تازيون خبرون

Daily Archives: March 9, 2016

ويا مور مري هنج نه رهيو هيڪڙو!: فقير گدا حسين

سوئيڊن جيئن ته اسڪينڊيڊينيرين ملڪن (ناروي، ڊنمارڪ، فن لينڊ) مان هڪ امير ملڪ آهي، هيءُ ملڪ امير آهي پر ماڻهو امير نه آهن، جيئن اسان جي ملڪ ۾ ماڻهو امير آهن پر ملڪ غريب آهي. اسان جا طبقا ۽ درجا آهن. امير کان امير ۽ غريب کان غريب اهڙا غريب جنهن جو دنيا ۾ مثال ملڻ مشڪل آهي.

گذريل 3 فيبروري تي سوئيڊن جي شهزادي شهنشاهه ڪارل 16 گستاف کي پٽ ڄائو، جنهن جو نالو شهزادو اوسڪر ڪارل اولوف رکيو ويو آهي. نالي رکڻ وقت ملڪ جي ٽن وڏن شهرن ۾ 21 توپن جي سلامي ڏني وئي، وڏي شان ۽ شوڪت سان ملڪ جي برقي ميڊيا توڙي اخبارن ۾ خوشيءَ جو اظهار ڪيو ويو. ايتري تائين جو ملڪ جتي اسڪولن ۾ شاگردن کي به ان خوشيءَ جي خبر ۾ شامل ڪيو ويو. استاد پنهنجي ليڪچر ۾ اها خبر ٻڌائيندا رهيا.

ٻئي طرف جيڪڏهن اسان جي ملڪ طرف نظر وڌي وڃي ته اوهان کي نظر ايندو ته اسان ملڪ جي باني قائد اعظم محمد علي جناح ۽ ان جي ڀيڻ مادر ملت محترمه فاطمه جناح سان ڇا ڪيو ۽ جناح صاحب جي حال حيات ڏوهٽي سان ڪراچيءَ ۾ ڇا ڪري رهيا آهيون، ان ويچاري کي پنهنجو سر ڍڪڻ لاءِ گهر ڪونهي. اهو ويچارو پنهنجي ٻارن سميت ڪرائي جي هڪ فليٽ ۾ گذر سفر ڪري رهيو آهي. گهر جي مالڪ طرفان هن کي نوٽيس به اچي رهيا آهن، اوهان اندازو لڳايو ته ڪيتري حد جي بي حسي ۽ بي حيائي آهي جو لقب ۾ قائد اعظم پر ان جي ڏوهٽي کي اجهو ڪونهي. اوهان وري مادر ملت محترمه فاطمه جناح سان ٿيل حالت بابت ٻڌايان ته صدر ايوب خان جي خلاف محترمه فاطمه جناح جو انتخابي نشان ”فانوس“ ۽ ايوب خان جو نشان ”گل“ هيو. اليڪشن مهم هلي رهي هئي، چونڊ مهم دوران گوجرانوالا ۾ غلام دستگير خان ايوب خان جي طرفان چونڊ مهم هلائي، جنهن ۾ هُن محترمه جي انتخابي نشان ”فانوس“ سان به تذليل ڪئي وئي، اهو غلام دستگير، جنهن جو پٽ خرم دستگير خان، اڄڪلهه پاڪستان مسلم ليگ (نواز) جو موجوده وفاقي وزير آهي. اوهان ان مان ڇا ٿا اندازو هڻي سگهو ته اسان پنهنجن محسنن سان ڪهڙو حشر ڪيو آهي ۽ اڃان اهو حشر جاري آهي. ڇا اُها قوم زنده رهي سگهي ٿي، جنهن پنهنجي قومي ابي ۽ قومي ماءُ سان اهڙي ويڌن ڪئي هجي. پنهنجي پيءُ ۽ ماءُ سان ته احسان ڪرڻ جو حڪم ڪيو ويو آهي ته پوءِ اسان اسلام جي نالي تي حاصل ٿيل ملڪ سان ڪيترا وفادار آهيون ۽ ان تي ڪهڙو احسان ڪري رهيا آهيون.

جيڪڏهن اڃان اڳتي هلندا ته اوهان کي محترم جناب ذوالفقار علي ڀٽي سان ٿيل واردات جو پتو پوندو، جنهن کي اسان بيدرديءَ سان ڦاسيءَ تي چاڙهي ڇڏيو. ذوالفقار علي ڀٽو صاحب هڪ اهڙو اڳواڻ هيو، جنهن قوم کان واعدو ورتو هو ته جيڪڏهن اسان کي اَن جي بدران گاهه کائڻو پوي ته ڇا کائيندا؟ جنهن تي قوم ان کي مثبت جواب ڏنو ۽ هن عوام جي سيلابي مدد سان پاڪستان کي ائٽمي طاقت بڻايو ۽ هو ڊاڪٽر عبدالقدير خان کي يورپ مان کڻي آيو ۽ عوام کي اهڙو تحفو ڏنائين جنهن سان پاڪستان اسلامي دنيا جو اڪيلو ائٽمي طاقت بڻجي ويو. اسان ان جي اولاد سان به ڇا ڪيو، اُهو به اوهان چڱي طرح ڄاڻو ٿا جو اڄ ڀٽي صاحب جو فڪر ته نه رهيو پر ان جي اولاد ۾ وڃي ننڍا ٻالڪ رهيا آهن.

جيڪڏهن اڃان به اڳتي ايندا ته اسان جيڪو حشر پاڪستان جي ائٽمي سائنسدان ڊاڪٽر عبدالقدير خان سان ڪيو اهو به اوهان کي معلوم آهي ته کيس هڪ فوجي جنرل سوالن ۽ جوابن جي ڪٽهڙي ۾ اچي بيهاريو. ٿئي ته ائين ها جو اولهه جي اسريل ملڪن وانگر اهڙن اڻ ملهه هيرن جي عزت ڪئي وڃي ها ۽ انهن کي اهڙو عظيم مان مرتبو ڏنو وڃي ها جو انهن جي پيڙهين کي سک هجي، عزت هجي، دنيا انهن جي زيارت ڪرڻ لاءِ تڙپي ها. پر، اسان جي اخلاقي وسعت ۽ قلبي سڪون جي نه هجڻ ڪري اڄ قائد اعظم رحه جو مقبرو ته آهي پر ان جي پوٽي کي ذاتي گهر ناهي. اسان مسئلن جي اڳيان ته ڪيترائي ايڪڙ زمين خالي رکي آهي پر ان جي وارثن کي هڪ ڇت به ڏئي نه سگهيا آهيون.

