تازيون خبرون

Daily Archives: May 17, 2016

پانامه ليڪس بعد اپوزيشن جو هدف صرف وزير اعظم يعني ”آءُ“ آهيان: نواز شريف

اسلام آباد (اين اين آءِ) وزيراعظم محمد نواز شريف پاناما ليڪس واري معاملي تي عدالتي ڪميشن جي ٽي او آرز بڻائڻ لاءِ اپوزيشن جي مشاورت سان ڪميٽي بڻائڻ جي تجويز ڏيندي چيو آهي ته ڪميٽي گڏيل مشاورت کانپوءِ جاچ لاءِ ٽي او آرز بڻائي جنهن کانپوءِ جنهن به فورم تي چاهيو ته جاچ ڪرائي وڃي، هن چيو ته منهنجو نالو پاناما پيپرز ۾ ناهي، اپوزيشن جي ٽي او آرز ۾ فرد جرم لاڳو ڪيو ويو آهي، منهنجو دامن صاف آهي ڪنهن قانوني ۽ آئيني اثتثنيٰ جي ڪا به ضرورت ناهي، ماضي ۾ به ڪڙن احتسابن مان گذريو آهيان ۽ هاڻ به ان طرح جي احتسابي عمل مان گذرڻ لاءِ تيار آهيان، هن چيو ته چاهيون ٿا ته ٽيڪس چوري ڪرڻ ۽ قرض معاف ڪرائيندڙ جي اصل ڪهاڻي به سامهون اچي، منهنجي والد دبئي وڃي گلف اسٽيل نالي فيڪٽري لڳائي، لنڊن جي فليٽ لاءِ پاڪستان مان هڪ رپيو به نه موڪليو، 23 سالن دوران اسان جي خاندان 10 ارب رپين کان وڌيڪ ٽيڪس ادا ڪيو، ذاتي طور تي 3 ڪروڙ ٽيڪس ادا ڪيو، 1999 ۾ اسان جي ڪاروباري ادارن کي مفلوج ڪيو ويو، تمام ڪاروباري ادارن جي ڇنڊ ڇاڻ ڪري رڪارڊ قبضي ۾ ورتو ويو، حڪومت وقت سرٽوڙ ڪوششون ڪرڻ جي باوجود رتي جي برابري به بدعنواني ثابت نه ڪري سگهي ۽ اسان ظالماڻي ۽ هڪ طرفي احتساب مان سرخرو ٿي ٻاهر نڪتاسين، هن چيو ته ڪاروبار مان سياست ۾ داخل ٿيو آهيان، سياست مان ڪاروبار ۾ نه آيو آهيان، هيليڪاپٽرن ۽ جهازن ۾ گهمندڙ ٻڌائين ته پهريان اهي ڇا هئا؟ معاملو منهنجي استعيفيٰ سان ختم نٿو ٿي سگهي، ڳالهه نڪتي آهي ته اڇا ڪارا پڌرا ٿيڻ گهرجن، گذريل ڏينهن قومي اسيمبلي ۾ اپوزيشن طرفان لڳايل الزامن جا جواب ڏيندي وزيراعظم چيو ته هلندڙ سال جي اپريل جي پهرين هفتي ۾ پاناما پيپرز جي حوالي سان هڪ رپورٽ ميڊيا ۾ آئي ۽ ان ۾ اهڙن آف شور ڪمپنين جي نشاندهي ڪئي وئي جنهن ۾ پاڪستانين جو تعلق ٻڌايو ويو آهي، ان ۾ واضح ڪيو ويو هو ته اهو ضروري ناهي ته اهي سڀ آف شور ڪمپينون غير قانوني هجن، نواز شريف چيو ته منهنجي ٻن پٽن جا نالا به ان ۾ آيا جيڪي گذريل ڪافي عرصي کان پرڏيهه ۾ ترسيل آهن ۽ ٻين لکين پاڪستانين وانگر هو به هلال جو رزق ڪمائي رهيا آهن، هن چيو ته مون کي ساٿين مشورو ڏنو ته منهنجو نالو ان ۾ شامل نه آهي ان لاءِ مون کي پنهنجو پاڻ کي احتساب لاءِ پيش نه ڪرڻ گهرجي پر مون ضروري سمجهيو ته منهنجي خاندان جا نالا شامل آهن ان لاءِ قوم کي خطاب ۾ اپوزيشن جي مطالبي کان اڳ سپريم ڪورٽ جي رٽائرڊ ججز جي سربراهي ۾ ڪميشن قائم ڪرڻ جو اعلان ڪيو، انصاف جي اعليٰ ترين ادارن ۾ مقرر اهي جج رٽائرڊ ٿيڻ جي باوجود به انصاف جا ڪيترائي تقاضا پورا ڪري سگهن ٿا پر اهڙو ماحول پيدا ڪيو ويو، انتهائي سٺي ساک جي مالڪ اڳوڻي چيف جسٽس به ڪميشن جي سربراهي کان انڪار ڪيو، ان کانپوءِ پارلياماني ڪميٽي جي تجويز سامهون آئي جنهن تي مثبت رد عمل ظاهر ڪيو پر ان تان اپوزيشن پوئتي هٽي وئي، ان کانپوءِ ايف آءِ اي کان جاچ جو مطالبو ڪيو ويو ان تي به اسان کين پنهنجي پسند جا آفيسر نامزد ڪرڻ جي آڇ ڪئي پر حاضر سروس چيف جسٽس جي سربراهي ۾ڪميشن قائم ڪرڻ جو مطالبو ڪيو ويو ان تي به 22 اپريل تي قوم کي پنهنجي خطاب ۾ اهو مطالبو تسليم ڪندي ڪميشن بڻائڻ جو اعلان ڪيو پر ان