تازيون خبرون

Daily Archives: February 24, 2016

سياسي جماعتن کي نيب جي طريقي تي خدشا آهن، مستقبل جو لائحه عمل اتفاق راءِ سان تيار ٿيندو: پرويز رشيد

اسلام آباد (اين اين آءِ) سڌ سماءَ جي وفاقي وزير پرويز رشيد چيو آهي ته سياسي جماعتن کي نيب جي طريقي تي تحفظات آهن، مستقبل جي بل جي حڪمت عملي گڏيل صلاح سان تيار ٿيندي، تيز رفتار ترقي نه ٿيندي ته پاڪستان پوئتي رهجي ويندو، پٺاڻ ڪوٽ معاملي تي پاڪستان پنهنجو فرض پورو ڪيو آهي، نيشنل ايڪشن پلان ڪنهن شيءَ سان متاثر نه ٿيندو، هن چيو ته چيئرمين نيب تسليم ڪيو آهي ته قانون ۾ ڪجهه خرابيون آهن ۽ سياسي جماعتن کي نيب جي طريقي تي خدشا آهن، هڪ سوال جي جواب ۾هن چيو ته پ پ به نيب جي ڪاررواين تي خدشن جو ذڪر ڪيو آهي، هن چيو ته وزيراعظم ترقي جي رستي ۾ رنڊڪن جو ذڪر ڪيو آهي، تيز رفتار ترقي نه ٿيندي ته پاڪستان پوئتي رهجي ويندو. هڪ سوال جي جواب ۾ هن چيو ته نيشنل ايڪشن پلان ڪنهن شيءِ سان متاثر نه ٿيندو.

 

قومي اسيمبلي ۾ اپوزيشن مرتضيٰ جاويد عباسي کي تڪراري قرار ڏئي ڇڏيو، ڊپٽي اسپيڪر جي موجودگي ۾ ايوان ۾ ويهڻ کان انڪار، واڪ آئوٽ

