تازيون خبرون

Daily Archives: March 14, 2016

ايف آءِ اي کنيل فائل واپس نه ڪيا ته ڦر جو ڪيس داخل ڪيو ويندو: وڏو وزير جو چتاءُ

سکر (بيورو) سنڌ جي وڏي وزير سيد قائم علي شاهه چيو آهي ته اي ڊي خواجا جي آءِ جي سنڌ طور مقرري سنڌ حڪومت جي مشوري تي ٿي آهي، پوليس ۽ قانون لاڳو ڪندڙ ادارن جي ڪم ۾ مداخلت ناهي ڪئي تڏهن ئي سنڌ ۾ ڪاميابيون مليون آهن ۽ ڏيڍ سال دوران ڪراچي ۾ هڪ به دهشتگرديءَ جو واقعو نه ٿيو آهي. هن اهڙن خيالن جو اظهار سکر پريس ڪلب ۾ هڪ تقريب کي خطاب ڪندي ۽ ميڊيا سان ڳالهه ٻولهه ڪندي ڪيو، ان موقعي تي وزيراعليٰ سنڌ سکر پريس ڪلب لاءِ اعلانيل 50 لک رپين جو چيڪ  پريس ڪلب جي عهديدارن حوالي پڻ ڪيو. وڏي وزير پنهنجي خطاب ۾ چيو ته پوليس ۽ رينجرز آپريشن دوران ڪراچي ۾ هزارين ماڻهو گرفتار ڪيا، پر موجوده سرڪار ان ۾ ڪڏهن به مداخلت نه ڪئي تڏهن ئي آپريشن ڪامياب ٿيو آهي. هن چيو ته ايف آءِ اي روينيو ۽ ڪي ايم سي آفيسن ۾ ڪارروائي ڪري ٽرڪ فائيلن جي کڻي وئي، جيڪي احتجاج باوجود اڃا تائين واپس ناهن ڪيا ويا. وزيراعليٰ سنڌ چيو ته هُن وزيراعظم آڏو احتجاج ڪيو آهي ته سنڌ جو ڏوهه يا گناهه ڪهڙو آهي جو وفاق جي ادارن سنڌ تي ڪاهه ڪئي آهي، اهو تاثر بلڪل غلط آهي ته ڪرپشن ۽ بدامني رُڳو سنڌ صوبي ۾ آهي، رشوت جي خاتمي لاءِ صوبا بااختيار آهن جنهن لاءِ سنڌ ۾ اينٽي ڪرپشن کاتو ايماندار چيئرمين ممتاز علي شاهه جي قيادت ۾ بهتر ڪم ڪري رهيو آهي. آئين جي آرٽيڪل 147 تحت وفاق جي ڪنهن به اداري يا آفيسر کي سنڌ ۾ قدم کڻڻ کان اڳ سنڌ سرڪار کان اجازت وٺڻي آهي، پر آئين جا بکيا اُڊيڙي سنڌ جي هلان ڪئي وئي آهي، اسين تڪرار سان نه پر قانون مطابق خدمت ڪرڻ گهرون ٿا. وزيراعليٰ چيو ته شڪارپور امام بارگاهه ۽ جيڪب آباد ماتمي جلوسن تي ٿيل حملن جا جوابدار ۽ ماسٽر مائينڊ ٻن ٻن هفتن ۾ گرفتار ڪيا ويا، جن جا ڪيس ملٽري ڪورٽس ۾ اماڻيا ويندا، ڪراچي سميت سڄي صوبي ۾ امن امان تي ضابطو آندو ويو آهي، دهشتگردي، ڀتا خوري، ٽارگيٽ ڪلنگ ۽ ڀنگ لاءِ اغوا جي وارداتن کي روڪيو ويو آهي جنهن ۾ رينجرز ۽ پوليس جو ڪردار اهم آهي. هن چيو ته سنڌ حڪومت صوبي جي آمدني ۾ رڪارڊ واڌ ڪئي آهي ۽ ايندڙ سال اسين سيلز ٽيڪس آن سروسز جي مد ۾ 60 ارب رُپيا ڪمائيندا سين جنهن حساب سان صوبي جي ترقي ڪرڻ گهرون ٿا. وزيراعليٰ سنڌ چيو ته بدقسمتيءَ سان ڪجهه سببن ڪري آدمشماري پٺتي ڪئي وئي آهي، اسين پٺتي نه هٽندا سين ۽ هر حال ۾ آدمشماري ٿيندي، سنڌ حڪومت صوبن ۾ ناڻي جي ورڇ گهڻ رخي بنيادن تي چاهي ٿي. وزيراعليٰ سنڌ سيد قائم علي شاهه سکر پريس ڪلب جي آڊيٽوريم ۽ عمارت جو رهيل ڪم مڪمل ڪرڻ جو اعلان ڪندي چيو ته ايندڙ بجيٽ ۾ ان لاءِ رقم رکي ويندي، جڏهن ته پراڻي سکر ۾ صحافي ڪالوني لاءِ پلاٽ پڻ ٺيڪ ڪرائي ڏنو ويندو. تقريب کي خطاب ڪندي قومي اسيمبليءَ ۾ مخالف ڌر جي اڳواڻ سيد خورشيد احمد شاهه چيو ته ميڊيا پنهنجي ڪارڪردگي ۽ ترقي سان ثابت ڪري ڏيکاريو آهي ته ملڪي بهتري ۾ ميڊيا هڪ ٿنڀي جي حيثيت رکي ٿي. هن چيو ته سکر پريس ڪلب جو سنگ بنياد شهيد ذوالفقار علي ڀٽو 1962 ع ۾ رکيو، سکر جا صحافي سهڪاري آهي، پيپلزپارٽي جو ميڊيا سان رشتو اڻ ٽٽ آهي. هن چيو ته هو چاهي ٿو ته سکر پريس ڪلب پاڪستان جي نمبر ون پريس ڪلب بڻجي ان جي ترقي ۾ سهڪار جاري رکيو ويندو. تقريب کي سکر پريس ڪلب جي صدر جان محمد مهر ۽ لالا اسد پٺاڻ پڻ خطاب ڪيو، جڏهن ته ايم اين اي نعمان اسلام شيخ، صلاحڪار ڊاڪٽر ارشد مغل، لعل بخش منگي، مشتاق سرهيو، ڪمشنر سکر ڊويزن محمد عباس بلوچ ۽ ٻيا پڻ موجود هئا.