کي به رد ڪيو ويو، حڪومتي ٽي او آرز رد ڪندي ٽي او آرز لاءِ 15 نوان نقطا ڏنا ويا پر ان ۾ شايد ڪنهن سنجيندگي جو عنصر شامل هجي، اپوزِيشن جي ٽي او آرز بدعنواني ۽ ڪرپشن بدران هڪ ماڻهو جي وچ ۾ گهمي رهيا آهن، ان ۾ به چيو ويو ته وزيراعظم کان مراد نواز شريف هوندو جنهن جو پاناما پيپرز ۾ ذڪر ئي ناهي ۽ ان تي فرد جرم لاڳو ڪيو ويو، وزيراعظم چيو ته اسان نٿا چاهيون ته ملڪ ڪنهن ڪشمڪش جو سبب بڻجي، ملڪ جي ترقي ۽ تعمير تي توجهه ڪرڻ لاءِ ان معاملي جي ڇنڊ ڇاڻ ضروري آهي، ڪنهن مسئلي کي اسان انا جو مسئلو نه بڻايو، صرف پاڪستان ئي اسان جي انا آهي، نواز شريف چيو ته اسان جو دامن صاف آهي ڪنهن آئيني يا قانوني اثتثنيٰ جي ضرورت ناهي، اسان ماضي ۾ به هڪ طرفي ڪڙي احتساب مان گذري چڪا آهيون ۽ هاڻ ان لاءِ تيار آهيون، اسان اهو به چاهيون ٿا ته بدعنواني، اختيارن جو ناجائز استعمال، ٽيڪس چوري، غير قانوني طور تي پيسو ٻاهر موڪلڻ، اربين رپين جا قرض معاف ڪرائيندڙ جي ڪهاڻي به عوام جي اڳيان اچي، جيڪڏهن هڪ اخباري ڪهاڻي تي ايترو گوڙ آهي ته پوءِ دستاويزي ثبوت جي حامل ڪيسن جي به جاچ ٿيڻ گهرجي، هن چيو ته هي ايوان احتساب جي جامعه، موثر ۽ بي داڳ ڪردار تي غور ڪري ۽ ميثاق جمهوريت جي به اها هڪ اهم شق هئي. هڪ اهڙو جامعه نظام واضح هجڻ گهرجي جنهن تي سڄي قوم کي اعتماد هجي، جنهن مان اهو بهتان ۽ الزامن وارو ڪلچر ختم ٿئي، نواز شريف چيو ته بي بنياد الزامن سان سياستدانن نه پر سياست به بي وقار ٿي وڃي ٿي ۽ ان سان جمهوريت جو حسن به ختم ٿي وڃي ٿو، وزيراعظم چيو ته اهو به چيو ويو ته مان پارليامينٽ ۾ اچي ڪري سوالن جا جواب ڏيان ته معاملو ختم ٿي ويندو، پر هي معاملو هاڻ ائين ختم نٿو ٿي سگهي نه ئي وري ان کي ختم ٿيڻ ڏينداسين، هاڻ اڇا ڪارا پڌرا ٿيندا، وزيراعظم چيو ته شاهراهه دستور تي ڌرڻي دوران هن ايوان جو ڪردار انتهائي مثبت رهيو، هن چيو ته مون کي لڪائڻ لاءِ نه پهريان ڪجهه هو نه اڄ آهي، منهنجو سڀ ڪجهه کليل ڪتاب وانگر آهي، منهنجو خاندان به کليل ڪتاب وانگر آهي، هن چيو ته سياست ۾ڪجهه ڪمايو يا بڻايو ناهي پر وڃايو ضرور آهي، هن چيو ته مان سياست مان ڪاروبار ۾ نه پر ڪاروبار مان سياست ۾ آيو آهيان، هن چيو ته مان بطور وڏي وزير يا وزيراعظم دفاعي ادارن ۽ ٽرسٽ کي مفت سرڪاري زمين ڏني هوندي، مالي گرانٽ ڏني هوندي، مشينري جي درآمد تي ٽيڪس ڇوٽ ڏني هوندي، شريف ميڊيڪل ڪمپليڪس هڪ وڏي فلاحي اداري طور ڪم ڪري رهيو آهي پر ان لاءِ هڪ انچ ايراضي يا مالي گرانٽ نه ورتي وئي آهي، هن سوال ڪيو ته ڇا ڪرپشن ڪندڙ ۽ سرڪاري ٽجوڙيون ڀريندڙ جو طرز عمل ائين هوندو آهي، اسان جي ڪهاڻي زرق حلال، محنت ۽ وقار، جدوجهد جي ڪهاڻي آهي، هن چيو ته پاڪستان جي قيام کان 11 سال اڳ اسان اتفاق فائونڊري سان پنهنجو ڪاروبار شروع ڪيو، منهنجي والد جو پختو ايمان، ديانت ۽ امانت تي پورو يقين هو، وقت سان گڏ ان ڪاروبار ترقي ڪئي، 1970 ۾ اسٽيل ۽ انجنيئرنگ ۾ سڀ کان وڏو مقام حاصل ڪيو، 1972 ۾ ان کي قومي ادارن ۾ ڏنو ويو ۽ اسان کي هڪ پائي به نه ڏني وئي، ان کان اڳ ادارا ڪروڙين رپين جي منعافي ۾ هئا، 1971 ۾ ساليانو ٽرن اوور 4 ڪروڙ رپين کان وڌيڪ هو، 7 سئو ڪينال تي ٻڌل فيڪٽيري هئي، ان وقت ڊالر 4 رپين جو سي ايس پي آفيسر جي پگهار 5 سئو رپيا ۽ سون 155 رپيا في تولو هو، ان وقت اسان جا