تازيون خبرون

Daily Archives: March 4, 2016

سڀني کي خبر آهي ته الطاف حسين جا ”را“ سان لاڳاپا آهن: مصطفيٰ ڪمال

ڪراچي (اين اين آءِ) اڳوڻي سٽي ناظم ڪراچي سيد مصطفيٰ ڪمال ۽ ايم ڪيو ايم رابطا ڪميٽي جي اڳوڻي ڊپٽي ڪنوينيئر انيس احمد قائمخاني نئين سياسي پارٽي ٺاهڻ جو اعلان ڪندي چيو آهي ته قانون لاڳو ڪندڙ ادارا خدا جي واسطي اردو ڳالهائيندڙ کي ايترو محب وطن سمجهو جيترو پنجاب، ڪي پي ڪي، سنڌ ۽ بلوچستان جا ماڻهو آهن، حڪومت اهڙي پاليسي يا لائحه عمل جوڙي سان جنهن سان پٽڪيل ماڻهو سڌي رستي تي اچن ۽ انهن کي به قومي ڌارا ۾ شامل ڪيو وڃي، اها ڳالهه ڪنهن کان ڳجهي ناهي ته الطاف حسين جا ڀارتي ڳجهي ايجنسي را سان لاڳاپا آهن، اڄ صرف الطاف حسين جي ڪري اردو ڳالهائيندڙ کي را جو ايجنٽ ڪوٺيو پيو وڃي، الطاف حسين کي حقن لاءِ وڙهڻو آهي ته پاڪستان اچي، اسان به گڏجي وڙهنداسين، الطاف حسين لاءِ ماڻهن پنهنجا 2 نسل تباهه ڪري ڇڏيا پر هاڻ لاڳيتو شراب واپرائڻ سان ان جي حالت اها آهي ته هفتن جا هفتا کيس ڪنهن ڳالهه جي ڪا سڌ ئي ناهي رهندي، ايم ڪيو ايم جي پريس رليز رحمان ملڪ لکرائيندو هو، ان دور ۾ شهر جو ٻيڙو ٻڏي ويو، ڪراچي جي حالت هڪ ڏينهن ۾ خراب ناهي ٿي، پهريان رابطا ڪميٽي مهينن ۾ زليل ٿيندي هئي ۽ هاڻ منٽن ۾ زليل ٿئي ٿي، رات جون گاريون ڏئي صبح جو معافي ورتي وڃي ٿي، ڇا سولت مرزا پنهنجي ماءُ جي ڪک مان ڏوهاري پيدا ٿيو هو، صولت مرزا کي شاهد حامد جو قاتل ڪنهن بڻايو، ڇا اجمل پهاڙي پنهنجي ماءُ جي ڪک مان اجمل پهاڙي پيدا ٿيو ان کي قاتل ڪنهن بڻايو، اسان محبت وطن ماڻهو هئاسين ۽ هي ڪميونٽي محب وطن ڪميونٽي هئي، اڄ را جي ايجنٽ ٿي وئي، تعليم اسان جو زيور هو، اسان 30 سالن ۾ جاهل ٿي وياسين، خميس تي ڊفينس ڪراچي ۾ هنگامي ڪانفرنس ڪندي هن چيو ته مان ۽ انيس قائمخاني اڄ هڪ پارٽي جو اعلان ڪري رهيا آهيون جنهن جو ڪو نالو ناهي، هن قومي جهنڊ ڏيکاريون چيو ته هي منهنجي پارٽي جو جهنڊو آهي، موجوده، اڳوڻي حڪومت، اسٽبلشمينٽ سميت سڀني کي خبر آهي ته الطاف حسين جا را سان لاڳاپا آهن، انهن سمورن ادارن ۽ حڪومتن کي ڪنهن ٻئي نه پر پارٽي جي اندرئين ماڻهن اسڪاٽ لينڊ يارڊ کي ٻڌايو، ڊاڪٽر عمران فاروق جي شهادت کانپوءِ لنڊن پوليس الطاف حسين جي گهر مان ٽرڪ ڀري ڪاغذات کڻي وئي، لنڊن پوليس انهن ڪاغذن جي ڇنڊ ڇاڻ ڪئي جن ۾ پارٽي جي ٻين ڪارڪنن سان گڏ الطاف حسين کان به 3 ڏينهن تائين پڇا ڳاڇا ٿيندي رهي، انهن ماڻهن جي چوڻ مطابق ته صرف 10 کان 12 منٽن کانپوءِ اسڪاٽ لينڊ هڪ کان پوءِ ٻيو ثبوت ان اڳيان رکڻ شروع ڪيو، جڏهن اسان انهن کان سوال ڪيو ته اوهان سڀ ڪجهه ڇو ٻڌايو ته اسان کي چيو ويو ته ان کان سواءِ ڪو ٻيو دڳ نه هو، اڃا ڪنهن جو نالو نه وٺندس پر جڏهن جڏهن پارٽي جا ماڻهو ڪوڙ ڳالهائيندا ته پوءِ اسان سچ ڳالهائينداسين، ايم ڪيو ايم ڇڏي ته پراپرٽي ۽ اختيار نه کسيا ويا هئا، ايم ڪيو ايم ڇڏيندڙن کي لت هڻي ڪڍيو وڃي ٿو پر اسان واحد 2 ماڻهو آهيون جن پارٽي کي خدا حافظ چيو اسان پارٽي جي اڳوڻي حڪومت کي 4 ڀيرا ڇڏيو پوءِ ان ئي پگهار تي واپس به آياسين، ايم ڪيو ايم جي پريس رليز رحمان ملڪ لکرائيندو رهيو اهو ئي سبب هو جو ڪراچي جو ٻيڙو ٻڏي ويو، الطاف حسين ڪڏهن به پنهنجون غلطيون قبول نه ڪيون ۽ پنهنجي اصلاح ۽ ماڻهن کان معافي وٺڻ بدارن پنهنجي طبيعت ۾ تبديلي نه آندي، اسان الطاف حسين صحيح ۽ غلط نه ڏٺو، اسان الطاف حسين لاءِ پنهنجا لاءِ دشمن ٺاهيا پر هن اسان جا نسل تباهه ڪيا، کيس ڪنهن هڪ ڪارڪن يا انسان جي پرواهه ناهي، لڳاتار شراب واپرائڻ سبب کيس ڏينهن ۽ رات ۾ فرق به ختم ٿي ويو هو، جڏهن کان پارٽي ۾ ايندڙ ماڻهن کي