تازيون خبرون

Daily Archives: March 26, 2016

گڏيل مفادن واري ڪائونسل جو اجلاس، آدمشماري ٻيهر ملتوي ڪرڻ جو فيصلو

اسلام آباد (اين اين آءِ) گڏيل مفادن واري ڪائونسل آدمشماري جو عمل هڪ دفعو ٻيهر ملتوي ڪرڻ جو فيصلو ڪيو آهي جڏهن ته نئين تاريخ لاءِ پاڪستان شماريات بيورو کي صوبائي حڪومتن ۽ فوج سان مشاورت ڪرڻ جي هدايت ڪئي ويئي آهي گڏيل مفادن واري ڪائونسل جو اجلاس جمعي تي وزيراعظم نوازشريف جي صدارت هيٺ وزيراعظم آفيس ۾ ٿيو اجلاس ۾ آدمشماري 2016 جو معاملو تف صيلي غور هيٺ آندو ويو اجلاس کي ٻڌايو ته گڏيل مفادن واري ڪائونسل جي گڏيل اجلاس ۾ ڪيل فيصلي مطابق صوبائي حڪومتن ۽ فوج سان ڪيترائي اجلاس منعقد ڪيا ويا ڇو ته مستقبل جي رٿابندي لاءِ آدمشماري آپريشن جي شفافيت نهايت اهميت واري اهي ۽ هن مقصد لاءِ اٽڪل 3 لک فوجين جي ضرورت آهي اجلاس کي ٻڌايو ويو ته فوج جي شوال آپريشن ۽ ضرب عضب ۾ مصروفيتن سبب گهربل انگ ۾ فوجي مهيا هئڻ ناممڪن آهي مرحلي وار آدمشماري جي آپش کي اجلاس دوران غور هيٺ آندو ويو جڏهن ته اجلاس ۾ شماريات بيورو پاران آگاهه ڪيو ويو ته مرحليوار آدمشماري ۾ مختلف خاميون آهن ۽ هي بين الاقوامي سطح تي به وڌيڪ مناسب طريقو نٿو سمجهيو وڃي اجلاس دوران گڏيل طور تي فيصلو ڪيو ويو ته آدمشماري جو عمل ملتوي ڪيو وڃي ۽ ان حوالي سان نئين تاريخ صوبائي حڪومتن ۽ فوج جي مشاورت سان ڪئي وڃي.

 

پاڪ- ايران مختلف معاهدن تي صحيحون ڪري ڇڏيون، امن جي واڌاري لاءِ گڏيل ڪوششن تي اتفاق