 

ملڪ ۾ هلندڙ برساتن سبب فوتين جو انگ 31 ٿي ويو، هيٺاهين وارا علائقا ٻڏي ويا

ڪراچي (نمائندن وٽان) اين ڊي ايم اي موجب تازين بارشن ۾ فوت ٿيندڙ جو انگ 31 آهي،ڪوئلي جي کاڻ ۾ فوت ٿيل 5 مزدور به شامل آهن، ملڪ ۾ هلندڙ برساتن سبب ملڪ جي مختلف علائقن ۾ فوتين جو انگ 18 ٿي ويو. قدرتي آفتن کي منهن ڏيڻ واري صوبائي اداري پي ڊي ايم اي موجب برساتن سبب بلوچستان ۾ 17 جڏهن ته ٽانڪ ضلعي ۾ هڪڄڻو فوت ٿيو آهي. اداري موجب ٽانڪ ضلعي ۾ گهر جي ڇت ڪرڻ سبب 2 ٻارن سميت 3 ڄڻا زخمي ٿيا. ٻي طرف ريسڪيو 1122 جي اختيارن موجب ڪي پي ڪي جي علائقي مردان ۾ هڪ جڳهه ڪرڻ سبب 4 ڄڻا زخمي ٿيا. بي بي سي جي نامه نگار محمد ڪاظم چيو آهي ته بلوچستان ۾ فوت ٿيندڙ 17 ڄڻن مان 5 ڄڻن جي فوت جو واقعو گذريل ڏينهن ڪوئٽه شهر کان 50 ڪلو ميٽر پري پشين ۾ پيش آيو. پشين ۾ ليويز فورس جي هڪ اهلڪار ميڊيا کي ٻڌايو ته ڪلي حاجي زعي ۾ برسات سبب هڪ گهر جي ڇت ڪري پئي جنهن سبب هڪ ئي خاندان جا 5 ماڻهو فوت ۽ 3 ڄڻا زخمي ٿيا،فوتين ۾ 3 مرد،1 عورت ۽ هڪ ٻار شامل آهن. قدرتي آفتن کي منهن ڏيڻ واري اداري پي ڊي ايم اي موجب بلوچستان ۾ وڌيڪ 2 کان 3 ڏينهن تائين تيز برساتن جا امڪان آهي. تيز برساتن سبب هيٺاهين وارا علائقا پاڻي هيٺ اچي ويا. ندي نالن ۾ برسات جي پاڻي سبب علائقن مان ڪيترائي ماڻهو لڏ پلاڻ ڪري ويا قبائلي علائقن جو ملڪ جي ٻين حصن سان زميني رابطو ڪٽجي ويو، ضروري شين جي کوٽ ٿي وئي، جنهن سبب ماڻهو سخت پريشاني کي منهن ڏيندا رهيا شاهراهه قراقرم به بند ٿي وئي جڏهن ته موسميات کاتي اڳڪٿي ڪئي آهي ته ايندڙ 24 ڪلاڪن دوران ڪوئيٽا، زوب ۽ قلات ڊويزن ۾ ڪجهه هنڌن تي تيز هوائون ۽ وڄ سان گڏ برسات پوڻ جو امڪان آهي.

