تازيون خبرون

Daily Archives: February 24, 2016

فلمن ۾ اڄوڪي دور جي بهادر ۽ همت وارين عورتن جي عڪاسي ڪرڻ چاهيان ٿي: پريانڪا

ممبئي (شوبز نيوز) بالي ووڊ اداڪارا پريانڪا چوپڙا چيو آهي ته کيس فلمن ۾ بااختيار عورتن جو ڪردار ڪرڻ تمام گهڻو پسند آهي، ڀارتي ميڊيا مطابق پريانڪا چوپڙا هڪ انٽرويو ۾ چيو ته مان پنهنجي فلمن ۾ اڄوڪي دور جي بهادر ۽ همت وارين عورتن جي عڪاسي ڪرڻ چاهيان ٿي ته جيئن دنيا کي ٻڌائي سگهون ته ڀارتي عورتون مظلوم ۽ لاچار ناهن، هن چيو ته اهڙن ڪردارن ذريعي مان دنيا کي اهو ٻڌائڻ چاهيان ٿي ته ڀارتي عورتون پاڻ پنهنجي پيرن تي بيهي سگهن ٿيون، پريانڪا چوپڙا پنهنجي ايندڙ فلم جئه گنگا جل ۾ هڪ سخت روئي واري پوليس آفيسرياڻي جي ڪردار ۾ نظر ايندي.

 

رنبير منهنجو ڀاءُ آهي،ڪترينا کان سندس ڌار ٿيڻ بابت ڪجهه نه ٿي چئي سگهان: ڪرينا

ممبئي (شوبز نيوز) بالي ووڊ اداڪارا ڪرينا ڪپور چيو آهي ته رنبير ڪپور سندس ڀاءُ آهي ۽ ڪترينا کان سندس ڌار ٿيڻ بابت هوءَ ڪجهه به نه ٿي چئي سگهي. ڀارتي ميڊيا مطابق هڪ انٽرويو ۾ ڪرينا ڪپور چيو ته رنبير سندس ڀاءُ آهي، تنهن ڪري کيس ان بابت ڪابه ناڪاري ڳالهه پسند ناهي، هوءَ پنهنجي ڀاءُ کي زندگي ۾ سدائين خوش ڏسڻ ٿي چاهي، سندس چوڻ هو ته رنبير کيس ڪترينا کان رستا ڌار ٿيڻ بابت ڪجه به ناهي ٻڌايو پر جيڪڏهن هو کيس اهو ٻڌائي به ها ته هوءَ ان جو ذڪر ميڊيا ۾ ڪڏهن به نه ڪري ها، ڇو ته اهو رنببير ۽ ڪترنا جو ذاتي معاملو آهي، ڪرينا ڪپور چيو ته اسان کي ڪو به حق نه ٿو پهچي ته اسان سندن گهرو زندگي ۾ مداخلت ڪيون. واضح هجي ته ڪرينا ۽ رنبير پاڻ ۾ سئوٽ آهن.

 

آسٽريلوي عورت ڪرڪيٽ ٽيم آخري ون ڊي ۾ نيوزيلينڊ کي مات ڏئي سيريز پنهنجي نالي ڪري ڇڏي

ويلنگٽن (اسپورٽس نيوز)آسٽريليا جي عورت ڪرڪيٽ ٽيم ٽئين ۽ آخري ون ڊي ميچ ۾ نيوزيلينڊ کي 6 وڪيٽن تان مات ڏئي سيريز 1-2 تان پنهنجي نالي ڪري ڇڏي، نيوزيلينڊ جي ٽيم پهريان کيڏندي مقرر 50 اوورن ۾ 5 وڪيٽن جي نقصان تي 243 رنسون ٺاهي آسٽريلوي ٽيم کي ميچ ۾ ڪاميابي لاءِ 244 رنسن جو هدف ڏنو، سوزي پاٽيز 110 رنسن سان مٿي رهي پر سندس سينچري پنهنجي ٽيم جي ڪم نه آئي. آسٽريليا طرفان پري، ميگن سڪٽ، فارل ۽ جونسن هڪ هڪ رانديگرياڻي کي آئوٽ ڪيو، جواب ۾ آسٽريلوي ٽيم جي اڳواڻ ميگ لاننگ جي شاندار سينچري سبب مهمان ٽيم ميزبان ٽيم طرفان مليل هدف 48.4 اوورن ۾ 4 وڪيٽن جي نقصان تي پوري ڪري ميچ کٽي ورتي،آسٽريليا جي ٽيم نيوزيلينڊ جي ٽيم کي نه رڳو ٽئين ۽ آخري ون ڊي ميچ ۾ 6 وڪيٽن تان مات ڏني پر ٽن ميچن جي سيريز پڻ 1-2 تان پنهنجي نالي ڪري ورتي.

