تازيون خبرون

Daily Archives: February 19, 2016

سياست جا بدلجندڙ رنگ: واحد پارس هيسباڻي

انڊلٺ جا ته 7 رنگ هوندا آهن، پر سياست جا ڪيترائي رنگ ٿين ٿا، جيڪي پل پل ۾ تبديل ٿيندا رهن ٿا، جيڪو رنگ صبح جو آهي اُهو منجهند تائين برقرار رهي، ان جي ڪابه ضمانت نه ٿي هجي، شام ۽ رات ته گهڻي پري جي ڳالهه آهي. رات جو اهي رنگ تبديل ٿيڻ جا وري وڏا مثال رهيا آهن. اِهو ئي آهي جو سياست سان لاڳاپيل ماڻهو ايترو اسپيس ضرور رکن ٿا جو اوچتي بدلجندڙ رنگ سان ايڊجسٽ ڪري سگهن يا ان کي منهن ڏئي سگهن.

گذريل ڪجهه ڏينهن کان هڪ پاسي موسم پنهنجا عجيب رنگ بدلائڻ شروع ڪيا آهن، جنهن هر ماڻهوءَ کي پنهنجي لپيٽ ۾ آڻي ڇڏيو آهي، کنگهه کڙڪي کان ڪير به بچيل ڪونهي، ته ٻئي پاسي سياست به نوان رنگ ڏيکارڻ شروع ڪيا آهن ۽ هاڻي ان جا منظر وزيراعظم هائوس تائين نظر اچي رهيا آهن. ٻه ڏينهن اڳ پاڻ واري وزيراعظم نيب جي حوالي سان جن خيالن جو اظهار ڪيو آهي، ان ڪيترن کي ئي حيران ۽ پريشان ڪري ڇڏيو آهي ته نيٺ اوچتو ئي اوچتو اهڙو ڇا ٿي ويو آهي يا ڇا ٿيڻ وارو آهي جو ميان صاحب جي جذبات جو پارو اِن حد تائين پهچي ويو آهي، نه ته هِن کان اڳ ۾ جڏهن اهڙي قسم جون دانهون سنڌ سرڪار جي صفن مان ٿينديون هيون ته ان کي هڪ وڏي ٽهڪ سان نظرانداز ڪيو ويندو هو… وزيراعظم ته ڳالهه ڪري ڇڏي پر ان کانپوءِ وزيرن مشيرن جي هڪ پوري لاٽ جيڪا تشريح ڪرڻ شروع ڪئي آهي اُها جتي دلچسپ آهي اتي بحث جا نوان سلسلا شروع ڪندڙ به آهي. پنجاب جي قانون واري وزير راڻا ثناءُ الله جنهن جو اندازِ بيان شروع کان ئي نرالو رهيو آهي، ان ته ٻه هٿ اڳتي وڌي ايترو به چئي ڇڏيو آهي ته پنجاب سنڌ ناهي جو نيب کي جيئن وڻي ائين ڪارروائي ڪرڻ ڏينداسين…. ان ڳالهه جو ٻيو مطلب اِهو آهي ته نيب کي سنڌ ۾ ته سڀ ڪجهه ڪرڻ جي مڪمل اجازت آهي پر پنجاب ۾ کيس اهڙي قسم جي ڪابه اجازت نه آهي، ان ڪري هوشياري وٺي…  نواز ليگ جيڪا وفاق ۾ يقين رکڻ جي دعويدار پارٽي آهي ۽ وري وري اِهي وضاحتون ڪندي رهي آهي ته هي صوبائيت تي يقين نه ٿي رکي، هن لاءِ سڀ صوبا برابر آهن، ڪير به گهٽ يا وڌيڪ ناهي، پوءِ اتي سندس حڪومت هجي يا نه هجي، پر راڻا صاحب جي بيان کانپوءِ ڳالهه ڳُڙ ٿي وئي آهي ۽ سمجهه ۾ نه پيو اچي ته ’پردي ڪي پيڇي ڪيا هي…‘

سنڌ سميت باقي ٽن صوبن جو عوام جيڪو سالن کان اِهي دانهون ڪندو رهيو آهي ته نواز ليگ جي پنجاب کان اڳتي نظر ئي نه ٿي وڌي، کيس صرف ۽ صرف پنجاب جي ڳڻتي رهي ٿي، ترقياتي اسڪيمون هجن يا عوام کي رليف ڏيڻ وارو ڪو ٻيو معاملو هجي، ان ۾ پنجاب ئي پهرئين ترجيح تي آهي. تازي صورتحال کانپوءِ اهڙي قسم جي دانهن کي وزن ملي وڃي ٿو. راڻا صاحب واري هِن انداز هڪ ڀيرو ٻيهر ڇوٽي ميان جي اُها ڳالهه ياد ڏياري ڇڏي آهي، جيڪا هُن رومال ۾ ڍڪيل لفظن ۾ طالبان سان مخاطب ٿي چئي هئي،جنهن جو ڦري سري مطلب اهو ئي پئي نڪتو  ته پنجاب توهان جو دشمن ناهي، اسان توهان جا پنهنجا آهيون، ان ڪري اسان تي حملو نه ڪريو… ڳالهه رڳو اتي به دنگ نه ٿي ڪري، پر اهڙي قسم جا ڪيترائي موقعا آيا آهن، جنهن ۾ پاڻ واري وڏي ڀاءُ جون سدائين پنج ئي آڱريون گيهه ۾ رهيون آهن، پوءِ اُهو معاملو اين ايف سي ايوارڊ جو هُجي، پاڻي جي ورهاست جو هجي يا ڪو ٻيو هجي، پر پاڻ واري ادا وڏي جا هميشه وارا نيارا رهيا آهن. ائين به ناهي ته اِهي سموريون نوازشون صرف نواز سرڪار ۾ ئي مٿس ٿينديون رهيون آهن پر دور ڪهڙو به هجي، پوءِ اُهو جمهوري يا غير جمهوري پر بسن تي لکيل ليڊيز فرسٽ واري جملي وانگر پنجاب سدائين فرسٽ تي ئي رهيو آهي، اهي ساڳيا منظر اڃا به نظر اچي رهيا آهن. ٻين صوبن ۾ ڇا به ٿئي ٿو، پنجاب سان واسطو رکندڙ حڪمرانن جو ان سان نه ته ڪو واسطو آهي ۽ نه ڪا دلچسپي، بس ساڊي پنجاب دا خير هووي. ان رويي ئي باقي صوبن ۾ محرومي واري احساس کي نه رڳو طول ڏنو آهي پر ان جا مختلف موقعن تي مختلف صورتن ۾ ري ايڪشن پڻ سامهون ايندا رهيا آهن.

