تازيون خبرون

Daily Archives: January 28, 2016

 دهشتگرد ۽ سندن پٺڀرائي ڪندڙ غلط فهمي ۾ نه رهن، قوم ۽ فوج آخري دهشتگرد جي خاتمي تائين سک سان نه ويهندي : ممنون حسين

اسلام آباد (بيورو) صدر ممنون حسين چيو آهي ته پاڪستان دهشتگردي تي ضابطو آڻڻ ۾ گهڻي حد تائين ڪامياب ٿي چڪو آهي ۽ هاڻي اسان انهن سببن جو جائزو وٺون، جن سان ملڪ انتهاپسندي ۽ ج دهشتگردي جي لاڙي جو شڪار ٿيو ته جيئن اڳتي ان قسم جي حالتن کان بچڻ لاءِ اپاءَ وٺي سگهجن، اهو سو سنئوڻ آهي ته ٽرانسپيرنسي انٽرنيشنل جي سالياني جائزيمطابق ملڪ ۾ بدعنواني ۾ گهٽتائي ٿي آهي، ملڪ مان بدعنواني جي مڪمل خاتمي ۾ پاڪستان جو نئون نسل اهم ڪردار ادا ڪري سگهي ٿو، پاڪستاني قوم ۽ هٿياربند فوج آخري دهشتگرد جي خاتمي تائين سک سان نه ويهندي. هن اها ڳالهه پاڪستان آرمي جي بيچلر آف ملٽري آرٽ اينڊ سائنس ۽ نسٽ انسٽيٽيوٽ آف پيس اينڊ ڪنفلڪٽ اسٽيڊيز جي سندون ورهائڻ واري تقريب کي خطاب ڪندي چئي. صدر چيو ته موجوده دور ۾ دفاعي سائنس ڏکي شڪل اختيار ڪري چڪي آهي، هاڻي سياسي، سفارتي، معاشي ايستائين جو مواصلات جهڙا معاملا به بچاءَ جي معاملن سان ڳنڍجي ويا آهن، صدر چيو ته گذريل ڪجهه ڏهاڪن دوران جنم وٺندڙ انتهاپسندي ۽ دهشتگردي مسئلن ۾ وا ڪئي آهي، ان ڏس ۾ اهو اڻٽر ٿي ويو آهي ته هٿياربند فوج جي آفيسرن ۽ جوانن جي سکيا جديد گهرجن مطابق ڪئي وڃي ته هو لاڳيتو مٽجندڙ حالتن جي گهرجن تي پورو لهي سگهن. هن چيو ته اها ڳالهه اطمينان جوڳي آهي ته پاڪستاني قوم پنهنجي عزم سان دنيا تي واضح ڪيو آهي ته اها ۽ هٿياربند فوج اندروني ۽ پرڏيهي هر قسم جي حالتن ۾ گڏجي دهشتگردي جو مقابلو ڪرڻ جي اهليت رکن ٿا. صدر چيو ته اسان دهشتگردن ۽ انهن جي سرپرستن تي واضح ڪريون ٿا ته هو ڪنهن به غلط فهمي ۾ نه رهن، پاڪستاني قوم ۽ هٿياربند فوج آخري دهشتگرد جي خاتمي تائين سک سان نه ويهندي، صدر هدايت ڪئي ته ملٽري آرٽ اينڊ سائنس جي ڪورس تي لاڳيتو غور جاري رکيو وڃي ته جيئن هي ڪورس ايندڙ وقت جي گهرجن تي پورو لهي سگهي، صدر چيو ته پاڪستان ۾ ماضي ۾ وسيلن کي ضايع ڪيو ويو، جنهن سان پاڪستان معاشِ مسئلن جي ور چڙهي ويو، لوڊشيڊنگ جي خاتمي لاءِ وقت سر رٿائون شروع نه ڪيون ويون، ڪرپشن ۽ بدعنواني مان پاڪستان کي سخت نقصان پهتو، ان صورتحال مان نڪرڻ جو اڪيلو طريقو هي آهي ته ملڪ مان بدعنواني جو مڪمل طور تي خاتمو ڪيو وڃي، هن چيو ته بهتري جو هي سفر جاري رهڻ گهرجي. صدر چيو ته معاشِ لنگهه رٿا قومي معيشت لاءِ اڻٽر آهي، قوم ان جي رستي ۾ ڪا به رنڊڪ اچڻ نه ڏي. صدر ان رٿا جو روٽ مٽائڻ وارين ڳالهين کي رد ڪندي چيو ته روٽ ۾ ڪا به تبديلي ناهي ڪئي وئي.

