تازيون خبرون

Daily Archives: March 24, 2016

بهتر کان بهتر فلم ۾ ڪم ڪيو پر پنهنجون فلمون ناهيان ڏسندي: ڪرينا ڪپور

ممبئي (شوبز نيوزِ) بالي ووڊ ادڪاره ڪرينا ڪپور خان پنهنجي ڪيريئر ۾ بهتر کان بهتر فلمن ۾ ڪم ڪيو آهي جڏهن ته اداڪاره جوچوڻ آهي ته هو ڪڏهن به پنهنجي فلم ناهي ڏسندي پنهنجي هڪ انترويو ۾ ڪرينه ڪپور پنهنجي ڪريئر بابت ڪيتريون ئي دلچسپ ڳالهيون ڪيون ڪرينا جو چوڻ هو ته مان ڪڏهن به پنهنجو پاڻ کي اسڪرين تي نٿي ڏسي سگهان منهنجي ماءُ ۽ ڀيڻ منهنجون فلمون ڏسي ٻڌائينديون آهن ته اها ڪيئن هئي مان پنهنجي ڪاميابي کي ڪڏهن به سنجدگي سان ناهي ورتو ۽ مان اڄ به بلڪل نئين اداڪاره وانگر ورتاءَ ڪيان ٿي بالي ووڊ ۾ ڪبهي خوشي ڪنهي غم، جب وي ميٽ، ٿري ايڊيٽس ۽ بجرنگي ڀائيجان جهڙين ڪامياب فلمن ۾ ڪم ڪندڙ ڪرينا ڪپور جو چوڻ هو ته کيس فلمن ۾ سڀ کان ڏکيو انهن جي مشهوري ڪرڻ لڳندو آهي ڪرينا جو چوڻ آهي ته مان مسلسل 40 ڪلاڪن تائين شوٽنگ ڪري سگهان ٿي پر جتي ڳالهه پروموشنز جي اچي ٿي ته اهو ڪم منهنجي لاءِ ڏاڍو ڏکيو هودنو اهي ۽ اڄڪلهه فلمن کي وڏي پئماني تي پروموت ڪيو وڃي ٿو جنهن لاءِ ڪافي همٿ جي ضرورت هوندي آهي.

 

فلم “روبوٽ 2” جو سين ڪرڻ تي 20 ڪروڙ رپيا خرچ

ممبئي (شوبز نيوز) اداڪار رجني ڪانت ۽ اڪشي ڪمار جي فلم “روبوٽ 2” جو سين ڪرڻ تي 20 ڪروڙ رپيا خرچ ٿيا آهن، ڀارتي ميڊيا مطابق “روبوٽ 2” ۾ اڪشي ڪمار هڪ ولن جو ڪردار ادا ڪري رهيو آهي، ايس شنڪر جي هدايتڪاري ۾ بڻجندڙ ان فلم جي ڪاسٽ ۾ اڪشي ڪمار ۽ رجني ڪانت کانسواءِ ايمي جيڪسن شامل آهي، فلم جي ڪهاڻي چڱائي ۽ برائي جي وچ ۾ جنگ جي موضوع تي ٺاهي وئي آهي، 350 ڪروڙ رپين جي بجيٽ سان ٺاهيل فلم ڀارتي فلم انڊسٽري جي مهانگي ترين فلمن ۾ شامل آهي.

 

ورلڊ ٽي-20 ڪپ: پاڪستان پنهنجي آخري ميچ اڄ آسٽريليا خلاف کيڏندو

موهالي (اسپورٽس نيوز) ورلڊ ٽي-20 قومي ڪرڪيٽ ٽيم پنهنجي چوٿين ۽ آخري گروپ ميچ (اڄ) جمعي ڏينهن آسٽريليا خلاف آءِ ايس بندر اسٽيڊيم موهالي ۾ کيڏندي، ميچ ڊي اينڊ نائيٽ ٿيندي ۽ پاڪستاني وقت مطابق منجهند جو 2 وڳي شروع ٿيندي، سيمي فائنل ۾ پهچڻ لاءِ اها ميچ پاڪستان لاءِ تمام اهميت رکي ٿي، هارائڻ جي صورت ۾ قومي ٽيم ورلڊ ٽي- 20 مان ٻاهر ٿي ويندي، پاڪستان ايونٽ ۾ هيستائين بنگلاديش جي خلاف ڪاميابي حاصل ڪئي آهي، روايتي مخالف انڊيا ۽ نيوزيلينڊ هٿان شڪست کي منهن ڏيڻو پيو.

 

وومينز ٽي 20 ڪرڪيٽ ورلڊ ڪپ ۾ اڄ آرام جو ڏينهن، سڀاڻي 2 ميچون کيڏيون وينديون

نئين دهلي(اسپورٽس نيوز) آءِ سي سي وومينز ٽي 20 ڪرڪيٽ ورلڊ ڪپ ۾ (اڄ) جمعي واري ڏينهن آرام جو ڏينهن آهي. ميگاوا يونٽ ۾ سڀاڻي 2 ميچون کيڏيون وينديون. ڀارت ۾ جاري ميگا ايونٽ ۾ سخت مقابلن جو سلسلو جاري آهي. گروپ اي جي ٽيمن آسٽريليا ۽ آئرلينڊ وچ ۾ فيروز شاهه ڪوٽلا ۾ کيڏيو ويندو. ميچ پاڪستاني وقت مطابق ڏينهن جو 3 وڳي شروع ٿيندو. ٻي ميچ به گروپ ۾ شامل ٽيمن نيوزيلينڊ ۽ ڏکڻ آفريڪا وچ ۾ ايم چنا سوامي اسٽيڊيم بنگلور ۾ کيڏي ويندي. اها ميچ پاڪستاني وقت مطابق رات ستين وڳي شروع ٿيندي. واضح رهي ته ميگا ايونٽ جو پهريون سيمي فائنل 30 مارچ تي فيروز شاهه ڪوٽلا نئين دهليءَ ۾ کيڏيو ويندو. ٻيو سيمي فائنل ميچ 31 مارچ تي اينڪهيڊ اسٽيڊيم ممبئي ۾ کيڏيو ويندو. جڏهن ته فائنل 3 اپريل تي ايڊن گارڊن ڪولڪته ۾ کيڏيو ويندو.

