تازيون خبرون

Daily Archives: October 6, 2016

ڪشمير مسئلو حل ٿيڻ تائين پاڪ_ڀارت لاڳاپا بحال نه ٿيندا، گڏيل قومون ظلم ختم ڪرائن: نواز شريف

اسلام آباد (اين اين آءِ) وزيراعظم محمد نواز شريف چيو آهي ته ڪشمير مسلسل باهه ۾ سڙي رهيو آهي، ڪشميرين جي آزادي واري تحريڪ کي ڪچلي نٿو سگهجي، هاڻ گڏيل قومن کي عالمي امن جي محافظ طور پنهنجي ساک برقرار رکڻي پوندي، پاڪستان هميشه ڪشميرين جي حقن جي حمايت ڪئي آهي ۽ مستقبل ۾ به جاري رکندو، ڪشميرين تي لاڳو سفري پابنديون ختم ڪيون وڃن، ڀارت عالمي برادري سان ڪيل واعدا کان ڪشمير کي محروم نٿو رکي سگهي، گڏيل قومن جي جنرل اسيمبلي ڪشمير بابت ڪيل واعدن کي پورو ڪري، فصلن ۾ ٽينڪ هلائڻ سان غربت ختم نٿي سگهي، پاڪستان جنگ جي خلاف آهي، ڪشمير سميت سمورا مسئلا ڳالهين ذريعي حل ڪرڻ چاهيون ٿا، اسان جي امن جي خواهش کي هڪ خود دار قوم جي خواهش سمجهي وڃي، ملڪ جي دفاع لاءِ ڪنهن به قدم ۾ هڪ لمحو به نه لڳائينداسين، اربع تي پارليامينٽ جي گڏيل اجلاس کي خطاب ڪندي وزيراعظم چيو ته ڪشمير مسلسل باهه ۾ سڙي رهيو آهي، ڪشمير ۾ انساني حقن جي ڀڃڪڙي ٿي رهي آهي، ڪشميري پنهنجي جان جي بازي لڳائي آزادي جي تحريڪ هلائي رهيا آهن، 7 لک ڀارتي قابض فوج جي باوجود ڪشميرين جا جذبا حريت کي دٻائي نه سگهيا، ڀارت ڪشميرين تي انهن جي حقن کان محروم نٿو ڪري سگهي، وزيراعظم چيو ته آزادي جي تحريڪ جي واڳ ڪشميري نوجوانن جي هٿ ۾ اچي وئي آهي، ڪشميرين سان پاڪستان جو تاريخي رشتو آهي، پاڪستان ڪشميرين سان هر قسم جو تعاون برقرار رکندو، اڄ اسان ٻيهر ڪشميرين جي آزادي جو عزم ڪريون ٿا، ڪشمير مسئلي جي حل بابت وزيراعظم چيو ته ڪشمير مسئلي جي حل کانسواءِ خطي ۾ پائيدار امن قائم نه ٿي سگهندو، اسان هر ممڪن ڪوشش ڪئي ته ڀارت ڳالهين جي ميز تي اچي پر ڀارت هميشه ڳالهين کي رد ڪيو آهي، وزيراعظم چيو ته ڪشمير کي اٽو انگ قرار ڏئي گڏيل قومن جي قراردادن جي مذاق اڏائي پئي وڃي، ڀارت عالمي برادري سان ڪيل واعدن کان ڪشميرين کي محروم نٿو ڪري سگهي، گڏيل قومن جي جنرل اسيمبلي ۾ خطاب جو حوالو ڏيندي هن چيو ته هن ڪشمير مسئلي تي گڏيل قومن ۾ 4 مطالبا رکيا، ڀارتي جيلن مان ڪشميري قيدين کي آزاد ڪيو وڃي، ڪشميرين تي سفري پابنديون ختم ڪيون وڃن، گڏيل قومن جنرل اسيمبلي ڪشمير بابت ڪيل واعدن کي پورو ڪري، وزيراعظم چيو ته ڀارت ڪشمير تان ڌيان هٽائڻ لاءِ پاڪستان تي الزام مڙهي رهيو آهي ۽ اڙي حملي جي ذميواري جاچ کانسواءِ پاڪستان تي مڙهي وئي آهي، هن چيو ته 28 سيپٽمبر تي لائين آف ڪنٽرول تي بنا سبب فائرنگ جو سلسلو شروع ٿيو جنهن سبب 2 پاڪستاني فوجي شهيد ٿيا، هن چيو ته پاڪستان جنگ جي خلاف آهي، خطي ۾ پائيدار امن چاهيون ٿا، وزيراعظم چيو ته پارليامينٽ جي گڏيل اجلاس جو مقصد اهو آهي ته تعميري سوچ سان حڪومت کي تجويزون ڏنيون وڃن.

