تازيون خبرون

Daily Archives: January 24, 2016

بينظير ڀٽو کي ڌمڪي پرويز مشرف ڏني يا ڪنهن ٻئي اهو پڪ سان نه ٿو چئي سگهان: مارڪ سيگل

رالپنڊي(بيورو) راولپنڊيءَ جي دهشتگردي ٽوڙ عدالت شهيد بينظير ڀٽو قتل ڪيس ۾ اڳوڻي صدر پرويز مشرف خلاف آمريڪي صحافي مارڪ سيگل جي بيان تي عدالتي آڏي پڇا جو حڪم ڏئي ڇڏيو آهي. آمريڪي صحافي مارڪ سيگل پنهنجي بيان ۾ موقف اختيار ڪيو آهي ته سندس موجودگيءَ ۾ بينظير ڀٽو کي ڌمڪي واري فون آئي هئي. هن چيو ته بينظير ڀٽو کي ڌمڪي پرويز مشرف ڏني يا ڪنهن ٻئي اهو پڪ سان نه ٿو چئي سگهي. سندس چوڻ هو ته بينظير ڀٽو کي ڌمڪي وقت هن موبائيل فون جي اسڪرين نه ڏٺي هئي.آمريڪي صحافي مارڪ سيگل چيو ته کيس اها ئي ڄاڻ آهي جيڪا کيس بينظير ڀٽو ڏني هئي. مارڪ سيگل چيو ته بينظير ڀٽو پنهنجي ٻئي ڪتاب ۾ پرويز مشرف جي ڌمڪيءَ جو ذڪر ڪيو آهي.

 

سنڌ ايجوڪيشن فائونڊيشن کي تعليمي سال کان اسڪولن ۾ داخلائن لاءِ بهترين قدم کڻڻ گهرجن، قائم علي شاهه

