تازيون خبرون

Daily Archives: October 8, 2016

ڀارت ڪا سرجيڪل اسٽرائيڪ ناهي ڪئي، سرحدي ڀڃڪڙي ٿي ته ڀرپور ڪارروائي ڪبي: پاڪستان

اسلام آباد/دهلي(م.د/اين اين آءِ/اي پي پي)  ڀارتي جارحيت ۽ ڪشمير جي صورتحال تي گهرايل پارليامينٽ جو گڏيل اجلاس ٿي گذريو. گڏيل اجلاس ۾ ڀارتي جارحيت، ڪنٽرول لائين جي ڀڃڪڙي ۽ والاريل ڪشمير ۾ انساني حقن جي سنگين ترين ڀڃڪڙي خلاف مذمتي ٺهراءَ منظور ڪيو ويو. ٺهراءَ ۾ عالمي برادري کي ڀارتي ظلمن جو نوٽيس وٺڻ جو مطالبو ڪيو ويو آهي. متفقه ٺهراءَ ۾ چيو ويو آهي ته ڀارت طرفان پاڪستان ۾ سرجيڪل اسٽرائيڪ جي ڀارتي دعويٰ مذمت جوڳي آهي، ڪشمير عالمي طور تي تسليم ٿيل تڪراري علائقو آهي. پاڪستان ڪشميرين جي اخلاقي، سفارتي ۽ سياسي حمايت جاري رکندو. پرڏيهي صلاحڪار سرتاج عزيز طرفان پيش ڪيل ٺهراءَ ۾ برهان واني جي شهادت کان پوءِ والاريل ڪشمير ۾ ڀارتي فوج جي هٿان شهادتن جو ذڪر ڪندي ڀارت طرفان ظلم بند ڪرائڻ جو مطالبو ڪيو. ٺهراءَ ۾ ڀارت طرفان پاڻي کي بطور هٿيار استعمال ڪرڻ جي مذمت ڪندي ڪلڀوشن ياديو جو معاملو عالمي فورمن تي اٿارڻ جو به اعلان ڪيو. ٻئي طرف ڀارت ۾ مقرر پاڪستان جي هاءِ ڪمشنر عبدالباسط چيو آهي ته ڪنٽرول لائن تي ڀارت ڪا سرجيڪل اسٽرائيڪ ناهي ڪئي، ائين هجي ها ته پاڪستان ڀرپور جواب ڏي ها، اڳتي ڀارت ڪنٽرول لائن جي ڀڃڪڙي ڪئي ته ڀرپور جواب ڏينداسين. هڪ ڀارتي ميگزين کي انٽرويو ڏيندي پاڪستاني هاءِ ڪمشنر عبدالباسط چيو ته پاڪستان ڪڏهن به ڇڪتاڻ نه ٿو چاهي، برهان واني جي جنازي ۾ هزارين ڪشميرين شرڪت ڪري ڪشميرين جي آزادي واري جدوجهد کي وڌايو آهي. پاڪستان سمورا تڪرار ڳالهين ذريعي حل ڪرڻ چاهي ٿو، پر ولاريل ڪشمير تي پنهنجي اصولي موقف تي سوديبازي نه ڪندو. هن چيو ته 29 سيپٽرمبر تي ڪا سرجيڪل اسٽرائيڪ نه ڪئي وئي. ڀارت کي اختيار ناهي ته اهو ڪنٽرول لائن تي فائرنگ کي سرجيڪل اسٽرائيڪ جو نالو ڏي.  هن چيو ته پاڪستان کي پنهنجي ايٽمي ۽ عسڪري صلاحيتن تي مڪمل اعتماد آهي. ڀارت وڌيڪ ڀڃڪڙيون ڪيون ته پاڪستان جواب ڏيندو. هڪ سوال جي جواب ۾ عبدالباسط چيو ته هي پهريون ڀيرو ناهي جو سارڪ ڪانفرنس ملتوي ٿي. سندس چوڻ هو ته پاڪستان پاڻ دهشتگردي جو سڀ کان وڏو شڪار آهي. ڀارت هر دهشتگرد حملي جو الزام تڪڙ ۾ پاڪستان تي هڻي ڇڏي ٿو. صورتحال کي حقيقت پسنداڻي طريقي سان ڏسڻ جو وقت اچي ويو آهي. هن چيو ته پاڪستان پنهنجي زمين ڪڏهن دهشتگردي لاءِ استعمال ٿيڻ نه ڏيندو.

