تازيون خبرون

Daily Archives: October 5, 2016

لالي ووڊ فنڪار فواد خان جي گهر ڌيءَ جي پيدائش، مبارڪون وصول

لاهور (شوبز نيوز) لالي ووڊ فنڪار فواد خان جي گهر ڌيءَ جي پيدائش ٿي آهي، جنهن کانپوءِ هو ٻن ٻارن جو پيءُ بڻجي ويو آهي، فواد خان جي مئنيجر ان حوالي سان ٻڌايو آهي ته فواد خان جي گهر واري صدف خان اسپتال ۾ داخل هئي، جتي رات جو ان وٽ ڌيءَ جي پيدائش ٿي. فواد خان ۽ صدف خان 2005ع ۾ شادي ڪئي هئي، جنهن کانپوءِ الله انهن کي پٽ عطا ڪيو، جنهن جي عمر 6 سال آهي، هاڻ انهن وٽ ڌيءَ جي پيدائش ٿي  آهي، اسپتال جي ذريعن جو چوڻ آهي ته صدف خان ۽ ٻارڙي جي حالت بهتر آهي، ڌيءَ جو پيءُ بنجڻ تي فواد خان  جي دوستن، مائٽن ۽ چاهيندڙن پاران مبارڪن جا پيغام وصول ٿي رهيا آهن، جيڪي ٻارڙي جي وڏي عمر لاءِ دعا ڪري رهيا آهن.

 

مان پاڪستاني اداڪارن جي ڪم جو قدر ڪريان ٿي: هيما مالني

ممبئي (شوبز نيوز) بالي ووڊ اداڪارا ۽ سياست دان هيما مالني چيو آهي ته اها فنڪارن جي عزت ڪري ٿي،صحافين سان  ڳالهائيندي هيمامالني چيو ته بحيثيت فنڪار مان پاڪستاني فنڪارن جي ڪم جو قدر ڪريان ٿي، پر مان ان بابت ڪجهه نه ٿي چوڻ چاهيان ته انهن کي ڀارت ۾ رهڻ گهرجي يا ملڪ ڇڏڻ گهرجي هن  وڌيڪ چيو ته فنڪار صرف فنڪار هوندو آهي ڀلي سندس تعلق پاڪستان سان هجي يا ڀارت سان، پر اها بدضمني آهي ته اهي پاڪستان کان آهن، مان اهو ضرور چوندس ته اهي گهڻا سٺا فنڪار آهن ۽ انهن ڀارت ۾ گهڻو سٺو ڪم ڪيو آهي.هن هڪ سوال جي جواب ۾ چيو ته مان ان تڪرار ۾ ملوث ٿيڻ نه ٿي چاهيان، اڙي حملي کانپوءِ جتي رنديپ هودا، سونالي ماندري ايم اين ايس جي پاڪستاني فنڪارن تي پابندي جي مطالبي جي حمايت ڪئي آهي، هتي سلمان خان، ڪرن جوهر، انوراگ ڪيشپ، همسل مهتا ۽ ناليش لوڪونور ان پابندي جي خلاف آهي.

 

ٽيسٽ ڪرڪيٽ سيريز، ڪپتان مصباح الحق سوڌو ڪيترائي رانديگر دبئي پهچي ويا

لاهور (اسپورٽس نيوز) ويسٽ انڊيز جي خلاف ٽيسٽ سيريز کيڏڻ لاءِ ڪپتان مصباح الحق دبئي پهچي ويو،جڏهن ته اوپنر محمد حفيظ ۽ احمد شهزاد پيٽرنز اليون ۾ ڪارڪردگي جي بنياد تي ٽيم قومي اسڪواڊ ۾ حصو بڻجندا. ذريعن مطابق پاڪستان ۽ ويسٽ انڊيز جي وچ ۾ ٽن ٽيسٽ ميچن  جي شروعات 13 آڪٽوبر کان ٿيندي،جنهن ۾ شامل ٿيڻ لاءِ ڪپتان مصباح الحق پنهنجي گهرواري ۽ ٻارن سوڌو لاهور جي علاما اقبال انٽرنيشنل ائيرپورٽ کان دبئي لاءِ نڪري چڪو آهي.

 

