تازيون خبرون

Daily Archives: May 14, 2016

ٽي ايم اي آفيس باقراڻي ۾ سوين غير قانوني ڀرتين جو انڪشاف، ڪوڙن ووچرن ذريعي ڪروڙين رپيا هڙپ

باقراڻي (رپورٽر) ٽي ايم اي آفيس باقراڻي ۾ 465 ملازمن مان 300 جعلي ملازمن جي ڀرتين جو انڪشاف ٿيو آهي ڀروسي جوڳن ذريعن موجب ٽي ايم اي آفيس لاءِ60 پٽيوالا هڪ ويسي باغيچي لاءِ 20 مالهي ۽ 17 بيلدار، هڪ فائربرگيڊ گاڏي لاءِ 18 فائرمين ،ٻه ٽريڪٽر ۽ هڪ مزدا سميت 4 گاڏين لاءِ 14 ڊرائيور، ٻه سينئير ۽ 83 جونئير ڪلارڪ، 14رڪوري ڪلارڪ، 15 ٽيڪس ڪلارڪ،27 هيلپر، 21 پمپ ڊرائيور، 10 آفيس صفائي ڪندڙ، 8 چوڪيدار، 6 اڪائونٽنٽ ۽ 4 پاڻي پياريندڙن سميت 401 پڪا ۽ 65 ڪچا ملازم ڀرتي ڪرڻ جو انڪشاف ٿيو آهي، ٽي ايم اي جي هرمهيني 1 ڪروڙ 15 لک روپيا بجيٽ مان 75 لک روپيا ملازمن جي پگهارن جڏهن ته باقي اٽڪل 40 لک روپيا تعلقي جي مختلف شهرن جي صفائي سٿرائي، لائيٽنگ ۽ گاڏين جي خراب هجڻ باوجود هزارين ليٽر ڊيزل جي مد ۾ ڪوڙا ووچر ٺاهي هڙپ ڪيا ويا، جڏهن ته چار سال اڳ 2012ع ۾ 300 وائيٽ ڪالر ڪوڙين ڀرتين جي انڪشاف ٿيڻ باوجود کين هر مهيني اندازن 42 لک گذريل چئن سالن ۾اٽڪل 20 ڪروڙ روپين جو سرڪاري خزاني کي ڌاڙو هنيو ويو، ٽي ايم اي آفيس باقراڻي ۾ اهڙي ڪروڙين روپين جي ڪرپشن جي درخواستن بعد ڪالهه نيب پاران ٽي ايم اي آفيس باقراڻي تي هنيل ڇاپي بعد ڪامورن ۾ ٿرٿلو مچي ويو آهي ۽ پاڻ بچائڻ لاءِ سرگرم آهن.

 

ڪاجل اگروال”دو لفظون ڪي ڪهاني“ ۾ انڌي ڇوڪري جو ڪردار ڪندي

ممبئي (شوبز نيوز) بالي ووڊ اداڪارا ڪاجل اگروال پنهنجي ايندڙ فلم ”دو لفظون ڪي ڪهاني“ ۾ هڪ انڌي ڇوڪري جو ڪردار ادا ڪري رهي آهي، جنهن کي حقيقي رنگ ڏيڻ لاءِ هن نه رڳو هيلن ڪيلر جا ڪتاب پڙهيا آهن پر اکين جي نور کان محروم ماڻهن جي مرڪز ۾ به وڏو وقت گذاريو آهي، هڪ انٽرويو ۾ ڪاجل ٻڌايو ته ڄاڻايل مرڪز ۾ وڃي مونکي اکين جي نور کان محروم ماڻهن جي زندگي،رهڻي ڪهڻي، ڏهاڙي جي سرگرمين ۽ مسئلن بابت وڏي ڄاڻ ملي، هن ٻڌايو ته ان مرڪز ۾ مونکي نور کان محروم ماڻهن جي استعمال ۾ ايندڙ شين بابت ٻڌايو ۽ سيکاريو ويو، جن ۾ خاص ڪمپيوٽر، آڊيو مشينون، مائڪروويوز، گهڙيون ۽ سيل فون شامل آهن، ڪاجل ٻڌايو ته مونکي ڇڙي جي مدد سان هلڻ به سيکاريو ويو، جنهن دوران منهنجون اکيون بند هيون ته جيئن مان حقيقي انڌي نظر اچان، هن چيو ته مونکي پنهنجي اکين جي چرپر تي به ڪنٽرول رکڻو پيو، اهو ڏکيو ڪم هو، ڇو ته مان وڏي چرپر واري ڇوڪري آهيان.

