تازيون خبرون

Daily Archives: April 8, 2016

شرڌا ڪپور هڪ ڀيرو وري برسات ۾ رومانس ڪندي نظر ايندي

ممبئي (شوبز نيوز) بالي ووڊ اداڪارا شرڌا ڪپور هڪ ڀيرو وري برسات ۾ رومانس ڪندي نظر ايندي، پنهجي پهرين فلم عاشقي 2 ۾ شرڌا ڪپور کي برسات ۾ فلمايل منظرن تي زبردست موٽ ملي هئي ۽ کيس تمام گهڻو پسند ڪيو ويو هو، جنهن کانپوءِ هن اها روايت برقرار رکندي اي بي سي ڊي ٽو ۽ وري ايڪ ولن ۾ به برسات ۾ ڪجهه منظر فلمبند ڪرايا، جن به ڏسندڙن جي دلين ۾ گهر ڪري ورتو، ڀارتي ميڊيا جي رپورٽن مطابق پهرين رومانوي، پوءِ ڊانس ۽ وري معصوم ڇوڪريءَ جي ڪردارن کانپوءِ هاڻ شرڌا ڪپور فلم باغي ۾ جيتوڻيڪ ايڪشن ڪردار ڪري رهي آهي پر هن پنهنجي چاهيندڙن جي خوشي کي نظر ۾ رکندي ان ايڪشن فلم ۾ به برسات ۾ رومانس ڪيو آهي، سندس فلم باغي جي هڪ گاني ڇم ڇم جو ٽيزر رليز ڪيو ويو آهي، جنهن ۾ هوءَ برسات ۾ ڊانس ۽ مستي ڪندي نظر اچي ٿي، فلمي ذريعن مطابق ان سڄي گاني ۾ شرڌا ڪپور برسات ۾ ڀڄندي نظر ايندي.001

 

انوشڪا شرما ۽ ويرات ڪوهلي وري هڪ، ٻنهي هوٽل ۾ گڏجي ماني کاڌي

ممبئي (شوبز نيوز) بالي ووڊ اداڪارا انوشڪا شرما ۽ سندس پريمي ڪرڪيٽر ويرات ڪوهلي ۾ هڪ ڀيرو وري ٺاهه ٿيڻ کانپوءِ ٻنهي هوٽل ۾ گڏجي ماني کاڌي، ڀارتي ميڊيا مطابق ڪجهه مهينا هڪ ٻئي کان ڌار رهڻ کانپوءِ انوشڪا ۽ ويرات وري هڪ ٿي ويا آهن، ان سلسلي ۾ جوڙِي کي ممبئي ۾ هڪ هوٽل مان گڏ ٻاهر نڪرندي ڏٺو ويو، جنهن دوران ٻنهي کي ڪاري رنگ جا ڪپڙا پهريل هئا، ان موقعي تي فوٽوگرافرن سندن تصويرون به ڪڍيون، ڀارتي ميڊيا مطابق 27 ورهين جي انوشڪا شرما ۽ 27 ورهين جي ويرات هوٽل ۾ رات جي ماني گڏ کاڌي ۽ پوءِ هڪ ئي گاڏي ۾ واپس روانا ٿي ويا.

اڳوڻن ڪرڪيٽرن سان ڳالهيون هلندڙ آهن، ملڪي ڪرڪيٽ ٽيم جي نئين سليڪشن ڪميٽي جو اعلان ٻن کان ٽن ڏينهن ۾ ڪيو ويندو: شهريار خان

لاهور(اسپورٽس نيوز) پي سي بي چيئرمين شهريار خان چيو آهي ته ملڪي ڪرڪيٽ ٽيم جي نئين سليڪشن ڪميٽي جو اعلان ٻن کان ٽن ڏينهن ۾ ڪيو ويندو. ان حوالي سان اڳوڻن ڪرڪيٽرن سان ڳالهه ٻولهه ٿي آهي. هڪ انٽرويو ۾ ڳالهائيندي شهريار خان چيو ته محسن خان چيف سليڪٽر جو عهدو قبولڻ کان انڪار ڪري ڇڏيو آهي. ٽيم جي هيڊ ڪوچ لاءِ اشتهار ڏئي ڇڏيو آهي، جلد اميدوار جو مقرري ڪئي ويندي. هن چيو ته شاهد آفريدي جو ٽي ٽوئنٽي جي ڪپتان ڇڏڻ وارو فيصلو سٺو عمل آهي. هو رانديگر جي حيثيت سان کيڏي سگهي ٿو. شهريار خان چيو ته سرفراز احمد کي اڳ ئي ڪپتان ان لاءِ مقرر ڪيو ويو آهي ته جيئن هو ذهني طور تيار ٿي وڃي. پي سي بي چيئرمين وڌيڪ چيو ته ٽيسٽ ڪپتان مصباح الحق جي آئندي بابت جلد کانئس پلان معلوم ڪندس. هن چيو ته جلد سليڪشن ڪميٽي جو اعلان ڪيو ويندو، ان لاءِ ڪيترن ئي ڪرڪيٽرن سان ڳالهه ٻولهه ٿي آهي، جن جا نالا نٿو ٻڌائي سگهان. شهريار خان چيو ته هارون رشيد محنتي ۽ ايماندار شخص آهي، کيس مستقبل ۾ ٻي ذميواري ڏني ويندي.