مرندي ڏٺو ۽ 35 سال اڳ جيڪو ٻار پنهنجي پيءُ کي دفنائيندو هو اڄ پنهنجي ٻارڙن کي دفنائي رهيو آهي، هن چيو ته تحريڪ ۾ قربانيون ڏيڻو پونديون آهن پر ان جو مقصد ٻڌايو وڃي، رات جو چيو ويندو هو ته کيس ماري ڇڏيو ۽ صبح رابطا ڪميٽي وري ان جون وضاحتون ڪندي رهي ٿي، هن چيو ته پ پ جي دور حڪومت ۾ الطاف حسين جي هدايت تي ايم ڪيو ايم 4 ڀيرا حڪومت ۾ آئي ۽ وئي ۽ پ پ جي بدترين ڪارڪردگي جي باوجود ايم ڪيو ايم 2008 کان 2013 تائين حڪومت ۾ آئي ۽ وئي ۽ عوام جي ڪا خدمت نه ڪئي جنهن جو بدلو 2013 جي چونڊن ۾ اردو ڳالهائيندڙ تحريڪ انصاف کي وڏي انگ ۾ ووٽ ڏنو، جيڪا ڳالهه الطاف حسين کي خراب لڳي ۽ هن 19 مئي 2013 تي نشي جي حالت ۾ ڪارڪنن کي نائين زيرو تي گڏ ٿيڻ جي هدايت ڪئي ۽ رابطا ڪميٽي کي ڪارڪنن کان زليل ڪرايو، حقيقت ۾ اهي ڪارڪن نه هئا پر اهي ڏوهاري هئا، پهريان رابطا ڪميٽي مهينن ۾ زليل ٿيندي هئي پر هاڻ ڏينهن ۾ زليل ٿئي ٿي، هن چيو ته نائين زيرو تي مهمانن کي پيش ڪيل کاڌو الطاف حسين جي مرضي کانسواءِ تيار نه ٿيندو هو، حڪومت ۾ اچڻ وڃڻ جو فيصلو ڪهڙي طرح ڪو ٻيو ڪري سگهيو پيو، رابطا ڪميٽي تحريڪ انصاف جي 8 لک ووٽ کڻڻ تي الطاف حسين جي ڪاوڙ ٿڌي ڪرڻ لاءِ اليڪشن ڪميشن ٻاهران 5 ڏينهن تائين مظاهرو ڪيو جنهن جي ضرورت نه هئي، انهن سمورين ڳالهين هوندي اسان پارٽي نه ڇڏي، پارٽي ڇڏڻ ڏاڍو ڏکيو فيصلو هو، جڏهن ڪارڪن جي لاش تي سياست ڪرڻي هجي ته ان جو لاش جناح گرائونڊ ۾ رکي ان تي مرسيو پڙهيو وڃي ٿو، جڏهن کان پارٽي ۾ هوش سنڀاليو آهي اڄ تائين ماڻهو رڳو قتل ٿي رهيا آهن، هن چيو ته ايم ڪيو ايم جي پريس رليز رحمان ملڪ لکرائيندو هو، اڳوڻي ناظم چيو ته هاڻ کان 24 ڪلاڪ اڳ تائين مان ۽ انيس قائمخاني آسائش زندگي گذاري رهيا هئاسين، اسان جا ٻارڙا اسان جي سامهون اسڪول ويندا هئا ۽ آزاد زندگي گذاري رهيا هئاسين پر اسان پنهنجي دل، دماغ، روح پاڪستان، ڪراچي ۽ سنڌ سان خاص طور تي اردو ڳالهائيندڙ جي اهنجن کان پاڻ کي الڳ نه رکي سگهياسين، اسان سياست کان پري هئاسين پر ان جي باوجود اسان کي هڪ هڪ ڏينهن جي خبر ملندي هئي، ڪنهن انسان کي نه رب کي راضي ڪرڻ لاءِ هي سڀ ڳالهيون ڪري رهيا آهيون، هن چيو ته قانون لاڳو ڪندڙ ادارن ۾ جيترا ماڻهو محب وطن آهن اوترائي اردو ڳالهائيندڙ به آهن، پريس ڪانفرنس دوران مصطفيٰ ڪمال روئي ويٺو ۽ الطاف حسين کي مخاطب ٿيندي چيو ته حقن لاءِ ويڙهه ڪرڻي آهي ته پاڪستان اچو اسان به اوهان سان گڏ وڙهينداسين، پر اوهان ته ايندڙ نسلن کي تباهه ڪري وڃڻ چاهيو ٿا، مهاجر ڪميونٽي تي رحم ڪريو، پارٽي اهڙي هئڻ گهرجي جو ڏوهاري ماڻهو اچي ته اهو به ٺيڪ ٿي وڃي، هن چيو ته اسان جي واپسي جو مقصد اهو ئي سچ سڀني کي ٻڌائڻو آهي ڪنهن کي لڳي ٿو ته مان غلط ڳالهائي رهيو آهيان ته ٻڌائي مان ثابت ڪندس، هن چيو ته اسان کي پارٽي جي سسٽم جي خبر هئي، پارٽي ڇڏي ته جان کي خطرو ٿي سگهي ٿو، اسان موت ۽ عزت ڏيڻ جو ٺيڪو الطاف حسين کي ڏنو هو، الطاف صاحب مسلسل ڪوڙ ڳالهائيندو رهيو آهي، هن چيو ته الطاف حسين کي 7 اٺ لاش گهرجن جنهن تي هو سياست ڪري سگهي، هن چيو ته اڄ هڪ شخص جي ڪري اردو ڳالهائيندڙ کي را جو ايجنٽ چيو پيو وڃي، صولت مرزا ۽ اجمل پهاڙي جهڙا ماڻهو پارٽي ۾ اچي را جا ايجنٽ بڻيا، هن عوام کي اپيل ڪئي ته صرف هڪ شخص جي ڪري سڄي اردو ڳالهائيندڙ قوم کان نفرت نه ڪريو ۽ ان کي ايترو محبت وطن سمجهو جيترو ڪنهن ٻئي صوبي جو رهواسي آهي، اسٽبلشمينٽ به اهڙو لائحه عمل جوڙي ته جيئن آئينده ڪو را جو ايجنٽ نه بڻجي، هن چيو ته الطاف حسين الله سان رجوع ڪري معافي گهري ۽ توبهه ڪري، دعا آهي ته الله تعاليٰ الطاف حسين کي نيڪ هدايت ڏئي.

