تازيون خبرون

Monthly Archives: February 2016

حوصله بلند آهن، ملڪ جي هر ڪنڊ مان دهشتگردن جو صفايو ڪنداسين: جنرل راحيل شريف

راولپنڊي (اي پي پي) چيف آف آرمي اسٽاف جنرل راحيل شريف پشاور ۾ شوال آپريشن دوران ڇنڇر ڏينهن شهيد ٿيل آفيسر ۽ جوانن جنازي نماز ۾ شرڪت ڪئي. ان موقعي تي آرمي چيف جوانن جي قربانين کي خراج عقيدت پيش ڪندي چيو ته اسان دهشتگردن جي مڪمل خاتمي لاءِ پرعزم آهيون. آءِ ايس پي آر طرفان جاري پريس رليز مطابق آچر ڏينهن چيف آف آرمي اسٽاف جنرل راحيل شريف پشاور جو دورو ڪيو، جتي هن شوال ۾ دهشتگردن سان فائرنگ جي ڏي وٺ ۾ شهيد ٿيل فوجين جي جنازي نماز ۾ شرڪت ڪئي. جنازي نماز ڪور هيڊ ڪوارٽرز ۾ ادا ڪئي وئي. جنهن ۾ اعليٰ سول ۽ فوجي قيادت پڻ شريڪ هئي. ان موقعي تي آرمي چيف شهيد جوانن جي ڪٽنبن سان يڪجهتي جو اظهار ڪيو. بعد ۾ هن سي ايم ايڇ پشاور ۾ زخمي فوجين جي عيادت ڪئي. دوري دوران آرمي چيف ڪور هيڊ ڪوارٽر پڻ ويو جتي کيس ڪور ڪمانڊر ليفٽيننٽ جنرل هدايت الرحمان شوال ۾ آپريشن جي تازي صورتحال بابت بريفنگ ڏني. آرمي چيف اتر وزيرستان ۾ پاڪ افغان سرحد ويجهو دهشتگردن کي سندن ٺڪاڻن مان ڪڍڻ لاءِ جاري آپريشن جي حتمي مرحلي تي مڪمل اطمينان جو اظهار ڪيو. ان موقعي تي شوال ۾ مشڪل پهاڙي علائقن ۾ دهشتگردن خلاف بلند حوصلي سان وڙهندڙ فوجين جي خدمتن جو اعتراف ڪندي آرمي چيف چيو ته اسان جو اهو عزم آهي ته دهشتگردن جو ملڪ جي هر ڪنڊ ۾ پيڇو ڪنداسين ۽ سندن سمورا ٺڪاڻا تباهه ڪنداسين.

 

