تازيون خبرون

Monthly Archives: January 2016

سلمان خان نيڪ دل ۽ همدرد انسان آهي: پلڪ موڇال

ممبئي (شوبز نيوز) ناليواري ڀارتي ڳائڻي پلڪ موڇال چيو آهي ته بالي ووڊ دبنگ سلمان خان نيڪ دل ۽ همدرد انسان آهي، هڪ انٽرويو ۾ هن چيو ته سلمان خان اهڙو انسان آهي، جيڪو ٻين جي ڏک کي پنهنجوسور سمجهي ٿو ۽ ڏکويل ماڻهن جي مدد لاءِ سدائين تيار رهندو آهي، هن چيو ته هوءَ جڏهن ممبئي آئي ته سلمان خان سان سندس ملاقات ٿي ۽ هن سندس هڪ فلم لاءِ ڪلام به رڪارڊ ڪرايو، پلڪ ٻڌايو ته سندس ان ڪلام کي سڀني ساراهيو ۽ کيس ڀرپور نموني همٿايو.

 

صنم تيري قسم مون لاءِ هڪ نعمت آهي: ماورا حسين

ممبئي (شوبز نيوز) بالي ووڊ ۾ پهرين فلم ۾ ڪم ڪندڙ پاڪستاني اداڪارا ماورا حسين چيو آهي ته فلم صنم تيري قسم مون لاءِ هڪ نعمت آهي، بالي ووڊ هنگاما ڊاٽ ڪام مطابق ماورا حسين هڪ انٽرويو ۾ چيو ته فلم جي هدايتڪار راڌيڪا رائو ۽ وني سپرو پاڪستاني ڊرامن ۾ منهنجي اداڪاري ڏسي چڪا آهن،جنهن ڪري فلم صنم تيري قسم لاءِ منهنجو ڪو آڊيشن نه ورتو ويو، هن چيو ته هوءَ گذريل ڪجهه سالن کان اهڙي ڪهاڻي جي ڳولا ڪري رهي هئي، جنهن مان مونکي اهو لڳي ته ان سان مون کي ڪارڪردگي ڏيکارڻ جو موقعو ملندو، ماورا چيو ته جڏهن راڌيڪا ۽ وني فلم صنم تيري قسم جي ڪهاڻي مونکي ٻڌائي ته مونکي احساس ٿيو ته ان ۾ ڪارڪردگي ڏيکارڻ لاءِ منهنجي لاءِ گهڻو ڪجهه آهي.

 

نه پاڪستان نه نيوزيلينڊ، ٻي ون ڊي ميچ برسات کٽي وئي، ميچ ختم ڪرڻ جو اعلان

نيپيئر (اسپورٽس نيوز) پاڪستان ۽ نيوزيلينڊ وچ ۾ ٽن ون ڊِي ميچن واري سيريز جي ٻي ميچ مينهن سبب ختم ڪئي وئي، ٻنهي ٽيمن وچ ۾ ٻي ون ڊي ميچ نيپيئر جي ميڪلين پارڪ ۾ رٿيل هئي پر مينهن سبب ان ۾ دير ٿي وئي، ميچ پاڪستاني وقت مطابق صبح جو 6 وڳي شروع ٿيڻي هئي پر ميدان ۾ پاڻي بيهجي وڃڻ ڪري راند شروع نه ٿي سگهي، امپائرن 10 لڳي 20 منٽن تي ٻيهر وڪيٽ ۽ ميدان جو معائنو ڪيو پر وڪيٽ تي آلاڻ ۽ آئوٽ فيلڊ آلي هجڻ ڪري ميچ ختم ڪرڻ جو اعلان ڪيو ويو، واضح هجي ته ٽن ميچن واري سيريز جي پهرين ميچ ۾ نيوزيلينڊ ڪاميابي ماڻي هئي، ٻنهي ملڪن وچ ۾ سيريز جي ٽئين ۽ آخري ون ڊي ميچ 31 جنوري تي کيڏي ويندي.

 

ڏکڻ ايشيائي راندين لاءِ پاڪستاني عورت باسڪيٽ بال ٽيم ۾ چوڌري نثار جي نياڻي نتاشا به شامل

لاهور(اسپورٽس نيوز) ڏکڻ ايشيائي راندين لاءِ پاڪستان جي عورتاڻي باسڪيٽ بال ٽيم ۾ وفاقي گهرو وزير چوڌري نثار علي جي نياڻي کي به شامل ڪيو ويو آهي، ڀارت ۾ 5 فيبروري کان رٿيل سيف گيمز لاءِ قومي عورت باسڪيٽ بال ٽيم جي چونڊ ڪئي وئي آهي، هڪ مهيني تائين ٽريننگ کانپوءِ رانديگرياڻين جي ڪارڪردگي جو جائزو وٺي 12 رڪني ٽيم جي چونڊ ڪئي وئي، جنهن ۾ وڏين صلاحيتن واري نتاشا نثار علي به شآمل آهي، جيڪا وفاقي گهرو وزير چوڌري نثار علي خان جي نياڻي آهي، ان کانسواءِ ملڪ جي مشهور فٽبالر حاجره خان کي به ٽيم ۾ شامل ڪيو ويو آهي، قومي عورت باسڪيٽ بال ٽيم جي اڳواڻي ثنا محمود حوالي ڪئي وئي آهي. واضح هجي ته قومي عورت باسڪيٽ بال ٽيم 20 سالن کانپوءِ ڪنهن عالمي مقابلي ۾ حصو وٺي رهي آهي،قومي ٽيم 1995ع ۾ پهريون ۽ آخري ڀيرو اسلامي راندين ۾ حصو ورتو هو.

