تازيون خبرون

Daily Archives: January 12, 2016

حڪومتي نااهلي سبب اقتصادي راهداري رٿا بابت غلط فهميون پيدا ٿيون آهن: خورشيد شاهه

اسلام آباد (بيورو) خورشيد شاهه چيو آهي ته حڪومتي نااهلي سبب اقتصادي راهداري رٿا بابت غلط فهميون پيدا ٿيون آهن اسلام آباد ۾ تقريب کي خطاب ڪندي ۽ ميڊيا سان ڳالهائيندي خورشيد شاهه چيو ته اقتصادي راهداري رٿا تي پارليامينٽ ۾ بحث ڪرايو ويندو. هن چيو ته وزيراعظم نواز شريف سموري صورتحال تي پارليامينٽ کي اعتماد ۾ وٺي.سندس چوڻ هو ته اقتصادي راهداري رٿا کي تڪراري نه بڻايو وڃي ڇاڪاڻ ته تڪراري رٿائون ڪڏهن به مڪمل نه ٿينديون آهن. خورشيد شاهه چيو ته پاڪ چين اقتصادي راهداري رٿا تمام گهڻي اهم آهي، تنهن ڪري حڪومت سنجيدگي کان ڪم وٺي. هن چيو ته پنهنجي حق ۾ هر ڪنهن کي ڳالهيون درست لڳنديون آهن، اها ئي ڳالهه ٻئي لاءِ ڪجي ته خراب لڳندي آهي. سندس چوڻ هو ته سعودي وزير سان ڪهڙيون ڳالهيون ٿيون، کين آگاهه ڪيو وڃي، وزيراعظم نواز شريف 34 ملڪن جي اتحاد تي به پارليامينٽ کي اعتماد ۾ وٺي. خورشيد شاهه چيو ته پ پ چيني حڪومت کي اولهندي روٽ تي ڪم شروع ڪرڻ جي تجويز ڏني هئي. هن چيو ته اقتصادي راهداري رٿا تي حڪومتي اتحادين کي به خدشا آهن، وزيراعظم نواز شريف کي صورتحال تي مشورا ڪرڻ جي تجويز ڏني. هن چيو ته ٿرپارڪر ۾ سنڌ سرڪار ڪيترائي منصوبا شروع ڪيا آهن ايندڙ ڪجهه سالن اندر صورتحال بهتر ٿي ويندي. خورشيد شاهه چيو ته سمورين پارٽين جي مئنڊيٽ جو احترام ڪرڻ گهرجي.

 

حڪومت مستقبل جي ضرورتن کي سامهون رکندي قانونسازي ڪري رهي آهي: اسحاق ڊار

لاهور (بيورو) ڪراچي، لاهور ۽ اسلام آباد اسٽاڪ ايڪسچينج کي پاڪستان اسٽاڪ ايڪسچينج ۾ ضم ڪيو ويو، ناڻي واري وفاقي وزير اسحاق ڊار چيو آهي ته حڪومت مستقبل جي ضرورتن کي سامهون رکندي قانونسازي ڪري رهي آهي، نيڪ نيتي سان ئي سمورا ڪم ڪري سگهجن ٿا. اسلام آباد ۾ ڪراچي، لاهور ۽ اسلام آباد اسٽاڪ ايڪسچينج کي پاڪستان اسٽاڪ ايڪسچينج ۾ ضم ڪرڻ جو افتتاح ڪرڻ کانپوءِ تقريب خطاب ڪندي اسحاق ڊار چيو ته پاڪستان اسٽاڪ ايڪسچينج جو خواب پورو ڪرڻ ۾ 15 سال لڳا، اڄوڪو ڏينهن تاريخي آهي، جنهن تي هُو سڀني کي مبارڪباد پيش ڪري ٿو. اسحاق ڊار چيو ته معيشت جي بحالي لاءِ واضح روڊ ميپ ٺاهيو ويو آهي، معيشت، صحت ۽ تعليم جي شعبن ۾ بهتري لاءِ ڪوششون ڪيون پيون وڃن. اسحاق ڊار چيو ته قونسازي بابت حڪومت جي پاليسي واضح آهي، مستقبل جي ضرورتن کي سامهون رکندي قانونسازي ڪئي پئي وڃي.