سنڌ حڪومت پاڪستان ۾ آيل پرڏيهين جي نيڪالي جو مطالبو ڪري ڇڏيو

ٽنڊو محمد خان(ڊ.ر) سنڌ سرڪار جي اطلاعات کاتي واري صوبائي صلاحڪار مولابخش چانڊيو چيو آهي ته آدمشماري هاڻي پوري پاڪستان لاءِ سندس ترقي خوشحالي جي ضمانت بڻيل آهي. جنهن جي ڪري آدمشماري کي اڻٽر ٿيڻ گهرجي. اهڙو اظهار هن ٽنڊو محمد خان پريس ڪلب طرفان ڏنل آجياڻي واري تقريب کي خطاب ۽ صحافين سان ڳالهائيندي ڪيو. هن چيو ته آدمشماري ذريعي پاڪستان دنيا جي اندر پنهنجي ڳڻپ ذريعي عالمي بين الاقوامي ادارن آڏو پنهنجو اصل انگ اکر ظاهر ڪري سگهي ٿو. پاڪستان جي آبادي دنيا جي ڪيترن ئي آبادي واري علائقن کان وڌي ويئي آهي. پر پاڪستا  جي اندر غيرقانوني آيل پرڏيهين کي هاڻي نيڪالي ڏيارڻ جي ضرورت آهي. هن چيو ته وفاق هلندڙ سال ملڪ جي آدمشماري سان مخلص نظر نه اچي رهي آهي. جنهن جي ڪري آدمشماري جي وفاقي ڪميٽي ۾ صوبن کي برابري جو حق ڏيڻ بجاءِ هڪ صوبي تي مشتمل ڪاميٽي جوڙي ويئي آهي. پر ان جي باوجود سنڌ صوبي جو باشعور عوام اهو ڪهڙي به مڪتبه فڪر سان تعلق رکڻ جي باوجود آدمشماري ڪرائڻ لاءِ عملي طور تيار آهي. ٽن ڏينهن جي گهر شماري ڪرڻ سان ڪيترائي خدشا پيدا ٿي سگهن ٿا. جنهن جي ڪري سنڌ سرڪار وفاق وٽ پنهنجو مضبوط موقف ٺاهيو آهي. آدمشماري جي پهرين مرحلي گهر شماري کان وٺي مردمشماري تائين ٽنهي صوبن جي رضامندي ۽ خدشن کي ختم ڪرڻ سان آدمشماري جا انگ اکر ۽ نتيجا مثبت حاصل ٿي سگهن ٿا. آدمشماري ۾ غيرقانوني طور آيل پرڏيهين کي ان ۾ شمار نٿو سگهجي. جنهن لاءِ غيرقانوني آيل پرڏيهين جي نيڪالي لاءِ قومي سطح تي وفاق کي سنڌ سرڪار سان گڏجي منصوبابندي لازمي ڪرڻ گهرجي. سنڌ جي عوام کي ڪيترائي خدشا ٿي پيا آهن. سنڌ جي ساحلي پٽي سان گڏ ريگستاني ٿري علائقن ۾ ٽرانسپورٽ جي رفتار توڙي رستا نه هجڻ ڪري آدمشماري جي گهر شماري ۽ مردمشماري جي مقرر ڏينهن ۾ اضافي ڪرڻ جي اهم ضرورت آهي. هن چيو ته سنڌ سرڪار جي منظوري سان ڪراچي ۾ آپريشن هلي رهيو آهي. جنهن جي ڪري آپريشن جي اشو تي ڪو به تضاد پيدا نه ڪيو وڃي نه وري سنڌ سرڪار ان کي اختلافن جو شڪار ڪرڻ چاهي ٿي. پ پ ڪو چيئرمين آصف علي زرداري جو ڏنل بيان بلڪل عوامي امنگن تحت منظر عام تي اچي چڪو آهي. ان کي غلط رنگ ڏيڻ جي ڪوشش نه ڪئي وڃي. چيف آف آرمي اسٽاف جنرل راحيل شريف جي رٽائرمينٽ جي مقرر وقت تي عهدي ڇڏڻ واري بيان سان دهشتگردن جي حوصلا افزائي ٿي سگهي ٿي. جنهن جي ڪري آصف علي زرداري اهڙي نازڪ موڙ تي ان اشو کي وقت کان اڳ نه ڪرڻ جي قومي صلاح ڏني آهي. پر ڪٿي به مُدي وڌائڻ جي ڳالهه نه ڪئي آهي. هن اهو به چيو ته نيب جي ڪارروائين جو ٽارگيٽ سنڌ صوبي کي بنائڻ جو حدف مقرر نه ڪيو وڃي. نيب کي پوري ملڪ ۾ ڪرپشن جي خلاف ڪارروائي ڪرڻ جو قانوني حق ملڻ گهرجي. سنڌ کان پوءِ هاڻي جڏهن پنجاب صوبي ۾ نيب جي ڪارروائين جي ڳالهه ٿي آهي ته وفاق ان کي پنهنجو انا جو مسئلو نه بڻائي. احتساب سڀني جو ٿيڻ گهرجي. هن