تازيون خبرون

Daily Archives: April 19, 2016

فلمن ۾ ڪاميابي يا  ناڪامي تي والد جو سهارو ناهيان وٺندي:شروتي هاسن

ممبئي:ڀارتي اداڪارا شروتي هاسن چيو آهي ته هو فلمن م ڪاميابي يا ناڪامي هڪ پاسي رکي اڳتي جي لاءِ وک وڌائيندي آهيان.هڪ انٽرويو ۾ سندس چوڻ هو ته ڪجهه ماڻهو سمجهندا آهن ته مان بالي وو۾  جاءِ ٺاهڻ جي لاءِ پنهنجي پيءُ ڪمل هاسن جو سهار ورتو آهي،جڏهن ته اهو اندازو بلڪل غلط آهي. شروتي هاسن جو چوڻ هو ته منهنجو پيءُ چوندو هو ته تون ميوزڪ ۾ قسمت آزمائي ڏس،پر مان کيس اداڪاري ڪرڻ جو چيو.بالي ووڊ جي نوجوان اداڪارا جو وڌيڪ چوڻ هو ته منهنجو پيءُ منهنجي رهنمائي ضرور ڪندو آهي پر انهيءُ جو مطلب ڪڏهن به اهو ناهي ته منهنجي ڪاميابي ۽ ناڪامي ۾ بابا جو هٿ آهي،فلمن ۾ ميرٽ جي بنياد تي آئي آهيان.

 

ملائڪا اروڙا پاران  ارباز خان کان طلاق نه وٺڻ جو فيصلو

مبئي (شوبز نيوز) بالي ووڊ اداڪارا ملائڪا اروڙا جيڪا پنهنجي مُڙس ارباز خان سان اختلافن ۽ پوءِ ڌار ٿيڻ سبب گهڻي پريشان نظر اچي رهي آهي.جڏهن ته بالي ووڊ اداڪارا ۽ ارباز خان ڌار ٿي چڪا آهن ۽ ملائڪا ارباز خان جي ڪٽنب کان به پري ٿي وئي آهي ۽ جنهن جو کيس حد کان وڌيڪ نقصان ٿي رهيو آهي.ملائڪا اروڙا جي ويجهن ساٿين جو چوڻ آهي ته اداڪارا چاهي ٿي ته هو مسٽر خان پاران مليل طلاق وارن ڪاغذن تي صحيح نه ڪندي،ڇاڪاڻ ته سندس خان ڪٽنب سان هڪ لاڳاپو برقرار رهي.

 

پاڪستان  ڪپ اڄ کان فيصل آباد ۾ شروع، پنجاب ۽ بلوچستان جون ٽيمون افتتاحي ميچ ۾ مهاڏو اٽڪائينديون

فيصل آباد (اسپورٽس نيوز) پاڪستان ڪرڪيٽ ڪپ جي شاندار شروعات سڀاڻي کان فيصل آباد ۾ شروع ٿي رهي آهي ۽ ايونٽ جي پهرين ميچ منجاب ۽ بلوچستان جي ٽيمن وچ ۾ ٿيندي.پاڪستان ڪپ جون مڪمل ميچون فيصل آباد جي اقبال اسٽِڊيم ۾ کيڏيون وينديون.شروعاتي ميچ پاڪستاني وقت مطابق منهجند جو 3 وڳي کيڏي ويندي.جڏهن ته پنجاب پوليس ۽ فيصل آباد پوليس پاران سخت سيڪيورٽي ڏيڻ جو يقين ڪرايو ويو آهي.سخت سيڪيورٽي ۾ سڀاڻي بلوچستان ۽ پنجاب جون ٽيمون افتتاهي ميچ کيڏندي.جهڙي طرح پي سي بي رانديگرن جي نيلامي لکي ڇُپي هڪ هوٽل ۾ ڪرائي هئي اهڙي طرح خاموشي سان پاڪستان ڪپ جي شروعات سڀاڻي ٿي رهي آهي.