مرحوم ذوالفقار علي ڀٽو، عظيم اڳواڻ ۽ جرئت جو مالڪ جنهن دنيا کي ٻڌايو ته پاڪستان ڇا آهي، ان جو ثبوت هن گڏيل قومن جي ايوانن ۾ ويهي ڏنو، گڏيل قومن هي غلط فيصلن وارن ڪاغذن کي پرزا پرزا ڪري ڇڏيو. اهو عظيم اڳواڻ جنهن سڀني اسلامي ملڪن کي هڪ ڪيو. ڪو به اولاد تيستائين تڳي نٿو سگهي، جيسين اُهي پنهنجي والدين سان احسان نٿو ڪري ۽ الله پاڪ جو فيصلو آهي ته جنهن والدين جي نافرماني ڪئي ته ان جا ٻئي جهان تباهه ٿي ويندا.

اُهو ئي سبب آهي جو اسان اڄ تباهه ۽ برباد آهيون ۽ سڄي دنيا ۾ در در ڌڪا ۽ ٿاٻا ٿا کائيندا وتئون. دنيا ۾ عرب ملڪن کان وٺي اولهه آمريڪا، آسٽريليا ۽ آفريڪا جي ملڪن ۾ ويچارو پاڪستاني بي سهارو آهي، جنهن به ملڪ ۾ وڃ ته اُتي پاڪستاني مجبور آهي ۽ بيوس آهي، جتي به پير رک ته همراهه مجبور آهي ۽ حلال و حرام رزق ڪمائي پنهنجي پوئتي رهيل خاندان لاءِ مشغول آهي. ٿورو سوچيو ته ڇا اسان جي ملڪ ۾ ڪو عرب، ڪو انگريز ڪو فرانسيسي، آمريڪي يا آسٽريلوي اچي محنت ۽ مزدوري ڪري ٿو؟ ڇا پاڪستان صرف ان خرم دستگير جو آهي، ڇا پاڪستان صرف جنرل ضياءُ الحق جو يا فوجي آمر جنرل پرويز مشرف جو آهي. پاڪستان ناهي ته پرديس ۾ رهندڙ منهنجو ۽ تنهنجو ناهي. مان ۽ تون اُهي انسان آهيون جو پنهنجو رت ولوڙي، پنهنجو خون ساڙي، پنهنجي جواني ختم ڪري، انتظار ۾ ويٺل ڀيڻ ۽ ڀاءُ، پيءُ ۽ ماءُ، انتظار ۾ ويٺل زال لاءِ بي درديءَ سان محنت ۽ مزدوري ڪري رهيا آهيون ۽ پاڪستان جي معيشت لاءِ پئسو موڪلي رهيا آهيون. اڳيان وري اُهي ئي غدار، اُهو ئي پئسو کڻي ساڳين ئي ملڪن ۾ اربين روپين جي سيڙپڪاري ڪري پاڻ کي ۽ پنهنجي اولاد کي محفوظ بڻائي رهيا آهن.

آئون سوئيدن ۾ رهان ٿو ۽ ڪجهه اٿڻي ويهڻي به آهي، پوءِ مختلف ماڻهن سان سلام دعا به آهي ۽ ڪڏهن ڪڏهن گڏجاڻين ۾ ملاقات به ٿيو وڃي سو اسٽاڪ هوم ۾ راولپنڊيءَ جو معين احمد نالي هڪ شخص رهندو آهي، جنهن کي اٽڪل 15 سالن جو عرصو گذريو آهي، پر ان همراهه جا هتان جا ڪاغذ پٽ سڌا ٿي نه سگهيا آهن. معين جي عمر اٽڪل 55 ورهيه آهي. هو پنهنجي اولاد ۽ نالي خاطر هتي رهيو پيو آهي ۽ غير قانوني طور تي ڪجهه ڪمائي ٻچن کي موڪليندو آهي. همراهه 15 سالن جي ڊگهي عرصي کان پنهنجي زال ۽ اولاد جو منهن نه ڏسي سگهيو آهي. هينئر ته هن سان نفسياتي چڪر به ٿي ويو آهي، پٺيان سندس جوان جماڻ ڌيءُ پيءُ جي جدائي جي صدمي جي ڪري لاڏاڻو ڪري وئي، سندس زال دل جي مريضه آهي پر ويچارو پاڪستان نٿو وڃي سگهي جو هو سوچي ٿو ته منهنجي ٻارن ۽ زال کي خرچ ڪير ڏيندو. ايترا ڪيترائي مثال آهن جن ويچارن پنهنجون حياتيون ساڙي ۽ ختم ڪري ڇڏيون. آخر انهن جو ڪير ذميوار آهي، ان جو ذميوار اهو استحصالي طبقو آهي، جنهن قوم جي ابي سميت قوم جي ڪيترن ئي بي بها عورتن جي عزت نه ڪئي. اهو ئي سبب آهي جو سوئيڊن جي شهزادي کي سندس پٽ ڄمڻ تي خوشيون ملهايون پيون وڃن، انهن جي خاندان کي عزت ڏني ٿي وڃي، جيڪي زنده آهن. باقي هت بادشاهن جي قبرن تي ڪي وڏا ميدان ۽ باغ ناهن. انهن جو اهو شان ۽ شوڪت ڏسي اسان جو من ويچارو مايوس ٿيو وڃي، پنهنجي ئي شرم ۾ ٻڏيو وڃون ته ڇا اسان ڪيترا حاسد ۽ ظالم آهيون ته ڇا اسان وٽ صرف اهو ئي وڏيرو، پير، مير، چوڌري ئي آهي، باقي سڀ اونداهه آهي؟ پر نه! اُٿو، سجاڳيءَ جو جهنڊو کڻي، حق جي ڪڍ لڳو ۽ انصاف ڪريو. انصاف ڪريو پنهنجين اهڙين هستين سان، قوم جي ابي جي پونئيرن کي اهڙي شهزادي جي حيثيت ڏيو، قوم جي ابي کي ان جي قبر مٿان پهري جي نه، قوم جي ابي کي ڪيترن ئي ايڪڙن تي ٻڌل باغ جي نه پر اهڙن املهه ماڻڪ هيرن کي سندن حيثيت ٻڌائڻ جي ضرورت آهي پوءِ ان ۾ ڇو نه پاڪستان جو تصور ڏيندڙ، پاڪستان کي ٺاهيندڙ، پاڪستان کي ائٽمي قوت بنائيندڙ يا جمهوريت تان قربان ٿيندڙ شامل ڇو نه هجن. جيئن ڀٽ ڌڻي فرمايو آهي ته:

پوکڻي اٿئي ته پوک نه ته ويندءِ منه چڙهي،

پاڻي به ٿيندءِ پوئرو پو سکي ٿيندءِ سوڪ،

جتي لڻندو سارو لوڪ، اُتي سڪندين هڪ سنگ لاءِ

(شاهه)

Hussain.ujan@yahoo.com

 

ڪامريڊ تاج محمد ابڙو هڪ يگانو ڪردار: سجاد علي قائمخاني عمرڪوٽ

ٿوهر جي ٽاريءَ تي گل گلابن جا ،

رات ڏٺاسين خوب ڪرشماخوابن جا .

تاريخ انهن کي ڪڏهن به فراموش ناهي ڪندي جيڪي ماڻهو خود تاريخ کي مرتب ڪندا آهن ، معاشري ۾ هي ماڻهو ڪو به ڪم مان مرتبي حاصل ڪرڻ لاءِ ناهن ڪندا پر ان ڪم ۾ محنت ، جدوجهد کي مڃتا سان نوازڻ معاشري جي مجبوري بڻجي پوندي آهي ان فرد جي هر تخليق معاشري ۾ تبديلي جو باعث بڻجندي آهي پر معاشري تي مسلط خيالات ، حڪمراني طبقي جا قدر، عام رواجي اخلاقيات ان فرد مٿان هر پل جبر طور لاڳو ٿندا رهندا آهن پربغاوت جي عمل ۾ هي جبر ان ماڻهو جي ارادن ۽ نظرين ۾ اڃا به طاقت پيدا ڪندا آهن ته هو معاشري مان انهيءِ غلاظت کي ختم ڪري هر جبر کي چيلينج ڪري ۽ عام عوام کي خوشحالي جي ضمانت ڏياري ائين هن خطي به عظيم ذهن ۽ جدوجهد کي زندگي ارپيندڙفرد ڏٺا آهن پر انهن فردن هن خطي جي ڪنهن به اصول تي سودو نه ڪيو ۽ تيزي سان نوان محاذ تعمير ڪندي ، انقلابي مقصدن کي پورهيت تائين پهچائيندي هڪ سوشلسٽ تبديلي لاءِ هن طبقي کي متحرڪ ڪندا رهيا ، اهڙي عظيم شخصيتن ۾ هڪ ٿر جي وارسين ڀٽن جيڏو وسيع دل رکندڙ مٺي جي گڊي واري ڀٽ کان به وڏيڪ حوصلي جرت جي مالڪ سنڌ ڄائي  سنڌ جو نامور اديب ، دانشور ، جج ، سياستدان ، سماج سڌارڪ ، صحافي ۽ استاد مرحوم ڪامريڊ تاج محمد ابڙو جي 10 مارچ 2016 تي 30 وهين ورسي سنڌ سميت پوري ملڪ ۾ ملهائي  پئي وڃي، ائين سمجهجي ته ڪامريڊ تاج محمد ابڙو جي جدوجهد کي سرخ سلام پيش ڪرڻ جو ڏينهن آهي ،

مرحوم ڪامريڊ تاج محمد ابڙو 08 اگسٽ 1924ع تي شهدادڪوٽ ۾ ڄايو شاگردي واري دور کان ئي پاڻ سياست ۾ سرگرم رهيا مسلم ليگ ، ڪميونسٽ پارٽي ، جئي سنڌ، سنڌ هاري ڪميٽي ۽ پيپلزپارٽي سميت هر تحريڪ ۾ ڀرپور حصو ورتائين ،   مرحوم ڪامريڊ تاج محمد ابڙو کي ايشاءِ جي سڀ کان وڏي ۽ وڏي ادبي تنظيم سنڌي ادبي سنگت سنڌ جي باني ميمبرن ۾ سندن جو شمار ڪيو ويندو هو ، هن لاڙڪاڻي واري اوطاق ۾ سنڌ ۽ هند جي مشهور اوطاق  مرحوم ڪامريڊ تاج محمد ابڙو تي سنڌي ادبي سنگت جو اجلاس ڪوٺرايو ادب وسيلي  انقلاب جي ان تحريڪ  روشني جو پهريون ڪرڻو لاڙڪاڻي ۾ مرحوم ڪامريڊ تاج محمد ابڙو جي اوطاق تان اڀريو ۽ پوري سنڌ ۾ ڦهلجي ويو ۽ سموري سنڌ ۾ جرڪائي ڇڏيائين ،  مرحوم ڪامريڊ تاج محمد ابڙو پاڪستان کان پهرين مشهور سنڌي مسلمانن جي واحد اخبار  الواحيد جو  ڪجهه وقت ايڊيٽر پڻ رهيو جنهن اخبار پاڪستان جي تاريخ ۾ اهم ڪردار ادا ڪيو پاڻ قائد اعظم محمد علي جناح جي انگريزي اخبار ڊان جو سب ايڊيٽر پڻ رهيو،  مرحوم ڪامريڊ تاج محمد ابڙو لاڙڪاڻي جي تاريخ جي سڀ کان وڏي لائبريري سر شاهنواز ڀٽو ميموريل لائبريري جو بنياد به رکرايو جيڪا اپر سنڌ جي واحد لائبريري آهي جتان هزارن جي تعداد ۾ اڄ به شاگرد اديب قانوندان  ۽ دانشور فيضياب ٿي رهيا آهن،  مرحوم ڪامريڊ تاج محمد ابڙو پاڪستان جو واحد اڳواڻ هو جنهن کي ڪامريڊ جو لقب مليو ،  مرحوم ڪامريڊ تاج محمد ابڙو هن کان پهريان خان عبدالولي خان ،  جي ايم سيد ، ذوالفقار علي ڀٽو ، مخدوم طالب المولي  ۽ ٻين ملڪن جي ناميار سياستدانن سان ڪلهو ڪلهي سان ملائي سياست ڪئي وڏيرا شاهي جي اثر رسوخ رکندڙ ضلعي جيڪب آباد ۾ شيخ عبدلامجيد سنڌي ، جي ايم سيد ۽ غلام محمد لغاري جن جي مدد سان ضلعي ۾ هاري ڪاميٽيءِ جو بنياد وڌو،