اسلام آباد(بيورو) پاڪستان ۽ ايران وچ ۾ مختلف شعبن ۾ معاهدن تي صحيحون ڪيون ويون آهن. وزير اعظم نواز شريف چيو آهي ته اميد آهي ته پاڪستان ۽ ايران جا لاڳاپا مضبوط کان مضبوط ٿيندا ويندا. گذريل ڏينهن ايراني صدر حسن رفسنجاني ۽ وزير اعظم نواز شريف وچ ۾ ملاقات ٿي. ملاقات کانپوءِ ٻنهي اڳواڻن مختلف شعبن ۾ معاهدن تي صحيحون ڪيون ويون. جڏهن ته بنهي ملڪن امن امان جي واڌاري لاءِ گڏيل ڪوششن تي اتفاق پڻ ڪيو. ملاقات کانپوءِ گڏيل پريس ڪانفرنس ڪندي وزير اعظم نواز شريف چيو ته پاڪستان ۽ ايران جي بهتر لاڳاپن جو فائدو عوام کي پهچندو. پاڪستان ۽ ايران وچ ۾ 2 سرحدي ڪراسنگ پوائنٽون جوڙيون وينديون. هن چيو ته ايراني صدر کي پاڪستان اچڻ تي ڀليڪار چوان ٿو. اميد آهي ته ايراني قوم صدر روحاني جي قيادت ۾ ترقي ڪندو. پاڪستان ۽ ايران گڏيل سهڪار کي توانائي سميت سمورن شعبن ۾ هٿي ڏني ويندي. سندس چوڻ هو ته ٻنهي ملڪن ۾ گھاٽا ڀائپي وارا لاڳاپا آهن، ايراني صدر سان ڳالهين ۾ سمورن شعبن ۾ سهڪار وڌائن تي ڳالهه ٻول ٿي آهي. ان موقعي تي ايراني صدر حسن روحاني پاڪستاني قوم کي يومِ پاڪستان جون مبارڪون ڏنيون. هن چيو ته پاڪستان ۽ ايران علائقائي مسئلن جي حل تي اتفاق ڪيو آهي ۽ ٻئي ملڪ دهشتگردي خلاف پرعزم آهن. هن چيو ته دهشتگردي خلاف گڏجي ڪوششون ڪرڻيون آهن. ٻنهي ملڪن جون سرحدون مضبوط ٿيڻ سان ئي ترقي ممڪن آهي. پاڪستان ۽ ايران وچ ۾ اقتصادي سهڪار وڌائڻ جا وڏا موقعا موجود آهن. ايراني صدر حسن روحاني وڌيڪ چيو ته پاڪستاني قيادت سان مختلف معاملن تي ڳالهيون ٿيون آهن. قدرتي وسيلن جي شعبن ۾ سهڪار کي وڌيڪ هٿي ڏئي سگھجي ٿي. هن چيو ته پاڪستان جي سلامتي اسان جي سلامتي آهي. ٻنهي ملڪن جون سرحدون محفوظ ٿيڻ سان گڏي فائدو ٿيندو. پاڪستان ۽ ايران لاڳاپن کي وڌيڪ هٿي ڏيڻ لاءِ پرعزم آهن.