 

مخالف ڌر جي غير موجودگي ۾ پي آءِ اي جو بل اسيمبلي مان منظور ڪرائڻ زيادتي آهي: خورشيد شاهه

اسلام آباد (بيورو) خورشيد شاهه چيو آهي ته مخالف ڌر جي غير موجودگي ۾ پي آءِ اي جو بل اسيمبلي مان منظور ڪرائڻ زيادتي آهي اسلام آباد ۾ صحافين سان ڳالهائيندي خورشيد شاهه چيو ته قومي ايئرلائن کي خانگائڻ حڪومت جي بدنيتي آڏو اچي رهي آهي. هن چيو ته حڪومت قومي ادري کي خانگائي ظلم ڪري رهي آهي، وزيراعظم پي آءِ اي کي نه خانگائڻ جو واعدو ڪيو هو. خورشيد شاهه جو چوڻ هو ته پي آءِ اي کي ڇو پيو خانگايو وڃي، جڏهن ان جو ڪو خرچ ناهي، تيل جا اگهه گهٽ ٿيڻ سبب قومي ايئرلائن جي خرچ ۾ 34 سيڪڙو گهٽتائي ٿي آهي. هن چيو ته ڪستو ٽوڙڻ جي دعويٰ ڪندڙن قرض کڻڻ جو رڪارڊ ٽوڙي ڇڏيو آهي. مخالف ڌر جي اڳواڻ جو چوڻ هو ته ميٽرول کي سالياني چار ارب روپين جي سبسڊي ڏئي قومي ناڻي کي نقصان پهچايو پيو وڃي. خورشيد شاهه چيو ته ماضيءَ ۾ اسحاق ڊار پي آءِ اي جي نجڪاري خلاف احتجاجن جي قيادت ڪندو هو.

 

سينٽرل اوڀر ۾ مسئلن جي حل لاءِ ڳالهيون ضروري آهن، خطي ۾ ڇڪتاڻ جا نتيجا تباهه ڪندڙ ٿي سگهن ٿا: پاڪستان

نيويارڪ (اين اين آءِ) گڏيل قومن ۾ پاڪستان جي نمائنده مليحه لوڌي چيو اهي ته وزيراعظم نوازشريف خطي ۾ هم آهنگي لاءِ ڪوشان آهن نظام جي خرابي جي ڪري داعش جهڙن غير رياستي عنصرن کي ڦهلجڻ جو موقعو مليو سلامتي ڪائونسل ۾ مباحثي دوران خطاب ڪندي گڏيل قومن ۾ پاڪستان جي نمائنده مليحه لوڌي چيو ته سينٽرل اوڀر ۾ مسئلن جي حل لاءِ ڳالهيون ضروري آهن خطي جي ملڪن ۾ ڇڪتاڻ جا نتيجا تباهه ڪندڙ ٿي سگهن ٿا الهندي ايشيا ۾ افراتفري ختم ڪري خطي کي مضبوط بڻائي سگهجي ٿو پاڪستان سينٽرل اوڀر ۾ علائقائي دهشمني جي خاتمي جو خواهشمند آهي اسلامي تعاون تنظيم خطي جي ملڪن ۾ امن لاءِ ڪردار ادا ڪري سگهي ٿي مليحه لوڌي چيو ته وزيراعظم نوازشريف خطي ۾ امن چاهي ٿو ۽ سينٽرل اوڀر ۾ ڇڪتاڻ جي خاتمي لاءِ مصلحتي ڪوششون ڪيون.