نيب جيڪا گذريل ڪيتري ئي عرصي کان ڪرپشن خلاف ڪارروائين ۾سرگرمِ عمل آهي، ان نيٺ اوچتو اهڙو ڇا ڪيو جو ان جو ري ايڪشن ڊائريڪٽ وزيراعظم هائوس مان اچي ويو؟ ان بابت جيتوڻيڪ سياسي مارڪيٽ ۾ ڪيتريون ئي ڪهاڻيون گردش ڪري رهيون آهن پر مڪمل طور تي اهڙا ڪي به تفصيل سامهون ڪونهن، جنهن جي بنياد تي ائين چئي سگهجي ته اصل ڳالهه هي آهي. سياسي مارڪيٽ ۾ جيڪي خبرون گردش ڪري رهيون آهن، انهن ۾ هڪڙي خبر اِها به آهي ته نيب نه رڳو نواز ڪابينا جي ڪجهه اهم وزيرن جا کاتا کولڻ جي ڪوشش ڪري رهي آهي، پر خود ميان صاحب جا اُهي فائيل به وري کولڻ چاهي ٿي، جيڪي مشرف دور ۾ ٺهيا هئا، هاڻي خبر ناهي انهن خبرن ۾ ڪيتري صداقت آهي، بهرحال ڪا نه ڪا ڳالهه ضرور آهي، جيڪا ايڏي شديد ردعمل جو ڪارڻ بڻي آهي. ان ردعمل مخالف ڌرين کي ڄڻ ته ڳالهائڻ جو نئون موقعو ڏئي ڇڏيو آهي، جيڪي ڪالهه تائين نيب جا ستايل محسوس ٿي رهيا هئا ۽ ان جي ڪارروائين کي سياسي انتقام جو نالو ڏئي صوبائي خودمختياري مٿان حملو چئي رهيا هئا، هاڻي اُهي نيب جي تعريف ۾ پورا نه پيا پون ۽ اِهي مطالبا ڪري رهيا آهن ته ڪرپشن خلاف ڪارروائين وارو اِهو سلسلو وڌيڪ تيز ڪرڻ جي ضرورت آهي. ٻئي طرف اخباري رپورٽن مطابق نيب چيئرمين، ڊي جي نيب پنجاب کي ڪارروايون تيز ڪرڻ جو فري هينڊ ڏئي ڇڏيو آهي. ميان صاحب جنهن جي ماضي واري حڪومتي تڏا ويڙهه پٺيان مک سبب ادارن سان ٽڪراءُ وارو ڄاڻايو ٿي ويو، هڪ ڀيرو ٻيهر حالتون الائي ڇو هڪ نئين ٽڪراءَ طرف ويندي محسوس ٿي رهيون آهن. ان سلسلي ۾ ميان صاحب جو اِهو بيان به وڏو معنيٰ خيز آهي ته ”ووٽ عوام ڏيندو آهي ۽ حڪومت ڪيرائي ڪو ٻيو ڇڏيندو آهي، هاڻي اِهو سلسلو ختم ٿيڻ گهرجي…..“  هي پنهنجي نوعيت جو انتهائي معنيٰ خيز بيان آهي، جنهن جي پٺيان ڪا نه ڪا ڪهاڻي ضرور آهي، جيڪا اِن ري ايڪشن جو ڪارڻ بڻي آهي.

هڪڙي پاسي سياست جو اِهو رنگ آهي ته ٻئي طرف وري ايم ڪيو ايم اڳواڻن طرفان ايندڙ 15 ڏينهن اهم قرار ڏيڻ ۽ عوام کي کاڌي پيتي جون شيون ذخيرو ڪرڻ واري صلاح ڏيڻ واري بيان پڻ بحث جا نوان سلسلا شروع ڪري ڇڏيا آهن. ان سلسلي ۾ هڪ نئون رنگ وري نيويارڪ مان اڏامندو اچي پهتو آهي، خبرون آهن ته آصف علي زرداري ۽ بلاول ڀٽي زرداري ۾ هڪ اهم ملاقات ٿي آهي، جنهن ۾ پارٽيءَ جون سموريون واڳون بلاول حوالي ڪندي، کيس صوبائي توڻي علائقائي قيادت تبديل ڪرڻ جا اختيار به ڏنا ويا آهن، اِهو رنگ ڪيترو رچي ٿو ۽ ان مان ڪهڙا نوان رنگ جڙي سامهون اچن ٿا، اِهو اڳتي هلي ڏسڻو آهي. بهرحال هينئر پاڻ واري پياري پاڪستان جو سياسي ماحول ڏاڍو دلچسپ به آهي ته سمجهه ۾ نه ايندڙ به آهي. هڪڙو ڪوهيڙو آهي، جيڪو ماحول تي ڇانيل آهي، ڪوهيڙو لهڻ کانپوءِ منظر ڪهڙا نظر اچن ٿا، سڀ ڪنهن کي ان جو انتظار آهي… اهي سڀ شيون پنهنجي جڳهه تي، بس جمهوريت ۾ يقين رکندڙ ماڻهن جي هڪڙي ئي خواهش آهي ته شل جمهوريت جو خير هجي.

wahidparas@yahoo.com

 

ميان صاحب، نيب ۽ پڇ جون ڳالهيون: منان چانڊيو

17 فيبروري وارين اخبارن ۾ وزير اعظم ميان نواز شريف جا لفظ ۽ جملا وڏين شهه سرخين ۾ ڇپيا آهن، جنهن ۾ هن فرمايو آهي ته نيب وارا سرڪاري آفيسن ۽ گهرن ۾ گھڙي شريف ۽ عزتدار، معصوم ۽ معززين کي تنگ ٿا ڪن، نيب چيئرمين نوٽيس نه ورتو ته ڪارروائي ڪندا سين، ساڳي ڏينهن وارين اخبارن ۾ چوڌري نثار علي جي حوالي سان هڪ ٻئي خبر شايع ٿي آهي ته پاڪستان ۾ داعش جي وجود کان انڪار نه آهي،  خبر آهي ته ڪنهن جي پڇ تي لت ڏني اٿم، اهڙي ريت 18 فيبروري تي وري اخبارن لاءِ پنجاب جي وزير قانون راڻا ثناءُ الله جي  حوالي سان اها خبر زينت بڻي آهي ته نيب کي ڪارروائي ڪرڻ ڪونه ڏيندا سين،جتي راڻا صاحب جي اهڙو فرمودو ملڪ جي ماڻهن لاءِ توجهه ۽ حيرت جا منظر  بنيا آهن، اتي وري ڀائي لوگن عوام کي مفت ۾ مشورو ڏنو آهي ته 15 ڏينهن تائين هڪ شهر کان ٻئي شهر تائين سفر نه ڪن، ۽ روز مرهه جو راشن وغيره گڏ ڪري رکن، مزي جي ڳالهه  ته ڀائي صاحبن جي اهڙي صلاح جي جواب ۾ رينجرز وارن چيو آهي ته ڪنهن کي به ڏهڪاءُ پکيڙڻ نه ڏنو ويندو. مٿي ڄاڻايل ڳالهين، خبرن، صلاحن، دڙڪن، دهمانن، فرمانن واري ڀرمار ۾ مٺڙي ملڪ جا  مسڪين ماڻهون،  وڏن وسوسن، وهمن، ڀون، الڪن ۽ ارمانن ۾ وڪوڙجي ويا آهن، ۽ ويچارن پورهيت پهنوارن جيڪي ڳڀي گرهه صحت، امن امان ۽ تعليم جي ڳولا ۾ پريشان، حيران ۽ سرگردان آهن، انهن کي اها خبر ڪونه ٿي پوي ته آخرڪار پاڻ واري پياري پاڪستان جي حڪمرانن، سياستدانن، عسڪري ادارن وارن ۽ ڪامورن کي ڇا ٿي ويو آهي جو روز روز اهڙيون اهڙيون ڳالهيون ڪن ٿا يا قدم کڻن ٿا جنهن ڪري هڪ ته ملڪ جي سياسي، معاشي، اقتصادي ۽ سماجي حالت اڳئين کان به وڌيڪ خراب ٿيندي پئي وڃي، ٻيو ته ڪروڙين ديس واسي غيريقيني ابهام ، ٻڏتر ۽ هاڻي ڇا ٿيندو واري ڪيفيت ۾ قابو ٿي رهيا آهن.