 

ڪشمير، ڪرپشن ۽ دهشتگردي وارن معاملن تي ڪو به سمجهوتو نه ٿيندو: پيپلز پارٽي

اسلام آباد(م.ڊ) مخالف ڌر جي اڳواڻ خورشيد شاهه چيو آهي ته ڪشمير معاملي، ڪرپشن ۽ دهشتگردي وارن معاملن تي ڪو به سمجهوتو نه ٿيندو. قومي اسيمبلي جي اسپيڪر اياز صادق جي صدارت هيٺ قومي اسيمبلي جو گڏيل اجلاس جاري آهي. اجلاس کي خطاب ڪندي خورشيد شاهه چيو ته  ڪشمير معاملو هجي، دهشتگردي جو وارو معاملو هجي يا ڪرپشن جو معاملو هجي سمجهوتو نه ٿيندو. اميد آهي ته اجلاس ۾ جيڪي ڳالهيون طئي ٿينديون انهن تي عمل به ٿيندو. پاڪستان 7 ڏهاڪن کان ڪشمير خلاف جنگ وڙهي رهيو آهي. يقين آهي ته ايوان جي راءِ تي عمل ٿيندو.  ماضي ۾ ايوان ۾ پاس ٿيل متفقه ٺهرائن تي عمل ناهي ٿيو. اسان حالتن کي ڏٺو آهي اها نئين ڳالهه ناهي ته پاڪستان ۾ ڪيتريون ئي جنگيون وڙهيون ويون. مخالف ڌر به ايتري ئي محب وطن آهي جيتري حڪومت آهي.هن چيو ته پاڪستان ڪشمير جي حمايت ۾ اڳتي رهيو آهي ۽ اڳتي رهندو. ماضي ۾ طئي ڪيل ڳالهين تي عمل ٿئي ها ته اڄ اهڙيون حالتون نه هجن ها. پاڪستان ڪشمير جي حقن لاءِ وڙهيو آهي، ڪشمير جي معاملي تي ڪو به ٺاهه نه ٿيندو. هن چيو ته سارڪ ڪانفرنس جي مثال سامهون آهي، حڪومت تي تنقيد جي نشاندهي ڪري رهيو آهيان. ماضي ۾ دٻاءُ وجهندا رهون ها ته ڪشمير ۾ اڄ دهشتگردي نه هجي ها. ڏسڻو پوندو ته پاڪستان جي پرڏيهي  پاليسي ڪمزور ڇو آهي؟ سارڪ ڪانفرنس جي ملتوي ٿيڻ وارن سببن تي غور ڪرڻو پوندو. ڀارت پاڪستان کي اڪيلو ڪرڻ جي ڪوشش ڪئي، پاڪ ڀارت جنگيون ڪشمير لاءِ وڙهيون ويون آهن. پنهنجين غلطين جو احساس ڪنداسين تڏهن ئي صحيح رستي تي وينداسين. اسان کي ڪمزور فيصلا نه ڪرڻ گهرجن. وزير اعظم نواز شريف جنرل اسيمبلي ۾ ڪشمير معاملي تي سٺي تقرير ڪئي پر ڀارتي جاسوس ڪلڀوشن جو ذڪر نه ڪيو جڏهن ته 5 ملڪن سارڪ ڪانفرنس ۾ شرڪت کان انڪار ڪيو. هن وڌيڪ چيو ته وزير اعظم ٻڌائي ها ته بلوچستان پاڪستان جو علائقو آهي، والاريل علائقو ناهي. وزير اعظم گڏيل قومن ۾ ڀارتي جاسوس واريو معاملو اٿاري ها. ٻئي طرف پيپلزپارٽي جي چيئرمين بلاول ڀٽو زرداري چيو آهي ته ايندڙ چونڊن کانپوءِ پ پ وزير اعظم هائوس ۾ ۽ نواز شريف جيل ۾ هوندو. پارليامينٽ هائوس ٻاهران ميڊيا ڳالهائيندي بلاول ڀٽو زرداري چيو ته وزير اعظم صاحب توهان پنجاب نه پر سڄي پاڪستان جا وزير اعظم آهيون. هن چيو ته اسان کي چيو ويو ته سياسي فائدي لاءِ اي پي سي جو بائيڪاٽ ڪيو، پارليامينٽ نواز شريف جي ذاتي ملڪيت ناهي، پر اسين ڪشمير مسئلي تي ڪم ناهيون ڪندا. وزير اعظم کي چيو هو ته اسين قومي اتحاد جا خواهشمند آهيون. هن چيو ته وزير اعظم خورشيد شاهه جي مطالبي تي اي پي سي گھرائي، اي پي سي ۾ وزير اعظم کي ڪجھه تجويزون ڏنيون. بلاول ڀٽو زرداري وڌيڪ چيو ته سي پيڪ آصف زرداري ۽ پيپلزپارٽي جو منصوبو هو. ڪشمير پاليسي تي اسين سڀ هڪ آهيون. هن چيو ته پاڪستان جا دشمن اسان جي ڪمزورين تي نظر رکيو ويٺا آهن. ڪالهه ڪوئيٽا ۾ منهنجي ڀينرن کي قتل ڪيو ويو. جنهن جي مذمت ڪريون ٿا. هن چيو ته وزير اعظم واعدو ڪيو هو ته پاناماليڪس تي احتساب ٿيندو. کيس چيو آهي ته پاناما ليڪس تي جاچ لاءِ پارليامينٽ مان بل پاس ڪرائي. هن چيو ته آئون هاڻي آيو آهيان، سنڌ ۾ تبديليون آنديون آهن، پيپلزپارٽي ۾ به تبديليون آڻيندس. ايندڙ چونڊن ۾ پ پ ڪاميابي ماڻيندي پ پ وزير اعظم هائوس ۾ ۽ نواز شريف پاناما پيپرز معاملي تي جيل ۾ هوندو.

