تازيون خبرون

Daily Archives: April 26, 2016

برائن ڀائرن بارسلونا اوپن ڊبلز جو ٽائيٽل کٽي ورتو

بارسلونا (اسپورٽس نيوز) آمريڪي برائن ڀائرن بارسلونا اوپن ڊبلز جو ٽائيٽل پنهنجي نالي ڪري ورتو. فائنل ۾ هنن پيلبو شاويز ۽ مارسيل گرينولرز کي شڪست ڏني. تفصيل موجب بارسلونا ۾ کيڏيل مينز ڊبلز جي فائينل ۾ سيڪنڊ سيڊ آمريڪي جوڙي باب برائن ۽ مائيڪ برائن يوروگوئي جي پيبلو شاويز ۽ اسپين جي مارسيل گرينولرز کي سخت مقابلي کان پوءِ شڪست ڏئي ٽائٽل کٽيو.

 

ميان صاحب هڪ دفعو وري مزاحمت جي موڊ ۾.: شفيق شاڪر

ڪيترن ئي ڏينهن کان ملڪ ۾ پکڙيل سياسي انتشار، غيريقيني ۽ ڇڪتاڻ واري ڪيفيت ۾ جڏهن وزيراعظم ميان نوازشريف جي قوم کي خطاب ڪرڻ واري خبر سامهون آئي هئي ته ملڪ جي ساڃاه وند ڌرين ۾ اها اميد ڪئي پئي ويئي ته ميان صاحب ڪنهن سياسي بصيرت جو مظاهرو ڪندي اهڙو واضح ۽ چٽو اعلان ڪندو جنهن سان پاناما ليڪس وارو معاملو ڪنهن مناسب ۽ باوقار طريقي سان حل ٿيڻ جو امڪان پيدا ٿيندو ۽ عوام توڙي ٻين سياسي ڌرين جي اطيمينان جو ڪو سامان پيدا ٿي پوندو پر هتي ته معاملو ئي ابتڙ نڪتو! ميان صاحب جي تقرير جيڪا اڃا تائين ته گھڻن جي سمجھ ۾ نه آئي آهي تنهن هيڪاري معاملن کي وڌيڪ منجھائي ۽ سياسي گرميء ۾ اضافو ڪري وڌو آهي.خبر ناهي ميان صاحب جي جن صلاحڪارن کيس “عظيم سياسي بصيرت”  سان لبريز اها تقرير لکي ڏني هئي تن جو ميان صاحب تي ڪهڙو پراڻو پلاند رهيل هو جيڪو وٺڻ جي هنن ڪوشش ڪئي آهي.

