تازيون خبرون

Daily Archives: April 6, 2016

پاناما ليڪس معاملي تي اعليٰ سطحي عدالتي جوڊيشل ڪميشن قائم ڪرڻ جو اعلان

اسلام آباد (بيورو) وزيراعظم نوازشريف پاران پاناما ليڪس جي معاملي تي هڪ اعليٰ سطحي جوڊيشل ڪميشن قائم ڪرڻ جو اعلان ڪيو آهي،  قوم کي خطاب ڪندي هن چيو ته جوڊيشل ڪميشن سپريم ڪورٽ جي رٽائرڊ جج جي سربراهي ۾ قائم ڪيو ويندو، وزيراعظم چيو ته سياسي مقصدن لاءِ منهنجي خاندان کي نشانو بڻايو پيو وڃي، زندگي ۾ پهريون ڀيرو ذاتي وضاحت لاءِ پيش ٿيو آهيان، هن وڌيڪ چيو ته مختلف وقتن تي اتفاق فائونڊيشن کي ختم ڪرڻ جي ڪوشش ڪرڻ جي باوجود پنهنجي مٿان بقايائون پورا 6 ارب سمورا قرض ادا ڪيا ۽ اسان جي خاندان قرض معاف نه ڪرايو ۽ نه مارڪ اپ، هن چيو ته هاڻي اسان مٿان ڪنهن بينڪ جي هڪ پائي به ناهي، حڪومت ۾ رهندي ڪڏهن ڪاروبار کي شامل نه ڪيو، وزيراعظم مطابق ساٿين جي مشورن هو ته منهنجي مٿان ڪو الزام ناهي ۽ منهنجا پٽ عاقل و بالغ آهن ان لاءِ مون کي ان معاملي تي وضاحت جي ضرورت ناهي.

 

پناما ليڪس انڪشاف: نيب پاران آف شوز ڪمپنين جي مالڪن خلاف ڪارروائي جو فيصلو

اسلام آباد (بيورو) پناما لِيڪس جي انڪشافن کانپوءِ نيب آف شور ڪمپنين جي مالڪن خلاف ڪارروائي جو فيصلو ڪري ورتو، نيب ذريعن جو چوڻ آهي ته پنامالِيڪس جي انڪشافن کي نظر انداز نٿو ڪري سگهجي.برطانوي خابرو اداري پنامالِڪس جي ڇرڪائيندڙ انڪشافن کانپوءِ پاڪستان، ڀارت ۽ ٻين ملڪن ۾ ٿرٿلو متل آهي، اڪثر ملڪن ۾ ڪارروائيون به شروع ٿي چڪيون آهن. پنامالِڪس جي انڪشافن جو پاڪستان ۾ به قومي احتساب بيورو پاران سختي سان نوٽيس ورتو ويو آهي. ذريعن جو چوڻ آهي ته نيب پرڏيهه ۾ غير قانوني اثاثا ٺاهيندڙ ۽ آف شور ڪمپنين جي مالڪن خلاف ڪارروائي جو فيصلو ڪري ورتو آهي. نيب ذريعن جو چوڻ آهي ته پناما ليڪس جي انڪشافن کي نظر اندز نٿو ڪري سگهجي، آف شور ڪمپنين جي مالڪن خلاف ڪارروائي ڪئي ويندي.

 

