تازيون خبرون

Daily Archives: March 25, 2016

آمريڪا سان لاڳاپا وڌيڪ وڌائڻ ۽ معاشي شعبي ۾ تعاون کي هٿي وٺائڻ جو خواهشمند آهيون: نوازشريف

اسلام آباد (اين اين آءِ) وزيراعظم محمد نوازشريف چيو آهي ته پاڪستان آمريڪا سان لاڳاپا وڌيڪ مضبوط ڪرڻ ۽ معاشي شعبي ۾ تعاون کي هٿي وٺرائڻ جو خواهشمند آهي اميد آهي ته هلندڙ مهيني جي پڄاڻي تي نيوڪليئر سمٽ جي موقعي تي صدر اوبامه سان ٻطرفو لاڳاپن جي حوالي سان فائديمند ڳالهه ٻولهه ٿيندي ويراعظم نوازشريف آمريڪي سفير ڊيوڊ هيل خميس تي وزيراعظم هائوس ۾ ملاقات ڪئي ان موقعي تي ٻطرفو لاڳاپن جي حوالي سان ڳالهائيندي وزيراعظم چيو ته پاڪستان آمريڪا سان پنهنجن لاڳاپن کي اڃا وڌيڪ مضبوط ڪرڻ ۽ معاشي شعبي ۾ سهڪار وڌائڻ جو خواهشمند اهي هن چيو ته منهنجي آمريڪا جي دوري دوران ٿيندڙ اهم فيصلن جي نتيجن ۾ ٻنهي ملڪن جا ٻطرفو لاڳاپا اڳيان وڌائڻ جي رفتار ۾ اضافو ٿيو آهي وزيراعظم چيو ته پاڪستان آمريڪا اسٽريٽجڪ ڊائلاگ سميت هن وقت تائين حاصل ٿيندڙ ڪاميابين جو پتو لڳائڻ ۾ مدد ملي آهي ۽ هن ڊائيلاگ سان 6 ورڪنگ گروپس جي تحت نون حدفن جي تعين جو موقعو مليو آهي هن چيو ته مان هلندڙ مهيني جي پڄاڻي تي آمريڪا ۾ ٿيندڙ نيو ڪيليئر سيڪيورٽي سمنٽ ۾ شرڪت جي موقعي تي صدر اوبامه سان ٻطرفو لاڳاپن جي حوالي سان مفيد ڳالهه ٻولهه لاءِ پراميد آهيان وزيراعظم محمد نوازشريف چيو ته افغانستان ۾ امن استحڪام ۽ ترقي سان پاڪستان کي به فائدو ٿيندو ان موقعي تي ڳالهائيندي آمريڪي سفير ڊيوڊ هيل افغانستان ۾ امن بحال ٿيڻ جي سلسلي ۾ پاڪستان جي ڪوششن کي واکاڻيو هن چيو ته 4 ملڪي ڳالهين سميت مختلف قدمن جي نتيجي ۾ افغانستان ۾ امن قائم ڪرڻ ۾ مدد ملندي آمريڪي سفير چيو ته هڪ پرامن افغانستان سڄي خطي جي فائدي ۾ آهن ملاقات دوران سيد طارق فاطمي به موجود هو.

 

