تازيون خبرون

Daily Archives: May 14, 2016

پاناما ليڪس معاملو: سپريم ڪورٽ جوڊيشل ڪميشن ٺاهڻ کان جواب ڏئي ڇڏيو

اسلام آباد (اين اين آءِ) سپريم ڪورٽ جي چيف جسٽس مسٽر جسٽس انور ظهير جمالي، پانامه ليڪس واري معاملي تي عدالتي ڪميشن بنائڻ کان معذوري طاهر ڪئي آهي چيف جسٽس چيو ته جيستائين مناسب قانونسازي نٿي ٿئي ۽ جاچ لاءِ تمام ماڻهن ۽ خاندانن گروپن ۽ ڪمپنين جا تفصيل فراهم نٿا ڪيا وڃن سپريم ڪورٽ ان معاملي تي ڪميشن نٿي جوڙي سگهي حڪومت طرفان پاناماه ليڪس واري معاملي جي جاچ لاءِ لکيل خط جي جواب ۾ رجسٽرار سپريم ڪورٽ طرفان قانون واري وزارت کي لکيل خط ۾ چيو ويو آهي ته محدود دائري سبب جيڪا ڪميشن جوڙي ويندي اها هڪ بي اختيار ڪميشن هوندي ۽ اها بدنامي حاصل ڪرڻ کان سواءِ مفيد ڪم نه ڪري سگهندي. خط ۾ چيو ويو آهي ته ڪميشن جي قيام جي حوالي سان حڪومت خط سان گڏ نوٽيفڪيشن ۾ جيڪي ٽرمز آف ريفرنس بيان ڪيا ويا آهن اهي انتهائي وسيع آهن ۽ بظاهر ڪميشن کي پنهنجي ڪارروائي مڪمل ڪرڻ ۾ ڪيترائي سال لڳي سگهن ٿا. ان جي لاءِ ڪميشن جي قيام جي حوالي سان ڪنهن راءِ ڏيڻ کان اڳ اهو ضروري آهي ته تمام ماڻهن، خاندانن گروپن ۽ ڪمپنين جا مڪمل تفصيل فراهم ڪيا وڃن. جنهن خلاف جاچ ڪرڻي آهي. سپريم ڪورٽ جي جوابي خط موجب جيستائين ڄاڻايل معلومات ۽ تفصيل فراهم نٿا ڪيا وڃن ۽ ڪميشن جي قيام لاءِ مناسب قانونسازي ذريعي مسئلو حل نٿو ڪيو وڃي ان وقت تائين حڪومتي خط تي حتمي ردعمل نٿو ڏيئي سگهجي. ٻئي طرف قانون واري وزارت جي هڪ اهلڪار موجب چيف جسٽس طرفان لکيل خط جي ڪاپي حڪومتي عهديدارن کي ڏياري ويئي آهي واضح رهي ته حڪومت 22 اپريل 2016 تي چيف جسٽس آف پاڪستان جسٽس انور ظهير جمالي کي پانامه ليڪس جي حوالي سان ٽه رڪني ڪميشن بنائڻ لاءِخط لکيو ويو هو جنهن ۾ چيو ويو هو ته پاڪستان ڪميشن اف انڪوائري ايڪٽ 1956 تحت ٽه رڪني ڪميشن جوڙي ان جي سربراهي ترجيحي بنيادن تي چيف جسٽس پاڻ ڪري. حڪومت پاران لکيل خط ۾ چيو ويو هو ته سياسي اثر رسوخ ذريعي قرض معاف ڪرائيندڙن، ڪرپشن، ڪميشن ۽ ڪڪ بيڪ ذريعي پرڏيهي ملڪ فنڊز منتقلي جي حوالي سان معاملن جي جاچ ڪئي وڃي.

