تازيون خبرون

Daily Archives: March 16, 2016

باغي ۾ ايڪشن منظر ڪندي ڌاڍو مزو آيو، اها منهنجي يادگار فلم رهندي: شرڌا ڪپور

ممبئي(شوبز نيوز) بالي ووڊ اداڪارا شرڌا ڪپور چيو آهي ته جڏهن کيس فلم باغي جي آڇ ٿي ته کيس اميد هئي ته ان ۾ کيس ايڪشن منظر به ڏنا ويندا،مونکي خوشي آهي ته اهڙو موقعو ملي ويو ته جيئن مان ڪجهه نئون ڪري سگهان. هڪ انٽرويو ۾ 27 ورهين جي شرڌا ڪپور چيو ته مان ايڪشن منظر فلمائڻ وقت تمام گهڻو جوش ۾ هيس ۽ جڏهن اهڙِي ايڪشن فلم ۾ ٽايگر شيروف توهان سان گڏ هجي ته ان کان ايڪشن منظرن جا گر سکڻ لازمي ٿي پوي ٿو، بهرحال مونکي ايڪشن منظر ڪندي تمام گهڻو مزو آيو، سندس چوڻ هو ته باغي ۾ هوءَ هڪ نئين روپ ۾ نظر ايندي ۽ اميد اهي ته ڏسندڙن کي اهو پسند به ايندو، هن چيو ته ايڪشن وارو تجربو زبردست رهيو، مان ان فلم ذريعي ڪافي نيون شيون سکيون ۽ ان فلم ۾ ڪم ڪرڻ هن لاءِ سدائين يادگار رهندو،  شرڌا ڪپور پنهنجي هيرو ٽائيگر جي به ساراهه ڪئي ۽ چيو ته ان جهڙو ڪير ٿي ئي نه ٿو سگهي، مان کيس اسڪول جي زماني کان سڃاڻان، جڏهن هو باسڪيٽ بال کيڏندو هو.001

 

سيف علي جي ڪري ئي ڪرينا ڪپور سدائين مطمئن ڏسڻ ۾ اچي ٿي: ڪنگنا رناوت

ممبئي (شوبز نيوز) بالي ووڊ اداڪارا ڪنگنا رناوت چيو آهي ته سيف علي خان بهترين اداڪار آهي، جڏهن ته ڪرينا ڪپور جي سڪون واري زندگي پويان به سيف جو ئي هٿ آهي، هڪ انٽرويو ۾ ڪنگنا رناوت چيو ته سيف علي خان ڪو عام اداڪار ناهي پر هو هڪ شاندار ۽ همت وارو اداڪار آهي، سندس چوڻ هو ته هوءَ پنهنجي ايندڙ فلم رنگون ۾ سيف علي خان سان ڪم ڪري رهي آهي ۽ ساڻس گڏ ڪم ڪري تمام گهڻو مزو اچي رهيو آهي. سندس چوڻ هو ته سيف علي خان جي ڪري ئي ڪرينا ڪپور جي منهن تي سدائين اطمينان  ڏسڻ ۾ ايندو آهي.001

 

شاهد آفريدي کي بخار ٿي پيو، ٽيم سان گڏ پريڪٽس به نه ڪري سگهيو

ڪولڪتا (اسپورٽس نيوز) قومي ٽي ٽوئنٽي ڪرڪيٽ ٽيم جي ڪپتان شاهد آفريدي کي بخار ٿي پيو آهي، جنهن ڪري هن ٽريننگ ۾ حصو نه ورتو، ميڊيا رپورٽن مطابق قومي ڪرڪيٽ ٽيم ٽي ٽوئنٽي ورلڊ ڪپ ۾ اڄ پنهنجي پهرين ميچ بنگلاديش خلاف کيڏندي پر ان کان پهرين ئي شاهد آفريدي کي بخار ٿي پيو، جنهن ڪري هن اڄ ٽيم جي پريڪٽس ۾ به حصو نه ورتو، جڏهن ته ٻين رانديگرن بالنگ، بيٽنگ ۽ فيلڊنگ جي ڀرپور پريڪٽس ڪئي، قومي ٽيم جي ذريعن مطابق شاهد آفريدي جلد صحتمند ٿيڻ لاءِ پريڪٽس بدران آرام ڪيو ۽ اميد آهي ته هو سڀاڻي تائين ٺيڪ ٿي بنگلاديش خلاف ايڪشن ۾ نظر ايندو.

