تازيون خبرون

Daily Archives: March 7, 2016

جان ابراهام ۽ شروتي هاسن جي ”راڪي هينڊسم“ 25 مارچ تي رليز ٿيندي

ممبئي (شوبز نيوز) بالي ووڊ جي نئين ايڪشن ۽ ٿرلر سان ڀرپور فلم ”راڪي هينڊسم“ 25 مارچ تي رليز ٿيندي.ڀارتي سڌ سماءَ وارن ذريعن مطابق نشي ڪانت ڪمت جي هدايتڪاري ۾ ٺهندڙ فلم جي ڪهاڻي ڏکڻ ڪورين فلم دي مين فرام نو ويئر تي ٻڌل آهي،جيڪا هڪ اهڙي شخص جي آهي،جيڪو ڊرگ مافيا سان ويڙهه لاءِ اڪيلو نڪري پوي ٿو. فلم ۾ جان ابراهام ۽ شروتي هاسن مرڪزي ڪردار ادا ڪيو آهي. جڏهن ته ٻين اداڪارن ۾ نشي ڪانت ڪمت، شرد ڪيلڪر، نٿاليا ڪور ۽ ديا چلواڊ شامل آهن، ڄاڻايل فلم 25 مارچ تي سينيما گهرن ۾ نمائش لاءِ پيش ڪئي ويندي.

 

ڀارت ۾ سڀني قبوليو، جيڪڏهن ڪنهن قبول نه ڪيو ته اهو منهنجو ڪٽنب آهي: سني ليون

ممبئي (شوبز نيوز) بالي ووڊ جي ڪينيڊين ڄائي اداڪارا سني ليون چيو آهي ته کيس ڀارت ۾ سڀني قبوليو ۽ جيڪڏهن ڪنهن قبول نه ڪيو ته اهو سندس ڪٽنب آهي، هڪ انٽرويو ۾ سني ليون چيو ته سندس زندگي جا ڪيترائي رخ ماڻهو نه ٿا ڄاڻين، هر ماڻهو جي زندگي ۾ ڪجهه اڻوڻندڙ شيون ٿينديون آهن ۽ اسان کي انهن سان گڏ کڻي اڳتي وڌڻو پوندو آهي، هن چيو ته مون سان به اهڙو ئي ڪجهه ٿيو آهي، منهنجا پنهنجا مائٽ مونکي پسند نه ٿا ڪن، اهي مون سان ڳالهائڻ به پسند نه ٿا ڪن، سندس چوڻ هو ته سڄي ڀارت مونکي قبول ڪيو پر جيڪڏهن ڪنهن نه ڪيو ته اهي رڳو منهنجا مائٽ آهن پر هاڻ مونکي انهن جي ڪا پرواهه ناهي، کين منهنجي باري ۾ ڪجهه به سوچڻ جو حق آهي، سندس چوڻ هو ته هاڻ منهنجو ڀاءُ، مڙس ۽ ان جا گهروارا ئي منهنجو ڪٽنب آهن، ڇو ته اهي ئي ماڻهو منهنجي سٺي توڙي خراب وقت ۾ مون سان گڏ آهن، مان انهن سان گڏ خوش آهيان،جيڪي مون سان منهنجي سڀني خامين ۽ خوبين سوڌو پيار ڪن ٿا، سني ليون چيو ته هوءَ سدائين محنت تي يقين رکي ٿي، سڀ ڪجهه رات وچ ۾ ناهي ٿي ويندو، ڪنهن به هنڌ پهچڻ لاءِ لاڳيتو جاکوڙڻو پوندو آهي، هن چيو ته مان مڃان ٿي ته ڀارتي معاشري ۾ ڪنهن به عورت لاءِ ڪاميابي جا ڏاڪا چڙهڻ ڏکيو آهي پر سندس ذاتي خيال آهي ته جيڪڏهن ڪا عورت همت واري ۽ ذهين هجي  ۽ کيس پنهجي ڪم بابت ڀلي ڀت ڄاڻ هجي ته ان لاءِ ڪوبه ڪم ڏکيو ناهي. سني ليون چيو ته ڀارت ۽ آمريڪا جي رهڻي ڪهڻي بلڪل مختلف آهي، ان ۾ ڪوبه شڪ ناهي ته آمريڪي معاشرو ڀارت جي ڀيٽ ۾ آزاد آهي پر ڀارت جي ثقافت ۽ سماجي قدر ان کي مختلف بڻائين ٿا.

 

جيڪڏهن سلمان بٽ کي ٽيم ۾ شامل ڪيو ويو ته ڪپتاني ڇڏي ڏيندس:شاهد آفريدي

لاهور (اسپورٽس نيوز) ٽي ٽوئنٽي ٽيم جي ڪپتان شاهد آفريدي سلمان بٽ جي قومي ٽيم ۾ شموليت تي اعتراض واري ڇڏيا،سندس چوڻ آهي ته جيڪڏهن سلمان بٽ کي قومي ٽيم ۾ کيڏايو ويو ته نه ٽيم جو حصو هوندس ۽ نه ئي ٽي ٽوئنٽي ورلڊ ڪپ ۾ ٽيم جي اڳواڻي ڪندس.اسپاٽ فڪسنگ ڪيس ۾ مُک ڪردار رهندڙ اڳوڻي ڪپتان سلمان بٽ کي ٻيهر ٽيم شامل ڪرڻ جون ڳالهيون هلي رهيون آهن،جنهن سلسلي ۾ پي سي بي اڳوڻن رانديگرن ۽ ڪرڪيٽ بورڊ جي عملدارن سان ڳالهيون به ڪيون پيون وڃن،پر ٽي ٽوئنٽي ٽيم جي ڪپتان شاهد افريدي سلمان بٽ جي واپسي جي مخالفت ڪري ڇڏي  آهي ۽ چيو آهي ته هي اهو ئي سلمان بٽ آهي،جنهن محمد عامر کي جواري بڻائڻ لاءِ اهم ڪردار ادا ڪيو ۽ ملڪ جي بدنامي ۾ اهم ڪردار ادا ڪيو،جيڪڏهن سلمان بٽ کي ٽيم ۾ شامل ڪيو ٿو وڃي ته مان نه رڳو ڪپتاني ڇڏيندس،پر ٽي ٽوئنٽي ورلڊ ڪپ ۾ ٽيم جو حصو نه ٿيندس، ان لاءِ منهنجي درخواست آهي پي سي بي کي ته هو سلمان بٽ جي معاملي تي سياست ڇڏي ڏين.

