تازيون خبرون

Daily Archives: October 7, 2016

پاڪ ڀارت ٻئي ايٽمي طاقتون آهن، دنيا کي ڪشمير مسئلي تي ڌيان ڏيڻو پوندو: مليٽري ڪميٽي نيٽو

اسلام آباد (اين اين آءِ) نيٽو جي مليٽري ڪميٽي جي جنرل پيول چيو آهي ته پاڪستان ۽ ڀارت ٻئي ايٽمي طاقتون آهن، دنيا کي ڪشمير مسئلي تي ڌيان ڏيڻو پوندو، دهشتگردي خاتمي جي گڏيل حڪمت عملي جو اعتراف ڪرڻ چاهيندس، جڏهن ته وزيراعظم نواز شريف هڪ ڀيرو ٻيهر چيو آهي ته افغانستان ۾ استحڪام اسان جي ملڪ ۽ خطي ۾ استحڪام لاءِ تمام گهڻو ضروري آهي، پاڪستان جي سول ۽ عسڪري قيادت افغان قيادت سان رابطي ۾ آهي، افغان حڪومت جي درخواست تي مفاهمتي عمل ۾ سهولت ڏئي رهيا آهيون، افغان قيادت ۾ ان جو پنهنجو مفاهمتي عمل افغانستان ۾ پائيدار امن ۽ استحڪام لازمي آهي، پاڪستان ڪشمير لاءِ سياسي سفارتي ۽ اخلاقي حمايت جاري رکندو، ايوان وزيراعظم طرفان جاري بيان موجب وزيراعظم نواز شريف نيٽو مليٽري ڪميٽي جي چيئرمين جنرل پيٽر پيول سان خميس تي وزيراعظم هائوس ۾ ملاقات دوران ڳالهائي رهيو هو. هن چيو ته اسان افغان قيادت کي آگاهه ڪيو آهي ته افغانستان جا دشمن پاڪستان جا دشمن آهن ۽ اسان پنهنجي لفظن تي قائم آهيون، وزيراعظم چيو ته گذريل ڏينهن به پاڪستان افغانستان لاءِ 50 ڪروڙ ڊالر جي امداد کانسواءِ 50 ڪروڙ ڊالر جي امداد جو اعلان ڪيو آهي ته جيئن ان کي مسئلن تي ڪنٽرول ۽ استحڪام حاصل ڪرڻ ۾ مدد ملي، اسان حقيقت طور تي سمجهون ٿا ته افغانستان ۾ استحڪام اسان جي ملڪ ۽ خطي ۾ استحڪام کي حاصل ڪرڻ لاءِ تمام گهڻو ضروري آهي، وزيراعظم چيو ته مان خود ۽ چيف آف آرمي اسٽاف افغانستان جا دورا ڪيا ۽ ان کي دهشتگردي جي لعنت کي ختم ڪرڻ لاءِ پنهنجي ڀرپور تعاون جي خاطري ڪرائي، وزيراعظم چيو ته پاڪستان جي سول ۽ عسڪري قيادت افغان قيادت سان رابطي ۾ آهي، هن چيو ته ڀارت والاريل ڪشمير جي مسئلي تي مسئلا پيدا ڪري رهيو آهي ۽ هن ٻٽي معيار جو سهارو ورتو آهي، ڀارت واقعي جي جاچ کانسواءِ اڙي حملي تي پاڪستان تي الزام مڙهيا آهن، ڀارت کي احساس نه آهي ته والاريل ڪشمير جي نوجوانن کي آزادي جي جدوجهد کي نئين قوت بخشي آهي، اسان پنهنجي سمورن پاڙيسرين سان پرامن لاڳاپا چاهيون ٿا.

