تازيون خبرون

Monthly Archives: April 2016

ڪين وليمسن نيوزيلينڊ جي ٽيسٽ ٽيم جو ڪپتان مقرر

ويلنگٽن (اسپورٽس نيوز) نيوزيلينڊ ڪرڪيٽ ڪين وليمسن کي باقاعده طور تي ٽيسٽ ٽيم جو ڪپتان مقرر ڪيو آهي، اهڙي طرح هو نيوزيلينڊ ڪرڪيٽ جي تاريخ جو 29هون ڪپتان بڻجي ويو آهي، 25 سالن جو  ڀارت ۾ ٿيل ورلڊ ٽي -20 ورلڊ ڪپ ۾ اڳواڻي جا فرض سرانجام ڏئي چڪو آهي، ان کي برينڊن ميڪ ڪولم جي جاءِ تي ٽيسٽ ٽيم جو ڪپتان مقرر ڪيو ويو آهي، ميڪ ڪولم هلندڙ سال فيبروري ۾ ٽيسٽ ڪرڪيٽ تان رٽائرمينٽ جو اعلان ڪيو هو، گذريل ڏينهن نيوزيلينڊ طرفان جاري ڪيل تفصيل مطابق ڪين وليمسن کي ٽنهي فارميٽ لاءِ نيوزيلينڊ جو ڪپتان مقرر ڪيو ويو آهي، وليمسن 48 ٽيسٽ، 93 ون ڊي ۽ 35 ٽي -20 ميچن ۾ نيوزيلينڊ جي نمائندگي ڪري چڪو آهي.

 

ٿر جي ڏڪار بابت ڪميشن رپورٽ ۽ بي رحم ذميوار حڪمران!: جاويد ابڙو

بدقسمتي سان غربت پاڪستان جو سڀ کان وڏو ۽ سنگين مسئلو بڻيل آهي، ڪجهه ڏينهن اڳ غربت جي حوالي سان هڪ رپورٽ جاري ڪئي وئي هئي، جنهن ۾ ڄاڻايو ويو هو ته پاڪستان ۾ تقريبن 6 ڪروڙ ماڻهو غربت جي لڪير کان به هيٺ پنهنجي زندگي گذارڻ تي مجبور آهن، انهن 6 ڪروڙ متاثر ماڻهن ۾ ٿر واسي به يقيني طور تي شامل آهن، ان ۾ به شڪ ناهي ته ڪو غريب ماڻهو پنهنجي ئي ملڪ ۾ فوٽ پاٿن ۽ فلاءِ اوور هيٺان رستن تي زندگي گهاريندي پنهنجي خوشين کي هميشه هميشه لاءِ وساري ڇڏي ٿو ۽ جڏهن سندس نظرون شاندار ۽ بلند عمارتن، مهانگين گاڏين، آسائشن سان ڀريل پارليامينٽ، وزيراعظم هائوس ۽ ايوان صدر تي پون ٿيون ته هن جي دل مان جيڪي آهون ۽ دانهون نڪرن ٿيون، تن کي اهو ئي محسوس ڪري سگهي ٿو، جيڪو هن وانگر ئي غربت واري زندگي گذاريندڙ هجي، ان وقت به هر غريب شخص جي دل رت جا ڳوڙها ڳاڙي ٿي، جڏهن اسان جي ملڪ جا حڪمران پرڏيهي دورن تي روانا ٿين ٿا، جن تي هر سال اربين رپيا خرچ ٿي وڃن ٿا. افسوس سان چوڻو ٿو پوي ته اسان جي دل مان انسانيت مري چڪي آهي، اسان سڀ بيوس ۽ لاچار ٿي چڪا آهيون، ان وقت هر باضمير شخص جو ڪنڌ شرم کان جهڪي وڃي ٿو، جڏهن ڪنهن غريب جا ٻار بک تي گذارو ڪري رهيا هجن ۽ ساڳئي وقت شاندار نموني جوڙايل محلن ۽ فارم هائوسز جا مالڪ پنهنجي  رهائشگاهن ۾ پلجندڙ پالتو جانورن کي روزانو جي بنياد تي قيمتي کاڌا نوش ڪرائيندا هجن، پر ان مان ڪنهن غريب جي هڪ ويلي جي ماني لاءِ انتظام ڪرڻ کي هُو عيب سمجهن ٿا.

سنڌ حڪومت ٿر جي ماروئڙن جي ڏکن ڏاکڙن ۽ تڪليفن کي ڄاڻڻ لاءِ اعليٰ سطح تي جيڪا ڪميشن جوڙي هئي، ان جي سفارشن ۾ تمام وڏن ۽ بنيادي مسئلن جي نشاندهي ڪئي وئي آهي ۽ جيڪڏهن انهن تي سنجيدگي سان عمل ڪيو وڃي ته ٿر جا مسئلا مڪمل طرح شايد ختم ته نه ٿي سگهن، پر اهي ڪنهن حد تائين حل ضرور ٿي سگهن ٿا. چوڻ جو مقصد اهو به ناهي ته سنڌ حڪومت ٿر ۾ ڄاڻي واڻي ڏڪار پيدا ڪيو آهي، پر جيڪڏهن ڪا قدرتي آفت اچي ٿي ته ان کان عوام کي بچائڻ حڪومت جي ئي ذميواري آهي، جيڪي کاتا انساني خدمت لاءِ قائم ڪيا ويا آهن، بدقسمتي سان انهن اهڙو ڪوبه ڪردار ادا ناهي ڪيو، جنهن سان هر نئين سج اڀرندڙ نون مسئلن تي ڪنٽرول ڪري انهن کي حل ڪري سگهجي.