 

هي زهر جو ڪاروبار اڃا ڪيترا گهر اجاڙيندو؟: واحد پارس هيسباڻي

ٽنڊومحمدخان جي ڪريم آباد ۽ سومرا پاڙي ۾ ڪچو شراب پيئڻ سبب جيڪو 40 کان وڌيڪ قيمتي انساني جانين جو نقصان ٿيو آهي، اِهو ڪنهن وڏي سانحي کان گهٽ نه آهي. جيتوڻيڪ انهيءَ واقعي کانپوءِ ٽنڊي محمد خان جي ايس ايس پي، ڊي ايس پي ۽ ايس ايڇ او کي معطل ڪيو ويو آهي، پر مان نٿو سمجهان ته ايڏي وڏي سانحي جي ڀيٽ ۾ هي ڪا وڏي سزا آهي، پوليس کاتي ۾ معطلي کي سزا نه پر ’آرام‘ جو نالو ڏنو ويندو آهي. اِهو ممڪن ئي ناهي ته ڪنهن شهر جي گهٽي گهٽي ۾ ڪچي شراب جون بٺيون هلندڙ هجن ۽ مقامي پوليس کي ڪا خبر ئي نه هجي. پوليس کي نه صرف سڀ خبر هوندي آهي پر هِن قسم جو ڪڌو ڪاروبار اڪثر سندس سرپرستي ۾ ئي ٿيندو آهي، جتان روزاني، هفتي ۽ مهيني جي حساب سان سندس حصو پتي مقرر ٿيل هوندو آهي، جنهن ذريعي اها پنهنجو ڀڀ ڀري قيمتي انساني جانين کي انهن منشيات فروشن جي رحم ڪرم تي ڇڏي ڏيندي آهي. مان ته اِن خيال جو آهيان ته هي جيڪا منشيات فروشي آهي، اها به دهشتگردي کان گهٽ ناهي. هڪڙا اهي دهشتگرد آهن، جيڪي گوليون هڻي، بم ڦاڙي بي گناهه ماڻهن کي موت جي وادين طرف ڌڪي ڇڏين ٿا ۽ ٻيا اُهي منشيات فروش آهن جيڪي ماڻهن جي رڳن ۾ نشي جهڙو زهر لاهي انهن کي موت جي وادين طرف ڌڪي ڇڏين ٿا، جيڪي به دهشتگردن کان گهٽ ناهن. جهڙي نموني دهشتگردن خلاف آپريشن هلندڙ آهي اهڙي نموني هنن منشيات فروشن خلاف به ڀرپور آپريشن ٿيڻ گهرجي، جنهن ۾ سندن صفايو ٿيڻ کپي. موجوده آءِ جي سنڌ اي ڊي خواجا اِن ئي ٽنڊي محمد خان ضلعي سان واسطو رکندڙ آهي، هن جي چارج سنڀالڻ جي ڪجهه ڏينهن کانپوءِ ٿيل ايڏو وڏو واقعو سچ پچ هِن لاءِ ٽيسٽ ڪيس آهي، هاڻي ڏسڻو اِهو آهي ته هي پنهنجي ڊپارٽمينٽ ۾ موجود هنن ڪارين رڍن سان ڪهڙو حساب ڪتاب ڪري ٿو جيڪي ڏهاڙي جي چڪر ۾ قانون، انصاف ۽ انسانيت جا ليڪا لتاڙي رهيا آهن. پاڻ ڪجهه ڏينهن اڳ هنن ئي صفحن ۾ اي ڊي خواجا کي اِن اميد سان ويلڪم ڪيو هيوسين ته هو نه رڳو امن امان جي مجموعي صورتحال کي بهتر بڻائيندو پر پنهنجي کاتي ۾ موجود انهن ڪنين مڇين کي به هڪ پاسي ڪندو جيڪي هِن ڊپارٽمينٽ لاءِ سچ پچ ڪنهن داغ مثل آهن.