هونئن ميان صاحب جي پنهن جي ماضيء جي تاريخ به سندس انهن “شاندار سياسي بصيرتن” سان لبريز رهي آهي. ستل نانگ تي لت ڏيڻ، رستي تي پيل بم کي ٿڏو هڻڻ،ککرن ۾ کڙا هڻڻ، خطرن سان کيڏڻ ۽ مهمجوئين  جا مقابلا ڪرڻ ميان صاحب جو محبوب مشغلو ۽ شاندار شوق رهيو آهي. سندس شان حڪمرانيء جي ڪتاب جا ورق ورائي ڏسو ته خبر پوندي ته ميان صاحب سدائين “اصولن جي صاف سٿري” سياست ڪندي ڪنهن به آرمي چيف سان نه ٺهيو سواء پاڪستاني تاريخ جي بدترين آمر جنرل ضياء جي. اهڙيء طرح هو ڪنهن به صدر سان مفاهمت وارو رويو اختيار نه ڪري سگھيو سواء رفيق تارڙ ۽ ممنون حسين جي.سپريم ڪورٽ جي ڪنهن به چيف جسٽس سان نه ٺهيو سواء چوڌري افتخار حسين جي.حزب اختلاف جي ڪنهن به ليڊر سان سندس تعلقات ڪڏهن به صحيح نه رهيا سواء سيد خورشيد شاه جي.سو ماضيء جي ان تاريخي آئيني ۾ ڏسجي ٿو ته صرف زورآزمائي،مزاحمت،مقابلو،هوڏ،انا،ضد،تڪبر۽ آمراڻو طرزعمل ئي نظر اچي ٿو.جن دانشورن ۽ صحافين يا عوام کي جيڪر اڄ به اها خوشفهمي آهي ته ميان صاحب بدلجي چڪو آهي،يا سندس سوچ يا روين ۾ ڪا تبديلي آئي آهي يا جمهوريت جي ديويء کيس پالش ڪري باقائدي هڪ جمهوري ليڊر بنائي ڇڏيو آهي يا وقت جي وهڪرن کيس ڪو سياسي سبق سيکاريو آهي ته اهڙن ماڻهن جي ساده دليء تي صرف ماتم ئي ڪري سگھجي ٿو.ميان صاحب ڪجھ به نه بدليو آهي نه سندس سوچون ۽ نه ئي سندس انداز حڪمراني! هو اڄ به ٺيٺ واپاري آهي جنهن کي طاقت جي نشي وڌيڪ آمر،هٺيلو،ضديلو ۽ لالچي بنائي ڇڏيو آهي.سو ان پس منظر کي سامهون رکندي اهو اندازو لڳائڻ بلڪل مشڪل ناهي ته ميان صاحب هن معاملي ۾ به پنهن جي هوڏ ۽ ضد تان نه لهندو بلڪه هن جي تقرير مان صاف ظاهر آهي ته هن ان معاملي کي جمهوري انداز ۾ باوقار طريقي سان منهن ڏيڻ بدران جھيڙي وارو رستو اختيار ڪرڻ جو فيصلو ڪري ڇڏيو آهي.جن اڪابرن کي ميان صاحب طرفان سپريم ڪورٽ ذريعي جوڊيشل ڪميشن جو اعلان مثبت ۽ نتيجاخيز نظر اچي رهيو آهي انهن کي ايندڙ چند ڏينهن ۾ سخت مايوسي ٿيندي جو ڪميشن ٺاهڻ جو اهو اعلان ، معاملو حل ڪرڻ لاء نه پر معاملي کي وڌيڪ منجھائڻ لاء ڪيو ويو آهي جنهن طرف ان ڪميشن جا ٽي آر اوز واضح نموني اشارو ڪري رهيا آهن.سو پهرين ڳالھ اها ته ان ڪميشن تي نه ته حڪومت مخالف سياسي ڌريون ئي متفق ٿينديون ۽ نه ئي سپريم ڪورٽ اهڙن منجھيل ۽ تڪراري ٽي آر اوز تحت ڪا جوڊيشل ڪميشن قائم ڪرڻ قبول ڪندي.

سڄو جھيڙو پاناما ليڪس تي متل آهي پر جوڊيشل ڪميشن 1857ع جي ايڪٽ تحت ٺاهي ان کي 1947ع کان ٿيندڙ هر ڪرپشن جي جاچ ڪرڻ جي صلاح ڏني پيئي وڃي.يعني پاڪستان جو هر اهو ماڻهو جنهن ڪٿي به ۽ ڪڏهن به ڪا ڪرپشن ڪئي هجي ،ڪڻڪ جون ٻوريون لڪايون هجن،مسجد مان جوتا چوراياهجن،اسڪول ٺاهڻ وقت سيمنٽ صحيح استعمال نه ڪيو هجي ،پهرين انهن سڀني جو احتساب ٿيندو۽جڏهن ڪميشن ان سموري ڪم کان واندي ٿئي ته پوء ڀلي پاناما ليڪس واري معاملي جي به تحقيقات ڪري!انهيء کان وڌ ٻي قوم سان ڪهڙي مذاق ٿي سگھي ٿي.