 

نواز شريف ۽ الطاف کي ڪڏهن غدار ناهي چيو، وزير اعظم پاناما ليڪس مسئلو جلد حل ڪرائي: بلاول

اسلام آباد(بيورو) پاڪستان پيپلزپارٽي جي چيئرمين بلاول ڀٽو زرداري چيو آهي ته نواز شريف ۽ الطاف کي ڪڏهن غدار ناهي چيو، وزير اعظم پاناما ليڪس مسئلو جلد حل ڪرائي. جي يو آءِ سربراهه مولانا فضل الرحمان سان ملاقات کانپوءِ ميڊيا سان ڳالهائيندي بلاول ڀٽو زرداري چيو ته ملاقات ۾ پاناما بابت مولانا کي درخواست ڪئي آهي ته سينيٽ ۾ پ پ سميت مختلف پارٽين بل پيش ڪيو هو ان تي نواز شريف کي سمجھائي ته اهو هن اشو کي جلد کان جلد حل ڪري. هن چيو ته انڪل الطاف کي ڪڏهن غدار ناهي چيو، هو ڪراچي جي سياسي حقيقت هو ۽ آهي. هن چيو ته مون نواز شريف کي به ڪڏهن غدار ناهي چيو. آئون هڪ چونڊيل وزيراعظم غدار چوڻ جو سوچي به نٿو سگھان. مون چيو هو ته مودي جي يار ڪو ايڪ ڌڪا اور ڪردو. هن چيو ته هڪ سوال جي جواب ۾ بلاول ڀٽو زرداري چيو ته مائنس ون ته اڳ به هلندو رهيو آهي، ڪڏهن به ڪير به مائنس ٿي سگھي ٿو. هن چيو ته منهنجي ناني کي به مائنس ڪيو ويو. منهنجي ماءُ، مامي مرتضيٰ ڀٽو ۽ شاهنواز ڀٽو کي به مائنس ڪيو ويو، اڄ هي چون ٿا ته زرداري کي مائنس ڪري ڇڏيو، سڀاڻي چوندا ته بلاول کي به مائنس ڪري ڇڏيو. مولانا فضل الرحمان سان اتحاد بابت سوال جي جواب ۾ بلاول ڀٽو زرداري چيو ته هاڻي ڏسڻو آهي ته مولانا صاحب اسان سان ڇا ٿو ڪري. ان موقعي تي بلاول ڀٽو زرداري وڌيڪ چيو ته مولانا فضل الرحمان منهنجو سينئر آهي، هن منهنجي پيءُ سان گڏ ڪم ڪيو آهي. مولانا فضل الرحمان هميشه جمهوريت لاءِ ڪم ڪيو آهي. مولانا سان گڏجي ڪم ڪرڻ چاهيون ٿا. مولانا ڪشمير ڪميٽي جو چيئرمين به آهي ان ڪري ڪشمير معاملي تي ڳالهايو آهي، اسان جي ملاقات ڪنهن خلاف ڪا سازش ناهي. ان موقعي تي جي يو آءِ سربراهه مولانا فضل الرحمان چيو ته بلاول ڀٽو زرداري سان ملاقات ڪري خوشي ٿي. ملڪي سالميت جي مسئلن تي گڏجي ڪم ڪندا آهيون.

 

