تازيون خبرون

Daily Archives: October 8, 2016

شيوسينا نوازالدين صديقي کي مسلمان هجڻ جي ڪري رام ليلا ۾ ڪم ڪرڻ کان روڪي ڇڏيو

ممبئي (شوبز نيوز) ڀارتي انتها پسند تنظيم شِو سينا جي مسلمانن سان وير سڀني جي اڳيان اچي ويو آهي ۽ هاڻي هنن بالي ووڊ جي اداڪار نوازالدين صديقي کي رڳو ان ڪري رامائڻ تي ٺهندڙ اسٽيج ڊرامي ليلا رام ۾ ڪم کان ڪرڻ کان روڪيو آهي ڇو ته هو مسلمان آهي.بالي ووڊ ۾ 50 کان وڌيڪ فلمن ۾ ڪم ڪندڙ نواز الدين رياست اتر پرديش جي علائقي ٻڌانا ۾ پنهنجي ننڍپڻ جي خواهش کي عملي طور پورو ڪرڻ لاءِ رام ليلا جي اسٽيج تي پهتو ته شيو سينا جي غنڊن جي سخت احتجاج تي کيس رام ليلا ۾ ڪم ڪرڻ کان روڪيو ويو.

 

ڳائڻي طاهر شاهه جو گيت“اينجل” آمريڪي اپيڪس ايوارڊ لاءِ چونڊجي ويو

ڪراچي (شوبز نيوز) پنهنجي ڌار انداز ۾ ڳايل گيت جي ڪري ٿوري ئي وقت ۾ پاڪستان جي شوبز نگري ۾ نالو ڪمائيندڙ ڳائڻي طاهر شاهه کي ڪير نٿو سڃاڻي،سندس گيت نه رڳو سماجي رابطن وارين ويب سائيٽن تي  مشهور ٿيو پر ڀارتي اداڪارن به انهن کي گهڻو ساراهيو ۽ پنهنجي فلمن ۾ سندس گيتن کي رکيو ويو. هاڻي اها خبر آئي آهي ته طاهر شاهه جي ڳايل گيت اينجل کي ايپڪس ايوارڊ لاءِ چونڊيو ويو اهي.

 

لاڳيتو ڇهه ڀير ا بال کي ڄاري ۾ وجهڻ جو عالمي رڪارڊ

چين (اسپورٽس نيوز) هونئن ته دنيا ۾ ڪيترائي رانديگر رند جي ميدان ۾ پنهنجي اهليت مڃرائيندا آهن ۽ شهرت به ماڻيندا آهن پر چين سان تعلق رکندڙ باسڪٽ بال جي هڪ رانديگر لاڳيتو 6 ڀير بال کي ڄاري ۾ وجهي عالمي رڪارڊ جوڙي ڇڏيو آهي.چيني صوبي شان ڪشي جي هڪ اسٽيڊيم ۾ باسڪٽ بال جي رانديگر زو چينگ ڪنگ وڏي مهارت سان اهو ڪارنامو ڪري ڏيکاريو۽ پنهنجو نالو گينز بڪ آف ورلڊ رڪارڊ ۾ لکرايو.

 

پاڪستان ڪرڪيٽ بورڊ رانديگرن ۽ آفيسرن لاءِ ڌار قانون بڻائي ڇڏيو

ڪراچي (اسپورٽس نيوز) پي سي بي رانديگر ۽ آفيسرن لاءِ ڌار ڌار قانون بڻائي ڇڏيو،هڪ پاسي اصولن جي ڀڃڪڙي جي نالي تي عمر اڪمل ۽ احمد شهزاد کي ڊگهي وقت کان ٽيم کان پري رکيو ويو،ٻئي پاسي ماٺ ۾ “اسڪ ينڊل واري ڪمري ۾ اڳوڻي بالنگ ڪوچ مشتاق احمد کي ڪلين چٽ ڏني وئي،ٽيم کي سيريز وقت يو اي اي ۾ ڇڏي ويندڙ مينيجر وسيم باري کي به ڪجهه نه چيو ويو.بورڊ اصولن جي پابندي نه ڪرڻ واري الزام ۾ احمد شهزاد ۽ عمر اڪمل کي ٽيم کان پري ڪيو،عمر گهڻي وقت کان ٽيم کان ٻاهر رهڻ کانپوءِ جڏهن هاڻي واپس موٽيو آهي ته نوجوان رانديگرن  ان جي جڳهه وٺي ڇڏي هئي، هو پوري يو اي اي ۾ رڳو هڪ بال ئي کيڏي سگهيو،اهڙي طرح احمد شهزاد کي ۽ هاڻي وارم اپ ميچ ۾ اهليتن جي اظهار جو موقعو مليو اٿس.

