تازيون خبرون

Daily Archives: February 12, 2016

ملڪ کي اونداهي مان ڪڍڻ لاءِ ڪوشان آهيون، ڪالهه ۽ اڄ واري پاڪستان ۾ فرق آهي: نواز شريف

دوها (مانيٽرنگ ڊيسڪ) وزيراعطم نواز شريف چيو آهي ته ٽي سال پهرين ۽ اڄ جي پاڪستان ۾ وڏو فرق آهي، آپريشن ضرب عضب دهشتگردن جي چيلهه چٻي ڪري ڇڏي آهي، ڪراچي جون حالتون بهتر ٿي چڪيون آهن، پي آءِ اي ۾ هڙتال ختم ٿي وئي ۽ هاڻي اداري جي ترقي لاءِ ڪم ڪرڻو پوندو. قطر جي شهر دوحا ۾ پاڪستاني ڪميونٽي کي خطاب ڪندي وزيراعظم نواز شريف چيو ته هُو ملڪ ۾ ترقي جو عمل بحال ڪري رهيا آهن، ملڪ کي اونداهي مان ڪڍڻ لاءِ حڪومت قدم کڻي رهي آهي، سولر ۽ هائيڊرو پاور منصوبا لڳايا ويا آهن. نواز شريف چيو ته ماضي جي حڪومتن ملڪ سان ناانصافيون ڪيون، گذريل 15 سالن ۾ بجلي جا منصوبا نه لڳايا ويا، پر اڄ هُو بجلي جي کوٽ ۽ ان جا اگهه گهٽ ڪري رهيا آهن، قطر سان معاهدي سان گئس ۽ توانائي جو بحران حل ٿي ويندو، ايل اين جي سان سستي بجلي پيدا ٿيندي. وزيراعظم چيو ته آپريشن ضرب عضب دهشتگردن جي چيلهه چٻي ڪري ڇڏي آهي، آپريشن ضرب عضب کي منطقي انجام تائين پهچايو ويندو، ڪراچي جون حالتون بهتر ٿي چڪيون آهن ۽ شهري ڏاڍا خوش آهن. وزيراعظم جو چوڻ هو ته پي آءِ اي ملازمن هڙتال ختم ڪئي آهي ۽ هاڻي پي آءِ اي ترقي ڪندو، پي آءِ اي کي قطر ايئر لائين جي برابر آندو ويندو…. وزيراعظم نواز شريف چيو ته موٽر وي ذريعي ڪراچي کي لاهور سان ملائي رهيا آهن، چين پاڪستان ۾ قرض نه پر سيڙپڪاري ڪري رهيو آهي. ٻئي طرف وزيراعظم نواز شريف چيو آهي ته قطر جا سيڙپڪار پاڪستان جي توانائي واري شعبي ۾ سيڙپڪاري ڪري سگهن ٿا، وزيراعظم نواز شريف سان قطر جي گادي واري هنڌ دوها ۾ قطر سيڙپڪاري اٿارٽي جي سربراهه شيخ عبدالله محمد الثاني ملاقات ڪئي، ان موقعي تي وزيراعظم نواز شريف چيو ته پاڪستان ۾ سيڙپڪاري لاءِ سيڙپڪارن کي مختلف سهولتون ۽ رعايتون ڏنيون پيون وڃن،تنهن ڪري قطر جي سيڙپڪاري اٿارٽي به ان مان فائدو وٺندي توانائي جي شعبي ۾ سيڙپڪاري ڪري سگهي ٿي، هن چيو ته پاڪستان ۾ سيڙپڪاري لاءِ پرامن ۽ مناسب ماحول آهي، وزيراعظم نواز سريف چيو ته ملڪ ۾ بنيادي ڍانچي جي ترقي تي خاص ڌيان ڏنو پيو وڃي.