چيو پيو وڃي ته ٽنڊي محمد خان جي پوليس کي نه صرف ڪچي شراب جي بٺين جي مڪمل طور تي ڄاڻ هئي، پر عوامي شڪايتن تي لڳ ڀڳ 2 مهينا اڳ ڇاپو هڻي هڪ هزار کان مٿي ڪچي شراب جا ڊرم هٿ ڪيا ويا هئا، جن ۾ هزارين ليٽر شراب موجود هو، اِهو شراب سڌي سنئين ڳالهه آهي ڪو واٽر ڪپن يا غيرآباد زمينن تان هٿ نه ڪيو ويو هوندو، ضرور ان جا ڪي ٺاهيندڙ ۽ وڪرو ڪندڙ هوندا، پر انهن جو ڇا ٿيو ۽ کين ڪهڙي سزا ملي، ان بابت ڪابه خبر چار ڪانهي، اسان وٽ اڪثر ڪري ان قسم جا ڇاپا وقت گذرڻ سان گڏوگڏ ڇپر ڪيا ويندا آهن ۽ ڳالهه کي ڄاڻي واڻي آيو ويو ڪيو ويندو آهي. هي ڪو پهريون موقعو ناهي، جنهن ۾ ڪچو شراب واپرائڻ سبب قيمتي انساني جانين جو نقصان ٿيو هجي، پر اسان وٽ ماضيءَ ۾ به اهڙي قسم جا ڪيترائي واقعا ٿي چڪا آهن. خاص ڪري مختلف تهوارن جي موقعن تي هن قسم جا واقعا ٿيندا رهيا آهن، پر هر ڀيري ڪجهه ڏينهن ميڊيا تي خبرون هلڻ کانپوءِ معاملو ماٺ ميٺ جو شڪار ٿي ويندو رهيو آهي ۽ وري هڪ نئون واقعو سامهون ايندو رهيو آهي. هن قسم جي واقعن کي روڪڻ لاءِ جنهن قسم جي سنجيدگيءَ جي ضرورت آهي ۽ جنهن قسم جي ڪارروائيءَ جي ضرورت آهي، اها ڪڏهن به نظر نه آئي آهي. هڪڙا عنصر ته اُهي آهن، جيڪي زهر وڪڻي گهر اجاڙين ٿا ۽ ٻيا عنصر اهي آهن، جيڪي انهن زهر وڪڻندڙن جي پشت پناهي ڪن ٿا، جن ۾ پوليس کان وٺي بااثر سياسي ماڻهو شامل آهن. ٽنڊي محمد خان ۾ ٿيل واقعي بابت به اِهي ئي خبرون آهن ته اِهو ڪچو شراب مقامي سياسي اڳواڻ ۽ مشهور ملهه پهلوان جي بٺي تان خريد ڪيو ويو، جيڪو سرعام ڪچو شراب وڪڻندو آهي. جيتوڻيڪ ماڻهن ڪاوڙ ۾ ان جي بٺي سميت گهر ۽ اوطاق کي باهه ڏئي ساڙي ڇڏيو آهي، پر هي منشيات فروش فرار آهي، 40 کان وڌيڪ ماڻهن جي هن قاتل سان ڪهڙو حساب ڪتاب ٿيندو، اِهو سوال بهرحال پنهنجي جڳهه تي قائم آهي. جيڪڏهن ماضيءَ جي واقعن جيان هِن واقعي کي به وقت گذرڻ سان گڏ آيو ويو ڪيو ويو ته اِهو سچ پچ هڪ وڏو الميو هوندو. جنهن گهر مان هڪ ئي وقت 3-3 جنازا کڄيا هجن، ان گهر جي حالت ڇا هوندي ۽ ان گهروارن تي ڇا گذرندو هوندو، هڪ انساني دل رکندڙ ان درد کي چڱيءَ طرح سمجهي سگهي ٿو.

جيڪڏهن ڏٺو وڃي ته منشيات فروشي وارو هي مسئلو صرف هڪڙي ٽنڊي محمد خان تائين محدود ناهي، پر سنڌ جي هر شهر ۽ هر ڳوٺ ۾ سرعام اڏا قائم ٿيل آهن، جتان سرعام هر قسم جو نشو ملي وڃي ٿو، پوءِ اُهو ڪچو شراب هجي، پڪو شراب هجي، هيروئن هجي، چرس هجي، آفيم هجي، گٽڪو هجي، مين پڙي هجي يا ڪو ٻيو نشو هجي. اڄ جي معاشي تنگي، گهريلو مسئلن ۽ سماجي اڻ برابري واري هِن ماحول ۾ ماڻهو نشي ۾ پناهه وٺڻ جي ڪوشش ڪن ٿا، جيڪو کين هر گهٽيءَ ۾ ڏاڍي سولائيءَ سان ملي وڃي ٿو. هتي ڪير به اهڙو ناهي جيڪو ماڻهن جي ذهنن کي تبديل ڪري، سندن مسئلن جي حل جي سلسلي ۾ پنهنجو ڪردار ادا ڪري ۽ کين زندگي طرف واپس موٽائي اچي ۽ انهن کي اِهو شدت سان محسوس ڪرائي ته نشو ڪنهن به مسئلي جو حل ناهي، اُهو پنهنجي زندگيءَ کي پاڻ تباهه ڪرڻ آهي. اسان وٽ حڪومتي سطح تان نشي جي لعنت کي ختم ڪرڻ ۽ منشيات فروشن خلاف ڪارروائي جا اعلان ته وڏي واڪي ٻڌڻ ۾ اچن ٿا، پر عملي طور تي جيڪو ڪردار ادا ڪرڻ ۽ جيڪا ڪارروائي ڪرڻ جي ضرورت هجي ٿي، اُها نٿي ٿئي. هڪ رپورٽ مطابق روزانو ڪروڙين رپين جو نشو وڪرو ٿئي ٿو، جنهن مان منشيات فروشن کي ڪروڙين روپيه ڪمائي ٿئي ٿي، اسان جو نئون نسل ڏاڍي تيزيءَ سان منشيات جي باهه ۾ سڙي ڀسم ٿي رهيو آهي. ڪير به ڪونهي جيڪو هنن منشيات فروشن جي موت جي وکر واري دڪانداري بند ڪرائي. بس ڳالهيون آهن، جن ذريعي ماڻهن جي دل وندرائي وڃي ٿي.

