تازيون خبرون

Daily Archives: September 28, 2016

سلمان خان جو راج ٺاڪري کي فون، فواد ۽ مائره جي فلمن جي نمائش نه روڪڻ جي درخواست

ممبئي (شوبز نيوز) بالي ووڊ جي دبنگ سلمان خان هندو شرپسند اڳواڻ راج ٺاڪري کي ٽيليفون ڪيو ۽ چيو آهي ته فواد خان ۽ مائره خان جي فلمن کي رليز ٿيڻ کان نه روڪيو وڃي. اڙي حملي کانپوءِ ڀارتي حڪومت ۽ ڀارت جا هندو شرپسند پارٽيون ڪاوڙ ۾ اچي ويون آهن ۽ هنن پاڪستاني فنڪارن کي ڀارت ڇڏڻ جي ڌمڪين سان گڏ انهن جي فلمن جي سئنيمائن تي نمائش کان روڪڻ جو اعلان ڪري رکيو آهي. ميڊيا رپورٽن موجب انهن ڌمڪين کانپوءِ جتي هدايتڪار ڪرن جوهر سوڌو ڪيترن ئي فنڪارن پاڪستاني فنڪارن جي حق ۾ ڳالهايو، اتي هاڻ بالي ووڊ جو دبنگ خان به ميدان ۾ اچي ويو آهي. سلمان خان مهاراشٽر جي هندو شرپسند پارٽي مهاراشٽر انو نرمان سينا جي اڳواڻ ۽ پنهنجي دوست راج ٺاڪري کي فون ڪري درخواست ڪئي آهي ته پاڪستاني فنڪار فواد خان جي فلم ”اي دل هي مشڪل“ ۽ مائره خان جي فلم ”رئيس“ کي نمائش کان نه روڪيو وڃي. مهاراشٽر انو نرمان سينا پاران چوڻ آهي ته هو ”اي دل هي مشڪل“ ۽ ”رئيس“ کي تيستائين رليز ٿيڻ نه ڏيندا جيستائين انهن فلمن مان پاڪستاني فنڪارن فواد خان ۽ مائره خان جا سمورا منظر ڪٽيا نٿا وڃن.

 

پاڪستاني فنڪارن کي ڌمڪيون ڏيندڙ تنظيمون پنهنجو دماغ ٿڌو رکن: جوهي چاولا

ممبئي: ڀارت ۾ هندو شرپسندن پاران پاڪستاني فنڪارن کي ڏني ويندڙ ڌمڪين کانپوءِ ڪجهه فنڪار حمايت ڪري رهيا آهن ته ڪجهه فنڪار ڌمڪين خلاف ميدان ۾ اچي ويا آهن، هدايتڪار ڪرن جوهر کانپوءِ هاڻ اداڪاره جوهي چاولا به ڀارتي شرپسند تنظيمن کي ٿڌي دماغ سان سوچڻ جي صلاح ڏني آهي. ميڊيا رپورٽن موجب پاڪستاني فنڪارن کي ڀارتي هندو شرپسندن پاران ملندڙ ڌمڪين کانپوءِ بالي ووڊ فنڪارا جوهي چاولا به چپ چوريا آهن ۽ هندو شرپسندن تنظيمن کي چيو آهي ته اهي ماڻهو جن جو پاڪستاني فنڪارن جو ڀارت ۾ ڪم ڪرڻ تي دماغ خراب ٿي چڪو آهي، انهن کي گهرجي ته ان بابت ٿڌي دماغ سان سوچين. فنڪاره جو چوڻ هو ته اسان مسئلن کي فورن ختم ڪرڻ چاهيون ٿا، پر اسان انهن مسئلن جي اصل سبب بابت بلڪل به نٿا سوچيون. هن جو چوڻ هو ته اصل ۾ مسئلي جو خاتمي جو سبب اهو آهي ته اسان پهريان پاڻ کي تبديل ڪريون. فنڪاره هندو شرپسند تنظيمن کي صلاح ڏيندي چيو ته هو صبر ۽ آرام سان سوچيندي ڳالهائين ۽ مسئلن جو حل ڳولهين.

 

لوڪيش راهول جي جاءِ تي گوتم گنڀير ڀارتي ٽيم جو حصو

ممبئي (اسپورٽس نيوز) ڀارتي ڪرڪيٽ بورڊ نيوزيلينڊ خلاف رهيل ٽيسٽ ميچن لاءِ گوتم گنڀير کي ٽيم ۾ شامل ڪري ورتو آهي. رپورٽ موجب لوڪيش راهول ڪانپور ۾ کيڏيل پهرين ٽيسٽ ميچ دوران رنسون ڀڄندي زخمي ٿي پيو، جنهن جي جاءِ تي گوتم گنڀير کي ٽيم ۾ شامل ڪيو ويو آهي، جنهن آخري ٽيسٽ ميچ 2 سال اڳ انگلينڊ خلاف کيڏي هئي.

 

ٽيم جي ڪپتاني مان مزو وٺي رهيو آهيان: سرفراز احمد

ابو ظهبي (اسپورٽس نيوز) ملڪي ٽي ٽوئنٽي ڪرڪيٽ ٽيم جي ڪپتان سرفراز احمد چيو آهي ته ٽيم جي ڪپتاني مان مزو وٺي رهيو آهيان، عالمي چيمپيئن ٽيم اهڙي ڪارڪردگي جو مظاهرو ڪندي، ان ڳالهه جو اندازو نه هيو. ويسٽ انڊيز کي ٽي ٽوئنٽي سيريز ۾ وائيٽ واش ڪرڻ کانپوءِ پريس ڪانفرنس ڪندي سرفراز احمد جو چوڻ هو ته ڪاميابي جو ڪريڊٽ سڀني ڏانهن وڃي ٿو، ڇو ته سينيئر رانديگرن سٺو سهڪار ڪيو، جڏهن ته نوجوانن جي ڪارڪردگي پڻ ساراهه جوڳي آهي. هن چيو ته ڪارڪردگي جو تسلسل برقرار رهيو ته ون ڊي سيريز ۾ به ڪلين سوئيپ ڪري سگهون ٿا.

