تازيون خبرون

Daily Archives: March 3, 2016

آرمي چيف جي افغان صدر سان ملاقات، شوال حملي جي جوابدارن خلاف گڏيل ڪارروائي تي اتفاق

ڪابل (م.ڊ) آرمي چيف جنرل راحيل شريف ۽ افغان صدر اشرف غني ملاقات ڪري سيڪيورٽي صورتحال ۽ شوال حملي جي جوابدارن خلاف گڏيل ڪارروائي تي اتفاق ڪيو آهي. پاڪ جي ترجمان ڊي جي آءِ ايس پي آر ميجر ليفٽيننٽ عاصم سليم باجوه پاران جاري ڪيل پڌرائي موجب، آرمي چيف جنرل راحيل شريف تاجڪستان کان واپسي تي ڪابل جو مختصر دورو ڪيو. آءِ ايس پي آر موجب، آرمي چيف جنرل راحيل شريف ڪابل جي مختصر دوري دوران افغان صدر اشرف غني ۽ آمريڪي فوج جي عملدارن سان ملاقات ڪئي. آءِ ايس پي آر چيو آهي ته ٻنهي اڳواڻن پاران خطي جي سيڪيورٽي صورتحال، بارڊر مئنيجمنٽ ۽ شوال حملي جي جوابدارن خلاف گڏيل ڪارروائي ڪرڻ سميت مختلف معاملن تي ڳالهيون ڪيون ويون. ملاقات دوران پاڪ فوج جي سربراهه جنرل راحيل شريف، اشرف غني کي افغان مفاهمتي عمل ۾ سهڪار جي خاطري، جڏهن ته  صدر اشرف غني پاران خطي جي استحڪام ۾ پاڪستاني ڪردار جي واکاڻ ڪئي وئي.

 

 جنهن اداري ۾ هٿ وجهون ٿا ته اتان هڪ نئين داستان نڪري ٿي اچي: سپريم ڪورٽ

اسلام آباد (بيورو) چيف جسٽس آف پاڪستان جسٽس انور ظهير جمالي  جو ڪيس دوران ريمارڪس ۾ چوڻ هو ته جنهن اداري ۾ هٿ وجهون ٿا ته اتان هڪ نئين داستان نڪري ٿي اچي.ميڊيا رپورٽ مطابق جسٽس انور ظهير جمالي جي سربراهي ۾ ٽي رڪني بينچ شهيد بينظير ڀٽو يونيورسٽي پشاور جي وائيس چانسلر جي مقرري بابت ڪيس جي ٻڌڻي ڪئي.چيف جسٽس آف پاڪستان وائيس چانسلر جي مقرري جي معاملي تي هائير ايجوڪيشن ڪميشن ڪي پي ڪي تي سخت تنقيد ڪئي ۽ چيو ته اختيار ملڻ کانپوءِ جيڪڏهن ڪو ماڻهو بي ايمان ٿي وڃي ته اها سسٽم جي خرابي ناهي،جنهن اداري ۾ هٿ وجهون ٿا انهيءَ جي هڪ نئين ڪهاڻي سامهون اچي ٿي وڃي.ان موقعي تي جسٽس انور ظهير جمالي ريمارڪس ڏيندي چيو ته سپريم ڪورٽ جي بادشاهت ناهي جو جنهن کي چاهي ڦاهي ڏئي،جنهن کي هار پارائي،عدالتون سسٽم ناهن ٺاهينديون،پر قانون مطابق ڪم ڪنديون آهن.وڏي وزير بابت فيصلو ڏنو ته سڀاڻي ٻيو ڪو آفيسر ساڳيو معاملو کڻي ايندو،سندس چوڻ هو ته الله ڪري هي قوم سڌري وڃي.جڏهن ته ٻڌڻي دوران جسٽس خلجي عارف پنهنجي ريمارڪس ۾ چيو ته ووٽر ووٽ ڏيڻ وقت اکيون بند ٿا ڪري بيهن يا وري ڪوڙن خوابن جي پويان لڳي ٿو پوي.عدالت ڪي پي ڪي جي سيڪريٽري کي رڪارڊ سوڌو گهرائي ٻڌڻي روڪي ڇڏي.