 

مصطفيٰ ڪمال جي الزامن تي وفاقي حڪومت پاران جاچ لاءِ ڪميٽي جوڙڻ تي غور،سنڌ ۾ الرٽ جاري

اسلام آباد/ڪراچي(اسٽاف رپورٽر/م.ڊ)وفاقي گهرو وزير چوڌري نثار علي خان وزير اعظم نواز شريف کي ڪراچي جي اڳوڻي سٽي ناظم مصطفيٰ ڪمال جي پريس ڪانفرنس ۽ ايم ڪيو ايم تي هنيل الزامن بابت آگاهي ڏئي ڇڏي آهي، ذريعن موجب وفاقي حڪومت پاران مصطفيٰ ڪمال جي الزامن جي جاچ لاءِ ڪميٽي جوڙڻ تي غور شروع ڪري ڏيو آهي، هوڏانهن پريس ڪانفرنس بعد سنڌ جي گورنر ڊاڪٽر عشرت العباد ڪراچي سميت پوري سنڌ ۾ سيڪيورٽي سخت ڪرڻ جي هدايت ڪري ڇڏي آهي، ، ينجرز گشت ۾ آضافو ڪري ڇڏيو آهي، هوڏانهن رينجرز ايم ڪيو ايم جي مرڪز نائين ذيرو جي ارد گرد پڻ چوڪي ڌائي ڇڏي آهي، مصطفيءِ ڪمال ۽ انيس قائمخاني جي رهائشگاهه تي پڻ سيڪيورٽي سخت ڪرڻ سان گڏ خاردار تارون وڇايون ويون آهن، سنڌ جي وڏي وزير سيد قائم علي شاهه جو اڳوڻي سٽي ناظم مصطفيٰ ڪمال ۽ انيس قائمخاني جي پريس ڪانفرنس جي رد عمل ۾ چوڻ آهي ته مصطفيٰ ڪمال جهڙيون پريس ڪانفرنسون ٻڌيون به آهن ۽ ڏٺيون به آهن، ٻئي پاڪستاني آهن ڪڏهن به ملڪ اچي وڃي سگهن ٿا، پريس ڪانفرنس سان ڪراچي ۽ ملڪ جي حالتن تي ڪو به فرق ۽ اثر نه پوندو. پي ٽي آءِ سربراهه عمران خان جو چوڻ هيو ته مصطفيٰ ڪمال ڌانڌلي جي ڳالهه ڪري اسان جي تائيد ڪئي آهي، هن پريس ڪانفرنس ۾ سچ ڳالهايو جيڪا سٺي ڳالهه آهي، مون ۾ ايتري بصيرت ناهي جو ايم ڪيو ايم جي سياست تي وڌيڪ ڳالهه ڪري سگهان.سنڌ جي اڳوڻي گهرو وزير ڊاڪٽر ذوالفقار مرزا جو چوڻ آهي ته مصطفيٰ ڪمال دير آيو درست آيو، منهنجون ڳالهيون سچ ثابت ٿيون، الله تعاليٰ اڄ مونکي قوم اڳيان ٻيهر سرخرو ڪيو آهي، عوامي مسلم ليگ جي سربراهه شيخ رشيد چيو آهي ته ايم ڪيو ايم تي الزام ڪا نئين ڳالهه ناهي، ماضي ۾ اهڙا الزام لڳا پر ڪا ڪارروائي نه ٿي، ميڊيا سان ڳالهائيندي هن چيو ته هاڻ پارٽي مان وڏو سگهارو آواز آيو آهي جيڪا سنجينده ڳالهه آهي، جيڪڏهن هڪ هفتي ۾ ايم ڪيو ايم ۾ ڏار پيو ته ٺيڪ نه ته پوءِ ڪجهه نه ٿيندو، ايم ڪيو ايم ۾ اهڙو ڪوئي ماڻهو ناهي جيڪو پريس ڪانفرنس جو جواب ڏئي سگهي، هن چيو ته ڪراچي جون حالتون هڪ مهيني ۾ تبديل ٿي وينديون. پي ٽي آءِ اڳواڻ شاهه محمود قريشي جو چوڻ آهي ته سياست ۾ تمام وڏي تبديلي اچڻ واري آهي، مصطفيٰ ڪمال ايم ڪيو ايم جو اهم ڪارڪن هيون ان اسان جي موقف جي تائيد ڪئي آهي، ذوالفقار علي ڀٽو جي سياست جو آصف علي زرداري جنازو ڪڍي ڇڏيو، هن چيو ته الطاف حسين ۽ رحمان ملڪ وچ ۾ رابطا هيا. اڳوڻي ايم اين اي نبيل گبول انڪشا ف ڪيو آهي ته مون کي خبر آهي ته الطاف حسين ڪارڪنن کي هد ايت ڪئي هئي ته فاروق ستار، انيس قائم خاني ۽ مصطفيٰ ڪمال کي ماري نائن زيرو مان ڀڄائڻو آهي، مصطفيٰ ڪمال جي پريس ڪانفرنس کانپوءِ پنهنجي رد عمل جو اظهار ڪندي نبيل گبول چيو ته جيڪو ڪجهه مصطفيٰ ڪمال چيو آهي ان سان رابطه ڪاميٽي جا ستر سيڪڙو ماڻهو متفق آهن  ۽ اهي الطاف حسين جي روئي کان تنگ آهن ، هن چيو ته ايم ڪيو ايم جي اڳواڻن جي اڪثريت مصطفيٰ ڪمال جهڙي سوچ رکندي آهي. پيپلز پارٽي جي اڳواڻ سينيٽر سعيد غني، مصطفيٰ ڪمال جي پريس ڪانفرنس جي حوالي سان چيو آهي ته مان نٿو سمجهان ته ان ۾ ڪا نئين ڳالهه آهي، ڪيترن ئي سالن کان ملڪ ۾ اهي ڳالهيون هلي رهيون آهن ۽ ايم ڪيو ايم جي خلاف اهڙا الزام لڳندا رهيا آهن. خانگي ٽي وي سان ڳالهائيندي هن چيو ته 1992 وارو آپريشن به انهن الزامن هيٺ ڪيو ويو هو. سعيد غني چيو ته رحمان ملڪ ۽ ايم ڪيو ايم جي قائد جي ملاقات جي ڳالهه منهنجي سامهون ڪڏهن ناهي ٿي، انيس قائمخاني تي ماضي ۾ به سنگين الزام لڳندا رهيا آهن. هن چيو ته سياسي پارٽين کي پنهنجي ڪرپشن جي جاچ ڪرائڻ گهرجي. مصطفيٰ پريس ڪانفرنس ۾ فقط الزام مڙهيا ويا جنهن سان پارٽي تي ڪو به فرق نٿو پوي، مصطفيٰ ڪمال ۽ انيس قائمخاني خميس تي الطاف حسين تي ڇتي تنقيد ڪندي پارٽي کان الڳ ٿيڻ جو اعلان ڪيو، بئريسٽر سيف ميڊيا سان ڳالهائيندي چيو ته مصطفيٰ ڪمال جي الزامن جي ڪا حيثيت ناهي، ايم ڪيو ايم الطاف حسين جي ڪري قائم ۽ دائم آهي، هو بيشڪ پارٽي جو غير تڪراري اڳواڻ آهي، هن چيو ته جن ماڻهن کي اعتراض آهي ڀل پريس ڪانفرنس ڪن، هن چيو ته مصطفيٰ ڪمال جي الزامن تي پارٽي جو نقصان نه ٿيندو، ڇو ته ڪيترائي ماڻهو اهڙي قسم جا الزام لڳائيندا رهيا آهن، هن چيو ته هڪ 2 ماڻهو الزام لڳائي پنهنجو شوق پورو ڪن.

 

ايم ڪيو ايم مصطفيٰ ڪمال جا الزام رد ڪري ڇڏيا، مائنس الطاف قبول ناهي: رابطا ڪميٽي

لنڊن/ڪراچي(م.ڊ) ايم ڪيو ايم لنڊن ۽ پاڪستان جي رابطا ڪميٽي جي گڏيل پريس ڪانفرنس ڪندي نديم نصرت ۽ ڊاڪٽر فاروق ستار چيو آهي ته متحده وٽ مينڊيٽ آهي، ڪنهن جي الزامن جي وضاحت ضروري ناهي، ايم ڪيو ايم کي ورهائڻ جو ڪوششون ڪي نيون ناهن، اسان کي مائنس الطاف قبول ناهي، اهي الزام پهرين پي ٽي آءِ جماعت اسلامي به لڳائي چڪي آهي، الطاف حسين ئي هر درد جي دوا آهي، ڪوڙن الزامن جي مذمت ڪريون ٿا.