رنبير ڪپور ۽ ڪترينا ڪيف ۾ اختلاف وڌي ويا

ممبئي (شوبز نيوز)  بالي ووڊ اداڪار رنبير ڪپور ۽ ڪترينا ڪيف ۾ اختلاف ايترا ته وڌي ويا آهن، جو هو پنهنجي ايندڙ فلم ”جگا جاسوس“ جي شوٽنگ دوران به هڪ ٻئي کان پري پري رهڻ لڳا آهن، بالي ووڊ ذريعن مطابق رنبير ۽ ڪيٽ هن وقت فلم جي هڪ گاني جي شوٽنگ ڪرائي رهيا آهن، جنهن لاءِ هڪ زبردست سيٽ ٺاهيو ويو آهي، سيٽ تي موجود اکين ڏٺن شاهدن ٻڌايو ته اڳوڻي جوڙي گاني لاءِ سيٽ تي ڌار ڌار پهتي ۽ هو ٻئي ان مهل تائين هڪ ٻئي کان پري بيٺا رهيا، جيستائين گاني جي گهرج مطابق کين هڪ ٻئي جي ويجهو نه اچڻو پيو، ذريعن مطابق ان موقعي تي گهڻن ئي ماڻهن کي ڪوشش ڪئي ته رنبير ۽ ڪترينا جي گاني کان هٽي هڪ ٻئي جي ويجهو هجڻ واري تصوير ڪڍجي پر کين ان ۾ مايوسي جو منهن ڏسڻو پيو.

 

راهول ڊريوڊ ۽ مهيلا جئه ورڌني آءِ سي سي جي ڪرڪيٽ ڪميٽي جا ميمبر مقرر

دبئي(اسپورٽس نيوز) راهول ڊريوڊ ۽ مهيلا جئه ورڌني کي انٽرنيشنل ڪرڪيٽ ڪائونسل (آءِ سي سي) جي ڪرڪيٽ ڪميٽي جو ميمبر مقرر ڪيو ويو جڏهن ته ڪميٽي جي چيئرمين انيل ڪمبلي جي عهدي ۾  ٽن سالن جي واڌ ڪئي وئي. گذريل ڏينهن آءِ سي سي  طرفان جاري ڪيل پريس پڌرائي مطابق ڀارت جي اڳوڻي ڪپتان ۽ مشهور بيٽسمين راهول ڊريوڊ کي ڪمار سنگا ڪارا جي جاءِ تي موجوده رانديگرن جي نمائندي جي حيثيت سان ڪميٽي ۾ شامل ڪيو ويو آهي. اڳوڻو سري لنڪن ڪپتان ڪمار سنگا ڪارا پنهنجو ٽن سالن جو مدو پورو ڪري چڪو آهي، اهڙي طرح آسٽريليا جي آف اسپنر ٽم مي کي لڪشمن سيوا رام ڪرشن جي جاءِ تي ڪميٽي جو حصو بڻايو ويو آهي. سري لنڪا جو اڳوڻو ڪپتان ۽ مشهور بيٽسمين مهيلا جئه ورڌني ٽن سالن لاءِ اڳوڻن رانديگرن جي نمائندي جي حيثيت سان ڪميٽي ۾ شامل ٿيو آهي.کيس اڳوڻي آسٽريليائي ڪپتان  مارڪ ٽيلر جي جاءِ  تي اها ذميواري سونپي وئي آهي جيڪو پنهنجو ٽن سالن جو مدو پورو ڪري چڪو آهي. ٽي ڀيرا سال جي بهترين امپائر جو ايوارڊ کٽندڙ رچرڊ ڪيٽبلر کي اسٽيو ڊيوس جي جاءِ تي امپائر جي نمائندي جي حيثيت سان ڪميٽي جو ميمبر مقرر ڪيو ويو آهي. ڪميٽي جي چيئرمين ڀارت جي اڳوڻي مشهور ليگ اسپنر انيل ڪمبلي جي عهدي ۾ ٽن سالن جي واڌ ڪئي وئي آهي.