 

نيب ڊاڪٽر عاصم خلاف ايل اين جي ڪيس ۾ هڪ ٻيو ريفرنس داخل ڪرڻ جي منظوري ڏئي ڇڏي

اسلام آباد (بيورو)نيب، پيٽروليم واري اڳوڻي وفاقي وزير ۽ پ پ اڳواڻ ڊاڪٽر عاصم خلاف ايل اين جي ڪيس ۾ هڪ ٻيو ريفرنس داخل ڪرڻ جي منظوري ڏئي ڇڏي آهي. نيب، پيٽروليم واري اڳوڻي وفاقي وزير ۽ پ پ اڳواڻ ڊاڪٽر عاصم خلاف ايل اين جي ڪيس ۾ هڪ ٻيو ريفرنس داخل ڪرڻ جي منظوري ڏئي ڇڏي آهي. اسلام آباد ۾ نيب جي ايگزيڪيوٽو بورڊ جو اجلاس چيئرمين قمرالزمان چوڌري جي صدارت هيٺ ٿيو. ان موقعي تي سنڌ جي اڳوڻي نگران وڏي وزير زاهد قربان علوي، اڳوڻي صوبائي صلاحڪار ضياءُ الحسن لنجار ۽ بلوچستان اسيمبلي جي اڳوڻي ايم پي اي فتح علي عمراڻي خلاف جاچ جو حڪم پڻ ڏنو ويو. نيب ترجمان موجب ڊاڪٽر عاصم تي قومي خزاني کي 17 ارب 33 ڪروڙ، ضياءُ الحسن لنجار تي غير قانوني اثاثا ٺاهڻ ۽ قومي ناڻي کي 4 ڪروڙ 40 لک رپين جو نقصان پهچائڻ جو الزام آهي. نيب جي اجلاس ۾ ايف بي آر ڪيس ۾ اڳوڻي چيئرمين عبدالله يوسف خلاف جاچ جي منظوري ڏني وئي، جڏهن ته ريلوي جي اڳوڻي آءِ جي ابن حسن خلاف شڪايتن جي جاچ جي تصديق ڪرڻ جي هدايت ڪئي وئي. نيب ترجمان موجب ڪي ڊي اي جي چئن آفيسرن خلاف به جاچ جي منظوري ڏني وئي. ان موقعي تي اڳوڻي سينيٽر مرحوم اعظم هوتي ۽ سندس بيواهه حميرا خلاف شڪايتن کي رد ڪيو ويو.

 

وڏي وزير پوليس ۽ رينجرز کي ليبر ورڪرن لاءِ ٺاهيل فليٽن تان قبضو ٻن مهينن ۾ خالي ڪرائڻ جو حڪم ڏئي ڇڏيو