ڀارتي ڪرڪيٽ بورڊ پنهنجي ئي عدالت کي بليڪ ميل ڪرڻ لڳو

ممبئي: لوڌا ڪميشن پاران کاتا ضبط ڪرڻ واري واويلا ڪندڙ ڀارتي ڪرڪيٽ بورڊ پنهنجي ئي عدالت کي بليڪ ميل ڪرڻ شروع ڪري ڏنو آهي. صدر ۽ حڪمران پارٽي ڀارتيا جنتا پارٽي جي پارليامينٽ جي ميمبر انواراگ ٺاڪر جو چوڻ آهي ته کاتا ضبط ڪرڻ سان اداري جي ساک تباهه ٿي ،نيوزيلينڊ سان هوم سيريز به غير يقيني جو شڪار آهي،بنا پئسن جي اسان ميچن جي ميزباني ڪئين ڪري سگهنداسين. ذريعن مطابق ڀارتي ڪرڪيٽ بورڊ جسٽس لوڌا جي اڳواڻي ۾ جڙيل پينل جي سفارشن لاڳو ٿيڻ ۾ ڪن لاٽار کان ڪم وٺي رهيو آهي.سپريم ڪورٽ شروعات ۾  انهن  کي 30 آڪٽوبر تائ.ين سفارشن جي پهرين مرحلي لاڳو ڪرڻ جو وقت ڏنو هو،اهو وقت گذاري ڇڏڻ کانپوءِ بي سي سي آئي عدالتي فيصلي جي ڀڃڪڙي ڪئي،30 سيپٽمبر  تي ورڪنگ ڪميٽي اجلاس ۾ سڀني ميمبرن کي 2 رقمن ڏيڻ جو فيصلو ڏيڻ کان ترت پوءِ ختم ڪيو ويو، پر لوڌا ڪميشن معامعلي کي سمجهندي لاڳاپيل بينڪن کي خط لکي انهن کي ٻنهي رقمن روڪڻ جو چئي ڇڏيو.

 

جنگي جنون ۽ زميني حقيقتون: رزاق عاصي

ڀارت ۾مودي سرڪار ۽ پاڪستان ۾نواز حڪومت جي اقتدار ۾ اچڻ کان پوءِ ٻنهي ملڪن جون سرحدون ڇڪتاڻ جي ور چڙهيل آهن، رڳو ائين به ناهي ته هندوستان ۽ پاڪستان ۾ڪو پهريون ڀيرو  ڇڪتاڻ وارو ماحول پيدا ٿيو آهي، پر مشرف جي آمريت اچڻ کان اڳ به ڪارگل معاملي کي جواز بڻائي  جمهوريت جو تختو اونڌو ڪيو ويو هو، پر  اسين ڳالهه ڪنداسين ان کان به اڳ جي جڏهن ننڍي کنڊ جي وجود جا ٻه حصا ڪيا ويا ۽ بعد ۾ مذهب جي بنياد تي قومون تشڪيل ڏئي، هڪ ڌرتي جي ڪيل ٻن ٽڪڙن جي هنجهه ۾ رهندڙ  انسانن کي اهڙو ته ورهايو ويو،  جنهن کانپوءِ هيءَ ڪجهه ڌرين جي مفادن جي جنگ جو هاڻ ڪٿي به دنگ نٿو ٿئي، اهو چوڻ جو به اسين حق رکون ٿا ته جڏهن يورپ جي سوين ورهين واري معاشي حڪمراني تي چائنا پنهنجو مڪمل قبضو ڪري ورتو آهي ته هن جا اثر دنيا جي اسرندڙ ملڪن تي پوڻ به اڻٽر آهي، اسين ڀارتي سياستدان توڙي فوج ۽ پاڪستان جي به ساڳي ڌرين  کي  هڪ ئي صف ۾ بيٺل ڏسون ٿا، ڇو جو جنگي ڇڪتاڻ ڪنهن به صورت ٻنهي ملڪن جي غريب توڙي عام ماڻهو جي حق ۾ ناهي، ڇو جو جنگ ۽ پيار ۾ اهو سڀ ڪجهه جائز بڻجي وڃي ٿو جنهن سان انساني رت جي به ڪا تميز ناهي هوندي، جنگين جي نقصان کان ڪو به اهڙو ذهن ناهي جيڪو اڻڄاڻ هجي، دنيا جون جنگيون گواهه آهن ته هن ۾ وڌ کان وڌ عام انسان جو رت وهيو آهي، گهر، ٻنيون ٻارا، مال متاع، توڙي انساني وجودن جي ڀيل به سڀ کان گهڻي عام ماڻهو جي ٿي آهي،  هاڻ جڏهن دنيا هڪ سڌريل ۽ انساني حقن جي حوالي سان تمام گهڻي ڳڻتي رکي ٿي ته اهڙي صورتحال ۾ جنگيون ڇيڙڻ ايترو سولو به ناهي پر جڏهن ڳالهه انساني انا ۽ سگهارن جي مفادن جي هجي ته پوءِ ڪو به حادثو ٿيڻ ۾ دير ناهي لڳندي.

