تازيون خبرون

Daily Archives: March 2, 2016

نرگس فخري ۽ اڪشي ڪمار جي فلم هائوس فل ٿري 3 جون تي ريليز ٿيندي

ممبئي (شوبز نيوز) آمريڪي ماڊل ۽ اداڪاره نرگس فخري ۽ اڪشي ڪمار جي نئي مزاحيا فلم ”هائوس فل ٿري“ 3 جون تي ريليز ڪئي ويندي. بالي ووڊ جي نئي مزاحيا فلم جي ڪهاڻي ساجد فرهاد لکي آهي جڏهن ته ان جي هدايت پڻ ساجد فرهاد ئي ڏني آهي. فلم ۾ اداڪاري ڪندڙن ۾ نرگس فخري، اڪشي ڪمار، اڀيشيڪ بچن، رتيش ديش مک، جيڪولين فرنينڊس ۽ بومن ايراني شامل آهن. فلم جي موسيقي ساجد واجد ترتيب ڏني آهي. بالي ووڊ جي نئي مزاحيا فلم هائوس فل ٿري 3 جون تي ڀارتي سينما گهرن ۾ ريليز ٿيندي.

 

پريٽي زنٽا آمريڪي دوست سان شاديءَ ڪري ڇڏي،لاس اينجلس ۾ تقريب

لاس اينجلس (شوبز نيوز)بالي ووڊ اداڪارا پريٽي زنٽا پنهجني دوست جين گنڊانف سان لائون لهي ورتو.پرڏيهي ميڊيا مطابق ڀارتي فلم انڊسٽري جي مشهور اداڪارا  پريٽي زنٽا شادي جي ٻڌڻين ۾ ٻڌجي وئي،پنهنجي ويجهي ۽ پُراڻي آمريڪي دوست جين گنڊانف سان لائون لهي سندس زال بڻجي وئي.شادي جو پروگرام آمريڪي شهر لاس اينجلس ۾ ڪيو ويو،جنهن ۾ گهوٽ ۽ ڪنوار جا ويجها دوست شامل ٿيا.

 

اڳوڻي فاسٽ بالر عاقب جاويد جو پاڪستان ڪرڪيٽ ٽيم جي ڪوچنگ جي خواهش جو اظهار

اسلام آباد(اسپورٽس نيوز) قومي ڪرڪيٽ ٽيم جي اڳوڻي فاسٽ بالر عاقب جاويد پاڪستان ڪرڪيٽ ٽيم جي ڪوچنگ جي خواهش ظاهر ڪئي آهي پر پي سي بي ان حوالي سان ڪو فيصلو نه ڪيو. پاڪستان ڪرڪيٽ بورڊ جي اختيارين ”اي پي پي” کي ٻڌايو ته اڳوڻي فاسٽ بالر عاقب جاويد پي ايس ايل دوران دبئي ۾ پي سي بي جي آفيشلز سان ملاقات ڪئي ۽ قومي ڪرڪيٽ ٽيم جي ڪوچنگ جي خواهش جو اظهار ڪيو. اختيارين ٻڌايو ته پي سي بي ان حوالي سان ڪو فيصلو نه ڪيو ڇو ته قومي ڪرڪيٽ ٽيم جي ڪوچ وقاريونس جو سينٽرل ڪانٽريڪٽ هلندڙ سال جون يا جولاءِ ۾ ختم ٿيندو. اختيارين ٻڌايو ته ڪوچوقار يونس کي جولاءِ ۾ انگلينڊ خلاف سيريز لاءِ به ڪوچ برقرار رکيو ويندو.

 

آسٽريلوي ڪرڪيٽ ٽيم جو اسسٽنٽ ڪوچ  ٽي-20  ورلڊ  ڪپ کانپوءِ استعيفيٰ ڏئي ڇڏيندو

سڊني(اسپورٽس نيوز) آسٽريليائي ڪرڪيٽ ٽيم جو اسسٽنٽ ڪوچ ڪريگ ميڪ ڊرموٽ هلندڙ مهيني ڀارت ۾ ٿيندڙ آءِ سي سي ورلڊ ڪپ ٽي-20 کان پوءِ پنهنجي عهدي تان استعيفيٰ ڏئي ڇڏيندو. سندس دور ۾ آسٽريليائي ٽيم  2013ع ۾ انگلينڊ خلاف ايشز جو ٽائٽل کٽڻ سان گڏوگڏ ورلڊ ڪپ ٽائٽل پڻ پنهنجي نالي ڪيو هو ۽ هاڻي هو چاهي ٿو ته ڪينگروز ٽيم ورلڊ ٽي-20 ٽائٽل کٽڻ ۾ ڪامياب ٿئي ته جيئن هو يادگار طريقي سان رخصت ٿئي. آسٽريليا ڪرڪيٽ  بورڊ مئي 2014ع ۾ ڊرموٽ سان ٻن سالن جو معاهدو ڪيو هو جيڪو هلندڙ سال مئي ۾ ختم ٿي ويندو ۽ ڊرموٽ معاهدي ۾ واڌ جو خواهشمند ناهي.

