تازيون خبرون

Daily Archives: May 16, 2016

وزير اعظم اسيمبلي اچي، اسان انتظار ڪنداسين: شاهه محمود قريشي

لاهور (م.ڊ) پاڪستان تحريڪ انصاف جي مرڪزي اڳواڻ شاهه محمود قرشي چيو آهي ته وزير اعظم نواز شريف اسيمبلي اچي، اسان انتظار ڪنداسين، ڪنهن قسم جي ڪابه نعري بازي نه ڪئي ويندي، خابرو ادارن موجب پاڪستان تحريڪ انصاف پاران اعلان ڪيو ويو آهي ته وزير اعظم جي قومي اسيمبلي اچڻ تي ڪنهن به قسم جو ڪو شور نه ڪيو ويندو، ان موقعي تي شاهه محمود قريشي جو چوڻ هو ته وزير اعظم جي تقرير جي حوالي سان حڪمت عملي طئي ڪرڻ لاءِ اپوزيشن جو اجلاس طلب ڪيو آهي، اپوزيشن سڀاڻي قومي اسيمبلي جي اجلاس کان پهرين 3 بجي اپوزيشن چيمبر ۾ گڏ ٿيندي ۽ عمل طئي ڪندي.

 

عاليا جا شرڌا سان اختلاف،باغي جي ڪاميابي جي خوشي ۾ ڪوٺايل پارٽي ۾ نه آئي

ممبئي (شوبز نيوز) بالي ووڊ جي ٻن نوجوان اداڪارائن عاليا ڀٽ ۽ شرڌا ڪپور ۾ اختلاف وڌندا پيا وڃن، جنهن ڪري ٻئي اداڪارائون هڪ ٻئي جي سامهون اچڻ به پسند نه ٿيون ڪن، ڀارتي ميڊيا جي رپورٽن مطابق تازو ئي شرڌا ڪپور پنهنجي فلم باغي جي ڪاميابي جي خوشي ۾ رٿيل پارٽي ۾ عاليا ڀٽ کي شامل ٿيڻ جي دعوت ڏني پر عاليا اها رد ڪندي پارٽي ۾ شرڪت نه ڪئي، جنهن سان ٻنهي ۾ اختلافن وارن افواهن کي وڌيڪ هٿي ملي وئي آهي، ڪجهه حلقن جو چوڻ آهي ته عاليا ڀٽ ، شرڌا جي لاڳيتين ڪاميابين تي پاڻ کي غيرمحفوظ سمجهي رهي آهي، جڏهن ته ڪجهه ذريعن جو چوڻ آهي ته کيس پنهنجي پريمي اداڪار سڌارٿ ملهوترا جو شرڌا جي ويجهو وڃڻ ۽ ساڻس گڏ فلم ۾ ڪرڻ نه ٿو وڻي، ڇاڪاڻ ته ايڪ ولن ۾ ڪم ڪرڻ دوران شرڌا ۽ سڌارٿ ۾ ويجهڙائپ جون ڳالهيون هليون هيون، جنهن تي عاليا ڪاوڙيل آهي.001

 

هالي ووڊ هيرو وين ڊيم کي پيغمر اسلام جي تعليم سان دلچسپي، پابندي سان عمل ڪرڻ لڳو

قاهره(شوبز نيوز) هالي ووڊ جي ايڪشن هيرو وين ڊيم چيو آهي ته صحت جي حوالي سان آئون پيغمبر اسلام ﷺ جي تعليم تي عمل ڪندو آهيان، جڏهن ته عربي کاڌا منهنجي پسند جي غذا آهن. هڪ انٽرويو ۾ پنهنجي فٽنس جا راز ٻڌائيندي ايڪشن هيرو وين ڊيم جو چوڻ هوته منهنجي صحت جو راز عربي کاڌا آهن، سٺي غذا کائڻ ۽ ڀرپور ننڊ صحت لاءِ فائديمند آهي ۽ جيڪڏهن توهان گوشت يا ڪُڪڙ کائڻ چاهيو ٿا ته هفتي ۾ هڪ ڀيرو کائڻ گھرجي. هن چيو ته آئون گھوڙي ۽ باز جو گوشت شوق سان کائيندو آهيان پر عربي کاڌن کي اوليت ڏيندو آهيان. هن چيو ته پيغمبر اسلام ﷺ تمام ذهين هو، جنهن انساني صحت جي حوالي سان سندن علم وسيع هو. هن چيو ته اهي ڳالهيون ڪنهن کان پڇڻ جون نه پر پاڻ پڙهڻ جون آهن، جيڪڏهن اهي پڙهيون وڃن ته خبر پوندي مسلمانن جون گھڻيون ڳالهيون سٺيون آهن.