اقليتن ۽ مسلمانن لاءِ الڳ الڳ پاڪستان ممڪن ناهي: بلاول ڀٽو زرداري

ميرپورخاص ( مختيار ڪيريو ) پاڪستان پيپلز پارٽي جي چئيرمين بلاول ڀٽو زرداري چيو آهي ته پاڪستان پيپلز پارٽي ٻه الڳ الڳ پاڪستان نٿي چاهي جتي مسلمانن جو پاڪستان الڳ هجي ۽ اقليتي برادري جو پاڪستان الڳ هجي، جتي مشرف جو پاڪستان الڳ هجي ۽ محترمه بينظير ڀٽو شهيد جو پاڪستان الڳ هجي، پاڪستان پيپلز پارٽي ماڻهن کي برابري ۽ اقليتي برادري جي برابري واري حقن جي ڳالهه ڪئي آهي. هن چيو ته هولي تهوار ۽ رنگن جي استقبال تي اقليتي برادري کي مبارڪ باد پيش ڪريان ٿو . عمرڪوٽ ماروي جو وطن ۽ بهادر بختاور جو ضلعو آهي ۽ عمرڪوٽ جي عوام هميشه پيپلز پارٽي جي مخالفن کي شڪست ڏئي ڪاميابي ماڻي آهي. هن چيو ته پاڪستان اقليتن کان بغير اڳتي وڌي نه سگهندو ۽ نه ئي ترقي ڪري سگهندو. ملڪي ترقي لاءِ هر شهري کي اڳتي اچي پنهنجو ڪردار ادا ڪرڻو پوندو . هن چيو ته آئون غريب عوام جي جنگ وڙهندو رهندس جئين شهيد ذوالفقار علي ڀٽو غريب عوام جي جنگ وڙهي هئي. بلاول ڀٽو زرداري چيو ته پيپلز پارٽي عورتن جي حقن جي لاءِ عملي قدم کنيا آهن جنهن جو مثال سنڌ اسيمبلي مان هندو ميرج ايڪٽ، وومين پروٽيڪشن ايڪٽ ۽ ننڍي عمر ۾ ڇوڪرين جي شادي روڪڻ لاءِ ارلي چائلڊ ميرج ريسٽرڪٽ ايڪٽ پاس ڪرائي عورتن کي قانوني تحفظ فراهم ڪيو آهي. ملڪي تاريخ ۾ ڪنهن  منتخب حڪومت اسميبلي مان اهڙا بل پاس نه ڪرايا هوندا، اهو اعزاز پيپلز پارٽي جي حڪومت سنڌ کي وڃي ٿو. بلاول ڀٽو زرداري چيو ته پاڪستان تحريڪ انصاف جي حڪومت پنهنجو ڪم ٻين  جي حوالي ڪري ڇڏيو آهي جڏهن ته مسلم ليگ (ن) جي حڪومت پنجاب اسيمبلي مان عورتن جي حقن لاءَ ڪمزور قانوني سازي ڪئي آهي جڏهن ته حقن جي پاسداري ڪمزور قانون سازي سان نه ٿيندي آهي پر تنهن جي باوجود به آئون انهن کي مبارڪباد پيش ڪريان ٿو. هن چيو ته توهان جو ڀاءُ توهان جي حقن لاءِ وڙهندو رهندو. هن عورتن کي اپيل ڪندي چيو ته اهي پنهنجي ڀاءُ جو ساٿ ڏين دنيا جي ڪا به طاقت مونکي اڳتي اچڻ کان نه روڪيندي. هن پڻ اها اپيل ڪندي چيو ته ملڪي ترقي لاءِ عورتون مردن سان گڏ  ڪم ڪن، جڏهن ته پاڪستان جي تاريخ اهو ٻڌائي ٿي ته پاڪستان ٺاهڻ ۾ قائد اعظم محمد علي جناح سان گڏ محترمه فاطمه جناح، شهيد ذوالفقار علي ڀٽو سان گڏ بيگم نصرت ڀٽو ۽ شهيد راڻي محترمه بينظير گڏ هيون ۽ مون سان گڏ منهنجون ڀينرون آصفه ۽ بختاور گڏ آهن. هن چيو ته مون کي ان ڳالهه تي فخر آهي ته منهنجي ماءُ شهيد راڻي محترمه بينظير ڀٽو مسلم دنيا جي پهرين عورت وزير اعظم بڻي. هن قومي اسيمبلي کان مطالبو ڪندي چيو ته اقليتي برادري جي حقن لاءِ قانون سازي ڪئي وڃي. شهيد ذوالفقار علي ڀٽو جيڪو روٽي، ڪپڙا ۽ مڪان جو نعرو لڳايو هو جنهن سان پاڪستان ۽ غريب عوام جي تقدير بدلجي وئي، آئون بلاول ڀٽو زرداري اوهان سان اهو واعدو ٿو ڪريان ته غريب عوام جي تقدير بدلائيندس ۽ انهن جا حق ڏياريندس. بلاول ڀٽو زرداري چيو ته 21 هين صدي ۾ اڄ به عمرڪوٽ جي عوام ڪاٺيون ٻاري پنهنجي گهرن جا چلها ٻاري رهيو آهي جڏهن ته سڀني کان وڌيڪ گئس جي پيداوار ڏيندڙ صوبو سنڌ آهي، تنهن جي باوجود عمرڪوٽ جو عوام گئس جي سهولت کان محروم آهي. آئون وفاقي حڪومت کان اهو مطالبو ڪريان ٿو ته عمرڪوٽ ۾ سوئي گئس جي فراهمي کي يقيني بڻايو وڃي، ٻي صورت ۾ آئون پاڻ عمرڪوٽ جي عوام سان گڏ احتجاج ۾ شامل هوندس. ان کان اڳ صوبائي وزير ۽ پي پي پي ضلعي عمرڪوٽ جي صدر حاجي سيد علي مردان شاهه، منارٽي ونگ سنڌ جي صدر لال چند اڪراڻي، ڪنور ڪرن سنگهه، سيد سردار علي شاهه پڻ خطاب ڪيو . ان موقعي تي ايڊوڪيٽ ظفر علي لغاري فنڪشنل مسلم ليگ ڇڏي پيپلز پارٽي ۾ شموليت جو اعلان ڪيو . هولي واري تهوار ۾ اقليتي برادري پاران مختلف رسمون ادا ڪيون ويون، جنهن ۾ بلاول ڀٽوزرداري  سميت اسٽيج تي ويٺل  پي پي پي جي سموري قيادت کي هولي جا رنگ لڳائڻ، پٽڪو ٻڌڻ  کان علاوه  ڏانڊيا راند، مٽڪو راند، ڍول جي ٿاپ جي راند، مٽڪي ٽوڙڻ سميت مختلف قسمن جا رنگ اڇلايا ويا. ان موقعي تي ايڊوڪيٽ ظفر علي لغاري فنڪشنل مسلم ليگ ڇڏي پيپلز پارٽي ۾ شموليت جو اعلان ڪيو. جلسي ۾ وزير اعليٰ سنڌ ۽ پي پي پي سنڌ جي صدر سيد قائم علي شاهه، سينيئر صوبائي وزير نثار احمد کهوڙو، اطلاعات کاتي واري صوبائي صلاحڪار مولا بخش چانڊيو ، صوبائي وزير خوراڪ سيد ناصر شاهه، صوبائي وزير مڪيش چاولا، صوبائي وزير دوست محمد راهمون، صوبائي وزير ايڪسائيز اينڊ ٽيڪسيشن گيانچند ايسراڻي، صوبائي وزير صحت ڄام مهتاب ڏهر، ايم اين ايز نواب يوسف ٽالپر، پير شفقت حسين شاهه جيلاني، پير سيد نور محمد شاهه جيلاني. فقير شير محمد بلالاڻي، ايم پي ايز خيرالنساء مغل، ڊاڪٽر کٽو مل جيوڻ، ڊاڪٽر مهيش ملاڻي، نواب تيمور ٽالپر، روبينه قائمخاني،  سينيٽر هري رام ڪشوري لال، عاجز ڌامراهه، انجنئير گيانچند، قاسم سراج سومرو، خالد سراج سومرو، پي پي پي تعلقه صدر الهبچايو اسير، پي پي پي عهديدارن ۽ ڪارڪنن وڏي انگ ۾ شرڪت ڪئي. هولي واري تهوار ۾ اقليتي برادري پاران مختلف رسمون ادا ڪيون ويون جنهن ۾ بلاول ڀٽو زرداري  سميت اسٽيج تي ويٺل  پي پي پي جي سموري قيادت کي هولي جا رنگ لڳائڻ، پٽڪو ٻڌڻ  کان علاوه  ڏانڊيا راند، مٽڪو راند، ڊول جي ٿاپ جي راند، مٽڪي ٽوڙڻ سميت مختلف قسمن جا رنگ اڇلايا ويا.