مرحوم ڪامريڊ تاج محمد ابڙوهڪ جج جي حيثيت ۾ جج وارو فرض نڀائيندو رهيو پر پنهنجي سڃاڻپ وارو عام سادگي واري زندگي جو طبقو هميشه ساڻس گڏ رهيو پاڻ وڪالت کي به وڏي زندگي ڏنائون ، جنهن ۾ هنن مظلومن، پورهيتن جا ڪيس مفت ۾ مختلف ڪورٽن ۾ پيش ڪيا ۽ ڪاميابي  ماڻيون ، عام طرز جي سادگي هن ڪڏهن به پنهنجي شخصيت کان جدا  نه ڪئي ،هن مهل به سنڌ صوبي جو عوام  مرحوم ڪامريڊ تاج محمد ابڙو جي سياسي ، سماجي ، ادبي ، قانوني خدمتن کي مد نظر رکندي سنڌ جي مختلف ضلعن ۾ مرحوم ڪامريڊ تاج محمد ابڙو يارگار ڪاميٽيون ۽ بزم مرحوم ڪامريڊ تاج محمد ابڙو جا بنياد وجهي سندن جون هر سال سنڌ صوبي ۾ ورسيون  ملهائي رهيا آهن ۽ سنڌ جي مختلف شهرن ۾ سندس جي نالي پويان لائبريريون ، روڊ ۽ پارڪ منسوب ٿيل آهن ، اهڙيون شخصيتون زنده قومن جو اهڃاڻ هونديون آهن ۽ نوجوان ٽهيءِ لاءِ مڪمل مشعل راهه هونديون آهن اهڙي خاص انسانن جي خدمتن ڪارڻ ئي سنڌ جيئي ٿي  ۽ انهن جي خدمتن کي سرخ سلام ۽ اخراج تحسين  پيش ڪري ٿي..

sajaadkk@gmail.com

 

 

 

شهباز تاثير جي ساڍن 4 سالن بعد بازيابي

پنجاب جي مقتول گورنر سلمان تاثير جو پٽ شهباز تاثير تقريبن ساڍن 4 سالن بعد آزاد ٿي ويو آهي. آءِ ايس پي آر موجب شهباز تاثير کي بلوچستان علائقي ڪچلاڪ مان بازياب ڪرايو ويو آهي. گهرو وزير چوڌري نثار به تصديق ڪري ڇڏي آهي. بلوچستان ۾ سي ٽي ڊي جي سربراهه اعتزاز گورايا چيو ته پوليس ۽ انٽيليجنس ادارن ڳجهي اطلاع تي ڪچلاڪ جي هڪ ڪمپائونڊ ۾ ڪارروائي ڪئي. ڪمپائونڊ مان هڪ ئي شخص مليو. جنهن پنهنجو نالو شهباز تاثير والد جو نالو سلمان تاثير ٻڌايو. بلوچستان سرڪار جي ترجمان به بازيابي جي تصديق ڪئي.

شهباز تاثير کي 5 سال اڳ 26 آگسٽ 2011ع ۾ لاهور عالم روڊ کان اغوا ڪيو ويو هو. تحريڪ طالبان جي بيان ۾ چيو ويو ته 2012ع ۾ شهباز تاثير ڊرون حملن ۾ ماريو ويو آهي پر اها خبر غلط ثابت ٿي. جولاءِ 2013ع ۾ لاهور پوليس 4 ماڻهن کي گرفتار ڪيو پر سندن گرفتاري باوجود شهباز تاثير جي بازيابي ممڪن نه ٿي. شهباز تاثير جي آزادي بابت سندس گهر وارن کي آگاهه ڪيو ويو.

وفاقي گهرو وزير چوڌري نثار علي خان سينيٽ ۾ شهباز تاثير جي بازيابي جي تصديق ڪندي چيو ته سلمان تاثير جي پٽ کي بلوچستان ۾ خاص آپريشن ڪرائي بازياب ڪرايو ويو آهي.

شهباز تاثير ڪوئيٽا مان بازياب ٿيڻ کانپوءِ خاص اڏام ذريعي لاهور پنهنجي گهر پهچي ويو، لاهور ايئرپورٽ تي شهباز تاثير جي زال سوڌو ٻين گهر ڀاتين آجيان ڪئي، ان موقعي تي شهباز جي امڙ پنهنجي جگر جي ٽڪري کي ڏسندي ئي ڀاڪر ۾ ڀري ورتو ۽ خوشي جا ڳوڙها وهائيندي کيس چميون ڏيندي رهي،جنهن سبب ماحول جذباتي نظر آيو، شهباز تاثير کي ايئرپورٽ کان گهر اماڻڻ لاءِ پيپلز پارٽي جي چيئرمين بلاول ڀٽو زرداري جي بلٽ پروف گاڏي استعمال ڪئي وئي، سندس قافلي ۾ پوليس ۽ سيڪيورٽي ادارن جون گاڏيون به شامل هيون، اٽڪل ساڍن چئن سالن کانپوءِ پنهنجي گهر پهچڻ تي شهباز تاثير سڀني مائٽن سان هڪ هڪ ٿي مليو، جتي پڻ جذباتي نظر اچي رهيا هئا.  شهباز تاثير کي گذريل ڏينهن ڪوئيٽا جي علائقي ڪچلاڪ مان بازياب ڪرايو ويو هو، جنهن کي لاهور پهچائڻ لاءِ راولپنڊِي مان خاص جهاز ڪوئيٽا اماڻيو ويو ، جنهن کانپوءِ کيس خالد ايئربيس تان خاص جهاز ذريعي لاهور روانو ڪيو ويو،

