تازيون خبرون

Daily Archives: May 6, 2016

فلم انڊسٽري ۾ سٺا دوست ملڻ مشڪل آهن: شرڌا شرما

ممبئي (شوبز نيوز) اداڪاره شرڌا شرما چيو آهي ته ممبئي فلم انڊسٽري ۾ سٺا دوست ملڻ انتهائي مشڪل آهن ڪيترائي ڀيرا مون محسوس ڪيو ته مان اڪيلي آهيان ۽ پنهنجو پاڻ کي اندران اندران ٽٽل محسو ڪيان ٿي هن چيو ته سٺا دوست هميشه ساٿ ڏيندا آهن نفسيات جي ماهر ڊاڪٽر هريش سيٺي جو خيال آهي ته ايواڊ تقريب کان وڌيڪ ضروري اهي ته فنڪارن ۽ ٽِي وي فنڪارن کي تنظيم ۽ نوجوانن فنڪارن لاءِ ڪائونسلنگ سينٽر شروع ڪرڻ گهرجن. ننڍن شهرن کان وڏا خواب کڻي ايندڙ نوجوان پنهنجو نالو ٺاهڻ کان پوءِ عدم تحفظ محسوس ڪن ٿا. سندس چوڻ هو ته ڊپريشن هڪ عام نفسياتي مسئلو بڻجي چڪو آهي پر هرهڪ جي تڪليف مختلف هوندي آهي.

 

ڪرن جوهر جي فلم ۾ ڪترينا ڪيف بدران جيڪولين فرنينڊس ڪاسٽ

ممبئي (شوبز نيوز) بالي ووڊ اداڪاره ڪترينا ڪيف جي ڪرن جوهر جي فلم ۾ ڪم ڪرڻ کان انڪار کان پوءِ جيڪولين فرنينڊس کي چونڊيو ويو، ڀارتي سڌ سماءَ وارن ذريعن موجب ڪرن جوهر هڪ فلم لاءِ ڪترينا ڪيف سان ڳالهايو هو، پر ڪترينا مصروف شيڊول سبب ان ۾ ڪم ڪرڻ کان انڪار ڪري ڇڏيو هو، ان کان پوءِ فلمسازن جيڪولين فرنينڊس کي چونڊيو آهي، شوشانت سنگهه راجپوت ۽ جيڪولين فلم سائن ڪري ورتي آهي.

 

سفارشي ڪلچر ڪرڪيٽ سميت قومي راندين کي تباهه ڪري ڇڏيو آهي: عبدالقادر

لاهور (اسپورٽس نيوز) اڳوڻي ٽيسٽ ڪريڪٽر عبدالقادر چيو آهي ته سفارشي ڪلچر ڪرڪيٽ سميت قومي راندين جي بنيادي ڍانچي کي تباهه ڪري ڇڏيو آهي، پي سي بي ۾ وڏن عهدن تي سفارش تي ڀرتي ٿين ٿا، عمر اڪمل سان جيڪو ڪجهه ٿيو آهي اهو ان جي حرڪتن جو نتيجو آهي، شاهد آفريدي هاڻي پوڙهو ٿي  چڪو آهي، ڪرڪيٽ ان جي وس ۾ نه رهي آهي. هن چيو ته ويون رچرڊز سٺو ڪوچ ثابت ٿي سگهي ٿو، اهڙن خيالن جو اظهار هن گذريل ڏينهن منهاج يونيورسٽي لاهور جي احتمام هيٺ راندين جي سالياني مقابلي جي پڄاڻي واري تقريب کي خطاب ڪندي ڪيو. اڳوڻي ٽيسٽ ڪرڪيٽر عبدالقادر چيو ته ڪرڪيٽ بورڊ کي تباهه ڪرڻ ۾ ڪابه ڪسر نه ڇڏي وئي آهي، پي سي بي ۾ وڏن عهدن تي مقرر عملدار سفارش تي ڀرتي ڪيا وڃن ٿا. هن چيو ته ڪوچنگ لاءِ مقامي رانديگر هئڻ گهرجي غير ملڪي ڪوچز جي ڪنهن ٻئي ملڪ ۾ ڪوچ بڻجڻ تي پابندي لڳائڻ وارو قانون پاس ڪيو وڃي. هن چيو ته غير ملڪي ڪوچ گهراڻو آهي ته پوءِ ويسٽ انڊيز جي عظيم رانديگر ويون رچرڊ کي گهرايو وڃي، جيڪو قومي ٽيم جي ڪوچنگ جون ذميواريون نڀائڻ لاءِ راضي آهي.

