تازيون خبرون

Daily Archives: January 19, 2016

دهشتگردن کي رعايت ڏيڻ وارو تڪراري بل: گهنشام شيام

اسان وٽ قانون جا بخيا اڊيڙڻ واري روايت پراڻي آهي پر قانون کي چتيون هڻڻ واري روايت به متعارف ٿي چڪي آهي. اسان وٽ دهشتگردن کي نئون پراڻو ڪرڻ واري مسخري اڳي به اين آر او تحت صرف پنهنجي ذاتي مفادن جي مدنظر ٿي آهي. انهي ڪري اسان دهشتگردن جي ٻوٽي کي پاڙان اکيڙڻ بجاءِ پاڻي ڏيئي وڏو وڻ ڪري ڇڏيو آهي. ايتري قدر جو اڃان تيز هلندڙ سالن کان ضرب عضب آپريشن به سئو سيڪڙو نتيجا نه ڏيئي سگھيو آهي. ڏوھ ته ڏوھ ئي ٿيندا آهن پر اهي جيڪڏهن پنهنجا ڪن ته معاف ڪيا وڃن يا ڪنهن به طريقي سان انهن جي ڏوهن تي ڪک رکيا وڃن ۽ ٻيو جيڪر ڏوھ ڪري ته سزائون ڏنيون وڃن اهو ڪٿي جو انصاف آهي!

ڏٺو وڃي ته اسان پنهنجي ملڪ ۾ ڏاڍو سو گابو واري نظريي تحت ماڳهين اُلٽي گنگا وهندي ڏٺي آهي مطلب ته جيڪي نامور وڏا ڏوهاري آهن اهي سري عام ڏوھ ڪندي ظاهر ظهور پيا گھمندا وتندا آهن. جڏهن ته بي ڏوهي خوامخواھ جيلن جي سلاخن پويان هنجون پيا هاريندا آهن انهي ڪري اهو سراسر سچ آهي ته قانون ڪوريئڙي جو ڄار آهي جنهن ۾ مڇر ته ڦاسي سگھي ٿو پر ڍڳو ڦاسڻ ناممڪن آهي.

جڏهن اسان جي سوچ جو محور صرف پنهنجو هجي ۽ ان کي ئي فائدا ڏنا وڃن پنهنجا نواز پاليسي کي پاڻي ڏنو وڃي ته پوءِ ائين تڪراري فيصلا نه ٿيندا ته ٻيو ڇا ٿيندو؟ هونئن اسان اٽڪل بازين کي پروموٽ ڪري حقي فيصلا ڪڏهن ڪيا آهن؟ جيڪي عوامي مفادن وٽان هجن.

اوهان کي ياد هجي ته پ پ پ مڪاني نظام جي حوالي سان هڪ تڪراري بل سنڌ اسيمبلي مان پاس ڪرايو هو انهي بل پ پ پ کي ايترو خوار ڪيو جو اهو بل پ پ پ کي واپس وٺڻو ئي پئجي ويو.

اهڙو ئي بل جمعي واري ڏينهن سنڌ اسيمبلي مان سنڌ ڪرمنل پراسي ڪيوشن سروس قانون ۾ اهم ترميمن وارو بل مخالف پارٽين جي هل هنگامي ۾ پنجن منٽن اندر منظور ٿي ويو. افسوس آهي ته پ پ پ وٽ پنهنجا مشهور قانوندان موجود آهن پر تن جي مشوري کان سواءِ قانون سازي ڪرڻ خالي هوا ۾ گھوٻاٽا هڻڻ برابر آهي. اسان وٽ هيٺين سطح تي ائين ٿيندو آهي جو چورن کي پاٿاريدار بچائيندا آهن. جيترو پاٿاريدار وڌيڪ سگھارو هوندو اوترو ئي چور وڌيڪ سگھارو ۽ وڌيڪ ڪمائو هوندو. بلڪل ائين ئي ڪن دهشتگردن جي سهولتڪارن کي بچائڻ لاءِ ملڪي مفاد کي ڇيهو رسائڻ واري قانون سازي ڪرڻ ڪٿي جي گڊ گورننس آهي. اها بيڊ گورننس جي به انتها آهي. آخر ڪار دهشتگردن خلاف کلي جنگ جي دعويٰ ڪندڙ ائين ڇو ڪري رهيا آهن؟ اهي عوام کي ڪهڙو پيغام ڏيڻ چاهن ٿا. اهو ڪهڙو سنڌ ڪارڊ استعمال ڪرڻ جو انداز آهي، جنهن ۾ چيو وڃي ته رڳي سنڌ ۾ ڪرپشن ۽ دهشتگردي خلاف ڪاروايون ڇو ٿيون ڪيو وڃن؟ ٻين صوبن ۾ ڇو نه؟ هاڻ سنڌي ماڻهو ٻين صوبن ۾ نه بلڪه سنڌ ۾ ڪرپشن ۽ دهشتگردي کي پاڙان اکيڙڻ جي خواهش رکي ٿو، ڇو جو سنڌي ماڻهو پنهنجي ايندڙ نسلن جي سٺي مستقبل لاءِ هينئر کان ئي ڪوشان رهڻ چاهي ٿو. ” ناني رڌڻ واري ۽ ڏوهٽي کائڻ واري“ پاليسي کي عوام ڪڏهوڪو رد ڪري چڪي آهي. ڏٺو وڃي ته جمعي واري ڏينهن سنڌ اسيمبلي مان سنڌ ڪرمنل پراسيڪيوشن سروس قانون ۾ اهم ترميمون ڪري اهو ترميمي بل جلدي ۾ منظور ڪرايو ويو. جنهن قانون سازي مطابق حڪومتي پراسيڪيوٽرز کي اضافي اختيار ڏيئي عدالتي نظام کي ڪمزور ڪيو ويو آهي. اهڙي قانون سازي پويان پراسيڪيوشن نظام ۾ سڌارو آڻڻ واري دعويٰ جي دليل کانسواءِ سنڌ سرڪار وٽ ڪو ٺوس دليل نه آهي.

ٿيڻ ته ائين کپي جو اهڙي قانون سازي ڪرڻ کان اڳ ۾ عدالتي نظام ۾ ويتر سڌارو آندو وڃي جيئن دهشتگردي ۾ گھيريل ملڪ کي امن جي سرزمين بڻائي سگھجي جو عوام گھٽ ۾ گھٽ پنهنجي گھر ۾ ته محفوظ هجي. واقعي نظام عدل کي بچائڻ لاءِ انصاف جي نظام کي شفاف بنائڻو پوندو. اها حقيقت آهي ته قانون جي حڪمراني قائم ڪندڙ قومون ئي ترقي يافته آهن. سنڌ سرڪار جي مطابق پراسيڪيوشن نظام ۾ خاميون هئڻ ڪري جوابدارن کي فائدو پهچندو هو. پر ايپڪس ڪميٽي کي پراسيڪيوشن نظام ۾سڌارن لاءِ سفارش ڪرڻ جي ضرورت ڇو محسوس آئي؟ نثار کهڙي مطابق ته هر حڪومت قانون ٺاهڻ جو حق رکي ٿي ڪنهن کان اجازت جي ضرورت ناهي. قانون سازي ڪجي ليڪن اهڙي قانون سازي ته نه ڪجي جنهن سان ڪنهن دهشتگرد کي سزا ڏيڻ يا نه ڏيڻ واري واڳ پنهنجي هٿ ۾ رکجي.

جڏهن وفاق طرفان نيشنل ايڪشن پلان تحت رينجرز کي اختيار ڏنا پي ويا تڏهن ڪراچي ۾ امن امان جي صورتحال ايتري خراب هئي جو سنڌ سرڪار کي انهي پلان جي حمايت ڪرڻ کان سواءِ ڪوئي چارو نه هو. انهي ڪري سنڌ سرڪار نيشنل ايڪشن پلان تحت رينجرز کي دهشتگردي خلاف ڪاروائي ڪرڻ جي مرحلي وار مدي ۾ واڌ ڪئي. ٽئين مرحلي ۾ اوچتو بريڪ تڏهن لڳو جڏهن اهو ايڪشن پلان سنڌ سرڪار جي ماڳهين ڳچي ۾ پئجي ويو ڇو جو بلڊنگ ڪنٽرول اٿارٽي منجھان آصف علي زرداري جا خاص ماڻهو گرفتار ٿيا. تڏهن رينجرز جي اختيارن کي محدود ڪرڻ وارو ٺهراءُ منظور ڪرائڻ جي سنڌ سرڪار کي ضرورت پيش آئي. سڀني محسوس ڪيو ته اها ڪائونٽر اسٽريٽيجي ڊاڪٽر عاصم کي بچائڻ لاءِ اختيار ڪئي ويئي ۽ سنڌ سرڪار عوام کي اهو محسوس ڪرائڻ جي ڪوشش ڪئي ته 18هين ترميم تحت ملندڙ صوبائي خودمختياري تي نيشنل ايڪشن پلان هڪ حملو آهي.

سنڌ ڪارڊ هڪ مضبوط ڪارڊ آهي ڇو جو پ پ پ ه ميشه سنڌ ڪارڊ کي استعمال ڪري مظلوميت وارو راڳ ڳايو آهي ۽ تمام گھڻو سياسي فائدو حاصل ڪيو آهي پر هاڻ ته پ پ پ روز روز سنڌ ڪارڊ استعمال ڪندي سنڌ ڪارڊ جي قيمت سان گڏوگڏ پنهنجي قيمت به وڃائي چڪي آهي. ڇو جو هاڻ سنڌ جو عوام سنڌ ڪارڊ استعمال ڪندڙن کي اقتدار بچائڻ واري حڪمت عملي کان سواءِ ٻيو ڪجهھ به نٿو سمجھي. ائين لڳي رهيو آهي ته نيشنل ايڪشن پلان تحت رينجرز جي اختيارن کي محدود ڪرڻ واري حوالي سان ٻن ننڍن شرطن تي مبني اسمبلي مان منظور شده ٺهرا کي وفاق مڪمل رد ڪري چڪو آهي. سنڌ سرڪار جو موقف ٻڌڻ لاءِ اڃان وزيراعظم طرفان نامزد ڪيل چوڌري نثار پڻ سنڌ ڏانهن لڙي نه آيو آهي. هونئن چوڌري نثار خلاف بيان بازي ۾ سنڌ سرڪار گھٽ نه ڪئي هئي ۽ نه ڪئي آهي. انهي ڪري سنڌ سرڪار کي چوڌري نثار مان چڱي موٽ ملڻ نا ممڪن لڳي پئي. نتيجي طور سنڌ سرڪار وفاق مان آسرو لاهي اهڙو ترميمي بل سنڌ اسمبلي مان منظور ڪرايو آهي. جيڪا سنئين سڌي سنڌ سرڪار جي اٽڪل بازي آهي، انهي اٽڪل بازي مطابق حڪومتي پراسيڪيوٽرز اضافي اختيار ڏيئي نه رڳو لئي ڪرائي ويئي آهي بلڪه ان قانون سازي پويان دهشتگردن کي الزامن کان آجو قرار ڏيئي بچائڻ واري حڪمت عملي پڻ آهي.

رينجرز جي اختيارن کي محدود ڪرڻ واري حڪمت عملي 2015سال جي ان تحفي عيوض اختيار ڪئي ويئي هئي جيڪو تحفو ڊاڪٽر عاصم جي گرفتاري جي صورت ۾ مليو هو ۽ هن سال 2016 ۾ مير منور ٽالپور تي ڪرپشن جا ڪيس ظاهر ٿيڻ جي صورت ۾ ٻيو تحفو پ پ پ کي مليو آهي. انهي ڪري سنڌ ڪرمنل پراسيڪيوشن سروس قانون ۾ اهم ترميمون ڪري اهو ترميمي بل سنڌ سرڪار کي اسمبلي مان منظور ڪرائڻو پئجي ويو. هر ماڻهو پاءٌ اٽو کائي ٿو سو سمجھي ٿو ته اهي اٽڪل بازيون ڳالهھ کي گھمائي ڦيرائي پيش ڪرڻ واريون ٽلون شلون ڪيتريون انصاف تي مبني آهن. هونئن ملڪ ۾ انصاف جون ڌڄيون اڏائڻ ۾ وفاق توڙي صوبن وسان ڪونه گھٽايو آهي. هڪ پاسي وفاق صنعتڪارن، سرمائيدارن، جي ڪاري ناڻي کي اڇي ڪرڻ واري رعايتي اسڪيم کي متعارف ڪرائي ملڪ جو ڏيوالو ڪڍڻ لاءِ پاڻ پتوڙي رهي آهي ۽ ٻي پاسي سنڌ سرڪار دهشتگردن کي رعايت ڏيڻ لاءِ قانون سازي ڪرڻ ۾ پوري آهي ته پوءِ ملڪ ڪيئن ترقي ڪري سگھندو.

