تازيون خبرون

Monthly Archives: April 2016

مخالف نَهنَ چوٽي جو زور لڳائن، عوام جي خدمت ۾ ڪابه ڪسر نه ڇڏي ويندي: نواز شريف

اسلام آباد (اين اين آءِ) وزيراعظم محمد نوازشريف چيو آهي ته قوم کي پنهنجي اثاثن جي باري ۾ پهريان ئي اعتماد ۾ وٺي چڪا آهيون مخالف مثبت قدمن تي منفي رويي جو اظهار ڪري رهيا آهن هن چيو ته منصوبن جو رسمي افتتاح نه ڪندا آهيون پر انهن کي مڪمل ٿيڻ کان پوءِ ئي ڌم پٽيندا آهيون. هن اهڙن خيالن جو اظهار گذريل ڏينهن وزيراعظم هائوس ۾ مسلم ليگ (ن) جي ايم اين اي سردار محمد عرفان ڊوگر، ايم اين اي عالم داد لاليڪا، ايم اين اي ميان نجيب الدين اويسي سان ڪيل ڌار ڌار ملاقاتن ۾ ڪيو ملاقات ۾ ٽنهي ايم اين ايز وزيراعظم سان گڏ پنهنجي تڪن ۾ هلندڙ ترقياتي ڪمن، عوامي مسئلن ۽ سياسي صورتحال تي خيالن جي ڏي وٺ ڪئي. جڏهن ته ايم اين ايز وزيراعظم جي قيادت ۽ ترقياتي پاليسين تي ڀرپور اعتماد جو اظهار ڪيو ان موقعي تي وزيراعظم ميمبرز کي خاطري ڪرائي ته عوام جي خدمت ۾ ڪابه ڪسر نه ڇڏي ويندي هن چيو ته قوم کي پنهنجي اثاثن جي باري پهريان کان ئي اعتماد ۾ وٺي چڪا آهيون هن چيو ته مين نه مانو جي رٽ هڻي اسان جي قدمن تي منفي رويي جو اظهار ڪيو پيو وڃي جڏهن ته تمام سياسي پارٽين جي راءِ مطابق چيف جسٽس جي نگراني ۾ ڪميشن بنائڻ جو فيصلو ڪيو ويو آهي ان باوجود مخالف نعرن جي سياست ڪري رهيا آهن.

 