 

ڪي فور منصوبو ايف ڊبليو کي ڏيڻ ۽ 23 مارچ تي شروع ڪرڻ جو فيصلو

ڪراچي (اسٽاف رپورٽر) سنڌ سرڪار ڪراچي ۾ واٽر سپلاءِ جي وڏي منصوبي ڪي-فور کي فرنٽيئر ورڪس آرگنائيزيشن (ايف ڊبليو او) کي ڏيڻ ۽ 23 مارچ تي منصوبي کي شروع ڪرڻ جو فيصلو ڪيو آهي، اهو فيصلو خميس ڏينهن وزير اعليٰ هائوس ۾ سنڌ جي وڏي وزير سيد قائم علي شاهه جي صدارت هيٺ هڪ اعليٰ سطحي اجلاس ۾ ڪيو ويو جنهن ۾ سنڌ جو گورنر ڊاڪٽر عشرت العباد خان خاص طور تي شرڪت ڪئي. اجلاس ۾ صوبائي وزير سيد مراد علي شاهه، ڄام خان شورو، وڏي وزير جو اطلاعات وارو صلاحڪار مولا بخش چانڊيو، چيف سيڪريٽري محمد صديق ميمڻ، ايڊيشنل چيف سيڪريٽري (ترقيات) اعجاز علي خان، پرنسپل سيڪريٽري علم الدين بلو، ناڻي وارو سيڪريٽري سهيل راجپوت، سيڪريٽري لوڪل گورنمينٽ نور محمد لغاري، ايم ڊي واٽر بورڊ ۽ ٻين اعليءِ آفيسرن شرڪت ڪئي. سنڌ جي وڏي وزير اجلاس کي خطاب ڪندي چيو ته ڪراچي جي عوام جي فلاح بهبود لاءِ ڪي-فور پروجيڪٽ جي وڏي اهميت آهي انڪري سياسي قيادت به ان جي جلد شروعات جي خواهشمند آهي ۽ اهو هڪ اعليٰ سطحي اجلاس آهي ان لاءِ اڄ مون انهيءَ منصوبي جي آغاز جي تاريخ مقرر ڪرڻ جي تجويز ڏيان ٿو. ناڻي ۽ منصوبابندي واري صوبائي وزير سيد مراد علي شاهه اجلاس کي بريفنگ ڏيندي ٻڌايو ته هن پنهنجي ٽيم سان گڏجي ايف ڊبليو او جي ڊائريڪٽر جنرل سان ملاقات ڪئي هئي ۽ ايف ڊبليو او سنڌ سرڪار جي منصوبي تي تعميراتي ڪم شروع ڪرڻ لاءِ تيار آهي. انهيءَ بعد ايف ڊبليو او سان گڏجي سنڌ حڪومت جا ڪجهه آفيسرن ۽ ماهرن جي هڪ ٽيم به ملاقات ڪئي ۽ فني معاملن ۽ ورڪ پلان تي تفصيلي خيالن جي ڏي وٺ ڪئي وئي. هن ٻڌايو ته جيڪڏهن ايف ڊبليو او کي ڪنٽريڪٽ ڏنو ويندو ته اهي ڪم ڪرڻ لاءِ تيار آهن. ان سنڌ جي وڏي وزير چيو ته ايف ڊبليو او هڪ ناميارو ادارو آهي ۽ ڪم جي معيار، رفتار کي ڏسندي ان جي ڪم جو ڪنٽريڪٽ ايف ڊبليو او کي ڏيڻ گهرجي جنهن تي گورنر سنڌ ۽ اجلاس ۾ شريڪت ڪندڙن تجويز جي حمايت ڪئي. ان کان پوءِ وڏي وزير سيد قائم علي شاهه