ڪراچي (اسٽاف رپورٽر) سنڌ جي وڏي وزير سيد قائم علي شاهه سنڌ پوليس ۽ رينجرز کي نادرن باءِ پاس جي ڀرسان ليبر ورڪرن لاءِ ٺاهيل هڪ هزار فليٽن تان غير قانوني قبضو ٻن مهينن ۾ خالي ڪرائڻ جو حڪم ڏنو آهي ۽ چيو آهي ته اهي غير قانوني قبضا هاڻ ڪنهن به صورت ۾ برداشت نه ڪيا ويندا. اهڙا حڪم هن اڄ وزير اعليٰ هائوس ۾ رٿيل اعليٰ سطحي اجلاس کي خطاب ڪندي ڪيا. اجلاس ۾ چيف سيڪريٽري سنڌ محمد صديق ميمڻ، ايڊيشنل چيف سيڪريٽري (ترقيات) محمد وسيم، پرنسپل سيڪريٽري علم الدين بلو، ناڻي وارو سيڪريٽري سهيل راجپوت، سيڪريٽري ليبر رشيد سولنگي سميت ٻين لاڳاپيل آفيسرن شرڪت ڪئي. اجلاس کي بريفنگ ڏيندي سيڪريٽري ليبر رشيد سولنگي ٻڌايو ته نادرن باءِ پاس ويجهو غريب ورڪرن لاءِ هڪ هزار فليٽ ٺاهيا ويا هئا جنهن ۾ 2010ع واري ٻوڏ سٽيلن کي غير قانوني طور ترسايو ويو هو، هاڻ اهي فليٽ خالي نه پيا ڪن. ان تي سنڌ جي وڏي وزير چيف سيڪريٽري کي ٻن مهينن اندر سنڌ پوليس ۽ رينجرز جي مدد سان فليٽ خالي ڪرائڻ جو حڪم ڏنو. هن چيو ته اهي فليٽ ليبر ورڪرن لاءِ ٺاهيا ويا هئا ۽ اهي هاڻ هر صورت ۾ سندن حوالي ڪيا وڃن ڇاڪاڻ ته مان هاڻي وڌيڪ انهن قبضا گروپن کي برداشت نه ڪندس. ليبر واري سيڪريٽري وڌيڪ ٻڌايو ته ورڪرز ويلفيئر بورڊ مختلف ليبر ڪالونين ۾ 7097 فيليٽس ۽ 1898 گهر ٺهرائي ڏنا آهن، انهن مان لانڍي ۾ واقع ليبر ڪالوني ۾ 1128 فليٽ ۽ 850 گهر آهن جڏهن ته سائيٽ ۾ 787 فليٽس ۽ 800 گهر آهن. نارٿ ڪراچي ۾ 154 فليٽ، ڪورنگي ۾ 920 فليٽ ۽ 248 گهر آهن. هن ٻڌايو ته نادرن باءِ پاس ۾ 3008 فليٽ آهن ۽ ان منصوبي تي ڪم هلي رهيو آهي. گلشن معمار ۾ هڪ هزار فليٽ آهن. هن ٻڌايو ته انهن کان علاوه حيدر آباد جي ليبر ڪالوني ۾ 1504 فليٽ، ڪوٽري ۾ 512، نوري آباد ۾ 192، لاڙڪاڻي ۾ 96 ۽ راڻي پور ۾ 100 گهرن جي تعمير تمام جلد مڪمل ڪئي ويندي. سيڪريٽري ليبر بريفنگ ڏيندي وڌيڪ ٻڌايو ته صوبي ۾ 24 ورڪرس ويلفيئر بورڊ جا ماڊل اسڪول آهن جنهن مان 22 فعال آهن. ورڪرس ويلفيئر بورڊ جا ٻه انٽرميڊيٽ ڪاليج به آهن جن ۾ ورڪرن جا 5743 ٻار تعليم پرائي رهيا آهن. ورڪرس ويلفيئر بورڊ طرفان انهن کي يونيفارم، بوٽ ۽ ڪتاب مفت فراهم ڪيا ويندا آهن. ورڪرس ويلفيئر بورڊ اسڪالر شپ بابت بريفنگ ڏيندي سيڪريٽري ٻڌايو ته بورڊ طرفان ورڪرن جي موت تي پنج لک رپين جي امداد ۽ هڪ لک رپيا ڏاج جي مد ۾ ڏنا ويندا آهن. هن ٻڌايو ته ميٽرڪ کان پوءِ 19600، گريجوئيشن لاءِ 32000 ۽ پوسٽ گريجوئيشن لاءِ 42000 سالياني اسڪالرشپ ڏني ويندي آهي. ورڪرس جي ٻارن کي سال 15-2014 دوران ايم بي اي، ايم بي بي ايس، ايم ايس، بي بي اي، بي اي، بي ايس، بي ٽيڪ ۽ ٻين ڊگرين لاءِ ڇهن ملين رپين جون 38 اسڪالرشپس ڏنيون ويون. سيڪريٽري ليبر رشيد سولنگي وڌيڪ ٻڌايو ته 18هين آئيني ترميم تحت سنڌ انڊسٽريل رليشنس