 

وفاقي حڪومت اسٽيٽ بئنڪ آف پاڪستان جي بورڊ آف ڊائريڪٽرز ۾ ٽن سالن لاءِ 8 ڊائريڪٽرز مقرر ڪري ڇڏيا

اسلامآباد(اي پي پي) وفاقي حڪومت اسٽيٽ بئنڪ آف پاڪستان جي  بورڊ آف ڊائريڪٽرز ۾  فوري طور تي ٽن سالن لاءِ 8 ڊائريڪٽرز مقرر ڪري ڇڏيا آهن. اسٽيٽ بئنڪ آف پاڪستان طرفان جاري ڪيل هڪ بيان مطابق اسٽيٽ بئنڪ جي بورڊ لاءِ جن ڊائريڪٽرز کي مقرر ڪيو ويو آهي انهن ۾ ڊاڪٽر طارق حسن، حافظ محمد يوسف، زبير سومرو، خواجه اقبال حسن، ظفر مسعود، اردشير خورشيد مارڪر، محمد رياض ۽ سرمد امين شامل آهن.

 

نيب بابت مشاورت سان اهڙو نظام بنائڻ گهرجي جنهن سان ڪرپٽ بچي نه سگهي ۽ بيگناهه جو پٽڪو رلي نه سگهي: پرويز رشيد

اسلام آباد (اين اين آءِ) سڌسماءَ جي وفاقي وزير سينيٽر پرويز رشيد چيو آهي ته نيب جي حوالي سان مشاورت سان اهڙو نظام ٺاهڻ گهرجي جنهن سان ڪرپٽ بچي نه سگهي ۽ ڪنهن بيگناهه جو پٽو روليو نه وڃي خميس تي قومي اسيمبلي ۾ پيپلزپارٽي جي عمران ظفر لغاري پاران نيب جي ڪارڪردگي بابت ٿيندڙ بحث ختم ڪندي هن چيو ته بحث ۾ اٿاريل نقطا توجهه جي قابل آهن ايوان کي ان تي ضرور غور ڪرڻ گهرجي هڪ ميمبر چيوت ه احتساب ۾ ڪنهن جو پٽڪو نه رولڻ گهرجي پر هڪٻئي ميمبر ڪنهن جو پٽڪو لاهڻ کان پاسو ناهي ڪيو ڪي پي ڪي حڪومت پنهنجي ئي جوڙيل احتساب قانون کي تبديل ڪيو جنهن تي ان تي تنقيد به ڪئي ويئي اڳوڻي وزيراعظم ظفرالله جمالي جن معاملن طرف ڌيان ڏياريو آهي ان تي غور ۽ فڪر ٿيڻ گهرجي ماضي ۾ احتساب جي نالي تي پارٽيون ٽوڙي ۽ نيون پاڙتيون بڻايون ويون احتساب جي حوالي سان سٺي ۽ خراب ٻنهي قسمن جي ڪاڪردگي موجود آهي چيئرمين نيب جي مقرري حڪومت ۽ اپوزيشن جي مشاورت سان ٿي هو پاڻ چئي چڪا آهن ته نيب بابت جائز شڪايتن جو ازالو ڪرڻ جي ضرورت آهي.