هر شهر ۽ هر ڳوٺ ۾ منشيات جو اِن انداز ۾ سرعام وڪرو ٿي رهيو هجي ۽ مقامي انتظاميا کي ان جي خبر ئي نه هجي، اِهو ڪيئن ممڪن آهي؟ جيڪڏهن ڪير اهڙي قسم جي نڪ جي پڪائي ڪري ٿو ته اِن کي نااهلي کانسواءِ ٻيو ڪهڙو نالو ڏئي سگهجي ٿو؟ حقيقت اِها آهي ته سڀني کي خبر آهي، پر هڪڙا ڪن فائدن تحت خاموش بڻيل آهن، ٻيا انهن منشيات فروشن جي اثر رسوخ سبب خاموش بڻيل آهن ۽ ٽيان ”منهنجو ڇا“ واري سوچ تحت خاموش آهن، انهن ۾ مقامي انتظاميا به اچي وڃي ٿي، سياسي سماجي ڌريون به اچي وڃن ٿيون ته عام ماڻهو به اچي وڃن ٿا ۽ اِن سوچ هِن منشيات جي ڪاروبار کي وسيع ڪرڻ ۾ مدد ڏني آهي. هن صورتحال ۾ جڏهن اسان کي مقامي انتظاميا جي ڪردار جي سڄي خبر آهي ته اُهو ڪهڙو آهي، تڏهن بجاءِ ان جي آسري تي ويهڻ جي ڪجهه مڙسي عام شهرين کي به ڪرڻي پوندي ۽ منشيات جي اڏن کي بند ڪرائڻ ۾ پنهنجو پريشر سامهون آڻڻو پوندو. هي منشيات فروش ڀلي ڪيتري به پٺ رکندڙ هجن، پر اُهي عام شهرين کان ڏاڍا ناهن، جيڪڏهن عام شهري هنن خلاف هڪ ٿي وڃن ته کين پنهنجي زهر واري دڪانداري هر صورت ۾ بند ڪرڻي پوندي. ٽنڊي محمد خان واري واقعي تي صرف افسوس جو اظهار ڪرڻ ڪافي ناهي، پر هِن واقعي جي مڪمل طور تي جاچ ڪري ملوث عنصرن خلاف سخت ڪارروائي جي پڻ ضرورت آهي. رڳو ايترو ئي نه پر منشيات فروشن خلاف اهڙو ئي آپريشن ڪرڻ جي ضرورت آهي، جهڙو دهشتگردن خلاف ڪيو پيو وڃي.

wahidparas@yahoo.com

 

بي روزگاري مهاڻن جون صدائون ڪير ٻڌندو : اصغر ملاح

دنيا جو ڪوبه ملڪ اهڙو نه آهي جتي زراعت پوئتي پيل هجي اهو ملڪ ترقي نٿو ڪري سگهي جن ملڪن ۾ زراعت اڳتي هجي اهي ملڪ دنيا ۾ خوشحال بڻيل آهن جن زراعت ۾ ترقي ڪئي آهي اهڙا ڪيترائي مثال دنيا ۾ موجود آهن سنڌ ۾ زراعت  جي تباهي  جون  دانهون  هاڻ  ڪا نئين ڳالهه  ڪانهي گذريل  ڪيترن ئي سالن کان سنڌ  جا آبادگار مختلف مسئلن  جو شڪار رهيا آهن، جنهن  ۾فصلن جي پوکي وقت  گهربل زرعي پاڻي  جو نه ملڻ  وڏو  مسئلو  رهيو آهي اسان جي ملڪ جي آبادي جو 72 سيڪڙو عوام جو گذر سفر زراعت تي آهي. زرعي پاڻي جي کوٽ، سٺا فصل نه ٿيڻ، سٺيون جنسون نه ملڻ سبب سنڌ جا اڪثر آبادگار مالي مشڪلاتن جو سدائين شڪار رهيا آهن سٺا فصل نه ٿيڻ جا ڪيترائي سبب آهن پر گهڻو ڪري سنڌ ۾ سدائين زرعي پاڻي جي کوٽ رهي آهي جنهن سبب سنڌ جي زراعت کي تمام گهڻو نقصان ڏنو آهي سنڌ ۾ وڌندڙ تيزي سان آدمشماري وڌڻ جي ڪري ۽ سنڌ  جي زراعت کي مٺي پاڻيءَ جي شديد گهرج آهي سنڌ جي آبادگارن وقت به وقت احتجاج  ڪري  دانهيو آهي ته سالن کان سنڌ جي حصي جو پاڻي ڦٻائڻ جي لاءِ اهي سڀ رستا اختيار ڪيا ويا آهن جنهن سان ڪنهن به طرح سنڌ جي پاڻيءَ کي غير قانوني طور تي روڪي سگهجي پاڻيءَ جون ضرورتون پوريون ڪرڻ جي لاءِ سنڌ جي پاڻي جي حصي مان ڪٽوتي ڪئي وڃي ٿي انهيءَ ڪري سڄي سنڌ ۾ سوڪهڙي واري صورتحال پيدا ٿي ويندي آهي سنڌ جي حصي جو پاڻي ورڪڻ جو مقصد سنڌ کي سڪائڻ آهي سنڌ  جي سرزمين  سنڌو درياهه جي پڇاڙي  ۾ آهي  سا ڪڏهن  ٻوڏ  هيٺ ته ڪڏهن  وري  سالن  جا  سال  سوڪهڙي  جو  شڪار رهي ٿي.