 

مظلوم  طبقي ۾ ورهائجي ويل سنڌ..!!!!!: غلام مصطفيٰ جمالي

وقت حالات انساني زندگي سان گڏ بدلبا رهن ٿا دور وقت قومون جي تقدير جا  فيصلا ڪنديون آهن پٿرن جي دور کان ويندي ان وقت تائين جيڪو وقت گذريو ان وقت ۾ ڪيترين ئي قومن جي تقدير جا فيصلا ٿيا ڪيتريون ئي قومون آزاد ٿيون ڪيترن ئي قومون جي ڪندارن پنهنجي قومون جي آزادي تي نعرا هنيا جشن ملهايا ڪيترن ئي سهڻين ست رنگي ڪپڙا پائي انهن ڪندارن کي پنهنجي مقدر جو ساٿي بڻائي ڇڏيو انهن قومون ترقيون ڪيون اڄ هن دور ۾ اهي قومون آزادي سان گڏ ڪنهن جون محتاج ناهي ڪنهن اڳيان انهن جي هٿ ڦهلائڻ جي ضرورت ناهي اڄ اهي قومون خوش آهن پر اسان سنڌي ايترا بي وس ايترا لاواث ڇو…!!!! ڇو اسان جي ننگ تن ڍڪڻ ڪپڙو ناهي ڇو اسانجي بک ستايل کائڻ لاءِ لولو ناهي،ڇو.؟؟اسان جا ڪندار ڪيڏانهن ويا اسان جي مقدرن ۾ رڳو لاشا ڇو،؟ هن دؤر کي نظرياتي عروج جو زمانو چيو وڃي ٿو. شايد ئي اسان گمان ڪو اهڙو ماڻهو هجي ،جيڪو پنهنجي نظرياتي پختگيءَ ۽ بي مثال حيثيت جي دعويٰ نه ڪندو هجي . جيڪو ٿو آني مان ڦٽي نڪري سو قوم جي حال ۽ مستقبل کي سنوارڻ جا سبق ڏئي ٿو. سماجي ڪارڪن هجن يا سياستدان، شاگرد هجن يا استاد ، واپاري هجن يا سرڪاري ملازم ، صحافي هجن يا اديب اسان جا اهي سمورا طبقا قوم جي ڀلائي ۽ فرد جي آزاديءَ جي ڳالهه ڪن ٿا .پر جيتريون ڳالهيون ٿين ٿيون ، جيتريون دعوائون ڪيون وڃن ٿيون ۽ جيتريون ڪوششون ڪيون وڃن ٿيون، صورتِ حال اوتري ابتڙ ۽ خراب ٿيندي وڃي ٿي . نالي ماتر به ترقي ڪانه ٿي ٿئي. انسان جو روز به روز حال حشر ايئن ٿيندو وڃي ٿو ،جهڙوڪ هن جي مٿي تي ڏکن ۽ ڏوجهرن جي ڳنڍ هجي، هن جا هٿ حالتن جي ٽوڙهن سان ٻڌا ويا هجن ۽ هو ڪنڊن واري پيچرن تان گذري رهيو هجي ۽ مسئلن جي ڇتن ڪتن جي لوڌ هن پٺيان هجي. اڄوڪي عوام جو روح زخمي آهي ۽ وجود رتوڇاڻ آهي. ڄ جو سنڌي داخلي غلاميءَ جي اهڙي ڀيانڪ دور مان گذري رهيو آهي، جنهن جو مثال سنڌ جي تاريخ ۾ ملي نه ٿو سگهي، هن تي اها غلامي اسرائيل يا آمريڪا مسلط ڪانه ڪئي آهي. يا وري ڌرتي ۽ آسمان مظلومن سنڌين تي ڏمريا آهن.

اهو قرب هڪ سنڌيءَ ٻئي سنڌيءَ تي ڪيو آهي . اڄ جو سنڌي ٻئي سنڌيءَ جي ظلم جو نشانو بڻيل آهي.اسان جا آدرش، اسان جا نظريا اسان جا اصول، اسان جا قدر ۽ اسان جا ادارا اسان جي سنڌين هٿان نشانو ٿيا آهن. اسان پنهنجي آدرشن کي ”قيدي آدرش“ بڻائي ڇڏيو آهي.اسان پنهنجي ڪنهن به آدرش جي ڳالهه مڃڻ لاءِ تيار نٿا ٿيون بلڪه آدرش کي پنهنجي ذاتي خواهه گروهي مفادن جي ڍال بڻايون ٿا. اهڙيءَ ريت اسان نظرين ،قدرن ۽ اصولن جي ڳالهه ٻئي کي بيوقوف بنائڻ  ۽ پنهنجي اندر واري مڪروهه انسان کي لڪائڻ لاءِ ڪندا آهيون. اسان پنهنجي گناهن کي لڪائن ۽ ڏوهن کي پالڻ لاءِ تنظيمن ۽ جماعتن ۾ پناهه وٺون ٿا. اسان جي چڱ مڙسي ٻئي جي پٽڪي لاهڻ لاءِ مخصوص ٿي چڪي آهي. هن وقت اسان جو معاشرو ظالم ۽ مظلوم طبقن ۾ ورهائجي چڪو آهي. هڪڙا ماڻهو ڏنڊي ۽ ڏاڍ جي زور تي ڪنهن تنظيمن يا جماعت جي آسري تي چڱ مڙسي يا عهدي رتبي جي آڌار تي ،ذات پات يا هلنديءَ پڄنديءَ جي زور تي شريف ، بيوس، لاچار ۽ مجبور انسان جو استحصال ڪري ٿو ۽ ظلم جون انيڪ روايتون قائم ڪن ٿا. اهڙي صورتِ حال سچي، سڌي ۽ سادي انسان کي پاڻ جهڙي انسان جو غلام بڻائي ڇڏيو آهي. اڄ جو انسان اهڙي عذاب جي زندگي گذاري رهيو آهي . هو مظلوم آهي، محڪوم آهي ۽ مجبور آهي.اهڙن مجبورن ۽ مظلوم غلامن جو تعداد ظالمن ۽ استحصال ڪندڙن جي تعداد کان گهڻو وڏو آهي. بلڪه ائين چئجي ته اسان جي اڪثريت داخلي غلاميءَ جي چڪي ۾ پيسجي رهي آهي ۽ اسان جي ٿورائي پنهنجي ئي ڌرتي وارن جي رت چوسڻ ۾ مصروف آهي. هنن قهري ڪارواين اڪثريت کان ڌرتيءَ جي بک کسڻ جي ڪوشش ڪئي آهي. عوام پنهنجي ذاتي سورن ۽ عذابن ۾ ايترو ته مصروف ۽ منجهيل رکيو ويو آهي جو هن کان جهڙوڪ ڌرتي جا ڏک ساريا ئي نٿا ٿين.