 

آسٽريليا نيوزيلينڊ کي ٻين ۽ آخري ڪرڪيٽ ٽيسٽ مئچ ۾ 7 وڪيٽن تان هارائي سيريز ڪلين سوئپ ڪري ورتي

ڪرائيسٽ چرچ (اسپورٽس نيوز) آسٽريليا نيوزيلينڊ کي ٻئين ۽ آخري ڪرڪيٽ ٽيسٽ مئچ ۾ 7 وڪيٽن تان هارائي سيريز ڪيلن سوئيپ ڪري ورتي. ان ڪاميابي سميت آسٽريليا جي ٽيم ٽيسٽ ڪرڪيٽ جي عالمي ٽيم رينڪنگ ۾ پهرئين پوزيشن حاصل ڪري ورتي آهي. ڪينگروز ڪيويز طرفان مليل هدف 201 رنسون ٽن وڪيٽن جي نقصان تي حاصل ڪيو. جو برنز 65 ۽ ڪپتان اسٽيون سمٿ 53 رنسن سان نمايان رهيا.جو برنز کي شاندار بيٽنگ جو مظاهرو ڪرڻ تي مئچ جو بهترين رانديگر قرار ڏنو ويو. مئچ جي پنجين ۽ آخري ڏينهن ڪينگروز بيٽسمينن بهترين بيتنگ جو مظاهرو ڪيو ۽ ڪيويز بائولرن تي حاوي رهيا. آسٽريليا جي ٽيم کي مئچ ۾ ڪاميابي لاءِ آخري ڏينهن 131 رنسن جي ضرورت هئي ان جون 9 وڪيٽون اڃان باقي هيون. ڪيويز کي مئچ کٽڻ لاءِ 9 وڪيٽن جي ضرورت هئي.ڪينگروز نيوزيلينڊ کي ٻي ۽ آخري ٽيسٽ مئچ ۾ 7 وڪيٽن تان هارائي نهص رف سيريز 0-2 تان پنهنجي نالي ڪئي بلڪه ٽيسٽ ڪرڪيٽ جي عالمي ٽيم رينڪنگ ۾ پهرئين پوزيشن حاصل ڪئي. جو برنز کي بهترين بيٽنگ جو مظاهرو ڪرڻ تي بهترين رانديگرن قرار ڏنو ويو.

 