اسان جي ملڪ ۾ اهڙا ٻار به موجود آهن، جيڪي اسڪول نٿا وڃن، پر اهي ڪچري جي ڍيرن تي گند ميڙيندي ضرور ڏسجن ٿا، پاڪستان کي تبديل ڪرڻ جا نعرا ته لڳايا وڃن ٿا، پر آخر اهي نعرا رڳو نعرن تائين ئي ڇو قيد آهن؟ جيڪڏهن اسان کي ملڪ ۾ تبديلي آڻڻي آهي ته پوءِ پٺتي پيل علائقن کي ترقي يافته علائقن جي برابر ڪرڻو پوندو، غربت کي ختم ڪرڻو پوندو، ماڻهن کي پيئڻ لاءِ صاف پاڻي، صحت، تعليم سميت ٻيون بنيادي گهرجون فراهم ڪرڻيون پونديون، بيروزگارن لاءِ روزگار جا دروازا کولڻا پوندا، جيڪا سئو سيڪڙو حڪومت جي ذميواري آهي. بهرحال، سنڌ حڪومت طرفان ٿر ۾ ڏڪار ۽ ٻارن جي موت جو ذميوار سنڌ سرڪار کي قرار ڏنو ويو آهي، حقيقتن تي ٻڌل اهڙي رپورٽ لاءِ جوڙيل ڪميشن پنهنجي رپورٽ چيف سيڪريٽري سنڌ حوالي ڪري ڇڏي آهي، اڳوڻي ايڊووڪيٽ جنرل عبدالفتاح ملڪ جي سربراهي ۾ جوڙيل ڪميشن پنهنجي رپورٽ ۾ چيو آهي ته ٿر ۾ موت جي ذميوار سنڌ حڪومت آهي، سرڪاري کاتن جي نااهلي جا ڪارڻ به رپورٽ ۾ ٻڌايا ويا آهن، ڪميشن شادي جي قانون تي عملدرآمد جي پڻ سفارش ڪئي آهي، جڏهن ته صحت، زراعت، روينيو، سياحت، جهنگلي جيوت، لائيو اسٽاڪ، صحت، تعليم ۽ ٻين کاتن تي ٿر جي ڏڪار جي ذميواري لاڳو ڪئي وئي آهي. ڏٺو وڃي ته اسپتالن ۾ ڊاڪٽرن جي کوٽ آهي ۽ جيڪي ڊاڪٽر اتي موجود آهن، انهن جو پگهار به تمام گهٽ آهي، ان ڪري ڪميشن پنهنجي رپورٽ ۾ ڊاڪٽر جو پگهار ساڍا ٽي لک کان به وڌيڪ مقرر ڪرڻ جي سفارش ڪئي آهي، تعليم جي حالت به انتهائي خراب آهي، زراعت ۽ لائيو اسٽاڪ ڪوبه ڪم ناهي ڪيو، ٿر ۾ ڏڪار سبب پيئڻ جو پاڻي ميسر ناهي، آر او پلانٽن تي ڪروڙين رپيا خرچ ته ڪيا ويا آهن، پر اهي به ٿر واسين لاءِ ايترا فائديمند نه رهيا آهن، جيتري حڪمران دعويٰ ڪن پيا. رپورٽ ۾ ٿر کي آفت سٽيل قرار ڏيڻ ۽ ٿر ڊولپمينٽ اٿارٽي قائم ڪرڻ جي سفارش ڪئي وئي آهي. ان کان وڌيڪ ٻيو ڪهڙو ظلم هوندو ته ٿر جي ماڻهن لاءِ ڪڻڪ ۽ ٻي خوراڪ ته موڪلي وئي، پر اها به انهن تائين نه پهچائي وئي، سنڌ حڪومت جيڪڏهن واقعي ٿر جي عوام جي مسئلن کي حل ڪرڻ جي خواهش رکي ٿي ته ان کي ٿر ۾ زندگي جي بنيادي گهرجن کي پورو ڪرڻ لاءِ ايمانداري سان مخلص انداز ۾ فلاحي رٿائن جي نگراني لاءِ ڪرپشن کان پاڪ ۽ بي داغ ذميوار ماڻهن کي مقرر ڪرڻو پوندو، ٿر ۾ ٻيون به گهڻيون ئي غير سرڪاري تنظيمون آهن، جيڪي ماروئڙن جي انساني خدمت ڪرڻ ۾ مصروف آهن.

مٺي ۾ قائم ڪيل اسپتال سڄي ٿر جون طبي ضرورتون پوريون ڪرڻ جي واحد اسپتال آهي، پهرين ڳالهه اها آهي ته ٿر جي ڏورانهن علائقن مان مٺي اسپتال پهچڻ ايترو سولو ناهي، جيترو سمجهيو وڃي ٿو، جيڪڏهن ڪير جان جوکي ۾ وجهي مشڪلاتن جو سفر طئي ڪري مٺي اسپتال پهچي به وڃي ٿو ته اتي اڪثر ڪري ڊاڪٽر موجود ناهن هوندا، ڇوته ڊاڪٽر ٻهراڙي ۽ پٺتي پيل علائقن ۾ فرض سرانجام ڏيڻ لاءِ تيار ئي ناهن، ان ڪري شهري سهولتن کي ڇڏي ڪري ڪهڙو ڊاڪٽر مٺي ويندو، مٺي اسپتال ڊاڪٽرن جي راهه ئي تڪيندي رهي ٿي ته ڪهڙو ڊاڪٽر ان کي قبول ڪري ماروئڙن جي اهنجن کي دور ڪندو. جڏهن ته نجي اسپتالن ۾ غريب ماڻهن پاران پنهنجو ۽ پنهنجي ٻارن ٻچن جو علاج ڪرائڻ وس جي ڳالهه ناهي، حيرت آهي ته اهي ڊاڪٽر به ٿر ۾ وڃڻ پسند نٿا ڪن، جن ٿر جا رهاڪو هجڻ ڪري رعايت جي بنياد تي ميڊيڪل ڪاليج ۾ داخلا ورتي، اهڙين حالتن ۾ ئي جيڪڏهن ڪميشن ڊاڪٽرن جو پگهار وڌائڻ جي سفارش ڪئي آهي، پر ان جي باوجود ڊاڪٽر پاڻ کي تڪليف ۾ وجهڻ نٿا چاهين.