پاليسي فيصلو ڪندي واٽر بورڊ ۽ پي اينڊ ڊي کاتي کي هدايتون جاري ڪيون ته هو ايف ڊبليو او سان گڏجي معاهدو تشڪيل ڏيئي ان تي عمل ڪيو وڃي. هن چيو ته معاهدي تي صحيح کان اڳ سموريون قانوني گهرجن کي نظر ۾ رکيو وڃي ۽ صحيح واري تقريب سي ايم هائوس ۾ منعقد ڪئي وڃي. سنڌ جي گورنر ڊاڪٽر عشرت العباد ۽ وڏي وزير سيد قائم علي شاهه ان منصوبي کي 23 مارچ تي شروع ڪرڻ جي خواهش جو اظهار ڪيو ۽ چيو ته تاريخي حوالي سان 23 مارچ اسان لاءِ سٺو ڏينهن آهي انڪري اهو منصوبو به ان ڏهاڙي تي شروع ڪيو وڃي. هن لاڳاپيل وزير ۽ واٽر بورڊ کي ان ضمن ۾ ضروري قدم کڻڻ جي هدايت ڪئي. واضع رهي ته ڪي-فور منصوبي جي ڪل لاڳت 25.5 ارب رپيا آهي ۽ ان سان ڪراچي شهر کي ٽن مرحلن ۾ 650 ايم جي ڊي پاڻي فراهم ڪيو ويندو. پهرين مرحلي ۾ ڪينجهر کان ڪراچي 260 ايم جي ڊي، ٻئي مرحلي ۾ به 260 ايم جي ڊي جڏهن ته ٽئين ۽ آخري مرحلي ۾ 130 ايم جي ڊي سال 2020ع کان پاڻي فراهم ڪرڻ جي شروعات ڪئي ويندي. اجلاس جي ابتدا ۾ ملڪ جي نامياري ڊراما نگار ۽ اديبا فاطمه ثريا بجيا جي روح جي ايصال ثواب لاءِ فاتح خاني پڻ ڪئي وئي. ٻئي پاسي سنڌ حڪومت دهشتگردي کي روڪڻ لاءِ سنڌ پوليس ڪائونٽر ٽيريزم جي نالي سان يونيورسٽي قائم ڪرڻ جو فيصلو آهي، گهرومعاملن واري وزير سهيل انور سيال چيو آهي ته يونيورسٽي جي قيام سان گڏ سمورن ٿاڻن ۾ ايمرجنسي سيل قائم ڪيا ويا آهن. گهرو وزير جي صدارت هيٺ ڪراچي ۾ ايس ايس يو هيڊ ڪوارٽر ۾ پوليس مئنيجمينٽ بورڊ جو اجلاس ٿيو، جنهن ۾ يونيورسٽي جي قيام جي منظوري ڏني وئي. اجلاس بابت پوليس پاران جاري ڪيل بيان تحت سهيل انور سيال چيو ته  يونيورسٽي جي قيام سان گڏ سمورن ٿاڻن ۾ ايمرجنسي سيل قائم ڪيا ويا آهن. هن چيو ته يونيورسٽي ۾ پوليس عملدارن ۽ اهلڪارن کي دهشتگردي کي روڪڻ لاءِ جديد تعليم ڏني ويندي. پوليس پاران جاري ڪيل بيان تحت ٿاڻن ۾ قائم ٿيندڙ ايمرجنسي سيل جو هيلپ لائين نمبر 911 آهي ، جڏهن ته اهو سيل ايمبولنس سروس، محافظ فورس، مددگار ون فائيو ۽ ٻين ادارن کان ڳنڍيل هوندو