هڪ ڪروڙ 80 لک رپيا اسٽاڪ هئا ۽ هي ان وقت جا آهن جنهن وقت اسان جو سياست سان ڪو به تعلق نه هو ۽ اهي ادارا 8 سالن کانپوءِ واپس ڪيا ويا ته ان وقت ان جي مشينري کنڊر بڻجي چڪي هئي، اسان جي والد ان فيڪيٽري کي ٻيهر آباد ڪيو، وزيراعظم چيو ته هڪ سال ۾ ان بي جان ڍانچي کي ٻيهر فعال ڪيو ويو، 1983 ۾ ان جو منعافو 7 ڪروڙ 57 لک رپين تائين پهتو، هي تفصيل انهن ماڻهن لاءِ آهن جيڪي حقيقتن کان ڄاڻي واڻي منهن موڙي رهيا آهن، منهنجي ورهاست ۾ هڪ ترقي ڪندڙ ڪاروبار مليو ۽ خوف خدا جو درس به مليو، اڄ عاليشان گاڏين ۾ گهمندڙ ڦرندڙ ۽ عاليشان محلن ۾ رهندڙ هيليڪاپٽرن ۾ ديان جو سير سفر ڪندڙن کان به اها تقاضا آهي ته هو مناسب سمجهن ته قوم کي پنهنجي آمدني کان آگاهه ڪن، هن چيو ته 70 جي ڏهاڪي ۾ اهي ڪٿي بيٺا هئا ۽ اڄ سندن شاهاڻن خرچن جو ذريعو ڇا آهي، وزيراعظم چيو ته ڪجهه ماڻهو الزام لڳائي رهيا آهن ته اسان ٽيڪس نٿا ڏيون، 23 سالن ۾ اسان 10 ارب رپين جو ٽيڪس ادا ڪيو، ان موقعي تي هن پورا تفصيل اسپيڪر حوالي ڪيا، هن 3 ڪروڙ 60 لک رپين جي ذاتي ٽيڪسن جا تفصيل به پيش ڪيا، وزيراعظم چيو ته 1972 ۾ اتفاق فائونڊري کي هڪ پيسو به معاوضو ڏيڻ کانسواءِ واپس ڪيو ويو، نواز شريف چيو ته اپريل 1983 ۾ اها فيڪريٽري 33.37 ملين درهم وڪرو ٿي، ان وقت اسان جو سياست سان ڪو به تعلق نه هو اسان جي والد عدم تحفظ تحت دبئي ۾ جيڪا سيڙپڪاري ڪئي اها 1999 ۾ ان وقت درست ثابت ٿي جڏهن اسان کي بي دخل ڪيو ويو ۽ اسان جي تمام ڪاروبار جو رڪارڊ قبضي ۾ وٺي ان جو تمام گهرائي سان جائزو ورتو ويو، اسان جا بينڪ اڪائونٽ چيڪ ڪيا ويا، حڪومت ننهن چوٽي جا زور هنيا پر بدعنواني هڪ رتي جي برابر به ثابت نه ڪري سگهي، اسان ان ظالماڻي ۽ هڪ طرفي احتساب مان سرخرو ٿي نڪتاسين، هن چيو ته اسان جي والد جده ۾ اسٽيل ملز لڳائي، جون 2005 ۾ اسٽيل ملز 17 ملين ڊالرز ۾ وڪرو ٿي ان جا تمام دستاويز موجود آهن، ان کي وسيلن ۽ ذريعن سان لنڊن ۾ فليٽ خريد ڪيا ويا، جده اسٽيل ملز يا لنڊن جي خريداري لاءِ پاڪستان مان هڪ رپيو به ٻاهر نه ويو، وزيراعظم چيو ته ڪميشن جي قيام جي حوالي سان چيف جسٽس جو خط مليو ويو آهي، قانوني ماهر ان جو جائزو وٺي رهيا آهن، وزيراعظم اپوزيشن اڳواڻ ۽ پارلياماني ليڊرن جي مشاورت سان پارلياماني ڪميٽي جوڙڻ جي پيش ڪش ڪئي جنهن ۾ جامعه ٽي او آرز ۽ ٻين معاملن کي حتمي شڪل ڏني وڃي ته جيئن بدعنواني ڪندڙن کي قانون جي ڪٽهڙي ۾ آڻي سگهجي ۽ ان حوالي سان ڪميٽي جيڪو تجويز ڪندي ان اڳيان شاهديون ۽ تفصيل رکيا ويندا، هن چيو ته اهو تاثر نه ڏنو وڃي ته ڪجهه ته گناهن ۾ ڀريل آهن ۽ ڪجهه جي لباسن مان فرشتن جي خوشبو اچي ٿي، اصولن جا ڳالهه ڪرڻي آهي ته ان لاءِ الڳ الڳ پيمانا نه هلي سگهندا، جيڪڏهن تورڻو آهي ته سڀني کي هڪ ترازو ۾ تورڻو پوندو، وزيراعظم چيو ته 70 سالن کان قوم کي اهڙن تماشن جي ور چاڙهيو ويو آهي، هن چيو ته خدا خدا ڪري پاڻ سنڀاليو آهي منزلن جو تعين ڪيو آهي، نوجوانن جي مايوس اکين ۾ اميد جو چراغ روشن ڪيو آهي، معيشت مستحڪم، شهرن جو امن واپس ڪرايو آهي، قومي عالمي سطح تي اسان جي وقار ۾ اضافو ٿيو آهي، اڄ هر پاڪستاني تسليم ڪري ٿو گذريل 3 سالن جي ڀيٽ ۾ موجوده پاڪستان سڀ کان وڌيڪ مستحڪم ۽ روشن آهي ۽ 2018 جو پاڪستان اڄ جي پاڪستان کان ڪيترائي ڀيرا مستحڪم ۽ روشن هوند.

