تازيون خبرون

Monthly Archives: September 2016

”پاڪستاني اداڪار دهشتگرد ناهن“سلمان خان پابندي جي مخالفت ڪري ڇڏي

نئين دهلي: بالي ووڊ جي دبنگ اداڪار سلمان خان پاڪستاني اداڪارن تي ڀارت ۾ پابندي جي مخالفت ڪندي چيو آهي ته پاڪستاني اداڪار دهشتگرد ناهن، اسان کي  دهشتگرد ۽ فنڪار ۾ فرق ڪرڻو پوندو، هڪ بيان ۾ هن چيو ته پاڪ – ڀارت وچ ۾ مسئلن جو حل امن آهي، ڀارت ۾ پاڪستاني اداڪارن کي ڌمڪين جي مذمت ڪندي سلمان خان جو چوڻ هو ته ڀارت ۾ ڪم ڪندڙ پاڪستاني اداڪار دهشتگرد نه پر فنڪار آهن، ڀارتي حڪومت فنڪارن کي ويزا جاري ڪيا ۽ ملڪ ۾ اچڻ جي اجازت ڏني.هن چيو ته اڄ جي دور ۾ جيڪڏهن اسان امن سان رهنداسين ته اهو سڀني لاءِ بهتر هوندو، جڏهن ته اهو عمل خاص طور تي هڪ عام ماڻهو لاءِ وڌيڪ بهتر هوندو.

 

سڄي ملڪ جي سئنيمائن تان ڀارتي فلمن جي نمائش بند

لاهور (شوبز نيوز) سڄي ملڪ جي سئنيما مالڪن لائن آف ڪنٽرول تي ڀارتي حملي سبب اڻڄاتل مدي تائين بالي ووڊ فلمن جي نمائش روڪي ڇڏي آهي. ڀارتي پروڊيوسرز ايسوسيئيشن پاران پاڪستاني فنڪارن تي پابندي کانپوءِ پاڪستاني سئنيما مالڪن به حالتون سڌرڻ تائين ڀارتي فلمون لاهڻ شروع ڪري ڏنيون آهن، امڪان آهي ته اڄ سئنيما مالڪ ۽ ڊسٽريبيوٽرز ڀارتي فلمن تي پابندي لڳائڻ جو باقائده اعلان ڪندا، جنهن سئنيما مالڪن ٽي وي چينلن تان ڀارتي ڊراما به بند ڪرڻ جي گهر ڪئي آهي.

 

ظهير عباس ويسٽ انڊيز خلاف ون ڊي سيريز ۾ به پاڪستان ٽيم پاران ڪلين سوئپ جي اڳڪٿي ڪري ڇڏي

اسلام آباد  (اسپورٽس نيوز) انٽرنيشنل ڪرڪيٽ ڪائونسل (آئي سي سي) جي صدر ظهير عباس ويسٽ انڊيز خلاف ون ڊي سيريز ۾ به پاڪستان ٽيم پاران ڪلين سوئپ جي اڳڪٿي ڪري ڇڏي، ظهير عباس جو چوڻ آهي ته ويسٽ انڊيز کي ٽوئنٽي ٽوئنٽي سيريز ۾ 3-0 تان شڪست ڏيڻ کانپوءِ پاڪستان ٽيم جو اعتماد بحال ٿيو آهي، پاڪستان ۽ ويسٽ انڊيز وچ ۾ ٽن ميچن تي ٻڌل هڪ ڏينهن جي ميچن واري سيريز کانپوءِ ٽن ميچن جي ٽيسٽ سيريز به کيڏي ويندي پرڏيهي خابرو اداري موجب پاڪستان ٽيم جي اڳوڻي عظيم بيٽسمين ظهير عباس چيو ته پاڪستان ٽيم کي ويسٽ انڊيز کان هڪ ڏينهن واري سيريز ۾ ڪاميابي لاءِ ڪا ڏکيائي نه ٿيڻ گهرجي، هن چيو ته رانديگرن ٽوئنٽي ٽوئنٽي ۾ بهترين راند جو مظاهرو ڪيو، ان ڪري هڪ ڏينهن واري سيريز لاءِ به ان مان گهڻيون اميدون لاڳاپيل آهن، آءِ سي سي جي صدر پاڪستاني اسپنرن جي تعريف ڪندي هڪ ڏينهن واري سيريز ۾ انهن جي ڪردار کي گهڻو اهم قرار ڏنو، هن ون ڊي ڪرڪيٽ ۾ قومي ٽيم جي ناقص ڪارڪردگي تي ڳالهائيندي چيو ته نوجوان رانديگرن کي ويسٽ انڊيز خلاف هڪ ڏينهن واري سيريز ۾ وڌيڪ موقعا ڏيڻ جي ضرورت آهي، ظهير عباس ڪپتان تي زور ڏنو ته هو گذريل غلطين مان سبق سکي ،نوجوانن کي وقت ڏيڻ ضرورت آهي جڏهن ته توهان سموري ٽيم ۽ پاڪستان کي گڏ تبديل نه ٿا ڪري سگهو ، هندستاني ڪرڪيٽ بورڊ جي صدر انوراگ ٺاڪر جي بيان جي حوالي سان پڇيل هڪ سوال تي ظهير عباس چيو ته اهي ڏينهن پري ناهن ،جڏهن سمورين ٽيمون ڪرڪيٽ سيريز کيڏڻ لاءِ پاڪستان جو دورو ڪنديون.

 

انڊر18 ايشيا هاڪي،پاڪستان جي ڀارت هٿان پڄاڻي

ڍاڪا (اسپورٽس نيوز) انڊر18 ايشيا ڪپ هاڪي ۾ پاڪستاني اڳڀرائي سان ڀارت هٿان پڄاڻي ٿي وئي. سيمي فائينل ۾ گرين شرٽس کي 1-3 سان موڪلاڻي جو نياپو مليو،واحد گول امجد علي خان پنالٽي ڪارنر تي ٺاهيو،بنگلاديش چائنيز تائپي کي 6-1 تان مات ڏئي فائنل ۾ پهچ حاصل ڪئي،اشرفل هيٽ ٽرڪ ٺاهي،چئيمپين جو فيصلو اڄ ٿيندو.