چيو ته لڳي ٿو ته نواز ليگ پاڻ کي هاڻي پوري ملڪ جي پارٽي نه سمجهي رهي آهي. نه وري وزيراعظم کي هڪ صوبي جو وزيراعظم ٿيڻ گهرجي. جمهوريت کي بچائڻ لاءِ اسان وزيراعظم نواز شريف کي بچائڻ لاءِ ڪا به ڳالهه نه ڪئي آهي. جمهوريت هر حالت ۾ هجڻ گهرجي. مسلم ليگي وفاقي وزيرن کي پيپلزپارٽي جي قيادت خلاف الزام تراشي جو سلسلو بند ڪرڻ گهرجي. هن چيو ته ڪالاباغ ڊئم جو اشو ٽن صوبن رد ڪيو آهي جنهن جي ڪري ان کي ٻيهر زنده نه ڪيو وڃي. وفاق آدمشماري جي مرحلي شروع ٿيڻ کان اڳ پنهنجي وڃايل ساک کي بحال ڪرڻ ۽ آدمشماري ۾ رنڊڪ پيدا ڪرڻ لاءِ ڪالاباغ جو اشو پيدا ڪيو آهي. نواز شريف جي جڏهن به عوامي ساک متاثر ٿيندي آهي يا وري کيس حڪومت وڃڻ جو خدشو ٿئي ٿو ته هو ڪالاباغ ڊئم جو راڳ پنهنجي وزيرن ۽ اڳواڻن ذريعي الپڻ شروع ڪري ڇڏي ٿو. جنهن لاءِ نواز شريف کي ڪالاباغ ڊئم جي تڪراري منصوبي کان پاسيرو رهڻ گهرجي. ڪالاباغ ڊئم هاڻي ٽن صوبن جي رد ڪرڻ سان گڏ وفاقي قومي مفادن لاءِ ناڪاري منصوبو ٿي ويو آهي. سنڌ حڪومت پنهنجي محدود بجيٽ باوجود صوبي جي عوام جي خدمت ڪري رهي آهي. صوبي ۾ تيزي سان ترقياتي ڪم ٿي رهيا آهن. جنهن ۾ ڪراچي کان وٺي ڪشمور، حيدرآباد ۽ سڄي سنڌ اندر بناڪنهن فرق جي عوامي مفادن تحت اسڪيمون ڏنيون ويون آهن. سنڌ سرڪار جي ايم پي ايز جي فنڊن ذريعي پڻ ترقياتي اسڪيمن ذريعي فنڊ جاري ٿي چڪا آهن. حيدرآباد کان بدين تائين ڊبل روڊ هاءِ ويز تعمير ڪرڻ جي اسڪيم ٺاهي ويئي آهي. جيڪا تمام جلد اسڪيم تي عمل شروع ڪيو ويندو. هن ٽنڊو محمد خان جي روڊن رستن جي زبون حالت تي پڻ ڏک جو اظهار ڪيو ۽ چيو ته ٽنڊو محمد خان سندس جنم ڀومي وارو علائقو آهي. کيس ننڊپڻ کان وٺي اڄ تائين ٽنڊو محمد خان ۽ حيدرآباد سان سندس وابسطگي رهي آهي. جنهن جي ڪري سندس پيار ۾ ٻئي شهر برابري جي حيثيت رکن ٿا. هن اهو به ٻڌايو ته ٽنڊو محمد خان جي اندر به روڊن رستن جي تعميرات لاءِ اسڪيمن لاءِ سنڌ جي وڏي وزير کي خصوصي گرانٽ جي سفارش ڪئي ويندي. انهيءَ موقعي تي پ پ جي ايم پي اي سيد اعجاز حسين شاهه بخاري تقريب کي خطاب ڪندي چيو ته پيپلزپارٽي عوام جي پارٽي آهي. سنڌ حڪومت سنڌ جي مفادن جي خلاف ڪنهن به منصوبي کي قبول نه ڪندي. ڪالاباغ ڊيم ٽن صوبن جو رد ٿيل ملڪ دشمن منصوبو ٿي ويو آهي. آدمشماري شفاف ٿيڻ گهرجي. تقريب کي پ پ جي ضلعي صدر حاجي محمد امين لاکو خطاب ڪندي چيو ته آدمشماري اسان جي عوام لاءِ جياپي جو مسئلو بڻيل آهي. جنهن لاءِ آدمشماري ۾ رڪاوٽون ختم ٿيڻ گهرجن. تقريب کي پريس ڪلب جي صدر غلام نبي ڪيريو خطاب ڪندي چيو ته سنڌ جي صحافين هميشه حق ۽ سچ سان پنهنجا صحافتي فرائض انجام ڏنا آهن. تقريب کي يونين آف جنرلسٽ جي صدر شهزاد صبح پوٽو، ٽي وي جنرلسٽ جي صدر عبدالڪريم شيخ ۽ ٻين خطاب ڪيو. جڏهن ته صوبائي صلاحڪار مولابخش چانڊيو. پريس ڪلب جي آڊيوٽريم هال لاءِ 15 لک رپيا ۽ اڳ منظور ڪيل 5 لک رپيا ڏيڻ جو اعلان ڪيو آهي.