 

قومي ڪرڪيٽ ٽيم جي سيڪيورٽي جو جائزو وٺڻ لاءِ پاڪستاني وفد ڀارت  پهچي ويو

اسلام آباد (اسپورٽس نيوز) وزيراعظم نوازشريف جي خاص هدايتن تي قومي ڪرڪيٽ ٽيم جي سيڪيورٽي جو جائزو وٺڻ لاءِ پاڪستاني وفد ڀارت  پهچي ويو.رپورٽ مطابق پاڪستان ڀارت ۾ ٿيندڙ  ٽي ٽوئنٽي ورلڊ ڪپ ۾ قومي ٽيم جي شموليت کي سيڪيورٽي سان مشروط ڪيوهو ۽ سيڪيورٽي ٽيم کي ويزاملڻ کانپوءِ وفد اڄ سيڪيورٽي جو جائزو وٺڻ لاءِ ڀارت پهچي ويو آهي.ذريعن مطابق پاڪستاني وفد هماچل پرديش جي وڏي وزير  ۽ پوليس سربراهه سان ملاقاتون ڪري ڀارت ۾ سيڪيورٽي صورتحال جو جائزو وٺڻ کانپوءِ رپورٽ وزيراعظم نوازشريف کي پيش ڪندا،جنهن جي روشني ۾ قومي ڪرڪيٽ ٽيم کي ڀارت موڪلڻ يا نه موڪلڻ جو فيصلو ڪيو ويندو.

 

قومي ادارن جي نيلامي ۽ عوام جي ننڌڻڪائپ: وزير علي جمالي

هن ملڪ ۾عوام کي “عوامي خدمت ” جي نالي ۾ ايترو ته خوار خراب ڪيو ويو آهي جو هاڻي حڪمرانن جي واعدن تي ڪو به اعتبار ناهي رهيو، ان کان وڏي ناانصافي ٻي ڪهڙي هوندي جو  ملڪ جي وجود ۾ اچڻ کان وٺي هيل تائين هڪ ننڍڙي اقليت هن ديس جي اڇي ڪاري جي مالڪ بڻيل آهي ۽ اڪثريت تي پنهنجي مرضيءَ جون پاليسيون مڙهي رهي آهي، انهن جو رت پي رهي آهي. انهيءَ مخصوص طبقي سان تعلق رکندڙ ماڻهو ملڪ جي هر اهم اداري ۾ موجود آهن، جنهن ۾ سوِل ۽ ملٽري اسٽيبلشمنٽ سميت سڀئي اهم ادارا شامل آهن. هنن ماڻهن ملڪ تي گذريل 67 سالن کان لاڳيتو حڪومت ڪئي آهي، چاهي اهي سول حڪومتون هجن يا وري ملٽري ڊڪٽيٽر شپ هجي. مزي جي ڳالهه اها ته هنن هن وقت تائين مسڪين ماروئڙن ۽ اٻوجهه عوام سان جيڪي ڪلور ڪيا آهن، انهيءَ کي هڪ خوبصورت نالي ”عوامي خدمت“ جو نالو ڏنو ويو آهي. منافقتن ۽ بي واجبين جي ان داستان کي جيڪڏهن پني تي اُتارڻ جي ڪوشش ڪجي ته هڪ ڪتاب لکجي سگهجي ٿو. هن طبقي پنهنجي مفادن جي پورائي لاءِ ملڪي وسيلن کي جنهن نموني سان لٽيو ۽ ڦريو آهي، دنيا جي ڪنهن به سُڌريل ملڪ ۾ ان جو مثال نٿو ملي. عوامي اهنج هنن کي ان وقت ياد ايندا آهن، جڏهن ڦرلٽ ۽ قومي خزاني کي ڦرڻ جا پنج سال پورا ٿي رهيا هوندا آهن ۽ هيءَ ايندڙ پنجن سالن لاءِ هڪ ڀيرو وري مسڪين ماڻهن کي بيوقوف بنائڻ لاءِ صوبي، وسيلن، ترقي ۽ عوامي خدمت جي پُرفريب نعرن سان “عوام” نالي مخلوق جي دَر تي حاضري ڀرڻ جهڙو ڪڌو ڪم ڪرڻ تي مجبور ٿيندا آهن.

هن وقت تائين ملڪ ۾ جيڪي به عوامي ڀلائي ۽ ترقي لاءِ ڪارناما انجام ڏنا ويا آهن، انهن  کي نالو ته عوامي خدمت جو ڏنو ويو پر ان ئي عوام کي ڪنهن به معاملي ۾ اعتماد ۾ وٺڻ جي ضرورت ئي محسوس نه ڪئي وئي. اهو آهي “جمهور جو راڄ” جنهن ۾  هميشه جمهور کي ئي خوار خراب ٿيڻو پوندو آهي. جڏهن بنا رٿابندي جي غلط پاليسيون يا فيصلا مڙهيا ويندا ته اهي عوام کي ڪو لاڀ ڏيڻ بجاءِ عوام لاءِ عذاب بڻجي ويندا آهن. اڄ ڪلهه وري پاڪ وطن ۾ ”نجڪاري“ جي نالي تي عوامي سهنج ۽ سهولتن ۾ اضافو ڪرڻ توڙي قومي خزاني کي وڌيڪ نقصان کان آجو ڪرڻ لاءِ ملڪ جي معتبر قومي ادارن جي لوٽ سيل لڳائڻ جا سانباها ڪيا پيا وڃن ۽ ايندڙ ڏينهن ۾ هزارين ماڻهن کي بيروزگار ڪرڻ ۽ لکين خاندانن کي فاقه ڪشي تي مجبور ڪرڻ جي رٿا بندي تيزي سان جاري آهي. جيڪڏهن ڪا صاف شفاف انڪوائري ڪرائجي ته پتو پوندو ته انهن قومي ادارن کي پڻ سياست، مفادن ۽ پنهنجا نوازي تحت ان مخصوص طبقي جنهن طرح سان ڦريو ۽ لٽيو آهي ان جو دنيا جي مهذب ملڪن ۾ ڪوبه مثال نٿو ملي. اهڙن سياسي، فوجي ۽ بيوروڪريسي سان تعلق رکندڙ شخصيتن جو احتساب ڪرڻ بدران سڄو گناهه عام ملازمن مٿان ڪيرائي انهن کي قرباني جو ٻڪرو بڻايو پيو وڃي. دنيا ۾ اهڙي ڪهڙي ڳالهه آهي جيڪا ممڪن ناهي ؟ نيت جي سچائي ۽ بهتر طريقيڪار سان سڀ ڪجهه ممڪن بڻجي سگهي ٿو. پر ڏچو اهو آهي ته اسان جا سڀ معاملا ”ڪم ٽپايو“ يا ايڊهاڪ ازم واري پاليسي تي هلي رهيا آهن. اسان جي حڪمرانن کي اها ڳالهه الائي ڪڏهن سمجهه ۾ ايندي ته دعوائن ۽ ڳالهين سان ڪڏهن به ڪو مسئلو حل نه ٿيندو آهي. مسئلن کي چئلينج سمجهي منظم رٿابندي ۽ بهتر طريقيڪار سان حل ڪري سگهجي ٿو. بنا ڪنهن اڳواٽ رٿا بندي ۽ عوام کي اعتماد ۾ وٺڻ جي اهو سڀ ڪجهه فقط آءِ ايم ايف ۽ ورلڊ بينڪ کان وڌيڪ قرض جي وصولي ۽ اڳوڻي اوڌر جون قسطون ادا ڪرڻ لاءِ ملڪ جي اهم ادارن کي ”نجڪاري” جي مقدس نالي تي قربان ڪرڻ جا سانباها ڪيا پيا وڃن، ان ڏس ۾ موجوده وفاقي حڪومت ۽ خاص طور تي ناڻي وارو وزير اسحاق ڊار جيڪو ميان نواز شريف جو ويجهو عزيز پڻ آهي، اپوزيشن جي سڀني پارٽين جي سخت مخالفت ۽ ملازمن جي شديد احتجاج، جنهن ۾ پي آءِ اي جي ڪارڪنن جو رت پڻ شامل ٿي چڪو آهي، ٽس کان مس ٿيڻ لاءِ به تيار ناهي. ان سلسلي ۾ سڄاڻ ڌريون اڳ ئي اهي دانهون ڪري رهيون آهن ته ملڪ جي مُک ادارن جيڪي ملڪي معيشت ۾ ڪرنگهي جي هڏي واري حيثيت رکن ٿا، انهن کي خانگائڻ ۽ نتيجي ۾ هزارين ملازمن کي بيروزگار ڪرڻ واري ڪارروائي جي ردعمل ۾ حالتون ايتريون ته خراب ٿي سگهن ٿيون جو انهن کي ڪنٽرول ڪرڻ وڏو مسئلو بڻجي ويندو، پر لڳي ائين ٿو ته اسان جا حڪمران ان معاملي تي ڪابه سنجيدگي اختيار ڪرڻ لاءِ تيار ناهن.