بهاري مسئلو حل ٿيو يا نه ؟ ڪالا باغ ڊيم اسان جي ترقي جو ڪارڻ آهي يا تباهيءَ جو سبب آهي؟ ڪراچي سنڌ کان الڳ ٿئي يا نه ؟ سنڌ جو وڏو وزير يا گورنر سنڌي ٿئي يا غير سنڌي؟ عوام اهڙن دکن دردن، سورن ۽ مسئلن کي ان ڪري ئي محسوس ڪري نٿو سگهي جو هن جي پنهنجي زندگي ئي عذاب بڻائي وئي آهي.اسان ٺلها بحثن جا باجا وڄائڻ ۾ پورا آهيون سموري گهر الٽي ويون اسان جي اگهور ننڊ اڃان پوري ناهي ٿي.اسان جي ڌرتي جي رت جي هولي لاشن جي مينار کڙا ٿي چڪا آهن اسان جي ڏاهن پنهنجن قومن کي تباهه ٿيندي ڏسي پنهنجون اکيون بند ڪري لوڪ کان لڪي روئڻ ۾ پورا آهن انهن کي خبر آهي ته هاڻ صرف ڳجهون آهن جيڪي ماس کائڻ ٿيون چاهين انهن جي دلين ۾ لالچ حوس ڀريل آهن انهن وٺ احساس ناهي انهن جا احساس مري چڪا آهن انهن جون جون دلين ٿي پٿرن جو قبضو ٿي چڪو آهي انهن وٽ اکيون ناهن انهن جا روح مري چڪا آهن اڄ اسان جي ڏاهن وٽ جيڪي دکي ڌرتي جي ڏک ڏسڻ جو حوصلو ناهي رهيو.!! عوام اڄ جي حالتن ۾ صبح شام انهيءَ اڻ تڻ ۾ آهي ته هن جي عزت سان رهجي اچي. هن جي جان ۽ مال کي ڪو ڇهيو نه رسي، پر جيئن ته هن کي داخلي غلامي جي ڳٽ سان ڪنڌ جهڪائي هلڻ تي مجبور ڪيو ويو آهي. ان ڪري هو پنهنجي پيرن کان پرتي ڏسي نٿو سگهي. هن تي ظلم اهي ڪن ٿا،جيڪي سندس آسرو ٿيڻ گهرجن، هن تي قهر اهي ڪن ٿا جيڪي رحم ۽ ڪرم لاءِ آهون ۽ دانهون ڪن ٿا. هن جي زندگي انهن عذاب بڻائي ڇڏي آهي، جيڪي اجتماعي خوشحالي جي ڊاڙ هڻن ٿا.هن کي ڌرتي کان اهي ڌار ڪن ٿا، جيڪي قوم کي متحد رکڻ لاءِ تنظيمون ،پارٽيون ۽ جماعتون جوڙين ٿا. هن تي ڏاڍ ۽ ڏمر اهي ڪن ٿا، جيڪي ڏاڍن کي ڏارڻ جا نعرا هڻن ٿا . هن کي سڃو ۽ سکڻو اهي ڪن ٿا ، جيڪي قوم جي خوشحاليءَ جي دعويٰ ڪن ٿا . ان ڪري ڪنهن به قومي ۽ سياسي فيصلي خواهه مسئلي ۾ عوام اهڙن ڌاڙيلن جو ساٿ نٿو ڏئي نتيجي ۾ سنڌ جا سنگين مسئلا روز به روز سنگين ۽  ڳنڀيرٿيندا وڃن ٿا ۽ عوام انهن ۾ ڪا به دلچسپي نٿو وٺي. اسان جيڪڏهن چاهيون ٿا ته سنڌ جي ”حال“ خواهه ”مستقبل“ سان لاڳاپيل مسئلن ،خواهشن ۽ منصوبن ۾ عوام وڏي اڪثريت سان شرڪت ڪري ته پوءِ پهريون اسان کي عوام جي آزارن ۽ عذابن مان جان آجي ڪرڻي پوندي. عوام جي عزت، جان ۽ مال کي نشانو نه بنائڻو پوندو. جيستائين عوام داخلي غلاميءَ جي زنجيرن ۾ جڪڙيل آهي، جيستائين عوام جي زندگي اسان جي هٿن سان عذاب بڻبي رهندي ۽ جيستائين اسان جي هٿ ۽ زبان، قول ۽ فعل کان عوام لاءِ آزار پيدا ٿيندا رهندا، ان وقت تائين تِرَ جيتري تبديلي به ڪا نه ايندي، بلڪه جڏهن ڪنهن تبديلي آڻڻ جي ڪوشش ڪئي وئي ته عوام طرفان مدد بدران ان جي ڪنهن نه ڪنهن طريقي سان مزاحمت ٿيندي رهندي. ڇو ته عوام  اهڙن ظالمن ،ڦورن،ٺڳن ۽ رهزنن کي ڪنهن به قسم جي واڳ ڏيڻ نه چاهيندو . ان ڪري جيڪڏهن اسان ڪجهه ڪرڻ گهرون ٿا ته ان لاءِ پهريون عوام کي داخلي غلاميءَ مان آزاد ڪرڻو پوندو.

