تازيون خبرون

Daily Archives: March 22, 2016

مشرف تي تنقيد ڪندڙ 2007ع ۾ اپوزيشن جي پٺيءَ ۾ ڇرو هنيو : چوڌري نثار

اسلام آباد  (اي پي پي) وفاقي گهرو وزير چوڌري نثار علي خان چيو آهي ته گذريل حڪومت بينظير ڀٽو جي قتل جي ايف آءِ آر ۾ پرويز مشرف جو نالو شامل هجڻ جي باوجود ان جي خلاف ڪا به ڪارروائي نه ڪئي، اسان پرويز مشرف جو نالو اي سي ايل مان سپريم ڪورٽ جي فيصلي جي تحت ڪڍيو آهي، جيڪڏهن انهن کي اعتراض آهي ته هي ڌر ڇو نه بڻيا. سومر ڏينهن پارليامينٽ جي گڏيل اجلاس دوران خورشيد شاهه جي اعتراض واري نقطي تي جواب ڏيندي گهرو وزير چوڌري نثار علي خان چيو ته ٻي طرف کان تقرير ڪرڻ کان پهرين مشورو ڪرڻ گهرجي ها ته بهتر هجي ها، هن چيو ته مون کان پهرين جيڪا تقرير ڪئي وئي ان جي لفاظي کان ايوان جو تقدس مجروح ٿيندو، اسان سڀني کي ايوان ۾ سچ جو احترام ڪرڻ گهرجي، هن چيو ته ڪو پنهنجو پاڻ کي ڪمزور چئي پنهنجو پاڻ کي صاف طور تي الزام کان آجو قرار ڏي ته ڇا ڪجي، مون بطور مخالف ڌر اڳواڻ جنرل پرويز مشرف جي قانون ٽوڙڻ جي حوالي سان جيڪو ڪجهه چيو هو اهو به ايوان ۾ پيش ڪندس. اسان پرويز مشرف جو نالو اي سي ايل مان سپريم ڪورٽ جي فيصلي تحت ڪڍيو آهي، جيڪڏهن انهن کي اعتراض آهي ته هي ڌر ڇو نه بڻيا، هن چيو ته 2007ع ۾ جڏهن هي زخم تازو هو ان وقت جي اپوزيشن فيصلو ڪيو ته اسان کي اسيمبلي واپس ناهي وڃڻو. هي فيصلو ٿي ويو هو، هي جمهوريت جا چيمپئن آهن. هنن ٻه ٽي مهينا به قربان ڪرڻ گوارا نه ڪيو، هي تماشائي بڻجي ڪناري تي بيهي تاڙيون وڄائيندا رهيا. هن چيو ته جڏهن پرويز مشرف جو نالو بي نظير ڀٽو قتل ڪيس ۾ اچي ويو هو ته هن مجرماڻي خاموشي ڇو اختيار ڪئي، جيڪڏهن پرويز مشرف آئين ٽوڙيندڙ هو ته دبئي ۾ ان سان ڳالهيون ڪري محفوظ رستو ڳوليندا رهيا، گهرو وزير چيو ته سپريم ڪورٽ ۾ جيڪا اپيل آئي ان ۾ پي ٽي آءِ جي حامد خان به ڌر طور هاءِ ڪورٽ جي فيصلي جي خلاف پٽيشن داخل ڪئي پر هو هڪ ڀيرو به پيش ناهي ٿيو، هن چيو ته مشرف تي تنقيد ڪندڙ 2007ع ۾ اپوزيشن ۾ پٺيءَ ۾ ڇرو هنيو، جيڪڏهن سندن ضمير جي آواز آهي ته هي ان ڪيس ۾ ڌر ڇو نه بڻيا، اسان هي ڪيس وڙهيو آهي، اسان کي ان ڳالهه تي فخر ۽ خوشي آهي ته هن حڪومت هڪ جمهوري آئيني ۽ قانوني قدم کنيو آهي، انهن کي ته بينظير ڀٽو ڪيس ۾ اڳڀرائي جي به جرئت نه ٿي، اسان خصوصي عدالت ۾ ڪيس وڙهيو. پرويز مشرف سوا ٻه سال پهرين کان اي سي ايل تي رهيو. 31 مارچ 2014ع جي خصوصي عدالت جي فيصلي جو حوالو ڏنو جنهن ۾ چيو ويو ته جنرل مشرف آزاد شهري آهي جتي مرضي آهي رهي ۽ جتان کان مرضي آهي علاج ڪرائي، هن چيو ته اسان ايف آءِ اي سان رجوع ڪيو ۽ ايف آءِ اي جي سفارش تي هاءِ ڪورٽ ۾ ڪيس داخل ڪيو. هاءِ ڪورٽ پنهنجي فيصلي ۾ چيو ته پرويز مشرف جو نالو اي سي ايل مان ڪڍڻ ۾ ڪنهن دير جو ڪو به جواز ناهي بڻجندو، اٽارني جنرل پنهنجي بيان ۾ حسين حقاني جو به حوالو ڏنو ته اي سي ايل مان نالو ڪڍڻ کانپوءِ هو به وطن واپس نه آيو. هن چيو ته سنڌ هاءِ ڪورٽ جڏهن هي فيصلو ڪيو ته ان کي پاڻ مرادو عملدرآمد جو پابند ڪيو ويو جيڪڏهن 15 ڏينهن تائين اپيل نه ٿي ته ڪيس ختم ٿي ويندو، اسان سپريم ڪورٽ سان رجوع ڪيو، جيڪڏهن کين جمهوريت سان ايتري محبت هئي ته کين ڌر بڻجڻ گهربو هو يا پوءِ سپريم ڪورٽ جي فيصلي جي خلاف ڳالهه ڪرڻ جي جرئت هجڻ گهربي هئي. هن چيو ته هو پنهنجي صحت جو بهانو بڻائي ويو، ان جي ذميداري عدالت تي لاڳو ٿئي ٿي. جيڪڏهن هن وري راهه فرار اختيار ڪئي ۽ هو وطن واپس نه آيو ته حڪومت انٽرپول سميت ٻيا ذريعا استعمال ڪندي. ان حوالي سان بحث جي هو آجيان ڪندا. هن چيو ته ان کان اڳ ڪنهن چيف مارشل لا ايڊمنسٽريٽر اهي ڏينهن نه ڏٺا جيڪي جنرل مشرف ڏٺا آهن، سندس نالو اي سي ايل ۾ رهيو ۽ عدالتن جي سامهون پيش ٿيندو رهيو، ان مان صاف ظاهر آهي ته قانون جي پاسداري بهتر ٿي رهي آهي، جيڪڏهن اسان هڪٻئي تي تنقيد ڪندا رهياسين ته حالتون بهتر نه ٿينديون.

