تازيون خبرون

Daily Archives: January 25, 2016

پاڪستان ۽ ڀارت وٽ ڪشمير مسئلي جي حل لاءِ ڳالهين کانسواءِ ٻيو ڪو به رستو ناهي: اعتزاز احسن/خورشيد قصوري/شاهد ملڪ

لاهور (اين اين آءِ) پاڪسيتان ۽ ڀارت وٽ ڪشمير مسئلي جي حل لاءِ ڳالهين کانسواءِ ٻيو ڪو به حل ناهي اهو مسئلو جنگ کان نه پر ڳالهين ذريعي حل ٿي سگهي ٿو ڪنهن به قسم جي جاچ کانسواءِ باچاخان يونيورسٽي تي حملي جو الزام ڀارت نه لڳائڻ گهرجي اسان کي ڀارت کي شڪ جو فائدو ڏيڻ گهرجي پوءِ ئي معاملا صحيح رخ ۾ اڳتي وڌي سگهن ٿا جنگ مسئلن جو حل ناهي انهي سان مسئلا وڌندا آهن، اهڙن خيالن جو اظهار خورشيد محمود قصوري، اعتزاز احسن، اڳوڻو هاءِ ڪمشنر ڀارت شاهد ملڪ ريٽائرڊ جنرل غلام مصطفيٰ، احمد رشيد، ڊاڪٽر محمد وسيم جنرل سيڪريٽري سائوٿ ايشيا، فري ميڊيا ايسوسيئيشن امتياز عالم ۽ ٻين سائوٿ ايشيا فري ميڊيا ايسيويئيشن جي اهتمام هيٺ پاڪ ڀارت برف ڳرڻ جي آئوٽ آف باڪس سلوشنز جي عنوان سان ڪوٺايل سيمينار کي خطاب دوران ڪيو. خورشيد محمودقصوري چيو ته ڪشمير مسئلي جو ڪو ئي آئوٽ آف باڪس حل آهي ئي نه سواءِ ڳالهين جي هن وقت ٻنهي ملڪن وٽ ڳالهين کانسواءِ ٻيو ڪو به دڳ ناهي هن چيو ته جڏهن به ٻئي ملڪ ڪشمير مسئلي جي حل لاءِ ويجهو اچڻ شروع ڪن ٿا ۽ ڳالهه ٻولهه بهتر ٿيڻ شروع ٿئي ٿي ته ڪو نه ڪوئي واقعو ٿي وڃي ٿو ۽ هي واقعو بي معنيٰ نه ٿو ٿئي پر اهو اسڪرپٽ ۾ لکيل هوندو آهي هن چيو ته ڪشمير مسئلي جي حل ۾ اڄ تائين جيتري به اڳڀرائي ٿي آهي ان ۾ پاڪستان آرمي جي مدد شامل آهي هي مسئلو جنگ سان نه پر صرف صرف ڳالهين سان حل ٿيندو. بئريسٽر اعتزاز احسن چيو ته جنگ ڪنهن مسئلي جو حل ناهي پر ان سان مسئلا وڌن ٿا هاڻي اسان کي آئوٽ آف باڪس سلوشن ئي تلاش ڪرڻو آهي.

 

پنجاب حڪومت کي سوڙهو ڪرڻ جون تياريون، چار اهم سياسي پارٽيون هڪ ٿي ويون

لاهور(م.ڊ) پنجاب صوبي ۾ چار پارٽين گڏجي حڪومت خلاف گڏيل مخالف ڌر ٺاهي ڇڏي.پنجاب اسيمبلي جو اجلاس نه گهرائڻ تي مخالف ڌُر جي اڳواڻ ميان محمود الرشيد گڏيل ۽ طاقت واري مخالف ڌُر جي تجويز ڏني هئي،جنهن جي عمران خان،بلاول ڀٽو ۽ پرويز الاهي اجازت ڏئي ڇڏي آهي.طاقت واري مخالف ڌُر جي قيام کانپوءِ، پاڪستان پيپلز پارٽي، تحريڪ انصاف، پاڪستان مسلم ليگ(ق) ۽ جماعت اسلامي پنجاب ۾ حڪومت کي ڏکيو رکنديون ۽ چارئي پارٽيون ملي ڪري پنجاب حڪومت خلاف ڀرپور طاقت جو مظاهرو ڪنديون.