رڳو پگهار ۽ عهدو نه کپي، ڳالهيون به ٻڌيون وڃن: انضمام الحق

لاهور (اسپورٽس نيوز) پاڪستان ڪرڪيٽ بورڊ جي چيف سليڪٽر انضمام الحق واضح چيو آهي ته جيڪڏهن سندس ڳالهيون نه مڃيون ويون ته هو رڳو پگهار لاءِ عهدي سان چنبڙيو نه رهندو پر استعيفيٰ ڏيڻ کي ترجيح ڏيندو. هن اها ڳالهه هڪ انٽرويو ۾ ڪئي. انضمام الحق جو چوڻ هو ته مون پاڪستان ڪرڪيٽ بورڊ ۾ عهدو سنڀالڻ کان پهريان بورڊ تي واضح ڪري ڇڏيو ته مان صرف نوڪري نه ڪندس پر پنهنجي تجويزن تي عمل ڪرائيندس پر ائين به ناهي ته مان ڪنهن جي به نه ٻڌندس، جڏهن مان ڪپتان هوس ته چيف سليڪٽر کان پنهنجي ڳالهه مڃرائيندو هوس ۽ هاڻ مان ٻين ڪپتانن جي ڳالهه به غور سان ٻڌندس. انضم الحق جو وڌيڪ چوڻ هو ته الله مون کي گهڻو نوازيو آهي. افغانستان کان علاوه به مون کي گهڻن بورڊن طرفان ڪوچنگ جي آفر ٿي هئي جيڪڏهن بورڊ ۾ رهندي مان پاڪستان ڪرڪيٽ جي خدمت نه ڪري سگهيس ته استعيفيٰ ڏئي گهر وڃڻ به بلڪل دير نه لڳائيندس.

 

سنڌ جي سياسي تاريخ ۾ شهيد الله بخش سومري جو ڪردار : ارشاد ڪاغذي

سنڌ جي سياسي تاريخ جو مطالعو، مشاهدو ۽ تحقيق ڪندي اهو چوڻو ٿو پئي ته مختلف واقعن، لقائن ۽ پهلوئن تي اڃا تائين تفصيلي طرح ريسرچ نه ٿي سگهي آهي. تحقيق ڪندڙن ڄاڻي ٻجهي انهن واقعن تي بحث نه ڪري ڪيئي راز ظاهر ڪري نه سگھيا آهن. پاڻ جڏهن سنڌ جي سياسي تاريخ جي حوالي سان ڪي واقعا پيش ڪيون ٿا ۽ خاص ڪري هتي موضوع جي مناسبت سان الله بخش سومري جي سياست، حڪمراني ۽ عملداري جو جڏهن ذڪر ڪجي ٿو ته ان ۾ ڪي اهم پاسا هتي ڏيڻ جو مقصد الله بخش جي دور کي سمجهڻ آهي. انگريز سرڪار جڏهن سنڌ کي بمبئي کان الڳ ڪري ڌار صوبو ٺاهيو ۽ سنڌ کي خودمختيار ڪيو، تڏهن سنڌ ۾ پهرين اليڪشن ٿي جنهن ۾ الله بخش سومري جي پارٽي اليڪشن ۾ اڪثريت حاصل ڪئي پر اڪثريتي پارٽي کي اقتدار ڏيڻ بدران اقليتي پارٽي جي سر غلام حسين هدايت الله کي سنڌ جو پهريون وزيراعظم بنايو ويو. ان وقت صوبي جي چيف ايگزيڪٽو کي وزيراعظم چيو ويندو هو. اها ٻي ڳالهه آهي ته صوبي جي وزيراعظم کي ڪيترا پاور ۽ اختيار هئا! اهو هڪ اهم بحث طلب مسئلو آهي ته سنڌ جي وزيراعظم کي ڪيترا پاور هئا ۽ هو پنهنجي حڪومت هلائڻ ۽ فيصلا ڪرڻ ۾ ڪيترو آزاد ۽ خودمختيار هو.

