تازيون خبرون

Daily Archives: April 6, 2016

ڪجهه معاملن ۾ پنهنجي اندر ۾ باغي آهيان:شرڌا ڪپور

ممبئي (شوبز نيوز) بالي ووڊ اداڪارا شرڌا ڪپور پنهنجي انيندڙ فلم ”باغي“ ۾ هڪ باغي ڇوڪري جو ڪردار ڪري رهي آهي ۽ سندس چوڻ آهي ته هوءَ ڪجهه معاملن ۾ پنهنجي اندر ۾ به باغي آهي، ليڪ مي فيشن ويڪ جي موقعي تي هڪ ڀارتي خابرو اداري سان ڳالهائيندي شرڌا ڪپور چيو ته هوءَ ان خيال کي رد ڪري ٿي ته بنا ڪنهن مقصد جي باغي بڻجي وڃجي، هن چيو ته مان ڪنهن مقصد لاءِ باغي بڻجڻ چاهيان ٿي، اهو مقصد ڪهڙو به ٿي سگهي ٿو، جنهن ۾ مان يقين رکندي هجان، باقي بنا ڪنهن مقصد جي باغي بڻجي وڃن جي حامي ناهيان، شرڌا ڪپور جي فلم ” باغي“ ۾ سندس هيرو ٽائيگر شيروف آهي

 

نوجوانن کي متاثر ڪرڻ لاءِ سهڻو نظر اچڻ لازمي آهي:دويا کوسلا ڪمار

ممبئي (شوبز نيوز) بالي ووڊ ۾ اداڪاري کانپوءِ هدايتڪارا بڻجي ويل دويا کوسلا ڪمار چيو آهي ته مون لاءِ سهڻو نظر اچڻ اهم آهي ته جيئن نوجوان منهنجي ان اسٽائل جي پوئلڳي ڪن، ليڪ مي فيشن ويڪ جي موقعي تي هڪ ڀارتي خابرو اداري سان ڳالهائيندي دويا کوسلا چيو ته فيشن تمام گهڻُو اهم آهي، هر ماڻهو کي هر هنڌ پنهنجي موجودگي جو احساس ڏيارڻ گهرجي،فلم ”ياريان“ ذريعي هدايتڪاري ۾ پير رکندڙ 34 ورهين جي دويا چيو ته مان جڏهن کان نوجوانن جي حوالي سان فلمون ٺاهڻ شروع ڪيون آهن ته نوجوان منهنجي پوئلڳي ڪن ٿا ۽ مونکان اثر وٺن ٿا، تنهن ڪري مون لاءِ اهو اهم آهي مان بهترين ۽ سهڻي نظر اچان، مان ڪڏهن به اهڙي ڊيسنگ نه چاهينديس، جنهن ۾ مان خراب لڳان، هن چيو ته هدايتڪارن لاءِ عام طور تي اهو سجهيو وڃي ٿو ته اهي فيشن جي معاملي ۾ محدود رهن ٿا پر هڪ عورت جي حيثيت ۾ سهڻو ۽ بهترين نظر اچڻ لازمي آهي، دويا چيو ته مان پارلر ۾ وڃي ٻه ٽي ڪلاڪ ناهيان ويهندي پر مان اها پڪ ڪندي آهيان ته مان سٺي ٿي لڳان ۽ مان جيڪا ڊريسنگ  ڪيان ٿي، اها به بهترين آهي.

پي سي بي سرفراز کي احمد کي قومي ٽيم جو ڪپتان مقرر ڪري ڇڏيو

لاهور(اسپورٽس نيوز) پاڪستان جي وڪيٽ ڪيپر بيٽسمين سرفراز احمد کي قومي ٽي ٽوئنٽي ڪرڪيٽ ٽيم جو ڪپتان مقرر ڪيو ويو آهي، ميڊِيا رپورٽن مطابق پاڪستان ڪرڪيٽ بورڊ جي عهديدارن ڊگهي صلاح مشوري کانپوءِ سرفراز احمد کي ڪپتان بڻائڻ جي منظوري ڏني ۽ پي سي بي طرفان ان جو باضابطا طور تي اعلان به ڪيو ويو آهي، ذريعن مطابق پي سي بي عهديدارن جي گڏجاڻي دوران ٽيم انتظاميا سرفراز احمد جي تمام گهڻي واکاڻ ڪئي، گڏجاڻي ۾ اها ڳالهه به سامهون آئي ته سرفراز پاڪستان سپر ليگ ۾ ڪپتان ۽ رانديگر طور شاندار ڪارڪردگي ڏيکاري، جنهن ڪري سندس ٽيم ڪوئٽا گليڊيئيٽرز فائنل تائين پهچڻ ۾ ڪامياب ٿي، کيس ڪپتان بڻائڻ کان پهرين سندس اڳوڻي رڪارڊ جو جائزو به ورتو ويو ۽ محسوس ڪيو ويو ته تازو ٽي ٽوئنٽي ورلڊ ڪپ دران ٽيم ۾ ڌڙابندي جون خبرون آيون پر سرفراز احمد اڪيلو رانديگر آهي،جنهن  جي ڪپتان ٿيڻ سان ٽيم ۾ ڌڙابندي ختم ٿيندي،ڇو ته سندس نالي تي ٽيم جي رانديگرن به اتفاق ڪيو آهي، واضح هجي ته ٽي ٽوئنٽي ورلڊ ڪپ ۾ قومي ٽيم جي ناقص ڪارڪردگي سبب ڪپتان شاهد آفريدي استعيفيٰ ڏئي ڇڏي هئي، سرفراز احمد ٽي ٽوئنٽي ڪيريئر جي شروعات 19 فيبروري 2010ع ۾ انگلينڊ خلاف ڪئي، هو 21 ٽي ٽوئنٽي ميچن ۾ 291 رنسون ٺاهي چڪو آهي، جن ۾ سندس بهترين اسڪور 76 آهي.