اسلام آباد (اين اين آءِ) قومي اسيمبلي ۾ اپوزيشن ڊپٽي اسپيڪر مرتضيٰ جاويد کي تڪراري ڪوٺيندي سندس موجودگي ۾ ايوان ۾ ويهڻ کان انڪار ڪندي احتجاجن واڪ آئوٽ ڪيو، اپوزيشن شيم شيم جا نعرا هنيا، اپوزيشن جي واڪ آئوٽ وقت وزيراعظم محمد نواز شريف ايوان ۾ آيو ۽ اٽڪل 40 منٽ بعد ايوان ۾ ويهڻ کانپوءِ واپس هليو ويو، وزيراعظم جي ايوان مان وڃڻ کانپوءِ پينل آف چيئرمين جي ميمبر محمود بشير ورڪ جڏهن اجلاس جي صدارت سنڀالي ته اپوزيشن ايوان ۾ واپس اچي وئي، هن واڪ آئوٽ ۾ ايم ڪيو ايم حصو نه ورتو، جڏهن ته وزيراعظم جي وڃڻ کانپوءِ ايم ڪيو ايم جا ميمبر ن پاران ڪيل بک هڙتال تي حڪومتي توجهه نه ڏيڻ تي ايوان مان واڪ آئوٽ ڪيو، ان کان اڳ قومي اسيمبلي جو اجلاس اڱاري تي صبح 11 لڳي 5 منٽن تي ڊپٽي اسپيڪر مرتضيٰ جاويد جي صدارت ۾ شروع ٿيو. پ پ جي نواب يوسف ٽالپر پوائنٽ آف آرڊر تي اٿي بيهي چيو ته ڊپٽي اسپيڪر گذريل رات اسان سان ناانصافي ڪئي آهي، اپوزيشن جي ميمبرن جو انگ وڌيڪ هو پر اجلاس جي صدر نشين ڊپٽي اسيپڪر فيصلو اسان جي خلاف ڏنو، اسان اپوزيشن جي سمورن ميمبرن مشاورت کانپوءِ فيصلو ڪيو آهي ته جيستائين ڊپٽي اسپيڪر معذرت نٿو ڪري اسان واڪ آئوٽ ڪنداسين، شاهه محمود قريشي چيو ته پاڪستان جي پارليامينٽ جي تاريخ ۾ پهريون ڀيرو ائين ٿيو آهي جو اقليت کي اڪثريت تي ترجيح ڏني وئي آهي، ڊپٽي اسپيڪر تڪراري ٿي چڪو آهي، ان جي صدارت ۾ ٿيندڙ اجلاس دوران اپوزيشن ايوان ۾ نه ويهندي، ڊپٽي اسپيڪر هن ايوان جو نگهبان آهي جنهن کي ايوان کي غير جانبداري سان هلائڻ هوندو آهي، پر گذريل ڏينهن هن پاڻ کي تڪراري بڻايو آهي، ان تي اپوزيشن شيم شيم جا نعرا هنيا، هن چيو ته گذريل ڏينهن اپوزيشن جا 4 ميمبر وڌيڪ هئا، حڪومت جي شڪست کي ڊپٽي اسپيڪر پنهنجي ووٽ سان تبديل ڪيو، پاڪستان جي پارليامينٽ جي تاريخ ۾ پهريون ڀيرو ائين ٿيو آهي جو 4 ميمبر وڌيڪ هئڻ باوجود ڊپٽي اسپيڪر اهڙو رويو اختيار ڪيو تنهنڪري هو تڪراري ٿي چڪو آهي، ان جي سربراهي ۾ ٿيندڙ اجلاس ۾ اپوزيشن ايوان ۾ نه ويهندي، ان سان گڏ اپوزيشن ميمبر واڪ آئوٽ ڪرڻ لڳا ته ڊپٽي اسپيڪر چيو ته جڏهن ووٽنگ ٻيهر ڪرڻ جي ڳالهه ڪئي وئي هئي، جماعت اسلامي جي صاحبزاده طارق الله چيو ته اسپيڪر کي حڪمت عملي سان ڊيل ڪرڻ گهرجي ها، کيس معاملو ملتوي ڪري ڇڏڻ گهرجي ها، وفاقي وزير زاهد حامد چيو ته جيڪڏهن اپوزيشن کي يقين هيو ته ان جي عددي اڪثريت آهي ته هو ٻيهر ڳڻپ ڪرائي ها، هي زيادتي آهي جو ايوان مان واڪ آئوٽ ڪيو آهي، ڊپٽِي اسپيڪر چيو ته مان ٻيهر ڳڻپ جي ڳالهه ڪئي هئي، شيرين مزاري جي چوڻ تي دروازا بند ڪيا ويا هئا، ان موقعي تي اپوزيشن ميمبرن واڪ آئوٽ ڪيو، اپوزيشن جي واڪ آئوٽ کانپوءِ تحريڪ انصاف جي راءِ حسن نواز ڪورم جي نشاندهي ڪئي، ڳڻپ تي گهربل ميمبر موجود نه هئڻ تي ڊپٽي اسپيڪر ڪورم پورو ٿيڻ تائين اجلاس جي ڪارروائي معطل ڪري ڇڏي. ٻئي پاسي قومي اسيمبلي ۾ مخالف ڌر اڳواڻ سيد خورشيد شاهه چيو آهي ته اپوزيشن کي هڪ طئه ٿيل منصوبي تحت وزيراعظم جي موجودگي ۾ ايوان کان ٻاهر رکيو ويو، اهڙي طرح ايوان نٿو هلائي سگهجي، جيڪڏهن اپوزيشن جي طاقت کي گهٽايو ويو ته پارليامينٽ جي طاقت گهٽجي ويندي، اڱاري تي قومي اسيمبلي ۾ ڊپٽي اسپيڪر مرتضيٰ جاويد جي ڪرسي صدارت ڇڏڻ کانپوءِ واڪ آئوٽ ختم ڪري ايوان ۾ واپسي تي هن چيو ته اسان ڊپٽي اسپيڪر جي ڪالهه واري رويي خلاف واڪ آئوٽ ڪيو، وزيراعظم جو ايوان ۾ اچڻ تي اپوزيشن جو ايوان ۾ نه هجڻ لاءِ وزيراعظم لاءِ پريشان ٿيڻ واري ڳالهه هئي، جيڪڏهن ان جي جاءِ تي ڪو ٻيو وزيراعظم هجي ها ته اهو پاڻ اپوزيشن کي پرچائي ايوان ۾ وٺي اچي ها. حڪومت رٿابندي تحت ڊپٽي اسپيڪر کي ان وقت تائين ڪرسي صدارت تي ويهاريو جيستائين وزيراعظم ايوان ۾هو، ان جو مقصد اهو هو ته اپوزيشن وزيراعظم اڳيان پنهنجو موقف نه رکي سگهي، اها به روايت آهي ته جڏهن وزيراعظم ايوان ۾ هجي اسپيڪر پاڻ صدارت ڪري، اسپيڪر ان بلڊنگ ۾ هوندي صدارت جي ڪرسي تي نه آيو، اسان ڊپٽي اسپيڪر جي موجودگي ۾ ايوان ۾ نه اينداسين، وزيراعظم جو ايوان ۾ هجڻ ۽ اپوزيشن جو نه هجڻ ان لاءِ پريشان ڪندڙ آهي، اپوزيشن بهتر نموني سياست ڪئي آهي، اڄ شايد وزيراعظم کي اهو به مشهورو ڏنو ويندو هو ته سٺو آهي ته اپوزيشن ٻاهر رهي، جيڪڏهن اندر هوندي ته اپوزيشن ليڊر ڳالهائيندو جنهن جو جواب وزيراعظم کي ڏيڻو پوندو، حڪومت صدر جي خطاب تي تشڪر واري قرارداد کي تڪراري بڻائي صدر جي حيثيت کي تڪراري بڻايو آهي، ڊپٽي اسپيڪر ووٽ ڏئي تڪراري بڻايو، جيڪڏهن اسپيڪر مصروف هو ته ڊپٽي اسپيڪر جي جاءِ تي ڪنهن ٻئي کي ڪرسي صدارت ويهاري ها، اسان به واپس اچون ها، جيڪڏهن اپوزيشن جي طاقت کي گهٽايو ويو ته پارليامينٽ جي طاقت به گهٽجي ويندي. پوائنٽ آف آرڊر تي ڪيٽن رٽائرڊ صفدر چيو ته خضدار ۾ پي آءِ اي فلائيٽس شروع ٿيڻ گهرجي، مولانا قمر الدين جو ٺهراءُ اهم آهي ان تي ڪميٽي ٺاهي وڃي، اعجاز جکراڻي چيو ته مولانا قمر الدين جي ٺهراءَ جي مخالفت حڪومت ڪئي ۽ هاڻ حڪومت جو هڪ ميمبر ان جي حمايت ڪري رهيو آهي، اها ٻٽي پاليسي آهي، طارق الله چيو ته مولانا قمر جي ٺهراءَ جي مخالفت جو ڏک ٿيو آهي، جيتوڻڪ هو حڪومتي حمايتي آهي، هن پنهنجي اتحادي جي مخالفت ڪئي، جي آءِ پل ڊاٽ جي سروي مطابق سڀ کان جمهوري جماعت آهي، ٻين جماعتن کي به جماعت اسلامي جي تقليد ڪرڻ گهرجي. اجلاس جي ڪارروائي اربع جي صبح ساڍي 10 وڳي تائين ملتوي ڪئي وئي.