 

ڳڙهي خدابخش ۾ شهيدن کي سلام ڀريندڙ به جمهوريت جا رکوالا آهن: وڏو وزير

حيدرآباد (اي پي پي) سنڌ جي وڏي وزير سيد قائم علي شاهه حيدرآباد ڊويزن جي چونڊيل نمائندن  ۽ عهديدارن کي هدايت ڪئي آهي ته اهي 4 اپريل تي  شهيد ذوالفقار علي ڀٽي جي 37 هين ورسي  ۾ وڌ کان وڌ شرڪت ڪري ملڪ ۾ جمهوريت بچائيندڙ  قومي اڳواڻ  ۽ اڳوڻي وزير اعظم شهيد ذوالفقار علي ڀٽو کي خراج عقيدت پيش ڪن ته جيئن شهيد جي ياد کي تازو ڪري جمهوريت لاءِ قرباني ڏيڻ واري جذبي کي  يقيني بڻائي سگهجي _اهڙن خيالن جو اظهار سنڌ جي وڏي وزير سيد قائم علي شاهه اڄ شام حيدرآباد لڳ ڳوٺ ڪرن شورو ۾ حيدرآباد ڊويزن جي چونڊيل عهديدارن ۽ ڪارڪنن جي هڪ وڏي گڏجاڻي کي خطاب ڪندي ڪيو  _گڏجاڻي کي خطاب ڪندي سنڌ جي وڏي وزير سيد قائم علي شاهه چيو ته  پاڪستان پيپلزپارٽي جي تاريخ ۾ 4 اپريل ۽ 27 ڊسمبر وڏي اهميت رکن ٿا جڏهن شهيد ذوالفقار علي ڀٽي ۽ شهيد راڻي محترمه بينظير ڀٽو آمرن اڳيان ڪنڌ نه جهڪايو ۽ عوام جي حقن خاطر پنهنجي جان جي قرباني ڏئي تاريخ ۾ امر ٿي ويا _ وڏي وزير  سيد قائم علي شاهه چيو ته   ڳڙهي خدابخش ۾  شهيدن کي سلام ڀريندڙ به اصل ۾ جمهوريت جا رکوالا آهن ۽ ان لاءِ انهن کي گهرجي ته هو جلسي دوران نظم ۽ ضبط جي خاص طور تي مظاهرو ڪن ته جيئن جلسي جي ڪارروائي کي اطمينان سان پايه تڪميل تائين پهچائي سگهجي ڇاڪاڻ ته جلسي دوران بدنظمي سبب مختلف هنڌن تان آيل لکين ڪارڪنن کي سخت تڪليف پيش اچي ٿي _وڏي وزير چيو ته هاڻي عوام جي سهولت خاطر ڳڙهي خدا بخش ۾  جلسا منجهند جو ئي شروع ڪرڻ جو اهتمام ڪيو ويو آهي جنهن تحت صبح جو شهيدن جي مزار تي  قرآن خواني ۽ دعا بعد شرڪت ڪندڙن لاءِ  لنگر جو بندوبست ٿيل هوندو آهي جنهن کانپوءِ  محترم سرفراز راڄڙ مشاعري جي  نشست  شروع ڪندو جنهن ۾ ملڪ جي مختلف صوبن مان  آيل پارٽي جا صدر ، عهديدار  ۽ ڪارڪن  شرڪت ڪندا آهن ۽ شهيدن جي قرباني ، جدوجهد  ۽ سندن خدمتن تي پنهنجن خيالن جو اظهار ڪري خراج عقيدت پيش ڪندا آهن _ هن اميد ظاهر ڪئي ته حيدرآباد ڊويزن  جي مڙني ضلعن مان لکن جي تعداد ۾ اڳواڻ ۽ ڪارڪن قافلن جي صورت ۾ 4 اپريل تي   ڳڙهي خدا بخش پهچي شهيد باني کي  خراج عقيدت پيش ڪندا _ هن چيو ته پارٽي چيئرمين بلاول ڀٽو زرداري سڀني  ذميوارن کي سختي سان هدايت ڪئي آهي ته ڪارڪنن سان گڏجاڻي ڪري عوام جي مسئلن جي جلد حل کي يقيني بڻايو وڃي _ هن چيو ته پارٽي اڳ کان وڌيڪ مضبوط آهي _ وڏي وزير چيو ته بلاول ڀٽو زرداري چيو ته مان اڳ ۾ ٿرپارڪر ۾ اقليتي ڀائرن  جي ديوالي ۾ شرڪت ڪئي هئي  ۽ هاڻي هولي ۾ به شرڪت ڪندس ان ڏس ۾ ضلعي عمر ڪوٽ  جي صدر، عهديدارن  ۽ ڪارڪنن بلاول ڀٽو  کي چيو ته هاڻي توهان  ضلعي عمرڪوٽ ۾ منعقد ٿيندڙ هولي جي ڏڻ ۾ شرڪت ڪريو جنهن سان هتي پارٽي قيادت  جي همٿ افزائي پڻ ٿيندي _ ان سان گڏوگڏ هڪ شايان شان جلسو پڻ منعقد ڪيو ويندو جڏهن ته اڄ  عمرڪوٽ ۾ هڪ وڏو جلسو منعقد ٿيو  جنهن ۾ اقليتي ڀائرن  ۽ پارٽي ڪارڪنن وڏي تعداد ۾ شرڪت ڪري پارٽي چيئرمين سان محبت جو اظهار ڪيو جتي هن ضلعي عمرڪوٽ جي چونڊيل ڊسٽرڪٽ ڪائونسل جي ميمبرن سان پڻ گڏجاڻي ڪئي _ ان موقعي تي صوبائي وزير ڄام خان شورو ڀليڪار پيش ڪئي_ گڏجاڻي ۾ حيدرآباد ڊويزن جي چونڊيل نمائندن ، سنڌ ڪائونسل جي ميمبرن کان علاوه ڪارڪنن وڏي انگ ۾ شرڪت ڪئي .