 

وقار يونس، شرارتي ۽ شعيب اختر ڪوڙ ڳالهائڻ جو ماهر هو: وسيم اڪرم

نئين دهلي (اسپورٽس نيوز) قومي ڪرڪيٽ جي اڳوڻي ڪپتان وسيم اڪرم چيو آهي ته وقار يونس شرارتي جڏهن ته شعيب اختر ڪوڙ ڳالهائڻ ۾ ماهر هو جڏهن ته انضمام الحق چيڙائڻ تي مئچ ڏسندڙ هڪ نوجوان کي مارڪٽ ڪئي. هڪ انٽرويو ۾ وسيم اڪرم ٻڌايو ته وقار يونس جڏهن نئون نئون ٽيم ۾ آيو ته وڏو شرارتي هو. جڏهن ته ان وقت اسان جو ڪوچ 75 ورهين جو ڊآڪٽر اسلم هو. ان وقت عمران خان وقار کي چيو ته تون وڏو شرارتي آهين، ڊاڪٽر صاحب جو روم ميٽ ٿيندي ته اتي موجود ڊاڪٽر چيو ته وقار تي نظر رکو ۽ ان حامي ڀري هن چيو ته وقار يونس ڊاڪٽر اسلم جي واچ 4 ڪلاڪ پوئتي ڪري ڇڏي ۽ کيس خبر به نه پئي جڏهن هو رات جو 2 وڳي آيو ته ڊاڪٽر پڇيو ته توهان جلد اچي ويا آهيون وسيم اڪرم چيو ته شعيب اختر ڪوڙ ڳالهائڻ جو ماهر هو ڪولڪته ٽيسٽ ۾ جنهن هوٽل ۾ اسان ترسيل هئاسين اتي نائٽ ڪلب به هو مون ان کي چيو ته نائٽ ڪلب نه وڃجي ان تي هن جواب ڏنو ته اوهان ڪهڙيون ڳالهيون ڪري رهيا آهيو مان پاڳل نه آهيان جو ٽيسٽ ميچ دوران ايئن ڪيان. جنهن بعد رات جو 12 وڳي جڏهن مان اتي ويس ته ڏٺم ته شعيب قميص لاهي ڊانس ڪري رهيو هو مون ان کي ڪن کان ورتو ۽ ڪمري ۾ ڇڏيس.

 

ڇا حالتون 90ع واري سياست ڏانهن پيون وڃن؟ long way!

پاڪستان جي سياست هر وقت ڪنهن نه ڪنهن باب کي کوليندي رهندي آهي. اسان سڀني لاءِ اها ڪا نئين ڳالهه ڪانهي؛ جيڪو ڪجهه پاناماليڪس جي حوالي سان ٿئي پيو ۽ جنهن انداز سان حڪومت ڌمڪي آميز لهجي ۾ جواب ڏيندي، ’مين نا مانون‘ جي پاليسي اختيار ڪندي سياسي ويڙهه جي شروعات پئي ڪري.

ان مان ظاهر پيو ٿئي ته حڪومت پاڻ کي ڪٿي رکڻ چاهي ٿي؟ ان حوالي سان اسان اڄ جي ڪالم ۾ ڪجهه پاسن تي ڳالهه ٻولهه ڪنداس. پاناما ليڪس ۽ سياست، مخالف ڌر ۽ حڪومت جا ٽي او آرز، حڪومت جو رويو ۽ حڪومت جي ’مين نا مانون‘ پاليسي ڪٿي سياست کي بيهاريندي؟

پاناما ليڪس ۽ سياست:

پاناما ليڪس جي حوالي سان، مان اڳ ئي لکي چڪي آهيان ته هن ڀيري پاناما ليڪس ملڪ جي ڪنهن سياسي پارٽي يا اسٽبلشمينٽ جو لکيل اسڪرپٽ ناهي، جو ان کي اهو چئي پاسيرو ڪيون ته حڪومت کي نقصان پهچائڻ جي سازش آهي. اهڙو ڪجهه به ناهي پر جيڪو ڪجهه پاناما ليڪس ۾ پڌرو ڪيو ويو آهي، ان ۾ صرف پاڪستان ئي ناهي پر يورپي ملڪ به شامل آهن. جن جا به ٽيڪس بچائڻ خاطر آف شور اڪائونٽس يا ڪمپنيون آهن انهن کي پڌرو ڪيو.

پاڪستان ۾ سوال پيو پيدا ٿئي ته مسلم ليگ ن حڪومت ۾ جڏهن به آئي هر وقت ڪرپشن جي خلاف مرلي وڄائي ۽ شهيد محترمه بينظير ڀٽو جي حڪومت کي ختم ڪرڻ ۾ نواز شريف جي سياست آن دي رڪارڊ آهي.