 

سنڌ حڪومت شروعاتي طور 8 ايڪڙ زمين ۽ 5 ڪروڙ روپيا ڏنا آهن: وڏو وزير

خيرپور (ڊ.ر) سنڌ جي وڏي وزير سيد قائم علي شاهه ڪالهه شام هتي شاهه عبداللطيف يونيورسٽي لڳ قومي شاهراهه تي ايس او ايس چلڊرين وليج پاڪستان پاران سنڌ حڪومت جي مالي سهڪار سان يتيم ۽ لاوارث ٻارن جي تعليم ۽ سار سنڀال لاءِ تعمير ڪرايل گهرن جو افتتاح ڪيو، پهرئين مرحلي ۾ پنج گهر ٺهرايا ويا آهن ۽ ٻئي مرحلي ۾ وڌيڪ 10 گهر ٺهرايا ويندا. سنڌ حڪومت ان مقصد لاءِ شروعاتي طور 8- ايڪڙ زمين ۽ 5 ڪروڙ رپين جي رقم فراهم ڪئي آهي. ان حوالي سان منعقد ڪيل پروقار تقريب کي خطاب ڪندي، وڏي وزير چيو ته سماج جي نظرانداز ڪيل ۽ والدين جي شفقت کان محروم ٿي ويندڙ ٻارن جي بهتر پالنا ۽ سکيا سان ئي کين سماج جو ڪارگر انسان بڻائي سگهجي ٿو. هن ان قسم جي ٻارن جي بهتر ماحول ۾ سار سنڀال لهڻ ۽ کين جديد قسم جي تعليم ۽ سکيا جون سهولتون فراهم ڪرڻ تي ايس او ايس چلڊرين وليج پاڪستان جي ڪوششن کي واکاڻيندي، يقين ڏياريو ته سنڌ حڪومت هن نيڪ مقصد لاءِ هر ممڪن سهڪار جاري رکندي. تقريب کي خطاب ڪندي اڳوڻي سينيٽر ۽ وفاقي وزير جاويد جبار، جيڪو هن اداري جي صلاحڪاري ڪائونسل جو چيئرمين پڻ آهي، چيو ته سماج جي نظرانداز ڪيل ۽ مائٽن جي شفقت کان محروم ٻارن کي يتيم ٻار سڏڻ سان منجهن احساس ڪمتري پيدا ٿئي ٿي ۽ اسانکي گڏيل ڪوششن جي نتيجي ۾ اهڙن ٻارن ۾ اعتماد پيدا ڪرڻو آهي. هن خيرپور ۾ ايس او ايس چلڊرين وليج قائم ڪرڻ ۾ سنڌ حڪومت کان علاوه قومي اسيمبلي جي ميمبر نفيسه شاهه ۽ ڪمشنر سکر محمد عباس بلوچ جي ذاتي دلچسپي ۽ ڪوششن جي پڻ ساراهه ڪئي. هن ٻڌايو ته هي ادارو گذريل چئن ڏهاڪن کان نالي وارن سرنديءَ وارن شخصيتن ۽ ادارن جي سهڪار سان خدمتون سرانجام ڏئي رهيو آهي ۽ هن وقت سڄي ملڪ جي 17 شهرن ۾ 52 مرڪز ڪم ڪري رهيا آهن. هن چيو ته هن اداري مان ڪيترائي ٻار فارغ ٿيڻ کانپوءِ مختلف ۽ اهم شعبن ۾ ڪامياب زندگي گذاري رهيا آهن. جاويد جبار وڌيڪ ٻڌايو ته هن اداري ۾ نه رڳو خيرپور ضلعي پر اتر سنڌ سان تعلق رکندڙ 150 ٻارن کي صرف ميرٽ آڌار داخلا ڏني ويندي. هن ٻڌايو ته هر گهر تي پنجاهه لک رپيا لاڳت اچي رهي آهي. هن سرنديءَ وارن ماڻهن ۽ ادارن کي اپيل ڪئي ته هو هن نيڪ مشن کي ڪامياب بڻائڻ ۾ مالي سهڪار ڪن. تقريب کي ايس او ايس چلڊرين وليج پروگرام پاڪستان جي صدر ثريا انور ۽ ٻين پڻ خطاب ڪيو.