 

جنگ جي رومانس کان اکڙين جي اوجاڳن تائين: شوڪت لوهار

انتهاپسندي ۽ فرقيواريت جي ور چڙهيل هِن خطي جي ماڻهن کي خبر ناهي، ڇو جنگ جي هولناڪين کان خوف نٿو ٿئي؟ هُو الائي ڪهڙي اجائي جنگي رومانس ۾ مبتلا ٿي ويا آهن، جو جنگ جنگ جو راڳ آلاپيو پيو وڃي؟

جنگ راند ناهي پر هِڪ اهڙو ٻرندڙ جبل آهي، جنهن جي دکندڙ لاوي ۾ سڀ ڪجهه سڙي ڀسم ٿي وڃي ٿو.

اهڙين هولناڪين لاءِ ٿورو ڌيان شامي تارڪين وطن ڏانهن ڪيو، جيڪي جيڪڏهن مُلڪ ۾ رهن ٿا ته انهن کي پنهنجي فوج ۽ جنگي جهاز اٽو بڻائي ڇڏيندا، پر جيڪڏهن هُو هڪڙين اهڙين ڪمزور ٻيڙين ۾ چڙهي سمنڊ منهن ڪندا ته سمنڊ جون بي رحم لهرون کين ٻوڙي زندگيءَ جي ڏيئي کي اجهائي وجهنديون ۽ ائين ٿيو به آهي. هڪ ڀيرو نه ڪئين ڀيرا جو شامي پناهگيرن جون ٻيڙيون سمنڊ ۾ غرق نه ٿيون هجن، آئي ڏينهن اِهو ڪجهه آهي، جيڪو رپورٽ ٿئي ٿو. ان ۾ درد آهي، پيڙا آهي ۽ هِڪ مسلسل اذيت ۽ آخرڪار موت جو راڪاس، جنگ ڪجهه به نٿي آڻي، ڪنهن لاءِ ڪوبه جيت جو پيغام نٿي آڻي، پر هر ڪنهن کي هارِ (شڪست) جا هار پارائي ٿي.

ڪير سمجهائي اسان جي ميڊيا مها دانشورن کي ته ملڪ جي ٻنهي پاسن هِڪ وار هسٽيريا پکيڙڻ سان اوهان جي ته اينڪرنگ ۽ ٽي وي جي ريٽنگ پڪي ٿيندي، پر ٻنهي ملڪن جي اٻوجهه عوام جن کي کائڻ لاءِ ماني ڳڀو ڪونهي، پائڻ لاءِ تن تي اوڇڻ ڪونهي، رهڻ لاءِ اجهو ڪونهي، اکين ۾ سدائين مجبورين جو سانوڻ لٿل آهي، اُتي اوهان جي ميڄالي ۾ ويٺل جنگي جنون ڪٿي هر شيءَ کي کنڊر نه بڻائي وجهي. ٿورو عقل، ٿورو شعور جي در تان بيک وٺڻ جي ضرورت آهي.

موجوده حالت ۾ جتي ڀارت جيڪو پنهنجي پاڻ کي دنيا جي وڏي ۽ ڊگهي سيڪيولر رياست ڪوٺي ٿو، ان جي هٺ ڌرمي جي حد ٿي وئي آهي. اڙي واري فوجي ڇانوڻي تي حملي ۾ 17 فوجين جي مرڻ تي بنا ڪنهن تصديق جي هن اِهي الزام پاڪستان تي هڻي ڪڍيا آهن، انهي جو ڪارڻ اِهو آهي جو هُو پنهنجي ظلم ۽ بربريت جيڪا معصوم ڪشميرين جي چهرن تي پلين گنز ذريعي ڪئي آهي، اِها لڪائي سگهي. اِها ڀارت جي پُل آهي جو دنيا سندس ترڪ تالين کان ڀلي ڀت واقف آهي. پٺاڻ ڪوٽ حملو هُجي يا اُڙي ۾ ٿيل واردات، اهي هميشه ڪنهن خاص موقعي ۽ وجهه جي نشانبر ڇو رهيو آهن؟ اِهو هڪ سوال آهي، جيڪو سوال کان وڌ هاڻ پرولي بڻجي چڪو آهي.

وزيراعظم پاڪستان نواز شريف جي گڏيل قومن جي اجلاس ۾ ڪيل تقرير مڙئي دنيا جي عدالت ۾ اِهو باور ڪرائڻ ۾ ڪامياب وئي آهي ته ٻيلي سياڻا ٿيو، ڀارت کي والاريل ڪشمير ۾ رتوڇاڻ کان روڪيو، انهيءَ ۾ ئي پوري ننڍي کنڊ جو امن ۽ سڪون جو نسخو لڪيل آهي.

هِن موقعي تي ڀارت طرفان ڇڏيل جاسوس ڪل ڀوشن تي ڪابه لب ڪشائي ڪونه ڪئي وئي، نه ئي برهمداغ بگٽيءَ جي انڊيا جي شهري بڻجڻ تي ڳالهه کي ڇيڙيو ويو. ٺيڪ آهي ته اسان جي پرڏيهي پاليسي سازن جن ۾ سرتاج عزيز ۽ طارق فاطمي ۽ مليحه لوڌي جي حڪمت به شامل هجي، پر خيرن سان نواز شريف صاحب پرڏيهي مهندارن سان ملاقاتون ڪامياب رهيون آهن.

ڀارت جي هٺ ڌرمي ۽ نڪ جي پڪائيءَ جي حد آهي جو هُو گذريل ستر سالن کان وٺي هيڏي ساري علائقي کي هِڪ جيل ۾ تبديل ڪيو ويٺو آهي. انهي اوپن جيل جو نالو والاريل ڪشمير آهي. ڪشمير جي خوبصورت وادي جتي جي وڻن، ٻوٽن ۽ خوابن ۾ ايندڙن جهڙا منظر سڀ هاڻ ڀارت جي رحم و ڪرم تي آهن. هُو جيڪي ڪڏهن ڪهڙي رهنما ته ڪڏهن ڪنهن عام شهري کي جهلي وٺي وڃن ٿا يا پنهنجي هٿن ۾ جهليل ڇرن وارين بندوقن سان سندن چهرا داغدار ڪن ٿا، انهن کي ڪير سمجهائي؟

ماضي جا مزار شاهد آهن ته ڀارت ڪڏهن به پنهنجي ضد ۽ هُوڏ تان هيٺ ڪين لٿو آهي. ڀلي اهو واپار، ثقافت يا رانديون هجن، هر جاءِ تي ان کي سياست جي ور چاڙهي ٿو ڇڏي، جنهن جا نتيجا اڳرا نڪرن ٿا ۽ نڪري رهيا آهن.