 

ڪراچي مان هٿ ڪيل خطرناڪ هٿيار!: ارشاد ڪاغذي

ڪالهه ڪراچي پوليس ڪارروائي ڪندي نيٽو هٿيار هٿ ڪري ورتا. ڪراچي پوليس جي تاريخ ۾ سڀ کان وڏي هٿيار هٿ ڪرڻ جي ڪارروائي، عزيزآباد مان نائين زيرو جي ملڪيت ڄاڻايل جاءِ مان نيٽو هٿيار هٿيڪا ڪري ورتا. ايڊيشنل آءِ جي مشتاق مهر پوليس هيڊ ڪواٽر ۾ پريس ڪانفرنس ڪندي ٻڌايو ته هٿيار هڪ سياسي پارٽي جي آفيسن مان هٿ آيا آهن. نائين زيرو ۽ ڀرپاسي مان نيٽو جا هٿيار هٿ اچڻ کانپوءِ ان ۾ ملوث پارٽي جو نالو وٺڻ جي ضرورت ناهي. ايڊيشنل آءِ جي پوليس سنڌ جو اشارو ايم ڪيو ايم ڏانهن هو. ڇاڪاڻ ته جتان هٿيار هٿ آيا آهن، اها ان جي ملڪيت ڄاڻائي وڃي ٿي. تنهن ڪري ان ۾ ڪو ابهام ناهي ته اهي هٿيار ٻي ڪنهن جا هئا پر ايڊيشنل آءِ جي ايم ڪيو ايم کي ملوث ڄاڻائي ٿو. هن تفصيل ٻڌائيندي چيو ته اربع جي ڏينهن صبح جو 5 وڳي عزيزآباد ۾ گھر تي ڇاپو لڳايو ويو، جتي پاڻيءَ جي ٽينڪي مان هٿيار هٿ ڪيا ويا. هٿيارن ۾ 84 آر پي جي راڪيٽس، 85 آر پي جي فيوز، 10 هزار رائيفل گرنيڊ، 200 هيڊ گرنيڊ، 10 جي ٿري، 11 سيون ايم ايم، هڪ ايم 16، 39 ايل ايم جيز، 39 ايل ايم جيز، 9 آر پي جيز سيون، 82 ايس ايم جيز، 11 اينٽي ايئر ڪرافڪٽ گنز، 12 سيون ايم ايم گنز، ۽ مختلف قسمن جون ساڍا 6 لک گوليون شامل آهن. ان کان علاوه بلٽ پروف جيڪٽون ۽ هيلمٽ به شامل آهن. هن وڌيڪ ٻڌايو ته اهي هٿيار 9 ۽ 10 محرم الحرام تي دهشتگردي جي وارداتن ۾ استعمال ڪرڻا هئا، پوليس بروقت ڪارروائي ڪري محرم ۾ ٿيندڙ دهشتگردي کي ناڪام بڻائي ڇڏيو. سنڌ پوليس جي اهڙي ڪارروائي کي ساراهڻ ضروري آهي، جو هن ڪراچي ۾ ٿيندڙ ملڪ دشمن ڪارروائيءَ کي بروقت ٻنجو ڏئي خونريزي ٿيڻ کان ڪراچيءَ جي عوام کي بچائي ورتو. آءِ جي سنڌ پاران هٿيار هٿ ڪندڙ پوليس پارٽي کي 10 لک انعام جو اعلان ڪيو آهي. اسان سنڌ پوليس جي انهن جوانن کي سلام پيش ڪريون ٿا. شاباش، لک شاباشون پوليس جي جوانن لاءِ!

ياد رهي ته نيٽو جا 19 هزار ڪنٽينرز مان هٿيار چورايا ويا هئا پر ان وقت جي حڪومتن سياسي مصلحت خاطر ڪنهن به قسم جي ڪارروائي کان ڪيٻايو هو ۽ هي هٿيار ڪراچي ۾ استعمال ٿيندا رهيا. چون ٿا ته 12 مئي جي واقعي ۾ به اهي هٿيار استعمال ڪيا ويا ۽ ڪراچي ۾ قتلام ڪيو ويو هو. اهڙو انڪشاف ڪراچي پوليس جي هڪ تازو رٽائرڊ ٿيل پوليس آفيسر نالو نه ظاهر ٿيڻ جي شرط تي ڪيو آهي. ان سلسلي ۾ پرنٽ ميڊيا ۾ رپورٽ پڌري ٿي آهي، جيڪا ان پوليس آفيسر جي انڪشاف تي مشتمل آهي ته بابر غوري جڏهن شپنگ جو وزير هو، ان وقت نيٽو جا هٿيار چوري ٿيا هئا. حڪومت جاچ شروع ڪئي ۽ اهو بنا نالي پوليس آفيسر به جاچ ۾ شامل ڪيو ويو. هو ٻڌائي ٿو ته جڏهن جاچ ڪئي وئي ته تصديق ٿي ته ڪنٽينرز چوري ٿيا آهن، جن جا نمبر ۽ هٿيارن جا تفصيل گڏ ڪري سرڪار کي ڏنا ويا. پر حڪومت جي دٻاءَ تي ڪيس کي ختم ڪيو ويو، جنهن ۾ آمريڪا جي مداخلت هئي ته جيئن بدنامي کان بچي پئي. هن آفيسر هڪ نئين ڳالهه ۽ انڪشاف ڪيو آهي. بقول هن جي ته جاچ دوران پتو پيو ته اصل ۾ اهي هٿيار چوري نه ڪيا ويا هئا پر بابر غوري ۽ پورٽ جي انتظاميا ۽ عملي جي ملي ڀڳت سان اهي هٿيار منتقل ڪري انهن کي ڏنا ويا هئا ۽ ان ۾ آمريڪا پاڻ به ملوث هو. مشرف جي دور حڪومت ۾ مفاهمتي پاليسي ۽ خاص مقصد تحت اهو ڪيس ختم ڪيو ويو. آفيسر جي چوڻ موجب اهي هٿيار ڪراچي جي مختلف خوني وارداتن ۽ خاص ڪري 12 مئي جي رتوڇاڻ ۾ به استعمال ۾ آندا ويا.

