تازيون خبرون

Monthly Archives: March 2016

حقيقت آهي ته پاڪستان ۾ ڀارتي ڳجهي ايجنسي ”را“ جو نيٽ ورڪ موجود آهي: ترجمان پاڪ فوج

اسلام آباد (بيورو) پاڪ فوج  جي اداري آءِ ايس پي آر جي ترجمان ليفٽيننٽ جنرل عاصم سليم باجوا جو وفاقي وزير سڌ سماءُ پرويز رشيد سان گڏ ڪانفرنس ڪندي چيو ته تمام  گهٽ ٿيندو آهي ته ڪنهن ملڪ ۾ فوجي جاسوس پڪڙجي پئي، ڀارتي ڳجهي ايجنسي را جي جاسوس کي گرفتاري ڪرڻ پاڪستان جي لاءِ تمام وڏي ڪاميابي آهي، ان پريس ڪانفرنس جو مقصد ڀارتي ايجنٽ ڪل بهوشن ياديو جي باري ۾ تفصيل ڏيڻ آهي، جنرل عاصم ٻڌايو ته بهوشن ياديو انڊين نيوي ۾ حاضر سروس آفيسر آهي، جنهن ڀارتي ڳجهي ايجنسي ۾ شموليت حاصل ڪئي، را ۾ شموليت کانپوءِ ڪل بهوشن ياديو سڪريب جي ڊيلر به بڻيو ۽ ايران جي علائقي چاه بهار ۾ جيولري جو ڪاروبار به ڪيو، جنرل عاصم مڃيو ته هي حقيقت آهي پاڪستان ۾ ڀارتي ڳجهي ايجنسي را جو نيٽ ورڪ موجود آهي، هن چيو ته ڪل بهوشن ياديو جي مشن ۾ ڪراچي ۽ بلوچستان ۾ ڪارروايون ڪرڻ آهي، هن جاسوس جو سڌو را ۽ ڀارتي حڪومت سان رابطو آهي. ڪل بهوش ياديو جو ڪوڊ your Monkey with us هو، گرفتاري وقت ڪل بهوشن ياديو وٽان غير ملڪي ڪرنسي ۽ نقشا پڻ برآمد ٿيا آهن، جنرل عاصم جو چوڻ هو ته ڀارت جيڪڏهن انڪار ڪري رهيو آهي ته ان کي ايندڙ ڪجهه ڏينهن ۾ خبر پئجي ويندي، پاڪ فوج جي ترجمان جو چوڻ هو ته ڪل بهوشن ياديو جو حدف گوادر پورٽ ۽ اقتصادي لنگهه منصوبو هو، مهراڻ بيس جي فنڊنگ به ڀارتي ايجنٽ جي علم ۾ آهي، گرفتار ڀارتي جاسوس ڪراچي ۾ فرقه وارانه ٽارگيٽ فورس بڻائڻ جي به ڪوشش ڪئي.

 

