تازيون خبرون

Daily Archives: January 15, 2016

پنهنجي زندگي کي کليل ڪتاب جيان رکڻ پسند ناهي: ايما واٽسن

لنڊن (شوبز نيوز) هالي ووڊ جي فلمي سلسلي هيري پوٽر مان شهرت حاصل ڪندڙ اداڪاره ايما واٽسن  چيو آهي ته ماڻهو مون کي هڪ بور شخصيت  سمجهندا آهن،جنهن جو سبب اهو آهي ته هوءَ هڪ تمام گهڻو ذاتي حيثيت ۾ رهندر انسان آهي. ايما واٽسن کي پنهنجي زندگي کليل ڪتاب جيان رکڻ پسند ناهي،تنهن ڪري هوءَ پرائيويسي پسند ڪندي آهي.هڪ انٽرويو ۾ هن چيوته هوءَ ذاتي خيالن ۾ رهڻ ڪري چپ ٿيڻ کانپوءِ گهڙين ۾ ئي ڀرپاسي جي ماحول کان لا تعلق ٿي ويندي آهي.

 

سلمان خان 2 ڪلاڪ ميزباني ڪرڻ عيوض ٻه ڪروڙ گهري ورتا

ممبئي (شوبز نيوز) بالي ووڊ جي دبنگ خان ايوارڊ شو جي تقريب ۾ رڳو ٻن ڪلاڪن لاءِ ميزباني جا فرض نڀائڻ تي 2 ڪروڙ معاوضو گهري ورتو.سلمان خان جو نالو نه رڳو بالي ووڊ پر دنيا جي مڃيل اداڪارن ۾ شامل ٿئي ٿو ۽ ڪيترين ئي بهترين فلمن ۾ اداڪاري جا جوهر ڏيکاريا آهن،ان لاءِ ئي کيس فلم جي ڪاميابي جو ظامن سڏيو ويندو آهي.جڏهن ته سلو ميان فلم انڊسٽري ۾ سڀ کان وڌيڪ معاضو وٺندڙ اداڪارن جي فهرست ۾ به اڳيان اڳيان آهي.سلمان خان کي هڪ ايوارڊ تقريب جي ميزباني لاءِ چيو ويو ۽ جنهن جو وقت به 2 ڪلاڪ ٻڌايو ويو،پر سلو ميان پنهنجو معاوضو 2 ڪروڙ ٻڌايو.ميڊيا ۾ اهي به خبرون اچي رهيون آهن ته بالي ووڊ ڪنگ خان جي جاءِ تي ايوارڊ شو جي ميزاباني نڀائڻ لاءِ سلمان خان کي چيو ويو، جنهن تي سلو ميان راضي ته ٿيو پر ٻن ڪلاڪن لاءِ 2 ڪروڙ رپيا گهري ورتا آهن، جنهن لاءِ تقريب ڪوٺائيندڙن ڪجهه ڏينهن جو وقت گهري ورتو آهي.

 

پاڪستان پهرين ٽي ٽوئنٽي ميچ ۾ ڪيوي ٽيم کي 16 رنسن تان مات ڏئي ڇڏي

آڪلينڊ (اسپورٽس نيوز)پاڪستان ٽي ٽوئنٽي سيريز جي پهرين ميچ ۾ ميزبان ٽيم کي 155 رنسن تي گهمائي لاٿو،شاهد آفريدي،وهاب رياض،عماد وسيم ۽ محمد عامر 2.2 شڪار ڪيا.نيوزيلينڊ پاران ڪپتان ڪين وليمسن 71 ۽ ڪين منهري 56 رنسون ٺاهي ڪيوي ٽيم پاران بهترين راند پيش ڪئي.جڏهن ته ٻيا رانديگر قومي بالرن اڳيان مڪمل بيوس نظر آيا ۽ پوري ٽيم 155 رنسن تي ڍير ٿي 16 رنسن تان مات کائي وئي.

 

سنڌ جي قديمي راند ملهه سرڪار جي بي ڌياني سبب ختم ٿيڻ لڳي، پهلوان بکون ڪاٽڻ تي مجبور