ڪيڏي نه تعجب خيز، عجيب و غريب ڪهاڻي آهي ته جڏهن نيب، ايف آءِ اي ۽ ٻين وفاقي ايجنسين سنڌ ۾ پ پ سان تعلق رکندڙ سياستدانن، چونڊيل عيوضين، بااثر همراهن ۽ وڏين آفيسرن خلاف ڪرپشن، اقرباپروري، سفارش خوري ۽ پنهنجا نوازيو پاليسي جهڙن عوام آزاريندڙ ڪبيرهه گناهه ڪندڙن خلاف وقتائتا ۽ موثر قدم کنيا ته ميان صاحب ۽ سندس همنوائن جا چهرا ٻهڪي پيا ۽ هو هر هر فرمائين پيا ته ملڪ مان خاص ڪري سنڌ مان رشوت خوري جهڙي ٻه مهين بڇڙي بلا جي پاڙ پٽي کيس برباد ڪيو ويندو، ۽ جتي نون ليگ وارا اهڙا سرها ٿي  ان جي دفاع لاءِ ڏينهن رات هڪ  ڪري رهيا هئا، اتي وزيراعلى هائوس گهر سنڌ کان بلاول هائوس ۽ دبئي واري همراهه تائين وڏو مانڌاڻ مچي ويو هيو، ۽ سمورن همراهن ڪيل گناهن جو ڪفارو ادا ڪرڻ لاءِ حيلا بهانا هلائي ڪي تڪڙيون ترڪيبون ترتيب ڏيئي رهيا هئا ۽ گڏوگڏ منهن مٿو پٽي رهيا هئا، ته جيڪڏهن مسمات رشوت سڳوري سنڌ ۾ ديرو ڄمايو ويٺي آهي ته وري پنجاب جا سياستدان ۽ آفيسر ڪهڙا مسجدن جا ڪک آهن، جيڪڏهن ڀتاخورن، دهشتگردن، سماج دشمنن جا آماجگاهه سنڌ ۾ آهن ته وري پنجاب ۾ ڪٿي رڍ، بگهڙ يا شينهن ٻڪري هڪ گهاٽ تان پاڻي پي رهيا آهن، جيڪڏهن سنڌ ۾  بئڊ گورننس آهي ته وري پنجاب ۾ گوڊ گورننس جي برڪت ۽ فيض سان کير ۽ ماکي جون نديون پيون وهن جيڪڏهن سنڌ ۾ مارئي جي ملڪ ٿر  ۾ ابهم ٻارڙا بک ۽ بيماري وگهي  مري رهيا آهن ته وري پنجاب جي گادي واري شهر زنده  دلين يا تخت لاهور جا ٻارڙا ڪهڙن بهشت جي جهولن ۾ جهولي رهيا آهن.  چوڻ جو مطلب ته اسان جي سدا ملوڪ ۽ سدابهار سياستدان هڪ ٻئي جا ڪڇا چٺا عرف پتا پڌرا ڪرڻ جا ماهر آهن، ۽ همراهن جو سڄو زور هڪ ٻئي جون ڪمزوريون ۽ عيب  ڳولهڻ تي هوندو آهي، باقي يارن جو عوام جي فلاح بهبود سان ڪوئي تعلق نه هوندو آهي، ۽ نه وري مٿن اها ڪا ذميواري عائد ٿئي ٿي، خير اها ته هئي پيپلن ۽ ليگلن جي ڏي سوال وٺ جواب ٻولي يا بي سري راڳڻي پر اصل ڳالهه اها آهي ته ميان صاحب جڏهن کان سياست جي آکيڙي ۾  پير پاتو آهي يا وري اقتداري سيج تي قدم مبارڪ رکيا آهن ته  همراهه ۾ برداشت ڪرڻ جو مادو يا سگهه مڙئي ڪجهه گهٽ هوندي آهي، ٻي ڳالهه ته ڪجهه ڏينهن کان وٺي چوڌري نثار علي ڪنهن جي پڇ تي لت ڏيڻ جي ڳالهه ڪري رهيو آهي، ۽ ان ڪهاڻي کي هن وقت خود ساخته بڻيل شرجيل انعام ميمڻ به ورجائي رهيو آهي، اسان جي سنڌي سماج ۾ لفظ پڇ جون ڪيتريون ئي معنائون ۽ تشريحون ٿينديون آهن،  مثال طور تي لومڙي جو پڇ ، هو ويچاري ڀڄڻ يا تيز ڊڪڻ جي معاملي ۾ مڙئي ڪجهه کٽل هوندي آهي، ۽ جڏهن ڪو ڪتو يا ڪو خونخوار جانور هن جو کائڻ يا مارڻ لاءِ پيڇو ڪندو آهي ته، هو وقتي طور تي پنهنجي پڇ کي هڪ طرف موڙي پاڻ ٻي طرف نڪري ويندي آهي، ٻيو پڇ آهي ڪتي جو  لاءِ عام چوڻي آهي ته اهو  پڇ وينڊو يا ڪرونڊو ٿيندو آهي، ۽ چوڻ وارا چون ٿا ته ڪتي جي پڇ کي ٻارهن مهينا نڙ ۾ وڌو ويو ۽ جڏهن ان کي ٻاهر ڪڍيو ويو ته اهو پهرين وانگر وينڊو يا ڪرونڊو هيو، نه جو نه سڌو ٿيو، هڪڙي وري اهڙي پڇ جي ڳالهه ڪئي ويندي آهي مثالطور تي ٻه ماڻهو پاڻ منجهه ڪنهن معاملي تي وڙهي پون ته هڪڙو فوري طور تي جيڪو هن ٻئي کان قبيلائي يا ذات جي عددي حساب کان اڪثيريت ۾  هوندو آهي اهو چوندو آهي ته خبردار مونسان ٿو سينو ساهين، منهنجو پڇ ڊگهو ٿئي، ساڳي ريت وري ڪنهن لاءِ چئبو آهي ته فلاڻي جو پڇ ڏانڊ آهي، يا جنهن جو پڇ کڻ ته اهو مادي. مٿي پاڻ جن پڇن جي ڳالهه ڪئي انهن مان مراد اها آهي ته جيڪي ماڻهو يا جيڪي فرد يا جيڪي ڌريون ٻين لاءِ آزاريندڙ يا نام نهاد ڏاڍا مڙس هجن انهن جي تشبيح اهڙن پڇن سان ڏني ويندي آهي، سو پاڻ کي خبر ڪونه ٿي پئي ته چوڌري نثار ۽ ٻي سنگت ڪهڙن پڇن جي ڳالهه ٿا ڪن، ها  باقي رهيو سوال ڀائي صاحبن جي ڏنل مفت مشوري جو ته پاڻ کي خبر ڪونه ٿي پئي ته يارن کي ڪٿان الهام ٿيو آهي ته پندرهن ڏينهن منجهه ملڪ ۾ وڏو ڪو سياسي طوفان يا خدا نه ڪري ڪا خون خرابي ٿئي  جنهن ڪري ماڻهو سفر کان پرهيز ڪن ۽ کاڌ خوراڪ جو سامان ذخيرو ڪري رکن، ممڪن آهي ته ڀائي لوگن وٽ خزانن جا کرار آهن ۽ خرزين ڀريل آهن ان ڪري پندرهن ته ڇا پر مهينن تائين موج مستي ۾ رهي سگهن ٿا، باقي ويچارا سنڌي ماڻهو جن جو گذر سفر ڀٽائيءَ جي ان شعر جي هڪ سٽ وانگر ته ،

