تازيون خبرون

Daily Archives: March 18, 2016

وفاقي حڪومت پرويز مشرف کي پرڏيهه وڃڻ جي اجازت ڏئي ڇڏي

اسلام آباد(بيورو) وفاقي حڪومت سپريم ڪورٽ جي فيصلي جي روشني ۾ اڳوڻي صدر پرويز مشرف کي علاج لاءِ پرڏيهه وڃڻ جي اجازت ڏئي ڇڏي، ان سلسلي ۾ وفاقي گهرو وزير چوڌري نثار علي خان اسلام آباد ۾ پريس ڪانفرنس ڪندي اهڙو اعلان ڪيو، هن چيو ته ڪجهه ماڻهن ٺيڪو کڻي ڇڏيو آهي ته حڪومت جي هر قدم تي تنقيد ڪرڻي آهي، هن چيو ته حڪومت جڏهن مشرف کي پرڏيهه وڃڻ جي اجازت ڏني تڏهن به ۽ جيڪڏهن نه ڏئي ها تڏهن ڀه خاص ٽولو مخالفت ڪري ها، سندس چوڻ هو ته آزاد ميڊيا جا تمام گهڻا فائدا آهن پر ان جو سڀ کان ناڪاري ڪردار ٽي وي چينلن تي هلندڙ ٽڪر آهن،ڇو ته ڪجهه ماڻهن پنهنجي سياست جو محور انهن ٽڪرن کي سمجهي ورتو آهي، وفاقي گهرو وزير چيو ته هڪ پارٽي طرفان لاڳيتو بيان اچي رهيا آهن ته مشرف کي پرڏيهه وڃڻ ڏنو ويو ته ملڪ ۾ طوفان اچي ويندو، اهڙا ماڻهو بيان ڏيڻ کان پهرين عوام کي اهو به ٻڌائين ته انهن پنهنجي 5 سالن جي حڪومت ۾ ان ئي مشرف کي گارڊ آف آنر ڏئي رخصت ڪيو ۽ ان کان رليف جو مطالبو ڪيو، جڏهن ته مٿس ان مهل به بينظير جي قتل جو الزام هو پر تڏهن توهان کيس آزاد نموني گهمڻ ڦرڻ جي اجازت ڏني ۽ اڄ توهان بيان ڏئي رهيا آهيو، چوڌري نثار علي خان چيو ته اڄ مشرف جو نالو اي سي ايل ۾ وجهندي 2 سال ٿي ويا آهن ۽ عدالت جي حڪم باوجود حڪومت هر فورم تي سندس نالو اي سي ايل مان ڪڍڻ جي مخالفت ڪئي، هن چيو ته اڄ مشرف جي ٻاهر وڄڻ کي ملي ڀڳت چيو وڃي ٿو، جيڪڏهن اسان کي کيس ٻاهر موڪلڻو هجي ها ته سنڌ هائيڪورٽ  جي فيصلي کانپوءِ ئي موڪلي ڇڏيون ها، وفاقي گهرو وزير چيو ته پرويز مشرف جي پرڏيهه وڃڻ سان سندس خلاف ڪيسن تي ڪو فرق نه پوندو، ڇو ته هن پڪ ڏياري آهي ته هو واپس اچي ڪيسن کي منهن ڏيندو.001

 

خيبر ايجنسي ۽ گلگت بلتستان ۾ ڪارروائي، 8 دهشتگرد مارجي ويا، 2 جوان شهيد

راولپنڊي (اين اين آءِ) سيڪيورٽي فورسز خيبرايجنسي ۽ گلگت بلتستان ۾ ڪارروائي ڪري 8 دهشتگردن کي قتل ڪري ڇڏيو جڏهن ته فائرنگ جي ڏي وٺ ۾ ٻه سيڪيورٽي اهلڪار پڻ شهيد ٿي ويا آءِ ايس پي آر مطابق خميس تي سيڪيورٽي فورسز انٽيليجنس جي بنياد تي گلگت بلتستان ۾ چلاس ويجهو گيال ڳوٺ جي تريل ماٿري ۾ ڪامياب ڪارروائي ڪري ٽن گهربل ڏوهارين کي قتل ڪري ڇڏيو. مارجي ويل دهشتگرد سول ٽرانسپورٽ سياحن ۽ سيڪيورٽي فورسز تي قراقرم هاءِ وي تي حملن ۾ ملوث هئا فائرنگ ۾ ٻه سيڪيورٽي اهلڪار به شهيد ٿي ويا. سيڪيورٽي فورسز علائقي کي گهيري هيٺان آڻي سرچ آپريشن شروع ڪري ڇڏيو هوڏانهن هڪ الڳ ڪارروائي ۾ سيڪيورٽي فورسز خيبر ايجنسي ۾ پنج دهشتگردن کي قتل ڪري ڇڏيو آءِ ايس پي آر مطابق گذريل رات دهشتگردن دره درامو دراب ۾ سيڪيورٽي فورسز جي چيڪ پوسٽ تي حملي جي ڪوشش جنهن جو بهادر سيڪيورٽي اهلڪارن منهن ٽوڙ جواب ڏيندي حملي کي ناڪام بڻائي ڇڏيو مارجي ويل دهشتگردن جا مڙهه سيڪيورٽي فورسز پنهنجي تحويل ۾ وٺي ڇڏيا جيڪي پوليٽيڪل انتظاميه جي حوالي ڪيا ويندا.