 

وزير اعظم 7 سوالن جا جواب نه ڏنا: مخالف ڌر جو قومي اسيمبلي مان واڪ آئوٽ

اسلام آباد(بيورو) مخالف ڌر وزير اعظم پاران سوالن جا جواب نه ڏيڻ تي قومي اسيمبلي جو واڪ آئوٽ ڪري ڇڏيو. اسپيڪر اياز صادق جي صدارت ۾ قومي اسيمبلي جو اجلاس ٿيو، اجلاس ۾ وزير اعظم نواز شريف خطاب ڪيو، وزير اعظم جو خطاب ختم ٿيو ته مخالف  ڌر اڳواڻ سيد خورشيد شاهه خطاب ڪيو. خورشيد شاهه تقرير شروع ڪئي ته مخالف ڌر ميمبرن هُل ڪندي هنگامو ڪيو.ان تي اسپيڪر خورشيد شاهه کي چيو ته هنن کي سمجھايو، توهان جا ساٿي آهن. بعد ۾ مخالف ڌر جا ميمبر خاموش ٿي ويا. خورشيد شاهه پنهنجي تقرير ۾ چيو ته  اسين ستن سوالن جا جواب وٺڻ آيا هئاسين پر وزير اعظم جيڪا تقرير ڪري وضاحت ڪئي آهي ان ۾ هُن ست سوالن مان ستر سوال وڌائي ڇڏيا آهن. هن چيو ته اسان سوچيو هو ته اسان جي ستن سوالن جا جواب وزير اعظم آساني سان ڏئي ڇڏيندو پر هتي ته دبئي به اچي ويو، جدو به اچي ويو، اسان کي سوالن جا جواب ناهن مليا. پارليامينٽ جو وقت ضايع نه ٿو ڪرڻ چاهيان. قوم کي سوالن جا جواب گھرجن. خورشيد شاهه جي انهن لفظن کانپوءِ اپوزيشن ايوان مان واڪ آئوٽ ڪري وئي.  خورشيد شاهه چيو آهي ته وزير اعظم پاران قومي اسيمبلي ۾ اچڻ تي صبر جو مظاهرو ڪنداسين ۽ وزير اعظم کي تقرير کان پوءِ به ايوان ۾ ويهڻ گهرجي. ميڊيا رپورٽ موجب خورشيد شاهه چيو ته وزير اعظم کي ايوان ۾ اچي سڀني سان ڳالهائڻ گهرجي ۽ تقرير کان پوءِ به ايوان ۾ ويهڻ گهرجي. هن چيو ته ميثاق جمهوريت موجود آهي ته پيار سان ڳالهائي رهيو آهيان، آئون اهڙي سياست کي پسند ناهيان ڪندو جنهن سان سسٽم کي نقصان پهچي. بينظير ڀٽو شهيد جي به اها ئي پاليسي هئي جنهن تي اسان به عمل ڪري رهيا آهيون. هن جو چوڻ هو ته پاناما پيپرز تي چيف جسٽس جو جواب اسان جي موقف تي تائيد آهي تنهن هوندي هن ڪميشن جوڙڻ کان انڪار ناهي ڪيو.

 

