تازيون خبرون

Monthly Archives: September 2016

فواد خان هندو تنظيمن جي ڌمڪين کانپوءِ پاڪستان موٽي آيو:پرڏيهي ميڊيا

ممبئي (شوبز نيوز) ڀارتي ميڊيا دعويٰ ڪئي آهي ته هندو انتهاپسند تنظيمن پاران ملڻ وارين سنگين ڌمڪين سبب فواد خان ڀارت ڇڏي واپس پاڪستان هليو ويو آهي. اڙي حملي کانپوءِ ڀارت پاران پاڪستان تي هڪٻئي پويان الزامن جو سلسلو جاري آهي، جڏهن ته ڀارتي هندو انتهاپسندن ته پاڪستاني فنڪارن کي 48 ڪلاڪن ۾ ڀارت ڇڏڻ جون ڌمڪيون به ڏنيون آهن ۽ هاڻ ڀارتي ميڊيا ان ڳالهه جي دعويٰ ڪري رهي آهي ته پاڪستاني اداڪار فواد خان ڀارت ڇڏي ڏنو آهي.  ڀارتي ميڊيا رپورٽن موجب پاڪستاني اداڪار فواد خان هندو انتهاپسند تنظيم جي ڌمڪين کانپوءِ ڀارت ڇڏي پاڪستان واپس هليو ويو آهي ۽ في الحال هن جي جلد واپسي جو ڪو ارادو ناهي. رپورٽ ۾ چيو ويو آهي ته فواد خان کي پنهنجي ٻئي ٻار جي پيدائش جي سلسلي ۾ پاڪستان ته وڃڻو ئي هو، پر هاڻ واپسي جا امڪان تمام گهٽ لڳي رهيا آهن. واضح رهي ته گذريل ڏينهن ۾ هندو انتهاپسند جماعت مهاراشٽر انو نرمان سينا پاڪستاني فنڪارن کي 48 ڪلاڪن ۾ ملڪ ڇڏڻ جي ڌمڪي ڏيندي چيو هو ته جيڪڏهن انهن ڀارت نه ڇڏيو ته هو سنگين نتيجا ڀوڳڻ لاءِ تيار ٿي وڃن.

 

نجي ٽي وي جي ميزبان کي مداح پاران ڏنل آئسڪريم اسپتال پهچائي ڇڏيو

ڪراچي (شوبز نيوز) اب تڪ نيوز چينل جي ميزبان ثناءَ فيصل گذريل رات ناظم آباد ۾ پنهنجي مڙس سان گڏ آئسڪريم کائڻ لاءِ وئي، جتي 15 سالن جي هڪ ڇوڪري کائنس آٽو گراف گهريو ۽ گڏ سيلفي ڪڍڻ جي خواهش ڏيکاري، جنهن تي ثناءَ کيس جواب ڏئي ڇڏيو. ڪجهه دير کان پوءِ اهو ڇوڪرو ٻيهر ثناءَ کي آئسڪريم ڏيڻ لاءِ آيو، جيڪا پڻ ثناءَ  وٺڻ  کان انڪار ڪري ڇڏيو، پر ڇوڪري جي گهڻي اسرار کان پوءِ ثنا اها آئسڪري وٺي کاڌي. آئسڪريم کائڻ جي ٿوري دير کان پوءِ ئي سندس حالت خراب ٿي پئي جنهن کي ضياءَ الدين اسپتال داخل ڪيو ويو اتي حالت وڌيڪ خراب ٿيڻ جي ڪري کيس عباسي شهيد اسپتال داخل ڪيو ويو. سندس مڙس جو چوڻ هو ته ڇوڪري پاران ڏنل آئسڪريم ۾ زهر هو. ايس ايڇ او حيدري مارڪيٽ ذوالفقار ٻڌايو ته عباسي شهيد اسپتال ۾ ثناءَ فيصل جو بيان ورتو ويو آهي، جنهن کان پوءِ واقعي جي ايف آءِ آر داخل ڪئي آهي. جڏهن ته ڄاڻايل ڇوڪري جو پتو نه پئجي سگهيو آهي.

 

پاڪستان ايشين ڪوڏي ڪوڏي ميچ جي فائينل ۾ ڀارت کي مات ڏئي ڇڏي

هنوئي (اسپورٽس نيوز) ويٽنام ۾ کيڏي ويندڙ ايشين ڪوڏي ڪوڏي چئيمپين شپ ميچ جي فائينل ۾ پاڪستان پنهنجي راويتي مخالف ڀارت جي ٽيم کي چئني پاسن کان هارائي سونو ٻلو پنهنجي نالي ڪري ڇڏيو.پاڪستاني رانديگرن سخت مقابلي کانپوءِ ڀارت کي 28 مقابلن ۾ 30 پوائنٽن تان مات ڏني.