65 جي جنگ هجي، 71 جو بنگال وارو سانحو هجي، توڙي ڪارگل جي چڙهائي، اِهي سڀئي انهيءَ ڳالهه جا شاهد آهن ته هندوستان هميشه کان سفارتي طور طريقن سان ڪڏهن به مسئلن جو حل ڪونه ڪڍيو آهي. ان سڀ ڪجهه جي نتيجي ۾ ٻنهي ملڪن جو گهڻو تڻو بجيٽ موتمار هٿيارن تي ئي خرچ ٿئي ٿو ۽ عوام جي زندگي صرف جنگ جي رومانس جي ور چڙهيل ئي رهي ٿي.

برحان واني جي سفاڪ قتل کانپوءِ والاريل ڪشمير جون حالتون ويتر بگاڙ طرف ويون آهن. ڀارت انهيءَ جي نتيجن کان اڻ واقف هو ته هُو هِڪ بي گناهه پر اٽل انسان کي ماري آزاديءَ جي سوالن کي مات ڏئي ڇڏيندو! انهيءَ سان ويتر اِهو ٿيو آهي جو والاريل ڪشمير جو هر ٻار ٻڍو، عورتون ميدان تي اچي ويا آهن. ڀارت جي فوج بي هٿيار ماڻهن مٿان گوليون پئي وسائي ۽ هوڏانهن ڀارت پنهنجي پر ۾ ڀارت جي سيڪيولرزم جي سِڪي کي سفارتي دنيا ۾ ڪيش ڪرائڻ جي ڪڍ آهي.

ڀارت جي اِها ڀُل آهي ته هُو پاڪستاني سفارتي ڪوششن ۽ دنيا ۾ پاڪستان جي فارين پاليسي تي وار ڪرڻ ۾ ڪامياب ويندو، ان جو اِهو خواب ته هُو پاڪستان کي سفارتي طرح اڪيلو ڪري رهيو آهي، پر حقيقت اِها آهي ته انهيءَ سان ڀارت جي منافقت ۽ ان جي مڪروهه چهري جي تصوير پوري دنيا ۾ چٽي ٿي بيٺي آهي.

هِن وقت نريندر مودي ڳئون برگيڊ کي تيار ڪري ٽي وي ۽ اخبارن ۾ واڙي دنيا آڏو پنهنجو اصل چهرو کڻي آيو آهي. هِن مهذب دنيا نالي هِڪ سياري تي هِڪ ملڪ جي چونڊيل وزيراعظم جي سِر جي قيمت جو اعلان ڪندڙ ڇا سڀ کان وڏا دهشتگرد نه آهن؟ ڇا ڀارت جي کليل جيل جهڙي والاريل ڪشمير ۾ ڪيل ظلم ۽ ڏاڍ عالمي طور تي مڃيل دهشتگردي نه آهي؟ جيڪو ملڪ اِها دعويٰ ڪري ٿو ته والاريل ڪشمير سندس پرڳڻو آهي، پوءِ پنهنجي شهرين سان اهڙا ڪلور ڪهڙي کاتي ۾؟

انهي کان علاوه ڀارت جي انتهاپسندن ڀارت ۾ موجود پاڪستاني اداڪارن، فنڪارن ۽ فنونِ لطيفه يا ثقافتن جي ويجهڙائپ جي برانڊ ايمبيسيڊرن کي ملڪ نيڪالي ڏني آهي؟ اِها ڪا چڱي ڳالهه آهي. هتي سڄو ڏينهن انڊيا جي چئنلن جي ڀرمار آهي، ڪيبل چئنلن تي سواءِ انڊين ڊرامن، سي آءِ ڊي، ناگن، ڪاوچ ۽ الائي ڇا ڇا؟ انهي مان انڊيا جي صنعت کي ڪيترو فائدو ملي ٿو. اسان وٽ ٻارن کي شاهه رخ خان، سلمان خان، عامر خان وڌيڪ ياد آهن ۽ انهن کي پنهنجي مائٽن جا نالا گهٽ ياد آهن، پر هي جيڪو پاسو آهي، اِهو فلمي ۽ ڊرامن وارو آهي، انهي سان انڊيا کي هِڪ پڙهيل لکيل ۽ لبرل ملڪ ۽ اولهه جو پيروڪار ته ثابت ڪري سگهجي ٿو، پر اسان وٽ بدقسمتيءَ سان ڪيبل چئنل وارا هِڪ به نيوز چئنل نٿا هلائين، جيڪو انڊيا جي منافقت ۽ سنسني خيزيءَ کي ملڪ ۾ پڌرو ڪري سگهي.

اسان کي به خبر پوي ته ڪيئن نه انڊيا ميڊيا ۾ ويٺل پنڊت پاڪستان بابت رت ڳاڙن ٿا. هُو ته ايتري حد تائين هليا ويا جو اڙي واري حملي ۾ استعمال ٿيل گولين جي خولن تي پاڪستاني مهرون کين نظر اچي ويون، اِهو ته پوءِ هندوستان جي دفاعي ادارن کين چيو ته خولن واري ڳالهه غلط آهي.

پاڪستان هِن وقت چائنا اڪانامڪ ڪوريڊور (سي پيڪ) جو تاريخ ساز معاهدو ڪري چڪو آهي ۽ ان تي ڪم شروع ٿي چڪو آهي. ان ۾ پاڪستان جي ترقي ۽ پاڙيسري ملڪن کي ان جو لاڀ نه ملڻ جهڙا عنصر نظر اچن ٿا، انهي کان علاوه پاڪستان وٽ ٿر ۾ ڪوئلن جا دنيا جا وڏا ذخيره موجود آهن، اهي پڻ ڀارت جي راجستاني علائقي جي ويجهو آهن. پاڪستان، افغانستان، ايران ۽ چين سميت سڀني پاڙيسري ملڪن سان ٺاهه واري پاليسي تحت هلي پيو. مستقبل ۾ چين کي پاڪستان مان لنگهه گهرجي ۽ انهيءَ جي نتيجي ۾ پاڪستان کي ترقي ۽ خوشحالي، پر خبر ناهي ٻنهي طرف ويٺل پنڊتن کي جنگ کيڏڻ مان ڪهڙو مزو ٿو اچي.