ڪراچي (اين اين آءِ) سنڌ ايجوڪيشن فائونڊيشن (ايس اي ايف) کي نئين شروع ٿيندڙ تعليمي سال 17-2016 کان 2 لک 50 هزار واڌو ٻارڙن کي اسڪولن ۾ داخلائن لاءِ بهترين قدم کڻڻ گهرجن ۽ ان کي هڪ حدف طور وٺڻو پوندو اها ڳالهه سنڌ جي وڏي وزير سيد قائم علي شاهه ڇنڇر تي وزراعليٰ هائوس ۾ سنڌ ايجوڪيشن فائونڊيشن جي بورڊ آف گورنرز جي اجلاس جي صدارت ڪندي ڪئي اجلاس ۾ ايڊيشنل چيف سيڪريٽري ترقيات اعجاز علي خان وڏي وزير جو پرنسپل سيڪريٽري علم الدين بلو ڊاڪٽر قيصر بنگالي ڊاڪٽر قاضي مسعود محترمه ناهيد شاهه دراني عاليه شاهد ۽ علي حسن نقوي شرڪت ڪئي. مئنجنگ ڊائريڪٽر ايس اي ايف ناهيد شاهه دراني بورڊ کي بريفنگ ڏيندي چيو ته فائونڊيشن جي ڪيترن ئي سکي ساک رکندڙ ادارن سان اسٽريٽجڪ حصي داري آهي انهن ادارن ۾ سٽيزن فائونڊيشن، انڊس رسيورس سينٽرز سنڌ مدرسه بورڊ ميسرز اوپر، انڊس ايجوڪيشن فائونڊيشن ۽ سارا ايجوڪيشن، تهذيب فائونديشن، گرين ڪريسينٽ ٽرسٽ، بي آر اي سي پاڪستان اينڊ ايجوڪيشن فنڊ سنڌ شامل آهن سنڌ ايجوڪيشن فائونڊيشن انهن ادارن سان گڏجي صوبي ۾ ٻارڙن جي تعليم ۽ تربيت ۾ مصروف آهي وڏي وزير چيئرمين ۽ بورڊ آف گورننگ سنڌ ايجوڪيشن فائونڊيسن جي بهتر ساک رکندڙ ادارن سان اسٽريٽجڪ حصيداري کي ساراهيو وڏي وزير چيو ته بهتر قدمن سبب صوبي ۾ تعليم جي معيار کي بهتر بڻائي سگهجي ٿو سنڌ ايجوڪيشن فائونڊيشن جي ايم ڊي سنڌ جي وڏي وزير جي هدايتن تي چيو ته ايس اي ايف پهريان ئي ٻارڙن کي اسڪول آڻڻ جي سلسلي ۾ حدف مقرر ڪري چڪو آهي ۽ فائونڊيشن نئين تعليمي سال 17-2016 جي شروعات تي 2 لک 50 هزار اضافي ٻارڙن کي اسڪول ۾ داخل ڪرائيندي هن چيو ته ايس اي ايف جو معيار جي حوالي سان ڪنهن به قسم جي سوديبازي نه ڪرڻ جو ايجنڊا آهي فائونڊيشن جيمختلف پروگرامن بابت ميمبرن کي بريفنگ ڏيندي ناهيد شاهه دراني ٻڌايو ته مختلف سروي رپورٽس مطابق سنڌ ۾ اٽڪل 2.5 ملين ٻارڙا اسڪول ۾ داخلائن کان وانجهيل آهن ۽ هي اهي ٻارڙا آهن جيڪي ڪڏهن اسڪول ويا ئي نه آهن يا داخل نه ڪرايا ويا آهن انهن ٻارڙن جون ڄمارون 9 سالن کان 18 سال آهن جن کي فني مهارت جي پروگرام ذريعي تربيت ڏيئي سگهجي ٿي ايس اي ايف معاشري ۾ موجود اهڙن سمورن ٻارڙن لاءِ تربيتي پروگرام شروع ڪرڻ جي تجويز ڏني جيڪا وڏي وزير چيئرمين سنڌ ايجوڪيشن فائونڊيشن طور منظوري ڏني. ناهيد شاهه دراني ٻڌايو ته هن وقت ايس اي ايف اهڙن ادارن جيڪي پهريان ئي هن سلسلي ۾ ڪم ڪري رهيا آهن انهن سان پارٽنرشپ ڪرڻ جي تجويز ڏني ۽ هن اهڙن ادارن جي هڪ لسٽ پيش ڪئي ناهيد شاهه فورم کي وڌيڪ ٻڌايو ته سنڌ ۾ ملڪ جي ٻين صوبن وانگر پوسٽ پرائمري تعليم ۾ شرڪت جي حوالي سان ڪافي خال موجود آهي تنهنڪري ان صورتحال ۽ چئ،لينج کي منهن ڏيڻ لاءِ ايس اي ايف پرائيويٽ اسڪول آپريٽرز سان شراڪت ذريعي مڊل ۽ هاءِ اسڪولز جي قيام جي تجويز پيش ڪئي. جنهن تهت اهڙا ضلعا جتي پوسٽ، پرائمري ايجوڪيشن ۾ شرڪت جي شرح تمام گهٽ آهي انهن کي ٽارگيٽ ڪيو وڃي. چيئرمين فائونڊيشن بورڊ آف گورننگ سيد قائم علي شاهه سنڌ ايجوڪيشن فائونڊيسن جي ڪارڪردگي کي ساراهيدي سنڌ جي ڏورانهين ۽ پٺتي پيل علائقن تي خاص توجهه ڏيڻ جي هدايت ڪئي ۽ ان فائونڊيشن کي سنڌ هڪومت پاران مڪمل تعاون جو يقين ڏياريو.