ميِڊيا ۾ اهي به خبرون آهن ته شهباز تاثير جي اغوا ۾ يونيورسٽي جو شاگرد ملوث نڪتو، اغوا ڪندرن جو ڪراچي هوائي اڏي تي حملي آورن سان به ڳانڍاپو رهيو. ازبڪستان اسلامي تحريڪ جي ملوث قرار ڏنو پيو وڃي. نجي ٽي وي جي پروگرام ۾ ٻڌايو ويو ته شهباز تاثير کي اغوا بعد لاهور جي وليشيا سوسائٽي ۾ رکيو ويو. ڪجهه ڏينهن بعد کيس ٻاهر منتقل ڪيو ويو. ڪراچي هوائي اڏي تي حملو ڪندڙن بنون ۾ هڪ فون تي رابطو ڪيو هو. بنون  ارن فون تان وري تاثير خاندان سان رابطو ڪيو هو، جنهن ۾ ساڻن شهباز تاثير جي به ڳالهه ٻول ڪرائي وئي هئي. شهباز تاثير جي اغوا  ۾ ملوث عثمان بصرا جو لشرڪ جهنگوي سان تعلق ٻڌايو پيو وڃي. ڳجهن ادارن دهشتگرد گروهن جي ڳٺ جوڙ جي تصديق ڪئي.

 

ملڪ مان دهشتگردي جو خاتمو پهرين اهميت ۽ قومي عزم آهي: نواز شريف/راحيل شريف

اسلام آباد(بيورو) ملڪ جي فوجي ۽ سياسي قيادت شبقدرماڪي جي مذمت ڪندي پاڪستان مان دهشتگردي جي پوري ريت خاتمي جو عزم ورجايو آهي، وزيراعظم نواز شريف جو چوڻ آهي ته ملڪ مان دهشتگردي جو خاتمو پهرين اهميت ۽ قومي عزم آهي، رپورٽن مطابق اسلام آباد ۾ وزيراعظم نواز شريف جي صدارت هيٺ اعليٰ سطح جو اجلاس ٿيو، جنهن ۾ آرمي چيف جنرل راحيل شريف، آئي ايس آئي جو ڊائريڪٽر جنرل ليفٽيننٽ جنرل رضوان اختر، وفاقي گهرو وزير چوڌري نثار علي خان، پرڏيهي سيڪريٽري ۽ قومي سلامتي جو صلاحڪار ناصر جنجوعا شامل ٿيا، ذريعن مطابق اجلاس ۾ ملڪ ۽ خطي جي سيڪيورٽي واري صورتحال تي خيالن جي ڏي وٺ ڪرڻ سان شب قدر ڌماڪي جي مذمت ڪئي وئي، اجلاس ۾ دهشتگردي جي خاتمي واري عزم جو ورجاءُ ڪيو ويو.

 

جن جي سزا 2025ع ۽ 2027ع ۾ ختم ٿيڻي هئي، انهن کي پيرول تي ڇڏي حڪومت اهڙي مهرباني ڇو ڪئي؟ : چيف جسٽس

ڪراچي (اسٽاف رپورٽر) سپريم ڪورٽ جي چيف جسٽس انور ظهير جمالي چيو آهي ته وفاق، سنڌ حڪومت ۽ سمورا اسٽيڪ هولڊر ڪراچي ۾ رينجرز جي اعتراضن جو حل ڳولين، سپريم ڪورٽ ڪراچي رجسٽري ۾ چيف جسٽس انور ظهير جمالي جي اڳواڻي ۾ 5 رڪني بينچ بدامني ڪيس بابت فيصلي تي عمل جي حوالي سان درخواست جي ٻڌڻي ڪئي، ان موقعي تي آئي جي سنڌ غلام حيدر جمالي ٽارگيٽ ڪلنگ جي حوالي سان رپورٽ جمع ڪرائي، جنهن ۾ ٻڌايو ويو ته 2015ع ۾ ٽارگيٽ ڪلنگ جا 159 واقعا ٿيا، جن مان 83 واقعن جا ڪيس داخل ڪيا ويا، جڏهن ته 53 جوابدار گرفتار ٿيا ۽ 15 پوليس مقابلن ۾ مارجي ويا، اهڙي ريت 25 ڪيسن بابت پوليس جاچ ڪري رهي آهي، جسٽس امير هاني مسلم اهڙي رپورٽ تي آئي جي سنڌ کي مخاطب ٿنيدي ريمارڪس ڏنا ته توهان جي رپورٽ اسان جي لاءِ ڪاغذ جا ٽڪرا آهن، ان سان اسان جي ڪا دلچسپي ناهي، رپورٽ ۾ انگن اکرن کانسواءِ ڪجهه به ناهي، هن  آئي جي کي چيو ته لڳي ٿو ته توهان ڪجهه ٻڌائڻ نه ٿا چاهيو، توهان جي ڳالهين مان لڳي ٿو ته توهان جو ڪراچي پوليس تي ڪو ڪنٽرول ناهي، ان تي آئي جي سنڌ چيو ته عدالتي ريمارڪس نامناسب آهن، جسٽس امير هاني مسلم کيس چيو ته توهان جي ڪارڪردگي جي حساب سان اهي ريمارڪس بلڪل مناسب آهن، جيڪڏهن توهان کي اعتراض آهي ته هڪ درخواست ڏيو، عدالت آئي جي سنڌ کان ٽارگيٽ ڪلنگ جي التويٰ ۾ پيل 57 ڪيسن جا تفصيل گهرائيندي چيو ته انهن ڪيسن جي رپورٽ خميس تائين جمع ڪرائي وڃي. ٻڌڻي دوران سنڌ حڪومت جي پيرول آفيسر 2015ع ۾ پيرول تي آزاد ڪيل ماڻهن جي فهرست عدالت ۾ جمع ڪرائي، پيرول آفيسر عدالت کي ٻڌايو ته ڀنگ لاءِ اغوا ۽ دهشتگردي جي ڪيس ۾ عمر قيد جي سزا مليل ٻن ڏوهارين کي ڇڏيو ويو، جنهن تي عدالت ريمارڪس ڏيندي چيو ته اغوا، دهشتگردي ۽ سنگين ڪيسن ۾ سزا مليل ڏوهارين کي پيرول جي سهولت نه ٿي ڏئي سگهجي، ٻڌايو وڃي ته ڀنگ لاءِ اغوا جي ڪيسن ۾ سزا مليل ڏوهارين کي ڪيئن ڇڏيو ويو؟ سپريم ڪورٽ 2012ع کان هن مهل تائين پيرول تي آزاد ٿيلن جي فهرست گهرائيندي پنهنجي ريمارڪس ۾ چيو ته جن جي سزا 2025ع ۽ 2027ع ۾ ختم ٿيڻي هئي، انهن کي پيرول تي ڇو ڇڏيو ويو ۽ حڪومت اهڙي مهرباني ڇو ڪئي؟ چيف جسٽس انور ظهير جمالي آئي جي سنڌ کي مخاطب ٿيندي ريمارڪس ڏنا ته ادارن ۾ ٽڪراءُ ختم ڪيو وڃي، شهر جي ڪشادي مفاد ۾ امن لاءِ گڏجي ڪم ڪيو وڃي، پوليس کاتي ۾ ڪوبه غلط ڪم ٿيو ته اسان توهان کان پڇنداسين، جنهن کانپوءِ ڪيس جي وڌيڪ ٻڌڻي خميس تائين روڪي وئي.