 

پرويز مشرف کي ٻاهر وڃڻ جي اجازت ڏئي نواز سرڪار سهولتڪاريءَ جو ڪردار ادا ڪيو: پيپلز پارٽي

ڪراچي(اسٽاف رپورٽر)  سنڌ جي سينيئر وزير نثار احمد کهڙو چيو آهي ته ن ليگ جي حڪومت آئين سان غداري ڪندڙ آمر پرويز مشرف کي ملڪ کان ٻاهر وڃڻ جي اجازت ڏئي سهولتڪاري جو ڪردار ادا ڪري غداريءَ جو مرتڪب ٿي آهي، جيڪڏهن آمر پرويز مشرف کي فوري طور ملڪ واپس نه آندو ويو ته سنڌ جي چپي چپي ۽ گهٽيءَ گهٽيءَ مان گو نواز گو جو نعرو لڳندو. اهڙن خيالن جو اظهار هن سومر ڏينهن پيپلز پارٽيءَ جي ايم پي ايز پاران آمر پرويز مشرف کي ملڪ کان ٻاهر وڃڻ جي اجازت ڏيڻ واري عمل خلاف سنڌ اسيمبليءَ جي ڏاڪڻين وٽ احتجاجي ڌرڻي کي خطاب ڪندي ڪيو. احتجاجي ڌرڻي ۾ پيپلز پارٽيءَ جي روبينا قائمخاني، رخسانا شاه، خيرالنساءِ مغل سميت ٻين عورت ميمبرن توڙي پيپلز پارٽيءَ جي صوبائي وزيرن ۽ ايم پي ايز شرڪت ڪئي جن جي ٻانهن تي ڪاريون  پٽيون ٻڌل هيون ۽ هو  هٿن ۾ پلي ڪارڊز کڻي گو نواز گو جا نعرا هڻي رهيا هيا. ڌرڻي کي خطاب ڪندي نثار احمد کهڙو چيو ته آمر پرويز مشرف ٻه دفعا آئين کي پائمال ڪيو ۽ جنهن تي آئين سان غداريءَ ڪرڻ جو ڪيس هلندڙ هجي ان کي ملڪ مان ٻاهر وڃڻ جي اجازت ڏئي نواز شريف حڪومت سهولتڪاريءَ جو ڪردار ادا ڪيو آهي ۽ ملڪ جي غدار جا سهولتڪار پڻ غداريءَ جا مرتڪب آهن. هن چيو ته عدالت پڻ ڪڏهن آمرن جي خلاف ڪا ڪاروائي نه ڪئي آهي ماضيءَ ۾ عدالت چئن مارشل لائن کي تحفظ ڏنو ۽ هاڻي واري آئين سان غداريءَ ڪندڙ آمر جو بال حڪومت جي ڪورٽ ۾ اڇلايو ۽ ڻ ليگ جي حڪومت وري آمر کي ٻاهر وڃڻ ڏنو جيڪڏهن نواز شريف کي ائين ئي ڪرڻو هو ته پوءِ هو پرويز مشرف کي ايئر پورٽ تي الوداع چوڻ وڃي ها ته بهتر هو. نثار احمد کهڙو چيو ته آمر پرويز مشرف ۽ نوازشريف جي سوچ هڪ آهي ۽ هو هڪ ئي سڪي جا ٻه پاسا آهن، هڪ عدالت کان ڊڄي ملڪ کان ڀڄي ويو ۽ ٻئي ان ئي آمر سان 10 سال معاهدو ڪري ملڪ مان فراريت اختيار ڪئي هئي. هن چيو ته پرويز مشرف تيستائين ملڪ مان ٻاهر نه پئي وڃي سگهيو جيستائين سندس نالو اي سي ايل مان نه پيو نڪري ۽ اي سي ايل مان آمر جو نالو ڪڍندڙ پيپلز پارٽيءَ نه پر نواز شريف جي حڪومت آهي. هڪ سوال جي جواب ۾ هن چيو ته پيپلز پارٽيءَ پرويز مشرف سان ڪنهن به اين آر او جو معاهدو نه ڪيو هو جيڪڏهن معاهدي جي صحيحن سان ڪنهن وٽ ثبوت آهن ته سامهون آڻي. هن چيو ته اين آر او پيپلز پارٽيءَ کي فائدو ڏيڻ لاءِ نه پر ڪنهن ٻين کي فائدو ڏيڻ لاءِ آندو ويو هو.

 

سنڌ اسيمبلي ۾ ڪي ڊي اي جي بحالي، سنڌ فئڪٽريز ترميمي بل ۽ سنڌ ٽرمس آف ايمپلائمينٽ بل اڪثريت راءِ سان منظور