 

نيب سنڌ ۾ ٺيڪ ڪيو هو جڏهن پنجاب جو رخ ڪيو ته غلط آ: مولابخش چانڊيو

ٽنڊوالهيار (نمائندو) جيلن ۾ ايم ڪيو ايم جي ڪارڪنن تي تشدد ڪري وفاداريون تبديل ڪرائڻ جي ڳالهه غلط آهي. اطلاعات بابت سنڌ جي وڏي وزير جي صلاحڪار مولابخش چانڊئي چيو آهي جيلن ۾ ايم ڪيو ايم جي ڪارڪنن تي تشدد ڪري وفاداريون تبديل ڪرائڻ جي ڳالهه غلط آهي، ناڪامي لڳائڻ لاءِ مٿن الزام هنيا پيا وڃن. ٽنڊوالهيار ۾ پريس ڪانفرنس ڪندي مولابخش چانڊئي چيو ته ڪراچي جي ماڻهن متحده کي مينڊٽ ڏنو، جنهن کي هو تسليم ڪن ٿا. هن چيو ته ويچاري فاروق ستار پريس ڪانفرنس دوران شهر مان صفائي مهم جي ڳالهه ڪئي يا ڌمڪيون ڏنيون. سندس چوڻ هو ته نيب سنڌ ۾ ٺيڪ ڪيو هو جڏهن پنجاب جو رخ ڪيو ته غلط آهي.صوبائي صلاحڪار جو چوڻ هو ته آءِ جي سنڌ جي تبديلي عدالتي حڪم   تحت نه ٿي پر قانون جي بالادستي قائم ڪئي وئي آهي. مولابخش چانڊئي چيو ته هو مڃين ٿا ته سنڌ جي ماڻهن جي ايتري خدمت ناهن ڪري سگهيا، ڪارڪنن سان گهڻو وقت جيل ۾ گذرايو آهي.

 

للڪارن کي منهن ڏيڻ ڪنهن هڪ سياسي پارٽي جي وس جي ڳالهه ناهي، ٻڌي ڪرڻي پوندي: بلاول ڀٽو زرداري

اسلام آباد (بيورو) پاڪستان پيپلز پارٽي جي چيئرمين بلاول ڀٽو زرداري چيو آهي ته للڪارن کي منهن ڏيڻ لاءِ ٻڌي لازمي آهي، سياسي پارٽيون هڪ ٿي ئي دهشتگردي کي منهن ڏيئي سگهن ٿيون، اسلام آباد ۾ ايشيا جي سياسيپارٽين بابت عالمي ڪانفرنس کي خطاب ڪندي بلاول ڀٽو زرداري چيو ته للڪارن کي منهن ڏيڻ ڪنهن هڪ سياسي پارٽي جي وس جي ڳالهه ناهي پر ان لاءِ ٻڌي جي سخت ضرورت آهي، هن چيو ته انساني اسمگلنگ 21 هين صديءَ ۾ انساني غلامي برابر آهي، جنهن جي خاتمي لاءِ دنيا جي سڀني قومن کي گڏجي ڪم ڪرڻو پوندو، خطاب دوران بلاول ڀٽو زرداري کان هڪ صحافي سوال ڪيو ته نيب جا پر ڪاٽيا وڃن، ان تي توهان ڇا چوندئو؟ جنهن تي پ پ چيئرمين چيو ته نيب کي ڇڏيو، ان تي ڇا ڳالهائجي.001