حڪومت پاران ريڊ زون ۾ ڌرڻو هڻندڙن خلاف آپريشن جو فيصلو، فورسز هاءِ الرٽ

اسلام آباد  (اين اين آءِ) وزيراعظم محمد نوازشريف ملڪ ۾ جملي صورتحال جو جائزو وٺڻ لاءِ سينيئر سياسي قيادت سان اڱاري تي مشاورتي اجلاس ڪيو اجلاس ۾ گهرو وزير چوڌري نثارعلي خان سڌسماءَ جو وفاقي وزير پرويز رشيد اسحاق ڊار خواجه سعد رفيق عبدالقادر بلوچ سينيٽر مشاهد الله وزيراعظم جو معاون ڊاڪٽر آصف ڪرماني ۽ عرفان صديقي شرڪت ڪئي. اجلاس دوران ملڪ ۾ امن امان جي صورتهال سميت مختلف معاملن تي ڳالهيون ڪيون ويون هوڏانهن خانگي ٽي وي مطابق ضلعي انتظاميه سان ڳالهين جي ناڪامي کان پوءِ وفاقي حڪومت ريڊ زون ۾ ڏنل ڌرڻو ختم ڪرڻ لاءِ آپريشن جو فيصلو ڪيو آهي ۽ ان ڏس ۾ رينجرز ايف سي ۽ پوليس کي الرٽ ڪيو ويو آهي. ٻئي طرف اسلام آبادجي مختلف علائقن ۾ 700 کان وڌيڪ مظاهرو ڪندڙن کي گرفتار ڪري کين پنجاب جي مختلف جيلن ۾ وڌو ويو ڪيپيٽل پوليس ذريعن جي حوالي سان ٻڌايو ته 500 کان وڌيڪ مظاهرو ڪندڙن کي قانون لاڳو ڪندڙ اهلڪارن سان چڪرين دوران گرفتار ڪيو ويو جن ۾ ڪجهه اڳواڻ به شامل آهن ذريعن موجب اسلام آباد جي ڊي چوڪ ۽ پريڊ گرائونڊ ۾ ڌرڻي ۾ شامل ماڻهن کي گرفتار ناهي ڪيو ويو جڏهن ته ڌرڻي کان ٻاهر ويندڙ مظاهرين جي گرفتاري عمل ۾ آئي ذريعن ٻڌايو ته گرفتار مظاهرو ڪندرن کي ڪجهه پوليس ٿاڻن سميت مختلف هنڌن تي رکيو ويو ۽ ان کان پوءِ کين اسلام آباد جي ويجهن ضلعن جي جيلن ۾ منتقل ڪيو ويو هڪ پوليس اهلڪار مطابق گرفتار ٿيلن کي جيلن ۾ منتقل ڪرڻ جو عمل سست آهي. ڄاڻايل اهلڪار وضاحت ڪندي ٻڌايو ته ڪيترائي ماڻهو گرفتار ڪيا ويا آهن تنهنڪري ڪيپيٽل پوليس پهريان ان ڳالهه کي يقيني بڻائي رهي آهي جنهن جيل ۾ مظاهرو ڪندڙن کي اماڻيو پيو وڃي اتي جڳهه موجود آهي يا نه.

 