ڪميشن پنهنجي رپورٽ ۾ مختلف مسئلن جي درست طريقي سان نشاندهي ڪئي آهي، پر ٿرين جا ڏک ختم ڪرڻ لاءِ جنهن دردمندي جي ضرورت آهي، اهو احساس حڪمرانن جي من ۾ ڪيئن پيدا ٿيندو. جيڪڏهن سنڌ حڪومت ٿرين جون مشڪلاتون حل ڪرڻ ۾ سنجيده آهي ته ٿر ۾ ڏڪار ۾ شدت اچڻ کان اڳ ئي اهڙا قدم کڻڻا پوندا، جن سان ماروئڙن تي ايندڙ مصيبتون روڪي سگهجن. پهرين جڏهن ٿر ۾ مقرر وقت تي برساتون نه پونديون هيون ته انتظاميا اڳواٽ ئي اهڙيون رٿائون جوڙي ڇڏيندي هئي، جن سان ٿر واسين جي تڪليفن کان بچائي سگهبو هو، پر هاڻوڪي وقت ۾ ته حڪومت پاڻ کي ان اهم ذميواري کان آجو سمجهي ٿي، اهو ئي سبب آهي جو ڪميشن جي رپورٽ ۾ سنڌ سرڪار کي ئي ٿر ۾ ماڻهن جي موت ۽ بدحالي جو ذميوار قرار ڏنو ويو آهي، ائين ناهي ته ٿر ۾ آيل ڏڪار جي ذميوار سنڌ سرڪار آهي، پر چوڻ جو مقصد اهو آهي ته جيڪڏهن قدرت جي طرفان ٿر ۾ ڏڪار واري صورتحال پيدا ٿئي ٿي ته ان امتحان جي تياري ڪرڻ ۽ ان ۾ سٺن نمبرن سان پاس ٿيڻ سنڌ حڪومت جي ذميواري آهي، جيڪڏهن ان ذميواري کان سنڌ سرڪار ڪن لاٽار ڪندي ته يقينن صوبائي حڪمران جماعت پيپلزپارٽي جي ئي عوامي مينڊيٽ کي نقصان رسندو ۽ جهڙي ريت پ پ تي ڪرپشن جا الزام لڳندا رهيا آهن، ان جي ڪري ئي پيپلزپارٽي جي حڪومت تان عوام جو ويساهه کڄندو ويو آهي. اڃا به وقت ويو ناهي، پيپلزپارٽي سميت سنڌ جي ٿر سان محبت ڪندڙ هر تنظيم ۽ مڪتب فڪر سان تعلق رکندڙن لاءِ هي سُنهري موقعو آهي ته هو ٿر جي غريب ماروئڙن جي مٿان ڇپر ۽ ڇانو بڻجي کين ڏکن ۽ تڪليفن مان ڇوٽڪارو ڏيارڻ لاءِ ڪردار ادا ڪن.

 

ڪاڇي جا ماروئڙا: گل بيبي لنڊ بلوچ

ڪاڇي جا ماروئڙا پنهنجي زندگي ڏکن ۾ گذاري رهيا آهن اڃا به ڪيستائين گذاريندا اسان جي ماروئڙن جي ڪير مدد ڪندو. هر ماڻهو صرف پنهنجي لاءِ ئي سوچيندو آهي اگر اسان ٻين لاءِ سوچون ۽ ٻين جي مدد ڪرڻ جو جذبو اسان جي دل ۾ پيد ٿئي ته اسان جا ماروئڙا به خوش رهندا ۽ اسان جو ملڪ به خوش رهندو بک ۽ بدحالي به گهٽجي ويندي اگر اسان جي ملڪ جا ماڻهو خوش رهندا ۽ اسان جا ٻچا به خوش رهندا پڙهيل لکيل امير ماڻهو ائين سوچين ته اگر اسان جا ماروئڙا خوش رهندا ته ڪميونيڪيبل ۽ پکڙجندڙ بيماريون به گهٽجي وينديون ته اسان جي ملڪ جي آبهوا صاف ٿي ويندي ۽ اسان جا امير ڀائر ۽ ان جا ٻچا ته خوش رهندا اهو تڏهن ٿيندو جو اسان مال ملڪيت جمع ڪرڻ جي بجاءِ سڀني لاءِ سوچون ڪاڇي جا ماروئڙا پاڻي پيئڻ لاءِ به سڪن ٿا ۽ بي روزگاري کان انهن غريب ويچارن جا برا حال آهن الله تعالى اسان جي پاڪستان جي زمين کي تمام گهڻو زرخيز بڻايو آهي انهن مان اسان فائدو ڪونه ٿا وٺون جيئن ڪاڇي جوم زمينون تمام گهڻيون سٺيون آهن پر اسان انهن قدرتي وسيلن مان فائدو ڪونه ٿا وٺون جيئن ڪاڇي ۾ زمينون به سٺيون آهن ۽ ڪاڇي جي ڪاج جو پاڻي ائين ئي ضايع ٿي رهيو آهي ان پاڻي کي جمع ڪري اهي ڪاڇي جون زمينون آباد ڪري سگهون ۽ اسان جا ماروئڙا به خوش رهندا ۽ اسان جي ملڪ ۾ بدحالي ته گهٽجي ويندي پر اهو ڪير ڪري سوچي دنيا چنڊ تائين پهچي وئي ۽ ڪٿان کان ڪٿان پهچي وئي اسان اڃان اتي آهيون .

اسان جي ملڪ کي الله جي مهرباني سان قدرتي ذخيرن ۽ نعمتن سان نوازيو آهي پر اسان انهن مان فائدو ڪونه ٿا وٺون ٻين ملڪن جا ماڻهو  ڪيئن ترقي ڪري رهيا آهن اسان اڃان ڏينهون ڏينهن پوئتي وڃي رهيا آهن اسان جي ملڪ جي ماڻهن کي خيرات وٺڻ جي عادت پئجي وئي آهي ڪيستائين ائين خيرات ۾ هلنداسين اسان جا جيڪي ڀائر وڏين وڏين پوسٽن تي پهچي وڃن ٿا اهي به صرف پنهنجي لاءِ سوچين ٿا انهن ۾ ڪا سچائي نه آهي اگر اهي ماڻهو سچ جي راهه تي هلندا ته سڀ مسئلا  حل ٿي ويندا ڪيترائي سال ٿي ويا آهن ته نئين گاج جو پاڻي ڊيم جي زرعي جمع ڪيو ويندو انهن غريب ماروئڙن کي خواب ڏيکاري چپ ٿي ويا آهن اهي غريب ۽ بي پهچ ماڻهو انهيءَ انتظار ۾ آهن ته ڪڏهن ڊيم ٺهندي ۽ اسان جون زمينون آباد رهنديون جيڪي ماڻهن کي سرڪار اهي ذميواري ڏئي ٿي اهي ماڻهو پئسه کائي وري چوندا آهن ته بجيٽ ڪونهي ڪاش اهي اسان جا ڀائر سچائي ۽ ايمانداري ڏيکارين ته ڪوبه ڪم ناممڪن نه آهي.