 

مڪي آرٿر جي رانديگرن کي“بي رحم” راند کيڏڻ جي هدايت

ابوظهبي (اسپورٽس نيوز) ويسٽ انڊيز جي خلاف ڪلين سويپ ڪاميابي جي خواهش ڪندي قومي ڪرڪيٽ ٽيم جي هيڊ ڪوچ مڪي آرٿر پاڪستاني رانديگرن کي بي رحم ڪرڪيٽ کيڏڻ جي هدايت ڏئي ڇڏي آهي.سندس سيريز جي ٽئين ٽي ٽوئنٽي ميچ کان اڳ چوڻ هو ته رانديگر بيرحماڻو رويا رکندي عالمي چئيمپين جي خلاف سيريز0-3 سان کٽڻ جي ڪوشش ڪن، بنا ڪنهن شڪ جي سيريز جي فتح صحيح رستي ۽ نئين ٽيم جي جڙڻ پاران پهرين وک آهي ۽ ان ڪري ڪجهه حقيقت پسنداڻا مقصدن کي ذهن ۾ رکي ڇڏيو آهي.پاور پلي ۾ قومي بيٽسمينن جي پهچ مان مطمئن آهيان،انگلينڊ جي خلاف سيريز ۾ جن ڳالهين جي سڃاڻپ ٿي ،انهن ۾ بهتري اچڻ لڳي پر ڊاٽ بالز جي حساب ۾ سنگل ڊبل تان گهٽتائي آندي وڃي.

 

عوامي حڪمرانيءَ جو نه پورو ٿي سگھندڙ خواب: جاويد ميمڻ

ڪراچي، حيدرآباد، دادو ۽ سيوهڻ کان پوءِ نيٺ سنڌ جو نئون وڏو وزير ڪيترا ڀيرا ملتوي ڪيل دوري تي جمع جي شام دير سان سکر پهتو. جتي هن 24 ڪلاڪ گذاريا ۽ پنهنجي ”نائڪ“ وڏي وزير هجڻ جي تاثر کي قائم رکڻ لاءِ رات جو ئي شهر ۾ ڪاهي پيو، گھنٽا گھر تي واقع هڪ هوٽل تي چانهن پيتي، فوڊ اسٽريٽ ۾ ائسڪريم کاڌي، نمڪ بازار ۾ لمڪا پيتي. سمورين جڳهن تي وڏو وزير پاڻ ادائگيون ڪندو رهيو.  ان دوران هو عام ماڻهن سان رلي ملي ويو ۽ سيلفيون ڪڍرايون. ٻه وزير سيد ناصر شاهه ۽ ڄام مهتاب ڏهر سميت پ پ اڳواڻن ۽ چونڊيل نمائندن جو وڏو جٿو ساڻس گڏ هو ۽ وي آءِ پي ڪلچر جي خاتمي جي دعوى ڪندڙ وڏي وزير جي قافلي ۾ 32 لينڊ ڪروزر، ويگو ۽ ٻيون وڏيون گاڏيون هيون جڏهن ته 12 پوليس موبائل ۽ ٻيون ڪارون ان کان سواءِ هيون. 50 کان وڌيڪ گاڏين جي پروٽوڪول ۾ گھمندڙ وڏي وزير ڊپٽي ڪمشنر آفيس ۾ آفيسرن سان گڏجاڻي ڪئي ۽ مختلف حڪم جاري ڪيا. وڏو وزير رات پنهنجي دوست ۽ اڳوڻي ايم پي اي سيد جاويد شاهه جي بيراج ڪالونيءَ واري رهائشگاهه تي ترسيو. ٻئي ڏينهن صبح جو اڳوڻي ايم پي اي ڊاڪٽر نصرالله بلوچ وٽ ناشتو ڪري اي آءِ يوٽي اسپتال جو دورو ڪيو ۽ پريس ڪلب ۾ ميٽ دي پريس کي خطاب ڪرڻ بعد آءِ بي اي ۽ اسپورٽس ڪامپليڪس جا دورا ڪندو مانجھاندو ڪرڻ لاءِ سيد خورشيد شاهه جي اڍائي ارب رپين واري نئين ٺهرايل شاندار محل ۾ ويو جتي پ پ ڪارڪنن سان ملاقات ڪرڻ سان گڏ وڪيلن جي هڪ وفد سان به ملاقات ڪئي. مانجھاندي کان پوءِ هو سکر هائوس پهتو جتي هن مڪاني ادارن جي چونديل نمائندن سان گڏجاڻي ڪئي جتي ٿڪاوٽ سبب سيد خورشيد شاهه کي ننڊ ورائي وئي هئي. ”نائڪ وڏو وزير اتان فارغ ٿي صدرالدين شاهه جي مزار تي حاضري ڀري چادر چاڙهي ۽ روهڙي باءِ پاس تي اڏجندڙ آرٽس ۽ ڊزائن ڪاليج جو دورو ڪندو هڪ ٺيڪيدار دادن پٺاڻ جي دعوت ۾ ويو جتي ميزبان پاران وڏي وزير کي 10 تولن جو سونو تاج پارايو ويو جڏهن ته ساڻس گڏ 16 کن اهم مهمانن کي پڻ هڪ هڪ تولي سون جا تحفا ڏنا ويا.