ڪراچي ۾ لا اينڊ آرڊر جي صورتحال به خراب ڪرائيندو رهيس: ڀارتي جاسوس جو اعتراف

اسلام آباد (اين اين آءِ) ڀارتي ڳجهي ايجنسي را جي جاسوس ڪل ڀوشن بلوچستان، ڪراچي ۾ دهشتگردي جون ڪارروائيون ڪرائڻ ۽ بلوچ لبريشن کي فنڊنگ جو اعتراف ڪندي چيو آهي ته حسين مبارڪ پٽيل جي نالي سان ڀارتي ايجنسين لاءِ ڪم ڪندو رهيو آهيان 2022 ۾ منهنجي ريٽائرمينٽ ڪميشن آفيسر طور ٿيڻي آهي، آفيسر بلوچستان طور ۽ ڪراچي ۾ ڪارروائيون ڪرائيندو رهيو آهيان را جي جوائنٽ سيڪريٽري انيل گپتا جي ماتحت آهيان بلوچ اسٽوڊنٽ تحريڪ کي هينڊل ڪرڻ منهنجو ڪم هيو بلوچ باغين کي ڪيترن ئي طريقن سان فنڊنگ ڪئي وڃي ٿي، را مستقل قريب ۾ بلوچستان ۾ ڪجهه وڏين ڪارروائين جو پلان ڪرڻ گهري پئي انهيءَ سلسلي ۾ پاڪستان ۾ آيس، گرفتاري کانپوءِ مون کي بهتر نموني سان ڊيل ڪيو ۽ سٺي پيشوراڻي انداز ۾ مون سان ورتاء ڪيو ويو ڪنهن دٻاءَ بنا سڀ ڪجهه سچ ٻڌائي ڇڏيو آهي اڱاري تي سينيٽر پرويز رشيد ۽ ڊي جي آءِ ايس پي آر ليفٽيننٽ جنرل عاصم سليم باجوا ڀارتي جاسوس ڪل ڀوشن ياديو جي گرفتاري جي حوالي سان پريس ڪانفرنس ۾ ڀارتي جاسوس جي اعترافي بيان تي ٻڌل ويڊيو ڏيکاري اٽڪل ڇهه منٽن جي ويڊيو ۾ ياديو پاران ٻڌايو ويو ته منهنجو نالو ڪل ڀوشن ديو ۽ نمبر 41558 آهي مان انڊين نيوي جو حاضر سروس آفيسر آهيان ۽ منهنجو تعلق انڊين نيوي جي ٽيڪنيڪل ڊپارٽمينٽ سان آهي ۽ منهنجو ڪوڊ نالو حسين مبارڪ پٽيل هيو جيڪو مان ڀارتي ايجنسين لاءِ ڪم ڪرڻ جي ڪري اختيار ڪيو مان نيشنل ڊفينس اڪيڊمي 1987 ۾ جوائن ڪئي ۽ ان کانپوءِ انڊين نيوي ۾ منهنجي شموليت جنوري 1991 ۾ ٿي ۽ ڊسمبر 2001 تائين ڪم ڪندو رهيس. ان کانپوءِ ڀارتي پارلياميڻٽ تي حملو ٿيو، هي اهو وقت هيو جڏهن مان ڀارتي ڳجهين ايجنسين لاءِ جاسوس طور ڪم ڪرڻ شروع ڪيو هن ٻڌايو ته مان انڊيا جي شهر ممبئي ۾ رهندو هيس هن اعتراف ڪيو ته مان هن وقت ڀارتي نيوي جو حاضر سروس آفيسر آهيان. مان پنهنجي 14 سال نيوي سروس کانپوءِ 2003 ۾ انٽيليجنس آپريشن شروع ڪيا ۽ ايران چار دهار ۾ پنهنجو ننڍو ڪاروبار سيٽ ڪيو مان 2003 ۽ 04 ۾ پنهنجي ڪوڊ نالي سان ڪراچي جي ڪيترائي دفعا وزٽ ڪئي جنهن جو مقصد انڊين را لاءِ بنيادي ٽاسڪ پورا ڪرڻا هيا مون کي 2013 جي آخر ۾ را ۾ شامل ڪيو ويو هو تڏهن کان مان بطور آفيسر بلوچستان ۽ ڪراچي ۾ ڪارروائيون ڪرائيندو رهيس ڪراچي ۾ لا اينڊ آرڊر جي صورتحال به خراب ڪرائيندو رهيس. هن چيو ته بنيادي طور تي مان را جي سيڪريٽري انيل گپتا جي ماتحت آهيان ۽ انيل گپتا جي پاڪستان ۾ موجود رابطن خاص طور تي بلوچ اسٽوڊنٽس کي هينڊل ڪرڻ منهنجو ڪم هو.

 

سنڌ حڪومت طرفان لاهور ڌماڪي جي فوتين جي وارثن لاءِ 5 – 5 لک ۽ زخمين لاءِ 3 – 3 لک رپيا معاوضي جو اعلان