احمد پور(اسپورٽس نيوز) سنڌ جي قديمي ۽ ثقافت جو اهڃاڻ راند ملھ پهلواني جي سرپرستي نه ٿيڻ سبب زوال پزيرائي جو شڪار، ملھ پهلوان پنهنجو ۽ پنهنجي ٻچن جو پيٽ پالڻ لاءِ مزدوري ڪرڻ تي مجبور. ثقافت کاتي پاران سار نه لھڻ ڪري ملاکڙن جا مور ملھ پهلوان بدحالي واري زندگي گذارڻ لڳا، ڪيترائي ميدان ڇڏي ويا ۽ سنڌ اسپورٽس بورڊ پاران پوئيواري نه ڪرڻ تي سنڌ جي قومي راند ڏينهون ڏينهن زوالپڻي جو شڪار ٿيڻ لڳي، ملاکڙا به رونقون وڃائي ويٺا آهن، قومي ڏهاڙن ميلن ۽ ملاکڙن ۾ طاقت جي علامت سمجھيا ويندڙ پهلوان سرڪار پاران سرپرستي نه ٿيڻ ۽ وظيفا نه ملڻ تي نفسياتي مرضن جي ور چڙهي ويا ۽ ڪيترائي ملھ پھلوان پيٽ سفر جي گذر لاءِ محنت مزدوري ڪرڻ تي مجبور ۽ پنهنجي جسماني طاقت به وڃائي ويٺا. سرڪار پاران سرپرستي (يا) پرگهورنه ٿيڻ خلاف ملھ پهلوانن جو پريس ڪلب احمد پور اڳيان احتجاجي مظاهرو. ان موقعي تي پهلوان عبدالقادر ميتلو، پهلوان علي نواز ميتلو، نصرالله ميتلو، شاهنواز ميتلو، خان سنديلو، پهلوان رضامحمد ميتلو ۽ ٻين ميڊيا سان ڳالهائيندي چيو ته سنڌ جي قديم ۽ ثقافت جي اهڃاڻ راند ملھ پهلواني سرپرستي ۽ پرگهور نه ٿيڻ ڪري زوال جو شڪار آهي. جڏهن ته نئين نسل ۾ شعور پيدا ڪرڻ لاءِ ثقافتي ڏينهن ملهايا پيا وڃن، اتي سنڌ جي قديم ۽ ثقافتي راند ملھ پهلواني زوالپزيرائي جي ور چڙهيل آهي. حڪومت ۽ ثقافت کاتي پاران سار نه لهڻ سبب ملھ پهلوان بدحالي واري زندگي گذارڻ تي مجبور آهن، سنڌ اسپورٽس بورڊ پاران پوئيواري نه ڪرڻ ڪري سنڌ جي ملھ پهلواني ڏينهون ڏينهن زوالپڻي جي شڪار ٿي رهي آهي جنهن ڪري سنڏ جي اڪثر ضلعن جا ملھ پهلوان معاشي بدحالي جي ڪري نفسياتي مرضن جي ورچڙهي ويا آهن قومي ڏهاڙن ۽ ميلن جي زينت ۽ طاقت جي علامت سمجھي ويندڙ ملھ پهلواني پٺڀرائي نه ٿيڻ ڪري منظرعام تان مٽجندي پئي وڃي. جڏهن ته حڪومت پاران مهوار وظيفو نه ملڻ ڪري پنهنجو ۽ پنهنجي ٻچن جوپيٽ گذاراڻ لاءِ محنت مزدوري ڪرڻ تي مجبور آهن، جنهن سبب ڪيترائي ملھ پهلوان پنهنجي جسماني طاقت به وڃائي چڪا آهن. هنن سنڌ جي وڏي وزير سيد قائم علي شاھ، ثقافت کاتي جي وزير ۽ ٻين وس وارن کان مطالبو ڪيو ته نوٽيس وٺي سنڌ جي قومي راند ملھ جي پٺڀرائي ڪرائي ملھ پهلوانن مان بيچيني ختم ڪئي وڃي. ٻي پاسي سنڌ جي قومي ۽ ثقافتي راند ملھ جي سرڪاري سرپرستي نه ٿيڻ ڪري سياسي سماجي اڳواڻن پاران ڳڻتي جو اظهار ان موقعي تي سياسي سماجي اڳواڻ ڊاڪٽر شير بهادر ميتلو نظير احمد مهيسر ستار کوسو حاجي انور لاڙڪ وڏيرو امام ڏنو سمنگ ۽ ٻين صحافين سان ڳالهائيندي چيو ته سنڌ جي قومي راند ملھ حڪومتي عدم دلچسپي جي ڪري تباهي ڏانهن وڃي رهي آهي هنن حڪومت ۽ راندين واري کاتي کان گهر ڪئي ته ملھ راند لاءِ تعلقي سطح تي گرائونڊ ٺهرايا وڃن ۽ ملھ راند لاءِ سرڪاري سرپرستي ڪئي وڃي ته جيئين هي راند عروج تي اچي سگهي .هوڏانهن ڪرڪيٽ هاڪي سميت ٻين راندين جي رانديگرن کي سرڪاري اهميت انهن لاءِ فنڊ مقرر ڪرڻ توڙي سرڪارپاران گرائونڊ مهيا ڪيا ويا آهن، جڏهن ته سنڌ جي ملھ راند لاءِ ڪابه سرڪاري سرپرستي نه ٿيڻ ڪري ۽ ان لاءِ گرائونڊ نه ٺهرائڻ سبب ملھ پنهنجي حيثيتوڃائي چڪي آهي ان ڪري عيدن ميلن ۽ قومي ڏهاڙن تي پنهنجي مدد پاڻ تحت ٿيندڙ ملھ مقابلن لاءِ نه گرائونڊ وغيره يا اسٽيڊيم نه هجڻ ڪري ملھ مقابلاڪرائڻ به مسئلو بڻجندو پيووڃي.

 

چنگچي رڪشا: ڪراچي جي اورنج ٽرين: الياس شاڪر

سپريم ڪورٽ ڪراچي ۾ چنگ چي رڪشائن کي ”کلي عام“ روڊن تي هلڻ جي اجازت ڏئي ڇڏي آهي. ڪراچي جون شاهرائون هڪ ڀيرو وري چنگ چي رڪشائن سان ڀرجي وينديون. موٽرسائيڪل جو منهن ۽ رڪشا جي ڌڙ واري ان عجيب الخلقت سواري کي عوام پنهنجي لاءِ غنيمت سمجهي رهيو آهي. دنيا چنڊ ۽ مريخ کانپوءِ ٻين سيارن تي وڃڻ جي تياري ڪري رهي آهي پر اسان اڃا تائين چنگ چي رڪشا جي روڊن تي هلڻ يا نه هلڻ جي بحث ۾ پورا آهيون. جسٽس دوست محمد پنهنجي ريمارڪس ۾ چيو ته ”ڪراچي ۾ 1995ع ماڊل جون بسون هلي رهيون آهن پر ڪو پڇڻ وارو ناهي. ڪراچي جي معاملن تي پڇڻ وارا ضرور آهن پر اهي رڳو ”ٽيڪس“ ۽ ”آمدني“ جو پڇندا آهن. عوام جيئي يا مري ان سان سندن ڪو غرض ناهي. هتي ته وي آءِ پي پروٽوڪول سبب بسما مري وڃي ٿي پر هڪ وزير صاحب ”ڀٽو زنده“ آهي جو فلسفو سمجهائڻ ۾ پورو هو.

دنيا جي هر ملڪ ۽ شهر جي سڃاڻپ ان جي ٽرانسپورٽ هوندي آهي. صاف سٿري ۽ هڪ دلڪش بس اڄ جي دنيا ۾ انساني زندگي جي معيار ۽ تهذيب يافتا معاشري جو هڪ مثالي نمونو پيش ڪندي آهي. تازو جاپان ”بلٽ ٽرين“ کي 220 ڪلو ميٽر في ڪلاڪ جي رفتار سان هلائڻ جو ڪامياب تجربو ڪيو آهي. لنڊن ۾ زير زمين ٽيوب سروس پنهنجو مثال پاڻ آهي. نيويارڪ ۽ واشنگٽن ۾ چمڪندڙ ٽيڪسيون ۽ تيز رفتار ٽرينون اتان جي شهرين لاءِ وڏي ۽ بنيادي سهولت آهي پر جڏهن ڳالهه ڪراچي جي هجي ته پوءِ دنيا جون رد ٿيل ۽ رٽائر بسون هاڻي به هتي ”نوڪريون“ ڪندي ملنديون. ٽرانسپورٽ کاتي جي پنهنجي حالت به کنڊر بسن کان گهڻو مختلف ناهي. جڏهن 50 سال پراڻي بس کي ٻن چئن سئو رپين ۾ فٽ ٿيڻ جو سرٽيفڪيٽ ملي سگهي ٿو ته چنگ چي رڪشائن کي به فٽنس ماڻڻ کان ڪير روڪي نٿو سگهي. هڪ ڳالهه ياد رکڻ جهڙي ضرور آهي ته ”چانهه پاڻي“ جو هڪ وڏو ”هوٽل“ کُلي ويو آهي، هاڻي ”ڌنڌو“ خوب هلندو. سپريم ڪورٽ جڏهن اهو چئي ڇڏي ته ”ڪراچي ۾ ٽرانسپورٽ مافيا جو قبضو آهي جيڪا نيون بسون هلڻ نه ٿي ڏئي ته باقي ڇا ٿو بچي.