 

مصطفٰي ڪمال جيڪا پارٽي ٺاهي رهيو آهي اهڙيون پارٽيون ماضي ۾ به ٺهنديون هيون: نثار کهڙو

خيرپور  (ڊ ر) سنڌ جي تعليم کاتي واري سينيئر وزير نثار احمد کهڙو چيو آهي ته ملڪ جي آئين ۾ اجازت آهي ته ڪو به ماڻهو پنهنجي پارٽي ٺاهي سگهي ٿو، مصطفٰي ڪمال جيڪا پارٽي ٺاهي رهيو آهي اهڙيون پارٽيون ماضي ۾ به ٺهنديون هيون. وزير اعظم نواز شريف جوڻيجو ليگ مان نڪري (ن) ليگ ٺاهي پگارا ليگ هن کان اڳ ۾ هئي. اهڙو اظهار هن انڊس ريسورسز سينٽر پاران ڪوٽ قلعي جي هيريٽيج پارڪ ۾ تعليمي ميلي ۾ مهمان خاص طور شرڪت ڪندي ميڊيا سان ڳالهه ٻولهه ڪندي ڪيو هن چيو ته سڀ کان وڌيڪ ۽ مضبوط ادارو عوام جي طاقت آهي عوام جنهن کي چونڊيندي ڪندي اهوئي حڪومت ڪندو آءِ جي سنڌ مٿان الزام هئا جنهن جي تبديلي لاءِ سپريم ڪورٽ آرڊر ڪيو آهي سنڌ ۾ امن وامان لاءِ رينجرز پوليس سان گڏجي ڪم ڪري رهي آهي نثار احمد کهڙو چيو ته تعليمي ميلو مچائڻ تي آءِ آر سي کي مبارڪباد ٿو ڏيان ته انهن ڪوٽ قلعي ڀرسان هيريٽيج پارڪ ۾ ٻارڙن جي ميلاپ، تفريح ،تعليم ، هنري صلاحتين کي هٿي ڏيڻ لاءِ ڪوشش ورتي آهي جنهن سان سنڌ ۾ ثقافت کي اجاگر ڪرڻ جو موقعيو مليو آهي سنڌ ۾ شهري ۽ ٻهراڙي واري مسئلي ۽ فرق کي ختم ڪرڻو آهي سنڌ اسانجي ماءُ آهي هن چيو ته اهڙين سرگرمين سان سٺو رواج قائم ٿيندو اهڙا پروگرام سنڌ جي ٻين شهرن ۾ به ٿيڻ گهرجن هن چيو ته تعليمي ميلي سان ايڪو نظر اچي ٿو ۽ هن ايڪي سان اسان وڌيڪ مضبوط ٿيندا سين اسڪائوٽ، جمبوري، گرلز گائيڊ ۽ ٻين تقريبن سان ماحول ۾ تبديلي ايندي آهي ۽ شاگرد ۽ شاگرياڻين کي پنهنجي صلاحتين جو مظاهرو ڪرڻ جو موقعيو ملندو آهي هن سنڌ واسين کي اپيل ڪئي ته هو حڪومت سان سهڪار ڪندي راندين سان ميدان آباد ڪرڻ ۾ مدد ڪن ڇو ته راند جا ميدان آباد ٿيندا ته اسپتالون ويران ٿينديون ڳوٺن ۽ شهرن ۾ فرق ختم ڪرڻو آهي ان موقعي تي آءِ آر سي جي ميڊم صادقه صلاح الدين خطاب ڪندي وزير تعليم جو شڪريو ادا ڪيو.

 

 شاهد حيات جي مصطفيٰ ڪمال ۽ رئوف صديقي سان ملاقات، ايم ڪيو ايم تي الزامن جي جاچ ۾ سهڪار بابت ڳالهيون