 

آرمي چيف پاران 10 ڪور هيڊ ڪوارٽر جو دورو ۽ نيٽو ملٽري ڪميٽي جي چيئرمين جنرل پيٽر سان ملاقات

راولپنڊي(م.ڊ) آرمي چيف جنرل راحيل شريف سان نيٽوملٽري ڪميٽي جي چيئرمين جنرل پيٽر ملاقات ڪئي جنهن ۾ مختلف معاملن تي ڳالهيون ڪيون ويون. آءِ ايس پي آر طرفان جاري بيان ۾ چيو ويو آهي ته ٻنهي عسڪري اڳواڻن جي ملاقات ۾ خطي جي سيڪيورٽي جي صورتحال تي ڳالهيون ڪيون ويون. ان موقعي تي جنرل پيٽر دهشتگردي خلاف جنگ ۾ پاڪسان جي ڪردار کي به ساراهيو. ٻئي طرف  آرمي چيف جنرل راحيل شريف 10 ڪور هيڊ ڪوارٽرن جو دورو ڪيو جتي هن لائين آف ڪنٽرول جي موجوده صورتحال تي بريفنگ ڏني. آءِ ايس پي آر طرفان جاري ڪيل بيان ۾ چيو ويو آهي ته آرمي چيف 10 ڪور هيڊ ڪوارٽرن جو دورو ڪيو جتي ڪور ڪمانڊر ليفٽيننٽ جنرل ظفر اقبال ڪور هيڊ ڪوارٽر اچڻ تي آرمي چيف جي آجيان ڪئي. ان موقعي تي جنرل راحيل شريف کي يونٽن ۽ فارميشنز جي آپريشنل تيارين بابت آگاهه ڪيو ويو. آرمي چيف جنرل راحيل شريف راولپنڊي ڪور جي تيارين تي مڪمل اطمينان جو اظهار ڪيو.

 

وڏي تباهي جو منصوبو ناڪام، ڪراچي مان تاريخ ۾ پهريون ڀيرو هٿيارن جي وڏي کيپ پڪڙي وئي