مڇ ۾ ريلوي ڦاٽڪ تي ٻه ڌماڪا، 4 مسافر مارجي ويا، ڪيترائي زخمي

ڪوئيٽا (اين اين آءِ) بلوچستان جي شهر مڇ ۾ ريلوي ٽريڪ ۽ جعفرايڪسپريس جي گاڏن ۾ ڌماڪن جي نتيجي ۾ 4 ڄڻا فوت ۽ 10 زخمي ٿي پيا اطلاعن موجب بلوچستا جي علائقي مڇ ۾ ريلوي ٽريڪ ۽ بوگي ۾ ٻن ڌماڪن جي نتيجي ۾ 3 ڄڻا فوت ۽ 10 زخمي ٿيا واقعي کان پوءِ امدادي ٽيمون زخمين کي اسپتال منتقل ڪيو جتي ڪيترن جي ڳڻتي جوڳي حالت ٻڌائي ويئي آهي. پوليس موجب ڌماڪو جعفر ايڪسپريس جي بوگي ۽ ريلوي ٽريڪ تي ٿيو جنهن سبب ريلوي ٽريڪ مڪمل طور تي تباهه ٿي ويو. اسٽيشن ماسٽر موجب هڪ بم ريلوي ٽريڪ تي لڳل هو ۽ ٻيو بوگي جي اندر هو ڌماڪي کان پوءِ پوليس ۽ سيڪيورٽي ادارن علائقي کي گهيري ۾ آڻي ڌماڪي جي جڳهه تان شاهديون گڏ ڪرڻ شروع ڪري ڏنيون. ٽريڪ کي نقصان پهچڻ سبب ٻين ٽرينن جي آمدرفت ڪٽجي ويئي وزيراعظم نوازشريف جعفر ايڪسپريس ڌماڪن جي سخت لفظن ۾ مذمت ڪئي ۽ ڌماڪن ۾ فوت ٿيندڙن لاءِ مغفرت جي دعا ڪندي واسطيدار اختيارين کي هدايت ڪئي ته ڌماڪي جي ذميوارن کي پڪڙيو وڃي ۽ زخمين کي علاج جون بهتر سهولتون فراهم ڪيون وڃن. تحريڪ انصاف جي اڳواڻ عمران خان به ان بم ڌماڪن جي سخت لفظن ۾ مذمت ڪئي. گهرو وزير چوڌري نثار علي خان بلوچستان جي علائقي مڇ ۾ جعفر ايڪسپريس تي حملي جي سخت مذمت ڪئي آهي، گهرو وزارت طرفان جاري بيان ۾ گهرو وزير چوڌري نثار علي خان جمعي تي مڇ ۾ جعفر ايڪسپريس تي حملي واري واقعي کي ننديو آهي، هن ڌماڪي سبب قيمتي جانيون ضايع ٿيڻ تي گهري ڏک جو اظهار ڪيو آهي. وفاقي ريلوي واري وزير سعد رفيق پتوڪي ۾ ٽرين حادثو ۽ جعفر ايڪسپريس ۾ ٿيندڙ ڌماڪن جي سخت لفظن ۾ مذمت ڪندي چيو آهي ته ڌماڪي ۾ ملوث ماڻهن جو پيڇو ڪري رهيا آهيون ڪنهن کي به نه بخشيو ويندو ميڊيا سان ڳالهائيندي وفاقي وزير چيو ته ڪوئيٽا کان راولپنڊي ايندڙ جعفر ايڪسپريس ۽ مڇ ۽ آب ڪم جي وچ ۾ تخريبڪاري جو نشانو بڻايو ويو ڄاڻ موجب جعفر ايڪسپريس ۾ ڌماڪا ٿيا ٻيو ڌماڪو حلڪي نوعيت جو هو پهرين ڌماڪي ۾ 4 ڄڻا فوت 16 زخمي ٿي پيا ٽرين جي سيڪيورٽي جي حوالي سان وفاقي وزير چيو ته ان ٽريڪ تي ٽرين سيڪيورٽي ڪليئرنس جي بغير نه هلندي آهي گذريل ڏينهن انهيءَ علائقي مان هڪ دهشتگرد کي بم نسب ڪندي پڪڙيو ويو جنهن کان سيڪيورٽي ڪليئرنس ملڻ سواليه نشان آهي ۽ ان جي جاچ ڪئي پئي وڃي هن چيو ته اهو هڪ سنگل ٽريڪ آهي ۽ مينوئل طريقيڪار مان ڪم ورتو ويندو آهي سنگل جي ڪوتاهي ۾ جيڪڏهن ريلوي جو ڪوبه ملازم ملوث ڏٺو ويو ته ان جي خلاف به سخت ڪارروائي ڪئي ويندي.

