تازيون خبرون

Daily Archives: January 14, 2016

طالبان جي تتل جسم مان ڦٽندڙ داعش ۽ دهشتگردي جو خوف: گل مورو

طالبان جي تتل جسم مان ڦٽندڙ داعش جي دهشتگردي ۽ شدت پسند ڌرين پاران ايشيائي خطي سميت جنهن ۾ پاڪستان، افغانستان کان ويندي جڪارتا تائين دهشتگردي واري واقعا رونما ٿيا آهن ان مان ثابت ٿئي پيو ته هن وقت داعش ۽ ٻيون دهشتگرد ڌريون جن جو تعلق مذهبي ۽ شدت پسند انتهاپسندي واري رجهان سان ملندڙ جلندڙ آهي جن جو تعلق هميشهه پاڻ ۾ رهيو آهي ان سلسلي هن وقت سڄي دنيا سميت خاص طور تي پاڪستان ۽ افغانستان توڙي ڀارت کان وٺي ايران، چين ۽ ٻين ملڪن ۾ جنهن تيزي سان دهشتگردي واريون ڪارروايون هڪ ئي ڏينهن اندر ڪيون آهن ان واقعن سڄي دنيا جي امن پسند ماڻهن کي حيراني ۽ خوف ۾ مبتلا ڪري ڇڏيو آهي اوچتو ئي اوچتو بلوچستان جي گادي واري هنڌ ڪوئٽا ۾ پوليو جا ڦرا پياريندڙ ٽيم مٿان آپگهاتي حملو جنهن ۾ 15 کان وڌيڪ سيڪيورٽي اهلڪارن سميت عام زندگيءَ سان وابسطه ماڻهو پنهنجون جانيون وڃائي چڪا آهن جڏهن ته انهيءَ واقعي بابت به اهو چيو پيو وڃي ته هي واقعو به انهن ئي دهشتگرد قوتن جو ئي نظر اچي پيو جن هميشهه پاڪستان اندر شروع کان وٺي دهشتگردي واريون ڪارروايون پئي ڪيون آهن اهي ئي ملوث ٿي سگهن ٿا انهيءَ ڏينهن پاڪستان جي گادي واري هنڌ اسلام آباد ۾ ميڊيا جي اي آر واءِ نيوز جي آفيس تي دستي بمن سان پڻ حملو ڪيو ويو جنهن جي ذميواري به داعش افغانستان جي دهشتگردن قبولي ورتي آهي ان ساڳئي ڏينهن ئي افغانستان ۾ پاڪستاني قونصل خاني تي آپگهاتي حملو ڪيو ويو ان ۾ به 6 کان وڌيڪ انساني جانيون ضايع ٿي ويون جڏهن ته ڪيترائي ماڻهو زخمي ٿي پيا. ان جي ذميواري به داعش جي دادلن قبولي ورتي آهي.

ان منظر مان اهو واضح ٿئي ٿو ته طالبان دهشتگرد ڌريون توڙي داعش جون دهشتگرد ڌريون جن جو تعلق عالمي سامراج سان هميشهه رهندو آيو آهي اهي نه ٿيون چاهن ته هن ايشيائي خطي اندر ڪو امن سڪون هجي ڇو ته ڪجهه ڏينهن اڳ جيڪو ڀارت اندر پٺاڻ ڪوٽ ۾ دهشتگردي وارو واقعو پيش آيو هو ان بابت به مودي سرڪار کان وٺي ڀارت جي سيڪيورٽي ايجنسين پاڪستان جي سرڪار کي اهو چيو ته ان واقعي ۾ دهشتگردن جو تعلق پاڪستان جي علائقي سان آهي جنهن جا ثبوت پاڪستان حوالي ڪيا ويندا ۽ انهن دهشتگردن کي چٽو ڪري ميڊيا اڳيان ۽ اسان جي حوالي ڪيو وڃي. جڏهن ته هن واقعي کان اڳ افغانستان کان لاهور پهچندڙ نريندر مودي سموري صورتحال ۽ ايشيا جي پس منظر کي جاچيندي ڳالهين واري آڇن کي قبول ڪندي اهو فيصلو ميان نوازشريف سميت گڏجي ڪيو ويو هو ته پاڪ ڀارت وچ ۾ جيڪو ڳالهين وارو ڊيٽ لاڪ پيدا ٿيل آهي ان جي خاتمي لاءِ ڀرپور ڪوششون ڪيون وينديون ۽ خارجي سطح تي ٻنهي ملڪن وچ ۾ ڳالهيون جاري رکيون وينديون ۽ ان سلسلي ۾ پاڪ هند جي گڏيل رضامندي سان سيڪريٽري سطح واريون ڳالهيون پڻ ڪرڻيون هيون پر اوچتو ئي اوچتو ڀارت اندر پٺاڻ ڪوٽ واري واقعي ٻنهي ملڪن وچ ۾ انهن ڳالهين ۾ رخنو وجهي ڇڏيو ۽ ڀارت جو اهو ئي مطالبو هو ته ڪهڙي به طريقي سان واقعي ۾ ملوث دهشتگردن کي گرفتار ڪيو وڃي ۽ انهن جو تعلق دهشتگرد تنظيم جيش محمد سان آهي انهيءَ سلسلي ۾ پاڪستان جي ملڪي اختيارين ان مطالبي جي نتيجي ۾ پنجاب مان جيش محمد جو سربراهه مسعود اظهر سندس ڀاءُ ۽ سندس ساٿين کي گرفتار ڪري سموريون آفيسون سيل ڪندي ۽ رڪارڊ پڻ ضبط ڪيو ويو آهي جڏهن ته وزيراعظم ميان نوازشريف حملي بابت جاچ لاءِ 6 رڪني ڪاميٽي مقرر ڪندي هندوستان کي وڌيڪ مطمئن ڪرڻ لاءِ هندوستان موڪلڻ جو اعلان پڻ ڪيو آهي. واضح رهي ته جيش محمد جو سربراهه مسعود اظهر پابندي مڙهيل تنظيم ان تنظيم جو باني افغان جهاد جي پيداوار آهي جنهن پنهنجي ساٿين جيان هن شدت پسند ڪارروايون ڪيون .