 

دشمن کي جارحيت جو منهن ٽوڙ جواب ملندو، ملڪ جو دفاع هر قيمت يقيني بڻائينداسين : آرمي چيف

رسالپور (اين اين آءِ) پاڪ فوج جي اڳواڻ جنرل راحيل شريف چيو ته ڀارت دهشتگردي خلاف جنگ ۾ اسان جو ڪردار کي ختم ڪرڻ چاهي ٿو پر ان جا ناپاڪ ارادا ڪامياب ٿيڻ نه ڏينداسين پاڪ هوائي فوج جو پيشاورانه صلاحيتن ۾ ڪوبه مقابلو نٿو ڪري سگهي دشمن جي ڪنهن به جارحيت يا اسٽريجڪ جو منهن ٽوڙ جواب ڏنو ويندو ڀارت والاريل ڪشمير ۾ ظلم جي انتها ڪري ڇڏي آهي جنهن جو عالمي برادري نوٽيس وٺي دهشتگردي عالمي چئلينج آهي ان جو مقابلو ڪيو ويو آهي ۽ ڪنداسين خميس تي پي اي ايف اڪيڊمي رسالپور ۾ ڪيڊٽس جي پاسنگ آئوٽ پريڊ سان خطاب دوران آرمي چيف جنرل راحيل شريف چيو ته پاڪ هوائي فوج جو پيشاورانه صلاحيتن ۾ ڪوبه مقابلو نٿو ڪري سگهي هٿياربند فوج اندروني ۽ ٻاهرين چئلينجن جو منهن ٽوڙ جواب ڏيڻ لاءِ هر وقت تيار آهي دشمنن جي ناپاڪ ارادن کي ڪامياب ٿيڻ نه ڏينداسين وطن جي بچاءَ لاءِ هر حد تائين وينداسين. پاڪستان جي خوشحالي جا دشمن نقصان پهچائڻ چاهين ٿا. هن چيو ته اسان دهشتگردي جي انفرااسٽريڪچر کي پاڙان ڪڍي ڪامياب ٿيا آهيون ڀارتي جنون سڀني جي اڳيان آهي ڀارت دهشتگردي خلاف جنگ ۾ اسان جي ڪردار کي ختم ڪرڻ چاهي ٿو. آرمي چيف جنرل راحيل شريف چيو ته پاڪستان هڪ ذميوار ۽ پرامن ملڪ آهي پاڪستان پاڙيسري ملڪن سان دوستانه لاڳاپن جي پاليسي اختيار ڪرڻ چاهي ٿو دهشتگردي عالمي چئلينج آهي ان جو مقابلو ڪيو آهي ۽ ڪنداسين. آرمي چيف جنرل راحيل شريف گريجوئيٽ ڪيڊٽس کي برانچ بيج لڳايا ۽ اعزاز ورهايا.

 

شهر ۾ ٽارگيٽيڊ آپريشن هر صورت ۾ جاري رهندو: مراد علي شاهه

ڪراچي(م.ڊ/اسٽاف رپورٽر/اين اين آءِ)وڏي وزير سيد مراد علي شاهه ڊي جي رينجرز جنرل بلال اڪبر کي عزيز آباد مان هٿ آيل هٿيارن بابت وڌيڪ جاچ ڪرڻ جي هدايت ڪري ڇڏي. وڏي وزير ڊي جي رينجرز سان ملاقات ڪئي جنهن ۾ عزيز آباد مان هٿ آيل هٿيارن بابت ڳاليهون ڪيون ويون. وڏي وزير ڊي جي رينجرز کي هدايت ڪئي ته هٿيارن بابت وڌيڪ جاچ ڪئي وڃي. ملاقات ۾ محترم الحرام جي سيڪيورٽي، امن امان جي صورحال ۽ ٻين معاملن تي ڳالهه ٻولهه ٿي.  وڏي وزير سيد مراد علي شاهه ڪراچي جي علائقي عزيز آباد ۾ نائن زيرو ۽ ڀرپاسي جي علائقي مان تاريخ ۾ هٿيارن جي سڀ کان وڏي کيپ هٿ ڪرڻ تي پوليس ۽ رينجرز پارٽي لاءِ 50 لک رپيا انعام ڪو اعلان ڪري ڇڏيو آهي، سندس چوڻ آهي ته هيڏي وڏي ڪارروائي ڪرڻ تي پوليس مٿان فخر آهي. شهر ۾ ٽارگيٽيڊ آپريشن هر صورت ۾ جاري رهندو. هن چيو ته پوليس ۽ رينجرز گڏجي ڪاميابيون حاصل ڪري رهيا آهن.  ڳجھن ادارن جي وقت سر ڪارروائين سان وڏيون ڪاميابيون ملي رهيون آهن.سٺو ڪم ڪندڙن سان گڏ آهيان.  ٻئي طرف  سنڌ جي وڏي وزير مراد علي شاهه جيل پوليس جون پگهارون به سنڌ پوليس جي برابر ڪرڻ جو حڪم ڏيندي سکر، نوابشاهه، عمر ڪوٽ ۽ مٺي ۾ نوان جيل ٺاهڻ ۽ سموري صوبي ۾ جيلن جي سڪيورٽي وڌائڻ ۽ قيدين کي سهولتون فراهم ڪرڻ جو حڪم ڏئي ڇڏيو آهي. سنڌ جي جيلن جي صورتحال بابت وڏي وزير مراد علي شاهه جي صدارت هيٺ اجلاس ٿيو، جنهن ۾ آءِ جي جيلز نصرت مڱڻ ۽ ٻين لاڳاپيل عملدارن شرڪت ڪئي. اجلاس دوران آءِ جي جيلن جي سڪيورٽي ۽ بيرڪس جي ترقياتي ڪمن بابت بريفنگ ڏني. وڏي زير ڪراچي سينٽرل جيل، لاڙڪاڻو ۽ بدين جيلن ۾ ترقياتي ڪمن جي سست رفتاري تي ڪاوڙ جو اظهار ڪندي ڪم جلد مڪمل ڪري رپورٽ ڏيڻ جو حڪم ڏنو. وڏي وزير سکر،نوابشاهه، عمر ڪوٽ ۽ مٺي ۾ نواز جيل قائم ڪري پراڻن جيلن کي عورت قيدين لاءِ مخصوص ڪرڻ جو حڪم ڏنو.