هاڻي ٿورو ذڪر وزيراعظم جي تقرير جو ڪيون جيڪا مختلف سوالن،مطالبن، الزامن،طعنن، مهڻن، شڪايتن،روڄ راڙي ، پنهن جي آتم ڪهاڻي ۽ پنهن جي خاندان جي پارسائي،پنهن جي مٿان ٿيل ظلمن ۽ ستمن،ڏوراپن ۽ آخر ۾ ڌمڪين جو مرڪب هئي.خبر ناهي ان سموري فضول گفتگوء مان ميان صاحب ڇا حاصل ڪرڻ گھريو ٿي ۽ هن ڇا حاصل ڪيو؟

پنهن جي جمهوري جدوجهد،سياسي جرئت ، قيد بند ۽ جلاوطنيء جا داستان ٻڌائڻ جي ڪهڙي ضرورت هئي پر جيڪر اهو داستان ٻڌائڻ ايترو ئي ضروري هو ته پوء ميان صاحب قوم کي اهو سچ به ته ٻڌائي ها ته هن ان وقت جي آمر سان معاهدو ڪري مقدس ملڪ جو گس ڇو ورتو ۽ وقت جي ان آمر سان حساب ڪتاب ڪرڻ کان سندس طاقتور حڪومت کي ڪنهن روڪيو هو؟ اهو به ٻڌائڻ کپندو هو ته مشرف کي ڪنهن سازش ڪري جهاز ۾ ويهڻ ڏنو. اهو به ته ان ئي آمر جا اڪثر وزير ۽ مشير اڄ ميان صاحب جي حڪومت جو اهم حصو ڪنهن بڻايا؟

هاڻي اچو ميان صاحب جي انهن مطالبن جي فهرست تي جيڪي هن تقرير دوران ڪيا. ان کان وڌيڪ عجيب ڳالھ ٻي ڪهڙي ٿي سگھي ٿي جو ميان صاحب پاڻ وزيراعظم هوندي ٻين کان احتساب جا مطالبا ڪري رهيو آهي.حڪومت اهو احتساب ڪري ڇونٿي، آخر حڪومت کي ڪنهن روڪيو آهي؟

سازشن جا حوالا به ڏنا ويا،ميڊيا،مخالف ڌر ۽ مقتدر ادارن کي به تنقيد جو نشانو بنايو ويو،پنهن جي پارسائيء جا قصا به ٻڌايا ويا،مظلوميت جا داستان به بيان ٿيا،عوامي حمايت جون دعوائون به ڪيون وييون پر ان سڄي لاحاصل گفتگوء مان ڪابه شيء حاصل نه ٿيندي سواء ان جي ته ميان صاحب کي اڄ نه ته سڀاڻي احتساب جي ان بيرحم عمل مان گذرڻو ضرور پوندو جو اهو معاملو ايترو آسانيء سان ماضيء جيان ڪنهن سردخاني ۾ دفن ٿي نه سگھندو.

*********

 