 

سنڌ سرڪار سي سي آءِ ۾ نون ڊيمن جي مخالفت ڪري ڇڏي

ڪراچي (اسٽاف رپورٽر) پاڪستان جي وزيراعظم محمد نواز شريف جي صدارت هيٺ اڄ اسلام آباد ۾ ٿيل گڏيل مفادن واري ڪائونسل (سي سي آءِ) واري اجلاس سنڌ جي وڏي وزير سيد قائم علي شاهه سنڌ صوبي جو ڀرپور دفاع ڪندي نون ڊيمن جي سخت ۾ مخالفت ڪئي ۽ وفاقي حڪومت تي آدمشماري ڪرائڻ تي زور ڀريو. وزير اعليٰ هائوس مان جاري ٿيل بيان ۾ ٻڌايو ويو آهي ته وفاقي پاڻي ۽ بجلي واري وزارت ڏهه سالن جي نيشنل فلڊ پروٽيڪشن پلان VI پيش ڪيو جنهن ۾ ٻوڏ واري وقت پاڻي ئي گڏ ڪرڻ لاءِ ڪالاباغ ڊيم ۽ اکوڙي ڊيم جي تعمير جي ڀرپور حمايت ڪئي وئي. وڏي وزير ان تي اصولي موقف اختيار ڪندي چيو ته سنڌ ۽ خيرپختون خواه جون حڪومتون ۽ اسيمبليون اڳ ئي ڪالاباغ ڊيم کي رد ڪري چڪيون آهن، اهي فلڊ پلان بيوروڪريسي جو بڻايل لڳي ٿو نه ته ٻئي صورت ۾ پاڻي ۽ بجليءَ واري وفاقي وزير سياستدان هئڻ ڪري ان کي سي سي آءِ ۾  آڻڻ جي منظوري نه ڏئي هان. هن چيو ته 1991ع جي پاڻي معاهدي ۾ ڪٿي به ڪنهن نئين ڊيم بڻائڻ جو ڪو ذڪر نه آهي. پاڻي ۽ بجلي واري وزارت اجلاس ۾ اهي دليل ڏنا ته ملڪ ۾ مسلسل ٻوڏ اچي رهي آهي ۽ ٻوڏ واري پاڻيءَ کي گڏ ڪرڻ جو واحد طريقو ڪالاباغ ڊيم ۽ اکوڙي ڊيم جي تعمير وارا منصوبا آهن. سنڌ جي وڏي وزير چيو ته 2010ع ۾ ٻوڏ ۽ 2011ع جي برساتن کان سواءِ ملڪ ۾ گذريل پنجن ورهين ۾ ڪا وڏي ٻوڏ نه آئي آهي. حالانڪ ٿرپارڪر سميت صوبي جي مختلف ضلعن ۾ ڏڪار واري صورتحال آهي. سنڌ سرڪار ڪاڇي، ڪوهستان ۽ ٻين ريگستاني علائقن ۾ رهندڙن ماڻهن کي ڪڻڪ ۽ کائڻ پيئڻ جون ٻيون شيون فراهم ڪرڻ لاءِ پنج ارب رپيا خرچ ڪيا آهن ۽ ان صورتحال ۾ ٻوڏ جي واري مفروضي تي نون ڊيمن جي اجازت ڪئين ڏئي سگهجي ٿي؟ ان تي وزير اعظم پاڪستان نواز شريف پاليسي فيصلو ڪندي ڪالاباغ ڊيم ۽ اکوڙي ڊيم جي تجويزن کي ملتوي ڪري ڇڏيو. سنڌ جي وڏي وزير سيد قائم علي شاهه چوٿين قومي ٻوڏ واري تحفظي پلان (نيشنل فلڊ پروٽيڪشن پلان VI) بابت ڳالهائيندي چيو ته گذريل ٽن پلانن کي وفاقي حڪومت طرفان فنڊنگ ڪئي وئي جڏهن ته ان چوٿين پلان لاءِ صوبائي حڪومتن کي 177 ارب رپين جو خرچ برداشت ڪرڻ لاءِ چيو ويو آهي، جيئن ته اهو هڪ قومي پلان آهي انڪري مرڪز کي ئي خرچ ڪرڻ گهرجي. وزير اعظم پاڪستان پاليسي فيصلو ڪندي پاڻي ۽ بجلي واري وزارت کي نيشنل فلڊ پروٽيڪشن پلان VI جي حوالي سان چئني وڏن وزيرن کي بريفنگ ڏيڻ جي هدايت ڪئي، جنهن بعد ان معاملي تي ايندڙ اجلاس ۾ بحث ڪيو ويندو. آدمشماري ڪرائڻ واري معاملي تي وڏي وزير سيد قائم علي شاهه چيو ته سنڌ صوبي ۾ سڀ کان پهرين آدمشماري ڪرائي وڃي. وزير اعظم چيو ته آرمي چيف آدمشماريءَ لاءِ ٽي لک کان وڌيڪ نوجوانن ڏيڻ جي بندوبست کان معذرت ڪئي آهي، انڪري آدمشماري ڪجهه وقت کان پوءِ ڪرائي ويندي. ان تي سنڌ جي وڏي وزير وزيراعظم تي زور ڀريو ته هُو گهٽ ۾ گهٽ آدمشماريءَ جي مهيني ۽ تاريخ جو اعلان ئي ڪري ڇڏي جنهن تي وزير اعظم کين يقين ڏياريو ته آدمشماري 2016ع ۾ ئي ڪرائي ويندي.

 

موجوده دور جي گهرجن مطابق پاڪ فوج کي جديد بنائڻ لاءِ ڪائي ڪسر نه ڇڏي ويندي: ممنون حسين