 

پيڪجڊ کير توهان جي ٻارن جي صحت ۽ نشو ونما جو ضامن:تحرير : محمد صالح بلوچ

هر ماءُ پيءُ جي خواهش هوندي آهي ته هو پنهنجي ٻارن کي کلندڙ مهڪندڙ ، صحتمنڌ ۽ تندرست وڌندڙ زندگيءَ ڏانهن ڏسڻ چاهيندا آهن. سڀئي والدين پنهنجي ٻارن کي آئن اسٽائن وانگر روزگار سان ڏسڻ چاهينداآهن ته جيئن انهن کي پنهنجو ذاتي آئن اسٽائن جهڙي صحتمند خوراڪ فراهم ڪئي وڃي. جيڪو ٻار جي نشو و نما کي اڳتي وڌائي ٿو ان ڪري کير جي استعمال جي اهميت تي ڪنهن به انسان کي انڪار ڪونهي، جيتوڻيڪ ٻارن ۽ نوجوانن کي صحتمند جهڙي زندگي ڏانهن آڻڻ ڪنهن شينهن کان گهٽ ڪونهي، پنهنجي ٻار کي کير پيئڻ ڏانهن راضي ڪرڻ لاءِ هڪ ماءُ ٻار کي ڪهڙي طرح دلاسا ڏيئي کير پياري ٿي، اهو منظر ڪنهن به ماءُ کان ڳجهو ڪونهي. ٻارن ۽ وڏن کي به ڪنهن به وقت کير پيارڻ جي لاءِ راضي ڪرڻ واري جنگ رڙ ڪري گهرائڻ کان لڪيل ڪونهي. وڏا ٻار ته کير جي خوشبو سنگهي ائين ڀڄندا آهن ته ڄڻ ڪنهن زهر پيارڻ جو چئي ڇڏيو هجي. انسان ذات ۾ صحتمند ترين مشروبات ۾ غذائيت سان ڀرپور پهرين خالص غذائيت سان ڀرپور خالص شڪل ۾کير ئي هوندو آهي. مضبوط هڏين لاءِ ڪيلشيم ۽ فاسفيٽس، توانائي جي لاءِ ڪاربو هائيڊريٽس ۾ نشو و نما لاءِ پروٽين، رت جي ڳاڙهن جزن لاءِ رائبو فيلون ۽ مضبوط جسم لاءِ کوڙ سارين ٻين شين جي فراهمي لاءِ کير جو استعمال اڻ کٽ آهي پر پنهنجي انهن سمورين غذائي خوبين جي باوجود کير عام طور تي ٻارن ۽ نوجوانن لاءِ ڪا خاص ڪشش نه ٿو رکي. ڪو وقت اهڙو هو جو مائرون ڪچي کير ۾ ميوه ۽ ان قسم جون شيون ملائينديون هيون. پرهاڻي ڪمپنين اهو فرض پنهنجي مٿي کڻي مائرن جي ڪلهن تان بار هٽائي ڇڏيو. پر حقيقت ۾ اڄ به مائرون پنهنجي ٻارن جي ضروري غذائي شين جي فراهمي ۾ پريشان ۽ منجهيل ڏٺيون وڃن ٿيون.

مائرن جي اهڙي پريشاني ۽ حقيقت کي سامهون رکندي کير پيئڻ ڪيترو ضروري آهي، کير ڪمپنيون هاڻي فوري کير جو حل پيش ڪري رهيون آهن. هن وقت لوڪل سپر مارڪيٽن انتهائي بلند درجي حرارت تي ٽيڪنالوجي UHT جو استعمال ڪندي دٻن ۾ محفوظ صحتمند خالص کير ڏئي رهيون آهن. UHT ٽيڪنالاجي سان بندڪيل کير جي دٻن هاڻي ٻارن جي دنيائي تبديلي ڪري ڇڏي آهي. اهي گهمڻ ڦرڻ وقت هٿن ۾ کير جا دٻا کڻي گهمندا ڦرندا آهن ۽ ان نئين انداز سان لطف اندوز ٿيندا رهندا آهن.UHT ٽيڪنالوجي سان ٺهيل ان کير جي دٻن کي سڄي دنيا مان موٽ ملي رهي آهي. انهن کي ڪهڙي به موسم ۾ استعمال ڪري سگهجي ٿو ۽ ان جي درجي حرارت بهتر رهي ٿي. پر شرط اهو آهي ته مدو ختم ٿيل نه هجي. اهو نه فقط ٻارن جي غذائيت فراهم ڪري ٿو پر ان ۾ کير جا ضروري غذائي جذا پڻ شامل آهن. جڏهن ته ان جو ذائقو تمام بهترين ۽ ٻارن کي گهربل توانائي مضبوطي، طاقت سان وڌ ۾ وڌ طبعي ۽ ذهني نشو و نما لاءِ اڪسير آهي. تحقيق ٻڌائي ٿي ته غذائيت جو گهڻو ڪري نقصان تقريبن پروسيس جي نتيجن ۾ ٿئي ٿو. پاڪستان ۾ کير کي استعمال جي قابل بڻائڻ لاءِ عام طور تي ڪجهه وقت لاءِ چلهي تي گرم ڪرڻ لاءِ چاڙهيو وڃي ٿو جڏهن ته، انڊسٽريل پروسيسنگ ۾ گرمائش لاءِ الٽرا هائي ٽيمپريچر پروسيس کي عمل ۾ آندو وڃي ٿو جنهن ڪري کير کي 130 ڊگري سينٽي گريڊ تي گرم ڪيو وڃي ٿو ۽ فورن دٻن ۾ بند ڪيو وڃي ٿو. ان ۾ هڪ سيڪنڊ جي لاپرواهي به سموري کير کي خراب ڪري سگهي ٿي. خوراڪ ۽ خاص ڪري کير کي محفوظ ڪرڻ لاءِ هي عام طور تي بنيادي طريقي ڪار آهي جڏهن ته کير کي گرم ڪرڻ جو وقت گهٽ هوندو آهي ته جيئن غذائيت وڌ کان وڌ برقرار رهي وڌيڪ گرم ڪرڻ سان کير جا ڪيترا انتهائي حساس جذا پنهنجي شڪل تبديل ڪري ختم ٿي وڃن ٿا.