“ آڻين ۽ چاڙهين ڏٿ ڏيهاڙي سومرا ”

اهڙن ماروئڙن جو ڇا ٿيندو ؟ آخر ۾ ملڪ ۽ سنڌ جا ماڻهو اهو چڱي ريت سمجهن ۽ ڄاڙين ٿا ته مها ڪرپشن واري معاملي پيپلن ۽ ليگلن  کي مڙئي ڪجهه سوڙهو ڪيو آهي، انڪري ڌريون ئي هينئر گڏجي ڪورس جي انداز ۾ نيب، ايف آئي اي ۽ ٻين وفاقي ايجنسين کي برو ڀلو چئي پنهنجي ڳچي ڇڏائڻ جي چڪر ۾ آهن ملڪ جي ڪروڙين ماڻهن جي اها تمنا ۽ خواهش آهي ته ملڪ جون اعلى عدالتون ۽ عسڪري قوتون پنهنجي پيرن تي ڄمي بيهي ملڪ مان ماڻهو مار دهشتگردن ۽ معاشي دهشتگردن جو هڪ ئي وقت صفايو ڪن. ته جيئن ڪروڙين ماڻهو ٻنهين مصيبتن مان نجات حاصل ڪري سک جو ساهه کڻن.

 

ملڪ ۾ احتساب وارو عمل جاري رهڻ گهرجي…..

ٻه ڏهاڙا اڳ ڪارڪنن کي خطاب ڪندي وزيراعظم نواز شريف چيو هو ته نيب حڪومتي آفيسرن کي خوفزده ڪري رهي آهي، جنهن سبب اُهي ڪو به فيصلو ڪرڻ کان ڊڄن ٿا. سندس چوڻ هو ته نيب حڪومتي آفيسرن کي ڊڄائي رهي آهي ۽ اُنهن جي ڊيوٽيءَ ۾ رڪاوٽون وجهي رهي آهي. جڏهن ته قومي اسيمبليءَ ۾ مخالف ڌر جي اڳواڻ سيد خورشيد شاهه پڻ وزيراعظم جي ان ڳالهه جي تائيد ڪندي چيو هو ته نيب کي پنهنجو ڪم صحيح طريقي سان ڪرڻ گهرجي.سياسي سوچ رکندڙ توڻي ملڪ ۾ احتساب جي اُميد ڪندڙ ماڻهن وزيراعظم جي تنبيهه تي ڇتي تنقيد ڪندي اُن کي احتساب واري عمل ۾ رڪاوٽ قرار ڏنو آهي. اها هن سماج جي بدقسمتي آهي جو هتي غريبن لاءِ هڪڙو ته اميرن لاءِ ٻيو قانون رهيو آهي. غريب ورهين تائين ڪنهن اڻ ڪيل ڏوهه جي سزا ۾ قيد ڪاٽيندا رهندا آهن ته ٻئي طرف ملڪ جي ڀينگ ڪندڙ اليٽ ڪلاس جو ڪو وار به ونگو ناهي ڪري سگهندو! اهڙا ئي عڪس مٿي ڄاڻايل خبرن مان پسي سگهجن ٿا. جيستائين سنڌ ۾ نيب ڪارروايون ڪري رهي هئي ته اُهي عين انصاف پٽاندر هيون، جڏهن اُن پنجاب ڏانهن پير سورڻ شروع ڪيا ته ملڪ جي اهم عهدي تي ويٺل انتهائي ذميوار شخص ذري گهٽ تڙيءَ وارو لهجو اختيار ڪندي نيب کي پنهنجي سائيز ۾ رهڻ جي تلقين ڪئي. هئڻ ته ائين گهربو هو جو ڪنهن ٻئي ڏانهن هٿ وڌائڻ کان پهريان حڪمران ڌر نيب کي اِها آڇ ڪري ها ته احتساب جي شروعات کانئن ۽ سندن ساٿين کان ڪئي وڃي ته جيئن مخالفن کي شڪايتن جو موقعو نه ملي. جيڪڏهن حڪمران ڌر جا هٿ صاف آهن ۽ اُها ڪنهن به مامري ۾ پاڻ کي ميرو نٿي سمجهي ته پوءِ اُن کي اهڙي ڪنهن به عمل کان قباحت محسوس نه ڪرڻ گهرجي ها، پر هتي قصو اُلٽ آهي. جيستائين نيب ٻين جو احتساب ڪري رهي هئي، تيستائين اُها درست هئي، پر جڏهن اُن حڪمران ڌر جي ويجهن ماڻهن ۾ هٿ وجهڻ جي ڪوشش ڪئي ته اُها مياري ٿي پئي.اسين سمجهون ٿا اهو ٻٽو معيار اڪثريت لاءِ مايوسيءَ جو ڪارڻ بڻبو. اڳ ئي ننڍن صوبن ۾ محروميءَ جو عنصر عام رهيو آهي ته انهن کي هر معاملي ۾ سدائين ڀت سان لڳائڻ جي ڪوشش ڪئي ويندي آهي، ويتر جو احتساب واري معاملي ۾ به اُهي ٻيائيءَ جو عنصر ڏسندا ته سندن محروميءَ جو وڌڻ فطري هوندو. جيڪڏهن اسين هڪ صاف سٿري ۽ سڌريل سماج جي تقاضا ڪريون ٿا ته پوءِ پنهنجن تي ڪک رکڻ واري روش ترڪ ڪرڻي پوندي. جيستائين اسان غلط کي غلط ڪوٺڻ جي جرئت نه ڌارينداسين، تيستائين سُڌاري جي ڪا به اُميد رکڻ ٻٻرن کان ٻير گهرڻ برابر آهي. اسان کي سمجهڻ گهرجي ته ٻٽي معيار هوندي سماج جو سڌارو ممڪن ناهي. ٿيڻ ته ائين گهرجي ته احتساب جي ان عمل کي اثرائتو بڻائڻ لاءِ نيب کي وڌيڪ بااختيار بڻايو وڃي ته جيئن ملڪ کي استحصالي طرف ڌڪيندڙن کان ازالو ڪري سگهجي. ان لاءِ نيب کي پڻ پنهنجي ڪردار ۾ شفافيت ڏيکارڻي پوندي. جيڪڏهن اُها يارن ۽ ڀوتارن سان هڪڙو ۽ ڪمزور توڻي هيڻن سان ٻيو رويو رکندي ته پوءِ لازمي طور اُن مٿان آڱريون کڄنديون.بهرحال اسين ملڪ ۾ احتساب واري عمل کي حقيقي بنيادن تي اڳتي وڌندو ڏسڻ گهرون ٿا ۽ اُن لاءِ سڀني ڌرين کان اها تقاضا ڪريون ٿا ته اُهي انهيءَ معاملي ۾ پنهنجو ڪردار ادا ڪن ته جيئن ملڪ ۾ بهتر سماج جي اڏاوت واري خواب کي حقيقت جو روپ ڏئي سگهجي.