 

عمران خان ٽن ڏينهن اندر قول ۽ فعل ۾ تضاد جي هيٽرڪ مڪمل ڪئي: پرويز رشيد

اسلام آباد (بيورو) پرويز رشيد چيو آهي ته عمران خان ٽن ڏينهن اندر قول ۽ فعل ۾ تضاد جي هيٽرڪ مڪمل ڪئي. اسلام آباد ۾ ميڊيا سان ڳالهائيندي پرويز رشيد چيو ته عمران خان پهرين ڏينهن ڪي پي ڪي ۾ لازمي سروسايڪٽ لاڳو ڪيو. هن چيوته پي ٽي آءِ سربراهه ٻئي ڏينهن تي احتساب جي قانون کي پنهنجي هٿ جي لٺ بٺايو ۽ ٽئين ڏينهن هو تبديليءَ جو نعرو موروثي سياستدان جي در تي دفنائڻ پهچي ويو. سندس چوڻ هو ته عمران خان چوندو هڪ ۽ ڪندو ٻيو آهي، پي ٽي آءِ سربراهه عوام آڏو وائکو ٿي چڪو آهي. پرويز رشيد چيو ته هڪ طرف عمران خان تبديلي جي ڳالهه ڪري ٿو ته ٻئي طرف موروثي سياستدان جي در تي وڃي ٿو.

 

زميني حقيقتن موجب دهشتگرديءَ خلاف جنگ کٽي رهيا آهن: چوڌري نثار

اسلام آباد (بيورو) وفاقي سرڪار هٿيارن جي لائسنس تان پابندي ختم ڪرڻ جو فيصلو ڪيو آهيوفاقي گهرو وزير چوڌري نثار جي صدارت هيٺ اجلاس ۾ ميڊيا هائوسز جي سيڪيورٽي تي غور ويچار ڪيو ويو. اجلاس ۾ ڳالهائيندي وفاقي گهرو وزير چوڌري نثار علي چيو ته زميني حقيقتن موجب هو دهشتگرديءَ خلاف جنگ کٽي رهيا آهن. هن چيو ته دهشتگرد منظم ۽ تربيت يافتا آهن، سيڪيورٽي گارڊ بيهارڻ سان حفاظت نه ٿي ڪري سگهجي. سندس چوڻ هو ته ميڊيا هائوسز لاءِ جديد هٿيارن تي پابندي ۾ نرمي ڪئي ويندي. وفاقي گهرو وزير چيو ته اسلام آباد ۾ رجسٽرڊ گاڏين ۾ سيڪيورٽي لاءِ ڊجيٽل چپس لڳايون وينديون. هن چيو ته گاڏين ۾ ڊجيٽل چپون لڳائڻ سان چيڪ پوسٽن تي جلد سڪيورٽي ڪليئرنس ۾ مدد ملندي. سندس چوڻ هو ته سيڪيورٽي خدشن بابت افواهه خوف لاءِ پکيڙيا پيا وڃن، دهشتگرد رڳو افواهه ئي پکيڙڻ چاهين ٿا. چوڌري نثار علي جو چوڻ هو ته تعليمي ادارن کي مڪمل تحفظ فراهم ڪيو ويندو، هو سيڪيورٽي بابت ضروري ڄاڻ ميڊيا سان شيئر ڪندا.

 

فوج دهشتگردن جي چيلهه ڀڃي ڇڏي،هاڻ دهشتگرد هار مڃڻ تي مجبور ٿي چڪا آهن: صدر ممنون حسين

اسلام آباد (بيورو) صدر ممنون حسين چيو آهي ته پاڪ فوج دهشتگردن جي چيلهه ڀڃي ڇڏي آهي ۽ دهشتگرد هاڻ هار مڃڻ تي مجبور ٿي چڪا آهن، اسلام آباد ۾ ڪيڊٽس جي تقريب کي خطاب ڪندي صدر ممنون حسين چيو ته دهشتگردي ملڪ کي وڏو نقصان پهچايو آهي پر آخري دهشتگرد جي خاتمي تائين آپريشن هلندو رهندو، هن چيو ته پاڪ فو

ج هن وقت آپريشن ضرب عضب ۾ رڌل آهي ۽ فوج جي پيشيور صلاحيتن سبب ان آپريشن ۾ وڏيون ڪاميابيون ملي رهيون آهن، سندس چوڻ هو ته ملڪ کي سڀ کان وڌيڪ نقصان بدعنواني پهچايو آهي، جنهن کي روڪڻ لاءِ پڇاڻي ۽ حساب ڪتاب واري نظام کي مضبوط ڪيو ويو آهي، صدر ممنون حسين چيو ته سڄي قوم دهشتگردي خلاف هڪ آواز آهي ۽ آپريسن ضرب عضب جي حمايت ڪري ٿي.