ڀل موجوده پيپلز پارٽي نواز شريف کي ان جو ماضي ياد نه ڏياري پر عوام ڪيئن ٿو وساري سگهي؟ نواز شريف صرف شهيد محترمه بينظير ڀٽو جي خلاف ئي نه پر يوسف رضا گيلاني خلاف به عدالت ۾ ويو.

هي سڀ ڪجهه لکڻ جو مقصد ته مسلم ليگ (ن) کي ماضي جي سياست جي تصوير ڏيکارڻي آهي، جيڪي پاڻ کي مظلوم پيش ڪن پيا. پاناما ليڪس ۾ نالا وزيراعظم نواز شريف جي خاندان جا آيا آهن ۽ خاندان کي اڻسڌو يا سڌي طرح نواز شريف تحفظ ڏيڻ جي پوري ڪوشش ڪئي، جنهن جو ثبوت سندس قوم کي خطاب آهي.

اهو سمجهڻ ته پاناماليڪس تي مخالف ڌر خاموش ويهي رهندي ۽ اهو به وري عمران خان آسانيءَ سان چپ رهندو، ممڪن ناهي. پاناما پيپرز يورپي ملڪن ۾ ئي ٿرٿلو مچائي ڇڏيو آهي ته پوءِ هيءُ سماج ڪيئن اڻڄاڻ رهي سگهي ٿو.

پاناما ليڪس تي مخالف ڌر کي سياست ڪرڻ لاءِ مجبور خود نواز شريف ۽ ان جي پارٽي ڪيو آهي. مسلم ليگ (ن) پهرين ڏينهن تي ڪميشن جوڙي ڇڏي ها يا مخالف ڌر کي اعتماد ۾ وٺي معاملي کي حل ڪرڻ جي ڪوشش ڪري ها ته اهڙو ڪجهه به ناهي ڪيو… ان جي ابتڙ نواز شريف پنهنجا ئي گيت ڳائي، پيپلز پارٽي کي ٽارگيٽ ڪيو. ايترو ئي نه پر مشرف تي به ڳالهائي ڏنو، جنهن کي پاڻ ئي ٻاهر موڪلي ڇڏيو ۽ ان جي باوجود به پنهنجي سياست کي اصولن جي بنياد تي چوندو رهيو، جيتوڻيڪ مشرف کي ڪوڙي ميڊيڪل رپورٽ تي ٻاهر موڪليو ويو.

نواز شريف پاڻ ئي هر محاذ کوليو آهي. جڏهن ته مخالف ڌر جي ٽي او آرز کي رد ڪري، انهن کي اسٽريٽ سياست ڪرڻ جو پڻ ڀرپور موقعو فراهم ڪيو پيو وڃي. اهو سمجهڻ انتهائي ضروري آهي ته مخالف ڌر ۽ حڪومت جا ٽي او آرز ڪهڙا آهن؟ پاناما ليڪس ۾ وزيراعظم نواز شريف جي خاندان جو نالو آيل آهي ۽ ان ۾ نواز شريف ائين نه ٿو ڪري سگهي ته ان جي مرضي سان سڀ ڪجهه ڪيو وڃي. ان ۾ مخالف ڌر ۽ سپريم ڪورٽ کي اختيار ملڻ گهرجي ته اهي تجويز ڪن ته انڪوائري ڪيئن ٿيڻ گهرجي؟

مخالف ڌر جا ٽي او آرز (هي هڪ اخبار ۾ اڳ ئي رپورٽ ٿي چڪا آهن. ان جا ڪجهه نقطا پيش ڪجن ٿا):

*وزيراعظم ۽ ان جي خاندان کي پنهنجي مٿان لڳل الزام غلط ثابت ڪرڻا پوندا،

* وزيراعظم ۽ سندس خاندان پاڻ کي ڪميشن آڏو پيش ڪري.

* نواز شريف 1985 کان وٺي 2016 تائين ملڪيت جا تفصيل فراهم ڪري،

*وزيراعظم ۽ ان جي خاندان جي ڪمائي جو ذريعو  ڇا هو، ڪهڙن بينڪ اڪائونٽز ۾ رقم رکي وئي، ڇا ان رقم تي ٽيڪس ادا نه ڪرڻو هو؟

* ڇا ان ڪمائيءَ تي ٽيڪس ادا نه ڪرڻو هو؟

*ٻاهرين ملڪ ۾ خريد ڪيل جائيداد ڪهڙن بينڪ اڪائونٽ ۽ ڪهڙي تاريخ تي ادا ڪئي وئي؟

* ڪميشن کي آف شورز اڪائونٽس ۾ موڪليل رقم جا تفصيل ٻڌايا وڃن،

* ڇا وزيراعظم ۽ سندس خاندان وارا ڊسمبر 2000 کان پوءِ اسٽيٽ گيسٽ هئا؟

* خصوصي ڪميشن عالمي فرانزڪ آڊٽ جي لاءِ عالمي ماهرن جي مدد ۾ حاصل ڪري سگهي ٿو،

* ماهرن جي ڪميٽي آف شورز ڪمپنين جي رقم جي مڪمل جاچ پڙتال ڪندي.