 

آئين ٽوڙي ججن کي قيد رکندڙ کي ٻاهر وڃڻ جي اجازت ڏيڻ سازش آهي: پيپلز پارٽي

اسلام آباد/ڪراچي(نمائندن وٽان) مڪ مڪه جي نتيجي ۾ مشرف کي ٻاهر وڃڻ کان ڪير به روڪي نه ٿو سگهي، نجي ٽي وي موجب مشير اطلاعات سنڌ مولابخش چانڊيو پريس ڪانفرنس ڪندي چيو آهي ته مشرف جو وڃڻ ڏوهه آهي، مشرف آئين ٽوڙيو، جج قيد ۾ رکيا، مولابخش چانڊيو چيو ته احسان جو بدلو احسان هوندو آهي ۽ ميان صاحب احسان جو بدلو چڪائي ڇڏيو آهي، هن وڌيڪ چيو ته پرويز مشرف کي ٻاهرين ملڪ وڃڻ جي اجازت ملڻ سازش آهي، اختيار ميان نواز شريف جي هٿ مان نڪرندا پيا وڃن، هن چيو ته حڪومت مشرف کي ڇڏي بعد ۾ رستا کولي ڇڏيا ۽ پرويز مشرف ۽ حڪومت ۾ مڪ مڪه ثابت ٿي رهيو آهي. ٻئي طرف پ پ چيئرمين بلاول ڀٽو زرداري چيو آهي ته اڪبر بگٽي قتل ڪيس ۾ مشرف کي بري ڪري قانون جا بکيا اڊيڙيا ويا آهن، تقريب کي خطاب ڪندي هن چيو ته منهنجي والده بينظير ڀٽو جي قتل ڪيس ۾ به مشرف نامزد آهي ۽ مشرف تي غداري ڪيس به عدالت ۾ آهي جنهن تي اڃان فيصلو ناهي ٿيو، غداري ڪيس آخري مرحلي ۾ آهي، پرويز مشرف عدالت ۾ پيش ٿيڻ کان لنوائيندو رهيو آهي، عوام سمجهي ٿي ته موجوده حڪومت مشرف کي ان جي ”احسان مندي” جو صلو ڏئي رهي اهي ۽ مشرف عدالت ۾ پيش ٿيڻ بغير ملڪ مان فرار ٿيڻ جو موقعو ڏنو پيو وڃي

 

وزيراعظم سان ليگي ايم اين ايز جي ملاقات، ترقياتي رٿائن سامهون ايندڙ رنڊڪون ختم ڪيون وڃن: نواز شريف

اسلام آباد (بيورو) وزيراعظم نواز شريف سان مسلم ليگ(ن) سان لاڳاپيل قومي اسيمبلي ميمبرن ملاقات ڪري پنهنجي تڪن جي مسئلن بابت ٻڌايو، وزيراعظم سان ملاقات ڪندڙ ايم اين ايز ۾ جاويد لطيف، حافظ عبدالڪريم ۽ ڊاڪٽر شذره منصب علي خان شامل هئا، ذريعن مطابق ايم اين ايز وزيراعظم کي پنهنجي تڪن جي مسئلن بابت ٻڌائڻ سان گڏ بنيادي ڍانچي واريون رٿائون شروع ڪرڻ جي واکاڻ ڪئي، ان موقعي تي وزيراعظم نواز شريف جو چوڻ هو ته سڀني تڪن جا اسيمبلي ميمبر عوام کي بهترين سهولتون ڏيڻ لاءِ ڪم ڪن، هن چيو ته ترقياتي رٿائن جو مقصد عوام جي خدمت ڪرڻ ۽ کين بااختيار بڻائڻ آهي، وزيراعظم هدايت ڪئي ته تڪن ۾ هندڙ ترقياتي رٿائون وقت سر پوريون ڪيون وڃن ۽ انهن سامهون ايندڙ رنڊڪن کي بنا دير ختم ڪيو وڃي.001