ورلڊ مليريا ڊي ڊينگي هڪ خطرناڪ مرض: غلام حسين لغاري

نيٺ وزيراعظم ميان محمد نوازشريف آڻ مڃي ورتي آهي ۽ مخالف ڌر جنهن ڳالهه تي بضد هئي ان کي نظر ۾ رکندي وزيراعظم صاحب چيف جسٽس پاڪستان کي خط لکي پاڻ سميت سمورن سياستدانن تي لڳل الزامن جي جاچ لاءِ ڪميشن جوڙڻ جو عرضرڙو ڪري ڇڏيو آهي. وزير اعظم جي قومي خطاب کانپوءِ اهڙو خط نه صرف لکجي چڪو آهي پر اهو چيف جسٽس تائين پهچي به ويو آهي ، هاڻ رڳو ڪميشن جوڙڻ ۽ ان جي ڪم جي آغا جو انتظار باقي آهي ۽ اهو تڏهن ئي ممڪن ٿي سگهي ٿو جڏهن چيف جسٽس پاڪستان ترڪي جي دوري تان واپس پهچي ۽ ڏسجي ته اهو ڪهڙو ٿو فيصلو ڪري،وزيراعظم پاران موڪليل ٽي او آرز کي قبول ٿو ڪري يا وري پنهنجي ترجيحات کي سامهون ٿو رکي..وزيراعظم ڪنهن وڌيڪ مخالفت کان بچڻ ۽ مخالف ڌر ۽ قوم کي ٿڌي ڪرڻ لاءِ پٿر ته پاڻي ۾ اڇلائي ڇڏيو آهي پر مخالف ڌر ۽ پوري قوم اهڙي ڪنهن به جاچ کي رد ڪري ڇڏيو آهي جنهن جا ٽي او آرز يعني جاچ جا نقطا حڪومت خود طئي ڪيا آهن ۽ ڀاڳين کي يعني مخالف ڌر کي اعتماد ۾ وٺي ناهي سگهيو، جنهن سان حڪومت ۽ مخالف ڌر وچ ۾ محاذ آرائي ختم ٿيڻ بدران وڌي سگهي ٿي.پ پ پ جي چيئرمن ته وزيراعظم کان استعيفيٰ ڏيڻ جو به مطالبو ڪري هڪ نئين بحث کي ڇيڙي ڇڏيو آهي.وزيراعظم پنهنجي ٽيون ڀيرو خطاب ۾ پاڻ کي جنهن نموني معصوم ظاهر ڪرڻ جي ناڪام ڪوشش ڪئي آهي ان جي ڪا به ضرورت نه هئي، اڃا به هو ڪجهه عرصي لاءِ عهدي کان پاڻ کي پري رکي ڪري پاڻ کي ۽ پنهنجي ڪٽنب سميت پنهنجي حڪومت کي احتساب لاءِ پيش ڪري ها ته شايد هو قوم جون دليون کٽي سگهي ها، سندس ۽ سندس پارٽي خلاف پئدا ٿيل واويلا نه صرف ختم ٿي وڃي ها پر عوامي سطح تي سندس مقبوليت جو گراف وڌي ها.

دنيا اندر جتي جتي به جمهوريت ۽ قانون جي حڪمراني آهي اتي آف شور ڪمپنين بابت انڪشافن ٿيڻ ۽ اهڙي قسم جي الزامن لڳڻ کانپوءِ اتان جي حڪمرانن يا ته فوري طور استعيفيٰ ڏئي ڇڏي آهي يا وري فوري طور ڪميشن جوڙي پنهنجي خلاف لڳل الزامن جي جاچ شروع ڪرائي ڇڏي، جيڪا وري هتي وڏي سياسي ڇڪتاڻ کانپوءِ ڪرائي پئي وڃي، اها به ڇڪتاڻ جي نظر ٿي رهي آهي. حڪومت توڙي ماضي ۾ اقتدار ۾ رهندڙ ڪا به ٻي ڌر پاڻ تي لڳندڙ ڪرپشن جي الزامن کي قبول ڪرڻ لاءِ تيار ناهي جڏهن ته ماضي ۾ به وڪي ليڪس ۽ ٻين ڳجهين رپورٽن وسيلي به سياسي ڪرپشن ۽ مني لاڊرنگ وسيلي ملڪ کان ٻاهر دولت منتقل ڪرڻ بابت انڪشاف ٿيندا رهيا آهن جيڪي ڪيس عدالتن ۾ به هليا پر ٻاهرين بئنڪن ۾ منقتل ٿيل ملڪي ناڻو نه واپس آيو نه وري ڪنهن کي سزا ملي چڪي آهي. سواءِ پ پ جي گذريل دور حڪومت ۾ ان جي وزيراعظم جناب يوسف رضا گيلاني کي عدالت ۾ منهن ڏيڻو پيو ۽ توهين عدالت جي مختصر ڪجهه سيڪنڊن لاءِ عدالت جي اٿڻ تائين مليل سزا تحت پنهنجي حڪومت وڃائي ويٺو.جنهن ملڪ ۾ آئين به هجي ۽ قانون جي حڪمراني جي دعويٰ به ٿيندي هجي ۽ جمهوريت جو دهل به وڄايو وڃي اتي انصاف جهڙي ڪا به شئي نه هجي ۽ حڪمران مال غنيمت سمجهي ملڪ لٽيندا رهن ۽ ڪڙو احتساب به نه ٿئي ته اها هن قوم ۽ ملڪ جي وڏي بدنصيبي کان گهٽ ڳالهه ناهي.اهوئي ڪارڻ آهي جو هن وقت ملڪ جا 20 ڪروڙ ماڻهو ملڪ جي موجوده سياسي سيٽ اپ ، جمهوريت ، آئين ۽ قانون کان انهي حد تائين بدظن ٿي چڪا آهن جو اهي غير سياسي قوتن طرف وجهائين ٿا ۽ انهن ۾ انصاف لاءِ اميدون وجهيو ويٺا آهن.جڏهن سياسي ڌريون خود بدعنوانين ۽ مني لاڊرنگ وسيلي آئين ۽ قانون کي پائمال ڪن ته پوءِ ٻين کي ڏوهه ڏيڻ به اجايو آهي.