 

ڇا منزل ملڻ کان اڳي ئي ڇڻي وينداسين…؟: علي رضا نوناري

دنيا اندر هن معاشري جي حسين تخت تي گذرندڙ پل ڪنهن وقت انسان مٿان اهڙو ته وار ڪندا آهن جو انسان من ئي من اندر ڀورا ڀورا ٿيڻ لڳندو آهي ۽ ان جي جيئڻ وارين حسرتن سان گڏ اهو زندهه لاش بڻجي زندگي گهارڻ لڳندو آهي ساڳي طرح منهنجو گذرندڙ هر پل مونکي تڪليف ۽ ڏکن جي لامن تي لوڏيندي احساسن جي آڙاهه ۾ اڇليندو رهي ٿو ڇو جو اڄ مان بيمار، ادب دوستن جي روين توڙي منهنجي قلم واري فن سان لاڳاپيل ادارن، ثقافت کاتي ۽ ذميوار ماڻهن جي ڪن لاٽار واري عملن سبب اداسين جا بار کڻي اهڙي ته بيوسي واري واٽ تي بيٺل آهيان، ان بيهڪ جو اندازو ڪي احساس شناس اکيون ئي لڳائي سگهن ٿيون، باقي عياش پرست وجود ڍونگي ادب دوست ۽ شيشن ۽ اي سين منجهه سمهڻ يا رهڻ وارا وجود منهنجي هن درد کي ڇا سمجهي سگهندا، اڄ بيماري سبب منهنجون سموريون ڪاوشون ماضي جيان لڳي رهيون آهن، منهنجي درد تي رات جو نيري اڀ سميت چنڊ تارا، وڻ ٽڻ، ڪتيون توڙي وڻن جون پتيون به سوڳوار بڻيل آهن ۽ اهي مونکي رات جو ڪنن ۾ زندگي انمول تحفو آهي، زندگي پياري آهي واريون جهونگاريون ٻڌائي مونکي تڪليفن سان جهيڙڻ لاءِ اتساهي رهيا آهن پر افسوس جو عياش پرست ثقافتي کاتي جي ڪامورن منهنجي درد کي روح سان محسوس ئي ناهي ڪيو سندن دليون پٿريلي مورتين جيان ڌڙڪڻ ڇڏي ويون آهن سندن انهي لاتعلقي واري عمل سبب منهنجا خماريل اکين جا اوجاڳيل پنبڙين ۾ ڦاٿل لڙڪ راتين جي تنهائي ڳڙندي پٿر بڻيل بتن کي جنجهوڙڻ لاءِ درد جي عجب تاريخ تحرير ڪندا رهن ٿا ساڳي ئي وقت منهنجي جيون کي جنگ جوٽڻ جو سبق به ڏيندا رهن ٿا انهي سبق عيوض آئون وقت سان جهيڙڻ به سکي رهيو آهيان ۽ معاشري اندر انسانيت سان نفرت ڪندڙ يا انسان جو درد تي مهڪڻ  واري انساني روپ ۾ بگهڙن جي نشاندهي ڪندي سندن سان وڙهڻ به سکي رهيو آهيان وري به شڪر آهي رب ڪائنات جو جنهن پنهنجي ٻاجهه سان اسان جا خيال روشن بڻايا آهن جن جي مدد سان بگهڙن جي باهوڙن توڙي چالاڪين سان منهن ڏئي رهيو آهيان نه ته ڪٿي هو گهڻائي سان گڏ چالاڪ توڙي طاقتور ۽ ڪٿي آئون انساني ٻاجهه کان وانجهيل جنهن جي زندگي خانه بدوش جي ان ڦاٿل خيمي جيان آهي جيڪو نه ته ٽٽل دل کي سبي ۽ پسيل نيڻن کي اگهي سگهندو آهي نه ئي اندر جي ڦٽن جي دوا روح جي اڪيلائي کي ختم ڪري سگهندو آهي،