 

سرفراز کي ڪپتان بڻائڻ سٺو فيصلو آهي، حفيظ کي جيڪو چوڻو آهي رٽائرمينٽ کانپوءِ چوي: وسيم اڪرم

ڪراچي(اسپورٽس نيوز) پاڪستان ڪرڪيٽ ٽيم جي اڳوڻي ڪپتان وسيم اڪرم سرفراز احمد کي ٽيم جو ڪپتان بڻائڻ جي آجيان ڪندي چيو آهي ته جيڪڏهن محمد حفيظ کي ڪا شڪايت آهي ته اهو پي سي بي چيئرمين کي ٻڌائي. ڪالهه ڪراچي ۾ ڳالهائيندي اڳوڻي ڪپتان وسيم اڪرم چيو ته اسان ڪرڪيٽ ۾ هڪ ليڊر کي فالو نه ٿا ڪري سگھو، ٽن کي ڪيئن ڪنداسين، پي سي بي ٽنهي فارميٽ جي ڪرڪيٽ لاءِ ڌار ڌار ڪپتان مقرر نه ڪري. هڪ ئي ڪپتان رکڻو پوندو. هن چيو ته  سرفراز احمد کي ڪپتان بڻائڻ وارو فيصلو سٺو آهي، محمد حفيظ کي ڪا شڪايت آهي ته پي سي بي چيئرمين سان ڪري حفيظ کي سينٽرل ڪانٽريڪٽ جو خيال رکڻ گھرجي، کيس جيڪو چوڻو آهي رٽائر ٿيڻ کانپوءِ چوي. هن چيو ته اهڙو ڪوچ نه گھرجي جيڪو هڪ هر سيريز کان پوءِ گھر هليو وڃي. پي سي بي ڪوچ کي ڳري رقم معاوضي طور ڏيندو آهي، پاڪستان جي ڪرڪيٽ کي اهڙين بلندين تائين پهچائيندڙ ڪوچ گھرجي جيڪو پورو پلان جوڙيندو هجي. وسيم اڪرم وڌيڪ چيو ته ڪوچ جي ذميواري هوندي ته اهو اي ٽيم، اڪيڊمي تي به ڌيان ڏئي. ڪوچ پاڪستاني هجي يا پرڏيهي، جيڪو به اچي پوري پلان سان گڏ اچي.37

 

“ مٽي پائو پاليسي ” جون ڪرامتون!: شفيق شاڪر

خدا ڀلو ڪري ٽن مهينن جي مهمان اڳوڻي حادثاتي وزيراعظم، چوڌري شجاعت جو جنهن پنهن جي شجاعت ڀري “ مٽي پائو پاليسي” ملڪ ۾ متعارف ڪرائي پاڪستاني قوم توڙي حڪمرانن کي وڏن وڏن مونجھارن ۽ مشڪلن کان محفوظ بنائي ورتو.چوڌري صاحب جا دشمن به سمورن سياسي اختلافن باوجود اهو مڃڻ تي مجبور آهن ته ڪيترين ئي سياسي ۽ اخلاقي خوبين ۾ پاڪستاني سياستدانن ۾ چوڌري صاحب جو ڪو مثال ناهي!جهڙوڪ سندس شرافت،سادگي،سچائي،برداشت، شائستگي،  نرم مزاجي،۽ مهمان نوازي سندس منفرد خوبيون آهن.( اضافي خوبي ؛ اقتدار جي ايوان ۾پوئين کڙڪيء مان ٽپڻ جي عادت!) سو جهڙيء طرح سندس مهمان نوازي عام آهي اهڙيء طرح هن جون صلاحون به سياستدانن ۽ عوام لاء عام هونديون آهن. پر جڏهن ڪا صلاح مفت ۾ ملندي هجي ته ماڻهو اجايو اهڙين شين تي شڪ شبها ظاهر ڪندا آهن ۽ مفت ۾ مليل شين جو قدر نه ٿيندوآهي.بهرحال گھڻي غور ويچار کان پوء پاڪستانين کي چوڌري صاحب جي “ مٽي پائوپاليسي” اهڙي ته دل سان لڳي آهي جو هرهڪ ٽپا ڏيئي رهيو آهي ته ان پاليسيء تي ان جي پوري روح مطابق عمل ڪرڻ جو کيس موقعو ڏنو وڃي!