گهٽ وقت ۾ روينيو ريڪارڊ جي ڪمپيوٽرائيزيشن سنڌ سرڪار جي وڏي سوڀ آهي: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته صوبي ۾ زمين جي  ڪمپيوٽرائيزيشن وارو ڪم سنڌ جي عوام لاءِ اسانجي سرڪار طرفان عظيم تحفو ثابت ٿيندو.  مون ان منصوبي کي صوبي جي ماڻهن لاءِ عظيم خدمت سمجهي شروع ڪيو ۽ مون کي يقين آهي ته اهي پنهنجي ۽ پنهنجي ايندڙ نسلن جي حقن واري رڪارڊ کي مڪمل تحفظ ڪرڻ تي مون کي سٺن لفظن ۾ ياد رکندا. اهڙن خيالن جو اظهار هن گذريل رات لينڊ روينيو ڪمپيوٽرائيزيشن ريڪارڊ جي معاملن ۽ مسئلن جي حوالي سان منعقد ٿيل اجلاس کي خطاب دوران ڪيو. اجلاس ۾ چيف سيڪريٽري سنڌ محمد صديق ميمڻ. وڏي وزير جي پرنسپال سيڪريٽري علم الدين بلو، سينيئر ميمبر آف روينيو رضوان ميمڻ، ميمبر آف روينيو ذوالفقار شاهه ۽ ٻين شرڪت ڪئي. اجلاس دوران وڏي وزير سيد قائم علي شاهه آفيسرن کان پڇاڳاڇا ڪئي ته هن 12 ڊسمبر 2011ع تي 4.9 ارب رپين جي لاڳت سان لينڊ ريڪارڊ جي ڪمپيوٽرائيزيشن جي منصوبي جي منظوري ڏني هئي، ته پوءِ اڄ تائين اهو منصوبو ڪهڙن سببن جي ڪري مڪمل ناهي ٿيو. سينيئر ميمبر آف روينيو رضوان ميمڻ وڏي وزير کي ٻڌايو ته اهو منصوبو ساڍن چئن ورهين جي رڪارڊ عرصي ۾ مڪمل ٿي چڪو آهي جڏهن ته پنجاب حڪومت زمين جي رڪارڊ ڪرڻ جو اهڙو منصوبو ساڍن 9 ورهين ۾ مڪمل ڪيو. چيف سيڪريٽري صديق ميمڻ ٻڌايو ته پنجاب ۾ 36 ۽ سنڌ ۾ 29 ضلعا آهن ۽ پنجاب ۾ لينڊ رڪارڊ جي ڪمپيوٽرائيزيشن جو ڪم عالمي بينڪ جي سهڪار سان ڪيو ويو، جڏهن ته سنڌ پنهنجن ئي وسيلن سان ڪم مڪمل ڪيو، اهڙي لحاظ سان بورڊ آف روينيو تمام بهترين ڪم ڪيو آهي ۽ اهي ڪجهه ننڍن مسئلن کي منهن ڏئي رهيا آهن جن کي تمام جلد حل ڪرڻ ضروري آهي. ميمبر ذوالفقار شاهه منصوبي جي خاص نقطن بابت ٻڌايو ته سنڌ حڪومت هڪ مرڪزي ڪمپيوٽرائيزيشن سسٽم تيار ڪيو آهي جنهن تحت زمين جا ملڪ صوبي ۾ قائم ڪنهن به سروس سينٽر مان پنهنجي لينڊ ريڪارڊ جي ڪاپي حاصل ڪري سگهن ٿا، جڏهن ته پنجاب ۾ رڳو لاڳاپيل تعلقي سينٽر مان ئي ريڪارڊ حاصل ڪري سگهجي ٿو. هن ٻڌايو ته اهو منصوبو تقريبن مڪمل ٿي چڪو آهي رڳو 8 کان 10 سيڪڙو ڊيٽا کي ڊجيٽلائيز ڪرڻ رهيل آهي. هن وڌيڪ ٻڌايو ته 24 ضلعن مان 3016 ريڪارڊ جون ڪاپيون جاري ڪيون ويون آهن جن خلاف ريڪارڊ جي نه ملڻ جون رڳو 25 شڪايتون مليون آهن. ذوالفقار شاهه وڌيڪ ٻڌايو ته هُو گم ٿيل ريڪارڊ ڳولي ۽ غلطن کي ختم ڪري ڪمپيوٽرائيزڊ سسٽم کي پرفيڪٽ بڻائڻ لاءِ ڏينهن رات محنت ڪري رهيو آهي. هن وڌيڪ ٻڌايو ته سپريم ڪورٽ آف پاڪستان جي حڪم جي روشنيءَ ۾ هن ڊجيٽلائيزڊ ريڪارڊ جي مائيڪرو فلمنگ ذريعي تصديق وارو عمل شروع ڪيو آهي ۽ اهڙي عمل جي مدد سان ڪمپيوٽرائيزيشن ۾ آيل غلطيون ختم ٿي وينديون. سنڌ جي وڏي وزير سيد قائم علي شاهه چيو ته روينيو ريڪارڊ جي ڪمپيوٽرائيزيشن سندس وڏي سوڀ آهي ۽ اها هن پاران سنڌ جي عوام لاءِ سڀ کان وڏي خدمت هوندي. هن آفيسرن کي هدايت ڪئي ته سپريم ڪورٽ جي حڪمن تي عملدرآمد ڪن ۽ ريڪارڊ کي غلطن کان پاڪ ڪيو وڃي. اهو سندس قيادت ۽ عوام سان پڪو پهه آهي.

 

صدر سان غير ملڪي سفيرن جي ملاقات، ضرب عضب آخري دهشتگردي جي خاتمي تائين جاري رهندو: ممنون حسين