هن ڏکڻ پنجاب جي علائقي بهاولپور جي هڪ سرڪاري استاد جي گهر ۾ جنم ورتو ابتدائي تعليم کان پوءِ وڌيڪ انتهاپسندي جا درس وٺڻ لاءِ ڪراچيءَ جي بنوريا ٽائون واري مدرسي پهتو هو. سوويت افغان واري جنگ کان اڳي هن افغانستان اندر عسڪري تربيت ورتي هئي ۽ دهشتگرد تنظيم حرڪت النصار سان گڏ افغان ۾ وڙهندي زخمي به ٿيو هو مسعود اظهر کي 1993 ۾ سري ننگر ۾ هڪ ڇاپي دوران ڀارتي اهلڪارن گرفتار به ڪيو هو ان جو شمار انهن خطرناڪ ويڙهاڪن سان ليکيو وڃي ٿو جيڪي هميشهه دهشتگرد ڪاررواين ۾ ملوث رهيا آهن آمريڪا واري يارنهن اليون واري واقعي کان پوءِ ڪابل تي آمريڪي بمباري جي جواب ۾ مسعود اظهر ڪابل مان نڪري پنهنجي ماڳ اچي پهتو هو اهو به واضح رهي ته ڪجهه سال اڳ واجپائي واري دور ۾ مسعود اظهر ڀارت جو جهاز اغوا ڪري پنهنجا ساٿي آزاد ڪرايا هئا ۽ ان واقعي کان پوءِ ڀارت جو اهو بار بار مطالبو ايندو رهيو ته نه رڳي مسعود اظهر پر جماعت الدعوه جي سربراهه حافظ سعيد به تاج محل واري واقعي ۾ ملوث آهي ان کي به ڀارت حوالي ڪيو وڃي البته اهو حافظ سعيد ڀارت حوالي ته نه ٿي سگهيو پر ڀارت اندر جيڪو پٺاڻ ڪوٽ وارو واقعو پيش آيو ان واقعي پوري ايشيائي خطي کي وري وڏي امتحان وجهي ڇڏيو جنهن جي ڪري پاڪ ڀارت ڳالهيون پڻ ملتوي ڪيون ويون ۽ هاڻ ته اهي سيڪريٽري سطح واريون ڳالهيون به ملتوي ٿي چڪيون آهن.

سو ڏسجي ته پاڪ ڀارت وچ ۾ اهي تعلقات جيڪي ميان نوازشريف ۽ مودي سرڪار جي وچ ۾ ملاقات کان پوءِ خوشگوار موڊ ڳالهيون ٿي چڪيون هيون اهي تعلقات قائم رهي سگهن ٿا يا نه يا اهي مذاڪرات وري ماضي جيان ڊيٽ لاڪ بڻجي وڃن ٿا نه رڳي پاڪ ڀارت وچ ۾ دهشتگردي واري مسئلي تي ڇڪتاڻ هلندي رهي ۽ آهي پر هن وقت هن ايشيائي خطي اندر پاڪ افغان جي وچ ۾ جيڪي بگڙيل تعلقات موجود هيا انهن جي خاتمي لاءِ تازو چار ملڪي اتحاد جنهن ۾ آمريڪا، چين، افغانستان ۽ پاڪستان وچ ۾ چند ڏينهن اڳ وفاقي گادي واري هنڌ ڳالهيون پڻ ٿي چڪيون آهن ته ڪهڙي به طريقي سان افغان اندر جيڪي افغان سرڪار لاءِ طالبان ڌريون ويڙهاند ذريعي ڏکيائون پيدا ڪري رهيون آهن انهن کي ڪهڙي به طريقي سان راضي ڪرڻ لاءِ پاڪستان کي پنهنجون ذميواريون ايمانداري سان نڀائڻ گهرجن ۽ ان لاءِ روڊ ميپ ۾ تيار ڪيو ويو آهي ته مارچ تائين ڪهڙي به حالت ۾ افغان اندر امن بحال ٿي سگهي ته جيئن اهي سيڙپڪاري واريون ڳالهيون يا وري تجارتي حوالي سان جيڪي عالمي قوتن جا هن وقت افغانستان کان ايشيائي رياستن واري رستي ذريعي راهداري کان وٺي گئس توڙي بجلي ريلوي توڙي روڊ رستن جون رٿائون جوڙيون ويون آهن اهي مڪمل ٿي سگهن ۽ افغانستان اندر جيستائين امن قائم نه ٿيندو اوستائين هن پوري ايشيائي خطي ۾ نه امن قائم ٿي سگهندو نه وري اهي سيڙپ واريون خواهشون پوريون ٿي سگهنديون ان حوالي سان ڏٺو وڃي ته سڄو زور آمريڪا کان وٺي ان جي اتحادين توڙي چين ۽ روس جي پيوٽن جو به اهو ئي زور آهي ته هن وقت انهن طالبان دهشتگردن کي يا ته ڪچليو وڃي يا وري کين محبت ۽ مزي سان ماٺ ڪرائي وڃي جنهن جو ذڪر بي بي سي جي نمائندي رحيم الله يوسفزئي اهو به ڄاڻايو آهي ته افغانستان اندر وڙهندڙ طالبانن کي اها به پيشڪش ڪئي وئي آهي ته جهڙي ريت اوهان طالبان واري دور ۾ افغان کان ايشيائي رياستن تائين گذرندڙ ٽرڪن ۽ ٽرالرن جو تحفظ ڊالرن ذريعي ڪندا هيا انهيءَ پيشڪش واري فارمولي تحت هاڻ به توهان اڳيان اها ئي پيشڪش آهي ته جيڪا تاجڪستان کان پاڪستان تائين تاپي گئس منصوبو شروع ٿيڻ وارو آهي ان جي سار سنڀال لاءِ ٿورن گهڻن ڊالرن تي اهي ذميواريون اهوان حوالي ڪيون وينديون ۽ افغانستان جي اشرف غني کان وٺي عبدالله عبدالله سان گڏجي حڪومتي شرڪت داري ۾ به اوهان کي ڀاڱي ڀائيوار ڪيو ويندو سو ان لاءِ چار اتحادي فارمولي تحت مارچ تائين ٽائيم ڏنو ويو آهي ۽ اها سڄي ذميواري پاڪستان مٿان رکي وئي آهي سو ميان نوازشريف لاءِ موجوده صورتحال جيڪا نظر اچي پئي اها انتهائي ڏکي نظر اچي پئي ڇو ته هڪ طرف ڀارت واري واقعي امن کي ڄڻ ته ڌڪ رسائي ڇڏيو آهي ته ٻئي طرف وري چار ملڪي اتحاد ٽائيم ٽيبل جي سندس مٿان ذميواري به وڌيڪ معاملي کي مونجهاري ۾ وجهي ڇڏيو آهي ته ٽئين طرف وري سعودي ايران جي وچ ۾ ڇڙندڙ جنگ به وڏي امتحان ۾ کيس وڌو آهي ڇو ته تازو سعودي جي سفارتڪارن کان وٺي ولي عهدن تائين اسلام آباد ياترا عسڪري توڙي سياسي قيادتن سان مسلسل ملاقاتون ۽ مطالبن جي لسٽ پيش ڪرڻ به وڏو امتحان آهي ڇو ته هن وقت سعودي حڪمران جن ملڪي اختيارين اڳيان اهو پڻ مطالبو رکيو آهي ته اوهان جي هر ڏکئي وقت تيل ۽ سيل ذريعي مدد ڪئي وئي آهي ان جي نتيجي ۾ اوهان کي به 34 عرب ملڪي اتحاد ۾ شامل ٿيڻو پوندو ان نتيجي ۾ پاڪستاني اختياريون ڪو به واضح جواب ناهن پيش ڪري سگهيون جڏهن ته برطانوي خابرو ادارن اهو ڄاڻايو آهي ته سعودي سرڪار جي عرب سڳورن اڳيان پاڪستاني اختيارين اهو مطالبو رکيو آهي ته سعودي ۾ 25 هزار پاڪستاني فوج ڏيڻ لاءِ تيار آهيون پر شرط اهو آهي ته انهن کي سعودي جي نيشنلٽي ڏيڻ سان گڏ سندن سمورو خرچ به سعودي کي ڀرڻو پوندو سو ڏسڻو اهو آهي ته ان صورتحال ۾ پاڪستان ڪهڙو قدم ٿو کڻي. جڏهن ته پاڪستان ۾ موجود افغاني سفير جانان موسيٰ زئي چيو آهي ته افغان عمل جو موجوده وقت جيڪڏهن ظاهر ٿيو ته هن پوري ايشيائي خطي ۾ ايڏي وڏي رتو ڇاڻ ٿيندي جنهن جو اندازو انتهائي مشڪل هوندو. هوڏانهن آمريڪي صدر بارڪ اوباما به پاڪ افغان تعلقات پاڪ ڀارت تعلقات سعودي ايران جي وچ ۾ هلندڙ ڇڪتاڻ واري سموري پس منظر کي نظر ۾ رکندي اسٽيٽ آف دي يونين کي خطاب ڪندي اهو چيو آهي ته داعش کي تباهه ڪنداسين پر پاڪستان ۽ افغانستان ۾ عدم استحڪام جو خدشو ڪيترن ئي ڏهاڪن تائين جاري رهندو ڪجهه علائقا اڃا به دهشتگردن جا ٺڪاڻا آهن انهن جي خاتمي لاءِ سڀني کي گڏجي قدم کڻڻو پوندو. ان مان واضح ٿئي ٿو ته 2016 خاص طور تي هن ايشيائي خطي لاءِ اهم سال قرار ڏنو پيو وڃي جنهن جو اظهار لال حويلي جي لاڏلي شيخ رشيد به ڦاٽ کاڌو آهي ته پاڪستان اندر دهشتگردن جا وڌيڪ حملا ٿي سگهن ٿا جيڪڏهن انهن جي روڪٿام نه ڪئي وئي ۽ پنجاب اندر سندن هيڊڪوارٽر تباهه نه ڪيا ويا ته ان سان حالتون وڌيڪ خراب ٿي سگهن ٿيون. سو ڏسڻو اهو آهي ته وڌندڙ دهشتگردي جيڪا طالبان کان ٿيندي داعش جي روپ ۾ پيدا ٿي آهي ان جي خاتمي لاءِ ڪهڙا قدم کنيا وڃن ٿا.