سنڌ ۾ پهرين ڏينهن کان وٺي انگريز سامراج جي مداخلت ۽ عملي طرح حڪمراني هئي. اٿندي ئي غير جمهوري انداز سان سنڌ جي اقتداري سياست ۾ ڌڙابندي ڪري هڪ اهڙي روايت جو بنياد وڌو ويو، جنهن جو عڪس اڃا تائين هتان جي سياست ۾ پسي سگھجي ٿو. ان وقت اقتدار جي حصول لاءِ ذاتي مفادن کي اوليت ڏني ويندي هئي. سنڌ حڪومت سال ٻن تائين مس هلندي هئي ۽ وري ٻي سرڪار ٺاهي ويندي هئي ۽ اهڙي طرح صوبائي خودمختياري سنڌ جي وڏيرن، جاگيردارن، سيٺين، سياستدانن، ڪامورن ۽ سازشي ٽولي جي سازشين جو شڪار رهي. سنڌ جا چونديل نمائندا ڪيترا سچا هئا، ان جوا اندازو ان مان لڳائي سگھجي ٿو جو هو وزارت لاءِ ڪڏهن هڪ جماعت سان ته ڪڏهن ڪنهن وزيراعظم سان ته ڪڏهن ٻي سان ساٿ ۾ سلهاڙيل هئا. ”انڌير نگري چرٻٽ راجا“ جهڙو ماحول هو. ميوزيڪل چيئر جو مزو هر هڪ ماڻي رهيو هو. ڪنهن کي سنڌ جو فڪر هو ئي ڪونه!

سر غلام حسين هدايت الله شيخ کان پوءِ الله بخش سومرو سنڌ جو وزيراعظم مقرر ٿيو. هو سادو، خداترس، ايماندار ۽ اڻ ڌريو شخص هو. هو ٻين وانگر آل انڊيا سياست يا ملڪي سطح جي ڪنهن سياسي جماعت جو ڪڏهن به رڪن نه ٿيو. هن جو تعلق وچولي طبقي سان هو ۽ هو پنهنجي سوچ ۽ سمجهه مطابق قوم پرست جي روپ ۾ ظاهر ٿيو ۽ وڏن سياسي جماعتن ۽ گڙنگ سياستدانن ۽ مفاد پرست سيٺين ۽ انگريز سامراج جي فساد، فتني ۽ منصوبابندي سان مقابلو ڪندو رهيو. جنهن جي هو سٽ سهي نه سگهيو. هندو ميمبر، ڪانگريس، مسلم ليگ ۽ ٻيون جماعتون پنهنجي ذاتي ايجنڊا تي ڪم ڪنديون رهيون. سنڌ جي مفاد تحت ڪا رٿابندي نه ٿي سگھي ۽ اهو دور اقتدار جي هوس جو دور هو. تمام سٺا، عاليشان، هڏڏوکي ۽ سنڌ جا خادم اسيمبلي ميمبر ۽ سياستدان هئا سي گڏجي سڏجي سنڌ کي تين وال ڪندا رهيا ۽ سنڌ جو عوام وات پٽي انهن جي مفادي سياست کي ڏسندو رهيو. ڏسڻن وائسڻن ماڻهن سنڌ کي تباهي جي ڪناري تي پهچائي ڇڏيو ۽ انگريزن جي نمڪ حلالي ڪندي وقت پاس ڪيو.

الله بخش سومري جي دور ۾ ڪيئي اهم واقعا ٿيا ۽ ان جو سبب فقط الله بخش جي وزارت کي ختم ڪرڻ ۽ ديس ڀائين وچ ۾ نفرت، تفرقو ۽ تضاد پيدا ڪرڻ هو. 1935ع واري آل انڊيا ايڪٽ تحت سنڌ کي آزاد صوبي جو درجو ڏيڻ جو فيصلو ڪيو ويو. 1936ع تي سنڌ کي بمبئي پرڳڻي کان الڳ ڪري خودمختياري ڏني وئي. 1937ع ۾ سنڌ ۾ پهرين عام چونڊ ٿي. پهريون وزيراعظم سر غلام حسين هدايت الله شيخ مقرر ٿيو ۽ سال اندر هن جي حڪومت ختم ٿي. 1938ع ۾ الله بخش سومرو سنڌ جو واڳ ڌڻي بڻيو. 1939ع ۾ سکر ۾ هندو ــ مسلم فساد ٿيا، مسجد منزل گاه جو سڀ کان وڌو واقعو پيش آيو. ان جي نتيجي ۾ تحريڪ هلي ۽ الله بخش جي حڪومت 1940ع ۾ ختم ڪئي وئي. ان بعد مير بنده علي اقتدار جي گدي تي ويٺو ۽ هڪ سال اندر 1941ع ۾ وري ٻيهر الله بخش سنڌ جو وزيراعظم ٿيو. الله بخش جي وزارت جي عرصي دوران سورهيه بادشاهه پير پاڳاري کي 1941ع ۾ گرفتار ڪيو ويو. 1942ع تي انگريز سرڪار حر تحريڪ کي ڪچلڻ لاءِ سنڌ اسيمبلي مان حر ايڪٽ منظور ڪرايو. ساڳئي سال سنڌ جي گورنر الله بخش کي ڊسمس ڪري ڇڏيو. 20 مارچ 1943ع ۾ سورهيه بادشاهه پير پاڳاري کي شهيد ڪيو ويو. 14 مئي 1943ع ۾ الله بخش کي شهيد ڪيو ويو.