 

حڪومت خطي جي عوام جي فائدن لاءِ اقتصادي تعاون ذريعي علائقائي مواصلاتي رابطن تي ڌيان ڏيئي رهي آهي: وزيراعظم

اسلام آباد (اين اين آءِ) وزيراعظم محمد نوازشريف چيو آهي ته حڪومت خطي جي عوام جي فائدن لاءِ اقتصادي تعاون جي ذريعي علائقائي مواصلاتي رابطن تي ڌيان ڏيئي رهي آهي آذربائيجان سان ٻطرفو دوستاڻو لاڳاپن کي اقتصادي ڀائيچاري ۾ آڻڻ جي ضرورت آهي هو جمعي تي آذربائيجان جي سفير علي علي زيدي سان وزيراعظم هائوس ۾ ڳالهائي رهيو هو وزيراعظم چيو ته پاڪستان مختلف شعبن ۾ آذربائيجان سان پنهنجن لاڳاپن کي وڌائڻ جي خواهش رکي ٿو هن چيو ته آذربائيجان سان ٻطرفو دوستاڻن لاڳاپن تي اقتصادي ڀائيواري ۾ آڻڻ جي ضرورت تي زور ڀريو. علي علي زيدي ان اعتماد جو اظهار ڪيو ته ٻنهي ملڪن وچ ۾ لاڳاپا گڏيل ڪوششن سان وڌيڪ بهتر ٿيندا.

 

آرمي چيف پاران پنجاب رينجرز هيڊ ڪوارٽر جو دورو، آپريشن جي تيارين تي اطمينان جو اظهار

راولپنڊي (اين اين آءِ) آرمي چيف جنرل راحيل شريف پنجاب رينجرز جي آپريشنل تيارين ۽ ورڪنگ بائونڊري ۽ بين الاقوامي سرحد تي چوڪسي جي سطح تي اطمينان جو اظهار ڪندي وطن لاءِ جان قربان ڪندڙ رينجرز جي شهيدن کي خراج عقيدت پيش ڪيو، آءِ ايس پي آر موجب چيف آرمي اسٽاف جنرل راحيل شريف پاڪستان رينجرز پنجاب جي هيڊڪوارٽر جو دورو ڪيو، آرمي چيف کي ڊي جي رينجرز ميجر جنرل عمر فاروق پاران فورس جي آپريشنل تيارين بابت بريفنگ ڏني وئي، پنجاب رينجرز جي آفيسرن ۽ جوانن کي خطاب ڪندي آرمي چيف جنرل راحيل شريف فوجين جي بلند جذبي، آپريشنل تيارين ۽ ورڪنگ بائونڊري انٽرنيشنل بارڊر سان گڏ فوجين جي چوڪسي کي ساراهيو ۽ شهيدن کي خراج عقيدت پيش ڪرڻ لاءِ يادگار شهدا تي گلن جي چادر چاڙهي.

 

ڪراس بارڊر فائرنگ شروع ٿيڻ کانپوءِ پاڪستان ۽ ڀارت جي ڊي جي مليٽري آپريشن فون تي ڳالهيون ڪيون هيون: ڊي جي آءِ ايس پي آر