 

مان نه شاعر هيس،عشق ٿيڻ کان اڳي!!: منير ڊومڪي

سنڌي ادبي آکيڙي ۾ هو نئين ٽهي جي تخليڪارن منجھ شايد پهريون تخليڪار هوندو، جنهن پنهنجي صوفي منش شخصيت ۽ منفرد  ڏات جي ڪري جلد هي منهنجي من اندر آکيرو ٺاهي گهرو تاثر ڇڏيو،جيئن سنڌ جو“شمشير”صرف هڪڙو ئي هو تيئن لاڙڪاڻي جو هو “فرازي” به صرف هڪ ئي آهي،ٻيو ڪو به نه.عام زندگيءَ ۾ سڪندر شيخ جي نالي سان ڄاتل سڃاتل هو شخص تخليق جي دنيا ۾ فرازي جي نالي سان ڄاتو(معاف ڪجو!نه ڄاتو) ويندو آهي.فرازي نئين نسل جي غزل جي صنف جو هڪ اڀرندڙ مخلص شاعر آهي،هو آزاد طبع رومانوي شاعر آهي.هن جا گھرا فڪري خيال به عنبر ۾ هر وقت اڏام ۾ هوندا آهن.هو جمال جو ڪمال جو ڪوي آهي،سندس اڪثر ڪويتائن ۾ان جو مظهر پڻ نظر اچي ٿو.هو جديد جُڳ جي سنڌي شاعريءَ ۾رديف ۽ قافيو جي قابليت جي حوالي کان پنهجي هڪ الڳ ۽ انفرادي حيثيت رکي ٿو.هن پنهنجي گھري فڪري شاعريءَ ۾ نوان استعاره ۽ اڻ ڇهندڙ تشبيهون ڪتب آنديون آهن،جيڪي سنڌ جي اڪثر شاعرن جي شعرن ۾ اڻ لڀ آهن.

ڪنهن ته آهي غزل جي رڙ سمجهي،

ڪنهن ته اجڙي ويل جي رڙ سمجھي،

گھر چيو شام خوش ٿيئي مون کي،

ڪنهن ته آ گھر ڊٿل جي رڙ سمجھي.

 

ڪير ڪنهن سان سچو ڪٿي آهي!

ماڻهو  ماڻهو  رهيو  ڪٿي  آهي.

 

وئشيا  جي  پيار  وانگي،

زندگي  ٿي  بار  وانگي،

ڪنهن نه آ تو سان ملايو،

مان  رنس پئي ٻار وانگي،

تو سوا مرڪ منهنجي نيڻن جي،

نانءُ  آ ماتمي  نظارن  جو.

وڌيڪ هن جي شاعري جي قدامت ۽ فني گھري فڪر کي ڪو ڀليءَ ريت تڏهن ئي پروڙي سگھي ٿو،جڏهن ڪو هن جي شاعري جي پهرين مجموئي جي ڪتاب “سمنڊ تري آيا”کي هڪ نظر مان ڪڍندو ته هو پاڻ مرادو ان نتيجي تي پڄندو ته فرازي ڪويتائن جي ڪنهن هڪ پاسي جو شاعر نه آهي.فرازي ڪو هڪ نه آهي، بلڪه ڪيترائي فرازي آهن،فرازي پيار،وفا ۽ رومانس جو شاعر، فرازي عورتن جي نفيس جذبن جو شاعر،فرازي مزاحمتي قوم پرست شاعر،فرازي درد،پيڙاءُ ۽ پڇتاءُ جو شاعر يا فرازي مسلسل جدوجهد ۽ اميدن جو شاعر.اڄ جيڪڏهن هن جي سنڌ جي اڪثر امير ادبي حلقن ۾ هن جو نالو ناهي ته ان جو سبب هڪ ته هو غربت جي گھاڻي ۾ پيسنجندڙ شاعر آهي ۽ ٻيو هن جو قصور اهو آهي ته هو اڄ جي نام نهاد درٻاري شاعرن وانگر درٻاري مزاج جو ناهي، هو ته صرف پنهنجي تر ۽ گھر جي ٻاهران در جو شاعر آهي ۽ هو پنهجي اهڙي اسٽيٽس  کان مطمئن به نظر اچي ٿو.ڀلا جنهن “اسٽيٽس ڪيو” جي روڳ ۾ ورتل بيمار معاشري ۾ جڏهن هڪ استاد جي پيشه آورانه  علمي صلاحيتن کي گھٽ ۽ هن جي ٻاهرين ظاهري ڏيک جي ماڊلنگ کي وڌيڪ اهميت هجي،يا جتي هڪ اداڪار جي انفرادي صلاحيتن ۽ اداڪاري کي گھٽ ۽ هن جي ڪار کي وڌيڪ ترجيح ڏني وڃي، اهڙي ڏيکاءُ ۽ نماءُ واري ماحول ۾ شيخ فرازي جهڙي گمنام تخليڪار جي تخليق کي ڪهڙي مڃتا ملندي؟ اڄوڪي اسان پنهنجي بحث ۾ فرازيءَ جي رومانوي شاعري واري پهلو ته هڪ نظر وجھنداسين.شيخ فرازي جي تقريبن سڄي شاعري جماليات ۽ حساسيت سان ڀريل آهي.