 

حڪومت گڏيل ٽي او آر ٺاهڻ لاءِ تيار آهي، اپوزيشن ضد ڇڏي: وفاقي سرڪار

اسلام آباد(بيورو) حڪومت پاناما ليڪس جاچ ڪميشن جا ٽي او آر مخالف ڌر جي مشاورت سان ٺاهڻ جو فيصلو ڪندي چيو آهي ته گڏيل ٽي او آرز تي اڳ به راضي هئاسين. سُڌ سماءُ بابت وفاقي وزير پرويز رشيد پريس ڪانفرنس ڪندي چيو ته مخالف ڌر سپريم ڪورٽ جي تقدس جو خيال رکي. سپريم ڪورٽ جو جوابي خط ڪنهنجي هار يا ڪاميابي ناهي، پاناما ليڪس جي جاچ لاءِ ڪميشن جوڙڻ قانوني مسئلو آهي، مخالف ڌر ان کي سياسي نه بڻائي مخالف ڌر هميشه ڳالهيون ڦيرائيندي رهي ٿي. پرويز رشيد جو چوڻ هو ته حڪومت مخالف ڌر سان گڏيل ٽي او آرز تي ڳالهين لاءِ اڳ به تيار هئي. ڪميشن ٺهي ويندو ۽ اسين سرخرو ٿينداسين.  مخالف ڌر کي ضد ڇڏڻو پوندو ۽ اعتماد جوڳي حل تي اتفاق ڪرڻو پوندو. هن چيو ته  اسان جا قانوني ماهر سپريم ڪورٽ جي خط جو جائزو وٺي رهيا آهن. اسين صاف 7 شفاف احتساب چاهيون ٿا. رٿابندي واري وزير احسن اقبال جو چوڻ هو ته مخالف ڌر سپريم ڪورٽ کي سياست ۾ گهلڻ چاهي ٿي. سپريم ڪورٽ صحيح چيو آهي ته ٽي او آر شخصي، ذاتي يا انتقامي نه ٿيڻ گھرجن. هن چيو ته مخالف ڌر پاناما جي لباس ۾ سياسي ايجنڊا پوري ڪرڻ چاهي ٿي. وزير اعظم جا سمورا اثاثا ظاهر آهن، ڪنهن کي اعتراض آهي ته چيلنج ڪري سگھي ٿو.

 

حڪومت کي گڏيل ٽي او آر ٺاهڻ جي آڇ،  چيف جسٽس جو خط ڪنهن جي شڪست يا سوڀ ناهي: اپوزيشن

ڪراچي(اسٽاف رپورٽر) مخالف ڌر اڳواڻ سيد خورشيد شاهه حڪومت کي گڏيل ٽي او آر ٺاهڻ جي آڇ ڪندي چيو آهي ته پاناما ليڪس تي چيف جسٽس جو خط ڪنهن جي شڪست يا سوڀ ناهي. مسئلي جو گڏيل حل ڪڍڻو پوندو، جمهوريت ڊي ريل ٿيڻ نه ڏينداسين. ڪراچي ۾ پريس ڪانفرنس ڪندي سيد خورشيد شاهه چيو ته پاناما ليڪس معاملي تي وزير اعظم کي تمام آسان رستو ڏنو. هاڻي گڏ ويهي مسئلي جو حل ڪڍڻو پوندو. اسان جو مطالبو هو ته پارليامينٽ ۾ پهرين قانون سازي ٿئي پوءِ ڪميشن جوڙي وڃي. حڪومت کي چيو ته پارليامينٽ ۾ ڳالهيون ڪيون وڃن. خورشيد شاهه چيو ته چيف جسٽيس جو جواب ڪنهنجي ڪاميابي يا ناڪامي ناهي. سپريم ڪورٽ چيو ته حڪومتي ٽي او آر قبولڻ جوڳا ناهن. جيڪا ڳالهه مخالف ڌر ڪئي اها ئي سپريم ڪورٽ ڪئي آهي. هن چيو ته پاناما ليڪس دنيا ۾ طوفان آڻي ڇڏيو آهي، ٻن ملڪن جي وزيراعظمن کي استعيفا ڏيڻي پئي. اسان جي ڪوشش آهي ته جمهوريت کي ڊي ريل ٿيڻ نه ڏنو وڃي. وزير اعظم پاناما ليڪس تي پاليسي بيان ڏي ۽ اهو سڌي ريت نشر ڪيو وڃي.