سنڌ نه سنبري سک: ليکڪ اطهر سنديلو

سنڌ هونءَ ته سڄي سورن ۾ آهي ۽ هزارين مرض اهڙا آهن جن جي درد جي دوا لاءِ ماڻهو در در ڀٽڪندا ٿا رهن. جيڪي مئل ڍور سمجھي جيري جاڳندي ڳئون کي ڳهڻ لاءِ ڪروڙين ڪينئا، ماڪوڙا گڏ ٿي حملو ڪيو هجي، ائين به ناهي ته مرضن جي شناخت ۽ انهن جي سببن جو پتو نه هجي، انهيءِ ڪري علاج ۾ مشڪلاتون ٿينديون هجن پر انڌن اونڌن ويڄن جي هوندي ڪنهن مريض جي صحتيابي جي اميد نٿي ڪري سگھجي، اهري طرح اڄ سنڌ جا ٻيٽ وڪڻڻ کان وٺي مڪاني ادارن ۾ ريگيولر بينادن تي ٿيندڙ ڪروڙين روپين جي ڪرپشن ۽ انهن مٿان جاچ بابت ٺهندڙ ڪاميٽين مٿان ڪاميٽين کي ڏسي اها اميد ئي نٿي جاڳي ته هي سنڌ جنهن ۾ پيءُ ماءُ جهڙو مقدس رشتو پنهنجن جگر جي ٽڪرن سان گڏ خودڪشيون ڪندا هجن، انهن کي وڪڻڻ لاءِ چوواٽي تي هوڪا ڏيندا هجن. سياسي، انتظامي ۽ معاشي ڀينگ ڏسجي ٿي يا ڪالهه سنڌ جي ماڻهن پاران کير وڪڻڻ واري کي حرام سمجھڻ واري سچي پچي حقيقت تي به اعتبار نٿو اچي، جڏهن عام سنڌي ماڻهو پنهنجي سامهون ڪنهن ”بينظير انڪم سپورٽ سينٽر“ تي پنهنجي ماءُ، ماسي يا اوڙي پاڙي واري ڪنهن ٻڌڙي عورت کي پوليس واري جا ڏنڊا کائيندي ڏسي ٿو ته هاڪاري تبديلي جي اميد جاڳڻ بجاءِ مايوسي جو ويس پهري نااميدي جي هڪ مستقل موسم جوڙي پئي ٿي. ”تبديلي“ اڄ جي سياسي سماچار جي هاڻ ”پراپرٽي“ بڻجي چڪي آهي ۽ ساڄي توڙي کاٻي ڌر جو فرق ميسارجي ”تاريخ جو موت“ جھڙا نظريا گھڙيندڙ عالمي سياسي منڊي ۾ چالو واپار کي ڏسي نٿو لڳي ته سنڌ يا پاڪستان ۾ تبديلي نالي ڪو اڏامندڙ امن جو پکي اچي آکيرو ڪندو……….. يا دهشتگردي ۽ ڪرپشن کي ڳنڍيندي انهيءِ ٻن مرضن جي خاتمي لاءِ صرف سنڌ لاٰءِ بضد نواز شريف ۽ چوڌري نثار جي سربراهي واري وفاقي سرڪار ۾ ڪا مناسب علاج ڪرڻ جي اهليت توڙي صداقت نظر نٿي اچي، تنهن هوندي به پيپلز پارٽي جي سيڪيولر مهانڊي کي ڪرپشن جي ڪوڙي الزام تحت ڪارو ڪرڻ وارو عمل ڪوٺيندڙ تجزيه نگارن تي اعتبار به ڪجي ته اينٽي ڪرپشن واري صوبائي خودمختيار اداري جا اڳوڻا توڙي هاڻوڪا اڇا چٽا اڳ ئي ڏسيون ويٺل حقيقت صحافي صرف هڪڙي ئي مڪاني ادارن ۾ مبينا طور ٿيندڙ سياسي ڪرپشن جو مثال پيش ڪن ٿا ته هر طرف کان ڪوڙو، ڪوڙو چوڻ جون صدائون بلند ٿي وڃن ٿيون. ٻئي طرف هر عام توڙي خاص شهري پنهنجي اکين اڳيان روڊن، رستن اسپتالن ويندي پنهنجي گھرن جي آڳرن ۾ نڪاسي جا تلاءُ روزانو ڏسي ٿو، روزانو مشاهدو ڪري ٿو ته جتي تعلقي سطع جي مڪاني ادارن کي به ماهوار بجيٽ ڏيڍ ڪروڙ جي لڳ ڀڳ هوندي، اهي صرف صفائي ۽ روشني جو انتظام به نه ڪري سگھن………..!!؟ يعني هر شهر جا روڊ رستا اکڙيا پيا هجن ۽ گندگي گھرن ۾ گھر ڪري الٽو شهرين جي صحت، جڳهن جي لاءِ نقصانڪار بڻيل هجن، اتي اهو ڪير اعتبار ڪندو ته ڪنهن هڪ تعلقي ميونپسل ۾ 25،30 کان وڌيڪ صرف مالهي هجن پر ڪو باغ، پارڪ، باغيچو نه هجي، ڪروڙين روپين جا ٺهيل ڊرينج نالا ابتا وهندا هجن……… ها ڏوڪري تعلقي جي ميونسپل به سنڌ جي ٻين بلدياتي ادارن کان انهي معاملي ۾ مختلف ناهي، اڃان به ٻه ڏاڪا مٿانهون هوندو. پر خاص ڳالهه اهڙين هزارن سون جي تعداد ۾ مبينا جعلي ڀرتين، ميونسپل پاران شهرين جي بڻيادي حقن بابت انتظامن کي ڏسندي عام شهري به اهو سمجھي يا پڇي سگھي ٿو ته اهي ڪروڙين روپيا ماهوار ۽ اهي هيڏا سارا وسيلا آخر وڃن ڪيڏانهن ٿا؟ ڏوڪري شهر لاءِ هڪ ڪروڙ روپين کان مٿي لڳايل اسٽريٽ لائٽون به ناڪاره بڻجي ويون آهن، شهر ۾ هر طرف گندگي جا ڍير لڳا پيا آهن جنهن سبب ڪيترائي موضي مرض پيدا ٿي ويا آهن. ڏوڪري تعلقي ميونسپل جو ڪيس سنڌ جي ٻين بلدياتي ادارن کان وڌيڪ دلچسپ، سنگين ۽ ظاهر ظهور آهي جو انهيءِ تي نه لکڻ ڪنهن به پروفيشنل صحافي، رپورٽر، ليکڪ کي پنهنجي ئي اندر واري سان ناانصافي لڳندو. ڇو ته انهيءِ ڌاڙي ۾خود ڀاڳيو ئي چور نظر اچي ٿو. توڙي جو ڏوڪري ميونسپل اهڙو چهرو لڪائڻ لاءِ ماضي ۾ انهيءِ جي رڪارڊ کي پراسرار طور لڳندڙ باهين وارن واقعن ۽ اڄ سودو آفيس ۾ رڪارڊ جو هڪ پنو يا بوڪ به نه رکڻ واريون ڪوششون به ظاهر ظهور آهن پر سنڌ ۾ ڪرپشن کي دهشتگردي سان گڏي انهيءِ خلاف آپريشن ڪندڙ وفاقي حڪومت جي قدمن يا سنڌ جي اينٽي ڪرپشن کاتي پاران سنڌ جون سون ورنيون ملڪيتون، ٻيٽ وڪڻڻ کان وٺي مڪاني ادارن جي اهڙي ڪرپشن جا پيرا لڪائڻ واري هاڻوڪي مهم ڏوڪري جي تعلقي جي عوام کي ڪو لاڀ پوندو يا ڪميٽين مٿان ڪميٽين ٺاهڻ واري سنت براقرار رکي ويندي ”تنهن بابت اڳواٽ ڪا اميد ته اجائي، پر پنهنجو ڪيس پيش ڪرڻ جي داد جو فرياد، ڪندڙ جو حق آهي.