*نيب ۽ ايف آئي اي سميت سڀئي ادارا ڪميشن جي مدد جا پابند هوندا.

حڪومت طرفان ٽي او آرز:

* ڪميشن پاڪستاني شهرين، پاڪستاني غير ملڪين ۽ ادارن سان پاناما لڪيس ۽ ملڪ ۾ آف شور ڪمپنين متعلق تحقيق ڪري سگهندي،

* ڪميشن کي موجوده يا وري اڳوڻي عوامي عهدن تي موجود فردن جي به تحقيق جو اختيار هوندو، جن سياسي اثر استعمال ڪندي پنهنجا ۽ پنهنجي خاندان جا قرض معاف ڪرايا يا وري ڪرپشن، ڪميشن يا ڪڪ بيڪس جي ذريعي ڪمايل رقم ملڪ کان ٻاهر موڪلي.

* انڪوائري ان ڳالهه جي جاچ ڪندي ته پاناما ليڪس جي الزامن مطابق پاڪستان جي ڪنهن قانون جي خلاف ورزي ٿي يا نه؟

اسان مخالف ڌر ۽ حڪومت طرفان جاري ڪيل ڪجهه ٽي او آرز جا نقطا پڙهيا. مسلم ليگ ن ڪهڙي بنياد تي مخالف ڌر جي ٽي او آرز کي رد ڪري ٿي؟

جيڪڏهن ڪميشن وزيراعظم جي جاچ پهرين نه ڪري ته پوءِ ڪنهن جي ڪندي؟ وزيراعظم نواز شريف ٻه ڀيرا قوم کي خطاب ڪيو، جنهن مان ثابت ڪيو ته پاناما پيپرز ڪي مذاق ناهن.

مخالف ڌر جو اهو موقف ته پهريان وزيراعظم جي جاچ ٿيڻ گهرجي؛ ظاهر آ جيڪو ملڪ جو سربراهه هجي ۽ ان تي الزام لڳن ته پوءِ پهرين سربراهه يا سرمائيدار جي جاچ ڪئي ويندي؟

مسلم ليگ ن جو چوڻ ته وزيراعظم کي نشانو بڻايو ويو آهي. ظاهر آ پاناما ليڪس ۾ وزيراعظم ۽ ان جي خاندان جا نالا آيا آهن، ان کي پهرين نه رکبو ته ڪنهن کي رکڻ گهرجي.

حڪومتي ڌر جي ٽي او آرز تي نظر وجهڻ سان معلوم ٿيندو ته اهي سڌي طرح پي ٽي آءِ جي خلاف ۽ پيپلز پارٽي کي نشانو بڻائڻ آهي. ان کان وڌيڪ دلچسپ ڳالهه ڇا چئبي ته وزيراعظم جو چوڻ، ان پهرين پاڻ کي احتساب لاءِ پيش ڪيو آهي پر ٽي او آرز  ۾ پاناما ليڪس جي جاچ کي آخر ۾ رکيو ويو.

يقينن جن جن قرض معاف ڪرايا، انهن سڀني جي جاچ ٿيڻ گهرجي پر هن وقت اهم مسئلو پاناما پيپرز آهن، جن کي پهرين ترجيح ڏيندي ملڪ جي سربراهه جي جاچ ٿيڻ گهرجي. حڪومت جو انڪار ظاهر ڪري پيو ته حڪومت پاناما ليڪس تي جاچ نه پر سياست ڪرڻ پئي چاهي.

حڪومت جو رويو ۽ مين نامانو پاليسي:

وزيراعظم نواز شريف ۽ ان جي پارٽي سياست ۾ جهڙي ٻولي استعمال ڪئي آهي، ان مان واضح پيغام ملي ٿو ته اهي پاناما ليڪس جي جاچ تي ڪيترا سنجيده آهن.

وزيراعظم نواز شريف شاهي انداز سان قوم کي پاناما پيپرز تي خطاب ڪيو پر قومي اسيمبلي ۾ ڪنهن به شيءِ جي ڪا وضاحت ۽ خطاب نه ڪيو، جيڪو مسلم ليگ (ن) جي سياسي رويي کي ظاهر ڪري رهيو آهي.