 

پاڪ چين لاڳاپا گڏيل مفادن ۽ اصولن تي ٻڌل آهن: وزيراعظم نواز شريف

اسلام آباد (اين اين آءِ) وزيراعظم نواز شريف چيو آهي ته پاڪ چين لاڳاپا گڏيل مفادن ۽ اصولن تي ٻڌل آهن، ٻنهي ملڪن جا لاڳاپا ڊگهار ۽ تاريخي آهن، مستقبل ۾ ٻنهي ملڪن جي وچ ۾سهڪار وڌيڪ مضبوط ٿيندو، جڏهن ته چين چائنا پاڪستان، اڪانامڪ ڪوري ڊور پراجيڪٽ تي هلندڙ ڪم واري رفتار تي اطمينان جو اظهار ڪيو آهي، گذريل ڏينهن پي ايم هائوس ۾ چين جي هڪ وفد سان ملاقات دوران خيالن جي ڏي وٺ ڪندي وزيراعظم چيو ته دفاعي پيداوار جي شعبي ۾ ٻطرفي سهڪار ۽ دفاعي ٽيڪنالاجي جي سهڪار پاڪستان ۽ چين اسٽيٽ ايڊمنسٽريشن سائنس اينڊ ٽيڪنالاجي اينڊ انڊسٽري فار نيشنل ڊفينس وچ ۾ ٻطرفي سهڪار تي اطمينان جو اظهار ڪيو ويو آهي، وزيراعظم چيو ته مستقبل ۾ مختلف شعبن ۾ سهڪار جي امڪان سان گڏ اهو سهڪار وڌيڪ مستحڪم ٿيندو، هن چيو ته چين طرفان مڪمل تجويزن کانپوءِ چائنا ايرو اسپيس اينڊ انڊسٽري ڪارپوريشن طرفان پاڪستان ۾ ايئر ڊفينس سسٽم جي شموليت واري فيصلي کي حتمي شڪل ڏني ويندي، وزيراعظم دفاعي وزارت ۽ چين ايرو اسپيس سائنس اينڊ انڊسٽري ڪاپوريشن جي وچ ۾ گڏيل دلچسپي وارن ٻين شعبن ۾ سهڪار کي موجوده گڏيل مڪينيزم تي به اطمينان جو اظهار ڪيو، وزيراعظم چيو ته سرڪاري ۽ پاپولر سطح تي ٻنهي ملڪن جي وچ ۾ ويجهڙا ۽ خوشگوار لاڳاپا مثال آهن، وزيراعظم چيو ته چائنا پاڪستان اڪانامڪ ڪوريڊور ٻنهي ملڪن وچ ۾ گهري دوستي جو ثبوت آهي، هن چيو ته هي واحد پروجيڪٽ سڄي خطي جي عوام جي زندگين ۾ تبديلي آڻڻ جي صلاحيت رکي ٿو جنهن لاءِ حڪومت ۽ پاڪستان جو عوام چين قيادت ۽ ان جي عوام جو ٿورائتو آهي.

 

آرمي چيف سان افغان سفير جي ملاقات، طور خم بارڊر تي معمول جي ٽريفڪ بحال ڪرڻ تي اتفاق

راولپنڊي  (اين اين آءِ) آرمي چيف جنرل راحيل شريف سان افغان سفير عمر زاخيل وال ملاقات ڪئي، ملاقات ۾ طور خم بارڊر تي معمول جي ٽريفڪ بحال ڪرڻ تي اتفاق ڪيو ويو، آءِ ايس پي آر مطابق آرمي چيف سان ملاقات دوران ٻطرفن لاڳاپن ۽ خاص طور تي بارڊر مئنيجمينٽ وارن معاملن تي خيالن جي ڏي وٺ ڪئي وئي، جڏهن ته طور خم بارڊر تي معمول واري ٽريفڪ بحال ڪرڻ تي اتفاق ڪيو ويو، ملاقات ۾ ٻنهي طرفن کان دهشتگردي جو مقابلو ڪرڻ ۽ خطي ۾ پائيدار امن جي قيام لاءِ ڪوششون جاري رکڻ جو به عزم ڪيو ويو.