جيڪڏهن ملڪ ۾ ڪا پاڻيءَ جي کوٽ آهي ته اها گڏيل طور تي برداشت ڇو نه ٿي ڪئي وڃي، سوڪهڙو آخر سنڌ جي مقدر ۾ ڇو آهي؟ سنڌ جي آبادگارن کي خوشحال بڻائڻ لاءِ ذراعت کاتو وجود ۾ آيل آهي جيڪو آبادگارن کي وقت سر زرعي پاڻي پهچائڻ جو پابند آهي سنڌ ۾ زرعي پاڻي جي کوٽ سبب سنڌ جي ننڍن وڏن آبادگارن پاران اهو ڏينهن خالي نه آهي جو آبادگارن جو احتجاج نه ٿيو هجي مونکي چڱي طرح ياد آهي جيڪا 2010 ۾ مها ٻوڏ سبب واهن شاخن ۽ سِم نالن کي پوندڙ گھارن سبب تباهي آئي هئي ۽ لکين سنڌ جي ماڻهن پنهنجا گھر گھاٽ ڇڏي سرڪاري ڪيمپن، واري جي ٽٻن، روڊ رستن، جي ڪنارن ۽ کليل ميدانن تي پناهه وٺڻ تي مجبور ٿي ويا گھارن جي ذريعي ايندڙ تباهي سبب لکين ايڪڙن تي بيٺل ڦٽيون، ساريون، ڪمند، ٽماٽا ۽ بصرن جا فصل تباهه ٿي ويا سنڌ جي شهرن ۾ پاڻي بيهي ويو ۽ سون جي تعداد ۾ ڳوٺن جا ڳوٺ تباهه ٿي موئن جو دڙو ٿي ويا مها ٻوڏ سڄي سنڌ جو نڪشو ڦرائي ڇڏيو. پاڻي ماهرن جو چوڻ آهي ته سنڌ ۾ 2010ع واري ٻوڏ رٿابندي نه هئڻ سبب تباهي پهچائي. ماضي ۾ به ملڪ ۾ خطرناڪ ٻوڏون اينديون رهيون آهن پر ايترو معاشي ۽ جاني نقصان  ناهي ٿيو، جيڪو 2010ع واري  ٻوڏ ۾ٿيو، ٻوڏ جي فطرتي گهرج هوندي آهي، ٻوڏون انسان دشمن ناهن پر پلاننگ نه هئڻ سبب نقصان ۾ واڌارو ٿيو هو.ٻوڏ کانپوءِ ٻيو  مرحلوسرڪار پاران ٻوڏ متاثرين کي وطن ڪارڊ وٺيدڙن کي مشڪلاتن جو منهن ڏسڻو پيو پوء ڪن نادرا جي ايجنٽن ۽ پوليس جي سپاهين کي هزارين روپيا رشوت ڏئي  وطن ڪارڊ  ورتو ته ڪن رشوت نه ڏيڻ جي ڪري سپاهين جون لٺيون کائي وطن ڪارڊ  ئي وساري ڇڏيو.

ڪي  واري سخت مشڪلاتن کانپوء ٻوڏ متاثر وطن ڪارڊ ته وٺي ويا وري ان کانپوء وطن ڪارڊ وٺڻ  مهل وڏو مسئلو اهو پيش آيو جو ڪچي جا اٻوجهه سادا ۽اڻ  پڙهيل ماڻهو جن کي اي بي سي جي اکرن جي به سڃاڻپ نه هوندي آهي تن کي چيو ويو ته اي ٽي ايم ڪارڊ مشين مان وڃي  پئسا ڪڍو هاڻ جن ماڻهن کي  پنهنجي نالي لکڻ جي به خبر ناهي اهي ڪيئن پن ڪوڊ نمبر هڻي  اي  ٽي ايم مشين مان پئسا ڪڍندا اي ٽي ايم مشين تي وري مختلف شاهينگ  پيدا گهر بيٺل هئا جن سادن اٻو جهه ماڻهو کان ڪارڊ وٺي اهو چيو ته اوهان کي اي ٽي ايم مشين مان پئسا  ڪڍي ڏنا ويندا  پر اڌ  پئسا اسان جا  ٿيندا وري جنهن متاثرين جي وطن ڪارڊ  جي ٻي  قسط آئي آهي ته ان ۾ ڪنهن ٻوڏ متاثرن جوپن ڪوڊ  گم ته وري ڪنهن ٻوڏ متاثرن  جو لسٽ مان نالو ئي گم  ڪيو ويو وطن ڪارڊآفيس وارا ٻوڏ  ستايل  ماڻهو کي  ڏهاڙي پنڌ ڪرائي  پريشان ڪرڻ  لڳا وطن  ڪارڊ جا پئسا وٺڻ  جي ڪري ٻوڏ کي متاثرين ڪراين ڀاڙن۾ پنهنجي گھر جا پئسا  پڻ کپائي ڇڏيا  هيا ڪن وري گهڻا پنڌ ڪرڻ کانپو وطن  ڪارڊ کي درياهه  بادشاهه جي حوالي  ڪري ڇڏيو.

وقت جا حڪمران وري ميڊيا اڳيان ائين چوندا رهيا ته اسان ٻوڏ متاثرين جي وڏي  مدد ڪئي آهي اسان هنن کي ٻج ڏنا وطن ڪارڊ جي صورت م ڪيش پئسن جي پڻ مدد ڪئي پر ٻوڏ  متاثرين  تا.ئين ته ٻج ڀاڻ  به صحيح تريقي سان  ڪونه پهتو غريبن جي بج ڀاڻ مان وڏيرن  سندن ڇاڙتن  پنهنجا  پيٽ ڀريا غريب اٻوجهه اهڙان جا اهڙان رهجي  ويا ٻوڏ متاثر بي يا رو مدد  گار ٿي ا.ئين  چوڻ  لڳا عالمي ادارن مان اربين روپيا امداد ملي پر اُها رقم متاثرن جي بحالي يا بچاءَ لاءِ خرچ ٿيندي ڪٿي به نظر ناهي آئي رونيو کاتي جي ڪامورن مختيارڪارن تپيدارن گهٽ نه ڪئي آهي قدرتي آفتن جو شڪار ٻوڏ برسات متاثرين جي لاءِ آيل ڪروڙين روپين جو ٻج ڀاڻ جون سوين ٻوريون ڪوڙي ڪاغذي ڪاروائي ڪري بنا ڪنهن ڊپ ڊاءِ جي هڙپ ڪري ويا جن  خلاف  اڄ تائين  قانوني  ڪاروائي عمل ۾ نه ائي آهي.وفاقي صوبائي سرڪار قدرتي آفتن ۾ پيل گھارن سبب بندن ۽ شاخن واهن جي بهتر مرمت ڪرائڻ لاءِ ڪروڙين رپيه جاري ڪيا ويا آهي ……….     هلندڙ

 

ٻي طرف پ پ سينيٽر عاجز ڌامراه ، پ پ ايم پي اي سيد اعجاز شاھ بخاري ، ٽنڊو محمد خان جي ڊپٽي ڪمشنر آغا عبدالرحيم ، پ پ ضلعي صدر حاجي امين لاکو فوتي ٿي ويلن جي تڏي تي وڃي ساڻن ڏک ونڊيو ۽ اسپتالن ۾ وڃي داخل مريضن جي عيادت ڪئي .