اپوزيشن ناڪ آئوٽ ٿيڻ ڪري واڪ آئوٽ ڪيو، مخالف ڌر ريڊ لائن پار نه ڪري: حڪومتي وزير

اسلام آباد(بيورو) حڪومتي وزيرن جو چوڻ آهي ته وزير اعظم ايوان ۾ سچ ڳالهائي مخالف ڌر کي ناڪ آئوٽ ڪري ڇڏيو، تڏهن اهي واڪ آئوٽ ڪري ويا. قومي اسيمبلي جي اجلاس کانپوءِ ميڊيا سان ڳالهائيندي وفاقي وزير پرويز رشيد چيو ته وزير اعظم اڳ به مخالف ڌر جي هر مطالبي کي تسليم ڪيو هو، وزير اعظم وٽ سچ ۽ مخالف ڌر وٽ ڪوڙ کان سواءِ ڪجھه ناهي وزير اعظم جڏهن سچ پيش ڪيو ته مخالف ڌر وارا واڪ آئوٽ ڪري ويا. ائين وزير اعظم جي سچ، ڪوڙ کي ناڪ آئوٽ ڪيو. جيڪي ناڪ آئوٽ ٿيا اهي واڪ آئوٽ ڪري ويا ڇو جو انهن وٽ ڪو جواب نه هو. پرويز رشيد چيو ته وزير اعظم جي تقرير مخالف ڌر وارن کي لا جواب ڪري ڇڏيو، ان ڪري انهن  ڀڄڻ جو رستو اختيار ڪيو. هن چيو ته جيڪي ماڻهو پارليامينٽ جي ڊبيٽ جو حصو نٿا وٺي سگھن، پنهنجي مٿان لڳل الزامن جا جواب نٿا ڏئي سگھن، جيڪي ٽيڪس بچائڻ لاءِ آف شور ڪمپنيون ٺاهين ٿا اهي سچ جو مقابلو نٿا ڪري سگھن. ان موقعي تي بچاءَ واري وزير خواجه آصف چيو ته عمران خان کي سڀني سياستدانن کان وڌيڪ آف شور ڪمپنين جو تجربو آهي، هن تڏهن آف شور ڪمپني ٺاهي جڏهن ٻين کي آف شور ڪمپني جي اسپيلنگ نه ايندي هئي. هن چيو ته  عمران خان ماڻهن جي خيرات جا پيسا آف شور ڪمپني ۾ لڳايا. آف شور ڪمپنيون ڏوهه آهي ته سڀ کان وڏو ڏوهاري عمران خان آهي. خواجه آصف چيو ته عمران خان ٻڌائي هوڻ 1993ع ۾ آف شور ڪمپني لاءِ پيسا ڪٿان آندا؟ هن چيو ته ميڊيا انڪشاف نه ڪري ها ته نيازي لميٽڊ آف شور ڪمپني جي خبر نه پوي ها. هي ٻڌائين ته انهن وٽ لکين پائونڊ ڪٿان آيا جنهن سان هنن آف شور ڪمپني ٺاهي. ڪهاڻي هاڻي پري تائين ويندي. هن چيو ته عمران خان زڪوات 70 ڪروڙ رپيا آف شور ڪمپني ۾ لڳائي ڇڏيا. عمران خان چوي ٿو ته هُن پراپرٽي فليٽ وڪڻي ٺاهي، ڇا هُن ڪنگڊم پيلس وڪڻيو آهي؟ خواجه آصف جو چوڻ هوته افسوس جوڳي ڳالهه آهي ته اپوزيشن جي ڪجھه پارٽين غير ذميواري جو مظاهرو ڪيو. هن چيو ته قومي اسيمبلي جي اجلاس کان اڳ اسپيڪر مخالف ڌر جي پارٽين کي اعتماد ۾ ورتو. هڪ پارٽي جو ته صفايو ٿي چڪو آهي ٻيو وري چوي ٿو ته رڳو آئون بچندس. عمران خان اڳ به اهي حرڪتون ڪري چڪو آهي، سوا سئو ڏينهن ايوان کي يرغمال بڻايو خورشيد شاهه کي اڄ ڳالهائڻ گھرجي، کين سڀني کان وڌيڪ وقت ڏنو ويو پر هن ڀڄڻ جو رستو اختيار ڪيو، عمران خان جنهن رستي تي هلي رهيو آهي هاڻي پ پ به ان تي نڪري پئي آهي. انهن کي روڪيو وڃي. هن چيو ته 90ع واري ڏهاڪي ۾ پ پ ۽ ن ليگ ريڊ لائين ٿيون، جنهن سان ملڪ جو جمهوريت جو نقصان ٿيو. مخالف ڌر ريڊ لائن پار نه ڪري.  هن چيو ته الزام بدلي الزام مجبوري ۾ ڏئي رهيا آهيون. هنن سان گڏ هڪ گجرا پارٽي ٻي ٽانگا بارٽي آهي، جيڪا سياست کي گندو ڪري رهي آهي. مخالف ڌر کي رڳو چار ماڻهو پيا هلائين. عمران خان، خورشيد شاهه، اعتزاز احسن اهي سڀ پرويز الاهي جي هٿ چڙهي ويا آهن. اهو چوڻ غير ضروري آهي ته ستن سوالن جا جواب نه مليا هاڻي ستر سوالن جا جواب ڏنا وڃن. خواجه سعد رفيق چيو ته وزير اعظم چئي چڪو آهي ته قانون ۾ خامي آهي ته اها به ختم ڪئي وڃي، اها هڪ وڏي آڇ آهي، جيڪڏهن مخالف ڌر جي ڪا پارٽي سنجيده آهي ته وزير اعظم جي آڇ جو هاڪاري جواب اچڻ گھرجي. اسين ڪوشش ڪنداسين ته مسئلو آساني سان حل ٿي وڃي. هن چيو ته اعتزاز احسن ذاتي سياست ڪري رهيو آهي، ان جي پويان سندس پارٽي جي خراب ڪارڪردگي آهي. عمران خان، شيخ رشيد، اعتزاز احسن ۽ ٻين کي پنهنجو سُور آهي. هڪ سوال جي جواب ۾ خواجه آصف چيو ته نيت صاف ناهي ۽ تڪرار هلائڻو آهي ته هي تڪرار ڏهه سال به هلي سگھي ٿو، پاناما ليڪس جي جاچ لاءِ قانون سازي جي ضرورت آهي ته اها به ٺهي سگھي ٿي. ميثاق جمهوريت تي شهيد بينظير به صحيح ڪئي هئي، ان کي اڳتي وڌايو وڃي. نه ته مسئلو حل نه ٿيندو.

 

پاڪ فوج جون سربراهه جي چين جي فوجي ۽ سياسي قيادت سان ملاقاتون، هٿياربند فوجن ۾ سهڪار وڌائڻ تي اتفاق

بيجنگ (اي پي پي) پاڪ فوج جو سربراهه جنرل راحيل شريف ٻن ڏينهن جي سرڪاري دوري تي چين جي گادي واري شهر بيجنگ پهچي ويو، جتي هن چين جي فوجي ۽ سياسي قيادت سان ملاقاتون ڪيون آهن، پاڪ فوج جي اداري آءِ ايس پي آر طرفان جاري ڪيل پڌرائي مطابق جنرل راحيل شريف بيجنگ پهچڻ تي چين جي هٿياربند فوجن طرفان گارڊ آف آنر پيش ڪيو ويو، پاڪ فوج جي سربراهه جنرل راحيل شريف چين جي آرمي چيف جنرل لي زو چينگ سان ملاقات ڪئي ۽ نئين آرمي هيڊڪوارٽر جي قيام تي چيني هم منصب کي مبارڪون ڏنيون، اجلاس ۾ ٻنهي پاڙيسري ۽ دوست ملڪن جي هٿياربند فوجن جي وچ ۾ تعاون وڌائڻ، تربيت لاءِ وفدن جي مٽاسٽا، ڳجهي معلومات جي ڏي وٺ ۽ چين پاڪ اقتصادي راهداري جي سيڪيورٽي سميت گڏيل دلچسي وارا ٻيا معاملا ڳالهين هيٺ آيا.