اڄ مان بيمار ننڍڙي عمر وارو ٽن معصوم ٻچڙن جو پيءُ پنهنجا والد وارا فرض نڀائڻ جي ڪوشش ته ڪري رهيو آهيان پر بيروزگاري سبب تهمتن جي هن وطن منجهه موت جي منحوسي پاڇي پلجندڙ زندگي جو دفاع نه ٿو ڪري سگهان ايترو ئي نه بلڪه هن اگهاڙي تلوار جهڙي زماني جي بي رحم وارتائن سان جنگ جوٽيندي بهارن توڙي احساس جي بحالي خاطر وقت جي بر رحم حالتن سان وڙهي به رهيو آهيان ان ويڙهه سبب ڪمزور بڻجندو پيو وڃان مون ته سوچيو هو قدرت پاران عطا ڪيل هن قلمي ڏات ذريعي ٻين جا درد پنن تي اوتيندي ملڪ اندر بي ساخين تي بيٺل ايوانن تائين پهچائيندي سندن حقن جي حاصلات لاءِ جنگ لڙي کين حق ڏياري سرهو ٿيندس ۽ اها جنگ وزن، وت آهر لڙيم به سهي، ان جنگ ڪجهه ڏنو ڪجهه کسيو به پر جڏهن ٻين جي دردن بدران اڄ منهنجي درد جي ڳالهه اچي منهن ڪڍيو ته پوءِ سڀ قلم ڌڻين جا قلم مڏا بڻجي ويا ۽ درمان ڪندڙ ڪردار توڙي ادارا چپ جو روضو رکي ڪنارا ڪشي بڻجي ويا آهن جنهن سبب منهنجي من جي مٽي تي قائم جذبن جي خوبصورت ديس جي مينار ڊهي پَٽ بڻجي ويا هن ۽ احساس جي اڏولپ اجڙندي زندگي جي رفتار ۾ رڪاوٽون کڙيون ڪري ڇڏيون آهن انهن وڪاوٽن سبب آئون پنهنجي وجود جي خمير ۾ ارڏو ماڻهو بلڪل وکري چڪو آهيان ۽ انهن وکريل حالتن ۾ پراوا ته اڳي ئي پراوا هئا پر پنهنجا به اوپرا بڻجي ويا آهن جن جي ڪري آئون موجوده حالتن ۾ سگبازين سان منهن ڏيندي وقت جي بي ترس وهڪري م غوطا کائي رهيو آهيان ان ۾ منهنجو يا منهنجي ڪردار جو ڪوبه ڏوهه ناهي تاريخ جي سوين ڪتابن جو سٽون گواهي ڏين پيون ته بيٺي جو سڀ ڪو يار آ ڪري جو ناهي ڪوئي هڪڙو احساس مونکي واسينگ جيان ونگ وجهي کلائي به ٿو ته روئاري به ٿو انهي احساس جا ٻه حصا آهن هڪ آهي ته آئون اهل هوندي نه ته ابي امان جي خدمت ڪري سگهيس مٿان اچي بيماري منهن ڪڍيو ۽ اها بلا اچي مهمان بڻي، انهي ڳالهه تي ڏاڍو ڏکارو ٿو رها ته ٻيو پاسو يا حصو آهي ته رب ڪائنات توڙي جيجل امان گواهه آهن ته منهنجي من اندر خدمت ڪرڻ وارو جذبو اڄ به جوان ۽ نيت به نيڪ رهي آهي پر تقدير جنهن جو انساني زندگين اندر وڏو عمل دخل رهيو آهي ان ساٿ نه ڏيندي مونسان ويساهه گهاتي ڪئي آهي، تقدير واري ڳالهه تي گهڻا دوست مونسان متفق نه به هوندا پر جيڪڏهن اهي پنهنجي زندگي دوران تقدير جي ساٿ تي سوچيندا ته کين اندازو ٿي ويندو، هلون ٿا اصل موضوع طرف ته ان نيڪ جذبي سبب رب ڪائنات اڳيان اڄ به سرخرو آهيان ۽ رهندس انهي احساس ته آئون اندر من ۾ ڏاڍو خوش رهان ٿو. اهڙين هاڪاري توڙي ناڪاري سوچون واري اونٽارن توڙي بيماري سبب اڄ مونکي مهڪ جا ٽهڪ اجائي لڳندا رهن ٿا صبح اجهايل، شامون اداس ۽ راتيون رڻ جهڙيون لڳي رهيون آهن جيڏانهن پيو نهاريان خزان ئي خزان رڃ ۽ سڃ، هوائن توڙي سڄڻن جي آوارگي نظر اچي رهي آهي رت جا رشتا فضول نظر اچي رهيا آهن پوءِ به پنهنجي دل کي ٻين جي دلين تان دستبردار نه ٿو ڪري سگهان ساڳي طرح پاڻ کي ٻين ماڻهن تان مستعفي نه ٿو بڻائي سگهان، ڇو جو پنهنجي وجود کي سمجهڻ جي ڀيٽ ۾ انهن ڳالهين يا عملن کي گناهه ٿو سمجهان، وجود جي باري ۾ هڪ استاد جا چيل جملا اڄ به منهنجي ڪنن ۾ پڙاڏا ڪري رهيا آهن ته رب ڪائنات جيئن انساني وجود اندر اکين، ڪنن، هٿن توڙي پيرن کي برابر رکندي هڪ جيترو شرف بخشيو آهي ساڳي ئي طرح دنيا جي گولي تي سڀني انسانن کي به جيئڻ جو حق برابر ئي عطا ڪيو آهي ۽ پنهنجي بارگاهه ۾ به سندن کي ساڳي نگاهه سان ڏسندو رهي ٿو ننڍڙو مثال ٿا وٺون ته جيئن مسجد اندر امير توڙي غريب، فقير توڙي بادشاهه سڀ هڪ ئي صف ۾ بيهندا آهن تيئن ئي حشر جي ڏينهن سڀ دربار الاهي ۾ هڪ قد سان برابر بيهاريا ويندا سو ڳالهه پئي ڪئي سين انساني وجود جي، ٿورو سوچون جيڪڏهن انسان جي هڪ اک ٻي اک جو ساٿ نه ڏي ته اهو پوري طرح ماحول جو نظارو ڪري سگهندو مطلب ته انڌو ڪاڻو ليکيو ويندو ساڳي طرح جيڪڏهن ڪن ڪن جو ساٿ نه ڏي ته پوءِ ماڻهو ٻڌي سگهندو، هٿ هٿ جو سان نه ڏي ته هي دنيا جا هيڏا سارا ڪم ڪري سگهندو، مان سمجهان ٿو جيڪڏهن پير پير جو ساٿ نه ڏي ته دنيا جو مشڪل سفر ته ڇڏيو پر انسان هڪ قدم وڌيڪ نه هڻي سگهندو ۽ اهو معذور ليکيو ويندو ٿورو سوچيو رب ڪائنات انسان جي وات اندر ڏندن جي ٻٽيهن جي صورت ۾ اهڙيون ته تکيون ڪاتيون عطا ڪيون آهن جيڪڏهن اهي ٻٽيهون هڪٻئي جو ساٿ نه ڏيندي گهٽ وڌ ورڪ ڪن ته شايد وچ ۾ بيٺل چم جي ڪچڙي زبان کي وڍي وجهن، سو انهي انسان کي پنهنجي وجود کي سمجهڻ جي سخت ضرورت آهي جيڪڏهن اڄ جو هي مغرور ماڻهو پنهنجي وجود کي سمجهي پوي ته مان سمجهان ٿو دنيا اندر نه ته نفرت رهي نه ئي قدرت، انهي استاد پاران انساني وجود بابت چيل جملن مان مون سبق پرائيندي ٻئي ڪنهن سان گڏ پنهنجي اڱڻ کٽي اداس نه ٿو ڏسي سگهان ۽ آئيندي ۾ اڃا به ليئڙا اٿم ته ضرور ڪي باذوق آڱريون خلقيون ويون هونديون جيڪي منهنجي ڦوهه جواني تي رحم کائيندي مون مٿان شفقت وارا ڦيرا کائينديون ته جيئن آئون بيماري واري حالت مان ڪَرِوَٽِ بدليندين جواني سان ڀاڪر پائيندس ان سان گڏ ابي امان سان گڏ وني توڙي معصوم ٻچڙن جي خدمت ڪرڻ سان گڏ ادب جي ميدان تي پنهنجي قلم جي خوشبو سان نيون تخليقون ارپيندي ادبي ميدان کي انهي خوشبو سان هڳائيندس.