وطن عزيز جي وجود ۾ اچڻ کانپوءِ ملڪ اندر ايتري ڪرپشن نه هئي نه وري ملڪي ناڻو مني لاڊرنگ وسيلي پرڏيهه منتقل ٿيندو هو جيترو هن وقت بيدردي سان ٿي رهيو آهي ۽ انجو ڪو به حساب ڪتاب ناهي ۽ هرڪو بچندو رهيو آهي.جڏهن کان ملڪ اندر احتسابي ادارا قائم ٿيا آهن تڏهن کان ڪرپشن ۽ مني لاڊرنگ وڌيڪ ڪر کنيو آهي جنهن جو اهو سبب آهي ته احتسابي ادارن ۽ ڪرپشن ۾ ملوث ماڻهن وچ ۾ ڊيلنگ وارو فقرو جنهن وسيلي اهي لٽيل ناڻي جو ڪجهه حصو واپس ڪري پاڻ کي سزا کان بچائي وڃن ٿا پر کين ٻي ڪا به سزا نٿي ملي، جنهن ڳالهه تي ملڪ جي عدالتن به پنهنجا ريمارڪس ڏنا آهن پر انهن رمارڪس تي حڪمرانن يا پارليامينٽ ڪو به نوٽيس اڃا تائين ناهي ورتو، سواءِ ان جي ته مستقبل ۾ احتساب بابت ڪو نئون قانون اچڻ وارو آهي، جيڪو پارليامينٽ اندر ويٺل اهي ئي عوامي نمائندا ٺاهي رهيا آهن جن جي پارليامينٽ اندر اڪثريت آهي.جيڪڏهن ميڊيا تي هلندڙ ٽاڪ شوز کي نظر ۾ رکبو ۽ انهن ۾ عوامي نمائندا يا سياسي پارٽين جا اڳواڻ هڪٻئي کي جنهن نموني بدعنوانين جا الزام مڙهي وائکو ڪندا رهن ٿا ، تن مان اهو ئي محسوس ٿي رهيو آهي ته پارليامينٽ توڙي صوبائي اسيمبلين ۾ ويٺل اڌ کان مٿي عوامي نمائندا ڪرپشن ۽ بدعنوانين ۾ ملوث آهن.جڏهن عوامي نمائندا خود ڪرپشن ۽ بدعنوانين ۾ ملوث هوندا اتي ڪهڙي انصاف جي اميد رکي سگهبي.وزيراعظم صاحب جذبات ۾ يا جارحاڻي انداز ۾ ئي سهي پر هڪ ڳالهه حقيقت تي مبني ڪئي آهي ته رڳو آف شور ڪمپنين جي جاچ ڇو ٿئي ؟ جاچ ۽ احتساب ٿئي ته سڀني جو ٿئي جن تي الزام آهن. ماضي ۾ ملڪ اندر جڏهن به ڪو احتساب ٿيو آهي ته اهو مخصوص ماڻهن يا ڪنهن هڪ اڌ مخالف سياسي ڌر جي اڳواڻن جو ٿيو آهي جنهن سان گرگ بدعنوان سياستدان ۽ سندن رکوالا ڪامورا بچندا رهيا آهن جنهن ڪري ئي ملڪ نه صرف بدعوانين جي ور چڙهي ويو آهي پر کربين رپين جو قومي ناڻو ٻاهرين ملڪن ڏانهن منتقل ٿي چڪو آهي، جنهن جي واپسي ٿيڻ قومي مفاد ۾ آهي پر ڪير واپس ڪرائيندو اهو به هڪ سوال آهي.مرحيات جنرل يحيٰ خان  جي دور ۾ حڪومت ۾ 300 ۽ شهيد ذوالفقار علي ڀٽو جي دور حڪومت ۾ 1300 ڪامورن کي بدعنوانين جي الزام هيٺ برطرف ڪيو ويو هو پر ڪنهن به سياسي اڳواڻ يا ايوب حڪومت جي دور جي بدعنوان وزير جو نالو نه ورتو ويو هو جنهنڪري به ايوب جا ساٿاري سياستدان وجهه وٺي جمهوري سياسي پارٽين ۾ هليا ويا ۽ ڪرپشن کي پاڻي ڏيڻ وارو سلسلو جاري رکيو. اهڙي طرح آمر ضياءُالحق جڏهن جمهوري