 

پاڪستان سوڌو سڀني پاڙي وارن ملڪن سان دوستاڻا لاڳاپا چاهيون ٿا پر سيڪيورٽي تي سوديبازي نه ڪنداسين: ڀارت

 

نئين دهلي (م.ڊ) ڀارتي گهرو وزير راجناٿ سنگهه چيو آهي ته ڀارت ، پاڪستان سوڌو پنهنجي سڀني پاڙي وارن ملڪن سان دوستاڻا لاڳاپا چاهي ٿو پر دوستاڻن لاڳاپن جي آڙ ۾ ملڪ جي سيڪيورٽي تي ڪابه سوديبازي نه ڪئي ويندي، ڀارتي ميڊيا مطابق نئين دهلي ۾ صحافين سان ڳالهائيندي راجناٿ سنگهه چيو ته ڪوبه ملڪ ڀارت جي امن ۽ بهتر سوچ جي ڀيٽنه ٿو ڪري سگهي، اسان سرحد پار کان هلندڙ هر قسم جي انتهاپسندي کي پوري قوت سان منهن ٽوڙ جواب ڏينداسين، هن چيو ته ملڪ جي سيڪيورٽي فورسز ڪنهن به حملي جو جواب ڏيڻ لاءِ تيار آهن، سندس چوڻ هو ته ڀارت جي پاڙي ۾ هلندڙ انتهاپسندي جون سرگرميون ڳڻتي جوڳيون آهن ۽ انهن ئي سرگرمين سبب ڀارت کي بار بار حملن کي منهن ڏيڻو پوي ٿو،جنهن جو تازو مثال هلندڙ مهيني پٺاڻ ڪوٽ ۾ ٿيل حملو آهي، راجناٿ سنگهه چيو ته ڀارت جي پاليسي امن واري آهي ۽ امن هيٺ ئي اسان پنهنجي سڀني پاڙيِ وارن ملڪن سان دوستاڻڻ لاڳاپن جي حق ۾ آهيون، جنهن لاءِ سنجيدگي سان ڪوششون ڪيون پيون وڃن.

 

ڪڻڪ جي خريداري لاءِ بينڪن کان وياج تي قرض ورتو ويندو آهي: ناصر شاهه جي سنڌ اسيمبليءَ کي آگاهي

ڪراچي (اي پي پي) سنڌ اسيمبلي جو اجلاس ڪالهه اسپيڪر آغا سراج دراني جي صدارت ۾ شروع ٿيو. اجلاس ۾ سوالن جواب جي وٿي دوران خوراڪ کاتي جي صوبائي وزير ناصر شاهه مختلف ميمبرن جي سوالن جا جواب ڏيندي ٻڌايو ته ڪڻڪ جي خريداري جي لاءِ بينڪن کان وياج تي قرض ورتو ويندو آهي، جنهن تي ايم ڪيو ايم جي ڪامران اختر چيو ته وياج حرام آهي ۽ وياج ڏيندڙ توڙي وٺندڙ ٻئي دوزخي آهن. خوراڪ کاتو اهڙو انتظام ڪري جنهن سان رقم وياج تي نه وٺڻي پئي. اسپيڪر آغا سراج دراني چيو ته جيڪڏهن عالمي بينڪ کي دوزخ کان ڏيڄاريو ويندو ته هو هڪ ٽڪو به نه ڏيندا. وفاقي حڪومت به بينڪن ۽ عالمي مالياتي ادارن کي وياج ڏيندي آهي. خوراڪ واري وزير چيو ته جيڪڏهن ڪامران اختر ڀائي رقم جو بندوبست ڪري ڏئي ته پوءِ اسان وياج تي قرض نه وٺنداسين.

 

عزيز بلوچ کي فريال ٽالپر ڀڄايو،منهنجو انهن سان ڪو به تعلق ناهي: ذوالفقار مرزا

بدين(ڊ.ر) سنڌ جي اڳوڻي گهرو وزير ذوالفقار مرزا چيو آهي ته هن جو عزيز بلوچ سان ڪو به تعلق ناهي،فريال ٽالپر عزيز بلوچ کي ڀڄايو آهي.ذريعن مطابق ذوالفقار مرزا جو وڌيڪ چوڻ هو ته عزيز بلوچ بي ايل اي وارن کي هٿيار ڏيندو هوندو،ها پر لياري جي حالتن جي بهتري لاءِ ان سان رابطو ضرور رهيو.سندس چوڻ هو ته آخري ڀيرو عزيز بلوچ کي فريال ٽالپر سان گڏ ڏٺو ويو هو،جنهن پيپلز پارٽي جي اڳواڻ جي گهر اچي ماني کاڌي ۽ سوکڙيون ورتيون.