الائي ڇو اهي اسان جا ڀائر اهو سڀ ڪجهه وساري ٿا ڇڏين ته اسان به پاڪستان ۾ رهون ٿا اگر اسان جي ملڪ ۾ ڪابه مصيبت ايندي ته اسان به محفوظ نه رهنداسين ٻڌي ۾ طاقت ڪئي وڃي سڀ ملي ڪري پنهنجي ملڪ ۽ پنهنجن پنهنجن شهرن کي سڌارڻ جي ڪوشش ڪيون اهي ڪاڇي جا ماروئڙا به اسان جا ڀائر آهن انهن کي اسان پنهنجو سمجهي انهن جي مدد ڪيون اسان جڏهن ڪاڇي ويندا آهيون ته اهي مهمان نواز ماڻهو اسان جي پڙهيل لکيل ماڻهن کي لکين عزت ڏيندا آهن جڏهن ماڻهون ويچارا ماني ۽ پاڻي کڻي ايندا آهن ته اسان جا جيڪي پڙهيل لکيل ماڻهو جيڪي شهرن مان ويندا آهن اسان ڪاڇي جي ماڻهن جي مدد ڪنداسين جڏهن اهو ڦڪو پاڻي ڏسندا آهن ته چوندا آهن هي ڪهڙو پاڻي آهي هي پاڻي توهان پيئندا آهيون ۽ پاڻ صحيح نموني پاڻي به نه پيئندا آهن متان اسان هي خراب پاڻي پي بيمار نٿي پون اوڏي مهل انهن کي احساس ٿيندو آهي اهي پنن تي ته لکي ايندا آهن جڏهن شهر پهچندا آهن ته ٻه يا ٽي ڏينهن انهن ماڻهن کي احساس هوندو آهي پر انهن ڳالهين تي عمل نه ڪندا آهن ۽ اهي پنا اڇلائي ڇڏيندا آهن هر ماڻهو صرف پنهنجي لاءِ سوچي ٿو پنهنجي ملڪ ۽ شهرن لاءِ ڇو نه ٿا سوچين الائي ڇا اها ڳالهه انهن کان وسري ويندي ته اسان به هن ملڪ ۽ شهر ۾ رهون ٿا هي ملڪ اسان سڀني جو گهر آهي اسان جي ملڪ يا شهر ۾ ڪابه مصيبت ۽ تڪليف ايندي ته اسان به محفوظ نه رهنداسين هيلٿ جون ٽيمون ڳوٺن ۾ وڃي ڪئمپ هڻندا آهن ۽ انهن ڳوٺاڻن ڪاڇي جي ماڻهن کي هيلٿ جي باري ۾ ٻڌائيندا آهن پنهنجي صحت جو خيال رکو اهي غريب ماڻهو صيحت جو ڪيئن خيال رکن انهن وٽ ته پيئڻ جو صاف پاڻي به ڪونهي ۽ انهن ويچارن وٽ ايتري آمدني به ڪونهي جو هو پنهنجي صيحت جو خيال رکن اصل ماڻهو ان ڳالهه تي توجه ڏين اهي سڀ ڇا جي ڪري ٿئي ٿو انهن مسئلن کي حل ڪرڻ جي ڪوشش ڪن اهي مسئلا حل ٿي ويندا ته ٻيا مسئلا پاڻ حل ٿي ويندا جڏهن اسان هيلٿ ٽيمن سان گڏ ويندا آهيون ته ڏسندا آهيون ته ڪجهه غريب ماڻهو اهڙين خراب بيمارين ۾ مبتلا هوندا آهن جيئن سرجري جا ڪيس يا ڪجهه ٻار اهڙا  هوندا آهن انهن جي اکين ۾ وائيٽ موتيو آهي اهي سڀ ڪيس حل ڪرڻ جهڙا هوندا پر انهن غريب ماروئڙن وٽ پئسا نه هوندا جو اهي شهر اچي پنهنجو علاج ڪرائين اهي معصوم ماڻهو ويچارا ائين تڙپي تڙپي زندگي گذاريندا رهيا آهن.

اهي غريب ماڻهو به اسان جو هڪ حصو آهن ۽ ڀائر آهن اسلام به اسان کي ڀائيچاري جو سبق ڏنو آهي اسان جا جيڪي ڀائر جنهن کي اها ذميواري ملي ٿي ته پوري ايمانداري سان ڪن ۽ اسان سڀني وس وارن ماڻهن کي کپي ته جيئن ڪوشش ڪري جلد ۽ جلد نئي گاج ڊيم ٺاهيو وڃي چوندا آهن ته ٻڌي اتحاد ۾ طاقت آهي اهو مسئلو تڏهن حل ٿيندو ته اسان سڀ ملي ڪري ڪوشش ڪيون ۽ پنهنجي ڪاڇي جي غريب ماڻهن جي مدد ڪيون اهي ماروئڙا ماڻهو جڏهن خوش ٿي ويندا انهن ماڻهن کي ڪيڏي نه دعا ڪندا اهو مسئلو صرف انهن ماروئڙن جو ڪونهي اسان سڀني جو آهي اسان جو ملڪ سرسبز رهندو ۽ زرعي آمدني ۾ مدد ملندي ڪاش اسان جي شهر ۽ ملڪ جا ماڻهو سچائي ڏيکارين اهڙا کوڙ مسئلا آهن جيڪي حل ٿيڻ جهڙا آهن پر اسان جي پڙهيل لکيل ۽ آفيسرن وٽ ٽائيم ڪونهي جو اهو مسئلو حل ڪري سگهن اهي ماڻهو پنهنجي زندگي ۾ ايترا ته مصروف ٿي ويندا آهن جو پاڻ کانسواءِ ۽ ٻين لاءِ سوچڻ جو ٽائيم ئي ڪونه ٿو ملي زندگي جو اصل مقصد ٻين ڪاڻ جيئن جو هوندو آهي ڪاش سڀ ماڻهو ايماندار ٿي وڃن ۽ گڏجي اهي ننڍا ننڍا مسئلا حل ڪري سگهن انهن غريب اٻوجهه ماڻهن جي مدد ڪن اهي ماروئڙا ڪاڇي جا به ڀائر به اسانجو هڪ حصو آهن ڪاش وس وارا ماڻهو انهن غريبن جي مدد ڪن انهن جي مدد ڪرڻ سان پنهنجي به مدد ٿئي ٿي ۽ انهن جو به پاڪستان اسان جو گهر آهي ۽ اسان سڀ ان گهر ۾ رهون ٿا الله سائين کان دعا آهي ته اسان جي ماروئڙن جي مدد ڪري ۽ اسان جي ڀائرن کي توفيق ڏئي ته انهي نيڪ ڪم کي سرانجام ڏيئي اسان جي پياري ملڪ پاڪستان کي سرسبز شاد ۽ آباد رکي.