 

سنڌ جا تاريخي ماڳ…………. حڪومت جي بيڌياني جو شڪار ٿيل سنڌ جي صثافت: رفيق چنا دادو

سنڌ اندر ڪيترائي تاريخي ماڳ آهن، جنهن سان سنڌي قوم جو گھرو تعلق آهي انهن مان ڪيترائي ماڳ مٽي جي ڍير ۾ تبديل ٿي ويا آهن ۽ اڄ به ڪيترائي ماڳ حڪومت جي بيڌياني سبب پنهنجي اصلي خوبصورتي وڃائي رهيا آهن. جيڪي اڄ به اسان لاءِ ڌيان طلب آهن. اڄ به دادو جا ثقافتي ۽ سياحتي ڪيترائي ماڳ حڪومت جي بيڌياني عدم توجي سبب پنهنجي اصلي خوبصورتي وڃائي تباهه حالي جو شڪار ٿي ويا آهن جن ۾ نصير محمد جو ڪلهوڙو جو قديمي قبرستان  رني ڪوٽ ۽ ڪائي جا قديمي غار آهن جن لاء چيو وڃي ٿو اهي غار 35 هزار سال قبل مسيح ۾ پٿر جي دور جي انساني هٿن جا تعمير ٿيل آهن انهن تاريخي ماڳن مان ڪلهوڙا دور جي حڪمران ميان يار محمد ڪلهوڙو جو مقبرو پڻ هڪ آهي . مقبرو ميان يار محمد ڪلهوڙو دادو ضلعي جي دادو شهر کان 10 ڪلوميٽر جي مفاصلي تي جيڪو سيوهڻ روڊ تي خداآباد کان اولهه طرف ٻن ڪلوميٽرن جي مفاصلي تي ڪلهوڙا دور جي حاڪم ميان يار محمد ڪلهوڙو جو مقبرو آهي. ڪنهن دور ۾ ميان يار محمد ڪلهوڙو تخت گاهه خداآباد جو والي هو. هن کي مقامي ماڻهون ميان يار محمد ڪلهوڙو ڏنڊائي جي نالي سان ڪوٺين ٿا. ڪلهوڙن جو دور گھڻن ئي حوالن سان سنڌ جي تاريخ ۾ سونهري دور سڏيو وڃي ٿو. هن دور ۾ فقيرن، بادشاهت کي مات ڏني .  ميان يار محمد جي لاءِ ته اهو چيو وڃي ٿو ته هو حافظ قرآن هئو. هن جي دور ۾ هر طرف الله اڪبر جي جهونگار هوندي هئي. ميان يار محمد ڪلهوڙو لاڙ تائين حڪومت ڪئي. چيو وڃي ٿو ته ڪلهوڙا دور ۾ سنڌي ماڻهون خوشحال ٿيو. ميان يار محمد ڪلهوڙو سنڌو درياء واري پاڻي تي ننڍا ننڍا واهه کوٽائي غير آباد زمينن کي آباد ڪري علائقي کي سر سبز ڪري ڏيکاريو. جڏهن ته نئين گاج جو پاڻي جيڪو ضايع ٿيندو هئو انهي پاڻي کي استعمال هيٺ آندو ويو ميان يار محمد نئين گاج جي پاڻي کي پڻ رٿابندي تحت عوام ڏنو ۽ انهن اتي پنهنجيون زمينون آباد ڪيون. علائقي جي عوام زمينون آباد ٿيڻ کانپوءِ پوري سنڌ کان وڌيڪ خوشحال ٿيا. ڪاڇي وارو علائقو جيڪو جابلو علائقو آهي اهو اڪثر ڪري تحريڪن جو مرڪز رهيو آهي ميان وال تحريڪ جا ماڻهون ان جبل ۾ اچي رهندا هئا. ڇاڪاڻ جو اتي نئين گاج جو پاڻي ملندو هئو ۽ جبلن جي سٺي پناهه پڻ ملندي هئي. علائقي جي عوام جو چوڻ آهي  ته ميان يار محمد ڪلهوڙي جو تاريخي مقبرو هر دور جي حڪومتن جي لاپرواهي ۽ بيڌياني سبب هنڌان هنڌان ٽٽي پيو آهي. هن مقبري کي وڏا وڏا ڏار پئجي چڪا آهن. ڪيترن ئي سالن کان هن مقبري کي شٽرنگ جي ٽيڪن تي بيهاريو ويو آهي عوام جي احتجاجن نشاندهي ڪرڻ کان پوءِ ڪيترائي سال اڳ هن