 

فوجي عدالت ۾ 12 دهشتگردن کي موت جي سزا،جنرل راحيل شريف منظوري ڏئي ڇڏي

راولپنڊي (بيورو) آرمي چيف جنرل راحيل شريف، فوجي عدالتن پاران موت جي سزا ٻڌايل 12 خطرناڪ دهشتگردن جي ڊيٿ وارنٽس تي صحيحون ڪري ڇڏيون آهن، آءِ ايس پي آر جو چوڻ آهي ته دهشتگرد سڪيورٽي فورسز ۽ بنون جيل تي حملن سميت  دهشتگردي جي ٻين سينگين وارداتن ۾ ملوث هئا. آءِ ايس پي آر پاران جاري ڪيل پڌرائي موجب آرمي چيف جنرل راحيل شريف 12 خطرناڪ دهشتگردن کي موت جي سزا ڏيڻ جي منظوري ڏيندي ڊيٿ وارنٽس تي صحيح ڪري ڇڏي آهي، دهشتگردن جا ڪيس فوجي عدالتن ۾ هلايو ويا ۽ فوجي عدالتن کين موت جي سزا ٻڌائي. آءِ ايس پي آر موجب جن دهشتگردن کي موت جي سزا ٻڌائي وئي هئي، انهن ۾ محمد عربي، رفيع الله، قاري آصف محمود، شوالي، محمد ذيشان، ناصر خان، شوڪت علي، امداد الله، محمد عمر، صابر شاهه، انور علي ۽ خاندان نالي دهشتگرد شامل آهن. آءِ ايس پي آر جو چوڻ آهي ته دهشتگرد محمد عربي تحريڪ طالبان پاڪستان جو فعال ميمبر هو، جيڪو بنون جيل تي حملي ۾ ملوث هو، بنون جيل تي حملي ۾ ڪيترائي دهشتگرد فرار ٿيڻ ۾ ڪامياب ٿي هئا، جڏهن ته حملي ۾ ڪيترائي پوليس ۽  سڪيورٽي فورسز جا جوان به زخمي ٿيا هئا. آءِ ايس آر  موجب دهشتگرد عربي قانون لاڳو ڪندڙ ادارن تي حملن ۾ به ملوث آهي، حملن ۾ ڪيترائي سڪيورٽي اهلڪار شهيد ۽ زخمي ٿيا هئا، جوابدار مئسجٽريٽ آڏو پنهنجي ڏوهه جو اعتراف ڪري چڪو آهي، کيس ٽن الزامن هيٺ موت جي سزا ٻڌائي وئي. آءِ ايس پي آر جي پڌرائي موجب، دهشتگرد رفيع الله ۽ قاري آصف محمود بندش پيل تنظيم سپاهه صحابه جا فعال ميمبر هئا، ٻئي دهشتگرد لاهور ۾ سيد وقار شاهه نالي شخص جي قتل ۾ ملوث آهن، دهشتگرد رفيع الله کي ٻن ۽ قاري آصف محمود کي چئن الزامن هيٺ فوجي عدالت پاران موت جي سزا ٻڌائي وئي آهي، جنهن جي ڊيٿ وارنٽس تي به آرمي چيف صحيح ڪئي آهي. پڌرائي موجب، دهشتگرد شوالي تحريڪ طالبان پاڪستان جو فعال ميمبر هو، جيڪو قانون لاڳو ڪندڙ ادارن تي حملن ۾ ملوث هو، دهشتگرد شوالي کي ٽرائل ڪورٽ پاران ٽن الزامن هيٺ موت جي سزا ٻڌائي وئي، جڏهن ته القاعده سان واسطو رکندڙ ٻن دهشتگردن محمد ذيشان ۽ ناصر خان کي به موت جي سزا ٻڌائي وئي آهي، اِهي دهشتگرد سڪيورٽي فورسز تي حملن ۾ ملوث هئا. آءِ ايس پي آر موجب، دهشتگرد شوڪت علي جي ڊيٿ وارنٽس تي به آرمي چيف پاران صحيح ڪئي وئي آهي ، دهشتگرد سڪيورٽي فورسز تي حملن ۾ ملوث هو، جنهن کي فوجي عدالت پاران 5 الزامن هيٺ موت جي سزا ٻڌائي وئي هئي. آءِ ايس پي آر جو چوڻ آهي ته دهشتگرد امداد الله بونير ۾ هڪ تعليمي اداري کي تباهه ڪري ڇڏيو هو، بندش پيل تنظيم  سان واسطو رکندڙ دهشتگرد سڪيورٽي فورسز تي به حملن ۾ ملوث آهي. آءِ ايس پي آر موجب، آرمي چيف پاران دهشتگرد محمد عمر، صابر شاهه، خاندان ۽ انور علي جي ڊيٿ وارنٽس تي به صحيح ڪئي وئي آهي ، جن کي فوجي عدالت پاران سڪيورٽي فورسز تي حملن ۾ ملوث هئڻ تي موت جي سزا ٻڌائي وئي هئي.