 

ملڪ جي وڏين تيل ڪمپنين پاران پيٽروليم وارين شين ۾ ملاوٽ ڪرڻ جو انڪشاف

اسلام آباد(بيورو)  قومي اسيمبلي جي اجلاس دوران ملڪ جي وڏين تيل ڪمپنين پاران پيٽروليم وارين شين ۾ ملاوٽ ڪرڻ جو انڪشاف ٿيو آهي،قومي اسيمبلي جي اسپيڪر سردار اياز صادق جي صدارت هيٺ اجلاس دوران برسلز ڌماڪن ۾ مارجي ويلن جي ياد ۾ هڪ منٽ خاموشي ڪئي وئي،جنهن کانپوءِ انهن ڌماڪن خلاف مذمتي ٺهراءُ مننظور ڪيو ويو، اهو ٺهراءُ پ پ ايم اين اي شازيا مري پيش ڪيو،جنهن ۾ گڏيل راءِ سان برسلز ڌماڪن جي مذمت ڪئي وئي،ٺهراءَ ۾ چيو ويو ته ايوان هر قسم جي دهشتتگردي جي مذمت ڪري ٿو ۽ ان ناسور جو خاتمو چاهي ٿو، اجلاس دوران ملڪ ۾ ترت آدمشماري ۽ بينظير انڪم سپورٽ پروگرام لاءِ سروي ڪرائڻ جا ٺهراءَ به منظور ڪيا ويا، سوالن جوابن جي ساهي دوران پيٽروليم واري وفاقي وزير شاهد خاقان عباسي وڏين آئل ڪمپنين طرفان پيٽروليم وارين شين ۾ ملاوٽ جو انڪشاف ڪندي چيو ته 15-2014ع دوران پيٽروليم وارين شين ۾ ملاوٽ ڪرڻ تي 4 ڪمپنين مٿان ڏنڊ وڌو ويو، هن تفصيل ڏيندي چيو ته هيسڪو آئل ڪمپني تي 20 لک، پاڪستان آئل ريفائنري تي 10 لک، بائيڪو آئل ڪمپني تي 5 لک ۽ پي ايس او تي هڪ لک رپيا ڏنڊ وڌو ويو، هن 15-2013ع دوران سڄي ملڪ ۾ گئس جي چوري جا تفصيل پڻ لکت ۾ جمع ڪرايا، جن مطابق گذريل ٽن سالن دوران سڄي ملڪ ۾ هڪ کرب 7 ارب ايم اي ايف گئس چوري ڪئي وئي، پيوٽروليم واري وزير مطابق سڀ کان  وڌيڪ 44 ارب 97 ڪروڙ ايم اي ايف گئس خيبرپختونخوا ۾ چوري ڪئي وئي، ٻئي نمبر تي پنجاب ۾ 32 ارب 71 ڪروڙ، سنڌ ۾ 28 ارب 21 ڪروڙ ۽ بلوچستان ۾ هڪ ارب 17 ڪروڙ ايم اي ايف گئس چوري ڪئي وئي.

 

هڪ سينيئر جونيئر آفيسر جي ماتحت ڪيئن ٿو ڪم ڪري سگهي: سپريم ڪورٽ

اسلام آباد(اي پي پي) سپريم ڪورٽ سنڌ حڪومت کي سنڌ بلڊنگ ڪنٽرول اٿارتي جي ڊآئريڪٽر جنرل آغا مقصود عباس کي سندس عهدي تان برطرف ڪرڻ جو حڪم ڏئي ڇڏيو آهي. جسٽس امير هاني مسلم جي سربراهي ۾ سپريم ڪورٽ جي ٽه رڪني بئنچ  خميس تي سنڌ بلڊنگ ڪنٽرول اٿارٽي جي ڊائريڪٽر جنرل کي هٽائڻ بابت داخل ڪيس جي ٻڌڻي ڪئي. ڪيس جي ڪارروائي دوران درخواست گذار جي وڪيل ايڊووڪيٽ افتخار قائم خاني عدالت ۾ پيش ٿي بيان ڏنو ته  سنڌ حڪومت طرفان آغا مقصود عباس کي سنڌ بلڊنگ ڪنٽرول اٿارٽي جي  ڊائريڪٽر جنرل جي اضافي چارج ڏني وئي هئي  جنهن جو هو مستحق ناهي.  هن چيو ته  حڪومت آغا مقصود عباس کي  21 هين گريڊ جي هڪ آفيسر کي نظر انداز ڪري 20 هين گريڊ جي آفيسر کي اهو عهدو ڏنو هو، جنهن تي جسٽس قاضي فائز عيسيٰ ريمارڪس ڏيندي چيو ته هڪ سينيئر جونيئر آفيسر جي ماتحت ڪيئن ٿو ڪم ڪري سگهي. عدالت آغا مقصود عباس کي سندس اصل عهدي تي واپس موڪلڻ جو حڪم ڏيندي ريمارڪس ڏنا ته جيڪڏهن مقصود عباس ترقي جو حقدار آهي ته هن کي ميرٽ تي ترقي ڏني وڃي. جنهن بعد عدالت ڪيس جي ٻڌڻي ملتوي ڪري ڇڏي.

 

اڳوڻي چيئرمين اسٽيل ملز سجاد حسين جي قتل جو حڪم ذوالفقار مرزا ۽ نثار مورائي ڏنو: چاچڙ

ڪراچي (اين اين آءِ) فشرمين ڪوآپريٽو سوسائٽي جي تحويل هيٺ اڳوڻي ڊائريڪٽر محمد خان چاچڙ جاچ ڪميٽي آڏو ڇرڪائيندڙ انڪشاف ڪيا آهن ذريعن موجب پيپلزپارٽي قيادت جي ويجهي ساٿي، فشريز جي گرفتار ڊائريڪٽر محمد خان چاچڙ جي آءِ ٽي کي ٻڌايو ته اڳوڻي چيئرمين اسٽيل ملز سجاد حسين جي قتل جو حڪم ڊاڪٽر ذوالفقار مرزا ۽ نثار مورائي سيپٽمبر 1998 تي ڪيفي ڪلفٽن تي سليم عرف سلو جي ذريعي گهرائي ڏنو ڊفينس فيز 8 ۾ فائرنگ ڪري سجاد حسين کي ماريو ويو ته انعام ۾ نثار مورائي 4 لک رپيا ڏنا نومبر 1998 ۾ نثار مورائي وڪيل عمران عزيز کي لاهور ۾ مارڻ جو ٽاسڪ 5 لک رپين سان ڏنو 30 اپريل 1999 تي لاهور ۾ ايڊووڪيٽ عمران عزيز کي ان جي آفيس ويجهو فائرنگ ڪئي جڏهن ته عمران عزيز زخمي جڏهن ته ان جو منشي غلام مصطفي مارجي ويو محمد خان چاچڙ مطابق چيئرمين اسٽيلز سجاد حسين قتل ڪيس ۾ ان کي ٽرائيل ڪورٽ موت جي سزا ڏني هئي پر هن هاءِ ڪورٽ ۾ اپيل فائيل ڪئي ۽ اتان بري ٿي ويو. 2007 ۾ جيل مان آزاد ٿيس ته دبئي اماڻيو ويو جتي 2009 تائين رهيس 2009 ۾ واپس آيس ته نثار مورائي مون کي 5 لک رپيا تي فشريز ۾ ڊائريڪٽر ڀرتي ڪري ورتو محمد خان چاچڙ وڌيڪ انڪشاف ڪيا ته زمين تي قبضي ۾ ارشد شاهه، فريد ابڙو، نثار مورائي، حضوربخش بابر سنڌو ۽ آفتاب پٺاڻ ملوث آهن ڪرپشن مان مليل رقم کي اومني انٽرنيشنل ذريعي ماهوار هڪ کان 4 ڪروڙ رپيا اعليٰ قيادت تائين پهچايا ويندا هئا ايراني تيل جي اسمگلنگ مان حاصل رقم گينگ وار جي استعمال ۾ ٿيندي هئي جوابدار محمد چاچڙ انڪشاف ڪيو ته نثار مورائي ڊفينس جي 27هين اسٽريٽ تي گينگ وار جي ڇاڙتن لاءِ سيف هائوس بڻايو هو جڏهن ته ڏوهن ۽ ڏوهاري ماڻهن لاءِ هڪ بنگلي تي قبضو ڪيو هو جتي سلطان قمر صديقي ۽ ٻيا ڊائريڪٽر به موجود هوندا هئا ۽ اتان زمينن تي قبضي جا معاملا به حل ڪيا ويندا هئا محمد خان چاچڙ ٻڌايو ته ان جي ويجهن ساٿين ۾ سليم عرف سلو، نادر خان مگسي، نثار مورائي، رانا شاهد، ڪامران عباسي عمر جٽ، سلطان قمر صديقي ۽ بابر سنڌو شآمل آهن جي آءِ ٽي جي ميمبرن جوابدارن کي گڏيل جاچ کان پوءِ بليڪ يعني ڏوهاري قرار ڏنو آهي ۽ ان جي انڪشافن تي وڌيڪ جاچ جي سفارش ڪئي آهي.