 

دهشتگردي خلاف ضرب عضب ڪاميابي سان جاري آهي، پاڪستان مان دهشتگردي ختم ڪنداسين: پرويز رشيد

اسلام آباد  (بيورو) سڌ سماءَجي وفاقي وزير پرويز رشيد چيو آهي ته ضرب عضب ڪاميابي سان جاري آهي، پاڪستان مان دهشتگردي ختم ڪري سک سان ويهنداسين، 2018 جي چونڊن ۾ عوام فيصلو ڪندو، پاڪستان ڪنهن ٺاهيو آهي هڪ انٽروويو ۾ هن چيو ته دهشتگردي هڪ عالمي مسئلو آهي، عالمي برادري دهشتگردي جي خاتمي لاءِ پاڪستان جي ڪردار جو اعتراف ڪري رهيو آهي، هڪ سوال جي جواب ۾ هن چيو ته ملڪ مان بيروزگاري، غربت، لوڊشيڊنگ ۽ دهشتگردي جي خاتمي لاءِ ڏينهن رات ڪم ڪري رهيا آهيون، اقتصادي راهداري سان ملڪ جي قسمت جاڳي پوندي ۽ 2018 جي عام چونڊن ۾ عوام فيصلو ڪندو ته نئون پاڪستان ڪنهن ٺاهيو آهي.

 

حڪمران اهو ٻڌي ڇڏين ته ڪالاباغ ڊيم ڪنهن به صورت ۾ قبول نه ڪنداسين:سيد خورشيد شاهه

هنگورو(رپورٽر) قومي اسيمبلي ۾ مخالف ڌر اڳواڻ سيد خورشيد احمد شاهه چيو آهي ته پاڪستان ۾ جمهوريت شهيد ذوالفقار ڀٽو ۽ محترمه بينظير ڀٽو جي ڪري قائم ٿي،ڀٽوڪٽنب ملڪ ۾ جمهوريت جي بحالي لاءِ سڀني کان گهڻيون قربانيون ڏنيون آهن.پنو عاقل ويجهو هنگورو ۾ پُل هي افتتاح کانپوءِ تقريب کي خطاب ڪندي مخالف ڌر اڳواڻ چيو ته ملڪ ۾ امن امان آرمي چيف جنرل راحيل شريف جي ڪوششن سبب ٿيو،پاڪ فوج دهشتگردن خلاف ڀرپور آپريشن به ڪيو ۽ دهشتگردي ۾ ملوث ماڻهن کي چيڀاٽي ڇڏيو.سندس چوڻ هو ته نيب جڏهن پنجاب جو منهن ڪري ٿي ته ڪير پر ڪٽڻ جي ڳالهه ڪري رهيو آهي ته وري ڪنهن جي ساهه واري رڳ تي لت آئي آهي،ڪيڏي نه عجيب ڳالهه آهي ته وزيراعظم نوازشريف به نيب بابت ڳالهيون ڪري عوام کي پريشان ٿو ڪري.هُن چيو ته سياستدانن کي ڪرپشن جي خاتمي ۾ پنهنجو ڪردار ادا ڪرڻو پوندو ۽ ڪرپشن خلاف ويڙهه ڪرڻي پوندي.خورشيد شاهه جو چوڻ هو ته هڪ ڀيرو ٻيهر ڪالاباغ ڊيم جون ڳالهيون ٿي رهيون آهن،پر حڪمران اهو سمجهي ڇڏين ته اسان کي ڪالاباغ ڊيم ڪنهن به صورت ۾ قبول ناهي،ڪالاباغ ڊيم بابت اسانجو موقف ساڳيو آهي،جيڪڏهن ڪنهن کي به ڪالاباغ ڊيم ٺاهڻ جو خيال آهي ته دل مان ڪڍي ڇڏي.سندس وڌيڪ چوڻ هو ته شهيد ذوالفقار ڀٽو ۽ بينظير ڀٽو جي قربانين سبب ملڪ ۾ جمهوريت جو ٻج پيو،جهڙي طرح ڀٽو خاندان هن ملڪ ۽ قوم لاءِ قربانيون ڏنيون آهن اهڙي طرح ڪنهن به ناهن ڏنيون.

 

بدقسمتيءَ سان پيپلزپارٽي کي شهيد ذوالفقار علي ڀٽو جو متبادل آصف زرداري مليو:خواجا سعد رفيق