نئين وڏي وزير جي شروعاتي تقريرن مان عام ماڻهو گھڻي عرصي کان پوءِ سنڌ ۾ عوامي حڪمرانيءَ جو خواب ڏسڻ لڳا هئا پر شايد هو اهو ڀلي ويا هئا ته سنڌ ۾ حڪمراني پ پ جي آهي چهرو ڀل بدلجي وڃي پارٽي، ان جي قيادت ۽ پاليسيون ته ساڳيون رهنديون. رڳو سکر جو مثال وٺو ته گذريل 8 سالن ۾ سکر جي ترقياتي ڪمن لاءِ اربين رپين جي رقم آئي پر ڪنهن کي خبر ناهي ته اها رقم ڪٿي ۽ ڪيئن خرچ ٿي، سکر اڳ کان وڌيڪ تباهه ٿيندو ويو. سکر شهر جي مجموعي حالت اهڙي آهي جو شهر جي تباهيءَ جي ذميوار سياستدانن وڏي وزير کي ڪنهن به اهڙي رستي تان نه گذاريو ۽ نه سول اسپتال سميت ڪنهن اهڙي اداري ۾ وٺي ويا جنهن سان کيس شهر جي اصل تباهيءَ جو اندازو ٿي سگھي پر ان جي باوجود وڏي وزير کي ميڊيا آڏو اهو اعتراف ڪرڻو پيو ته 8 سالن ۾ اربين رپيا اچڻ باوجود سکر ۾ کيس ڪٿي به ڪو ڪم ٿيل نظر نه پيو اچي لڳي ٿو ته سموريون اسڪيمون رڳو ڪاغذن ۾ پوريون ٿيون آهن. ان جي باوجود وڏو وزير هڪ اهڙي ٺيڪيدار وٽ دعوت کائڻ ويو جيڪو سکر جي تباهيءَ جي ذميوار انهن سياستدانن جو ساٿاري ۽ سهولتڪار آهي جن 8 سالن ۾ اربين رپيا هڙپي ڇڏيا پر اوڳرائي به نه ڏني. ان ٺيڪيدار سون جي تحفن جي مد ۾ 13 لک رپين کان مٿي ۽ چانهن پارٽي تي 2 لک رپين کان مٿي خرچ ڪيا ته ڇا ان جي بدلي ۾ هو ڪو فائدو حاصل نه ڪندو؟ سيد مراد شاهه جو چوڻ هو ته پهريون ڀيرو ته پهريون ڀيرو مالي سال جي شروعاتي اڍائي مهينن ۾ 70 ارب رپيا جاري ڪيا ويا آهن ته ڇا ڪو کانئس پڇندو ته پهرين وڏن وزيرن جي دورن ۾ جڏهن هو پاڻ ناڻي کاتي جو وزير هوندو هو ته ڇا هو ڄاڻي واڻي پئسا رليز ڪرڻ ۾ دير ڪندو هو؟ اهو به سوال پيدا ٿئي ٿو ته اهي 70 ارب رپيا به ڇا انهن ئي سياستدانن جي دادن پٺاڻ جهڙن ماڻهن کي جاري نه ڪيا ويا آهن جن اڳ ئي ابين رپيا ڳڙڪائي ڇڏيا آهن.

عوامي حڪمراني رڳو ٺلهن نعرن يا اعلانن سان نه ايندي آهي پر عمل مان ثابت ٿيندي آهي. جن پرڳڻن ۾ عوامي حڪمراني آهي اتي جا حڪمران عوام سان گڏ عوامي سوارين ۾ بنا پروٽوڪول جي به سفر ڪرڻ ۾ ڪا هٻڪ محسوس نه ٿيندي آهي. اتي عوامي ڀلائي جا ڪم اوليتي بنيادن تي ٿيندا آهن. ترقياتي رٿائون ڪاغذن ۾ نه پر عملي شڪل ۾ پوريون ٿيندي نظر اينديون آهن. ڪرپشن ڪندڙ ڪيڏو به وڏو عهدو رکندڙ هجي ان کي استعفا ڏئي عوامي توڙي عدالتي ڪٽهڙي ۾ اچڻو پوندو آهي ۽ سزا ڀوڳڻي پوندي آهي. اتي سرڪاري ناڻي کي سرنگھون هڻي پنهنجون ٽجوڙيون ڀرڻ جي اجازت ناهي هوندي. اتي تعليم ۽ صحت جو ڪاروبار ناهي ٿيندو اتي جا حڪمران پنهنجي حڪمران هجڻ جو ڏن ڀرڻ لاءِ دبئي ياترائون ناهن ڪندا. اتي نه ڪو ”ادو“ هوندو آهي ۽ نه ڪا ”ادي“ هوندي آهي. اتي جي پوليس سياسي نه هوندي آهي. اتي عدالتن کان مٿاهان قتل ناهن ٿيندا. اتي پوليس ۾ فل فراءِ يا هاف فراءِ جو ڪو تصور ناهي هوندو. اتي امير ۽ غريب جا هڪ جهڙا قانوني حق رڳو آئين جي ڪتاب ۾ لکي نه رکيا ويندا آهن پر اهي نظر به ايندا آهن. رڳو پاڻ سان سيلفيون ڪڍرائڻ کي عوامي حڪمراني ناهي سڏبو پر جڏهن عام ماڻهو حڪمرانن جي ڪرايل ڪمن جي سامهون بيهي فخر سان سيلفيون ڪڍرائن تڏهن لڳندو آهي ته عوامي حڪمراني آهي. اسيمبلي ميمبرن کي علائقي جي اڇي ڪاري ۽ عوام جي زندگين جو مالڪ بنائڻ عوامي حڪمراني ناهي هوندو پر گڊ گورنس، ۽ سٺن آفيسرن ذريعي عوام کي بنا فرق جي سمريون سهولتون ڏيڻ ۽ چونڊيل نمائندن کي عوام آڏو جوابده هجڻ سان عوامي حڪمراني نظر ايندي آهي.