 

15 هين قومي وومينز نيٽ بال چيمپيئن شپ 12 اپريل کان شروع ٿيندي

اسلام آباد (اسپورٽس نيوز) پاڪستان نيٽ بال فيڊريشن (پي اين ايف) جي انتظام هيٺ 15 هين قومي نيٽ بال چيمپيئن شپ 12 اپريل کان پاڪستان اسپورٽس ڪمپليڪس اسلام آباد جي حميدي هال ۾ شروع ٿيندي. پاڪستان نيٽ بال فيڊريشن جي صدر مدثر آرائين ٻڌايو ته چيمپيئن شپ ۾ سڄي ملڪ مان 17 ٽيمون شرڪت ڪنديون. جن ۾ پاڪستان آرمي، پاڪستان واپڊا، پاڪستان پوليس، پاڪستان ايئر فورس، پاڪستان نيوي، پاڪستان ريلوي، هائر ايجوڪيشن ڪميشن، پنجاب، خيبر پختونخواه، سنڌ، بلوچستان، اسلام آباد، فاٽا، آزاد ڄمون ۽ ڪشمير، لاهور گرائمز اسڪول لمز يونيورسٽي ۽ گلگت بلتستان شامل آهن. چيمپيئن شپ ۾ سنڌ جي ٽيم پنهنجي ٽائيٽل جو دفاع ڪندي. مينيجرز ميٽنگ 11 اپريل تي ٿيندي ۽ چيمپيئن شپ 17 اپريل تائين جاري رهندي.

 

عورت جي مجبوري: نسرين چانڊيو (اڳوڻي ايم پي اي)

اسان جي ملڪ ۾ عورت سان انسانيت سوز ظلم ٿيندا رهيا آهن، هتي عورت جي حرمت، وقار ۽ سلامتي کي مرد پنهنجي ذاتي مفادن جي حاصلات جي لاءِ غلط رسم ۽ رواج تي قائم پنهنجي عزت، غيرت جو سهارو وٺي پامال ڪندو هلندو رهيو آهي، اسان جي معاشري ۾ عورت جي زندگي جي حق کي مردن پنهنجي بڻايل رسم ۽ رواج جي فرمابرداري سان ڳنڍيو آهي ڇو ته مرد اڄ تائين عورت جي ماءُ، ڀيڻ، ڌيءُ ۽ ننهن وٺي پاڪ رشتن جي اهميت تسليم ئي ناهي ڪئي.

جيڪڏهن عورت ظلم ۽ زيادتي برداشت ڪري ته به عذاب ۾ ۽ مزاحمت ڪري ته ٻٽي عذاب ۾ اچي ويندي آهي، ان لاءِ اڪثر عورتون پاڻ سان ٿيندڙ ظلم ۽ زيادتي کي قسمت جو لکيو سمجهي قبول ڪري وٺنديون آهن، هتي هڪ عجيب رويو آهي ته ٿيندڙ زيادتي تي احتجاج ڪندڙ ڇوڪري کي سٺو ناهي سمجهيو ويندو ۽ نه ئي سٺي نگاهه سان ڏٺو ويندو آهي، ته پوءِ هو ڇو احتجاج ڪري؟

عورت کي جنسي طور تي حراسان ڪرڻ وارا تمام گهڻا واقعا ظاهر نه ٿيڻ جا گهڻا سبب آهن. اسان جي سماج جا اهڙا رويا آهن جو عورت پنهنجي پاڻ سان ٿيندڙ ظلم کي ظاهر نٿي ڪري ۽ نقصان کڻندي رهي ٿي، جيڪڏهن پنهنجي مٽن مائٽن ۽ والدين کي ٻڌائي ته کيس پڙهائي يا نوڪري ڇڏي گهر ۾ ويهڻ جو چيو ويندو آهي ۽ ڪٿي ته مجبوري جي حالت ۾ پوڙهي ماءُ پيءُ ننڍي ڀائرن جي ڪفالت جي ڪري مصلحتن زيادتي کي برداشت ڪندي رهي ٿي.