 

وڏي وزير متاثرن کي معاوضو ڏيڻ جو اعلان ڪيو هو، عملدرآمد ڇو ناهي ٿيو؟: چيف جسٽس

اسلام آباد(بيورو) سپريم ڪورٽ ڪوئيٽا سانحي جي جاچ لاءِ جڊيشل ڪميشن جوڙي ڇڏي آهي. چيف جسٽس انور ظهير جمالي جي سربراهي ۾ سپريم ڪورٽ رجسٽري جي 3 رڪني بينچ ڪوئيٽا سانحي بابت ورتل پاڻمرادي نوٽيس تي ٻڌڻي ڪئي. جسٽس قاضي فائز عيسيٰ جي سربراهي ۾ جوڙيل ڪميشن ڌرين جا بيان قلمبند ڪري مهيني اندر رپورٽ پيش ڪرڻ جي پابند هوندي، چيف جسٽس سانحي جي متاثرن کي معاوضو نه ملڻ تي سخت ڪاوڙ جو اظهار ڪندي چيو آهي ته بلوچستان جي وڏو وزير فوري طور پنهنجي اعلانن تي عمل ڪري. ٻڌڻي دوران متاثر ڌر جي وڪيل ٻڌايو ته ڪوئيٽا سانحي ۾ شهيد ٿيل ۽ زخمي وڪيلن کي اڃا تائين معاوضو نه ملي سگهيو آهي، جنهن سبب هو مالي مسئلن جو شڪار آهن. چيف جسٽس بلوچستان سرڪار تي ڪاوڙ جو اظهار ڪندي رماڪس ڏنا ته وڏي وزير متاثرن کي معاوضو ڏيڻ جو اعلان ڪيو هو، ٻڌايو وڃي ته هيل تائين عملدرآمد ڇو ناهي ٿي سگهيو.

 

ڪشمير مسئلي تي تڪرار نٿا چاهيون، خبر ناهي حڪومت ڇو پنهنجي پيرن تي ڪهاڙو هڻڻ چاهي ٿي: خورشيد شاهه