 

گوڊ گورننس ۽ شفافيت لاءِ سنڌ پبلڪ پروڪيومينٽ ريگيولرٽي اٿارٽي کي مضبوط ڪرڻ ضروري آهي: وڏو وزير

ڪراچي(اسٽاف رپورٽر) سنڌ جي وڏي وزير سيد قائم علي شاهه چيو آهي ته صوبي ۾ گوڊ گورننس ۽ شفافيت لاءِ سنڌ پبلڪ پروڪيومينٽ ريگيولرٽي اٿارٽي (ايس پي پي آر اي / سپرا) کي مضبوط ڪرڻ تمام ضروري آهي، پر سپرا کي گهرجي ته سمورن صوبائي کاتن جي آفيسرن لاءِ تربيتي پروگرام شروع ڪري ۽ پنهنجي سسٽم کي آسان ڪري. اهڙن خيال جو اظهار اڄ هن وزير اعليٰ هائوس ۾ سپرا جي مامرن تي اعليٰ سطحي اجلاس ۾ ڪيو. اجلاس ۾ وڏي وزير جي خاص معاون عبدالقيوم سومرو، وڏي وزير جو پرنسپل سيڪريٽري علم الدين بلو، سپرا جو ايم ڊي عبدالرحيم سومرو سميت ٻين شرڪت ڪئي. ان موقعي تي وڏي وزير سيد قائم علي شاهه کي بريفنگ ڏيندي سپرا ايم ڊي عبدالرحيم سوموي ٻڌايو ته هي ادارو سنڌ پبلڪ پروڪيومينٽ ايڪٽ تحت وجود ۾ آيو، جڏهن ته ان کان پهرين حڪومت بي اينڊ آر ڪوڊ ۽ پرچيز مينوئل / روايتي طريقي سان پروڪيومينٽ جا مامرا طئي ڪندي هئي، پروڪيومينٽ جو مطلب ڪنهن خارجي ذريعي سان گڊس جي خريداري ۽ ورڪس اينڊ سروسز جي حاصلات آهي. هن ٻڌايو ته جڏهن به هڪ ملين رپين کان وڌيڪ خريداري ڪرڻي هوندي ته سپرا جا قانون حرڪت ۾ ايندا پر اڪثر کاتا سپرا جي طريقيڪار تي عملدرآمد نه پيا ڪن. ان تي وڏي وزير چيو ته سندس اهي خبرون مليون آهن ته سپرا جي مختلف مرحلن ۾ تمام گهڻو وقت لڳندو آهي، ۽ اهو حڪومت جي مفاد ۾ ناهي ته جيڪو ترقياتي ڪم عوام جي وڏي مفاد ۾ منظور ڪيا وڃن اهي سرڪاري طريقيڪار / دير جو شڪار ٿين.  ايم ڊي سپرا عبدالرحيم سومري چيو ته دير ٿيڻ جا ڪارڻ سپرا جي آفيسرن پيدا ناهن ڪيا بلڪه اڪثر ڪري صوبائي کاتا انهن کي پروڪيومينٽ جي منظوريءِ لاءِ نامڪمل فائلون موڪلي ڇڏيندا آهن. ان تي وڏي وزير سيد قائم علي شاهه چيو ته هن سپرا کي صوبائي کاتن جي پروڪيومينٽ جي مامرن سان لاڳاپيل آفيسرن لاءِ تريبتي پروگرام ڪرائڻ جي هدايت ڪئي هئي، عبدالرحيم سومري ٻڌايو ته وڏي وزير جي حڪم تي سموري صوبي ۾ تربيتي پروگرام شروع ڪيا هئا ۽ 15 ضلعن ۾ لاڳاپيل آفيسرن لاءِ ٻن ڏينهن تي مشتمل تربيتي ورڪشاپ منعقد ڪيون ۽ ٻين ضلعن ۾ جلد تربيتي پروگرام منقعد ڪيا ويندا ۽ ان سان گڏوگڏ هيڊ آفيس ۾  آفيس آٽوميشن سسٽم پڻ متعارف ڪرايو پيو وڃي جنهن سان لاڳاپيل آفيسر پروڪيومينٽ جي معاملن تي هڪٻئي سان مسلسل رابطي ۾ رهندا. وڏي وزير چيو ته سندس اطلاع آهي ته سپرا جي ڪم ۾ نيب مداخلت ڪري رهيو آهي ان تي ايم ڊي سپرا هاڪاري جواب ڏيندي ٻڌايو ته نيب جو خيال هو ته پروڪيومينٽ جي هر معاملي ۾ ڪرپشن ٿي رهي آهي. هاڻي جڏهن اسان نيب جي لاڳاپيل آفيسرن کي تربيت ڏني آهي ته هاڻي اهي اسان جي ڪمن جي انداز ۽ طريقي کي سمجهن ٿا ۽ هاڻي اسان جي ڪمن ۾ مداخلت ناهن ڪندا. وڏي وزير سيد قائم علي شاهه سپرا تي زور ڀريو ته اهي حيدر آباد ۽ سکر ۾ ريجنل آفيسون قائم ڪرڻ لاءِ تجويزون موڪلن ڇاڪاڻ ته انهيءَ سان هيڊ آفيس تي ڪم جو وزن گهٽ ٿيندو ۽ فائلن جي منظوري ۾ دير ٿيڻ جي شڪايت به پاڻ مرادو گهٽ ٿي وينديون، وڏي وزير سپرا جي ڪارڪردگيءِ جي واکاڻ ڪئي ۽ سمورن صوبائي کاتن کي سپرا جي قانون تي عملدرآمد ڪرڻ جي هدايت ڪئي ۽ هن سپرا تي زور ڀريو ته ڪنهن به کاتي طرفان موڪليل پروڪيومينٽ جي درخواست جي منظُوري پندرنهن ڏينهن اندر ڏني وڃي.