 

ڪپتاني نئين ڳالهه ناهي،انضمام الحق جي چيف سليڪٽر ٿيڻ سُان ٽيم مضبوط ٿيندي: سرفراز احمد

ڪراچي (اسپورٽس نيوز) قومي ٽي ٽوئنٽي جي ڪپتان سرفراز احمد جو چوڻ آهي ته ڪپتاني ڪرڻ منهنجي لاءِ ڪا نئين ڳالهه ناهي،انضمام الحق جو چيف سليڪٽر ٿيڻ سُٺي ڳالهه آهي،ٽيم کي گهڻو فائدو پوندو.هڪ انٽرويو ۾ ڳالهائيندي قومي ٽيم جي ڪپتان سرفراز احمد جو چوڻ هو ته  اڳوڻي ڪپتان انضمام الحق کي چيف سليڪٽر بڻائڻ سان ٽيم کي گهڻو فائدو پوندو،خاص ڪري بيٽنگ جو مسئلو حل ٿي ويندو.سندس چوڻ هو ته انضمام الحق هڪ بهترين انسان ۽ عظيم ڪرڪيٽر آهي سندس چيف سليڪٽر ٿيڻ سان پاڪستان ٽيم هر شعبي ۾ مضبوط ٿي ويندي.

 

ٻڌايو ته پئسو ڪٿي خرچ ڪيون؟: شفيق شاڪر

خبرن مطابق سنڌ حڪومت پنهن جي ماضيء جي “شاندار” روايت برقرار رکندي ترقياتي فنڊز جو هڪ وڏو حصو صوبي جي ترقياتي منصوبن تي خرچ نه ڪري سگھي.ظاهر آهي ته سنڌ جي بادشاهن وٽ انهيء جو هڪڙوئي جواز سمجھ ۾ اچي ٿو ته سڄي سنڌ ايڏي ته عظيم الشان ترقي ڪري چڪي آهي جو هاڻي وڌيڪ ڪنهن ترقياتي منصوبي جي ڪا گنجائش ئي باقي نه رهي آهي جنهن تي اجايو قومي خزانو ضايع ڪجي.مثالي “ديانتداريء ” جي اها ئي تقاضا آهي ته رياست جو پئسو بچائي رکيو وڃي ته جيئن ڪنهن ڏکئي وقت تي ڪم اچي.سنڌ ۾ روڊن رستن،اسڪولن،اسپتالن جو هر طرف ڄار وڇائجي چڪو آهي.صحت ۽ صفائيء جي لحاظ کان سنڌ جو هر شهر پئرس جو ڏيک ڏيئي رهيو آهي.سرڪاري اسپتالن ۾ دوائن ۽ مشينريء تي پئسو خرچ ڪرڻ جي ضرورت ان ڪري نه رهي آهي جو حڪومت پوري صوبي ۾ اهڙا حفاظتي اپاء ورتا آهن جو هاڻي ماڻهن بيمار ٿيڻ ئي ڇڏي ڏنو آهي.بي روزگاري به خير جو سنڌ مان منهن مٿو پٽي ڪنهن ولايت ڏانهن منهن ڪري هلي ويئي آهي.ناليون ۽ گٽر اهڙي خودڪار سسٽم سان ڳنڍيا ويا آهن جو سوال ئي پيدا نٿو ٿئي جو انهن جو پاڻي ٻاهر رستن تي اچڻ جي همت ڪري سگھي.

ڳوٺ ڳوٺ ۾ مڇرن کي اهڙو ته موتمار ڦوهارو ڏنو ويو آهي جو مڇرن جا ڪئين ايندڙ نسل به ياد رکندا.واهن ۽ شاخن جا ترا سيمنٽ جي بدران چمڪندڙ شيشي سان پڪا ڪيا ويا آهن جو غريب آبادگارن کي هاڻي کيسي ۾ اضافي آرسي رکڻ جي ضرورت نه رهي آهي،بس پنهن جي ٻنيء جي ڪنهن ناليء جي مٿان وات پٽي هيٺ نهارين ته پنهن جا ٻٽيھ ئي ڏند ناليء جي چمڪندڙ تري ۾ ڏسي سگھن ٿا.اسڪولن کي پئسي جي ڪهڙي لوڙ! ڏوڪڙ اجايو ماسترن جو مٿو ڦيرايو ڇڏي پوء “ميري بلي ميري سي ميائون”ڪرڻ لڳن ٿا.ڀلا گذريل ٽن سالن کان مسلسل اسڪولين جو حقو پاڻي بند آهي تڏهن به ته اسڪول بند ته ناهن ٿيا. هونئن به اسڪولن کي جيڪر اهو پئسو ڏنو به وڃي ته اهي ڇا ۾ خرچ ڪندا؟ اسڪولن جا پکا يا موٽرون ٺهرائيندا يا وري ٻارن جي لاء ٿڌي پاڻيء جو ڪو بندوبست ڪندا يا فرنيچر جي مرمت ڪرائيندا يا وري ڪاغذ يا چاڪ وٺندا.