UHT ٽيڪنالوجي سان تيار ڪيل کير جا گهڻا فائدا آهن جنهن کي استعمال ڪرڻ لاءِ حوصلا افزائي ڪرڻ گهرجي اهي ٻارن جي غذائيت کي هڪ پرڪشش صحتمند پيڪيج جون ضرورتون پوريون ڪن ٿا. انتهائي بلند درجي حرارت تي مشتمل هن ٽيڪنالوجي ذريعي بند کير سان لاڳاپيل غذائي قدر ۽ قيمت جي متعلق ماڻهن جي گهڻائي اڻ واقف آهي ۽ انهن کي خبر هئڻ گهرجي ته UHT  سان بند کير عام کليل کير جي مقابلي ۾ وڌيڪ صحتمنڌ هوندو آهي جيئن ته اسان جي گهرن ۾ کير کي اوٻارڻ کان پوءِ ان جا 50% سيڪڙو غذائي جزا ختم ٿي ويندا آهن ايستائين جو هول سيل کير جي دڪان تان ورتل کير ۾ نقصان جا خدشا اڃان وڌي ويندا آهن. مائرون عام طور تي ان ڄاڻ کان اڻ واقف هونديون آهن. ان وقت انهن کي ڄاڻ جي وڌيڪ ضرورت هوندي آهي ته جيئن ٻارن کي UHT سان تيار ڪيل کير جي استعمال ڪرڻ جو وارو اچي. جيترو ٿي سگهي ٻار کي مضبوط کير جي شروعات سان UHT جا تيار ڪيل کير جا دٻا استعمال ڪرايا وڃن. خاص ڪري ننڍي عمر ۾ ٻارن جي هڏين کي مضبوط ڪرڻ لاءِ ڪيلشيم جي ضرورت هوندي آهي ان جي نتيجي ۾ ايندڙ وقت جا صحتمند ذهن ۽ جسم رکڻ وارا جوان اڀرندا اوهان پنهنجي ٻارن کي بهترين ڪارڪردگي ۽ طاقت آڻڻ لاءِ انتهائي بلند درجي حرارت تي محفوظ ڪيل کير جو استعمال ڪرايو جيڪو اوهان جي ٻارن جي نشو و نما جو ضامن آهي.

*****

 

هي ڪهڙو سماجي شعور آهي؟: شفيق شاڪر

جپان دنيا جو هڪ صنعتي ترقي يافته ملڪ آهي ۽ جپان اها ترقي تمام مختصر وقت ۾ ڪئي آهي. جپان جو مشهور هوائي اڏو نيريٽا جنهن کي هاڻي ٽوڪيو  انٽرنيشنل ايئر پورٽ به چيو وڃي ٿو اهو دنيا جي ڏهن وڏن مصروف ترين هوائي اڏن مان هڪ آهي جيڪو جپان جي اٽڪل 50 سيڪڙو هوائي مسافرن جي لاء استعمال ٿئي ٿو پر حيرت جي ڳالھ اها جو اهو هوائي اڏو روزانو رات جو يارهين وڳين کان صبح ڇهين وڳين تائين هر قسم جي هوائي ٽريفڪ لاء بند ٿي وڃي ٿو. اهو ڪنهن سيڪيورٽي رسڪ جي پيش نظر بند نٿو ڪيو وڃي پر ان لاء بند ڪيو وڃي ٿو جو جيئن ته اهو شهري آباديء جي وچ ۾ آهي ان ڪري اتان جي شهري ميونسپل انتظاميه طرفان حڪومت تي اها پابندي لڳل آهي ته رات جو انهن شهرين جي ننڊ ۽ آرام ۾ هرگز رخنو نه پوڻ گھرجي جيڪي سڄي ڏينهن جي محنت کان پوء رات جو ڀرپور ننڊ جا مستحق هوندا آهن ته جيئن ٻئي ڏينهن تي بنان ڪنهن ٿڪاوٽ ۽ بي زاريء جي واپس ملڪ جي ترقيء ۽ بهتريء جي لاء پنهن جون مقرر ڪيل ذميداريون سهڻي نموني ادا ڪري سگھن.جيئن ته اتان جون ميونسپل حڪومتون عوام جي بنيادي حقن جي تحفظ جون ذميدار هونديون آهن ۽ عوام جي جذبن ۽ احساسن جون نمائنده هونديون آهن سو مرڪزي حڪومت کي اهو اختيار ئي ناهي جو اها انهنجي فيصلن کي تبديل يا رد ڪري سگھي.جپان جي ان هوائي اڏي جو مون ذڪر ان ڪري ڪيو جو اسان پنهنجوپاڻ کي عظيم تهذيب جا وارث سڏيندا آهيون ۽ انگريزن توڙي دنيا جي ٻين قومن جا صرف عيب ڪڍندا رهندا آهيون پر انهن جي اختيار ڪيل سهڻن اصولن جي تعصب سبب پيروي ته پري رهي پر جائز تعريف به نه ڪندا آهيون.