سنڌ ۾ گڊ گورننس جو حال اهو آهي جو هڪ نوجوان جڏهن گٽرن تي ڍڪڻ نه هئڻ سبب وڏي وزير جي تصوير ٺاهي ان جو ڌيان ڇڪرايو ته سائينءَ نوٽيس ورتو پر ٻه ڏينهن گذرڻ باوجود گٽرن کي ڍڪڻ ته نه لڳا، ايترو ضرور ٿيو جو نوجوان خلاف ڪيس داخل ٿي ويو ۽ آخرڪار عالمگير نالي انهيءَ نوجوان پنهنجي مدد پاڻ تحت گٽرن کي ڍڪڻ شروع ڪيو. ڪراچيءَ جا شهري ته پريشان آهن ته قائم علي شاهه اڍائي سالن کان تعمير ٿيندڙ ملير 15 واري فلاءِ اوور (پُل) جو ڪم 15 جنوريءَ تي مڪمل ڪرڻ جو حڪم ڏنو آهي، جنهن وڏي وزير جي چوڻ تي گٽر جا ڍڪڻ نه لڳن، فلاءِ اوور جو ڪم ڪهڙو مڪمل ٿيندو؟

ڪراچيءَ ۾ ٽرانسپورٽ جو مسئلو حل ڪرڻ جي ڪوشش ئي ناهي ڪئي وئي. مورڳو اهو سوچيو ويو ته ”رئس گُلو“ ڪٿان نڪرندو ۽ ذاتي گهرج ڪٿان پوري ٿيندي؟ سنڌ جي حڪمرانن جي به ڇا ڳالهه ڪجي، حڪومت ڪندي عرصو ٿيو اٿن پر عوام لاءِ ڪا ڊگهي نظر واري پاليسي ناهن ٺاهي سگهيا. ڪراچيءَ سان محبت ڪندڙ هڪ پراڻي شهريءَ جو چوڻ آهي ته ”20 سالن کان بسن ۽ ويگنن ۾ سفر ڪري رهيو آهيان، حڪومت هڪ به نئون روٽ ناهي ٺاهيو. مورڳو اٺ نوان رستا بند ڪري ڇڏيا، جن ۾ مشهور روٽ 8A هو، جيڪو آءِ آءِ چندريگر جهري پاڪستاني وال اسٽريٽ کان ٿيندو ويندو هو. 8A بابت اردوءَ جي پهرين صف جي مزاح نگار مشتاق احمد يوسفي پنهنجي ڪتاب ”سرگزشت“ ۾ دلچسپ ذڪر ڪيو آهي، هو پاڻ ان روٽ/رستي جو مسافر هو، ۽ 8A ذريعي هو بينڪ جي هيڊ آفيس کان پنهنجي گهر پي آءِ بي ڪالوني ويندو هو. حڪومت پنهنجي ڪمائيءَ جا ايترا رستا ٺاهيا آهن جو اڌ انچ واري نلڪيءَ ۾ ڦڙو ڦڙو پاڻيءَ جو به نه ٿو اچي پر ٽينڪرن مان چئن انچن جو ڦوهارو ايئن ٿو نڪري جو جي ٽريبائن لڳايو وڃي ته ان کان ڏهه واٽ بجلي ضرور پيدا ٿي سگهي ٿي.

چنگ چي رڪشا ڪراچيءَ جي پراڻي ٽرانسپورٽ مسئلي جو حل ناهي، هي ٻڏنديءَ کي ڪناري لڳائڻ برابر آهن. دنيا ۾ ٽرانسپورٽ جي مسئلي تي وڏا وڏا سيمينار ٿين ٿا. ان کي سائنس قرار ڏئي جديد طريقن سان حل ڪرڻ جي ڪوشش ڪئي وڃي ٿي. ڪراچيءَ ۾ ٽرانسپورٽ جو مسئلو حل ڪرڻ ۾ حڪومت جو ڪو ڪردار ڪونهي، مورڳو سمورو شهر اڻ پڙهين ڊرائيورن جي رحم ڪرم تي آهي ۽ اهي هن کي انساني مسئلو نه ٿا سمجهن ۽ ڪمرشل طريقي سان حل ڪرڻ جي ڪوشش ڪن ٿا.

ڪراچيءَ جي تباهيءَ تي خوش ٿيندڙ وفاقي ۽ صوبائي اهلڪار هڪ ڳالهه ذهن ۾ رکن ته ڪراچي تباهه ٿي ته سمورو ملڪ تباهه ٿيندو. ۽ اها ڳالهه گذريل ڏينهن ۾ وزيراعظم نواز شريف به چئي چڪو آهي. ڪراچي 70 سيڪڙو ٽئڪس ڏئي ٿي ۽ سڀ کان وڌيڪ ٽئڪس ڏيندڙ به هن شهر ۾ رهن ٿا. ڪراچيءَ جي معيشت جو جنازو نڪتو ته سموري ملڪ کي روئڻو پوندو. پاڪستان ۾ ٽئڪس ڪلچر ڪراچيءَ ۾ ايجاد ٿيو. ٽيڪس ڏيندڙ ساڍن ٽن لک ماڻهن منجهان اڍائي لک ڪراچيءَ ۾ رهن ٿا. ڪراچيءَ سڄي پاڪستان جي تعمير ڪئي آهي، سڄي ملڪ جي معيشت جو ڦيٿو هلايو آهي، پر ڪراچيءَ جي ٽرانسپورٽ جي ڦيٿي بابت سپريم ڪورٽ جا ريمارڪس ڪافي آهن ته 1955ع8 واري ماڊل جون بسون ڪراچيءَ ۾ هلي رهيون آهن. سپريم ڪورٽ حقيقتون ٻڌائي ملڪي عوام تي وڏي مهرباني ڪئي آهي. هاڻي اسان جو ڪم آهي ته انهيءَ مسئلي کي حل ڪريون.

 

فضيلا سرڪي اغوا ڪيس هڪ ماءُ جي درد کان بيخبر سماج!: نسيم بخاري

هڪ دفعو وري ٺل جي نياڻي فضيلا سرڪي جي اغوا وارو معاملو ۽ سندس بازيابيءَ لاءِ ابي امڙ پاران ٿيندڙ جدوجهد واريون خبرون پرنٽ ۽ اليڪٽرانڪ ميڊيا ۾ اچڻ شروع ٿي ويون آهن. فضيلا سرڪي جي امڙ پاڻ ساڙڻ جو اعلان ڪيو آهي. هن جو چوڻ آهي ته اسلام آباد وڃي سپريم ڪورٽ آڏو پاڻ ساڙي ڏيهه پرڏيهه جي ماڻهن تي اُهو واضح ڪبو ته پاڪستان ۽ خاص ڪري سنڌ ۾ ڏاڍ ڏمر واريون قوتون ڪيتريون مضبوط آهن، انهن جي ڏهڪاءَ جو ڪيترو خوف آهي ۽ اهي ڪيتريون طاقتور آهن.