لاهور(اي پي پي) سنڌ جي وڏي وزير سيد قائم علي شاهه لاهور جي گلشن اقبال پارڪ ۾ ٿيل دهشتگردي ۾ فوت ٿيلن جي وارثن کي سنڌ حڪومت طرفان في ماڻهو 5 – 5 لک رپيا ۽ زخمين کي 3 – 3 لک رپيا معاوضي جو اعلان ڪيو آهي. اڱاري ڏينهن پاڪستان پيپلزپارٽي جي چيئرمين بلاول ڀٽو زرداري ۽ سنڌ جي وڏي وزير سيد قائم علي شاهه اڱاري ڏينهن لاهور جي جناح اسپتال وڃي گلشن اقبال پارڪ ۾ ٿيل بم ڌماڪي جي زخمين جي عيادت ڪئي. پ پ پنجاب جو صدر ميان منظور احمد وٽو، جنرل سيڪريٽري تنوير اشرف ڪائره ۽ ٻيا سينيئر اڳواڻ پڻ ان موقعي تي موجود هئا. بلاول ڀٽو زرداري هڪ هڪ زخمي سان مليو ۽ کانئن طبيعت معلوم ڪئي. هن زخمين کي تحفا پڻ ڏنا ۽ سندن جلد صحتيابي لاءِ دعا پڻ ڪئي.  لاهور جي جناح اسپتال ۾ زخمين جي عيادت بعد صحافين سان ڳالهائيندي سنڌ جي وڏي وزير چيو ته گلشن اقبال پارڪ ۾ ٿيل دهشتگردي وحشياڻي ۽ خوفناڪ دهشتگرديءَ جي واردات هئي. هن چيو ته هو ۽ پاڪستان پيپلزپارٽي جو چيئرمين بلاول ڀٽو زرداري دهشتگردي ۾ شهيد ٿيلن جي وارثن ۽ زخمين سان همدردي لاءِ لاهور آيا آهن. هن چيو ته سنڌ حڪومت طرفان بم ڌماڪي ۾ فوت ٿيلن جي وارثن ۽ زخمين لاءِ معاوضو پ پ چيئرمين بلاول ڀٽو زرداري جي هدايت تي ڏنو پيو وڃي. پنجاب ۾ آپريشن بابت سوال جي جواب ۾ وڏي وزير سيد قائم علي شاهه اهو پنجاب صوبو جو مسئلو آهي ۽ صوبائي حڪومت کي ئي فيصلو ڪرڻ گهرجي.

 

ڏکڻ ايشيا جي روشن مستقبل لاءِ سارڪ ملڪ هڪٻئي سان سهڪار ڪن: صدر ممنون حسين

اسلام آباد (اين اين آءِ) صدر ممنون حسين چيو آهي ته ڏکڻ ايشيا جي بهترين مستقبل لاءِ سارڪ ملڪ هڪٻئي سان تعاون ڪن اها ڳالهه صدر سارڪ پاران ماءُ ۽ ٻار جي صحت جي حوالي سان ڪانفرنس کي خطاب ڪندي ڪئي صدر هن اميد جو آظهار ڪيو ته هي ڪانفرنس خطي ۾ ماءُ ۽ ٻار جي صحت بهتر بنائڻ لاءِ فائديمند ثابت ٿيندي صدر چيو ته خطي جا ڪيترائي مسئلا هڪجهڙا آهن جن کي گڏجي ختم ڪري سگهجي ٿو صدر ممنون حسين چيو ته ويم صهت حڪومت جي ترجيحن ۾ شامل آهي ۽ حڪومت عوام کي صحت جون سهولتون ڏيڻ لاءِ وسان نٿي گهٽائي صوبائي حڪومتن جي مشاورت سان امءُ ۽ ٻار جي صحت جي حوالي سان 10 نقاتي پلان تيار ڪيو آهي جنهن ذريعي جٽادار ترقياتي حدف حاصل ڪري سگهبا هن وڌيڪ چيو ته هي جامع پلان ماءُ ٻار جي صحت ۾ بهتري آڻڻ ۾ مددگار ثابت ٿيندو. پاڪستان ڀارت بنگلاديش ۽ افغانستان ۾ ويم جي صحت جي حوالي سان ڪيترائي پروگرام جاري اهي پر ضرورت ان ڳالهه جي آهي ته ان جو دائرو وڌايو وڃي ته جيئن وڌ ۾ وڌ ماڻهو فائدو وٺي سگهن ۽ معاشري کي فعال ميمبر بڻائي سگهن صدر ممنون حسين چيو ته پاڪستان ماءُ ۽ تازي ڄاول ٻارڙن جي موت جي شرح ۾ گهٽائي لاءِ سمورن اسٽيڪ هولڊرز جي مدد سان قدم کڻي رهيو آهي هن چيو ته پاڪستان خطي ۾ به ماءُ ۽ ٻار جي صحت کي بهتر ڪرڻ لاءِ سهڪار جاري رکندو.