 

پلئه صاف آهن مخالف ڪامياب نه ٿيندا:نواز شريف

اسلام آباد (بيورو) وفاقي ڪابينا ٽن سالن لاءِ بجيٽ تجويزن جي منظوري ڏيندي پناما ليڪس جي جاچ لاءِ چيف جسٽس کي خط لکڻ واري حڪومتي فيصلي جي حمايت ڪري ڇڏي آهي، وزيراعظم چيو آهي ته ڪجهه سياسي مخالف ملڪي ترقيءَ ۾ رنڊڪ پيا وجهن، 2018 تائين ترقياتي منصوبا مڪمل ٿيڻ سان مخالفن جي سياست ختم ٿي ويندي.اسلام آباد ۾ وزيراعظم نواز شريف جي صدارت هيٺ وفاقي ڪابينا جو اجلاس  ٿيو، جنهن ۾ بجيٽ تجويزن، ترقياتي منصوبن ۽ ملڪ جي موجوده سياسي صورتحال تي غور ڪيو  ويو، . اجلاس ۾ ناڻي واري وزارت پاران ٽن سالن لاءِ بجيٽ تجويزون پيش ڪيون ويون، جنهن جي ڪابينا پاران منظوري ڏني وئي. ذريعن موجب، ڪابينا پاران پاناما ليڪس معاملي جي عدالتي جاچ ڪرائڻ لاءِ چيف جسٽس کي خط لکڻ واري حڪومتي فيصلي جي حمايت ڪندي پاڻ کي احتساب لاءِ پيش ڪرڻ تي وزيراعظم نواز شريف کي ڀيٽا پيش ڪئي. ترقي ۽ رٿابندي واري وزارت اجلاس کي بريفنگ ڏيندي ٻڌايو ته چيني ڪائونسل موٽروي منصوبن لاءِ 4 ڏهائي 4 ارب ڊالرز جي منظوري ڏئي ڇڏي آهي، موٽرويز ۾ سکر-ملتان، حويليان ۽ ٿاڪوٽ شامل آهن. ان موقعي تي خطاب ڪندي وزيراعظم نواز شريف چيو ته توانائي منصوبن لاءِ چيني پاران ڏنا ويندڙ 34 ارب ڊالر قرض نه پر سيڙڪاري آهي، موجوده حڪومتي دور ۾ ئي گيس بحران تي ضابطو آندو ويندو. وزيراعظم چيو ته 1999 کانپوءِ اقتدار ۾ آيل پارٽيون توانائي بحران ختم ڪرڻ ۾ ناڪام ويون پر ن ليگ جي حڪومت اقتدار ۾ اچڻ بعد توانائي منصوبن کي اوليت ڏني. هن چيو ته منصوبن ۾ شفافيت جو نئون معيار قائم ڪيو آهي، سمورا ادارا ملڪي معيشيت ۾ مضبوطيءَ جو ادارا ڪري رهيا آهن پر ڪجهه سياسي مخالف ملڪ جي ترقي ۾ رنڊڪ وجهن پيا. وزيراعظم چيو ته سياسي مخالف حڪومت جي ڪاميابين مان خوفزده آهن، 2018 تائين ترقياتي منصوبا مڪمل ٿيڻ بعد مخالفن جي سياست به ختم ٿي ويندي. وزيراعظم وڌيڪ چيو ته ٿر جي ڪوئلي مان بجلي پي پيداوار شروع ٿي وئي آهي، جنهن تي کيس ڏاڍي خوشي آهي.

 

سڀني کان پهرين وزير اعظم جي خاندان جي جاچ ٿيڻ کپي: مخالف ڌر

راولپنڊي(م.ڊ) پيپلزپارٽي پاناما ليڪس معاملي تي عوامي مسلم ليگ جي سربراهه شيخ رشيد سان رابطو ڪري ورتو آهي. اعتزاز احسن جو چوڻ آهي ته سڀ کان پهرين وزير اعظم نواز شريف ۽ ان جي گھر ڀاتين جوا حتساب ٿيڻ گھرجي. سينيٽ ۽ قومي اسيمبلي ۾ مخالف ڌر جي اڳواڻن سينيٽر اعتزاز احسن ۽ سيد خورشيد شاهه عوامي ليگ جي سربراهه شيخ رشيد سان ملاقات ڪئي. ان موقعي تي پاناما ليڪس معاملي ۽ ٻه مئي تي گھرايل مخالف ڌر جي پارٽين جي اجلاس بابت غور ويچار ڪيو ويو. پ پ اڳواڻن شيخ رشيد کي ٻه مئي واري اجلاس ۾ شريڪ ٿيڻ جي دعوت ڏني جيڪا هن قبول ڪري ورتي. ملاقات کانپوءِ ميڊيا سان ڳالهائيندي اعتزاز احسن چيو ته پاناما ليڪس جي جاچ ي مخالف ڌر جي پارٽين کي متحد ڪرڻ چاهيون ٿا.  هن چيو ته پاناما ليڪس بابت معاملن تي شيخ رشيد سان اتفاق ٿيو آهي. شيخ رشيد 2 مئي واري اجلاس ۾ شرڪت جي دعوت قبولي ورتي آهي. اعتزاز احسن وڌيڪ چيو ته 200 پاڪستانين ۾ وزير اعظم ۽ ان جي خاندان جو نالو سڀ کان مٿي آهي. ان کان اڳ جو معاملو عدالتي ڪميشن ۾ وڃي ڪجھه ڳالهين طئي ٿيڻ گھرجن.  هن چيو ته آف شور ڪمپنين جي الزام هيٺ آيل پاڻ اربين رپين جو پرڏيهه ۾ ڪاروبار هجڻ جو اعتراف ڪيو آهي. ٻئي طرف  سينيٽر اعتزاز احسن چيو آهي ته پاناما ليڪس جي ٻين قسط ۾ ڪنهن جو به نالو اچي پر اسان جو موقف ساڳو ئي آهي، سڀني کان پهرين وزير اعظم جي خاندان جي جاچ ٿيڻ کپي، خابرو ادارن موجب پيپلز پارٽي اڳواڻن اعتزاز احسن ۽ خورشيد شاهه سپريم ڪورٽ بار جي صدر ۽ ٻين اڳواڻن سان ملاقات ڪئي آهي، جنهن ۾ پاناما ليڪس معاملي تي جوڊيشل ڪميشن جي ٽرمز آف ريفرنس تي ڳالهيون ڪيون ويو، ملاقات کانپوءِ ميڊيا سان ڳالهائيندي اعتزاز احسن جو چوڻ هو ته اسان سمجهون ٿا ته سپريم ڪورٽ بار ڪنهن هڪ تنظيم يا سوچ جي نمائندگي نٿي ڪري، پر سپريم ڪورٽ بار جي باڊي عوامي سوچ رکي ٿي، اعتماد آهي ته سپريم ڪورٽ بار ايسوسي ايشن ملڪ ۽ قوم بابت سوچي رهي آهي، ان موقعي تي خورشيد شاهه جو چوڻ هو ته 2 مئي تي اپوزيشن پارٽين جو گڏيل اجلاس ٿيندو، جنهن ۾ ايندڙ حڪمت عملي جوڙي ويندي، جڏهن ته ان موقعي تي سپريم ڪورٽ بار جي صدر علي ظفر چيو ته پ پ اڳواڻن سان ملاقات ۾ اسان جوڊيشل ڪميشن جي ٽي او آر تي ڳالهه ٻولهه ڪئي آهي ۽ ان معاملي تي وڌيڪ صلاح مشورو ڪنداسين.