راولپنڊي  (اين اين آءِ) ڊي جي آءِ ايس پي آر ليفٽيننٽ جنرل عاصم سليم باجوا چيو آهي ته ڪراس بارڊر فائرنگ شروع ٿيڻ کانپوءِ پاڪستان ۽ ڀارت جا ڊي جي مليٽري آپريشن فون تي ڳالهيون ڪيون، ڀارت لائين آف ڪنٽرول تي سيز فائر جي خلاف ورزي ڪري ڇڪتاڻ وڌائي، سرجيڪل اسٽرائيڪ جي ڪوڙي دعويٰ ڪري ان کانپوءِ ان کي ثابت ڪرڻ ڏکيو ٿي ويو آهي، ڀارتي فائرنگ سان 2 پاڪستاني فوج شهيد، 9 فوجي ۽ 8 سولين زخمي ٿيا، ڀارت جو به نقصان ٿيو آهي جنهن کي هو لڪائي رهيو آهي، پاڪستان سمورن پاڙيسري ملڪن سان پرامن پاليسي جي لاڳاپن جي خواهش رکي ٿو. پاڪستان ۽ ڀارت جي فوج ۾ هاٽ لائين سميت سمورا مواصلاتي چينل کلي ويا آهن، پاڪستان سرزمين دهشتگردن جي ڪا به پناهگاهه نه آهي، 2014 ۾ امن ڳالهيون ناڪام ٿيڻ تي طالبان ۽ ٻين هٿياربند گروپن خلاف آپريشن شروع ڪيو ويو جنهن ۾ هن وقت تائين 35 سئو عسڪريت پسند مارجي ويا، 992 ٺڪاڻا تباهه ڪيا ويا، پاڪستان جي سيڪيورٽي فورسز جا 546 اهلڪار شهيد ٿيا، 22 سئو 85 زخمي ٿيا، فوجي عدالتن مان 170 دهشتگردن کي موت جي سزا ٻڌائي وئي، قانوني مرحلا مڪمل ٿيڻ تي 12 جوابدارن کي ڦاهي ڏني وئي، ڊي جي آءِ ايس پي آر ليفٽيننٽ جنرل عاصم سليم باجوا چيني خابرو اداري کي ڏنل انٽرويو ۾ چيو ته اهو ڀارت ئي آهي جنهن 2003 جي سيز فائر جي خلاف ورزي ڪري ڇڪتاڻ وڌائي، ڀارتي فوج پاران لائين آف ڪنٽرول تي فائرنگ ڪري سيز فائر جي خلاف ورزي ڪئي وئي ۽ ڪجهه ڪلاڪن کانپوءِ هن سرجيڪل اسٽرائيڪ جي ڪوڙي دعويٰ ڪئي، هن چيو ته اسان هر شيءِ جو جائزو ورتو ۽ ڀارتي دعويٰ کي بلڪل غلط ثابت ڪيو، هن چيو ته ڀارت ڪوڙ ڳالهايو نه ته هو پنهنجي پيرن تي بيهڻ جي قابل ئي نه آهي، هاڻ هو پنهنجي دعوائن کي تبديل ڪري رهيو آهي، هن چيو ته ڀارتي فوج پاران پاڪستاني سائيڊ تي روزانو فائرنگ ڪئي پئي وڃي پر اربع تي سڀ کان وڌيڪ فائرنگ ڪئي وئي ۽ ڀارتي فوج ننڍن هٿيارن ۽ رائيفلن، مشين گنن ۽ مارٽرز سان اٽڪل 25 هزار فائر ڪيا، هن چيو ته لائين آف ڪنٽرول تي سخت فائرنگ ٿي رهي آهي، جيتري وڌيڪ فائرنگ ٿيندي صورتحال ايتري ئي وڌيڪ خراب ٿيندي، فوج جي ترجمان چيو ته ڀارت جو به جاني نقصان ٿيو آهي پر هو لڪائي رهيو آهي، هن چيو ته ان آپريشن دوران سوين شڪي ماڻهن کي گرفتار ڪيو آهي، فوجي عدالتن ۾ دهشتگردن خلاف ڪيسن بابت فوج جي ترجمان ٻڌايو ته فوجي عدالتن پاران 166 ڪيس حتمي شڪل ۾ اچي چڪا آهن، 107 دهشتگردن کي موت جي سزا ٻڌائي وئي آهي، جڏهن ته 12 ڏوهارين کي سمورن قانوني مرحلن جي مڪمل ٿيڻ تي ڦاهي ڏني وئي آهي.

 

وڏي وزير شاهه ڊرگس کاتي جي ڊائريڪٽر ڊاڪٽر قيصر کي برطرف ڪري ڇڏيو، ڪم نه ڪندڙ گهر ويندا: مراد علي شاهه

ڪراچي(م.د) وڏي وزير سيد مراد علي شاهه ڊرگس کاتي جي ڊائريڪٽر ڊاڪٽر قيصر کي برطرف ڪري ڇڏيو. هن چيو آهي ته ڪم نه ڪندڙن کي گهر ڀيڙو ڪيو ويندو. وڏي وزير مراد علي شاهه جي صدارت هيٺ صحت کاتي جو اجلاس ٿيو. اجلاس ۾ پوليو، ايڊز ۽ ٻين پروگرامن جي مئنيجرن شرڪت ڪئي. اجلاس سان ڳالهائيندي وڏي وزير چيو ته صحت کاتي ۾ ڪنهن به قسم جي سفارش برداشت نه ڪنداسين جڏهن ته پوسٽنگ لاءِ سفارش ڪندڙن کي به فارغ ڪيو ويندو.

