تازيون خبرون

Daily Archives: March 15, 2016

دهشتگردن جو سمورو اسٽرڪچر ختم ڪري ڇڏينداسين، ڪاميابين تي سوديبازي نه ٿيندي: آرمي چيف

راولپنڊي(م.ڊ) پاڪ فوج جي سربراهه جنرل راحيل شريف چيو آهي ته فاٽا ۾ دهشتگردن خلاف آپريشن کي پڄاڻي تائين رسائڻ لاءِ اڳتي وڌي رهيا آهيون ۽ اسان کي اڳتي وڌڻ ۽ ڊگهي مدي وارن فائدن تي ڌيان ڏيڻ جي ضرورت آهي. جنرل هيڊڪوارٽر ۾ ڪور ڪمانڊرز ڪانفرنس کي خطاب ڪندي آرمي چيف سڄي ملڪ ۾ انٽيليجنس جي بنياد تي آپريشن جي رفتار کي تيز ڪيو وڃي ته جيئن سڄي ملڪ مان دهشتگردي جي سموري ڍانچي کي ختم ڪري سگهجي. آرمي چيف فاٽا ۾ رياست جي عملداريءَ لاءِ اثرائتي سرحدي  انتظام ۽ دهشتگردن کان پاڪ ڪيل علائقن ۾ ڪنٽرول مضبوط ڪرڻ لاءِ اپاءَ وٺڻ جي هدايت ڪئي. هن چيو ته آپريشن سبب عارضي طور تي بي گهر ٿيل ماڻهن کي مقرر ڪيل وقت اندر پنهنجن علائقن ۾ آباد ڪرڻ وارو عمل مڪمل ڪيو وڃي. آءِ ايس پي آر طرفان جاري ڪيل بيان مطابق آرمي چيف جي صدارت هيٺ ٿيل ڪور ڪمانڊرز ڪانفرنس ۾ ملڪ جي اندروني توڙي ٻاهرين سلامتي جي صورتحال ۽ پيشيور معاملن بابت غور ويچار ڪيو ويو. اجلاس ۾ شرڪت ڪندڙ ڪمانڊرز ملڪ اندر سلامتي جي صورتحال جو تفصيلي جائزو ورتو. ڪانفرنس کي خطاب ڪندي آرمي چيف شوال ۽ اتر وزيرستان ايجنسي سان لاڳاپيل علائقن ۾ جاري آپريشن تي مڪمل اطمينان جو اظهار ڪيو. آرمي چيف آپريشن ضرب عضب ۾ قربانيون ڏيندڙ جوانن ۽ آفيسرن کي ڀيٽا پيش ڪئي ۽ ان عزم جو اظهار ڪيو ته انهن ڪاميابين تي ڪنهن به قسم جي سوديبازي نه ڪئي ويندي

 