 

دهشتگردن خلاف آپريشن پنجاب پوليس سان گڏ نه ڪيو ويندو: آرمي چيف

اسلام آباد (مانيٽرنگ ڊيسڪ) آرمي چيف جنرل راحيل شريف چيو آهي ته دهشتگردن خلاف آپريشن پنجاب پوليس سان گڏجي نه ڪيو ويندو. رپورٽ موجب آرمي چيف پنجاب ۾ دهشتگردي خلاف انٽيليجنس بنيادن تي آپريشن جو حڪم ڏئي ڇڏيو آهي ۽ اها ڳالهه واضح ڪئي آهي ته جيئن ماضي ۾ پنجاب پوليس  صوبائي انٽيليجنس ايجنسين سان گڏجي آپريشن ڪيا ويندا هئا، هاڻ اهي نه ڪيا ويندا. پنجاب ۾ دهشتگردي جي مانيٽرنگ آرمي چيف پاڻ ڪندو ۽ ان ۾ رينجرز توڙي آءِ ايس آءِ اختياريون پڻ شريڪ هونديون. واضح رهي ته پنجاب ۾ فوجي آپريشن جو فيصلو لاهور جي گلشن اقبال پارڪ ۾ آپگهاتي ڌماڪي کانپوءِ ڪيو ويو.

 

نيشنل ايڪشن پلان تي مڪمل عمل ڪيو وڃي، پيپلز پارٽي پنجاب ۾ آپريشن جي حمايت ڪري ڇڏي

سکر (اي پي پي) قومي اسيمبلي ۾ مخالف ڌر جي اڳواڻ سيد خورشيد احمد شاھ چيو آهي ته نيشنل ايڪشن پلان ۾ ڪوتاهيون موجود هجڻ بابت وزيراعظم اعتراف ڪيو هو، انهن ڪوتاهين کي ختم ڪري ملڪ مان دهشتگرديءَ جي پاڙ پٽي وڃي. گرلز ڊگري ڪاليج سکر ۾ گلن جي نمائش جو جائزو وٺڻ بعد ميڊيا سان ڳالهائيندي سيد خورشيد احمد شاھ چيو ته نيشنل ايڪشن پلان تي جامع انداز سان عمل نه پيو ڪيو وڃي جنهن ڪري دهشتگرديءَ جا واقعا مڪمل طور تي ختم ناهن ٿي سگھيا. سيد خورشيد احمد شاهه پنجاب ۾ آپريشن جي حمايت ڪندي چيو ته دير آيد درست آيد تحت الله ڪري ته سيڪيورٽي فورسز کي وڏيون ڪاميابيون ملن. هن چيو ته پاڪستان پيپلز پارٽي ملڪ لاءِ بهتر سوچي ٿي، تنهنڪري موجوده صورتحال ۾ نه ڪو مطالبو ڪبو ۽ نه ئي سياست ڪبي. هي جيڪو ڪجهھ ٿي رهيو آهي ڪو هڪ صوبو نه پر سڀ صوبا ۽ پورو ملڪ ڀوڳي رهيو آهي. هن چيو ته قوم ۽ فوج جي هڪ پيج تي نه هجڻ جي ڳالھه نه ڪئي وڃي. دهشتگردي خلاف جنگ واري نقطي تي پوري قوم هڪ هنڌ بيٺل آهي.

 