 

 

 

پئسي جو مزو ئي پنهن جو آهي!: شفيق شاڪر

ٻهراڙيء جو هڪ همراه ميلو گھمڻ ويو،هي ماڻهو هو تمام سادو ۽ ميلي ۾ هئي رش گھڻي سو ان ڌڪ ڌڪان ۾ همراه جو پٽڪو ڪري پيو،پويان ئي ڪو ڳنڍيڇوڙ هن جي ڪڍ هو سو جيئن ئي پٽڪو ڪريو،ڳنڍيڇوڙ اهو کڻندي اهڙو ته سو تي ڪانٽو رکيو جو همراه پٽيندي ۽ رڙيون ڪندي ئي رهجي ويو.هونئن به ميلي ۾ گھمندڙ ٻين هيترن سارن شوقينن مان ڪنهن وٽ ايترو اجايو وقت  ڪٿي هو جو ان پوڙهي جي پراڻي پٽڪي جي پويان پنهن جو پيٽرول ۽ وقت ٻئي خرچ ڪن.بهرحال همراه پنهن جي منهن ڀڻڪندو ۽ ڳنڍيڇوڙن کي عجيب ۽ غريب گارين جا پرپٺ مفت ناشتا ڪرائيندو ڳوٺ پهتو.سندس مٽ مائٽ به وٽانئس ميلي جون خبرون وٺڻ لاء اچي گڏ ٿيا.هڪڙي پوڙهي دوست کانئس پڇيو ” ڏي خبر ڀائو! ميلي ۾ ڪو مزو هو؟“ همراه ته اڳيئي سڙيو ويٺو هو سو چوڻ لڳو ؛  ” ڌوڙ تنهن جي منهن تي ۽ ڇاهي ميلي جي مزي تي! جيڪر مون کي اڳواٽ اها خبر هجي ها ته اهو ميلو مچايو ئي ويو هو منهن جو پٽڪو چورائڻ لاء ته آئون ڀلجي به ان ميلي ۾ نه وڃان ها! هڪڙو ته نڀاڳن منهن جو پٽڪو ڪيرايو ٻيو ظلم اهو ته پٽڪو پاڻ سان گڏ کڻي به ويا،صرف پٽڪو ڪرڻ جو مون کي ايترو درد نه ٿئي ها جيترو درد پٽڪو چوري ٿيڻ تي ٿيو آهي،“