 

”سڀئي گڏجي سڏجي، هڪٻئي کي ڀاڪر پايون، اچو ته هولي ملهايون سنڌ سميت پوري ملڪ ۾ “ هولي جوش ۽ جذبي سان ملهائي وئي

اسلام آباد(م.ڊ) سنڌ سوڌو سڄي ملڪ ۾ هولي جو ڏڻ وڏي جوش ۽ جذبي سان ملهايو پيو وڃي، سڄي ملڪ ۾ رهندڙ هندو ڪٽنب پنهنجو مذهبي ڏڻ ڀرپور نموني سان ملهائي رهيا آهن. هولي کيرنگن جو تهوار قرار ڏنووڃي ٿو، جنهن ۾ هر پاسي قسمين قسمين رنگ وکيريل نظر ايندا آهن، هولي“ هندو جاتي جو شڀ ڏڻ آهي، جيڪو هندو جاتي هر سال ڦڳڻ مهيني جي پورنماسيءَ تي ڌام ڌوم سان ملهائيندي آهي، رنگا رنگي سندر ڏڻ ”هولي“ کي هندي ۾ ”هوري“ ۽ مارواڙي ۾ ”هولي“سڏيو وڃي ٿو، هولي کي ”هولڪا“ پڻ سڏيو وڃي ٿو، لفظ ”هوري“ جي معنيٰ آهي ”خوشي“، يعني ”خوشين جو ڏڻ“، هولي جو ڏڻ هر سال مارچ مهيني ۾ ۽ سنڌي ڪئلينڊر جي ڦڳڻ مهيني ۾ مها شِوِ راتڙي کان تقريبن پندرهن ڏينهن پوءِ ايندو آهي، هولي ڌرمي تهوار سان گڏوگڏ موسمي تهوار پڻ ليکيو ويندو آهي، هولي موسمي تهوار ان لاءِ ليکبو آهي، جو هي تهوار سياري ختم ٿيڻ کانپوءِ بهار جي موسم ۾ اچي ٿو، بهار جي موسم ايندي ئي لوڪ هولي جو تهوار ملهائڻ لاءِ تياريون شروع ڪري ڇڏيندو آهي، هولي جو تهوار ٻين تهوارن کان بلڪل مختلف ۽ نرالو آهي. انهيءَ ڪري موسم بهار جي پهرين برسات کانپوءِ سرد ۽ خشڪ موسم بدلجي رنگين ٿي ويندي آهي، ٿڌڙيون هوائون هلڻ لڳنديون آهن، سارو جڳ خوشين ۾ پيو نچندو آهي، ان موسم ۾ هي تهوار ”هولي“ ملهايو ويندو آهي. هي تهوار بهار رت اچڻ جي خوشي سان گڏ راڳ ڳائڻ، هڪٻئي کي مٺا طعام کارائڻ ، مٺايون ورهائڻ، نوان ڪپڙا پائڻ، نچڻ، ڪڏڻ ۽ رنگن جي پکيڙ، مقصد ته مرڪون وکيرڻ جو نانءُ آهي، هولي لفظ ٻڌڻ سان ذهن ۾ رنگن جو تصور اڀري اچي ٿو، هولي جا رنگ انڊلٺ جي رنگن جيان انساني زندگيءَ جي سک ۽ شانتي جا اهڃاڻ آهن، هن موسم ۾ لابارا ٿيندا آهن ۽ هارين وٽ به اناج وغيره جمع ٿيندو آهي. ان ڪري اُهي به ڏاڍو خوش هوندا آهن ۽ ڪنهن حد تائين هي انهن جي خوشي جو ڏينهن به چيو ويندو آهي.

 

2015 ۾ 1200 کان وڌيڪ جانيون ضايع ڪندڙ هيٽ اسٽروڪ هلندڙ سال وڌيڪ نقصان ڪري سگهي ٿو: سڪندر منڌرو

