تازيون خبرون

Daily Archives: February 23, 2016

ملير ۾ پوليس مقابلو، القاعده ۽ لشڪر جهنگوي جا 8 دهشتگرد مارجي ويا، 4 اهلڪار زخمي

ملير(رپورٽ: ناز شر) حساس ادارن ۽ پوليس جي بن قاسم جي علائقي پپري ۾ ڪاروائي، دهشتگردن طرفان پوليس مٿان جديد هٿيارن سان فائرنگ، پوليس جي جوابي فائرنگ ۾ القاعده ۽ لشڪر جهنگوي سان تعلق رکندڙ 8 دهشتگرد مارجي ويا. وڏي تعداد ۾ خودڪش جيڪيٽون، بم، هٿيار هٿيڪا، مارجي ويل دهشتگرد ڊي ايس پي فتاح سانگري سميت ڪيترن ئي پوليس اهلڪارن جي قتل ۾ ملوث هئا.مقابلي ۾ چار پوليس اهلڪار پڻ زخمي تفصيل موجب ايس ايس پي ملير رائو انوار جي اڳواڻي ۾ ملير پوليس جي وڏي انگ بن قاسم ٿاڻي جي حد پپري لڳ نيشنل هاءِ وي روڊ ڀرسان دهشتگردن جي موجودگي جي اطلاع تي چڙهائي ڪئي ان دوران اتي موجود دهشتگردن پوليس مٿان جديد هٿيارن سان فائرنگ ڪري ڏني ۽ پوليس جي جوابي فائرنگ ۾ القاعده ۽ لشڪر جهنگوي سان تعلق رکندڙ 8 دهشتگرد مقابلي ۾ مارجي ويا. جن مان 5 ڄڻن جي سڃاڻپ سهيل چشما ٽو، خليل، بلال، طلحه ۽ عبدالسلام جي نالي سان ٿي آهي باقي ٽن مارجي ويل دهشتگردن جي شناخت نه ٿي سگهي آهي. مقابلي دوران پوليس مارجي ويل دهشتگردن جي قبضي مان خودڪشي جيڪيٽون، پريشر ڪڪر بم، ڪلاشڪوف، پسٽل ۽ وڏي انگ ۾ گوليون ۽ ڌماڪيدار مادو هٿ ڪري ورتو آهي. مقابلي ۾ چار پوليس اهلڪار، فيصل، سليم، اڪبر ۽ انار خان پڻ زخمي ٿي پيا. ان ڏس ۾ ايس ايس پي ملير رائو انوار ٻڌايو ته مارجي ويل دهشتگردن جو تعلق القاعده ۽ لشڪر جهنگوي سان آهي، جيڪي پوليس ۽ رينجرز اهلڪارن جي ٽارگيٽ ڪلنگ ۾ ملوث هئا، مارجي ويل دهشتگرد سهيل چشما ٽو ۽ ٻين جو تعلق القاعده فاروق ڀٽي عرف مسنا ۽ نعيم بخاري گروپ سان آهي جن ڪجهه عرصو اڳ ڊي ايس پي بن قاسم فتاح سانگري، ڊي ايس پي مجيد عباس، ڊپٽي جيل سپرنٽنڊنٽ ذوالفقار حيدر سميت پوليس اهلڪارن ۽ رينجرز اهلڪارن جي قتل ۾ ملوث هئا. گرفتار دهشتگردن وٽان برآمد ٿيل ڪلاشڪوفون سرڪاري آهن جيڪي اهلڪارن کي قتل ڪرڻ بعد کسيو ويون هيون. هن چيو ته معاملي جي وڌيڪ تحقيقات ڪري رهيا آهيون ۽ هٿ آيل هٿيارن کي فرانزڪ ٽيسٽ لاءِ موڪليو ويندو.