 

سنڌ حڪومت ڪراچي ۾ اهم هنڌن اڳيان احتجاج ڪرڻ تي 90 ڏينهن جي پابندي مڙهي ڇڏي

ڪراچي (اسٽاف رپورٽر) صوبائي گهرو کاتي سنڌ اسيمبلي ۽ وڏي وزير هائوس سوڌو ڪراچي جي مختلف هنڌن تي احتجاج ڪرڻ تي 3 مهينن جي پابندي مڙهي ڇڏي.ميڊيا رپورٽ مطابق سنڌ حڪومت ڪراچي ۾ ريڊزون سوڌو اهم هنڌن اڳيان احتجاج رڪڻ تي 90 ڏينهن جي پابندي لاڳو ڪري ڇڏي آهي،جنهن جو باقائدي نوٽيفڪيشن به جاري ڪيو ويو آهي.صوبائي حڪومت پاران جن علائقن ۾ احتجاج ڪرڻ کان روڪيوآهي،انهن ۾ سنڌ اسيمبلي بلڊنگ،بلاول هائوس،سنڌ سيڪريٽريٽ،وزيراعليٰ هائوس،ڊاڪٽر ضيا الدين روڊ،فريسڪو چوڪ ۽ پي آئي ڊي سي چوڪ سوڌو ٻيا هنڌ شامل آهن.ذريعن جو چوڻ آهي ته بلاول هائوس اڳيان احتجاج ڪرڻ وارن کي قلم نمبر 144 هيٺ گرفتار ڪيو ويندو.

 