 

مخالف ڌر سياست نه ڪري ته پاناما ليڪس مسئلو حل ٿي سگھي ٿو: خواجه آصف

اسلام آباد(بيورو) بچاءُ بابت وفاقي وزير خواجه آصف چيو آهي ته سپريم ڪورٽ جو جواب اڻ ڌريو آهي، مخالف ڌر سياست نه ڪري. پنهنجي ٽوئيٽ اڪائونٽ تي ڇڏيل هڪ پيغام م وفاقي وزير خواجه آصف جو چوڻ هو ته مخالف ڌر پهريان ايف آءِ اي کان جاچ جو مطالبو ڪيو، پوءِ وري نيب جي لاءِ چيو ويو، پارلياماني ڪميٽي جو به چيو ويو. هن چيو ته اپوزيشن پنهنجي موقف تان ڦري وئي آهي.  وفاقي وزير خواجه آصف وڌيڪ چيو ته سپريم ڪورٽ جو جواب اڻ ڌريو آهي، مخالف ڌر سياست نه ڪري ته پاناما ليڪس جي جاچ جو مسئلو حل ٿي سگھي ٿو.

 

فضل الرحمان جو آصف زرداري کي فون، وزير اعظم جو پيغام پهچايو، پاناما ليڪس تي به ڳالهيون

اسلام آباد(بيورو) جميعت علماءِ اسلام جي سربراهه مولانا فضل الرحمان پ پ جي شريڪ چيئرمين آصف علي زرداري سان فون تي رابطو ڪري کيس وزير اعظم نواز شريف جو پيغام ڏنو. ميڊيا رپورٽن موجب وزير اعظم جي هدايت تي جي يو آءِ سربراهه فضل الرحمان آصف زرداري سان رابطو ڪيو ان موقعي تي ٻنهي اڳواڻن وچ ۾ پاناما ليڪس معاملي سميت مختلف معاملن تي ڳالهيون ٿيون. ميڊيا رپورٽن موجب مولانا فضل الرحمان سان ڳالهه ٻولهه بعد وزير اعظم نواز شريف جو به آصف علي زرداري سان رابطي جو امڪان آهي.

 

سنڌ ڪابينا شهيد اهلڪارن جي وارثن کي 50 لک رپيا معاوضو، پگهار ۽ پوئنرن کي هڪ نوڪري ڏيڻ جي منظوري ڏئي ڇڏي