هن جديد دور ۾ڀلا چاڪن جو ڪهڙو ڪم! ماسترن کي گھرجي ته شاگردن کي ملٽي ميڊيا ذريعي فل سائيز اسڪرين تي سائنسي فلمون ڏيکارين،چاڪن کي هڻن کڏ۾! ڪاغذن جو اسڪول ۾ ڀلا ڪهڙو ڪم،ڪو پوليس ٿاڻو ته ناهي جو رپورٽون لکندا.اجايو ماستر موڪل جون درخواستون لکيو لکيو سرڪاري پنن جي ستيا ناس ڪيو ڇڏين.فرنيچر کان سواء به ته اسڪول هلي سگھن ٿا،بلڪه پٽ تي ويهڻ ۾ جيڪا سادگي ۽ مزو آهي اهو مٿي بينچن ۽ ڪرسين تي ويهڻ ۾ ڪٿي!رهيو ٻارن جي لاء ٿڌي پاڻيء وارو مسئلو ته ٿڌو پاڻي ڦڦڙن جي لاء نقصانڪار آهي،اجايو ٻارن ۽ استادن کي زوڪام۽ کنگھ ٿي پوندا جنهن ڪري تعليمي ماحول متاثر ٿيندو.حڪومت پڪو پھ ڪري ڇڏيو آهي ته ڪنهن به حالت ۾ تعليمي نظام کي برباد ٿيڻ نه ڏبو.هي جيڪي چند شوقين اسٽريٽ لائيٽون هڻائڻ لاء اجايو ٺينگ ٽپا ڏين ٿا تن کي بجليء جي اگھن جي ئي خبر ڪانهي.هونئن به ته رات جي ٻارهن ڪلاڪن مان ست ڪلاڪ بجلي لوڊشيڊنگ جي ڪري بند رهي ٿي ته پوء نادانن کان پڇو ته آخر حڪومت ان ڊيڊ اسڪيم جي لاء ڇو فنڊ مهيا ڪري.رات جي اونداهيء ۾ آخر شهرين جو رستن ۽ گھٽين ۾ ساھ ڇوٿو منجھي؟نه ته رستن تي ڪي بلائون آهن جيڪي خدانخواسته سندن کيچل ڪنديون،جيب ڪترن کي حڪومت اڳيئي جلاوطن ڪري ڇڏيو آهي،باقي گھٽين ۾ نڪي گٽر نڪي خچر نڪي مڇر پوء پريشاني ڇاجي!