هن کي نام نهاد دانشورن جي علمي استحصال ،وڏيري جي سماجي ظلم ، ڪاموري جي اختياري ڏاڍ ۽ نقلي سياسي ڪارڪنن جي نظرياتي پرماريت کان بچائڻو پوندو.  عوام کي داخلي غلاميءَ مان آزاد ڪرڻ جو سولو طريقو اهو آهي ته اسان ٻين کي سڌارڻ بدران پاڻ کي سڌارڻ ۽ بدلائڻ جي ڪوشش ڪريون. اسان پاڻ سان ، پنهنجي نظريئي سان، پنهنجي ڌرتي ۽ ڌرتيءَ ڌڻين سان سچا ٿيون. اسان پنهنجي تنظيمن ۾ داخلي احتساب جي عمل کي اوليت ڏيون. جيڪڏهن اسان جي تنظيم ،ذات ۽ پيشي سان لاڳاپيل ڪو فرد ،ڪارڪن يا عهديدار ڪا اهڙي ڳالهه ڪري يا ڪو اهڙو عمل ڪري جنهن سان عوام جي دل آزاري ٿئي يا عوام جي عزت جان ۽ مال کي ڇيهو رسي ته پوءِ ان جو جوڳو تدارڪ ڪيون. مظلوم جي ڌر وٺون ۽ ظالم توڙي ظلم جي پاڙ پٽڻ جو پڪو پهه ڪيون.

 

 