جنسي حوس جو نشانو بڻجندڙ عورت دادرسي جي لاءِ پوليس وٽ وڃڻ جي لاءِ تيار ناهي هوندي ڇو ته اتي جيڪي ماڻهو ويٺل هوندا آهن اهي به ان بگهڙن کان گهٽ ناهن هوندا ۽ هو اين جي اوز سان رابطو ڪري ٿي ته هو پنهنجي پبلسٽي جي لاءِ انهن واقعن کي پرنٽ ۽ اليڪٽرانڪ ميڊيا تي ڦٽو ڪندا آهن جنهن سبب اهڙي عورت ڪروڙين ماڻهن سامهون بدنام ٿي ويندي آهي.

عورت پاڻ سان ٿيندڙ ظلم مان ڇوٽڪارو حاصل نٿي ڪري سگهي ڇو ته قانون ٺاهيندڙ قانون تي عملدرآمد ڪرائڻ وارا، قانون تحت فيصله ڏيڻ وارا ۽ قانون جي خلاف ورزي ڪرڻ وارا چار ئي مرد آهن، انهيءَ روين جي ڪري عورتن تي ظلم ڪندڙ مرد هميشه سزا کان بچي وڃن ٿا.

زرعي سماج ۾ مرد پنهنجي پاڻ کي صنعتي سماج جو سمجهي هلندو آهي پر عورت جي معاملي ۾ پنهنجي ذهن کي تبديل ڪرڻ لاءِ تيار ناهي هوندو، مرد جي بالادستي کي جڏهن ڪائي عورت چيلينج ڪندي اهي ته مرد ان جو دشمن بڻجي ويندو آهي. عورتن سان ٿيندڙ ظلم خلاف قانون سازي ۾ رڪاوٽون ۽ سبب ڪجهه هن طرح جا آهن. قومي ۽ صوبائي اسيمبلين ۾ عورتن جا حزب اقتدار ۽ حزب اختلاف جي ٻن طبقن ۾ رهڻ، پارٽي وابستگي ۽ پارٽي پاليسي واري مجبوري جو هجڻ. قانون سازي جي لاءِ اڪثريت جي ضرورت هوندي آهي جڏهن ته عورتون رڳو 33 فيصد آهن. اسيمبلين ۾ موجود مرد حضرات عورتن کي حقن جي حاصلات سان گڏ ٿيندڙ ظلمن جي خلاف قانون سازي ۾ ان جي لاءِ ساٿ ناهن ڏيندا ڇو ته ان جي عورتن تي حاڪميت واري بالادستي ختم ٿي ويندي. عورتن سان ٿيندڙ ظلمن خلاف قانون سازي ڪئي وڃي. متاثر عورتن کي قانون جي نفاذ ۽ تحفظ جو اوترو ئي حق حاصل هجي جيترو متاثر ٿيندڙ ڪنهن مرد کي حاصل آهي. ڪاروڪاري جي حوالي سان عورت جي قتل تي مجرم کي موت جي سزا ڏني وڃي ۽ گڏو گڏ ڪاروڪاري جي واقعن جو نجي فيصلو ڪندڙ سردارن جي خلاف سخت قانوني ڪارروائي به لازمي هجي ڇو ته ان سردارن جون اوطاقون ئي آهن جتي هو پاڻ غيرت جي فصل کي آبياري ڏئي رهيا هوندا آهن. عورتن سان ٿيندڙ ظلم خلاف قانون سازي جي اشد ضرورت آهي پر ان شرط تي ته قانون ڍاهيندڙ قانون تي عملدرآمد ڪرائڻ وارا ۽ قانون جي تحفظ فيصلو ڏيڻ وارن مردن سان عورتن جي برابري جي بنياد تي يا آبادي جي حوالي سان شراڪت لازمي هجي. خيبر پختونخواه، بلوچستان ۽ سنڌ جي ڪجهه علائقن ۾ عورت جي ووٽ وجهڻ تي پابندي آهي ۽ اها پابندي انهن علائقن جي عمائيدين ۽ اليڪشن ۾ حصو وٺندڙ اميدوار پاڻ لڳائيندا آهن، قانون سازي جي ذريعي عورت جي ووٽ جي استعمال جي حق کي روڪڻ خلاف قانون ۽ ڏوهه قرار ڏنو وڃي.