شيخ اياز مارئي جي پسمنظر ۾ ان جي ترجماني ڪندي لکيو هو ته:

”تو جئن ڪيو سومرا، ڏاڍا ڏکوئي سينءَ،

ڪوبه نه ڪري ائين، مِرونءَ لڄَ اچي وڃي.“

اها ساڳئي صورتحال، اها ساڳئي ميار ۽ بلڪل مارئي جهڙي پيڙا مان فضيلا سرڪيءَ جي امڙ سڪينه کي به گذرڻو پيو آهي، اُها سڪينه جنهن جو تعلق پنجاب جي شهر سنجرڪوٽ سان هو. پنجابي ڳالهائيندڙ ان عورت لائون لهڻ کانپوءِ مڪمل سنڌي ٻولي سکي ورتي. هوءَ اڄ به جڏهن ميڊيا آڏو دانهين ٿي ته سنڌيءَ ۾ ڳالهائي ٿي, اُها ٻڍڙي عورت پنهنجي دؤر ۾ ڏاڍي حسين هوندي هئي. ٿر جي ڀوتارن هن کي پنهنجي ڪوڙڪيءَ ۾ آڻڻ چاهيو پر هن جي مزاحمت کين ڏکي پئجي وئي. 23 مارچ 2007ع تي پنهنجي پاڙي ۾ راند کيڏندڙ سندس ست سالا معصوم نياڻي فضيلا سرڪي کي ڀوتار پنهنجي محسوس ٿيندڙ بي عزتيءَ جو بدلو وٺڻ لاءِ اغوا ڪرايو، جيڪا اڄ تائين نه رڳو پيءُ ماءُ پر دنيا جي اکين کان به اوجهل آهي، پر سندس امڙ جديد مارئيءَ جو ڪردار نڀائيندي ثابت قدميءَ سان شيخ اياز جي لفظن ۾ مارئي جيان للڪاري رهي آهي ته:

جئن ڪي ڪهؤ ڏار، تئن هو مڙسَ ملير جا،

نيٺ ته تنهنجي ڪوٽ تي، اڀري ڪندا وار،

سگهارا سنگهار وِلهيءَ ٿيندا واهرو.

ان ساڳئي تسلسل ۽ پسمنظر ۾ شيخ اياز جا اُهي شعر به حافظي تي تري اچن ٿا ته:

ڀِٽن ۾ ڀونچال، اچڻو آهي اوچتو،

سدا رهندو سومرا! هيئن نه منهنجو حال،

تو هي خامُ خيال سوگهيون آهن سنگهرون.

حيرت آهي انهيءَ ڳالهه تي ته هڪڙي ٻڍڙي عورت گذريل اٺن سالن کان پنهنجي نياڻيءَ جي بازيابيءَ لاءِ اڻ ٿڪ جستجو سان جاکوڙيندي آئي آهي، اُها عورت جيڪا اڄ جي جديد دؤر ۾ سنڌي عورتن ۽ سڄي سماج لاءِ جدوجهد جي ماڊل طور ڏٺي ۽ ليکي وڃي ها! بدقسمتيءَ سان هُن جي جدوجهد ۾ ڪلهو ڪلهي سان مِلائي ڪابه سياسي ۽ سماجي پارٽي جرئت منداڻي جدوجهد ڪرڻ لاءِ تيار نه ٿي ڏسجي.

ڳوٺ حسن سرڪي جي رهواسڻ سڪينه سرڪي پنهنجي مخالف کي للڪاريو آهي، تر ناهي ڇڏيو، پر تر جي طاقتور ماڻهوءَ سان اکين ۾ اکيون وجهي پنهنجي ظلمن جو حساب گهريو آهي. پنهنجي مڙس عبدالرزاق سرڪيءَ سان گڏيل جدوجهد ۾ هِن عورت ڇا ڇا نه وڃايو آهي؟! اهو عبدالرزاق جنهن پنهنجي ٻنيءَ ٻاري کي وڪڻي معصوم نياڻيءَ جي بازيابيءَ لاءِ جهيڙيو آهي، جنهن جو ڪيس به هڪ سال کانپوءِ 20 اپريل 2008ع تي حد جي ٿاڻي ۾ داخل ٿيو، پورو سال هن جي فرياد به نه ٻڌي وئي، ڪو به دادُ ڪونه ٿيو، پر فرياد کانپوءِ به ڪيس ۾ ڪا اڳڀرائي ڪونه ٿي. سائيڪلن جا پنڪچر ڳنڍي گهر جي چلهه ٻاريندڙ عبدالرزاق جي دڪان کي به باهه ڏياري وئي، پر پوءِ به اُهو پوڙهو ماڻهو ٿڪيو ناهي. هن جا حوصلا اڄ به بلند آهن، اُهي ٻئي زال مڙس تاريخ ۾ ڪو نئون داستان، ڪا نئين دانهن، ڪو نئون دردَ، رقم ڪرڻ لاءِ آتا آهن. هنن وٽ وڃائڻ لاءِ هاڻ ڪجهه به ناهي، حياتي آهي جنهن تان به هو هٿ کڻڻ لاءِ تيار آهن. هو دنيا جي مظلومن کي انصاف جي حاصلات لاءِ اتساهڻ لاءِ اڳيان آيا آهن. هنن جي نياڻي هنن جي جدوجهد جي واٽ وارو ذريعو آهي، اها نياڻي جنهن بابت ميڊيا ۾ خبرون آهن ته اُها وڪرو ٿي هئي گورو ميربحر ۽ مولو ميربحر کيس خريد ڪري تيغاڻين وٽ وڪرو ڪيو هو، تيغاڻين وري جتوئين کي پئسن عيوض ڏني هئي، تڏهوڪي ايس ايڇ او علي محمد مهر وارثن کي 10 لک ڀنگ ڏيڻ جي ڳالهه ڪري اڍائي لک رپيا ورتا هئا ۽ باقي پئسا پاڻ ڀرڻ جو چيو هو. هن چيو هو ته ڇوڪري بڇلو تيغاڻي وٽ آهي، فضيلا سرڪي جي چاچي عبدالجبار سرڪي پاران اڍائي لک ادا ڪرڻ باوجود به نياڻي جي بازيابي ممڪن نه بڻي هئي، جنهن بابت اطلاع آهن ته ان جي شادي به ڪرائي وئي آهي ۽ کيس اولاد به ٿيو آهي، هوءَ جبري پرڻي جي جڪڙ ۾ ڀل آئي هجي پر پوءِ به هن جي دل مان اُها دانهن ضرور نڪتي هوندي ته:

نسورو نادان سدا آهين سومرا!

منهنجو ساهُه سنگهار کان، ڌارو ڪندو زندان!