 

غيرت نالي تي قتل غيرت ناهي، اسلام عورتن جي حقن جي تحفط جو درس ڏئي ٿو: نواز شريف

اسلام آباد (بيورو) وزيراعظم نواز شريف سمورا توانائي منصوبا وقت سر مڪمل ڪرڻ جي هدايت ڪندي چيو آهي ته بجلي جي پيداوار ۾ اضافي سان لوڊشيڊنگ ۾ گهٽتائي ايندي ۽  ملڪ ۾  معاشي ترقي به ايندي. اسلام آباد ۾ وزيراعظم نواز شريف جي صدارت هيٺ وفاقي ڪابينا جي توانائي ڪميٽي جو اجلاس ٿيو، جنهن ۾ پاڻي ۽ بجلي واري وفاقي سيڪريٽري پاران توانائي منصوبن تي بريفنگ ڏني وئي. پاڻي ۽ بجلي واري وفاقي سيڪريٽري چيو ته 2015 بجلي جي پيداوار جي حوالي سان بهتر رهيو، موثر مانيٽرنگ ۽ حڪمت عملي سبب لائين لاسز ۾ به 5 ڏهائي 8 سيڪڙو گهٽتائي آئي. وفاقي سيڪريٽري چيو ته 12 سئو پيداوار جي نون منصوبن تي ڪم شروع ڪيو ويو آهي، بجلي جا سمورا منصوبا 2017 تائين مڪمل ڪيا ويندا. ان موقعي تي وزيراعظم نواز شريف، پاڻي ۽ بجلي واري وزارت کي هدايت ڪئي ته توانائي جا منصوبا وقت سر مڪمل ڪيا وڃن، هـُو سمورن منصوبن جي پاڻ نگراني ڪري رهيو آهي. وزيراعظم چيو ته بجلي جي پيداوار سان نه صرف لوڊشيڊنگ ۾ گهٽتائي ايندي پر بنيادي ڍانچي جي تعمير لاءِ به معاون ثابت ٿيندي. ٻئي طرف وزيراعظم نواز شريف چيو آهي ته غيرت جي نالي تي عورتن کي قتل ڪرڻ ڪا غيرت ناهي  اسلام آباد ۾ شرمين عبيد چنائي جي دستاويزي فلم جي مهورتي تقريب کي خطاب ڪندي وزيراعظم نواز شريف چيو ته غيرت جي نالي تي عورتن جي قتل ۽ نفرت پکيڙيندڙ قدمن کي روڪڻ جي ڪوشش ڪئي ويندي. هن چيو ته عورتن بابت شرميقن عبيد چنائي جون ڪوششون ساراهه جوڳيون آهن. سندس چوڻ هو ته عورتن تي تشدد ۽ ظلم اسلام جي خلاف آهي، عورتون هن ملڪ جو فخر آهن. وزيراعظم جو چوڻ هو ته اسلام عورتن کي مردن جي برابرحق ڏنا ويا آهن. وزيراعظم نواز شريف چيو ته شهرين جي حقن جو تحفظ جمهوريت سان ڪري سگهجي ٿو، هو قائد اعظم جي خواب کي حقيقت بڻائڻ جو عزم رکن ٿا.

 