 

 

ڪرپشن  جي قومي ڪوڙه ۾ ورتل سماج: شفيق شاڪر

روزانو هر طرف کان ڪرپشن يعني بدديانتيء جي خاتمي جي لاء  بلند صدائون ٻڌڻ لاء ملن ٿيون. اهي به شڪايتن جا دفتر سامهون اچن ٿا ته هڪ خاص طبقو يعني حڪمران، وزير،مشير ۽ ڪامورا ئي ملڪ ۾ هر قسم جي ڪرپشن ۽ لاقانونيت جا ذميدار آهن. مٿان وري اهي مطالبا به سامهون اچن ٿا ته انهن جو بي رحم احتساب هئڻ گھرجي. جڏهن سوال ڪجي ٿو ته جڏهن سڄي آڪاھ ئي بي ايمان ۽ بدديانت آهي ته پوء احتساب ڪير ڪري؟ ان جو  مناسب جواب احتساب جي پنهن جن سمورين خوبصورت خواهشن هئڻ باوجود ڪنهن وٽ به ڪونهي.ان جواب جي نه هئڻ جي ڪري سماج جا اهي عام ماڻهو ترت ڪجھ رياستي ادارن جا نالا کڻندي کين احتساب جي دعوت ڏيندي نظر ايندا.پر جڏهن سندن ان تجويز جي جواب ۾ اهو سوال ڪيو وڃي ٿو ته ڇا خود انهن ادارن جي اندر ڪرپشن موجود ڪانهي يا پهريائين انهن ادارن مان ڪرپشن هميشه جي لاء ختم ڪرڻ لا ڪي ٺوس قدم توهان کي ميدان ۾ نظر اچن ٿا؟ ته ان جو جواب ڏيڻ بدران اها اميد سامهون اچي ٿي ته قدرت طرفان ڪو نه ڪو ضرور ايندو جيڪو اچي انهن سڀني جو احتساب ڪندو! پهرين ڳالھ اها ته ڪنهن قدرتي احتساب جي عمل کان هر وقت پناه گھرڻ گھرجي جو تاريخ ٻڌائي ٿي ته جڏهن مڪافات عمل جي نتيجي ۾  احتساب جوڪو قدرتي هنٽرهلي ٿو ته پوء ان جي زد ۾ رڳو بدڪار ئي نه پر پرهيزگار به سٽجي وڃن ٿا.جڏهن ڪنهن هلاڪوء جي تلوار بي نيام ٿئي ٿي ته پوء ظالم ۽ مظلوم ۾ فرق نٿي ڪري.جڏهن فطرت انتقام وٺي ٿي ته پوء حڪمرانن سان گڏ رعيت به سزا کائي ٿي. اهو قدرت جو هڪ عجيب ۽ منجھيل نظام آهي جيڪوهر ظلم کان پاڪ هر طرح انصاف تي مبني هوندو آهي پر انسانن جي سمجھ ۾ نه ايندو آهي.

خاموشيء سان ظلم سهندڙ به ظالم جو حوصلو وڌائيندا رهندا آهن.بڇڙائيء تي چپ سبندڙ به بڇڙاين جي ڦهلجڻ جو سهارو بڻبا آهن.اهو ئي عوام قاتلن، چورن، دهشتگردن، ڪوڙن، ٺڳن،  ۽بدديانتن کي پاڻ ووٽ ڏيئي انهن جي هٿن ۾ طاقت جو هٿيار پڪڙائيندو آهي ۽ بعد ۾ سندن خلاف واويلابه مچائيندو آهي.اهو ئي عوام انهن بدديانتن کان غلط ڪم به وٺندو آهي ۽ نا انصافي،رشوت ۽ سفارشي ڪلچر جون دانهون به ڪندو آهي.ڪڙو سچ اهو آهي ته اسين پنهن جي جڳھ تي هڪ گڏيل بدديانتي واري عمل ۾ سڀ جا سڀ ڪنهن نه ڪنهن نموني ۽ ڪنهن نه ڪنهن حد تائين هڪ ٻئي سان شريڪ آهيون.پاڻي،بجلي ۽ گئس چوريء کان وٺي مسجدن مان جوتا چورائڻ تائين، ماپ ،تور جي کوٽ کان ٻيو نمبر جنسون وڪڻڻ تائين، کير ۾ پاڻي ملائڻ کان ويندي مدي خارج دوائون وڪڻڻ تائين،ٻين جا اخباري ڪالم چوري ڪرڻ کان وٺي فيس بڪ ۽ موبائيل تي ڪوڙيون خبرون پکيڙڻ تائين،نقل جي ذريعي امتحان پاس ڪرڻ کان ويندي ڪوڙيون ڊگريون خريد ڪرڻ تائين، مطلب ته اها ڪهڙي سماجي برائي آهي جيڪا صرف مٿئين طبقي ۾ موجود هجي ۽ عوام ۾ موجود نه هجي!