 

سنڌ سرڪار جو ڏڪار متاثرن ۾ ڪڻڪ ورهائڻ بدران راشد ڪارڊ ڏيڻ جو فيصلو

ڪراچي (اسٽاف رپورٽر) ٿر پارڪر ۾ ڏڪار واري صورتحال جي حوالي سان ٿر ڪمشين جي رپورٽ بابت سنڌ جي وڏي سيد قائم علي شاهه جي صدارت هيٺ هڪ اعليٰ سطحي اجلاس ٿيو، جنهن ۾ ٿر ڪميشن طرفان ڏنل سفارشن کي نظر ۾ رکندي حڪومت جي ڪوششن ۾ ايندڙ رڪاوٽن دور ڪرڻ سميت غربت ۽ ڏڪار جي شڪار ٿري عوام لاءِ پائيدار حل جي ڳولا ڪرڻ لاءِ تفصيلي بحث مباحثو ڪيو ويو. سنڌ هاءِ ڪورٽ ڪراچي جي سفارشن تي وڏي وزير سيد قائم علي شاهه چئن ميمبرن تي ٻڌل ٿر ڪميشن جوڙيو هو، جنهن ۾ عبدالفتاح ملڪ، ڊاڪٽر ٽيپو سلطان، سونو خان کنگراڻي ۽ صوبائي ڊزاسٽر مئنيجمينٽ اٿارٽي جو ڊائريڪٽر جنرل شامل آهن. ڪميشن جي قائدن ۽ ضابطن موجب ڪميشن کي ٿرپارڪر ۾ موجوده بحران جا سبب ڳولڻ ۽ ان معاملي تي اختيارين طرفان کنيل قدمن ۽ ڪنهن به صوبائي کاتي طرفان ٿرپارڪر ۾ ڏڪار واري صورتحال کي گهٽائڻ ۾ ڪنهن به قسم جي ڪوتاهيءَ جي صورت ۾ ذميوارن جي نشاندهي ڪرڻ ۽ ان صورتحال ۾ بحالي ۽ رليف جي حوالي سان سفارشون جوڙڻ شامل آهن. انهيءَ بابت ڪميشن مشاهدو ڪيو ته ٿرپارڪر ۾ ڏڪار واري صورتحال کي منهن ڏيڻ لاءِ لاڳاپيل صوبائي کاتن ۾ رابطن جي گهٽتائي آهي، ۽ ڪميشن تعلقي ميونسيپل ايڊمنسٽريشن، اسپيشل انيشيٽيو ڊپارٽمينٽ، اين جي اوز ۽ صوبائي صحت کاتي وچ ۾ رابطن ۾ وڏي وٿيءَ جي نشاندهي ڪئي آهي. ڪميشن ڏٺو ته صوبائي کاتن سماجي بهبود، ماحوليات، جنگلات، بهبودآبادي، ٽرانسپورٽ ۽ سياحت جي ڪارڪردگي غير تسلي بخش آهي. ڪميشن سفارش ڪئي ته صوبائي کاتن جهڙوڪ صحت، خوراڪ، لائيواسٽاڪ، آبپاشي ۽ موسميات جي نمائندن تي مشتمل هڪ صوبائي مانيٽرنگ ڪميٽي جوڙي وڃي جيڪا سنڌ جي وڏي وزير کي پنهنجي تحقيقي رپورٽ پيش ڪندي ۽ ان ڪميٽيءَ جي قائدن ۽ ضابطن ۾ ٽه ماهي جامع رپورٽ وڏي وزير کي پيش ڪرڻ شامل هجي. ٿر ڪميشن اها به سفارش ڪئي ته غربت، خوراڪ، صحت، زراعت ۽ تعليم جهڙن شعبن جي بهتر منصوبابندي لاءِ نيوٽريشن پاليسي جوڙي وڃي، انڪري هر يونين ڪائونسل ۾ نيوٽريشن جا بنيادي مرڪز هئڻ وقت جي اهم ضرورت آهي. ٿر ڪميشن ڏڪار واري پاليسيءَ بابت چيو ته حڪومت ڏڪار لاءِ جدا پاليسي ۽ عملي قدم کڻڻ لاءِ فريم ورڪ جوڙي ۽ ان حوالي سان ٿر ڊولپمينٽ اٿارٽي اهڙي بحران کي منهن ڏيڻ لاءِ سمورن ادارن جي سرپرستيءَ لاءِ بهتر ڪم ڪري سگهي ٿو. ٿر ڪميشن نشاندهي ڪئي ته مقامي آبادي ترقياتي منصوبن سان فائدا حاصل ناهي ڪري سگهي انهن لاءِ روزگار وارو حق پهرين ترجيح آهي. ڪميشن حڪومت تي زور ڀريو ته هو ڪوئلي جي منصوبن تي ڪم ڪرڻ لاءِ مقامي آباديءَ کي روزگار ڏيڻ لازمي قرار ڏئي. ڪميشن سفارش ڪئي ته قانون تي عملدرآمد ڪندي وڻن جي واپاري استعمال تي پابندي لاڳو ڪئي وڃي ۽ ٿرپارڪر ۾ زمين جي ڪوالٽي ۽ معدني زخيرن جي تحفظ لاءِ هارپي جي واضع پاليسي جوڙي وڃي. ڪميشن مشاهدو ڪيو ته 1.3 ملين (تيرنهن لک) آباديءَ لاءِ هڪ ضلعي اسپتال آهي جيڪو موجوده بحران جو وڏو سبب آهي. هنن چيو ته گريڊ 17 کان 19 جي اسپيشلسٽ، ميڊيڪل آفيسر ۽ ٻيون 309 اساميون خالي آهن. ان تي صوبائي وزير صحت ڄام مهتاب ڏهر چيو ته سنڌ پبلڪ سروس ڪميشن طرفان اسپيشلسٽ، ميڊيڪل آفيسر جي مقرريءَ لاءِ شروعات ڪئي وئي آهي ۽ ان جو تحريري امتحان ڪالهه ورتو ويو آهي جڏهن ته سموارا مرحلا ٻن مهينن ۾ مڪمل ٿي ويندا. سيڪريٽري صحت سعيد مڱڻيجي چيو ته ضلعي اسپتال کانسواءِ ٿرپارڪر ۾ 189 يوسي ڊسپينسيون به آهي ۽ ان کان علاوه هڪ نئين ضلعي اسپتال جي منظوري ڏني وئي آهي ۽ هڪ مهيني اندر ان تي ڪم شروع ڪيو ويندو. وڏي وزير صوبائي ناڻي واري وزير سيد مراد علي شاهه کي هدايت ڪئي ته ضلعي اسپتال لاءِ وڌ کان وڌ فنڊ مختص ڪري ته جيئن هڪ سال اندر اسپتال قائم ڪري سگهجي. ٿر ڪميشن چيو ته پوري ضلعي ۾ 14 ايمبولينسون آهن جنهن مان 6 ايمبوليسون مٺي اسپتال ۾ استعمال ٿي رهيون آهن. ان تي وڏي وزير ٿرپارڪر ضلعي لاءِ 10 ايمبوليسون خريدڻ جي منظوري ڏني. ڪميشن ٻڌايو ته ٿر ۾ ڊاڪٽرن جي رهائش لاءِ ڪنهن به قسم جو انتظام نه آهي ۽ جيڪا به رهائشي سهولتون موجود آهن انهن کي نان ميڊيڪل عملو استعمال ڪري رهيو آهي ان تي وڏي وزير چيو ته انهن کي فوري طور تي خالي ڪرايو وڃي. ڪميشن غير تربت يافته دائين جي نشاندهي ڪئي ان موقعي تي صحت واري وزير ٻڌايو ته هنن ايل ايڇ ڊبليو جي ٽريننگ شروع ڪري ڇڏي آهي ته جيئن اهي مڊوائف واريون خدمتون سرانجام ڏئي سگهن. اجلاس ۾ ان ڳالهه جي به نشاندهي ڪئي وئي ته ٿرپارڪر جو ڊوميسائل رکندڙ ڊاڪٽر به ٿر ۾ ڪم ڪرڻ لاءِ راضي نه آهن ان تي ڪميشن سفارش ڪئي تي لازمي سروس ايڪٽ تي سختي سان عمل ڪرايو وڃي ته جيئن ڊاڪٽر پنهنجن علائقن ۾ پنهنجو فرض نڀائن. ڪميشن حڪومت تي زور ڀريو ته فيملي پلاننگ ۽ رپراڊڪٽو هيلٿ ڪئير نيٽ ورڪ تي بهتر طريقي سان عملدرآمد ڪرايو وڃي ان تي وڏي وزير پاپوليشن کاتي کي حڪم ڏنو ته اهي ٿرپارڪر ۾ پنهنجي ڪمن جي تفصيلي رپورٽ پيش ڪن. ڪميشن طرفان نشاندهي ڪئي وئي ته گهٽ عمر وارين شادين، ماء ۽ ٻار ۾ خوراڪ جي گهٽتائي، امينائيزيشن جي گهٽتائي، انٽينيٽل ڪيئر ۽ صحت جي سهولت تي پهچ جو فقدان وڏا ڪارڻ آهن. جن جو تدارڪ وقت جي تمام گهڻي ضرورت آهي. ايڊيشنل سيڪريٽري ترقيات محمد وسيم ٻڌايو ته يورپين يونين جي سهڪار سان ٿرپارڪر سميت ستن ضلع لاءِ اٺن ارب رپين جو نيوٽريشن پروگرام شروع ڪيو ويو آهي جنهن کي ٿرپارڪر ۾ فوري طور تي عملدرآمد ڪرائڻ ضروري آهي. ڪميشن ٻڌايو ته آر او پلانٽس پنهنجي مڪمل صلاحيتن مطابق ڪم نه پيا ڪن ۽ انهن جي مرمت کي يقيني بڻايو وڃي ان تي وڏي وزير اسپيشل انيشيٽو ڊپارٽمينٽ کي آر او پلانٽس جي حوالي سان پنهنجي ڪارڪردگي رپورٽ جمع ڪرائڻ جي هدايت ڪئي. ڪميشن ٿرپارڪر ۾ آبپاشي ۾ بهتري لاءِ ضروري قدم کڻڻ لاءِ زور ڀريو ته جيئن ريگستاني ضلعي ۾ غربت گهٽ ٿي سگهي ۽ خوشحالي اچي. وڏي وزير سيڪريٽري زراعت کي ٿرپارڪر لاءِ خاص اسڪيم جوڙڻ ۽ ايندڙ اجلاس ۾ پيش ڪرڻ جو حڪم ڏنو. ٿر ڪميشن چيو ته ٿرپارڪر ضلعي ۾ 563 اسڪول آهن جنهن ۾ استادن جي 989 اساميون خالي آهن. ضلعي ۾ هڪ لک نوي هزار ٻار پرائمري ۾ داخل آهن جنهن مان 22 هزار رڳو ميٽرڪ ۾ پهچندا آهن. قائم مقام سيڪريٽري تعليم مختيار سومرو ڪميشن جي رپورٽ تي اعتراض ڪندي چيو ته ٿر ۾ 4008 اسڪول آهن جنهن مان 3719 پرائمري، 243 مڊل، 39 سيڪنڊري ۽ 7 هائر سيڪنڊري اسڪول آهن. هن ٻڌايو ته انهن سمورن اسڪولن ۾ ڪل داخلا 149992 آهي جنهن ۾ 93178 ڇوڪرا ۽ 56814 ڇوڪريون شامل آهن. ٿرپارڪر ۾ 5148 استاد آهن جنهن مان 4548 مرد استاد ۽ 600 عورت استاد آهن. وڏي وزير سيد قائم علي شاهه چيو ته ٿر ڪميشن جي رپورٽ جامع آهي جنهن تي تفصيلي بحث مباحثي جي ضرورت آهي ڇاڪاڻ ته انهن جي تحقيقي رپورٽ اهم آهي ۽ ان تي کلي ذهن سان غور ۽ فڪر جي ضرورت آهي. هن چيف سيڪريٽريءَ کي هدايت ڪئي ته ان رپورٽ جي حوالي سان سمورن سيڪريٽرين جو اجلاس گهرائي ۽ ايندڙ اجلاس ۾ تفصيلي تجويزن سان اچن. هن چيو ته هو ٿرپارڪر واري معاملي تي تمام ڪوششن سان حل ڪرڻ چاهي ٿو.