دنيا جي سڌريل ملڪن ۾ قانون جي پيروي ڪرڻ اتان جي شهرين جي عادت ۾ شامل ٿي چڪو آهي جڏهن ته قانون کي ٽوڙڻ اسان جهڙن ملڪن ۾ اسان جي قومي سڃاڻپ بڻيل آهي. اهي ڪڏهن به ڏسي وائسي ٽريفڪ سگنل جي خلاف ورزي نٿا ڪن.هنڌ هنڌتي گندگي نٿا ڦهلائين.ٻين شهرين لاء تڪليف ۽ پريشانيء جو سبب نٿا بڻجن.اهو سڀ ڪجھ ڇا آهي؟ انهيء کي شهري يا سماجي شعور Civic Sense چئبو آهي.جنهن قوم ۾ اهو شعور جيترو وڌيڪ پختوهوندو ان معاشري ۾ اوترو ئي وڌيڪ نظم ۽ ضبط ڏسڻ ۾ ايندو ۽ قومون پنهنجي زندگيء ۾ ايندڙ ڏکئي کان ڏکين موڙن ۽ مرحلن جو مقابلو صرف نّظم ۽ ضبط سان ئي ڪري سگھنديون آهن.جنهن معاشري ۾ ماڻهو نه سوچ ۾ منظم هجن،نه جسماني طور تي منظم هجن ۽ نه ئي سماجي طور تي منظم هجن ان معاشري ۾ افراتفري ۽ ڀڃ ڊاھ ته ڏسي سگھجي ٿي پر قومي يڪجهتي، سماجي ايڪتا ۽ سياسي استحڪام جا صرف خوبصورت خواب ئي ڏسي سگھجن ٿا.جنهن سماج ۾ هڪٻئي جي اهنج ۽ ايذاء جو خيال نه رکيو وڃي،ٻئي جي پريشانين ۾ اضافو ڪرڻ کي ڪو ڏوھ ئي نه سمجھيو وڃي ۽ هڪٻئي جي بنيادي حقن جو عملي انڪار ڪيو وڃي ته اهڙي سماج جا  شهري سدائين هڪ ٻئي کان بي زار نظر ايندا.جنهن جو نتيجو آخرڪار سماج ۾ نفرت، بغاوت ۽ تشدد جي صورت ۾ ئي ظاهر ٿئي ٿو. اسان وٽ ته قانون جڙندا ئي ان ڪري آهن ته انهنکي ٽوڙيو وڃي. خود قانون جوڙيندڙ ۽ انهن تي عمل ڪرائيندڙ ئي قانون جا بکيا اڍيڙڻ ۾ اڳيان اڳيان نظر ايندا.ڇا اسان جي ملڪ ۾ پوليس جو ڪو سپاهي وڏين گاڏين ۾ گھمندڙ اشرافيا کي روڪڻ لاء اشارو ڪرڻ جو تصور ڪري سگھي ٿو؟ان ڪري جو اسان اڃا تائين پنهن جي وحشي دور واري تاريخ مان آزاد نه ٿيا آهيون جتي قانون صرف ڪمزورن جي پيرن جي ٻيڙي بنيل هوندو آهي.

اها ته ٿي وڏن ماڻهن جي ڳالھ پر اسان مان هرڪو جنهنکي جيترو اختيار آهي قانون ٽوڙڻ ۽ ٻئي جي حق تلفي ڪرڻ ۾ وسان نٿو گھٽائي. اڄ ڪلھ هڪ برگر فيشن به اسان جي معاشري جي سڃاڻپ بڻيل آهي.سمجھ ۾ نٿو اچي ته اها جھنگلي ٻوٽي اوچتو ئي اوچتو ڪٿان پيدا ٿي آهي جنهن پوري سماج کي پنهن جي لپيٽ ۾ آني ڇڏيو آهي. موٽر سائيڪلن جي هٿ سان ڦاڙيل سائلنسرس جو شور،مٿان پريشر هارنن جي ملايل موسيقي ۽ گڏوگڏ انهن تي سجايل اسپيڪرن مان ايم پي ٿري جي ذريعي فل واليوم سان نڪرندڙ سر سنگيت، نه وقت جي پابندي ۽ نه ئي جاء جڳھ جو خيال، بس سفر جاري آهي.ايترو خيال به نٿو ٿئي ته ڪو بيمار سڄي رات تڙپي مس ستو هجي ۽ توهان جي ان شوق ان جي ننڊ زهر ڪري ڇڏي هجي!موٽر سائيڪلن جي ان نرالي شوق ۾ صرف اشرافيا جا ئي ٻار ڪونهن پر عام طور تي ته موٽر سائيڪل هوندي ئي وچين يا هيٺئين طبقي جي ماڻهن وٽ آهي.انهيء انسان آزار ڪلچر جو شڪار صرف جاهل ۽ اڻ پڙهيل ئي نه هوندا آهن پر ڪاليجن ۽ يونيورسٽين ۾ پڙهندر شاگرد،مدرسن ۾ ديني تعليم حاصل ڪندڙ کٿابي، ايستائين جو ٻارن کي تعليم ۽ تربيت ڏيندڙ ڪجھ استاد به وڏي فخر سان اهڙين موٽرسائيڪلن کي ڊوڙائيندي نظر ايندا آهن.جڏهن ڪنهن معاشري ۾ معزز استاد صاحبان جن کي رول ماڊل سمجھيو ويندو آهي اهي به ان سماجي شعور کان وانجھيل هجن ته پوء سماج جو اهو ئي حشر ٿيڻو آ جيڪو اسان کي نظر اچي رهيو آهي. اسان جي تعليمي ۽ تربيتي نظام ۾ ڪا بنيادي خّامي ضرور آهي جو سماج طرف اسان جا رويا مثبت گھٽ ۽ منفي زياده آهن.اسان پنهن جي گهر جو گند بنان هٻڪ جي ٻئي جي گھر اڳيان ڦٽو ڪري پنهن جي ذميداري پوري ڪرڻ ۾ فخر محسوس ڪندا آهيون.پر ٻئي جي گھر جي اڳيان گندگي ڦٽي ڪرڻ جي ڪري جيڪا اذيت انهن گھر وارن کي برداشت ڪرڻي پوي ٿي انهيء جو احساس نه اسان کي پاڻ ٿئي ٿو ۽ نه ڪو ٻيو اسان کي اهو احساس ڏياري ٿو.اهڙيء طرح ڪا شيء کائي يا استعمال ڪري انهيء جي ٿيلي يا ڪاغذ جتي آيو اتي ڦٽي ڪرڻ به اسان جي قومي مزاج ۾ شامل آهي.