جيڪڏهن ملڪ ۾  پاليسيون  اهڙيون ٺاهيون وينديون جن سان عوام رليف يا ڪا مدد ملڻ بجاءِ وڌيڪ اذيت ملندي ته پوءِ اهڙيون پاليسيون نه ٺاهڻ ۾ ئي  ملڪ جي بهتري آهي. هڪ پاسي مهانگائي جو ڏينهون ڏينهن وڌندڙ طوفان ملڪ جي ڪروڙين غريب ۽ مجبور ماڻهن لاءِ اڄوڪي دور جو سڀ کان وڏو مسئلو بڻيل آهي. خاص ڪري هاڻوڪن حڪمرانن جي هٿ ٺوڪي جمهوري دور ۾ ته مهانگائي جا اڳيان پويان رڪارڊ ٽٽي چڪا آهن ۽ ٻچن کي مانيءَ جو ڳڀو مهيا ڪرڻ غريب عوام لاءِ ڏينهون ڏينهن مشڪل کان مشڪل ٿيندو پيو وڃي، پيءُ چئن معصوم پُٽن کي پنهنجي هٿن سان موت جي وادي ۾ ڌڪي آخر ۾ پنهنجي ساهه جي تند کي به ڇني ڦٽي ڪري ٿو، جنهن جو درد سمجهڻ لاءِ شايد ڪو حڪمران هن دنيا ۾ ناهي رهيو. تعليم ۽ صحت جون سهولتون رڳو امير ۽ سرنديءَ وارن کي ميسر آهن. مهانگائي، غربت ۽ بيروزگاري جي ماريل عوام وٽ پنڻ، خودڪشي ڪرڻ يا پنهنجي ٻچن کي بازار ۾ آڻي وڪڻڻ کان سواءِ ٻي ڪا واٽ نه بچي آهي. حڪمرانن ڳاٽي ٽوڙ وياج تي ورلڊ بينڪ، آءِ ايم ايف جهڙن عوام جي رت پياڪ ادارن کان سخت ۽ عوامي مفادن جي خلاف شرطن تي اربين رپين جا قرض ورتا آهن، جنهن جي بنياد تي ملڪ ۾ مهانگائي جو طوفان، ملڪي اهم ادارن جي نجڪاري، مهانگائي ۽ لوڊشيڊنگ جي ماريل عوام مٿان وڌيڪ ڳرا ٽيڪس لاڳو ڪرڻ شامل آهي، پر اوڌر ۽ ڳري وياج تي ورتل  اهو سڄو پئسو حڪمران ٽولي جي عياشين ۾ خرچ ٿي رهيو آهي ۽ غريب ماڻهن کي نه پهريان ڪجهه مليو هو ۽ نه وري هاڻي ڪجهه ملڻ جي اُميد آهي. رپورٽن موجب هاڻوڪي حڪومت جي دور ۾ ملڪ ۾ هر روز 8 ارب ۽ ساليانو 600 ارب روپين جي ڪرپشن ٿي رهي آهي، جنهن جو اڳ ۾ مثال نٿو ملي. موجوده نوازليگ حڪومت جي اڍائي سالن جي ڪارگردگي انتهائي مايوس ڪندڙ رهي آهي ۽ عوام کان اٽو، لٽو ۽ اجهو سڀ ڪجهه کسجي چڪو آهي، ملڪ ۾ هر پاسي مهانگائي، بيروزگاري، بدامني ۽ دهشتگردي جو راڪاس واڪا ڪري رهيو آهي، صحيح معنيٰ ۾ پڇاڻي يا چيڪ اينڊ بئلينس نه هئڻ ڪري سرڪاري ادارن جو خانو خراب ٿي ويو آهي، چور کي سزا نه ٿي ملي ۽ شريف کي مدد نه ٿي ملي، اهڙي صورت ۾ مايوسي ۽ انارڪي ڦهلجڻ فطري ڳالهه آهي. سياسي جماعتن جي ساک جي حالت اها آهي ته انهن جي پارٽي ليڊرشپ ڪڏهن ”اينٽ سي اينٽ بجادين گين“ ته ڪڏهن وري منافقي ۽ چاپلوسي جون سڀئي حدون ڪراس ڪندي ”جاني ڪي باتين جاني دو“ وارو راڳ آلاپي پنهنجي ڪيل ڪارنامن ۽ ڪرپشن کي احتسابي پنجوڙ کان آجو ڪرائڻ آهي. اهڙي ليڊرشپ کان ڪنهن اُميد يا آسري جي آس لڳائڻ پاڻ کي دوکي ۾ رکڻ برابر آهي، ڇو ته بقول چوڌري نثار جي ته ”هتي سڀني سياسي پارٽين جو هڪٻئي جي مفادن جي حاصلات لاءِ مُڪ مڪا ٿيل آهي، ”نفسياتي مونجهارن، خودڪشين جي وَر چڙهيل ۽ فاقه ڪشي“ جي تصوير بڻيل عوام کان ”عوامي خدمت“ جي نالي تي جيئڻ  جو حق کسڻ وارو اختيار اوهان کي ناهي ڏنو ويو، پر حڪومتن طرفان سائنسي ۽ منظم انداز ۾ ڪرپشن جا اڳيان پويان رڪارڊ ٽوڙڻ جي مُهم گذريل ڏهاڪو سالن کان جنهن نموني سان جاري آهي، ان جو نتيجو اهو نڪتو آهي جو هاڻي منافعي بخش ادارن کي به هٿرادو طريقي سان نقصانڪار ڄاڻائي اڌ موڙي ۾ وڪڻي رهيل ڪسر پوري ڪرڻ لاءِ تيزي سان سفر جاري آهي.عملي طرح سان گذريل فوجي ڊڪٽيٽرشپ کان پوءِ سياسي پ پ ۽ نواز حڪومت پاران اهڙو ڪجهه به ناهي ٿيو جو عوام نڌڻڪائي واري احساس کان ٻاهر نڪري سگهي. لکين ماڻهو حڪومتي بي حسي ۽ بدديانتي توڙي مها ڪرپشن جي ڪري بُک، بيروزگاري ۽ مهانگائي جي سيلاب آڏو بي وس ۽ چونڊيل ”عوامي“ حڪومتن جي ڪارڪردگي کان مايوس ٿي ڏکين حالتن کي منهن ڏيئي رهيا آهن. هڪ طرف پي آءِ اي، ريلوي، اسٽيل ملز جي ظالماڻي طريقي سان نجڪاري ته ٻئي پاسي وري سنڌ حڪومت طرفان صحت جون اڻپوريون سهولتون مهيا ڪندڙ سرڪاري اسپتالن، ڊسپنسرين کي نجڪاري جي نذر ڪرڻ جون تياريون عروج تي آهن، ڪٿي ڪٿي ته اهڙيون ڪاغذي ڪاروايون مڪمل پڻ ٿي چڪيون آهن رڳو انتظام سنڀالڻ جي دير آهي. پيپلزپارٽي جيڪا مرڪز ۾ هن وقت مخالف ڌر وارو ڪردار ادا ڪري رهي آهي ۽ مرڪزي حڪومت جي مبينه نجڪاري واري پاليسي جي سخت مخالفت ڪري رهي آهي، ان پارٽي جي سنڌ ۾ حڪومت آهي، جيڪا وري سرڪاري اسپتالن ۽ اسڪولن کي نجڪاري جي نانگ جي منهن ۾ ڏيڻ جا سانباها ڪري رهي آهي، ان کي منافقتن جو شاهڪار نه چئجي ته ٻيو ڇا چئجي.اسيمبلي اندر جيڪا فرينڊلي اپوزيشن موجود آهي ان جو ڪردار حڪمران ڌر کان وڌيڪ شرمناڪ ۽ نندا جوڳو آهي،غريب عوام جو ڪو اوهي واهي نه رهيو آهي ۽ جن ماڻهن عوام جي مينڊيٽ ذريعي اقتدار ماڻيو آهي، اُهي عوامي  مسئلن ۽ اهنجن کي وساري چڪا آهن.