ڪراچي (اين اين آءِ) ڪراچي جي علائقي عزيز آباد ۾ حساس اداري جي نشاندهي تي پوليس ڪارروائي ڪري ڪراچي جي تاريخ ۾ هٿيارن جي وڏي کيپ هٿ ڪري ورتي آهي، هٿيارن ۾ اينٽي ايئر ڪراف، اينٽي ٽينڪ به شامل آهي، تفصيل موجب عزيز آباد ۾ ايم ڪيو ايم جي مرڪز نائين زيرو ويجهو حساس اداري جي نشاندهي تي پوليس هڪ خالي گهر ۾ ڪارروائي ڪئي جنهن دوران زمين اندر پاڻي جي ٽينڪ لڪايل وڏو اصلحو هٿ ڪيو ويو، ان اصلحي ۾ راڪيٽ لانچر، اينٽي ايئر ڪراف گن، ڪلاشنڪوف، ايل ايم جي، ايس ايم جي، جي ٿري، ايم 16 رائيفل، نائين ايم ايم پسٽل سميت جديد قسم جا هٿيار شامل آهن، ذريعن موجب هٿ ڪيل هٿيارن ۾ 2 سئو کان وڌيڪ راڪيٽ لانچر ۽ هزارن جي انگ ۾ رائيفل گرنيٽ ۽ لاتعداد گوليون به شامل آهن، ڇاپي دوران وڏي انگ ۾ بلٽ پروف جيڪيٽس ۽ هيلٽمينٽ به هٿ ڪيا ويا آهن، ڪارروائي کانپوءِ پوليس گهر کي لاوارث ڇڏيل هڪ ٽينڪ ۾ ٻوريون ۽ گوليون پيل هيون، ذريعن موجب هٿ ڪيل هٿيار سياسي پارٽي جو ٻڌايو پيو وڃي، پوليس مطابق گهر مان هن وقت تائين جيترا هٿيار هٿ ڪيا آهن ايترا شهر جي تاريخ ۾ هن وقت تائين ڪنهن به ڪارروائي ۾ هٿ نه ڪيا ويا آهن، اصلحي جي کيپ کي 3 ٽرڪن ۽ پوليس موبائيل ۾ منتقل ڪيو ويو.

 

سنڌ سرڪار زمينن تي قبضن جي رپورٽ سپريم ڪورٽ ۾ جمع ڪرائي ڇڏي

ڪراچي (اين اين آءِ) سنڌ حڪومت سرڪاري زمين تي قبضي بابت رپورٽ سپريم ڪورٽ ڪراچي رجسٽري ۾ جمع ڪرائي ڇڏي آهي، رپورٽ سنڌ حڪومت جي روينيو کاتي جمع ڪرائي آهي جنهن ۾ چيو ويو آهي ته سنڌ حڪومت جي اٽڪل 59 هزار 803 ايڪڙ زمين تي اڃاتائين مختلف شخصيتن ۽ کاتن جو قبضو آهي، 52 هزار ايڪڙ کان وڌيڪ زمين تي سرڪاري ادارن جو قبضو برقرار آهي، رپورٽ ۾ چيو ويو آهي ته 8 هزار ايڪڙ تي نجي ادارا ۽ ماڻهو قابض آهن، قبضو ڪندڙن ۾ عسڪري، وفاقي، صوبائي ۽ مڪاني ادارا شامل آهن، گذريل ڪجهه مهينن ۾ صرف 2864 ايڪڙ زمين قبضي مان ڇڏائي وئي آهي، سنڌ حڪومت جي زمين تي قبضي جو انڪشاف 2013 ۾ سپريم ڪورٽ ۾ داخل درخواست ۾ ڪيو ويو هو، رپورٽ ۾ انڪشاف ڪيو ويو آهي ته زمين تي قبضو ختم ڪرڻ بابت ڪيترائي ادارا ڪو به جواب ڏيڻ لاءِ تيار نه آهن، سنڌ حڪومت کربين رپين جي سرڪاري زمين تان قبضو نه ڇڏائي سگهي ۽ نه ئي قيمت وصول ڪري سهگي آهي.

 

ڪراچي جون روشنيون واپس آڻيندس، امپريس مارڪيٽ، ڪورنگي ۽ ملير ضلعن کي تاريخي طور تي بحال ڪيو ويندو: وڏو وزير