 

مهمند ايجنسي ۾ سيڪيورٽي چيڪ پوسٽن  تي دهشتگردن جا حملا، 9 اهلڪار شهيد

پشاور(اي پي پي) لوئر مهمند ايجنسي ۾ دهشتگردي جي ٻن مختلف واقعن ۾ 9 خاصه دار شهيد ٿي ويا. پهريون واقعو اربع ۽ خميس جي وچ واري رات ڪڙپه ڪيمپ تعلقي پنڊيالي گنداپ روڊ تي ان وقت پيش آيو جڏهن اڻ ڄاتل دهشتگردن سيڪيورٽي چيڪ پوسٽ تي موجود خاصه دارن کي جديد اسلحي سان نشانو بڻايو. حملي جي نتيجي ۾ 7 خاصه دار موقعي تي شهيد ٿي ويا. شهيدن ۾ مراد خان، ملتاني، نصير خان، فرحاد خان،ابن امين، ذاڪر خان ۽ انوار خان شامل آهن. ٻيو واقعو درازي علائقي تعلقي يڪه غنڊ مهمند ايجنسي ۾ پيش آيو جتي موجود خاصه دار تاج ولي ۽ بلال خان جيڪي هڪ ٽيوب ويل تي ڪم ڪري رهيا هئا ته دهشتگردن انڌا ڌنڌ فائرنگ ڪري انهن کي شهيد ڪري ڇڏيو. اهو واقعو گذيل ڏينهن پيش آيو، شهيدن جا لاش خاڪي غلطئي اسپتال منتقل ڪيا ويا آهن. حملي آور موقعي تان فرار ٿي ويا.

 