موجوده وقت هلندڙ ڇڪتاڻ جا سبب صرف ۽ صرف ٻن سپرپاور سڏائندڙ  جا مفاد آهن، جنهن جي لپيٽ ۾ سموري دنيا جي ترقي پزير ملڪن کي بلي جو ٻڪر بڻجڻو پوندو، پاڪستان ۽ ڀارت جي معاملي کي جيڪڏهن ڏسبو ته هي رڳو ڪشمير مسئلي تي ناهي، هن ڇڪتاڻ جي پويان ٻيا به کوڙ سارا سبب آهن، جنهن جي ڪري ڪنهن به صورت ٻنهي ملڪن ۾ ڇڪتاڻ جو برقرار رهڻ ئي حڪمرانن جي مفاد ۾ آهي، پاڪستان جا الزام اهن ته ”را“  ملڪ جي اندروني معاملن ۾ مداخلت پيو ڪري، جڏهن ته ڀارت به آءِ ايس آءِ  جي اثر هيٺ رهندڙن کي پنهنجي لاءِ خطرو قرار ڏيندو پيو اچي، ان پيش منظر ۾ ڀارتي وزيراعظم نريندر مودي جو هي بيان ميڊيا تي آهي ته  ڀارت نه ڪڏهن ٻئي ملڪ تي حملو ڪيو آهي ۽ نه ئي ڪنهن ملڪ جي زمين جو بکيو آهي. ڀارت ٻين جي مفاد لاءِ قربانيون ڏنيون آهن. ٻن عالمي جنگين ۾ مفاد نه هجڻ باوجود ڏيڍ لک ڀارتي فوجين قربانيون ڏنيون آهن، پرڏيهه ۾ رهندڙ ڀارتي به ٻين برادرين سان گڏجي رهن ٿا. جڏهن ته اهڙي نموني پاڪستان حڪومت به پنهنجو الڳ موقف ٿي رکي جنهن لاءِ پرڏيهي معاملن بابت وزيراعظم جي مشير طارق فاطمي جو چوڻ هو ته ڀارت ڪشمير تي ٿيندڙ ظلم تان ڌيان هٽائڻ چاهي ٿو. سنڌ طاس معاهدي ۾ آمريڪا جو به ڪردار آهي. اهو معاهدو ختم ٿيو ته ڪنهن به حد تي وڃڻ لاءِ تيار آهيون.

ڀارت کي ايران سان لاڳاپن تي پريشاني نه هئڻ گهرجي. ان سان سٺا لاڳاپا آهن. ڪابل جا پنهنجا اندريان مسئلا آهن جڏهن ته ڀارت ڪشمير مسئلي تان ڌيان هٽائڻ چاهي ٿو. پر پرڏيهي معاملن جي مشير سرتاج عزيز ته سموري ڇڪتاڻ کي ڪشمير مسئلو حل ٿيڻ تائين ٻنهي ملڪن جي لاڳاپن ۾ ڇڪتاڻ جا پاڇا برقرار رهڻ قرار ڏنو آهي، سندس اهو به چوڻ آهي ته ڀارت ڪشمير ۾ آزادي تحريڪ کي ختم ڪرڻ لاءِ ڪريل حرڪت تي لهي آيو آهي. ايل او سي تي حالتون معمول تي آڻڻ چاهيون ٿا. ڪشمير تي نئين قومي پاليسي ٺهڻ ضروري آهي. پر هن اهو به مڃيو ته ڀارت طرفان پيغام آيو آهي ته ڇڪتاڻ گهٽائڻ چاهيون ٿا. پر پاڪستان جي دفاع واري وفاقي وزير خواجا آصف ته سڄي معاملي کي ڀارت نام نهاد سرجيڪل اسٽرائيڪ جو ڊرامو رچايو. ڀارتي ڳجها ادارا پاڻ اهڙا واقعا ڪندا  آهن. برهان واني جي قتل کانپوءِ به ڪشمير ۾ ڪرفيو لاڳو آهي. ڪشمير جي آزادي واري تحريڪ ڪشمير فتح ڪرڻ سان همڪنار ٿيندي. سي پيڪ کي دنيا جي ڪابه طاقت روڪي نه ٿي سگهي. هن چيو ته افغانستان اسان جي دشمن سان گڏ ٿيو آهي ته ڪا ڳالهه ناهي. اسان به پنهنجي رويي تي نظرثاني ڪري سگهون ٿا.

هاڻ اسين مٿين بيانن مان آساني سان اهو سمجهي سگهون ٿا ته آخر ڪهڙو مسئلو آهي، انڪري ٻنهي ملڪن ۾ وڌندڙ ڇڪتاڻ جي پويان وري به سپر پاورن جا مفاد آهن، ڀارت توڙي پاڪستان جو عوام ڇا ٿو سوچي اهڙي ڇڪتاڻ  نه رڳو ٻنهي ملڪن جي مفادن لاءِ خطرناڪ آهي، بلڪه هي جنگ سموري دنيا جي امن لاءِ هاڃيڪار ثابت ٿيندي، باقي اسين صوفين جي ڌرتي جا واسي ته ڪنهن به صورت ان ڇڪتاڻ جي حق ۾ ناهيون ته انسانيت جو قتل عام ٿئي، جنگ کٽڻ يا هارائڻ وڏو مسئلو ناهي، اهم مسئلو جنگي جنون ۽ سوڀ جي حاصلات لاءِ ٿيل انساني قتل عام وڏي ۾ وڏو الميو آهي، انڪري اسان محبتن جي جنگ چاهيون ٿا بقول ساحر لڌهيانوي جي ته:

اے شریف انسانو

خون اپنا ہو یا پرایا ہو

نسلِ آدم کا خون ہے آخر

جنگ مشرق میں ہو کہ مغرب میں

امنِ عالم کا خون ہے آخر
بم گھروں پر گریں کہ سرحد پر

روحِ تعمیر زخم کھاتی ہے

کھیت اپنے جلیں کہ اوروں کے

زیست فاقوں سے تلملاتی ہے
ٹینک آگے بڑھیں کہ پیچھے ہٹیں

کوکھ دھرتی کی بانجھ ہوتی ہے

فتح کا جشن ہو کہ ہار کا سوگ

زندگی میّتوں پہ روتی ہے
جنگ تو خود ہی ایک مسئلہ ہے

جنگ کیا مسئلوں کا حل دے گی

آگ اور خون آج بخشے گی

بھوک اور احتیاج کل دے گی
اس لئے اے شریف انسانو!

جنگ ٹلتی رہے تو بہتر ہے

آپ اور ہم سبھی کے آنگن میں

شمع جلتی رہے تو بہتر ہے

 

 

سياست جي مونو گرام ۾ اسان جا ڌنڌلا عڪس: شوڪت لوهار

لڳي ائين ٿو ته عمران خان صاحب جو پلاٽ اڏا رائيونڊ وارو مها جلسو ڀارتي فوج جي جارحيت ۽ مودي سرڪار جي ارهه زورائين جي بڙ بڙ دکي ۾ ڪٿي گم ٿي ويو. پنهنجي جاءِ تي ر ائيونڊ مارچ هڪ نظر ۾ هڪ تمام وڏو ۽ خوفناڪ قسم جو جلسو ٿيندي نظر اچي رهيو هو. جهڙي نموني رائيونڊ ۾ خيما کوڙڻ کان اڳ ۾ پي ٽي آءِ ۽ نون ليگ جا متوالا هڪ ٻئي جي آمهون سامهون هئا ۽ هڪ خوف جي فضا ڇانيل هئي، خون ريزي ٿيندي نظر اچي رهي هئي. رتوڇاڻ جو منظر عيان ٿيندي پسجي رهيو هو پر خير سان اهو طوفان اچي پنهنجي جاءِ تي ويهي رهيو آهي. ان جي گرد آهي، جيڪا هوريان هوريان ٿمجي رهي آهي. هن وقت سياست جي شفق لالاڻ ۾ خان صاحب جي وٺ پڪڙ واري سياست ڪنهن سُست توپچي جيان پنهنجي نشاني کان پري مار ڪري رهي آهي.

رائيونڊ مارچ ۾ پي ٽي آءِ جو اڪيلي سر شو صرف ناظرين ۽ حاضرين کي محزوز ڪرڻ ۾ ڪامياب ويو آهي. باقي نواز ليگ تي هروڀرو ان جو ڪو خاص اثر ڪو نه پيو آهي. هونئن به هن وقت والاريل ڪشمير ۾ اڙي واري حملي کانپوءِ جنگ جي بڇ بڇان آهي. انهيءَ ڏس ۾ هن اها دعويٰ به ڪئي ته اسين سرجيڪل اسٽرائيڪس ڪيا آهن. حالانڪه اهو نارمل جو ڀارت جو ائب نارملي ٺڪاءُ هو، جيڪو هُو لائين آف ڪنٽرول تي ڪندو رهيو آهي، جيڪا بين الاقوامي قانون جي پڻ ڀڃڪڙي آهي پر جيئن ته ڀارت بين الاقوامي قانون جي لڳاتار ڀڃڪڙي ڪندو رهيو آهي ۽ اهو سڀ ڪجهه ان کي ڦٻيو به آهي. تنهن ڪري ان ۾ خير عافيت سمجهي ته جي ائين دنيا ۾ هُل هنگامو مچائبو ته شايد ڀارت جي واهه واهه ٿي ويندي. وري ڀارتي سياست جي هم نوا اتان جي خابرو ميڊيا به ٿي آهي، جنهن ڀارتي فوج ۾ شايد اڏامندڙ شڪتي ڏسي ان کي افوق الفطرت سمجهڻ شروع ڪيو آهي ۽ ڀارتي ميڊيا هن وقت پاڪستان تي گند اُڇلائڻ ۾ پورو آهي.