 

پنجاب کي فائدو پهچائي ٻين صوبن ۾ محرومي وارو احساس پيدا ڪرڻ نه ٿا چاهيون : سعد رفيق

لاهور (م.ڊ)ريلوي واري وفاقي وزير خواجا سعد رفيق چيو آهي ته اسان پنجاب کي فائدو پهچائي ٻين صوبن ۾ محرومي وارو احساس پيدا نه ٿا ڪرڻ چاهيون، معاشي لنگهه رٿا بابت وزيراعظم سوڌو سڀ وضاحت ڪري چڪا آهن، لاهور ۾ ميڊيا سان ڳالهائيندي سعد رفيق چيو ته ريلوي کي پاڪ – چين معاشِي لنگهه مان فائدو ضرور ٿيندو پر اها ڳالهه سمجهڻ گهرجي ته اهي رٿائون سڄي ملڪ لاءِ آهن، تنهن ڪري ان کي ڪالاباغ ڊيم جيان تڪراري نه بڻايو وڃي، هن چيو ته خيبرپختونخوا ۾ 13 ارب رپين کان وڌيڪ جون رٿائون هلي رهيون آهن، جڏهن ته پشاور-لاهور ريلوي ٽريڪ کي به اهميت جي بنياد تي ٻٽو ڪيو ويندو، سندس چوڻ هو ته خيبرپختونخوا وارن جو ضد آهي ته ميٽروبس لاءِ ريلوي جي ئي زمين گهرجي،خواجا سعد رفيق چيو ته گوادر ۾ پاڻي جي مسئلي جي حل لاءِ واٽر ٽريٽمينٽ پلانٽ لڳايا پيا وڃن.

 

هلندڙ سال جي پڄاڻي تائين 2 هزار ميگاواٽ وڌيڪ بجلي متبادل ذريعن مان پيدا ڪنداسين: مراد علي شاهه

اسلام آباد (اي پي پي) سنڌ صوبو سال 2017ع جي ختم ٿيڻ تائين 2 هزار ميگاواٽ کان وڌيڪ بجلي متبادل ذريعن مان پيدا ڪرڻ شروع ڪري ڇڏيندو. ناڻي واري وزير مراد علي شاهه پنهنجي هڪ بيان ۾ چيو ته صوبائي حڪومت شمسي توانائي۽ هوا جي مدد سان بجلي پيدا ڪرڻ جي حوالي سان 33 مختلف ڪمپنين کي بجلي جي پيداواري منصوبا شروع رڪڻ لاءِ زمين الاٽ ڪري ڇڏي آهي. هن چيو ته صوبي ۾ هوا ۽ سج جي مدد سان بجلي پيدا ڪرڻ جا وسيع امڪان موجود آهن ۽ ايندڙ سلا جي ختم ٿيڻ تائين ان منصوبي جي تڪميل سان 2 هزار ميگاواٽ کان وڌيڪ بجلي قومي گرڊ ۾ شامل ڪئي ويندي. جنهن سان توانائي جي ضرورت پوري ڪرڻ ۾ مدد ملندي.

 

گورنر سنڌ عشرت العباد سان ڊي جي رينجرس ميجر جنرل بلال اڪبر جي ملاقات

ڪراچي(اسٽاف رپورٽر) گورنر سنڌ عشرت العباد سان ڊي جي رينجرس ميجر جنرل بلال اڪبر ملاقات ڪري امن امان جي صورتحال سميت ڪراچي آپريشن تي مشاورت ڪئي آهي. گورنر هائوس ڪراچي ۾ گورنر سنڌ ڊاڪٽر عشرت العباد سان ڊي جي رينجرس ميجر جنرل بلال اڪبر ملاقات ڪئي….ملاقات دوران صوبي خاص ڪري ڪراچي ۾ امن امان جي صورتحال ۽ ڪراچي ۾ جاري آپريشن بابت خيالن جي ڏي وٺ ڪئي وئي.ملاقات دوران قومي ايڪشن پلان ۽ صوبائي ايپڪس ڪميٽي جي فيصلن تي عملدرآمد بابت به مشاورت ڪئي وئي.