سو ميان صاحب جو به اهو ئي خيال آهي ته هي پاناما پيپرز وارو ميلو سندس ئي پٽڪو چورائڻ لاء مچايو ويو آهي، جنهن ميلي ۾ هر طرف ڳنڍيڇوڙ سندس سياسي پٽڪي جي پويان لڳل آهن،اهڙن ڳنڍيڇوڙن کي هو جديد ڊڪشنريء موجب  ادب واري زبان ۾ ”دهشتگرد “سڏي رهيو آهي.جيڪر ڪنهن سندس تقرير يا پٽڪارو نه ٻڌو هجي ته سڪون سان اهو وڊيو وري ڏسي وٺي ته هو پاناما ليڪس واري معاملي تي هاء گھوڙا ڪندڙن کي انهيء ئي ”باعزت “لقب سان سڏيو آهي ۽ ٻي ڪا سندن شان ۾ ”گستاخي“ ڪرڻ کان پنهن جو پاڻ کي زوريء روڪيو آهي.انهن سيٺين ۽ واپارين جي سياست،دوستي،دشمني،رويا ۽ ريتون رسمون ٻي عام مخلوق کان بلڪل الڳ هونديون آهن.اهي سياست ۽ حڪمرانيء جي فن ۾ به رڳو ڪلڪيوليٽر استعمال ڪندا آهن.انهن جي سموري دلچسپيء جو محور صرف ” جنس“ ۽ ”خريدار“ هوندا آهن.جنس ڪيتري ۾ وٺڻي آهي ۽ ڪيتري ۾ وڪڻڻي آهي.اهو ئي سبب آهي جو پاڪستان جي سياست تي جيئن ئي واپارين جو قبضو ٿيو آهي ته انهن جي چوڌاريء متل محفل ۾ ڊپلوميٽس ۽ انٽيڪچوئلس جي بدران صرف سيلز مينيجر ۽ سيلز مين،بروڪر،ايجنٽ ۽ خريدار ئي نظر آيا آهن.پئسي جي هڪ پنهن جي دنيا ، پنهن جي نفسيات ، پنهن جو نشو ۽ پنهن جو مزو ٿئي ٿي،انهيء کي پئسي کان سڃو سمجھي ئي نٿو سگھي. پر اها به حقيقت آهي ته اهي ان سموري پئسي هئڻ باوجود پنهن جو پاڻ کي دنيا جا غير محفوظ ترين ماڻهو سمجھندا آهن،انهيء ڪري جيڪر انهن جي نفسياتي ڪيفيت باقائدي ڪنهن ماهر ڊاڪٽر کان چڪاس ڪرائي وڃي ته سوال ئي نٿو پيدا ٿئي جو اها عام ماڻهن جي نفسيات جيان نارمل هجي. خاص طور تي وهم،گمان،انديشا،شڪ ۽ شبها انهن جي ثانوي فطرت بڻجي وڃي ٿي.دولت جي ان بيدردر دنيا ۾ اعتماد،احساس ۽ رشتن جهڙيون شيون به بلڪل بي تعلق بڻيل هونديون آهن.ايستائين جو هڪ ڀاء ٻئي ڀاء مان سازشن جو سواد محسوس ڪندو آهي  ۽ پيء کي پٽ مان بغاوت جي بوء اچڻ لڳندي آهي.اهو صرف ڪو ٺلهو خيال نه پر تاريخ اهڙين عجيب حرڪتن سان ڀري پيئي آهي. بهرحال، ڳالھ پئي ٿي پاناما پيپرس واري متل ميلي جي ته اهي بوتل مان نڪتل ان جن کان پاڻ نه پيا ڊڄن پر سندن پئسو ڊڄي ٿو. پئسو جنهن جي لاء هنن پنهن جون سڀ محنتون ۽ ڪاوشون لڳايون،سڀ اصول ۽ اقدار پوئتي ڌڪيا،ڪيترن سان دشمنون کنيون،ڪيترن جون بددعائون برداشت ڪيون،خواريون ۽ تنقيدون سٺيون جيڪر اهو پئسو واپس هٿن مان هليو ويو ته پورو جيون ئي اونداهون نه ٿيندو ته ٻيو ڇا ٿيندو!خزاني تي جڏهن ڪو نانگ پنهن جي فطرت هٿان مجبور ٿي ڦڻ کولي ويندو آهي ته هن جي ادراڪ ۾ اها ڳالھ اصل نه ويهي سگھندي آهي ته ڪو خزاني جي ان تلاش ۾ مون تي بي خبريء ۾ وار ڪري سگھي ٿو پر جيئن ته هن کي پنهن جي نه پر صرف خزاني جي ڳڻتي هوندي آهي ان ڪري هو ويٺو رهندو آهي.