اسين سنڌ جا ماڻهو ڏاڍا بدقسمت آهيون ۽ شاي گھڻي عرصي تائين رهنداسين ڇو ته اسان پنهنجي قسمت پاڻ بدلڻ نٿا چاهيون. اسان مرده پرست بڻجي چڪا آهيون ۽ تاريخ شاهد آهي ته جنهن قوم پنهنجي قسمت بدلڻ جي پاڻ ڪوشش ناهي ڪئي ان جي قسمت خدا به ناهي بدلائيندو ۽ ان قوم مٿان اهڙا حمران اچي ويندا آهن جيڪي سندن رت پيئڻ واري عمل کي به ڪارنامو ڪري پيش ڪندا آهن. گذريل ٻن مهينن ثابت ڪيو آهي ته سنڌ پرڳڻي جي قسمت بدلائڻ، هتان خراب ٿيل نظام کي سڌارڻ ۽ سڌي رستي تي آڻي عوامي حڪمرانيءَ جو احساس پيدا ڪرڻ واريون دعوائون ڪندڙ سيد مراد علي شاهه به پنهنجي پارٽيءَ جي اڳين وڏن وزيرن جو تسلسل آهي جيڪي دعوائون ته گھڻيون ڪندا آهن، سنهري خواب به ڏيکاريندا آهن پر عملي طور تي هو ڪجھ به نه ڪندا آهن. هاڻي به سرڪاري ناڻو ائين لٽبو رهندو، ساڳيا سيستدان هوندا، ساڳيا ٺيڪيدار هوندا، سونا تاج پائبا رهندا ۽ عام ماڻهو ائين ئي پوليس ۽ ڪامورن هٿان ذليل ٿيندو رهندو ۽ وڌيڪ ذليل ٿيڻ لاءِ ساڳين سياستدانن جي درن تي انصاف لاءِ ڌڪا کائيندو رهندو.

 

 

ڀارت جو جنگي جنون ڪٿي دنگ ٿيندو..؟؟؟: غلام مصطفي جمالي

انڊيا جي ميڊيا اڙي واقعي کي وٺِي ڪري  اهڙو ته اچي شور ڪيو آهي ڄڻ جهنگ ۾ ڪنهن شينهن ڪا اچي مارا ماري شروع  ڪئي هجي.جنهن کي ڏسي ڪري ٻين جهنگل جي جانورن اچي رڙيون ڪرڻ شروع ڪيو هجن،ڀارتي ميڊيا به اهڙيون ئي جانورن واريون رڙيون ڪري رهي آهي.انڪري اهو خيال ذهن ۾ اچي ٿو ته ڀارت انهي رڙيون ڪندڙ ميڊيا جا منهن بند ڪرائڻ لاءِ ڇا پاڪستان تي لڪي ڪو حملو ڪري سگهي ٿو، ائين به آهي ته ٿي سگهي ٿو ته ڀارت پنهنجي پراڻي روايت کي برقرار رکندي پاڪستان اندر ڪو دهشتگردي جو واقعو ڪرائڻ ۾ ڪامياب نه وڃي.!!خاص طور تي تعليمي ادارن اندرن،ڇو ته مودي سرڪار افغانستان سان ملي ڪري پاڪستان اندر ڪو واقعو ڪرائي سگهي ٿو،ان ڪري هن وقت جهڙي صورتحال پيدا ٿي وئي آهي انهي مان ائين لڳي رهيو آهي ته ڀارت بزدلي واري روايت رکندي ڪٿي نه ڪٿي ڪو واقعو ڪرائڻ تي تاڻ ۾ ضرور هوندو انهي ڪري پاڪستان جي سڪيورٽي ادارن کي انهي ماحول اندر سخت انتظام وٺڻا پوندا،ڇو ته خدا نه ڪري جو آرمي پبلڪ اسڪول جهڙو واقعو ٻيهر پيش اچي،جڏهن ته هن وقت تعليمي ادارن اندر سڪيورٽي کي سخت ڪرڻ جي تمام گهڻي ضرروت آهي،جڏهن ته انهي سان گڏ انهن جو ٻيو ٽارگيٽ فوج يعني عسڪري قيادت به ٿي سگهي ٿو،جنهن اندر آرمي جا ميڊيڪل جا شعبا جهڙوڪ اسپتالون شفا خانه سرفهرت آهن،انهي ڪري ملٽري جي سڀني اسپالتن اندر  تمام گهڻي سڪيورِٽي ۽ نظرثاني جي ضرورت آهي،۽ پاڪستان آرمي کي پڻ چوڪس رهڻ گهرجي،ڇو ته اڙي واقعي اندر مرندڙ به ڀارتي فوجي آفيسر هئا انهي ڪري ڀارت به فوجي ادارن ۾ ٽارگيٽ ڪرڻ کي وڌيڪ ترجيع ڏيندو،جڏهن ته انکان پهرين به اسانجي رجمنٽل ٽرينگ سنٽر کي انڊيا نشانو بنائي چڪو آهي،