اسلام آباد تي ڪا مصيبت ايندي آهي ته حڪمران شهر ڇڏي ڀڄي ويندا آهن:مولابخش چانڊيو

ڪراچي (اسٽاف رپورٽر) جڏهن به اسلام آباد تي ڪا مصيبت ايندي آهي ته حڪمران شهر ڇڏي ڀڄي ويندا آهن. اطلاعات بابت وڏي وزير جي صلاحڪار مولابخش چانڊئي چيو آهي ته جڏهن به اسلام آباد تي ڪا مصيبت ايندي آهي ته حڪمران شهر ڇڏي ڀڄي ويندا آهن، هو وفاق کي ڪمزور نه پر مضبوط ڪرڻ وارن مان آهن. ڪراچي ۾ سيمينار کي خطاب ڪندي مولا بخش چانڊئي چيو ته اسلام آباد ۾ بي چيني پکيڙڻ دنيا ۾ ملڪ خلاف افواهه ڦهلائڻ جي برابر آهي. هن چيو ته گادي واري شهر ۾ ڏڦيڙ پکيڙندڙن خلاف سخت ڪارروائي ٿيڻ گهرجي. صوبائي صلاحڪار چيو ته احتساب جو نشانو رڳو سنڌ کي ڇو پيو بڻايو وڃي؟ ٻين صوبن ۾ به ڪاررايون ٿيڻ گهرجن. مولابخش چانڊئي چيو ته جڏهن کان پ پ ٺهي آهي، تڏهن کان هيل تائين ان جو احتساب ڪيو پيو وڃي. سندس چوڻ هو ته نيب جي ڪردار کي شڪي بڻائيندڙن جو ميڊيا احتساب ڪري هو وفاق کي ڪمزور ڪرڻ نه پر مضبوط ڪرڻ جي خواهش رکن ٿا

 

اسان پرامن ماڻهو آهيون اسان جي ڌرڻي جي ڪنهن سان ڀيٽ نه ڪئي وڃي: عمران خان

ايبٽ آباد (اين اين آءِ) تحريڪ انصاف جي چيئرمين عمران خان چيو آهي ته اسڪولن جي اڏاوت لاءِ 15 ارب ڊالر بيروني امداد آئي اها ڪيڏانهن ويئي انڪوائري ٿيڻ گهرجي عمران خان ابيٽ آباد ۾ اسڪول جو پيڙهه جو پٿر رکڻ کان پوءِ ميڊيا سان ڳالهائيندي چيو ته 11 سالن ۾ صرف 700 اسڪولن تي ڪم شروع ٿيو جڏهن ته 600 اسڪولن تي اڄ تائين ڪم شروع ناهي ٿي سگهيو سڀني کي معلوم هئڻ گهرجي ته تعليم سان ڇا ٿي رهيو آهي ڪي پي ڪي حڪومت سڀ کان وڌيڪ پئسو تعليم تي لڳايو آهي هن چيو ته صوبي جي پوليس کي مڪمل غير سياسي بنائينداسين پنجاب ۾ پوليس غير سياسي نه آهي ڪي پي ڪي حڪومت جلد پوليس ايڪٽ منظور ڪرڻ واري آهي عمران خان چيو ته اسان پرامن ماڻهو آهيون اسان جي ڌرڻي جي ڪنهن ٻئي سان ڀيٽ نه ڪئي وڇي اسان ته هڪ ٻوٽو به نه پٽيو هو ان کان پوءِ تحريڪ انصاف جي چيئرمين پاران خيبرپختونخواهه بارڊر تي رينجرس مقرر ڪرڻ جو مطالبو ڪيو آهي.

 

ديني طبقو آزمائشي دور مان گذري پيو، عالمي قوتن اسلام جو آواز ختم ڪرڻ جو فيصلو ڪري ڇڏيو آهي:مولانا فضل الرحمان