اسلام آباد (اين اين آءِ) پاڪستان جي صدر ممنون حسين چيو آهي ته موجوده دور جي تقاضائن مطابق پاڪ فوج کي جديد بنائڻ لاءِ ڪائي ڪسر نه ڇڏي ويندي دنيا جي ڪائي طاقت پاڪستان کي اک کڻي ڏسڻ جي جرئت نٿي ڪري سگهي اتحاد ۽ ٻڌي جي طاقت سان اسان پنهنجن سمورن مسئلن تي ڪنٽرول ڪري سگهون ٿا هن اها ڳالهه جمعي تي شڪرپوڙيان پريڊ گرائونڊ ۾ هٿياربند فوج جي يوم پاڪستان پريڊ ۾ حصو وٺندڙن ۾ انعام ورهائڻ ۽ هٿياربند فوج جي دعوت جي تقريب کي خطاب ڪندي ڪئي صدر ممنون حسين يوم پاڪستان جي شاندار پريڊ جي اهتمام تي ان ۾ شامل ٿيندڙن کي واڌايون ڏيندي چيو ته ان جي پيشاوراڻي صلاحيتن ۽ جذبن تي کين ۽ پوري قوم کي فخر آهي اسان جي ٽنهي فوجين جنهن شاندار پريڊ جو مظاهرو ڪيو ان سان قوم جي جذبي کي حوصلو مليو آهي. هن چيو ته پريڊ دوران ان جو وڌندڙ هر قدم پاڪستان جي دشمنن جي دلين تي مڱ ڏريندو ويو ۽ پاڪستان فوج تي قوم جي اعتماد جو ورجا به ٿيو ته هو پيشاوراڻي صلاحيتن سان دفاع وطن لاءِ هر وقت تيار آهن. صدر چيو ته 23 مارچ جي پريڊ قوم جي انهيءَ جذبي کي يقيني تازو ڪيو آهي جنهن جي طاقت سان اسان جا بزرگ آزاد وطن حاصل ڪرڻ ۾ ڪامياب ٿيا هئا. صدر چيو ته فوج جي شاندار پريڊ پاڪستان جي وقار کي عالمي سطح تي به اجاگر ڪيو آهي ان کان اڳ صدر پريڊ ۾ حصو وٺندڙن ۾ شيلڊ ورهايون ۽ انهن جي شاندار ڪارڪردگي جي واکاڻ ڪئي.

 

سياست کي تخليقي ماڻهن جي ضرورت آهي: پرويز رشيد

اسلام آباد (اين اين آءِ) سڌسماءَ جي وفاقي وزير سينيٽر پرويز رشيد ميڊيا ٽائون جي توسيع ۽ ميڊيا جي نون ماڻهن جي هائوسنگ جا مسئلا حل ڪرڻ جي خاطري ڪرائيندي چيو ته ميڊيا ٽائون ٻين سوسائٽين لاءِ هڪ مثال بڻجي چڪو ماضي ۾ پنجاب حڪومت مان ويندڙن شهبازشريف کي خزانو خالي ڪري صرف منصوبن جو قبرستان ڏيئي ويا سياست کي تخليقي ماڻهن جي ضرورت آهي سردار عتيق مسلم ڪانفرنس کي آمريت جي هٿ جي لٺ ۽ کيسي جي گهڙي بڻايو جمهوري قوتن کي آمريت جو هٿيار نه بڻجڻ گهرجي آمريت کي صرف زوال ۽ جمهوريت کي عروج حاصل آهي ماڻهو سياست ۾ پلاٽن تي قبضو ڪرڻ اچن ٿا پر مشتاق منهاس هڪ ايماندار شخص آهي اميد آهي ته هو سياست جي ميدان ۾ اچڻ کان پوءِ ملڪ جي تعمير ۽ ترقي ۾ خاص ڪردارف ادا ڪندو هن ڳالهه جو اظهار هن جمعي تي ميڊيا ٽائون هائوسنگ سوسائٽي جي سيڪريٽري فاروق فيصل پاران نيشنل پريس ڪلب جي اڳوڻي صدر ۽ مشهور اينڪر پرنس مشتاق منهاس جي اعزاز ۾ ڪوٺايل تقريب کي خطاب ڪندي ڪيو. سينيٽر پرويز رشيد چيو ته مشتاق منهاس فاروق فيصل ۽ افضل بٽ سميت ٻين ساتين صحافين جي فلاح ۽ بهبود لاءِ وڏيون ڪوشش ڪيون آهن ۽ هر ڪم نيڪ نيتي ۽ محبت سان ڪيو جنهن سبب کين ڪاميابي ملي ميڊيا ٽائون هائوسنگ سوسائٽي رٿا ۾ ڪيترائي ڀيرا ان کي ٽاريو ويو پر مشتاق منهاس ۽ ٻين ساٿين جي دلڇسپي ۾ گهٽتائي نه آئي ۽ اڄ ميڊيا ٽائون جو منصوبو سڀني آڏو آهي جيڪو ملڪ جي سڀ کان ڪامياب هائوسنگ منصوبن مان هڪ آهي جيڪو حڪومت جي آمدني ۾ اضافو به ڪري رهيو آهي جنهن تي انتظاميه کي واڌايون ڏجن ٿيون.