ٽيم لاءِ محنت ڪرڻ تي وقار يونس جو ٿورائتو آهيان: محمد حفيظ

فيصل آباد (اسپورٽس نيوز) ملڪي ٽيم ۾ پروفيسر جي نالي سان سڃاتي ويندڙ بيٽسمين محمد حفيظ چيو ته آهي ته مان اڳوڻي ڪوچ وقار يونس طرفان ٽيم سان گڏجي ڪارڪردگي بهتر بڻائڻ لاءِ محنت ڪرڻ تي سندس ٿورائتو آهيان. سماجي رابطن واري ويب سائيٽ ٽوئيٽر تي پنهنجي پيغام ۾ اڳوڻي ڪوچ کي خراج پيش ڪندي محمد حفيظ چيو ته وقار يونس سان ڪم ڪرڻ منهنجي لاءِ اعزاز جي ڳالهه آهي. هن ٽيم لاءِ جيتري محنت ڪئي، ان تي سندس دلي طور ٿورا مڃان ٿو. محمد حفيظ، شاهد آفريدي لاءِ به نيڪ خواهشن جو اظهار ڪيو.27

 

ڳڙهي خيرو- رتوڇاڻ سنڌ قبيلائي دهشتگرديءَ مان ڪڏهن آجي ٿيندي؟: نسيم بخاري

جيڪب آباد جي تعلقي ڳڙهي خيرو ويجهو ڳوٺ لعل بخش سومرو ۾ 600 جريب سرڪاري زمين جي مالڪي تان سومرا، رند ۽ ڏاهاڻي برادري جي وچ ۾ خونريزي ٿي آهي، جنهن ۾ چئن ڀائرن سوڌو اٺ ڄڻا اجل جو شڪار ٿي ويا آهن. جهيڙي ۾ جديد هٿيارن سان ڪيل ڇتي فائرنگ علائقي کي جنگ جي ميدان ۾ تبديل ڪري ڇڏيو، چئن ڪلاڪن تائين ڌريون مورچا بند ٿي گولين جا ڌوڙيا وسائينديون رهيون، فائرنگ ۾ ڏاهاڻي برادري جا ٻه ڄڻا حميد ۽ معشوق مارجي ويا آهن، جڏهن ته سومرا برادري جا 4 ڀائر مراد، غلام علي، حميد عرف ڪالو، امير بخش، منظور ۽ گل خان قتل ٿي ويا آهن.

سومرا برادري جي پيءَ پٽ سوڌو ٽي ڄڻا زخمي ٿيا آهن. ايس ايس پي جيڪب آباد ساجد کوکر پوليس اٽالن ۽ بڪتربند گاڏين سان پهچي ڌرين ۾ هلندڙ فائرنگ روڪرائي. سومرا برادري جي ڇهن ڄڻن جا لاش پوسٽ مارٽم بعد پوليس پهري ۾ ڳوٺ پهچايا ويا. ايس ايس پي جيڪب آباد وقتائتي ڪارروائي ڪري واردات ڪندڙ 15 ڄڻن کي هٿيارن سميت گرفتار ڪيو آهي، جيڪا ساراهه جوڳي ڳالهه آهي. اسان وٽ قبيلائي دهشتگرديءَ وارين وارداتن کانپوءِ ڏوهن ۾ ملوث ماڻهو، گهڻي ڀاڱي قانون قابو نه ڪري سگهندو آهي، پر ڳڙهي خيري ۾ ٿيل خونريزيءَ جي جوابدارن جي ٿڏي تي گرفتاري هڪ مثبت عمل آهي، جنهن جي ذريعي قانون جي بالادستيءَ وارو ويساهه وڌي ٿو ۽ ان جي ڪري ئي امڪاني خطرن جا گهنڊ به گهٽجي وڃن ٿا.