جڏهن اڳوڻي فوجي صدر ۽ “پهرين پاڪستان پراڊڪٽ” جي باني محترمي و مڪرمي عزت مآب جناب پرويز مشرف ڀائيء سان حڪومت “راند ”ڪرڻ جي نيت ڪئي هئي تڏهن به چوڌري صاحب پوري خلوص سان حڪومت ۽ ڪجھ ٻين“ مٿي ڦريلن” کي “مٽي پائو پاليسيء” سان وات مٺو ڪرڻ جي صلاح ڏني هئي پر ان وقت سياستدانن جي بيٽري تازو کٽي آيل عوامي اليڪشن جي پاورسان ايترو ته چارج هئي جو انهن چوڌري صاحب جي صلاح ٻڌندي ئي  مستيء ۾ اڃا به وڌيڪ دڙا هڻڻ شروع ڪري ڏنا.ڪنهن چيو ته ٽنگيوس، ڪنهن چيو لٽڪايوس. ڪنهن چيو سبق سيکاريوس،ڪنهن چيو ته اڍيالا جيل جي هوا کارايوس.مطلب ته “ جيترا اٺ انهيء کان به ٽيڻ تي بوڙيون!” پر آخر سڀني جي کوپرين  ۾  “مٽي پائو” پاليسيءجي فوائد ۽ ثمرات جي برڪتن واري ڳالھ اچي ويئي. جڏهن عظيم بادشاهي تخت تي ويٺل سياڻي راجا پنهن جي درٻارخاص اها راء معلوم ڪرڻ جي لاء منعقد ڪئي ته “ ٻڌايو وڃي ته ڏوهاريء سان ڇا سلوڪ ڪيو وڃي؟”ته نورتنن يڪ زبان ٿي عرض ڪيو، “ بادشاه سلامت!تسان هڻ مٽي پائو ني.”جواب ۾ بادشاه غصي ۽ حيرت ڀريل نظرن سان انهن ڏانهن ايئن ڏٺو ڄڻ ته کين ڪچو ڳڙڪائي ويندو پر بادشاه فرمايو،“ اسان ڪڏهن پنهن جي قول تان پوئتي ناهيون هٽندا پر جيڪر وفادار رتنن جي مرضي اها ئي آهي ته بس پوء ان معاملي تي رڳو مٽي نه پائو پر ڇائي به پائو.” چوڌري صاحب کي کيرون هجن جو هن جي اها “مٽي پائو پاليسي پروڊڪٽ” بنان ڪنهن اشتهاري خرچ جي خود بخود ملڪ ۾ هلڻ شروع ٿي ويئي آهي.

ممتاز قادريء جي چاليهي واري تقريب کان پوء جڏهن هزارين جھنڊي بردار ۽ ڏنڊي بردار ماڻهو راولپنڊيء جون حدون اورانگھي وزارت داخلا واري شهر اسلام آباد ۾ داخل ٿيا ان وقت توڙي جو پنڊي واري چوڌري صاحب کي ڏاڍي چڙ آئي ۽ چيائين ته انهن قانون دشمنن سان لفظن نه پر لٺين ذريعي نبربو.پر هو ان معاملي ۾ منجھي پيو ته لٺيون هلائيندو ڪير! .چوڌري صاحب جيسين ڪو فيصلو ڪري ڪي ڪري تيستائين حڪومتي ڪپتان پنهن جن ٻن رانديگرن کي ترت گجرات واري چوڌريء جي “ مٽي پائو”  پاليسيء تي عمل ڪرڻ لاء چيو.دير ئي ڪانه ٿي اسلام آباد ۾ ڪجھ ئي دير ۾ اهڙو سناٽو ڇانئجي ويو جو ڪڪڙن جون ٻانگون بڌڻ ۾ پئي آيون.اهو هو “ مٽي پائو پاليسي” جو ڪمال!