ڪچي آبادي فورن ڪيرائي ويئي، رهواسين کي ته مهلت نه ڏني ويئي؟: سپريم ڪورٽ

اسلام آباد (اين اين آءِ) سپريم ڪورٽ آف پاڪستان وفاقي پوليس ۽ موٽر وي پوليس جي آءِ جيز کي آفيسون منتقل ڪرڻ لاءِ ٻن کان ٽن مهينن جو وقت ڏيڻ جي اپيل رد ڪندي چيو آهي ته اي-11 ڪچي آبادي، فورن ڪيرائي ويئي اتان جي رهواسين کي ته مهلت نه ڏني ويئي اسلام آباد ۽ موٽر وي پوليس جا سربراهه قانون کان مٿان آهن ته پنهنجي آفيسن ۾ قومي جهنڊي بدران داعش جو جهنڊو هڻن. سومر تي سپريم ڪورٽ ۾ جسٽس شيخ عظمت سعيد جي سربراهي ۾ ٻه رڪني بئنچ اسلام آباد جي رهائشي علائقي ۾ ڪمرسل ۽ سرڪاري سرگرمين جي خلاف ڪيس جي ٻڌڻي ڪئي گهرو سيڪريٽري، سيڪريٽري مواصلات ۽ چيئرمين سي ڊي اي عدالت ۾ پيش ٿيا ٻڌڻي دوران عدالتي پڇاڻي تي گهرو سيڪريٽري ٻڌايو ته آءِ جي اسلام آباد پوليس جي آفيس ايف 7 ۽ آءِ جي موٽر وي جي آفيس ايف 8 ۾ آهي ٻنهي آءِ جيز جون آفيسون رهائشي علائقن مان منتقل ڪرڻ لاءِ ٻن کان ٽن مهينن جو وقت گهرجي خانگي ٽي وي موجب جسٽس شيخ عظمت سعيد چيو ته ٻن کان ٽن مهينن جو وقت نٿا ڏيئي سگهون سيڪيورٽي ادارا حڪومت کي ڇو شرمسار ڪرائڻ گهرن ٿا ڇا ٻنهي آءِ جيز تي قانون لاڳو نٿو ٿئي ٻئي آفيسر قانون کان مٿان آهن ته آفيسن ۾ قومي جهنڊي بدران داعش جو جهنڊو لڳائين جسٽس شيخ عظمت سعيد چيو ته آءِ-11 جي ڪچي آبادي ته ڪيرائڻ ۾ دير ئي نه ڪئي ويئي ڇا ڪچي آبادي جي رهواسين کي مهلت يا متبادل رهائش جو بندوست ڪرڻ جو وقت ڏنو ويو ايڊيسنل آٽارني جنرل اپيل ڪئي ته هڪ ڪلاڪ جو وقت ڏيئي ڇڏيو گهرو سيڪريٽري ۽ چيئرمين سي ڊي اي سان گڏجي معاملي جو ڪوئي حل ڪڍون ٿا عدالت اپيل منظور ڪري ورتي ٻڌڻي ٻيهر شروع ٿي ته جسٽس شيخ عظمت ريمارڪس ۾ چيو ته چيئرمين سي ڊي اي ڪم نٿا ڪري سگهن ته گهر هليا وڃن جسٽس شيخ عظمت سعيد ريمارڪس ۾ چيو ته ڇا سيڪٽر ايف سيون يا ايف ايٽ پاڪستان ۾ نٿا اچن عدالت گهرو سيڪريٽري، مواصلات، ڪيڊ ۽ چيئرمين سي ڊي اي کي حڪم ڏنو ته گڏجي ويهو ۽ ٻڌايو ته آفيسون ڪڏهن منتقل ٿينديون.

 

دهشتگردي هڪ گڏيل دشمن آهي جنهنجي خاتمي لاءِ جدوجهد سڀني جي ذميواري آهي: صدر/وزير اعظم

اسلام آباد (اين اين آءِ) پاڪستان جي صدر ممنون حسين ترڪي جي شهر انقره ۾ بم ڌماڪي جي سخت لفظن ۾ مذمت ڪئي آهي ۽ قيمتي جانين جي نقصان تي ڏک جو اظهار ڪيو آهي صدر ممنون حسين چيو آهي ته ڏک ۽ افسوس جي هن گهڙي ۾ پاڪستان جي حڪومت ۽ عوام پنهنجي ترڪ ڀائرن جي ڏک ۾ گڏ آهي هن چيو ته پاڪستان خود دهشتگردي جو شڪار آهي ۽ ڪنهن به هنڌ تي هر قسم جي دهشتگردي جي مذمت ڪري ٿو پاڪستان جي صدر ممنون حسين بم ڌماڪي ۾ مارجي ويلن جي وارثن سان تعزيت جو اظهار ڪندي زخمي ماڻهن جي جلد صحتيابي لاءِ دعا ڪئي آهي.