نيب جي ڪارواين تي واويلا ڇو  …..؟ : جاويد احمد چانڊيو

نيب جي ڪارواين جو اهم مقصد ڪرپشن ڪرپٽ مافيا کان ملڪ ۽ عوام کي ڪرپشن جي ناسور بچائڻ ڪرپٽ مافيا کان ناجائز طريقي سان لٽيل رقم واپس ڪرائڻ ۽ ان سان گڏ ڪرپشن ۾ ملوث ڪنهن به ڌر کي قانون موجب سزاڏيڻ به آهي.ڪرپشن جو ناسورجنهن ملڪي ادارن کي مڪمل طرح کوکلو بڻائي ڇڏيو آهي پاڪستان ۾ وڌنڌڙ ڪرپشن تي عالمي برادري کي به حيرانگي ۽ تشويش آهي ڪرپشن جي جڙ ختم نه ٿيڻ سان ملڪ ۽ عوام جي ترقي خوشحالي ممڪن نه آهي. سڄي ملڪ ۾ ڪرپشن ڪرپٽ مافيا خلاف نيب جو ادارو عملي ڪاروائي ڪندي نظر اچي رهيو آهي.ڪرپشن ڪرپٽ مافيا نيب جي ڪارواين تي سخت ذهني دٻاءُ جو پڻ شڪار آهن .ڪرپشن جي زد ۾ آيل ادارن جو جائزو وٺجي ٿو ته ڪرپشن جي ناسور ادارن کي اڏيهي وانگر تباهه ڪري ڇڏيو آهي،۽ عوام کي ڪنگلو بڻايوويو آهي.ملڪ جا اڪثر ادارا ڪرپشن جي زنگ ۾ وٺجي وياآهن هرسال ڪرپشن جو گراف تيزي سان وڌي رهيو آهي. هرسال300ارب جي ڪرپشن ٿئي ٿي ڪجهه ڏينهن اڳ وزير اعظم ميان محمد نواز شريف جي قومي اداري نيب تي ٿيل تنقيد ملڪ ۾ نئون بحث ڇيڙي وڌو آهي اهو به معلوم ٿيو آهي ته نيب ڪرپشن ڪرپٽ مافيا جيڪي مختلف ادارن سان تعلق هجڻ ڪري هو سياسي اثر ۽وڏا گهرا تعلقات رکن ٿا.مسلم ليگ(ن)سان تعلق رکندڙ جيڪي ميان محمد نواز شريف ۽ شريف خاندان سان ويجهڙائي رکن ٿا جنهن جو تعداد 50ٻڌايو پيو وڃي انهن جا ڪرپشن ڪيسن جابند ٿيل فائل ٻيهر کلڻ سان معاملو وڌيڪ پيچيده ٿي ويو آهي.نيب پڪا ثبوت هٿ ڪري ورتا آهن ۽ انهن تي اربين رپين جي هيرا ڦيري ۽ قومي خزاني کي نقصان پهچائڻ جو الزام آهي. قومي اداري( نيب)تي ڪجهه خدشا ٿي سگهن ٿا پر ان جو مطلب قومي اداري کي ڪڏهن به تڪراري نه بنائڻ گهرجي نه ان تي ڪنهن به قسم جي سياست نه چمڪائڻ گهرجي وزير اعظم ميان محمد نواز شريف پي آئي اي جي مسئلي تي جڏهن ته نيب تي به سخت لهجو اختيار ڪيو آهي.اهو به معلوم ٿيو آهي ته نيب اڄ کان 25سال اڳ جي ڪيسن جا فائل به کولڻ جي تياري ڪري ورتي آهي جنهن سبب ڪرپشن ۽ ڪرپٽ مافيا ۾ وڏو ٿرٿلو متل آهي.مختلف ادارن ۾ ٿيل ڪرپشن جا ڪيس نيب جي زيرنگراني سماعت آهن نيب جي ڪارواين ٿيڻ کان پوءِ وڏو تعداد ڪرپٽ مافيا جو ملڪ کان فرار به ٿي چڪو آهي فرار ٿيل حڪومتي وزير بيروڪريٽ ڪامورا شاهي به شامل آهن. ڪرپٽ مافيا خلاف ڪاروائي بنا ڪنهن فرق جي سفارش ڪئي وئي آهي موجوده حالاتن ۾ سياسي ڌرين جو  نيب جي معاملي تي  لفظي جنگ ۽ گرما گرمي پڻ وڌنڌي رهي ٿي. نيب جي معاملي تي ڪرپشن ڪرپٽ مافيا خلاف نيب جون ڪاروايون اثر انداز ٿي سگهن ٿيون جيڪڏهن معاملو بهتر جي طرف وڃي رهيو آهي ته ان جي حمايت جاري رکڻ گهرجي. خدشن کي ختم ڪرڻ ۽ اصلاح جو عمل بهترين ڪرڻ لاءِ ڌرين جي سنجيدگي ضروري آهي.نيب ذريعن ٻڌايو آهي ته ماضي ۾ نيب جي ڪارڪردگي بهترين رهي آهي ڪرپشن ڪرپٽ مافيا خلاف قانون جي دائري ۾ رهي ڪري نيب ڪاروايون ڪري رهي آهي انهي جي تصديق نيب ڪيترائي ڀيرا وضاحت ڪئي آهي. نيب جي ڪارڪردگي جو  تفصيل ڪجهه هن ريت آهي ٿوقومي احتساب بيرو1999۾ وجود ۾ آيو قانون اصولن جي پاسداري نظم ضبط جو پابند بڻايو ويو.ڪرپشن جي خاتمي جي ذميواري (نيب )تي سونپي وئي نيب آرڊينس تحت1999 کان ڪم ڪرڻ لڳو آهي.قومي اداري نيب جو دائرو پوري ملڪ ۾ پکڙيل آهي ان کان سواءِ فاٽا گلگت بلستان تائين نيب جو وجود برقرار آهي. هن وقت قومي احتساب بيرو جو چيئرمين قمرزمان چوڌري آهن.نيب جو وجود اچڻ کان پوءِ ڪرپشن ۽ ڪرپٽ مافيا کان هن وقت تائين 262ارب رپيا وصول ٿي چڪا آهن. جيڪي قومي خزاني ۾ جمع ٿيا .قومي احتساب بيرو کي هن وقت تائين پهتل درخواستن جو تعداد 2لک70هزار 675آهي .ڪرپشن ڪرپٽ مافيا ۽ بدعنواني ۾ ملوث ماڻهن جي جاچ 5872 ٿي جڏهن ته 2908مليل درخواستن جي روشني ۾ جاچ جو حڪم ڏنو ويو آهي.