اسلام آباد (اين اين آءِ) برطانيا انڊونيشيا جاپان ارجنٽينا اڪواڊور ۽ لٿونيا جي سفيرن گذريل ڏينهن ايوان صدر ۾ منعقد ٿيل تقريب ۾ شرڪت ڪري پنهنجا دستاويز صدر مملڪت ممنون حسين کي پيش ڪيا جڏهن ته تقريب جي پڄاني کان پوءِ مختلف ملڪن جي سفيرن صدر ممنون حسين سان ڌار ڌار ملاقاتون ڪيون ان موقعي تي صدر ممنون حسين چيو ته پاڪستان تمام ملڪن بلخصوص پاڙيسري ملڪن سان لاڳاپا رکڻ جو خواهشمند آهي ته جيئن خطي ۾ امن استحڪام ۽ خوشحالي اچي. هن وڌيڪ چيو ته پاڪستان سيڙپڪاري جا بهتري موقعا فراهم ڪري ٿو جنهن ۾ عالمي سيڙپڪارن کي فائدو ٿيندو صدر مملڪت وڌيڪ چيو ته آپريشن ضرب عضب ڪاميابي سان جاري آهي ۽ آخري دهشتگرد جي خاتمي تائين آپريشن جاري رهندو صدر مملڪت نيون زميوارون سنڀاليندڙ سفيرن کي مبارڪباد پيش ڪيو ۽ ان اميد جو اظهار ڪيو ته هو پاڪستان سان پنهنجي ملڪن جا لاڳاپا وڌيڪ مضبوط بنائڻ ۾ ڪردار ادا ڪندا.

 

پانامه ليڪس معاملي تي وزيراعظم جي خاندان جو احتساب ٿيڻ گهرجي: خورشيد شاهه

سکر (اين اين آءِ) قومي اسيمبلي ۾ مخالف ڌر جي اڳواڻ خورشيد شاهه چيو آهي ته پانامه ليڪس معاملي تي وزيراعظم جي خاندان جو احتساب ٿيڻ گهرجي 2012 ۾ حاجين کي موبائيل فون فراهم ڪرڻ بابت ڪرپشن جون ڳالهيون ڪيون پيون وڃن احتساب ڪرڻو آهي ته عوام جي پئسي سان ڪروڙين رپين جا ڏنل اشتهارن جو به حساب ٿيڻ گهرجي. گذريل ڏينهن ميڊيا سان ڳالهائيندي خورشيد شاهه چيو ته سمجهه ۾ نٿو اچي ته ميان صاحب کي جلسن لاءِ ڇو اچڻو پئي ٿو. اسان جاچ جي لاءِ نوازشريف جي خاندان جي ڳالهه ڪئي ته ان جي خاندان جو احتساب ٿيڻ گهرجي. هن چيو ته 2012 ۾ حاجي سڳورن کي موبائيل فون فراهم ڪرڻ بابت ڪرپشن جون ڳالهيون ٿي رهيون آهن هن چيو ته پانامه ليڪس نئون معاملو آهي ۽ موبائيل خريداري 2012 ۾ ٿي هئي جيڪڏهن احتساب ڪرڻو آهي ته عوام جي پئسن سان ڪروڙين رپين جي ماليت جا اشتهار ڏنا ويا ان جو به احتساب ٿيڻ گهرجي خورشيد شاهه چيو ته منهنجي نيت خراب نه آهي حاجين لاءِ موبائيل فون جي خريداري جائز طريقي سان ڪئي ويئي جيڪا گذريل سال به لانچ ڪري سگهجي پئي.

 