ايڪٽ 2013 تحت ايمپلائيز اولڊ ايج انسٽيٽيوٽ ( اي او بي آءِ)، سنڌ ايمپلائيز سوشل سيڪيورٽي ايڪٽ 2015، ورڪرز ويلفيئر فنڊ 2015 ۽ ٻين قانونن کي صوبائي شڪل ڏئي ضروري ترميمون ڪري اسيمبلي مان پاس ڪرايو ويو آهي. اجلاس دوران وڏي وزير طرفان پڇيل سوال جي جواب ۾ چيف سيڪريٽري سنڌ ٻڌايو ته فيڪٽريز ايڪٽ، شاپ اينڊ اسٽيبلشمينٽ ايڪٽ، اسٽينڊنگ آرڊر آرڊيننس (سنڌ ٽرمس آف ايمپلائيمينٽ ايڪٽ)، ورڪرس ڪمپنسيشن ايڪٽ، پيمنٽ آف ويجز ايڪٽ، ايمپلائيمينٽ آف چلڊرين ايڪٽ، سنڌ منيمم ويج ايڪٽ ۽ ٻين قانونن جا مسودا اسميبليءَ کي موڪليا ويا آهن. ليبر واري سيڪريٽري وڌيڪ ٻڌايو ته سنڌ سرڪار گهٽ ۾ گهٽ اجرت تيرنهن هزار رپيا ماهوار مقرر ڪئي آهي، ان تي وڏي وزير چيو ته مون کي اهڙيون خبرون پهتيون آهن ته ليبر کاتو گهٽ ۾ گهٽ اجرت جي حڪومتي حڪمن تي عمل ڪرائڻ ۾ ناڪام ٿي رهيو آهي. هن چيو ته اهو اسان جو مزدورن سان واعدو آهي ۽ ان کي هر صورت ۾ عملدرآمد ڪرائڻ گهرجي. سيڪريٽري ليبر رشيد سولنگيءَ سيسي بابت ٻڌايو ته ان جو بنيادي مقصد ورڪرن کي طبي سهولتون فراهم ڪرڻ آهي ۽ هن وقت سيسي سان 29755 فيڪٽريون ۽ 759339 ورڪر رجسٽرڊ آهن، ان کانسواءِ 49902 دڪان ۽ 124338 دڪانن تي ڪم ڪندڙ ورڪر رجسٽرڊ آهن. هن چيو ته صوبي ۾ سيسي وٽ 5 اسپتال ۽ 42 ڊسپينسريون آهن جنهن ۾ 107777 او پي ڊي جڏهن ته 2635 انڊور مريض آهن. سنڌ جي وڏي وزير چيو ته وليڪا اسپتال تمام پراڻي آهي ۽ ان ۾ تمام سهولتون موجود هيون انڪري اڄ به مان ان کي سمورين ضروري سهولتن سان آراسته ڏسڻ چاهيان ٿو. سيڪريٽري ليبر رشيد سولنگي ٻڌايو ته سيسي جو ساليانو بجيٽ 8 ارب جڏهن ته ترقياتي بجيٽ 5 ارب رپيا آهي ۽ 3 اربن جو سرپلس بجيٽ آهي. انهيءَ تي وڏي وزير چيف سيڪريٽري سنڌ کي حڪم جاري ڪيا ته هو ذاتي طور تي سيسي جي اسپتال جو دورو ڪري ۽ وليڪا اسپتال ۾ ٽراما سينٽر پڻ تعمير ڪرايو وڃي. هن چيو ته ليبر کاتي وٽ سپر هاءِ وي، نيشنل هاءِ وي جي ڀرسان ڌاٻيجي انڊسٽريل اسٽيٽ ۽ سکر، لاڙڪاڻي ۽ ميرپورخاص سميت سمورن صنعتي شهرن ۾ ايمرجنسي سينٽر ۽ بهترين اسپتالون هئڻ گهرجن. سنڌ جي وڏي وزير ليبر کاتي کي سمورن اسٽيڪ هولڊرن جي مشوري سان ترجيحي بنيادن تي ورڪرس پارٽيسپيشن فنڊ وارو مامرو حل ڪرڻ جي هدايت ڪئي، هن وقت هي معاملو عدالتي ڪاروائي هيٺ آهي ۽ سنڌ هاءِ ڪورٽ جي ناظر وٽ ڏهن اربن جو فنڊ به جمع ڪرايو ويو آهي. سنڌ جي وڏي وزير ليبر کاتي کي چائيلڊ ليبر خلاف سخت قدم کڻڻ جا واضح حڪم جاري ڪيا ۽ چيو ته هي هڪ وڏو سنگين مامرو آهي ۽ مون کي محسوس ٿي رهيو آهي ته چائلڊ ليبر جي خاتمي لاءِ ٺوس قدم ناهن کنيا ويا. هن چيو ته شهيد محترمه بينظير ڀٽو سدائين چائلڊ ليبر خلاف آواز اٿاريندي رهي ۽ اهو سندس خواب هيو جنهن ڪري اسان جي حڪومت چائلڊ ليبر جي خاتمي لاءِ ڏينهن رات ڪوشان آهي.