لاهور (م.ڊ) وفاقي وزير خواجا سعد رفيق چيو آهي ته هي هڪ حقيقت آهي ته پاڪستان جي ڪنهن به سياسي پارٽي ۾ جمهوريت ناهي،پارٽين تي خاندانن جو قبضو آهي ۽ بدقسمتيءَ سان شهيد ذوالفقار علي ڀٽو جو متبادل آصف علي زرداري مليو.لاهور ۾ اتحاد امت ڪانفرنس کي خطاب ڪندي خواجا سعد رفيق  جو چوڻ هو ته پاڪستان ۾ شروع کان ئي سياست تي هڪ خاص ماڻهن جو قبضو رهيو ۽ هاڻي حقيقت اها آهي ته ڪنهن به سياسي پارٽي ۾ جمهوريت ناهي،بدقسمتيءَ سان پاڪستان جي باني قائداعظم محمد علي جناح جي زندگيءَ ٿوري هئي،جنهن کانپوءِ لالچي وڏيرن ۽ ڪجهه جرنيلن جي اتحاد پاڪستان کي اڻ کٽ نقصان پهچايو.سدنس چوڻ هو ته نظريا ضرورت مطابق ڪرسي تي ايندڙ جج به ملڪ جي ٽٽڻ جا ذميدرا آهن.ڪجهه لالچي ماڻهن سياست تي پنهنجو اثر ڄمايو ۽ ملڪ ۾ سياسي پارٽين کي وڌڻ نه ڏنو ايتري تائين جو بدقسمتيءَ سان پيپلز پارٽي کي شهيد ذوالفقار علي ڀٽو جو متبادل آصف زرداري مليو.ريلوي جي وفاقي وزير خواجا سعد رفيق جو چوڻ هو ته ملڪ کي ڪنهن ٻاهرين دشمنن مان خطرو ناهي،پر اندروني سازشي ماڻهن جو ڊرپ آهي،اسان هڪ ٻئي تي شڪ ڪيون ٿا ۽ پاڻ تي اعتماد نه ٿا ڪيون.اسان پنهنجي ملڪ کي مضبوط ڪنداسين.سندس چوڻ هو ته پاڪستان لاءِ مذهبي پارٽين وڏي خدمت ڪئي پر دهشتگردن عالمن سڳورن جي محنت تي پاڻي وجهي ڇڏيو ۽ مسجدن،امام بارگاهن توڙي ٻين پاڪ هنڌن تي بم ڌماڪا ڪري مذهب کي بدنام ڪيو.

 

اسٽريٽجڪ ڳالهين لاءِ پاڪستاني وفد واشنگٽن پهچي ويو، آمريڪا کي سيڪيورٽي خطرن بابت ٻڌائينداسين: احسن اقبال

اسلام آباد (بيورو) آمريڪا سان اڄ کان رٿيل اسٽريٽجڪ ڳالهين لاءِ پاڪستاني وفد واشنگٽن پهچي ويو آهي، وفد ۾ شامل وفاقي وزير احسن قبال جو چوڻ آهي ته پاڪستان ۽ آمريڪا جي لاڳاپن ۾ نئين واڌ آئي آهي، اسان آمريڪا کي سيڪيورٽي خطرن بابت ٻڌائينداسين، پرڏيهي معاملن واري صلاحڪار سرتاج عزيز جي اڳواڻي ۾ واشنگٽن پهتل وفد ۾ احسان اقبال، عابد شير علي ۽ گهرو سيڪريٽري عارف خان شامل آهن، آمريڪي پرڏيهي وزير جان ڪيري ڳالهين ۾ پنهنجي ملڪ جي وفد جي اڳواڻي ڪندو، احسن اقبال هڪ خانگي ٽي وي سان فون تي ڳالهائيندي چيو ته پاڪ – آمريڪا اسٽريٽجڪ ڳالهين جو مقصد لاڳاپن کي وڌائڻ آهي، هن چيو ته ماضِي ۾ ٻنهي  ملڪن جا لاڳاپا رڳو سيڪيورٽي تائين محدود هئا پر هاڻ ڳالهين ۾ تعليم، ٽيڪنالاجي ۽ معيشت جهڙا معاملا به شامل آهن. احسن اقبال جو چوڻ هو ته اسان آمريڪا کي پهرين به سيڪيورٽي خطرن بابت ٻڌائيندا رهيا آهيون ۽ هاڻ به ٻڌائينداسين، وفاقي وزير چيو ته پاڪستان جي ڪوشش آهي ته خطي ۾ امن اچي، جنهن لاءِ آمريڪا سان گڏجي ڪم ڪري رهيا آهيون.