 

فوج جي قربانين ۽ فتح کي سياسي اختلافن ۽ موقعي پرستي جي نذر نه ڪرڻ گهرجي:آصف زرداري

ڪراچي (اسٽاف رپورٽر) اڳوڻي صدر آصف علي زرداري چيو آهي ته پاڪستان ڪيترن ئي سالن کان مختلف مسئلن کي منهن ڏئي رهيو آهي، پوري قوم ۽ پ پ فوج سان گڏ بيٺل آهي، ڪجهه عنصرن پاران ملڪ اندر سياسي معاملن يا احتساب جي لاءِ فوج جو ڪردار ڳولڻ مناسب نه آهي. پاڪستان پيپلز پارٽي جي شريڪ چيئرمين آصف علي زرداري پاران جاري ٿيل بيان ۾ وڌيڪ چيو ويو آهي ته ملڪ جا اندروني ۽ پرڏيهي دشمن خطرا پيدا ڪري رهيا آهن، پابندي مڙهيل تنظيمن جا دهشتگرد ۽ بلوچستان جا علحيدگي پسند پرڏيهي قوتن سان گڏجي قوم کي منتشر ڪري رهيا آهن. هن چيو ته ملڪ جي سلامتي ۽ استحڪام جي لاءِ فوج جي شاندار ڪردار تي قوم کي فخر آهي، قوم ۽ سياسي قوتون ملڪ جي سلامتي جي لاءِ فوج سان گڏجي دهشتگردي کي پاڙ کان پٽي اڇلائينديون. آصف زرداري وڌيڪ چيو آهي ته ڪراچي ۾ منظم ڏوهه ٿيڻ وڏي سازش آهي، قوم ۽ ميڊيا کي افواهن ۽ اڳڪٿين تي ڌيان نه ڏيڻ گهرجي، جنرل راحيل شريف جو ملازمت ۾ واڌ نه وٺڻ وارو بيان وقت کان اڳ آهي، ان سان منفي تاثر وڃي سگهي ٿو. هن چيو ته اسان کي پاڪ فوج جي جوانن تي فخر آهي، پاڪ فوج ضرب عضب آپريشن ۾ شاندار ڪاميابي حاصل ڪئي آهي، پ پ ضرب عضب آپريشن جي حمايت ڪري ٿي. آصف زرداري چيو ته آرمي پبلڪ اسڪول تي حملي کانپوءِ ماڻهو پاڻ کي غير محفوظ سمجهي رهيا هئا، فوج جي قربانين ۽ فتح کي سياسي اختلافن ۽ موقعي پرستي جي نذر نه ڪرڻ گهرجي. آصف زرداري وڌيڪ چيو ته پاڪستان جي هٿياربند فوج دهشتگردي جي خاتمي جي لاءِ هر اول دستو آهي، اميد آهي ته پاڪستان هميشه جي لاءِ دهشتگردي کان پاڪ ٿي ويندو، جنرل راحيل جي مدبراني قيادت ۾ اميد آهي ته دهشتگردي خلاف جنگ پنهنجي منطقي انجام تي پهچندي.

 

پ پ کي ايف آءِ اي مان ڪو ڊپ ناهي پر اهو ادارو تعصب جي بنياد تي صوبي اندر ڪارروايون ڪري ٿو:مولابخش چانڊيو