ڏٺو وڃي ته سنڌ سرڪار طرفان منظور ٿيل اهڙي ترميمي بل ڪو سنڌي عوام جي ذهن ۾ سٺو تاثر پيدا نه ڪيو آهي. انهي ڪري پ پ پ کي گھرجي ته سنڌ جي عوام اڳيان پنهنجو صاف ۽ شفاف ڪردار ادا ڪري، اهڙين اٽڪل بازين کان پاسو ڪري مثبت حڪمت عمليون جوڙي جيئن اهڙي نوبت نه اچي جو سنڌ ۾ نالي ماتر پارٽيون جيڪي هيئنر گرينڊ الائينس جي صورت ۾ اڳيان اچن پيون سي پنهنجي مقصدن ۾ ڪامياب وڃن. سنڌ ڪرمنل پراسيڪيوشن سروس قانون ۾ ترميمي قانون سازي مطابق دهشتگردي جي انت وارين عدالتن اها ٽرائيل عدالتن ۾ ٽي کان ست سالن تائين ملندڙ سزا جوڳا ڪيس پراسيڪيوٽرز طرفان ٺوس ثبوتن يا سببن جي پيش ڪرڻ جي صورت ۾ ختم ڪيا ويندا. مطلب ته پنهنجن کي سزا ملڻ کان اڳ ۾ بچايو ويندو. انهي بل جي مدنظر عدالتن جي فيصلن تي بد اعتمادي جو سنئون سڌو اظهار آهي. انهي سان ادارن جو پاڻ ۾ ٽڪراءٌ ڪا ملڪ لاءِ مثبت حڪمت عملي نه آهي. وري به پراسيڪيوٽرز کي رينجرز کان مقرر وقت جي اندر رپورٽ گهرڻ جا اختيار ڏنا ويا آهن. اهڙا اختيار سنڌ سرڪار طرفان رينجرز جا محدود اختيار ڪرڻ واري حڪمت عملي جو تسلسل آهن. انهي ترميمي بل سان انهي تاثر کي قطعي رد نٿو ڪري سگھجي ته سنڌ سرڪار اهڙن ڏوهارين کي رليف ڏيڻ پئي چاهي جيڪي ڏوهاري سزا ملڻ جي صورت ۾ پ پ پ جي ساک کي ڌڪ رسائيندا ڇو جو اهي ڏوهاري بطور ونگار وهڻ وارا سهولت ڪار آهن. ٿيڻ ته ائين کپي جو اهو عدالتن تي ئي ڇڏيو وڃي ته عدالتون غيرجانبداري سان ثبوتن، دليلن جي آڌار تي فيصلو ڪري اصل حقيقي ڏوهارين کي سزا ڏيڻ ۾ ڪامياب وڃن، جيئن عوام جو عدالتن تي وڌيڪ ويساھ بحال ٿئي ۽ انهي سان سنڌ ۾ پيدا ۾ ٿيل خوف واري ماحول مان نجات ملندي. اهڙي طرح سان دهشتگردي جي پاڙ پٽجي سگھي ٿي ۽ عوام سُک جو ساھ کڻي سگھي ٿو.

سنڌ سرڪار کي ويتر خوشي محسوس ڪرڻ گھرجي ته جيڪا عوام جي تحفظ واري ڏکي ذميواري مٿس آهي اها پاڻ مرادو پوري ٿي رهي آهي.انهي ڪري سنڌ سرڪار مٿان اها رڳو ذميواري لاڳو ٿئي ته انهي چڱي عمل کي ويتر پروموٽ ڪري جيئن نظام ۾ بهتري اچي سگھي ۽ اها ئي ڳالهھ عوام جي مفادن وٽان آهي ان کان پوءِ  پ پ پ کي ماضي مان سبق حاصل ڪرڻ گھرجي ته آمريت واري دور ۾ به عدالتن تي ڪاھ ڪرڻ جي نتيجي ۾ پرويز مشرف کي وڏي خواري نصيب ٿي ۽ گھڻو ڪجهھ ڀوڳڻو پيو. عدالتن جي ضرورتن کان قطعي انڪار نٿو ڪري سگھجي ڇو جو سٺو انصاف مهيا ڪرڻ ئي بهتر حڪمراني ڪرڻ جي راھ هموار ڪرڻ آهي. هيءَ ترميمي قانون سازي آئين جي بلڪل ابتڙ آهي جيڪڏهن دهشتگردن کي سزا ڏيڻ يا نه ڏين متعلق فيصلا سنڌ سرڪار ڪري ته پوءِ عدالتن جي ڪهڙي ضرورت وڃي بچي ٿي. اڃان تائين مفاهمتي پاليسي کان پ پ پ پنهنجو پانڌ نه ڇڏائي سگھي آهي. ماضيءَ ۾ به نواز سرڪار ۽ پ پ پ مفاهمتي ٺاھ ڪري ڪراچي کي بد امني جي ور چاڙهيو هينئر موجوده دهشتگردن سان مفاهمتي ٺاھ ڄڻ مني ريڪنسيليشن آرڊر آهي جيڪو وري به ڪراچي کي دهشتگردي جي چنبي ۾ آڻڻ جي هڪ حڪمت عملي آهي اهڙي ڪاري قانون کي گھٽ ۾ گهٽ جھموريت ۾ ترجيح نه ڏني وڃي. هونئن اهڙي انڌي قانون کي بنا بحث مباحثي ۽ ويچار ونڊڻ جي پنجن منٽن ۾ منظور ڪرائڻ ڪهڙو جھموري انداز آهي؟ سنڌ سرڪار کي سنڌي ماڻهن جي حقن جي تحفظ ڪرڻ، ٿر ۾ روز به روز معصوم ٻارڙن جي مرڻ، سنڌ ۾ ڌارين جي آبادڪاري، وڌندڙ بيروزگاري، مهانگائي ۽ ٻين ڪيترن مسئلن تي قانون سازي ڪرڻ گھرجي ۽ نه ئي اهڙا تڪراري بل آڻي پنهنجي ساک خراب ڪرڻ گھرجي.