حڪومت مٿان راتاهو هنيو ته هن وري احتساب جي آڙ ۾ صرف ئي صرف پ پ پ سان لاڳاپيل سياسي اڳواڻن کي نا اهل قرار ڏئي کين چونڊن کان پري رکيو هو ۽ چونڊيل وزيراعظم کي ڦاهي تائين پهچائي جمهوريت جو تسلسل روڪي ڇڏيو هو. مشرف دور حڪومت ۾ وري بدعنوان سياسي اڳواڻن جي حوصلي افزائي ڪري کين اقتدار جي منصب تائين پهچايو ويو جن جي اها ئي ڪوشش رهي ته ملڪي ناڻو ڪيئن لٽجي ۽ ڪيئن ٻاهر موڪلجي.مشرف جي دور ۾ لڳايل اهو ٻوٽو بعد ۾ جمهوري دور حڪومتن ۾ وڌي وڻ ٿي چڪو آهي جنهن کي پاڙن کان پٽڻ لاءِ به ڪجهه واڍا گهرجن  باقي ٻين جي وس کان ڳالهه ٻاهر آهي.محترمه بينظير ڀٽو صاحبه جي قتل ۽ آئين ٽوڙڻ جهڙن سنگين ڪيسن ۾ ملوث مشرف کي جيئدان ڏيندڙ ، گارڊ آف آنر وسيلي ايوان صدر مان رخصت ڪندڙ توڙي ملڪ کان ٻاهر ڀڄائيندڙ به قوم کان لڪيل ناهن ۽ هن وقت رڙيون ڪرڻ واڳن جيان ڳوڙها وهائڻ کان گهٽ ناهي جهڙي طرح وزيراعظم ميان محمد نوازشريف به پنهنجي تازي خطاب ۾ اظهار ڪيو آهي.  جڏهن هڪ غير سياسي حساس اداري جو سربراهه پنهنجي اداري جو  پاڻ خود احتساب ڪري بدعنوانين ۾ ملوث هڪ درجن ڪامورن کي برطرف ڪري سگهي ٿو ته اسانجا سياسي حڪمران ان ڳالهه ۾ دير ڪهڙي سبب ڪن ٿا، جن کي ڀلي اها خبر به آهي ته سندن حڪومت ۾ ڪهڙا ڪامورا يا وزير ۽ اسيمبلي ميمبر ڪرپٽ آهن، جنهنڪري سندن ئي ٺاهيل آئين ، قانون ۽ جمهوريت پائمال ٿي رهي آهي. هونئن به انصاف ۾ دير انصاف جي خون برابر آهي.جيڪڏهن ڪا غير سياسي قوت حڪمرانن ۽ سياستدانن جي احتساب لاءِ ڪو غير آئيني قدم کڻي ٿي ته  آئين سان غداري ڪرڻ ۽ جمهوريت مخالف قدم کڄڻ جون دانهون ٿين ٿيون پر جڏهن خود حڪمران آئين ۽ قانون جي لتاڙ ڪن ته ان کي جمهوريت جو حسن سڏيو وڃي ٿو جيڪا هڪ شرمناڪ ڳالهه آهي.جيڪڏهن اسانجا حڪمران ۽ اسان جي سياسي قيادت خود پنهنجي حڪومتن ۽ پارٽي اڳواڻن جو احتساب ڪن ته شايد ئي پاناما ليڪس ، وڪي ليڪس يا ٻئي ڪنهن ليڪس جو شڪار ٿين يا مٿن اهڙي قسم جا الزام لڳي سگهن.اڃا به وقت هٿن مان ناهي ويو، وفاقي توڙي صوبائي سياسي حڪومتون بنا ڪنهن وڌيڪ وقت وڃائڻ جي پنهنجي وزيرن ، ڪامورن ۽ اڳواڻن جو ڪڙو احتساب  شروع ڪن ۽ انهن جا ڪيس عدالتن ڏانهن موڪليا وڃن ته جيئن ڪرپٽ سياستدانن ، وزيرن ۽ ڪامورن جو ڪڙو احتساب ٿي سگهي ۽ کين تا حيات سياسي سسٽم کان نا اهل قرار ڏنو وڃي. هونئن به ڪرپشن کي دهشتگردي سان ڳنڍيو پيو وڃي جيڪو هڪ قسم جو هاڻ سنگين ڏوهه سڏيو پيو وڃي.