ٻئي طرف وزيراعظم محمد نوازشريف انقره ۾ دهشتگرد حملي جي سخت لفظن ۾ مذمت ڪندي چيو آهي ته پاڪستان جو عوام ۽ حڪومت کي ڏاڍو ڏک ٿيو آهي ۽ هن ڏکئي وقت ۾ اسان پنهنجي ترڪ ڀائرن سان گڏ آهيون هڪ مذمتي بيان ۾ نوازشريف چيو ته دهشتگردي هڪ گڏيل دشمن آهي ۽ جي خاتمي لاءِ جدوجهد سڀني جي ذميواري آهي هن چيو ته پاڪستان دنيا ۾ ڪنهن به هنڌ دهشتگردي جي ڪارروائي جي خلاف پختو عزم رکي ٿو هوڏانهن پرڏيهي آفيس جي ترجمان چيو ته ترڪي جو عوام پنهنجي مضبوط ازم ۽ جذبي سان دهشتگردي کي فيصلائتي شڪست ڏيندو انقره جي سينٽرل علائقي ۾ ڪار خودڪش حملي سان ڪيترائي ماڻهو فوت ۽ زخمي ٿيا هئا.

 

سنڌ صوبي کي پوليو کان پاڪ بڻائڻ لاءِ هر حد تائين وينداسين: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته سنڌ صوبي کي پوليو کان پاڪ بڻائڻ لاءِ هر قسم جا قدم کنيا ويندا. هن انسپيڪٽر جنرل سنڌ پوليس اي ڊي خواجه ۽ ڪمشنر ڪراچي آصف حيدر شاهه کي اڄ کان شروع ٿيندڙ مهم دوران پوليو ٽيمن کي مڪمل فول پروف سيڪيورٽيءَ ڏيڻ سان گڏوگڏ سموريون لاڳاپيل سهولتون فراهم ڪرڻ جون به هدايتون ڪيون ۽ گذريل پوليو مهم دوران رهجي ويل سمورن ٻارڙن کي پوليو جا ڦڙا پياريا وڃن.وڏي وزير شهرين کي به اپيل ڪئي ته هلندڙ پوليو مهم دوران پوليو ٽيم سان مڪمل سهڪار ڪن ۽ پوليو مهم کي ڪامياب بڻائڻ ۾ سرڪار جو ساٿ ڏين. سنڌ جي وڏي وزير ان عزم جو به پڪو پهه ڪيو ته اسان پنهنجي ٻارن کي پوليو کان بچائينداسين ۽ سنڌ صوبي کي پوليو کان پاڪ ڪنداسين.

 

انقره ڌماڪي جي مذمت، دهشتگردي خلاف ويڙهه ۾ ترڪي سان گڏ آهيون: پاڪستان

اسلام آباد(بيورو) پاڪستان انقره ۾ دهشتگرد حملن جي سخت مذمت ڪندي دهشتگردي خلاف ويڙهه ۾ ترڪي سان مڪمل ايڪي جو اظهار ڪيو آهي. پرڏيهي آفيس جي ترجمان پنهنجي بيان ۾ چيو آهي ته پاڪستان انقره ۾ ٿيل تازي دهشتگردي جي وحشياڻي ڪارروائي جي سخت لفظن ۾ مذمت ڪري ٿو ۽ ترڪي سان هن ڏکئي گهڙي ۾ گڏ بيٺل آهي. ترجمان چيو ته پاڪستان هر قسم جي دهشتگردي کي نندڻ بابت پنهنجي عزم کي ورجائي ٿو. پاڪستاني انقره ۾ بم ڌماڪي تي ڏکويل آهن ،جنهن ۾ ڄاڻ مطابق وڏي انگ ۾ بيگناهه جانيون ضايع ٿيون ۽ ڪيترائي ماڻهو زخمي ٿيا. پرڏيهي ترجمان چيو ته اسان ڏکويل ڪٽنبن ۽ ترڪي جي عوام توڙي حڪومت سان دلي همدردي ۽ تعزيت ڪيون ٿا. ترجمان ان يقين جو اظهار ڪيو ته ترڪي جو بهادر عوام دهشتگردي جي ان بڇڙائي جي خاتمي لاءِ پرعزم ٿي پنهنجون ڪوششون جاري رکندو.