لائين آف ڪنٽرول جي ڀڃڪڙي ڪندي جڏهن هن ٻن پاڪستاني فوجين کي شهيد ڪري ڇڏيو ته ملڪان ملڪ ڀارتي ميڊيا اهي شوشا ڇڏيا ته اسان پاڪستان تي سرجيڪل اسٽرائيڪ ڪيو آهي، پر پاڪستاني فوج جي جوابي ڪارروائي ۾ جيڪو سندن جاني نقصان ٿيو آهي، ان جو ذڪر ڪرڻ لاءِ سندن وات ۾ مڱ پيل آهن. اها خبر ته پوءِ ڪنهن عالمي اداري تان بريڪ ٿي ته ڀارت جا چوڏهن کن فوجي پاڪستاني فوج جي جوابي ڪارروائي ۾ مارجي چڪا آهن. وري مودي سرڪار جو جنگي جنون وڃي سڌ طاس معاهدي جي نڙي تي ننهن رکڻ تائين پهتو، جنهن ۾ نريندر مودي اهو چيو ته خون ۽ پاڻي گڏ گڏ نٿا وهي سگهن. هو هن خطي جي ڏکيائين ۽ تڪليفن کان ڀلي ڀت واقف آهي پر ڇاڪاڻ ته ضد ۽ انا هٺ ڌرمي، انهيءَ کان وڌ ڪشمير ۾ ڪيل پنهنجا ڪڌا ڪم سندن آڏو سجهي رهيا آهن.

موجوده صورتحال ۾ جتي عمران خان جي پي ٽي آءِ جيڪا هر حوالي سان نون ليگ سان مهاڏو اٽڪائڻ ۾ پوري آهي تنهن جي رائيونڊ مارچ جو ملڪي سياسي نوٽيس بورڊ تي ڪو خاطر خواهه اثر ڪو نه ٿيو آهي. اسان جا ماڻهو جنهن اُميد جي ٽرنڪولائيزر ۾ رهندا آهن، اهو بهرحال عمران خان پورو ڪندي نظر ڪو نه ٿو اچي.

هن رياست جو عوام، جيڪو عوام گهٽ پر هڪ ٽيڪسي تي ڏنل/ ورتل هڪ مڇي جو تلاءُ آهي، جنهن کي جيڪو وڻي جهڙي اگهه وڪڻي ڇڏي، وري اوچتو ڪٿي دشمني ۾ ڪو زهريلي دوا انهيءَ مڇي جي تلاءُ ۾ اڇلي وڃي ته سڄو تلاءُ زهريلو ۽ صبح جو سڀ مڇيون بنا ڪنڊي جي موت جي امرت ۾ پيون ترنديون.

هن ملڪ جو عوام نعري ۽ لاري جي آسري پوري عمر گهاري ڇڏي ٿو، پر شرط اهو آهي ته آسرو ختم نه ٿئي، جيتري اُميدپرستي مان سمجهان ٿو اسان وٽ آهي، اها جيڪڏهن ڪن شعور جي سيجيل ماڻهن کي ٻڌائبي ته نگ رهجي وڃن. هن وقت هن ملڪ جو عوام لوڊشيڊنگ جيڪا گهڻو ڪري هٿرادو آهي، جي آزار ۾ احتجاج ۽ خودڪشيون ڪري ٿڪجي پيئي آهي. آئون اها دعويٰ ڪريان ٿو ته هن وقت ڀلي جرمن نازي پارٽي به جيڪڏهن هن ملڪ ۾ لوڊشيڊنگ، بيروزگاري، دهشتگردي ۽ لاقانونيت کي ختم ڪرائي ته هوند ماڻهو ان کي ووٽ ڏيڻ لاءِ تيار ٿي ويندا.

بهرحال اسان وٽ ننڍا ننڍا علائقا، ملڪن، چوڌرين، خانن، نوابن ۽ انهن جي ايندڙ نسلن کي دان ڪيل آهن، انهن کي وڻي ته هو پنهنجن پنهنجن علائقن ۾ ڪا ڊسپينسري، ڪو اسڪول ڪو روڊ ڪو رستو ٺهرائين، جيڪڏهن سرڪار جا موڊ ڪجهه ٻيو چاهين تڏهن به وس جا مالڪ آهن انهن کان ڪو پڇڻ آکڻ وارو ڪو نه آهي.