ڳڙهي خيري ۾ ٿيل خونريزيءَ کانپوءِ اتي خوف ۽ ڏهڪاءَ واري صورتحال بدستور جاري آهي. ڌريون مورچابند آهن ۽ ڪنهن به وقت ڪجهه به ٿي پوڻ جو امڪان بهرحال موجود آهي. سومرا برادري جي عورتن پاڪ ڪتاب مٿي تي رکي احتجاج ڪيو آهي، رندن ۽ ڏاهاڻين تي حملي جي اڳڀرائي واري تهمت مڙهي آهي. سومرا برادري جي عورتن جو چوڻ آهي ته زمين اسان جي آهي، رندن جو چوڻ آهي ته سومرن اسان تي حملو ڪيو. ڌرين ۾ ڪيتري ئي عرصي کان کڻت واري سرڪاري زمين تان تڪرار هلندڙ هو، جنهن جي، علائقي جي بااثر ڀوتارن ۽ انتظاميا کي پوري پوري ڄاڻ هئي. پرنٽ ۽ اليڪٽرانڪ ميڊيا اهو به رپورٽ ڪيو آهي ته ڊي ايس پي ڳڙهي خيرو پوليس نفري کي هڪ ڪلوميٽر پري بيهاري تماشو ڏسندو رهيو.

ڳڙهي خيري ۾ ٿيل خونريزي واري واقعي کانپوءِ سنڌ جي وڏي وزير واقعي جو نوٽيس وٺندي انتظاميا کان رپورٽ طلب ڪئي آهي. ان رپورٽ ۾ واقعي جون ڪهڙيون به حقيقتون بيان ڪيون وڃن پر اهو طئه آهي ته جن انساني زندگين جو نقصان ٿيو آهي، ان جو ازالو ڪڏهن نه ٿيندو ۽ نه ئي وري اهو ممڪن به آهي.

مان اڪثر اهو سوچيندو آهيان ته پاڻ وٽ واقعن ٿيڻ کانپوءِ پرنٽ ۽ اليڪٽرانڪ ميڊيا جي رپورٽنگ کانپوءِ انتظاميا جا ڪن کڙا ٿيندا آهن، بااثر ٻولڻ لڳندا آهن ۽ حڪمرانن کي افسوس ٿيڻ لڳندو آهي. سوال اهو آهي ته وارداتن ٿيڻ کان اڳ انهن جي رستا روڪ واري ايجنڊا ڪنهن کي ڪيتري ياد هوندي آهي؟ ڳڙهي خيري ۾ جيڪا خونريزي ٿي آهي، اها خونريزي اوچتي ڪنهن آفت جو نتيجو ناهي، ڌرين ۾ ان ڇڪتاڻ جي خبر حد جي پوليس کي به هئي ته بااثر ۽ چونڊيل يا قبيلائي سردار به ان کان واقف هئا. ڪنهن ۾ ايتري جرئت نه ٿي ته انهن نفرتن کي ناسور بڻجڻ کان روڪجي، اهي اختلاف ۽ تڪرار جيڪڏهن انصاف ڀرئي ماحول ۾ طئه ڪيا وڃن ها ته اڄ خونريزي جا خطرناڪ نتيجا نروار نه ٿين ها.

ڪو دؤر هوندو هو جڏهن واقعن جي روڪٿام لاءِ باقاعده سنجيدگيءَ سان حڪمت عمليون جڙنديون هيون ۽ ڪوششون ٿينديون هيون، جيڪي گهڻي ڀاڱي ڪارگر به ثابت ٿينديون هيون، پر هاڻ اهڙيون سرگرميون خواب بڻجي ويون آهن، جنهن جي نتيجي ۾ واقعن ۽ وارداتن جي شرح ۾ زبردست حد تائين اضافو ٿيو آهي.

سنڌ ۾ قانون جو خوف رهيو ئي ناهي، هتي قانون، لتاڙجڻ ۽ چيڀاٽڻ لاءِ هڪ رانديڪو بڻجي ويو آهي. پئسي، طاقت، سرڪاري ۽ سياسي پٺڀرائي سبب ماڻهن جا دماغ خراب ٿي ويا آهن، انهن جو پيٽ ڀرجي ويو آهي، نتيجي ۾ حرص ۽ لالچ جا نت نوان رڪارڊ قائم ٿي ويا آهن. مان دعويٰ سان چوان ٿو ته ڳڙهي خيرو ۾ جن ماڻهن انسانن جو رت وهايو آهي، انهن کي پنهنجي ٽيڪ ۽ پٺڀرائي جي پوري پوري پڪ هوندي، تڏهن ئي ته انهن ڏينهن ڏٺي جو بلڪل بي خوف ٿي، انساني حياتيون موت جي ننڊ سمهاريون آهن.