 

مولانا فضل الرحمان جي وزيراعظم نواز شريف سان ملاقات،عورتن جي تحفظ وارو بل واپس وٺڻ جو مطالبو

لاهور (م.ڊ) جمعيت علماءِ اسلام (ف) جي سربراهه مولانا فضل الرحمان وزيراعظم نواز شريف سان ملاقات ڪري پنجاب اسيمبلي مان عورتن جي تحفظ بابت منظور ٿيل بل واپس وٺڻ جو مطالبوڪيو آهي، وزيراعظم نواز شريف جي يو آئي(ف) جي سربراهه کي لاهور جي جاتي عمره ۾ ملاقات جي دعوت ڏني هئي،جيڪا هن منظور ڪئي، جاتي عمره ۾ وزيراعظم ۽ مولانا فضل الرحمان ۾ ٿيل ملاقات دوران پنجاب جو وڏو وزير شهباز شريف به موجود هو، ذريعن مطابق مولانا فضل الرحمان ملاقات دوران وزيراعظم نواز شريف سامهون عورتن جي تحفظ وارو بل منظور ڪرائڻ جي شڪايت ڪئي ۽ چيو ته وڏو وزير شهباز شريف اهو بل منظور ڪرائڻ کان پهرين ساڻن ڳالهائي وٺي ها ته بهتر هو پر بل پاس ڪرائڻ کانپوءِ وڏو وزير چوي ٿو ته ترميم ڪرڻ لاءِ تيار آهيون. مولانا فضل الرحمان وزيراعظم کي چيو ته  توهان ڄاڻايل بل بابت عالم سڳورن کان راءِ وٺو ته ڇا اهو بل قرآن ۽ سنت جي خلاف آهي يا نه؟ اسان توهان جي نوٽيس جو انتظار ڪري رهيا هئاسين، هن چيو ته اسان جو مطالبو آهي ته پنجاب حڪومت بنا دير اهو بل واپس وٺي، ذريعن مطابق وزيراعظم نواز شريف،مولانا فضل الرحمان کي پڪ ڏياري ته حڪومت ان معاملي تي کين اعتماد ۾ وٺندي. ملاقات کانپوءِ ميڊيا سان ڳالهائيندي مولانا فضل الرحمان چيو ته هن وزيراعظم نواز شريف سان سندس دعوت تي ملاقات ڪئي، هن چيو ته هن ملاقات دوران وزيراعظم سامهون عورتن جي تحفظ واري بل بابت پنهنجا اعتراض پيش ڪيا ۽ احتجاج به رڪارڊ ڪرايو.001

 

گهرو وزير جي ايف آءِ اي کي سرفراز مرچنٽ جا خدشا ۽ شڪايتون ختم ڪرڻ جي هدايت

اسلام آباد(اي پي پي) گهرو معاملن واري وفاقي وزير چوڌري نثار علي خان وفاقي جاچ اداري (ايف آءِ اي) کي سرفراز مرچنٽ جي خدشن ۽ شڪايتن کي دُور ڪرڻ جي هدايت ڪئي آهي. وزارت جي ترجمان مطابق سومر ڏينهن چوڌري نثار علي خان ڊائريڪٽر ايف آءِ اي کي اها هدايت ڏني آهي ته هو ذاتي طور تي سرفراز مرچنٽ سان رابطو ڪري. سرفراز مرچنٽ جي حيثيت هڪ گواهه جي آهي، سندس عزت ۽ احترام رکيو وڃي. گهرو وزير ايف آءِ اي کي اها به هدايت ڪئي ته سرفراز مرچنٽ جي خدشن ۽ شڪايتن کي فوري طور ختم ڪيو وڃي.

 