چوڌاري لوهي تارن ۽ ديوارن جو حسار آهي. ماڻهو ته ٺهيو پکي به پڪڙي ماريا وڃن ٿا ته اِهي جاسوسي ڪري رهيا هئا، ڪنٽرول لائن تي ايڏي چوڪي ۽ ايڏين ٿلهين ديوارن کي ڪيئن پار ڪري ڪو وڃي سگهي ٿو. رڻ ڪڇ ۾ گپ گرچڻ واري ڌٻڻ آهي. هرطرف کان در دروازا بند آهن، پوءِ خوامخواهه پاڪستان مٿان الزام بازي جو ڌمچر ٿيڻ ڀارت کي ئي ڳچي ۾ پوڻو آهي. ايڊورڊ سعيد اولهه بابت پڌرو ڪري چڪو آهي ته هُو اوڀر يا مشرق کي ڪيئن نه غير مهذب سمجهن ٿا. لفظن جو استعمال خيال سرجي ٿو. سوشل ميڊيا جو سمنڊ جي پاڻي جيڏو ڪوڙ اسان جي نوجوان نسلن لاءِ سچ جو پرتوو ثابت ٿيندو.

جيڪڏهن ڀڳت سنگهه جنهن جنگ آزادي لاءِ سر ڏنو، جهانسي جي راڻي، منگل پانڊي ۽ ٻيا اڻ ڳڻيا آزادين جا رکوالا شهيد آهن ته پوءِ برهان واني به ته شهيد آهي، باقي جيڪي عاشق سرحدن جي خاردار تارن ۾ ڪونه ٿا اٽڪن، اِهي گلزار جون هي سٽون ٿي ٿا پون:

آنکون ڪو ويزا نهين لگتا،

سپنون ڪي سرحد هوتي نهين.

بند آنکون سي روز مين سرحد پار،

چلا جاتا هون، ملني مهدي حسن سي.

shoukatali.lohar@gmail.com

 

 

جمهوريت جا مسئلا: ڊاڪٽر لال خان

پاڪستان جي قيام کان وٺي هن ملڪ ۾ سياسي انتشار وڌندو ئي رهيو آهي. هتان جي پورهيتن جي شعور ۽ عمل جي ميدان ۾ متحرڪ سياست صرف 1960ع واري ڏهاڪي جي آخري سالن ۽ 1970ع جي ڪجهه مهينن دوران نظر آئي. باقي سموري سياست بالادست طبقن جي گڏيل تڪرارن ۽ مفادن جي ٽڪراءَ جو آکاڙو ئي بڻيل رهي. دولت جي سياست جي آقائن کي جڏهن ان ذلت، غربت ۽ محروميءَ جو جمهوريت ۾ شدت اختيار ڪرڻ ۽ هن ”نظام“ تحت معاشري جي برباديءَ جون حقيقتون پيش ڪيون وڃن ته انهن سڀني جي طرفان هڪ ئي عذر پيش ڪيو ويندو آهي ته ان جو سبب مارشل لائون لڳڻ هو. جڏهن ته هن وقت شايد ئي ڪا اهڙي پارٽي هجي جنهن جي قيادت پاڻ ڪنهن آمريت جي پيداوار نه هجي. پر هندستان ۾ ته ڪڏهن ڪا مارشل لا ناهي لڳي. پوءِ اتي پاڪستان کان به وڌيڪ غربت، ذلت ۽ محرومي ڇو آهي؟ اتي وري ثقافتي، مذهبي ۽ ٻيا مفروضا ۽ بهانا سائنسي دليلن جي جاءِ والارين ٿا. حقيقت ۾ هندستان جهڙن ملڪن ۾ جتي جاگرافيائي وسعت، صنعت ۽ معشيت وڏي هجي، رياست وسيع هجي، جنهن ۾ مختلف قومن، نسلن، ثقافتن ۽ ٻولين جي ڀرمار هجي، اتي نظام هڪ سطحي منافقاڻي ۽ پرفريب جمهوري ناٽڪ تحت ئي هلي سگهي ٿو، جيڪو انارڪي ۽ افراتفريءَ سان ئي هلائي سگهجي ٿو. فوجي مرڪزيت ۽ جبر جو اقتدار هندستان جي ڀڃ ڊاهه کي تيز ڪري ڇڏي ها، ان ڪري ئي حڪمران طبقن ۽ سامراجي آقائن آمريت کي اُتي اجازت ۽ تقويت ڪڏهن به ناهي ڏني.