محبت خالي هڪ عاشق جو ڪنهن محبوب لاءِ اندر جو پاڪ جذبونه آهي بلڪه محبت ته هڪ مذهبي احساس پڻ آهي. محبت پنهنجو هڪ الڳ مذهب آڇيندي آهي، جنهن ۾ محبوب جا هٿ ڪنهن به وقت عقيدتمنديءَ سان چمڻ ان احساس جي انتها جي نشاني هوندي آهي.

ڪعبي جهڙي الفت سان،

رات چميا مون يار جا هٿ.

توهان يقين ڪريو ته جڏهن  محبوبا جي پيار جا هٿ عاشق جي هٿن ۾ ايندا آهن ته پوءِ درد تڪليفون ۽ ٻيا اذيت ڏيندڙ هٿ پاڻ مرادو پري ٿي ويندا آهن.

ويجھو آيا پيار جا هٿ،

پري ٿيا آزار جا هٿ.

هڪ وڏي رومانوي شاعر جون اهي ڪهڙيون ڪواليفيڪيشنس ۽ خصوصيتون آهن، جن جي ذريعي اها سڌ پوي ته اهو شاعر رومانوي شاعر آهي؟ هر رومانوي شاعر هڪ ته شاعري تمام سادي ٻوليءَ ۾ ڪندو آهي ۽ هو عام ماڻهوءَ کان وڌيڪ پنهنجا سڀ حواس پنهجي شاعري جي ذريعي جھجھي انداز ۾ پيش ڪندو آهي، هونه فقط پنهنجي شاعري جي ذريعي انهن حواسن جو بي تهاشا نماع ڪري، پر پڙهندڙن تي هن جي شاعري هڪ گھري تاثرسان گڏوگڏ جامع پيغام به ڇڏي.۽ وڌيڪ اهو ته هڪ وڏي رومانوي شاعر جي ٻي وڏي خصوصيت اها به هوندي آهي ته هو هميشه پنهنجي شاعريءَ جي ذريعي پنهنجي شاعري جوهڪ الڳ تصور پڻ پيش ڪندو آهي. آئون نٿو چوان ته شيخ فرازي مشهور انگريزي رومانوي شاعرن وانگر ڪو وڏي قد ڪاٺ جو شاعر آهي، پر هو ايترو ته وڏي قد جو رومانوي شاعر ضرور آهي جو هن پنهنجي رومانوي شاعريءَ ۾ شاعريءَ جو پنهنجو هڪ الڳ ۽ منفرد تصور ڏنو آهي. هن جي رومانوي شاعريءَ جو تصور اهو آهي ته صرف اهو ماڻهو ئي شاعر ٿي سگھي ٿو، جنهن کي عشق جي چوٽ لڳي هجي ۽ هوان مرحلي مان گذريو هجي، جيڪو شاعر عشق جي تڙپندڙ تجربي مان نٿو گذري، فرازيءَ جي تصور مطابق اهو پاڻ کي شاعر چورائڻ جو به حق نٿو رکي،يعني رومانوي شاعر ٿيڻ لاءِ عشق پهرين ڪرايٽيريا آهي،جيئن فرازي چوي ٿو ته:

مان نه شاعر هيس،

عشق ٿيڻ کان اڳي.

۽ شاعري وارو ڏانءُ هڪ شاعر عاشق ۾ تڏهن ئي اچي سگھي ٿو، جڏهن هو پنهنجي ان محبوبا (جي مُک) ۾ چاهت جا مرڪندڙ گلاب ڏسي ۽ هن کي هلندي به ڏسي:

تنهنجو مرڪڻ گلاب چاهت جا،

۽ هلڻ تنهنجو شاعري آهي.

ٺيڪ آ! شاعري وارو ڏانءُ هڪ شروعاتي مرحلي ۾ هڪ شاعر عاشق ۾ عشق جي چڻنگ جي ڪري پيدا ٿيو، اها ته ابتدا هئي،پوءِ ڀلا ان شاعريءَ واري اختتام واري منزل تي هڪ شاعر عاشق ڪيئن پڄي؟! ان پيچيده سوال جو لازوال جواب ته خود رومانوي شاعر عاشق فرازي ئي بهتر ڏئي سگھي ٿو:

دهشتن جي مون کي رات هنج ۾ڪري

نيڻ ارپي ٻئي، شاعري ٿي ختم،

جديد ٽهي جي غزل جي شاعر فرازي جي شاعريءَ ۾ جيڪا شيءِ مون کي سڀني کان وڌيڪ حيران ڪن لڳي اُها اها آهي ته هو شاعري ۽ محبوبا کي ٻه الڳ شيون نٿو سمجهي بلڪه ٻنهي کي هڪ ٻئي جو ساڳيو تسلسل سمجھي ٿو.هڪ تخليڪار جي اڃ ڪيئن اجھامبي ڀلا؟هڪ تڙپندڙ عاشق جو پياس ڪيئن ختم ٿيندو؟جڏهن هن جو يار(شاعري) هن تائين( هن جي تصور تائين) اچي،پوءِ ڪا به پياس نه رهندي:

هاڻي ڪا ئي پياس نه رهندي،

آيو يار اڃارن تائين.

ڪنهن غزل جي رومانوي شاعر لاءِ سڀ کان وڌيڪ هن جي شاعريءَ لاءِ اسٽف يا مٽيريل ڪير مهيا ڪري سگھي ٿو؟اها آهي خود هن جي محبوبا،ڇو ته غزل چئبو ئي ان کي جيڪو محبوب جي حسن ۽ انگ جون هن سان ڳالهيون ڪري ۽ محبوب جون ڳالهيون (شاعري  جي ذريعي )ڪنهن سان اوري به،۽ گيت ۾ وري ڪا عورت پنهنجي عاشق جي واکاڻ  ڳائي ڪري ڪري،پر جيڪڏهن انهن ٻنهي جو ميلاپ ۽ اتصال هجي ته پوءِ؟!۽ جيڪڏهن محبوبا پنهنجي ديواني عاشق کي پنهنجا انگ به ارپي،گيت به ڳائي ته پوءِ؟ته پوءِ رومانوي غزل جو شاعر جهڙوڪ فرازي نه چاهيندي به غزل ته لکي ويهندو نه!۽ شاعر جي اجازت وٺڻ بغير، هوءَ دلربا پنهنجي انگ ۽ حسن جي تعريف ۾لکيل غزل ته وٺي ته ويندي نه!