 

وزيراعظم طاقت جي زور تي فيصلا ڪري وفاق جي مدد بدران ٽڪراءُ جو سبب بڻجي رهيو آهي: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته وزيراعظم طاقت جي زور تي فيصلا ڪري وفاق جي مدد بدران ٽڪراءَ جو سبب بڻجي رهيو آهي سينيٽ فيڊريشن جي علامت آهي ڪجهه ماڻهو عدالتن کان وڌيڪ طاقتور آهن ان لاءِ وزيراعظم وفاق سان نه ٽڪرائي گڏيل مفادن واري ڪائونسل جو اجلاس ٿيو ته پوءِ وفاق بمقابلا طاقتور حڪومت هوندو. ميڊيا سان ڳالهائيندي خورشيد شاهه چيو ته سينيٽ وفاق جي علامت آهي ۽ اتان رد ٿيڻ کانپوءِ طاقت جي زور تي ڪنهن به بل جو منظور ٿيڻ هڪ خطرناڪ عمل آهي ۽ اها وفاق جي علامت کي ختم ڪرڻ جي برابر آهي حڪومت جي اهڙي قدم سان سٺو پيغام نه ويندو. هن چيوته نواز شريف وفاق جي مدد بدران ان سان ٽڪراءُ جو سبب بڻجي رهيو آهي ڪجهه ماڻهو عدالتن کان وڌيڪ طاقتور آهن ان لاءِ وزيراعظم وفاق سان نه ٽڪرائي. خورشيد شاهه چيو ته وزيراعظم کي صلاح ڏيان ٿو ته پي آءِ اي نجڪاري بل جو معاملو گڏيل مفادن واري ڪائونسل کڻي وڃي ڇو ته اتان منظور ٿيڻ کانپوءِ وفاق جي منظوري جو تاثر ملندو طاقت جي زور تي فيصلا ته ڊڪٽيٽر ڪن ٿا مشرف ۽ ضياءُ الحق به ائين ئي ڪيو هو. هن چيو ته گڏيل. مفادن واري ڪائونسل ۾ وڃڻ جو فيصلو آئيني ضرور آهي جڏهن ته اخلاقي ۽ سياسي ناهي هاڻي اسان گڏيل اجلاس ۾ شرڪت ڪنداسين ۽ جيڪڏهن اجلاس ۾ سينيٽ جي راءِ کي نظر انداز ڪيو ويو ته وفاق لاءِ سٺو پيغام نه ويندو اپوزيشن ليڊر چيو ته ڪيترين ئي جماعتن سان انهيءَ معاملي تي رابطي ۾ آهيون اسان پارليامينٽ کي بالادست سمجهون ٿا ان لاءِ پنهنجو موقف اتي پيش ڪنداسين. ان ۾ سخت احتجاج ڪيو ويندو. گڏيل مفادن واري ڪائونسل جو اجلاس ٿيو ته پوءِ وفاق بمقابلا طاقتور حڪومت هوندو.

 