مختلف احتساب عدالتن ۾ 2159ريفرنس داخل ٿيا.عوام جو قومي احتساب بيرو تي 42سيڪڙو اعتماد رهيو آهي جڏهن ته حڪومت جي ٻين ادارن تي 29۽ 30 سيڪڙو رهي ٿو.ٽرانسپيرلسي انٽرنيشنل گذريل سال جي رپورٽ ۾ ڄاڻايو هو ته پاڪستان ڪرپشن 175ملڪن ۾ شمار جڏهن ته هاڻي 126۾آهي .احتساب عدالتن جوو قت 10مهينا مقرر ڪيو ويوآهي جڏهن ته نيب وڌيڪ پنهنجا تفصيل به ظاهر ڪيا آهن جنهن جوپڻ ڊگهو تفصيل آهي. قومي احتساب بيرو پنهنجي فرض شناس سان ڪم ڪري رهيو آهي سنڌ ۾ جيڪڏهن نيب ڪرپشن ۽ ڪرپٽ مافيا خلاف ڪاروائي جو آغاز ٿئي ٿو ته صوبائي حڪومت مونجهاري جو شڪار رهي ٿي.ردعمل ۾بار بارنشاهدي ڪري ٿي ته سنڌ کان سواءِ ٻين صوبن ۾ به ڪرپشن ٿي رهي آهي. رڳو سنڌ کي وفاقي ادارا نشانو بڻائي رهيا آهن ڪرپشن ۽ ڪرپٽ مافيا خلاف جيڪڏهن بنا ڪنهن فرق جي عملي آغاز ٿئي رهيو آهي ته شروعات ڪهڙي به صوبي مان ٿئي ٿي ته ان جي مڪمل حمايت ۽ تائيد ڪرڻ گهرجي. ڇا سنڌ حڪومت کي اهو نظر نه اچي رهيو آهي ته 8سالن کان سنڌ جاماڻهون مسئلن جي ڌٻڻ ۾ ڦاٿل آهن.سنڌجا تاريخي شهر موهن جو دڙو ۾ ڪيئن بدلجي ويا. ان جو وڏو سبب ڪرپش ۽ بدعنواني آهي  حڪومتي ادارن ۾ وڌنڌڙ ڪرپشن جي ناسور ادارن جو ڏيوالو ڪڍي ڇڏيو آهي ادارن ۾ بهترين ڪارڪردگي ۽ اصلاح جو نشان به نظر نه اچي رهيو آهي ڪرپشن ۽ ڪرپٽ مافيا لاڳاپا سياسي ڌرين سان هجڻ ڪري هميشه محفوظ رهيا آهن سرڪاري اسپتالن جو جائزو وٺبو ته بدعنواني ڪرپشن سبب غريب عوام سستي دوابه نه ٿي ملي ميڊيڪل اسٽور کان عوام دوا خريد ڪري ٿو. سرڪاري آيل دوائون اسٽورن تي وڪرو ڪيون وينديون آهن اسپتالن جا اڪثر آلات ناڪارا ۽ ڊاڪٽر انهن کي ذاتي استعمال ۾ آڻيندا آهن. نيب جنهن جو ادارن ۾ صاف شفاف جاچ ۽ ڇاپو لڳي ٿو ته ڪروڙن جي ڪرپشن ظاهر ٿئي ٿي پوليس ٿاڻا وڪرو ٿين ته اتي انصاف جي ڪهڙي اميد ڪري سگهبي. غريب عوام جوحق سرڪاري نوڪرين جي ٻولي لکن ۾ هجي ته يقينن غريب عوام لاءِ سرڪاري نوڪريون خواب رهنديون. پوليس جي محڪمي ۾ ڪرپشن ڪنهن کان ڳجهي ۽لڪيل نه آهي لکين رپيا ڏيئي من پسندي پوسٽون ورتيون وڃن ته انهن ۾ ڪيتري عوام جي خادميت هوندي دهشتگردن ۽ ڏهارين سالاڳاپورکندڙ پوليس آفيسر عوام کي ڪيترو فائدو ڏيئي سگهن ٿا ڇا عوام کي انهن کان انصاف ملي سگهندو؟ ،جيڪڏهن سياسي ڌرين جو جائزو وٺجي ته هو ڪرپشن جي مسئلي تي هميشه خاموش تماشائي بڻيل هوندا آهن پ پ نواز ليگ تحريڪ انصاف جي يو آءِ  ايم ڪيو ايم سميت ٻيون سياسي ڌريون پنهنجي صفن کان ڪڏهن احتساب جي شروعات ڪئي آهي جنهن جو بهتر جواب عوام به ڏيئي سگهي ٿو .پ پ جي وزيرن توڙي عوامي چونڊيل نمائدن تي ڪرپشن جا الزام آهن  پ پ جا نظرياتي ڪارڪن ان جي تصديق به ڪن ٿا اهي طرح نوازليگ جي اڳواڻ تي به ڪرپشن جا پنهنجا ئي مقامي اڳواڻ ۽ ڪارڪن الزام لڳائن ٿا ته ان جو ازالو ڇو نه ٿي سگهيو آهي هن وقت تائين ڪابه اهڙي ثابتي نه ملي سگهي آهي ته پ پ نوازليگ سميت ٻئي ڪنهن ڌر ڪنهن به ڪرپشن مافيا کي پارٽي مان خارج ڪيو ويو آهي؟ سرڪاري نوڪريون وڪڻندڙن خلاف ڪاروائي ۽ لکين رپيا ڏيئي سرڪاري نوڪريو حاصل ڪندڙ کي رقم واپس ڏياري وئي؟،قومي احتساب بيرو نيب عوامي اميدن جو مرڪز آهي. ڪنهن به سياسي ڌر کي قومي احتساب بيرو نيب خلاف ڪنهن به قسم جو ثبوت آهي ته سپريم ڪورٽ جا در سڀني لاءِ کليل آهن نيب کربين رپيا واپس ڪرايا آهن جيڪي قومي خزاني ۾ جمع ڪرايا.سياسي ڌرين جي ڪرپشن خلاف پاڻ مرادو ڪهڙي ڪاروائي آهي ان جي به عوام ۽ ميڊيا اڳيا کليل وضاحت ڪرڻ گهرجي. وقت جي اهم ضرورت آهي ته قومي احتساب بيرو کي وڌيڪ خودمختياربڻايو وڃي نيب جي معاملن ۾ سياست چمڪائڻ بند ڪئي وڃي حساس معاملن کي سياست جي رخ نه چاڙهيو وڃي ،قومي مفادن خاطر ڪرپشن ڪرپٽ مافيا خلاف متحد ٿي عملي ڪم جو آغاز ملڪ ۽ عوام جي خوشحالي ترقي جو فارمولو ثابت ٿيندو.