حيدرآباد (بيورو) سنڌ جي سڌ سماءُ کاتي واري صوبائي صلاحڪار مولابخش چانڊيو چيو آهي ته پيپلزپارٽي کي ايف آءِ اي مان ڪو به ڊپ ناهي پر اهو ادارو تعصب جي بنياد تي صوبي اندر ڪارروائيون ڪري رهيو هو. اهڙن خيالن جو اظهار هن سول اسپتال حيدرآباد جي ليڪچر هال ۾ آل سنڌ پيپلز ميڊيڪل اسٽاف ويلفيئر ايسوسيئيشن سنڌ پاران سالياني ڪلينڊر 2016 جي افتتاحي تقريب کي خاص مهمان طور خطاب ڪندي ڪيو. هن چيو ته  جيتوڻيڪ هن ڪڏهن به مسلم ليگ کي ووٽ نه ڏنو آهي پر ماڻهن جي ووٽ  جي راءِ جو احترام ڪري ٿو جن  مسلم ليگ کي ووٽ ڏئي مرڪز ۾  حڪومت ڪرڻ جو  مينڊيٽ ڏنو آهي. هن چيو ته هو  وفاقي گهرو وزير چوڌري نثار ۽ ٻين کي غير نٿو سمجهي جيتوڻيڪ  سندن  رويا ۽ چهرا وفاقي نه پر مخصوص علائقن جا آهن پر تنهن هوندي به هو حڪمران آهن ۽ اسانکي سٺا لڳن ٿا پر جيڪڏهن انهن سان ڪا ناراضگي هوندي ته اسين  ان بابت ڳالهائينداسين ۽ انهن کي به گهرجي ته هو به  اسانکي ڏسن. هن چيو ته ٽنهي ننڍن صوبن آدمشماري ۽ مردمشماري ڪرڻ جي لاءِ چيو آهي ۽ اهو  سندن متفقه آواز آهي ته غير جانبدارانه آدمشماري ٿيڻ گهرجي ڇاڪاڻ ته صوبا ان کي زندگي ۽ موت جو مسئلو سمجهن ٿا  ان ڪري  وفاق کي صوبن جو خيال رکڻو پوندو. هن چيو ته پارٽي قيادت بلاول ڀٽو زرداري ملڪ جي شهرن جي ترقي ۽ واڌاري ۾ خصوصي دلچسپي وٺي ٿو. هن چيو ته هو پارٽي قيادت وڏي وزير ۽ صحت واري وزير سان ملي سنڌ پيپلزميڊيڪل اسٽاف ويلفيئر ايسوسيئيشن جا مسئلا حل ڪرائڻ لاءِ  پاڻ پتوڙيندو ته جيئن سندن مسئلا حل ڪري کين سهولتون فراهم ڪيون وڃن ته جيئن  هو سنڌ جي بيمار ماڻهن جي اڳ کان وڌيڪ سچي جذبي سان خدمت ڪري سگهن. هن چيو ته  هاڻي  هر هنڌ ڀائيچاري جي فضا قائم ٿي رهي آهي انڪري هاڻي تعصب کان هٽي ڪري ڪم ڪرڻو پوندو ۽ اميد ظاهر ڪئي ته ڀائيچاري جي فضا ٻيهر قائم ٿيندي. هن چيو ته  شهر ۾ ترقياتي ڪم ٿيڻ جي ڪري خوبصورت منظر ۽ رونقون ٻيهر واپس اچي رهيون آهن. هن چيو ته مون پنهنجي  فنڊ مان سول اسپتال حيدرآباد اندر واٽرڪولرلڳرايا ۽ محسوس ڪيو ته هتي جو عملو پنهنجي مقصد ۾ سچو آهي. هن چيو ته سول اسپتال حيدرآباد ۾ سهولتن جي فراهمي ۽ راڻي باغ حيدرآباد جي بحالي  سندس جنون آهي جنهن لاءِ هو  هروقت ڪوشان آهي. ان موقعي تي پرووائيس چانسلر لمس ڊاڪٽر منير جوڻيجو، ميڊيڪل سپرنٽينڊنٽ سول اسپتال حيدرآباد ڊاڪٽر واجدميمڻ، اڳوڻي صوبائي وزير زاهد علي ڀرڳڙي، فياض شاهه ايسوسيئيشن جي صدر سليمان ميمڻ ۽ ٻين  پڻ تقريرون ڪيون.

 