ڪراچي (اسٽاف رپورٽر) سنڌ اسيمبلي ۾ ڪي ڊي اي جي بحالي، سنڌ فئڪٽريز ترميمي بل ۽ سنڌ ٽرمس آف ايمپلائمينٽ بل اڪثريت راءِ سان منظور ڪيا ويا آهن، متحده ميمبرز التوا واري رٿ پيش ڪرڻ جي اجازت نه   ملڻ ۽ ايم ڪيو ايم  جي ڊپٽي ڪنوينر شاهد پاشا جي گرفتاري خلاف سخت حتجاج ڪندي ٻه ڀيرا ايوان مان علامتي واڪ آئوٽ ڪيو. سنڌ اسيمبلي جو اجلاس اسپيڪر آعا سراج دراني جي صدارت هيٺ ٿيو، جنهن دوران تعليم ۽ پارلياماني معاملن واري وزير نثار کهڙي ڪي ڊي اي جي بحالي، سنڌ فئڪٽريز ترميمي بل ۽ سنڌ ٽرمز آف ايمپلائمينٽ بل پيش ڪيا، جيڪي  اڪثريت راءِ سان منظور ڪيا ويا. متحده جي سيد سردار احمد ڪي ڊي اي جي بحالي واري بل ۾ ڪي ڊي اي جو سربراهه ڪراچي جي ميئر کي  بڻائڻ واري ترميم پيش ڪئي، جيڪا رد ڪئي وئي. متحده ميمبرز ڊپٽي ڪنوينر شاهد پاشا جي گرفتاري ۽ ڪراچي ۾ عطائي ڊاڪٽرن خلاف ڪارروائي لاءِ التوا واري رٿ پيش ڪرڻ جي اجازت نه ملڻ تي سخت احتجاج ڪندي ٻه ڀيرا ايوان مان علامتي واڪ آئوٽ ڪيو. متحده ميمبرز سخت نعريبازي ڪندي اسپيڪر جي روسٽرم آڏو احتجاج ڪندا رهيا، جنهن دوران ايجنڊا جون ڪاپيون به ڦاڙيون ويون. اجلاس ۾ بل تي بحث دوران صوبائي وزير نثار کهڙو جذبات ۾ آئين کي ايان چئي ويو. اجلاس دوران ن ليگ ايم پي اي سورٺ ٿيٻو تيل جي قيمتن ۾ واڌ کانپوءِ ڀاڙا نه گهٽائڻ بابت ڌيان ڇڪايو نوٽيس  پيش ڪيو، جنهن تي ٽرانسپورٽ واري وزير ممتاز جکراڻي چيو ته تيل جي قيمتن ۾ لاٿ کانپوءِ انٽرسٽي ٽرانسپورٽ جي ڀاڙن ۾ 8 سيڪڙو ۽ اسڪول وينز جي ڀاڙن ۾ 10 سيڪڙو گهٽتائي ڪئي وئي آهي. هن چيو ته ٽرانسپورٽ آفيسرز وٽ اختيار نه هئڻ سبب فيصلن تي عملدرآمد ڪرائڻ ۾ ڏکيائي پيش اچي رهي آهي پر اهڙي فيصلي تي عملدرآمد لاءِ ڪمشنرز ۽ ڊي سيز کي ليٽر لکيا ويا آهن. سنڌ اسيمبلي ۾ مختلف معاملن تي بحث جاري هو ته اجلاس جي ڪارروائي سڀاڻي تائين ملتوي ڪئي.

 

پاڪستان ۾ رهندڙ هر شهري کي برابري جا حق حاصل آهن: پرويز رشيد

اسلام آباد (بيورو) پرويز رشيد چيو آهي ته پاڪستان ۾ رهندڙ هر شهري کي برابري جا حق حاصل آهن. غربت جي خاتمي لاءِ پاڙيسري ملڪن سان بهترين لاڳاپا قائم ڪيا ويندا. اسلام آباد ۾ تقريب کي خطاب ڪرڻ کانپوءِ ميڊيا سان ڳالهائيندي پرويز رشيد چيو ته هو پاڪستانين ۾ فرق کي تسليم نٿا ڪن. هن چيو ته دهشتگردي کي ختم ڪرڻ لاءِ آفيسرن ۽ جوانن وڏيون قربانيون ڏنيون، دنيا به سندن ڪوششن کي واکاڻيو آهي. وفاقي وزير جو چوڻ هو ته ملڪ ۾ دهشتگردي ۽ توانائي بحران ۾ گهٽتائي ٿي آهي، ايندڙ ڏينهن ۾ توانائي بحران ۾ وڌيڪ گهٽتائي ٿيندي. سندس چوڻ هو ته ملڪي ترقي ۾ عورتن جو وڏو ڪردار آهي، مٿن تشدد روڪڻ لاءِ حڪومت قانونسازي ڪئي آهي. پرويز رشيد جو چوڻ هو ته عورتن کي بااختيار بڻائڻ لاءِ حڪومت قانون متعارف ڪرايا آهن، نياڻين ڀارت کان ميچ کٽي پٽن جا ڏک گهٽ ڪيا.

 

قانون سازي ان وقت ڪئي پئي وڃي جڏهن آئين ٽوڙيندڙ کي با عزت بري ڪري ٻاهر موڪليو ويو: خورشيد شاهه