سنڌ ۾ پهرين ٽيڪنيڪل يونيورسٽي کي قائم ڪرڻ جي شروعات ڪري ڇڏي آهي: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه بينظير ڀٽو شهيد يوٿ ڊولپمينٽ پروگرام (بي بي ايس واءِ ڊي پي) کي هدايت ڪئي آهي ته نرسنگ، پيرا ميڊڪس ۽ هوٽل مئنجمينٽ جي شعبن ۾ به تربيت جو اهتمام ڪيو وڃي ته جيئن اسان جا تربيت يافته نوجوان خاص طور تي نياڻيون نه رڳو صوبي ۾ بلڪه عرب ملڪن ۾ به روزگار جي موقعن مان فائدو حاصل ڪن. هن اها ڳالهه اڄ اڱاري ڏينهن وزير اعليٰ هائوس ۾ بي بي ايس واءِ ڊي پي جي اجلاس جي صدارت ڪندي ڪئي. اجلاس ۾ چيئرمين ريٽائرڊ ايئرمارشل رياض الدين شيخ ۽ وڏي وزير جو پرنسپل سيڪريٽري علم الدين بلو، ناڻي وارو سيڪريٽري سهيل راجپوت ۽ بي بي واءِ ايس ڊي پي جي ٻين آفيسرن شرڪت ڪئي. سنڌ جي  وڏي وزير چيو ته سرڪاري ۽  خانگي اسپتالن ۾ نرسن ۽ پيرا ميڊيڪل اسٽاف جي شديد ضرورت آهي انڪري بي بي ايس واءِ ڊي پي کي گهرجي ته هو انهن شعبن ۾ تربيت جي شروعات ڪري. بي بي ايس واءِ ڊي پي کي هدايت ڪندي هن چيو ته عرب ملڪن ۾ پيرا ميڊيڪل اسٽاف ۽ نرسن جي تمام گهٽي گهرج آهي ۽ اسان کي اهڙن موقعن مان فائدو وٺڻ گهرجي. وڏي وزير کي بريفنگ ڏيندي پروگرام جي چيئرمين چيو ته بي بي ايس واءِ ڊي پي 34 مختلف شعبن ۾ بشمول صحت واري شعبي ۾ اِي سي جِي ٽيڪنيشن، انيسٿيا، ايڪس ري ٽيڪنيشن، او ٽي ٽيڪنيشن، ليب ٽيڪنيشن جي ڪورسن ۾ نوجوانن کي تربيت فراهم ڪري رهي آهي پر نياڻيون وڌيڪ بيوٽيشن، اسٽيچنگ ۽ ڪمپيوٽر ڪورسز ۾ تربيت جون خواهشمند آهن. سنڌ جي وڏي وزير چيو ته هن سنڌ ۾ پهرين ٽيڪنيڪل يونيورسٽي کي قائم ڪرڻ لاءِ ڪم جي شروعات ڪري ڇڏي آهي جنهن جي ڪاغڊي ڪارروائي تقريبن مڪمل ٿي چڪي آهي. ان تي وڏي وزير جي يونيورسٽيز ۽ بورڊ واري سيڪريٽري اقبال دراني وڏي وزير کي يونيورسٽي جي ڊرافٽ ۽ ٽريڊز بابت ٻڌائيندي چيو ته هنرمند نوجوان جيڪي پرڏيهه ملازمت جا خواهشمند آهن انهن کي سرٽيفڪيٽس جي ضرورت هوندي آهي، اها يونيورسٽي نوجوانن خاص طور تي نياڻين جي ان ضرورت جو احاطو ڪندي. پروگرام جي چيئرمين بي بي ايس واءِ ڊي پي جي ڪاميابين بابت ٻڌائيندي چيو ته مختلف شعبن ۾ 292000 نوجوانن کي ڪاميابيءَ سان تربيت ڏني وئي آهي. واضع رهي ته بي بي ايس واءِ ڊي پي کي 9-2008ع ۾ متعارف ڪرايو ويو هو جنهن جو مقصد غربت ۽ بيروزگاري جهڙن مسئلن کي قابو ڪرڻ ۽ بيروزگار نوجوانن کي مفت تربيت فراهم ڪرڻ هو. هن ٻڌايو ته تربيت پبلڪ پرائيوٽ پارٽنرشپ تحت ڏني وئي. هن چيو ته ڪامياب تربيتي پروگرام کي ڏسندي عالمي بينڪ ايس ايس ڊي پي تحت تربيت لاءِ فنڊ فراهمي تي راضپو ڏيکاريو آهي. سنڌ جي وڏي وزير چيو ته هو جاچ ڪرڻ لاءِ ٽيمون موڪليندو جيڪي تربيتي مرڪزن جو دورو ڪنديون ۽ سرڪاري ۽ خانگي شعبن ۾ ڏني ويندڙ تربيت جو جائزو وٺنديون. هن چيو ته بهتر ۽ مناسب تربيت کي يقيني بڻايو ويندو.

 

ذوالفقار علي ڀٽو جو قتل عدالتي دهشتگردي هئي: مولابخش چانڊيو

ڪراچي (اسٽاف رپورٽر)سنڌ جي سڌسماءِ واري صلاحڪار مولا بخش چانڊيو چيو آهي ته ذوالفقار علي ڀٽو جو قتل عدالتي دهشتگردي هئي. شهيد بينظير کي به دهشتگردي جو نشانو بڻايو ويو. پنجاب ۽ ٻين صوبن جي وچ ۾ فرق آهي. وزيراعظم به رڳو پنجاب جو ثابت ٿي ٿو.وفاق جي شڪل ڏيکارڻ بجاءِ پنجاب ڏسي ٿو. پاڪستان بچائڻو آهي ته صوبن کي حق ڏيڻا پوندا . اهڙن خيالن جو اظهار سنڌ جي سڌسماءِ واري صلاحڪار مولا بخش چانڊيو مقامي هوٽل ۾ عورتن جي عالمي ڏينهن جي موقعي تي وومن ميڊيا پاران ڪوٺايل هڪ سيمينار کان خطاب ڪندي چيو آهي . مولا بخش چانڊيو چيو ته لوڊشيڊنگ سميت مردم شماري ۽ حقن لاءِ اسين به مينار پاڪستان تي ڌرڻو هئي سگهون ٿا .هن چيو ته سنڌ جو وڏي وزير شريف آهي هو جمهوريت مخالفت قدم نه کڻندو. سندس چوڻ آهي ته اڳ نيب سنڌ ۾ غلط ڪيو پر ڪنهن دانهون نٿي ٻڌيون، هاڻ پنجاب ۾ هڪ کيس کنيو آهي ته دانهن نڪري وئي .ان چيو ته پنجاب رڳو لاهور نه آهي پنجاب جي به حالتون خراب آهن . سڌسماءِ واري صلاحڪار مولا بخش چانڊيو چيو ته مصطفيٰ ڪمال بابت هو نٿو ڳالهائڻ چاهي، اهو سندن اندروني معاملو آهي .پر اهو ضرور چئي سگهي ٿو ته هو ڪنهن جي ڪنهن جي آشيروار سان ضرور آيو هوندو، اها ڪارڪنن يا عوام به ٿي سگهي ٿي .ان چيو ته الطاف حسين اڄ به پارٽي جو ليڊر آهي .قائداعظم جي فرمان تي عمل نٿو ٿئي .اسلام عورتن کي عزت ۽ حق ڏنا آهن .سنڌ صوفين جي ڌرتي آهي اسان جو مرش دعورت جي عزت ڪئي آهي .اسان جي ليڊر به هڪ عورت هئي .هن تقريب ۾ سينيئر صحافي انور سن راءِ ،فوزيا شاهين،همابقائي سميت ٻين خطاب ڪيو آهي، صحافت ۾ ڪاميابيون ماڻيندڙ عورت کي شيلڊون ڏنون ويون.