خدا جو نالو وٺو ۽ ڇلانگ مٿان ڇلانگ هڻندا سڌو گھر پهچي وڃو ۽ حڪومت کي دعائون ڏيو.اڄ ڪلھ نيٽ ڏسي ڏسي نوجوانن جو مٿو خراب ٿي ويو آهي.چون ٿا ته راندين واري وزارت اسان کي راند جا گرائونڊ ٺهرائي ڏئي.ڏسو ٿا ماڻهن جي حالت! حڪومت وٽ ٻيا ڪم گھٽ آهن جو ويٺي عوام جا فضول شوق پورا ڪري.اول ته راند هئڻ نه گھرجي جو قوم جو قيمتي وقت انهن حرڪتن ۾ ضايع ٿئي ٿو.ٻيو ته جيڪر ڳوٺ ڳوٺ ۾ راند شروغ ٿي ويئي پوء حڪومتي پهلوانن جي راند ڪير ڏسندو؟ هڪڙا ٻيا “جاهل” به آهن جيڪي حڪومت کي چون ٿا ته شهرن ۾ پبلڪ پارڪ ٺهرايا وڃن ته جيئن شام جي وقت ماڻهو اتي تفريح لاء وڃي سگھن.بلي بلي! شوق ته ڏسو هن ترقي پسند قوم جا! پهرين ڳالھ ته پارڪن جي لاء زمين ڪٿان اچي؟پر جيڪر زمين هجي به سهي ته پارڪ ڪيئن ٿا ٺهرائي سگھجن جو پنهن جي اکين سان ڏسو پيا ته پارڪن ۾ خدانخواسته بمن جا ڌماڪا ٿين ٿا.نه پارڪ هوندا ۽ نه ئي ڌماڪا ٿيندا،ڀلي سزا هجي ڌماڪا ڪندڙن کي!ڪي شرارتي انٽرنيٽ تي نوجوانن کي ڀڙڪائين ٿا ته حڪومت کان مطالبو ڪيو ته اها اوهان کي ليپ ٽاپ وٺي ڏئي.پر جيڪر انهن کي اهي رانديڪا وٺي ڏيون ته ويٺا حڪومت سان چٿرون ڪندا ۽ انهن جو گھڻو وقت ليپٽاپ ذريعي نيٽ تي ئي ليپس ٿي ويندو ته پوء اهي ٽاپ ڪيئن ڪري سگھندا؟ جيڪي نڀاڳا چنڊا ڏوهاري جيلن ۾ واڙيا پيا آهن اهي به اها اميد رکيو ويٺا آهن ته حڪومت جيل کاتي کي پورا پئسا ڏئي ته جيئن جيلن جي حالت بهتر بڻائي سگھجي.قصو سمجھ کان ٻاهر آهي ڪيڏانهن جيل ڪيڏانهن سڌارا!انهن کي سمجھايو ته ماٺ ڪري جيڪا دال روٽي مليو ٿي سا کائي حڪومت جي وڏي عمر لاء دعائون گھرندا رهو.وڌيڪ شور ڪندا ته دال جي ديڳ ۾ هڪ بالٽي پاڻيء جي اڃا به وڌائي ڇڏبي، پوء خبر پوندي ته سڌارو ڇا ٿيندو آهي! سنڌ جي جھر جھنگ ۾ شڪراني جا نفل پڙهڻ گهرجن جو هاڻي سنڌ ترقيء جي اهڙي منزل تي پهچي چڪي آهي جو ترقياتي بجيٽ جو پئسو خرچ ڪرڻ جي لاء حڪومت کي ڪو رستو ئي نظر نٿو اچي!

shafiquershakir@gmail.com

 

 

Long Way! ڇا پاناما ليڪس واٽر لو ثابت ٿيڻ پئي وڃي؟: وينگس

پاڪستان جي سياست ۾ جيتري گرماگرمي ۽ جستجو اقتدار کي بچائڻ لاءِ نظر اچي ٿي، اوتري مشڪل سان عوام لاءِ نظر ايندي درحقيقت عوام لاءِ ڪڏهن آواز اُٿاريو ئي ناهي، انهن کي درد ۽ ڏک صرف ان وقت ياد ايندا، جڏهن ڪجهه سالن جي حڪومت هٿن کان نڪرندي نظر ايندي. جمهوريت جو کوڙو ڳايو ويندو ته عوام کي جمهوريت جي ضرورت آهي، عوام جي تڪليفن جو حل صرف جمهوريت ئي آهي، بيشڪ جمهوريت ئي سڀ ڪجهه آهي، پر اسان جي پياري ملڪ ۾ جمهوريت عوام جي درد جي دوا نه پر اميرن جي مفادن کي ٻيڻو ڪرڻ جو رستو بڻائي وئي آهي.

جڏهن به عوام پنهنجي تڪليفن لاءِ آواز اُٿاريو ته ان کي ڪنهن ٻڌو…؟

عوام جي درد تي چيو ويو ته هي صرف ٻين جي چوڻ تي روڊن تي اچن ٿو، اسان ملڪ جي ترقي لاءِ گهڻو ڪجهه ڪري رهيا آهيون. انهن کان ڪير اهو پڇي ته هيل تائين سواءِ اميرن جي ٺيڪن کي وڌائڻ لاءِ ميگا پراجيڪٽس وٺڻ کان اعلاوه ٻيو ڇا ڪيو ويو؟ ان جو فائدو عوام کي ڪيترو مليو؟ ان ڪري جمهوريت جو کوڙو ٻڌائڻ سان جمهوريت نه اچي ويندي، ان جي لاءِ نيت جو هجڻ انتهائي ضروري آهي.