 

70 سيڪڙو تڪن جا نتيجا پهريون ئي ماڻهن جي ڄاڻ ۾ هوندا آهن: چيف جسٽس

اسلام آباد (بيورو) انور ظهير جمالي چيو آهي ته 70 سيڪڙو تڪن جا نتيجا پهريون ئي ماڻهن جي ڄاڻ ۾ هوندا آهن لڳي ٿو ته 25 سالن تائين ساڳيون ئي حڪومتون رهنديون. چيف جسٽس انور ظهير جمالي جي سربراهيءَ ۾ سپريم ڪورٽ جي ٽه رڪني بئنچ خانگي ميڊيڪل ڪاليج بابت ڪيس جي ٻڌڻي ڪئي. ٻڌڻي دوران جسٽس امير هاني مسلم پاڪستان ميڊيڪل اينڊ ڊينٽل ڪائونسل جي وڪيل کان پڇاڻو ڪيو ته انسپيڪشن کانسواءِ ڪنهن کي ڪئين يونيورسٽي ٺاهڻ جي اجازت ڏئي سگهجي ٿي؟ پي ايم ڊي سي جي وڪيل چيو ته وفاقي سرڪار جي چوڻ تي ڪيترائي آرڊر جاري ڪيا ويندا آهن، سندن بدقسمتي آهي ته حڪومت پنجن سالن ۾ پي ايم ڊي سي جو پنجون آرڊيننس جاري ڪيو آهي. جسٽس امير هاني مسلم رمارڪس ڏنا ته وفاقي سرڪار ته چاهين هر هنڌ سندن حڪومت هلي. ٻڌڻي دوران چيف جسٽس رمارڪس ڏيندي چيو ته حڪمرانن کي پاڻ ئي ووٽ ڏئي آندو ويندو آهي،70 سيڪڙو نتيجن جي اڳ ۾ ئي هوندي آهي. هن چيو ته ڀاڙي جي عمارتن ۾ ميڊيڪل ڪاليج قائم ٿيل آهن، انسپيڪشن کان سواءِ ڪاليج قائم ڪرڻ جي اجازت ڏيندڙن خلاف ڪارروائي ٿيڻ گهرجي؟ عدالت پي ايم ڊي سي کي ڪاليج انسپيڪشن بابت رپورٽ ٻن هفتن اندر پيش ڪرڻ جو حڪم ڏيندي ٻڌڻي ملتوي ڪري ڇڏي.

 

آرمي چيف سان يورپي يونين جي خاص نمائندي جي ملاقات، علائقائي سيڪيورٽي صورتحال تي ڳالهيون

راولپنڊي (اين اين آءِ) چيف آف آرمي اسٽاف جنرل راحيل شريف سان يورپي يونين جي خاص نمائندي ۽ افغانستان لاءِ يورپي يونين جي وفد جي سربراهه ايبيسٽر فرانز مائيڪل ميلي بن خميس تي ملاقات ڪئي ۽ علائقائي سيڪيورٽي صورتحال تي ڳالهيون ڪيون آءِ ايس پي آر مطابق يورپي يونين جي نمائندي آرمي چيف سان ملاقات دوران آپريشن ضرب عضب جي ڪاميابين ۽ علائقائي اسحقام لاءِ پاڪستان جي ڪوششن کي واکاڻيو.

 

وزيراعظم 31 مارچ تي نيويارڪ وڃي رهيو آهي، اميد ته اتي پاڪ ڀارت وزيراعظمن جي ملاقات ٿيندي: سراج عزيز