پاڪستان ۾ آمريتون اچڻ جو سبب نسبتن ننڍي معيشت ۽ بالادست طبقن جي مختلف ڌڙن جي تڪرار مان جنم وٺندڙ ٽڪرائن تي ضابطو آڻڻ جي ضرورت ۽ عوامي بغاوتن جو خوف هو. بالادست طبقن جي سنجيده ماهرن ۽ سامراجي آقائن هتي فوجي آمريتون ٿاڦيون، پر اقتدار جمهوري هجي يا فوجي آمريت تي ٻڌل، هيٺئين معاشري جو نظام هڪ ئي رهيو آهي. موجوده نظام ۾ سياست، عزت، مرتبو، حيثيت، پهچ ۽ طاقت جو تعين صرف ۽ صرف دولت ئي ڪري ٿي. حڪمران اشرافيه ثقافت کان ويندي راندين ۽ مذهب تائين سڀ جو استعمال دولت، پنهنجي مفاد ۽ ناڻو ڪمائڻ لاءِ ئي ڪري ٿي. رياستي ۽ حڪومتي اقتدار ۾ فرق صرف حاڪميت جي طرز جو هجي ٿو. پر جنهن جمهوريت لاءِ هيترو تقدس معاشري ۾ هجي ٿو ۽ قربانين جي تلقين ڪئي ٿي وڃي، جن ادارن کي مقدس ڪري پيش ڪيو ٿو وڃي ۽ جنهن آئين ۽ قانون کي هڪ مذهبي عقيدي جو درجو ڏنو وڃي ٿو، سا بنيادي طور اولهه جي سرمائيداري نظام مان ڦٽي نڪتل طرز حڪمراني آهي. جنهن جو فرسوده نقل اسان جا پيروڪار حڪمران ڪن ٿا. ان جي گهڻي پرچار لبرل سيڪيولر بورجوازي جا نمائنده سياستدان ۽ اهل دانش ڪندا هئا. پر ڪجهه عرصي کان آمريڪي سامراج فوجي آمريتن ذريعي پنهنجو تسلط لاڳو ڪرڻ جو طريقو ترڪ ڪري ڇڏيو آهي. مذهبي ۽ ساڄي ڌر جون پارٽيون به هن جمهوريت جي ريلي ۾ داخل ٿي عوام ۾ پنهنجي جاءِ ٺاهڻ جي ڪوشش ۾ مصروف آهن. اولهه ۾ جمهوريت جو حاڪميت وارو جيڪو طور طريقو آهي سو ارڙهين ۽ اڻويهين صدي ۾ سرمائيداري صنعتي انقلاب جي ٻي معاشي، اقتصادي، رياستي ۽ سماجي ترقيءَ جي حاصلات سان سلهاڙيل هو. تنهن ڪري اتي استحصال اسان وانگر ننگو ۽ سفاڪ ناهي پر منافقيءَ وارو ۽ مٺي زهر جهڙو آهي. جيتوڻيڪ هاڻِ انهن ترقي يافته ملڪن ۾ معاشي ڏيوالپڻي سبب ان استحصال ۾ رکيل جبر جا جزا چٽا ٿي رهيا آهن، پر هڪ حقيقت آهي ته هن اقتصادي ۽ معاشي نظام ۾ جيڪا جمهوريت قائم آهي، تنهن جي نظام ۾ رهندڙ، ذاتي ملڪيت جي تقدس ۽ مالياتي سرمائي جي اطاعت کي تسليم ڪرڻ بنا ڪابه پارٽي يا اڳواڻ اقتدار کي هلائي نه ٿو سگهي. يونان ۾ انتهائي کاٻي ڌر جي سائريزا حڪومت جي سرمائيداريءَ اڳيان گوڏا کوڙي ڇڏڻ جو تازو مثال اسان جي اڳيان آهي.

ليون ٽرائسڪي پنهنجي مشهور ڪتاب ”روسي انقلاب جي تاريخ“ ۾ لکيو هو ته ”هڪ پٺتي پيل ملڪ، ترقي يافته ملڪن جي مادي، فني ۽ فڪري سوڀن کي ذخيرو ڪري ڇڏيندو آهي، پر ان جو مطلب هي ناهي ته هن معاشري کي هڪ محڪماڻي انداز ۾ انهن ماضيءَ جي مرحلن کي ٻيهر جنم ڏيڻ هوندو آهي.  جيتوڻيڪ پٺتي پيل ملڪن ۾ ترقي يافتا ملڪن جي پٺيان هلڻو پوندو آهي پر اهي شين کي انهيءَ ترتيب ۾ ناهن وٺندا. تاريخي پسماندگي پر اهي شين کي انهيءَ لاءِ رعايتون آهن جو انهن کي اجازت ڏئي ٿي، مورڳو مجبور ڪري ٿي ته اهي ڪوبه طريقو اختيار ڪن ۽ ڪيترن ئي وچ ۾ ايندڙ مرحلن کي اورانگهي اڳتي وڌي سگهن، جيڪي پنهنجا تير ڪمان ڦٽو ڪري بندوقون کڻي ڇڏيندا آهن.“ جيڪڏهن اسان پاڪستان ۾ جديد موٽرويز جو جائزو وٺون ته انهن جي چند ميٽرن جي فاصلي تي قائم ننڍن ڳوٺن جي گهرن ۽ انهن موٽرويز جي ٽيڪنالاجيءَ جي وچ ۾ هزارين سالن جا فاصلا آهن. الميو هي آهي ته انهن فاصلن جي دوري قلت ۽ حَوس هن سرمائيداري نظام ذريعي ختم ڪري نه ٿي سگهجي. هن مالياتي سياست ۾ عوام جي جمهوريت ممڪن ئي ناهي. جڏهن مالياتي ۽ معاشي فرق ايترو شديد آهي ته پوءِ اهڙي صورتحال ۾ سياسي، جمهوري برابري معاشري ۾ ڪيئن ممڪن آهي؟ جيتوڻيڪ جمهوريت جي ماءُ ”برطانيا“ ۾ اڃا تائين بادشاهت به موجود آهي ۽ رياست جي وحشت ۽ جبر به ڪنهن ٻي سرمائيدار رياست کان گهٽ ناهن پر جمهوري رياڪاري، قانوني ۽ عدالتي فريبن ذريعي اهو ڪرپشن ۽ جبر کي جاري رکندو پيو اچي. آمريڪي جمهوريت دنيا جي سڀ کان مهانگي ۽ بدعنوان جمهوريت آهي. پورهيت عوام جي جمهوريت ان وقت تائين ممڪن ناهي، جيستائين اقتصادي، سماجي ۽ ثقافتي برابري نه ٿي هجي.

 

 

سنڌ طاس معاهدي جي ڀڃڪڙي جنگي قدم برابر…!!

پاڪستان سنڌ طاس معاهدي کي ختم ڪرڻ کي پاڪستان خلاف جنگي قدم قرار ڏيندي چيو آهي ته 1965ع ۽ 1971ع وارين جنگين ۽ ڪارگل سياچن معاملن دوران به اهو معاهدو برقرار رهيو، ان معاهدي کي ڪنهن به صورت ۾ ختم نه ٿو ڪري سگهجي. سرتاج عزيز چيو آهي ته ڀارت پاران پاڪستان جي خلاف پاڻي جي جارحيت يا سنڌ طاس معاهدي کي هڪ طرفي طور ختم ڪرڻ نه رڳو سنڌ طاس معاهدي پر عالمي قانونن جي پڻ خلاف ورزي هوندي، ورلڊ بئنڪ ان معاهدي ۾ سهولت ڏيندڙ آهي. قومي اسيمبلي ۾ پاليسي بيان ڏيندي پرڏيهي صلاحڪار ٻڌايو ته والاريل ڪشمير ۾ انساني حقن جي خلاف ورزين تي پاڪستان پاران گڏيل قومن جي جنرل اسيمبلي ۾ ڀرپور آواز اٿارڻ تي ڀارت بوکلائجي ويو آهي ۽ هو پاڪستان جي خلاف سازشون ڪري رهيو آهي. هن سنڌ طاس معاهدي جي تفصيلن کان پڻ ايوان کي آگاهه ڪيو. هن ٻڌايو ته سنڌ طاس معاهدي جي پاسداري ٻنهي ملڪن جي ذميواري آهي، جيڪڏهن ڀارت پاڪستان جو پاڻي روڪڻ جي ڪوشش ڪري ٿو ته اهو نه رڳو ان معاهدي جي خلاف ورزي پر عالمي قانونن جي پڻ خلاف ورزي هوندي. اهڙن قدمن کي پاڪستان جي خلاف جنگ سمجهيو ويندو، اهڙا قدم پاڪستان جي معيشت کي نقصان پهچائڻ جي ڪوشش آهن جيڪڏهن ڀارت ائين ڪري ٿو ته اسان اهو معاملو گڏيل قومن ۾ کڻي وڃي سگهون ٿا.