جڏهن وزيراعظم نواز شريف پاڻ ۽ خاندان کي قوم آڏو پيش ڪري ڇڏيو آهي ۽ ان جو چوڻ ته پاناما ليڪس ۾ آيل نالا صرف الزام ۽ ملڪيت سڀ قانوني آهن، مخالف ڌر جي ڪميشن کان فرار ٿيڻ کي ڇا سمجهجي؟

مسلم ليگ (ن) جي سربراهه نواز شريف کي مخالف ڌر جي ٽي او آرز کي قبول ڪرڻ گهربو هو، نه ڪي ان تي سياست ڪندي جلسن ۾ ڌمڪي آميز ٻولي استعمال ڪرڻ گهربي هئي. جڏهن ملڪ جي وزيراعظم جو رويو اهڙو هوندو ته ٻيا خاڪ جاچ ۾ تعاون ڪندا.

پاڻ کي وزيراعظم نواز شريف قوم آڏو ڌمڪي آميز رويي سان پيش ڪري پيو ته جيڪو ڪجهه جاچ ڪندو، انهن جي مرضي سان باقي جيڪڏهن مخالف ڌر ڪجهه پيش ڪيو ته اهو قبول ناهي، پوءِ وزيراعظم نواز شريف اهو به ٻڌائي ڇڏي ته مخالف ڌر جي اهميت ڪا به ناهي.

ملڪ جي وزيراعظم جا نالا عالمي رپورٽ ۾ آيا آهن ان ڪري لازم ٿئي ٿو، پهرين سربراهه پاڻ کي جاچ لاءِ پيش ڪري ۽ پوءِ ٻيا پيش ٿين.

جيڪڏهن حڪومت جي ئي مرضي سان سڀ ڪجهه جاچ ۾ پيش ڪرڻو آهي ته پوءِ جاچ ڪرڻ جي ضرورت ڪهڙي؟

ان ۾ ڪو شڪ ناهي ته نواز شريف لاءِ اسٽبلشمينٽ جو رويو انتهائي نرم ۽ سپريم ڪورٽ جا سوموٽوز ناهن، جيئن اڳوڻي حڪومت جي دور ۾ سوموٽوز جي برسات هئي. هاڻي اهو ثابت پيو ٿئي ته پردي پٺيان جيڪو هڪ ٻيو معاهدو مشرف ۽ نواز شريف ۾ ڪرايو ويو ته مشرف کي ٻاهر موڪليو ۽ توهان پنهنجي حڪومت جو مُدو پورو ڪيو. ڇا اهو درست هو؟ جيڪڏهن ائين ناهي ته پوءِ عسڪري قوتن پاران پنهنجن آفيسرن خلاف قدم کڻڻ بعد خاموشي ڇو ٿي وئي آهي. اها خاموشي ڪيترائي سوال اُٿاري رهي آهي!

حڪومت جو انداز جيئن هجڻ گهرجي اهو بلڪل ناهي، پر ان جي ابتڙ وزيراعظم نواز شريف جو لهجو غير سياسي ۽ ويڙهه وارو نظر پيو اچي. مخالف ڌر جا ٽي او آرز رد ڪرڻ مان واضح آهي ته نواز شريف پاناما ليڪس تي جاچ بدران سياسي ويڙهه کي اختيار ڪري معاملي کي دٻائڻ جي ڪوشش آهي. پاناماليڪس ۾ برطانيا جي وزيراعظم جي نالو آيو ان پنهنجا پورا ٽيڪس، ظاهر ڪيا ۽ پارليامينٽ ۾ پاڻ کي پيش ڪندي هر هڪ الزام جو جواب ڏنو.

ڇا هُن، وزيراعظم نواز شريف جيان غير سياسي ٻولي اختيار ڪئي ۽ مخالف ڌر جي مطالبن کي رد ڪيو؟ هن اهڙو ڪجهه به نه ڪيو پر پاڻ کي پيش ڪري سڀ ڪجهه واضح ڪري ڇڏيو.

جيڪڏهن حڪومت ’مين نا مانون‘ واري پاليسي اختيار ڪئي ۽ مخالف ڌر کي اسٽريٽ پاور استعمال ڪرڻ تي مجبور ڪري پاڻ کي مظلوم پيش ڪيو ته ان مان واضح ٿيندو ته مسلم ليگ (ن) پنهنجو پاڻ کي سياسي ويڙهه ۾ وجهڻ چاهي ٿي.