اهي هئا سنڌ جي سياسي تاريخ جا اهم واقعا جن کي وساري نه ٿو سگھجي ۽ اهي واقعا سنڌ جي تاريخ کي بدلائڻ ۾ اهم ثابت ٿيا. ان سياسي دور جي تاريخ سنڌ جي تاريخ جي بدترين ۽ پرآشوب دور سان ڀيٽي ويندي آهي. هونئن ته جڏهن کان سنڌ جدا صوبو بڻيو ان ڏينهن کان وٺي سنڌ اندر افراتفري، فساد، سازشون ۽ وڳوڙ چالو رهيا. پر جيڪي اهم واقعا ٿيا تن سنڌ ۾ رهندڙ ديس ڀائين ۾ نفاق ۽ نفرت وڌائي ڇڏي ۽ دنگا فساد ڪري هندو ۽ مسلم ايڪتا تي سخت وار ڪيو ويو ۽ ڀائرن جي دلين ۾ تعصب ۽ تضاد ايترو وڌي ويو جو هو هڪ ٻئي جي خون جا پياسي بنجي ويا ۽ پوءِ دلين سان گڏ ڌرتي جو به ورهاڱو ٿيو.

الله بخش سومري پنهنجي وزارت عظميٰ جي دور ۾ سنڌ جي ڀلائي لاءِ ڪيئي ڪم ڪيا ۽ هي دور سنڌ جي خوشحالي ۽ سڌارن جو دور ليکجي ٿو. الله بخش سياسي طور سنڌ ۽ هند جي سياست تي هڪ غير جانبدار شخص طور اڀري آيو ۽ انگريز سرڪار جي فيصلن خلاف مزاحمت ڪرڻ لڳو ۽ سندس ڪوشش رهي ته هو هندستان ليول تي هڪ اهڙو وسيع اتحاد جوڙي جيڪو اڻ ڌريو هجي ۽ پنهنجي وطن کي آزادي ڏياري سگھجي. هو بنيادي طرح سيڪيولر خيالن جو ماڻهو هو. ۽ ان ۾ حقيقت به آهي ته هو سادو سنت هو پر ذهني ۽ عقلي بلوغت سمجهداري، سياڻپ ۽ ايمانداري ۾ سنڌ جي ٻين اڳواڻن کان سرس هو. ان جو هڪ سبب ته هي آهي ته هو وچولي طبقي سان تعلق رکندڙ هو ۽ ٻيو ته هو وطن فروش نه هو. جڏهن ته ٻي طرف سنڌ جا سياستدان وڏيرا، جاگيردار ۽ سيٺيا هئا، جيڪي پنهنجي ذاتي مفادن لاءِ هر ڪم ڪرڻ لاءِ تيار هئا ۽ هنن ايئن به ڪيو.. 1936ع کان 1947ع تائين سنڌ صوبي مٿان ڪارا ڪڪر ڇانيل رهيا ۽ سنڌ جي نمائندن انگريزن، ڪانگريس ۽ مسلم ليگ جي اشاري تي سنڌ جي وحدت تي جيڪي وار ڪيا سي سنڌ جي تاريخ جو حصو آهن. ان سموري عرصي ۾ سنڌ ۽ سنڌين سان جيڪي ڪيس ۽ ڪلور ڪيا ويا ۽ ويڇا وڌايا ويا تن جي تاريخ مختصر ضرور آهي پر اها سنڌ ۽ سنڌين لاءِ هاڃيڪار ثابت ٿي. ان دور ۾ انگريز سامراج سنڌ جي سورهيه پٽن ۽ آزادي جي متوالن کي سزائون ۽ سيکتون ڏئي سنڌ کي اڪيلو ڪيو. سنڌ جا حلالي فرزند شهيد ڪيا ويا ۽ سنڌ تي مارشلا مڙهي سنڌين جو قتلام ڪيو.