ڪراچي (اسٽاف رپورٽر) ايف آئي اي سنڌ جي ڊائريڪٽر شاهد حيات ڪراچي ۾ ايم ڪيو ايم جي باغي اڳواڻن مصطفيٰ ڪمال ۽ رئوف صديقي سان اهم ملاقات ڪري ايم ڪيو ايم تي ” را“ سان لاڳاپن جي الزامن ۽ مني لانڊرنگ سوڌو ٻين معاملن تي خيالن جي ڏي وٺ ڪئي ، ميڊيا رپورٽن مطابق شاهد حيات ڪراچي جي اڳوڻي سٽي ناظم مصطفيٰ ڪمال جي گهر تي پهتو، جتي هن ساڻس ملاقات ڪئي، ان موقعي تي متحده کان رستا ڌار ڪندڙ اڳوڻو صوبائي وزير رئوف صديقي به موجود هو، ذريعن مطابق ايف آئي اي سنڌ جي ڊائريڪٽر شاهد حيات ٻنهي اڳواڻن سان ملاقات دوران را سان ايم ڪيو ايم جي لاڳاپن، مني لانڊرنگ ۽ ٻين معاملن تي سهڪار جي حوالي سان ڳالهه ٻولهه ڪئي، ذريعن مطابق مصطفيٰ ڪمال ۽ رئوف صديقي پنهنجي پريس ڪانفرنس دوران ايم ڪيو ايم سربراهه تي لڳايل الزامن جي حوالي سان شاهد حيات کي تفصيلي طور ٻڌايو ۽ ان معاملي ۾ ايف آئي اي سوڌو ٻين جاچ ادارن سان پوري ريت سهڪار ڪرڻ جي پڪ ڏياري، ايم ڪيو ايم جي ٻنهي باغي اڳواڻن سان ڪيتري ئي دير ملاقات کانپوءِ شاهد حيات واپس روانو ٿي ويو، جڏهن ته ملاقات جي حوالي سان ٻنهي ڌرين طرفان ڪي به تفصيل سامهون ناهن اچي سگهيا.001

 

ڪراچي ۾ هڪ ويڙهاڪ ٽولو تشدد ۽ دهشتگردي کي هوا ڏيڻ ۾ ملوث آهي: رينجرز

ڪراچي (اسٽاف رپورٽر) رينجرز سنڌ چيو آهي ته ڪراچي ۾ هڪ ويڙهاڪ ٽولو تشدد ۽ دهشتگردي کي هوا ڏيڻ ۾ ملوث آهي، جڏهن ته رينجرز تي الزام ۽ چيڪ پوسٽن تي حملا ان سلسلي جي ڪڙي آهن، اڄ صبح ڪراچي ۾ ٻن مختلف هنڌن تي رينجرز جي چوڪين تي دستي بم حملن جي حوالي سان رينجرز جي ترجمان جاري ڪيل بيان ۾ چيو ته ڄاڻايل ويڙهاڪ ٽولو شهر ۾ مختلف ماڻهن کي تشدد وارين ڪاررواين لاءِ ڀڙڪائي رهيو آهي، هن چيو ته رينجرز اهڙين حرڪتن جو سختي سان نوٽيس ورتو آهي ۽ اهڙين ڪاررواين لاءِ ڀڙڪائيندڙ ماڻهن کي ترت گرفتار ڪيو ويندو، رينجرز جي ترجمان عوام کي اپيل ڪئي ته اهي اهڙن ملڪ دشمن عنصرن جي ڏٽن ۾ نه اچن. واضح هجي ته اڄ ايم ڪيو ايم اڳواڻ ڊاڪٽر فاروق ستار پريس ڪانفرنس ۾ رينجرز تي ايم ڪيو ايم جي ڪارڪنن کي وفاداريون مٽائڻ لاءِ دٻاءُ وجهڻ جو الزام مڙهيو هو.001

 

ايم ڪيو ايم کي ٽوڙڻ جي سازش ٿي رهي آهي، ميمبرن کي پل جي ٻئي پاسي رابطي لاءِ دٻاءُ وڌو پيو وڃي: فاروق ستار