افغان حڪومت ۽ طالبان وچ ۾ سڌو سئون ڳالهيون،پاڪستان ميزباني جي حامي ڀري ورتي

اسلام آباد(م.ڊ)افغان حڪومت ۽ طالبان وچ ۾ پهريون ڀيرو سڌو سئون ڳالهيون مارچ جي پهرين هفتي ٿينديون،پاڪستان ميزباني جي حامي ڀري ورتي.افغان حڪومت ۽ طالبان وچ ۾ پهريون ڀيرو سڌو سئون ڳالهيون مارچ مهيني جي پهرين هفتي ۾ ٿينديون،ڪابل ۾ افغان مفاهمتي عمل جي لاءِ چار ملڪي ڪميٽي جي اجلاس ۾ پاڪ افغان ڪميٽي ٻنهي ملڪن جي عالمن جي حمايت حاصل ڪندو.افغانستان جي گادي واري شهرڪابل ۾ ٿيندڙ اجلاس ۾  چين،آمريڪا ۽ افغانستان جا نمائندا به شامل ٿيا.اجلاس ۾ شامل ٿيندڙن امن لاءِ اشرف غني حڪومت جي عزم جي واکاڻ ڪئي.جڏهن ته عالمن جي حمايت لاءِ پاڪ افغان گڏيل ورڪنگ گروپ جي به واکاڻ ڪئي وئي.جاري ڪيل بيان مطابق افغانستان حڪومت ۽ طالبان وچ ۾ ڳالهين جي دور کانپوءِ تڪڙوئي اسلام آباد ۾ هڪ ٻيو اجلاس گهرايو ويندو.

 

جماعت اسلامي پاران ڪرپشن خلاف پهرين مارچ کان تحريڪ هلائڻ جو اعلان

لاهور(م.ڊ)جماعت اسلامي ڪرپشن خلاف پوري ملڪ ۾ تحريڪ هلائڻ جو اعلان ڪري ڇڏيو،تحريڪ جي شروعات پهرين مارچ خيبرپختونخوا کان ڪئي ويندي.جماعت اسلامي جي مرڪز منصورا ۾  ٿيل اجلاس کانپوءِ ميڊيا سان ڳالهائيندي جماعت اسلامي جي امير سراج الحق جو چوڻ هو ته ڪرپشن سبب مهانگائي ۽ بدامني قوم جو جيئڻ جنجال ٿي ويو آهي،جماعت اسلامي ڪرپشن خلاف ڀرپور تحريڪ هلائيندي.جماعت اسلامي جي امير سراج الحق جو چوڻ هو ته پاڪستان ۾ هر ڏينهن 12 ارب ۽ سال تي 4320 ارب رپين جي ڪرپشن ٿي رهي آهي،سندس چوڻ هو ته ڪرپشن خلاف تحريڪ هڪ قومي فرض آهي،ملڪ جي سڀني باضمير ۽ ڪرپشن خلاف ڳالهائيندڙن کي هن تحريڪ ۾ شامل ٿيڻ جي دعوت ڏيون ٿا.سراج الحق جو چوڻ هو ته ڪرپشن قومي سلامتي،جمهوريت ۽ چونڊ واري عمل لاءِ خطرناڪ ٿي وئي آهي،پاڪستان کي ڪرپشن کان پاڪ ۽ صاف ڪرڻو پوندو.

 

رينجرز عزير بلوچ جي بيان جي روشني ۾ ذوالفقار مرزا کي جاچ لاءِ گهرائي ورتو

ڪراچي:ڪراچي ۾ لياري گينگ وار جي سربراهه عزير بلوچ کان پڇا ڳاڇا دوران اهم اڳڀرائي ٿي آهي ۽ هن پ پ مخالف سمجهيو ويندڙ اڳوڻي صوبائي گهرو وزير ڊاڪٽر ذوالفقار مرزا جو نالو کنيو آهي، جنهن تي رتينجرز اختيارين ذوالفقار مرزا کي جاچ لاءِ گهرائي ورتو آهي، ذريعن جو چوڻ آهي ته وڏي وزير سيد قائم علي شاهه پاران اهم شخصيتن کان پڇا ڳاڇا جي اجازت ملڻ کانپوءِ رينجرز ڊاڪٽر ذولفقار مرزا ۽ ثانيا ناز سوڌو ٻين 5 اهم اڳواڻن کان جاچ جو فيصلو ڪيو آهي، جنهن لاءِ سڀ کان پهرين اڳوڻي صوبائي گهرو وزير ڊاڪٽر ذوالفقار مرزا کي پڇا ڳاڇا لاءِ گهرايو ويو آهي، ذريعن مطابق رينجرز پاران ڊاڪٽر ذوالفقار مرزا کي جاچ لاءِ پيش ٿيڻ جي حوالي سان باضابطا طور تي ٻڌايو ويو آهي، ان کان پهرين ذوالفقار مرزا لياري گينگ وار جي سربراهه عزير بلوچ سان گهرن رابطن ۽ لاڳاپن جو اعتراف به ڪري چڪو آهي، ذريعن جو اهو به چوڻ آهي ته ذوالفقار مرزا ۽ ٻين اڳواڻن کان جي آئي ٽي جاچ ڪندي.