آگسٽ يا سيپٽمبر 2013ع ۾ سنڌ رينجرس جي ڊي جي ميجر جنرل رضوان اختر سپريم ڪورٽ کي آگاهي ڏيندي چيو هو ته نيٽو جا ڪيترائي ڪنٽينرز ڪجهه سال اڳ هٿيارن سوڌو گم ٿي ويا هئا، انهن جي ڪا خبر چار ناهي پئجي سگهي. جڏهن ميڊيا ۾ آمريڪا جي هٿيارن جي چوري بابت خبرون شايع ٿيون ته آمريڪا جي سفارتخاني پاران ميڊيا جي رپورٽ جو ترديدي بيان شايع ٿيو هو، جنهن ۾ سفارتخاني چيو هو ته ايساف يا نيٽو جي هٿيارن جي چوري ڪانه ٿي آهي. انهن رپورٽن کي رد ڪندي آمريڪي سفارتخاني جو هڪ بيان جاري ڪندي چيو ويو هو ته اهي خبرون ڪوڙيون ۽ گھمراهه ڪندڙ آهن. بيان ۾ چيو ويو هو ته ”آمريڪا معمول موجب ملٽري ۽ سفارتي ترسيل لاءِ ڪراچي بندرگاه استعمال ڪندو آهي، نه آمريڪا ۽ نه ئي وري ايساف ڪراچي بندرگاه جي ذريعي هٿيار يا گولا بارود موڪليو آهي.“ هن بيان مان اوهان اندازو لڳائي سگھو ٿا ته آمريڪا ڳالهه کي لڪائڻ جي ڪوشش ڪئي ٿي. جڏهن ته هر ڪو ڄاڻي پيو ته هٿيار چوري ٿيا آهن پر جڏهن پوليس جو آفيسر جيڪو چوريءَ جي جاچ ڪري رهيو هو، ان جي چوڻ مطابق ته ڪنٽينرز چوري نه پر راضي خوشيءَ سان ڪراچي جي هڪ سياسي جماعت جي عسڪري ونگ جي حوالي ڪيا ويا هئا. ان جو مطلب ته ڪراچي ۾ جيڪا بدامني ٿئي پئي تنهن ۾ ٻاهرين قوتن جو هٿ هو ۽ آمريڪا ان ۾ اهم ڪردار ادا ڪيو. ان کان علاوه اهي خبرون پيون ته ان سياسي جماعت کي ”را“ پڻ فوجي سکيا، تربيت، هٿيار ۽ پئسا ڏوڪڙ ڏيندي رهي آهي، جنهن بابت مصطفيٰ ڪمال ۽ ايم ڪيو ايم جا منحرف اڳواڻ ان قسم جي تصديق ڪندا رهن ٿا.

هينئر جڏهن ڪراچيءَ مان وڏي تعداد ۾ هٿيار، گوليون ۽ گولا بارود جو وڏو ذخيرو هٿ ڪيو ويو آهي ۽ اهي هٿيار ايڊيشنل آءِ جي سنڌ پوليس چواڻي ته محرم ۾ استعمال ڪري ڪراچيءَ ۾ بدامني ۽ رتوڇاڻ ڪري هڪ دفعو ٻيهر ڪراچيءَ کي دهشتگردن جي رحم ڪرم جي حوالي ڪري ملڪ جي سلامتيءَ کي نقصان پهچائڻ جي ناپاڪ سازش سِٽي وئي هئي ۽ سنڌ پوليس بروقت ڪارروائي ڪري ڪراچيءَ کي بچائي ورتو. عزيزآباد جي گھر تي ڇاپو هڻي ايم ڪيو ايم جي ملڪيت واري آفيسن ۾ جيڪي هٿيار هٿ ڪيا ويا، اهي پنهنجي نوعيت جا حساس ۽ موتمار هئا ۽ اهي محرم جي مقدس مهيني ۾ استعمال ڪري مذهبي، لساني ۽ فرقيواريت جي نفرت کي وڌائڻ جي سازش هئي. اهي هٿيار جيڪي هٿ ڪيا ويا آهن، اهي ته بنهه ٿورا آهن، انهن جي ذري پتي جيترا آهن ۽ هڪ سيڪري جي برابر به ناهن جيڪي ڪراچيءَ اندر ٻُڌايا وڃن ٿا. صولت مرزا ۽ ٻين ڏوهارين جي نشاندهي تي سنڌ پوليس ۽ رينجرس جيڪي ڪاروايون ڪيون آهن، انهن جي ڪري سوين دهشتگرد گرفتار ٿيا آهن ۽ انهن خود باسيو آهي. ايم ڪيو ايم جي سربراه پاڪستان خلاف جيڪي نعرا هنيا ۽ دشمن ملڪ کان مدد وٺڻ لاءِ جيڪي ڳالهيون ڪيون، ان مان صاف ظاهر ٿو ٿئي ته هو ملڪ دشمنن جي چوڻ تي هلن پيا. ۽ هينئر جڏهن هنن جي آفيسن ۽ جڳهن تان جيڪي موتمار هٿيار هٿ ڪيا ويا ويا آهن، انهن جي ڪري اها ڳالهه ظاهر ٿي وئي آهي ته هو غير ملڪي ايجنڊا تي ڪم ڪري رهيا آهن. هن وقت جڏهن ملڪ تي جنگ جا ڪارا بادل ڇانيل آهن ته دهشتگرد ڪراچي ۾ قتل عام ۽ ڏڦيڙ پيدا ڪري پاڪستان کي غيرمستحڪم ڪرڻ جون ڪوششون ڪرڻ وارا هئا پر پوليس جي بروقت ڪارروائي جي ڪري ڪراچي خونريزي کان محفوظ رهي.