اسلام آباد(بيورو) قومي اسيمبلي ۾ مخالف ڌر اڳواڻ خورشيد شاهه چيو آهي ته اسان ڪشمير مسئلي جي ايشو تي تڪرار نٿا چاهيون  تنهن هوندي خبر ناهي ته حڪومت ڇو پنهنجن پيرن تي پاڻ ڪهاڙي هڻڻ چاهي ٿي، ڇا مخالف ڌر کي تنقيد جو حق به ناهي؟ جيڪڏهن حڪومت چاهي ٿي ته مخالف ڌر جي وات تي ٽيڪ لڳائي ته ٺيڪ آهي. اسان حڪومت کي سپورٽ ڏيڻ جي لاءِ ايوان ۾ ويٺا آهيون، پاڪستان جي لاءِ رت ڏيندڙڻ کي غدار چوڻ ڪٿان جو انصاف آهي. پارليامينٽ جي گڏيل اجلاس ۾ سينيٽر مشاهد الله خان کان پوءِ خطاب ڪندي خورشيد شاهه چيو ته اسان اتحاد جي ڳالهه ڪئي آهي اسن هڪ ايوان ۾ به هڪ ٻئي جي ڳالهه ٻڌڻ لاءِ تيار ناهيون. هن چيو ته حڪومتي ميمبر پارٽي  قيادت سان دشمني ڇو ڪري رهيا آهن.  توهان جي اڳواڻ توهان جو ڇا بگاڙيو آهي جو توهان ان کان بدلو وٺي رهيا آهيو؟ اسان کي برو ڀلو ناهي چيو  تنهن هوندي اسان ههڙي ماحول ۾ ايوان  نٿا ويهي سگهون.

 

ملڪ جي سياسي ۽ عسڪري قيادت ڀارت کي مضبوط پيغام ڏنو آهي: اسحاق ڊار

اسلام آباد(م.ڊ) ناڻي واري وفاقي وزير اسحاق ڊار چيو آهي ته ملڪ جي سياسي ۽ عسڪري قيادت ڀارت کي مضبوط پيغام ڏنو آهي، پاڪستان جي دفاع لاءِ تيار آهي، ملڪ ڏانهن ميري اک کڻي ڏسندڙن جون اکيون ڪڍي ڇڏينداسين. اسلام آباد ۾ تقريب کي خطاب ڪندي اسحاق ڊار چيو ته ڀارت مسلسل ڪنٽرول لائين تي فائربندي جي ڀڃڪڙي ڪري رهيو آهي. هن چيو ته پاڪستان پنهنجي دفاع ۽ سالميت لاءِ هر حد تائين وڃي سگهي ٿو، ڪنٽرول لائين تي دشمن کي منهن ٽوڙ جواب ڏنو پيو وڃي. اسحاق ڊار چيو ته ڀارتي وزير اعظم نريندر مودي الزام لڳائڻ بدران غربت ۽ بيروزگاري جي خاتمي لاءِ پاڪستان سان مقابلو ڪري.

 

ن ليگ ۽ عمران خان مونجھارن جو شڪار آهن: بلاول ڀُٽو زرداري

ڪراچي (م.ڊ) پاڪستان پيپلز پارٽيءَ جي چيئرمين بلاول ڀُٽي زرداريءَ چيو آهي ته ن ليگ ۽ عمران خان ٻئي مونجھارن جو شڪار آهن. پيپلز پارٽيءَ جي چيئرمين بلاول ڀُٽو زرداريءَ سماجي رابطن جي ويب سائيٽ ٽوئيٽر تي پنهنجي پيغام ۾ چيو ته ن ليگ ۽ عمران خان ٻئي اپ سيٽ آهن، پي ٽي آءِ جا وزير حڪومت ڇڏي پيپلز پارٽيءَ ۾ شامل ٿي رهيا آهن، اڳوڻي مملڪتي وزير عبدالحڪيم بلوچ کي پيپلز پارٽيءَ ۾ ڀليڪار چوان ٿو.

 