بدامني ۽ لاقانونيت جو ڳوٺن توڙي شهرن ۾ راڄ آهي، سنڌ صوبي سان ته ايتري ويڌن آهي جو ان جا شهري علائقا ڀتي خور دهشتگردن ۽ ٻهراڙيءَ وارا علائقا پاٿاريدار وڏيرن ۽ ڌاڙيلن جي حوالي ٿيل آهن، جتي ڀنگ لاءِ اغوا انڊسٽري اڄ سڀ کان نفعي بخش ڪاروبار بڻجي چڪو آهي، مهانگائي بيروزگاري، غربت ۽ بدامنيءَ جو هي طوفان ملڪ کي ڪهڙي اونداهي ڪُن ۾ وڃي اڇلائيندو، ان جي اقتدار جي نشي ۾ مست حڪمرانن کي ڪا به پرواهه ناهي! اڃان به وقت آهي ته انڌ جي گهوڙي تي سوار حڪمران ٽولو عقل کان ڪم وٺي، عوام دشمن پاليسين کي ڇڏي ملڪ جي بهتري ۽ ڀلائي لاءِ اپاءَ وٺي، آءِ ايم ايف ۽ ورلڊ بينڪ جي فرمائشي نجڪاري واري پروگرام کان پاسيرو ٿي 20 ڪروڙ عوام جي حقيقي انداز سان خدمت ذريعي مليل مينڊيٽ جو احترام ۽ مسڪين ماڻهن کي موت مار مهانگائيءَ، بيروزگاري ۽ بدامني توڙي لوڊشيڊنگ جي آزار کان نجات ڏيارين توڙي پنهنجا غيرترقياتي خرچ گهٽائي سادگي واري حڪمراني اختيار ڪري عوام سان ڪيل وچن پورا ڪن.

 

“را” جو رينگٽ اصل مقصدن تان ڌيان هٽائڻ آهي…؟؟؟: غلام مصطفيٰ جمالي

هن وقت ايم ڪيو ايم  جا “را” سان تعلق ۽ مصطفيٰ ڪمال جي پريس ڪانفرنس جو ڳالهيون ملڪ ۾ عام آهن.پر حيقيقت ۾ ڏٺو  وڃي ته ايم ڪيو ايم جا “را” سان تعلق ڪا نئي ڳالهه ناهي.ان ڪري مصطفيٰ ڪمال ڪا نئي ڳالهه کڻي ڪري ڪون آيو آهي.مان سمجهان ٿو ته اها ملڪ جي سياست جي ڪا نئي راند آهي جنهن جو مقصد پاڪستان جي اصل مقصدن تان ڌيان هٺائي انهي طرف ڌيان ڇڪئاڻ آهي.پر جيڪڏهن واقعي مصطفيٰ ڪمال سچ چئي رهيو آهي ته مان سمجهان ٿو ته انهي جي به عوام کي جلد کان جلد خبر پئجي ويندي.پر جڏهن کان  ايم  ڪيو ايم جي اڳواڻي ڪراچي ناظم مصطفيٰ ڪمال،پنهنجي پارٽي جي قائد ايم ڪيو ايم جي اڳواڻ الطاف حسين خلاف بيان ڏنو آهي.ان ڏينهن کان وٺي ڪيترائي سوال ذهن ۾ اڀري آيا آهن.ته آخر اهڙي ڪهڙي وجهه بڻي جو اوچتو مصطفيٰ ڪمال دبئي کان ڪراچي پهتي ويو.۽ ايندي پاڪستان اندر بيان جي اهڙي ته باهه باري جنهن ايم ڪيو ايم جي سموري ڪاري چٽي کي سامهون رکي ڇڏيو.جتي مصطفيٰ ڪمال جا اهڙو بيان آهي.اتي ذهن اندر ڪيترائي سوال پڻ آهي..سوال اهو به آهي ته ڇا جيڪو ڪجهه مصطفيٰ ڪمال ڳالهايو اهو سڀ سچ آهي.؟