اوهان کي ٻڌائيندو هلجي ته 2015ع جي شروعات ۾ ڪسٽم جي انٽيليجنس جي عملدارن ڪراچي شهر جي مختلف علائقن ۾ ڇاپا هڻي 400 کان وڌيڪ آمريڪي ڪنٽينرز هٿ ڪيا هئا. ڪسٽم جي اهلڪارن نجي ۽ ذاتي جڳهين، فارمن، واڙن، ڀينس ڪالوني، ماڙيپور ۽ ٻين هنڌن تي ڇاپا لڳائي اهي ڪنٽينرز هٿ ڪيا جن ۾ سرون، سريا ۽ سيمينٽ ۽ ان جا بلاڪ ڀريل هئا ۽ اهي موتمار هٿيار هٿ ٿي نه سگھيا. ڪسٽم جي حڪام مطابق ته ٻن ڪنٽينرز ۾ هيليڪاپٽر جا اسپيئر يا فاضل پرزا ۽ ٻيا ايٽم هٿ ٿي سگھيا. اها ڪارروائي سپريم ڪورٽ ۾ هلندڙ ڪراچي بدامني ڪيس جي ڪري ڪئي وئي هئي. ان وقت جي چيف جسٽس ميان افتخار چوڌري پاڻ مرادو نوٽيس وٺندي تحقيقات جو حڪم ڏنو هو. ان سلسلي ۾ سوين شڪي ڏوهارين کي گرفتار ڪيو ويو هو ۽ انهن جا ڪيس مختلف عدالتن ۽ احتساب عدالت ۾ پڻ هليو ۽ ڪيترن بيگناهن کي عدالت آزاد پڻ ڪيو هو. پر وقت جي حڪومتن ۽ ايم ڪيو ايم جي زور بار تي آمريڪي ڪنٽينرس جي ڪيس کي چڱي نموني ڪونه هلايو ويو ۽ سياسي مصلحتن جي ڪري ملڪ کي هڪ اهڙي آڙاهه ۾ وڌو ويو، جنهن جو نقصان ڪراچي ۾ بدامني جي صورت ۾ ظاهر ٿيو. ڪراچي ۾ مشرف توڙي پيپلز پارٽي جي دور ۾ ايم ڪيو ايم اڇي ڪاري جي مالڪ هئي. ڪراچي هن کي حق ملڪيت طور ڏني وئي هئي. ڪراچي ۾ جيڪي سنگين ڏوهه ٿيا، انهن ۾ 12 مئي، 22 مئي، بينظير ڀٽو تي حملو، بلديا فيڪٽري کي باهه ۽ ٻين وارداتن ۾ ايم ڪيو ايم کان ڪوبه پڇاڻو نه ڪيو ويو. جنهن ڪري ڪراچيءَ جي صورتحال تمام سنگين ٿي وئي، جنهن کانپوءِ آپريشن جي نتيجي ۾ سندن ڏوهه ظاهر ٿيا ۽ ايم ڪيو ايم جا لاڳاپا را سان ڳنڍيا ويا پر پوءِ به ايم ڪيو ايم کي بچائڻ جا وس ڪيا ويا ۽ هن تي بندش نه لڳائي وئي ۽ مائينس الطاف حسين جي ٿيوري ذريعي ايم ڪيو ايم جي جان آجي ڪئي وئي. هينئر جڏهن اهي غير ملڪي هٿيار مليا آهن ته سرڪار تي واجب آهي ته اها ملڪ دشمن قوتن خلاف قانون مطابق ڪارروائي ڪري ۽ ملڪ دشمن عناصر کي سخت کان سخت سزا ڏئي.

****

 