پ پ پ ۽ سنڌ حڪومت صحافت جي آزادي تي يقين رکي ٿي: مولابخش چانڊيو

ڪراچي (اسٽاف رپورٽر ) سنڌ جي اطلاعات ۽ آرڪائيوز بابت وڏي وزير جي صلاحڪار مولابخش چانڊيو آرڪائيوز جي آفيس ۾ سنڌ جي مختلف پريس ڪلبن جي عهديدارن ۾ امدادي چيڪ ورهايا. جن ۾ ملير پريس ڪلب، سجاول پريس ڪلب، ٽنڊو محمد خان پريس ڪلب ۽ ٻيون پريس ڪلبون شامل آهن. ملير پريس ڪلب جو چيڪ صدر آغا طارق پٺاڻ وصول ڪيو، ان موقعي تي ملير ڊسٽرڪٽ ڪونسل جي نامزد چيئرمين سلمان عبدالله مراد ۽ پيپلز پارٽي ملير جا ڪارڪن به موجود هئا، جڏهن ته ٻين پريس ڪلبن جي عهديدارن پنهنجا پنهنجا چيڪ وصول ڪيا. پريس ڪلبن جي عهديدارن سان ڳالهائيندي مولابخش چانڊيو چيو ته پريس ڪلبس هائيڊ پارڪس جيان ڪم ڪن ٿا، جتي مختلف طبقن سان تعلق رڪندڙ ماڻهو پنهنجن مسئلن جي حل لاءِ اچن ٿا ۽ سياسي پارٽين جا ورڪرز ۽ اڳواڻ به موقف پيش ڪرڻ لاءِ پريس ڪلبس جا دورا ڪن ٿا. هن چيو ته پاڪستان پيپلز پارٽي ۽ سنڌ حڪومت هميشه صحافت جي آزادي تي يقين رکي ٿي ۽ سنڌ حڪومت سموري صوبي جي پريس ڪلبس جي تعمير ۽ ترقي لاءِ پنهنجو موثر ڪردار ادا ڪندي رهندي. هوڏانهن سنڌ جي اطلاعات ۽ آرڪائيوز بابت وڏي وزير جي صلاحڪار مولابخش چانڊيو سنڌ اسيمبلي ۾ پسٽل واري معاملي تي ميڊيا سان ڳالهائيندي چيو ته ڪجهه دوستن پاڻ کي ملندڙ رعايت جو ناجائز فائدو وٺندي اهو ڊرامو رچايو آهي. سنڌ حڪومت معاملي جي جاچ ڪري رهي آهي. سنڌ جي گهرو وزير سهيل انور سيال به معاملي جو سخت نوٽيس ورتو آهي. سنڌ اسيمبلي جي انتظاميه لاڳاپيل سيڪيورٽي اهلڪارن کي معطل به ڪري ڇڏيو آهي ۽ اسيمبلي جي اندر به ان معاملي جي جاچ تي ڪم ٿي رهيو آهي. مولابخش چانڊيو چيو ته سنڌ حڪومت جي ڪاوشن سان سموري صوبي خاص ڪري ڪراچي ۾ امن جي فضا قائم ٿي آهي ۽ دهشتگردي جي واقعن ۾ خاطر خواه گهٽتائي آئي آهي. هن چيو ته جيئن ئي اسيمبلي معاملي جي جاچ مڪمل ٿيندي ان جون حقيقتون ميڊيا سان شيئر ڪيون وينديون

 

نين ڪوآرڊينيشن ڪاميٽيون سياسي چئلينجن کي منهن ڏيڻ لاءِ متحرڪ تنظيمون آڻين:بلاول ڀٽو

اسلام آباد (بيورو) پاڪستان پيپلزپارٽي جي چيئرمين بلاول ڀٽو زرداري چيو آهي ته تاريخ پاڪستان پيپلزپارٽي جي نين ڪوآرڊينيشن ڪاميٽين تي وڏي ذميواري رکي آهي ۽ انهن ڪاميٽين کي گهرجي ته پارٽي ۽ سڄي قوم کي جيڪي سياسي چئلينجز سامهون آهن انهن کي منهن ڏيڻ لاءِ متحرڪ تنظيمون آڻين، سخت محنت ڪن ۽ ڪارڪنن سان ويجهي رابطي ۾ رهن،اڄ زرداري هائوس اسلام آباد ۾ پاڪستان پيپلزپارٽي سينٽرل پنجاب جي ڪوآرڊينيشن ڪاميٽي سان گڏجاڻي دوران ڳالهائيندي چيئرمين بلاول ڀٽو زرداري چيو ته جمهوري جدوجهد ۽ جمهوري قدرن جي مشعل بردارپارٽي هجڻ جي ناتي پاڪستان پيپلزپارٽي عوام جي اجتماعي اتساه لاءِ ملڪ جي ڪند ڪڙڇ ۾ واحد نمائنده طور نمايان بيٺل رهي آهي،گڏجاڻي ۾ پاڪستان پيپلزپارٽي سينٽرل پنجاب جي ڪوآرڊينيشن ڪاميٽي جي ميمبرن راجا پرويز اشرف، رانا فاروق احمد خان، چوڌري منظور۽ نديم قائره شرڪت ڪئي، ان موقعي تي پيپلزپارٽي عورت ونگ جي صدر ايم اين اي فريال ٽالپر،قمرالزمان قائره ۽ چيئرمين بلاول ڀٽو زرداري جي پوليٽيڪل سيڪريٽري جميل سومرو به موجود هئا، بلاول ڀٽو زرداري وڌيڪ چيو ته پنجن ئي صوبائي ڪوآرڊينيشن ڪاميٽين جي لاءِ اقليتن بابت صلاحڪاري ڪاميٽيون جوڙيون وينديون جيڪي کين اقليتن سان لاڳاپيل معاملن بابت مشورا ڏينديون. هن چيو ته صوبن ۾ پارٽي جي نئين تنظيم کان اڳ ۾ سموريون گڏجاڻيون ڪوآرڊينيشن ڪاميٽيون ڪوٺائينديون، چيئرمين بلاول ڀٽو زرداري گڏجاڻي ۾ ڪوآرڊينيشن ڪاميٽي کي هدايت ڪئي ته اوڪاڙا جي هارين جو معاملو هر فورم تي اٿاريو وڃي، ڪوآرڊينيشن ڪاميٽي جي ميمبرن پارٽي چيئرمين کي خاطري ڪرائي ته پارٽي جي نئين سر تنظيم سازي جي لاءِ سفارشون ۽ تجويزون جوڙڻ ۽ نئين دور سان هم آهنگ ڪارڪنن جي ٽيم جوڙڻ  وقت پنهنجي سمورا ذاتي پسند ناپسند کي هڪ پاسي رکندا، گڏجاڻي اڍائي ڪلاڪ تائين جاري رهي جنهن ۾ پارٽي جي نئين سر تنظيم سازي جي حوالي سان سمورن معاملن تي تفصيل سان ويچاريو ويو.