عام ماڻهو پٽواري سسٽم مان تنگ ٿي ويا آهن، سسٽم کي ڪامياب بڻايو وڃي: وڏو وزير

ڪراچي (اسٽاف رپورٽر)  سنڌ بورڊ آف روينيو ملڪي تاريخ ۾ پهريون ڀيرو سنڌ صوبي جي 29 ضلعن جي 15 ملين (ڏيڍ ڪروڙ) صفحن تي مشتمل روينيو ريڪارڊ کي ڪاميابيءَ سان ڪمپيوٽرائيز ڪري ڇڏيو آهي. اهڙن خيالن جو اظهار سنڌ بورڊ آف روينيو جي سينئر ميمبر رضوان ميمڻ اڄ اڱاري ڏينهن وزيراعليٰ هائوس ۾ روينيو ريڪارڊ جي ڪمپيوٽرائيزيشن جي حوالي سان منعقد ٿيل اجلاس ۾ بريفننگ ڏيندي ڪيو. اجلاس ۾ چيف سيڪريٽري سنڌ محمد صديق ميمڻ، وڏي وزير جي سيڪريٽري اقبال دراني، ميمبر بورڊ آف ريوينيو ذوالفقار شاهه ۽ ٻين لاڳاپيل آفيسرن شرڪت ڪئي. بورڊ آف روينيو جي سينيئر ميمبر رضوان ميمڻ اجلاس کي ٻڌايو ته 29 ضلعن جو ريوينيو ڪمپيوٽرائيز ريڪارڊ 15 ملين (ڏيڍهه ڪروڙ) صفحن تي مشتمل آهي ۽ اسان جي نون ڊيٽا اِنٽري فرمن روينيو ريڪارڊ جي اسڪيننگ ۽ فهرستن سميت 90 سيڪڙو ڪم مڪمل ڪري ڇڏيو آهي. ان موقعي تي ميمبر بورڊ آف ريوينيو ذوالفقار شاهه اجلاس کي ٻڌايو ته روينيو ريڪارڊ ۾ تمام گهڻيون بنيادي خاميون هيون، جن جي صحيح طريقي تحت تصديق ڪئي وئي آهي، انهن خامين جو مثال ڏيندي هن ٻڌايو ته 35 سيڪڙو ورهايل شيئرز ۾ غلطيون هيون، 30 سيڪڙو ريڪارڊ جا سروي نمبر ئي غائب هئا، 3 سيڪڙو ۾ ڳڻپ جون غلطيون هيون، هڪ سيڪڙو غلطين ۾ خريدار ۽ وڪري ڪندڙن جا نالا شامل نه هئا ۽ جڏهن ته 2 سيڪڙو ڪاغذن جي تصديق نه ڪئي وئي هئي. ان موقعي تي سنڌ جي وڏي وزير سيد قائم علي شاهه اجلاس کي ياد ڏياريو ته شهيد بينظير ڀٽو جي قتل جي ردعمل ۾ اٽڪل 850 ديهن جو ريڪارڊ ساڙيو ويو هو، ۽ هن سينئر ميمبر کان پڇا ڪئي ته ان ريڪارڊ کي واپس حاصل ڪرڻ لاءِ اوهان ڇا ڪيو آهي؟ ان تي رضوان ميمڻ جواب ۾ چيو ته اهڙو ڪيترو ئي ريڪارڊ مائيڪرو فلمنگ يونٽس ذريعي واپس حاصل ڪيو ويو آهي ۽ اسان 400 ديهن جو ريڪارڊ ڳولهي لڌو آهي ۽ ڪمپيوٽرائيزڊ ڪيو ويو آهي، جڏهن ته باقي 450 ديهن جو ريڪارڊ حاصل ڪرڻ لاءِ ڪم ٿي رهيو آهي. ميمبر بورڊ آف روينيو ذوالفقار شاهه ٻڌايو ته زمين جي رجسٽر ڪرائڻ لاءِ گهربل ويلج فارم 1، غيرزرعي مقصدن لاءِ زمين جي استعمال يا گرانٽ جي رجسٽريشن جي وليج فارم نمبر 2، زرعي زمين جي حقن واري ريڪارڊ جو وليج فارم 7 ۽ پراپرٽي رجسٽر ڪرائڻ جي وليج فارم 7 پارٽ B سميت ٻين اهم فارم کي به ڪمپيوٽرائيزڊ ڪيو ويو آهي. واضح رهي ته فارم 7 پارٽ B جو مطلب آهي ميوٽيشن رجسٽر، پراپرٽي رجسٽر ۽ ڪراچي ۾ سرڪاري ۽ ميونسپلٽي کان ڌار زمين جي تفصيلن لاءِ استعمال ٿيندو آهي ۽ پراپرٽي ڪارڊ اهو ڪراچي کان علاوه ٻين شهرن جي سٽي سروي لاءِ پراپرٽي جي رجسٽريشن جي ڪم ايندو آهي. هن چيو