۽ عالمي سطح تي به پيغام وڃي پيو ته پاڪستان جو سربراهه نواز شريف ڪميشن آڏو پيش ٿيڻ بجاءِ پنهنجي مرضيءَ سان ڪميشن جوڙڻ جي موڊ ۾ آهي، جيڪو جمهوري نه پر غير جمهوري عمل ثابت ٿيندو.

ان ڪري مسلم ليگ (ن) پنهنجي حڪومت کي ڌڪ پاڻ پئي هڻي، مخالف ڌر جي ٽي او آرز ۾ ڪا نئين ڳالهه ڪانهي، ان کي رد ڪرڻ غير جمهوري عمل آهي.

پاناما ليڪس تي حڪومت کي ’مين نا مانون‘ جي پاليسي ختم ڪري، جمهوري عمل کي وڌڻ ڏنو وڃي ۽ جمهوري عمل اهو ئي آهي ته جيستائين جاچ ٿئي، وزيراعظم نواز شريف کي ڪجهه وقت لاءِ پاڻ کي غير جانبدار ٿي وڃڻ گهرجي پر نواز شريف جهڙي ٻولي استعمال ڪئي آهي، ان مان ثابت ٿي ويو ته هو پاناماپيپرز تي جانبدار آهي ۽ اهڙي ماحول ۾ سياسي ويڙهه ئي جنم وٺندي. جاچ ٿيندي مشڪل نظر پئي اچي ۽ ان جو بنياد خود مسلم ليگ (ن) وجهي رهي آهي.

هڪ ڀيرو ٻيهر 90 ڏهاڪي جي سياست جو باب وزيراعظم نواز شريف شروع ڪيو آهي، شايد اڄ به ماضي جو نواز شريف، موجوده نواز شريف تي حاوي آهي.  مسلم ليگ (ن) کي نوي ڏهاڪي جي سياست جي باب کي کولڻ نه پر بند ڪرڻ گهرجي.

 

 