کٽمنڊو(م.ڊ) سرتاج عزيز، ڀارتي پرڏيهي وزير سشما سوراج سان ملاقات ڪري سارڪ ڪانفرنس ۾ وزيراعظم نريندر موديءَ کي شرڪت جي دعوت ڏني نيپال جي شهر پوکارا ۾ ٿيل ملاقات دوران پٺاڻ ڪوٽ واقعي جي جاچ ۽ خطي جي صورتحال سميت مختلف معاملن تي ڳالهيون ڪيون ويون.ان موقعي تي سرتاج عزيز، سشما سوراج کي وزيراعظم ميان نوازشريف طرفان پنهنجي ڀارتي هم منصب کي سارڪ ڪانفرنس ۾ شرڪت جو دعوت نامو به ڏنو.سرتاج عزيز، نيپال، ڀوٽان ۽ مالديپ کي به هلندڙ سال پاڪستان ۾ ٿيندڙ سارڪ ڪافرنس ۾ شرڪت جي دعوت ڏني.ملاقات کانپوءِ گڏيل پريس ڪانفرنس ڪندي سرتاج عزيز چيو ته سشما سوراج سان خوشگوار ماحول ۾ ملاقات ٿي.هن چيو ته ملاقات دوران پاڪ ڀات لاڳاپن سميت مختلف معاملن تي ڳالهيون ڪيون ويون، نئين اڳڀرائيءَ جا هاڪاري نتيجا نڪرندا.سرتاج عزيز چيو ته وزيراعظم ميان نوازشريف 31 مارچ تي نيويارڪ وڃي رهيو آهي، اميد ته اتي پاڪ ڀارت وزيراعظمن جي ملاقات ٿيندي.سشما سوراج جو چوڻ هو ته سرتاج عزيز سان ملاقات ۾ پٺاڻ ڪوٽ واقعي جي جاچ تي خيالن جي ڏي وٺ ٿي.هن چيو ته پٺاڻ ڪوٽ واقعي سبب ٻنهي ملڪن جي قيادت وچ ۾ رابطن ۾ دير ٿي آهي.سشما سوراج چيو ته واقعي جي جاچ لاءِ پاڪستان جي جاچ ٽيم 27 مارچ تي ڀارت پهچندي ۽ 28 مارچ کان پنهنجو ڪم شروع ڪندي.

 

ڪالاباغ ڊيم ڪنهن به صورت نه ٺهڻ گهرجي، تڪراري رٿا سان سنڌ بنجر بڻجي ويندي: قائم علي شاهه

ڪراچي (اسٽاف رپورٽر) سنڌ صوبي مان گم ٿيل 32 ماڻهن جي ڳولا لاءِ ٻين صوبن سان رابطو ڪرڻ جو فيصلو ڪيو آهي، گهرو سيڪريٽري جو چوڻ آهي ته گم ٿيلن جي جاچ لاءِ جي آءِ ٽي جوڙي وئي آهي. ڪراچي ۾ گهرو سيڪريٽري جي سربراهيءَ ۾ سنڌ مان گم ٿيل 32 ماڻهن بابت اجلاس ٿيو. اجلاس ۾ لاڙڪاڻي، حيدرآباد، شهيد بينظير آباد، سکر، ميرپورخاص ۽ ڊي آءِ جيز سميت حساس ادارن جي آفيسرن شرڪت ڪئي. اجلاس ۾ گم ٿيل ماڻهن جي ڳولا لاءِ ٻين صوبن سان رابطي جو فيصلو ڪيو ويو. ان موقعي تي ڳالهائيندي گهرو سيڪريٽريءَ جو چوڻ هو ته صوبائي گهرو سيڪريٽري چيو آهي ته سنڌ مان گم ٿيل 32 ڄڻن مان خالد شميم جو پتو پيو آهي، جيڪو سرڪاري حراست ۾ آهي. هن چيو ته گم ٿيل ماڻهن جي ڳولا لاءِ ٻين صوبن سان رابطو ڪيو ويندو، جڏهن ته جي آءِ ٽي پڻ جوڙي وئي آهي. اجلاس دوران پوليس رپورٽ پيش ڪندي ٻڌايو ته گم ٿيل ماڻهو وٽن نه آهن. ٻئي طرف ڪالاباغ ڊيم ڪنهن به صورت نه ٺهڻ گهرجي، ڇاڪاڻ ته ان رٿا سان سنڌ بنجر بڻجي ويندي. اسلام آباد ۾ سنڌ هائوس تي ميڊيا سان ڳالهائيندي وڏي وزير چيو ته سنڌ جا ماڻهو وزيراعظم جي گهوٽڪي واري اعلان جا منتظر آهن. سندس چوڻ هو ته ڪالاباغ ڊيم تڪراري رٿا آهي، جنهن کي ٽي صوبا رد ڪري چڪا آهن. هن چيو ته فلڊ ڪنٽرول کاتو وفاق جي ماتحت آهي، خرچ به اهو برداشت ڪري. سندس چوڻ هوته مصطفيٰ ڪمال جي الزام ايم ڪيو ايم جو اندروني معاملو آهي، انيس قائمخاني هجي يا ٻيو ڪو، ڪنهن ڪيس ۾ ملوث هجي ته گرفتار ٿيڻ گهرجي.