آئون ته هان حيران ڪئن تو ڀاڙيو ڪوٽ تي.

شيخ اياز جو اُهو شعر رڳو عمرڪوٽ جي حوالي سان ناهي پر اهو شعر اڄ به اهڙن ظلمن جي داستانن جي ترجماني ڪري ٿو. فضيلا سرڪي ڪيس ٿاڻي جي ايف آءِ آر کان ملڪ جي اعليٰ عدليه تائين وڏو اٿليو پٿليو آهي. اڳوڻي چيف جسٽس تڏهوڪي جيڪب آباد جي ايس ايس پي ثاقب اسماعيل ميمڻ کي گهرائي ٽن هفتن ۾ رپورٽ ڏيڻ جو چيو هو، اُها رپورٽ افتخار چوڌري کي ته نه ملي پر ان کانپوءِ ايندڙ ايس ايس پيز به فضيلا سرڪي ڪيس جي حوالي سان ڪي گهربل نتيجا نه ڏئي سگهيا. منير احمد کهڙو، پروين چانڊيو، ولي الله دل، يونس چانڊيو، ظفر اقبال ملڪ ۽ ساجد کوکر تائين نه رڳو ايس ايس پيز پر ڊي آءِ جيز عبدالخالق شيخ، ثناءُ الله عباسي، سائين رکيو ميراڻي، جاويد عالم اوڍو، خادم رند، دين محمد بلوچ تائين به متاثر خاندان، انصاف لاءِ دَر کڙڪايا آهن. اڳوڻي آءِ جي مشتاق شاهه کان اڄ جي آءِ جي سنڌ پوليس تائين متاثر خاندان جون انصاف لاءِ صدائون اڀ ڏارين ٿيون، پر اُهو اڃا اڻلڀ آهي. سنڌ جي وڏي وزير قائم علي شاهه به هڪ جلسي ۾ فضيلا سرڪي جي بازيابيءَ لاءِ تحرڪ وٺڻ جي پڪ ڏياري هئي، پر تحرڪ جو حقيقت جي ڌرتيءَ تي ڪو به نانءُ نشان ڏسڻ ۾ نه ٿو اچي.

مشرف دؤر گذري ويو، پاڪستان پيپلز پارٽي به تاريخ ۾ پهريون ڀيرو پنج سال اقتدار جا مزا ماڻيا، (ن) ليگ جي حڪومت جا اڍائي ورهيه گذري ويا آهن، سائين قائم علي شاهه گذريل ستن اٺن سالن کان سنڌ جو اقتدار ڌڻي آهي، پر فضيلا سرڪي سڀ کان وسري وئي آهي.

انتهائي افسوس سان لکڻو ٿو پوي ته فضيلا سرڪي ڪيس جي حوالي سان هڪ غريب خاندان ڏاڍي شاندار نموني جهڙي ڊگهي جدوجهد ڪئي آهي، ان جي اوتري جرئت سان داد رسي نه ٿي آهي. اُهو خاندان جيڪو ڀوتار هٿان ڏنگيل آهي، ان ئي ڀوتار جي جوءِ ۾ رهي ڪري ان خلاف هر طرح سان مزاحمت سان آڏو اچي جيڪا دليري ڏيکاري آهي، اُها دليري ته ڀونءَ جي سموري ماڻهن کي ظلم ۽ ڏاڍاين خلاف جدوجهد جي علامت ثابت ٿيڻ گهرجي، پر ڏک اهو آهي ته ماڻهو ڏيئي مان ڏيئو ٻارڻ بدران جهڙي ڦڙتي ۽ تيز طوفان ۾ ٻرندڙ ڏيئي کي به وسائڻ لاءِ وسان نه گهٽائي رهيا آهن. اهڙي حال ۾ بي حال عورت آخر ڪيستائين پنهنجي مظلوم نياڻيءَ جي بازيابيءَ لاءِ دانهيندي رهندي!؟

فضيلا سرڪي جي امڙ کي صوفي بزرگن جي درگاهن تي دانهڻ ۽ انياءَ خلاف احتجاج ڪرڻ جون صلاح ملي رهيون آهن. درگاهه فتح پور ۾ جيڪڏهن اُها عورت ڌرڻو هڻي ويهي ٿي رهي يا اُها صوفي شاهه عنايت جي درگاهه جهوڪ شريف ۾ وڃي انصاف لاءِ ٻاڏائي ٿي ۽ گادي نشينن کان مدد طلبي ٿي، عاجزي جي احساس سان اها اميد ڪري ٿي ته سندس آس پوري ٿيندي ته هن جو اهو جذبو پڪ سان ڪنهن جوت ۾ تبديل ٿي سگهي ٿو ۽ ان سڄي معاملي کي جيڪڏهن پرنٽ ۽ اليڪٽرانڪ ميڊيا جي پوري پوري پذيرائي به ملي ٿي ته نه فقط ڏاڍ ۽ ڏهڪاءَ پکيڙيندڙ قوتن جو گهيرو تنگ ٿيندو پر رياستي سرڪار ۽ ادارن بابت به خلق انيڪ سوال پڇڻ شروع ڪندي، جنهن جي نتيجي ۾ ادارن جي فعاليت ۽ عوام دوست ڪارڪردگي جا به جواز پيدا ٿي سگهن ٿا.

سڪينه سرڪي ڪنهن وڏي گهراڻي جي عورت ناهي، هن وٽ ڪنهن يونيورسٽيءَ يا ڪاليج جي ڪابه ڊگري ناهي، هڪڙي عام عورت آهي، اُها عورت جڏهن پهاڙ جيڏي حوصلي سان دل پختي ڪري ۽ جدوجهد لاءِ سِر تريءَ تي ڪري نڪري پوي ٿي ته جاگيرداراڻي جبر هيٺ رهندڙ سماج ۾ اها هلچل ڪا ننڍي ڳالهه ناهي.

فضيلا سرڪي پرنٽ ۽ اليڪٽرانڪ ميڊيا ۾ گذريل اٺن سالن کان جيترو گونجيو آهي، اُها گونج پنهنجي ملڪ کانسواءِ جيڪڏهن ڪنهن ٻئي هنڌ رڳو مهينو اڳ ئي گونجي ها ته هن وقت تائين ڏوهاري عدالتن کان سزا کائي جيل به ڪاٽن ها!ٰ پر اسان وٽ انصاف لاءِ ٻاڏائيندي عمريون گذري وينديون آهن. هڪڙي ڀوتار يا سردار ۾ هٿ وجهڻ سان ڪهڙي قيامت اچي ويندي. تر جو اهو وڏيرو اڄ به ڏاڍ ۽ ڏهڪاءَ پکيڙيو ويٺو آهي، فضيلا سرڪي جي پيءُ ماءُ کي ڌمڪيون ڏئي رهيو آهي، ان ڪيس کي ايمانداريءَ سان رپورٽ ڪندڙ صحافين کي ڊڄائي ۽ ڌمڪائي رهيو آهي، پر قانون لاڳو ڪندڙ ادارا غفلت جي گهري ننڊ ۾ آهن.