مسلم ليگ (ن) پنهنجن گذريل حڪومتن جي وڃڻ تي ماتم ڪندي نظر پئي اچي، پر انهن کي اهو سڀ ڪجهه ياد ڇو ناهي ته مسلم ليگ (ن) کي اڄ تائين ڪنهن به پارٽي مهم هلائي ڪيرايو ناهي، جيئن انهن پاڻ مهم هلائي شهيد محترمه بينظير ڀٽو جي حڪومت کي ختم ڪرايو، پر انهن جي خلاف ڪير به اڳيان نه آيو. هاڻي جيڪڏهن عمران خان ڪجهه وقت ڌرڻا هنيا، پر ان سان مسلم ليگ (ن) جي حڪومت ختم نه ٿي، ان کي بچائڻ ۾به سياسي پارٽين اهم ڪردار ادا ڪيو. مطلب ته مسلم ليگ (ن) جي حڪومتن کي ختم ڪرڻ ۾ سياسي پارٽين ائين ڪردار ادا ناهي ڪيو جيئن خود مسلم ليگ (ن) ڪندي رهي آهي.

مسلم ليگ (ن) جو چوڻ آهي ته انهن پيپلزپارٽي کي حڪومت ڪرڻ ڏني، مسلم ليگ (ن) ان وقت به ائين زور لڳايو جيئن عمران خان اڄ لڳائي رهيو آهي ته حڪومت ختم ٿئي، ڇا يوسف رضا گيلاني کي هٽائڻ ۾ ميان نواز شريف پنهنجو ڪردار ادا نه ڪيو هو؟ ان وقت جي سپريم ڪورٽ سوو موٽو نوٽيس جنهن انداز سان ورتا، ان ۾ خوش مسلم ليگ (ن) نظر نه آئي؟

ميمو گيٽ تي مسلم ليگ (ن) ڪيتري نه جذباتي ٿي وئي هئي، سڀ ڪجهه آن دي رڪارڊ تي آهي. ائين ناهي ته پيپلز پارٽي عوام کي جنت ڏني هجي، پر هتي مسلم ليگ (ن) ۽ پيپلز پارٽي کي ڪوڊ ڪرڻ جو مقصد ته ٻنهي مان ڪنهن ڪيترو هڪٻئي جي خلاف قدم کنيا ۽ ڪنهن هر وقت مسلم ليگ (ن) کي بچائڻ لاءِ سمجهوتا سياست ڪئي.

پاناماليڪس ۽ سمجهوتا سياست!

پاناما ليڪس جي عالمي رپورٽ ۽ دنيا جا اڳواڻ ان ۾شامل آهن، پاڪستان جا اڳواڻ ڀل بهتر فهرست ۾ شامل هجن يا نه پر ڪرپشن جي ڪيسن جي فهرست ۾ ٽاپ تي ايندا، ان ۾ ميان نواز شريف به شامل آهي، غير ملڪ جي عوام جو امير وزيراعظم ميان نواز شريف. پاناماليڪس مان جيڪڏهن نواز حڪومت بچي وئي ته پوءِ هڪ ڳالهه طئي ٿي ويندي ته هن سياست مان اخلاقي سياست مري چڪي آهي ۽ جيڪڏهن ان ۾ ڪنهن پارٽي اگر مگر جي پاليسي اختيار ڪري سمجهوتا سياست ڪئي ته اها به اوتري ئي ڪرپشن ۾ برابر جي شريڪ ٿي سگهي ٿي، جيتري مسلم ليگ (ن) پاناما ليڪس ۾ آهي.