 

گئس بحران ۽ عوامي پريشانيون: شهنيلا فياض

ٿر ۾ خوراڪ جي گهٽتائي سبب ٻارڙا اسپتالن ۾ بيماري سبب فوت ٿي رهيا آهن ۽ سنڌ جي مختلف علائقن ۾ گيس جي بحران سبب عوام پريشان آهي. صبح جو اٿڻ شرط ٻارن لاءِ ناشتو تيار ڪرڻ ۽ گيس جو نه ھجڻ وڏو مسئلو آهي ۽ مجبورن ٻارن کي بکئي پيٽ اسڪولن ڏانهن موڪلي پيو وڃي.

گيس جي گھٽ پريشر ڪري عورتن کي کاڌي تيار ڪرڻ ۾ پريشاني ٿئي ٿي، ٻار جڏھن صبح جو سوير اسڪول وڃڻ لاءِ ننڊ مان اٿي ٿو، سيءَ ۾ گيس نه ھجڻ جي ڪري برف جھڙي ٿڌي پاڻي سان ٻار بيمار ٿي پون ٿا. گيس جي بحران جو ڪاروبار تي به وڏو اثر پوي ٿو. خاص طور تي ھوٽلن وارن وڏو نقصان ٿئي ٿو. گھرن ۾ گيس جي بحران جي ڪري ھوٽلن تي ماڻھن جي رش نظر اچي ٿي، گئس نه هجڻ سبب عورتون وڌيڪ پريشان ٿين ٿيون، جيڪي عورتون نوڪرين تي وڃن ٿيون، انھن جو چوڻ آھي ته ”گيس نه ھجڻ جي ڪري صبح جو گرم پاڻي ملي ٿو نه وري چانھ، توھان ٻڌايو ته ناشتو ۽ لنچ ڪئين ٺھندو؟ گيس جي انتظار ۾ اسان کي نوڪري تي وڃڻ ۾ دير ٿي ويندي آھي.“

سڄي سنڌ ۾ گئس جي بحران سبب سفر ڪرڻ ۾ به پريشاني ٿئي ٿي. ماڻھن کي ڊيوٽي تي وڃڻ لاءِ گھڻي پريشاني ٿيندي آھي. ھر روز ھر شھر ۾ گيس جي گھٽ پريشر سبب ماڻھو رستن روڊن رستن تي احتجاج ڪندي نظر اچن ٿا، ڪاٺين جي کوٽ سبب ماڻھو سخت پريشان آھن. سنڌ جيڪا گيس جي گھٽ پريشر جي ڪري صبح ۽ منجھند جي ماني رات جي ماني سان گڏ کائڻي پئي ٿي. صبح جو چڙھيل ڀاڄي رات جو وڃي تيار ٿئي ٿي. ان وچ واري وقت ۾ عورتون پنھنجي گھر جا سمورا ڪم ڪري وٺنديون آھن پر گئس جي پريشر جي وڌڻ جو ڪو امڪان نه ھوندو آهي.

سنڌ جيڪا 37 سيڪڙو گئس جي پيداوار مھيا ڪري ٿي، ان کي بدلي 29 سيڪڙو گئس ڏني وڃي ٿي. جڏھن ته وڏو صوبو پنجاب ڪل 5 سيڪڙو گئس جي پيداوار سبب بدلي ۾ ان کي 49 سيڪڙو گئس ڏني وڃي ٿي. ان مان مراد ته پنجاب ٻين صوبن جي گئس به هڙپ ڪري ٿو. اھا ھن ملڪ جي بدقسمتي آھي جو اصل مالڪ پنھنجي پيداوار مان فائدو حاصل نٿو ڪري سگھي ۽ لٺ جي زور تي ٻين صوبن جي پيداوار تي قبضو ڪن ٿا. ان متعلق سينيٽ ۾ پڻ بحث ٿيو، جتي پيٽروليم ۽ قدرتي وسيلن جي وفاقي وزير شاھد خاقان عباسي چيو ته قدرتي گئس رڳو پيداواري علائقي جو حق آھي. صوبن جي گئس تي پھرين حق واري معاملي کي گڏيل مفادن واري ڪائونسل ۾ کنيو ويندو. سنڌ ۾ سي اين جي حاصل ڪرڻ لاءِ ڊگھيون ڊگھيون قطارون لڳل  آھن ۽  ھفتي ۾ ٻه کان ٽي ڏينھن تائين سي اين جي اسٽيشنون بند پيل آھن ۽ پنجاب ۾ سي اين جي بغير ڪنھن رڪاوٽ جي وڪرو ڪئي پئي وڃي. روس جيڪو دنيا جو سڀ کان وڌيڪ گئس پئدا ڪندڙ پاڪستان ان کان گئس وٺڻ جو معاھدو ڪيو آھي، جڏھن ته هن کان اڳ ۾ پاڪستان پيپلزپارٽي جي حڪومتي دور ۾ ايران سان گئس جو معاھدو ٿيو ھو، ان معاھدي تحت ايران – پاڪستان جي سرحدن جي ويجھو پنھنجون پائيپ لائينون وڇايون پر آمريڪا جي سخت مخالفت بعد ايران کان گئس وٺڻ وارو معاھدو پورو ٿيو ۽ نئين معاھدي تحت پاڪستان روس ايل اي جي ليڪيوڊ، نيچرل گئس خريد ڪندو، جيڪا سنڌ کي ڏني ويندي. جڏھن ته سنڌ مان حاصل ٿيندڙ سي اين جي مان پنجاب جا ڪارخانا ھلايا ويندا يعني سستي ۽ سٺي گئس اصل مالڪن کان کسي طاقت جي زور تي پاڻ استعمال ڪندا. جڏھن ته ٻاھران گھرايل ايل اين جي وري سنڌ حوالي ڪئي ويندي.