مقبري جي مرمت لاءِ لکين روپين جو سامان آيو، جنهن ۾ سيمينٽ ۽ ٽائيلز موجود هيون جيڪي پر هن مقبري جي مرمت نه ٿي سگھي آهي. هن مقبري کان ٻاهر درگاهه جي احاطي ۾ بيٺل ٻيا ڪيترائ مقبرا ڪري پٽ پئجي چڪا آهن. تاريخ  ٻڌائي  ٿي ته هن مقبري کي 300 سالن کان وڌيڪ عرصو گزري چڪو آهي پر پوءِ به هي مقبرو ڏسڻ وٽان آهي. گذريل  سالن  ۾ بارشن جي تباهه ڪارين ۾ مقبرو ميان يار محمد ڪلهوڙو به محفوظ نه رهي سگهيو ۽ بارش جو وڏو پاڻي هن هن مقبري جي ٿلهين ڀتين اندر داخل ٿي هن مقبري کي وڌيڪ ڪمزور بڻائي ڇڏيو آهن. مقبري جي ڏاکڻو طرف بلڪل پنهنجي جڳهه ڇڏي ليٽي پيو آهي.  مقبري ٻاهران آيل ماڻهن جون يادگار لکڻيون اڄ به موجود آهن جن ۾ فارسي ۾ لکيل شعر پڻ آهن. درگاهه ميان يار محمد ڪلهوڙي جي مقبري سامهون سندس ٺهرايل مسجد پڻ آهي. جنهن جا چاپڙ پڻ ڪري پيا آهن ۽ هن مسجد ۾ بارشن جي پاڻي وڏا گھارا ٺاهي ڇڏيا آهن جڏهن ته هن مسجد جو هڪ گنمبذ پڻ ڪيڏي مهل به ڪري پٽ ته پئجي سگھي ٿو مگر ڪنهن جاني نقصان کي پڻ نظر انداز نٿو ڪري سگھجي. ٻڌايو وڃي ٿو ته دادو ضلعي جو وڏي مان وڏو قبرستان آهي جيڪو ڪلهوڙا دور جو آهي. درگاهه ٻاهران بلڪل سامهون دائي فقير جي قبر آهي. جنهن مٿان پڻ مقبرو اڏايل آهي. جڏهن ته درگاهه جي چوڌاري هن قبرستان ۾ ميان وال تحريڪ جي سپاهه ، سپاهه سالارن، جرنيلن، جون قبرون ۽ مقبرا پڻ آهن. جيڪي مالڪي نه هئڻ ۽ حڪومت جي بيڌياني سبب ڪي ته زمين دوز ٿي ويون ڪي ته مقبرا ڪري پٽ پئجي ويا. جڏهن ته اڄ به قبرستان اندر هڪ وڏو مقبرو ٺهيل آهي جنهن لاءِ چيو ٿو وڃي ته اهو ميان وال تحريڪ جي جرنيل منگھو فقير جتوئي جو آهي ۽ ٻيو مقبرو پٿر سان جوڙايل آهي. جنهن جي قبر مٿان پڻ پٿر تي بهترين قرآن شريف جون آيتون اڪريل آهن. هنن ماڳن يا مقبرن تي اڄ به پري پري کان مريد ۽ سياهه ايندا آهن. مگر هنن لاءِ هتي ڪوبه مسافر خانو يا ريسٽ هائوس جوڙايل نه آهي. اڄ به هنن ابدي ننڊ سمهڻ وارن جي ياد ۾ هر سال ميلو لڳايو ويندو آهي ۽ پري پري کان عقيدتمند اچي حاضري ڀرائيندا آهن. هن رات مرد توڙي عورتون سازندن جي سر تي ڪنڌ ڌوڻ ڪري ، الله توهار جي آواز کي بلند پڻ ڪندا آهن. جڏهن حڪومت طرفان هتي ايندڙ زيارتين لاءِ ڪوبه جوڳو بندو بست ٿيل نه آهي. درگاهه جي سامهون سڏ پنڌ تي هڪ ڦٽل کوهه آهي کوهه بغير پاڻي جي اڄ موجود آهي. هن کوهه مان ميلي جي زائرين جي مٽي ڀري ويندي هئي. جنهن لاءِ اهو مشهور آهي ته ان کوهه ۾ ميان يار محمد ڪلهوڙو پنهنجو پاڻ کي رات جي پهر ۾ اونڌو لڙڪائي الله جو ذڪر بلند ڪندو هئو.  