ڳڙهي خيري ۾ جيڪا رت جي راند ٿي آهي، تنهن لاءِ ماڻهو ڪانڍيا ويا هوندا، هٿيار گڏ ڪيا ويا هوندا، گاڏين جو انتظام ٿيو هوندو، ان سڄي صورتحال ۾ ٻنهي ڌرين جي سوين ماڻهن کي خبر هوندي پر ڇاڪاڻ ته انهن جي ذهنن ۾ هڪٻئي کي ماتِ ڏيڻ وارو جنون ڇانيل هو. ان ڪري ڪنهن کي به ان امڪاني خطري کان بچڻ جو خيال نه ٿيو ۽ هن واقعي کان اڳ پوليس يا انتظاميا کي هڪڙي فون ڪرڻ مناسب نه سمجهي. اسان جي سماج ۾ اڪثر اهو ڏٺو ويو ته ڌريون پوليس ۽ انتظاميا کي اڳواٽ خرچي پاڻي ڏئي، ويڙهه واري وقت تائين پري رهڻ ۽ لاتعلق ٿيڻ جون ضمانتون وٺنديون آهن، ائين جيڪڏهن نه به هوندو آهي تڏهن به هلندڙ جهيڙي ۾ پوليس جو ڪڏي پوڻ ڏاهپ ڀري ڳالهه نه ليکي ويندي آهي. ڇو ته پوليس جي ڀيٽ ۾ جهيڙيندڙ ڌريون ماڻهن ۽ هٿيارن جي حوالي سان وڌيڪ مضبوط هونديون آهن، جن وٽ جديد بارود ۽ بم گولا ۽ راڪيٽ لانچر به هوندا آهن.

ڳڙهي خيري ۾ جيڪا خونريزي ٿي آهي، اها خونريزي جيڪب آباد ضلعي ۾ قبيلائي دهشتگرديءَ جي ٻن ڌرين ۾ رتوڇاڻ جي نئين شروعات آهي، ان ڇڪتاڻ پنهنجي ابتدا ۾ اٺ ڏهه انسانن جون زندگيون ڳڙڪايون آهن. خبر نه آهي ته ان دهشتگرديءَ جو ڇيهه ڪٿي ٿيندو ۽ ڌرين جي اها ويڙهه ڪٿي دنگ ڪندي؟

سنڌ ۾ قبيلائي دهشتگردي جا واقعا، ڌريون ان وقت تائين خطرناڪ وارداتن جي صورت ۾ جاري رکنديون آهن جيستائين جرڳي جي تاريخ طئه نه ٿيندي آهي. نه رڳو اهو پر جرڳي جي ڏينهن تائين هڪٻئي جي ماڻهن جا ڪنڌ ڪپيا ويندا آهن، جنهن ڏينهن جرڳو ٿيندو آهي، ان ڏينهن تي ڪابه ڌر اڳڀرائي نه ڪندي آهي، باقي ان کان اڳ خونن جو اسڪور پورو ڪرڻ جي پوري پوري ڪوشش ٿيندي آهي. جرڳي واري ڏينهن ڏهن، ويهن، ٽيهن ۽ چاليهن چاليهن انسانن جي قاتلن کي پوليس پروٽوڪول ۾ آندو ويندو آهي، اهي قاتل رهزن ۽ ڏوهاري پنهنجي ڌر جا هيرا ۽ سورما تصور ڪيا ويندا آهن، انهن کي ايڏو ته مانُ ڏنو ويندو آهي جو انهن کي مٿي ڪرڻ جا واضح امڪان پيدا ٿي ويندا آهن ۽ پوءِ جرڳن ۾ خون ۽ زخمي ڳڻبا آهن، خون خونن ۾ پاڙبا آهن، زخمي زخمين ۾ ڪٽجي ويندا آهن، باقي جنهن به ڌر جو جنهن ڏي حساب بچندو آهي، اهو ان کي ڏنڊ جي صورت ۾ ڏيڻو پوندو آهي، اهي پئسا ڪيئن گڏ ڪيا ويندا آهن ۽ متاثر ڌر جي ڀوتار وٽ پهچڻ کانپوءِ ڪيئن ورڇجي ويندا آهن، سو به هڪ دردناڪ ۽ اندر ۾ وڍ وجهندڙ قصو آهي.