 

ٿر ۾ معصوم ٻارڙن تان موت جو راڪاس نه ٽريو، مٺي ۽ ڏيپلي ۾ وڌيڪ 4 ٻارڙا فوت

مٺي (نمائندو) ٿر ۾ معصوم ٻارڙن تان موت جو راڪاس نه ٽريو، مٺي ۽ ڏيپلي ۾ وڌيڪ 3 ٻارڙا فوت ٿي ويا، جنهن کانپوءِ هلندڙ مهيني فوت ٿي ويل ٻارڙن جو انگ وڌي 92 ٿي ويو آهي.مٺي جي ڳوٺ ٻٽڙي ۾ 5ورهين جي معصوم نينگري نينا ڀيل فوت ٿي وئي، ڏيپلي جي ڳوٺ هميراٻهه ۾ خوراڪ جي کوٽ جو شڪار وڌيڪ هڪ ٻارڙو زندگي جي جنگ هارائي ويو.مٺي جي سول اسپتال ۾ 25 ڏينهن جو نينگر بابو ٺڪر به دم ڌڻي حوالي ڪيو..وڌيڪ ٽن معصوم ٻارڙن جي فوت ٿيڻ کانپوءِ هلندڙ مهيني فوت ٿي ويل ٻارڙن جو انگ وڌي 92 ٿي ويو آهي..عرصي ۾ 92 ٻارڙن جي فوت ٿيڻ باوجود صحت کاتي طرفان متاثر علائقن ۾ بيمارين کان بچاءُ لاءِ لاءِ ڪي به اپاءُ ناهن ورتا ويا، جنهن سبب بيمارين تيز سان پکڙجي رهيون آهن.ان سلسلي ۾ بيمارين سبب متاثر علائقن جي رهواسين جو چوڻ آهي ته حڪومت طرفان بيمارين جي روڪ ٿام لاءِ ڪي به اپاءُ ناهن ورتا ويا، سندن علائقن ۾ طبي ڪئمپون قائم ڪري معصوم ٻارڙن جو حياتيون ضايع ٿيڻ کان بچايو وڃي.

 

گڏيل قومن جي ماهرن پنجاب حڪومت کي اورنج ٽرين رٿا روڪڻ لاءِ چيو آهي: عمران خان

اسلام آباد (اين اين آءِ) پاڪسيتان تحريڪ انصاف جي چيئرمين عمران خان چيو آهي ته گڏيل قومن جي ماهرن پنجاب حڪومت کي اورنج ٽرين منصوبو روڪڻ جو چيو آهي ماهرن مطابق منصوبي سان ماڻهو بي گهر ٿي رهيا آهن ۽ ثقافتي ورثي کي به وڏو نقصان پهچي رهيو آهي. سوشل ميڊيا تي جاري پنهنجي پيغام ۾ عمران خان چيو ته گڏيل قومن جي ماهرن مطابق اورنج لائين ٽرين رٿا ثقافتي ورثي کي تباهه ڪري رهي آهي هن چيو ته اسلام آباد، راولپنڊي ميٽرو بس جي 27 ڪلوميٽر ڊگهي روٽ تي 46 ارب رپيا خرچ ڪيا ويا جڏهن ته پشاور ۾ ايتري ئي ڊگهي ٽريڪ تي صرف 13 ارب رپيا خرچ ايندو. عمران خان مطابق پشاور بس اسڪيم سان ٽريفڪ مسئلا حل ڪرڻ ۾ مدد ملندي. هن چيو ته ريلوي وارو وزير ڪيترين ئي درخواستن جي باوجود پشاور بس منصوبي لاءِ ريلوي جي فاضل اراضي فراهم ناهي ڪئي.

 

جماعت اسلامي ڪرپشن ۽ وي آءِ پي ڪلچر خلاف مارچ ۾ تحريڪ هلائڻ جو اعلان ڪري ڇڏيو

ڪراچي (اسٽاف رپورٽر) جماعت اسلامي ڪرپشن ۽ وي آءِ پي ڪلچر خلاف مارچ ۾ تحريڪ هلائڻ جو اعلان ڪري ڇڏيو، جماعت اسلامي جي امير سراج الحق چيو آهي ته ڪنهن به اداري کي وڪرو ٿيڻ نه ڏنو ويندو.ڪراچي ۾ ميڊيا سان ڳالهائيندي جماعت اسلامي جي امير سراج الحق چيو ته حڪومت ادارن کي ڪرپشن ذريعي ناڪام بڻائڻ بعد هاڻي وڪرو ڪري رهي آهي.جماعت اسلامي جي امير چيو ته بيورو ڪريٽن ۽ سياستدانن جي ڪرپشن جا تفصيل گڏ ڪيا پيا وڃن، سنڌ حڪومت ڏوهارين کي ڇڏرائڻ لاءِ قانون ٺاهيو آهي..سراج الحق وڌيڪ چيو ته ڪرپشن ۽ وي آءِ پي ڪلچر خلاف مارچ ۾ تحريڪ هلائي ويندي، حڪومت قرض جو بار عوام جي ڪلهن تي رکيو آهي.