انگ ارپي پئي،گيت ڳائي پئي،

مان غزل ٿو لکان،هوءَ وٺي ٿي وڃي.

هڪ عاشق جڏهن پنهنجي معشوقه جو ٻاهريون روپ ۽ اندريون روپ ۽ اندريان انگ ڏسندو آهي ته پوءِ هو دل هي دل ۾ عزم ڪري ويهندو آهي ته هن لاءِ هاڻ پنهنجي ان سهڻيءَ کان  ڏور رهڻ ناممڪن ٿي ويندو:

روپ تنهنجو ڏسي، دل عزم آ ڪيو،

دور توکان رهڻ، هاڻ ممڪن نه آ!

محبوبا جو جسم هڪ باغ مثل آهي،جنهن باغ جي شروعاتي حصي ۾ رومانس جي وقت رنگ به رنگي سهڻا پوپٽ گلن سان گڏ پڻ ٽڙندا آهن۽انهن پوپٽن کي پڪڙڻ ۽ ڇهڻ صرف محبوب جو ئي فطرتي حق هوندو آهي:

باغ بدن مان رنگ به رنگي،

سهڻا پوپٽ! گُل ٽڙن ٿا.

هڪ رومانوي شاعر جي ڪنهن دلربا لاءِ رومانس جي مسرت ۽ مزي جو انتها ٿئي ٿو،جڏهن هو انبر جي خوشبوءِ جيڪا خوشبوءِ سڀني کان وڌيڪ دلفريب ۽ وڻندڙ هوندي آهي،ان خشبودار وکر جي مهڪ کي به ڪجھ به نه سمجھي ان کي هو گھٽ ڪري،ان جي ابتڙ پنهنجي سهڻيءَ جي ململي جسم جي(گرم)پگھر کي وڌيڪ سمجھي ۽ هن کي ڏاڍو پسند به ڪري،جيئن فرازي چوي ٿو ته:

مهڪ انبر جي وڻي ڪنهن جاءِ تي،

پر مون کي تنهنجو پگھر، ڏاڍو وڻيو!

۽ جيڪڏهن ڳالهه دل جي من موهيندڙ مومل ڏانهن روز اچڻ وڃڻ جي هجي ۽ نيڻن کي نيڻن سان سلاميءَ جي هجي،پوءِ اهڙو ڪهڙو راڻوديوانو هوندو، جيڪو فرازيءَ جي هنن سٽن کي نظرانداز ڪندو؟

اسان جو اوهان ڏي اچڻ روز ٿئي ٿو،

اکين سان اکين کي چمڻ روز ٿئي ٿو.

رومانس درحقيقت هڪ عاشق ۽ معشوقه جي وچ ۾ جسماني محبت جو ڪلاميڪس هوندو آهي ۽ اهو انوکو ۽ وڻندڙ تجربو انهن ٻنهي جي ڪل ميراث هوندي آهي،ان دلفريب تجربي جي ابتدا محبوب ڪري يا محبوبا ڳالهه مڙئي هڪڙي ئي ليکبي.فرازيءَ جي رومانوي شاعري ۾ جتي عاشق جي رومانس جي انتها ڏيکاري وئي آهي، اتي ئي وري  لاڏلي معشوقه جي لاڏ لوڏن جورومانس سنڌي امتحاني پرچي جي سوال وانگر “کولي سمجھايو”واري انداز سان ڏيکاريو ويو آهي.

هوءَ ڏس هلندي اچي پئي روڊ تي،

لاڏلي لڏندي اچي پئي روڊ تي،

مون ڏٺو اڄ هرڻي وانگي نازنين،

ڪامڻي ڪڏندي اچي پئي روڊ تي

سنڌي ادب ۾ فرازي شايد پهريون رومانوي شاعر آهي، جنهن پنهنجي رومانوي شاعريءَ جي ذريعي محبوب ۽ محبوبا جي ذاتي رومانس کي ڪلچرل ٽچ پڻ ڏنو آهي:

خيال منهنجو گھوٽ بڻيو،

هوءَ سنوري ڪنوار وانگي.

فرازي جو “محبوبا جي رومانس جو تصور”ڪو هڪ نه بلڪه گھڻن رخن وارو آهي.ڪڏهن هو رومانس کي سهڻيءَ جي گلاب ڳلن کي چمڻ کانپوءِ غمگين عاشق جو اٿاه غم جو پاڻمرادو ختم ٿي وڃڻ نانءُ سمجھي ٿو:

مون اٿي ڳل چميا گلابن جا،

روشنين ۾ مئو ملال آهي.

ته ڪڏهن وري محبوبا جي هيري وانگر سفيد نيڻن کي چمڻ کانپوءِ هڪ آرڊنري عاشق، آرڊنري عاشق نٿو رهي بلڪه لازوال ٿي پوي ٿو.

نيڻ پکراج هي چمي تنهنجا،

ٿي پيو لازوال  آهيان  مان.

ته ڪڏهن وري محبوبا جي اظهار جا هٿ عاشق ديواني لاءِ نيڻن جي خوشي ۽ خوش حاليءَ جا سبب بڻجن ٿا.

ساوڪ بڻيا نيڻن جي،

هي تهنجي اظهار جا هٿ.