27  مارچ تي اقبال پارڪ ۾ ٿيل سانحي کان پوء عسڪري قيادت بادشاه سلامت کان پڇڻ سواء ئي پنجاب ۾ رينجرز آپريشن شروع ڪري ڇڏيو.بادشاه سلامت ناراض هئا ۽ سپھ سالارن کي الڳ تشويش هئي.پنجاب جو راجا،بيت المال جو داروغو ۽ “الوزير لسلامتيه الداخلا باڪستان”، پهريائين بادشاه سلامت ۽ پوء پنڊيء وارن کي عرض ڪيو ته “ جي، مٽي پائو.” ۽ ڪم ٺهي ويو،رٺل پرچي پيا.اها آهي “ مٽي پائو پاليسي پراڊڪٽ ” جنهن جا ڪرشما ، فوائد ۽ ثمرات ڪهڙا لکي ڪهڙا لکون!( ڪي ڪي نه جادو ڪيتا اڪ “مٽي پائو” ني)

شهيد ڀٽي جي ورسي ملهائڻ لاءسنڌ جي راجا سخاوت جا دريا وهائيندي عوامي بيت المال مان اڍائي ڪروڙ جاري ڪرڻ لاء ڀل چڪ مان هڪڙو ليٽر ڇا جاري ڪيو جو سڀ “عوام دشمن” اصل راجا جي پويان پئجي ويا.جڏهن هڪڙي شاهي شهزادي کي خبر پيئي ته هن راجا تي سخت ڪاوڙ جو اظهار ڪندي اهو شاهي حڪم جاري ڪيو ته “ اها جاچ ٿيڻ گھرجي ته اسان جي راڄ ۾ هيڏي وڏي بدديانتي اسان جي سو سيڪڙو هتي موجود هوندي ڪيئن ٿي؟ خبردار! ڪنهن کي به بخش نه ڪيو ويندو.” ٻئي ڏينهن تي ڪيترن ئي تجربيڪار درٻارين شهزادي کي هٿ ٻڌي سمجھايو ته “ حضور! مٽي پائو.توهان کي خبر ناهي ڪنهن مس گائيڊ ڪيو آهي، پاڪستان ۾ ان کي بديانتي نه چئبو آهي!.” بس پوء ان “مٽي پائو”جي ڪرامت ڏسو جو شينهن ۽ ٻڪري ساڳئي تلاء تي پاڻي پيئڻ لڳا.

ڳجھن ادارن ڪوڙڪيون وڇائي وڏي مشڪل سان هڪ پرديسي پکي پڪڙيو پر جڏهن حڪومت سڳوريء کي ان پکيء جون ٻوليون عالمي اوطاق تي ٻڌائڻ لاء زور ڀريو ويو ته حڪومت چيو،“ جي،مٽي پائو!”جنهن ڪري انڊيا ۽ پاڪستان جا عظيم لاڳاپا خراب ٿيڻ کان بچي ويا.

ڪجھ عرصي کان“ پاڪستان سر!سر! پارٽي”جا صاف سٿرا اڳواڻ ڪورس جي انداز۾ ڪرپشن ترانو را..را..را..جي سرگم تي ڳائيندا ٿا اچن جنهن ۾ دنيا جي ڏوهن واري ڊڪشنري  مان هنن ڪي به اهڙا لفظ نه ڇڏيا آهن جن جو سهرو گھوٽ الطاف کي نه ٻڌائون هجن.پر هن “ويچاري” اهي ڏوه جن “معصومن” جي ذريعي ڪيا،جن جي نازڪ هٿن ماڻهن جا گلا ڪپيا، جيڪي را…را..را ..جي راڳ جا هيرو  آهن، جيڪي اڄ به مائي ڪلاچيء جي ڇاتيء تي چڙهيو ويٺا آهن جڏهن انهن ڪمالين کان پڇجي ٿو ته انهن “معصومن ” سان ڪهڙو سلوڪ ٿيڻ گھرجي ته جواب ۾ اهائي گجراتي ترڪيب ٻڌڻ لاء ملي ٿي ته “ جي،…ماضيء جي انهن سڀني معاملن تي مٽي پائو.”…!!!