نواز شريف حڪومت ۾ اچڻ کانپوءِ پنهنجي ڪاروبار کي هٿي ڏيندو آهي: عمران خان

گجرانوالا (م.ڊ) پاڪستان تحريڪ انصاف جي چيئرمين عمران خان چيو آهي ته وزيراعظم نوازشريف  حڪومت ۾ اچڻ کانپوءِ رڳو پنهنجي ڪاربار کي هٿي ڏيندو آهي.گجرانولا ۾ جلسي کي خطاب ڪندي عمران خان جو چوڻ هو ته وزيراعظم نوازشريف ۽ ان جي سياست ۾ وڏو فرق آهي،نواز شريف جو اقتدار ۾ اچڻ جو مقصد رڳو پنهنجي ڪاروبار کي ترقي ڏيڻ هوندو آهي.جيڪڏهن ان دوران ملڪ ترقي ڪئي ته صحيح آهي نه ته سندس ڪاروبار ته ترقي ڪري ٿو نه ۽ انهيءَ سبب نواز شريف جو ڪاروبار ته ترقي ڪري رهيو آهي،پر پاڪستان جي معاشي حالت خراب ٿي رهي آهي.هارين جو حال تمام خراب ٿي ويو آهي،لاهور ۾ 200 ارب رپيا خرچ ڪري اورنج ميٽرو لائين جو منصوبو جوڙيو پيو وڃي،جيڪڏهن ساڳيا پئسا هارين جي ڀلائي تي خرچ ڪيا وڃن ته ملڪ ۾ غربت ختم ٿي ويندي هاري خوشحال ته ملڪ خوشحال ۽ ملڪ اندر بيروزگاري ۾ به  گهٽتائي اچي ويندي.تحريڪ انصاف چيئرمين عمران خان جو چوڻ هو ته جيڪڏهن عالمي منڊي ۾ تيل جا اگهه ڏٺا وڃن ته ڊيزل جي اگهن ۾ 20 رپيا گهٽتائي ٿيڻ گهربي هئي،پرهتي ائين نه ڪيو ويو.جيڪڏهن ايئن ٿئي ها ته انهيءَ ڳالهه جو فائدو هارين کي پوي ها پر نواز شريف سدائين اميرن کي نوازيندو آهي.

 

اڳوڻي صدر پرويز مشرف جي طبيعت اوچتو خراب، اسپتال منتقل

ڪراچي (اسٽاف رپورٽر) اڳوڻي صدر پرويز مشرف جي طبيعت اوچتو خراب ٿي پئي، جنهن کي ڪراچي جي پي اين ايس شفا اسپتال ۾ منتقل ڪيو ويو.اڳوڻي صدر پرويز مشرف جي طبعيت اوچتو خراب ٿيڻ سبب ڪراچي جي اسپتال پي اين ايس شفا منتقل ڪيو ويو، جتي سندس مختلف ٽيسٽون ڪيون ويون. پرويز مشرف جو بلڊ پريشر هاءِ ٿي ويو هو، جنهن سبب کيس چڪر اچي رهيا هئا، کيس اسپتال جي آءِ سي يو ۾ داخل ڪيو ويو آهي.پرويز مشرف جي ترجمان جو چوڻ آهي ته پرويز مشرف جي طبيعت بهتر آهي، بلڊر پريشر هاءِ ٿي ويو آهي، طبعيت بابت ڪا به پريشاني جهڙي ڳالهه نه آهي.

 

پنجگور ۾ گهر تي حملو، فائرنگ ۾ 6 ڄڻا مارجي ويا

ڪوئيٽا (م.ڊ) بلوچستان جي پنجگور واري علائقي ۾ گهر تي اڻڄاتل هٿياربندن جي فائرنگ جي نتيجي ۾ 6 ڄڻا مارجي ويا، ميڊيا رپورٽن مطابق پنجگور جي علائقي بونستان ۾ موٽر سائيڪل تي سوار هٿياربندن  هڪ گهر تي فائرنگ ڪئي، جنهن جي نتيجي ۾ 6 ڄڻا مارجي ويا، پوليس ٻڌايو ته هٿياربندن گهر سان لڳو لڳ ئي ٺهيل اوطاق تي هيارن جا منهن کولي ڇڏيا، جنهن جي نتيجي ۾ 6 ڄڻا مارجي ويا، جن جي سڃاڻپ اسماعيل، شعيب، غلام جان، مومن، نظر ۽ اسماعيل 2 جي نالي سان ٿي آهي،خبر پوڻ تي پوليس واقعي واري هنڌ پهچي علائقي کي ڪڙو چاڙهي ڇڏيو، جنهن کانپوءِ مارجي ويلن جا لاش کڻائي اسپتال پهچايا، پوليس جو چوڻ آهي ته شروعاتي طور تي واقعو پراڻي دشمني جو نتيجو لڳي ٿو.