اسلام آباد – 21 مارچ (اي پي پي) قومي اسيمبلي ۾ مخالف ڌر اڳواڻ سيد خورشيد احمد شاهه چيو آهي ته اجلاس طلب ڪرڻ جي حوالي سان سينيٽ چيئرمين جي رولنگ جي حوالي سان سوچ ويچار سان ڪو حل ڪڍڻ گهرجي، جنرل (ر) پرويز مشرف جي پرڏيهي ملڪ روانگي افسوسناڪ آهي. سومر ڏينهن پارليامينٽ جي گڏيل اجلاس دوران مخالف ڌر اڳواڻ سيد خورشيد احمد شاهه چيو ته اسان کي حڪومت جي نيت تي ڪو شڪ نه آهي، هن چيو ته اجلاس طلب ڪرڻ جي حوالي سان سينيٽ چيئرمين جي رولنگ جي حوالي سان سوچ ويچار سان ڪو حل ڪڍڻ گهرجي. هن اڳوڻي صدر پرويز مشرف جي پرڏيهي ملڪ روانگي جي حوالي سان حڪومت کي تنقيد جو نشانو بڻايو. مخالف ڌر اڳواڻ چيو ته پرويز مشرف هڪ چونڊيل وزيراعظم کي برطرف ڪري گرفتار ڪيو ۽ سندس خاندان کي مسئلن جي ور چاڙهيو ويو، وزيراعظم بجا طور آئين جي آرٽيڪل 6 تحت ڪيس هلائڻ جي حوالي سان هن ايوان کي اعتماد ۾ ورتو هو پر هاڻي ان کي ٻاهر وڃڻ جي اجازت ڏني وئي. هن وزيراعظم محمد نواز شريف جي قومي اسيمبلي کي خطاب به پڙهي ٻڌايو ۽ چيو ته اسان هي چيو هو ته ان آئين جو تحفظ پارليامينٽ ڪندي. اسان تسليم ڪريون ٿا ته پيپلزپارٽي جي دور ۾ پرويز مشرف چار ڀيرا ٻاهر ويو اسان ڪمزور ماڻهو هئاسين، هن چيو ته بيان ڏيڻ ۽ تنقيد ڪرڻ آسان آهي، پرويز مشرف آئين ٽوڙيو، ججن کي گهرن ۾ نظر بند ڪيو، هي اسان ناهي چيو هي حڪومتي بيان آهي، اسان هي چيو هو ته پرويز مشرف سميت سڀني ماڻهن جي خلاف ڪارروائي ڪئي وڃي، حڪومت پارليامينٽ کي اعتماد ۾ وٺڻ کانسواءِ فيصلو ڪيو.

 

مشرف ٽئين اين آر او تحت پرڏيهه ويو، حڪومت شرمندگي لڪائڻ لاءِ غلط بياني پئي ڪري: چانڊيو

ڪراچي (اسٽاف رپورٽر) سڌسماءَ بابت وڏي وزير جي صلاحڪار مولابخش چانڊيو چيو آهي ته پرويز مشرف ٽئين اين آر او تحت پرڏيهه ويو، حڪومت شرمندگي لڪائڻ لاءِ غلط بياني ڪري رهي آهي. سنڌ اسيمبلي آڏو مولابخش چانڊيو ميڊيا سان ڳالهائيندي چيو ته هر ڪمال کي زوال به ايندو آهي، متحده سربراهه چوندو هو ته مصطفيٰ ڪمال جهڙو نه ميئر آيو آهي نه ايندو. مولابخش چانڊيو چوڌري نثار سان مخاطب ٿيندي چيو ته چوڌري صاحب سڀ کان پهريون اين آر او اوهان جي حڪومت ڪيو هو، انڪري وفاقي حڪومت کي تسليم ڪرڻ گهرجي ته پرويز مشرف کي اجازت ڏئي کانئن غلطي ٿي آهي. مولابخش چانڊيو سوال جي جواب ۾ چيو ته ايان علي جي ڏوهه جي نوعيت پرويز مشرف جي ڏوهن کان وڌيڪ نه آهي، نه ئي کيس ايان علي سان ڪا دلچسپي آهي، ان بابت ذڪر ڀوڳ ۾ ئي ڪندو آهيان. مولابخش چانڊيو چيو ته حڪومت جي نااهلي سبب اپوزيشن متحد ٿي رهي آهي ۽ مستقل ۾ وفاقي حڪومت لاءِ مشڪلاتون پيدا ٿينديون.