سوال اهو به آهي ته ڇا جيڪو ڪجهه مصطفيٰ ڪمال چئي رهيو آهي اهو ڪنهن جي اشاري تي چئي رهيو آهي يا پنهنجي اندر جي باهه ٻاهر ڪڍي رهيو آهي.؟سوال اهو به آهو ته مصطفيٰ ڪمال کي ڪڏهن معلوم ٿيو ته الطاف حسين“را”جو ايجنٽ آهي.؟۽ جيڪڏهن الطاف حسين را جو ايجنٽ هو ته مصطفيٰ ڪمال ايترا ڏينهن خاموش ڇو هو.؟؟سوال اهو به آهي ته جيڪڏهن ايم ڪيو ايم پارٽي “را” جي ايجنٽ آهي ته پوءِ مصطفيٰ ڪمال پنهنجي ڪراچي اندر ناظمي واري دور اندر“را” سان ڪم ڪيو هوندو يا نه.؟ ۽ سوال اهو به آهي ته ڪٿي الطاف ۽ مصطفيٰ ڪمال جي وچ ۾ ٿيندڙ تڪرار جي اصل وجهه انڊيا جي اينجسي را ته ناهي.؟سوال اهو به آهي ته جيڪڏهن اها سموري صورتحال آهي جنهن اندر ايم ڪيو ايم جا انڊيا جي ايجنسي “را” سان تعلق آهن ۽ ڪنهن وقت ۾ مصطفيٰ ڪمال به ان جو حصو هو ۽ کيس اها به ڄاڻ هئي ته ايم ڪيو ايم “را”کي ايجنٽ آهي. ۽ انهي ڳالهه کي هن ڪيترو عرصو لڪايو.پوءِ احساس ادارن اڃان تائين مصطفيٰ ڪمال کي گرفتار ڇو ناهي ڪيو.؟سوال اهو به آهي ته مصطفيٰ ڪمال جي واپسي واري ٽائيمنگ ڪنهن طعه ڪئي.؟اسٽبلشمينٽ مصطفيٰ ڪمال عشرت العباد ۽ ٻِين ايم ڪيو ايم اڳواڻن جي هڪ هنڌ گڏ ڪري پڇا ڳاڇا ڪڏهن ڪندي،؟سوال اهو به آهي ته ڇا مصطفيٰ ڪمال تي ڪراچي جي عوام کي اعتبار آهي.؟سوال اهو به آهي ته ڇا مصطفيٰ ڪمال ڪراچي جي عوام جي اعتبار ڪندو.؟سوال اهو به آهي ته سچ سوچي سمجهي ڳالهائڻ گهرجي يا موقع ڏسي ڪري.؟؟سوال اهو به آهي ته جيڪڏهن مصطفيٰ ڪمال سچ ڳالهائي رهيو آهي ته ايم ڪيو ايم جي خلاف شاهديون کڻي عدالت ۾ ڇو ڪون پيو وڃي.؟سوال اهو به آهي ته ڇا اسٽبليشمنٽ ايم ڪيو ايم جي پابندي لڳائڻ جو سوچي رهي هوندي.؟سوال اهو به آهي ته ڇا ايم ڪيو ايم  خلاف غداري ڪيس هلايو ويندو.۽ ڇا عدالت مصطفيٰ ڪمال جي بيان تي نوٽيس وٺندي.۽ جيڪڏهن اهو به ڏٺو وڃي ته مصطفيٰ ڪمال اڪيلو اها جنگ ڪيئن ٿو وڙهي سگهي.؟۽ سوال اهو به آهي ته فاروق ستار  ايم ڪيو ايم جو ڪيترائ ڏينهن ٿو سات ڏي.؟۽ مصطفيٰ  ڪمال جيڪو ايم ڪيو ايم خلاف بيان ڏنو آهي.انهي بيان جي ڇا مصطفيٰ ڪمال کان ڪراچي جي عوام مطعمين آهي يا مصطفيٰ ڪمال جي خلاف ڪراچي جي عوام جي دلين اندر نفرت پکڙجي وئي آهي.۽ اتي اهو به سوال آهي ته اهو فصيلو ڪرڻ به مشڪل آهي ته ڪير “را” جو اينجٽ آهي ۽ ڪير محب وطن آهي.؟ان ڪري اهو به سوال آهي ته جيڪڏهن مصطفيٰ ڪمال واقعي سچ ڳالهائي رهيو آهي ۽ هو اهو ڪجهه ڳالهائي رهيو آهي جيڪو ملڪ ۽ قوم جي لاءِ فائيمند آهي ته پوءِ مصطفيٰ ڪمال سان ٻيا ايم ڪيو ايم جا مميبر ساٿ ڇو ڪون پيا ڏين،؟جڏهن ته اهو به ڏٺو ويو هو ته جڏهن مصطفيٰ ڪمال ڪراچي اندر ايم ڪيو ايم جي قائد الطاف حسين خلاف پريس ڪانفرنس پڻ ڪئي هئي.جنهن پريس ڪانفرنس جي خلاف ڪراچي اندر ايم ڪيو ايم جي قائد جي حق ۾ ريليون پڻ ڪڍيون هنيون پر انهن اندر ماڻهن جي تعداد تمام گهڻي ٿورڙي هئي ڇو.؟جيڪڏهن تعداد ٿورڙي هئي ته اها به ڳالهه ظاهر آهي ته ڪراچي جي عوام ايم ڪيو ايم جي انهي نظر سان نه پئي ڏسي.جيڪڏهن ڪراچي کي عوام ايم ڪيو ايم جي انهي نظر سان نه پئي ڏسي ته پوءِ انهي ڊوڙ ۾ مصطفيٰ ڪمال اڪيلو ڇو.؟جڏهن ته پريس ڪانفرنس کان پوءِ ڪراچي اندر ڀلي ٿورڙن ئي ماڻهن جيڪو احتجاج ڪيو اهو جائز عمل هو يا نه،؟جڏهن ته پ پ جي اپوزيشن اڳواڻ خورشيد شاهه چيو آهي ته مصطفيٰ ڪمال جي لڳايل الزامن تي ايم ڪيو ايم تي ڪو به فرق نه پوندو آخر ڇو.؟سوال اهو به آهي ته ڇا مصطفيٰ ڪمال جو ڊاڪٽر ذوالفقار مرزا ساٿ ڏيندو.؟ڇا مصطفيٰ ڪمال ڊاڪٽر ذوالفقار مرزا کان معافي وٺندو.؟سوال اهو به آهي ته ڇا مصطفيٰ ڪمال جي ڊاڪٽر ذوالفقار مرزا معاف ڪندو.؟ سوال اهو به آهي ته مصطفيٰ ڪمال ريجنرز جو ڪم آسان ڪيو آهي يا انهي ڪم جي ويتر مشڪل ۾ وڌو آهي،؟سوال اهو به آهي ته حڪومت مصطفيٰ ڪمال جي بيان تي ڪيترا ڏينهن خاموش تماشائي بيٺل نظر ايندي،؟سوال اهو به آهي ته رحمان ملڪ جي ڪا سختي ڇو نه پئي اچي.؟ڇا اهو آساني سان نڪري ويندو.؟سوال اهو به آهي ته ڇا مصطفيٰ ڪمال قومي ڏوهاري ناهي.؟جيڪڏهن قومي ڏوهاري آهي ته کيس ڇو معاف ڪيو پيو وڃي.؟سوال اهو به آهي ته ڇا مصطفيٰ ڪمال کي گواه طور معافي ملي رهي آهي ته آخر ڇو.؟