 

آپريشن ضرب عضب جي ڪاميابيءَ ۾ هوائي فوج جو ڪردار انتهائي اهم آهي: نواز شريف

اسلام آباد (بيورو) وزيراعظم نواز شريف چيو آهي ته آپريشن ضرب عضب جي ڪاميابيءَ ۾ هوائي فوج جو ڪردار انتهائي اهم آهي، حڪومت هٿياربند فوج جي صلاحيت ۾ واڌ لاءِ پر عزم آهي. اسلام آباد ۾ وزيراعظم نواز شريف سان هوائي فوج جي سربراهه ايئر چيف مارشل سهيل امان ملاقات ڪئي. ملاقات دوران ايئر چيف پاران وزيراعظم کي هوائي فوج جي پيشوراڻي معاملن ۽ آپريشن ضرب عضب تي بريفنگ ڏني وئي. ان موقعي تي ڳالهائيندي وزيراعظم نواز شريف چيو ته آپريشن ضرب عضب ملڪ جو سڀ کان وڏو آپريشن آهي، ان جي ڪاميابي ۾ هوائي فوج جو اهم ڪردار آهي. وزيراعظم چيو ته حڪومت هوائي فوج سميت ٽنهي هٿياربند فوج جي صلاحيت وڌائڻ لاءِ پر عزم آهي.

 

آدمشماري 18 سالن کان ناهي ٿي، بروقت آدمشماري جي حق ۾ آهيون: وڏو وزير

خيرپور (ڊ ر) سنڌ جي وڏي وزير سيد قائم علي شاهه گمبٽ ۾ 917 ملين جي لاڳت سان جگر جي پيوندڪاريءَ واري سينٽر جو افتتاح ڪندي گمبٽ انسٽيٽيوٽ آف ميڊيڪل سائنسز کي يونيورسٽيءَ جو درجو ڏيڻ جو اعلان ڪري ڇڏيو آهي ۽ چيو آهي ته هاڻ سنڌ ۾ ڪاري ڪامڻ جي مريضن جي ٽرانسپلانٽيشن مفت ۾ ڪئي ويندي. لور ٽرانسپلانٽيشن سينٽر جي افتتاحي تقريب کي خطاب ڪندي وزيراعليٰ سنڌ چيو ته ڪاري ڪامڻ هن وقت سنڌ صوبي ۾ وبائي صورت اختيار ڪري چڪو آهي،هن لور ٽرانسپلانٽيشن سينٽر ذريعي غريب ۽ بي پهچ مريضن جو مفت علاج ڪيو ويندو، هر ٽرانسپلانٽيشن تي 60-70 لک خرچ اچن  ٿا، پر هاڻي هن سينٽر جي ٺهڻ سان اها سهولت صوبي ۾ ممڪن ٿي سگهي آهي، هر ماڻهو ڀارت يا يورپي ملڪن مان جگر جي پيوندڪاري جو خرچ برداشت نه پئي ڪري سگهيو. وزيراعليٰ سنڌ وڌيڪ چيو ته اهو ڪنهن سنگ ميل کان گهٽ نه آهي جو گمبٽ انسٽيٽيوٽ آف ميڊيڪل سائنسز ۾ هڪ ئي هنڌ غريب ماڻهن جو مفت دل جا آپريشن، گڙدن جي پيوندڪاري، اينجيوگرافي ۽ هاڻ جگر جي پيوندڪاري ٿي رهي آهي، جڏهن ته هتي 4 هزار ماڻهن جو او پي ڊي ۾ علاج ٿي رهيو آهي. وزيراعليٰ سنڌ ڊاڪٽر اديب رضوي ۽ ڊاڪٽر رحيم بخش ڀٽي جي ڏکي انسانيت لاءِ ڪيل خدمتن کي ڀيٽا پيش ڪندي چيو ته هو غريب عوام جي اميدن تي پورا لٿا آهن. وزيراعليٰ سنڌ چيو ته سنڌ حڪومت صحت ۽ تعليم جي شعبن کي اوليت بنيادن تي ڌيان ڏئي رهي آهي، ڪارڊيو سينٽر ڪراچي جو انتظام سنڌ سرڪار سنڀالي ورتو آهي جنهن تي 8 ارب رپيا خرچ ڪيا پيا وڃن ۽ 15 ماڙ عمارت تعمير ڪرائي پئي