هڪ عاشق آسودو ۽ خوش حال ڪڏهن ٿيندو آهي؟ان وقت نه جڏهن هن کي دنيا جون سڀ مادي شيون ملي وڃن،بلڪه ان وقت جڏهن هو محبوبا جي نرم ٻانهن جي ٻک ۾ هجي، پوءِ ته سائين عاشق ڄڻ زمين تي نه فلڪ ۾ڪڪرن مٿان اگھور ننڊ ۾ ستو پيو هجي:

تنهجي ٻانهن ۾ فرازي رات ڀر،

ائين لڳو ڄڻ ننڊ هئس ڪڪرن مٿان.

ٻانهن جي ٻک کانپوءِ عاشق هن دنيا ۾ نه هوندو آهي هن کي معشوقه ڄڻ ته پاڻ سان گڏ هڪ ٻي دنيا ۾ وٺي ويندي آهي،اها دنيا جنهن ۾ هن دنيا جو ڪو به ماڻهو نه هوندو آهي، صرف اهي ٻئي محبوب ۽ محبوبا هوندا آهن ۽ انهن جوگرم پيار:

هيئن لڳي ٿو هتي نه آهيان مان،

پاڻ سان ڪا وٺي وئي آهي.

ته ڪڏهن فرازي وري ان رومانس کي گرميءَ ۾ گلوڪوز جي گلاس جيان هانءُ جو ٺار ڪوٺي ٿو:

ڪيترو پيار ٿو ڪيان تو سان،

هانءُ جو ٺار، ڪجھ ٻڌائي ٿو.

………………هلندڙ…………..

ان کان علاوه شاعر فرازي وري معشوقه جي رومانس کي عاشق جي رومانس مٿان فوقيت به ڏي ٿو ۽ ڪيترن ڊوهن دوکن باوجود به محبوبا جي رومانس جي ڪمٽمينٽ جو به انتها درجي جو مثال پڻ ڏي ٿو:

چئي ٿي دوکا ڊوهه ڪٽيندس،

جرئت سان ڏاٽا ٿي ڳولي،

فرازي مڃي يا نه مڃي، جيڪا محبوبا جنهن جرئت سان اڄ جيڪي ڏاٽا ڳولي ٿي،اها شباب ۽ نقاب جي بهاني ننڍپڻ ۾ محبوب سان هڪڙي ڳالهه ڪندي آهي ۽ جوانيءَ ۾ وري محبوب سان جٺ به ڪري ويندي آهي!

ننڍپڻ ۾ هن چيو هو، ملبو شباب ۾،

جڏهين جوان ٿي آ، ملي آ نقاب ۾.

جيئن پيارماڻهوءَ کي ڀٽڪيل،خواب ۽ ويسر واري زندگي مان جاڳائڻ جو نالو آهي،ائين ئي وري رومانس محبوب کي محبوبا سان مڪمل طور ملڻ لاءِ مڪمل تيارين لاءِ الرٽ ڪندو آهي:

اجھو ٿي رات منهن کولي،

رکو ٻاري بتي جانان!

رات وارو رومانس راتوڪو هو،صبح جو سويري جڏهن محبوبا محبوب جي اڳيان ايندي آهي ته ڪنهن ٻئي ويس ۽ روپ ۾ ايندي آهي:

صبح جو سويلو اسان جي اڳيان،

اڇو ويس پائي اچي چنڊ ٿو.

مختصرن،فرازي جي رومانس جي مئٿ ميٽڪس ايترو ته سمپل آهي، جو پيار ۽ رومانس ۾ تفريق وارو عنصر پڻ پاڻمرادو غائب ٿي وڃي ٿو.خيال+نيڻ+ڳل+هٿ+ٻانهون+ اڪيلي محبوب ۽ محبوبا جي دلفريب دنيا برابر رومانس.

هاڻي اسان انهن معصوم پر نظرانداز ڪندڙ خامين تي تڪڙي نظر وجھنداسين،جيڪي خاميون اسان کي فرازيءَ جي رومانوي شاعري ۾ نظر آيون. هڪ ته شيخ فرازيءَ جوڪن جڳهن تي پنهنجن خيالن جو ورجاءُ هن جي رومانوي شاعري ۾ بوريت جو ايليمينٽ پيدا ڪري ٿو:

جڏهن ٿو اچان رات جو دير سان مان،

ته  ٻاري  بتيءَ  کي  اٿي  ويٺي  آ

 

نه جھيڙو نه جھڳڙو ڪرڻ آءُ ڄاڻان،

اکين کي اکين سان چمڻ آءُ ڄاڻان.

۽ شاعريءَ ۾ اها فني لحاظ کان اوڻائي چئبي، پر ساڳئي وقت اها خوبي به چئبي،ڇو جو شاعر وٽ اهڙو ڏانءُ آهي جو هن کي ڪنهن هڪ خيال کي ڪيترن ئي طريقن سان پيش ڪرڻ جو باڪمال هنر ۽ اصلوب به اچي ٿو.ٻيو هن جي رومانوي شاعري خود هن جي ڪافي پنهنجن خيالن جو متضاد جهلڪ به ڏي ٿي هيٺيان ڪجھ شعرثبوت ڏين ٿا:(

1)

زمين آڪاش قرب تنهنجو،

حسين تو ۾ جمال آهن.

ٿر بڻائي وئي آ سڪ هن جي،

هو ڪڪر ٿي وسيو، ڪٿي آهي!

(2)ناز سان مون ڏي نهاري،

دل منهنجي وٺندي وڃي ٿي،

مان ڪري ڄڻ پيس فلڪ تي،

ديد مون تي پيس،اٿي وئي

(3) ننڍپڻ ۾ هن چيو هو، ملبو شباب ۾،

جڏهين جوان ٿي آ، ملي آ نقاب ۾.

چوي ٿي نه هاڻ ڪبو تو کان پردو،

ڪيل پنهنجي غلطي ڏسڻ شام آئي.