جڏهن حڪومتون ڪاروباري ڪمپنين ۾ بدلجي وڃن ته پوء حڪمرانن  جي زبردست محلن تي لٽڪيل سياسي بورڊن جي ڪا اهميت نٿي رهي،سندن محلن ۾ قدم رکندڙ سياسي ڪارڪن نه پر اهي ئي گراهڪ،خريدار،ايجنٽ ۽ بروڪر ئي هوندا آهن.سندن ۾محفلن ۾ عوام جي دردن ۽ سورن جو ذڪر هو ڇو ڪندا جو اهي ڄاڻن ٿا انهن سمورن صدمن،محرومين ۽ المين جا ذميدار ڪي انهن محلن کان ٻاهر نه پرمحلن جي اندر ئي موجود آهن.اهي اندر ئي اندر خدا جي عام خلق کان گھڻو خوفزده رهن ٿا جو سندن پنهن جن ڪارن ڪرتوتن جو خوف کين تمام وڏي سيڪيورٽي ۽ پروٽوڪول سواء محلن کان ٻاهر قدم رکڻ نٿو ڏئي.هڪ واپاريء جي ٽپڙ گول ڪرڻ جو مطالبو به عوام لاء ڪنهن به فائدي جو نه آهي.هتي ته واپاري برادريء جي پوري قطار لڳي پيئي آهي جن جي سوچ،روين،نفسيات ۽ پاليسين ۾ آخر ڪيئن ڪو فرق ٿي سگھي ٿو جو پئسي جي پنهن جي نفسيات،پنهن جو نشو،پنهن جي دنيا ۽ پنهن جو مزو آهي.بس قوم کي انتظار ڪرڻ گھرجي ان خوشنصيب گھڙيء جو جڏهن عوامي عهدن جي ڪرسين تي واپاري نه پر  سچ پچ سياستدان ويهڻ جي قابل ٿي وڃن!

 

 

ايپڪس ڪميٽي سنڌ جا فيصلا….