 

 

تيل جا اگهه گهٽجڻ سان عوام کي جيڪو لاڀ ملڻ گهرجي نه ملي سگهيو….

عالمي اگهن ۾ آيل لاٿ کي نظر ۾ رکندي وفاقي سرڪار پهرين مارچ تي ملڪ اندر پيٽروليم شين جي اگهن ۾ گهٽتائي ڪري ڇڏي آهي، پيٽرول جي قيمت ۾ 8 رپيا 48 پيسا گهٽتائي ڪئي وئي آهي، جنهن کانپوءِ پيٽرول هاڻي في ليٽر 62 رپيا 72 پيسا ٿي ويو آهي. اهڙي طرح هاءِ اسپيڊ ڊيزل چار رپيا 67 پيسا، لائيٽ ڊيزل هڪ روپيو 7 پئسا، هاءِ آڪٽين 2 روپيا 98 پيسا، گاسليٽ هڪ روپيو 66 پئسا في ليٽر سستا ٿي ويا آهن. تيل جي اگهن ۾ گهٽتائي ڪندي وزير اعظم نواز شريف چيو آهي ته پيٽروليم وارين شين جا اگهه گهٽائڻ سان سرڪار کي نقصان ٿيو آهي پر تنهن هوندي به عوام کي فائدو ڏيڻ لاءِ اهڙو فيصلو ڪيو ويو آهي. سندس چوڻ هو ته پاڪستان ۾ پهريون ڀيرو ان حد تائين تيل جي اگهن ۾ گهٽتائي ڪئي وئي آهي. سندس اهو به چوڻ هو ته عوام تان ٽيڪس جو بار جيترو گهٽ ٿئي اوتري ئي کيس خوشي ٿيندي. پيٽروليم شين خاص ڪري في ليٽر پيٽرول جي اگهه ۾ 8 روپيا 48 پئسا جيڪا لاٿِ ڪئي وئي آهي، تنهن جي آجيان ڪري سگهجي ٿي، ۽ اميد به ڪجي ٿي ته وفاقي توڙي صوبائي حڪومتون پنهنجي لاڳاپيل ادارن کي سرگرمُ ۽ فعال بڻائيندي انهيءَ لاٿِ جو فائدو هيٺين سطح تي عوام کي به پهچائڻ لاءِ ڪي اپاءَ ضرور وٺنديون. بدقسمتيءَ سان قيام کان وٺي اڄ تائين هيءَُ ملڪ ڪڏهن مارشلائن، ڪڏهن دهشتگردي، ڪڏهن انتهاپسندي، ڪڏهن لسانيت، ڪڏهن قومي تضاد ته ڪڏهن انتهاپسنديءَ جي بحران جي ور چڙهيل پئي رهيو آهي، مهانگائي پڻ وقتن به وقتن هن ملڪ ۾ هڪ بحران جي شڪل  به اختيار ڪندي رهي آهي، جنهن جو ماريل عوام هر گهڙي هر پَلَ حڪومت جي سطح تي ۽ رياست جي سطح تي ڪنهن نه ڪنهن رليف جي ڳولا ۾ پئي رهيو آهي. ائين به ناهي ته حڪومتن طرفان عوام جي رليف لاءِ ڪي پروگرام ناهن ڏنا ويا يا عوام جي فلاح ۽ بهبود لاءِ وقت جي حڪومتن ڪيئي پروگرامَ پئي ڏنا آهن پر اهي ان ڪري گهربل نتيجا ڏئي نه سگهيا آهن جو انهن پروگرامن تي عمل يقيني بنائڻ جي ڪردارن پنهنجو ڪردار سچائي ۽ ايمانداريءَ سان نه نڀايو يا ائين چوڻ به غلط نه ٿيندو ته انهيءَ ڏس ۾ ٺهيل قانونن تي سندن روح مطابق عمل نه ٿيڻ جي ڪري عوام رليف کان هميشه محروم پئي رهيو آهي. هن ملڪ جي لڳ ڀڳ چاليهه سيڪڙو آبادي غربت جي لڪير کان به هيٺ زندگي گذاري ٿي، اڄ کوڙ اهڙا علائقا آهن، جتي جي واسين لاءِ رزقُ، روزگار ۽ ٻن ويلن جي ماني وڏو چيلينج بڻيل آهي،اڄ به ڳڀي جي ڳولا ۾ پيڙهيل طبقي جي گهٽ اجرت تي به جفاڪشي جاري آهي. عامُ واهپي جي شين ۾ ڳاٽي ٽوڙ واڌ جو بارو جي سڀ کان وڌيڪ ڪنهن طبقي تي پيو آهي ته اهو پورهيت طبقو ئي آهي ۽ غريب طبقو ئي آهي. سو چئي سگهجي ٿو ته پيٽروليم جي شين جي قيمت ۾ واڌ يا گهاٽي جو سنئون سڌو اثر به انهيءَ غريب ۽ پورهيت طبقي تي ئي پئي ٿو. پيٽرول جي قيمت ۾ واڌ يا گهٽتائي عامُ واهپي جي شين سان تعلق رکي ٿي، تنهن ڪري اهڙن اگهن ۾ واڌ يقينن سرمائيدار ۽ واپاري طبقي لاءِ خوشخبري هوندي آهي ۽ غريب طبقي لاءِ مايوسيءَ واري ۽ رڳن جي رهيل رت به چوسي ڇڏڻ واري خبر هوندي آهي پر جي اهڙن اگهن ۾ گهٽتائي ٿيندي آهي، ته غريب ۽ پورهيت طبقي لاءِ هِڪ خوشيءَ جي خبر هوندي آهي. اسان جو ملڪ اڃا ترقيءَ ۾ ان سطح تي نه پهتو آهي جو مافيائن کي ٽوڙهو وجهي سوگهو ڪري سگهي،

 

پاڪستان هر مشڪل مان نڪري رهيو آهي، 2018 لوڊشيڊنگ جي خاتمي جو سال هوندو: نواز شريف

چڪوال:وزيراعظم نواز شريف جو چوڻ آهي ته پاڪستان هر مشڪل مان ٻاهر نڪري رهيو آهي،جڏهن ته 2018 ع تائين ملڪ مان لوڊشيڊنگ جو به خاطمو ٿي ويندو.چڪوال ۾ عوامي ميڙاڪي کي خطاب خطاب ڪندي وزيراعظم نواز شريف جو چوڻ هو ته چڪوال سوڌو پوري ملڪ جي عوام مسلم ليگ(ن)تي اعتماد ڪيو آهي،جنهن سبب اسان هارين،مزدورن ۽ عام مڻهو جي خوشحالي لاءِ ڏينهن رات هڪ ڪري محنت ڪري رهيا آهيون.سندس چوڻ هو ته پاڪستان مشڪل وقت مان ٻاهر نڪري رهيو آهي،الله جي فضل ڪرم سان ملڪ مان دهشتگرديءَ سوڌو هر ڏکئي وقت کي منهن ڏئي رهيا آهيون ۽ ٻين مسئلن کي به ٿوري وقت ۾ حل ڪري وٺنداسين.وزيراعظم نواز شريف جو چوڻ هو ته بجلي لاءِ هڪ ڪروڙ ڪورڙ رپيا ڏينداسين،جڏهن ته بجلي کوٽ پوري ڪرڻ لاءِ محنت ڪري رهيا آهيون ۽ ان شا الله 2018 ع تائين ملڪ مان بجلي جي لوڊشيڊنگ جو خاطمو آڻينداسين.