ڪراچي(اسٽاف رپورٽر) سنڌ جي صوبائي ڪابينا ڊيوٽي دوران شهيد ٿيندڙ پوليس اهلڪارن جي وارثن کي 50 لک رپيا معاوضو، پگهار ۽ سندس پوئنرن کي هڪ نوڪري ڏيڻ جي منظوري ڏئي ڇڏي آهي، اهو فيصلو وڏي وزير سيد قائم علي شاهه جي صدارت ۾ ٿيندڙ صوبائي ڪابينا جي اجلاس ۾ ڪيو ويو. صوبائي ڪابينا جي اڄ ٿيل اجلاس ۾ پنجن ايجنڊا ايٽمن تي ڳالهه ٻولهه ڪئي وئي، جنهن ۾ ڪڻڪ جي خريداري ۽ ان ۾ واڌ، رمضان پيڪيج، امن مان واري صورتحال ۽ ترقياتي منصوبا شامل هئا. جيستائين ڪڻڪ جي خريداريءَ جو تعلق آهي ته ڪابينا کي ٻڌايو ويو ته خوراڪ کاتي 1.1 ملين ٽن ڪڻڪ خريد ڪرڻ جي ٽارگيٽ بدران 923307 ٽن ڪڻڪ خريد ڪري ورتي آهي. صوبائي خوراڪ کاتي ڪڻڪ جي خريداري 2 لک ٽن وڌائڻ جي سفارش ڪئي پر مارڪيٽ ۾ قيمت وڌيڪ هئڻ ڪري خوارڪ کاتي جي درخواست کي مسترد ڪيو ويو ڇو ته هدف کي وڌائڻ سان آبادگارن کي ڪنهن به قسم جو ڪو فائدو حاصل نه ٿيندو. رمضان پيڪيج تي ڳالهائيندي ڪابينا بينظير انڪم سپورٽ پروگرام تحت 1500 رپيا ڏيڻ جو اعلان ڪيو. واضع رهي ته بي آءِ ايس پي وٽ 20 لک خاندان رجسٽرڊ آهن جن کي حڪومت طرفان 3 ارب رپيا بي آءِ ايس پي ڪارڊ ذريعي فراهم ڪيا ويندا آهن. ان موقعي تي انسپيڪٽر جنرل پوليس صوبي ۾ امن امان واري 2صورتحال تي بريفنگ ڏيندي ٻڌايو ته صوبي ۾ هاڻي ڪوبه ڀنگ وارو ڪيس ظاهر ناهي ٿو، جڏهن ته 2015ع وارن 15 ڪيسن جنهن ۾ شمس الدين، ميجر رٽائيرڊ نوخيز جن کي راشد منهاس روڊ ۽ ڊفينس واري علائقي مان اغوا ڪيو ويو هو، ۽ انهن جي پيرا بلوچستان ڏانهن وڃي رهيا آهن ۽ انهن جي بازيابيءَ لاءِ سنڌ پوليس ڪوششون ڪري رهي آهي. فضيلا سرڪي واري ڪيس جي حوالي سان آءِ جي سنڌ پوليس چيو ته اهو هڪ پراڻو ۽ پيچيدا ڪيس آهي جنهن ڇوڪريءَ کي بازياب ڪرايو آهي ان جو ڊي اين اي ٽيسٽ ٿي رهيو آهي ته جيئن پڪ ٿئي ته اها فضيلا آهي يا نه. سنڌ جي وڏي وزير سيد قائم علي شاهه ڪابينا جي منظوريءَ سان پوليس اهلڪارن جيڪي پنهنجو فرض نڀائڻ دوران شهيد ٿيندا آهن انهن جي وارثن لاءِ مالي معاوضو 2 ملين رپين مان وڌائي 5 ملين رپيا ڪرڻ جو فيصلو ڪيو آهي. سنڌ جي وڏي وزير ايپڪس ڪميٽيءَ ۾ ڪيل فيصلن تي ڪابينا کي اعتماد ۾ ورتو. ڪابينا آءِ جي سنڌ پوليس کي ويهه هزار پوليس اهلڪارن کي فوري طور تي ڀرتي ڪرڻ جي اجازت ڏني. پوليس ڊپارٽمينٽ وٽ رڳو 8000 پوليس اهلڪارن کي تربيت ڏيڻ جي گنجائش آهي انڪري ڪورڪمانڊر ڪراچي ليفٽيننٽ جنرل نويد مختيار انهن کي پاڪستان آرمي کان تربيت ڏيارڻ جي ذميواري ورتي. ڪابينا رينجرز ۽ پوليس جو صوبي خاص طور تي ڪراچي شهر ۾ امن امان قائم ڪرڻ تي انهن جي ڪاوشن جي واکاڻ ڪئي. ڪابينا پوليس کاتي کي سي پي اي سي پروجيڪٽس لاءِ سيڪيورٽي فورس وڌائڻ لاءِ به اجازت ڏني. ڪابينا ۾ بجيٽ تجويزن تي به غور ڪيو ويو جن کي جدا اجلاس ۾ حتمي شڪل ڏني ويندي.صوبائي ناڻي ۽ منصوبا بندي واري وزير سيد مراد علي شاهه ۽ ايڊيشنل چيف سيڪريٽري محمد وسيم ڪابينا کي ٻڌايو ته هلندڙ مالي سان جي آخر تائين 129 بلين رپين جي لاڳت 400 اسڪيمون مڪمل ڪيون وينديون. اجلاس کي ٻڌايو ويو ته اليڪشن ڪميشن آف پاڪستان (اي سي پي) طرفان نيون اسڪيمن جي شروعات تي پابندي لڳائي وئي آهي جنڪري نئين اسڪيمن لاءِ رکيل 16 بلين رپيا استعمال ناهن ڪيا ويا.