سکر (بيورو) جي يو آءِ جي سرواڻ  مولانا فضل الرحمان چيو آهي ته ملڪ دهشتگردي جو شڪار آهي، لاهور سانحي تي سڄي قوم سوڳ ۾ ورتل آهي، بيگناهه معصوم ماڻهو مارڻ جو ذميوار آخر ڪير آهي، سڄي ملڪ ۾ مدرسن جي ڇنڊ ڇاڻ ڪئي وئي پر ڪجهه به نه مليو، جانبدار رويو قبول ناهي، اسلام ۽ مذهبي ڌرين کي بدنام ڪرڻ جي سازش ڪڏهن به قبول نه ڪنداسين، حڪمران عالمي قوتن جا وفادار آهن.منزل گاهه ۾ 77 هين دستار فضيلت ڪانفرنس کي خطاب ڪندي مولانا فضل الرحمان چيو ته، ديني طبقو آزمائشي دور مان گذري رهيو آهي، عالمي قوتن اسلام جو آواز ختم ڪرڻ جو فيصلو ڪري ڇڏيو آهي، ان ڪري ملڪ ۾ هر طرح سان مذهبي ڌرين کي بدنام ڪرڻ جي ڪوشش ڪئي پئي وڃي ۽ انهن کي دهشتگردي سان ڳنڍيو وڃي ٿو.  مولانا فضل الرحمان چيو ته اسلامي قوتن ۽ مدرسن جو آواز دٻائڻ جا خواب انگريزن به ڏٺا هئا، جيڪي پورا نه ٿيا، آمريڪا جو خواب به پورو نه ٿيندو، هن چيو ته پنجاب اسيمبلي جو بل غير آئيني ۽ غير شريعي آهي، جيڪو بل پاس ڪيو ويو آهي اهو ڏکڻ آفريڪا ۽ ڀارت جي اسيمبلي پاس ڪيو، مشرف قومي اسيمبلي ۾ آندو پر اسين ڀرپور مزاحمت ڪئي، پنجاب اسيمبلي مان ان ڪري پاس ٿي ويو جو اتي جي يو آءِ موجود نه هئي . هن چيو ته حڪمران اهڙو بل پاس ڪري خاندان  تباهه ڪري رهيا آهن، هاڻي ڌيءَ پنهنجي پيءُ ۽ زال پنهنجي مڙس کي گرفتار ڪرائي سگهي ٿي، خدا را عورتن تان تشدد جو رستو روڪيو، خاندان تباهه نه ڪريو، ملڪ ۾ انساني حقن تي ٽارچر ڪيو وڃي ٿو، مذهبي طبقي کي دٻائڻ جي ڪوشش قبول نه ڪنداسين، مولانا فضل الرحمان چيو ته ايران ۽ پاڪستان جي لاڳاپن کي خراب ڪيو وڃي ٿو، جڏهن ايراني صدر پاڪستان ۾ موجود هو ان وقت ڀارتي ايجنٽ کي ايران جي ويزا سميت ظاهر ڪرڻ جو ڪهڙو مقصد آهي، ان ٽائيمنگ کي نوٽ ڪرڻ گهرجي. هن چيو ته سنڌ جي ماڻهن کي به پنهنجي قوميت، تهذيب ۽ وقار جو تحفظ ڪرڻ لاءِ عالمن کي چونڊي اسيمبلين ۾ موڪلڻو پوندو، هن چيو ته اسين پاڪستان کي خطرناڪ حالتن جي ور چاڙهڻ نٿا چاهيون، جيڪڏهن نئين قراردار جي ڳالهه ڪئي ويندي ته پوءِ معاملا  اڳتي نڪري ويندا، ذوالفقار علي ڀٽو قومي سوچ جو سياستدان هو هن قوم کي گڏيل آئين ڏنو، افسوس جو  آمرن 73  ع واري آئين کي گرد آلود بڻائي ڇڏيو، بلاول کي نصيحت نٿو ڪري سگهان، سندس والد کي نصيحت ڪري سگهان ٿو، بلاول پنهنجي وڏن کان به اڳتي نڪري ڳالهيون ڪري رهيو آهي ان سان وڏن جو احترام نه رهندو، جي يو آءِ سرواڻ  چيو ته جڏهن دهشتگردي خلاف قانون جوڙيو ويو ته ان وقت مذهب ۽ فرقي جو نالو وٺي قوم کي ڪهڙو پيغام ڏنو ويو، قومي اتفاق راءِ کي سبوتاز ڪرڻ ۾  مٿان جو اشارو هو، ڪانفرنس کي مولانا ناصر محمود سومرو، سعود افضل هاليجوي، آغا ايوب شاهه، عبدالقيوم هاليجوي، مولانا محمد صالح انڍر، مولانا غلام الله هاليجوي، امداد الله ڦلپوٽو ۽ ٻين خطاب ڪيو، ان موقعي تي مدرسي جي فارغ ٿيل عالمن ۽ حافظن جي دستار بندي پڻ ڪئي وئي.