 

ٿر لاءِ هڪ هزار ڊاڪٽر ڀرتي ڪرڻ ۽ ڊسپينسرن جون پگهارون جاري ڪرڻ جي هدايت

ڪراچي (اسٽاف رپورٽر) سيد قائم علي شاهه ٿر لاءِ هڪ هزار ڊاڪٽر ڀرتي ڪرڻ ۽ ڊسپينسرين تي ڪم ڪندڙ ملازمن کي پگهارون جاري ڪرڻ جي هدايت ڪري ڇڏي آهي سنڌ جي وڏي وزير سيد قائم علي شاهه ٿر لاءِ هڪ هزار ڊاڪٽر ڀرتي ڪرڻ ۽ ڊسپينسرين تي ڪم ڪندڙ ملازمن کي پگهارون جاري ڪرڻ جي هدايت ڪري ڇڏي آهي. وڏي وزير سيد قائم علي شاهه جي صدارت هيٺ ٿر صورتحال بابت اهم اجلاس ٿيو، جنهن ۾ صحت واري وزير ۽ سيڪريٽري پاران بريفنگ ڏني وئي. صحت واري وزير ڄام مهتاب ڏهر بريفنگ ڏيندي چيو ته ٿر جي 6 تعلقن ۾ 170 ڊسپينسرين کي فعال ڪيو ويو آهي. هن چيو ته ڊسپينسرين تي ڪم ڪندڙ ملازمن کي هن وقت تائين پگهارون ناهن ملي سگهيون، جنهن سبب ملازم ڏکيائن کي منهن ڏين پيا. اجلاس دوران وڏي وزير سيد قائم علي شاهه پاران نيوٽريشن ۽ ليڊي هيلٿ ورڪر پروگرام جي ڪاڪردگي تي ڪاوڙ جو اظهار ڪيو ويو. وڏي وزير سيد قائم علي شاهه صحت واري وزير کي هدايت ڪندي چيو ته ٿر ۾ ليڊي هيلٿ ورڪر پروگرام تي خاص ڌيو ڏنو وڃي.

 

آدمشماري بابت ان ڪئمرا بريفنگ لاءِ سيسس کي آخري خط لکيو آهي، جواب نه مليو ته ڪارروائي ڪئي ويندي: آغا سراج دراني

ڪراچي (اسٽاف رپورٽر) سنڌ اسيمبلي جي اسپيڪر آغا سراج دراني چيو آهي ته آدمشماري بابت  ان ڪئمرا بريفنگ لاءِ سيسس کي  آخري خط لکيو آهي، جواب نه مليو ته رولز تحت ڪارروائي ڪئي ويندي، مخالف ڌر اڳواڻ خواجا اظهار چيو ته لڳي ٿو ته سنڌ حڪومت آدمشماري بابت بهتر نموني ڪيس ناهي وڙهيو. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو، جنهن دوران چيو  ته  آدمشماري بابت ان ڪئمرا بريفنگ لاءِ سينسز ڪمشنر کي خط لکڻ ۽ بار بار رابطا ڪرڻ باوجود موٽ نه ملي آهي، هاڻ ان کي آخري خط لکيو  آهي، جيڪڏهن جواب نه مليو ته رولز تحت ڪارروائي ڪئي ويندي. مخالف ڌر اڳواڻ خواجا اظهارالحسن چيو ته آدمشماري ملتوي ٿيڻ بابت ميڊيا ذريعي خبر پئي آهي، وڏو وزير ٻڌائي ته جيڪڏهن مسئلي جي حل لاءِ سندن سهڪار جي ضرورت آهي ته هو ان لاءِ تيار آهن. اسپيڪر آغا سراج دراني چيو ته وفاق سنڌ جي ٺهرائن تي عمل ناهي ڪندو پر انهن خلاف ڪارروائي ڪندو آهي، هن چيو ته سنڌ حڪومت پاڻ آدمشماري ڪرائي رڪارڊ ٺاهي، جيڪڏهن ايوان راضي ٿيو ته هو وڏي وزير سان به ان معاملي تي ڳالهائڻ لاءِ تيار  آهي. تعليم ۽ پارلياماني معاملن واري وزير نثار کهڙي چيو ته وفاقي حڪومت آدمشماري ڪرائڻ  لاءِ هڪ سال اڳ اعلان ڪيو هو پر هو ان معاملي تي سنجيده نظر نه آئي.  هن چيو ته ٻن مهينن کان آدمشماري ملتوي ڪرائڻ لاءِ ٽال مٽول ڪئي پئي وئي.    نثار کهڙي چيو ته آدمشماري ملتوي ٿيڻ تڪليف ڏيندڙ ڳالهه آهي، جيڪڏهن وفاقي حڪومت چاهي ها ته اها فوجي جوانن جي مدد وٺي پئي سگهي.