 

آئيني ترميم تي 90 سيڪڙو ڪم مڪمل ٿي چڪو آهي: اسحاق ڊار

اسلام آباد (اين اين آءِ) چونڊ سڌارن واري پارلياماني ڪميٽِي جي چيئرمين اسحاق ڊار چيو آهي ته آئيني ترميمن تي 90 سيڪڙو مڪمل ٿي چڪو آهي، اڱاري تي نون ميمبرن جي مقرري تي آئيني ترميم کي حتمي شڪل ڏني ويندي، گذريل ڏينهن چونڊ سڌارن واري ڪميٽي جو 17 هون اجلاس سينيٽر اسحاق ڊار جي صدارت ۾ ٿيو، اجلاس ۾ زاهد حامد، انوشا رحمان، ڊاڪٽر عارف علوي، سيد نويد قمر، ڪنرل رٽائرڊ طاهر حسين مشهدي سميت ٻين شرڪت ڪئي، اجلاس کانپوءِ مختصر بريفنگ ڏيندي اسحاق ڊار چيو ته ڪجهه سياسي جماعتون اليڪشن ڪميشن جي ميمبرن جي مقرري تي پنهنجي قيادت سان مشاورت لاءِ وقت گهريو آهي، جڏهن ته اڄ نون ميمبرن جي مقرري تي آئيني ترميم کي حتمي شڪل ڏني ويندي.

 

ايف 16 وٺڻ اسان جو حق آهي ان ڪري ڪوشش ڪري رهيا آهيون: خواجا آصف

اسلام آباد (اين اين آءِ) دفاع واري وفاقي وزير خواجه آصف چيو آهي ته جيڪڏهن آمريڪا اسان کي ايف 16 جهاز فراهم نه ڪيا ته ٻين منڊين جو رخ ڪنداسين، هن چيو ته پاڪ آمريڪا لاڳاپن ۾ ننڍا مسئلا ايندا آهن جڏهن ته مجموعي طور تي لاڳاپا بهتر آهن، هن چيو ته آمريڪا 3 سالن کان اسان سان حقاني طالبان ۽ شڪيل آفريدي جي معاملي تي ڳالهائي رهيو آهي، شڪيل آفريدي جو معاملو پاڪستان جو اندروني معاملو آهي، ميڊيا سان ڳالهائيندي وفاقي وزير چيو ته افغانستان چاهي ٿو ته سندس مسئلو حل ٿئي، هن چيو ته افغانستان جو امن سڌي طرح پاڪستان جي امن سان سلهاڙيل آهي، هن چيو ته ايف 16 جهاز روڪڻ سان پاڪستان جي دهشتگردي خلاف ڪوششون متاثر ٿينديون، هن چيو ته پاڪستان دهشتگردي خلاف جنگ ۾ اهم ڪردار ادا ڪيو آهي ۽ ايف 16 جهاز آپريشن ضرب عضب ۾ ڪاميابي سان استعمال ڪيا ويا، پاڪستان کي ان جهازن جي خريداري روڪڻ جو مطلب پاڪستان جي ڪوششن کان انڪار آهي، هن چيو ته شڪيل آفريدي پاڪستاني شهري آهي ۽ ان خلاف پاڪستاني عدالتن ۾ ڪيس هلندڙ آهن، ڪنهن به قوت کي پاڪستان جي اندروني معاملن ۾ مداخلت ڪرڻ جي اجازت نه ڏينداسين.

 

غير رياستي عنصرانتهاپسند گروپن سان گڏجي عيسائي برادري خلاف تشدد کي هٿي ڏئي رهيا آهن:بلاول ڀٽو