اسان جيڪو نياڻين سان ناانصافيء وارو سلوڪ ڪيون ٿا، پاڙيسرين کي ايذايون ٿا،پاڻ کان ڪمزورن جا حق غصب ڪيون ٿا،ٻارن کان جبري پورهيو ڪرايون ٿا، ظالمن جو هٿيار بڻجي ٻين تي ظلم ڪيون ٿا، ڪرپشن صرف سرڪاري پئسو ناجائزنموني کائڻ کي ئي نه چئبو آهي .پر ڪرپشن هڪ سوچ ۽ ان جي نتيجي ۾ جنم وٺندڙ مختلف روين جو نالو آهي.ان ڊاڪٽر جي باري ۾ توهان جو ڇا خيال آهي جيڪو ماڻهن جا گردا ڪڍي وڪڻي ڇڏي ٿو، ان ليبارٽري واري کي توهان ڪهڙو نالو ڏيندا جيڪو موذي مرضن جا جيوڙا انسانن جي خون ۾ شامل ڪري ٿو.ان ڪاسائي کي ڇا چوندا جيڪو ماڻهن کي مردار گوشت کارائي ٿو.انهي استاد کي ڪهڙو لقب ڏيندا جيڪو پگھار ته ٻارن کي پڙهائڻ جي کڻي ٿو پر پنهن جا ٻيا ڌنڌا ڪري ٿو.ان مدرسي جي مولويء کي ڪهڙو نالو ڏيندا جيڪو غريب کٿابين لاء مليل زڪوات ۽ چندي جي پئسن سان پنهن جو گھر ڀري ٿو.انهن اين جي او اڳواڻن کي ڇا چئبو جيڪي مصيبت ۾ ستايلن جي نالي تي ڊونيشن جمع ڪري عياشيون ڪندا آهن.انهيء پٽيوالي کي ڇا چئبو جيڪو ڪجھ روپيا وٺي لائين ۾ لڳل ماڻهن جو حق ماري ڪنهن کي پوئين در مان اندر ڇڏي ٿو ڏئي.