اهڙيء طرح ڪنهن سرڪاري يا نجي عمارت کي پنهن جي مذهبي، سياسي، سماجي ۽ تجارتي تشهير جو مرڪز بنائڻ کي به ڪو اخلاقي ڏوھ نٿو سمجھيو وڃي.هتان ڪنهن عمارت تي رنگ ٿيو ناهي هتان انهيء تي ان عمارت جي مالڪ جي مرضيء سوا انهيء تي رنگ برنگي اشتهار،مذهبي گڏجاڻين جون دعوتون، سياسي جلسن جون ڪوٺون، مختلف حڪيمن جاڏس پتا، ايستائين جو نفرت پکيڙيندڙ نعرا ۽ گار گند جو وسيع ذخيرو پڙهڻ لاء نظر ايندو. ظاهر آهي ته اهو ڪم اڻ پڙهيل ته ڪري نٿا سگھن،اهي سڀ پڙهيل لکيل مخلوق جا سونهري ڪارناما هوندا آهن.اهو سڀ ڪجھ اسان ان عمارت کي پنهنجي ذاتي ملڪيت سمجھي ڪندا آهيون ۽ عمارت جي مالڪ جي بنيادي حقن جواسان کي ذرو به خيال نه ايندو آهي.موبائيل فون ۽ انٽرنيٽ جي سهوليت ته اسان آسانيء سان حاصل ڪري ورتي پر انهن کي به ڪنهن تعميري ۽ مثبت رخ ۾ استعمال ڪرڻ بدران اڪثر ٻين جي آزار جي لاء استعمال ڪيو وڃي ٿو ۽ انهن شين جي استعمال جي بنيادي اخلاقيات اسان اڃا تائين نه سکي سگھيا آهيون.نيٽ تي اڻ وڻندڙ زبان جو استعمال ۽ موبائيل جي استعمال ۾ وقت ۽ موقعي جو خيال نه رکڻ ۽ ڪنهن جي آرام وقت فضول قسم جا ميسيج موڪلڻ ،انهن شين کي اسان شهري شعور جي خلاف ڪڏهن سمجھيو ئي ناهي.شهرن ۽ ڳوٺن ۾ ڪروڙن جي خرچ سان ٺهيل بنگلا ۽ عمارتون ته اسان کي ٺهيل نظر اينديون پر ان بنگلي مان ڊرينج سسٽم جو ٻاهر نڪتل پائيپ ان ڪري اتي جو اتي ڇڏي ڏيندا آهيون جو اسان اها ذميداري ٽائون يا ميونسيپل ڪميٽي جي سمجھندا آهيون ته اها انهيء کي ڪنهن گٽر سان ملائي ڇڏي.جيئن ته اسان جي ملڪ ۾ سرڪاري ادارا پنهنجو مقرر ڪم ايترو تيزيء ۽ آساني سان ڪندا ناهن انڪري اهي کليل پائيپ گھٽين ۾ گندگي جو ڍير ۽ ڪني پاڻي جو سمنڊ ڪٺو ڪندا رهندا آهن حالانڪه جڏهن بنگلي تي ڪروڙين روپيا خرچ ڪري سگھجن ٿا ته ٻه ٽي هزار ان جي مناسب ڊرينيج تي به خرچ ڪري سگھجن ٿا.پر جيئن ته اسان  تهادارا پري رهيا ،پنهن جي گھر جي گھٽيء جي به مالڪي ڪرڻ لاء تيار ناهيون ان ڪري اها صورتحال پيدا ٿئي ٿي.هر شيء ۽ هر خرابي جيڪر حڪومت جي کاتي ۾ وجھڻ سان اسان جو ڪو مسئلو حل ٿئي ٿو ته پوء ايئين به ڪيون پر سڀ مسئلا صرف حڪومتون ئي حل ڪري نٿيون سگھن. هڪ ننڍڙي مثال مان سمجھون. مثال ڪا ميونيپل ڪميٽي ڪنهن گھٽيء۾ پاڙي وارن جي سهوليت لاء ڪا بتي لڳائي ٿي پر ان پاڙي جا ٻار ان بتيء کي پٿر هڻي ٽوڙي ڇڏين ٿا .

ميونسيپل طرفان بار بار اها بتي بدلائي وڃي ٿي ۽ بار بار ان پاڙي جا ٻار انهيء جو ساڳيو حشر ڪن ٿا. نه پاڙي جو ڪو ماڻهو ان بتيء جي مالڪي ڪري ٿو ۽ نه ئي ٻارن کي ان حرڪت کان منع ڪري ٿو ته پوء آخر ميونسيپل ڪميٽي ڇا ٿي ڪري سگھي.اهو ننڍڙو مثال آهي پر ٻين معاملن کي به ان مثال ذريعي سمجھي سگھجي ٿو. اسان جون سماجي تڪليفون تيستائين گھٽجي نه سگھنديون جيستائين اسان ۾ سماجي شهري شعور بيدار نه ٿيندو ۽ اهو شعور تيستائين بيدار نه ٿيندو جيستائين اسان انهن شين جي مالڪي نه ڪنداسين.اهي جملا ته توهان پڙهيل لکيل ماڻهن جي وات مان اڪثر ٻڌندا رهندا آهيو ته “ سرڪاري مال آهي اسان جي گھران ڇا ٿووڃي!”جڏهن اسان پنهن جي فائدي لاء قائم ڪيل ادارن ۽ شين کان لاتعلقيء وارو رويو اختيار ڪيون ٿا ته پوء پبلڪ پارڪن ۽ قومي لائبريرين جو به اهو ئي حشر ٿئي ٿو!