 

سڀني ادارن جو احتساب ٿيڻ گهرجي،پنجاب جي ڳالهه ايندي ته ميان صاحبان ناراض ٿي ويندا آهن: شرميلا فاروقي

حيدرآباد:سنڌ جي وڏي وزير جي ثقافت کاتي بابت خصوصي معاون شرميلا فاروقي چيو آهي ته سنڌ ۾ 11 قديمي مرڪزن جو ترقياتي ڪم هلندڙ آهي تاريخي ۽ قديمي عمارتون جن جي حالت زبون  ٿي وئي هئي انهن کي اصل حالت ۾ آڻڻ لاءِ ثقافت کاتي ڀرپور اپاءَ اختيار  ڪري رهيو آهي  ته جيئن تاريخي  ماڳ گهمندڙن کي اهو  فخر  ٿئي ته اسانجي سنڌ  جي جرنلن جا مقبرا آهن جن  پراڻي دور ۾ پنهنجي پنهنجي رياستن تي حڪومتون ڪيون. اهڙن خيالن جو اظهار هن هيرآباد حيدرآباد ۾ مير ڪرم علي خان ٽالپر جي مقبري جي مرمتي ۽ خوبصورتي واري ڪم جي پڄاڻي ۽ ان جي واپس ٿيڻ واري حوالي سان ڪوٺايل تقريب کي خطاب ڪندي ڪيو. هن چيو ته مير حڪمرانن جنهن طريقي سان  پنهنجن آرائشن کي ٺاهيو  ان جو مثال نٿو ملي ۽ هاڻي اهو اسانجو فرض آهي ته  جتي جتي  تاريخي قديمي شيون آهن  انهن جي  نظرداري ڪرڻ ثقافت کاتي جي ذميواري آهي. هن چيو ته  اڄ مير ڪرم علي خان جي مقبري جو ڪم مڪمل ٿيڻ تي انڊوولمينٽ فنڊ ٽرسٽ (اي ايف ٽي) پاران  آڪٽوبر 2010 ۾ مرمتي ڪم شروع ڪيو ويو جيڪو مئي 2015 ۾ مڪمل ٿيو  جنهن جي مرمت لاءِ سنڌ حڪومت  25 ملين رپيا خرچ ڪيا آهن. هن چيو ته  پ پ پ جي چيئرمين بلاول ڀٽو زرداري جون خاص هدايتون آهن ته سڀئي ادارا  پنهنجو ڪم تسلي بخش نموني سان ڪن  ۽ جيڪڏهن جتي ڪا به خردبرد ٿي آهي ته ان جي انڪوائري ٿيڻ گهرجي _انڊوولمينٽ فنڊ ٽرسٽ سان ثقافت کاتي ۾ 11 تاريخي ماڳن جي سارسنڀال لهڻ لاءِ معاهدو ٿيو هو جنهن ۾ رني ڪوٽ  ، نئون ڪوٽ ، ڪلهوڙا حڪمرانن جا مقبرا ۽ پڪي قلعي جي مرمت شامل آهي جنهن جو ڪم تمام جلد شروع ڪرايو ويندو _هن چيو ته  اي  ايف ٽي ادارو 2009 ۾ قائم ٿيو ۽ ان ۾ سينيئر تجربيڪار ماڻهن جي مدد ورتي وئي آهي. هن چيو ته  ثقافت کاتو  ڪڏهن به  صوبي جي ثقافت کي  مٽائڻ نه ڏيندو هن هڪ سوال جي جواب ۾ چيو ته سڀني ادارن جو احتساب ٿيڻ گهرجي جڏهن پنجاب جي ڳالهه ايندي آهي ته ميان صاحبان ناراض ٿي ويندا آهن جڏهن ته  سنڌ حڪومت سان ماٽيلي ماءُ وارو سلوڪ ڪيو پيو وڃي تڏهن به  اسين صبر ۽ اطمينان سان پنهنجون ذميواريون نڀائي رهيا آهيون _ بعد ۾ شرميلا فاروقي  مير ڪرم علي خان ٽالپر جي مقبري جو دورو ڪيو ۽ مير حيدر علي  کي  مقبري جون چاٻيون حوالي ڪيون . تقريب ۾ اڳوڻو صوبائي وزير زاهد ڀرڳڙي ، سيڪريٽري ثقافت ڊاڪٽر نياز حسين عباسي ، اڳوڻو سيڪريٽري ثقافت عبدالحميد آخوند، ڊي جي ثقافت منظور ڪناسرو، اي ايف ٽي جي انچارج  اشتياق انصاري، مير حيدر علي ٽالپر ۽  ابراهيم شاهه  کان علاوه واسطيدار عملدار پڻ موجود هئا.