ڪمند ۽ ڪڻڪ جي آبادگارن کي مناسب اگهه ناهي مليو، اپاءَ ورتا وڃن: قائم علي شاهه

ڪراچي (اسٽاف رپورٽر) سنڌ ڪابينا هلندڙ سال 11 لک ٽن ڪڻڪ خريداري ڪرڻ ۽ امدادي اگهه 13 سئو رپيا في مڻ مقرر ڪرڻ جي منظوري ڏئي ڇڏي آهي، وڏي وزير قائم علي شاهه  غير قانوني مدرسن خلاف ڪارروائي ڪرڻ جي هدايت ڪندي چيو آهي ته ڪمند ۽ ڪڻڪ جا آبادگار مناسب اگهه نه ملڻ سبب پريشان آهن، انهن کي رليف فراهم ڪرڻ لاءِ اپاءَ ورتا وڃن.      سنڌ ڪابينا جو اجلاس وڏي وزير سيد قائم علي شاهه جي صدارت هيٺ  ٿيو  آهي،  جنهن دوران آءِ جي سنڌ امن امان بابت بريفنگ ڏيندي ٻڌايو ته لياري گينگ وار جا 260 دهشتگرد، القاعدا ۽ ٽي ٽي پي جا 177 دهشتگرد ماريا ويا آهن.  هن ٻڌايو ته اي ٽي سيز ۾ 3949 ڪيسز هلي رهيا آهن، جن مان 45 ڪيسن ۾ جوابدارن کي سزا ٻڌائي وئي آهي. آءِ جي سنڌ ٻڌايو ته 109 ڪيسز ۾ جوابدارن کي آزاد ڪيو ويو آهي، جڏهن ته فوجي عدالتن پاران 3 ڪيسز ۾ دهشتگردن کي سزا ٻڌائي وئي آهي. آءِ جي سنڌ ٻڌايو ته شڪارپور سانحي ۾ ملوث وڌيڪ ٻن جوابدارن کي گرفتار ڪيو ويو آهي، جن جو تعلق تحريڪ طالبان سان آهي. هن ٻڌايو ته اسڪولن  جي سڪيورٽي لاءِ ريپڊ ريسپانس فورس جا 3 مرڪز قائم ڪيا ويا آهن. وڏي وزير  آءِ جي سنڌ کي ميرپورخاص، عمرڪوٽ ۽ ٿرپارڪر ۾ غيرقانوني مدرسن خلاف ڪارروائي تيز ڪرڻ ۽ چيف سيڪريٽري کي  اي ٽي سيز جي 10 نين عمارتن جي تعمير وارو ڪم تيز ڪرڻ جي به هدايت ڪئي. اجلاس دوران وڏي وزير چيو ته ڪمند ۽ ڪڻڪ جي آبادگارن کي مناسب اگهه نه مليو آهي، جنهن سبب اهي پريشان آهن. هن چيف سيڪريٽري کي هدايت ڪئي ته آبادگارن کي رليف فراهم ڪرڻ لاءِ اپاءَ ورتا وڃن. خوراڪ کاتي جي سيڪريٽري اجلاس کي ٻڌايو ته هلندڙ سال 14 لک ٽن ڪڻڪ جي پيداوار لهڻ جو امڪان آهي، اجلاس دوران 11 لک ٽن ڪڻڪ خريد ڪرڻ ۽ ڪڻڪ جو سرڪاري اگهه 1300 رپيا في مڻ مقرر ڪرڻ جي به منظوري ڏني وئي. اجلاس دوران آءِ جي سنڌ ٻڌايو ته 2300 کان وڌيڪ افغانين کي گرفتار ڪري ڊي پورٽ ڪيو ويو آهي، وڏي وزير غيرقانوني طور ترسيل پرڏيهين خلاف ڪارروائي تيز ڪرڻ ۽ پوليس کي رينجرز سان رابطا وڌيڪ تيز ڪرڻ جي هدايت ڪئي. پلاننگ اينڊ ڊولپمينٽ کاتي جي سيڪريٽري اجلاس کي ٻڌايو ته سنڌ ۾ 1762 ترقياتي اسڪيمون هلي رهيون آهن جن تي 16.18 ارب رپيا خرچ ڪيا پيا وڃن ۽ انهن اسڪيمن مان 590 نيون اسڪيمون آهن. پلاننگ کاتي جي سيڪريٽري ٻڌايو ته آبپاشي کاتي ترقياتي بجيٽ مان 83 سيڪڙو رقم خرچ ڪري چڪو آهي، توانائي ۽ ٿرڪول تي 67-67 سيڪڙو رقم خرچ ٿي چڪي آهي. وڏي وزير ترقياتي اسڪيمون جلد مڪمل ڪرڻ جي هدايت ڪندي شارٽ ٽرم ڪڊنيپنگ کي روڪڻ لاءِ به اپاءَ وٺڻ جي هدايت ڪئي. اجلاس دوران ناڻي ۽ پلاننگ واري کاتي جي وزير مراد علي شاهه ٻڌايو ته ٿر  ڪول جي منصوبن تي خاص ڌيان ڏنو پيو وڃي، جڏهن ته وڏي وزير تعليم کاتي جي اسڪيمن کي جون تائين مڪمل ڪرڻ جي هدايت ڪئي. صوبائي وزير منظور وساڻ سموريون اسڪيمون عام چونڊن کان اڳ مڪمل ڪرڻ تي زور ڀريندي چيو ته ڪابه اسڪيم ٻن سالن اندر مڪمل ٿيڻ گهرجي، ڇاڪاڻ ته ماڻهو حڪومت جي ڪارڪردگي ڏسڻ چاهن ٿا. اجلاس دوران ڪجهه وزيرن جي غير موجودگي تي  وڏي وزير سخت ڪاوڙ جو اظهار ڪيو.