ٿر جي صورتحال

سينيٽ ڪاميٽي چيو آهي ته ٿر ۾ ٻار بک ۽ دوا نه ملڻ سبب مري رهيا آهن. سنڌ حڪومت جي نمائندن ٿر ۾ ٻارڙن جي موت جو سبب ننڍي عمر جي شادي ۽ جهالت ڄاڻايو آهي. سندن چوڻ آهي ته ننڍي عمر ۾ شاديءَ سبب ٻار وقت کان اڳ پيدا ٿين ٿا. سنڌ سرڪار جي نمائندن سينيٽ ڪاميٽي کي اِهو پڻ ٻُڌايو ته ٿرپارڪر ۾ 4 ارب 10 ڪروڙ رپين جي ڪڻڪ ورهائي وئي آهي. 13 لک آبادي ۾ ڪڻڪ جو في ڪس تناسب اڍائي مڻ ٿئي ٿو. جڏهن ته پاڻي فراهمي لاءِ 5 ارب ڏنا ويا آهن. اُن کان علاوه ٿرپارڪر ۾ 300 ڊاڪٽر مقرر ڪرڻ سان گڏوگڏ ڪميونٽي ويلفيئر جون سهولتون بهتر بڻائڻ لاءِ وڌيڪ فنڊ فراهم ڪيا پيا وڃن.گذريل ڪيتري ئي وقت کان ٿر ۾ ڏُڪار واري حالت جون خبرون اينديون رهن ٿيون، جڏهن ته معصوم ٻارڙن جي موت جون پڻ رپورٽون هڪ تسلسل سان هلنديون رهن ٿيون، پر سرڪار آهي سا پهريان ته اِهو مڃڻ لاءِ تيار ئي نه هئي ته ڪو سنڌ ۾ ڏُڪار جهڙي صورتحال به آهي يا اُتي معصوم ٻارڙا پنهنجي مائرن جون جهوليون خالي ڪري ابدي ننڊ وڃي سُمهن ٿا. سنڌ سرڪار انهيءَ مامري کي ميڊيا جو ڊرامو قرار ڏيڻ جي ڀرپور ڪوشش ڪئي ۽ چيو ته اهڙي ڪا به صورتحال ناهي، پر جڏهن سندن ئي جوڙيل ڪميٽين رپورٽون ڏنيون ته مجبورن کين معصوم ٻارڙن جي موت بابت مڃڻو ته پيو پر هُنن اُنهيءَ جا جيڪي ڪارڻ ٻُڌايا، سي انساني قدرن جا ليڪا لتاڙڻ برابر هُئا. ايستائين جو ڀرئي ايوان ۾ سنڌ جي وڏي وزير چرچي واري انداز ۾ چئي ڏنو هو ته اصل ۾ ڳالهه هيءَ آهي ته ٿر جون عورتون ڊاڪٽرياڻين ڏانهن وڃڻ بجاءِ دائين وٽ وڃن ٿيون، جيڪي ٻارن کي ڇڪي ڪڍن ٿيون ۽ اِئين اُهي مريو وڃن! وڏي وزير جو اِهو دليل اُنهن لکين مائرن جي توهين مثل هو، جن کي صحت جون سهوليتون مهيا ڪري ڏيڻ سرڪار جي ذميواري هُئي، سو ته ٺهيو، ويتر پنهنجي ئي عوام مٿان چٿرون ڪرڻ واري ڳالهه مان چڱيءَ پر اندازو لڳائي سگهجي ٿو ته موجوده حڪمران پنهنجي عوام ڏانهن ڪيتري قدر ذميوار آهن يا اُنهن حڪمرانن جي نظر ۾ عام ماڻهوءَ جي زندگيءَ جي ڪيتري قيمت آهي؟ باقي ٻين جُٺين جيان سنڌ جي عوام وڏي وزير جي اِها ڳالهه به وساري ڇڏي. هاڻ هڪ ڀيرو ٻيهر سنڌ جي نمائندن انساني حقن بابت سينيٽ ڪاميٽي آڏو ٿر ۾ مرندڙ ٻارڙن جي موت جو ڪارڻ ننڍي ڄمار ۾ شاديون ۽ جهالت کي قرار ڏنو آهي. ايترو ئي نه پر اُهي بريفنگ دوران اِهو به ٻُڌائين ٿا ته موجوده سرڪار ٿر ۾ اربين رپيا خرچ ڪري ماڻهن کي مفت ڪڻڪ فراهم ڪئي آهي، جڏهن ته ايتري ئي رقم هنن صاف پاڻيءَ جي فراهميءَ تي به خرچ ڪئي آهي. جيڪڏهن سندن ڳالهه کي تسليم به ڪري وٺجي، ته پوءِ سوال اِهو ٿو پيدا ٿئي ته سنڌ سرڪار جي هيڏين سارين ڪوششن باوجود به ٿر اندر موت جي راڪاس کي آخر ماٺ ڇو نٿي اچي؟ جيڪڏهن ماڻهن کي صاف پاڻيءَ جي فراهميءَ لاءِ اربين رپيا خرچ ڪيا ويا آهن ته اُن جو آخر رهواسين کي فائدو ڇونه پهچي رهيو آهي؟ ڪٿي اِئين ته ناهي ته اِهي سڀ اُپاءَ ڪاغذن جي حد تائين ٿيا آهن ۽ اُنهن جو حقيقت سان پري پري تائين ڪو واسطو ناهي. جيڪڏهن اِئين ناهي ته پوءِ ٿر جي عوام جي زندگين ۾ سرڪار جي ورتل اُپائن جا اثر ضرور ڏسڻ ۾ اچڻ گهرجن ها. ٿر مان اِهي به رپورٽون اينديون رهن ٿيون ته صاف پاڻيءَ جي فراهميءَ لاءِ جيڪي پلانٽ لڳايا ويا آهن، اُنهن مان ڪيترائي غير فعال آهن، اُن کان علاوه ٿر جي اسپتالن جي حالت به ڪا بهتر ناهي، نه ته اُتي دوائن جي پورائي تي ڌيان ڏنو ٿو وڃي نه ئي وري عملي تي.

 

رجني ڪانت سان گڏ ڪم ڪري بهترين فني تجربو مليو:راڌيڪا اپتي

ممبئي (شوبز نيوز) بالي ووڊ اداڪاره راڌيڪا اپتي سپر اسٽار رجني ڪانت سان گڏ ڪم ڪرڻ کي بهترين فني تجربو قرار ڏنو آهي، ڀارتي ميڊيا مطابق راڌيڪا اپتي اڄ ڪلهه تامل فلم ”ڪبالي“ ۾ رجني ڪانت سان گڏ ڪم ڪري رهي آهي، هن چيو ته رجني ڪانت سان گڏ ڪم ڪرڻ جو تجربو بهترين هو ۽ يقني طور منهنجي زندگي ۽ ڪيريئرجي بهترين تجربن مان هڪ آهي، هن چوي ته ان دوران گهڻو ڪجهه سکيو آهي، هو هڪ بهترين استاد آهي، فلم جي شوٽنگ ملائيشيا ۾ پوري ٿي چڪي آهي ۽ ڊپنگ جو ڪم هلي رهيو آهي.