شيرين مزاري جي سوال جي جواب ۾ سرتاج عزيز ٻڌايو ته سنڌ طاس معاهدي جي سهولت ڏيندڙ عالمي بئنڪ آهي، اسان سلامتي ڪائونسل جي 5 مستقل ميمبرن سان پڻ ان حوالي سان ڳالهه ڪري رهيا آهيون، اهي معاهدي جي خلاف ورزي ڪندا ته اسان ڀرپور ردعمل ۽ انڊس ڪميشن جي سسٽم کي فعال بڻائينداسين. هاڻي اهي خبرون اچي رهيون آهن ته ڀارت ان معاهدي تحت پاور هائوس هڻڻ جو سوچي رهيو آهي.

منزه حسن جي سوال جي جواب ۾ هن ٻڌايو ته اسان ڀارت جي پاڪستان ۾ مداخلت جا سمورا ثبوت ڏينداسين. پوءِ ان کي گڏيل قومن جي سيڪريٽري جنرل ۽ ٻين ملڪن کي ڏينداسين. 1965ع ۽ 1971ع وارين جنگين ۾ به اهو معاهدو برقرار رهيو ۽ ڪارگل ۽ سياچن معاملن دوران به ان کي هٿ نه لاٿو ويو پر هاڻي مودي سرڪار اهڙي قسم جون ڪوششون ڪري رهي آهي جنهن کي ڪنهن به صورت ۾ قبول نه ڪيو ويندو.

 

اڀرندي سرحد تي نظر آهي، هر طرح جي صورتحال کي منهن ڏيڻ لاءِ تيار آهيون: پاڪ فوج

اسلام آباد/پشاور(اي پي پي)آرمي چيف جنرل راحيل شريف جرمني مان واپسيءَ تي پشاور ۾ هڪ اعليٰ سطح جي اجلاس جي صدارت ئي. پي ٽي وي مطابق جنهن ۾ ملڪ جي مجموعي سيڪيورٽي ڪنٽرول لائن ۽ اوڀر پاسي ۾ آرمي چيف جنرل راحيل شريف صدارت ۾ عسڪري اڳواڻن جو اعليٰ سطحي اجلاس منعقد ٿيو، صدارت ۾ عسڪري اڳواڻن جو اعليٰ سطحي اجلاس منعقد ٿيو، جنهن ڪور ڪمانڊر پشاور جنرل هدايت الله خان، ڊي جي آءِ ايس آءِ ليفٽيننٽ جنرل رضوان اختر ڊي جي آءِ ايس پي آر عاصم باجوا ۽ پاڪ فوج جي ٻين آفيسرن شرڪت ڪئي. آرمي چيف کي سيڪيورٽي صورتحال تي تفصيلي بريفنگ ڏني وئي ان اجلاس ۾ آپريشن ضرب عضب ۽ آپريشن خيبر ٿري ۽ ڪنٽرول لائن جو جائزو ورتو ويو. آءِ ايس پي آر جي ڊائريڪٽر جنرل ليفٽيننٽ جنرل عاصم سليم باجوا چيو آهي ته سيڪيورٽي فورسز اوڀرندي سرحد تي ڪڙي نظر رکيون رهيون آهن ۽ ڪنهن به قسم جي اڳرائيءَ جو جواب ڏيڻ لاءِ هر وقت تيار آهيون. ڪرسچن ڪالوني ورسڪ روڊ تي حملو ڪندڙ دهشتگردن جي سهولتڪارن کي گرفتار ڪيو ويو آهي. اڱاري ڏينهن آرمي چيف جنرل راحيل شريف جي صدارت هيٺ آپريشن ۽ سيڪيورٽي صورتحال جي حوالي سان منعقد ٿيل جائزه اجلاس کانپوءِ آفيسر بيس پشاور ۾ ميڊيا کي بريفنگ ڏيندي جنرل عاصم سليم باجوا چيو ته ڪرسچن ڪالوني حملي جي چئن سهولت ڪارن کي گرفتار ڪيو ويو آهي. هن چيو ته حملي جي رٿابندي افغانستان ۾ ڪئي وئي هئي ۽ گرفتار ڪيل سهولت ڪارن دهشتگردن کي ڪرسچن ڪالوني ۾ پهچڻ ۾ مدد ڏني هئي. هن چيو ته دهشتگردن جو هڪ ساٿي افغانستان ۾ ڪٿي روپوش آهي. هن ٻُڌايو ته مردان جي عدالت تي حملي جي سلسلي ۾ 3 ماڻهن کي گرفتار ڪيو ويو آهي جن وٽان 3 خودڪش جئڪيٽ پڻ هٿ آيون آهن جن کي مردان پوليس لائنز ۽ نيشنل بئنڪ تي حملي دوران استعمال ڪرڻ جي رٿابندي ڪئي وئي هئي. هن چيو ته گرفتار ٿيل سمورن ماڻهن حملي آورن کي پنهنجي ٽارگيٽ تائين پهچڻ ۾ مدد فراهم ڪئي هئي. هن اهو به ٻُڌايو ته دهشتگرديءَ جي ڪاررواين ۾ ملوث عورتن کي پڻ گرفتار ڪيو ويو آهي جن کي قانون مطابق سزا ڏني ويندي. هن چيو ته پشاور ۽ فاٽا ۾ انٽيليجنس رپورٽس جي بنياد تي 1470 آپريشن ڪيا ويا آهن جنهن جي ڪري امن امان جي مجموعي صورتحال ۾ بهتري آئي آهي. هن چيو ته مستقبل ۾ وڌيڪ مربوط ۽ بامقصد آپريشن ڪيا ويندا، ضرب عضب ۽ خيبر ٿري آپريشن ڪاميابيءَ سان مڪمل ڪيا ويا آهن ۽ راجگال جو پهاڙي سلسلو ڪليئر ڪيو ويو آهي. هن چيو ته سمورن هنڌن تي سيڪيورٽي فورسز جا جوان سرحد ۽ علائقي جي نگرانيءَ تي مقرر ڪيا ويا آهن. هن چيو ته ٽي ڊي پيز جي پنهنجي گهرن ڏانهن واپسيءَ وارو سلسلو 76 سيڪڙو مڪمل ٿي ويو آهي ۽ لاڳاپيل ادارن جي سهڪار سان سندن ضروري امداد ڪئي پئي وڃي. پهرين جولاءِ 2016ع کان هيستائين خيبر پختونخوا ۽ فاٽا ۾ دهشتگرديءَ جون 14 ڪارروايون ناڪام بڻايون ويون آهن. سرحد تي انتظام کي وڌيڪ بهتر ڪرڻ جي ڪوشش ڪئي پئي وڃي ۽ جيڪڏهن افغانستان ان حوالي سان پنهنجو ڪردار ادا ڪري ته حالتن ۾ وڌيڪ بهتري ايندي. هن چيو ته نيون چيڪ پوسٽون پڻ قائم ڪيون ويون آهن جن سان ٻنهي ملڪن جي وچ ۾ سرحدن تي حالتون بهتر ٿينديون. هن چيو ته اڀرندي سرحد تي سيڪيورٽي فورسز جي نظر آهي ۽ ڪنهن به قسم جي جارحيت جو جواب ڏيڻ لاءِ فورسز تيار آهن. هن عوام کي پڻ اپيل ڪئي ته اهي پنهنجي لاڳاپيل علائقن ۾ پنهنجي آس پاس ڪڙي نظر رکن ۽ ڪنهن به شڪي شخص جي موجودگيءَ جو اطلاع لاڳاپيل ٿاڻي تي ڏين.