وڃي، جتي دل جي مريضن جو مفت علاج ۽ آپريشن ڪيو ويندو. وزيراعليٰ سنڌ جرمن ماهرن جي ٽيم پاران هن نوبل ڪاز ۾ حصو وٺڻ تي ٿورا مڃيا ۽ چيو ته گمبٽ انسٽيٽيوٽ آف ميڊيڪل سائنسز جا فنڊ ايندڙ مالي سال ۾ وڌايا ويندا، جڏهن ته اداري جون سڀ ضرورتون پوريون ڪيون وينديون. تقريب کي خطاب ڪندي صحت واري صوبائي وزير ڄام مهتاب حسين ڏهر چيو ته اڄ نه جسم جي هڪ نازڪ حصي جي پيوندڪاريءَ وارو سينٽر پنهنجو مٽ پاڻ ۽ ملڪ جي پبلڪ سيڪٽر ۾ پهريون ادارو آهي، جيڪو سنڌ حڪومت جي مالي مدد ۽ سهڪار کانسواءِ ممڪن نه هو. هُن ڊاڪٽر ڀٽي ۽ سندس ٽيم جي ڪوششن کي ساراهيو جنهن ڇهن مهينن جي مختصر عرصي دوران هن پروجيڪٽ کي مڪمل ڪيو. گمبٽ انسٽيٽيوٽ آف ميڊيڪل سائنسز جي ڊائريڪٽر ڊاڪٽر رحيم بخش ڀٽي آجياڻي تقرير ۾ ٻڌايو ته سندن مستقبل جي منصوبن ۾ ڪينسر اسپتال ۽ آرٿو پيڊڪ سينٽر شامل آهن، ڊسپينسري مان شروع ڪيل هيءَ اسپتال اڄ پنهنجو مٽ پاڻ ميڊيڪل سائنسز جو ادارو بڻجي چڪو آهي. هن وڌيڪ چيو ته گمبٽ کي هيلٿ سٽي ڊڪليئر ڪري اُن لاءِ پيڪيج جو اعلان ڪيو وڃي ته جيئن هتي سنڌ صوبي جي ماڻهن کي صحت جون جديد سهولتون مفت مهيا ٿي سگهن. ڊاڪٽر ڀٽي ٻڌايو ته لور ٽرانسپلانٽيشن سينٽر جي ڪل لاڳت 917 ملين آهي، سنڌ سرڪار 300 ملين جاري ڪري ڇڏيا آهن. ان کان اڳ 8-رڪني جرمن ڊاڪٽرن واري ٽيم جي سربراهه پروفيسر ڊاڪٽر بيڪر وزيراعليٰ سنڌ کي لور ٽرانسپلانٽيشن بابت تفصيلي پرزنٽيشن ڏني ۽ چيو ته هو ٻن سالن تائين اداري ۾ رهندا ۽ ٽيچنگ اسٽاف گمبٽ اسپتال جي ڊاڪٽرن کي سکيا پڻ ڏنو. وزيراعليٰ سنڌ گمبٽ انسٽيٽيوٽ آف ميڊيڪل سائنسز جا مختلف وارڊ ۽ شعبا گهمي ڏٺا. ان موقعي تي ميڊيا سان ڳالهائيندي وزيراعليٰ سنڌ سيد قائم علي شاهه چيو ته آدمشماري 18 سالن کان ناهي ٿي، وفاق ۽ سنڌ سرڪار چاهي ٿي ته وقت سر آدمشماري ٿئي، پر 2 صوبا دلچسپي نه ٿا رکن ان لاءِ آدمشماري کي پٺتي ڪيو ويو آهي، ڇاڪاڻ ته پاڪ فوج ضرب عضب آپريشن ۾ مصروف آهي. هڪ سوال جي جواب ۾ وزيراعليٰ سنڌ چيو ته وفاقي حڪومت سان پاڻي، بجلي ۽ گئس جي مسئلن تي تحفظات آهن، جيڪي مسئلا گڏيل مفادن واري ڪائونسل ۾ کنيا ويندا، سي سي آءِ اجلاس آئين مطابق 90 ڏينهن ۾ ڪرائڻ ضروري آهي. وڏي وزير چيو ته سنڌ ۾ آباديءَ جي شرح وڌيڪ آهي ان حساب سان وفاق کي سنڌ جو حصو ڏيڻ گهرجي. بعد ۾ وزيراعليٰ سنڌ گمبٽ انسٽيٽيوٽ آف ميڊيڪل سائنسز ۾ لور ٽرانسپلانٽيشن جي رهائشي بلاڪ جو افتتاح پڻ ڪيو.