جيئن ته ايندڙ عام چونڊن ۾ باقي وڃي ڪي ٻه سال رهيا آهن تنهنڪري ضرورت ان ڳالهه جي آهي ته جيترو جلد ٿي سگهي اوترو سياست ۽ سرڪاري ادارن کي بدعنوانين ۽ ڪرپشن کان نه صرف پاڪ ڪيو وڃي پر منِي لاڊرنگ واري لعنت جو به صفايو ٿيڻ گهرجي جنهن لاءِ وزيراعظم پاران لکيل خط کي بنياد بڻائي ملڪ جي چيف جسٽس کي ئي پنهنجو قومي ڪردار ادا ڪرڻ گهرجي ته جيئن آئين ، قانون ۽ انصاف جو تحفظ ڪري سگهجي ۽ سياست مان ڪرپشن ۽ نا انصافين جو خاتمو اچي سگهي

 

 

اختلاف راءِ دشمني ۾ تبديل نه ٿيڻ گهرجي

پاڪ سرزمين پارٽي جي جناح باغ ۾ ٿيل جلسي ۾ پارٽي جي اڳواڻن انيس قائمخاني، رضا هارون، وسيم آفتاب، اشفاق منگي، مصطفيٰ ڪمالي جي گهر واري سائره ڪمال سميت وڏي انگ ۾ ڪارڪنن ۽ شهرين شرڪت ڪئي، جلسي واري پنڊال ۾ پاڪ سرزمين پارٽي جي جهنڊي بدران شرڪت ڪندڙ ماڻهن جي هٿن ۾ پاڪستاني جهنڊا کنيل هئا، جلسي ۾ عورتن ۽ ٻارڙن جو به هڪ وڏو انگ موجود هو. جلسي کي پاڪ سرزمين پارٽي جي سربراهه مصطفيٰ ڪمال خطاب ڪندي چيو ته 30 ڏينهن جي مختصر عرصي اندر ڪراچي جي باغ جناح ۾ لکين ماڻهن جو عام جلسو ڪري ورلڊ رڪارڊ قائم ڪيو ويو آهي، هي پهرين پارٽي آهي جنهن ۾ پارٽي جي جهنڊي بدران پاڪستان جي جهنڊي کي متعارف ڪرايو ويو آهي اهو به هڪڙو ورلڊ رڪارڊ آهي، اسان ايوانن اندر موجود جمهوريت کي نٿا مڃون جيستائين گلي محلي جي عوام کي يونين ڪائونسل جي سطح تائين اختيار منتقل نٿا ڪيا وڃن تيستائين جمهوريت کي قبول نه ڪيو ويندو،