ميان صاحب قرآن حافظ ، ۽ فقير صفت انسان هئو. ڪهن وقت ۾ درگاهه جي اندر هڪ ڏنڊو پڻ پيل آهي جنهن لاءِ اهو مشهور آهي ته هن ڏنڊي سان ميان يار محمد حڪومت ورتي هئي. هن تاريخي وقت  جي  حڪمرانن  جي  بيحسي قيديمي آساران جي  صحيح سار سنڀال نه  لهڻ سبب  قبرستان  ڀرسان موجود  ڳوٺ جو گندي پاڻي جو نيڪال وهي رهيو آهي . جيڪو هن مقبري لاءِ نهايت ئي نقصانڪار آهي مقامي ڳوٺ جا پير سن رهواسي ٻڌائن ٿا ته .1972ع  ۾ جڏهن ممتاز علي خان ڀٽو جڏهن سنڌ جو گورنر ۽ مارشل لا ايڊمنسٽريٽر هو ان وقت ممتاز علي خان ڀٽو خداآباد آيو ته هتان جا ڳوٺاڻا کيس درگاهه ميان يار محمد ڪلهوڙي تي وٺي ويا. ان وقت جڏهن ته درگاهه تائين وڃڻ لاءِ رستو ڪچو هئو ۽ وڏي تڪليف کان پوءِ ممتاز علي خان ڀٽو درگاهه ميان يار محمد ڪلهوڙي تي  پهتو ته هن ڪچي رستي کي پڪي ڪرائڻ ۽ ڳوٺ کي بجلي ڏيڻ جو پڻ اعلان ڪيو هو. 2008ع واري پ پ پ  جي عوامي حڪومت ۾ سنڌ جي ثقافت جي وزير محترمه سسئي پليجو پڻ هن تاريخي ماڳ تي پهچي جلد تعميراتي ڪم شروع ڪرائڻ جو وچن ته ڪيو مگر ان کي ڪيترائي سال گذري چڪا آهن پر اڃا تائين  ميان يار محمد ڪلهوڙو جي  مقبري جي مرمت  لاءِ هڪ سر به نه لڳي سگهي آهي ڳوٺاڻن چوڻ  آهي  ته  هر  وقت جي  حڪومت . هن مقبري تي حڪومت نامدار وقت  به  وقت ڪانه ڪا سروي  ٽيم ته موڪلي ٿي. مگر ڪيترائي دفعا سروي ڪرڻ باوجود هن مقبري جو تعميراتي ڪم شروع نه ٿي سگهيو آهي.  ميان يار محمد ڪلهوڙي تاريخ  ٻڌائي  ٿي. ته  ميان يار محمد ڪلهوڙو 18 سال حڪومت ڪئي. اهو ٻڌايو پيو وڃي ته هن پنهنجي مرڻ کان اڳ مقبري جي اڏاوت شروع ڪرائي هئي پر ميان يار محمد جي اچانڪ موت ٿيڻ تي مقبري جو ڪم اڌورو رهجي ويو هئو.. جڏهن ته باقي رهيل ڪم بعد ۾ مڪمل ڪرايو ويو هئو. ميان يار محمد ڪلهوڙو 11 ذوالقعد 1113 هه بروز جمع مطابق 14 سيپٽمبر سن 1719 ع تي پنهنجي تخت گاهه خداآباد ۾ راهه رباني ورتي. هن پويان پنج پٽ ڇڏيا جن ۾ ميان نور محمد ، ميان محمد خان، ميان دائود خان، ميان تاج محمد خان۽ ميان غلام حسين شامل آهن دادو  ضلعي جي باشعور  عوام سڄاڳ  ڌرين وقت به  وقت ميان يار محمد ڪلهوڙو جي  مقبري سميت ضلعي ۾ ٻين  تاريخي جائن جي حڪومت پاران مالڪي نه ڪرڻ تي  ڳڻتي  جو  شڪار آهي. هنن جو مطالبو  رهيو آهي ته دادو  ضلعي  جي  سڀني ثقافتي ورثن کي محفوظ ڪن ته جئين هو صنعت جو درجو اختيار ڪري سگهن عوام  احتجاج  ڪري ڪري ٿڪجي  پيو  آهي ته تاريخي ورثن جي مالڪي  ڪئي وڃي پر اڄ تائين  ڪنهن  به  نوٽيس  نه ورتو  آهي .دنيا جي سڌريل ملڪن ۾ ثقافتي ورثن تي خاص توجهه ڏني ويندي آهي پر افسوس سنڌ سميت دادو  ضلعي  جي ثقافتي ورثن کي هر وقت جي سرڪار اڃ تائين دنيا ۾ متعارف به نه ڪرائي سگهي آهي.