 

مصطفيٰ ڪمال جون مون بابت ڳالهيون بي بنياد ۽ ڪوڙ تي ٻڌل آهن: رحمان ملڪ

اسلام آباد (اين اين آءِ) پ پ سينيٽر رحمان ملڪ چيو آهي ته مصطفيٰ ڪمال جون مون بابت ڳالهيون من گهڙت، بي بنياد ۽ ڪوڙ تي ٻڌل آهن، اڳوڻي سٽي ناظم مصطفيٰ ڪمال جي پريس ڪانفرنس تي رد عمل ڪندي هن چيو ته ايم ڪيو ايم جو پڌرنامو لکرائڻ نه منهنجو ڪم هو ۽ نه ڪڏهن لکيو آهي پر گڏيل پڌرنامو جڏهن ٻنهي پارٽين جي ملاقات کانپوءِ شايع ڪرڻو هوندو هو ته ان ۾ ٻنهي پارٽين جي راءِ ضرور شامل هوندي هئي، هن چيو ته الطاف حسين سان منهنجون ملاقاتون سدائين صوبي ۽ وفاق ۾ اتحادي حڪومت کي مستحڪم ڪرڻ ۽ لوڪل باڊي آرڊيننس لاءِ ٿينديون هيون جن ۾ سنڌ جو گورنر يا فاروق ستار موجود هوندو هو، گهرو وزير جي حيثيت سان الطاف حسين ڪڏهن به ڪنهن ڪرمنل ڪارڪن جي حمايت جو نه چيو آهي ۽ نه ئي ڪڏهن ان جي ڪارڪن سان را جو تعلق بحث هيٺ آيو، ايم ڪيو ايم سان ملاقاتن ۾ هميشه پارٽي جي نمائندگي ۽ حمايت ڪئي آهي، الطاف حسين سان ملاقاتون ڪو ڳجهو راز نه هوندو هو جن کي مصطفيٰ ڪمال وڌائي ڪوڙ ۽ بنياد الزامن طور پيش ڪري رهيو آهي، واضح رهي ته پريس ڪانفرنس ۾ مصطفيٰ ڪمال دعويٰ ڪئي هئي ته رحمان ملڪ ايم ڪيو ايم لاءِ پريس رليز لکندو هو.