ته روينيو ريڪارڊ جي ڪمپيوٽرائيزڊ سان سندس اداري تمام گهڻو دلچسپ ڊيٽا گڏ ڪري ورتو آهي، جهڙوڪ 78 سيڪڙو ننڍا هاري جن وٽ 4 ايڪڙن کان به گهٽ زمين آهي، ان کان علاوه 4 کان 16 ايڪڙ زمين 16 سيڪڙو هارين وٽ آهي، جڏهن ته 16 کان 100 ايڪڙ رکندڙ وڏا زميندار رڳو 6 سيڪڙو آهن ۽ 100 ايڪڙ کان وڌيڪ زمين رکندڙ صرف 0.34 سيڪڙو آهن. وڏي وزير طرفان پڇا ڪيل سوال جي جواب ۾ ميمبر بورڊ آف روينيو ٻڌايو ته 76 سيڪڙو زمين جا ملڪ مرد ۽ 9 سيڪڙو عورتون مالڪ آهن، جڏهن ته 15 سيڪڙو زمين مردن، عورتن ۽ ٻارن جي گڏيل طور ملڪيت آهي. هن ٻڌايو ته پاڪستان ۾ پهريون ڀيرو “سنڌ زمين” جي نالي سان موبائل ايپليڪيشن جي شروعات ڪئي وئي آهي. جنهن ذريعي زمين جي روينيو ريڪارڊ تائين پهچ حاصل آهي ۽ اٽڪل 80 هزار کان وڌيڪ ماڻهن ان سهولت جو استعمال ڪيو آهي، ذوالفقار شاهه وڌيڪ ٻڌايو ته انهن وٽ 27 سروس سينٽرز آهن جنهن ۾ 25  سروس سينٽرز ضلعي هيڊڪوارٽر ۾ فعال آهن، جڏهن ته باقي 2 سينٽرز به هلندڙ مهيني جي آخر تائين آپريشن ڪرڻ شروع ڪري ڇڏيندا. سروس سينٽر ۾ موجود سهولتن جي باري ۾ ٻڌائيندي ذوالفقار شاهه چيو ته ڪنهن به سروس سينٽر کان جديد سينٽرل ڊيٽابيس ذريعي زمين جي ريڪارڊ جي ڪاپي حاصل ڪري سگهجي ٿي ۽ خاص سيڪيورٽي جي حامل پيپرز ۽ ڪيو آر ڪوڊ جو استعمال ڪري جعل سازي کي ممڪنه حد تائين ختم ڪيو ويو آهي. ڪراچي ۾ قائم ڊيٽا سينٽر جي باري ۾ هن ٻڌايو ته اتي سموري سنڌي ٻوليءَ ۾ دنيا جي سڀ کان وڌيڪ 7 ٽيرابائيٽ ڊيٽا محفوظ ڪئي وئي آهي، جيڪو ڏيڍهه ڪروڙ صفحن تي مشتمل آهي ۽ اسان جي اسٽاف ۾ 27 سروس سينٽرز لاءِ 108 انفارميشن ٽيڪنالاجي جا ماهر موجود آهن. هن وڌيڪ ٻڌايو ته 75 ملين صفحن کي جديد ڊيٽا ۾ منتقل ڪرڻ جو مائيڪرو فلمنگ وارو ڪم 2016 جي آخر تائين آن لائين موجود هوندو. سينئر ميمبر بورڊ آف روينيو چيو ته ڪراچي ڊويزن جي 93 ديهن جو ڊجيٽل نقشي ۽ صوبي جي باقي ضلعن جا نقشا به لينڊ ريڪارڊ ڊيٽابيس سان ڳنڍيا ويا آهن. سنڌ جي وڏي وزير سيد قائم علي شاهه بورڊ آف روينيو کي هدايت ڪئي ته هُو ڪنهن به غلطي جي درستگيءَ لاءِ پنهنجي ڪال سينٽرز کي فعال بڻائي ۽ غلطين جي نشاندهي ۽ تصديق لاءِ فيڊبيڪ سسٽم موثر هئڻ گهرجي. چيف سيڪريٽري سنڌ روينيو ريڪارڊ کي ڪمپيوٽرائيزڊ سسٽم جي افتتاح لاءِ سنڌ جي وڏي وزير کي دعوت ڏني ته جيئن ان سسٽم کي سموري سنڌ ۾ فعال ڪيو وڃي. ان تي وڏي وزير ايندڙ هفتي حيدرآباد ۾ افتتاح ڪرڻ تي رضامندي جو اظهار ڪيو ۽ مٿن زور ڀريو ته هُو عوام ۾ ان جي تشهير ڪن ڇاڪاڻ ته عام ماڻهو پٽواري سسٽم مان تنگ ٿي ويا آهن. هن چيو ته اوهان پهرين ان سسٽم کي ڪامياب بڻايو پوءِ اوهان کي ميوٽيشن ورڪ به ڏيندس.