 

سنڌ جي تعليم جو  ڪيئن بهتر ٿيندي؟: محمدعلي شر

بيان تجويزون ڪيتريون ئي  ٿي سگهيون پر تعيلم جي ۾ ڪابه  تبديلي نه آئي نه  اسان جي تعليمي معيار جئين تيئن ئي آهي آخر اسان جي صوبي جو تعيلم جو معيار ڪيئن بهتر ٿيندو اخبار جو هيڊ لائنس، چٽيون خبرون ته هر ڪو پڙهي ٿو پر افسوس ڪارائتا مضمون تمام گهٽ دوست پڙهڻ ٿا .

سماج جو ڪوب مسئلو هڪ ٻئي ڀارڻ سان ڪجهه به  نه ٿيندو ان لاءَ  پر اهو ويتر خراب ٿيندو اهڙي طرح هر ادارو هڪ ٻئي تي آزام لڳائي پاڻ آزاد سمجهي ٿو  ٻين صوبن جي تعليم بهتر ڇو آهي. تعليم جيڪا عبادت جي صفت ۾ شامل ٿي ان جي باري ۾ سڀ کان پهريان حڪومت سڌ  جا اعليٰ عهديدار مان پڙهيل لکيل،قابل آفيسر هن ڪم ۾ لڳايا وڃن جيڪي پنهنجي وڃي  جيئن ته تاريخي ڪاميابي ملي سگهي.

حڪومت سنڌ طرفان مقرر مقرر ڪيل ڪورس  ناڪارا نه پر ان ۾ سڌاري جي اشد ضرورت آهي ناڪارا مضمون تبديل ڪيا وڃن جيڪي اجايو بار آهن جيڪي جنهن ڪري شاگرد دل آزاريندڙ ۽ ڪاپي ڪرڻ تي مجبور ڪندڙ آهي

سالانه امتحان جو سسٽم ختم ڪري سيسمٽرجو سلسلو شروع  ڪيو وڃي هزار صفحن تي مشتمل مختلف ڪورس جنهن ۾ گهڻي ڀاڱي غير ضروري مواد شامل آهي جيڪي شاگرد کي مايوس ڪندڙ آهن وري سال مڪمل ٿيڻ کانپوءَ ان بابت امتحان ڏيڻ انهتائي مشڪل ڪم آهي.