ان سڄي صورتحال ۾ جن کان پنهنجا پيارا عمر ڀر لاءِ وڇڙي ويندا آهن يا زخمي ٿي معذور ٿي پوندا آهن، انهن جي اقتصادي سهائتا لاءِ عملي طور تي ڪوبه ڪک ڀڃي ٻيڻو نه ڪيو ويندو آهي. متاثر خاندانن کي زندگي جي وهنوار هلائڻ لاءِ مناسب معاوضي نه ملڻ ڪري جيڪا پلاند واري باهه دل ۾ ڀڙڪندي آهي، سا جڏهن ڀڙڪو کائيندي آهي ته گهڻو ڪجهه ڀڙڀانگ ٿي ويندو آهي.

ڪجهه مهينا اڳ لاڙڪاڻي هاءِ ڪورٽ جي جسٽس عثمان پنهور ڏاڍا شاندار فيصلا ڪيا، اهي فيصلا اتر سنڌ لاءِ هڪ وڏي نعمت ثابت ٿي پئي سگهيا، پر انتظامي ڪن لاٽار انهن جي اهميت ئي وڃائي ڇڏي، جن ۾ جرڳن تي پابندي ۽ رتوڇاڻ وارن واقعن جي سڌي سنئين حد جي پوليس ذميوار قرار ڏني وئي هئي، پر اڄ اهي فيصلا هوا ۾ ڪک پن ٿي ويا آهن. انتظاميا انهن جو احترام ڪري ها ته ان جا سڄي سماج ڏي ڏاڍا مثبت اثر پون ها.

ڪجهه سال اڳ سنڌ هاءِ ڪورٽ قبيلائي دهشتگرديءَ بابت جرڳن تي مڪمل پابندي هنئي هئي ۽ اهڙو ڪريڊٽ لاڙڪاڻي جي اڳوڻي ڪمشنر نذير حسين مهر ڏانهن به وڃي ٿو، جنهن جي اثرائتن حڪمن جي نتيجي ۾ ڀوتارن جا جرڳائي جهان ويران ٿي ويا هئا. هنن جون اوطاقون اجڙي ويون هيون، ڀوتارن جي لئه مري وئي هئي، نه رڳو ايترو پر ڪجهه ڀوتارن جي لاءِ ته پنهنجا ضلعا به انتظامي طور تي نو گو ايريا بڻيل هئا.

پر هاڻ صورتحال ان جي بلڪل ابتڙ آهي، هاڻي جيڪب آباد سميت اتر سنڌ ۾ جرڳائي جهان وڏي صنعت بڻجي چڪو آهي. اهو ڪاروبار وقت سان گڏ وڌي رهيو آهي ۽ ڌرين جي جبري کير کنڊ ٿيڻ وارين خبرن کي انتظاميه پنهنجو ڪارنامو قرار ڏئي رهي آهي. جڏهن قانون ۽ عدالت موجود آهي ته پوءِ هنن سان ٽڪراءُ ۾ ايندڙ هٿرادو جرڳن کي هٿي وٺرائي ڪهڙي قانون جي بالادستيءَ وارو تاثر ڏيڻ جي ڪوشش ڪئي پئي وڃي؟

ڳڙهي خيرو ۾ جيڪا خونريزي ٿي آهي، ان جون چار پنج قسطون گهٽ ۾ گهٽ آڏو اينديون ۽ ان کانپوءِ جرڳو ٿيندو ۽ ان جرڳي ۾ جيڪي جٺيون ٿينديون تنهن جو پاڻ مختصر مٿي بيان ڪري آيا آهيون.

ايس ايس پي جيڪب آباد ساجد کوکر سٺي ساک رکندڙ آفيسر آهي. ان ڪري ان جي ڪريڊٽ ۾ فقط اها ڳالهه ڪافي ناهي ته هن ڳڙهي خيري خونريزي جا جوابدار هٿيارن سميت گرفتار ڪيا آهن، پر ان جي ڪارڪردگي کي تڏهن چار چنڊ لڳندا، جڏهن ان خونريزيءَ جا ڪيس انصاف جي آڌار تي داخل ٿين. انهن ڪيسن جي پوليس ايمانداراڻي پيروي ڪري ۽ اهي ڏوهاري سزائون ماڻن، جن ڪيترائي جهڳا جهڻ ڪيا آهن. گڏوگڏ قبيلائي دهشتگرديءَ جي امڪاني خطرن وارا گهنڊ به پوري سنجيدگيءَ سان ٻڌا وڃن ته جيئن وري ڪنهن ماءُ جي جهولي خالي نه ٿئي، ڪنهن ونيءَ جو ورُ نه وڇڙي ۽ ڪي ٻار يتيم نه ٿين.

naseembukhari44@gmail.com

 

 

سنڌ ۾ ٿيل ترقي ڪٿي آهي…؟: تنيو سڪندر

سنڌ جي حاڪم جوبيان اخبار ۾ پڙهيم، جنهن ۾ فرمايل هو، ته جنهن کي سنڌ ۾ ترقي نظر نه ٿي اچي سو اکين جو وڃي آپريشن ڪرائي، مون کي به ترقي نظر ۾ نه پئي ڏسڻ ۾ اچي سو سائينءَ جي ڏنل صلاح موجب ڊاڪٽر صالح ميمڻ جي انتظام هيٺ هلندڙ اسپتال آل ابراهيم ميمڻ ڳوٺ ڪراچي وڃي آپريشن ڪرايم ته خبر پئي ته ترقي ڪيئن ٿي آهي ۽ ڪيتري ٿي آهي.