 

ڀارت اسان جو پاڻي روڪيو ته چين کي به جواز ملي ويندو: پاڪستان

اسلام آباد/گڏيل قومون (اي پي پي/م.ڊ/اين اين آءِ) گڏيل قومن جي اداري ۾ پاڪستان جي مستقل نمائنده ڊاڪٽر مليحه لوڌي چيو آهي ته ڀارت ڊگهي وقت کان رياستي دهشتگردي جي سرپرستي ڪري رهيو آهي. گڏيل قومن جي جنرل اسيمبلي ۾ ڀارتي پرڏيهي وزير جي خطاب تي جواب جو حق استعمال ڪندي پاڪستاني نمائنده چيو ته ڄمون ۽ ڪشمير ڪڏهن به  ڀارت جو اڻ ٽٽ حصو نه رهيو ۽ نه ئي اڳتي ٿي سگهي ٿو. هن چيو ته ڀارتي پرڏيهي وزير سشما سوراج جي ڪوڙن ۽ بي بنياد دعوائن جو پول پڌرو ڪندي چيو ته ڀارتي پرڏيهي وزير جنرل اسيمبلي جي خطاب ۾ بلوچستان جو مسئلو اٿاري گڏيل قومن جي چارٽر ۾ لکيل اصولن جي کليل خلاف ورزي ڪئي آهي. هن پاڪستان کي عالمي برادري ۾ اڪيلو ڪرڻ جي ڀارتي مطالبي کي خود فريبي قرار ڏيندي چيو ته والاريل ڪشمير ۽ ٻين علائقن ۾ جنگي ڏوهه ڪرڻ ۽ جنگ جي خواهش جي بنياد تي ڀارت پاڻ عالمي  برادري ۾ اڪيلو ٿي رهيو آهي. گذريل اڌ صدي دوران ڀارت پنهنجن سمورن پاڙيسري ملڪن خلاف نه رڳو جارحيت اختيار ڪئي پر انهن خلاف دهشتگردي جي سرپرستي به ڪئي. مليحه لوڌي چيو ته گذريل ڪجهه ڏينهن دوران 100 کان وڌيڪ ڪشميرين کي شهيد ڪيو ويو آهي، سوين اکين جي نور کان محروم ٿي چڪا آهن ۽ عورتن ۽ ٻارن سميت هزارين ماڻهو زخمي آهن.  اها رياستي دهشتگردي جي بدترين شڪل ۽ جنگي ڏوهه آهي، اسان ڀارت کان مطالبو ڪريون ٿا ته اهو گڏيل قومن جي اداري جي انساني هقن بابت هاءِ ڪمشنر جي تجويز ي قبول ڪندي  والاريل ڪشمير ۾ انساني حقن جي خلاف ورزين جي جاچ جي اجازت ڏئي. گڏيل قومن جي سلامتي ڪائونسل سان گڏوگڏ ڀارت ۽ پاڪستان ڪشميرين جي خود اراديت جي حق کي تسليم ۽ انهن کي اهو حق ڏيڻ جو واعدو ڪري ڇڏيو آهي.   گذريل 70 سالن کان ڀارت طاقت ۽ ڌوکيبازي سان ڪشميرين کي گڏيل قومن جي نگراني هيٺ راءِ شماري ذريعي خود اراديت جي حق جي اظهار ۽ پنهنجي مقدر جو فيصلو ڪرڻ جي اجازت نه پيو ڏئي. خود اراديت جي حق لاءِ  ڪشميرين جي جدوجهد جائز آهي ۽ عالمي برادري  طرفان ان جدوجهد جي اخلاقي ۽ سفارتي حمايت ڪشميرين جو حق آهي. هن چيو ته ڀارت اڙي واقعي کي به پاڪستان خلاف الزام هڻڻ ۽ والاريل ڪشمير ۾ ظلمن تان دنيا جو ڌيان هٽائڻ لاءِ استعمال ڪري رهيو آهي. هن چيو ته جيڪڏهن ڀارت پاڪستان کي عدم استحڪام جو شڪار ڪرڻ جي ڪوششن بدران پنهنجن اندروني مسئلن خاص طور تي  12 کان وڌيڪ وڳوڙن تي ضابطو آڻڻ تي ڌيان  ڏئي ته اهو ان جي حق ۾ بهتر ٿيندو. هن ڀارتي پرڏيهي وزير جي ان دعويٰ کي به ڪوڙو قرار ڏنو ته ڀارت پاڪستان سان ڳالهين لاءِ ڪا شرط لاڳو نه ڪيو آهي، ڀارت پاڪستان سان ڳالهيون هڪ سال اڳ معطل ڪري ڇڏيون هيون ۽ پاڪستان طرفان هر هر آڇ ۽ عالمي برادري جي مشورن باوجود انهن ڳالهين کي بحال ڪرڻ کان انڪاري آهي. وزيراعظم  ۾ محمد نواز شريف ڀارت کي ڳالهين جي تازي آڇ گڏيل قومن جي جنرل اسيمبلي ۾ تازو پنهنجي خطاب ۾ ڪئي آهي، هتي هڪ ڳالهه واضح ڪرڻ ضروري آهي ۽ اها هيءَ آهي ته ڳالهيون رڳو پاڪستان نه پر ٻنهي ملڪن ۽ انهن جي عوام جي مفاد ۾ آهن.  وزيراعظم جي پرڏيهي معاملن واري صلاحڪار سرتاج عزيز چيو آهي ته ڀارت سنڌ طاس معاهدو معطل ڪرڻ جي ڪوشش ڪئي ته پاڪستان ان تي ڀرپور احتجاج ڪندو ۽ ان معاملي کي عالمي بينڪ ۽ بين الاقوامي عدالت ۾ کڻي وڃبو، گذريل ڏينهن قومي اسيمبلي ۾ ڌيان طلب نوٽيس جو جواب ڏيندي هن چيو ته ڀارت خلاف ٿيندڙ جنگيون ۽ ڪارگل واقعي کانپوءِ به سنڌ طاس معاهدو معطل نه ڪيو ويو هو، هن قومي اسيمبلي کي ٻڌايو ته عالمي بينڪ سنڌ طاس معاهدي ۾ نه صرف سهولتڪار هو پر ان معاهدي جي ضامن به هئي ۽ ڀارت هڪ طرفي طور تي ان معاملي تي فيصلو نٿو ڪري سگهي، هن چيو ته ڀارت سنڌ طاس معاهدي کي اٿاري پاڪستان تي دٻاءُ وجهڻ جي ڪوشش ڪري رهيو آهي، جڏهن ته پاڪستان ڪنهن به قسم جو ڀارتي دٻاءُ قبول نه ڪندو. ڀارتي پرڏيهي وزارت پاڪستاني هاءِ ڪمشنر عبدالباسط کي طلب ڪري اڙي حملي جون شاهديون پيش ڪيون آهن جنهن کي پاڪستان رد ڪري ڇڏيو آهي. ڀارتي ميڊيا دعويٰ ڪئي آهي ته ڀارتي پرڏيهي وزارت عبدالباسط کي طلب ڪري اڙي حملي ۾ پاڪستان جي ملوث هجڻ جون شاهديون پيش ڪيون. پاڪستاني هاءِ ڪمشنر عبدالباسط ڀارتي الزامن کي رد ڪندي چيو ته پاڪستان ذميوار ملڪ آهي، اڙي حملي سان اسان جو ڪو لاڳاپو ناهي. هن وڌيڪ چيو ته ڀارت پڪن ثبوتن کان سواءِ پاڪستان تي الزام هڻڻ بند ڪري.