سنڌ حڪومت عزير بلوچ سميت 23 خطرناڪ ڏوهارين لاءِ جي آءِ ٽي جوڙڻ جي منظور ڏئي ڇڏي

ڪراچي (اسٽاف رپورٽر) سنڌ جي وڏي وزير سيد قائم علي شاهه  23 سنگين ڏوهن ۾ ملوث ڏوهارين بشمول ويجهڙ ۾ گرفتار ڪيل عزير جان بلوچ جي لاءِ جوائنٽ انويسٽيگيشن ٽيمز (جي آءِ ٽيز) جوڙڻ جي منظوري ڏئي ڇڏي آهي. وزير اعليٰ هائوس مان جاري ٿيندڙ هڪ بيان ۾ سنڌ جي وڏي وزير 23 سنگين ڏوهارين ۾ ملوث ڏوهارين مسعود عالم عرف ڀولا چاچا، محمد اياز ولد عبدالقيوم، محمد حامد عرف پپو، سيد عظمت حسين عرف عظمت، محمد ارشد عرف اسد ڇوٽا، محمد نعيم، شعيب اختر، محمد ناصر عرف موڇڙ، عبدالرشيد عرف ڪاشف بيچ والا، محمد سعيد بلوچ، محمد محسن، محمد عدنان، محمد فاروق عرف لانڍي، دل مراد، محمد دانش، سليم، محسن عرف لمبا، ريحان عرف شانا، سيد عمران رضا، مهر بخش، عدنان عرف اي ڊي عرف دانش، محمد اسلم عرف منا ۽ عزير بلوچ لاءِ جي آءِ ٽيز جي منظوري ڏني آهي. محمد خرم عرف موٽا، محمد فرحان عرف فنٽر، محمد نويد، محمد شفيق، محمد سهيل ۽ منهاج قاضي جون جي آءِ ٽيز پائپ لائين ۾ آهن. بيان ۾ وڌيڪ چيو ويو آهي ته سنڌ حڪومت صوبي مان ڏوهاري عناصرن جي خاتمي لاءِ ڪوشان آهي ۽ ان لاءِ سخت کان سخت قدم کنيا پيا وڃن. سنڌ جي وڏي چيو ته دهشتگرد اسان جا ۽ اسان پياري ڌرتي جا دشمن آهن، اسان انهن جي ناپاڪ ادارن کي سمجهي رهيا آهيون ۽ اهو به ڄاڻون پيا ته انهن تي ڪهڙي ريت حملو ڪرڻو آهي. هن چيو ته سنڌ صوبي جي عوام پيپلز پارٽي حڪومت تي عتماد ڪيو آهي جيئن ته انهن جي جان، مال ۽ آزاديءَ جو هر قيمت تي تحفظ ڪيو ويندو. وڏي وزير چيو ته جي آءِ ٽيز کان پوءِ ڏوهارين کي بهتر طريقي سان پراسيڪيوٽ ڪيو ويندو. جنهن لاءِ سمورا ضرور قدم کنيا پيا وڃن.

 

ادارن جي مضبوطي جا خواهشمند آهيون پر ادارا حدن ۾ رهي ڪم ڪن: پرويز رشيد

لاهور (بيورو) پرويزرشيد چيو آهي ته ادارن کي مضبوطي ڪرڻ سندس خواهش آهي، پر ادارا حدن ۾ رهي ڪم ڪن لاهور ۾ ميڊيا سان ڳالهائيندي پرويز رشيد چيو ته نوازشريف جي حڪومتي دور ۾ ڪرپشن ۽ ڪميشن جو سوال ئي پيدا نٿو ٿئي. هن چيو ته هو هاڪاري احتساب جا حامي آهن، احتسابي عمل جمهوريت جي خاصيت آهي. سندس چوڻ هو ته انصاف ۽ قانون جون گهرجون پوريون ڪرڻ کانپوءِ ڪنهن ۾ هٿ وجهي سگهجن ٿا. وفاقي وزير پرويز رشيد جو چوڻ هو ته رٿائون ڪنهن جي ذاتي نه پر قومي ڀلائي لاءِ آهن. پرويز رشيد چيو ته خوف وارو ماحول حڪومتي معاملن تي اثر انداز نٿو ٿي سگهي، قومي رٿائن تي ڪنهن کي اثر انداز ٿيڻ جي اجازت نه ڏني ويندي

 

اپوزيشن جي ريڪوزيشن تي اجلاس گهرايو ويو، پر سندن غير موجودگي ۾ بحث سهيڙيا پيا وڃن: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه پي آءِ اي ۽ تيل اگهن وارن معاملن تي بحث سندن غير موجودگي ۾ سهيڙڻ تي احتجاج ڪندي چيو آهي ته حڪومت ٻڌي ڇڏي ته اجلاس ائين ناهن هلندا، اپوزيشن ايوانن کان ٻاهر احتجاج ڪيو ته حڪومت کي پتو پئجي ويندو. قومي اسيمبلي اجلاس ۾ خطاب ڪندي خورشيد شاهه چيو ته اپوزيشن جي ريڪوزيشن تي اجلاس گهرايو ويو آهي، پر سندن غير موجودگي ۾ بحث سهيڙيا پيا وڃن. هن چيو ته هو پبلڪ اڪائونٽس ڪميٽي جي اجلاس ۾ شريڪ هو، ان ڪري گذريل ڏينهن ايوان ۾ نه اچي سگهيو، پر حڪومت غير موجودگي ۾ ئي پي آءِ اي ۽ تيل اگهن واران معاملن تي بحث سهيڙيو. خورشيد شاهه چيو ته حڪومت ٻڌي ڇڏي ته اجلاس ائين ناهن هلندا، مخالف ڌر جي موجودگي ۾ ئي اهم معاملن تي بحث کي مڪمل ڪيو وڃي ته کين اعتراض نه هوندو. خورشيد شاهه وڌيڪ چيو ته جيڪڏهن اپوزيشن ايوانن کان ٻاهر احتجاج ڪيو ته حڪومت کي پتو پئجي ويندو ته مخالف ڌر جي ڪيتري اهميت آهي.