 

ٿر تي موت جي راڪاس جا لامارا جاري، وڌيڪ 6 حياتيون ڳڙڪائي ويو

ٿرپارڪر(رپورٽر) ٿرپارڪر ۾ معصوم ٻارڙن جي فوت ٿيڻ جو سلسلو جاري آهي، ڏيپلي ۽ مٺي ۾ خوراڪ جي کوٽ ۽ بيمارين جو شڪار وڌيڪ 4 ٻارڙا فوت ٿي ويا، اڄوڪي ڏينهن ۾ 6 جانيون ضايع ٿيڻ بعد هلندڙ مهيني فوتي ٻارڙن جو انگ 103 ٿي ويو آهي. ڏيپلي جي ڳوٺ جاگر لنڊ ۾ 9 مهينن جي نينگري شاهه پري لنڊ فوت فوت ٿي وئي، ڳوٺ ڳالاهو ۾ ٻن ڏينهن جي نينگري ثمينه راهمون به زندگي جي جنگ هارائي وئي.. ڏيپلي ۾ ڳوٺاڻي سرور راهمون جو تازو ڄاول پٽ فوت ٿي ويو، جڏهن ته رحمان آباد ۾ گووند ڪولهي جو تازو ڄاول پٽ به زندگي جي جنگ هارائي ويو. مٺي جي سول اسپتال ۾ ڳوٺ نرهوڙي واسي 15 مهينن جي نينگري حميده ۽ ڳوٺ دينگاري ڏيپلو واسي نينگر رضا الله سومرو به دم ڌڻي حوالي ڪيو. اڄوڪي ڏينهن ۾ 6 معصوم ٻارڙن جي فوت ٿيڻ کانپوءِ هلندڙ مهيني فوتي ٻارڙن جو انگ 103 ٿي ويو آهي. 103 انساني جانيون ضايع ٿيڻ باوجود مٺي سول اسپتال سميت ٿر جي ٻين اسپتالن اندر سهولتن جي کوٽ برقرار آهي. مٺي، اسلام ڪوٽ، ڏيپلي، ننگرپارڪر ۽ ڪلوئي جي ٻهراڙين وارن علائقن ۾ حڪومت طرفان قائم ڪيل ڊسپينسرين ۾ عملي ۽ سهولتن جي کوٽ موجود آهي. بيمارين سبب متاثر ٿيل ٻهراڙين وارن علائقن ۾ صحت جون سهولتون فراهم نه ڪرڻ سبب گيسٽرو، ڊائريا ۽ نمونيا سميت ٻيون بيماريون تيزي سان پکڙجي رهيو آهي. ٻئي طرف سنڌ هاءِ ڪورٽ ٿر ۾ خوراڪ جي کوٽ سبب ٻارڙن جي فوتگين واري ڪيس ۾ ٿر اندر رليف سرگرمين جي جاچ لاءِ ڪميشن جوڙڻ بابت سنڌ سرڪار کان تجويز گهري ورتي، چيف جسٽس سجاد علي شاهه چيو آهي ته حڪومت پاڻ ڪوتاهي ڪئي، ڪميشن آزاد هئڻ ضروري آهي. چيف جسٽس سجاد علي شاهه جي سربراهي ۾ جي بئنچ ٿر ۾ خوراڪ جي کوٽ سبب ٻارڙن جي فوتگين واري ڪيس جي ٻڌڻي ڪئي، جنهن دوران پٽيشنر ۽ ايڊووڪيٽ جنرل پيش ٿيا. ٻڌڻي دوران چيف جسٽس سجاد علي شاهه چيو ته ڇو نه ٿر ۾ رليف سرگرمين جي جائزي لاءِ آزاد ڪميشن جوڙي وڃي، جنهن تي ايڊووڪيٽ جنرل کيس ٻڌايو ته ٿر ۾ رليف ڪميٽي موجود آهي، جنهن جو تاج حيدر سربراهه آهي. چيف جسٽس چيو ته تاج حيدر بزرگ ٿي چڪو آهي، ڇو نه ڪنهن نوجوان کي ان ڪم سان لڳايو وڃي؟ چيف جسٽس سجاد علي شاهه ايڊووڪيٽ جنرل کي چيو ته ٻڌايو وڃي ته ڪميشن ڪهڙن ماڻهن تي ٻڌل هجي ۽ ان وٽ ڪهڙا اختيار هئڻ گهرجن، حڪومت پاڻ ڪوتاهي ڪئي، ڪميشن جو آزاد هئڻ ضروري آهي.