آکين جي آپريشن کانپوءِ ديد گهڻي چٽي ٿي، پر پوءِ به ترقي ڏسڻ ۾ نه آيم، سمورا شهر کنڊر جو ڏيک ڏئي رهيا هئا، لاڙڪاڻي جهڙي شهر جيڪو پيپلز پارٽيءَ جو مقدس ترين شهر چيو ويندو آهي ان جو هڪ روڊ به قابل تعريف نه آهي جو ٻين صوبن کي ٻڌائي سگهجي ته V.I.P روڊ ته اچي ڏسي وڃو. ان وي آءِ پي روڊ تي به کڏون کوٻا کوٽيل آهن، باقراڻي روڊ کي تعمير ٿئي ٻه سال به مس ٿيا آهن، پر سمورو روڊ اکڙي چڪو آهي، انگريز جي نالي واري جائلس بازار ۽ مسٽر سئيو نالي واري بازار پڻ ٽٽل ڏسڻ ۾ آئي. سڄي مارڪيٽ ڪلهوڙن جي دور ۾ گهاڙ واهه کوٽايل ڀرسان قافلن جي ترسڻ جي جاءِ کي قافلا سراءِ سڏيو وڃبو هيو. ان سراءِ جي گهٽين کي سوڙهو ڪري ڇڏيو ويو آهي جو هاڻي جيڪڏهن ماڻهو مري ٿو ته لاش کٽ تي به کڻي ٻاهر نٿو ڪڍي سگهجي ۽ ڏوليءَ ۾ لڙڪائي ميت کي مقام ڏي موڪلجي ٿو.

اهڙي طرح گندي پاڻيءَ جي نيڪال جو سرشتو سالن کان صهي نه ٿي سگهيو آهي، مينهن پوڻ جي ته ڳالهه ئي نه ٿي ڪجي، پر روزانو جيڪو پاڻي نيڪال ٿئي ٿو سو به نڪري نه ٿو سگهي. گهر جي اڱڻن ۾ ڪني پاڻيءَ ۾ پير پُسيل پيا آهن، اهڙي صورتحال هر هڪ ننڍي وڏي شهر جي ئي آهي. سوچيان ٿو اجايو آپريشن ڪرائي آيم، فرق ته ڏسڻ ۾ ڪوبه نه آيو. ان ڪري منهنجي سنڌين کي صلاح آهي ته بابا متان اوهان به وڃي آپريشن ڪرايو پر ڏسڻ ۾ اهو ئي ايندو جيڪو انهن اکين سان اڄ ڏسي رهيا آهيو.

ٻي خبر به پڙهيم ته نوڪرين تي بندش سپريم ڪورٽ وڌي آهي، جيڪا جلدي لهڻ واري آهي ۽ پوءِ نوڪريون پارٽيءَ جي جيالن ڪارڪنن کي ڏنيون وينديون. ان جو مطلب ته ڇا جي ميرٽ، ڇا جو غير پارٽي جو هجڻ، ناني پئي ٿي رڌي ۽ ڏهٽن ۾ پئي ورهائي.

خدارا حاڪمئو اکيون اوهان کوليو، بي روزگاري سڀني سنڌين جي گهرن ۾ڪاهي پيل آهي. اوهان صرف پنهنجا ڪارڪن پنهنجي وزيرن۽ ميمرن جيان آسودا ڪندا ته پوءِ باقي ڪروڙن ۾ اسان جهڙي خلق ڪيڏانهن ويندي. اوهان جي صرف هڪ وزير صاحب تي الزام لڳا آهن ته هن پير صاحب تيرنهن هزار نوڪريون کپايون آهن، ڀٽي صاحب غير سنڌين کي سنڌي سيکارڻ لاءِ ”سنڌي لينگويج ٽيچر“ S.L.T ڀرتي ڪيا هئا. جيڪا پاليسي اڄ به جاري آهي پر ڪوبه غير سنڌي، سنڌي پڙهايو لکايو نه ويو آهي. پر هن ڀوتار اهي نوڪريون به سنڌي پڙهائيندڙ ماستر کي ڏيڻ بجاءِ بنگالي، برمي، گلگتين کي ڏئي ڇڏيون، جن کي سنڌي پڙهڻ لکڻ ته پري رهيو پر کين ڳالهائڻ به ڪونه پيو اچي، سو سنڌين جي ترقي اهڙي طرح ٿيندي رهندي ته پوءِ واهه واهه ڇونه ڪبي.