ڀارت پاران ڪشمير کي اٽوٽ انگ چوڻ بين الاقوامي قانون جي خلاف ورزي آهي: اعتزازاحسن

اسلام آباد (اين اين آءِ) پاڪستان پيپلزپارٽي جي اڳواڻ اعتزازاحسن چيو آهي ته ڀارت پاران ڪشمير کي اٽوٽ انگ چوڻ بين الاقوامي قانون جي خلاف ورزي آهي افغانستان ملتان ۽ بنگلاديش پاران سارڪ ڪانفرنس ۾ شرڪت کان انڪار پرڏيهي وزارت جي وڏي ناڪامي آهي جنرل اسيمبلي ۾ وزيراعظم جي تقرير گڏيل هئي. نوازشريف جي خطاب ۾ سڀ کان اهم ڳالهه ڀارتي جاسوس ڪلڀوشن يادو جي ٿيڻ گهرجي ها جڏهن ته پاڻ ۾ غلط فهميون ختم نه ٿينديون ته ڪشمير جو ڪيس اسان ڪيئن وڙهنداسين پاڪستان ۽ ڀارت جوهري قوتون آهن ڇڪتان صرف ۽ صرف تباهي آڻيندي آهي اربع تي اسپيڪر اسيمبلي سردار اياز صادق جي صدارت هيٺ پاڪ ڀارت ڇڪتاڻ ۽ ڪشمير مسئلي جي حوالي سان قومي اسيمبلي جي گڏيل اجلاس جي ٻئي ڏينهن ڳالهائيندي اعتزازاحسن چيو ته ٻه ڏينهن اڳ آل پارٽيز ڪانفرنس ٿي جنهن ۾ سمورين سياسي پارٽين والاريل ڪشمير جي صورتحال جي حوالي سان پنهنجا خيال پيش ڪيا ۽ ان تي بحث ڪيو اهو اي پي سي ان ڪئميرا به هئي ته ميڊيا تي ٽڪرز ۽ ٽاڪ شوز ۾ اي پي سي جي ڪارروائي جي باري ۾ ڳالهه ٻولهه ٿي ان معاملي جو نوٽيس ورتو وڃي هن چيو ته ڪشمير پاڪستان جي شه رڳ آهي ڪشمير ۾ اڄ باهه ڀڙڪي رهي آهي ۽ خون جي هولي جاري آهي نوجوانن کي وڏن هٿيارن سان نابين ڪيو پيو وڃي. جنهن سان مقابلو ڪرڻ لاءِ ڪشميري نوجوان انهن هٿيارن جي مقابلي ۾ پٿرن سان جدوجهد ڪري رهيا آهن هن چيو ته ڀارت ان آزادي جي تحريڪ سان پريشان ۽ وائڙي ٿي ويئي آهي جهڙي طرح سرجيڪل اسٽرائيڪ جو ڊرامو رچايو ويو ان مان ثابت ٿئي ٿو ته ڀارت بيڪ فوٽ تي هليو ويو آهي ڀارت ۾ ڪچريوال ۽ ڪانگريس جي قيادت به ان ڏس ۾ سوال اٿاري رهي آهي. ڀارت سنڌ طاس معاهدي تي نظرثاني ۽ ان جي رد ٿيڻ جي ڳالهه ڪري رهي آهي ڪشمير جي مسئلي تي پاڪستان ۽ ڀارت ۾ چئن جنگين باوجود سنڌ طاس معاهدي تي فرق به نه آيو ڀارتي قيادت جيڪڏهن چاهي ٿي ته سنڌ طاس معاهدي تي ترميم يا ان کي ختم ڪرڻو آهي ته ڀارت پاران اهو جنگي قدم هوندو هن چيو ته سارڪ ڪانفرنس جو منعقد نه ٿيڻ افسوس جوڳي ڳالهه آهي هن چيو ته منهنجي والده اهو اعلان ڪيو هو ته جيستائين ڪشمير آزاد نه ٿئي هو ريشم نه پائيندي ۽ 2001 ۾ فوت ٿيڻ تائين هو ان عهد تي قائم رهي. هن چيو ته ڪشمير هڪ بين الاقوامي تڪرار آهي ۽ ڀارت جو اهو چوڻ آهي ته هو ان جو اٽوٽ انگ آهي بين الاقوامي قانون جي خلاف ورزي آهي هن چيو ته اسان اهو سمجهون ٿا ته ڀارت پاران سنڌ طاس معاهدي جي خلف ورزي جارحيت جو هڪ قدم آهي. هن چيو ته اڙي حملي کان پوءِ پاڪستان جي پرڏيهي وزير چيو آهي ته ٿي سگهي ٿو ته ڪشمير تان ڌيان هٽائڻ لاءِ ڀارت خود ڪرايو هجي پر جيڪڏهن ٿي سگهي ٿو ته پوءِ پاڪستان اڪيلو ڇو رهجي ويو پيپلزپارٽي سينيٽر وزيراعظم کي تنقيد جو نشانو بڻائيندي چيو ته توهان پاڪستان کي دنيا ۾ اڪيلو ڪري رهيا آهيو گڏيل قومن جي جنرل اسيمبلي جي 71هين اجلاس ۾ وزيراعظم جي تقرير جي حوالي سان ڳالهائيندي اعتزازاحسن چيو ته تقرير گڏيل هئي. هن چيو ته ميڊيا ي ملڪ جي سلامتي جي اشو تي ذميواري جو مظاهرو ڪرڻ گهرجي. اهڙي ڪنهن به شخص کي پروموٽ نه ڪيو وڃي جنهن تي پابندي مڙهيل هجي هن چيو ته هن ايوان ۾ سکن جون سيٽون فراهم ڪرڻ جي الزام جي وضاحت ڪرڻ چاهيان ٿو. پهريان ته اهو ٻڌايان ته اهڙي ڪابه لسٽ سکن جي موجودگي نه هئي. جيڪڏهن هجي ها ته مون تائين ڪيئن پهچي ها ۽ مان جيڪڏهن ڀارت کي ڏني هئي ته منهنجي خلاف ڪارروائي ڪيل هجي ها هن چيو ته وزيراعظم جي گڏيل قومن ۾ تقرير جي هن تعريف ڪئي هئي ڪشمير جي لاءِ ذوالفقار علي ڀٽو، بينظير ڀٽو جي ڪمٽمينٽ رهي آهي اهڙي ڪنهن جي به نه رهي آهي.