سنڌ صوبي جي تعليم بهتر ڪرڻ لاءَ هڪ هر هڪ فرد کي پنهنجو پنهنجو ڪردار  ادا ڪرڻو پوندو ته جيئن تعليم جهڙي زيور کان سنڌ واسين کي مرحوم نه رکيو وڃي

تعليمي بورڊن جو ڪردار .

پراڻي دور ۾ بورڊن جو سلو اميج هوندو هو ۽اهي چڱي نموني امتحان وٺندا هئا پر هاڻي ته ٻڌڻ ۾ اچي ٿو ته گريڊ پيسن تي وڪرو ٿي رهيا آهن جنهن ڪري ٽيوشن ڏيندڙن ۽ڪاپي ڪرائيندڙ جي ڌنڌي کي ڌڪ لڳو آهي .

ٽيوشن جو آزار

اڳي استاد بنا ڪنهن فرق جي پوري ڪلاس جي ٻارن لي وڏي چاهه سان پڙهائيندا هئا ۽ سٺي رزلٽ تي خوشي ۽ بري رزلٽ تي شرمساري محسوس ڪندا هئا پرهاڻي ته استاد ڪلاس پڙهائڻ ته ڇا پر اسڪول ئي ڪونه ٿا وڃن گهر ويٺي پگهارون کڻڻ ٿا ڪافي ڪاليجن ۾ ته ڪلاسون ئي ڪونه ٿيون هلن ڪٿي نالي ماتر هلن ٿيون ته پريڪٽيڪل  ڪونه ٿا ڪرائين صرف  ٽيوشن تي مارو مار آ ٽيوشن نه پڙهندڙ ٻار تعليم کان مرحوم رهجي وڃي ٿو

پرائيوٽ اسڪول

ٽيهه چاليهه سال اڳ تعليم کي عبادت جي حيثيت حاصل هئي پر هاڻي اها صنعت بڻجي چڪي آهي پرائيوٽ اسڪولن جو فيشن ته ايتري قدر وڌي ويو آهي جو سرڪاري اسڪولن ۾ ڪم ڪندڙ استاد به پنهنجا ٻار پرائيوٽ اسڪول ۾ پڙهائيندا آهن جن ۾ ڪم ڪندڙ ٽيچر مشڪل سان انٽر يا بي اي پاس هوندا آهن جڏهن ته انهن کي ڪابه ٽريننگ ٿيل نه آهي هوندي ۽ جن جي مانيٽرنگ جو به مناسب بندوبست نه ٿيل هوندو آهي اگر سندن ٻار به سرڪاري اسڪولن ۾ پڙهڻ ته سندن دلچسپي پيدا ٿئي انڪري تعليم کاتي ۾ ڪم ڪندڙ کي پابند ڪجي ته هو پنهنجا ٻار سرڪاري اسڪول ۾ پڙهائن

تعليم جي تباهي جا سبب

استادن طرفان  تعليم  کي پيغمبري پيشو نه سمجهڻ

نبي سڳورا ماڻهن کي هدايت ڪرڻ يعني سٺين ڳالهين  جي تعليم ڏيڻ جي لاءِ موڪليا ويا جنهن ڪري تعليم کي پيغمبري پيشو سمجهو وڃي ٿو  چاليهه پنجاهه سال اڳ استادن کي ان ڳالهه جو چڱي طرح احساس هيو جنهن ڪري نه رڳو  سٺي نموني پڙهائيندا هئا پر سندس لباس به منفرد رکندا هئا جنهن ڪري پري کان خبر پوندي هئي ته استاد ٿو اچي ته سڀ ئي ادب مان اُٿي بيهندا هئا

سنڌ  جي تعليم بهتر ڪرڻ لاءِ استاد  کي انتهائي اهم ڪردار ادا  ڪرڻو پوندو.اسان جي صوبي جي تعليم جي صورتحال ايتري ته بدتر ٿي وئي اگر جيڪڏهن اسان جي معاشري جي هر فرد پنهنجو ڪردار سچائي ،ايماندار  سان ادا ڪيو ته انشاءِ الله اسان جي تعليم بهتر ٿي سگهي ٿي.

واڪا ڪرڻ وس مون

   ٻڌڻ ڪم ٻروچ جو.(شاهه)

 

 

پٺاڻ ڪوٽ ايئر بيس حملي تي پاڪستان جو ورتل ايڪشن

گذريل ڏينهن وزيراعظم نواز شريف جي صدارت هيٺ اعليٰ سطحي اجلاس ٿيو. اجلاس ۾ آرمي چيف جنرل راحيل شريف، ڊي جـِي آءِ ايس آءِ ليفٽيننٽ جنرل رضوان اختر، وفاقي گهرو وزير چوڌري نثار، قومي سلامتي بابت صلاحڪار ليفٽيننٽ جنرل رٽائرڊ ناصر خان جنجوعا ۽ پنجاب جي وڏي وزير شهباز شريف شرڪت ڪئي. اجلاس دوران دهشتگردي جي خاتمي لاءِ ڪيل قدمن تي اطمينان جو اظهار ڪيو ويو. اجلاس ۾ فيصلو ڪيو ويو ته پٺاڻ ڪوٽ ايئربيس حملي بابت وڌيڪ تفصيل ملڻ کانپوءِ جاچ لاءِ پاڪستان جي خاص ٽيم ڀارت ڏانهن اماڻي ويندي. اجلاس ۾ اهو به فيصلو ڪيو ويو ته پٺاڻ ڪوٽ ايئربيس حملي بابت سڄي معلومات کي سامهون آندو ويندو ۽ ڪنهن به شيءِ کي ڳجهو نه رکيو ويندو، جڏهن ته شفاف جاچ ڪري سڄي ڄاڻ دنيا آڏو آندي ويندي. وزيراعظم نواز شريف جو چوڻ هو ته پاڪستان جي ڌرتي ڪنهن به دهشتگرديءَ ۾ ملوث ناهي رهي ۽ نه ئي ڪنهن به پاڙيسري ملڪ کي نقصان پهچائڻ چاهيون ٿا، پاڪستان جي ڌرتي ڪنهن جي به خلاف استعمال ٿيڻ نه ڏينداسين. ملڪ ۾ پابندي مڙهيل تنظيمن جي آفيسن کي بند ڪرڻ جو سلسلو جاري آهي.