 

ايشوريا راءِ جي فرانسيسي صدر سان ملاقات، کيس فرانس جي اعليٰ سول اعزاز سان نوازيو ويو

ممبئي (شوبز نيوز) بالي ووڊ جي من موهڻي اداڪارا ايشوريا راءِ بچن فرانسيسي صدر فرانسسڪو هالينڊ سان ملاقات ڪئي،ملاقات ۾ آيل مهمانن کي مانجهاندو ڏنو ويو. بالي ووڊ اداڪارا فرانسيسي صدر سان ملاقات دوران ڪينز فلم فيسٽيول ۾ شامل ٿيڻ جي موقعي تي ٿيندڙ تجربن جي کيس ڄاڻ ڏني.ڀارتي ميڊيا مطابق ايشوريا راءِ بچن مانجهاندي ۾ شامل ٿيڻ لاءِ پهتي ته فرانسيسي صدر سندس دل جي گهرائين سان آجيان ڪئي.ان موقعي تي ايشوريا کي فلم انڊسٽري ۾ بهترين خدمتن جي مڃتا ۾  فرانس جي اعليٰ سول اعزاز“نائيٽ آف دي آرڊر آرٽس اينڊ ڪلچر” سان به نوازيو ويو.

 

تمام جلد شادي ڪنديس،شادي ڪرڻ جو اهم ڪارڻ ٻارن سان چاهه آهي: پريانڪا چوپڙا

ممبئي (شوبز نيوز) بالي ووڊ اداڪارا پريانڪا چوپڙا شادي جي خوهش ظاهر ڪندي چيو ته مان گهڻا ٻار چاهيان ٿي،پئسي يا ملڪيت جي ڪري ڪنهن سان شادي نه ڪنديس،منهنجي زندگي ۾ ڪو به ماڻهو آيو ته هيرن جي ڪري نه ايندو.هڪ انٽرويو ۾ پريانڪا جو چوڻ هو ته مان هميشا کان ٻارن جو چاهه ڪيو آهي تمام گهڻا ٻار ۽ اهو ئي ڪارڻ آهي جو مان شادي ڪرڻ چاهيان ٿي.اداڪارا چيو ته منهنجي زندگي ۾ ڪو به ماڻهو رڳو ان وقت ايندو،جڏهن مونکي محبت ٿي ويندي ۽ اهو ئي ڪارڻ هوندو جو مان شادي به ڪنديس ۽ ٻارن کي گهڻو پسند ڪندي آهيان جنهن جي ڪري به مونکي شادي ڪرڻ جي ضرورت آهي ۽ اهو وقت به جلد ايندو جڏهن مون کي ڪنهن سان محبت ٿي ويندي.

 

ايشيا ڪپ ٽي ٽوئنٽي جو اعلان،پاڪ-ڀارت ٽيمون 27 فيبروري تي آمهون سامهون ٿينديون

ڍاڪا (اسپورٽس نيوز) ايشيا ڪپ ٽي ٽوئنٽي جو اعلان ڪيو ويو آهي،جنهن ۾ ميزباني بنگلاديش ڪندو. ذريعن مطابق ايشيا ڪپ ٽي ٽوئنٽي 24 فيبروري کان بنگلاديش ۾ ٿيندو،جڏهن ته قومي ٽيم 27 فيبروري تي پنهنجو پهريون ميچ روايتي مخالف ڌر ڀارت خلاف کيڏندي.ايونٽ ۾ شامل 4 مان هڪ ٽيم چونڊجڻ کانپوءِ مين رائونڊ ۾ پهچندي،جيڪو 29 فيبروري تي گرين شرٽ سان ٽڪرائيندي،2 مارچ تي پاڪستان جو مقابلو بنگلاديش ۽ 4 مارچ تي سريلنڪا سان ٿيندو.