 

پاڪ فوج قومي جدوجهد جو هر ول دستو….

پ پ جي شريڪ چيئرمين ۽ اڳوڻي صدر آصف علي زرداري چيو آهي ته قومي تاريخ جي نازڪ موڙ تي آرمي چيف جنرل راحيل شريف جو مدي ۾ واڌ نه وٺڻ جو اعلان وقت کان اڳ آهي. سياسي معاملن، احتساب يا ٻين معاملن ۾ فوج جو امڪاني ڪردار ڳولڻ مناسب ناهي. فوج جي جدوجهد ۽ قربانين کي سياسي اختلافن ۽ موقعي پرستي جي نذر نه ڪرڻ گهرجي. هڪ بيان ۾ هن چيو ته اندريان ۽ ٻاهريان دشمن گڏجي ملڪي سلامتي، امن ۽ قوم کي بدترين خطرن جو شڪار ڪري رهيا آهن. ان ۾ ضرورت ان ڳالهه جي آهي ته نازڪ موقعي تي ذاتي اعتراضن، سياسي معاملن ۽ هر قسم جي انا يا خود پرستي کي مٿانهون رکي قوم ۽ سياسي قوت هٿياربند فوج سان ڪلهوڪلهي ۾ ملائي دهشت گردي کي پاڙان ختم ڪريون. هٿياربند فوج ضرب عضب آپريشن شروع ڪيو ته ملڪ ۾ امن امان جي صورتحال بهتر ٿي ۽ دهشت گردي خلاف جاري جنگ ۾ نمايان ڪاميابي ملي. فوج قومي جدوجهد جو هر ول دستو آهي ۽ وڏي اميد آهي ته جنرل راحيل شريف بنا ڪنهن خوف ۽ مدبراڻي قيادت ۾ تمام جلد اها جدوجهد پنهنجي انجام تائين پهچندي. اهو تاثر نه ڏيڻ گهرجي ته فوج قوم جانباز سپاهي ۽ بهادر آهيون. ان جي قربانين کي نٿي ساراهي. جنرل راحيل شريف جو گذريل ڏينهن توسيع نه وٺڻ جو بيان تحسين جوڳو ۽ ساراهه جوڳو آهي. قوم ۽ ميڊيا کي افواهن کان پاسو ڪرڻ گهرجي پر اسان بجا طور سمجهون ٿا ته قوم جي نازڪ موڙ تي جنرل راحيل جو اعلان وقت کان ا ڳ آهي. دهشت گردي خلاف جنگ ۾ قوم متحد آهي. ان اعلان سان عوام جي اميد مايوسي ۾ بدلجڻ جو امڪان آهي. اڳوڻي صدر چيو ته معروضي حالتن ۽ عوامي خواهشن کي نظر ۾ رکي سياسي قيادت کي قومي مفاد ۽ ملڪي سلامتي جي تناظر ۾ وقت اچڻ تي فيصلو ڪرڻ گهرجي. پوري قوم ۽ پ پ فوج سان هن عظيم جدوجهد ۾ ڪلهو ڪلهي ۾ بيٺل آهي. هن چيو ته گذريل سال آرمي پبلڪ اسڪول پشاور تي دهشت گرد حملي کانپوءِ صورتحال گهڻي سنگين ٿي وئي. سڄي ملڪ ۾ خوف ۽ هراس جي لهر پکڙجي وئي. سڄي ملڪ ۾ دهشت گردي جا واقعا، فرقيوار تڪرار، بلوچستان ۾ شور تي ۽ ڪراچي ۾ منظم ڏوهه، ڀتي خوري ڀوائتي سازش آهي. عليحدگي پسند  غير ملڪي آقائن جي اشاري تي ملڪ کي منتشر ڪري رهيا آهن.