ڪراچي آپريشن دوران ماضي اندر جنهن جنهن ٺڪاڻن جي خبر پئجي چڪي آهي جن جا تفصيل به انٽيلجنس ادارن وٽ وجود آهن.انهن  تي به ڪڙي نظر رکي ڪري انهن کي سيل ڪيو وڃِي،ڇو ته پاڪستايني ادارن هٿان گرفتار ڪيل انڊين نيوي ڪمانڊر (ڪلوڀوشن ياديو) جيڪو پاڪستان اندر ويهي ڪري ڀارت جي خفيه ايجنسي را) لاءَ ڪم ڪري رهيو هو انهي انهن ٺڪاڻن جي مڪمل ڄاڻ ڀارت کي ضرور  ڏئي ڇڏي هوندي.جڏهن ته انڊِيا پنهنجي ڪولڊ سٽارٽ ڊاڪٽرن جي تحت پنهنجا عسڪري اثاثا خاص طور تي لانگ رينج آرٽلري(آئين آف ڪنٽرول يا ورڪنگ بائونڊري جي ويجهو اچي رکيا آهن انهن سان به پاڪستان کي خبردار ٿيڻ گهرجي.جڏهن ته ڀارتي ميڊيا هن وقت انتقام جي رٽ لڳائي ويٺو آهي انهي ڪري ڀارت پنهنجي ميڊيا ۽ ٻين ادارن کي خوش ڪرڻ لاءِ پاڪستان ۾ ڪجهه نه ڪجهه ڪرائڻ جي چڪر ۾ آهي،جڏهن ته اڙي واقعي کان پوءِ ڀارت آپي کان ٻاهر نڪري ويو آهي ۽ سندس ڪاوڙ بي صبري ٿي وئي آهي،۽ انهي بي صبري واري دهشگردي وارو رخ انهي واقعو کان پوءِ ٿيو آهي جنهن واقعو جو پاڪستان کي علم ئي ناهي،بطور انڊيا جي ته اڙِي واقعي اندر پاڪستان ملوٽ آهي انڪري جيڪڏهن پاڪستان ملوث آهي ته انهي جا ڀارت وٽ ڪهڙا ثبوت آهن.؟هن وقت مسئلو صرف اڙي واقعو جو ناهي جڏهن ته پاڪستان اندر به اهڙا ڪيترائي واقعا ٿي گذريا آهن پر پاڪستان ڪڏهن به انهن واقعن اندر ڀارت کي ملوث قرار ناهي ڏنو،

جڏهن ته انهن واقعن اندر ڀارت پڪو ٺڪو ملوث به هوندو آهن،انهن واقعن اندر آرمي پبلڪ اسڪول،باچا خان يونيورسٽي واقعو ۽ هر روز  ٿيندڙ  ورڪنگ بائونڊري جي گولا باري،،جڏهن ته پاڪستان وٽ انهي جا ثبوت به آهن ته انهن واقعن اندر ڀارت ملوث آهي پر ڪڏهن به پاڪستان آپي کان ٻاهر ناهي نڪتو ۽ ڪڏهن به انڊيا لاءِ اهڙو زهر ناهي اوڳاڙيو. جيڪو هن وقت ڀارت اوڳاڙي رهيو آهي،جڏهن ته پاڪستان وٽ هڪ وڏو ثبوت  ڪلوڀوشن ياديو جي صورت اندر انڊيا جي دهشتگردي جو موجو آهي پر انهي جي باجود به پاڪستان هميشه انڊيا سان امن  دوستي جو هٿ ملائڻ پئي چاهيو پر انڊيا هميشه پنهنجي “ڪتي واري پچ واري سوچ” اندر ۾ رکي ڪري پاڪستان سان ڪنهن نه ڪنهن بهاني تي مهاڏو اٽڪائيندو آيو آهي،جڏهن ته اڙي واقعي کان پوءِ ڀارت پاڪستان سان ته پهچي ناهي سگهيو.. پر ڀارت مظلوم ڪشمرين مٿان لظمن جا انبار ڪيترائي ڇڏيا آهن،جڏهن ته ڪشمير اندر معصوم ٻارن کي سندس والدين سامهون ذبع ڪندي به ڀارت جي فوجين کي رحم ڪون ٿو اچي،مان سمجهان ٿو ته بي جي پي هڪ اهڙي جماعت آهي جنهن جو سندو سئنون تعلق دهشتگردي سان آهي.ان ڪري ڀارت جو وزيراعظم نريندر مودي صرف ۽ صرف هن خطي اندر دهشتگردي پکيڙڻ چاهي ٿو ٻيو ڪجهه به نه،هن وقت جنگ جي حالتن کي ڏسي ڪري خد انڊيا جي عوام جو اهو چئي رهي آهي ته انڊيا جي عوام جنگ نه ٿي ڇاهي اها عوام چاهي ٿي ته پاڪستان ۽ هندستان ۾ وچ ۾ هيمشه تعلق دوستي وارا رهن. پر نيندر مودي کي جنگ جو ته الائي ڪهڙو جنون سوار آهي،جڏهن ته انڊيا ڀلي ته جنگ جو شوق پورو به ڪري پر کيس رسوائي جي سواءِ ٻيو ڪجهه نه نصيب نه ٿيندو،