ٽنڊي محمد خان ۾ زهريلو شراب واپرائڻ سبب فوت ٿيلن جو انگ 55 ٿي ويو آهي. آءِ جي سنڌ به 45 ڄڻن جي فوت ٿيڻ جي تصديق ڪري ڇڏي آهي. ملهه ايسوسيئيشن جي سيڪريٽري جنرل علي نواز پنهور سميت 8 ڄڻن خلاف ڪيس داخل، دهشتگردي جا قلم شامل نه ڪيا ويا آهن. گذريل  اربع جي ڏينهن وڌيڪ 6 لاش ٽنڊو محمد خان آندا ويا ، فوتين ۾ ٽنڊو محمد خان جي ٻرڙا پاڙي جي ابراهيم ملاح ، ڪولاچي پاڙي جي عمران ڪولاچي ، چئنل موري جي مودو ڪولهي ،  سومرا پاڙي جي ٻن ڄڻن محرم ماڇي ، ممتاز شيدي ۽ ڀيمون ڪولهي جا لاش آندا ويا ، جڏهن ته سم نالي جا رهواسي اشرف خاصخيلي ۽ ساجد علي عرف سونيا کي زهريلو شراب پيئڻ سبب ٽنڊو محمد خان جي سرڪاري اسپتال آندو ويو جتي کين ڳڻتي جوڳي حالت ۾ داخل ڪيو ويو آهي،

زهريلو شراب واپرائڻ سبب مري ويلن جو ڪيس داخل  ڪيو ويو آهي جنهن ۾  پوليس ڪيس ۾ اي ٽي سي جا قلم نه هنيا آهن صرف زهر ڏيئي مارڻ جا قلم ڪيس ۾ شامل ڪيا ويا آهن، مري ويلن جو ڪيس ايس اڇ او ٽنڊو محمد خان جي فرياد تي گناھ نمبر 29/2016 تحت قلم 316/337 جي پي سي موجب مک جوابدر ملهھ ايسوسيئشن سنڌ جي جنرل سيڪريٽري علي نواز پنهور ، حاڪم پنهور ، شوڪت پنهور ، عبدالرحمان ، سميت 3 نامعلوم جوابدارن خلاف داخل ڪيو ويو آهي ڪيس ۾ منشيات فروشن جي سرپرستي ڪرڻ جي الزام ۾ سي آءِ اي ٽنڊو محمد خان جي اڳوڻي انچارج غلام شبير دلواڻي کي به شامل ڪيو ويو آهي سندس جو  نالو ايف آءِ آر ۾ شامل ڪيو ويو آهي پر پوليس ڪيس ۾ ڪنهن به جوابدار جي گرفتاري ظاهر نه ڪئي آهي پر پوليس مختلف علائقن ۾ ڇاپا هڻي 15 کان مٿي ماڻهن کي گرفتار ڪري ورتو آهي، هوڏانهن احتجاج جو سلسلو جاري آهي مڇريل ماڻهن ڪيس ۾ جوابدار ڄاڻايل مک جوابدار علي نواز پنهور جي بنگلي کي ڊاهي پٽ ڪري سامان کي باھ ڏيئي ساڙي ڇڏيو.

سڀ شئي سامهون هجڻ باوجود به واقعي جو مک ذميوار زمين گهي وئي يا آسمان کائي ويو  جو پوليس کي اڃان تائين ان تائين پهچ نه ملي سگهي آهي، 50 کان مٿي گهر اجڙي وڃڻ باوجود انتظاميه پاران تحرڪ نه وٺڻ عجيب ڳالهه آهي اهڙن واقعن تي هميشه جيان انتظاميه ٺلهن ڪاميٽين ۽ جاچ جا بيان ڏئي پاڻ کي آجو ڪري ويهي رهيندي پر ائي ٿيڻ نه گهرجي.

 

جلد سرزمين تان دهشتگردي جو خاتمو آڻينداسين، ميري اک سان ڏسندڙ جون اکيون ڪڍيون وينديون:نواز شريف/ممنون حسين