 

پنهنجي دور ۾ بجلي بحران ختم ڪرڻ چاهيان ٿو: نواز شريف

اسلام آباد(بيورو) وزيراعظم ميان نواز شريف پارليامينٽ هائوس کي سولر پاور تي منتقل ڪرڻ واري رٿا جو افتتاح ڪري ڇڏيو، اها رٿا چين جي سهڪار سان تيار ڪئي وئي آهي، افتتاحي تقريب ۾ سينيٽ چيئرمين ميان  رضا رباني، قومي اسيمبلي جو اسپيڪر سردار اياز صادق ۽ چيني سفير سن وي ڊونگ به موجود هئا، ان موقعي تي خطاب ڪندي وزيراعظم نواز شريف چيو ته پارليامينٽ کانسواءِ قومي گرڊ کي به ان سولر پاور رٿا مان بجلي ڏني ويندي، هن چيو ته قومي اسيمبلي جي اسپيڪر ۽ سينيٽ چيئرمين جيڪو مثال قائم ڪيو آهي، ان جي واکاڻ ڪرڻ گهرجي، سندس چوڻ هو ته اسيمبلي ۾ سڄي ملڪ جا نمائندا ويهن ٿا ۽ منهنجي ڪوشش آهي ته پنهنجي اقتداري دور ۾ بجلي جي بحران جو خاتمو آڻيان، وزيراعظم چيو ته بجلي جي حوالي سان ڪيتريون ئي رٿائون هلي رهيون آهن، اسان چين جي سهڪار سان بجلي جي بحران تي ضابطو آڻڻ جي ڪوشش ڪري رهيا آهيون ۽ 2018ع تائين ملڪ مان بجلي جي بحران جو مڪمل خاتمو آندو ويندو، هن چيو ته پاڪستان جي ترقي ۾ چين جي دوستي جو تمام وڏو هٿ آهي، نواز شريف چيو ته پارليامينٽ هائوس پنهنجي بجلي پيدا ڪري پاڻ تي ڀاڙڻ جو جيڪو مثال قائم ڪيو آهي، اهو سٺو سنئوڻ آهي.

 

اتر وزيرستان ۾ سيڪيورٽي فورسز جي بمباري،25 دهشتگرد مارجي ويا

وانا (م.ڊ) اتر وزيرستان ۾ سيڪيورٽي فورسز جي بمباري جي نتيجي ۾ 25 دهشتگرد مارجي ويا، سيڪيورٽي ذريعن مطابق اتر وزيرستان جي علائقن وانا ۽ ڪند پهاڙ ۾ هوائي فوج جي جيٽ جهازن ذريعي دهشتگردن جي ٿاڪن تي بمباري ڪئي وئي، پاڪ فوج جي عام رابطن واري اداري آئي ايس پي آر مطابق انٽيليجنس ڄاڻ جي بنياد تي وانا ۽ ڪند پهاڙ وارن علائقن ۾ ٻه هوائي حملا ڪيا ويا، هڪ ڪارروائي جي نتيجي ۾ 15 دهشتگرد مارجي ويا ۽ ٻي ۾ 10 دهشتگردن کي ماريو ويو، سيڪيورٽي ذريعن مطابق جيٽ جهازن جي بمباري جي نتيجي ۾ دهشتگردن جا 8 ٿاڪ پڻ تباهه ٿي ويا، جڏهن ته ڪيترائي دهشتگرد زخمي پڻ ٿيا.

 

صدر ممنون حسين سان وزيراعظم جي ملاقات،قومي معاملن تي گڏيل خيالن جو اظهار

اسلام آباد(بيورو)وزيراعظم نوازشريف جي اسلام آباد ۾ صدر ممنون حسين سان ملاقات،ترقياتي معاملن تي تفصيلي ڳالهيون،وزيراعظم صدر کي حڪومت جي پاليسين ۽ مختلف رٿائن بابت ڄاڻ ڏني.صدر ۽ وزيراعظم نوازشريف پاڪ چين اقتصادي لنگهه رٿا،توانائي جي رٿائن تي ٿيندڙ اڳڀرائي ۽ دهشتگردي خلاف آپريشن ضرب عضب جي بهتر ڪارروائين تي گڏيل خيالن جو اظهار ڪيو.ٻنهي اڳواڻن ڪراچي سوڌو ملڪ ۾ امن امان جي صورتحال تي به تفصيلي ڳالهه ٻولهه ڪئي،آپريشن ضرب عضب جي ڪاميابين تي پاڪ فوج جي واکاڻ ڪئي ۽ چيو ته آخري دهشتگرد تائين ڪارروايون جاري رهنديون.