اجلاس دوران بريفنگ ۾ ٻڌايو ويو ته پابندي مڙهيل تنظيم جيش محمد جي ڪيترن ئي ملزمن کي پڪڙيو ويو آهي ۽ انهن جي ڪيترين ئي آفيسن کي سيل به ڪيو ويو آهي. ڏکڻ پنجاب جي علائقن ملتان، رحيم يار خان ۽ بهاول نگر ۾ آپريشنز دوران 10 کان 12 ڄڻن کي گرفتار ڪيو ويو، جن وٽان ڪمپيوٽر ۽ ٻيا اوزار به برآمد ٿيا آهن. اجلاس دوران اهم ملڪي معاملن، نيشنل ايڪشن پلان، پٺاڻ ڪوٽ حملي ۽ سعودي عرب ۽ ايران ڇڪتاڻ کانسواءِ اهم معاملن تي خيالن جي ڏي وٺ ڪئي وئي. اعليٰ اختيارين ڀارتي ائيربيس پٺاڻ ڪوٽ حملي جي جاچ ۾ اڳڀرائي تي اطمينان جو اظهار ڪيو. اجلاس بعد جاري ڪيل پڌرنامي ۾ چيو ويو آهي ته دهشتگردي کي پوري طرح ختم ڪرڻ واري ارادي هيٺ ڀارت سان رابطي ۾ آهيون، جنهن کي ڀارت جي حڪومت سان مشورا ڪرڻ کانپوءِ پٺاڻ ڪوٽ موڪليو ويندو، جڏهن ته پاڪستان ڀارت کان وڌيڪ ڄاڻ گهري آهي. ٻئي طرف مليل چاڻ موجب ڀارت پاران پٺاڻ ڪوٽ حملي ۾ ملوث ڄاڻايل پابندي مڙهيل تنظيم جيش محمد جي سربراهه مولانا مسعود اظهر کي ڀاءُ ۽ 11 ساٿين سميت گرفتار ڪيو ويو آهي. مولانا مسعود اظهر ۽ سندس ڀاءُ مفتي عبدالرحمان کي بهاولپور مان گرفتار ڪري اڻڄاتل هنڌ منتقل ڪيو ويو آهي. مولانا مسعود اظهر کان پٺاڻ ڪوٽ حملي بابت پڇا ڳاڇا ڪئي پئي وڃي. مولانا مسعود اظهر کي حفاظتي تحويل ۾ ورتو ويو آهي. اها به ڄاڻ ملي آهي ته پابندي مڙهيل جيش محمد جي سربراهه کي ڀاءُ سميت نظربند ڪيو ويو آهي. پٺاڻ ڪوٽ حملي جي جاچ جي سلسلي ۾ وزيراعظم نوازشريف هڪ اعليٰ سطحي 6 رڪني ڪميٽي به جوڙي ڇڏي آهي، جنهن ۾ آءِ ايس آءِ ۽ ايم آءِ جا نمائندا به شريڪ هوندا، وزيراعظم هائوس جي ترجمان موجب وزيراعظم پاران جوڙيل ڪميٽي جو ڪنوينز ايڊيشنل آءِ جي ڪائونٽر ٽيررزم ڊپارٽمينٽ پنجاب راءِ طاهر کي بڻايو ويو آهي، آءِ ايس آءِ جو سينئر آفيسر برگيڊيئر نعمان سعيد، ايم آءِ جو ليفٽيننٽ ڪنرل عرفان مرزا، ايڊيشنل آءِ جي سي ٽي ڊي ڪي پي ڪي صلاح الدين خان، ڊائريڪٽر آءِ بي لاهور عظيم ارشد، ڊائريڪٽر ايف آءِ اي لاهور عثمان انور ڪميٽي جا ميمبر هوندا، ڪميٽي پٺاڻ ڪوٽ واقعي بابت شاهدين ۽ ڀارتي الزامن جو جائزو وٺندي، واقعي بابت ڪجهه ماڻهن تي لڳندڙ الزامن جا به جاچ ڪندي.

 

ڪوئيٽا ۾ پوليو سينٽر ويجهو بم ڌماڪو، 16 اهلڪار شهيد، 20 زخمي، ايمرجنسي لاڳو

ڪوئيٽا (اين اين آءِ) ڪوئيٽا ۾ پوليو جي هيڊ يونٽ ويهو ڌماڪي ۾ 16 اهلڪار شهيد ۽ 20 زخمي ٿي پيا شهيدن ۾ 15 پوليس ۽ هڪ ايف سي اهلڪار شامل آهن ريسڪيو ذريعن مطابق ڪوئيٽا جي مقامي علائقي سيٽلائيٽ ٽائون ۾ ٿيل ڌماڪي جي زخمين کي سول اسپتال ڪوئيٽا منتقل ڪيو ويو جڏهن ته اسپتال ۾ ايمرجنسي لاڳو ڪئي ويئي صدر مملڪت ۽ وزيراعظم ڌماڪي جي مذمت ڪندي چيو ته دهشتگردن جي بزدلاڻين ڪارروائين سان اسان جي جوانن جا حوصلا ڪمزور نه ٿيندا ۽ ملڪ مان دهشتگردن جو انت آڻي ئي سک سان ويهنداسين جڏهن ته چوڌري نثارعلي خان به ڪوئيٽا ڌماڪي جي سخت لفظن ۾ مذمت ڪندي آءِ جي بلوچستان کان رپورٽ گهري اهي تفصيل مطابق اربع تي ڪوئيٽا سميت بلوچستان جي مختلف ضلعن ۾ ٽن ڏينهن کان پوليو مهم جو آخري ڏينهن هو ۽ پوليو سينٽر مان ٽيمن کي مختلف علائقن ۾ اماڻيو پئي ويو ڌماڪي وقت 15 کان 20 پوليس اهلڪار ڊيوٽي تي هئا ڌماڪو ايتري شديد نوعيت جو هو جو ان سان ويجهين عمارتن جا شيشا ٽٽي پيا ۽ ڀرسان بيٺل گاڏين کي به سخت نقصان ٿيو. بلوچستان جي گهرو وزير سرفراز بگٽي چيو آهي ته سڄي پاڪستان کي سيڪيورٽي خدشا لاحق آهن دهستگردي خلاف جنگ کي سيڪيورٽي رسڪ نه ڪوٺيو وڃي اها ڳالهه هن اربع تي بم ڌماڪي ۾ زخمي ماڻهن جي سول اسپتال ڪوئيٽا ۾ عيادت کان پوءِ صحافين سان ڳالهه ٻولهه ڪندي ڪئي ان موقعي تي صحت جي صوبائي وزير مير رحمت صالح بلوچ سيڪريٽري صحت نورالحق بلوچ ايم ايس سول اسپتال ڪوئيٽا ڊاڪٽر عبدالرحمان پڻ موجود هئا مير سرفراز بگٽي چيو ته ڌماڪو خودڪش آهي يا نه جاچ ٿي رهي آهي عوام کي تحفظ فراهم ڪرڻ ۽ بلوچستان کي پرامن بنائڻ اسان جي ذميواري آهي جنهن ۾ ڪنهن قسم جي ڪوتاهي برداشت نه ڪئي ويندي هن چيو ته دهشتگردي خلاف جنگ وڙهي رهيا آهيون ۽ وڙهنداسين پوري پاڪستان کي سيڪيورٽي خدشا آهن. هن چيو ته دهشتگردن پوليو مهم ۾ حصو وٺندڙ رضاڪارن جي حفاظت تي مقرر پوليس اهلڪارن کي نشانو بڻايو جنهن ۾ پوليس ۽ ايف سي اهلڪارن سميت 14 ڄڻا شهيد جڏهن ته 24 زخمي ٿيا.