سنڌ جا حڪمران ايل اين جي وٺڻ کان جواب ڏئي رھيا آھن پر وفاقي وزير  انھن جي ڪيل معاھدن جون ڪاپيون ڏيکاري رھيا آھن، جنھن ۾ ھنن پاران ايل اين جي وٺڻ واريون صحيحون ٿيل آھن. سنڌ اندر اڄڪلھ 1450 ايم ايم جي ضرورت آھي، جڏھن ته اڄ ڪلھ ڪل گئس 1300 ايم ايم سي ايف ڊي ڏني پئي وڃي. 150 ايم ايم جي گھٽتائي آھي. ڪراچي شھر ۾ 900 جي ضرورت آھي جڏھن ته 800 ايم ايم گئس ڏني پئي وڃي.

 

نواب اڪبر بگٽي قتل ڪيس جو فيصلو………..

ڪوئيٽا ۾ دهشتگردي ٽوڙ عدالت اڳوڻي صدر پرويز مشرف کي بلوچ قومپرست اڳواڻ نواب اڪبر بگٽي جي قتل ڪيس مان آجو ڪري ڇڏيو، ان کانسواءِ اڳوڻي وفاقي گهرو وزير آفتاب احد شيرپائو ۽ بلوچستان جي اڳوڻي گهرو وزير شعيب نوشيرواني کي به ان ڪيس مان آجو ڪيو ويو آهي، ميڊِيا رپورٽن مطابق ڪوئيٽا جي دهشتگردي ٽوڙ عدالت ۾ نواب اڪبر بگٽي قتل ڪيس جي ٻڌڻي ٿي، ان موقعي تي اڳوڻو وفاقي گهرو وزير آفتاب احمد شيرپائو عدالت ۾ پيش ٿيو، ٻڌڻي دوران عدالت مختصر فيصلو جاري ڪندي اڳوڻي صدر پرويز مشرف، آفتاب احمد شيرپائو ۽ شعيب نوشيرواني کي ڪيس مان آجو ڪري ڇڏيو، جڏهن ته مقتول جي قبر کوٽن واري درخواست به رد ڪئي وئي، ٻڌڻي کانپوءِ جميل اڪبر بگٽي عدالتي فيصلي تي اعتراض واريندي ان کي هاءِ ڪورٽ ۾ چيلينج ڪرڻ جو اعلان ڪيو آهي. عدالت نواب اڪبر بگٽي قتل ڪيس ۾ نامزد ٽن ملزمن اڳوڻي وزيراعظم شوڪت عزيز، اڳوڻي گورنر بلوچستان اويس احمد غني ۽ اڳوڻي ڊي سي ڊيرا بگٽي عبدالصمد لاسي جا داعمي وارنٽ جاري ڪندي سندن گرفتاري تائين ڪيس پينڊنگ ۾ رکڻ جو حڪم ڏنو. واضح هجي ته نواب اڪبر بگٽي 26 آڪٽوبر 2006ع تي بلوچستان جي جبلن ۾ هڪ آپريشن دوران شهيد ٿي ويو هو، جنهن جو ڪيس 2009ع ۾ بلوچستان هاءِ ڪورٽ جي حڪم تي داخل ٿيو، ان ڪيس ۾ آزاد ٿيل ٽنهي جوابدارن سوڌو 12 ماڻهن کي جوابدار نامزد ڪيو ويو هو.

اڪبر بگٽي جي پٽ جميل بگٽي جي وڪيل ميڊيا سان ڳالهائيندي چيو ته عدالتي فيصلي مان مطمئن ناهيون، ان ڪري اهو فيصلو هاءِ ڪورٽ ۾ چئلينج ڪنداسين، جاچ ٽيمن جي ڪارڪردگي به بيان ڪرڻ جوڳي ناهي، عدالت ۾ هڪ ملزم کي به پيش نه ڪيو ويو، ملزمن کي سزا ملڻ گهرجي ها.

اڳوڻي صدر جنرل رٽائرڊ پرويز مشرف چيو آهي ته اڪبر بگٽي ڪيس ۾ عدالتي فيصلي ثابت ڪري ڇڏيو ته مون تي داخل ڪرايل سمورا ڪيس سياسي هئا، جن ۾ ڪابه سچائي نه هئي، پنهنجي جاري ڪيل بيان ۾ پرويز مشرف جو چوڻ آهي ته اڄ آئون پرسڪون آهيان، ڇوته اڪبر بگٽي ڪيس ۾ عدالت طرفان ڪيل فيصلي ثابت ڪري ڇڏيو ته مون تي ٺاهيل ڪيس سياسي هئا، مون تي بي بنياد ڪيس داخل ڪرايا ويا، مون کي يقين آهي ته ٻين به ڪيسن جو فيصلو مستقبل ۾ اڪبر بگٽي ڪيس جيان ئي ايندو. آفتاب احمد شيرپائو چيو ته ڪيس ۾ بيگناهه هئاسين، ان ڪري اسين بري ٿيا آهيون، اسان جي خلاف ڪنهن به شاهدي نه ڏني هئي.

 