اهي جيڪي معصوم ٻارن کي اغوا ڪن ٿا ۽ ڀنگ  جي رقم نه ملڻ جي صورت ۾ انهن کي قتل به ڪري ڇڏين ٿا،اهي ڪهڙي سماج جو حصو آهن؟اهي جيڪي افواه  ۽ بي بنياد خبرون پکيڙي ماڻهن کي پريشان ڪن ٿا،اهي جيڪي موبائيل تي بي نظير انڪم سپورٽ ۽ ٻين انعامن جا ڪوڙا ميسيج موڪلي ماڻهن کي ڦرين ٿا،اها سڀ ڪرپشن ۽ بدديانتي ئي آهي اهي ڪي افسانا نه پر  اسان جي هن ئي سماج جون اهي اڻ وڻندڙ حقيقتون آهن جن تي اسان سوچڻ ئي نٿا چاهيون ۽ اسان مان هرڪو اهي سڀ خرابيون،بدديانتيون ۽ ناانصافيون آسانيء سان صرف ٻين جي کاتي ۾ وجھي پاڻ کي هر پاپ کان پوتر ثابت ڪرڻ جي ڪوشش ڪري ٿو..اها چوڻي صحيح آهي ته “عوام پنهن جي حڪمرانن جي نقش قدم تي هلندو آهي” پر اها چوڻي اسان کي ڇو نٿي نظر اچي ته “ جڏهن عوام ظالم بڻبو آهي ته انهن تي ظالم حڪمران مقرر ڪيا ويندا آهن.” ان حقيقت کي تسليم نه ڪري اسان هڪ اجتماعي دوکي جو شڪار بڻيل آهيون ته سڀ ڪجھ ڪنهن ڪرشمي ذريعي يا ڪجھ وقتي قدمن جي ذريعي پاڻهي درست ٿي ويندو،اها اهڙي عظيم ڀل آهي جنهن مان جيترو جلد ٻاهر نڪرجي اهو اوترو بهتر ٿيندو. پورو سماج منافقت ۽ بدديانتيء جي ڄار ۾ ڦاٿل آهي، جنهن وٽ جيترو اختيار ۽ جيتري طاقت آهي اهو اوترو ظلم ڪري رهيو آهي ۽ بديانتيء جي قومي ڏوھ ۾اسان مان هرڪو پنهن جي طاقت ۽ اختيار جي لحاظ کان اوتروئي ان ۾ شامل ۽ شريڪ آهي.نه ته اهو ڪيئن ممڪن آهي جو هڪ ديانتدار معاشري ۾ ڪو بدديانت ٽولو ايترو وقت ڪڍي وڃي!ڪنهن انصاف ڀرئي سماج ۾ هڪ ننڍڙي ظالم اقليت ماڻهن کي ايئن پنهن جي آڱرين تي نچائي سگھي! جيڪر بدديانتيء جي جنس ڪو وٺڻ وارو ئي نه هجي ته بدديانتن کي پنهن جو دوڪان آخر بند ڪرڻو پوي ٿو.ڪوڙ جا دوڪان ان ڪري سينگاريل ۽ سجايل آهن جو ڪوڙ جو سودو ڳنهندڙن جي به رش کٽڻ جو نالو ئي نٿي وٺي.دنيا ۾ معاشرا يا سماج ڪنهن جادو واري ڇڙيء جي ذريعي ڪڏهن به تبديل نه ٿيا آهن.

انقلاب جنهن شيء جو نالو آهي اهو ماڻهن جي پڪي نيت ۽ مستحڪم ارادي مان .ئي ڦٽندو آهي.  سماج جي سڄي عمارت جو جسو ئي اڏوهيء کاڌل هجي ۽ ماڻهن برائيء کي برائي سمجھڻ ئي ڇڏي ڏنو هجي ان سماج ۾ رات وچ ۾ ڪا اهڙي تبديلي اچي وڃي جو سڀ ڪجھ پنهن جي صحيح جاء تي موٽي اچي، اها اسان جي نيڪ خواهش ته ٿي سگھي ٿي پر فطرت جي اڻ ٽر اصولن مطابق ايئن ٿيندو ناهي.هر ماڻهو سماج جي عمارت جي هڪ سر آهي جيستائين هر سر مضبوط نه ٿي ٿئي، سماج ۾ منفي ڀڃ ڊاھ جو سلسلو جاري رهندو.رڳو حڪمرانن ۽ اشرافيا کي نه پر هر فرد کي پنهن جي ديانتداري  ثابت ڪرڻي پوندي.غلط ۽ صحيح جي فرق جي پابندي ڪرڻي پوندي. صرف ڏنڊي جي زور تي ڪنهن به سماج جي مجموعي روين ۾ ڪا مستقل،همه گير ۽ پائيدار تبديلي آڻي نه ٿي سگھجي.ڇو ته

“ افراد ڪي هاٿون مين هين قومون ڪي تقديرين

هر فرد   هي  ملت  ڪي  مقدر  ڪا    ستارا.”

******

 

سنڌ سرڪار جي پرڏيهين کان بيزاري

سنڌ جي وڏي وزير سيد قائم علي شاهه چيو آهي ته جيڪڏهن اسان تڪراري سياست ڪريون ها ته وفاق پنهنجو چهرو ڏيکاري پيا سگهون، پر اسان وفاق بچائڻ لاءِ ايئن نه ڪيو. سنڌ ۾ آباد ٻين صوبن جا ماڻهو سنڌ جو پاڻي ۽ ٻيا وسيلا استعمال ڪري رهيا آهن. ٻيا صوبا ان ڏس ۾ ڀاڱيواري ڪن. سنڌ ۾ رهندڙ غير قانوني پرڏيهين کي نيڪالي ڏني وڃي. ايف آءِ اي ۽ نئب جي سنڌ تي ڪاهه غير قانوني آهي. اهڙن خيالن جو اظهار هن ڪالهه سي. پي. اين. اي پاران وزير اعليٰ ۾ رکيل ويهڪ کي خطاب ڪندي ڪيو.