گذريل اٺن ڏهن سالن کان سنڌ ۾ ڏيهي ۽ پرڏيهي اين جي اوز جو وڏو چرچو رهيو آهي، پر ڪنهن هڪڙي اين جي اوز به فضيلا سرڪي واري معاملي تي اثرائتو دٻاءُ وڌائڻ جي حوالي سان اڄ تائين نتيجا ڏيندڙ وک نه وڌائي آهي. پرنٽ ۽ اليڪٽرانڪ ميڊيا ۾ ڪنهن بيمار ماڻهوءَ جي مفلسي رپورٽ ٿئي ٿي ته ڪونه ڪو ادارو يا مخير ماڻهو جاڳي پوي ٿو، ڪو شاگرد ڪنهن موذي مرض ۾ مبتلا ٿئي ٿو ته ان جا يار دوست ۽ شاگرد گڏجي سڏجي 70 کان 80 لک رپيا گڏ ڪري وٺن ٿا، پر ڇا سبب آهي جو هڪڙي هاءِ پروفائيل ڪيس جي حوالي سان ڪنهن به فرد يا اداري سهائتا جي سلسلي ۾ اک نه پٽي آهي؟ ڇا هڪ مسڪين خاندان کي انصاف ڏيارڻ يا مدد ڪرڻ خير جو ڪم ناهي!؟

انساني ڀلائي جي حوالي سان پاڻ پتوڙيندڙ يا ادارا فضيلا سرڪي اغوا ڪيس کي هٿي وٺرائي ۽ انصاف جي فراهمي کي يقيني بڻائي، جيڪڏهن جاگيرداراڻي جهان ۾ ڪو ٽاڪوڙو وجهن ٿا ته ان سان رڳو هڪڙي خان جي ڪوٽ ۾ لرزش نه ايندي، پر هڪٻئي پٺيان اهڙن ڪڌن ڪردارن جي ڪوٽن ۾ ٽاڪوڙا مچندا. هڪڙي سڪينه جديد دؤر جي سورمي ثابت نه ٿيندي، پر سوين سڪينائون پنهنجا سور پچارڻ لڳنديون، جڏهن ائين ٿيندو ته گهڻن خردماغ، بااثر ڀوتارن جا دماغ ٺڪاڻي لڳندا.

naseembukhari44@gmail.com

 

پٺاڻ ڪوٽ واقعو: پاڪستاني قدمن جي ڀارتي آجيان

ڀارتي پرڏيهي وزير وڪاس سوراپ ميڊيا بريفنگ دوران چيو ته پٺاڻ ڪوٽ حملي جي جاچ بابت پاڪستاني سيڪيورٽي فورسز عملدارن سان مڪمل رابطي ۾ آهيون، جاچ لاءِ ڀارت ايندڙ پاڪستاني تحقيقاتي ٽيم جي آجيان ڪيون ٿا، جڏهن ته جاچ ٽيم جو مئنڊيٽ بعد ۾ طئه ڪيو ويندو، جيڪڏهن پاڪستان وڌيڪ ثبوت گهريا ته اهي به جاچ ٽيم کي فراهم ڪيا ويندا، پٺاڻ ڪوٽ حملي جي جاچ ۾ پاڪستان سان پورو سهڪار ڪنداسين، دهشتگرد تنظيمن خلاف پاڪستان جون ڪارروايون درست سمت ڏانهن وڃي رهيون آهن، جيش محمد جي ڪارڪنن کي گرفتار ڪرڻ جي آجيان ڪيون ٿا، جيش محمد جي سربراهه مولانا مسعود اظهر جي گرفتاري بابت اسان کي ڄاڻ ناهي، پاڪ-ڀارت پرڏيهي سيڪريٽريز سطح جي ملاقات کي گڏيل مشوري کانپوءِ معطل ڪيو ويو، ڀارتي پرڏيهي سيڪريٽري پنهنجي هم منصب سان ڳالهه ڪئي آهي، ٻنهي ملڪن جي مشوري کانپوءِ جلد ئي نئين تاريخ جو اعلان ڪيو ويندو، ٻنهي ملڪن جي پرڏيهي سيڪريٽريز وچ ۾ تمام جلد ۽ بهترين ملاقات ٿيندي، ان موقعي تي هڪ صحافي سوال ڪيو ته ڇا اڃا به بال پاڪستان جي ڪورٽ ۾ آهي؟ جنهن تي وڪاس سوراپ جواب ڏنو ته هي فٽبال ناهي پر سفارتي معاملا آهن، پاڪستان پاڙيسري ملڪ آهي، ٻئي ملڪ سٺن پاڙيسرين جيان رهڻ چاهين ٿا. پاڪ ڀارت ڳالهين جي حوالي سان سندس چوڻ هو ته نوازشريف پاڙيوارن سان سٺا ۽ دوستاڻا لاڳاپا رکڻ چاهي ٿو، پاڪ ڀارت ڳالهيون ري شيڊيول ٿي چڪيون آهن ۽ ٻئي ملڪ گڏيل طور تي پرڏيهي سيڪريٽرين وارين ڳالهين رڪجڻ تي هڪ راءِ آهيون.

پاڪستان پاران پٺاڻ ڪوٽ واقعي تي کنيل قدمن جي ڀارت جي آجيان بهتر عمل آهي، جيڪڏهن ٻئي ملڪ هڪ ٻئي سان اهڙي نموني سهڪار ڪندا رهيا ته اهو ڏينهن پري ناهي جڏهن ٻنهي ملڪن جو واپاري ڪار ونهوار پٽڙي تي اچي ويندو ۽ ٻنهي ملڪن جو عوام به سک جو ساهه کڻندو، ٻنهي ملڪن جو عوام بنا ڪنهن خوف خطري جي هڪ ٻئي جي ملڪ اچي وڃي سگهندو ۽ هر محاذ تي هڪ ٻئي جو ساٿاري بڻيل رهندو جيڪو عوام ۽ دنيا لاءِ بهتر پيغام هوندو.