ڇو ته انکان پهرين به ڀارت اهڙا شوق پورا ڪري چڪو آهي گهڻو ماضي ۾ وڃڻ کان پهرين ماضي جو ٿورو ويجهو اچي ڪري ڀارت تي نظر وجهون ته هوُ ڪيترو مظبوط آهي. جو اهڙي ماحول اندر هو جنگ ڪرڻ ٿو چاهي،اوهانکي ياد هوندو ته پٺاڻ ڪوٽ ائيربيس اندر ڪجهه دهشتگردن اندر گهڙي ڪري ڪيترائي ڀارت جا فوجي ماري وڌا جنهن کان پوءِ انهي دهشتگردن کي ڪنٽرول ڪرڻ جي لاءِ ڀارت جا سمورا ادارا زور لاهڻ لاءِ پهچا ويا پر پورا ڇهه ڏينهن لڳا انهن دهشتگردن کي ڪنٽرول ڪرڻ ۾ جڏهن ته اهو به ٻڌايو پئي ويو ته دهشتگرد جي پهرين حملي اندر مري ويا هئا پر ڀارت جي فوج کي ايتري همت نه پئي ٿي جو اندر وڃِي انهي جو جائزو وٺِي پر جڏهن انهي واقعي کي اچي ميڊيا کنيو ته پوءِ ڀارتي فوج سوچيو ته هاڻي خلق پئي کلي ان ڪري وڃِي ڏسون،،ڪيڏي نه افسوس جهڙي ڳالهه آهي ته اهڙي فوج ڪئين ته سوچي سگهي ته هوُ پاڪستان جي فوج سان مقابلو ڪندي،،جڏهن ته پاڪستان اندر فوج به دلير آهي ۽ انهي سان گڏ پاڪستان جي عوام ۾ به تمام گهڻو جذبو رکندڙ آهي،،جڏهن ته ان وقت اهڙيون به ڳاليهون سامهون اچي رهيون آهن ته انڊين آرمي اندر ڏهه کان پندرهن هزار درخواستون به اچي چڪيون آهن جن ۾ ڄاڻايو ويو آهي ته انهن کي موڪل ڏني وڃي،،انهي ڳالهه مان اهو به صاف ظاهر آهي ته جيڪي فوجي پنهنجي ملڪ جي حفاظت ڪرڻ بجاءِ ڀڄڻ ۾ پورا هجن اهي جنگ ته پري جي ڳالهه انهي جو ٻڌي ڪري به بيمار ٿي پوندا،،آخر ۾ صرف ايترو چوند ته سنڌطاس معاهدي طور ڀارت پاڪستان جو پاڻي ڪڏهن به بند نه ڪندو انهي ڪري پاڪستاني ميڊيا کي انهي جي حوالي اندر ڪجهه نرمي ضرور رکڻ گهرجي

 

 

سنڌ طاس معاهدي جي ڀڃڪڙي جا ڀارتي جتن،،،،

ڀارت سنڌ طاس معاهدي تان ڦرندي پاڪستان جو پاڻي گھٽائڻ تي غور شروع ڪري ڇڏيو آهي. ان سلسلي ۾ ڀارتي وزيراعظم نريندر مودي جي صدارت هيٺ اجلاس ٿيو. اجلاس ۾ پاڪستان جو پاڻي روڪڻ سميت مختلف هٿڪنڊن تي غور ويچار ڪيو ويو. اجلاس ۾ پاڪستان کي ملندڙ پاڻي ۾ گھٽتائي ڪرڻ جي تجويز به پيش ڪئي وئي. اجلاس ۾ پاڪستان جو پاڻي بند ڪرڻ جي حوالي سان مختلف تجويزن تي غور ڪيو ويو، ان موقعي تي ڀارتي پاڻي ماهرن جي اڪثريت وزيراعظم نريندر مودي کي مشورو ڏنو ته پاڪستان جو پاڻي بند ڪرڻ جي صورت ۾ چين براهما پترا وٽان ڀارت ايندڙ پاڻي به بند ڪري سگهي ٿو، ان ڪري اهڙي قسم جي غلطي کان پاسو ڪيو وڃي. ڀارتي ميڊيا جو چوڻ آهي ته نريندر مودي سنڌ طاس معاهدي تي قانوني مشاورت جاري رکندو. ڀارتي ميڊيا موجب ڀارتي قيادت جو چوڻ هو ته چين کان پاڻي روڪڻ جي حوالي سان ڪو خطرو ناهي نه اهو سنڌ طاس معاهدي جو حصو آهي، جڏهن ته اجلاس ۾ چيو ويو ته ڀارت چناب درياهه تي 3 ڊيمن جي اڏاوت تيز ڪندو. سنڌ طاس معاهدي تحت چناب درياهه جو پاڻي پاڪستان ڪنٽرول ڪندو آهي. ڀارت معاهدي تحت سمورا قانوني حق استعمال ڪندو.