 

 

پاڻ کي عقلمند سمجهندڙ وفاقي سرڪار وقت تي آدمشماري ڪرائڻ ۾ ناڪام وئي آهي: خورشيد شاهه

سکر(بيورو) قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته، پاڻ کي عقل ڪل سمجهندڙ وفاقي سرڪار وقت تي آدمشماري نه ڪرائڻ سان سندس وڏي ناڪامي آهي، عورتن جي بل سان مردن سان ڪهڙا مسئلا ٿيندا، ان بابت مولانا فضل الرحمن ئي ٻڌائي سگهي ٿو، پنجاب ۾ ڪول پراجيڪٽ سان زراعت تباهه ۽ بيماريون پکڙجنديون، ان ڪري پراجيڪٽ ٿر ۾ لڳايو وڃي، سکر ۾ نوازليگ اڳواڻ سرور لطيف سان والده جي لاڏاڻي تي تعزيت بعد ميڊيا سان ڳالهائيندي سيد خورشيد احمد شاهه چيو آهي ته، وفاقي سرڪار پاڻ کي عقل ڪل سمجهي پئي، آدمشماري وقت تي نه ڪرائڻ اها سندس وڏي ناڪامي آهي، هن چيو ته، ملڪ ۾ عورتن تي تشدد ٿئي پيو، ان ڪري عورتن کي آئيني حق ملڻ گهرجن، پنجاب اسيمبلي مان عورتن جي حوالي سان پاس ٿيل بل سان مردن کي ڪهڙا مسئلا پيش ايندا، اهو مولانا فضل الرحمن ئي ٻڌائي سگهي ٿو، ڇاڪاڻ ته هن اهو بل ناهي پڙهيو، خورشيد شاهه جو چوڻ هو ته وفاقي سرڪار ڀارت جي حوالي سان پارليامينٽ کي اڳڀرائي ۽ مسئلن بابت آگاهي نه پئي ڏئي، پارليامينٽ مضبوط ٿيڻ سان ادارا مضبوط ٿيندا، هن چيو ته، پنجاب ۾ ڪول پراجيڪٽ سان زراعت تباهه ۽ بيماريون پکڙجنديون تنهنڪري ڪول پراجيڪٽ ٿر ۾ لڳايو وڃي، هڪ سوال جي جواب ۾ چيو ته، گرين بس سروس اورينج ۽ ميٽرو جو مقابلو نٿي ڪري سگهي، ڇو ته، اهو مهانگو پراجيڪٽ آهي، هن چيو ته، حڪومت کي تيل في ليٽر37 روپيا ۽ ڊيزل 31 روپين ۾ پوي ٿو، ان باوجود حڪومت وڌيڪ ٽئڪس وٺي پئي، اڃا به گهٽ ۾ گهٽ پئٽرول 12 ۽ ڊيزل 15 روپيا گهٽائي وڃي، هن چيو ته، نوازليگ سرڪار 2018 ۾ بجلي بحران ختم ڪرڻ جي ڳالهه ڪئي هئي، پر کيس بجلي بحران 2020۾ ختم ٿيندي نظر نه پيو اچي، هن هڪ سوال جي جواب ۾ چيو ته، عمران خان ٻين کي ڪجهه به ناهي سمجهندو، صرف پاڻ کي سڀ کان وڏو جمهوريت پسند سمجهندو آهي، وڏو وزير نساسڪ ۾ ٿيل ڪرپشن جي انڪوائري پڻ ڪرائي.