پاڪ-سعودي قيادت جي ملاقات، سعودي عرب جي سلامتي کي اهم سمجهون ٿا: نواز شريف

رياض (اين اين آءِ) وزيراعطم نوازشريف ۽ آرمي چيف جنرل راحيل شريف پاڪستاني وفد سان گڏ سعودي عرب جي فرمان روا شاهه سلمان بن عبدالعزيز سان ملاقات ڪئي جنهن ۾ سينٽرل اوڀر جي صورتحال سميت ٻطرفو لاڳاپن تي خيالن جي ڏي وٺ ڪئي سعودي فرمان روا شاهه سلمان بن عبدالعزيز سان شاهي محل ۾ ٿيندڙ ملاقات ۾ ٻنهي ملڪن جي قيادت پاڪستان ۽ سعودي عرب جا لاڳاپا ۽ ٻنهي ملڪن جي عوام وچ ۾ گهرن رشتن کي هٿي ڏيڻ تي خيالن جي ڏي وٺ ڪئي ان موقعي تي سعودي عرب ۽ ايران وچ ۾ تازو ڇڪتاڻ تي به ڳالهه ٻولهه ڪئي ويئي ذريعن مطابق وزيراعظم نوازشريف سعودي فرمان روا کي آگاهه ڪيو ته پاڪستان سعودي عرب جي سلامتي کي اهم سمجهي ٿو ۽ ان جي خودمختياري ۽ علائقائي سالميت کي ڪنهن به خطري جي صورت ۾ سخت ردعمل جو مظاهرو ڪندو حرمين شريفين جو تحفظ پوري امت مسلمه جو فرض آهي ۽ پاڪستان به ان کي پنهنجو فرض سمجهي ٿو نوازشريف چيو ته پاڪستان امت مسلمه جي اتحاد جو حامي آهي هن سعودي عرب سميت سمورن خليجي ملڪن سان ڀائراڻن ۽ دوستاڻن لاڳاپن جو حوالو ڏيندي چيو ته هو مسلم ملڪن ۾ اختلاف ختم ڪرڻ لاءِ پنهنجون خدمتون پيش ڪرڻ لاءِ تيار آهي ذريعن مطابق وزراعظم مسلمانن جي يڪجهتي ۽ پاڪستاني عوام سان خاص لڳاءُ تي خادم حرمين شريفين سان تشڪر جو اظهار ڪندي چيو ته پاڪستان جي حڪومت ۽ عوام کيس قدر جي نگاهه سان ڏسي ٿو سعودي فرمان روا پاڪستان پاران سينٽرل اوڀر ۾ امن ۽ ڇڪتاڻ گهٽائڻ لاءِ ڪوششن جي تعريف ڪئي ۽ پاڪستاني قيادت پاران ان معاملي ۾ ذاتي دلچسپي کي به ساراهيو. شاهه سلمان بن عبدالعزيز وزيراعظم نوازشريف کي ايران سان سعودي عرب جي ڇڪتاڻ ختم ڪرڻ لاءِ هر مثبت قدم جي حمايت جو يقين ڏياريو ملاقات ۾ سعودي ڪابينه جا ميمبر ۽ شاهي خاندان جا فرد به شريڪ ٿيا.

 

چوڌري نثار نوازشريف جو چيو نٿو مڃي، ميان صاحب بيوس آهي: مولابخش چانڊيو

حيدرآباد (بيورو) سڌ سماءَ واري صوبائي صلاحڪار مولا بخش چانڊيو آهي ته چوڌري نثار وزارت ڇڏڻ لاءِ تيار نظر ايندو آهي، پر نواز شريف جي ڳالهه ناهي ٻڌندو، ميان صاحب به بي وس نظر ايندو آهي، هي پيار به ٿي سگهي ٿو، سنڌ ۾ مخالف ڌر رڳو ڊاڪٽر عاصم حسين ۽ ماڊل ايان علي پويان لڳل آهي. حيدرآباد جي مقامي هوٽل ۾ وومين ميڊيا سينٽر ماس ڪميونيڪيشن جي تقريب ۾ شرڪت بعد ميڊيا سان ڳالهائيندي مولابخش چانڊيو چيو ته ميان صاحب کان هو پڇڻ چاهي ٿو ته ڇا چوڌري نثار کان ڊنل آهي؟ يا ان سان محبت ڪري ٿو، گهٽ ۾ گهٽ واضع ڪيو وڃي. هن چيو ته اسحاق ڊار سياست سمجهي ٿو، ان کي سنڌ ۾ اچڻ گهرجي، پ پ جي خواهش آهي ته نواز سرڪار مدو پورو ڪري پر سندن لڇڻن مان ائين نٿو لڳو. مولا بخش چانڊيو چيو ته سنڌ ۾ جيڪي به الائنس ٺهيا آهن، اهي سنڌ حڪومت کي ناڪام ڪرڻ لاءِ ٺهيا آهن، پر انهن کي هميشه ناڪامي نصيب ٿي، سنڌ حڪومت وفاق جو حصو هئي ۽ آهي. هن چيو ته اقتصادي راهداري منصوبي بابت صوبن وفاق آڏو خدشا ظاهر ڪري ڇڏيا آهن، هاڻي وفاقي حڪومت جو ڪم آهي ته صوبن جا خدشا ختم ڪري. هن وڌيڪ چيو ته اپوزيشن جو ڪم مئسلن جي نشاندهي ڪرڻ آهي، نه ڪي اسپيڪر ڊائس اڳيان گوڙ ڪري وڌيڪ مسئلا پيدا ڪرڻ، سنڌ ۾ مخالف ڌر رڳو ڊاڪٽر عاصم حسين ۽ ماڊل ايان علي پويان لڳل آهي. صوبائي صلاحڪار جو چوڻ هو ته ڪراچي مان پهريان ٻوري بند لاش ملندا هئا ۽ هاڻي پٿرن سان ڀريل ٻوريون ملي رهيون آهن، ڪراچي ۾ صفائي جو نظام پهريان کي بهتر آهي. مولابخش چانڊيو چيو ته سنڌ ۾ آدمشماري درست نموني نه ٿي آهي جنهن کي صحيح ڪرڻ جي ضرورت آهي  ميڊيا جي نمائندن پاران پڇيل سوالن جا جواب ڏيندي ڪيو. صوبائي صلاحڪار مولابخش چانڊيو اپوزيشن ليڊر سيد خورشيد شاهه جي بيان جي تائيد ڪئي ته وفاقي ناڻي واري وزير سينيٽر اسحاق ڊار ۾  اها خاصيت آهي ته هو سياسي مفاهمت ۾ مهارت رکي ٿو، ماڻهن کي راضي به ڪري وٺندو آهي، سندس زبان سياسي آهي ۽ هو ماڻهن کي گڏ وٺي هلي ٿو جڏهن ته مفاهمت دوران ٻه قدم پوئتي به  هٽي ويندو آهي ۽ مفاهمت وارو انداز اپنائيندو آهي. هن چيو ته  اهو وزير اعظم جي ذميواري آهي ته هو ماحول کي خوشگوار بڻائي ۽ صوبن کي گڏ وٺي هلي. هن چيو ته سندس خواهش آهي ته وزير اعظم پاڪستان  پنهنجي آئيني مدو پورو ڪري. هن ان ڳالهه تي افسوس جو اظهار ڪيو ته پاڪستان مسلم ليگ ن جي حڪومت جڏهن به ايندي آهي ته هو پوري پاڪستان لاءِ نه بلڪه مخصوص علائقن لاءِ حڪومت ۾ ايندي آهي، جيڪا تمام خطرناڪ ڳالهه آهي. صوبائي صلاحڪار چيو ته مخالفن کي سواءِ پيپلزپارٽي جي ڪجهه به  نظر نه اچي رهيو آهي. هن چيو ته پ پ پ ڪلهه به وفاق جي پارٽي هئي ۽ اڄ به وفاق جي پارٽي آهي. هن چيو ته پ پ پ مخالف اهو سوچي رهيا آهن ته سنڌ ۾ پ پ پ جي   چونڊيل  حڪومت ڪيئن ختم ڪجي ۽ پارٽي چيئرمين بلاول ڀٽو زرداري تي ڪهڙا ڪهڙا  ڳٿا لفظ ڳالهايا وڃن. نئين چونڊيل بلدياتي نمائندن بابت پڇيل سوال جي جواب ۾ صوبائي صلاحڪار چيو ته جيڪڏهن انهن بغاوت نه ڪئي ته اسان سان گڏ هوندا، جڏهن ته اختيارن جي ڳالهه ٿي ته قانونسازي ڪرڻي پوندي ۽ ضرورت آهر افهام ۽ تفهيم  سان اختيار ڏئي سگهجن ٿا. ان موقعي تي وومين ميڊيا سينٽر جي فوزيه شاهين پروگرام جي اعزاز ۽ مقصدن تي تفصيلي روشني وڌي.