 

دهشتگردي کي پوري طرح ختم ڪرڻ واري ارادي هيٺ ڀارت سان رابطي ۾ آهيون: پڌر نامو

اسلام آباد (بيورو) وزيراعظم نوازشريف جي صدارت هيٺ ايپڪي ڪميٽي جي اجلاس ۾ وفاقي گهرو وزير چوڌري نثار علي خا، ناڻي واري صوبائي وزير اسحاق ڊار،پاڪ فوج جي سربراهه جنرل راحيل شريف،ڊي جي آئي ايس آئي ليفٽننٽ جنرل رضوان اختر،خاص صلاحڪار سرتاج عزيز،قومي سلامتي جو صلاحڪار ناصر جنجوعا،خاص سهڪاري صلاحڪار طارق فاطمي ۽ بيون اعليٰ اختياريون شامل هيون.اجلاس دوران اهم ملڪي معاملن،نيشنل ايڪشن پلان،پٺاڻ ڪوٽ حملي ۽ سعودي عرب ۽ ايران ڇڪتاڻ کانسواءِ اهم معاملن تي خيالن جي ڏي وٺ ڪئي وئي.اجلاس جي دوران شامل اعليٰ اختيارين ڀارتي ائيربيس پٺاڻ ڪوٽ حملي جي جاچ ۾ اڳڀرائي تي اطمينان جو اظهار ڪيو.وزيراعظم هائوس پاران ايپڪس ڪميٽي جي جاري پڌرنامي مطابق پٺاڻ ڪوٽ واقعي ۾ اهم اڳڀرائي سامهون آئي آهي ۽ ڀارت پاران ڏنل ڄاڻ ۽ شروعاتي جاچ جي سوجهري ۾  حملي ۾ ملوث ڏهارين کي گرفتار ڪيو ويو آهي، جن جو تعلق پابندي مڙهيل تنظيم جيش محمد سان آهي،جڏهن ته شروعاتي ڄاڻ مطابق پابندي مڙهيل تنظيم جيش محمد جي ڪيترن ئي ميمبرن کي گرفتار ڪري ،انهن جون آفيسون سيل ڪيون ويون آهن.پڌرنامي ۾ چيو ويو آهي ته دهشتگردي کي پوري طرح ختم ڪرڻ واري ارادي هيٺ ڀارت سان رابطي ۾ آهيون ۽ حڪومت هڪ خاص جاچ ٽيم کي پٺاڻ ڪوٽ موڪلڻ بابت غور ڪري رهي آهي،جنهن کي ڀارت جي حڪومت سان مشورا ڪرڻ کانپوءِ پٺاڻ ڪوٽ موڪليو ويندو،جڏهن ته پاڪستان ڀارت کان وڌيڪ ڄاڻ گهري آهي.

 