ڪراچي (اسٽاف رپورٽر) ايم ڪيو ايم جي سينيئر اڳواڻ ڊاڪٽر فاروق ستار چيو آهي ته اڻ ڄاتل نمبرن تان اسان جي ميمبرن کي فون ڪري پل جي ٻئي پاسي رابطو ڪرڻ جو چيو پيو وڃي، ڊرائي ڪلين فيڪٽري بند ٿيڻ گهرجي، جيڪو ڳالهه مڃيندو، اهو پاڪ صاف ٿي ويندو، نائن زيرو تي پريس ڪانفرنس کي خطاب ڪندي فاروق ستار جو چوڻ هو ته ڪراچي سينٽرل جيل جي بيرڪ نمبر 25.24.19.18 ۾ قيد ايم ڪيو ايم ڪارڪنن تي دٻاءُ وڌو ويو، انهن کي بند وارڊ ڪيو ويو، جيڪا جيل مينوئل جي لتاڙ آهي ۽ ان  جو مطلب انهن کي هڪ پاسي جي سزا ڏيڻ آهي،هن چيو ته ايم ڪيو ايم کي ٽوڙڻ جي سازش ٿي رهي آهي، اسان جي 40 قيدي ڪارڪنن کي سينٽرل جيل ۾ تشدد ڪري چيو پيو وڃي ته فلاڻي جي پارٽي ۾ شامل ٿي وڃو، گذريل ڪجهه ڏينهن پهرين اسان سازش طرف اشارو ڏنو هو، جيڪو صحيح ثابت ٿي رهيو آهي، اڄ جون حالتون 1992 کان مختلف ناهن، ايم ڪيو ايم اڳواڻ چيو ته اسان جا ڪارڪن جيل مينوئل مطابق جيل ۾ پنهنجو وقت گذاري رهيا آهن، انهن تي هن وقت تائين ڏوهه ثابت ناهي ٿيو، انهن جا ڪيس ٻڌڻي هيٺ آهن، ان صورتحال ۾ اسان جي ڪارڪنن تي تشدد ڪرڻ ۽ انهن کي بند وارڊ ڪرڻ هڪ قسم جي سزا آهي.001

 

مصطفيٰ ڪمال ۽ انيس قائمخاني جو پلان اي ايم ڪيو ايم کي ٽيڪ اوور ۽ پلان بي پنهنجي پارٽِي ٺاهڻ هيو: نبيل گبول

لاهور (مانيٽرنگ ڊيسڪ) سينئر سياستدان نبيل گبول چيو آهي ته مصطفيٰ ڪمال ۽ انيس قائمخاني جو پلان اي ايم ڪيو ايم کي ٺيڪ اوور ۽ پلان بي پنهنجي پارٽي ٺاهڻ هو ٻنهي جي رهائشگاهن ڏانهن دوربين لڳائي ڇڏي آهي ۽ اتي رات جي اونداهي ۾ ڪجهه ماڻهو برقا پائي به اچي رهيا آهن هڪ انٽرويو ۾ هن چيو ته مان اهو نه چوندس ته مصطفيٰ ڪمال کي آندو ويو آهي ايم ڪيو ايم جي اصل طاقت رابطا ڪميٽي نه آهي پر اصل طاقت سينٽر ۽ يونٽ جا انچارج آهن ۽ انيس قائمخاني انهن ماڻهن سان ئي رابطي ۾ آهي. هن چيو ته ميڊيا ۾ ايم ڪيو ايم جي موجوده حالتن جي پس منظر ۾ اڳواٽ هڪ صديقي جو ذڪر ڪيو هو ۽ هاڻي به ڪيترائي ماڻهو آهن پر مان انهن جي زندگين کي لاحق خطري سبب انهن جو نالو نه وٺندس. هن چيو ته مان مصطفيٰ ڪمال ۽ انيس قائمخاني جي رهائشگاهه طرف دور بين لڳائي ڇڏي آهي جنهن سبب سڀ ڪجهه چٽو نظر اچي رهيو آهي ڪيترائي ماڻهو رات جي پوئين پهر اچي رهيا آهن ۽ انهن ۾ ڪجهه برقا پائي به اچي رهيا آهن ايم ڪيو ايم جي خوف جو ماحول هاڻي به برقرار هجڻ واري سوال تي هن چيو ته هي ماحول مڪمل ختم ته ناهي ٿيو پر ٻنهي سبب 50 سيڪڙو ختم ٿي ويو آهي. هن چيو ته ماڻهوءَ جي زندگي جي ڪا به خبر ناهي مصطفيٰ ڪمال ۽ انيس قائمخاني پلان اي ۽ پلان بي کڻي آيا هئا پلان اي مطابق الطاف حسين جي نه هئڻ جي صورت ۾ پارٽي کي ٽيڪ اوور ڪرڻ جڏهن ته پلان بي ۾ پنهنجي جماعت ٺاهڻ هيو ۽ هاڻي اهي پلان بي تي ڪم ڪري رهيا آهن.