ٻئي پاسي پاڪستان سنڌو درياءَ تي ٺهندڙ ڊيمن ۽ توانائي جي منصوبن تي ڀارت سان ڳالهيون ناڪام ٿيڻ کانپوءِ عالمي ثالثي عدالت سان رجوع ڪري ورتو آهي. انڊس واٽر ڪميشن جي ذريعن موجب ڀارت سان ان حوالي سان ڪيتريون ئي ڳالهيون ٿيون پر ڀارت پاڪستاني موقف تسليم ڪرڻ کان انڪار ڪري ڇڏيو جنهن کانپوءِ ڳالهيون بنا نتيجي ختم ٿي ويون آهن ۽ پاڪستان معاملي جي حل لاءِ عالمي ثالثي عدالت سان رابطو ڪري ورتو آهي. انڊس واٽر ڪمشنر طرفان عالمي عدالت کي لکيل خط ۾ مسئلي کي حل ڪرڻ جو مطالبو ڪيو ويو آهي، پاڪستان رتلي ۽ ڪشن گنگا هائيڊرو پاور پراجيڪٽ جي تعمير کي سنڌ طاس معاهدي جي کليل خلاف ورزي قرار ڏيندي ان تي خدشن جو اظهار ڪيو آهي ۽ موقف اختيار ڪيو آهي ته سنڌ طاس معاهدي تحت پاڪستان جي اوڀرندي دريائن سنڌ طاس ۾ ٽن اولهندي دريائن سنڌ، جهلم ۽ چناب سميت دريائن جو پاڻي پاڪستان لاءِ مخصوص ڪيو ويو آهي، جڏهن ته ڀارت طرفان جهلم درياءَ ۽ چناب درياءَ جي پاڻي جي ورڇ بابت سنڌ طاس معاهدي جي خلاف ورزي ڪندي ان تي 850 ميگاواٽ رتلي ۽ 330 ميگاواٽ جي ڪشن گنگا ڊيم جي تعمير  شروع ڪري ڇڏي آهي. پاڪستاني موقف آهي ته انهن منصوبن سان ڊيم جي ڊيزائن ۾ تبديلي ڪئي جنهن سان پاڪستان کي ملندڙ پاڻي ۾ گهٽتائي ٿي آهي. انڊس واٽر ڪمشنر مرزا آصف بيگ ان ڏس ۾ عالمي ڪنسلٽنٽس ۽ ماهرن سان پڻ رابطا شروع ڪري ڇڏيا آهن جڏهن ته هلندڙ سال جولاءِ ۾ دهلي ۾ ٿيندڙ ڳالهين ۾ ڊيڊ لاڪ سبب پاڪستان وڌيڪ ڳالهيون ڪرڻ کان انڪار ڪري ڇڏيو هو ۽ معاملي کي عالمي عدالت ۾ کڻي وڃڻ جو فيصلو ڪيو هو جنهن تي هاڻي ان معاملي کي عالمي عدالت ۾ موڪليو ويو آهي ۽ ٻئي طرف ڀارت پڻ ان معاملي تي متحرڪ آهي ۽ سنڌ طاس معاهدي کي ختم ڪرڻ تي غور ڪري رهيو آهي.

 

سي پيڪ رٿا جي مخالفت ڪندڙ پاڻ اڪيلا ٿي ويندا: حڪومت

لاهور (اين اين آءِ) سڌ سماءَ جي وفاقي وزير سينيٽر پرويز رشيد چيو آهي ته ظالم دنيا ۾ اڪيلو هوندو آهي ۽ ڀارت کي اڪيلائي کان بچڻ لاءِ ڪشميرين تي ظلم ۽ بربيت کي بند ڪرڻو پوندو. بلوچستان مان هڪ به اهڙو آواز نه ٿو اچي جيڪو ڀارتي وزيراعظم کي خوش ڪري سگهي بلوچستان مان پاڪستان زنده آباد جا نعرا لڳندا رهندا، ڀارت جيڪڏهن پاڪ چين اقتصادي راهداري منصوبي جي مخالفت ڪندو ته هو دنيا ۾ اڪيلو ٿي ويندو. عمران خان کي سياست جو ٻيڙو ٻوڙڻ ۽ پنهنجي پارٽي کي برباد ڪرڻ جو هنر اچي ٿو ۽ هو صرف انهيءَ ۾ موجود آهي ۽ هو تفريح ڪرڻ لاءِ سڄي ملڪ مان ماڻهن کي رائيونڊِ ۾ گڏ ڪري رهيو آهي پر ان جي ابتڙ وزيراعظم نواز شريف پاڪستان کي کنجراب کان گوادر تائين ملائڻ جي ڪوشش ڪري رهيو آهي اهڙن خيالن جو اظهار هن الحمرا هال ۾ ميڊيا سان ڳالهائيندي ڪيو. هن پي ٽي آءِ جي رائيونڊ جي مارچ جي حوالي سان پڇيل سوال تي چيو ته عمران خان کي سياست جو ٻيڙو ٻوڙڻ ۽ پنهنجي جماعت کي برباد ڪرڻ جو هنر اچي ٿو ۽ هو صرف انهيءَ ۾ مصروف آهي ۽ هو ڪنهن ٻي سياسي جماعت ۽ سياسي اڳواڻ ۾ اهو هنر موجود نه آهي تحريڪ انصاف جو 30 سيپٽمبر تي ميلو ٿيندو ۽ آڪٽومبر ۾ ڪجهه به نه هوندو.

 