رومانوي شاعريءَ ۾ متضاد خيال پيش ڪرڻ خاميءَ سان گڏوگڏ رومانوي شاعريءَ جو حسن به آهي،چاهي پوءِ اها رومانوي شاعري ڪنهن سنڌي شاعر جي هجي يا ڪنهن انگريز شاعر جي.مشهور انگريزي رومانوي شاعر جان  ڪيٽس به پنهنجي شاعريءَ ۾ متضاد خيال پيش ڪيا آهن.جيئن هو پنهنجي نظم ”اينڊيامن” ۾ چوي ٿو ته:

A thing of Beauty is joy forever

يعني هر سونهن واري شيءِ سدائين لاءِ خوشيءَ جو بائث آهي،وري پنهنجي هڪ ٻئي نظم“ميلينڪلي”۾چوي ٿو ته :

يعني سونهن  خوشيءَ سان رهي ٿي،ٻنهي جو انت ٿيڻو ئي ٿيڻو آهي. She dwells with Beauty—Beauty that must die

تنهن ڪري متضاد خيال پيش ڪرڻ رومانوي شاعرن جو شاعري ۾ ڪفر ڪرڻ نه بلڪه احساسن جي ايمان کي وڌيڪ پختو ڪرڻ آهي.

فرازيءَ جي رومانوي شاعريءَ ۾ اسان کي ٽن حواسن تي مشتمل شعر جهجهي مقدار ۾ ملن ٿا،پر بقايا ٻن حواسن جهڙوڪ ٻڌڻ جي حس ۽ چکڻ واري حس تي شعرن جي ڪلت شدد سان محسوس ٿئي ٿي،هتي شيخ فرازي بطور رومانوي شاعر ٿورڙو کٽي پوي ٿو.شيخ فرازي جي خوبصورت شاعري واري داستان گھڻو رنگين ته آهي ئي آهي،پر هن جي عملي زندگي جي داستان ان کان به وڌيڪ سنگين آهي.

گھڻو جيڪو رنگين هو داستان،

اهو ئي  ته  سنگين  هو  داستان.

هو ان لاچار ۽ مجبور ڪنهن فيڪٽريءَ ۾ ڪم ڪندڙ مزدور وانگر آهي،جيڪو مزدور جن شين کي فيڪٽري ۾ پاڻ پنهنجي جفاڪش هٿن سان پروڊيوس ڪندو آهي،پر جڏهن اهي شيون مارڪيٽ ۾ اينديون آهن،ته هن کي پاڻ ۾ به انهن شين جي قوت خريد نه هوندي آهي.ٺيڪ ائين ئي شيخ فرازي لاڪاڻي جي مشهور رابيل ڪتاب گھر ۾ پاڻ هڪ مزدور آهي،ماڻهن ۾ علم جا خزانه ادب تي روز نت نوان ڪتاب ته وڪڻندو آهي،پرهن ۾پاڻ ۾انهن ساڳين ڪتابن جي قوت خريد نه آهي.هڪ ماڻهوءَ سان اها ڪيڏي نه وڏي ٽريجڊي هوندي!اڄوڪو هي مضمون مون ان لاءِ نه لکيو آهي ته ڪو شيخ فرازي جي يا منهنجي “واه،واه”ڪرڻ ۾ هجي ته ڪيڏي نه ڀلي شاعري آهي ۽ ڪيڏو نه ليکڪ ان شاعريءَ تي سهڻي ۽ جامع نموني شاهڪار مضمون لکيو آهي،پر اڄوڪو هي مضمون ثقافت کاتي جي ننڊ ۾ اگھور انهن درد مند آفيسرن لاءِ آهي ۽ ٻين ساڃانهه وند درد انسانيت رکندڙن انهن ماڻهن لاءِ آهي،جيڪي شايد شيخ فرازي جھڙن اڀرندڙ شاعرن جي فطرتي ۽ لڪيل قلمي صلاحيتن کي اجاگر ڪرڻ ۾ ڪا سهائتا ڪن.شيخ فرازي جو ٽن چئن ڪتابن جيترو شاعري مسودو تيار پيو آهي،پر هن ۾اها معاشي وسعت ناهي جو هو انهن کي ڪنهن پبلشر کان ڇپرائي سگھي!منهنجي ته اڃا ثقافت کاتي جي اعلى اختيارن کي اها نماڻي گذارش هوندي ته هو شيخ فرازي جهڙي تخليقار کي پنهنجي ڊيپارٽمينٽ ۾ ڪنهن ڪنڊ پاسي ۾ مستقل طور ٿورڙي جڳهه ڏين!هو ايترو ته پڙهيل لکيل ضرور آهي، جيترو شڪيسپيئر هو،ڪو ته هجي جيڪو هن جي لاوارث غزل ۽ اجڙي ويل وجود جي رڙ سمجھي؟! ته پوءِ هو به چئي ويهي ته:

ڪنهن ته آهي غزل جي رڙ سمجهي،

ڪنهن ته اجڙي ويل جي رڙ سمجھي.

Muneer03337569110@gmail.com

 

 

ڀارتي کي اڳرائي جو منهن ٽوڙ جواب……!