مرزا گروپ کي ٽوڙڻ لاءِ ٿيل ناڪام ڪوششون ۽ واپسي جا کُلندڙ در: نور سنڌي

اسان جي معاشري ۾ هڪ پهاڪو آهي ته ”چڙهيل جو سڀ ڪو، پر ڪريل جو ڪو به ناهي“ اهو پهاڪو ڪنهن حد تائين صحيح به ڏسڻ ۾ اچي ٿو. اهي حقيقتون به آهن ته اسان پنهنجون اصولي روايتن کان هٽي ويا آهيون، اسان وٽ مفاد پرستي وارو رجحان تيزيءَ سان وڌي رهيو آهي پر ان چوڻي ته سنڌ گدڙن نه کاڌي آهي وانگر سڄو معاشرو اهڙو به نه آهي. ان جو مثال بدين ضلعي جو آهي، جتي ذوالفقار مرزا پنهنجي يار آصف علي زرداري سان ڪيترن ئي ڳالهين تي اختلاف ڪري بغاوت جو جهنڊو هٿ ۾ کنيو ۽ ڏسندي ئي ڏسندي اها ياري اختلافن ۾ بدلجي وئي. شروع ۾ ڪوششون ڪيون ويون ته ذوالفقار مرزا کي ان راهه تان هٽائجي پر مرزا اصولن تي سوديبازي نه ڪندي پنهنجي ڳالهين تي اٽل رهي سنڌ جي گهرو وزارت کي قربان ڪري ڇڏيو ۽ پ پ دور ۾ پنهنجي پارٽي جي حڪومت خلاف ميدان ۾ لهي آيو. ذوالفقار مرزا پاران پ پ ڇڏڻ بعد پ پ قيادت دعويٰ ڪئي ته سندس حيثيت پ پ جي ڪري آهي، پارٽي کانسواءِ هن جي ڪا به حيثيت نه آهي، پر گذريل بلدياتي چونڊن ۽ گولاڙچي جي ننڍي چونڊ ۾ ذوالفقار مرزا ثابت ڪري ڏيکاريو ته بدين ضلعي جي عوام ساڻس گڏ آهي. سنڌ جون ساڃاهه وند ڌريون چون ٿيون ته جڏهن هاڻ پ پ شهيد ڀٽو ۽ شهيد راڻي واري نه آهي ته ان صورتحال ۾ چونڊن ۾ ماڻهو پنهنجي ڪردار ۽ شخصيت ذريعي ڪاميابي ماڻي آهي. ذوالفقار مرزا جا آصف زرداري سان اختلاف مفاهمتي پاليسي تحت حڪومت ۾ شريڪ ڪرڻ ۽ سندن ناجائز مطالبا مڃڻ تان پ پ جي نظرياتي اڳواڻن، ڪارڪنن کي نظرانداز ڪرڻ تان شروع ٿيو. ذوالفقار مرزا گهرو وزير جي حيثيت سان ڪراچي ۽ سنڌ جي ٻين وڏن شهرن ۾ امن ڪرائڻ ۽ دهشتگردن خلاف آپريشن ڪرائڻ چاهيو ته مفاهمتي پاليسي تحت آصف زرداري کيس ائين ڪرڻ نه ڏنو ۽ ان تان ٻه جگري يار جدا ٿي ويا. ان بعد ۾ مرزا پ پ ۾ رهيو ۽ چيو ته پ پ ڪنهن جي جاگير نه پر شهيدن جي پارٽي آهي.