ايپڪس ڪميٽيءَ گهڻي غور ۽ فڪر ۽ ڳالهين کانپوءِ ان ڳالهه تي زور ڀريو آهي ته ڪراچي ۾ امن جي بحاليءَ کي يقيني بڻائڻو آهي جنهن لاءِ سنڌ پوليس کي وڌيڪ مضبوط بڻائڻ جو فيصلو ڪيو ويو آهي. اهو فيصلو خميس ڏينهن سنڌ جي وڏي وزير سيد قائم علي شاهه جي صدارت هيٺ وزيرعليٰ هائوس ۾ منعقد ٿيل ايپڪس ڪميٽيءَ جي اجلاس ۾ ڪيو ويو. اجلاس ۾ سنڌ جي گورنر ڊاڪٽر عشرت العباد، صوبائي وزيرن، ڪورڪمانڊر ڪراچي ليفٽيننٽ جنرل نويد مختيار، وقتي چيف سيڪريٽري رضوان ميمڻ، ڊي جي رينجرز سنڌ ميجر جنرل بلال اڪبر، وڏي وزير جو پرنسپل سيڪريٽري علم الدين بلو، آءِ جي سنڌ پوليس اي ڊي خواجه ۽ ٻين شرڪت ڪئي. ڊي جي رينجرز ميجر جنرل بلال اڪبر ۽ آءِ جي سنڌ پوليس اي ڊي خواجه پنهنجي پنهنجي فورسز جي ڪارڪردگي بابت پريزينٽيشن ڏني ۽ مختلف مامرن ۽ پيش ايندڙ چيلنجرز تي روشني وڌي. ايپڪس ڪميٽي انهن مامرن ۽ چيلنجرز کي منهن ڏيڻ لاءِ نئين حڪمت عملي وضع ڪئي. اجلاس کي ٻڌايو ويو ته ٽارگيٽ ڪلنگ، ڀنگ لاءِ اغوا ڪرڻ ۽ ڀتاخوري وارن ڪيسن ۾ نمايان گهٽتائي آئي آهي. پريزنٽيشن ۾ انگ اکر ٻڌائيندي چيو ويو ته دهشتگردي ۽ ٽارگيٽ ڪلنگ جي ڪيسن ۾ 80 سيڪڙو گهٽتائي ٿئي آهي، سن 2013ع ۾ هر مهيني 80 کان 100 ٽارگيٽيڊ ڪلنگ جا واقعا ٿيندا هئا پر هاڻي ڪڏهن ڪو وارقعو پيش ايندو آهي، اهڙي طرح ڀتي خوريءَ جي ڪيسن ۾ 85 سيڪڙو تائين گهٽتائي ٿئي آهي. 2013ع ۾ 1774 اغوا جا ڪيس رپورٽ ٿيا هئا جڏهن ته 2016ع ۾ پهرين پنجن مهيننن واري عرصي ۾ 13 ڪيس رجسٽرڊ ٿيا آهن. اجلاس کي ٻڌايو ويو ته جڏهن پنجاب ۾ ڇوٽو گينگ خلاف آپريشن ٿي رهيو هو ته ان وقت سنڌ رينجرز سنڌ-پنجاب ۽ سنڌ-بلوچستان سرحدن تي سخت چيڪنگ جي شروعات ڪئي وئي هئي ۽ سنڌو درياهه سان گڏ چيڪ پوسٽون قائم ڪيون ويون هيون جتان ڏوهارين جي اچڻ جو امڪان هو. ڪراچي شهر ۾ امن جي بحالي سبب جاين جي قيمتن ۾ 23 سيڪڙو تائين اضافو ٿيو آهي، گذريل سال ڪراچي ۾ رمضان المبارڪ جي مهيني دوران مارڪيٽن ۾ خريد و فروخت 70 ارب رپين کان وڌيڪ جي ڪئي وئي ۽ 14 آگسٽ جي موقعي تي قومي جهنڊن جي 5 ارب رپين تائين فروخت ڪيا ويا ۽ صنعت ۽ تجارت کي فروغ حاصل ٿيو. ڪميٽيءَ هلندڙ صورتحال تي پنهنجي تسلي جو اظهار ڪندي شهر ۾ قيام امن کي يقيني بڻائڻ لاءِ نئين حڪمت عملي وضع ڪرڻ جو به فيصلو ڪيو ويو جنهن لاءِ سنڌ جي وڏي وزير سيد قائم علي شاهه ويهه هزار پوليس اهلڪارن بشمول ڪراچي ۾ اٺ هزار ڀرتي ڪرڻ جي منظوري ڏني. ڪورڪمانڊر ڪراچي نويد مختيار نئين فورس کي پاڪستان آرمي کان تربيت لاءِ سمورن ضروري انتظامن کي يقيني بڻائڻ جي خاطري ڪرائي،  سنڌ جي وڏي وزير ڪميٽيءَ کي ٻڌايو ته 10 نيون اي ٽي سي ڪورٽون جو قيام آخري مرحلي ۾ آهي. اسان سينٽرل جيل ڪراچي ۾ 6 اي ٽي سي ڪورٽون قائم ڪري رهيا آهيون جنهن لاءِ انهن جون عمارتون جون 2016ع تائين مڪمل ٿي وينديون ۽ اهي پهرين جولاءِ 2016 کان ڪم شروع ڪنديون. سنڌ هاءِ ڪورٽ ان لاءِ پنهنجي قانوني ٽيم فراهم ڪرڻ جو يقين ڏياريو آهي ۽ انهن ڏهن اي ٽي سي ڪورٽن ۾ ججن کي مقرر ڪيو ويندو.200 پراسيڪيوٽرز کي مقرر ڪرڻ جي پڻ منظوري ڏني آهي.