 

ضرب عضب آپريشن سان ملڪ مان دهشتگردي ختم ڪرڻ ۾ مدد ملي: آرمي چيف

اسلام آباد (اي پي پي) چيف آف آرمي اسٽاف جنرل راحيل شريف جيڪو قطر جي سرڪاري دوري تي آهي، سومر ڏينهن قطر رياست جي امير شيخ تميم بن حماد الثاني ۽ وزيراعظم ۽ گهرو وزير شيخ عبدالله بن نصير بن خليفه الثاني سان ڌار ڌار ملاقاتون ڪيون، آءِ ايس پي آر طرفان جاري ڪيل پڌرائي مطابق چيف آف آرمي اسٽاف قطر جي دفاعي معاملن واري وزير ڊاڪٽر خالد بن محمد العطيه ۽ قطري اميري لينڊ فورس جي ڪمانڊر ميجر جنرل محمد بن علي الغنيم سان پڻ ڌار ڌار ملاقات ڪئي، قطر جي امير ۽ وزيراعظم سان ملاقاتن دوران علائقائي سلامتي ۽ ٻطرفي دفاعي سهڪار تي ڳالهه ٻولهه ٿي، ان موقعي تي افغانستان ۾ سرچاءُ واري عمل لاءِ قطر آفيس ذريعي سهولت بابت پڻ تفصيلي ڳالهه ٻولهه ٿي، ان موقعي تي قطري قيادت پنهنجي ان ڳالهه کي ورجايو ته پاڪستاني قطر گڏيل ڀائپي وارن لاڳاپن سان ڳنڍيل آهن، جيڪي وقت گذرڻ سان گڏ دفاعي ۽ گڏيل مفاد وارن لاڳاپن ۾ تبديل ٿيندا پيا وڃن، ٻنهي ملڪن جي هٿياربند فوجن وچ ۾ دفاعي لاڳاپن جي سطح تي اعتماد جو اظهار ڪندي ٻنهي ملڪن جي اڳواڻن سهڪار کي وڌيڪ هٿي وٺرائڻ تي زور ڏنو، ملاقاتن دوران قطر جي قيادت علائقائي استحڪام جي حوالي سان پاڪستان جي ڪردار جو اعتراف ڪندي دهشتگردي جي خاتمي ۽ خطي ۾ امن لاءِ پاڪستاني فوج جي ڪوششن جي واکاڻ ڪئي.

 

نيب آرڊيننس آڻڻ حڪومت لاءِ خطرناڪ هوندو: خورشيد شاهه

اسلام آباد(بيورو) قومي اسيمبلي ۾ مخالف ڌر جي اڳواڻ سيد خورشيد شاهه جو چوڻ آهي ته نيب آرڊيننس آڻڻ حڪومت لاءِ خطرناڪ ثابت ٿيندو،ان لاءِ نوازشريف کي وقت جي حساب سان سوچڻو پوندو.پارليامنيٽ هائوس ٻاهريان ميڊيا سان ڳالهائيندي قومي اسيمبلي ۾ مخالف ڌر جي اڳواڻ خورشيد شاهه جو چوڻ هو ته نيب آرڊيننس آڻڻ حڪومت لاءِ خطرناڪ هوندو،ڇو ته هاڻي ڪا به پارٽي نيب آرڊيننس جي حمايت نه ڪندي ۽ جيڪا به پارٽي انهيءَ آرڊيننس جي حمايت ڪندي ته عوام انهيءَ کي نه رڳو چور سمجهندي پر جيڪڏهن آرڊيننس قرآن پاڪ جي نظر ۾ آندو ويو تڏهن به عوام انهيءَ کي مڃڻ کان انڪار ڪندي.سندس چوڻ هو ته هي وقت نيب آرڊيننس آڻڻ جو ناهي،ان لاءِ نوازشريف کي وقت سان گڏ هلڻو پوندو ۽ بل جي حمايت نه ڪرڻي پوندي.قومي اسيمبلي ۾ مخالف ڌر جي اڳواڻ سيد خورشيد شاهه جو چوڻ هو ته آدم شماري ۽ گهر شماري کي روڪڻ نه گهرجي ۽ جيڪڏهن آدم شماري جي لاءِ 3 لک فوج نه ٿي ملي ته ٻن مرحلن ۾ آدم شماري ڪرائي وڃي.جڏهن ته پهرين مرحلي ۾ سنڌ ۽ بلوچستان ۾ آدم شماري ڪرائي وڃي ۽ ٻئي مرحلي ۾ پنجاب ۽ خيبرپختون خوا ۾ آدم شماري ڪرائي وڃي.