 

ترقياتي فنڊن جي حوالي سان ڪيترن ئي کاتن جي ڪارڪردگي بهتر ناهي: وڏو وزير جو اعتراف

ڪراچي (اي پي پي) سنڌ جي وڏي وزير سيد قائم علي شاهه چيو آهي ته سندس حڪومت  بنا ڪنهن سماجي ۽ سياسي فرق جي صوبي جي عوام جي بهتري، انفراسٽرڪچر جي ترقي ۽ ماڻهن کي وڌ کان وڌ روزگار جي فراهمي جي خواهشمند آهي پر مون کي افسوس سان چوڻو ٿو پوي ته ترقياتي فنڊز جي حوالي سان ڪيترن ئي کاتن جي ڪارڪردگي سٺي نه آهي جيڪا ڪنهن به صورت ۾ قابل قبول نه آهي. هن اها ڳالهه سومر ڏينهن نيو سنڌ سيڪريٽريٽ ۾ انتظامي کاتن جي سربراهن ۽ سيڪريٽريز جي اجلاس جي صدارت ڪندي ڪئي. اجلاس ۾ چيف سيڪريٽري سنڌ محمد صديق ميمڻ، آءِ جي سنڌ پوليس اي ڊي خواجه، وڏي وزير جو پرنسپل سيڪريٽري علم الدين بلو، ايڊيشنل چيف سيڪريٽري (ترقيات) محمد وسيم، سمورا صوبائي سيڪريٽريز، ڪمشنرز ۽ ٻين لاڳاپيل سينئر آفيسرن شرڪت ڪئي. ايڊيشنل چيف سيڪريٽري (ترقيات) محمد وسيم پريزنٽيشن ڏيندي چيو ته صوبائي حڪومت ترقياتي ڪمن لاءِ مجموعي طور تي 213.649 بلين رپيا رکيا هئا جنهن مان 124 بلين رپيا صوبائي اي ڊي پي، 20 بلين رپيا ضلعي اي ڊي پي، وائيبلٽي گيپ فنڊ لاءِ 15 بلين رپيا، پرڏيهي فنڊ تحت منصوبن لاءِ 26.985 بلين رپيا ۽ وفاقي پي ايس ڊي پي تحت 9.664 بلين رپيا شامل آهن. صوبائي اي ڊي پي جا تفصيل ٻڌائيندي محمد وسيم چيو ته 1762 جاري اسڪيمن لاءِ 106.184 بلين رپيا رکيا ويا ۽ 590 نئين اسڪيمن لاءِ 35.816 بلين رپيا رکيا ويا هئا. هن چيو ته ناڻي کاتي مجموعي طور تي مختص ڪيل 142 بلين رپين جي مقابلي ۾ 78.102 بلين رپيا جاري ڪيا جڏهن ته کاتن 43.401 بلين رپيا استعمال ڪيا. اهڙي طرح جاري ڪيل فنڊن جي فيبروري 2016ع تائين جي استعمال جو سراسري طور 56 سيڪڙو بڻجي ٿي. هن چيو ته سماجي ڀلائي کاتي کي جاري ڪيل 51.997 ملين رپين مان صرف 4.32 ملين رپيا استعمال ڪيا ويا جيڪو اهڙي ريت جاري ڪيل فنڊن جو 8 سيڪڙو بڻجي ٿو. ٽرانسپورٽ کاتي جاري ڪيل 595.123 ملين رپين مان 184.25 ملين رپيا استعمال ڪيا جيڪي جاري ڪيل فنڊن جو 31 سيڪڙو بڻجي ٿو. بهبود آبادي کاتي جاري ڪيل 25.25 ملين رپيا مان 6 ملين رپيا استعمال ڪيا جيڪي 25 سيڪڙو بڻجي ٿو. مائينر اينڊ منرل کاتي جاري ڪيل 27.372 ملين رپين مان 1.234 ملين رپيا خرچ ڪيا ويا جيڪي رڳو 5 سيڪڙو ٿين ٿا. محنت واري کاتي 14 سيڪڙو فنڊ استعمال ڪيا آهن. لائيو اسٽاڪ اينڊ فشريز کاتي 15 سيڪڙو فنڊز استعمال ڪيا آهن. ان تي سنڌ جي وڏي وزير سيد قائم علي شاهه ڪاوڙ جو اظهار ڪندي چيف سيڪريٽري سنڌ کي چيو ته ترقياتي اسڪيمن جي جائزي وٺڻ لاءِ اجلاس منعقد ڪيو وڃي. هن چيو ته اهي آفيسر