 

پاڪستان، پٺاڻ ڪوٽ ايئر بيس واقعي بابت ڀارت کان اضافي شاهديون گهـري ورتيون

اسلام آباد (بيورو) پاڪستان، پٺاڻ ڪوٽ ايئر بيس واقعي بابت ڀارت کان اضافي شاهديون گهــُري ورتيون، پرڏيهي ترجمان نفيس ذڪريا جو چوڻ آهي ته واقعي جي جاچ لاءِ ڀرپور سهڪار

ڪيو پيو وڃي، پاڪستاني ڪرڪيٽ ٽيم ٽي ٽوئنٽي ورلڊڪپ ۾ شرڪت ڪندي ۽ ان کي سڪيورٽي فراهم ڪرڻ ڀارت جي ذميواري آهي. پرڏيهي ترجمان نفيس ذڪريا اسلام آباد ۾ هفتيوار بريفنگ دوران ٻڌايو ته پاڪستان پٺاڻ ڪوٽ واقعي جي جاچ ۾ ڀارت سان ڀرپور سهڪار ڪيو ۽ واقعي جو ڪيس داخل ڪندي جاچ ٽيم به جوڙي وئي جيڪا جلد ڀارت جو دورو ڪندي. هن چيو ته پرڏيهي سيڪريٽري پنهنجي ڀارتي هم منصب سان پٺاڻ ڪوٽ واقعي جون اضافي شاهديون گهـُريون آهن. پرڏيهي ترجمان چيو ته پاڪستان ۽ ڀارت جي پرڏيهي سيڪريٽرين وچ ۾ ڳالهين جي تاريخ مقرر ڪرڻ لاءِ ڪم جاري آهي. سندس چوڻ هو ته پٺاڻ ڪوٽ واقعي کانپوءِ وزيراعظم نواز شريف ڀارتي هم منصب کي فون ڪري حملي جي مذمت ڪئي پر اها بدقسمتي آهي ته پاڪستان تي الزام هنيا ويا. نفيس ذڪريا چيو ته پٺاڻ ڪوٽ واقعي جي جاچ لاءِ سمورا ضروري قدم کنيا ويا ۽ ڀارت کي جاچ جي حوالي سان مڪمل سهڪار جي خاطري به ڪرائي وئي. پرڏيهي ترجمان جو چوڻ هو ته قومي ڪرڪيٽ ٽيم ڀارت ۾ ٿيندڙ ٽي ٽوئنٽي ورلڊ ڪپ ۾ شرڪت ڪندي پر ان کي سڪيورٽي فراهم ڪرڻ ڀارت جي ذميواري هوندي. نفيس ذڪريا وڌيڪ چيو ته پاڪ-آمريڪا اسٽريٽجڪ ڳالهين سان لاڳاپن ۾ وڌيڪ بهتري ايندي ۽ ڳالهين جو ستون دور ايندڙ سال ٿيندو. پرڏيهي ترجمان چيو ته پاڪستان دهشتگردي خلاف سمورن ملڪن سان گڏيل سهڪار تي يقين رکي ٿو ۽ ان جو نيوڪليئر پروگرام ملڪ ۽ قوم جي حفاظت لاءِ آهي. سندس چوڻ هو ته افغان مفاهمتي عمل کي ڪامياب بڻائڻ سمورن ملڪن جي ذميواري آهي ۽ ان عمل لاءِ اڃا ڳالهين جي تاريخ طئي ناهي ٿي –

پاڪستان جو ايٽمي پروگرام رول بيڪ نه ٿيندو، پاڪستان تي 68 ڏهائي 5 ارب ڊالرز جو قرض آهي: اسحاق ڊار

اسلام اباد (بيورو) اسحاق ڊار چيو آهي ته پاڪستان جو ايٽمي پروگرام رول بيڪ نه ٿيندو، پاڪستان تي 68 ڏهائي 5 ارب ڊالرز جو قرض آهي ناڻي واري وفاقي وزير اسحاق ڊار چيو آهي ته  اڪستان جو ايٽمي پروگرام رول بيڪ نه ٿيندو، پاڪستان تي 68 ڏهائي 5 ارب ڊالرز جو قرض آهي. سينيٽ جو اجلاس چيئرمين رضا رباني جي صدارت هيٺ ٿيو، جنهن ۾ شرمين عبيد چنائي کي آسڪر ايوارڊ کٽڻ تي ڀيٽا وارو ٺهراءُ منظور ڪيو ويو، جيڪو سينيٽر نسرين جليل پيش ڪيو. ان موقعي تي پاليسي بيان ڏيندي اسحاق ڊار چيو ته پاڪستان پنهنجي ايٽمي پروگرام جو تحفظ ڪندو. سندس چوڻ هو ته جيڪي ماڻهو ايٽمي پروگرام رول بيڪ ڪرڻ جي ڳالهه ڪري رهياآهن، انهن کي هوش کان ڪم وٺڻ گهرجي. اسحاق ڊار چيو ته ضرب عضب آپريشن سبب عارضي متاثر ٿيندڙن جي بحالي لاءِ فنڊن جي ڪا کوٽ ناهي. ناڻي واري وزير چيو ته آءِ ايم کان 5 ڏهائي 23 ارب ڊالرز جو قرض ورتو ويو آهي. سندس چوڻ هو ته هنن جڏهن 2013 ۾ حڪومت سنڀالي ان وقت پاڪستان تي 61 ارب ڊالرز جو قرض هو. اسحاق ڊار چيو ته حڪومت طرفان سموريون ادائيگيون وقت تي ڪيون پيون وڃن، پوئين حڪومت جو قرض به ادا ڪيو ويو آهي.سينيٽ ۾ مخالف ڌر جي اڳواڻ اعتزاز احسن خطاب ڪندي ناڻي واري وزير جي تقرير کي لفظن جو گورک ڌنڌو قرار ڏنو. هن چيو ته اڄ اعتزاز احسن سنجيده هو، ڪٿي به نه کليو، پر هو تڏهن کلندو آهي جڏهن سندن حڪومت کي قرض ملندو آهي.اعتزاز احسن چيو ته هو سينيٽ ۾ اقتصادي صورتحال تي بحث چاهن ٿا، ايندڙ هفتي ان بابت اسحاق ڊار کان سوال ڪيا ويندا.