 

 

ماضي ۾ ڪيترن ئي سياسي ماڻهن انتقامي ڪارروائين تي روئي ڏنو هو ۽ سياسي ڪارڪن شرمند ٿيا هئا:مولا بخش چانڊيو

ڪراچي (مانيٽرنگ ڊيسڪ) وڏي وزير جي اطلاعات بابت صلاحڪار مولا بخش چانڊيو چيو آهي ته ماضي ۾  ڪيترن ئي سياسي ماڻهو انتقامي ڪارروائين تي روئي ڏنو هو ۽  سياسي ڪارڪن شرمند ٿيا هئا. هڪ خانگي ٽي وي سان ڳالهائيندي مولا بخش چانڊيو چيو ته  وفاقي گهرو وزير چوڌري نثار سياسي ڪارڪن ناهي، سندس ڪلاس روم به الڳ هو. هن چيو ته ميان صاحب ۽ سندس ٻارڙن تڪليفون برداشت ڪيون آهن، گهرو وزير کي نواز شريف جي تڪليفن  جو احساس ڪئين ٿيندو؟. سندس چوڻ هو ته صوبائي حڪومت امن امان جي حوالي سان جوڳا قدم کڻي رهي آهي، ڪراچي ۾ ڏوهي سرگرميون گهٽجي ويون آهن.

 

سـُپريم ڪورٽ، هڪ واقعي جي ٻي ايف آءِ آر داخل ڪرائڻ واري ڪيس ۾ 8 ليويز اهلڪارن جون درخواستون خارج ڪري ڇڏيون

اسلام آباد (بيورو) سـُپريم ڪورٽ، هڪ واقعي جي ٻي ايف آءِ آر داخل ڪرائڻ واري ڪيس ۾ 8 ليويز اهلڪارن جون درخواستون خارج ڪري ڇڏيون آهن. چيف جسٽس، جسٽس انور ظهير جمالي جي سربراهي ۾ سپريم ڪورٽ جي 5 رڪني لارجر بينچ هڪ واقعي جي ٻي ايف آءِ آر داخل ڪرائڻ خلاف درخواست تي ٻڌڻي ڪئي. درخواستگذار جي وڪيل دليل ڏيندي چيو ته قانون موجب هڪ واقعي جي ٻي ايف آءِ آر جو ڪو به وجود ناهي. جسٽس امير هاني مسلم ريمارڪس ڏنا ته جيڪڏهن پوليس حقيقتن جي ابتڙ ڪا ايف آءِ آر داخل ڪري ته پوءِ متاثر ڌر ڇا ڪري سگهي ٿي. ليويز اهلڪارن جي وڪيل دليل ڏيندي چيو ته پوليس خلاف ڪارروائي جي درخواست داخل ڪرائي سگهجي ٿي، ان تي جسٽس خلجي عارف ريمارڪس ڏيندي چيو ته پوليس خلاف ڪارروائي سان ايف آءِ آر تي ڪو به اثر نه پوندو. جسٽس ثاقب نثا ريمارڪس ڏنا ته هڪ واقعي جون ٽي ايف آءِ آر به داخل ٿي سگهن ٿيون.  عدالت، دليل مڪمل ٿيڻ بعد 8 ليويز اهلڪارن جون درخواستون خارج ڪري ڇڏيون آهن. واضح رهي ته ليويز اهلڪارن سان مبينا مقابلي ۾ حافظ جان شخص مارجي ويو هو، جنهن بعد اهلڪارن خلاف ڪيس داخل ڪيو ويو هو.