 

سانگهڙ سٽي مان 12 وارڊن مان 10 سيٽون ف ليگ ٻهاري وئي، 2 سيٽن تي پ پ اميدوار ڪامياب، مختلف هنڌن تي جهيڙا، 11 زخمي

سانگهڙ (نمائندو) سانگھڙ ضلعي ۽ بدين جي ڪجھ تڪن تي مڪاني چونڊن لاءِ پولنگ جو عمل مڪمل ٿيڻ کانپوءِ ووٽن جي ڳڻپ جاري آهي، سانگهڙ سٽي مان 12 وارڊن مان 10 سيٽون فنڪشنل ليگ ٻهاري وئي، 2 سيٽن تي پ پ اميدوار ڪامياب ٿي سگهيا، شاهپور چاڪر جي 8 وارڊن مان 6 تي پ پ اميدوار سوڀارا ٿيا، جهول جي 6 وارڊن مان 3 تي پ پ ۽ 3 تي فنڪشنل ليگ اميدوارن ڪاميابي ماڻي ورتي آهي…. سانگهڙ ضلعي جي هڪ ڊسٽرڪٽ ڪائونسل، 11 ٽائون ڪميٽين ۽ 73 يونين ڪائونسل تي پولنگ جو عمل صبح ساڍي ستين وڳي شروع ٿيو، جيڪو شام ساڍي پنجين وڳي تائين بنا وقفي جي جاري رهيو. پولنگ جو عمل مڪمل ٿيڻ کانپوءِ ووٽن جي ڳڻپ جاري آهي، سانگهڙ جي وارڊ 3 تي فنڪشنل ليگ اميدوار امجد راجپوت، وارڊ نمبر 8 تي فنڪشنل ليگ اميدوار زاهد حسين1146، وارڊ نمبر 10 تي فنڪشنل ليگ اميدوار رضا خاصخيلي 606 ۽ وارڊ نمبر 11 تي فنڪشنل ليگ اميدوار عاصم سنڌو، وارڊ نمبر 12 تي فنڪشنل ليگ اميدوار مراد علي نظاماڻي، وارڊ نمبر 7 تي فنڪشنل ليگ اميدوار الهبچايو نظاماڻي ڪاميابي ماڻي ورتي آهي…..کپري جي 18 وارڊن مان 11 تي پ پ اميدوار ۽ 7 تي فنڪشنل ليگ جا اميدوار ڪامياب ٿي ويا آهن، شهدادپور جي يوسي جمه تي پ پ اميدوار شفيق احمد 2768 ووٽ کڻي ڪامياب ٿي ويو آهي……غير حتمي ۽ غير سرڪاري چونڊ نتيجن موجب سانگهڙ جي يوسي سدرٺ تي ڪائونسلر جي سيٽ تي پ پ اميدوار نويد ڏيرو ڪاميابي ماڻي ورتي آهي….جهول جي 6 وارڊن مان 3 تي پ پ ۽ 3 تي فنڪشنل ليگ اميدوار سوڀارا ٿيا آهن، جهول جي وارڊ نمبر 2 تي فنڪشنل ليگ اميدوار رفيق احمد آرائين 335 ووٽ جڏهن ته وارڊ نمبر 5 تي پ پ اميدوار بابو مڪراني 495 ووٽ کڻي غير حتمي ۽ غيرسرڪاري چونڊ نتيجن موجب ڪامياب ٿي ويو……. جهول جي وارڊ نمبر هڪ تي فنڪشنل اميدوار رشيد 390 ووٽ کڻي ڪاميابي ماڻي ورتي آهي، وارڊ نمبر 6 تي فنڪشنل ليگ جو اميدوار نواب چنڙ 790 ووٽ کنيا جڏهن ته مخالف پ پ اميدوار انور شر 410 ووٽ حاصل ڪيا، وارڊ نمبر 4 تي پ پ اميدوار خان محمد خاصخيلي 870 ووٽ کڻي ڪامياب ٿي ويو …..