 

ٻارڙن سان جنسي زيادتي ڪندڙ ۽ وڊيو ٺاهيندڙ 7 کان 10 سال قيد ڀوڳيندو: بل منظور

اسلام آباد (بيورو) سينيٽ جي انساني حقن بابت اسٽينڊنگ ڪميٽي ٻارڙن جي حقن جي تحفظ بابت فوجداري قانون ۾ ترميمي بل منظور ڪري ورتو، بل جي متن ۾ چيو ويو آهي ته ٻارڙن سان جنسي زيادتي توڙي غير اخلاقي وڊيو ٺاهيندڙ 7 کان 10 سال قيد ڀوڳيندو. سينيٽ جي انساني حقن بابت اسٽينڊنگ ڪميٽي جو سنيٽر نسرين جليل جي صدارت هيٺ اجلاس ٿيو، جنهن ۾ ٻارڙن جي حقن بابت فوجداري ترميمي بل جي منظوري ڏني وئي. وفاقي وزير زاهد حامد ڪميٽي کي بريفنگ ڏيندي چيو ته ٻارڙن جي غير اخلاقي وڊيو ۽ تصويرون ٺاهيندڙ 2 کان ست سال جيل ڀوڳي سگهندو. بل جي متن ۾ چيو ويو ته ٻارڙن جي انساني اسمگلنگ جو ڏوهه ثابت ٿيڻ تي جوابدار کي 5 کان ست سال قيد جي سزا ملندي. بئريسٽر ظفر الله چيو ته چيو ته قصور اسڪينڊل کي نظر ۾ رکندي ٻارڙن جي تحفظ واري قانون ۾ وڌيڪ بهتري آندي ويندي. اسٽينڊنگ ڪميٽي قبائلي علائقن ۾ 2008 کان 2011 تائين فورسز جي ڪارروائين جا تفصيل طلب ڪري ورتا آهن.

 

پاڪستان ۽ آمريڪا جو ڊگهي مدي پارٽنرشپ تحت معيشت، سيڪيورٽي، دهشتگردي ۽ ٻين اهم معاملن تي ٻطرفو تعاون وڌائڻ تي اتفاق

واشنگٽن (اين اين آءِ) پاڪستان ۽ آمريڪا وچ ۾ ڊگهي مدي پارٽنرسپ تحت معيشت، سيڪيورٽي، دهستگردي ۽ ٻين اهم معاملن تي ٻطرو تعاون وڌائڻ تي اتفاق ڪيو جڏهن ته آمريڪا چيو اهي ته مولانا مسعود اظهر جي حراست سميت پاڪستان پاران ورتل اپاءُ ذڪر جوڳا آهن ايٽمي عدم ڦهلاءُ کي روڪڻ لاءِ پاڪستان ۽ آمريڪا گڏجي ڪم ڪندا واشنگٽن ۾ پاڪ آمريڪا اسٽريٽجڪ ڳالهين جي پڄاڻي تي گڏيل پڌرنامي ۾ چيو ويو ته ٻنهي ملڪن ڊگهي مدي ٻن پارٽنرشپ تي اتفاق ڪيو آهي ايٽمي عدم ڦهلاءُ کي روڪڻ لاءِ پاڪستان ۽ آمريڪا گڏجي ڪم ڪندا مولانا مسعود اظهر جي حراست سميت پاڪستان پاران ورتل اپاءُ ذڪر جوڳا آهن امريڪا پٺان ڪوٽ حملي ۾ پاڪستان جي سهڪار جي واکاڻ ڪئي ٻنهي ملڪن ۾ ڪسمير سميت ٻين مسئلن جي حل لاءِ پاڪ ڀارت ڳالهين تي اتفاق ڪيو ويو آمريڪي پرڏيهي وزير جان ڪيري شدت پسندي جي خلاف اپائن تي وزيراعظم نوازشريف جي ڪردار جي واکاڻ ڪئي پڌرنامي ۾ چيو ويو ته افغان مفاهمتي عمل ۾ پاڪستان جو ڪردار اهم آهي، واشنگٽن ۾ ميڊيا سان ڳالهائندي پرڏيهي صلاحڪار مطابق مارچ جي آخر ۾ پاڪ ڀارت وزيراعظمن جي ملاقات جو امڪان آهي.