ٿر ۾ ڪو به ڏڪار ناهي، ٻار مائرن ۾ غذائي کوٽ ۽ ڪمزوري سبب فوت ٿيا : سنڌ سرڪار

ميرپورخاص / مٺي (نمائندن وٽن) سينيئر صوبائي وزير تعليم  نثار احمد کهڙو  ۽ سنڌ جي وڏي وزير جي اطلاعات  ۽ آرڪائيوز بابت صلاحڪار مولابخش چانڊيو اڄ سول اسپتال مٺي  پهتا جتي هنن ٻارڙن جي نگهداشت واري وارڊ ۾ صحت جي صورتحال  جو تفصيلي جائزو ورتو . ان موقعي تي هنن ضلعي صحت آفيسر ۽ ايم ايس کي سختي سان هدايت ڪئي ته حڪومت پاران فراهم ڪيل دوائن ۽صحت جون سهولتون ٿر جي مريضن تائين پهچايون وڃن. هن ڊائريڪٽوريٽ آف انفارميشن طرفان قائم ڪيل انفارميشن ميڊيا آگاهي سيل جو دورو ڪيو. نثار احمد کهڙو ۽ مولابخش چانڊيو درٻار هال ۾ گڏيل پريس ڪانفرنس کي خطاب ڪندي چيو ته پيپلزپارٽي جمهوري حڪومت ٿر جي هميشه خدمت ڪئي آهي ۽ ڪندي رهندي جڏهن ته موجوده صورتحال ۾ ٻارن جي موت واقع ٿي رهي آهي ان تي اسان تمام گهڻو ڏک آهي جيڪو انسانيت جو وڏو نقصان آهي. هن چيو ته ٻارن جي موت جو سبب مائرن ۾  غذائي کوٽ ۽ ڪمزوري  جي ڪري  وقت کان اڳ  ٻارن جي ڄم جو ٿيڻ آهي جنهن جي ڪري 17 فوتگيون ٿيون آهن. هن چيو ته ٿر جي موجوده صورتحال  تي جيڪا قيامت برپا ڪئي پئي وڃي  اهڙي ڪا قحط  جهڙي صورتحال ناهي. هن چيو ته پ پ پ جمهوري حڪومت  کي بدنام ڪرڻ لاءِ ڪجهه مفاد پرست عناصر سازشي پروپيگنڊا ڪري رهيا آهن جيڪي وقت سان گڏ وگڏ  ٿڌا ٿي ويندا . هن چيو ته پيپلزپارٽي  ۽ سنڌ حڪومت تي ڪوتاهي جا الزام لڳائي  اجائي واويلا  ڪئي پئي وڃي اسانکي خبر آهي ته ان سازش جي پويان ڪنهن جو هٿ آهي . هن چيو ته ادارن ۾ نقص جي ڪري اين جي اوز ٿر ۾ اهو ڪم سنڀاليو  آهي جيڪو خوش اسلوبي سان نڀائي رهي آهي  ان ۾ هينڊز  ۽ شفاء اين جي اوز جي ڪارڪردگي تسلي بخش آهي. ڄاڻايل اين جي اوز پنهنجي سموري رپورٽ   ۾ چيو آهي ته ٿر جي صورتحال خراب ناهي . هن چيو ته اسان عوام کان ڪا ڳالهه  نه لڪائينداسين  ٿر جون حالتن  کي باريڪ بيني سان ڏسي رهيا آهيون . هن چيو ته گذريل ڏڪار ۾ سنڌ حڪومت پاران 7 فيزز ۾ 2 لک 55 هزار خاندانن ۾ مفت ڪڻڪ تقسيم ڪئي  وئي هئي  ۽ ان وقت سنڌ حڪومت ڏڪارجي صورتحال کي منهن ڏنو هو. صوبائي صلاحڪار اطلاعات مولابخش چانديو چيو ته مان مٺي  ۾ گڏجاڻي   دوران ڪافي معاملن  کان مطمئن ٿيو آهيان پر ڪجهه  ڳالهين تي متفق نه آهيان جنهن جي اطلاع  پنهنجي اعليٰ قيادت  ۽ سنڌ حڪومت کي ڏيندس _ هن چيو ته ڪجهه ماڻهن جي ڪوتاهين  کي پوري سنڌ حڪومت تي نه وڌو وڃي جڏهن ته صوبائي حڪومت پنهنجي قوم جي ٻارڙن جو تحفظ ڪري سگهي ٿي  ۽ ڪري رهي آهي. هن چيو ته  جڏهن آئون سول اسپتال مٺي  پهتس ته مونکي گلن جهڙا ٻارڙا پنهنجا ٻچا لڳا ۽ منهنجن اکين مان لڙڪ وهي آيا .هن وڌيڪ چيو  ته مٺي  سول اسپتال پهرين کان وڌيڪ اپ گريڊ  ٿي چڪي آهي جتي تمام وڌيڪ سهولتون نظر اچي رهيون آهن پر جيڪڏهن تازا ڄاول ٻار  هڪ يا 2 پائونڊ جا پيدا ٿيندا ته معاملا گڙٻر ٿي سگهن ٿا . مولابخش چانڊيو چيو ته ٿر جي صورتحال جي پويان تمام  سماجي ، ثقافتي ، معاشي  ۽ ٻيا سبب شامل آهن . سنڌ حڪومت ۽ اسانجي قيادت اسان کي هتي موڪليو آهي اسان کان اڳ به  وزير آيا ۽ ٻيهر به اسين ۽ وزير ايندا رهندا. هن چيو ته گڏجاڻي ۾ شفاء  ۽ هينڊ اين جي اوز واضح ڪيو آهي ته ٿر جي صورتحال ۾ سنڌ حڪومت جو ڪو به ڏوهه ناهي اها ڳالهه مونکي تمام سٺي لڳي، ڇاڪاڻ ته سنڌ حڪومت سڄي معاملي کان چڱي ريت آگاهه آهي ۽ اسين پنهنجو ڪم بخوبي انجام ڏئي رهيا آهيون . ان موقعي تي صوبائي وزير زڪوات  دوست محمد راهمون ، ايم پي اي ڊاڪٽر مهيش ڪمار ملاڻي  ،ايم پي اي خير النساء مغل ، ڊپٽي ڪمشنر خدا ڏنو شورو ، ايڊيشنل ڊپٽي ڪمشنر نثار ميمڻ ۽ ٻيا موجود هئا _ ان کان اڳ نثار کهڙو  ۽ مولابخش چانڊيو ٿر جي موجوده صورتحال بابت سرڪاري ۽ غير سرڪاري اسٽيڪ هولڊرز  کان تفصيلي بريفنگ ورتي.

 

والاريل ڪشمير۾ پيپلز پارٽي جو سياسي موت ٿي چڪو آهي: پرويز رشيد

مظفر آباد(م.ڊ) وفاقي سڌ سماءَ واري وزير پرويز رشيد مظفر آباد ۾ مسلم ليگ ن جي ڪارڪن ڪنوينشن سان خطاب ڪندي مخالفن کي ڇتي تنقيد جو نشانو بڻايو.پرويز رشيد جو چوڻ هو ته والاريل ڪشمير ۾ پاڪستان پيپلز پارٽي جو سياسي موت ٿي چڪو آهي ۽ پيپلز پارٽي جا پنهنجا ڪارڪن ڪفن اوڍي والاريل ڪشمير جي وزيراعظم خلاف احتجاج ڪندا رهيا. سندس چوڻ هو ته ڪوتاهين کانپوءِ به ڪڏهن حڪومت والاريل ڪشمير جي سياست ۾ مداخلت نه ڪئي،پرويز رشيد جو اهو به چوڻ هو ته پيپلز پارٽي جي حڪومت ۾ نيلم ،جهلم پراجيڪٽ تي وڏا فنڊ لڳائڻ کانپوءِ به ان ۾ دير ٿي.وفاقي ڪشمير،گلگت بلتستان واري معاملن جي وزير چيو ته ايندڙ چونڊن ۾ مسلم ليگ ن والاريل ڪشمير کان کٽيندي.