 

آرمي چيف سان چيني اڳواڻ جي ملاقات، اقتصادي راهداري منصوبي تي ڳالهيون

راولپنڊي (م.ڊ) آرمي چيف جنرل راحيل شريف سان چائنا ڪميونسٽ پارٽي جي سياسي بيورو اڳواڻ زانگ چوزينگ ملاقات ڪئي آهي، ملاقات دوران اقتصادي راهداري منصوبي ۽ خطي ۾ سيڪيورٽي معاملن تي خيالن جي ڏي وٺ ڪئي وئي، خابرو ادارن موجب آءِ ايس پي آر پاران جاري ڪيل بيان ۾ چيو ويو آهي ته جي ايڇ ڪيو ۾ آرمي چيف جنرل راحيل شريف سان چيني اڳواڻ ملاقات ڪئي، ملاقات دوران ٻنهي ملڪن جي دفاع ۽ سيڪيورٽي تعاون وڌائڻ تي به غور ڪيو ويو، ان موقعي تي آرمي چيف جنرل راحيل شريف جو چوڻ هو ته راهداري منصوبي کي وقت سر پڄاڻي تي پهچائڻ لاءِ محفوظ ماحول ڏيڻو پوندو، سندس چوڻ هو ته راهداري منصوبي خطي جي بهتري جي فائدي ۾ آهي، چيني اڳواڻ زانگ جو چوڻ هو ته اقتصادي راهداري منصوبو خطي ۾ وڏي اهميت رکي ٿو، جنهن سان خطي ۾ پائدار اثر پوندا.

 

جيڪا حڪومت اچي ٿي پنهنجي مرضي جو قانون ٺاهي ٿي: چيف جسٽس

اسلام آباد (بيورو) چيف جسٽس آف پاڪستان انور ظهير جمالي چيو آهي ته جيڪا حڪومت اچي ٿي اها پنهنجي مرضي جو قانون ٺاهي ٿي، خابرو ادارن موجب چيف جسٽس آف پاڪستان انور ظهير جمالي جي سربراهي ۾ 3 رڪني بينچ سنڌ ۾ ميئر ۽ ڊپٽي ميئر جي چونڊجڻ واري ڪيس جي ٻڌڻي ڪئي، ٻڌڻي دوران چيف جسٽس ريمارڪس ڏنا ته 2013ع جي شو آف هينڊز جي قانون ۾ ترميم جي ڪهڙي ضرورت هئي، قانون ۾ تبديلي آڻڻ جو مقصد بهتري آڻڻ هوندو آهي، تباهي نه، پر هتي قانون کي رانديڪو ٺاهيو ويو آهي، پنهنجي فائدي لاءِ قانون ۾ ترميم ڪئي وڃي ٿي، سندس چوڻ هو ته جيڪا حڪومت اچي ٿي اها پنهنجي مرضي جا قانون ٺاهي ٿي ۽ سڄو گند عدالتن مٿان وجهي ڇڏي ٿي.

 

بلاول ڀٽو جي شهيد ذوالفقار علي،امڙ بينظير،ناني نصرت ۽ مامن مير مرتضيٰ ۽ شاهنواز جي مزارن تي حاضري