 

ماڌوري جي ناچ، اداڪاري ۽ سونهن سندس عاشق بڻائي ڇڏيو آهي:مندانا ڪريمي

ممبئي(شوبز نيوز)  بالي ووڊ اداڪارا ۽ ڊانسر مندانا ڪريمي چيو آهي ته هوءَ ماڌري ڊڪشت جي ناچ واري مهارت، اداڪاري ۽ سونهن کان تمام گهڻي متاثر آهي، فلم ”بي پازيٽو“ لاءِ آئٽم نمبر جي شوٽنگ دوران ڳالهائيندي مندانا چيو ته ماڌوري ڊڪشت منهنجو آئيڊيل آهي،مان عشق جي حد تائين کانئس متاثر آهيان، بگ باس 9 ۾ حصو وٺندڙ مندانا ڪريمي پهريون ڀيرو آئٽم نمبر ڪري رهي آهي، ان لاءِ سندس چوڻ آهي ته هي پهريون ڀيرو آهي جو مان ڪنهن فلم لاءِ گانو ڪري رهي آهيان،مونکي پاڻ به ان گاني جي شوٽنگ دوران پنهنجي ڊانس ڏسي حيرت ٿي، ڇو ته مان اهو ئي سمجهندي هيس ته مان سٺي ناچڻي ناهيان پر ڪوريوگرافرجي محنت مونکي ڊانس ڪرڻ جا گر سيکاريا، مندانا ان کان پهرين فلم رائي، مين اور چارلس،ڀاگ جوني ۽ ڪيا ڪول هين هم 3 ۾ مختصر ڪردار ڪري چڪي آهي، هڪ سوال جي جواب ۾ مندانا چيو ته هن وقت فلمن ۾ ڪابه اداڪارا اڪيلي سر ڪم نه ٿي ڪري، جنهن جو مثال اڙتا پنجاب آهي، جنهن ۾ ڪرينا سان گڏ عاليا ڀٽ به ڪم ڪري پئي، تنهن ڪري ڪير به اهو نه ٿو چئي سگهي ته مان فلم ۾ اڪيلي هيروئن هجان، مندانا چيو ته مان اهڙين فلمن ۾ ڪم ڪندي رهنديس، جن جي ڪهاڻي ۽ پلاٽ مونکي وڻي.

 

آءِ پي ايل 9 ۾ سلو اوور ريٽ سبب ويرات ڪوهلي تي 24 لک رپيا ڏنڊ لاڳو

نئين دهلي(اسپورٽس نيوز)  رائل چئلينجرز بنگلور جي ڪپتان ۽ اسٽار بيٽسمين ويرات ڪوهلي تي هلندڙ انڊين پريميئر ليگ (آءِ پي ايل) جي نائين ايڊيشن “ ڪولڪته نائيٽ رائيڊرز خلاف ميچ ۾ سلو اوور ريٽ سبب 24 لک رپيا ڏنڊ لاڳو ڪيو ويو. آءِ پي ايل جي گورننگ ڪائونسل طرفان جاري بيان مطابق بنگلور جي ٽيم ڪولته خلاف ميچ ۾  مقرر وقت ۾ اوور ختم ڪرائڻ ۾ ناڪام رهي جنهن سبب ٽيم جي ڪپتان ڪوهلي تي 24 لک رپيا جڏهن ته ٽيم جي ٻين رانديگرن تي  6، 6 لک رپيا ڏنڊ لاڳو ڪيو ويو آهي. ڪوهلي کي هلندڙ ايڊيشن دوران ٻيو ڀيرو سلو اوور ريٽ سبب ڏنڊ پيو آهي، جيڪڏهن ٽيون ڀيرو سلو اوور ريٽ ٿيو ته ڪوهلي کي هڪ ميچ جي پابندي درپيش ٿي سگهي ٿي.

 

 

پاڪستان نيوزيلينڊ ۾ کٽڻ جو موقعو وڃايو: اظهر علي

لاهور (اسپورٽس نيوز) قومي ڪرڪيٽ ٽيم جي ون ڊي ڪپتان اظهر علي چيو آهي ته پاڪستان نيوزيلينڊ ۾ کٽڻ جو موقعو وڃايو، انگلينڊ کي هارائڻ آسان ناهي، خابرو ادارن موجب ميڊيا سان ڳالهائيندي اظهر علي جو چوڻ هو ته نئين سليڪشن ڪميشن ۽ ڪوچ سان ٽيم جي ڪارڪردگي بهتر ٿيندي، انگلينڊ کي هارائڻ آسان نه هوندو، بهترين ڪارڪردگي جو مظاهرو ڪرڻو پوندو.