 

دهشتگردن جي چيلهه چٻي ڪري ڇڏي، بجلي کوٽ جو پورائو پهرين ترجيح آهي: نواز شريف

اسلام آباد (بيورو) وزير اعظم نوازشريف چيو آهي ته پاڪستان پاڙيسري ملڪن سان بهتر لاڳاپا چاهي ٿو قوم دهشتگردي مان ڇوٽڪاري جو پڪو پهه ڪيو آهي. اسلام آباد ۾ تقريب کي خطاب ڪندي نواز شريف چيو ته آپريشن ضرب عضب جا بهتر نتيجي نڪري رهيا آهن دهشتگردن جي چيلهه چٻي ٿي وئي آهي. هن چيو ته ضرب عضب آپريشن کي انجام تائين پهچايو ويندو، ملڪ جي اندروني ۽ سلامتي واري صورتحال ۾ بهتري اچي رهي آهي. نواز شريف چيو ته بجلي جي کوٽ کي پورو ڪرڻ سندن حڪومت جي پهرين ترجيح آهي، 2017ع جي آخري تائين 10 هزار ميگا واٽ بجلي سسٽم ۾ اچي ويندي. وزير اعظم چيو ته حڪومت پرڏيهي سيڙپڪارن کي بهتر ماحول فراهم ڪري رهي آهي. هن چيو ته پاڪستان ۽ آمريڪا پاڪستان ۾ وڏي پئماني تي سيڙپڪاري ڪري رهيا آهن. نواز شريف چيو ته پاڪستان جي معاشي صورتحال هڪاري آهي، امن امان ۾ بهتري سبب معاشي ترقي ۾ واڌارو ٿيو آهي. وزير اعظم چيو ته ٽئڪس اوڳاڙي ۾ 33 سيڪڙو واڌ ٿي آهي، معاشي ترقي لاءِ کين گڏجي ڪم ڪرڻو پوندو.

 