 

صحافي پسٽل سنڌ اسيمبلي ۾ آڻي سيڪيورٽي جا پول کولي ڇڏيا، گرفتار، وفاق نوٽيس ورتو، مذمت

اسلام آباد/ڪراچي (م.ڊ/اين اين آءِ) سنڌ اسيمبلي ۾ نجي ٽي وي جو اينڪر ساٿي سميت هٿيار کڻي ايوان ۾ پهتو ته سيڪيورٽي اهلڪارن کيس حراست ۾ ورتو صوبائي گهرو وزير ڊي آءِ جي سائوٿ جي سربراهي ۾ جاچ ڪميٽي جوڙي ويئي آهي گذريل ڏينهن نجي ٽي وي چينل جو اينڪر اقرارالحسن پنهنجي ساٿي سميت هٿيار گڏ کڻي سنڌ اسيمبلي ۾ پهتو اسيمبلي ميمبرن موجب جڏهن سيڪيورٽي اهلڪارن اينڪر جي ساٿي کي روڪڻ جي ڪوشش ڪئي ته اقرارالحسن سيڪيورٽي ادارن کي چيو ته ان کي منهنجي ضمانت تي ايوان ۾ اچڻ ڏنو وڃي جنهن کان پوءِ ٻئي ايوان ۾ پهچي ويا ۽ ايوان اندر هٿيار ظاهر ڪيا. سنڌ اسيمبلي جي اسپيڪر چيو آهي ته اوهان جي سيڪيورٽي ۾ بنا روڪ ٽوڪ جي ايوان ۾ هٿيار کڻي داخل ٿيو آهي جنهن بعد سيڪيورٽي گارڊ کان هٿيار کسي اسپيڪر جي حوالي ڪيو ويو ٻئي طرف صوبائي گهرو وزير واقعي جو سختي سان نوٽيس وٺندي هٿيار ۽ ان شخص سميت نجي ٽي وي چينل جي اينڪر کي گرفتار ڪرڻ جو حڪم جاري ڪيو آهي صوبائي گهرو وزير جي حڪم کان پوءِ پوليس ٻنهي ڄڻن کي پنهنجي حفاظت ۾ وٺي ڇڏيو آهي گهرو وزير انورسيال جو چوڻ آهي ته سيڪيورٽي وارن معاملن ۾ غفلت ڪندڙ اهلڪارن جي خلاف به سخت ڪارروائي ڪئي ويندي. جڏهن ته اسپيڪر سراج دراني چيو آهي ته هٿيار هٿ ڪرڻ واري واقعي جي جاچ ڪري رپورٽ پيش ڪئي وڃي. سُڌ سماءُ بابت وڏي وزير جي صوبائي صلاحڪار مولا بخش چانڊيو سنڌ اسيمبلي ۾ هٿيار کڻي اچڻ واري مامري تي پنهنجو رد عمل ظاهر ڪندي چيو آهي ته سنڌ اسيمبليءَ ۾ هٿيار کڻي اچڻ واري مامري جي سنڌ حڪومت جا چڪري رهي آهي. مولا بخش چانڊيو جو وڌيڪ چوڻ هو ته سنڌ اسيمبليءَ جي سموري سڪيورٽي عملي کي معطل ڪري سندن خلاف به جاچ ڪئي ويندي. مولا بخش چانڊئي چيو ته دوستن رعايتن جو ناجائز فائدو وٺي ڪوڙو ڊرامو رچايو آهي جنهن کي جاچ بعد وائکو ڪيو ويندو.سنڌ اسيمبلي اجلاس دوران هڪ خانگي ٽي وي چينل جي اينڪرپرسن پاران سنڌ اسيمبليءَ جي سڪيورٽي عملدارن جي پت وائکي ڪرڻ جي لاءِ اسيمبلي هال ۾ هٿيار کڻي وڃڻ واري عمل بعد سنڌ جي تعليم واري وزير نثار احمد کهڙي چيو آهي ته هڪ صحافين جي خراب حرڪت جي ڪري سڀ صحافي هاڻي شق جي نگاهه سان ڏٺا ويندا. سنڌ اسيمبليءَ جي فلور تي ڳالهائيندي نثار احمد کهڙي چيو ته خانگي ٽي ويءَ جي هڪ صحافيءَ جي خراب عمل سبب هاڻي سڀ صحافي شڪي بڻجي ويا آهن. ٻئي طرف صحافين تنظيمن پاران اقرار الحسن جي گرفتاري جي سخت لفظن ۾ مزمت ڪئي وئي  آهي، هوڏانهن وفاقي گهرو وزير چوڌري نثار صحافي جي گرفتاري جي مذمت ڪندي واقعو جو نوٽيس ورتو آهي، چوڌري نٿار گهرو سيڪريٽري کي هدايت ڪئي  آهي ته هو آءِ جي سنڌ سان  رابطي ڪري معاملي جي رپورٽ وٺي.