ڪراچي (اين اين آءِ) سنڌ جي وڏي وزير سيد مراد علي شاهه چيو آهي ته اهي ڪراچي کي بهترين، سرسبز ۽ خوبصورت شهر ۾ تبديل ڪرڻ جي ڪوشش ڪري رهيو آهي ۽ شهر جي خوشحالي، پائيداري ۽ سروس ڊليوري تي ڌيان ڏنل آهي ۽ هاڻ ڪراچي جي پراڻن علائقن کي خوبصورت بڻايو پيو وڃي ته جيئن انهن علائقن ۾ به هر هڪ ماڻهو گهر خريد ڪرڻ ۾ دلچسپي وٺي، هن اها ڳالهه سي ايم هائوس ۾ هڪ اجلاس جي صدارت ڪندي ڪئي، جنهن ۾ ورلڊ بينڪ جي 82 ملين ڊالر جي تعاون سان ڪراچي ليو ايبل امپورمينٽ پروجيڪٽ کي حتمي شڪل ڏيڻ ۽ شهر جي پراڻن علائقن کي بحال ڪرڻ جي حوالي سان غور ڪيو ويو، اجلاس ۾ ايڊيشنل چيف سيڪريٽري ترقيات محمد وسيم ۽ ان جي ٽيم پرنسپل سيڪريٽري نويد ڪامران بلوچ ۽ ناڻي واري حسن نقوي شرڪت ڪئي، وڏي وزير چيو ته ڪراچي کي قومي معيشت ۾ هڪ مرڪزي حب جي حيثيت حاصل آهي جنهن جو جي ڊي پي ۾ 15 کان 29 سيڪڙو حصو آهي پر ان جي معاشي ترقي خاص طور تي شهر جي پراڻن علائقن ۾ گذريل 2 سالن دوران رفتار تمام گهٽ رهي آهي ۽ اها ڳالهه به تڪليف ڏيندڙ آهي ته ڪراچي گلوبل ليو ايبل انڊيڪس ۾ دنيا جي 140 اهم شهرن جي لسٽ ۾ 134 هين نمبر تي آهي جنهن جو سبب انفرا اسٽڪچر ۾ گيپ، بنيادي خدمتون ۽ شهر جو هڪ وڏو حصو اڃاتائين غير ترقي يافته هجڻ ۽ تاريخي ماڳن جي ابتڙ صورتحال ۽ علائقن جو سرسبز نه هجڻ آهي، سيد مراد علي شاهه چيو ته ورلڊ بيڪ ڪراچي سٽي ڊائگنوسٽڪ جي لاءِ ٽيڪنيڪل مدد فراهم ڪئي هئي، ايڊيشنل چيف سيڪريٽري محمد وسيم اجلاس کي بريفنگ ڏيندي چيو ته سنڌ جي وڏي وزير جي اڳواڻي ۾ پاڪستان چوڪ کان امپريس مارڪيٽ، ڪورنگي ۽ ملير ضلعن جي علائقن جي نشاندهي ڪئي وئي آهي، هن چيو ته پاڪستان چوڪ جي علائقن امپريس مارڪيٽ جي فوٽ پاٿن کي بهتر بڻايو ويندو ۽ اتي پيادل هلندڙ ۽ معذور ماڻهن لاءِ سهولتون ڏنيون وينديون، انهن علائقن ۾ موجود پارڪن کي بحال ڪيو ويندو، هن چيو ته قائد آباد کان اسٽيل مل جنگشن نواب صديق علي خان روڊ کان لسٻيلا تائين اندر پاس، سنگر چورنگي کان يونس چورنگي کان اسپتال چورنگي تائين رستو، کوکرا پار روڊ کان سعود آباد تائين روڊ رستا، اورنگي ۾ مختلف روڊ سائيٽ اوينيو کان پراچا چوڪ کان حبيب چورنگي، جنرل ٽائر روڊ ٽيڪسٽائيل مل کان گلوبل ٽيڪسٽائيل مل لانڍي، بهادر يار جنگ روڊ کان ڊسٽرڪٽ ڪورنگي ۽ عظيم پورا کان شاهراهه الطاف، شاهه فيصل زون تائين روڊن کي ٻيهر تعليم ۽ اپ گريڊ ڪيو ويندو.

 

ملڪ جي سلامتي جو مسئلو هجي ته سياست کي جدا ڪرڻ گهرجي: مولابخش چانڊيو

ڪراچي (اين اين آءِ) سنڌ جي وڏي وزير جي سڌسماءَ واري صلاحڪار مولابخش چانڊيو چيو آهي ته ملڪ جي سلامتي جو مسئلو هجي ته سياست کي الڳ ڪرڻ گهرجي عمران خان جو چئي رهيو آهي اهو به صحيح آهي پر اپوزيشن کي ناڪام سولو فلائيٽ ڪندڙن بڻايو ۽ تحريڪ انصاف مفاهمت جو رول ادا ڪيو هڪ انٽرويو ۾ هن چيو ته ڀٽو جي گڏيل قومن ۾ تقريرن سان ملڪ جي عزت وڌي ملڪ جي سلامتي جو مسئلو هجي ته سياست کي الڳ ڪرڻ گهرجي مولابخش چانڊيو وڌيڪ چيو ته عمران خان رائونڊ مارچ تي به اعتماد ۾ نه ورتو هو هن چيو ته اسان نوازشريف جا دوست نه آهيون پر حالتن موجب وزيراعظم سان گڏ بيهڻو پوندو ملڪ جي سلامتي کي اولين ترجيحي ڏيون ٿا هن چيو ته بلاول سخت لهجو استعمال ڪندو آهي پر گاريون نه ڏيندو آهي عمران خان قومي ليڊر بڻجي اڀريو آهي ان کي رشتي وٺڻ وارو جملو استعمال نه ڪرڻ گهرجي ها. هن چيو ته شيخ رشيد کي به توهين آميز لفظ استعمال نه ڪرڻ گهرجن ها.