2013ع جي چونڊن کانپوءِ جڏهن پي ٽي آءِ واضح طرح ظهور پذير ٿي آئي هئي ته ائين لڳو هو ته هاڻ واقعي خان صاحب صحيح دڳ تي هلڻ شروع ڪيو آهي. توڙي جو پرويز مشرف جي  شفقت جو هٿ به هن پارٽي مٿان پئي رهيو هو ماڻهو اهو سمجهڻ لڳا هئا ته واقعي هاڻ تبديلي سونامي بڻجي نئون پاڪستان ٺاهيندي. اهو برگر ڪلاس جنهن ڪڏهن پاور پاليٽڪس کي گاهه ئي ڪو نه وڌو هو ۽ هميشه ان کي فضول سمجهيو هو. ٻيو ته پي ٽي آءِ پنهنجي پر ۾ هڪ رجعت پرست پارٽي آهي، پر پوءِ به هو پنهنجن جلسن، جلوسن ۾ ميوزڪ، مستي ۽ تفريح ڪرڻ جي ڪري جلسي ۾ ڪامن ريئارڪ جي بوريت کان بچي پيا وڃن پر اهو سڀ ڪجهه هڪ واقعي ڏاڍي سنجيده ۽ هڏڏوکي عوام دوست پارٽي ۽ اڳواڻ لاءِ ڪافي ڪو نه هوندو آهي، جيڪو ماڻهن کي هاڻ آهستي آهستي محسوس ٿيڻ لڳو آهي. قادري  جي ڪلمينشن عمران خان ۽ ٻين گهڻن ئي فري هٽ کيڏيندڙ رانديگرن کي ملائي جڏهن اسلام آباد جي گرين بيلٽ  ماڻهن کي ميڙي گڏ ڪيو هو ۽ ان وقت ميڊيا به ڀرپور سندن ساٿ ڏئي رهي هئي. ائين لڳي رهيو هو ته انقلاب آيو ڪي آيو، پر خير علامه صاحب جي خطابن تي ڪنهن کي ڪو به شڪ شبهو ڪو نه آهي. هو ڳالهائڻ ۽ حوالو ڏيڻ جو ماهر آهي. هن وٽ ماڻهن کي گڏ ڪرڻ جو فن به آهي ۽ سندن جماعت عوامي تحريڪ پي اي ٽي، پي ٽي آءِ کان وڌيڪ منظم آهي. ان به هڪ حد تائين عمران خان جو سياسي ڪزن ٿيڻ جو ڪردار نڀايو پر مولانا طاهر القادري جي اڏام جيئن تڪڙي هوندي آهي، تنهن ڪري هن دفعي ماڊل ٽائون جي قصاص ريلين به ڪو خاطر خاهه ٻوٽو ڪو نه ٻاريو، پر بهرحال ماڊل ٽائون جي بيگناهه ماڻهن جو قتل نواز ليگ کي ڪٿي نه ڪٿي سوڙهو ضرور ڪندو.

هن وقت عطاءُ الله عيسيٰ خيلوي جا گيت به عمران خان جي جلسن ۾ ڪو نه ٿا گونجن، نظم ضبط پنهنجي جاءِ تي پر پارٽِي اندر جيڪا ٽوڙ ڦوڙ آهي سا به وقتن فوقتن سامهون ايندي رهي ٿي. لڳي ائين ٿو ته خان صاحب صرف اشو ۽ الزام کان ٻاهر نڪرڻ ئي نٿو چاهي. ڪير به کير جو ڌوتل ڪو نه آهي. پاناماليڪس وارو وڏو پينڊورا باڪس کلي چڪو آهي تڏهن به ان جو ايڏو وڏو جهٽڪو ڪو نه آيو آهي جيڪو اسين انگلستان يا آئس لينڊ ۾ ڏٺو. اسان وٽ مڙها ۽ منجا مرندي تائين گڏ هوندا آهن، اهي ائين ايترو جلدي ان جي جان ڪو نه ٿا ڇڏين.

پ پ پ هاڻ گهڻي ڀاڱي اهو سمجهي ڇڏيو آهي ته سندس وجود ملڪ جي سڀ کان وڏي صوبي ۾ وڃي ٿو سُسندو ۽ شايد ڀلي پيو ننڍو ٿئي ان جي کيس پرواهه ڪو نه آهي.

پنجاب ۾ نواز ليگ ماڻهن کي امن، خوشحالي، روڊ، رستا، ريلون ۽ سُک ڏنا آهن ۽ هو اتان پيا کائيندا، جڏهن ته هتي ڪاري وارا ڪک ۽ سڀ گٽر اٿليا پيا آهن، بک، بيروزگاري، جهالت ۽ وڏيري اوطاق نه صرف ڊرامن ۾ پر حقيقي سنڌ به بمباري ٿيل ڪابل قنڌار ۽ عراق کان وڌيڪ ڀيانڪ منظر پيش ڪري رهي آهي. سنڌ ۾ وڪرو ڪرڻ لاءِ هاڻ ڪٿي نعري جي ضرورت ئي نه رهي آهي جو هتان جي عوام جي قوت ڄڻ ته ختم ٿي چڪي آهي، انهن جي ڳچين ۾ وڏا وڏا ڳٽ آهن، انهن جي پيرن ۾ ٿلهيون لوهي سيخون آهن. هاڻ سنڌ جو عوام بس هڪڙي نعري جي نشي ۾ پُر آهي جو هو سنڌي آهي ۽ هن وٽ پنج هزار سالن جي پراڻي ۽ دنيا جي اعليٰ تهذيب آهي. منهنجي خيال ۾ مشڪلاتن جو هڪ مها ساگر سنڌ واسين کي بي حس ۽ بي وس ڪرائڻ لاءِ ڪافي آهي. خان صاحب جا خواب تعبير ٿيندي نظر ڪو نه ٿا اچن باقي سياست ۾ ڪا به شيءِ آخري ڪو نه هوندي آهي.