ڪراچي(اي پي پي) ماحوليات ۽ ڪوسٽل ڊولپمينٽ واري صوبائي وزير ڊاڪٽر سڪندر مينڌرو چيو آهي ته گلوبل وارمنگ ۽ هيٽ اسٽروڪ صرف سنڌ يا پاڪستان نه پر پوري دنيا جو مسئلو آهي جيڪو ڏينهنون ڏينهن تيزي سان وڌي رهيو آهي، گذريل سال جون2015ع ۾ هيٽ اسٽروڪ سبب 1200 کان وڌيڪ انساني جانيون ضايع ٿي ويون ۽ موسميات کاتي پاران هن سال اڃا به وڌيڪ هيٽ اسٽروڪ ٿيڻ  جا امڪان ظاهر ڪيا ويا آهن جڏهن ته سنڌ حڪومت گڏيل حڪمت عملي تحت سڀني لاڳاپيل کاتن ۽ عوام ۽ ميڊيا جي سهڪار سان ان مسئلي کي منهن ڏيڻ جي لاءِ قدم کڻي رهي آهي ته جيئن هن سال گرمين ۾ ايمرجسي واري صورتحال دوران نقصان کان بچي سگهجي. اهڙو اظهار هن ڪالهه ڪراچي جي مقامي هوٽل ۾ سنڌ انوائرل پروتيڪشن ايجنسي (سيپا) پاران (هيٽ ويو مينيجمينٽ) جي عنوان سان  منعقد ڪرايل سيمينار کي خطاب ۽ بعد ۾ ميڊيا سان ڳالهائيندي ڪيو.صوبائي وزير چيو ته هيٽ اسٽروڪ سبب گذريل سال ڀارت ۽ يورپ ۾ پڻ ڪافي نقصان ٿيو هي هڪ حساس مسئلو آهي ان ڪري اسان سڀني کي ان حوالي سان پنهنجو پنهنجو ڪردار ادا ڪرڻ گهرجي. هن چيو ته نه صرف پاڪستان پر پوري دنيا مان ٻيلا گهٽ ٿي رهيا آهن ۽ هتي اسان وٽ درياءُ جي پاڻي ۾ پڻ گهٽتائي ٿي رهي آهي ان کان سواءِ ٻيا به ڪيترائي فيڪٽر آهن جنهن ڪري هتي گرمي وڌي وئي آهي. هن چيو ته قدرتي آفتون مختلف صورتن ۾ اينديون رهيون آهن ان وقت اسان سڀ پريشان ٿيون ٿا ۽ دانهون به ڪيون ٿا پر افسوس جو جڏهن اهي آفتون ختم ٿي وڃن ٿيون ته اسان ان مان سبق سکڻ بدران سڀ ڪجهه ڀلجي وڃون ٿا هن چيو ته اسان کي انهن تجربن مان سکڻ ۽ عقل کان ڪم وٺڻ گهرجي ان سان گهڻو ڪجهه بهتر ٿي سگهي ٿو.هڪ سوال جي جواب ۾ سڪندر مينڌرو چيو ته خدا نه خواسته هن سال جيڪڏهن اهڙي ايمرجنسي صورتحال پيدا ٿي ته حڪومت ان کي منهن ڏيڻ جي لاءِ تيار آهي هميشه جيان ايمرجنسي فنڊ پڻ موجود آهن ۽ جيڪڏهن ضرورت پئي ته ٻين فنڊن مان پن ڪٽوتي ڪري ايمرجنسي کي منهن ڏنو ويندو آهي.هڪ ٻئي سول جي جواب ۾ چيو ته مڃان ٿو ته ملڪ ۾ بجلي جي کوٽ اهي پر ان جي هوندي به اسان ڪي اي، حيسڪو ۽ سيپڪو سميت سڀني پاور ڪمپنين کي هدايت ڪئي آهي ته هو هيٽ اسٽروڪ دوران گهٽ کان گهٽ ٽائيم جي لاءِ لوڊشيڊنگ ڪن.صوبائي وزير چيو ته گلوبل وارمنگ يا هيٽ اسٽروڪ اهڙو مسئلو آهي جنهن کي صرف حڪومت منهن نٿي ڏئي سگهي ان لاءِ اسان سڀني کي پنهنجو پنهنجو ڪردارا ادا ڪرڻو پوندو ۽ سڀ کان وڌيڪ ذميداري ميڊيا جي ٿئي ٿي ته هو عوام م آگاهي پيدا ڪري ته جيئن وڌ کان وڌ ماڻهو پاڻ کي هيٽ اسٽروڪ کان بچائي سگهن.هن چيوته گذريل عوام هيٽ اسٽروڪ کان بي خبر هجڻ ڪري وڏو جاني نقصان ٿيو پر هن سال عوام ۾ آگاهي جي لاءِ ڀرپور ڪوشش ڪري رهيا آهيون ۽ هن قسم جي سيمينار پڻ فائيديمند ثابت ٿي سگهن ٿا ڊاڪٽر سڪندر مينڌرو چيو ته عوام کي آگاهي جي لاءِ جاگرتا مهم پڻ جلد هلائي ويندي.ان موقعي تي جناح اسپتال جي جوائنٽ دائريڪٽر سيمي جمالي،ڪمشنر ڪراچي سيد آصف حيدر شاهه، ايم ڊي پي ڊي ايم اي سلمان شاهه، چيف ميٽرولوجسٽ عبدالرشيد، ايدمنسٽريٽر ڪي ايم سي روشن علي شيخ ۽ ٻين پڻ سيمينار کي خطاب ڪيو.