******

 

ڪراچي جو امن

آرمي چيف جنرل راحيل شريف چيو آهي ته ڪراچي کي دهشتگردن کان پاڪ ڪرڻ لاءِ آخري حد تائين وينداسين، آءِ ايس پي آر موجب آرمي چيف جنرل راحيل شريف جي صدارت هيٺ امن امان بابت ڪور هيڊڪوارٽرز ڪراچي ۾ خاص اجلاس ٿيو. 6 ڪلاڪ جاري رهندڙ اجلاس ۾ ڪراچي ۾ هلندڙ ٽارگيٽيڊ آپريشن ۽ ضرب عضب آپريشن سميت مختلف معاملن جو جائزو ورتو ويو. اجلاس ۾ ڊيجي آءِ ايس آءِ ليفٽيننٽ جنرل رضوان اختر ، ڊي جي ايم آءِ نديم ذڪي ، ڪور ڪمانڊر ڪراچي ، ڊي جي رينجرز ۽ ٻين اعليٰ عملدارن شرڪت ڪئي. اجلاس دوران ڊي جي رينجرز ميجر جنرل بلال اڪبر آرمي چيف جنرل راحيل شريف کي ٽارگيٽيڊ آپريشن بابت بريفنگ ڏني. امن امان بابت اجلاس کي خطاب ڪندي آرمي چيف جنرل راحيل شريف چيو ته ڪراچي شهر توڙي ان کان ٻاهر ملڪ جي ٻين حصن ۾ پرامن ۽ بي خوف زندگيءَ کي يقيني بڻايو وڃي. ڳجهن ادارن دهشتگردن جو پتو لڳائي سندن نيٽ ورڪ ٽوڙيو آهي، جنهن تي انٽيليجنس ايجنسين جو ڪردار ساراهه جوڳو آهي، ڪراچي جي عوام جو تحفظ هر حال ۾ يقيني بڻايو ويندو. ٽارگيٽيڊ آپريشن لاءِ رينجرز جو ڪردار ساراهه جوڳو آهي. رينجرز سميت ملڪ جي سيڪيورٽي ادارن ڪراچي ۾ دهشتگردن جي نيٽ ورڪس کي بي نقاب ڪيو، انٽيليجنس ادارن جي ڪوششن سان نه رڳو دهشتگردن جي انفراسٽرڪچر کي تباهه ڪيو ويو، پر ان جي ڪراچي توڙي ڪراچي کان ٻاهر به ٺڪاڻن کي ختم ڪيو ويو. عوام جي جان ۽ مال جو تحفظ يقيني بڻايو وڃي، اسان شهرين جي پرامن ۽ بي خوف معمول واري زندگي کي ممڪن بڻائينداسين، ملڪ جا انٽيليجنس ادارا دهشتگردن جي نيٽ ورڪ جو پتو لڳائڻ ۽ سندن چيلهه چٻي ڪرڻ تي مبارڪباد جا مستحق آهن.

سنڌ ۾ جيڪو هن وقت امن امان قائم ٿيو آهي ان ۾ خاص طور تي سنڌ حڪومت جون ڪوششون آهن ۽ وفاق جي اها دعويٰ ته سنڌ خاص طور تي ڪراچي ۾ امن قائم ٿيو آهي جيڪا ڏيکاءُ جي ڳالهه آهي ۽ ان ۾ سمورا استعمال  ٿيندڙ وسيلا اهي سنڌ حڪومت جا آهن ۽ ان ۾ رينجرز جو به ڪردار آهي وفاقي وزير گهرو جيڪو سنڌ ۾ امن امان لاڳو ڪرڻ جي دعويٰ ڪري رهيو آهي فقط هڪ ڀيرو سنڌ ۾ آيو هو ۽ چيو ته ان مسئلي کي پاڻ ئي سنڀاليو انڪري اهي مسئلا اسان پاڻ ئي سنڀاليا آهن ۽ الحمدا لله اسان ان ۾ ڪاميابي حاصل ڪئي آهي . دهشتگردي جي خاتمي ۽ امن امان قائم ڪرڻ کانپوءِ اسانجي اولين ترجيح ماڻهن کي وڏي انگ ۾ روزگار فراهم ڪرڻ  آهي ڪراچي جا شهري مڃن ٿا ته هاڻي ڪراچي ۾ امن امان قائم ٿي ويو آهي ۽ اتان جا رهواسي هاڻي ڪراچي شهر ۾ آزاداڻي  طرح سان گهمي ڦري سگهن ٿا ۽ اهي خريداري به ڪن ٿا.

 

ڪراچي کي دهشتگردي کان پاڪ ڪرڻ لاءِ آخري حد تائين وينداسين: آرمي چيف

ڪراچي (اسٽاف رپورٽر) پاڪ فوج جي عام رابطن واري شعبي آئي ايس پي آر مطابق ڪورهيڊ ڪواٽرز ڪراچي ۾ پاڪ فوج جي سربراهه جنرل راحيل شريف جي صدارت هيٺ امن امان بابت اجلاس ٿيو،جنهن ۾ ڊي جي آئي ايس آئي ليفٽيننٽ جنرل رضوان اختر،ڪورڪمانڊر ڪراچي ليفٽيننٽ جنرل نويد مختيار،ڊي جي آيم آئي،ڊي جي رينجرز سنڌ ۽ ٻيون اعليٰ اختياريون شامل هيون.5 ڪلاڪن کان وڌيڪ وقت هلندڙ هن اجلاس ۾ امن امان جي صورتحال ۽ ڪراچي آپريشن جو جائزو ورتو ويو.جڏهن ته اختيارين ڪراچي ۾ ڳجهي ڄاڻ تي ٻڌل آپريشن بابت آرمي چيف کي وضاحت به ڏني. اجلاس جي دوران جنرل راحيل شريف نمايان ڪاميابيون ماڻڻ تي ڳجهن ادارن جي واکاڻ ڪندي چيو ته ڪراچي جي عوام جي روز مرهه جي زندگي کي بنا ڊپ جي ۽ پرامن بڻايو وڃي.ڪراچي کي امن امان جي  حوالي سان تحفظ جي پڪ ڏيون ٿا،جنرل راحيل شريف حڪم ڏنو ته ڪراچي ۾ دهشتگردن جي نيٽ ورڪن کي تباهه ڪندي شهر کان ٻاهر انهن جي ٿاڪن ۽ رابطن کي ختم ڪيو وڃي ۽ڪراچي کي دهشگردي کان پاڪ ڪرڻ لاءِ آخري حد تائين وينداسين.