 

 

وزيراعظم پاناماليڪس تي پارليامينٽ کي اعتماد ۾ وٺڻ بدران جلسن ۾ لڳي ويو، رڳو مخالف ڌر کي گارگند ڪئي پئي وڃي:اعتزاز احسن

لاهور (م.ڊ) سينيٽ ۾ پيپلز پارٽي سان لاڳاپيل مخالف ڌر جي اڳواڻ سينيٽر اعتزاز احسن چيو آهي ته پاناماليڪس جي معاملي تي وزيراعظم پارليامينٽ کي اعتماد ۾ وٺڻ بدران جلسن لاءِ نڪري پيوآهي، لاهور هائيڪورٽ ۾ ميڊيا سان ڳالهائيندي اعتزاز احسن چيو ته انڪم ٽيڪس ٻڙي هجڻ کانپوءِ به ايڏيون وڏيون ملڪيتون ٺهي وڃڻ سمجهه کان چڙهيل ڳالهه آهي، هن چيو ته وزيراعظم نواز شريف کي گهرجي ها ته هو پاناماليڪس بابت پارليامينٽ کي اعتماد ۾ وٺي ها پر هو جلسن ۾ لڳي ويو آهي، جن ۾ رڳو مخالف ڌر کي گارگند ڪيو پيو وڃي، هن چيو ته شريف ڪٽنب 1994ع ۽ 1996ع ۾ هڪ ٽڪو به ٽيڪس ادا نه ڪئي، ان کانپوءِ به ان جون شگرملون هلي رهيون آهن، سندس چوڻ هو ته ڪروڙين رپيا صندوقن ۽ ٻورين ۾ ڀري ٻاهر نيا ويا، جنهن جي جاچ لاءِ عدالتي ڪميشن جوڙڻ بدران فرانزڪ آڊٽ ڪرائي وڃي، اعتزاز احسن چيو ته اڄ تائين ڪرپشن ۽ ان قسم جي ٻين الزامن جي جاچ ۾ ڪنهن کي به سزا ناهي ملي، جڏهن ته جڊيشل ڪميشن جي ٽي آر اوز لاءِ قانونسازي جي ضرورت آهي، پ پ سينيٽر مطالبو ڪيو ته حڪومت، مخالف ڌر سان گڏجي عدالتي جاچ ڪميشن لاءِ ٽرمز آف ريفرنسز جوڙي.001

 