 

پ پ جي سنڌ حڪومت صحافين جي ڀلائي ۽ بهتري لاءِ هميشه جدوجهد ڪئي آهي: مولا بخش چانڊيو

ڪراچي (اي پي پي) سنڌ جي وڏي وزير جي اطلاعات ۽ آرڪائيوز کاتي بابت صلاحڪار مولابخش چانڊيو پاران ملير پريس ڪلب جي سالياني چونڊ 2016ع ۾ ڪاميابي ماڻيندڙ عهديدارن صدر آغا طارق ۽ ٻين ڪامياب عهديدارن کي مبارڪ ڏيندي اميد ظاهر ڪئي آهي ته اهي ملير جي سڀني صحافين کي گڏ کڻي هلندا ۽ انهن جي مسئلن جي حل لاءِ جدوجهد ڪندا. صوبائي صلاحڪار چيو ته پاڪستان پيپلز پارٽي جي سنڌ حڪومت صحافين جي ڀلائي ۽ بهتري لاءِ هميشه جدوجهد ڪئي آهي ۽ ملير جي صحافين جا مسئلا به اوليت جي بنياد تي حل ڪيا ويندا.

 

قومي سطح تي ناڪامي جا سڀ ذميوار آهيون، اسٽبلشمينٽ، سياستدانن ۽ عدليا کي غلطيون مڃڻيون پونديون: بلاول ڀٽو زرداري