*******

 

 

صرف هڪ ڇو؟ جاچ پرويز مشرف ۽ عمران خان کان به ٿيڻ گهرجي

نيب جو موجوده ڍانچو جنرل مشرف ٺاهيو هو. جنهن جو مقصد نواز سريف کان انتقام وٺڻ هو. جن کي نيب قانونن کان ڊپ ٿيندو هو. انهن ن ليگ ڇڏي مشرف ليگ کي جوائن ڪيو هو. اهڙن خيالن جو اظهار اطلاعات جي وفاقي وزير پرويز رشيد پريس ڪانفرنس ڪندي ڪيو، هن وڌيڪ چيو ته اسان جو احتساب ته گذريل 20 سالن کان ٿيندو پيو اچي. پهرين بينظير ڀٽو ۽ مشرف اسان جو احتساب ڪيو. ڏوهه ته پري جي ڳالهه جيڪڏهن اسان کان غلطي به ٿئي ها ته مشرف اسان کي ڪڏهن نه ڇڏي ها. پاڪستان جي ادارن کي ٺيڪ ڪرڻ اسان جي ذميواري آهي، اسان ڪنهن خوف جو شڪار ناهيون. چوڌري نثار مصطفيٰ ڪمال جي الزامن تي تصفيلي ڳالهه ڪئي سرفرار مرچنٽ جي بيانن تي به چوڌري نثار ڪميٽي ٺاهي آهي. جيڪڏهن مصطفيٰ ڪمال وٽ ثبوت آهن ته کيس ڪميٽي وٽ ضرور وڃڻ گهرجي. 99ع ۾ جڏهن اسان جي حڪومت ختم ڪئي وئي ته ڪراچي ۾ وڏن وڏن نامي گرامي ماڻهن کي زندگي کان محروم ڪيو ويو. شاهد حامد، حڪيم سعيد، صحافي صلاح الدين کي ماريو ويو. اسان قاتلن جي جاچ شروع ڪئي ۽ گرفتاري لاءِ وڌڻ لڳاسين ته اسان کي سنڌ ۾ ن ليگ جي حڪومت ختم ڪرڻي پئي. اسان ته کين حڪومت مان ڪڍي ڇڏيو هو ٻيهر حڪومت ۾ ڪنهن آندو ۽ ڪنهن مضبوط ڪيو. جنرل مشرف جي هڪ هٿ تي اهي بيٺل هئا ته ٻئي هٿي تي عمران خان بيٺل هو. جاچ مشرف لاءِ ٿيڻ گهرجي. صرف هڪ تي ڇو مشرف ۽ عمران خان خلاف به جاچ ٿيڻ گهرجي. جن کي 2007ع جون ڳالهيون هاڻي ياد اچي رهيون آهن ته عمران ڀارت الطاف جون ڳالهيون ڇو لڪايون. هن چيو ته جيڪڏهن آئين ۾ ترميم ٿي سگهي ٿي ته نيب قانون ۾ ڇو نٿي ٿي سگهي. عمران خان به خيبرپختون خواهه ۾ نيب جي قانون کي تبديل ڪيو. هن چيو ته ڀارتي اختيارين جي خاطري تي ئي ٽي ٽوئنٽي ورلڊ ڪپ لاءِ ڪرڪٽ ٽيم کي ڀارت موڪلينداسين. نيب پاڻ تسليم ڪيو آهي ته ان جي نظام ۾ خرابيون آهن. ايم ڪيو ايم مشرف جي ريفرنڊم ۾ هن لاءِ ووٽ گهرندي رهي. ڪراچي ۾ ٿيندڙ قتل غارت ۽ ڏوهن جي جاچ مشرف کان به ڪرڻ گهرجي. نيب تي ن ليگ جي تنقيد نئين ڳالهه ناهي. وزيراعظم تي اثاثا لڳائڻ جو الزام غلط آهي. نبي صلعم جا مڃيندڙ جيڪڏهن زحمت بڻجي وڃن ته يقينن تعليم ۾ کوٽ رهجي وئي. نيب جاچ ڀلي ڪري پر ڏوهه ثابت ٿيڻ تائين ڪنهن جو پٽڪو نه لاهي.

 