الله بخش ۽ ان جي حڪومت ان معاملي کي ڪيئن منهن ڏنو ان باري ۾ تحقيق ڪندڙن اشارن ڪناين ۾ لکيو ته ضرور آهي پر کليل نموني ۾ ڪنهن کي ڏوهي قرار نه ڏنو آهي. پر اهو سچ اهي ته سنڌ جا سياستدان ۽ چونڊيل عيوضي پيرپاڳاري جي گرفتاري تي ڪو ردعمل نه ڏيکاريو، سنڌ جي وزيراعظم الله بخش جا هٿ ٻڌل هئا. اسان ۽ توهان اهي ليک ضرور پڙهيا هوندا ته سنڌ جي گورنر جي حڪم سان پير سائين پاڳاري کي گرفتار ڪيو ويو، ان وقت الله بخش سنڌ ۾ موجود ڪونه هو ۽ هن اچڻ شرط احتجاج ڪيو وغيره وغيره. اهو ايتري حد تائين ته درست آهي پر جڏهن ان جي اندر ۾ جهاتي پائي ڌسجي ته معلوم ٿئي ٿو ته سنڌ جا اسيمبلي ميمبرن جو ان باري ۾ ڪردار ڪهڙو هو؟

سنڌ، سال 1937ع ۾، بمبئيءَ کان ڇڄي جدا صوبو بڻي. 1937ع کان 1947ع تائين ان جي نئين قومي زندگيءَ جو بنياد پوندو رهيو، پر غلط اصولن تي، جن سياست جا غلط قدر وجود ۾ آندا، ۽ آخر خود صوبي کي ئي نهوڙي ڇڏيو. جدا ٿيڻ کان پوءِ سنڌ جي سياسي زندگيءَ تي سنڌ جا وڏيرا صاحبان ۽ پير صاحبان، پنهنجي دولت، راڄوڻي اثر ۽ پيريءَ ــ مريديءَ جي آڌار تي، هڪدم ڇانئجي ويا. نه ڪا مستقل سياسي پارٽي ٺهڻ ڏنائون، نه سياست جو مدار ئي ڪن مفيد اخلاقي اصولن تي رکڻ ڏنائون.“

سنڌ جي وطن فروش وڏيرن جي سياست کي ڏسجي ٿو ته سوال پيدا ٿو ٿئي ته ٻيو ڪو اهڙو ماڻهو هو، جيڪو انهن کان مٿانهون هجي، ها اهو چئي سگھجي ٿو ته شهيد الله بخش اهڙي سياست ڪئي جنهن ۾ ذاتي مفاد جو عمل دخل بنهه نه هو. هو ان کان مٿانهون هو ۽ انهن سمورن وڏيرن کان به مٿانهون هو پر کيس هلڻ نه ڏنو ويو. سازش ڪري انگريزن ۽ وڏيرن کيس سوڙهو ڪيو هو ۽ هو اهڙو جلدي قدم نه کڻي سگھيو پر مجموعي طور الله بخش سنڌ جي سياست جو هڪ روشن باب هو. پير علي محمد راشدي چواڻي:  شڪارپور جي شمع اجهامڻ کان اڳ هڪ ڀڙڪو کاڌو، ۽ ان ڀڙڪي جو نالو هو الله بخش مرحوم.

irshadkagzi@yahoo.com

 

 