ڪراچي(اسٽاف رپورٽر)پاڪستان پيپلزپارٽي جي چيئرمين بلاول ڀٽو زرداري،منڊي بهاوالدين جي غيريقيني واري صورتحال تي ڳڻتي جو اظهار ڪيو آهي.جتي رپورٽن موجب غيررياستي عنصر انتهاپسند گروپس سان گڏجي مقامي عيسائي برادري خلاف تشدد کي ڀڙڪائي رهيا آهن ۽ کين مذهب تبديل ڪرڻ يا علائقو خالي ڪرڻ جون ڌمڪيون ڏنيون پيون وڃن، جاري ٿيل بيان ۾ پاڪستان پيپلزپارٽي جي چيئرمين چيو ته سندس پارٽي منڊي بهاوالدين جي عيسائي برادري سميت ملڪ جي غريب ۽ پوئتي پيل برادرين خلاف ظلم ۽ زيادتين تي ڪڏهن به خاموش نه ويهندي، بلاول ڀٽو زرداري وفاق ۽ پنجاب حڪومتن کي چيو آهي ته ان معاملي جو تڪڙو ايڪشن ورتو وڃي ۽ پنجاب ۾ اقليتي برادري سان ٿيندڙ ظلم ۽ انتقامي ڪارروائي ۾ ملوث جوابدارن کي پڪڙ ۾ آندو وڃي، بلاول ڀٽو زرداري وڌيڪ چيو ته مون اڳ ۾ ئي اها ڳاله ڪئي هئي ته نواز شريف حڪومت نيشنل ايڪشن پلان کي نون ليگ ايڪشن پلان ۾ تبديل ڪري ڇڏيو آهي۽ پلان جي صرف ڪجه چونڊ نقطن تي عمل ڪيو پيو وڃي،هن چيو ته وفاقي ۽ پنجاب حڪومتون نيشنل ايڪشن پلان جي نقطي نمبر 9 تي ڇو خاموش آهن جنهن ۾ اهو واضح چيو ويو آهي ته ” مذهبي انتهاپسندي جو خاتمو آڻبو ۽ اقليتن جي تحفظ کي يقيني بنايو ويندو“،هن چيو ته اهي ٻئي حڪومتون انهي نقطي تي عمل ڪرڻ بدران انهن سان ٻٽ بڻيل آهن جيڪي مذهبي انتهاپسندي کي هٿي ڏيئي رهيا آهن ۽ اقليتن کي نشانوبڻائي رهيا آهن،پاڪستان پيپلزپارٽي جي چيئرمين مطالبو ڪيو ته منڊي بهاوالدين جي عيسائي برادري کي خصوصي تحفظ فراهم ڪيو وڃي، منڊي بهاوالدين ۾ ماڻهن جي زندگين يا ملڪيتن کي نقصان رسيو ته ان جا ذميوارشريف ڀائر هوندا، بلاول ڀٽو زرداري منڊي بهاولادين جي اقليتي برادري سان يڪجهتي جو اظهار ڪندي کين خاطري ڪرائي ته پارٽي سندن تحفظ بابت ڳڻتي کي هر فورم تي اٿاريندي ۽ کين مشڪلات ۾ اڪيلو نه ڇڏيو ويندو.

پاڪستان جي بدعنوان قيادت  ڀارتي ايٽم بم کان به وڌيڪ خطرناڪ آهي: سراج الحق

پشاور (اين اين آءِ) جماعت اسلامي جي امير سراج الحق چيو آهي ته پاڪستان جي ڪرپٽ قيادت ڀارت جي ايٽم بم کان به وڌيڪ خطرناڪ آهي ۽ ان جي ڪري ئي پاڪستان جو مستقبل اونداهو نظر اچي رهيو آهي. پنهنجي بيان ۾ سراج الحق چيو ته ملڪ ۾ ڪرپشن سڀ کان وڏو مسئلو آهي ۽ ڪرپٽ قيادت ڀارت جي ايٽم بم کان به وڌيڪ خطرناڪ آهي جنهن سبب پاڪستان جو انداهو نظر اچي رهيو آهي. ان چوڻ هو ته وزير اعظم جي قومي اسيمبلي ۾ تقرير سان مسئلو حل نه ٿيندو جڏهن ته چيف جسٽس جي سربراهي ۾ ڪميشن ٺاهڻ سان مسئلو حل ٿي سگهي ٿو. عوام ملڪي دولت لٽڻ وارن جو احتساب ڪري. حقيقي احتساب لاءِ ٽي او آرز تي اپوزيشن سان ڳالهيون ۽ چيف جسٽس جي نگراني ۾ ڪميشن بڻايو ويندو. پشاور ۾ جامعه اشرفيا ۾ خطاب ڪندي هن چيو ته ڪرپشن پاڪستان جو سڀ کان وڏو مسئلو آهي ۽ ڪرپشن سبب نظريه پاڪستان خطري ۾ آهي ۽ چند خاندانن جي راڄ جو خاتمو آڻڻ اڻٽر ٿي ويو آهي هن چيو ته بدقسمتي سان ڪرپٽ قيادت جي پويان عالمي اسٽيبلشمينٽ جي هجڻ سبب معاملا پنهنجي انجام تائين نه پهچي رهيا اهن هن چيو ته پانامه ليڪس ۾ شايع ٿيندڙ نالن جو احتساب بي حد ضروري آهي ۽ چيف جسٽس جي نگراني ۾ ڪميشن بنائڻ به انتهائي ضروري آهي.

 

لنڊن وارو پلاٽ ٽيڪس ڏنل پئسن سان خريد ڪيو، الزامن جو جواب ثبوطن سان ڏيندس: عمران خان

اسلام آباد (اين اين آءِ) پاڪستان تحريڪ انصاف جي سربراهه عمران خان چيو آهي ته اسيمبلي ۾ پهريان پنهنجي صفائي پيش ڪندس جنهن کان پوءِ وزيراعظم نوازشريف کان سوال ڪندس موقعو مليو ته اسيمبلي ۾ مون مٿان لڳايل الزامن وارن سوالن جا به جواب ڏيندس بني گالا ۾ مڊيا سان ڳالهائيندي عمران خان چيو ته مان عوام آڏو جوابده آهيان هن چيو ته اڃا فيصلو ڪرڻو اهي ته پريس ڪانفرنس ڪيان يا ان جو اسيمبلي ۾ جواب ڏيان. هن چيو ته جيڪو مان پنهنجي باري ۾ جواب ڏيندس وزيراعظم کان به اهو ئي جواب وٺندس. هن چيو ته ڇا وزيراعظم نوازشريف ايوان ۾ منهنجي تقرير ٻڌڻ تائين اجلاس ۾ ويهندو؟ هن چيو ته وزيراعظم جي تقرير جو بي صبري سان انتظار اهي هن چيو ته چيف جسٽس درست چيو آهي ته اهڙن ٽي او آرز تي جاچ ٿي ته ان ۾ صديون لڳي وينديون.