 

ڪرپشن شڪايتن جي انڪوائري ۾ غير ضروري التوا : سپريم ڪورٽ نيب چيئرمين کي طلب ڪري ورتو

اسلام آباد  (اين اين آءِ) سپريم ڪورٽ آف پاڪستان ڪرپشن شڪايتن جي انڪوائري ۾ غير ضروري التوا تي چيئرمين نيب قمرزمان چوڌري کي هڪ هفتي کان پوءِ طلب ڪري ورتو آهي جمعي تي نيب پاران ڪرپشن شڪايتن جي انڪوائري ۾ غير ضروري ڊيگهه بابت ڪيس جي ٻڌڻي سپريم ڪورٽ جي ٽه رڪني بئنچ ڪئي جسٽس گلزار احمد پڇاڻو ڪيو ته فيڊرل پبلڪ سروس ڪميشن جي اڳوڻي سربراهه اشرف مگسي پاران غير قانوني مقررين بابت انڪوائري چئن سالن کان هلي رهي آهي چئن سالن ۾ انڪوائري مڪمل نه ٿي ۽ نه ئي ريفرنس داخل ٿيو انڪوائري مڪمل ڪرڻ ۾ وڌيڪ ڪيترو وقت لڳندو جسٽس دوست محمد ريمارڪس ڏنا ته احتساب قانون جي ڪجهه شقن تي نظرثاني جي ضرورت آهي عدالت ايندڙ ٻڌني تي چيئرمين نيب کي ذاتي حيثيت ۾ پيش ٿيڻ جو حڪم ڏنو جنهن تي ڊپٽي پراسيڪيوٽر نيب اپيل ڪئي ته چيئر.مين جي جاءِ پراسيڪيوٽر جنرل کي طلب ڪيو جسٽس طارق پرويز چيو ته ڪمال ڪريو ٿا ڇا چيئرمين نيب کي عدالت اچڻ ۾ شرم اچي ٿو ڪيس جي ٻڌڻي هڪ هفتي لاءِ ملتوي ڪئي ويئي.

 

آرمي چيف جنرل راحيل شريف سان فرانس جي بچاءَ ۽ قومي سلامتي بابت جنرل سيڪريٽري جي ملاقات

راولپنڊي (اين اين آءِ) چيف آف آرمي اسٽاف جنرل راحيل شريف سان فرانس جي دفاع ۽ قومي سلامتي بابت جنرل سيڪريٽري لوئس گوٽيئر جمعي تي جي ايڇ ڪيو ۾ ملاقات ڪئي آءِ ايس پي آر مطابق پاڪ فوج جي سربراهه سان ملاقات ۾ جنرل سيڪريٽري پاڪستان سان دفاع ۽ سيڪيورٽي جي شعبن ۾ سهڪار سميت گڏيل دلچسپي جي معاملن تي خيالن جي ڏي وٺ ڪئي ملاقات ۾ خطي جي جملي سيڪيورٽي صورتحال به غور هيٺ آندي ويئي.

 

بلوچستان مان گرفتار ”را“ ايجنٽ بابت جاچ ۾ ايران کان مدد وٺڻ جو اعلان

اسلام آباد (اين اين آءِ) وفاقي گهرو زوير چوڌري نثار چيو آهي ته بلوچستان مان را ايجنٽ جي گرفتاري نهايت ڳڻتي جوڳي آهي گرفتاري سان پاڪستان جي ان موقف جي تائيد ٿئي ٿي ته بلوڇستان جون حالتون خراب ڪرڻ ۾ بيروني هٿ ملوث آهي معاملي جي مفصل تفتيش ٿيڻ اڃا رهيل آهي ۽ جاچ جي سلسلي ۾ حڪومت ايران کان به مدد گهري ويندي جمعي تي گهرو وزارت پاران جاري بيان ۾ گهرو وزير چيو ته ڪوئي ملڪ خطي ۾ امن ۽ دوستي جي اسان جي ڪوششن کي ڪمزوري نه سمجهي هن چيو ته پاڪستان کي حساس ادارن جي ڪارڪردگي واکاڻ جوڳي آهي جنهن جي ڪاوشن سان هن ملڪ دشمن نيٽ ورڪ کي ٽوڙيو ويو چوڌري نثار چيو ته هن معاملي جي مفصل جاچ ٿيڻ اڃا رهيل آهي ۽ جاچ جي سلسلي ۾ حڪومت ايران کان به مدد ورتي ويندي.