کپري جي وارڊ نمبر 2 تي پ پ اميدوار ملڪ ضمير ۽ وارڊ نمبر 4 تي پ پ اميدوار وسيم قائمخاني ڪامياب ٿي ويو آهي، جڏهن ته وارڊ نمبر 6 تي پ پ اميدوار عابد قائمخاني ڪامياب ٿيو آهي……ڄام نواز علي جي وارڊ نمبر هڪ تي فنڪشنل ليگ اميدوار ڄام نور علي 848 ووٽ کڻي ڪاميابي ماڻي ورتي آهي، جڏهن ته سندس مخالف پ پ اميدوار صرف 6 ووٽ کڻي سگهيو، ساڳي ريت وارڊ نمبر 2 تان فنڪشنل ليگ اميدوار ڄام زاهد 930 ووٽ کنيا جڏهن ته سندس مخالف پ پ اميدوار صرف 8 ووٽ کڻي سگهيو…….ڄآم نواز علي جي يوسي جمڙائو ۾ يوسي چيئرمين جي سيٽ تي فنڪشنل ليگ اميدوار اڪرام جوڻيجو 2134 ووٽ کڻي ڪامياب ٿي ويو آهي، يوسي جمڙائو جي وارڊ نمبر هڪ تي فنڪشنل ليگ اميدوار منظور خاصخيلي 810 ووٽ کڻي ڪاميابي ماڻي ورتي آهي….يوسي جمڙائو جي وارڊ نمبر 2 تي ف ليگ اميدوار علي حسن بنا مقابلي ڪامياب ٿي ويو، وارڊ نمبر 3 تي ف ليگ جو علي کوسو، وارڊ نمبر 4 تي فنڪشنل ليگ جو حاڪم شاهه ۽ ضلعي ڪائونسل جي ميمبر لاءِ اميدوار ڄام شبير علي پڻ ڪامياب ٿي ويو آهي..ٽنڊو آدم جي يوسي پيرو فقير شورو ۾ ضلعي ڪائونسل جي ميمبر جي سيٽ تي پ پ اميدوار مختيار شورو 4 هزار 347 ووٽ کڻي ڪامياب ٿي ويو آهي، جڏهن ته يوسي ميرحسن مري ۾ چيئرمين جي سيٽ تي پ پ اميدوار عقيل مري ڪامياب قرار ڏنو ويو آهي…سرهاڙي جي يوسي حبيب ڪيريو جي وارڊ نمبر هڪ تي جي يو آءِ جو هاشم درس ڪامياب قرار ڏنو ويو آهي، شاهپور چاڪر جي 8 وارڊن مان 6 تي پ پ اميدوار هڪ تي فنڪشنل ليگ اميدوار ڪامياب ٿي ويو، جڏهن ته هڪ وارڊ جو رزلٽ اڃا سامهون نه اچي سگهيو آهي……هوڏانهن بدين ضلعي جي يوسي ڪڙيو گنهور ۾ مرزا گروپ جو اميدوار هارون نظاماڻي 750 ووٽ کڻي ڪامياب ٿي ويو، جڏهن ته پ پ اميدوار صرف 50 ووٽ کڻي سگهيو، ڪڙيو گنهور جي وارڊ 4 تي پ پ اميدوار پيربخش 318 ووٽ ڪامياب ٿي ويو…..تلهار جي وارڊ نمبر 5 تي مرزا گروپ جو اميدوار حسن جمالي، وارڊ نمبر 11 تي پ پ اميدوار صديق هاليپوٽو 371 ووٽ کنيا، وارڊ نمبر 7 تي آزاد اتحاد گروپ جي اميدوار شاهد ٽالپر 328 ووٽ کنيا، وارڊ نمبر 8 تي مرزا گروپ جو عثمان جلباڻي 481 ۽ وارڊ نمبر 10 تي آزاد اميدوار فيصل ٽالپر 372 ووٽ کڻي ڪاميابي حاصل ڪري ورتي آهي…ٽنڊو باگو جي وارڊ نمبر 7 تي پ پ اميدوار نورمحمد ڪاتيار 633 ووٽ کڻي ڪاميابي ماڻي ورتي آهي…..