نئون ديرو (رپورٽر) پيپلز پارٽيءَ جو چيئرمين بلاول ڀٽو نئون ديرو هائوس کان ڳڙهي خدابخش ڀٽو پهچي پنهنجي ناني شهيد ذوالفقار علي ڀٽو، امڙ شهيد راڻي محترمه بينظير ڀٽو، ناني بيگم نصرت ڀٽو، مامن شهيد مير مرتضيٰ ڀٽو ۽ شهيد شاهنواز ڀٽو جي مزارن تي حاضري ڀري گلن جون چادرون چاڙهيون ۽ فاتحه خواني ڪئي. بعد ۾ مزا اندر قائم ڪيل شهداءَ گئلري جو معائنو ڪيو، جتي پ پ جي شهيد ڪارڪنن جون تصويرون پنهنجي موبائل فون ۾ ڪيپچر ڪيون. ان موقعي تي ايم اين اي فريال ٽالپر، سنڌ اسيمبليءَ جي ڊپٽي اسپيڪر شهلا رضا ساڻس گڏ هيون. بلاول ڀٽو زرداريءَ جي مزار تي حاضري ڀرڻ کان اڳ ڳڙهي خدابخش ڀٽو جي مزار کي عام ماڻهن کان مڪمل طور تي خالي ڪرائي سيڪيورٽيءَ جا انتظام انتهائي سخت ڪيا ويا. جڏهن ته نئون ديرو هائوس کان ڳڙهي خدابخش ڀٽو تائين سيڪيورٽي الرٽ رکندي روڊ جي ٻنهي پاسن کان ايندڙ ويندڙ عام ٽريفڪ کي پڻ مڪمل طور تي بند رکيو ويو جنهن ڪري عام ماڻهن کي سخت گرميءَ سبب پريشانين جو منهن ڏسڻو پئجي ويو. هوڏانهن حاضري ڀرڻ بعد بلاول ڀٽو زرداري نوابشاهه روانو ٿي ويو. 002

 

سبي ويجهو جعفر ايڪسپريس تي راڪيٽ لانچر سان حملو، 3 مسافر مارجي ويا،10 زخمي

سبي(م.ڊ)  بلوچستان جي علائقي سبي ويجهو جعفر ايڪسپريس تي راڪيٽ لانچر سان حملي جي نتيجي ۾ 3 مسافر مارجي ويا ۽ 10 زخمي ٿي پيا آهن، بلوچستان جي وڏي وزير ثناءُ الله زهري ٻن ڄڻن جي مارجڻ جي تصديق ڪندي اجل جو شڪار ٿيلن جي وارثن لاءِ 10-10 لک رپيا معاوضو ڏيڻ جو اعلان ڪري ڇڏيو آهي. راولپنڊي کان ڪوئيٽا ويندڙ جعفر ايڪسپريس تي سبي ويجهو هٿياربندن راڪيٽ لانچر سان حملو ڪيو. هٿياربندن جي حملي جي نتيجي ۾ جعفر ايڪسپريس جون 3 بوگيون پٽڙي تان لهي ويون، جنهن سبب ٽريفڪ جي اچ وڃ معطل ٿي وئي. سيڪيورٽي ذريعن موجب، ٽرين تي حملي جي نتيجي ۾ 3 مسافر ٿڌي تي مارجي ويا ۽ 10 ڄڻا زخمي ٿي پيا آهن. اطلاع تي سڪيورٽي فورسز ۽ ليوز اٽالن واقعي واري هنڌ پهچي سرچ آپريشن شروع ڪري ڇڏيو، جڏهن ته مارجي ويلن جا لاش ۽ زخمين کي اسپتال منتقل ڪيو ويو آهي. ٻئي پاسي بلوچستان جي وڏي وزير نواب ثناءُ الله زهري واقعي جو نوٽيس وٺندي رپورٽ طلب ڪري ورتي آهي. وڏي وزير ثناءُ الله زهري حملي ۾ مارجي ويلن جي وارثن لاءِ 10-10 ۽ زخمين لاءِ 50-50 هزار رپيا معاوضي جو اعلان ڪيو آهي. هوڏانهن ريلوي واري وفاقي وزير خواجه سعد رفيق واقعي تي سخت لفظن ۾ مذمت ڪئي آهي. 002

 

لطيف آباد ۾ هڪ هفتي اندر 7 ٻارڙا ارڙي وگهي فوت،20 بيماري ۾ مبتلا،صحت کاتو ننڊ ستل