گينگ وار جا ڏوهاري ڪٿي روپوش آهن؟ عذير بلوچ سڀ ڪجھه ٻڌائي ڇڏيو

ڪراچي (اسٽاف رپورٽر) لياري گينگ وار جي مک ڪردار عذير بلوچ پنهنجي روپوش ساٿين بابت اهم انڪشاف ڪيا آهن. ميڊيا رپورٽن موجب عذير بلوچ جاچ ادارن کي ٻڌايو آهي ته گينگ وارو جا ڏوهاري فيصل پٺاڻ، وسيع لاکو، سڪندر عرف سڪو، شاهد رحما، ملا نثار ۽ ٻيا 9 دهشتگرد ايران ۾ آهن. هن ٻڌايو ته شيراز ڪامريڊ، شڪيل الرحمان، بادشاهه، مسقط ۾ ۽  استاد تاجو ڏکڻ آفريڪا ۾ آهي. عذير بلوچ کي دبئي ۾ به ڪراچي مان ڀتو ملندو رهيو. هن جاچ ادارن کي ٻڌايو ته روپوشي دوران 94 لک رپيا ڀتو دبئي ۾ وصول ڪيو.

 

سنڌ اسيمبلي ۾ نصرت سحر عباسي ۽ نثار کهڙي وچ ۾ جملن جي ڏي وٺ، فنڪشنل ليگ جو واڪ آئوٽ

ڪراچي (اسٽاف رپورٽر) سنڌ اسيمبلي جي اجلاس دوران نصرت سحر عباسي ۽ سينيئر وزير نثار کهڙي وچ ۾ جملن جي ڏي وٺ ٿي، نصرت سحر عباسي کي نثار کهڙي جي مبينا ڌمڪي واري اشاري ۽ ڳالهائڻ جي اجازت نه ملڻ تان فنڪشنل ۽ نوازليگ ميمبرن ايوان مان واڪ آئوٽ ڪيو.اسپيڪر سراج دراني جي صدارت هيٺ سنڌ اسيمبلي جي اجلاس ۾ سوالن جوابن جي وقفي دوران هنري تعليم بابت پڇيل سوالن جا جواب شاهه ٿهيم ۽ انساني حقن واري وزارت بابت پڇيل سوالن جا جواب نثار کهڙي ڏنا ويا. نصرت سحر عباسي هنري تعليم بابت جمع ڪرايل سوال جي جواب تي اعتراض واريو، اسپيڪر سراج دراني به سندس موقف جي حمايت ڪندي هدايت ڪئي ته ٻيهر سوالن جا درست جواب ڏنا وڃن، ڪو به اهڙو جواب قبول نه ڪيو ويندو، جنهن مان ميمبر مطمئن نه هجي. نثار کهڙو سوالن جا جواب ڏئي رهيو هو نصرت سحر عباسي ايوان جي ڪارروائي آئين موجب نه هلائڻ جي شڪايت ڪئي، نثار کهڙي چيو ته آئين جي ڳالهه اهي ڪري رهيا آهن، جيڪي پاڻ آمرن جي هنج ۾ ويٺل رهيا. ان موقعي تي نثار کهڙي ۽ نصرت سحر عباسي وچ ۾ جملن جي ڏي وٺ ٿي، اسپيڪر نصرت سحر عباسي کي خاموش رهڻ جي هدايت ڪندي سندس مائيڪ بندڪرائي ڇڏيو، نصرت سحر عباسي چيو ته سينيئر وزير هن ڏانهن اشارا ڪري ڌمڪيون ڏئي رهيو آهي. نثار کهڙي چيو ته هن ڪو به اشارو ناهي ڪيو، اسپيڪر سراج دراني چيو ته ڪير به ڪنهن  کي گهٽ وڌ نه ٿو ڳالهائي سگهي. اسپيڪر سوالن جوابن جو وقفو ختم ٿيڻ جو اعلان ڪندي ايم ڪيو ايم جي سيف الدين خالد کي ڌيان ڇڪايو نوٽيس تي ڳالهائڻ جي اجازت ڏني. نصرت سحر عباسي سان گڏ سورٺ ٿيٻو ۽ ٻيا ميمبر به احتجاج ڪرڻ لڳا ته سيف الدين خالد اسپيڪر کي چيو ته هڪ ميمبر ڪجهه ڳالهائي پئي سندس ڳالهه ٻڌو، سراج دراني چيو ته انهن ٻنهي جو آواز ڏاڍو سٺو آهي، ڳائين ٿا سٺو هو. اسپيڪر جي اهڙي جملي بعد فنڪشنل ليگ ۽ نوازليگ جي ميمبرز ايوان مان واڪ آئوٽ ڪيو.