ان کان مڪاني چونڊ دوران ٽنڊي آدم جي يوسي ماڻڪ ٿهيم ۾ پ پ ۽ فنڪشنل ليگ ڪارڪنن وچ ۾ جهيڙي دوران فائرنگ ۾ احمد ٿهيم، علي نواز ۽ نور ٿهيم زخمي ٿي پيا. کپرو ۾ پولنگ اسٽيشن جمعون سمون تي به ٻن گروپن ۾ جهيڙي دوران فائرنگ جي نتيجي ۾ 3 ڄڻا زخمي ٿي پيا.. فائرنگ جي واقعن کانپوءِ پولنگ جو عمل بند ڪيو ويو، جيڪو ڪجهه وقت کانپوءِ ٻيهر شروع ڪيو ويو. شهدادپور جي يوسي 5 ۽ 6 جي مختلف پولنگ اسٽيشنز ۽ شاهپور چاڪر جِي يوسي ڪورو خان عمراڻي تي فنڪشنل ليگ اميدوارن چونڊ جو بائيڪاٽ ڪيو. فنڪشنل ليگ اڳواڻن الزام هنيو آهي ته پولنگ اسٽيشنز تي بيلٽ پيپر وقت کان اڳ آندا ويا ۽ پولنگ اسٽيشنون به تبديل ڪيون ويون.. يوسي ساڌڻو جي وارڊ نمبر 2 ۽ 3، جڏهن ته يوسي سيٺار پير جي وارڊ نمبر 2 ۾ اميدوارن جا نشان تبديل هجڻ سبب چونڊ ملتوي ڪئي وئي. ٻئي پاسي سانگهڙ ۽ بدين جي رهجي ويل هنڌن تي مڪاني چونڊن لاءِ پولنگ دوران مختلف علائقن ۾ جهيڙن ۾ 11 ڄڻا زخمي. جڏهن ته ڪيترين پولنگ اسٽيشنن تي بدنظمي سبب ووٽنگ وارو عمل روڪيو ويو. کپري جي يوسي بلاول هڱورو جي پولنگ اسٽيشن جمعو سمي تي ٻن ڌرين ۾ جهيڙو ٿي پيو جنهن دوران فائرنگ جي نتيجي ۾ 6 ڄڻا زخمي ٿي پيا. جهيڙي جي اطلاع تي پوليس پهچي صورتحال تي ضابطو آڻي زخمين کي اسپتال پهچايو. کپري جي وارڊ نمبر هڪ تي عورتن جي پولنگ ۾ ڇڪتاڻ تان بدنظمي سبب ووٽنگ وارو عمل روڪيو ويو. ٽنڊي آدم جي يوسي ماڻڪ ٿهيم جي پولنگ اسٽيشن ۾ پيپلز پارٽي اميدوار طرفان بيلٽ پيپرن تي ٺپا هڻڻ تي ايس يو پي اميدوار ڪرن ٿهيم احتجاج ڪيو جنهن دوران ٻنهي ڌرين جي ووٽرن ۾ جهيڙو ٿيو. جهيڙي جي نتيجي ۾ 2 ڄنا زخمي ٿي پيا ۽ ووٽنگ وارو عمل ٻن ڪلاڪن تائين پڻ روڪيو ويو. ايس يو پي اميدوار ڪرن ٿهيم ميڊيا سان ڳالهائيندي چيو ته پ پ اميدوار بيلٽ پيپرن تي ٺپا هنيا جنهن خلاف دانهڻ تي کيس ڌمڪيون ڏنيون ويون. ڍوري ناري جي يوسي ماڻڪ ٿهيم جي پولنگ نمبر 5 ۾جهيڙي دوان 3 ڄڻا زخمي ٿي پيا. پولنگ ۾ جهيڙي سبب ووٽنگ وارو عنل ڪجهه وقت لاءِ روڪيو ويو.