ميڊيا ۽ ڄاڻ جي حق جي اهميت کان ڪير به انڪار نه ٿو ڪري سگهي. آگاهي هر انسان جو بنيادي حق آهي. آگاهيءَ واري قانون  بابت اوهان جي ترميمن جي روشنيءَ ۾ اوهان جي صلاح سان نئون قانون ٺاهينداسين. هن چيو ته حڪومت ۾ اچڻ وقت پهريون سوال اهو پڇيو ويو ته  اوهان جي اوليت ڪهڙي آهي. مون چيو ته امن امان منهنجي اوليت آهي. سوات آپريشن وقت لک ڏيڍ لک ماڻهو سنڌ ۾ آيا ۽ انهن مان اڌ واپس ويا، اسان کي خدشو هو ته ضربِ عضب مهل به ايئن ٿيندو، جنهن جي ڪري اسان ڪجهه سختي ڪئي، پر ان تي به تنقيد ٿي. اسان  چوڪسي گهٽائي ته ڪجهه ڏوهاري به سنڌ ۾ آيا. پهريان اهو طئي ٿيو هو ته آپريشن سڄي ملڪ ۾ ٿيندو. سنڌ پوليس وٽ اڳ جديد هٿيار ۽ سکيا نه هئي، اسان انهن کي جديد هٿيار ۽ سکيا فراهم ڪئي. هاڻي ٽارگيٽ ڪلنگ، ڀنگ لاءِ اغوا جهڙن ڏوهن ۾ گهٽتائي آئي آهي. فوجي عدالت ڏانهن 80 ڪيس موڪليا، جن مان 5 قبول ڪيا ويا آهن. ملڪ ۾ ايمرجنسي ته ناهي پر حالتون ايمرجنسي جهڙيون آهن. ڪراچيءَ ۾ 75 سيڪڙو ڏوهه گھٽجي ويا آهن. نيب بنا ڪنهن نوٽيس ۽ قانوني گهرجن جي سنڌ جي آفيسرن خلاف ڪارروايونئب ڪيون.

سنڌ ۾ غير قانوني پرڏيهين جو وڏو مسئلو آهي، سرڪاري انگن اکرن موجب سنڌ ۾ 20 لک غير قانوني پرڏيهي آهن، پر منهنجو اندازي موجب انهن جو تعداد ان کان تمام گهڻو آهي. افغاني پاڪستان لاءِ آيا هئا پر ميزباني سنڌ ڪئي، سنڌ هاڻي وڌيڪ ميزباني برداشت نه ٿي ڪري. سنڌ پڇڙيءَ وارو صوبو آهي، سنڌ کي پنهنجي حصي جو پاڻي نه ٿو ملي، اسان کي پنهنجي ماڻهن لاءِ پاڻي ناهي ته ٻين کي ڪٿان ڏيون، هتي سڀني صوبن جا ماڻهو رهن ٿا، ٻيا صوبا پنهنجو پنهنجو حصو سنڌ کي ڏين. سنڌ کي 91 واري ٺاهه موجب پاڻي نه ٿو ملي. ڪراچي ۾ مقامي گينگس به سرگرم هئا جن کي به چيباٽيو ويو آهي.

غير قانوني پرڏيهن جو انگ به وڌيو آهي ۽ اهو تمام وڏو مسئلو آهي ۽ اهي اسانجو پاڻي ۽ ٻين وسيلن تي وڏو ٻوجهه آهن. اسان پنهنجو پيٽ ڪٽي تارڪين وطن جي مهمان نوازي ڪئي پر هاڻ پريشاني وڌي رهي آهي اهي غيرقانوني پرڏيهي هاڻ ندين نالن تي به قبضا ڪري رهي آهن جنهن ڪري صفائي سٿرائيءَ ڪرڻ ۾ به ڏکيائيون پيش اچي رهيون آهن. سنڌ ۾ هندستان، بنگلاديش، برما، افغانستان کان 20 لکن کان به وڌيڪ غيرقانوني پرڏيهي آيل آهن. ايف آءِ اي غيرقانوني پرڏيهن کي ڇڏي ٻين قسمن وارين جي ڪاررواين ۾ مصروف آهي.