سنڌ جي نئين آءِ جي اي ڊي خواجه چارج سنڀالي ورتي، گارڊ آف آرنر پيش

ڪراچي (اين اين آءِ) سنڌ پوليس جي نئين آءِ جي الهه ڏنو خواجه چيو آهي ته صوبي ۾ امن قائم ڪرڻ لاءِ دٻاءُ برداشت نه ڪيو ويندو آفيسر صرف ڏوهن جي انت تي خاص ڌيان ڏين اي ڊي خواجه سومر تي آءِ جي سنڌ جي حيثيت سان چار سنڀالي ان موقعي تي کيس گارڊ آف آرنر پيش ڪيو ويو آءِ جي سنڌ پوليس الهه ڏنو خواجه عهدو سنڀاليندي ئي ماتحت آفيسرن ۽ اهلڪارن کي هدايت ڪئي ته ڪرپشن ۽ بدعنواني کي برداشت نه ڪيو ويندو ڏوهن جي پٺڀرائي ڪندڙ پوليس اهلڪارن کي ڪنهن به صورت معاف نه ڪيو ويندو آفيسر به ڪنهن قسم جي دٻاءُ ۾ نه اچن صرف ڏوهن جي روڪٿام تي خاص ڌيان ڏين ترجمان سنڌ پوليس جو چوڻ آهي ته نئين آءِ جي جي مقرري کان پوءِ وڏي پئماني تي بدلين ۽ مقررين جو تاثر غلط آهي اهڙو ڪوئي معاملو غور هيٺ نه آهي جڏهن ته مستقبل ۾ ضرورت تي قائدن قانونن مطابق مقرري يا بدلي ڪري سگهجي ٿي.

 

 رضا هارون جا به ايم ڪيو ايم کان رستا ڌار، مصطفيٰ ڪمال جي ڪيمپ ۾ شامل ٿي ويو

ڪراچي (اسٽاف رپورٽر) ايم ڪيو ايم سان لاڳاپيل اڳوڻو صوبائي وزير رضا هارون به مصطفيٰ ڪمال جي ڪيمپ ۾ شامل ٿي ويو، اڄ صبح اوچتو دبئي کان واپس ڪراچي پهتل رضا هارون اهڙو اعلان مصطفيٰ ڪمال جي گهر تي پريس ڪانفرنس ڪندي ڪيو، هن مصطفيٰ ڪمال سان گڏ پريس ڪانفرنس دوران ايم ڪيو ايم ڇڏڻ جو اعلان ڪندي قيادت کي ڇتي تنقيد جو نشانو پڻ بڻايو، رضا هارون چيو ته جاگيرداراڻي ۽ وڏيرڪي سوچ خلاف جهاد جي بنياد تي ايم ڪيو ايم ٺاهي وئي پر هاڻ مون جهڙا ڪيترائي ماڻهو تنگ ٿي چڪا آهن، هن چيو ته جڏهن ايم ڪيو ايم ٺهي هئي ته خيال اهوئي هو ته اها عام ماڻهن جي حقن، مڊل ڪلاس جي حڪمراني ۽ جاگيرداري نظام جي خاتمي لاءِ ڪم ڪندي پر اها پنهنجي مقصد تان هٽي وئي، هن چيو ته 18 هين ترميم لاءِ هر پارٽي پنهنجي ڳالهه مڃرائي پر ايم ڪيو ايم ڪجهه نه ڪيو ۽ وزيراعظم چونڊرائڻ ۾ لڳل رهي،سندس چوڻ هو ته گهٽ ۾ گهٽ ڪوٽا سسٽم ئي ختم ڪرائڻ لاءِ ڪوشش ڪئي وڃي ها پر مهاجريت کي ڪوٽا سسٽم سان ڳنڍيو ويو ۽ اسان جا مڊل ڪلاس سڀ ماڻهو اپر ڪلاس ٿي ويا، اسان اڻ ڳڻين حڪومتن ۾ رهياسين پر قومي وهڪري ۾ شامل نه ٿياسين، رضا هارون چيو ته بي بي سي ايم ڪيو ايم تي را کان مدد وٺڻ جو الزام مڙهيو، ڊاڪيومينٽري ٺاهي ۽ خبرون هلايون پر هڪ سال گذرڻ کانپوءِ به پارٽي ان خلاف ڪا ڪارروائي ناهي ڪئي، هن چيو ته بي بي سي خلاف ڪراچي ۾ احتجاج ٿيو پر لنڊن ۾ ان ڪري احتجاج نه ڪيو ويو جو اتي اعترافي بيان ڏنل آهي، جڏهن ته طارق مير جي اعترافي بيان ۾ رڳو 4 ماڻهن جو ذڪر آهي ، رات جو را کان مدد گهرڻ کانپوءِ توهان صبح جو صفايون ڏئي رهيا آهيو. ايم ڪيو ايم سربراهه جو نالو وٺڻ کانسواءِ ان ڏانهن اشارو ڪندي رضا هارون چيو ته ڪا اسيمبلي اهڙي ناهي ،جنهن ۾ سندس خلاف ٺهراءُ منظور نه ٿيو هجي، رضا هارون چيو ته ڪراچي ۾ مينڊيٽ جي ڳالهه ڪري خوش ٿيندڙ ياد رکن ته عوام ملڪي ادارن کي گارگند ڪرڻ، نيٽو فوج ۽ گڏيل قومن کي دعوت ڏيڻ جو مينڊيٽ ناهي ڏنو، جيڪڏهن مينڊيٽ ۾ اها ڳالهه به شامل آهي ته ان حوالي سان به ٻڌايو وڃي.001