اسلام آباد (اي پي پي) سڄي ملڪ ۾ 23 مارچ يوم پاڪستان ڀرپور قومي جذبي سان ملهايو ويو. وفاقي گادي واري شهر اسلام آباد ۾ 31 ۽ صوبائي گادي وارن شهرن ۾ 21- 21 توپن جي سلامي سان صبح جي شروعات ڪئي وئي. يوم پاڪستان تي فجر جي نماز کان پوءِ ملڪ جي سلامتي، خوشحالي ۽ ترقي لاءِ خاص دعائون ڪيون ويون.وفاقي گاديءَ واري شهر اسلام آباد ۾ اربع تي پاڪستان واري ڏهاڙي جي موقعي تي شاندار فوجي پريڊ منعقد ٿي جنهن ۾ پاڪستان جي هٿياربند فوجن جي جٿن شاندار فوجي پريڊ، جڏهن ته پاڪ فضائيه جي جهازن شاندار فلاءِ پاسٽ جو مظاهرو ڪيو. هٿياربند فوجن جي گڏيل پريڊ تقريب جو خاص مهمان صدر مملڪت ممنون حسين هو، جڏهن ته وزيراعظم محمد نواز شريف، بچاءَ وارو وزير خواجه محمد آصف، چيئرمين جوائنٽ چيفس آف اسٽاف ڪميٽي جنرل راشد محمود، چيف آف آرمي اسٽاف جنرل راحيل شريف، ايئر چيف مارشل سهيل امان، نيول چيف ايڊمرل ذڪاءُ الله کان علاوه پرڏيهي سفارتڪارن، نمائندن، هاءِ ڪمشنرن ۽ وفاقي توڙي صوبائي وزيرن، پارليامينٽ ميمبرن ۽ عوام جي وڏي انگ شرڪت ڪئي. صدر جيڪو تقريب جو خاص مهمان هو، جي آمد جو پگل وڄائي اعلان ڪيو ويو هو بگي ۾ سوار ٿي پريزيڊنٽ باڊي گارڊز سان گڏ تقريب ۾ پهتو. سلاميءَ جي چبوتري تي وزيراعظم محمد نواز شريف، بچاءَ وارو وزير خواجه محمد آصف، جنرل راشد محمود، جنرل راحيل شريف، ايئر چيف سهيل امان، صدر مملڪت جي آجيان ڪئي جنهن بعد قومي ترانو وڄايو ويو. صدر پريڊ ڪمانڊر سان گڏ پريڊ جو معائنو ڪيو جنهن کانپوءِ پاڪ فضائيه ۽ بحريه جي جهازن شاندار فلائي پاسٽ ڪيو جنهن ۾ جي ايف 17 ٿنڊر ۽ ايف 16، معراج، پي ٿري سي اورين، ايف 7، پي جي 7، قراقرم، ايگل سميت مختلف جنگي جهازن حصو ورتو. پريڊ ۾ 12 نادرن لائيٽ انفينٽري، بحريه، فضائيه، فرنٽيئر ڪور، پاڪستان رينجرز پنجاب، پاڪستان پوليس، پاڪستان آرمي جي ليڊي آفيسر، گرلز گائيڊ ۽ اسڪائوٽس جي جٿن شاندار پريڊ جو مظاهرو ڪيو، جڏهن ته پاڪ فوج جي اسپيشل سروسز گروپ جي جٿي پڻ پنهنجي مخصوص انداز ۾ پريڊ ڪندي صدر مملڪت کي سلامي ڏني. آرمڊ فورس جي جٿي جيڪو الخالد ٽينڪ، ٽي اي ٽي يو ڊي ٽينڪ، الزرار ٽينڪن تي ٻَڌل هو، آرٽلري جي بڪتربند، اي پي سيز، آرمي ايئر ڊفينڊ ميزائل ۽ ٽريڪنگ ريڊار سسٽم سان ليس ايف ايم 90 ڪور آف انجنيئرنگ، ڪور آف سنگل جي جٿن پڻ صدر کي سلامي ڏني. تقريب ۾ جديد ترين ميزائلن کان علاوه دفاعي سازو سامان جو پڻ مظاهرو ڪيو ويو. نوجوانن، ٻارن، پوڙهن ۽ عورتن جي وڏي انگ پريڊ گرائونڊ ۽ آسپاس جي شهرين گهرن جي ڇتين تي بيهي فضائي مظاهرو ڏٺو، پريڊ تقريب جو هڪ ٻيو شاندار مظاهرو پاڪ فوج جي اسپيشل سروسز گروپ، پاڪ بحريه ۽ فضائيه جي ڪمانڊوز جو 10 هزار فوٽن جي اونچائيءَ تان فري فال جپمپ جو مظاهرو هو. تقريب جي پڄاڻيءَ تي ٻارن قومي ۽ ملي گيت پيش ڪيا، صدر ممنون حسين ۽ وزيراعظم محمد نواز شريف ٻارن ۾ رلي ملي ساڻن هٿ پڻ ملايا  صدر ممنون حسين يوم پاڪستان جي موقعي تي پنهنجي پيغام ۾ چيو ته اڄوڪو ڏينهن وطن عزيز جي تعمير ۽ ترقي جي عزم کي ورجائڻ وارو ڏينهن آهي. آزادي  واري تحريڪ جي عظيم اڳواڻن کي خراج عقيدت پيش ڪيان ٿو. پاڪستان جو قيام جمهوري جدوجهد جي نتيجي ۾ ممڪن ٿيو، وطن عزيز جي ترقي ۽ استحڪام جو راز پڻ جمهوريت ۾ لڪل آهي. وزيراعظم محمد نواز شريف پنهنجي پيغام ۾ چيو ته وطن عزيز کي اجتماعي ڪوششن سان عظيم رياست بڻائي سگهون ٿا. ايندڙ نسلن جو مستقبل محفوظ ڪرڻ لاءِ به پرعزم آهيون. هن چيو ته دهشتگردي ۽ شدت پسندي کي شڪست ڏيڻ لاءِ پرعزم آهيون. يوم پاڪستان جي موقعي تي قائداعظم محمد علي جناح ۽ علامه اقبال جي مزارن تي گارڊز جي تبديلي جون تقريبون پڻ ٿيون.