 

انوشڪا شرما ڦلاري نالي نئين فلم ڪو پروڊيوس ڪرڻ سان گڏ ان ۾ ڪم به ڪندي

ممبئي (شوبز نيوز) بالي ووڊ اداڪارا انوشڪا شرما اعلان ڪيو آهي ته هوءَ ڦلاري نالي نئين فلم ڪو پروڊيوس ڪرڻ سان گڏ ان ۾ ڪم به ڪري رهي آهي، هڪ بيان ۾ انوشڪا ٻڌايو ته فوڪس اسٽار اسٽوڊيوز جي گڏيل پروڊڪشن سان ٺهندڙ ان رومانوي فلم ۾ لايف آف پائي ذريعي مشهوري ماڻيندڙ ڳائڻو اداڪار دلجيت دوسنجي ۽ سورج شرما سانس گڏ نظر ايندا، هن ٻڌايو ته اها فلم ڀارتي پنجاب جي 100 سال پراڻي رسم ڦلار جي ڪهاڻي تي ٻڌل آهي، جنهن جي هدايت نئون ڊائريڪٽر انشائي لال ڏئي رهيو آهي،  27 ورهين جي انوشڪا شرما جو چوڻ هو ته ڦلار شادي جي رسمن جي حوالي آهي، جيڪا گذريل 100 سالن کان ڀارتي پنجاب ۾ هلي رهي آهي.

 

سنجي دت 25 فيبروي تي آزاد ٿي گهر پهچندو،گهر ڀاتين ۾ خوشيءَ جي لهر

ممبئي (شوبز نيوز) بالي ووڊ جو مشهور اداڪار سنجي دت پنهنجي سزا پوري ڪرڻ کانپوءِ 25 فيبروري خميس ڏينهن جيل مان آزادي ماڻيندو.بالي ووڊ ۾ سنجو ڀائي ۽ منا ڀائي جي نالي سان مشهور سنجي دت پنهنجي سزا جو مدو پورو ٿيڻ کانپوءِ خميس 25 فيبروي تي جيل مان آزاد ٿي رهيو آهي،ايڊيشنل ڊائيريڪٽر جنرل ڊي ڪي مطابق اداڪار سنجي دت 25 فيبروري خميس ڏينهن جيل مان آزاد ٿي رهيو آهي.جڏهن ته منا ڀائي جي آزادي جي خوشي ۾ گهر ڀاتين پاران جيل انتظاميا جي مان ۾ هڪ شاندار پروگرام  ڪيو هو،پر سيڪيورٽي مسئلن سبب اداڪار جي گهر ڀاتين کي جيل انتظاميا دعوت ڪرڻ کان روڪي ڇڏيو آهي.يادرهي ته اداڪار سنجي دت 1993ع ۾ ممبئي حملن ۽ غير قانون هٿيار رکڻ جي ڏوهه ۾ مئي 2013ع کان پوني يارواڊا جيل ۾ ساڍا 3 سال قيد هيو.