ملڪ جو اصل مسئلو ڪرپشن آهي، رائيونڊ مارچ مان ڪجهه به حاصل نه ٿيندو: خورشيد شاهه

سکر (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته پاڪستان ۾ احتجاج جو ڪو ئي قدر ناهي رائيونڊ مارچ وارا رستن تي ئي ويٺا هوندا ۽ وزيراعظم مٿان هيليڪاپٽر تي ايندو ۽ ويندو رهندو. ميڊيا سان ڳالهائيندي هن چيو ته ترقي يافته ملڪن ۾ مظاهرين کي پنهنجي احتجاج جو مقصد معلوم هوندو آهي ۽ اهي پنهنجي ملڪ جي حڪومت کي سوچڻ تي مجبور ڪري ڇڏيندا آهن پر پاڪستان ۾ احتجاج جو ڪو ئي قدر ناهي ترقي يافته ملڪن ۾ مظاهرن ۽ احتجاجن جو اثر هوندو آحي هتي پاناما ليڪس هجي يا ڪا ئي ٻي ليڪس ڪوئي به ان کي حقيقت ۾ تبديل ڪرڻ لاءِ تيار ناهي. هن چيو ته پاناما ليڪس ڪرپشن جو کليل ڪتاب آهي پر هر ماڻهو پاناما ليڪس کي نظرانداز ڪري رهيو آحي هن معاملي تي حڪومت جو ضد برقرار آهي جيڪڏهن احتساب نه ٿيو ته پوءِ واضح ٿي ويندو ته دال ۾ ڪجهه ڪارو آحي هن جو چوڻ هو ته ڪرپشن خلاف رائيونڊ مارچ مان ڪجهه به حاصل نه ٿيندو، اپوزيشن ليڊر جو چوڻ هو ته ملڪ ۾ سڀ کان وڏو چئلينج ڪرپشن آهي ڪرپشن ختم ٿي وڃي ته ملڪ مان غربت سولائي سان ختم ٿي ويندي پر هتي ماڻهو صحت جو ڪارڊ ورهائڻ لاءِ تقريبن جو اهتمام ڪن ٿا ۽ اربين رپيا ڪرپشن جي حوالي ٿي وڃن ٿا.

 

 

ڪراچي جو ميئر بي ڏوهي آهي ته کيس عدالتون آزاد ڪنديون: مراد علي شاهه

ڪراچي (اين اين آءِ) سنڌ جي وڏي وزير سيد مراد علي شاهه قومي احتساب بيورو (نيب) کي مشورو ڏنو آهي ته هو سنڌ صوبي جي خلاف وچ هنٽ بند ڪري ڇوته ننڍن ڪيسن جي جانچ پڙتال ڪرڻ انهي جو ڪم نه آهي، بلڪه اهو اينٽي ڪرپشن اسٽيبلشمينٽ جو ڪم آهي. هن اها ڳالهه اڄ شام ڪلفٽن ۾ عبدالله شاهه غازي جي مزار تي عرس جي اختتامي تقريب جي ادائيگي کانپوءِ ميڊيا سان ڳالهه ٻولهه ڪندي چئي. هڪ سوال جي جواب ۾ هن چيو ته مونکي خبر نه آهي ته اسپيڪر سنڌ اسيمبلي آغا سراج دراني جا ثمن جاري ٿيا آهن يا نه، پر آئون نيب کي مشورو ڏيندس ته اهو سنڌ صوبي ۾ وچ هنٽ بند ڪري ۽ اهڙي ريت هراسڻ اسان جي مينڊيٽ جي خلاف آهي. اهو ڪم اينٽي ڪرپشن اسٽيبلشمنٽ (اي سي اي) جو آهي. هن چيو ته اسان جي حڪومت اي سي اي کي وڌيڪ مضبوط ڪري رهي آهي. هڪ ٻئي سوال جي جواب ۾ سيد مراد علي شاهه چيو ته ايم ڪيو ايم جي بيگناهه ڪارڪنن کي آزاد ڪيو ويندو جيڪڏهن انهن کي ڪسٽڊي ۾ ورتو ويو آهي. هن چيو آهي ته اسان انتقام ۽ تشدد تي ڀروسو نٿا رکون ٿا بلڪه اسان هر هڪ جي حقن جو احترام ڪندا آهيون پر انهي جو اهو مطلب هرگز ڪونهي ته اسان ڪنهن کي به قانون هٿ ۾ وٺڻ جي اجازت ڏينداسون. هڪ ٻئي سوال جي جواب ۾ هن چيو ته آئي جي پوليس سنڌ جي بدلي ڪرڻ تي ڪوبه غور نه پيو ڪيو وڃي. ترقياتي منصوبن بابت آگاهي ڏيندي وڏي وزير چيو ته هو ذاتي بنياد تي هلندڙ ڪمن جو معائنو ڪندو ۽ انهي ڳالهه جي بنهه اجازت نه ڏيندو ته ڪنهن به منصوبي جو ڪم فقط ڪاغذن تائين محدود رهي. بلڪه اسان اهو فيصلو ڪيو آهي ته سڀني ترقياتي منصوبن بابت حقيقتن، منصوبي جي منظوري کان وٺي فنڊ ملڻ تائين جي ڄاڻ ويب سائيٽ تي رکنداسين ته جيئن ماڻهن کي پنهنجن علائقن ۾ ٿيڻ وارن ڪمن بابت ڄاڻ حاصل ٿئي. هن چيو ته حڪومت تعليم جي نظام، صحت جي خدمتن ۽ امن امان کي برقرار رکڻ لاءِ سرگرم آهي. هن چيو ته اسان شهر ۾ امن لاءِ وڏي قيمت ادا ڪئي آهي. تنهن ڪري انهي کي لتاڙڻ جي ڪنهن کي به اجازت نه ڏينداسين. ان کانپوءِ سنڌ جي وڏي وزير عبدالله شاهه غازي جي مزار تي گلن جي چادر چڙهائيندي فاتحه خواني ڪندي ٽن ڏهاڙن جي عرس جي پڄاڻي ڪئي. ان کانپوءِ سيد مراد علي شاهه ايم پي اي نصرت خواجه جي گهر ويو ۽ ان سان سندن ڀاءُ وزير علي خواجه جي وفات تي جيڪو هڪ نامور بينڪر هو تعزيت ڪئي.