 

شهيد قومي اثاثو آهن، وارثن جي همٿ غازين جو جذبو حب الوطني قابل تقليد آهي، ڪورڪمانڊر ڪراچي

ڪراچي (اين اين آءِ)ڪور ڪمانڊڙ ڪراچي ليفٽيننٽ جنرل نويد مختار چيو آهي ته اسان جا شهيد اسان جو قومي اثاثو آهن شهيدن جي وارثن جي همٿ ۽ غازي جو وطن جي حب جو جذبو قابل تقليد آهي اهڙن خيالن جو اظهار هن جمعي تي ملير ڪينٽ ۾ اعزاز ورهائڻ جي تقريب کي خطاب ڪندي ڪيو ڪور ڪمانڊر ڪراچي پاڪ فوج جي شهيدن ۽ غازين کي خراج تحسين پيش ڪيو ۽ اعزاز ماڻيندڙ آفيسرن ۽ عهديدارن کي واڌايون ڏنيون شهيد آفيسرن ۽ عهديدارن کي سندن اعليٰ خدمتن جي اعتراف ۾ ٻلن سان نوازيو ويو چار ستاره امتياز، 17 تمغئه امتياز، 16 تمغئه بسالت آفيسران جونيئر ڪميشن آفيسرز ۽ سولجرز حاصل ڪيا 28 تمغئه بسالت شهيدن جي وارثن وصول ڪيا.

 

گذريل سال پاڪستان ۾ 3 هزار کان وڌيڪ ٻارڙن ۽ ٻارڙين سان جنسي ڏاڍائي ٿي: رپورٽ

سکر(اي پي پي) ننڍي عمر جي ٻارن سان ٿيندڙ جنسي تشدد خلاف جاکوڙيندڙ تنظيم ساحل جي سينيئر ريجنل ڪوآرڊينيٽر برڪت علي انصاري ۽ وڪيل هادي ڪالهه سکر پريس ڪلب ۾ بريفنگ ڏيندي ٻڌايو ته گذريل سال پاڪستان ۾ هڪ هزار 794 ڇوڪرن ۽ هڪ هزار 974 ڇوڪرين سميت  3هزار 768 ٻارڙن سان جنسي ڏاڍائي ٿيڻ جا ڪيس سامهون آيا. جنسي ڏاڍائي جو شڪار ٿيندڙ ٻارڙن جي عمر هڪ کان 18 سال ٻڌائي وئي. هن ٻڌايو ته پاڪستان ۾ ٻارڙن سان جنسي ڏاڍائي جا سڀ کان وڌيڪ 2 هزار 616  ڪيس پنجاب ۾ ٿيا. سنڌ ۾ 638، وفاقي گادي اسلام آباد ۾167، خيبر پختونخواھ ۾ 113، بلوچستان ۾ 207  ۽ آزاد ڪشمير ۾ 21 ٻارڙن سان جنسي ڏاڍائي جا واقعا ٿيا. ڳوٺن ۾ 2 هزار 786  ۽ شهرن ۾ 979 ٻارڙا جنسي ڏاڍائي جو شڪار بڻيا. ساحل موجب پوليس وٽ 2 هزار 571 ڪيس رجسٽرڊ ٿيا.  سنڌ جي  خيرپور ضلعي ۾ 83 ، لاڙڪاڻي ۾ 58، گھوٽڪي ۾ 71 ، ڪراچي ۾ 19، ۽ حيدرآباد ۾ 30 جنسي ڏاڍائي جا واقعا رپورٽ ٿيا.  هنن ٻڌايو ته ننڍي عمر ۾ شاديون روڪڻ وارو قانون اچڻ بعد سنڌ ۾ بي جوڙ شادين جا 57 ڪيس رپورٽ ٿيا آهن. گھوٽڪي ۾ 16 ، جيڪب آباد ۾ 8 ۽ ميرپور خاص ۾ 5 ننڌي عمر جون بي جوڙ شاديون ٿيون.