 

حڪومت وفاق ۽ صوبن جي وچ ۾ غلط فهميون پيدا پئي ڪري: خورشيد شاهه

اسلام آباد (بيورو) قومي اسيمبلي ۾ پنهنجي خيالن جو اظهار ڪندي مخالف ڌر جي اڳواڻ خورشيد شاهه جو چوڻ هو ته حڪومت معاشي لنگهه رٿا لاءِ رکيل پئسن مان اورينج لائين رٿا ٺهي رهي آهي،اهڙن قدمن سان صوبن ۽ وفاق جي وچ ۾ غلط فهميون پيدا ڪري رهي آهي.ذريعن مطابق خورشيد شاهه جو چوڻ هو ته ڀلائي واري رياست جي ڳالهه ته ڪن ٿا پر عوام جي مجبورين مان فائدو ٿا کڻن، حڪومتي قرضن واري ڳالهه به سڀني کي خبر آهي،عوام تي ٽيڪس جو بار وڌو پيو وڃي،حڪومتي قدمن مان لڳي ٿو ته انهن کي عوام جي فائدي سان ڪو به سروڪار ناهي ۽ ڪاري پئسي کي قانوني بڻائڻ لاءِ ڪايمنسٽي اسڪيم هلائي پئي وڃي. خورشيد شاهه چيو ته ٻڌايو وڃي ته اها آمريت جي حڪومت آهي  يا جمهوريت جي،2004ع ۾ تيل جو اگهه 32 ڊالر في بيرل هو ته پيٽرول جو اگهه 62 رپيا ٿيو هو،2012ع ۾ 110 بيرل في ڊالر هو ته پيٽرول جو اگهه 97 رپيا هو،2012ع کانپوءِ تيل جا اگهه 3 سيڪڙو هيٺ اچي ويا،بجلي جا اگهه 33 سيڪڙو وڌايا ويا،هن وقت ملڪ ۾ بجلي ۽ پيٽروليم شين جي اگهن تي بحث هلي رهيو آهي.مخالف ڌر جي اڳواڻ جو چوڻ هو ته سرڪلرڊيٽ اڄ وري 500 ارب کان وڏي ويو آهي،2013ع تائين گڏيل قرض 140 کرب هو ۽ هاڻي 180 کرب ٿي چڪو آهي،جڏهن ته سي پيڪ تي پوري قوم خوش هئي پر خاص علائقن لاءِ هوندو اها ڄاڻ نه هئي،سي پيڪ رٿا جي پئسي مان اورينج لائين لاءِ پئس ڪڍيا ويا.

 

ڪوئيٽا پوليو سينٽر تي حملي جي مذمت، هي وقت دهشتگردن کي سختي سان منهن ڏيڻ جو آهي: بلاول ڀٽو زرداري

ڪراچي (اين اين آءِ) پاڪستان يپلزپارٽي جي چيئرمين بلاول ڀٽو زرداري اربع جي صبح ڪوئيٽا ۾ پوليو سينٽر تي ٿيل دهشتگردي جي سخت لفظن ۾ مذمت ڪئي آهي جنهن ۾ 14 اهلڪار شهيد ٿيا آهن بلاول هائوس مان جاري بيان ۾ بلاول ڀٽو زرداري چيو ته دهشتگرد اهڙي قسم جي وحشياڻي ڪارروايون ۽ بم حملن ذريعي رياست ۽ قانون لاڳو ڪندڙ ادارن جي صلاحيت کي چئلينج ڪري رهيا آهن ۽ صورتحال سمجهدار رويي جي گهر ڪري رهي آهي هن چيو ته هي وقت آهي ته دهستگردن کي سختي سن منهن ڏنو وڃي ۽ نيشنل ايڪشن پلان کي ان جي حقيقي روح مطابق عمل ۾ آندو وڃي بجاءِ ان جي ته ان کي نواز ليگ جي پلان ۾ تبديل ڪيو وڃي جهڙي طرح سنڌ ۾ ٿي رهيو آهي بلاول ڀٽو زرداري شهيدن جي وارثن سان همدردي جو اظهار ڪيو آهي.

 

آءِ جي سنتڌ 4-4 ڀيرا سزا مليل آفيسر کي مقرر ڪري بديانتي ڪئي: سپريم ڪورٽ

اسلام آباد (اين اين آءِ) سپريم ڪورٽ توهين عدالت ڪيس ۾ آءِ جي سنڌ جو معافي نامو رد ڪندي ايندڙ ٻڌڻي تي فرد جرم لاڳو ڪرڻ جو فيصلو ڪري ورتو آهي اربع تي سپريم ڪورٽ جي جسٽس امير حاني مسلم جي سربراهي ۾ ٽه رڪني بئنچ آءِ جي سنڌ جي خلاف توهين عدالت ڪيس جي ٻڌڻي ڪئي ٻڌڻي دوران آءِ جي سنڌ به عدالت ۾ پيش ٿيو جڏهن ته ان جي وڪيل عدالت ۾ موقف اختيار ڪيو ته هو پاڪستان کان ٻاهر هو ان لاءِ نوٽيس جو جواب جمع نه ڪرائجي سگهيو هن چيو ته اسان کي پنهنجي ذميواري جو پورو احساس آهي ۽ اسان کان غلطي ٿي آهي ان لاءِ اسان کي معافي ڏني وڃي جنهن تي عدالت ريمارڪس ڏنا ته ڪائي ننڍي غلطي هجي ته عدالت نوٽيس ناهي وٺندي پر هي وڏو معاملو آهي ڇو ته سيف الله کي 4-4 ڀيرا نوڪري مان ڪڍي سزائون ڏنيون ويون آهن ۽ اهڙي شخص کي ڪيئن ٻيهر مقرر ڪري سگهجي ٿو عدالت ريمارڪس ۾ چيو ته آءِ جي سنڌ پنهنجي ذميواري سان بدديانتي ڪئي ڊيپوٽيشن تي سيف الله جي مقرري عدالتي حڪم جي خلاف ورزي آهي غلطي جو احساس ٿئي ته معافي گهرڻ لاءِ ڪوئي وقت گهربل ناهي هوند عدالت آءِ جي سنڌ جو معافي نامو رد ڪندي ايندڙ ٻڌڻي تي فرد جرم لاڳو ڪرڻ جو فيصلو ڪيو آهي خانگي ٽي وي مطابق ايندڙ ٻڌني تي انسپيڪٽر سيف الله تي به فرد جرم لاڳو ڪيو ويندو.