 

سنڌ جي وڏي وزير جو آءِ جي سنڌ کي فون، اسٽريٽ ڪرائم جي ڪارروائين تي ڳڻتي جو اظهار

ڪراچي (اسٽاف رپورٽر) سنڌ جي وڏي وزير سيد قائم علي شاهه آءِ جي سنڌ غلام حيدر جماليءَ سان فون تي رابطو ڪري شهر ۾ وڌندڙ اسٽريٽ ڪرائمز ۽ بينڪ ڦر جي وارداتن تي تشويش جو اظهار ڪندي چيو ته ان معاملي کي سنجيدگيءَ سان وٺندي ان کي سنگين ڏوهن وانگر ورتو وڃي ۽ انهن تي ضابطو آندو وڃي. هن چيو ته شهرين ڪراچي شهر ۾ امن جي بحاليءَ بعد سڪون جو ساهه کنيو هو انهن کي هاڻ ٻيهر مايوس ڪيو پيو وڃي. هن آءِ جي سنڌ کي هدايت ڪئي ته سمورا ايس ايس پيز پنهنجن لاڳاپيل علائقن جي سيڪيورٽي کي بهتر بڻائڻ جا ذميوار آهن، هنن کي گهرجي ته علائقن ۾ پيٽرولنگ ۾ واڌ آڻن ۽ ڏوهارين جي سرگرمين تي سخت نظر رکي وڃي. هن چيو ته بينڪ ڦر جي وارداتن ۾ به اضافو ٿيو آهي ۽ اهو پڻ سنگين نوعيت وارو معاملو آهي ۽ ان کي به فوري طور تي حل ڪيو وڃي ۽ ضابطو آندو وڃي. هن چيو ته ايس ايڇ اوز ۽ ٻيا لاڳاپيل پوليس اهلڪار شهر ۾ چوڪس رهن. هن چيو ته جيڪڏهن ڪنهن به علائقي ۾ اسٽريٽ ڪرائمز ٿيا يا بينڪ ڦر ٿي ته لاڳاپيل آفيسر ان جا ذميوار هوندا. هن  آءِ جي سنڌ تي زور ڀريو ته لاڳاپيل پوليس ٿاڻن کي هدايت ڪئي وڃي ته اسٽريٽ ڪرائم ۽ بينڪ وارداتن وارن ڪيسن تي ڪم ڪن ۽ هن کي هر پندرهن ڏهاڙن کانپوءِ رپورٽ پيش ڪئي وڃي.

 

وفاقي سرڪار پاران شڪي دهشتگردن جون رياستي سهولتون ختم ڪرڻ جو فيصلو

اسلام آباد (بيورو) وفاقي سرڪار، شڪي دهشتگردن جون رياستي سهولتون ختم ڪرڻ جو فيصلو ڪندي چئني صوبن، آزاد ڪشمير ۽ گلگت بلتستان حڪومتن کي هدايتون جاري ڪري ڇڏيون آهن. ذريعن موجب، حڪومت 8 هزار 300 شڪي ماڻهن خلاف ڪاررواين جو فيصلو ڪيو آهي، ان سلسلي ۾ نيڪٽا پاران هدايتون جاري ڪيون ويون آهن. ذريعن موجب، نيڪٽا جي هدايتن کانپوءِ صوبن پاران ڊسٽرڪٽ انٽيلجنس ڪميٽيز کي ذميواريون ڏنيون ويون آهن، جيڪي ضلعي سطحي تي فورٿ شيڊول ۾ شامل شڪي دهشتگردن جو جائز وٺنديون. ذريعن جو وڌيڪ چيو آهي ته شڪي دهشتگردن جون رياستي سهولتون ختم ڪرڻ سان گڏ انهن جا سڃاڻپ ڪارڊ، پاسپورٽ، هٿيارن ۽ ڊرائيونگ لائسنس رد ڪرڻ جو فيصلو ڪيو ويو آهي، جڏهن ته اڪائونٽس پڻ منجمند ڪيا ويندا.

 

رينجرز پاران ڪراچي ۾ ڏوهارين خلاف سخت ڪريڪ ڊائون جو اعلان

ڪراچي (اسٽاف رپورٽر) ڊي جي رينجرس سنڌ ميجر جنرل بلال اڪبر جي صدارت هيٺ سيڪورٽي بابت اجلاس ۾ ڏوهن ۾ ملوث ماڻهن خلاف سخت ڪريڪ ڊائون ڪرڻ جو فيصلو ڪيو ويو، چوري ٿيل سامان جي خريداري ۽ وڪرو ۾ ملوث ماڻهن کي به گرفتار ڪيو ويندو… ڪراچي ۾ ڊي جي رينجرس سنڌ ميجر جنرل بلال اڪبر جي صدارت هيٺ سيڪورٽي بابت اعليٰ سطحي جو اجلاس ٿيو، جنهن ۾ آءِ جي سنڌ غلام حيدر جمالي، ايڊيشنل آءِ جي مشتاق مهر، ڊي ڊي جي، سيڪٽر ڪمانڊرز ۽ ڊي آءِ جيز شرڪت ڪئي. اجلاس دوران ڀتاخوري ۽ ڀنگ عيوض اغوا، اسٽريٽ ڪرائيمز ۽ بئنڪن مان ڦر جي واقعن ۾ ملوث جوابدارن جي گرفتاري ۾ ٿيل اڳڀرائي جو جائزو ورتو ويو.. اجلاس ۾ فيصلو ڪيو ويو ته چوري ٿيل سامان جي خريداري ۽ وڪرو ۾ ملوث ماڻهن تي ڪڙي نظر رکي ويندي، چوري ٿيل سامان جي خريداري ۽ وڪرو ۾ ملوث ماڻهن کي قانون جي گرفت ۾ آندو ويندو. اجلاس دوران ڏوهن ۾ ملوث ماڻهن خلاف سخت ڪريڪ ڊائون ڪرڻ جو فيصلو ڪيو ويو.