لائين آف ڪنٽرول تي ڀارتي فوج جي بنا جواز فائرنگ ۽ گولاباري جي نتيجي ۾ پاڪ فوج جا 2 جوان شهيد ۽ 6 شهري زخمي ٿي پيا، پاڪ فوج ڀارتي اڳرائيءَ جو ڀرپور جواب ڏنو. آءِ ايس پي آر موجب ڀارتي فوج ايل او سي تي ڀمڀر، ڪيل ۽ ليپا سيڪٽرز جي علائقن ۾ بنا جواز فائرنگ ۽ گولاباري ڪئي جنهن جي نتيجي ۾ پاڪ فوج جا 2 جوان شهيد ٿي ويا. ڀارتي فوج طرفان ڀونچ بٽل ۽ دوڌنيا سيڪٽرز ۾ به بنا جواز فائرنگ ۽ گولاباري ڪئي وئي جنهن جي نتيجي ۾ ڇهه شهري زخمي ٿي پيا. ان کانسواءِ ڀارتي فوج ناطر لچيال جي سول آباديءَ کي به نشانو بڻايو. ڀارتي فوج پاران ليپا ماٿري ۾ منڊا ڪنڊي، نيلم ماٿري جي جهپ سيڪٽر ۽ وٽالا وارن هنڌن تي به فائرنگ ڪئي وئي، جنهن سبب نيلم ماٿري ۾ وڏي انگ ۾ سياح ڦاٿل آهن. اطلاعن مطابق ڀارتي فورسز پاران لائين آف ڪنٽرول تي اجائي چڙڏياريندڙ فائرنگ ڪئي وئي، جنهن جي نتيجي ۾ 2 جوانن سوڌو 3 ڄڻا شهيد ٿيا، جڏهن ته پاڪ فوج جي جوابي ڪارروائي ۾ 3 ڀارتي چوڪيون تباهه ڪيون ويون، سينيئر صحافي حامد مير انڪشاف ڪيو آهي ته حملو ناڪام بڻائيندي 14 ڀارتي فوجين کي ماري ڇڏيو، 8 ڀارتي فوجين جا لاش تتاپاني سيڪٽر ۾ ڏٺا ويا، جن کي ڀارتي فوج به نه کنيو، ان کان علاوه پاڪستان جي ناردرن لائيٽ انفنٽري جي منهن ٽوڙ جواب جي نتيجي ۾ پڻ 6 ڀارتي فوجي مارجي ويا،  پاڪستاني فوج ڀارت جي هوائي حملي جي دعويٰ سختي سان رد ڪري ڇڏي آهي، پاڪ فوج جي ترجمان ليفٽيننٽ جنرل عاصم سليم باجوا چيو آهي ته هوائي حملو ڪيو ويو ته منهن ٽوڙ جواب ڏينداسين، ڀارت لائين آف ڪنٽرول تي فائرنگ ڪئي آهي ۽ ان کي هوائي حملي جو نالو ڏنو آهي، پاڪستان ۾ ڪٿي به ڪو هوائي حملو ناهي ٿيو جيڪڏهن اهڙي ڪا ڪوشش ڪئي وئي ته ان جو منهن ٽوڙ جواب ڏينداسين،  ڀارت ڀمڀر، ڪيل، تتاپاني ۽ ليپاسيڪٽر ۾ فائرنگ ڪئي، جنهن جو پاڪستان ڀرپور جواب ڏنو ۽ فائرنگ جو سلسلو رات اڍائي کان صبح 8 وڳي تائين جاري رهيو، جڏهن ته ڀارت الزام دعويٰ ڪئي آهي ته ڀارتي فوج پاران لائين آف ڪنٽرول جي ٻي پاسي وڃي پاڪستاني فوج تي حملا ڪيا ويا ۽ پاڪستاني فورسز سيز فائر جي خلاف ورزي ڪندي نوگام سيڪٽر ۽ هروڀرو فائرنگ ڪئي، جڏهن ته پاڪستان ڀارت جي سمورن دعوائن کي رد ڪري ڇڏيو آهي. ڊي جي آءِ ايس پي آر وڌيڪ چيو ته ڀارت پاران مسلسل چڙ ڏياري پئي وڃي، پاڪستان جي دهشتگردي خلاف جنگ ۾ ڪاميابين مان دنيا سکڻ چاهي ٿي، روس سان فوجي مشقون ڪيون پيون وڃن جيڪي تمام اهم آهن، ايران سان به اسان سرحدي انتظام ٺيڪ ڪرڻ چاهيون ٿا، ڀارت ۾ اڙي واقعو ڪيئن ٿيو، نقصان ڪيترو ٿيو ۽ ان ۾ ڪيترا مرچ مصالحه وڌا ويا ان بابت ڄاڻڻ جي ضرورت آهي، ڀارت ڪشمير مسئلي تان ڌيان هٽائڻ لاءِ صورتحال خراب ڪري رهيو آهي، ڀارت ايل او سي تي سيڪيورٽي جا 3 گهيرا ٺاهي رکيا آهن، ڀارتي سيڪيورٽي گهيري واري تار ۾ بجلي ڇڏيندي آهي جنهن سان پکي به مري ويندا آهن ۽ ڀارتي سيڪيورٽي جو اهو گهيرو 3 کان چار ڪلوميٽر تائين پکڙيل آهي ۽ اتي مورچا ۽ سينسر به لڳل آهن، ايتري سخت سيڪيورٽي باوجود اندر گهڙڻ ۽ حملو ڪرڻ جو ڀارتي الزام سندس ئي سيڪيورٽي سسٽم جي ناڪامي آهي، پاڪستان جي رياستي پاليسي ڪنهن قسم جي چڙها چتي جي حوصلا افزائي نه ڪرڻ آهي، ڀارت پاران حملي ڪرڻ جو ڇڏيل سوشو ڪشمير جي آزادي واري تحريڪ کي دٻائڻ جي هڪ ڪوشش آهي.

 

رنبير ۽ ايشوريا جي 18 سال پراڻي تصوير سماجي رابطن واري ويب سائيٽ تي مشهور

ممبئي (شوبز نيوز) بالي ووڊ جي سهڻي اداڪارا ايشوريا راءِ بچن ۽ نوجوان اداڪار رنبير ڪپور جي فلم“اي دل هي مشڪل” رليز کان اڳ ئي شوقينن کي گهڻو بيچين ڪيو آهي. جتي هي ٻئي اداڪار پهريون ڀيرو گڏ فلم ۾ نظر ايندا اتي ئي هن فلم جي ٽريلر ۽ گيتن کي ڏسي سندن چاهيندڙن ٻنهي جي جوڙي کي گهڻو پسند ڪيو آهي.پر جيڪا ٻئي ڳالهه سندن چاهيندڙن جي نظرن جو مرڪز آهي اها آهي ٻنهي اداڪارن جي 18 سال پراڻي هڪ تصوير.اها تصوير 42 سالن جي ايشوريا جي ڪيرئير جي شروعات ۾ ورتي وئي هئي،جڏهن ته هوءِ 34 سالن جي رنبير ڪپور جي پيءُ رشي ڪپور ۽ اڪشي کنا سان فلم “آ اب لوٽ چلين” جي شوٽنگ ڪري رهي هئي.اها تصوير سماجي رابطن وارين ويب سائيٽن تي ماڻهن جي نظرن جو مرڪز بڻيل آهي.