 

حامين کي گهرن مان نڪرڻ جي هدايت، نتيجا تبديل ڪرڻ جي ڪوشش ڪئي وئي ته سخت مزاحمت ڪبي: ذوالفقار مرزا

بدين (ڊ ر) اڳوڻي صوبائي گهرو وزير ڊاڪٽر ذوالفقار مرزا پنهنجي حامين کي بدين، تلهار، گولاڙچي ۽ ٽنڊي باگي جي آراوز آفيسن ٻاهران پهچڻ جي هدايت ڪري ڇڏي، سندس چوڻ آهي ته هزارين ماڻهو ٻاهر نڪري مڪاني چوندن جا نتيجا تبديل ڪرڻ واري سازش کي ناڪام بڻائين. بدين ۾ ميڊيا سان ڳالهائيندي اڳوڻي صوبائي گهرو وزير ڊاڪٽر ذوالفقار مرزا چيو ته سڄي سنڌ مان کٽڻ جي دعويدار پيپلزپارٽي بدين ۾ مينڊيٽ تسليم ڇو نه ٿي ڪري. هن چيو ته ووٽرن جي ڳڻپ دوران رينجرز کي هٽائي ايس ايس يو جا اهلڪار مقرر ڪري نتيجا تبديل ڪرڻ جي سازش ڪئي پئي وڃي. ڊاڪٽر ذوالفقار مرزا چيو ته جمهوريت صرف زرداري جي ڪاميابي جو نالو آهي ته پوءِ اهي اهڙي جمهوريت کي قبول نه ٿا ڪن. سندس چو ڻ هو ته سنڌ حڪومت جي ڏاڍ جو ڀرپور جواب ڏنو ويندو، جڏهن ته سندن ماڻهو پنهنجو مينڊيٽ کسڻ نه ڏيندا. هن چتاءُ ڏيندي چيو ته نتيجا تبديل ڪرڻ جي ڪوشش ڪئي وئي ته سخت مزاحمت ڪئي ويندي

 

مظفر ڳڙهه ۾ ڪوهيڙ سبب روڊ حادثو، هڪ ئي ڪٽنب جا 5 ڀاتي فوت

اسلام آباد (اي پي پي) پنجاب جي شهر مظفر ڳڙهه ۾ ڪوهيڙي جي نتيجي ۾ روڊ حادثي ۾ هڪ ڪٽنب جا پنج ڀاتي فوت ٿي ويا. خبر موجب مظفر ڳڙهه لڳ آچر ڏينهن شديد ڪوهيڙي جي ڪري هڪ ٽرالر ٻن موٽرسائيڪلن کي زوردار ٽڪر هنيو جنهن جي نتيجي ۾ موٽرسائيڪلن تي سوار هڪ ئي ڪٽنب جا پنج ڀاتي اجل جو شڪار ٿي ويا.ٽيمن جي ڪارڪنن مطابق 2 موٽرسائيڪلن سوار 5 ڄڻا ملتان پاسي وڃي رهيا هئا ته سامهون ايندڙ ٽريلر مٿن چڙهي ويا، جنهن ۾ 5 ئي ڄڻا سخت زخمي ٿي پيا، زخمين کي اسپتال منتقل ڪيو ويو پر زخمن جا سور نه سهدي فوت ٿي ويا، زخمي ٿيل 5 ئي ڄڻن کي امدادي ٽمين جي ڪارڪنن مظفر ڳڙهه جي ضلعي اسپتال ۾ پهچايو،جن رستي ۾ ئي دم ڌڻي حوالي ڪري ڇڏيو، افسوسناڪ واقعي سبب علائقي ۾ سوڳ واري صورتحال ٿي وئي. ميداني علائقن ۾ صبح ۽ رات جي وقت شديد ڪوهيڙي جي ڪري روڊ حادٿن ۾ اضافو ٿيو آهي جنهن ڪري اختيارين طرفان ماڻهن کي رستن تي گاڏيون احتياط سان هلائڻ جي تاڪيد ڪئي ويئي آهي