اڻ ڄاڻن جي لاء اشتهار؛ سنياسي سياستدانن جي سو سالا تجربن جي روشنيء ۾نظريه ضرورت جي آٽوميٽڪ پلانٽ ذريعي تيار ڪيل اهڙي پاڪستاني پراڊڪٽ جيڪا ٻه سو سيڪڙو رزلٽ ڏئي ٿي. هن پراڊڪٽ جا ڪي به مضر اثرات  اڃا سامهون نه آيا آهن تنهن هوندي به اصول پسنديء جي مرض ۾ مبتلا مريض هن پروڊيڪٽ کي پنهن جي ضمير جي اڳواٽ مشوري کان سواءهرگز استعمال نه ڪن.ايڪسپائيري ڊيٽ معلوم ڪرڻ لاء عوام جي افعالن ۽ حرڪتن تي ڪڙي نظر رکڻ گھرجي.موثر ۽ ترت نتيجا حاصل ڪرڻ لاء سچ ڳالهائڻ کان پرهيز لازمي آهي.

********

 

 

جي ڊي اي جو آواز نئين اميدن جو  آغاز …! : جاويد احمد چانڊيو

سياسي جماعتن جو هڪ پليٽ فارم تي گڏ ٿيڻ سان عوام جو اعتماد بحال ٿيندو آهي.سياسي جماعتن جا گڏيل اتحاد ڪاميابي جي ضمانت پڻ هوندا آهن. ماضي ۾ به سياسي ڌرين جا اتحاد ٺهندا رهيا آهن .سياسي ڌرين جو ڪنهن به اشو تي گڏ ٿيڻ ڪا نئين ڳالهه ۽ تعجب نه هوندو آهي. ملڪي ۽ صوبائي سطح تي سياسي ڌرين جا ٺهندڙ اتحاد جمهوريت جو حصو هوندا آهن.پاڪستان ۾ سياسي جماعتن کي هڪ پليٽ فارم تي گڏ ڪرڻ جو اعزاز بزرگ سياسي اڳواڻ نواب زاده نصرالله خان (مرحوم)وڏي مقبوليت ماڻي ورتي هئي ،نوابزاده نصرالله خان جو اڪثر سياسي جماعتن جا سربراهه احترام ڪندا هئا.۽ حڪومتن خلاف سياسي جماعتن کي هڪ پليٽ فارم جمع ڪرڻ ۾ هن جو وڏو ڪردار رهيو آهي.گڏيل اتحاد وسيلي تحريڪ هلائڻ ۽ حڪمرانن کي گهر ڀيڙو ڪرڻ ۾بھ نوابزاده نصرالله جو وڏو ڪردار هوندو هو.ان ڪري نوابزاده نصرالله خان کي بابا ءِ جمهوريت به سڏيو ويندو هو. هن وقت به ملڪي توڙي صوبائي سطح تي سياسي ماحول گهڻو سرگرم ڏسڻ ۾ اچي رهيو آهي.پ پ حڪومت مسلسل 8سالن کان وڌيڪ عرصو هجڻ جي باوجودبه عوام جا اڪثر مسئلا حل ڪرڻ ۾ ناڪام وئي آهي.عوام احساس محرومي جو شڪار آهي.موجوده دور ۾ به سنڌ ۾ مختلف سياسي ڌرين پ پ حڪومت جي غلط ۽ ناڪام پاليسن  خلاف ۽ عوام جا مسئلا حل نه ٿيڻ خلاف پ پ حڪومت خلاف محاذ جو ڙيو ويو آهي.سنڌ جون مختلف سياسي جماعتون هڪ پليٽ فارم تي گڏ ٿيون آهن. سنڌ جي ممتاز تجربيگار سياستدانن (ف) مسلم ليگ جي سربراهه حضرت پيرصاحب سيد صبغت الله شاهه راشدي( پير صاحب پاڳارو) جن جي سربراهي ۾ بڻجندڙ پ پ خلاف سياسي مورچو گرينڊ ڊيمو ڪريٽڪ الائنس ٺهي چڪو آهي.هن اتحاد ۾ (ف) مسلم ليگ (ن) مسلم ليگ سنڌ عوامي اتحاد پارٽي،سنڌ يو نائيٽيڊ پارٽي ،قومي عوامي تحريڪ پ پ ورڪرز پارٽي ، تحريڪ انصاف راڄو ڻي اتحاد کان سواءِ ٻيون سياسي پارٽيون شامل آهن، سنڌ جا نالي وارا سياستدان سيد پير صدرالدين شاهه راشدي، سردار ممتاز علي ڀٽو.سيد غوث علي شاهه، ڊاڪٽر ذولفقار مرزا ،لياقت علي جتوئي. ڊاڪٽر ارباب غلام رحيم، سسيد جلال محمود شاهه، محمد اسماعيل راهو ،غلامرتضيٰ جتوئي عرفان الله مروت .شهر يار مهر،نصرت سحر عباسي، ڄام مدد علي ڪاشف علي نظاماڻي.ڊاڪٽر غلام عباس مهيسر. سميت ٻيا اڳواڻ گهڻو سرگرم آهن. سنڌ ۾ سياسي هلچل جو آغاز شروع ٿي چڪو آهي.