پ پ حڪومت مڪمل ناڪام ٿي چڪي، سنڌ مٿان پنجاب جي يلغار جاري آهي: جلال محمود شاهه

لاڙڪاڻو/ڏوڪري/باڊهه/باقراڻي (نمائندن وٽآن) سنڌ آدمشماري مانيٽيرنگ ڪميٽي جو قافلو باڊهه، ڏوڪري، آريجا ۽ باقراڻي کان ٿيندو لاڙڪاڻي پهتو، شاندار آجيان، گلن جي ورکا، سنڌ آدمشماري مانيٽرنگ ڪميٽي جي اڳواڻن سيد جلال محمود شاهه، جسقم جو سينيئر وائيس چيئرمين ڊاڪٽر نياز ڪالاڻي، جيئي سنڌ محاذ جو چيئرمين رياض چانڊيو، عوامي جهموري پارٽي جو سربراهه ابرار قاضي، جسقم آريسر جو وائيس چيئرمين اسلم خيرپوري، جيئي سنڌ قومپرست پارٽي جو سربراهه قمر ڀٽي جي اڳواڻي ۾ سوين قومي ڪارڪنن باقراڻي ٽاور کان سائين جي ايم سيد پارڪ کان هڪ شاندار ريلي ڪڍي وئي جيڪا مختلف روڊن رستن کان ٿيندي هوشو پارڪ اڳيان پهتي جتي وڏي جلسي جي صورت اختيار ڪئي. جڏهن ته ريلي شهر جو گشت ڪرڻ دوارن ماڻهن طرفان گل ورکا ڪيا ويا. ريلي ۾ جسقم جي ڏاڏو اطهر سومرو، عزيز شيخ، نادر سولنگي، اشرف ڪلهوڙو، ايس يو پي ڊاڪٽر مظهر مغل، طالب مغل، سنڌ نيشنل پارٽي جي نصرالله ابڙو، يسار سنديلو سميت مختلف تنظيمن جي اڳواڻن ۽ ڪارڪنن سوين جي تعداد ۾ شرڪت ڪئي. جلسي کي خطاب ڪندي سيد جلال محمود شاهه، ڊاڪٽر نياز ڪالاڻي ۽ رياض چانڊيو خطاب ڪندي چيو ته سنڌ مٿان پنجاب جي يلغار جاري آهي. اسان گذريل 17 فيبروري کان آدمشماري مانٽيرنگ ڪميٽي جي طرفان سنڌ جي هر ضلعي شهر ۽ ڳوٺ ۾ وڃي آدمشماري مهم هلائي آهي جنهن ۾ اسان کي ڀرپور موٽ ملي آهي وفاقي حڪومت قومپرستن جي اهڙي مهم کي ڏسندي آدمشماري ملتوي ڪري ڇڏي آهي گذريل 17 سالن کان وفاقي حڪومت آدمشماري نه ڪرائي سنڌ جي مٿان پنهنجو غلبو برقرار رکندي پئي اچي. پ پ حڪومت مڪمل طور تي ناڪام ٿي وئي آهي. وفاقي حڪومت کي خبر آهي ته جيڪڏهن سنڌي آدمشماري ۾ حصو وٺن ٿا ته سنڌين جي تمام گهڻي اڪثريت آهي. هنن جلسي کي وڌيڪ خطاب ڪندي چيو ته سنڌ جو وزير اعليٰ وفاقي حڪومت آڏو بيوس بڻيل آهي. سي سي آءِ اجلاس ۾ سنڌ جو ڪيس مضبوطي سان پيش ڪري نه سگهيو جنهن جو سبب صرف ڊاڪٽر عاصم آهي. هنن چيو ته نواز شريف کي سنڌ سان ڪڏهن به سچو نه ٿيندو. مولا بخش چانڊيو پنهنجي نوڪري بچائڻ لاءِ اهو بيان ڏنو آهي ته مان قومپرست ناهيان منهنجا ابا ڏاڏا به قومپرست نه هيا. هنن چيو ته جيڪڏهن وفاقي حڪومت آدمشماري نه ڪرائي ته هي سجاڳي مهم جو قافلو وڏي احتجاجي تحريڪ ۾ تبديل ٿي ويندو ۽ سنڌي ماڻهو پنهنجا حق حاصل ڪرڻ لاءِ روڊن ۽ رستن تي هوندا.