 

ڪجهه ماڻهو عمران خان جا ڪن ٿا ڀرين ۽ پوءِ هو ڳالهائڻ شروع ڪري ٿو: سعد رفيق

لاهور (م.ڊ) ريلوي واري وفاقي وزير خواجا سعد رفيق چيو آهي ته ريلوي ڪارخانن کي پوري رفتار سان ڪم ڪرڻ گهرجي، ڇو ته هڪ هڪ شفٽ سان ڪم نه هلندو، 16 ڪلاڪ ڪم ڪيو ته ان جو معاوضو به ڏنو ويندو، لاهور ۾ ريلوي بابت اجلاس کي خطاب ڪندي ۽ ميڊيا سان ڳالهائيندي سعد رفيق چيو ته جيڪڏهن پشاور ۾ ريلوي پٽڙي ٺاهي وڃي ته طورخم تائين اها پٽڙي ڪيئن پهچندي؟ جيڪڏهن اسان وٽ وڌيڪ جاءِ هوندي ته ڪي پي ڪي کي به ڏينداسين. هن چيو ته خيبرپختونخوا اسان کي لکي ڏئي ته ان کي ٻٽي ٽريڪ جي ضرورت ناهي، وفاقي وزير جو چوڻ هو ته پشاور ۾ ريلوي جي ايراضي بابت وڌيڪ ڳالهه ٻوله نه ٿي ٿي سگهي، ڇو ته جيڪڏهن ايراضي هجي ها ته ڏئي ڇڏيون ها. خواجا سعد رفيق چيو ته ڪجهه ماڻهو عمران خان جي ڪنن ۾ سرٻاٽ ڪن ٿا ۽ پوءِ هو ڳالهائڻ شروع ڪري ٿو، هو سياست نه پر ڪم ڪري.

 

اليڪشن ڪميشن پاران ملڪي تاريخ ۾ پهريون ڀيرو اليڪٽرانڪ ووٽنگ مشين جي استعمال لاءِ تياريون شروع

اسلام آباد (بيورو) اليڪشن ڪميشن، ملڪي تاريخ ۾ پهريون ڀيرو اليڪٽرانڪ ووٽنگ مشين جي استعمال لاءِ تياريون شروع ڪري ڇڏيون اهن، ان سلسلي ۾ آڇون پڻ گهرايون ويون آهن.اليڪشن ڪميشن جي ذريعن موجب،  ملڪي تاريخ ۾ پهريون ڀيرو اليڪٽرانڪ ووٽنگ مشين جون تياريون شروع ڪيون ويون آهن، جنهن لاءِ آڇون طلب ڪيون ويون آهن ۽  پهرين مرحلي ۾ 4 سئو مشينن جي خريداري لاءِ تياريون ڪيون ويون آهن. ذريعن جو چوڻ آهي ته اليڪٽرانڪ ووٽنگ مشين جو استعمال پائليٽ پراجيڪٽ طور ڪيو ويندو ۽ ان سلسلي ۾ آڇون اليڪشن ڪميشن ۽ چونڊ سڌارن واري ڪميٽي جي گڏيل سفارشن کانپوءِ پيش ڪيون وينديون. ذريعن موجب، اليڪٽرانڪ ووٽنگ مشين جو استعمال هلندڙ سال ڪنهن به ننڍي چونڊ دوران ڪيو ويندو. اليڪشن ڪميشن، نادرا، آءِ ٽي واري وزارت، اليڪٽرانڪ ووٽنگ مشين جي استعمال ۽ ٽڪنيڪي تجويزن تي به متفق آهن.

 

ڪراچي کان حيدرآباد ايندڙ ڪار سپر هاءِ وي تي ڪلٽي،3 ڄڻا فوت،2 زخمي

ڄامشورو (اي پي پي) ڄامشوري ۾ ڪار ڪلٽي ٿيڻ جي نتيجي ۾ پي ۽ پٽ سميت هڪ ئي خاندان جا 3 ڀاتي فوت ۽ هڪ ٻارڙي سميت ٻه زخمي، تفصيل مطابق نوري آباد ويجهو سپر هاءِ وي تي تيز رفتار ڪار ڪلٽي ٿيڻ جي نتيجي ۾ بنٽي، ڪالب، ۽ حوا فوت ٿي ويا جڏهن ته جاويد ۽ رخسانا زخمي ٿي پيا، فوتين جا لاش ۽ زخمين کي سول اسپتال حيدرآباد منتقل ڪيو ويو آهي، ڪار سوار ڪراچي کان حيدرآباد اچي رهيا هئا ته سندن ڪار ٽاءِ راڊ ٽٽي پوڻ جي نتيجي ۾ ڊرائيور جي قابو مان نڪري ڪلٽي ٿي پئي جنهن سبب اهو حادثو پيش آيو. اي