مشرف نيب جو ڍانچو نواز شريف کان انتقام لاءِ بڻايو هو: پرويز رشيد

لاهور(اين اين آءِ) سڌ سماءَ جي وفاقي وزير پرويز رشيد چيو آيه ته پرويز مشرف نيب جو ڍانچو نواز شريف کان انتقام لاءِ ٺايهو هيو محترمه بينظير ڀٽو جو احتساب هجي يا مشرف جو احتساب هجي اسان ٻنهي ۾ سرخرو ٿيا آهيون جن احتساب جي ڊپ کان ان دور ۾ مسلم ليگ (ن) کي نه ڇڏيو ۽ اڄ به نه ڇڏيندا ڇا خيبرپختونخواهه ۾ نيب جي قانونن کي تبديل ناهي ڪيو ويو، پر اتي ته اداري جي سربراهه کي ئي گهرڀيڙو ڪيو ويو ٻڌايو وڃي عمران خان جي پڇ تي ڪنهن جو پير آهي، عورتن جي حقن وارو بل پنجاب لاءِ آهي، اٽڪ کان هن پار رهندڙن کي ان کان ڊڄڻ جي ضرورت ناهي جيڪڏهن مصطفيٰ ڪمال وٽ ڪي دستاويزي ثبوت آهن ته هو سرفراز مرچنٽ جي معاملي ۾ چوڌري نثار علي خان پاران جوڙيل ڪميٽي کي پيش ڪري. اسان ته ڪراچي جون حالتون سڌارڻ لاءِ سنڌ ۾ پنهنجي حڪومت جي قرباني ڏني. اسان ته کيس حڪومت مان ڪڍي ڇڏيو هو ٻيهر کيس حڪومت ۾ ڪنهن آندو ۽ ڪنهن مضبوط بڻايو جيڪي مشرف جي آسپاس هيا اهي به پارٽنر ان ڪرائيم آهن انهن کان به پڇاڳا ٿيڻ گهرجي. عمران خان ٻڌائي هن 2004 ۾ الطاف حسين جون ڀارت ۾ تصويرون لڳل ڏٺيون پر هن ان راز کي ڇو 12 سال ظاهر نه ڪيو اهڙن خيالن جو اظهار هن ايڊوورٽائيزيشن ايسوسيئيشن جي عهديدارن جي حلف کڻڻ واري تقريب جي موقعي تي خطاب ۽ ميڊيا سان ڳالهائيندي ڪيو. پرويز رشيد چيو ته عورتن وارو بل پنجاب ۾ پاس ٿيو آهي پر ان بابت ڳالهه ڪنهن ٻئي هنڌ ٿي رهي آهي پنجاب جي حد ته اٽڪ وٽ ختم ٿي وڃي ٿي جيڪي اٽڪ کان پري رهن ٿا اهي هن بل کان ڇو ڊنل آهن جيڪو شخص پشاور يا ڊيرا اسماعيل خان ۾ رهي ٿو ان کي ته هن بل مان خوفزده نه ٿيڻ گهرجي. هي بل ته راولپنڊي، ملتان، لاهور ۽ پنجاب اندر ئي لاڳو ٿئي ٿو ها جيڪڏهن ان سان پنجاب ۾ ڪا غلطي ٿي آهي جيڪا هن ڳجهي رکي آهي ۽ ٻڌائي ناهي ان بابت ڪجهه نه ٿو چئي سگهجي جيڪڏهن ڪا ان کان ڪائي غلطي ناهي ٿي ته اٽڪ کان هن طرف رهندڙن کي هن بل مان خوفزده نه ٿيڻ گهرجي. هن نيب جي حوالي سان سوال جي جواب ۾ چيو ته وفاق جي ٻن وڏين جماعتن پ پ ۽ مسلم ليگ (ن) 2005 ۾ ميثاق جمهوريت تي صحيحون ڪيون هيون ۽ ان تي احتساب جي حوالي سان شقون شامل ڪيون ويون هيون سڀ ڄاڻين ٿا ته نيب جا موجوده قانون ۽ ڍانچو پرويز مشرف ٺاهيو هيو ۽ ان جو مقصد صرف نواز شريف کان بدلو وٺڻ هيو. ان زماني ۾ هنن قانونن کي استعمال ڪري جعلي پارٽي به ٺاهي وئي هئي ۽ جن کي نيب قانونن مان خوف هيو انهن ن ليگ کي ڇڏي ڏنو هيو ۽ مشرف ليگ جوائن ڪري ورتي هئي ۽ جيڪي ماڻهو ن ليگ سان گڏ رهيا اهي احتساب کان خوفزده ٿيڻ وارا نه هيا جيڪڏهن ائين هجي ها ته جڏهن نيب کي مشرف پاران پنهنجن مقصدن لاءِ استعمال ڪيو پئي ويو ته اهي ماڻهو ان وقت ئي اسان کي ڇڏي ڏين ها اسان کي نه ان وقت ڪو ڊپ هيو ۽ نه هاڻي آهي. اسانجو احتساب ته 20 سالن کان ٿي رهيو آهي ٻه دفعا محترمه بينظير ڀٽو شهيد اسان جو احتساب ڪيو ۽ پوءِ 10 سالن تائين مشرف اسان جو احتساب ڪيو. جيڪڏهن اسان کان ڪٿي بدعنواني ۽ جرم ڪرڻ ته پري جي ڳالهه آهي جيڪڏهن ڪا غلطي يا ڪوتاهي ٿئي ها ته مشرف اسان کي ڪڏهن به اسپيئر نه ڪري ها پر الحمدالله محترمه بينظير ڀٽو جو يا مشرف جو احتساب اسان ٻنهي مان ڪامياب ٿي نڪتا آهيون هن چيو ته پاڪستاني ادارن کي ٺيڪ ڪرڻ اسان جي زميواري آهي جڏهن اسان بجلي جو نظام ٺيڪ ڪرڻ جي ڳالهه ڪريون ٿا ته ڇا اهو سوچيو ويندو ته ڇو اسان بجلي کي ٺيڪ ڪري رهيا آهيون ڇا اسان ان مان خوفزده آهيون. جيڪڏهن اسان سٺي ٽرانسپورٽ جو سوچينداسين ته اهو سوچينداسين ته ان ۾ اسان کي پاڻ ويهڻو آهي ان لاءِ عوام کي ٽرانسپورٽ ڏئي رهيا آهيون اسان ماڻحن کي سهولت ڏيڻ لاءِ ۽ پاڪستان لاءِ گهڻو ڪجهه ڪرڻو آهي.

 

صحافي  جمهوري  نظام جو اهم حصو آهن، سندن تحفظ حڪومتن جي ذميواري آهي: مولابخش چانڊيو