 

توهين عدالت ڪيس: سنڌ هاءِ ڪورٽ پاران آءِ جي سنڌ جي پيش نه ٿيڻ تي سخت ڪاوڙ جو اظهار

ڪراچي (اسٽاف رپورٽر) سنڌ هاءِ ڪورٽ توهين عدالت ڪيس جي ٻڌڻي دوران آءِ جي سنڌ جي پيش نه ٿيڻ تي سخت ڪاوڙ جو اظهار ڪندي ٻڌڻي 11اپريل تائين ملتوي ڪري ڇڏي آهي. سنڌ هاءِ ڪورٽ ذوالفقار مرزا جي هاءِ ڪورٽ آمد جي موقعي تي سندس ساٿين ۽ صحافين تي تشدد بابت توهين عدالت ڪيس جي ٻڌڻي ڪئي. آءِ جي سنڌ جي وڪيل عدالت کي ٻڌايو ته آءِ جي سنڌ سينيٽ جي اسٽينڊنگ ڪميٽي جي اجلاس ۾ شرڪت لاءِ اسلام آباد ويل آهي ان ڪري اڄوڪي ٻڌڻي کان آجو قرار ڏيڻ واري سندس درخواست منظور ڪئي وڃي. عدالت آءِ جي جي پيش نه ٿيڻ تي سخت ڪاوڙ جو اظهار ڪندي ٻڌڻي 17 اپرين تائين ملتوي ڪري ڇڏي آهي.

 

ڪراچي جي علائقي اورنگي ٽائون ۾ پوليس جي ڪارروائي، 5 جوابدار مارجي ويا

ڪراچي (اسٽاف رپورٽر) ايس آءِ يو ۽ اي وي سي سي ڪراچي جي اورنگي ٽائون واري علائقي ۾ شارٽ ٽرم ڪڊنيپنگ جي سربراهه سميت 5 ڏوهارين کي مقابلي ۾ مارڻ ۽ هڪ مغوي کي بازياب ڪرائڻ جي دعويٰ ڪئي آهي.جڏهن ته آءِ جي سنڌ ڪارروائي ۾ حصو وٺندڙ ٽيم لاءِ 10 لک رپيا انعام جو اعلان ڪيو آهي.ايس آءِ يو جي ايس ايس پي فاروق اعواڻ اي وي سي سي عملدارن سان گڏ پريس ڪانفرنس ڪندي چيو ته اورنگي ٽائون ۾ ڪارروائي دوران شارٽ ٽرم ڪڊنيپنگ گروپ جو خاتمو ڪيو ويو آهي. هن ٻڌايو ته ڪارروائي دوران گروپ جو سربراهه مظهر ڪالا، محمد تنوير، محمد فهيم، ابن علي ۽ رشيد مارجي ويا، جڏهن ته  هڪ مغوي زاهد علي کي بازياب ڪرايو ويو آهي. پوليس موجب ڏوهاري شهرين جي شارٽ ٽرم ڪڊنيپنگ ۾ ملوث هئا ۽ هنن مغوي زاهد علي جي وارثن کان 50 لک رپيا ڀنگ طلب ڪيو هو. آءِ جي سنڌ ڪارروائي ۾ حصو وٺندڙ ايس آءِ يو ۽ اي وي سي سي پوليس اهلڪارن لاءِ 10 لک رپيا انعام جو اعلان ڪيو آهي.  ٻي طرف ڪراچي جي ڊفينس واري علائقي ۾ قانون لاڳو ڪندڙ ادارن ڪارروائي ڪري پابندي مڙهيل تنظيم سان واسطو رکندڙ 3 دهشتگردن کي گرفتار ڪري هٿيار هٿ ڪري ورتا آهن. ذريعن موجب  ڊفينس جي خيابان بخاري  واري علائقي ۾ قانون لاڳو ڪندڙ ادارن هڪ جڳهه تي ڇاپو هڻي 3 دهشتگردن کي گرفتار ڪرڻ کانپوءِ کين اڻڄاتل هنڌ منتقل ڪري ڇڏيو آهي. ذريعن موجب گرفتار دهشتگردن جو واسطو پابندي مڙهيل تنظيم سان آهي ، جن وٽان مختلف قسم جا هٿيار به هٿ آيا آهن. ذريعن موجب گرفتار دهشتگردن جو تعلق بندش پيل تنظيم سان آهي