 

بلا فرق احتساب چاهيون ٿا، حڪومت کي اپوزيشن جا ٽي او آرز مڃڻا پوندا: بلاول ڀٽو زرداري

اسلام آباد (اين اين آءِ) پ پ چيئرمين بلاول ڀٽو زرداري پنهنجي ٽوئيٽر پيغام ۾ چيو آهي ته سپريم ڪورٽ پاران حڪومتي ٽي او آرز کي رد ڪيو آهي جنهن سان حڪومت کي هڪ وڌيڪ ڌچڪو لڳو آهي، ٽوئيٽ ۾ لکيو آهي ته هاڻ لڪڻ لاءِ حڪومت وٽ ڪا به جڳهه نه بچي آهي ۽ هاڻ وفاقي حڪومت کي اپوزيشن سان گڏ ويهي نوان ٽي اور آرز بڻائڻ لاءِ ڊرافٽ تيار ڪرڻو پوندو، حڪومت کي اپوزيشن جا ٽي او آرز مڃڻا پوندا، هن چيو ته بنا ڪنهن فرق جي احتساب جي شروعات وزيراعظم کان ٿيڻ گهرجي.

 

سي سي پي او وسيم احمد غفار ذڪري کي رستي تان هٽائڻ جو حڪم ڏنو: عذير بلوچ جا جي جي آءِ ٽي ۾ سنسني خيز انڪشاف

ڪراچي (اين اين آءِ) عذير بلوچ جي جي آءِ ٽي ۾ سنڌ پوليس بابت سنسني خيز انڪشاف ٿيا آهن. رپورٽ موجب 2010 ۾ سي سي پي او ڪراچي وسيم احمد فون ڪري فاروق اعواڻ جي گهر اچڻ لاءِ چيو سي سي پي او ميٽنگ دوران ٻڌايو ته غفار ذڪري ۽ ان سان ساٿي لياري ۾ دهشتگردي پکيڙي رهيا آهن رپورٽ ۾ انڪشاف ڪيو ويو آهي ته سي سي پي او وسيم احمد غفار ذڪري کي رستي تان هٽائڻ جو حڪم ڏنو. غفار ذڪري کي قتل ڪرڻ لاءِ عذير بلوچ ايس ايڇ او ڪلري ۽ بغدادي کي پنهنجي مرضي سان لڳائڻ جو مطالبو ڪيو جوابدار ايس ايڇ او يوسف بلوچ جي سفارش تي اقبال ڀٽي کي ايس پي لياري لڳرايو. عذير بلوچ اڳوڻو گهرو وزير ذوالفقار مرزا کي سفارش ڪري ايس ايڇ او ڪلري بغدادي ۽ سپر مارڪيٽ مقرر ڪرايا ايس ايڇ اوز ۾ انسپيڪٽر امتياز نيازي، بابر حميد، ثناءُالله ملڪ ايوب عابد تنولي جاويد بلوچ، ۽ چاند خان نيازي شامل آهن. 2009 ۾ قادر پٽيل محمد رئيسي کي عذير بلوچ جي سفارش تي لياري جو ايڊمنسٽريٽر مقرر ڪرايو. عذير بلوچ محمد رئيسي کان هر مهيني ٻه لک رپيا مهينو ڀتو وصول ڪندو هو انڪشاف جي باوجود اڳوڻي سي سي پي او وسيم احمد ۽ ايس ايس پي فاروق اعواڻ خلاف ڪابه ڪارروائي عمل ۾ نه آندي ويندي آهي.