پاناما ليڪس تي ڪميشن جوڙي واضح ڪيو ويو ته ڪير درست ۽ ڪير غلط ڳالهائي رهيو آهي! معاملي کي دٻائڻ سان ڪجهه نه ٿيندو، جڏهن ڪرپشن جي الزامن تي ماضي ۾ ٻين جون حڪومتون جهٽ پل ۾ ڪيرايون ويون ته پوءِ هڪ پاناما ليڪس عالمي رپورٽ، جنهن ثبوتن سان ٻڌايو آهي ۽ خود وزيراعظم جا پٽ انٽرويوز ۾ اڻ سڌا اقرار ڪندا رهيا آهن، ان کان وڌيڪ ميان نواز شريف پاڻ قوم کي خطاب ڪري ٻڌايو ته سندس پٽن وٽ ڪيتري عمر ۾ جائيداد ۽ سرمائيڪاري ڪندڙ هئا ۽ بي بي سي جي هڪ انٽرويو ۾ وزيراعظم نواز شريف جو پٽ اهو چوندي ٻڌو ويو ته هڪ شاگرد جي حيثيت سان ان وٽ ڪجهه به ناهي.

جيڪڏهن ان وٽ ڪجهه به نه هو ته پوءِ فيڪٽريون ڪيئن لڳايون؟ ڳالهه صرف هڪ پاناما ليڪس جي ئي ناهي پر ان کانپوءِ جنهن انداز سان ڳالهيون خود نواز خاندان ڪندي نظر آيو آهي، ان تي پاناما ليڪس تي هڪ وڏي ڪميشن جوڙڻ گهرجي ۽ ان جو رڪارڊ سرد خاني ۾ موڪلڻ بجاءِ عوام آڏو پيش ڪيو وڃي ته آخر ڪنهن ڇا ڪيو؟

پاناما ليڪس تي سياسي پارٽين کي سمجهوتا سياست نه ڪرڻ گهرجي، ڇو جو هي معاملو ڪرپشن ۽ غلط بياني جو به آهي. پيپلز پارٽي جيڪڏهن ڪٿي سمجهوتا سياست ڪئي ته پوءِ اها سياسي طور تي پاڻ کي گهڻو ڪمزور ڪري ڇڏيندي ۽ اهڙي سياسي ڪمزوري کي ختم ڪرڻ مشڪل هوندو، پيپلز پارٽي ڪنهن به غير سياسي قدم جي سپورٽ نه ڪري ۽ نه ئي سمجهوتا سياسي ڪارڊ استعمال ڪري.

ملڪي سياست سمجهوتا سياست جيڪا صرف ڪجهه خصيص مفادن خاطر اختيار ڪري سياست کي ڪمزور ڪيو ويو آهي، ها جيڪڏهن سمجهوتا سياست عوام جي مفادن ۾ هجي ته ڳالهه به سمجهه ۾ اچي پر هتي سمجهوتا سياست صرف امير اڳواڻن کي محفوظ رستو ڏيڻ کانسواءِ ڪجهه ناهي. عوام ۽ جمهوريت جي نالي تي مذاق اڏايو ويو آهي. ايترو عوام کي بيزار نه ڪريو جو سڀاڻي عوام حقيقي آواز تي به اڳيان نه اچي. هاڻي ڏسون سياسي پارٽيون ڪهڙي پاسي بيهن ٿيون، لنڊن ياترا سياست جي ٽيبل تي سمجهوتا سياست جا ڪارڊ آڻيندي يا هن ڀيري جمهوري رستو اختيار ڪندي پاناما ليڪس تي ايمانداري سان فيصلو اڳيان ايندو.

پاناما ليڪس پاڪستان ۾ واٽر لو جي شڪل اختيار ڪندي!

جيڪڏهن پاناما ليڪس تي ايمانداري سان فيصلو اڳيان آيو ته پوءِ پاناما ليڪس واٽر لو جيان ثابت ٿيندي، جنهن ۾ نواز ليگ حڪومت کي ختم نه ٿيندي، ان سان گڏوگڏ ڪيس هلندا. خير اسان وٽ آرٽيڪل ڇهه تحت جڏهن آمر پرويز مشرف ٻاهر وڃي سگهي ٿو ته پوءِ نواز خاندان تي ڪيس ڪهڙو نتيجو ڏيندا؟ پر ان دوران حڪومت ختم ٿي سگهي ٿي.

ڇاڪاڻ جو ماضي ۾ صرف الزامن تي حڪومتون ختم ڪيون ويون، پوءِ هڪ رپورٽ جنهن جي نتيجي کان پوءِ حڪومت وٽ اخلاقي جواز ڪهڙو بچندو؟ ان ڪري موجوده سياسي ماحول ۾ پاناما ليڪس اڳتي هلي واٽر لو وانگر شڪل اختيار ڪري سگهي ٿي، اهو ان وقت ٿيندو، جڏهن پاناما ليڪس تي سمجهوتا سياسي ڪارڊ استعمال نه ٿئي.