 

وفاق جي دعويٰ ڏيکاءُ آهي، امن امان سنڌ سرڪار جي ڪوششن سبب بحال ٿيو: وڏو وزير

دادو/ڪي اين شاهه/ميهڙ (نمائندن وٽان)وزير اعلى سنڌ سيد قائم علي شاهه پاران خيرپورناٿن شاهه جي ترقياتي رٿائن لاءِ خاص پئڪيج ميهڙ وايا راڍڻ روڊ، ايف پي بچاءُ بند تي 2 پلون تعمير ڪرڻ ۽ ميونسپل ڪاميٽي خيرپورناٿن شاهه جي برطرف ڪيل 144 ملازمن کي انڪوائري بعد بحال ڪرڻ جو اعلان رپورٽ موجب،   دادو سنڌ جي وڏي وزير سيدقائم علي شاهه چيو آهي ته سنڌ ۾ جيڪو هن وقت امن امان قائم ٿيو آهي ان ۾ خاص طور تي سنڌ حڪومت جون ڪوششون آهن ۽ وفاق جي اها دعويٰ ته سنڌ خاص طور تي ڪراچي ۾ امن قائم ٿيو آهي جيڪا ڏيکاءُ جي ڳالهه آهي ۽ ان ۾ سمورا استعمال  ٿيندڙ وسيلا اهي سنڌ حڪومت جا آهن ۽ ان ۾ رينجرز جو به ڪردار آهي وفاقي وزير گهرو جيڪو سنڌ ۾ امن امان لاڳو ڪرڻ جي دعويٰ ڪري رهيو آهي فقط هڪ ڀيرو سنڌ ۾ آيو هو ۽ چيو ته ان مسئلي کي پاڻ ئي سنڀاليو انڪري اهي مسئلا اسان پاڻ ئي سنڀاليا آهن ۽ الحمدا لله اسان ان ۾ ڪاميابي حاصل ڪئي آهي _ اها ڳالهه هن اڄ ڳو ٺ خانپور جوڻيجو تعلقي خيرپور ناٿن شاهه ضلع دادو  ۾ هڪ وڏي ميڙ کي خطاب ڪندي ڪيو _ هن چيو ته  هن چيو ته  دهشتگردي جي خاتمي ۽ امن امان قائم ڪرڻ کانپوءِ اسانجي اولين ترجيح ماڻهن کي وڏي انگ ۾ روزگار فراهم ڪرڻ  آهي ۽ ان سان گڏوگڏ سنڌ جي انهن علائقن جتي اڃان تائين ترقي وارو ڪم شروع نه ٿيو هو اتي وڏي انگ ۾ ترقياتي ڪم ڪيا پيا وڃن _ هن چيو ته ضلع دادو جي پ پ پ لاءِ وڏيون قربانيون آهن ان لاءِ ضلع دادو کي ڪنهن به طرح نظر انداز نه ڪيو ويندو ۽ وڏي انگ ۾ ترقياتي ڪم ڪرايا ويندا وڏي وزير چيو ته ڪراچي جا رهواسي مڃن ٿا ته هاڻي ڪراچي ۾ امن امان قائم ٿي ويو آهي ۽ اتان جا رهواسي هاڻي ڪراچي شهر ۾ آزاداڻي  طرح سان گهمي ڦري سگهن ٿا ۽ اهي خريداري به ڪن ٿا_ هن چيو ته 30 سالن کانپوءِ ڪراچي ۾ امن امان قائم ٿيو آهي جنهن جو اعزاز سنڌ حڪومت کي وڃي ٿو جڏهن ته حڪومت جي ڪوشش آهي ته ڪراچي سميت سڄي سنڌ ۾ امن امان جي صورتحال وڌيڪ بهتر ٿئي_هن باچا خان يونيورسٽي ۾ ٿيل دهشتگردي جي حملي کي افسوسناڪ قرار ڏيندي چيو ته الحمدا لله هاڻي سنڌ ۾ جيڪب آباد کان ڪراچي تائين  امن امان قائم ڪيو ويو آهي ۽ سماج دشمن عنصرن کي اهڙو سبق سيکاريو ويو آهي جو صوبي ۾ امن امان جي صورتحال  بهتر آهي_ هن چيو ته اهو فقط ماڻهن جي طاقت سان ممڪن بڻيو آهي ڇاڪاڻ ته  موجوده بلدياتي چونڊن ۾ ماڻهن پ پ پ جي پاليسي تي رضامندي ظاهر ڪندي ان کي وڏي اڪثريت سان چونڊيو آهي _هن چيو ته پارٽي کي بلدياتي چونڊن ۾ ڪاميابي شهيد بينظير ڀٽو جي پاليسين جي تسلسل کي جاري رکڻ جي ڪري ملي آهي _هن چيو ته آصف علي زرداري ۽ بلاول ڀٽو زرداري ۽ جمهوريت جا وڏا علمبردار آهن جن  جو اهو پهه ڪيو آهي ته اهي هميشه عوام جي خدمت  ڪندا رهندا ۽  هو عوام جي سهڪار ۽ جذبي سان دهشتگردي جو خاتمو ڪندا _ هن چيو ته سنڌ صوبو قدرتي وسيلن سان مالا مال آهي ۽  1994ع ۾  شهيد محترمه بينظير ڀٽو  دعويٰ ڪئي هئي ته ٿر جي ڪوئلي مان بجلي پيدا ڪئي ويندي پر مخالفن شهيد محترمه جو منصوبو  اڌ ۾ ڇڏي ڏنو ۽ هاڻي اها حالت  آهي جو ملڪ ۾ بجلي  16 رپين کان 18 رپين تائين في يونٽ مهانگي ٿي چڪي آهي_ هن ٻڌايو ته ٿر جي ڪوئلي مان  بجلي پيدا ڪرڻ وارو ڪم هلندڙ آهي ۽ جيئن ئي اهومنصوبو مڪمل ٿيندو ته بجلي جا اگهه 8 کان 9 رپين تائين  في يونٽ  ٿي ويندي ۽ پورو ملڪ روشن ٿيندو _ هن چيو ته پ پ پ جي سنڌ حڪومت شهيد محترمه بينظير ڀٽو جي مشن تي عمل ڪندي بيروزگار نوجوانن کي بنا  فرق روزگار مهيا ڪري رهي آهي ۽ مخالف جڏهن به اقتدار ۾ ايندا آهن ته اهي ماڻهن کي روزگار کان محروم ڪرڻ واري پاليسي تي هلندا آهن جڏهن ته اڳوڻي صدر پاڪستان آصف علي زرداري پنهنجي دور ۾ نوڪرين مان برطرف ڪيل ماڻهن کي نه فقط کين سندن نوڪرين تي بحال ڪيو بلڪه غريب ۽ بي پهچ عورتن لاءِ  انڪم سپورٽ پروگرام پڻ شروع ڪيو جنهن تحت پوري ملڪ جي غريب عورتن کي ماهوار وظيفو ڏنو ويو_هن چيو ته اسين شهيد ذوالفقار علي ڀٽو ۽ بينظير ڀٽو جا ڪارڪن آهيون ۽ مستحق ماڻهن کي ڪڏهن به مايوس نه ڪنداسين _هن انجنيئر عبدالعزيز جوڻيجو پاران پيش ڪيل ترقياتي ڪمن کي منظور ڪندي اعلان ڪيو ته هاڻي ضلعي دادو ۾ ترقياتي ڪمن جو ڄار وڇايو ويندو، ان موقعي تي خيرپوناٿن شاهه شهر کي ماڊل شهر بنائڻ خيرپوناٽن شاهه تعلقي جي ترقياتي رٿائن لاءِ خاص پئڪيج ڏيڻ ڪاڇي ۾ ايف پي بچاءُ بند تي 2 پلون تعمير ڪرائڻ ۽ انڪوائري بعد خيرپورناٿن شاهه ميونسپل ڪاميٽي جي برطرف ٿيل 144 ملازمن کي بحال ڪرڻ جو اعلان ڪيو جڏهن ته وزيراعلى سيد قائم علي شاهه ميهڙ وايا راڍڻ روڊ تعمير ڪرائڻ جو پڻ اعلان ڪيو، ان موقعي تي صوبائي صلاحڪار فياضِ علي ٻٽ، انجنيئر عبدالعزيز جوڻيجو، ايم اين اي عمران ظفر لغاري ايم اين اي مسرت رفيق مهيسر، ايم پي اي ڪلثوم چانڊيو ، غلام دستگير ڳورڙ، اعجاز چانڊيو، شبير ابڙو، رياض چانڊيو ۽ ٻين خطاب ڪيو.  ايم پي اي ڊاڪٽر سجيلا لغاري کان علاوه سنڌ ڪائونسل جي ميمبر، نئين چونڊيل بلدياتي نمائندن ، سپاف جا اڳواڻ ،پ پ پ ضلع دادو جي عهديدارن ، پ پ پ جي جيالي ڪارڪنن وڏي انگ ۾ ميڙاڪي ۾ شرڪت ڪئي، سنڌ جي وڏي وزير سيد قائم علي شاهه  جي ڳوٺ خانپور پهچڻ تي انجنيئر  عبدالعزيز جوڻيجو سان سندس امڙ ۽ ڀيڻ جي لاڏاڻي تي عذرخواهي ڪئي ۽ مرحومين جي مغفرت لاءِ دعا گهري .