جيڪي مالي سال جي آخر تائين پنهنجا ترقياتي فنڊ استعمال ڪرڻ ۾ ناڪام رهيا آهن، انهن کان سٺي طريقي سان پڇا ڳاڇا ٿيندي. هن چيو ته اهي آفيسر جيڪي ايمانداري ۽ محنت سان ڪم ڪري رهيا آهن ۽ جن کي عوام جي مسئلن لاءِ احساس آهي، اهي مون سان گڏ بيٺل هوندا جڏهن ته باقي ٻين آفيسرن کي تبديل ڪيو ويندو. سيد قائم علي شاهه چيو ته ايندڙ مالي سال جي بجيٽ پيش ڪرڻ ۾ رڳو ٻه مهينا رهجي ويا آهن ۽ مان اهو چاهيا ٿو ته اوهان جنگي بنيادن تي اسڪيمن وارن ڪمن جي رفتار کي تيز ڪيو. هن چيو ته فنڊ موجود آهن ۽ ترقياتي اسڪيمن تي ڪم به جاري آهن، اوهان کي رڳو ذاتي دلچسپي وٺندي ڪمن جي رفتار کي تيز ڪرڻو آهي. هن چيو ته ان جو اهو مطلب هرگز نه آهي فنڊن کي بيضابطگي سان خرچ ڪيو وڃي. فنڊن جو صحيح استعمال ۽ مناسب استعمال ٿيڻ گهرجي. هن چيو ته اينٽي ڪرپشن کاتي کي پهريان ئي هدايت ڏئي ڇڏي آهي ۽ جيڪڏهن ڪوبه فنڊن جي هيرڦير ۾ ملوث هوندو ته ان کي ڪنهن به قيمت تي معاف نه ڪيو ويندو. سنڌ جي وڏي وزير جي هڪ سوال جي جواب ۾ اي سي ايس (ترقيات) محمد وسيم چيو ته سينٽرل جيل ڪراچي جي ڪمپائونڊ ۾ 6دهشتگردي ٽوڙ ڪورٽس (اي ٽي سي) جي تعمير جلد مڪمل ٿي ويندي. ان تي وڏي وزير کين هدايت ڪئي ته 14 وڌيڪ اي ٽي سي ڪورٽس جون عمارتون اتي تعمير ڪيون وڃن. هن هدايت ڪئي ته هُو ان لاءِ ايندڙ بجيٽ ۾ منظوري وٺن پر مان اهو چاهيا ٿو ته اوهان سيڪيورٽي سبب ڪري انهن جا بنگلوز به سينٽرل جيل جي ڪمپائونڊ اندر تعمير ڪرايو. وڏي وزير چيف سيڪريٽري کي هدايت ڪئي ته مان پهريان ئي 10 وڌيڪ اي ٽي سي ڪورٽس جي قيام جو اعلان ڪري ڇڏيو آهي، ان ڪري ايندڙ بجيٽ ۾ انهيءَ لاءِ هڪ مناسب رقم رکي ويندي ته جيئن اهي اسڪيمون مڪمل ٿي سگهن. وڏي وزير چيف سيڪريٽري کي وڌيڪ هدايتون ڪيون ته هُو سمورن کاتن ۽ ذيلي ادارن ۾ خالي آسامين جو ڊيٽا گڏ ڪن ۽ لوڪل باڊيز اليڪشن جي عمل جي مڪمل ٿيندي ئي نين ڀرتين تان پابندي هٽائي ويندي. هن چيو ته هُو صوبي جي بيروزگار نوجوانن کي ميرٽ جي بنياد تي ملازمتن جي فراهمي جو خواهشمند آهي. هن چيف سيڪريٽري سنڌ تي زور ڀريو ته جاب اورينٽيڊ فني تعليم جي فروغ تي توجهه ڏنو وڃي ته جيئن هنرمند ماڻهن کي پرڏيهه موڪلي سگهجي. هن چيو ته هو مختلف سفارتڪارن سان ڳالهائي چڪو آهي ۽ هو هنرمند نوجوانن کي پنهنجي ملڪن ۾ روزگار جا موقعا فراهم ڪرڻ تي رضامند آهن. سيد قائم علي شاهه چيو ته هو هڪ ڀيرو وري ترقياتي اسڪيمن جي جائزي واري اجلاس جي صدارت ڪندو ان ڪري هن چيف سيڪريٽري کي هدايتون ڪيون آهن ته صوبائي کاتن کي چوندا رهن ته جيئن اهي پنهنجي لاڳاپيل ترقياتي اسڪيمن کي بروقت مڪمل ڪن.