وري ٿورو مٿي ٿا هلئون، مرڪز مهربان وارن ڏانهن، جن، ڪامريڊ مير محمد ٽالپر چواڻي ته صرف پنهنجا مرڪز مضبوط پئي ڪرايا آهن، ڪنهن به مرڪزي کاتي کي ڏسو ايئر فورس، ڪسٽم، پي آءِ اي، نيب، فارين سروسز، ايف آءِ اي، سفارتڪاري، رانديون، ڪيترا نالا کڻجن سڀني ۾ سنڌين سان ساڙ ۽ حسد روا رکيو ويو آهي. وري چيو ٿو وڃي ته سنڌين ۾ قابليت ڪين آهي. بابا مڃيوسين ته اسين ڪورا ڄٽ آهيون پر اسان کي علم ۽ عقل ڏيڻ به ته اوهان جي ذميوارين ۾به ته آهي. هن ملڪ جا اسين به شهري آهيون، اسان کي ٽيڪنيڪل تعليم ڏيڻ اوهان جي مٿان فرض آهي، اسان کي جهاز هلائڻ سيکاريو، اسان کي ريلون، آڳبوٽ هلائڻ لاءِ ادارن ۾ موڪليو، جڏهن تربيت ڏيندئو ته سکنداسين، گهر ويٺي ته پوءِ جاهل، چور نه بڻباسين ته ڇا ڪنداسين.!

مون کي هڪ دوست ٻڌايو ته چائنا ۾ ٻارڙن کي پرائمري تعليم پڙهائي ويندي آهي، پر کين هنري سکيا به ڏني ويندي آهي، رانديڪا، موبائل سيٽ ڳنڍڻ جوڙڻ، ٽاڪا هڻڻ کين سيکاريا ٿا وڃن ته جيئن اڳتي هلي هي اليڪٽرانڪ شيون ٺاهي سگهن، اهڙي طرح هو پنهنجي ملڪ جي ماڻهن کي تربيت ڏين ٿا. پر هتي صرف اسان جو وڏو ڀاءُ ئي هر ڪم کي سنڀالڻ وارو سمجهيو ويو آهي. سمورا بار هو ئي کڻي رهيو آهي. اسان کيس چئون ٿا ته ادا وڏا، ڪجهه ڪم اسان جي حوالي به ڪر ته ڪاوڙجي ٿو پوي ته اوهان نڪما آهيو، اوهان هنن شين کي هٿ ئي نه لايو.

ڪالهه خبر پڙهيم ته هڪ سنڌي نوجوان موبائل بيٽريءَ کي منٽن ۾ چارج ڪرڻ وارو چارجر تيار ڪيو آهي، ٿيڻ ته هيئن گهربو هيو جو ان کي پنهنجي ملڪ ۾ سهولتون ڏجن ها ته هو ان کي عام ڪري ها، پر ننڍي ڀاءُ هئڻ ڪري وڏي ڀاءُ هتي ويهڻ ئي نه ڏنس۽ هڪ ٻاهرئين ملڪ کيس آفر ڪيو ته هيڏانهن هليو اچ، تنهنجو قدر اسان وٽ آهي ۽ هو هاڻي ٻاهر هليو ويو آهي.

سو هتي نه گهٽ گهوٽ ۾ آهي نه ئي ڪمي ڪنوار ۾ آهي جهڙي پني تهڙي ڇالي آهي نه سنڌ جي سرڪار نه ئي مرڪز واري وڏي سرڪار سنڌين جي ڏکن تي ڪو پهو رکڻ لاءِ تيار آهي. ڏسئون ته سڀ ڪجهه ٿا، اجايو اسان کي اکين جي آپريشن ڪرائڻ لاءِ چيو ٿو وڃي.

*****

 