حيدرآباد (بيورو) صحت جي سهوليتن جي اڻ هوند يا شعور جي گهٽتائي، حيدرآ باد جي لطيف آباد واري علائقي ۾ هڪ ئي هفتي اندر 7 ٻارڙا ارڙي وگهي فوت ٿي ويا ۽ 20 ٻارڙا ارڙي جي بيماريءَ ۾ مبتلا آهن. لطيف آباد جي ڳوٺ الهه بخش بروهي ۾ ارڙي جي بيماري پکڙجڻ سبب هڪ ئي قبيلي سان تعلق رکندڙ ماڻهن جا 7 معصوم ٻارڙا 4 ورهين جو سليم شيخ، ٻن ورهين جي شهزادي، 5 ورهين جو زبير علي ۽ جان محمد، ٻن جي ورهين جو مصطفي شيخ ، روزينا شيخ ۽ ٽن ورهين جو اڪبر تڙپي تڙپي گهرن ۾ ئي فوت ٿي ويا، جڏهن ته ڳوٺ ۾ وبائي بيماري پکڙجڻ سبب 20 معصوم ٻارن جي زندگي اڃا به خطري هيٺ آهي. ڳوٺاڻن جو چوڻ آهي ته 4 ڏينهن اڳ انهن ڊپٽي ڪمشنر حيدرآباد سان ملاقات ڪري کيس وبائي بيماري متعلق لکت ۾ درخواست پڻ ڏني، جنهن  ۾ کيس اهو چيو ويو ته ڳوٺ ۾ صحت کاتي سان لاڳاپيل ٽيم کي موڪليو وڃي پر ان باوجود ڪابه صحت کاتي جي ٽيم توڙي ضلعي انتظاميه جي ٽيم ڳوٺ نه پهتي آهي، ڳوٺاڻن ميڊيا کي ٻڌايو ته هو مزدور طبقي سان تعلق رکندڙ آهن، جنهن ڪري کين ڪرائي جا پئسا به ناهن جو هو ٻارڙن کي حيدرآباد جي اسپتال کڻائي وڃن.

 

پ پ اڳواڻ آصف هاشمي دبئي ۾ گرفتار

دبئي (م.ڊ)  پاڪستان پيپلزپارٽي جو اڳواڻ آصف هاشمي کي دبئي ۾ گرفتار ڪيو ويو آهي، هڪ نجي ٽي وي ذريعن جي حوالي سان دعويٰ ڪئي آهي ته پاڪستان پيپلزپارٽي جو اڳواڻ آصف هاشمي کي دبئي مان ڪرپشن جي الزام هيٺ گرفتار ڪيو ويو آهي ۽ جلد ئي ان کي پاڪستان پهچائڻ جا امڪان آهي، ذريعن وڌيڪ چيو ته آصف هاشمي تي ڏيڍ ارب رپين جي ڪرپشن جا الزام آهن، هو ٻه مهينا اڳ يورپ کان دبئي آيو هو، آصف هاشمي کي 2013 ۾ ستاره امتياز سان به نوازيو ويو هو. 002

 

ڊيرا غازي خان ۾ مدرسي جي ڇت ڪري پئي،6 ٻارڙا دٻجي فوت، ڪيترائي زخمي

ڊِرا غازي خان(م.ڊ)  ڊيرا غازي خان ۾ مدرسي جي ڇت ڪرڻ سبب 6 ٻارڙا دٻجي فوت ٿي ويا ۽ 22 کان وڌيڪ زخمي ٿي پيا، ميڊيا رپورٽن مطابق مدرسي ۾ ٻارڙا تعليم پرائي رهيا هئا ته ان دوران برساتن سب زبون ٿي ويل عمارت جي ڇت اوچتو ڌماڪي سان ڪري پئي، جنهن جي نتيجي ۾ سمورا ٻارڙا مٽيءَ جي ڍيرن هيٺان دٻجي ويا، خبر پوڻ تي علائقي واسين ۽ ريسڪيو ٽيمن پهچي امدادي ڪارروايون شروع ڪيون، جڏهن ته پوليس به پهچي وئي، امدادي ڪاررواين دوران مٽيءَ جي ڍيرن هيٺان دٻجي ويل ٻارڙن  کي ڪڍي اسپتال پهچايو ويو، جتي علاج دوران زخمن جا سور نه سهندي 6 ٻارڙا فوت ٿي ويا، جڏهن ته 22 کان وڌيڪ زخمين کي طبي امداد ڏني وئي.