 

پاڪستان ۾ فوجي عدالتون قائم ڪرڻ وارو فيصلو انتهائي ڏکيو هو: چوڌري نثار

لنڊن(م.ڊ) وفاقي گھرو وزير چوڌري نثار علي خان چيو آهي ته پاڪستان ۾ فوجي عدالتون قائم ڪرڻ وارو فيصلو انتهائي ڏکيو هو. ميڊيا رپورٽن موجب گھرو وزير چوڌري نثار لنڊن ۾ برطانيا جي قومي سلامتي واري صلاحڪار سان ملاقات ڪئي. ان موقعي تي پاڪ_برطانيا لاڳاپن سميت مختلف معاملن تي خيالن جي ڏي وٺ ڪئي وئي. ان موقعي تي برطانوي صلاحڪار پاران فاٽا لاءِ 10 لک پائوئڊ امداد ڏيڻ جو اعلان ڪيو ويو. اها امداد فاٽا متاثرن لاءِ ڪڻڪ فراهم ڪرڻ تي خرچ ڪئي ويندي. فاٽا متاثرن کي 65 هزار ٽن ڪڻڪ ڏني ويندي. ان موقعي تي وفاقي گھرو وزير چوڌري نثار چيو ته پاڪستان ۾ فوجي عدالتون قائم ڪرڻ وارو فيصلو انتهائي ڏکيو هو ، اسان دهشتگردي گھٽ ڪري ڇڏي آهي. هن چيو ته حڪومتي قدمن سان دهشتگردي جي واقعن ۾ واضح گھٽتائي ٿي آهي.