پاناما ليڪس جو پينڊورا باڪس

پانامه ليڪس پاڪستان سميت دنيا جي مختلف ملڪن جي سياستدانن ۽ وڏن خاندانن جا پرڏيهه ۾ اثاثا وائکا ڪري ڇڏيا آهن، جڏهن ته پاڪستان جي ٻه طاقتور  ڀٽو خاندان ۽ شريف فيملي جا نالا ان لسٽ ۾ شامل آهن، ميڊيا رپورٽن موجب ڪاغذن جي حوالي سان لکيو ته 2007 ۾قتل ٿيل پاڪستان پيپلزپارٽي جي چيئرپرسن بينظير ڀٽو ، سينيٽر رحمان ملڪ ۽ سندس ڀائيٽيو حسن علي جعفري به فونسا موسيڪ جا گراهڪ هئا، دستاويزن مطابق بينظير ڀٽو شارجه ۾ موجود پنهنجي ڪمپني پيٽروفائن ايف زيڊي کي تيل جو ٺيڪو ڏيارڻ لاءِ عراقي صدر صدام حسين جي حڪومت کي ڳري رشوت ڏني ۽ بعد ۾ 2001 ۾ برطانيا ۾ پٽرولائن انٽرنيشنل ان ڪارپوريشن جي نالي سان ڪمپني ٺاهي، فونسا موسيڪ جي رڪارڊ مطابق بينظير ڀٽو جي ٻي ڪمپني پيٽرو لائن انٽرنيشنل ان ڪارپوريشن جو تعلق سياسي گروپ سان هجڻ جي ڪري بطور ڪلائنٽ قبول ڪرڻ کان انڪار ڪيو ويو،

2005 ۾ گڏيل قومن جي پروگرام هيٺ ٿيندڙ جاچ۾ انڪشاف ٿيو ته بينظير ڀٽو جي  ڪمپني  صدام حسين کي ٻه ملين آمريڪي ڊالر ڏنا جنهن جي بدلي ۾ 115 کان 145 ملين ڊالر جو آئل ڪنٽريڪٽ حاصل ڪيو ويو، هي انڪوائري آمريڪي فيڊرل سروسز جي سربراهه پال وا ڪر جي سربراهي ۾ ڪئي وئي، رپورٽ جي مطابق 2006 ۾ نيب به دعويٰ  ڪئي هئي ته پيٽروفائن ايف زيڊ سي جي مالڪ بينظير ڀٽو آهي، پر بينظير ڀٽو ۽ پيپلزپارٽي ان الزامن کي رد ڪندي پنهنجي خلاف سياسي سازش قرار ڏنو هو. ۽ هاڻ به اهڙن الزامن کي رد ڪيو پيو وڃي.

ميڊيا رپورٽن موجب پاناما پيپرز ۾ پاڪستانين ۾ اڳوڻي وزيراعظم بينظير ڀٽو، رحمان ملڪ ۽ سندس ڀائيٽو حسن علي، اڳوڻي صدر آصف علي زرداري جي دوست جاويد پاشا شهباز شريف جو مائٽ الياس معراج، ثمينه دراني، لڪي مروت جو خاندان سيف الله خاندان، وزيراعظم نواز شريف جا ٻار مريم، حسن ۽ حسين نواز شريف پاڻ، احمد علي رباني ذوالفقار لاکاڻي، شهباز ياسين، ذوالفقار پراچه، اعظم سلطان، شهباز ياسين ملڪ، شاهد نذير، خليل حسينه گوهر اعجاز شامل ڄاڻيا ويا آهن، جڏهن ته ملڪي سربراهن ۾ شامي صدر بشرالاسد، ارجنيا جو صدر موريسيو، يوڪرين جو صدر پوروشينڪو، وزيراعظم پاولو لازارينڪو، جارجيا جو اڳوڻو وزيراعظم، يو اي اِي صدر خلفيه بن زيد، سعودي شاهه سلمان، قطرجو وزيراعظم حماد بن جسام، عراقي اڳوڻو صدر ايادالادي، ارون جو اڳوڻو وزيراعظم علي ابوالرغيب، سوڊان جو صدر احمد علي، چيني صدر شي جن پنگ جو ڀاءُ، برطانوي وزيراعظم ڊيوڊ ڪيمرون جا والدين، مصري اڳوڻو صدر منيب مبارڪ، لبيائي اڳوڻُ سربراهه معمر قذافي جو خاندان، آزربائيجان جي صدر جا ٻار فهرست ۾ ڄاڻايا ويا آهن.

اداڪارن ۾ اميتاب بچن، ايشوريا راءِ، جيڪي چن ۽ ٻين جا نالا آهن، جڏهن ته آسٽريليا، نيوزيلينڊ، فرانس فهرست بابت جاچ شروع ڪري ڇڏي آهي. آئيس لينڊ جي صدر تي استعيفيٰ لاءِ دٻاءُ آهي، برطانيا ۽ آزربائيجان اهڙي ڪاروبار کي جائز قرار ڏنو. ڏکڻ آفريڪا ترديد ڪئي. هوڏانهن معاشي ماهر گيبرل زڪمين جو چوڻ آهي ته پاناما ليڪس جي دستاويزن جي جائزي مان پتو پوي ٿو ته ڳجهي نموني ٺاهيل دولت جي ماليت 7 کرب 60 ارب ڊالر ٿئي ٿي، جيڪا دنيا جي سموري دولت جو تقريبن 8 سيڪڙو آهي ۽ ان رقم ۾ مسلسل واڌ ٿي رهي آهي.