 

مورو ۾ هڪ سال اڳ پسند جو پرڻو ڪندڙ جوڙو قتل، سندس نياڻي اغوا

مورو(رپورٽر) مورو ڀرسان پراڻا جتوئي ۾ ھڪ سال اڳ پسند جو پرڻو ڪندڙ جوڙو زال مڙس قتل معصوم ننيگري اغوا جوابدار فرار خبر موجب ھڪ سال اڳ پسند جو پرڻو ڪندڙ نوجوان رورل ھيلٿ سينٽر نوان جتوئي جي ڊسپينسر اميد علي قمبراڻي ۽ ھيلٿ ورڪر ناري فرزانا مستوئي پنھنجي معصوم ننيگري دلڪش سان گڏ پنھنجي ڳوٺ پراڻا جتوئي کان ڪيري ۾ نوان جتوئي ھيلٿ سينٽر اچي رھيا ھئا ته نوان جتوئي جي شيخ محله وٽ ڪار ۾ سوار چار ھٿيار بندن ڪيري کي روڪي ھٿيار بندن گوليون ھڻي زال مڙس اميد علي قمبراڻي ۽ فرزانا مستوئي کي قتل ڪري فرار ٿي ويا ۽ سندن ستن سالن جي ڌي معصوم ننيگري دلڪش کي اغوا ڪري ويا ۽ جوابدار ڪار ۾ سوار ٿي فرار ٿي ويا قتل کان پوءِ نوان جتوئي ۽ آس پاس جي علائقي ۾ خوف حراس ڇائنجي ويو خبر پوڻ تي سندس وارث ۽ وڏي تعداد ۾ ماڻھو قتل واري ھنڌ پھتا اطلاع ملڻ تي حد جي نوان جتوئي پوليس پھتي زال مڙس جي لاشن کي نوان جتوئي رورل ھيلٿ سينٽر پھچايو بعد ۾ پوسٽ مارٽم ڪرڻ لاءِ پوليس لاش کڻائي تعلقه اسپتال مورو آندا جتي پوسٽ مارٽم ڪرڻ بعد لاش وارثن جي حوالي ڪيا ويا لاش سندس ڳوٺ پراڻا جتوئي گھر پھچڻ تي ڪھرام مچي ويو ياد رھي ته ناري فرزانا ذات جي مستوئي آھي ۽ ھن جي پھريان به شادي ٿيل ھئي ان وقت ٻنھي زال مڙسن جي سيٽنگ نه ٿيڻ ڪري ھن نوجوان اميد علي قمبراڻي سان پسند جي شادي ڪئي ھئي فرزانا مستوئي کي اڳين مڙس مان ھڪ ستن سالن جي نياڻي دلڪش پڻ آھي جنھن کي قتل ڪندڙ جوابدار اغوا ڪري ويا آھن نوجوان اميد علي قمبراڻي اصل پراڻا جتوئي جو رھواسي آھي ۽ ناري فرزانا مستوئي اصل ھتان  جي رھواسڻ آھي ۽ ھن جو گھر نوابشاھ پڻ آھي ناري جا عزيز نوان جتوئي پڻ ويٺل آھن آخري اطلاعن تائين ڪو به ڪيس وغيره داخل نه ٿيو آھي ھن شادي مان ناري فرزانا جا مائيٽ رازي نه ھئا

 

ٿر ۾ وڌيڪ 6 ٻارڙا حياتيون وڃائي ويٺا، هلندڙ مهيني فوتگين جو انگ 124 ٿي ويو

مٺي (اين اين آءِ) ٿر ۾ غذائي کوٽ سبب وڌيڪ 6 ٻارڙا پنهنجون حياتيون وڃائي ويٺا جنهن کان پوءِ هلندڙ مهيني فوتي ٻارڙن جو انگ 124 ٿي ويو آهي اطلاعن مطابق غذائي کوٽ ۽ صحت جون بنيادي سهولتون نه هئڻ سبب سنڌ جي ضلعي ٿر ۾ وڌيڪ 6 ٻارڙا فوت ٿي ويا فوتي ٻارڙن ۾ مٺي جو هڪ ورهين جو سمجهو ڀيل، هڪ هڪ ڏينهن جو عبدالحميد ۽ عمرگل، ڏيپلو جي چئن ڏينهن جي نازيه ڳوٺ ارنيارو جو ستن مهينن جو پرڪاش ڪمار ۽ ٽن ڏينهن جي ٻارڙي شامل آهي واضح رهي ته ٿرپارڪر ضلعي ۾ هلندڙ مهيني هن وقت تائين 124 جڏهن ته هلندڙ سال 224 ٻارڙا غذائي کوٽ سبب پنهجون حياتيون وڃائي چڪا آهن جڏهن ته سول اسپتال مٺي سميت ٿر جي مختلف اسپتالن ۾ 200 کان وڌيڪ ٻارڙا علاج هيٺ آهن.