 

زهريلو شراب واپرائڻ سبب فوتگيون جاري، انگ 42 ٿي ويو، ڪيترن جي حالت نازڪ

حيدرآباد/ٽنڊومحمد خان (نمائندن وٽان) ٽنڊو محمد خان ۾ زهريلو شراب واپرائڻ سبب سول اسپتال ۾ داخل وڌيڪ هڪ ڄڻو فوت ٿي ويو، جنهن بعد هيل تائين فوتين جو انگ وڌي 42ٿي ويو آهي، مختلف اسپتالن ۾ داخل 16 ڄڻن مان ڪيترن جي حالت ڳڻتي جوڳي ٻڌائي پئي وڃي، فوتين مان 27 ڄڻن جا لاش دفنايا ويا آهن. ٽنڊو محمد خان جي ڪريم آباد پاڙي ۾ ڪچو شراب واپرائڻ سبب سول اسپتال حيدرآباد منتقل ڪيلن مان وڌيڪ هڪ ڄڻو فوت ٿي ويو، جنهن بعد هيل تائين فوتين جو انگ وڌي 42 ٿي ويو آهي. حيدرآباد سول اسپتال ۽ ٽنڊو محمد خان ۾ فوت ٿيلن جا لاش ضروري ڪارروائي بعد وارثن حوالي ڪيا ويا، فوت ٿيل 42 ڄڻن مان 27 ڄڻن جا لاش ٽنڊو محمد خان جي مختلف علائقن ۾ دفنايا ويا، جنهن دوران ماحول سوڳوار ٿي ويو، جڏهن ته وڌيڪ لاشن جي مختلف علائقن ۾ تدفين ڪئي وئي. زهريلو شراب واپرائڻ سبب فوت ٿيلن ۾موتي، ناتيو، شير محمد، راڻو، لالجي، لالجي، اشوڪ، ريشمان، جئه رام، مانو، تلو، نٿو، ڀاڙو ميگهواڙ، چينو، خانجي ولد نيمڙو، بابو ولد شنڪر، پپو، فقيرو، ڪانجهي ولد ويرسن، شريمتي مونا ٻائو، راسين، شفيع، نرسنگ، محمد، وحيد ملاح، الله ڏنو ملاح، ميرو اوٺو، شوڪت اوٺو، بخش علي،فيمجي، شريمتي رواڙي، نارخان، رامو، نديم عالماڻي، اعجاز ، رفيق سولنگي شامل آهن. حيدرآباد جي سول اسپتال ۾ 5 ۽ مختلف اسپتالن ۾ 10 کان وڌيڪ ماڻهن کي داخل ڪيو ويو آهي، جن مان ڪيترن جي حالت ڳڻتي جوڳي هجڻ ڪري فوتين جو انگ وڌڻ جو خدشو ظاهر ڪيو پيو وڃي.  ذريعن موجب، ڪچو شراب واپرائڻ سبب 20 کان وڌيڪ ماڻهو پوليس جي خوف کان اسپتالن ۾ داخل ٿيڻ بدران گهرن ۾ علاج ڪرائي رهيا آهن. ڪچو شراب واپرائڻ سبب فوتين جي وارثن ذميوارن  خلاف  حيدرآباد- بدين روڊ تي ڌرڻو هنيو. وارثن جو چوڻ آهي ته پوليس ۽ ايڪسائيز کاتي جي نااهلي ڪري واقعو پيش آيو، ذميوارن خلاف ڪارروائي ڪري ساڻن انصاف ڪيو وڃي.

 

دهشتگردي خلاف جنگ ۾ آرمي چيف جون ڪوششون ساراهه جوڳيون آهن: قائم علي شاهه/عشرت العباد

اسلام آباد (بيورو) صدر ممنو حسين جو چوڻ آهي ته پاڪستان ملڪ ڏانهن اٿندڙ هر ميري اک کي ڪڍي ڇڏينداسين.پاڪستان جي قومي ڏيهاڙي تي مُک تقريب گادي واري شهر اسلام آباد ۾ ٿي رهي آهي، جنهن ۾ صدر ممنون حسين،وزيراعظم نوازشريف ، وفاقي وزيرن ۽ هٿياربند فوج جا سربراهه، چيئرمين جوائنٽ چيف آف آرمي اسٽاف ۽ ٻيون اعليٰ شخصيتون شامل آهن.پاڪستان جي ڏيهاري جي حوالي سان رٿيل پريڊ جي شروعات شڪر پڙيان پريڊ گرائونڊ ۾ قومي تراني سان ٿي،جنهن کانپوءِ صدر پاڪستان فوجي جوانن جي دستي جو معائنو ڪيو.ان موقعي تي تقريب کي خطاب ڪندي پاڪستان صدر ممنون حسين چيو ته جيڪڏهن ڪنهن به پاڪستان طرف ڏوهه جي نظر سان ڏٺو ته انهيءَ کي چيڀاٽي ڇڏينداسين.سندس چوڻ هو ته پاڪستاني قوم جي جوانن جو حواصلا ۽ طاقت اڄ جي پريڊ جي روح آهن،جنهن مان اهو پيغام ملي ٿو ته پاڪ فوج پنهنجي پيشي ۾ ڪنهن کان به گهٽ يا پوئتي ناهي ۽ پاڪستان جي بچاءُ لاءِ جبل جيان مضبوط آهي.هي پاڪستان جي بانين جو قانوني عزم ۽ قوم جو بي مثال جذبو هيو،جنهن جي قوت سان رڳوهڪ قرار داد جي خيال کي حقيقت ۾ مٽائي ڇڏيوصدر پاڪستان ممنو حسين چيو ته  پاڪستان هن وقت قائد آعظم جي نقش قدم تي هلي رهيو ۽ ملڪ مان انتها پسندي، دهشتگردي اڻ ڀيٽ جي دور مان نڪري رهيو آهي،هن وقت ڪنهن به دشمن کي منهن ڏيڻ جي سگهه رکون ٿا، ڪنهن به پاڪستان طرف ڏوهه جي نظر سان ڏٺو ته انهيءَ جو حشر خراب ٿيندو.