 

اساما آپريشن کان چار سال اڳ پاڪستان وٽ هو، حڪومت سي آءِ اي کان آپريشن ڪرائي مارائي ڇڏيو: آمريڪي صحافي

واشنگٽن(م.ڊ) آمريڪا جي مشهور تحقيقي صحافي سيمورس هرش هڪ ڀيرو وري چيو آهي ته القاعده جي اڳوڻي سربراهه اسامه بن لادن تائين پهچڻ ۾ پاڪستان مدد ڪئي. پولٽنزر پرائز کٽيندڙ  سيمورس هرش چيو آهي ته گذريل سال جڏهن هُن اسامه بن لادن جي ايبٽ آباد واري گھر ۽ مارجڻ بابت ثبوت ڏٺا ته مونکي پنهنجي دعويٰ سچي لڳي. هُن پنهنجي دعويٰ تي ڄمڻ جو اظهار ڪندي چيو ته پاڪستان اسامه بن لادن کي 2006 ۾ گرفتار ڪيو ويو ۽ سعودي عرب جي مدد سان ڪيترائي سال قيد رهيو. بعد ۾ پاڪستان ۽ آمريڪا ۾ معاهدو ٿيو ته آمريڪا اسامه ڪمپائونڊ ۾ ڪارروائي ڪندو پر ظاهري طور اهو ڏيکاريو ويندو ته پاڪستان کي ان جي ڪا خبر ناهي. هن چيو ته مون کي ان حوالي سان وڌيڪ ثبوت مليا آهن. سيمور هرش جو وڌيڪ چوڻ هو ته ڀارت جي ڪري پاڪستان لاڳيتو الرٽ آهي، ان جا ريڊار هر طرح جي چرپر تي نظر رکيو اچن، جڏهن ته ان جا ايف_16 جهاز به ڪنهن قسم جي صورتحال جو مقابلو ڪرڻ لاءِ تيار آهن، اهڙي صورتحال ۾ آمريڪا لاءِ ممڪن ئي نه هو ته اهو بنا اجازت جي پاڪستان ۾ داخل ٿي سگھي. هن چيو ته آمريڪا سان اهو معاهدو ان وقت جي آرمي چيف ۽ آءِ ايس آءِ سربراهه ڪيو، جنهن ٻين پاڪستاني جرنيلن کي پريشان ڪيو.

 

پاناماليڪس وڌيڪ 400 پاڪستانين جي آف شور ڪمپنين ۽ اڪائونٽن تان پردو کڻڻ جو اعلان

اسلام آباد(بيورو) سڄي دنيا سان لاڳاپيل سياسي ۽ ڪاروباري شخصيتن جي ڳجهن آف شور اڪائونٽن ۽ ڪمپنين جا تفصيل جاري ڪري طوفان مچائيندڙ پاناماليڪس هڪ ڀيرو وري ٿرٿلو مچائڻ لاءِ تيار آهي، جنهن ۾ وڌيڪ سوين پاڪستاني سياسي توڙي ڪاروباري شخصيتن جا نالا به شامل آهن، ميڊيا رپورٽن مطابق انٽرنيشنل ڪنسورشيم آف انويسٽيگيٽو جرنلسٽس(آئي سي آئي جي) پاناما سان لاڳاپيل لا فرم موساڪ فونسيڪا کان مليل ڊيٽا مان  وڌيڪ 2 لک دستاويز 9 مئي تي جاري ڪرڻ جو اعلان ڪيو آهي، جن ۾ دنيا جي 200 ملڪن سان لاڳاپيل انهن ڪمپنين، عوامي ڀلائي جي ادارن، فائونڊيشنز ۽ شخصيتن جا نالا شامل آهن،جن هانگ ڪانگ کان ويندي آمريڪي ٻيٽ نوويڊا تائين 21 مختلف ملڪن ۾ پنهنجا ڳجها اڪئونٽ کولي رکيا آهن، آئي سي آئي جي جي رپورٽ مطابق ايندڙ سال ظاهر ٿيندڙ دستاويز ايترا ته وڏا هوندا جو اڄ کان پهرين ايڏي وڏي پئماني تي ان قسم جا ڳجها دستاويز ڪڏهن به شايع نه ٿيا هوندا، جڏهن ته ڪنهن به ماڻهو جي ذاتي ڊيٽا ۽ بينڪ جي ڄاڻ نه ڏني وپيندي، رپورٽ مطابق ڳجها آف شور اڪائونٽ ۽ ڪمپنيون ٺاهيندڙن ۾ پاڪستان سان لاڳاپيل 400 سياسي ۽ ڪاروباري شخصيتن جا نالا به نون دستاويزن ۾ شامل آهن، جن جو تعلق ڪراچي ۽ لاهور سان آهي، واضح هجي ته آئي سي آئي جي ان کان پهرين به 10 لک کان وڌيڪ دستاويز جاري ڪري چڪي آهي.

 

پهرين مئي کان پيٽرول اگهه ۾ 4 رپيا في ليٽر واڌ جو امڪان

ڪراچي (اسٽاف رپورٽر) پهرين مئي کان پيٽرول اگهه ۾ 4 رپيا في ليٽر واڌ جو امڪان آهي، خانگي ٽي وي نيوز چينل موجب پهرين مئي کان ايڇ او بي سي جي قيمت 4 رپيا في ليٽر واڌ جو امڪان آهي، جڏهن ته ڊيزل ۽ پيٽرول جي قيمت 3 کان ساڍا 3 رپيا ليٽر وڌي سگهي ٿي، ذريعن چيو آهي ته مٽي جي تيل جي قيمت ۾ سوا 3 رپيا جڏهن ته لائٽ ڊيزل جي قيمت ۾ 2 رپيا 50 پئسا واڌ جو امڪان آهي.