 

نيب سربراهه کي آزاد ۽ خودمختيار بڻايو وڃي:عمران خان

اسلام آباد(بيورو) پاڪستان تحريڪ انصاف جي چيئرمين عمران خان چيو آهي ته جيستائين نيب ۽ ان جي سربراهه کي آزاد ۽ خودمختيار نه ٿو ڪيو وڃي تيستائين ملڪ ۾ ڪنهن به ڪرپٽ ماڻهو جو احتساب صحيح طريقي سان نه ٿيندو،اسلام آباد ۾ تحريڪ انصاف جي ميمبر سازي مهم جي شروعات جي موقعي تي ميڊيا سان ڳالهائيندي عمران خان چيو ته ڪي پي ڪي کان سواءِ ڪنهن به صوبي بنا ڪنهن فرق جي احتساب لاءِ قدم ناهن کنيا،احتساب بابت ترميم تي نظر وجهڻ لاءِ ڪميٽي جي منظوري ڏئي ڇڏي آهي،انهن جي سربراهي ۾ ڪميٽي قانون ۾ ترميم جو جائزو وٺندي ۽ آزاد احتساب ۾ رنڊڪ بڻجڻ واري ترميم کي ختم ڪيو ويندو.پيپلز پارٽي ۽ مسلم ليگ(ن) هڪ معاهدي مطابق 18 هين ترميم ڪئي جنهن کانپوءِ ٻنهي پارٽين ڳٺ جوڙ ڪري پنهنجي مرضي مطابق نيب چيئرمين مقرر ڪيو،اسان انهيءَ جي مخالفت ٿا ڪيون ۽ مطالبو ٿا ڪيون ته نيب چيئرمين کي آزاد ۽ خودمختيار بڻايو وڃي.عمران خان جو چوڻ هو ته تحريڪ انصاف ملڪ جي واحد پارٽي آهي،جنهن ۾ اندروني طور تي به جمهوريت آهي،جڏهن ته ٻين پارٽين ۾ خاندانن جو راڄ ۽ بادشاهت قائم ٿيل آهي.

 

لياري ميڊيڪل ڪاليج ۾جعلي داخلائن جو انڪشاف، متاثرن پاران عدالت وڃڻ جو اعلان جو احتجاج