قومي اسيمبليء ۾ ڇا ٿيڻ وارو آهي؟: شفيق شاڪر

ميڊيا ۽ عوام جي  سوچ تي سوار ”پاناما پيپرز“ وارو معاملو گذريل ڪيترن هفتن کان سلجھڻ بدران وڌيڪ مونجھاري طرف وڌي رهيو آهي.خبر ناهي ته ايندڙ وقت ۾ ان معاملي جا پاڪستان جي سياست تي ڪهڙا مثبت يا منفي اثر ظاهر ٿيندا يا ان نه کٽندڙ گپ شپ ۽ بحث مباحثن جي نتيجي ۾ پاڪستان جي غريب عوام جي محروم زندگين ۾ ڪهڙا کير ۽ ماکيء جا دريا وهڻ شروع ٿي ويندا پر اها حقيقت آهي ته نواز شريف حڪومت ۽ ان سان انهيء بلڪه ٻين به ڪيترين ئي بدعنوانين جي معاملن تي ٻٽ بڻيل مخصوص پيپلز پارٽي جون اهي سموريون گڏيل اٽڪلون ۽ حڪمت عمليون في الحال حڪومت جي خلاف ڪنهن فيصلائتي ڪردار کي روڪڻ ۾ گھڻي حد تائين ڪامياب ويندي نظر اچي رهيون آهن.ظاهر ۾ اپوزيشن پاران جن ۾ پي پي پي به زباني سرندا وڄائڻ ۾ سڀني جي اڳيان اڳيان آهي،اڄ به سياست جي جنترن ۽ منترن کان واقف تجزيي نگارن جو اهو خيال ،پڪو پختو ساڳي صورت ۾ موجود آهي ته نواز شريف حڪومت ۽ موجوده پيپلز پارٽي هڪ ئي سڪي جا ٻه پاسا آهن.سياسي اسٽيج تي عوام جي اکين ۾ ڌوڙ وجھڻ لاء ڀلي زباني جمع، ڪٽ ۽ضرب جاري هجي پر” مذاق جمهوريت “ جو معاهدو اڄ به زنده ۽ جوان آهي. ان ڪري اهي ٻئي ڌريون سچ پچ هڪ ٻئي جي خلاف وڃڻ يا هڪ ٻئي کي اجايو ايذائڻ جي غلطي ڪڏهن به نه ڪنديون.اڄ جيڪر زرداري صاحب نواز شريف کان ڪجھ خفا آهي ته ان جو سبب اهو ناهي جو هن جي نظر ۾ نوازشريف ڪوڙ ڳالهائي قوم سان دوکو ڪيو آهي،يا هن ٽيڪس بچائڻ لاء غيراخلاقي حرڪت ڪئي آهي ،يا هو پنهن جي ملڪيت لڪائي رهيو آهي پر اصل ناراضگي اها آهي ته جڏهن ڪرپشن ۽ وٺ پڪڙ جي حوالي سان خود زرداري صاحب يا سندس دوستن تي ڏکيا ڏينهن آيا ته نوازشريف هن جي ڪابه مدد نه ڪئي.اهي اختلاف ڪي اصولي نه پر هڪ ٻئي کي مهڻا ۽ ميارون ڏيڻ جي ڪاروائيء تي بڌل آهن بلڪه ايئن چئجي ته صحيح ٿيندو ته پاناما ليڪس ۽ ڪرپشن جي حوالي سان ٻنهي ڌرين وچ ۾ ڪي ٻه موقف آهن ئي ڪونه.ڇوته ٻئي ڌريون سياسي جياپي لاء في الحال هڪٻئي جي سهاري جون محتاج آهن.اها ئي پاليسي جيڪا مولانا صاحب،اچڪزئي ۽ اي اين پي گھڻو واضح نموني سان ميان صاحب جي حق ۾ اختيار ڪيو ويٺي آهي ،جيڪر ڪنهن کي شڪ آهي ته پي پي جي فيصلا ڪندڙ قيادت ان پاليسيء کان الڳ ٻي ڪا راء رکي ٿي ته ان کي سواء سياسي اڻ ڄاڻائي ۽ سادگيء جي ٻيو ڇا ٿو چئي سگھجي! سو جيڪر پي پي جا قمر الزمان ڪائره جهڙا سياسي ڪارڪن ڪيترو به حڪومت جو سياسي حشر نشر ڪرڻ لاء سچا ۽ سنجيده ڇو نه هجن پر هرڪو ڀلي ڀت ڄاڻي ٿو ته پي پي جا اصل فيصلا ڪٿي ٿيندا آهن ۽ ڪير ڪندو آهي! سو پي پي جون فيصلي جي سگھ رکندڙ شخصيتون اڄ به ميان صاحب سان گڏ آهن ۽ 2018ع تائين گڏ ئي رهنديون جيڪر موجوده حڪومت ٻئي ڪنهن اڻ ڄاتل يا نرالي طريقي سان جام شهادت نوش نٿي ڪري.