 

ن ليگ جي اڳواڻن مخالف ڌر تي اجائي تنقيد ڪئي آهي: مولا بخش چانڊيو

ڪراچي(اسٽاف رپورٽر) وڏي وزير جي سڌُ سماءَ بابت صلاحڪار مولا بخش چانڊئي چيو آهي ته ن ليگ جي اڳواڻن مخالف ڌر تي بلا جواز تنقيد ڪئي آهي. ڪراچي ۾ ميڊيا سان ڳالهه ٻولهه ڪندي مولا بخش چانڊئي چيو ته ن ليگ پارلياميٽ جي گڏيل اجلاس کي ناڪام ڪرڻ جي ڪوشش ڪئي. هن وڌيڪ چيو ته تنقيد مخالف ڌر جو ڪم هوندي آهي پر حڪومتي وزيرن الٽو ڪم ڪري ڏيکاريو آهي.

 

ڪپتان جون پ پ کان راهون ڌار، عمران خان 30 آڪٽوبر تي اسلام آباد کي بند ڪرڻ جو اعلان ڪري ڇڏيو

اسلام آباد(بيورو) پاڪستان تحريڪ انصاف جي سربراهه عمران خان  پاناما ليڪس معاملي تي پ پ کان الڳ ٿي  30 آڪٽوبر تي اسلام آباد ۾ ڌرڻو هڻڻ جو اعلان ڪري ڇڏيو آهي، نواز شريف کي وزير اعظم مڃڻ کان انڪار ڪري ڇڏيو آهي، سندس چوڻ آهي ته نواز شريف ڏوهي ثابت ٿي ويو آهي، آئون کيس وزير اعظم نٿو مڃان. نواز شريف جي احتساب يا استعيفا تائين پارليامينٽ ۾ نه ويندس. اسلام آباد ۾ ميڊيا سان ڳالهائيندي عمران خان چيو ته گڏيل پارليامينٽ جي اجلاس ۾ نه وڃڻ تي تمام گھڻي تنقيد ٿي. ڪور ڪميٽي ۾ اڪثريت جو خيال هو ته مونکي وڃڻ گھرجي. منهنجو موقف هو ته آل پارٽيز سربراهي اجلاس ۾ ڀارت کي موقف ملي ويو آهي. هن چيو ته ڪشمير ۽ ايل او سي ڇڪتاڻ تي اسان سڀ متحد آهيون. هن چيو ته نواز شريف پاناما ليڪس ۾ ڏوهي ثابت ٿي ويو آهي، آئون کيس وزير اعظم نٿو مڃان. آئون هڪ ڏوهاري کي وزير اعظم مڃڻ لاءِ تيار ناهيان. هن چيو ته نواز شريف ۽ آصف زرداري ٻئي ڪرپٽ آهن، پارليامينٽ جي اجلاس ۾ پ پ ڇا ڪري ها، اندران ته هو ن ليگ سان مليل آهن. پارليامينٽ ۾ جيڪو ڪجھه ٿيو اهو سڀني ڏسي ورتو. هن چيو ته حڪمرانن قوم جي اخلاقيات کي تباهه ڪري ڇڏيو آهي، نواز شريف لنڊن ويو ته اتان ويهي مودي کي فون ڪيائين. اها آهي سندس حب الوطني؟. هن چيو ته اسين روڊن تي نه نڪرون ها ته پاناما ليڪس جو اشو ئي ختم ٿي وڃي ها. اسين روڊن تي نڪتاسين ته خورشيد شاهه وارن چيو ته سولو فلائيٽ ڪئي آهي، اسان انهن سان گڏجي وياسين ته به ڪجھه نه ٿيو.  