 

 

پاناما ليڪس معاملو، سينيٽ چيئرمين به جواب ڏئي ڇڏيو…!

سينيٽ چيئرمين رضا رباني، پاناما ليڪس جي جاچ لاءِ ڪميشن جو سربراهه بڻجڻ کان معذرت ڪري ڇڏي، سندس چوڻ آهي ته هـُو سينيٽ چيئرمين ۽ ڪميشن جي سربراهي ڪرڻ سان مفادن جو تڪرار پيدا ٿيڻ جو خدشو آهي. هڪ بيان ۾ رضا رباني جو چوڻ هو ته پاناما ليڪس جي جاچ لاءِ ڪميشن جي سربراهه طور سندس نالو تجويز ڪرڻ تي هـُو اپوزيشن ليڊر خورشيد شاهه جو ٿورائتو آهي پر هن وقت مناسب ٿيندو ته هـُو سينيٽ چيئرمين طور ڪميٽي ۾ شامل ٿئي. هــُو پارليامينٽ خاص طور سينيٽ جي حقن جو ڪسٽوڊين آهي ۽ ڪميشن جي سربراهي ڪرڻ سان مفادن جو تڪرار پيدا ٿيڻ جو خدشو آهي.

پاناما ليڪس جي جاچ لاءِ حقيقتن تائين پهچڻ ڏکيو مرحلو آهي ڇو ته وائيٽ ڪالر ڪرائيم ۾ مهارت گهـُربل هوندي آهي جيڪا وٽس ناهي ڪنهن اهڙي شخص جو نالو تجويز ڪيو وڃي جنهن لاڳاپيل شعبي ۾ مهارت هـُجي.

حڪومت طرفان پاناما ليڪس جي جاچ لاءِ جسٽس رٽائرڊ سرمد عثمان جلالي جو نالو تجويز ڪيو ويو هو جنهن کي پ پ ۽ تحريڪ انصاف رد ڪري ڇڏيو هو، جڏهن ته خورشيد شاهه ڪميشن جي سربراهي لاءِ رضا رباني جو نالو تجويز ڪيو هو. پاناما ليڪس جي تحقيق واري طريقي تي حڪومت ۽ مخالف ڌر وچ ۾ پيدا ٿيل اختلاف اڃان تائين ختم نه ٿي سگهيا آهن، پيپلز پارٽي ان جي تحقيقت پارلياماني ڪميشن ذريعي ڪرائڻ چاهي ٿي، جڏهن ته پاڪستان تحريڪ انصاف چيف جسٽس جي سربراهي ۾ جوڊيشل ڪميشن ذريعي جاچ چاهي ٿي ۽ حڪومت رٽائرڊ جج جي سربراهي ۾ ڪميشن جوڙڻ جي ڳالهه ڪري رهي آهي.

ٻئي طرف حڪومت پاناما ليڪس تي سينيٽ چيئرمين جي سربراهي ۾ پارلياماني ڪميشن جوڙڻ واري پ پ جي تجويز کي نامناسب قرار ڏئي ڇڏيو آهي. اسحاق ڊار چيو آهي ته پاناما ليڪس معاملي تي انڪوائري ڪميشن ئي جوڙيو ويندو. سرڪاري ٽي وي موجب پنهنجي هڪ بيان ۾ ناڻي واري وفاقي وزير چيو ته پاناما ليڪس معاملي تي ڪجھه ڌرين سينيٽ چيئرمين کي ڪميشن جو سربراهه بڻائڻ جي تجويز ڏني هئي، پر سينيٽ چيئرمين کي انڪوائري ڪميشن جو سربراهه مقرر ڪرڻ واري تجويز مناسب نه هئي. پاناما ليڪس تي وزير اعظم جي اعلان مطابق انڪوائري ڪميشن جوڙي ويندي. انڪوائري ڪميشن سموريون قانوني گھرجون پوريون ڪرڻ کانپوءِ جوڙي ويندي. ڪميشن جو اعلان به گھرجون پوريون ٿيڻ کانپوءِ ڪيو ويندو .