 

ميئر کي مشرف دور وارا اختيار ڏنا ويا ته سنڌ سرڪار ڇا ڪندي؟: قائم علي شاهه

ڪراچي (اسٽاف رپورٽر) قائم علي شاهه چيو آهي ته رينجرز جي اختيارن وارو معاملو حل ٿي ويو آهي، اعلان جلد ڪيو ويندو. ڪراچي ۾ پريس ڪلب جي عهديدارن سان ملاقات دوران ڳالهائيندي وڏي وزير سيد قائم علي شاهه چيو آهي ته چوڌري نثار کي رينجرز جي اختيارن وارو معاملو حل ڪرڻ لاءِ سنڌ اچڻو هو پر نه آيو. هن چيو ته رينجرز جي اختيارن وارو معاملو ايترو ڏکيو نه هو جيترو بڻايو ويو آهي. سندس چوڻ آهي ته متحده جو ميئر اڃا چونڊيو ئي نه آهي ته اڳ اختيار گهريا پيا وڃن. وڏي وزير چيو ته ميئر کي پرويز مشرف دور وارا اختيار ڏنا ويا ته سنڌ سرڪار ڇا ڪندي؟.

 

هڪ مهيني بعد رينجرز جو معاملو ٻيهر ڪر کڻندو: خورشيد شاهه

نوشهروفيروز (نمائندو) وزيراعظم مسئلو پاڻ حل ڪري يا ناڻي واري وزير اسحاق ڊار کي ڪراچي موڪلي. نوشهري فيروز ويجهو ڳوٺ الله ڏني ڀنڀري ۾ پ پ اڳواڻ فاروق ڀنڀري سان سندس سهري جي لاڏاڻي تي تعزيت کانپوءِ ميڊيا سان ڳالهائيندي ۽ هڪ انٽرويو ۾ سيد خورشيد شاهه چيو ته جيڪڏهن سنڌ جا سمورا معاملا حل ڪرڻ آهن ته پوءِ کين چوڌري نثار نه گهرجي. هن چيو ته پ پ کي جڏهن ٽياڪڙ تي اعتماد ئي ناهي ته پوءِ معاملو اڳتي ڪئين وڌي سگهي ٿو. سندس چوڻ هو ته سنڌ حڪومت ڪنهن سان وڙهڻ نٿي چاهي، سمورا معاملا آئين ۽ قانون موجب حل ٿين. خورشيد شاهه چيو ته کين وزيراعظم مان اميد آهي ته هو سنڌ جي خدشن کي ختم ڪرڻ لاءِ پنهنجو ڪردار ادا ڪندو. هن چيو ته اقتصادي راهداري رٿا تي ننڍن صوبن کي ڀت سان لڳايو پيو وڃي، جنهن تي هو احتجاج ڪرڻ تي مجبور ٿي سگهن ٿا. هڪ سوال جي جواب ۾ خورشيد شاهه چيو ته ڪرمنل پراسيڪيوشن بل به نه پڙهيو آهي، ان ڪري ان تي ڪو تبصرو نه ڪندو. مخالف ڌر جي اڳواڻ چيو ته محدود وسيلن باوجود سنڌ حڪومت صحيح نموني ڪم ڪري رهي آهي. هن چيو ته ميئرز ۽ چيئرمينز کي 2013 موجب اختيار ملندا، ايم ڪيو ايم طرفان سنڌ حڪومت خلاف بيان سمجهه کان چرهيل آهن. سندس چوڻ هو ته اقتصادي راهداري رٿا ۾ سنڌ سميت ننڍن صوبن کي نظرانداز ڪيو ويو آهي. خورشيد شاهه چيو ته ايران ۽ سعودي عرب جي ڇڪتاڻ جي خاتمي لاءِ پاڪستان کي ڀرپور ڪردار ادا ڪرڻ گهرجي. هن چيو ته ايران ۽ سعودي عرب ۾ تڪرار حل نه ٿيو ته مسلمان ملڪن ۾ دهشتگرديءَ جا واقعا وڌندا ۽ انساني جانيون ضايع ٿينديون. سندس چوڻ هو ته داعش پنجاب ۾ موجود آهي تنهن ڪري اتي به آپريشن ٿيڻ گهرجي. خورشيد شاهه چيو ته جمهوري حڪومت کي هلڻ گهرجي، کين فرينڊلي اپوزيشن قرار ڏيندڙ اڻ ڄاڻ آهن. هن چيو ته سنڌ ۾ گورنر راڄ رڳو ڳالهيون ڪرڻ سان نه لڳندو، گرينڊ الائسن جي ڪابه حيثيت ناهي. سندس چوڻ هو ته سنڌ سرڪار مالياتي بحران کي منهن ڏئي رهي آهي. خورشيد شاهه چيو ته سنڌ سرڪار کي ڪارڪردگي بهتر ڪرڻ گهرجي، ملڪ ۾ جمهوريت کي ڪو به خطرو ناهي.