 

ڪي پي ڪي ۾ عورتن جي تحفظ واري ٺهراءُ جو مسودو تيار ڪيو ويو آهي: عمران خان

پشاور (م.ڊ) پاڪستان تحريڪ انصاف جي چيئرمين عمران خان جو چوڻ آهي ته ڪي پي ڪي ۾ عورتن جي تحفظ لاءِ مسودو تيار ڪري اسلامي نظرياتي ڪائونسل ڏانهن موڪليو ويو آهي.پشاور ۾ بينظير ڀٽو شهيد يونورسٽي ۾ ميڊيا سان ڳالهائيندي عمران خان جو چوڻ هو ته خيبر پختون خوا انتهاپسنديءَ سبب سڀني کان وڌيڪ متاثر ٿيندڙ صوبو آهي ۽ اسان چاهيون ٿا ته اهڙو ٺراءُء پاس ٿئي جنهن سا صوبو متاثر ٿئي.ان لاءِ عورتن جي تحفظ لاءِ مسودو تيار ڪيو ويو آهي،جنهن ۾ عورتن جي حقن جي اڳواڻي هوندي،جڏهن ته مسودو اسلامي نظرياتي ڪائونسل ڏانهن موڪلي ڇڏيو آهي.عالمن سڳورن جي منظوري کانپوءِ اسيمبلي ۾ آڻي انهءَ تي بحث ڪيو ويندو.

 

اهو سچ آهي ته افغان طالبان پاڪستان ۾ حملا ڪري افغانستان ڀڄي وڃن ٿا: برطانيا جو اعتراف

اسلام آباد(بيورو) برطانيا جي پرڏيهي وزير فلپ هيمنڊ چيو آهي ته دهشتگردي خلاف ويڙهه ۾ پاڪستان سان گڏ آهيون، دهشتگرد پاڪستان ۾ حملا ڪري اوڀر افغانستان ۾ لڪي وڃن ٿا، اسلام آباد ۾ پرڏيهي معاملن واري صلاحڪار سرتاج عزيز سان ملاقات کانپوءِ گڏيل پريس ڪانفرنس کي خطاب ڪندي برطانوي پرڏيهي وزير چيو ته پاڪ – ڀارت ڳالهيون ڪشمير مسئلي سان مشروط نه هجڻ گهرجن، جڏهن ته اسان کي اميد آهي ته پاڪستان پٺاڻ ڪوٽ حملي جي جاچ ۾ اڳڀرائي ڪندو، هن چيو ته سرتاج عزيز سان ملاقات ۾ واپار ۽ دهتشتگردي جي معاملي تي ڳالهه ٻولهه ٿي، جڏهن ته افغانستان ۾ امن عمل ۽ پاڪ – ڀارت ڳالهين جي حوالي سان به خيالن جي ڏي وٺ ڪئي وئي، سندس چوڻ هو ته برطانيا، پاڪستان سان پنهنجي لاڳاپن کي اهميت ڏئي ٿو،اسان پاڪستان سان هر شبعي ۾ ڊگهي مدي وارو سهڪار وڌائڻ چاهيون ٿا، فلپ هيمنڊ چيو ته اسان پاڪستان ۾ ترقياتي رٿائن لاءِ حمايت جاري رکڻ سان گڏ دهشتگردي ۽ انتهاپسندي خلاف ويڙهه ۾ پاڪستان سان گڏ آهيون، هن چيو ته اهو سچ آهي ته افغان طالبان پاڪستان ۾ حملا ڪري وري واپس افغانستان ڀڄي وڃن ٿا، سندس چوڻ هو ته پاڪستان ۾ معاملا صحيح رخ ۾ اڳتي وڌي رهيا آهن،سندس چوڻ هو ته پاڪستان ۽ افغانستان دهشتگردن کي پنهنجي ملڪن ۾ پناهه نه ڏيڻ واري واعدي تي قائم آهن پر اوڀر افغانستان مان پاڪستان تي حملا ٿين ٿا، برطانوي پرڏيهي وزير چيو ته افغان پناهگيرن جي معاملي کي منهن ڏيڻ لاءِ ٻئي ملڪ ڀرپور ڪوششون ڪري رهيا آهن، هن ٻڌايو ته پاڪستان ۽ برطانيا وچ ۾ اسٽريٽجڪ ڳالهيون ترت ٿينديون، ان موقعي تي سرتاج عزيز جو چوڻ هو ته مختلف شعبن ۾ سهڪار تي برطانيا جا ٿورائتا آهيون، برطانوي پرڏيهي وزير سان افغانستان سوڌو علائقائي ۽ ٻه طرفن معاملن تي ڳالهيون ٿينديون،هڪ سوال جي جواب ۾ هن چيو ته طالبان سان ڳالهين جو ايندڙ دور جلد ٿيڻ جي اميد آهي، جڏهن ته برطانيا سان انٽيليجنس شيئرنگ ڪئي پئي وڃي، جيڪا پاڪستان توڙي  برطانيا ٻنهي ملڪن لاءِ به اهم آهي، سرتاج عزيز چيو ته اميد آهي ته پاڪ – ڀارت ڳالهيون جلد ٿينديون.