 

بيبي جي شهادت کا پوءِ ڪو ٻيو رستو اختيار ڪيون ها ته اڄ جمهوريت نه هجي ها: مولا بخش چانڊيو

ڪراچي(م.د) وڏي وزير جي سڌُ سماءَ بابت صلاحڪار مولا بخش چانڊئي چيو آهي ته جيڪڏهن بيبي جي شهادت کا پوءِ ڪو ٻيو رستو اختيار ڪيون ها ته اڄ جمهوريت نه هجي ها. خانگي ٽي وي جي هڪ پروگرام ۾ ڳالهين دوران هن چيو ته خان صاحب جي رڳو هڪ صوبي ۾ حڪومت آهي، شيخ رشيد ڪٿي بيٺو آهي. شيخ رشيد فلمون ڏسندو رهيو آهي پرهاڻ فلمي زمانو گذري چڪو آهي. عمران خان کي ناڪامين مايوس ڪيو آهي. هن چيو ته بلاول ڀٽو زرداري پاناما معاملي تي گڏيل مخالف ڌر جو جو ساٿ ڏنو. انقلاب چوڻ سان ناهي ايندو پ  پ ۾ مائنس ون وارو خواب جنرل ضياءُ الحق ۽ پرويز مشرف جو به هو پر پ پ ۾ مائنس ون وارو فارمولو نه هلندو. بلاول ڀٽو پاناما معاملي تي عمران خان جو ساٿ ڏنو ۽ بلاول ڀٽو پاناما معاملي تي مخالف ڌر سان اتحاد چاهي ٿو.

 

پاڪستان جي مقابلي ۾ ڀارت سفارتي سطح تي جارحاڻو رويو اختيار ڪيو: اعتزاز احسن

اسلام آباد(م.د) سينيٽر اعتزاز احسن چيو آهي ته پاڪستان جي مقابلي ۾ ڀارت سفارتي سطح تي جارحاڻو رويو اختيار ڪيو آهي جڏهن ته پاڪستان اڪيلائي جو شڪار نظر اچي رهيو آهي. سينيٽ اجلاس ۾ پنهنجن خيالن جو اظهار ڪندي هن چيو ته والاريل ڪشمير ۾ ڀارتي جارحيت ۽ ڪنٽرول لائين تي ڇڪتاڻ جي معاملي تي ڀارت سفارتي سطح تي پاڪستان جي مقابلي ۾ وڌيڪ جارحاڻو نظر اچي رهيو آهي جڏهن ته پاڪستان اڪيلائي جو شڪار آهي ۽ پرڏيهي صلاحڪار به پوڙهو نظر اچي رهيو آهي. هن وڌيڪ چيو ته ڀارت پاڪستنا کي دنيا ۾ اڪيلو ڪرڻ جي ڪوشش ۾ مصروف آهي جڏهن ته پاڪستان جو پرڏيهي وزير آهي ئي ڪو نه. اميد آهي ته ان معاملي تي سينيٽ جي تيار ڪيل سفارشون حڪومت جي لاءِ مددگار ثابت ٿينديون.

 

غيرت بل شريعت خلاف آهي، بلڪل برداشت نه ڪبو: سراج الحق

لاهور (م.ڊ) جماعت اسلاميءَ جي امير سراج الحق غيرت جي نالي تي قتل واري بل جي مخالفت ڪندي چيو آهي ته شريعت خلاف ڪنهن به قانون کي بلڪل به برداشت نه ڪنداسين، سينيٽر سراج الحق چيو ته بل ۾ اسلامي نظرياتي ڪائونسل جي آئيني حيثيت کي به چئلينج ڪيو ويو آهي، قانون ۾ صلح جو حق نه ڏيڻ اسلامي حڪمن جي ڀڃڪڙي آهي، غيرت جي نالي تي قانون جوڙڻ هوڏ ۽ دهشتگرديءَ جي برابر آهي. هن چيو ته حضرت امام حسين سان محبت جو حق ادا ڪرڻ جي لاءِ يزيدي نظام سان ٽڪرائڻو پوندو، حڪمرانن ملڪ ۾ ظالماڻو نظام مڙهي رکيو آهي.