 

ثابت ٿي ويو دنيا جون آڱرين تي ڳڻڻ جيتريون تاريخون ۽ تهذيبون سنڌ جي تهذيب آڏو ڪجهه باهن: سانا

ڪراچي (اسٽاف رپورٽر) ڪراچي ۾ سانا طرفان سنڌ جي ترقي بابت ڪانفرنس منعقد ڪئي وئي آهي، مقرر جو چوڻ آهي ته سنڌ جي تاريخ موهن جي دڙي مان ڏسي سمجهي سگهجي ٿي، اهو ثابت ٿي ويو آهي ته دنيا جون آڱرين تي ڳڻڻ جيتريون تاريخون ۽ تهذيبون سنڌ جي تهذيب آڏو ڪجهه به ناهن، آمريڪي قونصل جنرل برائين هيٿ چيو آهي ته سنڌ جي نوجوان ڪنهن به پليٽ فارم تي هٿيار ناهن کنيا، سنڌين کي جتي به موقعو مليو آهي انهن پاڻ ملهايو آهي.. ڪراچي جي مقامي هوٽل ۾ سانا طرفان ”سنڌ جي ترقي بابت ڪانفرنس منعقد ڪئي وئي. ڪانفرنس جي پهرين سيشن کي آمريڪي قونصل جنرل برائين هيٿ، صوبائي وزير سيد مراد علي شاهه، سانا جي جنرل سيڪريٽري نورالنساءِ گهانگهرو، سهيل انصاري ۽ ڊائريڪٽر آءِ بي اي ڪراچي ڊاڪٽر عشرت حسين خطاب ڪيو. ڪانفرنس جي ٻئين سيشن ۾ ايس ڊي پي جي چيف ايگزيڪيوٽو گل ملاح، سانا اڳواڻ ڊاڪٽر وليد شيخ، سماجي اڳواڻ مهناز مهر، ڊاڪٽر مبارڪ علي، گمس جي چيف ايگزيڪيوٽو ڊاڪٽر رحيم بخش ڀٽي ۽ ٻين خطاب ڪيو. ڪانفرنس جي ٽئين سيشن کي خطاب ڪندڙن ۾ ابوالفضل، محمود نواز شاهه، ڊاڪٽر قيصر بنگالي، ڊاڪٽر پرويز طاهر ۽ ٻيا شامل هئا. ان موقعي تي خطاب ڪندي مقررن چيو ته سنڌ اندر مالي وسيلا عرب ملڪن کان به وڌيڪ آهي، مالي وسيلا هئڻ باوجود سنڌ جا ماڻهو بک ۽ بدحالي واري زندگي گهارڻ تي مجبور آهن.۔ هنن چيو ته سنڌ هر سال 20 کرب کان وڌيڪ ڪمائي ٿي، پر بدلي ۾ سنڌ کي صرف ئي صرف 50 کان 80 ارب رپيا ڏنا وڃن ٿا، خبر ناهي اهي 50 کان 80 ارب رپيا ڪٿي خرچ ٿين ٿا. مقررن جو چوڻ هو ته سنڌ مان چونڊيل نمائندا سنڌ جي ترقي ۽ مالڪي ڪرڻ بدران سياسي سوديبازي ۽ مصلحت جو شڪار ٿي وڃن ٿا. مقررن چيو ته سنڌ جي تاريخ موهن جي دڙي مان ڏسي سمجهي سگهجي ٿي، اهو ثابت ٿي ويو آهي ته دنيا جون آڱرين تي ڳڻڻ جيتريون تاريخون ۽ تهذيبون سنڌ جي تهذيب آڏو ڪجهه به ناهن. ڪانفرنس کي خطاب ڪندي ناڻي کاتي جي صوبائي وزير سيد مراد علي شاهه چيو ته وفاق سنڌ سان ٻه اکيائي ڪري کين مالي طور ڪمزور ڪري رهيو آهي، سنڌ جا فنڊ پنجاب تي خرچ ڪيا پيا وڃن. مراد علي شاهه چيو ته سنڌي ڊاڪٽر ٿر ۾ ڊيوٽيون ڪرڻ لاءِ تيار ناهن، ٿر جي ڪوئلي مان توانائي جي کوٽ کي ختم ڪري سگهجي ٿو. ان موقعي تي خطاب ڪندي آمريڪي قونصل جنرل برائين هيٿ چيو ته سنڌ هڪ ڊگهي تاريخ آهي، سنڌ جي نوجوانن کي سڄي دنيا قدر جي نگاهه سان ڏسي ٿي، سنڌ جي نوجوانن به پليٽ فارم تي هٿيار ناهن کنيا. آمريڪي قونصل جنرل برائين هيٿ چيو ته سنڌ جي نوجوانن کي جتي به موقعو مليو آهي، اتي انهن پاڻ ملهايو آهي.