Shokatali.lohar@gmail.com

 

 

ڀارت کي منهن ٽوڙ جواب ڏيڻ تي اتفاق

سياسي ۽ عسڪري قيادت چيو آهي ته ڀارت جي ڪنهن به ايڊوينچر جي لاءِ اسان پوري طرح تيار آهيون، سرحدن جي حفاظت لاءِ سياسي ۽ عسڪري قيادت ۽ پوري قوم متحد آهي. لائين آف ڪنٽرول تي ڀارتي فورسز جي هروڀرو جي فائرنگ جو موثر جواب ڏنو ويو، ڀارت جو سرجيڪل اسٽرائيڪ جي دعويٰ بي بنياد ۽ ڪوڙي آهي جيڪا هاڻي بي نقاب ٿي وئي آهي، دهشتگردي خلاف جنگ جي نازڪ موڙ تي لائين آف ڪنٽرول ۽ اوڀرندي سرحدن تي ڇڪتاڻ ۾ اضافي سان دهشتگردن کي فائدو پهچي سگهي ٿو پر هر قسم جي خطري کي منهن ڏيڻ لاءِ فوج تيار آهي. نيشنل ايڪشن پلان ۽ قومي سلامتي بابت اجلاس وزيراعظم جي صدارت ۾ ٿيا. اجلاسن ۾ ان ڳالهه تي اتفاق ڪيو ويو ته انتهاپسندي ۽ دهشتگردي کان ملڪ کي ڇوٽڪارو ڏيارڻ لاءِ هيستائين حاصل ٿيندڙ فائدن جي سگهه ڏيڻ لاءِ قومي سطح تي اجتماعي ڪوششون ۽ صوبائي سطح  خاص طور تي ڪوششن جي ضرورت آهي، جڏهن ته ڪجهه علائقا جتي اڳڀرائي غير تسلي بخش رهي آهي، اتي اڳتي وڌڻ تي به اتفاق ڪيو ويو آهي. قومي سلامتي واري صلاحڪار ۽ نيشنل ايڪشن پلان تي عملدرآمدي ڪميٽي جي ڪنوينر ليفٽيننٽ جنرل (ر) ناصر خان جنجوعه اجلاس کي نيشنل ايڪشن پلان تي عملدرآمد جي صورتحال ۽ ان مرحلي تي درپيش چئلينجن کان آگاهه ڪيو. نيشنل ايڪشن پلان جي هر رخ تي ڌار ڌار تفصيلي غور ويچار ڪيو ويو، وزيراعظم هائوس طرفان جاري بيان موجب قومي سلامتي جي صلاحڪار ان ڳالهه تي زور ڏنو ته نيشنل ايڪشن پلان تي عملدرآمد لاءِ صوبائي حڪومتن جو ڪردار اهم آهي ۽ اسان سڀني لاءِ مشينري جذبي سان گڏجي ڪم ڪرڻ اڻٽر آهي، اجلاس ۾ نيشنل ايڪشن پلان جي مختلف جزن لاءِ هدف ۽ نظام وقت جي حوالي سان ايندڙ جي لائحه عمل تي اتفاق ڪيو ويو، اجلاس ۾ سيڪيورٽي فورسز، قانون لاڳو ڪندڙ ادارن ۽ سول آرمڊ فورسز (سي اي ايف) جي قربانين جو اعتراف ۽ کين ساراهيو ويو، شرڪت ڪندڙ وفاقي ۽ صوبائي انٽيلي جنس ادارن جي ڪم جي به واکاڻ ڪئي جنهن سان سيڪيورٽي فورسز ۽ قانون لاڳو ڪندڙ ادارن کي دهشتگردن جي ڪيترن ئي ڪوششن کي ناڪام بڻائڻ ۾ مدد ملي ۽ کين قانون جي دائري ڪار ۾ ڪم لاءِ ساز گار ماحول فراهم ڪرڻ جي عزم جو اظهار ڪيو ويو. وزيراعظم جي سيڪريٽري فوجداري نظام انصاف ۾ سڌارن جي ڪجهه رخن تي بريفنگ ڏني، آئنده لائحه عمل جي باري ۾ اتفاق راءِ جوڙڻ جي لاءِ دهشتگردي بابت ڪيسن کي منهن ڏيڻ جي لاءِ جاچ، پڇاڻو ۽ عدالتي طريقيڪار جي حوالي سان قانون ۾ سڌارن جون تجويزون به شرڪت ڪندڙن کي پيش ڪيون ويون، شرڪت ڪندڙن اتفاق ڪيو ته گهربل نتيجا حاصل ڪرڻ لاءِ وفاقي ۽ صوبائي حڪومتن ۽ قانون لاڳو ڪندڙ ادارن جي وچ ۾ جامع رابطن جي ضرورت آهي، دشمن جي ناپاڪ ارادن کي ناڪام بڻائڻ جي لاءِ انٽيلي جنس رايا حاصل ڪرڻ، تجزيا، جاچ پڙتال ۽ استعمال کي وڌيڪ بهتر بڻائڻ تي به اتفاق ڪيو ويو. ان موقعي تي وزيراعظم نواز شريف چيو ته نيشنل ايڪشن پلان سمورن ڌرين جي وچ ۾ ڊگهي بنياد جي اتفاق راءِ جو نتيجو آهي، قومي پاليسي گهرجن تحت اسان دهشتگردي جي خلاف جنگ وڙهي رهيا آهيون ۽ پرتشدد انتهاپسندي جي خلاف منهن ڏئي رهيا آهيون، قوم اسان مان معاشري کي انهن براين مان سدائين جي لاءِ ڇوٽڪارو ڏيارڻ جي اميد رکي ٿي ۽ اسان هر حالت ۾ ان جي اميدن تي پورو لهنداسين. جڏهن ته قومي سلامتي ڪميٽي جي اجلاس ۾ پاڪ فوج جي آپريشنل تيارين تي مڪمل اطمينان جو اظهار ڪيو ويو.