 

ڇا چونڊيل نمائندن کي رڳو شو پيس ڪري رکڻو آهي؟: سپريم ڪورٽ

اسلام آباد (بيورو) سپريم ڪورٽ مڪاني ادارن جي چونڊيل نمائندن جي اختيارن بابت ڪيس ۾ چئني صوبن جي سيڪريٽريز ۽ ايڊووڪيٽ جنرلز کي طلب ڪري ورتو، جسٽس خلخي عارف ريمارڪس ڏنا آهن ته ڇا چونڊيل نمائندن کي رڳو شوپيس ڪري رکڻو آهي، اهڙين چونڊن جو ڪهڙو فائدو، رڳو ڳالهين سان ڪجهه نه ٿيندو، اختيار هيٺين سطح تائين منتقل ڪيا وڃن. سپريم ڪورٽ ۾ چيف جسٽس انور ظهير جمالي جي سربراهي ۾ بئنچ مڪاني ادارن جي چونڊيل نمائندن جي اختيارن بابت ڪيس جي ٻڌڻي ڪئي. عدالت مڪاني ادارن جي چونڊيل نمائندن جي اختيارن بابت چئني صوبن جي لوڪل گورنمينٽ جي سيڪريٽريز ۽ ايڊووڪيٽ جنرلز کي طلب ڪري ورتو آهي. سپريم ڪورٽ حڪم ڏنو ته مڪاني ادارن جي فعال هئڻ بابت اصل حقيقت کان آگاهه ڪيو وڃي. جسٽس خلخي عارف ريمارڪس ڏيندي چيو ته ڇا چونڊيل نمائندن کي رڳو شوپيس ڪري رکڻو آهي، اهڙين چونڊن جو ڪهڙو فائدو، رڳو ڳالهين سان ڪجهه نه ٿيندو، اختيار هيٺين سطح تائين منتقل ڪيا وڃن.