حيدرآباد(بيورو) وڏي وزير جو اطلاعات کاتي بابت صوبائي صلاحڪار مولا بخش چانڊيو  چيو آهي ته ڪا به خبر  شايع ڪرڻ  يا نه ڪرڻ   ميڊيا جي ادارن ۽  ميڊيا جي نگراني  ڪندڙ  ادارن جي پاليسي  جو  مسئلو آهي  ۽ عام صحافين ۽ پريس ڪلب  جي  ذميواري  نه  آهي. حيدرآباد پريس ڪلب  ۽  ملڪ جي ٻين حصن ۾ پريس ڪلبن ۽  صحافين  تي حملا  ۽ تشدد  افسوس جو ڳو  عمل آهي  جنهن جي  جيتري  به مذمت ڪجي اها  گهٽ آهي صحافي  جمهوري  نظام جو اهم  حصو آهن ۽ انهن جي تحفظ جي  ذميواري صوبائي  ۽ وفاقي حڪومتن جي آهي. اهڙو اظهار هن حيدرآباد پريس ڪلب ۾ پريس ڪلب طرفان سينيئرفوٽو گرافر مشتاق اجميري جي وفات تي ڪوٺايل تعزيتي ريفرنس کي خطاب ۽ صحافين سان ڳالهائيندي ڪيو. هن چيو ته بدقسمتي سان اسانجي معاشري ۾ عدم برداشت  ۾ اضافو ٿي رهيو ۽ اختلاف برداشت نه ٿا ڪيا وڃن، جنهن سبب  معاشري زوال جو شڪار آهي، جڏهن ته صحافين کي سچ لکڻ يا ڳالهائڻ تي به ڪيترين مشڪلاتن کي  منهن ڏيڻو پئي ٿو. هن چيو ته ڪوبه پنهنجي نظريي کي ٻين تي زبردستي  لاڳو  نٿو ڪري سگهي ۽ ماضي ۾ پڻ ماڻهن من پسند اسلام آڻڻ جي ڪوشش ڪئي پر اسلام  اهو ئي رهندو جيڪو محمد صه  ڏنو. هن پريس ڪلب حيدرآباد جي عهديدارن کي چيو ته اهي پريس ڪلب تي ٿيندڙ حملي جي نتيجي  ٿيل نقصان جو ڪاٿو لڳائي کيس  ٻڌايئن ته جيئن نقصان جي فوري طور ازالي لاءِ اپاءُ وٺي سگهجن. هن صحافين کي يقين ڏياريو  ته اهي  مستقبل ۾ پريس ڪلب تي حملي جهڙن واقعن کان بچڻ  ۽ کين مڪمل تحفظ فراهم ڪرڻ لاءِ وڏي وزير سان  ڳالهه ٻولهه ڪندو. هن چيو ته پريس ڪلب تي حملي واري ڏينهن خدشن باوجود  انتظاميه پاران مناسب حفاظتي انتظام نه ڪرڻ جو پڻ جائزو ورتو ويندو.  مصطفيٰ ڪمال  بابت سوال تي  هن چيو ته  مصطفي ڪمال  پويان ڪنهن جو  ڪمال آهي  ڪجهه ڏينهن ۾  واضع ٿي ويندو. هن چيو ته اسان ان ئي جماعت کي مڃون ٿا جنهن سان عوام گڏ هجي  ۽ اسين  عوام مينڊيٽ جو احترام ڪيون ٿا  ۽ اسين  ڪنهن سازش  جو حصو نه بڻجنداسين. هڪ سوال تي هن چيو ته ڪنهنجي  را  جو ايجنٽ  هجڻ ۽ ان سان لاڳاپيل  ٻيا معاملا  ملڪي سلامتي  جا  آهن ۽ اها  وفاقي حڪومت جي ذميواري آهي  ته اها  انهن  ڳالهين جي  جاچ ڪري  ته  جيئن سچ سامهون اچي هڪ سوال تي هن چيو ته  نيب  جڏهن سنڌ ۾ ڪاروايون ڪري رهيو  هو  ته اهو مقدس ادارو  هو  پر جيئن ئي انهن پنجاب ڏانهن رخ ڪيو ته وزير اعظم ،  وزير اعليٰ پنجاب ، وفاقي وزير اطلاعات ۽ ٻين  نيب  تي سوال اٿارڻ شروع ڪري ڏنا  ۽ چيو ته  نيب  شريفن جو پڳون ڌوڙ  ڪري رهي آهي ۽ ماڻهن سان  ناانصافي ٿي رهي  آهي اهڙن بيانن کان پوءِ  نيب ۽ ان  جا فيصلا  تڪراري ٿي  ويا آهن.  هاڻي  نيب  کي  پاڻ  کي  غير جانبدار هجڻ جو ثبوت ڏيڻو پوندو، ان کان  اڳ تعزيتي  ريفرنس کي خطاب ڪندي صوبائي صلاحڪار مولا بخش چانڊيو چيو ته  مرحوم  فوٽو گرافر  مشتاق اجميري  خوش اخلاق  بهترين انسان  هو، جنهن جون خدمتون  هميشه ياد  رکيون  وينديون  ان  موقعي تي  سينئر صحافي علي حسن ، ناصر شيخ ، جنيد خانزاده ، الطاف ڪوٽي فرحان آفندي  ۽ ٻين  مرحوم  مشتاق اجميري کي  زبردست خراج عقيدت پيش ڪيو  ۽ سندن  خدمتن جي واکاڻ ڪئي  صوبائي صلاحڪار اطلاعات مولا بخش چانڊيو  ان کان اڳ پريس ڪلب حيدرآباد جو تفصيلي معائنو ڪيو ۽ حملي سبب  پريس ڪلب کي  ٿيندڙ  نقصانن  جو  جائزو ورتو.

 

ايف آءِ اي اسٽيل ملز اسپتال ۾ ڪرپشن جي جاچ شروع ڪري ڇڏي

ڪراچي (اين اين آءِ) ايف آءِ اي ڪارپوريٽ ڪرائيم سرڪل ڪراچي پاڪستان اسٽيل ملز اسپتال ۾ ڪرپشن جي جاچ شروع ڪري ڇڏي آهي.ان سلسلي ۾ اسٽيل ملز جي چيف ايگزيڪيوٽو آفيسر کي لکيل هڪ خط ۾ لاڳاپيل آفيسرن کي گهرايو ويو آهي، ايف آٰءِ اي ذريعن مطابق اسٽيل مل جي ٻين شعبن وانگر ملازمن کي علاج جي سهولت فراهم ڪندڙ اسپتال به سخت بدانتظامي جو شڪار آهي ۽ اسپتال ۾ دوائن جي خريداري ۽ ٻيا انتظامي خرچن ۾ وڏي پئماني تي مالي بدعنوانيون ٿي رهيون آهن اسٽيل مل اسپتال ۾ ٿيندڙ باقاعدگيءَ جو هڪ اهم ثبوت گذريل سال اسپتال انتظاميه پاران ڪئي ويندڙ خريداري ۾ لکين رپين جي ڪرپشن تي اسٽيل ملز انتظاميه پاران جاچ لاءِ هڪ ڪميٽي جوڙي وئي ۽ ڪميٽي پنهنجي رپورٽ ۾ لاڳاپيل آفيسرن جي ڪرپشن ۾ ملوث هجڻ جي تصديق ڪندي سندن خلاف ڪارروائي ڪرڻ جي سفارش پڻ ڪئي. پر اڃا تائين لاڳاپيل ذميوارين خلاف ڪا به ڪارروائي شروع ناهي ٿي سگهي. جاچ ڪميٽي جي ميمبرن ۾ اڳوڻو ڪيپٽن شمسي حسن، جنرل مئنيجر اسد بن سعيد، اي جي ايم فنانس محمد حنفي، ڊاڪٽر عمر ڀٽي، ڊاڪٽر چند ڪمار شرما ۽ ڊي جي ايم شاهد احمد خان شامل آهن. پيغام ۾ سي اي او کان سمورو رڪارڊ به طلب ڪيو ويو آهي جنهن ۾ ڪميٽي جي رپورٽ ۽ ان جي روشني ۾ ذميوار آفيسرن ۽ ملازمن جي خلاف ٿيندڙ ڪارروائي جو تفصيل شامل آهي.