 

چوڌري شجاعت جو اڳوڻي صدر سان فون تي رابطو ، ڊاڪٽرن جي اجازت بعد ڏيهه ورندس: پرويز مشرف

لاهور (بيورو) اڳوڻي صدر پرويز مشرف چيو آهي ته هـــو ڪنهن معاهدي تحت پرڏيهه نه ويو آهي، ڊاڪٽرز پاران کيس اجازت ملڻ بعد ڏيهه واپس موٽي ايندو. ق  ليگ جي صدر چوڌري شجاعت حسين اڳوڻي صدر پرويز مشرف سان فون تي رابطو ڪري سندس خيرت معاملوم ڪئي. رابطي دوران اڳوڻي صدر پرويز مشرف پرويز الاهي ۽ چوڌري شجاعت کي دبئي اچڻ جي دعوت ڏني، جنهن تي چوڌري شجاعت چيو ته دبئي وڃڻ جو فيصلو پارٽي مشاورت بعد ڪيو ويندو. اڳوڻي صدر پرويز مشرف چيو آهي ته هـــو ڪنهن معاهدي تحت پرڏيهه نه ويو آهي، ڊاڪٽرز پاران کيس اجازت ملڻ بعد ڏيهه واپس موٽي ايندو.

 

بلوچستان ۾ فورسز جي ڪارروائي، اهم ڪمانڊر سميت 12 دهشتگرد مارجي ويا

ڪوهلو (مانيٽرنگ ڊيسڪ) بلوچستان جَي علائقي ڪــوهلو ۾ سڪيورٽي فورسز جي ڪارروائي دروان پابندي مڙهيل تنظيم جي اهم ڪمانڊر سميت 12دهشتگرد مارجي ويا، ايف سي ترجمان جو چوڻ آهي ته مارجي ويل دهشتگرد فورسز تي حملن ۾ ملوث هئا. بلوچستان جي ڪوهلو واري علائقي ۾ دهشتگردن جي موجودگي واري ڳجهي اطلاع تي سڪيورٽي فورسز ڪارروائي ڪئي ته دهشتگردن فائرنگ ڪري ڏني. ايف سي ترجمان جو چوڻ آهي ته سڪيورٽي فورسز جي جوابي ڪارروائي ۾ پابندي مڙهيل تنظيم جي اهم ڪمانڊر جهان عرف جهانگير سميت 12دهشتگرد مارجي ويا آهن، جن جي قبضي مان مختلف قسمن جا هٿيار هٿ ڪيا ويا آهن. ايف سي ترجمان موجب، مارجي ويل دهشتگرد سڪيورٽي فورسز تي حملن ۾ ملوث هئا، وڌيڪ جاچ ڪئي پئي وڃي.

 

ڪرڪ ۾ لڳاتار برسات کانپوءِ گهر جي ڇت ڪرڻ سبب هڪ عورت ۽ ٻارڙيءَ سميت 4 گهر ڀاتي فوت

پشاور (مانيٽرنگ ڊيسڪ) خيبرپختونخواهه ۽ چترال جي مختلف علائقن ۾ ڪٿي تيز ته ڪٿي هلڪي برسات جو سلسلو جاري آهي، ڪرڪ ۾ لڳاتار برسات کانپوءِ گهر جي ڇت ڪرڻ سبب هڪ عورت ۽ ٻارڙيءَ سميت 4 گهر ڀاتي فوت ٿي ويا. خبيرپختونخواهه جي مختلف علائقن ۾ لڳاتار برسات کانپوءِ مواصلاتي نظام درهم برهم ٿي ويو آهي، جڏهن ته ڪيترائي علائقا پاڻي هيٺ اچي ويا آهن. هوڏانهن ڪرڪ واري علائقي ۾ لڳاتار برسات کانپوءِ گهر جي ڇت ڪرڻ سبب هڪ عورت ۽ ٻارڙي سميت 4 گهرڀاتي فوت ٿي ويا. اطلاع ملڻ تي ريسڪيو ٽيمن واقعي واري هنڌ پهچي فوتين جا لاش گهر جي ملبي هيٺان ڪڍي اسپتال منتقل ڪيا، جتان ضروري ڪارروائي بعد وارثن حوالي ڪيا ويا.