جي ڊي اي جي مرڪزي اڳواڻن جو عوامي رابطه مهم جي سلسلي ۾ مير پور خاص،ٽنڊو الهيار پهچڻ تي والهيانه استقبال ڪيو ويو.جڏهن ته سنڌ جي تاريخي شهر عمرڪوٽ ۾ شاندار جي ڊي اي جلسو ڪيو جنهن ۾ لکين عوام جي شرڪت اهو ثابت ڪيو ته جي ڊي اي کي وڏي عوامي پذيرائي حاصل آهي. سنڌ جي عوام جو جي ڊي اي  آواز  بڻجي چڪي آهي،عوام جو لکن جي تعداد ۾ گڏ ٿيڻ جي ڊي اي جي ڪاميابي جي علامت ظاهر ڪري ٿو. جلسي ۾ جوش جذبو ۽  اهو هرگز نه ٿو چئي سگهجي ته ڪو سرڪاري ملازمن کي زبردستي اچڻ جو پابند ڪيو ويو هجي، ان ڪري جلسو ڪامياب ٿيو آهي عوام جو رضاڪارانه جلسي ۾ شرڪت ۽ ذاتي خرچ ڪرڻ چاهت ۽ جي ڊي اي تي اعتماد آهي.ڪامياب جلسو  عوامي تبديلي جي شروعات آهي جڏهن ته جي ڊي اي اڳواڻ سنڌ جي ٻين علائقن ۾ به مرحلي وار سياسي عوامي طاقت جو مظاهرو ڪندا.ٻئي طرف موجوده سنڌ جي وڏي وزير سيد قائم علي شاهه ۽ پ پ سرڪار جي عهديدارن وزيرن اها پڻ وضاحت ڪئي آهي ته گرينڊڊيمو ڪريٽڪ الائنس جي ڊي اي ڪو به اشو ۽ عوامي پروگرام نه آهي خبر ناهي ته ٽانگا پارٽيون ڪهڙو مقصد کڻي نڪتيون آهن. ماضي ۾ پ پ خلاف ڪيترائي اتحاد قائم ٿيا۽ جيڪي ناڪام ٿيا. پ پ حڪومت کي انهن اتحادن مان ڪو به خطرو نه آهي. سنڌ ۾ پ پ جي حڪومت ترقي خوشحالي ڏانهن وڃي رهي آهي،پ پ وڌ ۾ وڌ عوام کي روزگار ڏنو آهي،سنڌ جي وڏي وزير سيد قائم علي شاهه صاحب جن جو اهو به چوڻ آهي ته پ پ مخالفين پنهنجي اکين ۽ نظرن جو معائنو ڪرائن ڇو ته سنڌ هن وقت ترقي ڪري رهي آهي پ پ مخالفين کي ڪجهه به ڏسڻ ۾ نه ٿو اچي،پ پ اڄ به اٽي لٽي اجهي جي نعري تي قائم آهي،پ پ کي ڪو به ختم نه ٿو ڪري سگهي. جي ڊي اڳواڻن کي عوام رد ڪري چڪي آهي،انهن کي عوام جي حمايت حاصل نه آهي،سنڌ جي وڏي وزير سيد قائم علي شاهه صاحب جن جو فرمان پنهنجي جاءِ تي سوچ درست اندازولڳائڻ اهو هڪ الڳ مسئلو آهي،هر هڪ ڌر کي پنهنجو موقف بيان رکڻ جو پورو حق حاصل آهي.گرينڊڊيموڪريٽڪ الائنس جي ڊي اي جا اڳواڻ سنڌ جا ٻرندڙ مسئلا کڻي عوام جي عدالت ۾ حاضر ٿيا آهن.سنڌ جا جيڪي اهم اشو آهن خبر ناهي پ پ جي صوبائي سرڪار کي نظر نه اچي رهيا آهن .ڇا سنڌ جو عوام ڪرپٽ مافيا جي ٿيندڙ ڪرپشن  کان واقف نه آهي ۽ هر قسم جي ڪرپشن جو خاتمو گهري ٿو ؟ پ پ پاران چورايل مينڊيٽ عام اليڪشن 2013کان ويندي مڪاني ۽ ضمني چونڊن کي صاف شفاف ڌانڌلين کان پاڪ رهيون؟ سرڪاري مشينري جي مداخلت سبب پ پ مخالفين تي ڪوڙا ڪيس داخل ڪري وفاداريون تبديل ۽ حراساڪرڻ حڪومتي ڏاڍ تي زبردستي ڪري عوام جو اصل فيصلو رد ڪيو ويو آهي،چند مثال ڏجن ٿا سنڌ جي ضلعن سانگهڙ ،دادو ،ٿرپارڪر، بدين. ٺٽو ،خيرپور۾ ٿيل ڌانڌليون ڪنهن کان به ڳجهيون ۽ لڪيل نه آهن،خيرپور ناٿن شاهه ۽ موري ۾ ٿيل ضمني چونڊن ۾ ويران پولنگين پ پ کي اڪثريت ڪيئن حاصل ٿئي ۽ ٺپا مافيا آزادي سان پنهنجو  ڪم ڪري ڏيکاريو ؟ اهو کڻي سچ تسليم کڻي ڪجي ته خيرپور ناٿن شاهه ۾ سنڌ عوامي اتحاد پارٽي جو سربراهه لياقت علي جتوئي پ پ تي ڌانڌلين جا الزام لڳائي بائيڪاٽ ڪري ڇڏيو هو. ته پ پ لاءِ رستو صاف رهيو.هوڏانهن موري ۾ مسلم ليگ (ن) جو اميدوار رئيس مسروراحمد خان جتوئي به ضمني چونڊن ۾ پ پ تي ڌانڌلين جو الزام لڳائي بائيڪاٽ ڪيو.۽ پ پ لاءِ رستو صاف رهي ٿو ۽يقينن پ پ جي ڪاميابي جو انڪار نه ٿو ڪري سگهجي.ضمني چونڊن ۾ پولنگن جو ويران هجڻ باوجود وڏي ليڊ سان پ پ جو ڪامياب ٿيڻ ڪيتري ڌانڌلي ثابت ڪري ٿي؟ سنڌ ۾ بک بدحالي مفلصي بي روزگاري .زراعت جي تباهه ڪاري. بدامني مهانگائي،ڪرپشن عروج تي آهي.ماضي جي خوشحال سنڌ جا ماڻهون مرد عورتون وڏيون ڊگهيون قطارون ٺاهي بينظير انڪم سپورٽ تحت امداد جا منتظر هوندا آهن .ان کي ڪهڙو ناءُ ڏجي ته خوشحال سنڌ جا ماڻهون غربت مفلصي تنگي لاچاري سبب وڏيون قطارون ٺاهي امداد وٺڻ جا حقدار بڻجي ويا آهن پوءِ سنڌ جي خوشحالي ترقي وارو دور ڪٿي آهي؟ ڪرپشن ختم ڪرڻ جو پ پ سرڪار تصور به نه ٿي ڪري ته ڪرپشن ڪٿان ختم ٿيندي؟ اگر سچائي آهي ته فرار ٿيندڙ لٽيرن کي انٽرپول ذريعي گرفتاري يقيني بڻايو وڃي،انهن خلاف اسيمبلي ۾ سزاجو بل پاس ڪيو وڃي.سرڪاري نوڪريون وڪرو ڪندڙن ۽ جعلي آڊرن ڏيندڙن خلاف ڪاروائي ڇو نه ٿي ٿئي؟سنڌ جا تاريخي شهر ڪرپشن جي وڌنڌڙ ناسور سبب موهن جو دڙو بڻجي ويا آهن انهن جو سڌارو ڪير ڪندو؟ تعليم يافته نوجوان ڊگريون هٿن کڻي وزيرن ۽ ڪامورن جي درن تي ڌڪا کائي رهيا آهن ۽ نوجوان بي روزگاري سبب خودڪشيون ڪري رهيا آهن. ڇا ان حقيقتن کي ڪوڙقرار ڏجي؟ ڌانڌلين جي ذريعي چونڊيل نمائدا عوام جي حقيقي خدمت ڪري سگهندا؟سنڌ ٻين صوبن کان وڌيڪ مسئلستان بڻجي وئي آهي. هر طرف گندگي جا ڍير ٿيڻ ڪنهن جي ناڪامي ڪري ڪوٺجي؟ پيئڻ ۽ زراعت لاءِ پاڻي فراهم ڪرڻ ڪنهن جي ذميواري آهي ؟ بدامني جي باهه ختم ڪير ڪندو ؟هن وقت سنڌ ۾ مختلف سياسي جماعتن گڏيل پليٽ فارم طور گرينڊ ڊيموڪريٽڪ الائنس جي ڊي اي سنڌ جو حقيقي ڪيس کڻي عملي طور ميدان تي نڪتي آهي عوام ان سان گڏ آهي. جيڪا عوامي اميدن پورو لهندي. جي ڊي اي جتي به پروگرام ڪندي عوام ان جو ڀرپور ساٿ ڏيندو .عوام مسئلا حل چاهي ٿو.۽ حالاتن مان اندازو لڳائي سگهجي ٿو