هن چيوته اعتزاز احسن جهڙا ماڻهو پوري ڪوشش ڪن پيا ته نواز شريف جو احتساب ٿئي پر آصف زرداري ائين ٿيڻ نه ٿو ڏي. آصف زرداري ان ڪري نواز شريف سان گڏ آهي جو هو سمجھي ٿو ايندڙ وارو آصف زرداري جو آهي. پيپلزپارٽي واران اندران حڪمرانن سان مليل آهن. خورشيد شاهه کان وڌيڪ فرينڊلي اپوزيشن ڪهڙي ٿي سگھي ٿي. پ پ وارن کي چوان ٿو ته اهي به ايم ڪيو ايم جيان مائنس ون جو فارمولو اختيار ڪري آصف زرداري مان جند ڇڏائين. عمران خان وڌيڪ چيو ته نواز شريف مودي کي گرين سگنل نه ڏي ها ته مودي جي هيڏي همٿ نه ٿئي ها. اڄ جيڪو اسيمبلي ۾ ٿيو ان ۾ پيغام ڏنو ويو آهي ته پاڪستان ورهائجي ويو آهي. اسان کي نيب، ايف بي آر مان ڪا اميد ناهي. جيڪا اميد آهي اها سپريم ڪورٽ مان آهي پر اصل اميد عوام مان آهي. عمران خان موجب سپريم ڪورٽ ماضي ۾ ننڍين شين تي سوموٽو ايڪشن کڻندي آئي آهي، اڄ ادارا تباهه ٿي رهيا آهن. عوام اڄ قدم نه کنيو ته مافيا ڪنٽرول ڪري ويندي. جمهوريت جي نالي تي ڦر لٽ ٿي رهي آهي. جنهن ملڪ ۾ ادارا تباهه هجن ۽ ڌانڌلي سان اقتدار حاصل ڪجي اتي هاڻوڪن حڪمرانن جهڙا اقتدار ڌڻي ڪڍي نه سگھبا. هن چيو ته سڄي قوم تيار آهي، 30 آڪٽوبر تي سڀئي اسلام آباد پهچن. هن چيو ته آئون هنن جيان منافق ناهيان. آئون فضل الرحمان ۽ آصف زرداري جهڙو سياستدان ناهيان. عوام کي ملڪ بچائڻو آهي ته اسان سان گڏ بيهڻو پوندو. نه ته اهو سلسلو ائين هلندو رهيو ته نواز شريف ۽ زرداري وارا وٺندا رهندا. عمران خان موجب ڪرپشن ۾ ملوث ماڻهو ملڪ بچائڻ لاءِ نٿا بيهي سگھن. حڪمرانن قوم جي اخلاقيات تباهه ڪري ڇڏي آهي. بلاول نواز شريف کي غدار چوي ٿو وري هٿ ملائي ساڻس ويهي رهي ٿو. آئون جنهن کي ڏوهي سمجھان ان سان هٿ نٿو ملائي سگھان. هن چيو ته نواز شريف ڀارت جي هڪ واپاري جندال سان ڳجھي ملاقات ڪئي. ان جو ڪهڙو مقصد؟ وزير اعظم گڏيل قومن ۾ تقرير ڪئي ته مودي چيو اها تقرير راحيل شريف جي چوڻ تي ڪئي وئي. نواز شريف پنهنجي ڪمزورين جي ڪري فوج کي بدنام ڪيو.