سنڌ ۽ پنجاب جي چونڊيل بلدياتي نمائندن حلف کڻي ورتو

لاهور/ڪراچي/حيدرآباد/لاڙڪاڻو(نمائندن وٽان) سنڌ ۽ پنجاب جي مختلف شهرن ۾ چونڊيل بلدياتي نمائندن حلف کڻي ورتو، پنجاب ۾ راولپنڊي، منڊي بهاوالدين، ڊيره غازي خان ۾ چونڊيل بلدياتي ميمبرن حلف کنيو، سنڌ جي شهرن ڪراچي، حيدرآباد، لاڙڪاڻو، ميرپو ماٿلو، سانگهڙ، بدين، ٽٺو، جيڪب آباد ۾حلف برداري تقريبون ٿيون، ضلعي راولپنڊي ۾ 2298 نون چونڊيل ميمبرن حلف کنيو، ڪراچي جي 6 ضلعن ۾ 245 يونين ڪائونسلز ۽ يونين ڪميٽين ۾ چونڊيل نمائندن حلف کڻي ورتو، ڪراچي  ۾ هڪ ميٽرو پوليٽن ڪارپوريشن، 6 ميونسپل  ڪارپوريشن  ۽ هڪ ضلعي ڪائونسل جي چونڊيل نمائندن حلف کڻي ورتو آهي، ڪراچي اولهه،  ملير، ڪورنگي ۽ ڪراچي ڏکڻ ميونسپل ڪارپوريشن جي نمائندن حلف کڻي ورتو آهي. ڪراچي ڏکڻ ميونسپل ڪارپوريشن جي چونڊيل نمائندن کي حلف کڻائڻ جي تقريب اسڪائوٽس آڊيٽوريم ۾ ٿي ، جنهن دوران ايڊيشنل سيشن جج سڪندر پنهور نمائندن کي حلف کڻايو. ڏکڻ ميونسپل ڪارپوريشن جي 31 چيئرمين، 31 وائيس چيئرمين ۽ 124 ڪائونسلرز حلف کڻي ورتو آهي، ڏکڻ ضلعي مان پ پ جي 9 چيئرمين ۽ وائيس چيئرمين حلف کنيو آهي. ڏکڻ مان ايم ڪيو ايم  جي11 چيئرمين ۽ وائس چيئرمين،تحريڪ انصاف جي 2 چيئرمين ۽ وائس چيئرمين به حلف کنيو. اسڪائوٽس آڊيٽوريم ۾ گنجائش گهٽ هئڻ سبب چونڊيل نمائندن ٻن مرحلن ۾ حلف کنيو. ڪراچي اولهه ميونسپل ڪارپوريشن جي 276 چونڊيل نمائندن حلف کڻي ورتو آهي، جنهن ۾ ايم ڪيو ايم، پ پ  ۽ ٻين پارٽين جا نمائندا شامل آهن. ڪورنگي ميونسپل ڪارپوريشن جي 222 نمائندن به حلف کڻي ورتو آهي،جن کي ڊسٽرڪٽ اينڊ سيشن جج حلف کڻايو آهي. ملير ضلعي ڪائونسل جي 36ميمبرز، يوسي چيئرمين، وائيس چيئرمين ۽ ڪائونسلرز حلف کڻي ورتو آهي،جن کي ملير جي سول جج نادر علي بڙدي حلف کڻايو آهي. مڪاني چونڊن دوران ڪامياب ٿيل نمائندن جون حلف برداري واريون تقريبون ٿيو آهن، سڄي سنڌ ۾ چيئرمين، وائيس چيئرمين ۽ ڪائونسلرز کان عهدن جون حلف ورتو ويو آهي.. ڄامشوري ضلعي ۾ مڪاني چونڊن دوران 26 يوسيز، ٽن ٽائون ڪميٽين ۽ ٻن ميونسپل ڪاميٽين تي ڪاميابي ماڻيندڙ 2 سئو 36 نمائندن جي حلف برداري واري تقريب ڊي سي آفيس ۾ منعقد ڪئي وئي، جتي نمائيندن کان حلف ورتو ويو. ٺٽي جي ضلعي ڪائونسل حال 37 چئيرمين ۽ وائيس چئيرمين، جڏهن ته هڪ سئو 59 ڪائونسلر ۽ 32 ٽائون ڪميٽي جي نمائندن کان سول جج غضنفر عباس ۽ اسلم ڪلهوڙي حلف کڻايو. ميرپورخاص جي ڀٽائي ڪلچر حال ۾ ايڊيشنل سيشن جج عبدالحڪيم 26 يونين ڪائونسل ۽ چئن ٽائون ڪاميٽين جي نمائندن کان حلف ورتو. ڪنڌڪوٽ ۾ ايڊيشنل سيشن جج محمد ابراهيم سومرو ضلعي ڪامپليڪس ۾ ڪنڌڪوٽ تعلقي جي 10 يونين ڪائونسل جي ميمبرن، چيئرمين ۽ وائيس چيئرمين سميت ميونسيپل ڪاميٽي ڪنڌڪوٽ ۽ ٽائون ڪاميٽي غوثپور جي 96 ميمبرن کان حلف کڻايو. نوابشاهه ۾ ٿرڊ ايڊشنل سيشن جج منظور ميمڻ ۽ سيڪنڊ سينئر سول جج رجب علي شر 58 يوسيز جي چيئرمين، وائس چيئرمين، ضلعي ڪائونسل جي ميمبرن ۽ جنرل ڪائونسلرن سميت 4 سئو 6 نمائندن کان حلف کڻايو.. بدين ۾ ضلعي ۾ ڪامياب ٿيل اميدوارن جي حلف برادري تقريب جيم خانه ۾ منعقد ڪئي وئي، تقريب ۾ ڪامياب ٿيل 50 نمائندن حلف کنيو.. جيڪب آباد ضلعي ڪائونسل جي 44 ميمبرن، 22 يونين ڪائونسلن جي چيئرمينن ۽ وائيس چيئرمينن کان حلف ورتو ويو. لاڙڪاڻي ۾ چونڊيل نمائندا جي حلف برداري تقريب ٿي، تقريب ۾ باڊهه جي 14، ڏوڪري جي 5 ٽائون ڪميٽين کان ٿرڊ سول جج ۽ جڊيشل مئجسٽريٽ ظفرالله جمالي حلف کڻايو. سکر جي 26 چيئرمينن سميت 419 نمائندن کي به حلف کڻايو ويو. ميهڙ جي 20 يوسين ، 1 ميونسپل ڪاميٽي ، 2 ٽائون ڪاميٽي ، 20 ضلعي ڪائونسلرن سميت 166 ميمبرن حلف کڻي ورتو جڏهن ته ٻن ميمبرن جو نوٽيفڪيشن جاري نه ٿي سگهيو خبر موجب گورنمينٽ هاءِ اسڪول ون ميهڙ ۾ مڪاني چونڊن جي ڪامياب ڪائونسلرن جي حلف برداري جي تقريب ٿي ڪامياب ڪائونسلرن کي ايڊيشنل سيشن جج ميهڙ غلام ياسين ڪولاچي حلف کڻايو حلف برداري تقريب ۾ ميهڙ تعلقي جي 20 يوسين ، 1 ميونسپل ڪاميٽي ، 2 ٽائون ڪاميٽي ۽ 20 ضلعي ڪائونسلرن سميت 166 ميمبرن حلف کنيو جڏهن ته ٻن ڪائونسلرن جو نوٽيفڪيشن جاري نه ٿيڻ سبب حلف نه کڻي سگهيا حلف برداري تقريب کانپوءِ ڪامياب ڪائونسلرن کي حلف کڻڻ کانپوءِ پنهنجي پارٽي اڳواڻن ۽ ورڪرن مبارڪباد ڏني ۽ گلن جا هار پارايا جڏهن ته حلف کڻندڙن ۾ صوبائي صلاحڪار جو ڀاءُ امتياز پاشا ٻٽ ، شير محمد چانڊيو ، سردار اشرف سولنگي ، شير افضل جانوري ، قاضي عبدالحميد مهيسر ، انجنيئر خالق ڏنو ميراڻي ، امتياز خان مهيسر ، گلزار جهتيال ۽ عوامي اتحاد پارٽي جي نياز علي ٻرڙو ، سيد الطاف شاه ، پ پ ش ڀ جي عبدالستار چنه ۽ ٻيا شامل هئا. حيدرآباد ضلعي جي ميونسپل ڪاميٽي قاسم آباد جي 26 وارڊن تي بلدياتي چونڊن ۾ ڪاميابي ماڻيندڙ جنرل ڪائونسلرن جي حلف برداري تقريب خميس ڏينهن سنڌ ميوزم ٿي گذري. حلف برادري تقريب کي خطاب ڪندي ڊسٽرڪٽ اليڪشن ڪمشنر حيدرآباد امتياز علي ڪلهوڙو چيو ته 2015 چونڊن جو سال هو جنهن ۾ سڀ کان پهرين بلوچستان پوءِ خيبر پختونخواهه پوءِ ڪنٽونمينٽ بورڊز جنهن بعد وفاقي گادي واري شهر ۽ آخر ۾ سنڌ ۽ پنجاب ۾ بلدياتي چونڊون ڪرايون ويون، هن چيو ته سنڌ ۾ بلدياتي چونڊن وارو مرحلو پڄاڻي ويجهو آهي ۽ ايندڙ هڪ ٻن ڏينهن ۾ مخصوص سيٽن لاءِ شيڊول جاري ڪيو ويندو، هن چيو ته هو سمورن ادارن جو ٿورائتو آهي جن بلدياتي چونڊن ۾ اليڪشن ڪميشن سان مڪمل سهڪار ڪيو ۽ اهي چونڊون پرامن ماحول ۾ صاف شفاف طريقي سان پنهنجي پڄاڻي تي پهتيون، هن چيو ته اڄ جيڪي چونڊيل ميمبر حلف کڻي رهيا آهن انهن جو فرض بڻجي ٿو ته اهي عوامي ووٽ جي حق نڀائيندي عوامي خدمت جو وچن ڪن. ان موقعي تي سڪينڊ ايڊيشنل سيشن جج قمرالدين عباسي چيو ته هو چونڊيل ميمبر کي مبارڪون ڏئي ٿو جن کي عوام ووٽ ڏئي عوامي خدمت جهڙي مقدس ڪم لاءِ چونڊيو آهي اميد آهي ته اهي عوامي خدمت سان گڏ پنهنجيون ذميواريون بهتر نموني نڀائيندا. آخر ۾ سڪينڊ ايڊيشنل سيشن جج قمرالدين عباسي چونڊيل ميمبر کان حلف کڻايو. ان موقعي تي اسسٽنٽ ڪمشنر قاسم آباد لعل ڏنو منگي پڻ اتي موجود هيو. حلف برداري تقريب جي موقعي تي سنڌ ميوزم ٻاهران سيڪورٽي جا سخت انتظام ڪيا ويا هئا.

 

ڳالهيون ملتوي ناهن ٿيون نه ئي پاڪ ڀارت پاڻ کي دهشتگردن هٿان يرغمال بڻجڻ ڏيندا: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد چيو آهي ته پاڪ ڀارت ڳالهيون ملتوي ناهن ٿيون نه ئي ٻئي ملڪ پاڻ کي دهشتگردن هٿان يرغمال بڻجڻ ڏيندا. اسلام آباد ۾ تقريب کي خطاب ڪندي پرويز رشيد جو چوڻ آهي ته پاڪستان ۽ ڀارت ذميوار ملڪ آهن. هن چيو ته پٺاڻ ڪوٽ واقعي بابت ڪنهن به اڳڀرائي کان ڀارت کي آگاهه ڪيو ويندو، دنيا جا ڪيترائي ملڪ پاڪستان جي جاچ مان مطمئن آهن. سندس چوڻ هو ته پاڪستان هر قسم جي دهشتگردي خلاف وڙهي رهيو آهي، ڪيترائي دهشتگردن کي گرفتار ڪيو ويو آهي. پرويز رشيد چيو ته دهشتگردي خلاف پاڪستان جي قدمن جي واکاڻ ڪئي پئي وڃي.