2013ع  جي چونڊن ۾ آپا فهميده مرزا ۽ حسنين مرزا کي پ پ پاران ٽڪيٽ ڏني وئي ۽ هنن ڪاميابي ماڻي پر بعد ۾ کين ترقياتي ڪمن ۾ نظرانداز ڪرڻ، آفيسرن پاران عوام جا ڪم نه ڪرڻ ۽ بعد ۾ مرزا جي ويجهن ۽ حمايتين کي ڪوڙن ڪيسن ۾ گرفتار ڪيو ويو ته مرزا ڊي ايس پي آفيس پهچي جذباتي ٿي مڪ سان شيشو ٽوڙيو ۽ ان ڳالهه کي ڳالهوڙو بڻائي مرزا ۽ سندس ساٿين خلاف ڪيس داخل ڪري مرزا فارم جو پوليس گهيرو ڪري کيس گرفتار ڪرڻ جي ڪوشش ڪئي. ڪيترائي ڏينهن پوليس جو گهيرو جاري رهيو، بعد ۾ آپا فهميده مرزا جي اچڻ تي گهيرو ختم ٿيو ۽ مرزا ضمانتون ڪرايون. پ پ جي اهڙي عمل سان ذوالفقار مرزا نه صرف بدين ضلعي پر سڄي سنڌ ۾ هيرو ٿي ويو ۽ سنڌ جا ڪيترائي ساڃاهه وند ماڻهو مرزا گروپ ۾ شامل ٿيا. تازو بدين ضلعي جي مختلف شهرن ڳوٺن ۾ صحافي دوستن سان تعزيتون ڪرڻ لاءِ وڃڻ ٿيو ۽ اتي صحافين ۽ ٻين ساڃاهه وند ڌرين سان ڪچهريون ٿيون، جن مان ظاهر ٿيو ته اڄ هن ڏکئي دور ۾ آپا فهميده مرزا، حسنين مرزا جون ترقياتي اسڪيمون روڪيون ويون آهن، جتي سندن ۽ ذوالفقار مرزا جا آفيسر هنن جا جائز ڪم ڪرڻ لاءِ تيار نه آهن، ان جي باوجود بدين ضلعي جي عوام جي اڪثريت هنن سان گڏ آهي. اڄ به ذوالفقار مرزا ضلعي جي عوام جي دلين جي ڌڙڪن بڻيل آهي، اڄ به هو عوام جي دلين تي راڄ ڪري ٿو. ضلعي بدين جون ساڃاهه وند ڌريون ٻڌائين ٿيون ته بدين ضلعي ۾ مرزا جي ڪري پ پ ۾ حيثيت ٺاهيندڙ ڪمال چانگ، نادر خواجه، محمد نواز چانڊيو، عزيز ميمڻ ۽ ٻين کي پ پ قيادت پاران ضلعي بدين جو جهڙوڪر بي تاج بادشاهه بڻايو ويو آهي. نادر خواجه کي سنڌ جي وڏي وزير جو صلاحڪار بڻايو ويو آهي ته ذوالفقار مرزا جي بدين ضلعي ۾ وڌندڙ حيثيت کي ختم ڪرايو وڃي، ڪيئن به ڪري سندس گروپ کي ٽوڙيو وڃي، پر هن وقت تائين ذوالفقار مرزا جي اهميت، مقبوليت، حيثيت کي ذري برابر به هو گهٽائڻ ۾ ڪامياب نه ويا آهن. پ پ جي اڳوڻي حڪومت ۾ آپا فهميده مرزا پاران ورڪرن لاءِ رڪشا منظور ڪرايا ويا، پر ذوالفقار مرزا جي بغاوت بعد اها اسڪيم روڪي وئي ۽ هاڻ اهي 400 رڪشا ورهايا ويا آهن پر رڪشا ورهائڻ وارو عمل پ پ ضلعي قيادت کي ڪنڌ ۾ پئجي ويو آهي. روزانو بدين ضلعي ۾ پ پ جا جيالا احتجاج ڪري ڊي سي، اسسٽنٽ ڪمشنرن ۽ پ پ قيادت تي پنهنجا نوازڻ جا الزام هڻي احتجاج ڪري رهيا آهن. اهڙي عمل سان بدين ضلعي اندر پ پ ۾ جيالن جا ضلعي قيادت سان اختلاف وڌي ويا آهن ۽ پ پ جا ناراض جيالا مرزا گروپ ۾ شامل ٿيڻ لاءِ تيار ٿي ويا آهن. ذوالفقار مرزا جو تعلق حيدرآباد سان به آهي. مشهور محقق، اديب مرزا قليچ بيگ جي خاندان جو چشم چراغ ذوالفقار مرزا شاگردي دور ۾ شهيد ذوالفقار علي ڀٽو جي شخصيت کان متاثر ٿي پ پ سان وابسته ٿيو، پر سياست کان پري رهيو. 88ع ۾ بدين ۾ شگر مل لڳائڻ بعد اتان جي ماڻهن سان سندن تعلقات وڌيا. 93ع وارين چونڊن ۾ جڏهن مير مرتضيٰ ڀٽو بدين ضلعي جي اين اي 225 تان فارم ڀرايو ته ضلعي مان ڪو به پ پ اڳواڻ سندس سامهون فارم نه ڀرايو ته بينظير ڀٽو ۽ آصف علي زرداري جي گڏيل صلاح سان ذوالفقار مرزا کي ٽڪيٽ ڏني وئي ۽ هن ڪاميابي ماڻي، ان بعد مختلف تڪن تان چونڊ وڙهندي ايم پي اي رهيو ۽ قومي اسيمبلي جي سيٽ سندس وني آپا فهميد مرزا کي ڏني وئي ۽ اڄ تائين ان سيٽ تان پاڻ ڪاميابي ماڻيندي رهي آهي. آپا فهميده مرزا ذهين، ٻاجهاري ۽ سنجيده سياستدان آهي، پاڻ پ پ جي گذريل دور ۾ قومي اسيمبلي جي اسپيڪر به رهي. آپا فهميده مرزا ۽ ذوالفقار مرزا تي ڪڏهن به ڪرپشن جو الزام نه لڳو. هنن روايتي سياستدانن وانگر سياست مان مال نه پر عزت ٺاهي آهي. هنن تي ڪڏهن به پنهنجا نوازڻ جا الزام به نه لڳا آهن. هنن جي ڪوششن سان ماضيءَ ۾ بدين ضلعي ۾ رڪارڊ ٽوڙ ترقياتي ڪم ٿيا. هزارين ماڻهن کي ميرٽ تي نوڪريون ڏنيون ويون. هو بدين ضلعي جي عوام جا بنيادي مسئلا حل ڪرڻ جي ڪوشش ڪندا رهيا آهن. ذوالفقار مرزا لاءِ مشهور آهي ته هو بااصول آهي. اصولن تي ڪنهن به صورت ۾ سوديبازي نه ڪندو آهي. انتهائي جذباتي، سندس دوستي به کليل ته دشمني ۾ کليل رهندي آهي. يارن جو يار رهيو آهي سندس پ پ ۾ قربانيون آهن. ايم ڪيو ايم لاءِ هن بار بار چيو ته ان ۾ را جا ايجنٽ آهن، پر مفاهمتي پاليسي جي ڪري اکيون ٻوٽي ويهي رهڻ واري پ پ قيادت اڄ ذوالفقار مرزا جون ڪيل ڳالهيون اکين سان ڏسي ۽ ڪنن سان ٻڌي رهي آهي. الطاف حسين اصل اوقات تي اچي پاڪستان مرده آباد جا نعرا هنيا ۽ سندس حمايتين ان تي لبيڪ ڪيو، پر الطاف جي اهڙي ڪريل ۽ ملڪ دشمن حرڪت تي جڏهن محب وطن عوام احتجاج ڪيو، پاڪ فوج ۽ حڪمرانن نوٽيس ورتو ته ايم ڪيو ايم جي قيادت ڊرامابازي ڪندي ايم ڪيو ايم لنڊن سان واسطو ختم ڪرڻ جو اعلان ڪندي پاڻ کي بچائڻ جي ڪوشش ڪئي. ذوالفقار مرزا پ پ جي واڳ ڌڻين تي جيڪي ڪرپشن جا الزام هنيا اهي به سچ ثابت ٿي رهيا آهن. ذوالفقار مرزا پ پ ڇڏڻ بعد به تقريرن ۾ ذوالفقار علي ڀٽو، محترمه بينظير ڀٽو جو پاڻ کي جانثار سڏائي ٿو. جڏهن ته ڪراچي ۽ بدين ۾ مرزا فارم جي ڪمرن ۾ لڳايل شهيد ڀٽو، شهيد راڻي جا قدآور فوٽو ۽ سندس آصف علي زرداري سان نڪتل فوٽو هٽايا نه آهن. هن وقت ذوالفقار مرزا بغاوت ڪرڻ واري وقت ۽ بلدياتي چونڊن وقت جيان سرگرم نه آهي پر اڄ به ڪنهن به فورم تي تقريرون يا ڳالهيون کريون ڪري ٿو. اڄ به هو آصف زرداري خلاف کريون ڳالهيون ۽ ميڊم فريال ۽ ٻين وزيرن مشيرن تي ڪرپشن جا کليا الزام لڳائي دليلن سان سچ ثابت ڪرڻ جي ڪوشش ڪري ٿو. سندس بغاوت جو علم کڻڻ بعد پ پ قيادت جي ڪجهه ڌرين مرزا کي واپس پ پ ۾ آڻڻ ۽ آصف زرداري سان سرچاءُ ڪرائڻ جون به انڊر گرائونڊ ڪوششون ڪيون، پر اهي ڪامياب نه ويون. هن وقت اهي به ڳالهيون گردش ۾ آهن ته بلاول ڀٽو زرداري جي خواهش آهي ته ذوالفقار مرزا سميت ناراض پ پ جي سينئر اڳواڻن سان ڳالهيون جاري رهن ۽ کين واپس پ پ ۾ آڻجي. بلاول جي اهڙي سوچ يقينن قابل تعريف آهي، پر مسئلي جو حل اهو آهي ته جيستائين پ پ کي شهيد ڀٽو، شهيد راڻي واري پارٽي بڻائي پ پ جي منشور مطابق نه هلايو ويندو، جيستائين ذوالفقار علي ڀٽو جي نعري ”طاقت جو اصل سرچشمو عوام آهي“ کي سمجهي عوام کي ان نظرئي سان نه ڏٺو ويندو ته پ پ جيڪا هاڻ سنڌ صوبي تائين وڃي بچي آهي، ايندڙ چونڊن ۾ جيڪڏهن پ پ مخالفن جو مضبوط اتحاد ٺهي ٿو ته پ پ سنڌ ۾ به حڪومت نه ٺاهي سگهندي.