حڪومت ۽ سندس حامي ڌرين پاناما معاملي مان جان ڇڏائڻ لاه جيڪا حڪمت عملي اختيار ڪئي هئي،خوشقسمتي سان يا بدقسمتيء سان سموريون اڳڀرايون ان منصوبي مطابق ئي ڪاميابيء سان اڳتي وڌي رهيون آهن.جهڙيء طرح حڪومت سپريم ڪورٽ سامهون سٽ ايترو ته الجھائي رکيو جنهن کي سلجھائڻ جي سٽ سپريم ڪورٽ پنهن جي اندر نه ٿي سمجھي.جنهن ڪري حڪومت کي صلاح ڏني ويئي آهي ته ڪورٽ سڳوريء کي گھٽ ۾ گھت اهو ته ٻڌائڻ جي تڪليف ڪئي وڃي ته جاچ ڇاجي ڪرڻي آهي ۽ ڪنهن جي خلاف ڪرڻي آهي؟ سو اهو معاملو اتي ئي لٽڪيل رهندو  جيس تائين وزارت قانون هڪ ٻيو خط لکڻ لاء اکيون مهٽي ننڊ مان اٿندي تيستائين خير سان هڪ ٻيو مهينو وقت جي ڪيلنڊر تان ڪٽجي چڪو هوندو.انهيء کان اڳ ظهر آهي ته حڪومت کي ٽي آر اوز ۾ تبديليء جي حوالي سان لازمي اپوزيشن سان ٽيڪا ٽپڻي ڪرڻي پوندي جيڪو ڪو سولو ڪم ناهي انهيء کي به پورو مهينو کپي.سو ان معاملي کي اتي ئي وساري ڇڏجي ته سپريم ڪورٽ پاران ڪا جوڊيشل ڪميشن قائم ٿي سگھندي يا وري اها ڪي نتيجا به ڏيئي سگھندي. ته پوء حڪومت ۽ اپوزيشن وٽ ان معاملي کي ڪنهن ڪن ۾ ڌڪڻ يا ان جا ڪي نتيجا حاصل ڪرڻ لاء ڪهڙو آپشن آهي؟ اهو آپشن آهي وزيراعظم جو قومي اسيبليء ۾ ستن سوالن جا جواب نه پر صرف پاليسي بيان ڏيڻ يعني ماضيء جي ٻن مظلوم ۽ معصوم تقريرن جيان هڪ وڌيڪ ڏنگي،ڳري ۽ همت ڀري تقرير ڪرڻ.  جنهن آپشن تي ئي هن وقت تائين اطلاعن مطابق حڪومت ۽ سندس حامي پارٽيون متحد ۽ متفق ٿي چڪيون آهن.باخبر ذريعن مطابق اپوزيشن ليڊر سان ان معاملي ۾ سمورا صلاح مشورا مڪمل ڪيا ويا آهن.ٿيندو ايئن جو ميان صاحب قومي اسيمبليء ۾ هڪ زوردار تقرير ڪندو.ڪجھ نامعلوم ڌرين کي تنقيد جو نشانو بنائيندو،پنهن جي ڏکن،سورن ۽ پارسائيء جا قصا بيان ڪندو ۽ سندس حامي جن ۾ پي پي به شامل آهي سندس تقرير غور سان ٻڌندا ۽ اپوزيشن ليڊر ميان صاحب جو شڪريو به ادا ڪندو جو هن اسيمبليء ۾ اچڻ جي عنايت ڪئي.اهو به ممڪن آهي ته ميان صاحب پاناما معاملي جي حوالي سان ڪنهن پارياماني ڪميٽي قائم ڪرڻ جو اعلان ڪري.اهڙيء طرح گھڻي حد تائين حڪومت جي سوچ مطابق هن معاملي جي ڦوڪڻي مان هوا به نڪري ويندي ۽ حڪومت ۽ سندن حمايتين کي وقت کي ۡڪجھ اڳتي ڌڪڻ جو موقعو ملي ويندو.

ان سموري قضيي ۾ عمران خان ۽ شيخ رشيد توڙي تازو ساڻن سر ملائيندڙ بلاول ڀٽو زرداري ، عوام ۽ ميڊيا  لاء ڪهڙو ڪردار باقي بچندو،اهو وقت تي ڇڏڻ گھرجي! رهيو سوال انهن ڌرين جو جيڪي في الحال اهو سارو تماشو عوام وانگر ئي ڏسي رهيا آهن،اهي ان مئچ ۾ ڪنهن کي کٽڻ ۽ هارائڻ ڏسڻ گھرن ٿا يا مئچ کي ”ڊرا “ ۾ ختم ڪرائڻ گھرن ٿا ،گھڻن کي سندن ان مرضيء جي معلومات جي اڻ تڻ آهي جيڪا وقت گذرڻ سان گڏوگڏ وڌيڪ اذيت ۽ نراسائيء ۾ بدلبي ٿي وڃي.

 

 

ڪراچي لاءِ پيڪيج منظور….