 

ڀارتي انتهاپسندي،عاطف اسلم جو ڀارت ۾ ٿيندڙ شو به رڪجي ويو

گڙگائون: عاطف اسلم  کي ڀارتي شهر گڙگائون ۾ 15آڪٽوبر تي شو ڪرڻو هو،انتها پسند تنظيمن پاران مليل ڌمڪين کانپوءِ موسيقي وارو اهو پروگرام روڪڻو پئجي ويو.ڀارت جي انتها پسندي حدون اورانگهي وئي،هڪ ٻيو پاڪستاني فنڪار به ان جو شڪار بڻجي ويو، ڳائڻي عاطف اسلم جو چوڻ هو ته کيس ڀارت جي شهر گڙگائون ۾ کيس هڪ شو ڪرڻ لاءِ وڃڻو هو پر انتها پسندن جي ڌمڪين کانپوءِ کيس اهو پروگرام روڪڻو پيو.

 

سرفراز ڪپتاني ۾ سرخرو، اظهر جي عهدي تي برقرار رهڻ لاءِ جاکوڙ شروع،پاڪ-ويسٽ انڊيز ون ڊي سيريز جي اڄ پهرين ميچ

دبئي (اسپورٽس نيوز) سرفراز ڪپتاني ۾ سرخرو ٿي ويو، اظهر عهدي تي برقرار رهڻ لاءِ سڀاڻي کان جدوجهد ڪندو، پاڪستان ۽ ويسٽ انڊيز وچ ۾ پهرين ون ڊي ميچ اڄ ٿيندي، سرفراز جي قيادت هيٺ ٽوئنٽي ٽوئنٽي سيريز ۾ ڪلين سوئپ اظهر تي دٻاءَ وڌائي ڇڏيو آهي، ابوظهبي ۾ اظهر علي ۽ جيسن هولڊر ون ڊي ٽرافي جي مهورت ڪئي، ٻنهي ٽيمن شارجه ۾ پريڪٽس به ڪئي، پاڪستان جو ايندڙ هدف ون ڊي سيريز آهي، جيڪا سڀاڻي جمعي ڏينهن کان شروع ٿي رهي آهي، جنهن ۾ قومي ٽيم جي قيادت اظهر علي ڪندو، ڪاري آنڌي خلاف شاهينن جي شاندار ڪارڪردگي ڏيکارڻ ان لاءِ به لازمي آهي ته قومي ٽيم کي رينڪنگ ۾ نائين پوزيشن کان ترقي ڪريهيٺ اچڻو پوندو، گذريل ڏينهن دبئي جي مقامي هوٽل ۾ ون ڊي سيريز جي ٽرافي ۽ لوگو جي مهورت ٿي، جنهن ۾ اظهر علي ۽ جيسن هولڊر موجود هئا.

 

ڀارت ۽ نيوزيلينڊ جي ڪرڪيٽ ٽيمن وچ ۾ ٻئي ٽيسٽ ميچ سڀاڻي کان شروع ٿيندي

ڪولڪتا (اسپورٽس نيوز) ڀارت ۽ نيوزيلينڊ جي ڪرڪيٽ ٽيمن وچ ۾ 3 ميچن تي ٻڌل سيريز جي ٻئين ميچ (سڀاڻي) جمعي کان ڪولڪتا ۾ شروع ٿيندي، ميزبان ڀارت کي ٽن ٽيسٽ ميچن جي سيريز ۾ 0-1 جي سرسي حاصل آهي، ڪانپور ۾ کيڏيل پهرين ٽيسٽ ميچ ۾ ڀارت نيوزيلينڊ کي 197 رنسن تان هارائي ميچ کٽي سيريز ۾ سرسي حاصل ڪئي هئي، پهرين ميچ ۾ شاندار ڪاميابي کانپوءِ ڀارتي ٽيم ٽيسٽ رينڪنگ ۾ ٻيهر پهرين پوزيشن حاصل ڪرڻ جي سلسلي ۾ رنڊڪ پار ڪئي آهي، ٻي ميچ ۾ ڪاميابي جي صورت ۾ ڀارت پاڪستان کان پهرين پوزيشن حاصل ڪري وٺندو، ٻنهي ٽيمن وچ ۾ ٽين ۽ آخري ٽيسٽ ميچ 8 کان 12 آڪٽوبر تائين کيڏي ويندي، ٽيسٽ سريز کانپوءِ ٻنهي ٽيمن وچ ۾ 5 ون ڊي ميچن تي ٻڌل سيريز جي پهرين ميچ 16 آڪٽوبر تي ڌرم شالا ۾ کيڏي ويندي، ٻئي ميچ 20 آڪٽوبر تي فيروز شاهه ڪوٽلا دهلي ۾، ٽئين ميچ 23 آڪٽوبر تي پنجاب ڪرڪيٽ ايسوسي ايشن اسٽيڊيم موهالي چندي ڳڙهه ۾، چوٿين ميچ 26 آڪٽوبر تي ڪولائچي جڏهن ته پنجين ۽ آخري ميچ 29 آڪٽوبر تي وشاڪا پشنم ۾ کيڏي ويندي.