ذوالفقار مرزا بابت اهي ڳالهيون به هلن پيون ته بلاول جا ساڻس خفيه رابطا ٿيا آهن ۽ ڳالهيون به ٿيون آهن پر مرزا پنهنجي اصول پرستي واري موقف تي قائم آهي، سندس وڏو شرط اهو آهي ته پ پ کي شهيد ڀٽو ۽ شهيد راڻي جي پارٽي طور هلايو وڃي ۽ ان مان فريال ٽالپر جي ڪنهن به قسم جي مداخلت ختم ڪئي وڃي. نظرياتي پ پ ورڪرن کي اهميت ڏني وڃي. ڪرپشن جو خاتمو آندو وڃي ۽ ان ۾ ملوث پارٽي اڳواڻڻ، وزيرن، مشيرن خلاف ڪارروايون ڪيون وڃن. اهو به چيو پيو وڃي ته اهي سمورا مطالبا تسليم ڪري بلاول جنهن ڏينهن مرزا فارم تي آيو ته مرزا واپس پ پ ۾ شامل ٿي ويندو.

****

 

 

 

پارليامينٽ جي گڏيل اجلاس ۾ پ پ ۽ ن ليگ آمهون سامهون….

پارليامينٽ جو گڏيل اجلاس پيپلزپارٽي ۽ مسلم ليگ (ن) جي جهيڙي جي ور چڙهي ويو، هڪٻئي تي سنگين قسم جي الزامن کانپوءِ معاملو خراب ٿي ويو، پيپلزپارٽي پاران جيڪو مودي جو يار آ غدار آ غدار آ جا نعرا، (ن) ليگ پاران پيپلزپارٽي تي سکن جون فهرستون ڀارت کي ڏيڻ جا الزام هنيا ويا جنهن تي  پيپلزپارٽي پاران بائيڪاٽ جي ڪوشش کي اسپيڪر ۽ راجا ظفر الحق معافي وٺي ناڪام ڪري ورتو، جڏهن ته مسلم ليگ (ن) ڪشمير معاملي کي ڇڏي ڪالاباغ ڊيم جي معاملي کي وچ ۾ آڻي ڇڏيو، جڏهن ته پشتون اڳواڻن چيو آهي ته مري اسين رهيا آهيون ۽ ننڊ پنجاب وارا ڪري رهيا آهن، پارليامينٽ جي گڏيل اجلاس کي خطاب ڪندي سينيٽر مشاهد الله خان چيو ته هتي وزيراعظم تي تنقيد ڪئي وڃي ٿي ته هن جنرل اسيمبلي کي خطاب ۾ ڀارتي ايجنٽ ڪلڀوشن ياديو جو نالو نه ورتو، پر ان جو نالو هر فورم تي ڏنو ويو آهي، نواز شريف ڪم وارو ماڻهو آهي ڀڀڪيون هڻڻ وارو نه آهي، اسان ته اهو به ڏٺو آهي ته سکن جو فهرستون ڀارتي انٽيلي جنس چيفس کي ڏنيون ويون ۽ بينظير ڀٽو جو فهرستون ڏيڻ تي ٿورو به مڃيو ويو، جيڪي ماڻهو پاڻ کي جمهوريت پسند چون ٿا انهن جو تماشو ڏسي وٺو ۽ انهن کي اهو ٻڌائڻو پوندو ته انهن کي اهي ٽپ ڏيڻ ڪنهن سيکاريا آهن، اسان ۾ ڳالهه ٻڌڻ جو حوصلو آهي توهان چئو ٿا ته 2018ع ۾ وزيراعظم پيپلزپارٽي جو هوندو ۽ نواز شريف جيل ۾ هوندو پر ٻڌي ڇڏيو ته 2018ع ۾ وزيراعظم نواز شريف ئي هوندو ۽ جيل ۾ ڪير هوندو ان جو فيصلو ڪري وٺو، جيڪي اڄ هتي گلو ڦاڙي ڳالهائي رهيا آهن اهي سنڌ وڃي پنهنجا جوش ڏيکارين، جيڪڏهن ڪرپشن ايئن هلندي رهي ته 2028ع ۾ پيپلزپارٽي کٽي نٿي سگهي، پاناما ۾نواز شريف جو نه پر بينظير ڀٽو نالو آهي، پاناما پيپرز جي 560 آف شور ڪمپنين مان 558 پيپلزپارٽي جي ماڻهن جون آهن،  هڪ سياسي پارٽي پارليامينٽ جي گڏيل اجلاس ۾ نٿي اچي، مون کي ان ڳالهه جي ڳڻتي آهي ته ان جي پارٽي اي پي سي ۾ شرڪت ڪئي ۽ ٽاڪ شوز ۾ به عمران خان گڏيل اجلاس ۾ شرڪت جي حامي ڀري ان کانپوءِ آخري وقت تي انڪار تي جاچ ڪرڻ گهرجي، پي ٽي آءِ جو اجلاس ۾ نه اچڻ ڳجهي ايجنڊا آهي، ان جي نه اچڻ جي مذمت ڪريون ٿا، پوري قوم وزيراعظم محمد نواز شريف جي قيادت ۾ ڪشميرين جي اخلاقي، سفارتي ۽ سياسي مدد جاري رکندي. ڪشمير مسئلي کي عالمي سطح تي اجاگر ڪرڻ جي لاءِ وزيراعظم جي هدايت تي اسان جا نمائندا پوري دنيا ۾ وڃي رهيا آهن ۽ اسان ڪشميرين جي هي خاطري ڪرايون ٿا ته ڪشمير جي مڪمل آزادي تائين پاڪستان جدوجهد جاري رکندو. مشاهد الله خان خطاب دوران پيپلزپارٽي جي ميمبرن جيڪو مودي جو يار آ غدار غدار آ جا نعرا هڻڻ شروع ڪري ڇڏيا ۽ ايوان ۾ ڊيسڪون وڄائڻ شروع ڪيون، جنهن تي سيد خورشيد شاهه چيو ته اسان ڪنهن کي به خراب ناهي چيو جنهن جي ماءُ ڪڏهن ڪشميرين جي لاءِ ريشم ۽ زيور ناهن پاتا هي انهن کي به غدارن ۾ شامل ڪري ڇڏين ٿا، اسان اسيمبلي ۾ گوڙ ڪري نئين دهلي کي ڪهڙو پيغام ڏيڻ ٿا چاهيون جيڪڏهن حڪومت چوي ٿي ته مخالف ڌر منهن تي ٽيپ هڻي ڇڏي ته اسان اهو ٿا ڪري ڇڏيون، هڪ پارٽي اڳ ۾ ئي بائيڪاٽ ڪيو آهي، اسان به وڃون ٿا اسان کي هتي گاريون ناهن ٻڌڻيون، اسان هليا ٿا وڃون جنهن تي قومي اسيمبلي جي اسپيڪر ۽ جماعت اسلامي جي سينيٽر سراج الحق کين روڪي ورتو، اسپيڪر چيو ته جنهن معاملي تي هي اجلاس گهرايو ويو آهي انهن خلاف وڙهڻ بدران اڄ اسان پاڻ ۾ وڙهي رهيا آهيون جنهن تي خورشيد شاهه چيو ته اسان به چاهيون ٿا ته ڪشمير جي معاملي تي متحد هجون پر هتي اسان تي ئي ڇوهه ڇنڊيا پيا وڃن، جنهن تي راجا ظفر الحق معذرت ڪندي چيو ته آئون توهان کان معافي وٺان ٿو جڏهن ته سينيٽر مشاهد الله خان چيو ته مون گار ناهي ڏني ڪنهن جي دل آزاري ٿي آهي ته معذرت چاهيان ٿو آئون جمهوري ماڻهو آهيان ڀڄڻ وارو ناهيان.