 

پاڪستان جي حق ۾ ڳالهائڻ اوم پوري کي مهانگو پئجي ويو، بغاوت جو ڪيس داخل

ممبئي(شوبز نيوز) بالي ووڊ ۾ اهڙن ماڻهن جي کوٽ ناهي، جيڪي پاڪستان خلاف شاهه کان وڌيڪ شاهه جا وفادار بڻجي ڳالهائين ٿا پر اهڙا فنڪار به موجود آهن، جيڪي سچي ۽ سڌي ڳالهه منهن تي چوڻ ۾ ناهن ڪيٻائيندا ۽ انهن مان اوم پوري به هڪ آهي،جنهن کي پاڪستان جي حق ۾ ڳالهاڻ جي  سزا ملي رهي آهي ۽ کيس بغاوت جي ڪيس کي منهن ڏيڻو پئجي ويو آهي. رپورٽن موجب اوم پوري ڀارتي ٽي وي جي پروگرام ۾ شامل هو، جنهن جو موضوع پاڪ-ڀارت ڇڪتاڻ ۽ بالي ووڊ ۾ پاڪستاني فنڪارن جو ڪم هو، ان دوران هڪ سوال جي جواب ۾ اوم پوري چيو ته ڪير ڪجهه به چوي پر مان پاڪستاني فنڪارن سان گڏ ضرور ڪم ڪندس؟، اهڙي بيان کانپوءِ اوم پوري خلاف بغاوت جو ڪيس داخل ڪيو ويو آهي.

 

سلمان جي پيءُ سليم خان پاڪستاني فنڪارن جي حمايت ڪري ڇڏي

ممبئي(شوبز نيوز) بالي ووڊ اداڪار سلمان خان جو پيءُ  سليم خان به پاڪستاني اداڪارن جي حمايت ۾ ميدان تي اچي ويو آهي. رپورٽ موجب هندو انتهاپسندن طرفان پاڪستاني اداڪارن کي ملڪ ڇڏيڻ جي ڌمڪين سان گڏوگڏ مٿن پابندي جو پڻ مطالبو ڪيو ويو هو، جنهن خلاف سلمان خان پنهنجي رد عمل اظهار ڪيو هو، جنهن تي دبنگ خان کي سخت تنقيد جو نشانو بڻايو ويو. اهڙي صورتحال بعد سندس پيءُ پڻ پنهنجي خاموشي ٽوڙي ڇڏي آهي. ان حوالي سان سليم خان جو چوڻ آهي ته منهنجي پٽ پاڪستاني اداڪارن طرفان ڀارتي فلمن ۾ ڪم ڪرڻ تي پابندي خلاف آواز اٿاريو آهي، جيڪا هاڪاري سوچ آهي، ڇو ته پاڪستاني فنڪارن تي پابندي جو مطالبو غلط آهي.

 

پاڪستان۽ ويسٽ انڊيز وچ ۾ ٽين ۽ آخري ون ڊي انٽرنيشنل ڪرڪيٽ ميچ اڄ کيڏي ويندي

ابوظهبي (اسپورٽس نيوز) پاڪستان ۽ ويسٽ انڊيز جي ڪرڪيٽ ٽيمن وچ ۾ ٽين ۽ آخري ون ڊي انٽر نيشنل اڄ اربع تي شيخ زيد اسٽيڊيم ابوظهبي ۾ کيڏي ويندي. گرين شرٽس کي ٽن ميچن جي سيريز ۾ 0-2 جي سرسي حاصل آهي. شارجه ۾ کيڏيل پهرين ميچ ۾ پاڪستان 111 ۽ ٻي ميچ ۾ 59 رنسن تان ڪاميابي حاصل ڪري ون ڊي سيريز کان علاوه ٻنهي ٽيمن وچ ۾ 3 ٽيسٽ ميچون پڻ کيڏيون وينديون. ان سلسلي ۾ پهرين ٽيسٽ 13 کان 17 آڪٽوبر تائين دبئي، ٻي ٽيسٽ 21 کان 25 آڪٽوبر تائين ابوظهبي، جڏهن ته ٽين ۽ آخري ٽيست ميچ 30 آڪٽوبر کان 3 نومبر تائين شارجه ۾ کيڏيون وينديون.