 

افغانستان ۾ امن جي قيام لاءِ پاڪستان پنهنجون ڪوششون جاري رکندو: سرتاج عزيز

هيگ (م.ڊ) وزيراعظم جي پرڏيهي معاملن واري صلاحڪار سرتاج عزيز چيو آهي ته افغانستان ۾ امن جي لاءِ پاڪستان پنهنجون ڪوششون جاري رکندو، طالبان کي پيغام ڏيون ٿا ته تشدد جي رستي کي ڇڏي امن جو حصو بڻجن، امن ڪانفرنس کي خطاب ڪندي سرتاج عزيز چيو ته افغان حڪومت، حزب اسلاميءَ وچ ۾ ٿيندڙ امن معاهدو خوشيءَ جوڳو آهي، هن چيو ته مستقبل ۾ ميڊيڪل، انجنيئرنگ ۽ بينڪنگ سيڪٽر ۾  به 3 هزار افغاني شاگردن کي اسڪالر شپ ڏينداسين، پاڪستان 3 هزار افغان شاگردنکي اسڪالر شپ به ڏنيون آهن.

 

ڊي جي آءِ ايس آءِ رضوان اختر کي ڪور ڪمانڊر ڪراچي بڻائڻ جو امڪان

راولپنڊي(م.ڊ) ايندڙ ڏينهن ۾ فوج ۾ وڏين تبديلين جو امڪان آهي، ڪور ڪمانڊر پشاور، ملتان ۽ بهاولپور جي تبديلين جو به امڪان آهي جڏهن ته ڊي جي آءِ ايس آءِ ليفٽيننٽ جنرل رضوان اختر کي ڪور ڪمانڊر ڪراچي بڻائڻ جو به امڪان آهي. جنرل رضوان 22 سيپٽمبر 2014ع تي آءِ ايس آءِ جو سربراهه بڻيو. ان کان پهرين هو ڊي جي رينجرز سنڌ جي عهدي تي رهيو ۽ ڪراچي آپريشن کي ليڊ ڪيو هو. ان ڪري هن جي ڪراچي ڪور ڪمانڊر بڻجڻ جا واضع امڪان آهن.

 

ڪرپشن جي خلاف جنگ جلد ئي کٽڻ وارو آهيان: عمران خان

پشاور (اين اين آءِ) چيئرمين تحريڪ انصاف عمران خان چيو آهي ته ڪرپشن جي خلاف جنگ تمام جلد کٽڻ وارو آهيان انسانن تي پيسو خرچ ڪرڻ ۽ ادارن جي مضبوطي سان ترقي ممڪن آهي استاد ٻارڙن کي سچ ڳالهائڻ جو سبق ڏين سرڪاري اسڪولن جي نظام کي وڌيڪ بهتر بڻائي رهيا آهيون تعليم صحت ۽ انصاف جي فراهمي حڪومت جي ذميواري آهي سي ايم هائوس ۾ ٽيچر ڊي جي حوالي سان منعقد ڪيل تقريب کي خطاب ڪندي عمران خان چيو ته ڪيتري ئي عرصي کان سرڪاري اسڪولن جي حالت خراب آهي ۽ غريب جي ٻارڙن کي اڳتي نٿو ڇڏيو وڃي. اسان انگريزن جو نظام تعليم به تباهه ڪئي آهي هن چيو ته موجوده صوبائي حڪومت تعليم جي نظام کي بهتر بڻايو ۽ 34 هزار ٻارڙا سرڪاري اسڪولن ۾ اچن پيا. استاد قوم جا معمار آهن استاد ۽ پروفيسرن جون پگهارون وڌيڪ وڌائينداسين ڇو ته قومون تعليم سان ئي بڻجنديون آهن. رستن جي اڏاوت سان قومون نه بڻبيون آهن هن چيو ته اسپتالن کي ٺيڪ ڪري رهيا آهيون تعليم صحت ۽ انصاف ڏيڻ حڪومت جي ذميواري آهي.