 

ڀارت جو پاڪستان سان لڳندڙ سرحد تي ريڊار، سينسر ۽ ڪيمرائون لڳائڻ جو اعلان ڪري ڇڏيو

نئين دهلي (م.ڊ) ڀارت، پاڪستان سان لڳندڙ سرحد وٽ ريڊار، سينسر ۽ ڪيمرا لڳائڻ جو اعلان ڪيو آهي. ڪشمير ميڊيا سروس مطابق اها ڳالهه ڀارت جي گهرو معاملن واري مملڪتي وزير ڪرن رجيبو لوڪ سڀا ۾ ٻڌائي. هن چيو ته پاڪستان ۽ بنگلاديش سان لڳندڙ سرحد تي ريڊار، سينسر ۽ ڪيمرائون لڳائڻ لاءِ هڪ پائلٽ پروجيڪٽ شروع ڪيو آهي. هن ٻڌايو ته حڪومت فيصلو ڪيو آهي ته ڪنٽرول لائين ۽ ورڪنگ ائونڊري سوڌو سرحد تي انهن ڏکين علائقن ،جتي ڪنڊيدار تارون لڳائڻ ممڪن ناهي، اتي ريڊار، سينسر، ڪيمرائون ۽ موصلاتي نظام تي ٻڌل هڪ مربوط فني نظام لڳايو وڃي. هن لکت واري جواب ۾ لوڪ سڀا کي ٻڌايو ته شروعاتي طور تي فيصلو ڪيو ويو آهي ته پائلٽ پروجيڪٽ پنجاب ، سر ڪريڪ(گجرات)، اولهه بنگال، تري پوره ۽ ڄمون خطن ۾ شروع ڪيو ويو ويندو. ڄمون سرحد تي اهو نظام لڳائڻ لاءِ 10 ڪروڙ رپين جي منظوري ڏني وئي آهي.

 

ميهڙ جي ڪچي ۾ بروهي برادري جي ٻن ڌرين ۾ انڌاڌنڌ فائرنگ،2 عورتون قتل،5 زخمي

ميهڙ (رپورٽر) ميهڙ تعلقي جي ڪچي واري علائقي ڳوٺ انب مگسي ڀرسان بروهي برادري جي  هڪ  ڌر جي هٿياربندن پاران ٻئي ڌر جي گهر تي ڪاهه ڪري انڌاڌنڌ فائرنگ ڪري ڏني، فائرنگ جي نتيجي ۾ 2 عورتون قتل، جڏهن تـ ٻن وڌيڪ عورتن سميت 5 ڄڻا پڻ گوليون لڳڻ سبب زخمي ٿي پيا. جنهن بعد علائقو جنگ جو ميدان بڻجي ويو، جڏهن تـ هٿياربندن جي فائرنگ سبب 65 ورهين جي پيرسن عورت مسمات فاطمـ بروهي ۽ 24 ورهين جي زينت خاتون گوليون قتل ٿي ويون. جڏهن مسمات نور خاتون، بيبل خاتون،آصف،احمد ۽ ميرل بروهي گوليون لڳڻ سبب زخمي ٿي پيا،جڏهن تـ اهڙو اطلاع ملڻ باوجود ڀنڊ ماڙي پوليس واقعي واري هنڌ 4 ڪلاڪن بعد پهچي لاش تحويل ۾ وٺڻ کانپوءِ پوسٽ مارٽم ڪرائڻ لاءِ تعلقا اسپتال ميهڙ پهچايا، جتي لاش پوسٽ مارٽم ٿيڻ بعد وارثن حوالي ڪيا ويا، جڏهن تـ آخري اطلاع تائين واقعي جو ڪيس ڀنڊ ماڙي ٿاڻي تي داخل ناهي ٿي سگهيو.