اسان چاهيون ٿا ته پيئڻ جي صاف پاڻي کان وٺي سيوريج، ٽريفڪ جي نظام ۽ لوڪل سيڪيورٽي تائين سمورا اختيار هيٺين سطح تائين عوام کي منتقل ڪيا وڃن، ايم اين اي، ايم پي اي ۽ سينيٽرن جو ڪم ترقياتي منصوبن جي تڪميل ڪرڻ نه پر قانونسازي ڪرڻ آهي، ترقياتي منصوبن جي نالي تي اربين رپين جي ڪرپشن ڪئي وڃي ٿي، ترقياتي منصوبن جي نالي تي اربين رپين مان ٺيڪن جون ڪمپنيون ٺاهيون ويون آهن، جڏهن عوام کي پيئڻ جي صاف پاڻي کان وٺي سيوريج ۽ مقامي سطح جا مسئلا حل نٿا ڪيا وڃن ته اهڙي صورت ۾ انهن کان حب الوطني ۽ پاڪستانيت جو مطالبو نه ڪيو وڃي، بلوچستان، فاٽا ۽ ڪراچي ۾ فوجي آپريشن سان مسئلو حل نه ٿيندو، دنيا ۾ مقامي حڪومتن کي اختيار ڏيئي عوامي مسئلا حل ڪيا وڃن ٿا پر هتي جمهوريت جي نالي تي ايم اين اي، ايم پي اي ۽ سينيٽرن کي بااختيار بڻائي عوامي مسئلا حل ڪرڻ کان منهن موڙيو وڃي ٿو. ملڪ ۾ ڀلي 4 بدران 20 صوبا ٺاهيا وڃن پر انهن نون صوبن جو عوام کي ڪوبه فائدو نه ٿيندو انڪري اسان نون صوبن وارو مطالبو آخر ۾ رکيو آهي، اسان ماضي ۾ وقت جي فروعنن سان حق جي سدا بلند ڪئي آهي، هتي 2001ع ۽ 2013ع جي لوڪل گورنمينٽ سسٽم جي ڳالهه ڪئي وڃي اسين انهن ٻنهي نظامن کي نٿا مڃون، نيب ڪرپشن کي روڪي نٿي سگهي جيستائين محلي ۽ گهٽي جي عوام جي هٿن کي نيب جا هٿ نه ٺاهيو ويندو تيستائين ملڪ مان ڪرپشن ختم نه ٿيندي. نيب جي هٿن کان وڌيڪ عوام جا هٿ طاقتور آهن تنهن ڪري نيب وارا اختيار مڪاني ادارن واري حڪومتن ذريعي عوام تائين منتقل ڪيا وڃن. ڀلي ماڻهو ڪهڙي به مذهبي فرقي سان لاڳاپيل هجن انهن جو پيپلز پارٽي، مسلم ليگ (ن)، ايم ڪيو ايم سميت ڪهڙي به پارٽي ۽ نظريي سان واسطو هجي هر ماڻهو کي پنهنجي نظريي ۽ منشور جي حمايت ۾ پروگرام ٻڌائڻ جو حق هجڻ گهرجي، اسانجي ڳالهه ٻڌي وڃي جيڪڏهن اها پسند اچي ته اسان جي حمايت ڪئي وڃي نه ته اختلاف راءِ رکڻ جو هر ڪنهن کي حق آهي پر ان اختلاف راءِ کي دشمني ۾ تبديل نه ڪيو وڃي ڪنهن جي جان نه ورتي وڃي،