 

سنڌ ۾ 60 لک شاگرد تعليم کان محروم آهن: مراد علي شاهه

ڪراچي (اسٽاف رپورٽر) وزيراعليٰ سنڌ سيد مراد علي شاهه چيو آهي ته صوبي ۾ 60 لک کان وڌيڪ ٻار اسڪولن کان ٻاهر آهن. تعليمي ادارن ۾ شاگردن جي داخلائن لاءِ ڀرپور  قدم کنيا پيا وڃن. تعليم جي مسئلن تي ڪوٺايل سيمينار کي خطاب ڪندي وڏي وزير سيد مراد علي شاهه چيو ته تعليم جي معيار کي ڏسي صوبي ۾ تعليمي  ايمرجنسي لاڳو  ڪئي وئي آهي. تعليم جي بهتري لاءِ تعليم کاتي جي وزير کي مڪمل اختيار ڏنل آهن. هن وڌيڪ چيو ته هر ٻار کي تعليم ڏيڻ اسان جو فرض آهي. سنڌ حڪومت هن مسئلي کي حل ڪرڻ پهرين ترجيح سمجهي ٿي. هن چيو ته هر ٻار کي تعليم ڏيڻ لاءِ بجيٽ جو وڏو حصو تعليم لاءِ رکيو ويو آهي. ۽ هر اسڪول ۾ تعليم جي معيار کي بهتر ڪرڻ لاءِ ڀرپور ڪوششون ورتيون پيو وڃن. ٻي طرف  وزيراعليٰ  سنڌ جي صدارت هيٺ صوبي ۾ تعليم جي بهتري لاءِ  اجلاس ٿيو، جنهن ۾ تعليم کي بهتر ڪرڻ لاءِ غور ڪيو ويو، اجلاس ۾ تعليم کاتي جي وزير ڄام مهتاب ڏهر، سيڪريٽري فضل الله پيچوهي ۽ ٻين شرڪت ڪئي، ان موقعي تي تعليم کي بهتر ڪرڻ لاءِ بحث ڪيو ويو، صوبائي وزير اجلاس ۾ چيو ته تعليم لاءِ سنجيده آهيون، 5 سال پروگرام جا 2 سال گذري ويا آهن. تعليم کاتي جي بهتري لاءِ عملي سهڪار جاري آهي. ڄام مهتاب ڏهر چيو ته ملازمن ۽ استادن تي نظر رکڻ لاءِ 200 کان وڌيڪ مانيٽرنگ اسسٽنٽ مقرر ڪيا ويا آهن. جڏهن ته قديم اسڪولن جي عمارتن جو مرمتي ڪم پڻ جاري آهي. سيڪريٽري تعليم فضل الله پيچوهو چيو ته سرڪاري اسڪولن ۾ شاگردن جي داخلائن لاءِ  هر ممڪن قدم کنيو پيو وڃي.