ته تبديلي اڻٽر بڻجي چڪي آهي.

 

 

غيرملڪي ايجنسين جي سرگرمين تي ڳڻتي

سياسي ۽ عسڪري قيادت پاڪستان ۾ ڀارت جي ڳجهي ايجنسي را سميت غيرملڪي ايجنسين جي سرگرمين تي سخت ڳڻتي جو اظهار ڪندي معاملو عالمي سطح تي کڻڻ جو فيصلو ڪيو آهي. اهڙو فيصلو وزيراعظم جي صدارت ۾ ٿيل قومي سلامتي ڪميٽي جي اجلاس ۾ ڪيو ويو. اجلاس ۾ آرمي چيف جنرل راحيل شريف، چيئرمين جوائنٽ چيفس آف اسٽاف ڪميٽي جنرل راشد محمود، اسحاق ڊار، چوڌري نثار، ڊي جي آءِ ايس آءِ، قومي سلامتي بابت وزيراعظم جي صلاحڪار ناصر خان جنجوعه ۽ ٻين شرڪت ڪئي.

اجلاس ۾ دهشتگردي جي خاتمي لاءِ جاري ڪاررواين جو تفصيلي جائزو ورتو ويو جڏهن ته ملڪي سلامتي ۽ سرحدي سيڪيورٽي تي پڻ خيالن جي ڏي وٺ ڪئي وئي. جڏهن ته قومي سلامتي ڪميٽي دهشتگردي خلاف آپريشن تي اطمينان جو اظهار ڪندي فيصلو ڪيو ته آخري دهشتگرد جي خاتمي تائين آپريشن ضرب عضب جاري رهندو جڏهن ته اجلاس ۾ سول ۽ عسڪري قيادت ملڪ ۾ ڀارتي ڳجهي ايجنسي را جي مداخلت سميت ٻين ايجنسين جي سرگرمين تي سخت ڳڻتي جو اظهار ڪندي ان کي عالمي سطح تي کڻڻ جو فيصلو ڪيو جڏهن ته اجلاس ۾ آمريڪا ۾ ٿيندڙ جوهري سلامتي ڪانفرنس، آمريڪا کان ايف 16 جهازن جي خريداري ۽ هٿياربند فوج جي ترقياتي پروگرامن جو به جائزو ورتو ويو. ذريعن جو چوڻ آهي ته اجلاس ۾ سياسي ۽ عسڪري قيادت پاران ملڪ اندر پرڏيهي ڳجهن ادارن جي سرگرمين ۽ پاڪستان کي غير مستحڪم ڪرڻ وارين ”را“ جي ڪوششن تي ڳڻتي ظاهر ڪئي وئي. اجلاس ۾ فيصلو ڪيو ويو ته ملڪ اندر پرڏيهي ايجنسين جي ايجنٽن جي سرگرمين وارو معاملو عالمي سطح تي اٿاريو ويندو. اجلاس کي خطاب ڪندي وزيراعظم نواز شريف چيو ته پاڪستان جو ايٽمي پروگرام محفوظ هٿن ۾ آهي، دهشتگردي جي خاتمي لاءِ سڪيورٽي ادارن جي قربانين کي سڄي دنيا ۾ ساراهيو پيو وڃي. اجلاس ۾ دهشتگردي خلاف هلندڙ ڪارروائين جو جائزو ورتو ويو ۽ آپريشنز تي اطمينان جو اظهار ڪيو ويو، ان موقعي تي ڪجهه ڏينهن اڳ آمريڪا ۾ ٿيل ائٽمي سلامتي ڪانفرنس، ايف 16 جهازن جي خريداري ۽ پاڪ فوج جي ترقياتي پروگرمن جو به جائزو ورتو ويو، واضح رهي ته ڪالهه سيڪيورٽي فورسز پاڪ افغان بارڊر تي ڪارروائي ڪري افغان انٽيليجنس جي آفيسر کي گرفتار ڪيو، گذريل مهيني ساڳئي علائقي مان را جي حاضر سرورس آفيسر کي به گرفتار ڪيو ويو هو.