ملير(ڊ.ر) شهيد بينظير ڀٽو ميڊيڪل ڪاليج لياري ۾ ڪراچي جي ٻهراڙين لاءِ رکيل سيٽن تي ڌاڙو، ڪيترن ئي با اثر ماڻهن ٻهراڙين جا جعلي ڊوميسائيل ۽ پي آر سي ٺهرائي ميڊيڪل ڪاليج ۾ داخلا ورتي، ٻهراڙي جي شاگردن ۽ والدين جي احتجاج بعد ڊي سي ملير ڪيترن ئي شاگردن جا ڊوميسائيل رد ڪري ڇڏيا. ڊي سي ويسٽ جعلي دوميسائيل رد ڪرڻ کان انڪار ڪري ڇڏيا. ٻهراڙين جي شاگردن ۽ والدين جو احتجاج، ٻهراڙين جي حقن تي ڌاڙو هنيو ويو آهي. جيڪڏهن جعلي پي آر سي ۽ ڊوميسائيل رد ڪري اسان سان انصاف نه ڪيو ويو ته عدالت ۾ وينداسين. ڪراچي ٻهراڙي جي شاگردن ۽ و الدين جون صحافين سان ڳالهيون تفصيلي رپورٽ مطابق شهيد بينظير ڀٽو ميڊيڪل ڪاليج ۾ ڪراچي جي ٻهراڙي وارن پٺتي پيل علائقن لاءِ مخصوص ڪيل ميڊيڪل جي سٽن تي جعلي پي آر سي ۽ ڊوميسائيلن ذريعي ڪراچي شهر ۽ ملڪ جي ٻين شهرن جي با اثر ماڻهن جي پٽن ۽ ويجه مائٽن کي داخلا ڏيڻ جو انڪشاف ٿيو آهي. انهي سلسلي ۾ معلوم ٿيو آهي ته ضلعي ملير جي علاقي گڏاپ لاءِ مخصوص ڪيل 10 سيٽن، بن قاسم جي مخصوص ڪيل 10 سيٽن ۽ضلعي ويسٽ جي ٻهراڙين لاءِ مخصوص ڪيل ميڊيڪل جي 10 سيٽن تي ڪراچي ٻهراڙي جي حقيقي شاگردن جي بجاءِ سمورين سيٽن تي جعلي ڊوميسائيلن ذريعي ڌارين کي داخلا ڏني وئي آهي. گڏاپ جي ٻهراڙي وارن ڳوٺن جي سيٽن تي جعلي پي آر سي ۽ ڊوميسائيلن ذريعي جن غير مقامي شاگردن کي شهيد بينظير ميڊيڪل ڪاليج لياري ۾ داخلا ڏني وئي آهي.، انهن ۾ مس ملحه فاطه، مس عائشه خان، مس ساميه قادر، شاهه مير رئوف، ردا راقب خان، صدام حسين، محمد محسن اسحاق، فهرين احسان، عبدالباسط شامل اهن. جڏهن ته ضلعي اولهه جي ٻهراڙي وارن ڳوٺن جي جعلي ڊوميسائيل تي جن کي ميڊيڪل ۾ داخلا ڏني وئي آهي انهن ۾ مس ڪرن علي، محمد ميران حسن، پارس، مائره، مس شيزا پروين، عريشه عمران، رضا محمد، عائشه صديقي، محموده عرف حرا ۽ سريبا ڪلثوم شامل آهن. اهڙي طرح بن قاسم جي ٻهراڙي وارن ڳوٺن لاءِ مخصوص ڪيل ميڊيڪل جي سيٽن تي به ٻهراڙي وارن شاگردن جي حقن تي ڌاڙو هڻي ٻين صوبن ۽ شهرن جي با اثر ماڻهن جي پٽن ۽ ويجه عزيزن کي داخلائون ڏنيون ويون آهن. هوڏانهن ضلعي ملير جي مختلف ڳوٺن جي شاگردن ۽ والدين عبدالستار بڪڪ، محمد انور ميمڻ، محمد نواز بلوچ، اشفاق احمد ميمڻ، اسماعيل علي ۽ ٻين ملير پريس ڪلب پهچي صحافين کي ٻڌايو ته شهيد بينظير ڀٽو ميڊيڪل ڪاليج لياري ۾ ڪراچي جي پٺتي پيل ٻهراري وارن علائقن لاءِ ميڊيڪل جون سيٽون مخصوص ڪيون ويون آهن پر ڪراچي شهر ۽ ٻين صوبن جي با اثر ماڻهن ٻهراڙين جون ڪوڙيون پي آر سي ۽ ڊوميسائيل ٺهرائي پنهنجن پٽن ۽ عزيزن کي داخلائون ڏياريون آهن. هنن چيو ته اسان ڊي سي ملير جا ٿورائتا آهيون جنهن اسان جي درخواست تي جعلي ڊوميسائيل رد ڪيا اهن پر ڊي سي اولهه اسان جي ڳالهه ٻڌڻ لاءِ به تيار نه آهي. ڳوٺن جي شاگردن ۽ والدين وزير اعليٰ سنڌ کي اپيل ڪئي آهي ته ٻهراڙين جي حقن تي لڳل ڌاڙي جو نوٽيس وٺي ڪوڙا ڊوميسائيل ۽ پي آر سيون رد ڪيون وڃن ۽ ٻهراڙين لاءِ مخصوص ڪيل ميڊيڪل جي سيٽن تي ٻهراڙين جي شاگردن کي داخلا ڏني وڃي. هنن چيو ته جيڪڏهن ڪوڙا ڊوميسائيل ۽ پي آر سي رد نه ڪيا ويا ته هو انصاف لاءِ عدالت ۾ ويندا.

 

مٽياري ڀرسان موٽر سائيڪل ۽ ٽرالر ۾ ٽڪر، هڪ فوت،ٻه زخمي

مٽياري (رپورٽر) مٽياري ڀرسان ڇنڊڻ موري وٽ ٽرالر ۽ موٽرسائيڪل وچ ۾ ٽڪر ٿي پيو، جنهن جي نتيجي ۾ موٽرسائيڪل تي سوارڳوٺ بچو جعفراڻي جا رهواسي 30 سالا نوجوان سلطان ولد سليمان جعفراڻي کوسو فوت ٿي ويو، جڏهن ته سندس سوٽ حسين بخش ولد در محمد کوسو ۽ سليمان جعفراڻي کوسو زخمي ٿي ويا. موقعي تي موجود مقامي ماڻهن فوتي ۽زخمين کي تعلقه اسپتال مٽياري پهچايو جتي فوتي سلطان کوسو جي لاش کي ضروري ڪارروائي بعد وارثن حوالي ڪيو ويو ۽ زخمين کي طبي امداد ڏني وئي. ٻي طرف پوليس ٽرالر ۽ ڊرائيور کي پنهنجي تحويل ۾ وٺي ڇڏيو آهي.