سنڌ جي وڏي وزير سيد قائم علي شاهه ڪراچي شهر جي خوبصورتيءَ  مک روڊن جي مرمت ۽ ڪي ايم سي اسپتالن ۾ ضروري سهولتن ۽ آلات جي فراهميءَ لاءِ 1.977 بلين رپين واري اسپيشل ڪراچي پيڪيج جي منظوري ڏئي ڇڏي آهي. گذريل ڏينهن وزيراعليٰ هائوس ۾ اجلاس جي صدارت ڪندي وڏي وزير خاص گرانٽ جي منظوري ڏني. اجلاس ۾ ناڻي وارو سينئر صوبائي وزير سيد مراد علي شاهه، پرنسپل سيڪريٽري علم الدين بلو، وقتي چيف سيڪريٽري رضوان ميمڻ ۽ ڪمشنر ڪراچيءَ آصف حيدر شاهه شرڪت ڪئي. ڪمشنر ڪراچيءَ شهر ۾ خوبصورتيءَ، مرمت ۽ بحاليءَ وارن ڪمن لاءِ 1.977 بلين رپين جا منصوبا پيش ڪيا. شهر جي خوبصورتي، ترقياتي ڪمن ۽ ڪلفٽن، طارق روڊ ۽ پراڻي نيشنل هاءِ وارن روڊن جي مرمت لاءِ 1500 ملين رپيا خرچ ٿيندا. سنڌ جي وڏي وزير سمورن لاڳاپيل کاتن ۽ آفيسرن کي هدايت ڪئي آهي ته اهي تعميراتي ۽ مرمتي ڪمن جي معيار جي خاص طور تي نگراني ڪن ۽ معيار تي ڪنهن به قسم جو سمجهوتو نه ڪيو ويندو. شهر جي خوبصورتي ۽ ڪجهه اهم روڊن جي مرمت لاءِ ڪمشنر ڪراچي آصف حيدر شاهه سفارش ڪئي آهي، انهن مرمت ۽ تعمير ٿيندڙ روڊن ۾ ڪلفٽن، طارق روڊ، اولڊ نيشنل هاءِ وي شامل آهن.

وڏي وزير جي هدايت تي ناڻي واري وزير سيد مراد علي شاهه 300 ملين رپين جي اسپيشل گرانٽ فوري طور تي جاري ڪري ڇڏي آهي ۽ اها گرانٽ گوليمار انڊر پاس جي جلد تڪميل لاءِ جاري ڪئي وئي . سنڌ جي وڏي وزير گوليمار انڊر پاس جي جلد کان جلد تعميراتي ڪم مڪمل ڪرڻ جي هدايت ڪئي ته جيئن ماڻهن کي پيش ايندڙ ڏکيائين جو ازالو ٿي سگهي. هن ڪمشنر ڪراچي آصف حيدر شاهه کي هدايت ڪئي ته هُو ڊپٽي ڪمشنرز کي مرمت ٿيندڙ روڊن ۽ تعميراتي ڪمن جي نگرانيءَ ڪرڻ لاءِ هدايت ڪري. مان پاڻ انهن ڪمن جي انسپيڪشن ڪندس.

سنڌ جي وڏي وزير ڪمشنر ڪراچي جي سفارش تي ڪراچي لاءِ 1977 ملين رپيا جاري ڪندي ڪمشنر ڪراچي ۽ ايڊمنسٽريٽر ڪراچي کي هدايت ڪئي ته هُو رمضان المبارڪ کان اڳ ڪراچي کي صاف سٿرو شهر بڻائڻ لاءِ دستياب وسيلن مان ڀرپور طور تي فائدو حاصل ڪيو وڃي. موجوده سنڌ حڪومت صوبي جي عوام لاءِ زندگيءَ جون سموريون سهولتون کين در تائين پهچائڻ جو ازم ڪيو آهي. شهر جي مختلف اسپتالن لاءِ خاص گرانٽ طور 177 ملين رپيا جاري ڪيا ويا، عباسي شهيد اسپتال ۾ به دوائن ۽ طبي آلات جي فراهميءَ کي يقيني بڻائڻ جي هدايت ڪئي وئي.

سنڌ سرڪار کي اپيل آهي ته پئڪيج  ته اڳ به منظور ٿيندا رهيا آهن ۽ رقم به جاري ٿيندي رهي پر شهر جو حال  ساڳيو رهيو آهي ان ڪري سرڪار سڳوري کي گذارش آهي ته نشاندهي ڪيل مسئلن تي ڪجهه خرچ ڪيو وڃي جئين عوام کي به سهولتون ملي سگهن،