 

پرويز مشرف بلوچ اڳواڻ نواب اڪبر بگٽي جي قتل ڪيس مان آجو، آفتاب شيرپائو ۽ شعيب نوشيرواني به جند ڇٽي وئي

ڪوئيٽا (م.ڊ) ڪوئيٽا ۾ دهشتگردي ٽوڙ عدالت اڳوڻي صدر پرويز مشرف کي بلوچ قومپرست اڳواڻ نواب اڪبر بگٽي جي قتل ڪيس مان آجو ڪري ڇڏيو، ان کانسواءِ اڳوڻي وفاقي گهرو وزير آفتاب احد شيرپائو ۽ بلوچستان جي اڳوڻي گهرو وزير شعيب نوشيرواني کي به ان ڪيس مان آجو ڪيو ويو آهي، ميڊِيا رپورٽن مطابق ڪوئيٽا جي دهشتگردي ٽوڙ عدالت ۾ نواب اڪبر بگٽي قتل ڪيس جي ٻڌڻي ٿي،ان موقعي تي اڳوڻو وفاقي گهرو وزير آفتاب احمد شيرپائو عدالت ۾ پيش ٿيو،ٻڌڻي دوران عدالت مختصر فيصلو جاري ڪندي اڳوڻي صدر پرويز مشرف، آفتاب احمد شيرپائو ۽ شعيب نوشيرواني کي ڪيس مان آجو ڪري ڇڏيو، جڏهن ته نواب اڪبر بگٽي جي پٽ جميل اڪبر بگٽي جي قبر ڪشائي واري درخواست رد ڪئي وئي، ٻڌڻي کانپوءِ جميل اڪبر بگٽِي عدالتي فيصلي تي اعتراض واريندي ان کي هائيڪورٽ ۾ چيلينج ڪرڻ جو اعلان ڪيو. واضح هجي ته نواب اڪبر بگٽي 26 آڪٽوبر 2006ع تي بلوچستان جي جبلن ۾ هڪ آپريشن دوران شهيد ٿي ويو هو، جنهن جو ڪيس 2009ع ۾ بلوچستان هائيڪورٽ جي حڪم تي داخل ٿيو،ان ڪيس ۾ آزاد ٿيل ٽنهي جوابدارن سوڌو 12 ماڻهن کي شامل ڪيو ويو هو.

 

ڪراچي جي احتساب عدالت ڊاڪٽر عاصم حسين کي وڌيڪ 10 ڏينهن جي رمانڊ تي نيب حوالي ڪري ڇڏيو

ڪراچي (اسٽاف رپورٽر) ڪراچي جي احتساب عدالت ڊاڪٽر عاصم حسين کي وڌيڪ 10 ڏينهن جي رمانڊ تي نيب حوالي ڪري ڇڏيو آهي، عدالت ڊاڪٽر عاصم حسين جو طبي معائنو ڪرائڻ جو حڪم ڏيندي چيو آهي ته جيڪڏهن ڊاڪٽر تجويز ڪن ته ڊاڪٽر عاصم کي اسپتال داخل ڪيو وڃي. احتساب عدالت جي جج سعيد قريشي جي عدالت ۾ بدعنواني ڪيس ۾ پيٽروليم واري اڳواڻي وزير ڊاڪٽر عاصم حسين کي پيش ڪيو ويو.. ڪيس جي جاچ آفيسر ضمير عباسي عدالت کي ٻڌايو ته ڊاڪٽر عاصم خلاف اسٽاڪ ايڪسچينج ۾ 170 ملين ڊالر جي ڪرپشن سامهون آئي آهي، جڏهن ته دبئي ۾ ويٺل سندس فرنٽ مين عبدالمجيد کي گرفتار ڪرڻ لاءِ انٽرپول سان رابطو ٿيو آهي جلد کيس گرفتار ڪيو ويندو، جنهن سبب وڌيڪ جاچ لاءِ 14 ڏينهن جو رمانڊ ڏنو وڃي. ڊاڪٽر عاصم حسين جي وڪيل رضا نقوي عدالت ۾ موقف اختيار ڪيو ته عاصم حسين تي جيڪي به ڪرپشن جا الزام لڳايا ويا آهن، اهي سڀ ڪوڙا آهن، هيستائين ڊاڪٽر عاصم خلاف ڪرپشن جا ڪي به ثبوت ناهن مليا آهن، جنهن سبب کيس بنا دير آزاد ڪيو وڃي. عدالت ٻنهي ڌرين جا دليل ٻڌڻ کانپوءِ ڊاڪٽر عاصم حسين کي وڌيڪ 10 ڏينهن لاءِ نيب حوالي ڪري ڇڏيو. عدالت ڊاڪٽر عاصم حسين جو جناح اسپتال مان علاج ڪرائڻ جو حڪم ڏيندي چيو ته جيڪڏهن ڊاڪٽر تجويز ڪن ته پوءِ عاصم حسين کي اسپتال ۾ داخل ڪرايو وڃي.

 

ڪوئيٽا ۾ سيڪيورٽي فورسز جي گاڏي ويجهو ڌماڪو،6 اهلڪار شهيد

ڪوئيٽا(م.ڊ) ڪوئيٽا ۾ سيڪيورٽي فورسز جي گاڏي ويجهو ڌماڪي جي نتيجي ۾ 6 اهلڪار شهيد ٿي ويا، شروعاتي رپورٽن مطابق ڪوئيٽا جي مارگٽ واري علائقي ۾ سيڪيورٽي فورسز جي گاڏي ويجهو زوردار ڌماڪو ٿيو، جنهن جي نتيجي ۾ علائقي ۾ ڀاڄ پئجي وئي، ڌماڪي سب فورسز جي گاڏي تباهه ٿي وئي، جڏهن  ته شروعاتي خبرن مطابق ڌماڪي جي نتيجي ۾ 5 اهللڪار ٿڏي تي ئي شهيد ٿي ويا، خبر پوڻ تي ايف سي سوڌو سيڪيورٽي فورسز جا وڏا اٽالا پهچي ويا، جن علائقي کي ڪڙو چاڙهي ڇڏيو، جنهن کانپوءِ امدادي ڪارروايون ڪري شهيد ٿي ويل اهلڪارن جا لاش اسپتال نيا ويا، سيڪيورٽي ذريعن جو چوڻ آهي ته ڌماڪو ان مهل ٿيو، جڏهن سيڪيورٽي فورسز جي گاڏي اتان گذري رهي هئي، اها خبر ناهي پئجي سگهي ته ڌماڪو ڪهڙِ نوعيت جو هو پر شروعاتي ڄاڻ ۾ ٻڌايو ويو آهي ته ڌماڪو ريموٽ ڪنٽرول بم ذريعي ڪيو ويو.