 

سيوهڻ شريف: خانگي ريسٽ هائوس ۾ زيارت لاءِ آيل مسافر کي باهه وڪوڙي وئي،ڳڻتي جوڳي حالت ۾ حيدرآباد منتقل

سيوهڻ شريف (رپورٽر)سيوهڻ شريف ۾ هڪ خانگي ريسٽ هائوس ۾ زيارت لاءِ آيل مسافر کي اچانڪ باهه وڪوڙي ويئي: 50 سيڪڙو جسم  سڙي ويو ۽ مسافر خاني جي ڪمري ۾ پيل ڪاٺ جو سامان به سڙي رک: سيوهڻ پوليس واقعي واري هنڌ پهچي مسافر جي جان بچائي ورتي: طبي امداد بعد مسافر کي ڳڻتي جوڳي حالت ۾ حيدرآباد روانو ڪيو ويو، خبر موجب سيوهڻ شريف ۾ ڪالهه رات دير سان ڌمال چونڪ وٽ موجود هڪ خانگي ريسٽ هائوس ۾ زيارت لاءِ آيل سيد فرزند حسين شاهه پٽ روزي شاهه کي ان مسافر خاني جي ڪمري ۾ اچانڪ باهه ان وقت وڪوڙي ويئي جڏهن هو نشي ۾ ڌت هجڻ وقت پنهنجي زال سان بدنظمي ڪري رهيو هو ته ريسٽ هائوس وارن کيس ڪمري ۾ بند ڪري پوليس کي اطلاع ڪيو سيوهڻ پوليس جي پهچڻ شرط ئي ڪمري مان باهه جو دونهون آيو ۽ پوليس مسافر کي باهه کان بچائي تعلقه اسپتال سيوهڻ پهچايو جتي ڊاڪٽرن مطابق سندس جسم 50 سيڪڙو سڙي چڪو آهي جنهن کي وڌيڪ علاج لاءِ حيدرآباد روانو ڪيو ويو. مسافر خاني ۾ موجود اکين ڏٺن شاهدن سنڌ پريس ڪلب سيوهڻ جي صحافين کي ٻڌايو ته هي واقعو رات جو دير سان پيش آيو آهي جنهن سبب مسافر خاني جي ڪمري ۾ پيل ڪاٺ جو سامان به سڙي رک ٿي ويو آهي. ۽ پوليس وقت تي پهچي متاثر جي جان بچائي ورتي آهي. سيوهڻ پوليس ڪوبه ڪيس وغيره داخل ناهي ڪيو جڏهن ته پوليس جو چوڻ آهي ته متاثر شخص نشي بعد سگريٽ پيئڻ جي ڪوشش ڪري رهيو هو ته کيس باهه وڪوڙي ويئي. ياد رهي ته سيوهڻ جي خانگي ريسٽ هائوسن ۾ ههڙا ڪيترائي قتل، چوري، اغوا، منشيات وغيره جهڙا واقعات پيش ايندا رهيا آهن پر پوليس خاموش تماشآئي وارو ڪردار ادا ڪري سري عام ريسٽ هائوس جي مالڪن کان منٿلي اوڳاڙي ڪندي جرم ڪرڻ لاءِ کين لائيسنس ڏئي ڇڏيو آهي. جتي ڪيترائي اڻ وڻندڙ واقعا پيش ايندا رهندا آهن.