لاهور (م.ڊ) پاڪستان پيپلز پارٽي جي چيئرمين بلاول ڀٽو زرداري چيو آهي ته سياستدانن کي وڪيلن کان مينڊيٽ مڃڻ سکڻو پوندو، بار جي چونڊن ۾ ڌرڻو ۽ احتجاج شامل ناهي هوندو،نتيجا جيڪي به هوندا آهن، اهي مڃڻا پوندا آهن. لاهور ۾ هائيڪورٽ بار کي خطاب ڪندي بلاول ڀٽو زرداري چيو ته قومي سطح تي ناڪامي جا اسان سڀ ذميوار آهيون، اسٽبلشمينٽ، سياستدانن ۽ عدليا کان غلطيون ٿيون آهن، جيڪي انهن سڀني کي مڃڻيون پونديون، هن چيو ته پ پ جي حڪومتي دور ۾ پاڻمرادي نوٽيس جو غلط استعمال ڪيو ويو، مان پڇي سگهان ٿو ته نوازليگ جي ايڪشن پلان ۾ گهڻن دهشتگردن کي سزا ملي آهي؟ ن ليگ جو ايڪشن پلان اهو آهي ته پنجاب ۾ ڪنهن به انتهاپسند خلاف ڪارروائي ناهي ڪرڻي. سندس چوڻ هو ته قومي ايڪشن پلان تي ان جي روح مطابق ڪم نه پيو ڪيو وڃي، ضرورت آهي ته توهين رسالت قانون جو غلط استعمال روڪيو وڃي، سندس چوڻ هو ته پنجاب ۾ پابندي مڙهيل تنظيمن خلاف ڪارروائي نه پئي ڪئي وڃي، جيڪي ٻين نالن سان ڪم ڪري رهيون آهن،حڪومت پاڻ به مڃيو آهي ته ان کي ٻين نالن سان ڪم ڪندڙ اهڙين تنظيمن جي انگ جي ڄاڻ ناهي. پ پ چيئرمين چيو ته ڪڏهن سٺن ۽ خراب طالبان جا اصطلاح استعمال ڪيا ويا، بچاءَ وارو وزير چئي چڪو آهي ته افغان طالبان سان تاپي گئس پائپ لائن رٿا جي حفاظت لاءِ ڳالهه ٻولهه ڪئي ويندي، هن چيو ته لاهور هائيڪورٽ بار ڏکڻ ايشيا ۾ سڀ کان وڏي بار آهي ۽ اها جمهوري جاکوڙ ۾ اهم حيثيت رکي ٿي، بلاول ڀٽو زرداري چيو ته هن بار جو گذريل ۽ ايندڙ وقت ٺاهڻ ۾ وڏو حصو آهي،قائد اعظم ۽ منهنجو نانو ذوالفقار علي ڀٽو وڏا ناليوارا وڪيل هئا،هن چيو ته جمهوريت لاءِ بار جي جاکوڙ واري تاريخ شاهد آهي ته ان جڏهن به جهنڊو کنيو ته آمرن کي وڃڻو پيو، هاڻ به هر اداري کي جمهوريت جي مضبوطي لاءِ ڪردار نڀائڻو پوندو، سندس چوڻ هو ته کيس اهڙي پارٽي جو حصو هجڻ تي فخر آهي، جنهن جمهوريت لاءِ قربانيون ڏنيون آهن، پ پ ڪارڪنن تي زخمن جا نشان انعام برابر آهن،پ پ چيئرمين چيو ته قومون آئين ۽ قانون لاءِ وڏي جاکوڙ ڪنديون آهن، هڪ آمر ايمرجنسي لڳائي ۽ 60 ججن کي ڪم کان روڪي ڇڏيو، پارليامينٽ عدليا جي اعتراضن تي ڪميٽي جوڙي ۽ ججن پنهنجي ضمير مطابق فيصلا ڪيا، پ پ جي وزيراعظمن خلاف وڏا وڏا فيصلا ڪيا ويا، ججن جي مقرري جج ڪن ته انصاف مضبوط ٿيندو، جڊيشل ڪميشن ججن جي مقرري ۾ پارليامينٽ کي به اختيار ڏنو آهي، آئين مطابق قانونسازي ڪرڻ پارليامينٽ جو حق آهي، جڏهن ته عدليا جو ڪم آئين جي تشريح ڪرڻ آهي، بلاول ڀٽو زرداري چيو ته ججن جي مقرري ۾ صدر ۽ وزيراعظم جو ڪردار نمائشي آهي، اسان ملڪ ۾ انصاف ڀرئي نظام جا خواهشمند آهيون، هن چيو ته اڃا تائين ملڪ ۾ ڪابه عورت چيف جسٽس مقرر ناهي ٿي، منهنجي امڙ جي دور ۾ عورتن کي عدالتي بينچن ۾ آندو ويو پر اها ڳالهه عجيب آهي ته سپريم ڪورٽ ۾ ڪابه عورت جج ناهي، پ پ چيئرمين چيو ته پيپلز پارٽي جي حڪومت ۾ سوين پاڻمرادا نوٽيس ورتا ويا، قانوني ماهرن به انهن نوٽيسن تي اعتراض واريا، مان ته قانونسازي بابت پارليامينٽ کي مليل اختيار خلاف اعتراض تي حيران آهيان، بلاول ڀٽو زرداري چيو ته ڪرپشن جي حوالي سان ڪابه مقدس ڳئون ناهي، اسان کي ڪرپشن ڪيسن جي حوالي سان ٻٽو معيار ختم ڪرڻو پوندو، معاشري لاءِ ڌار ڌار نظام صحيح ناهي، پي سي او هيٺ آئين کي لتاڙڻ جي مذمت ڪيون ٿا.

 

ٿر ۾ ڏڪار ۽ طبي سهولوتن جي اڻاٺ سبب وڌيڪ 3 ٻارڙا فوت، انگ 40 ٿي ويو

ڪراچي/مٺي (نمائندن وٽان) ٿرپارڪر ۾ ڏڪار ۽ اسپتالن ۾ طبي سهولتن جي اڻهوند سبب وڌيڪ 3 ٻارڙا فوت ٿي ويا، 11 ڏينهن دوران بيمارين سبب حياتيون وڃائيندڙ ٻارڙن جو انگ وڌي 40 ٿي ويو آهي، سنڌ سرڪار پاران ڏڪاريل ڏيهه ۾ اڃا تائين رليف جو ڪم شروع نه ٿي سگهيو ۽ نه ئي ٿرپارڪر کي آفت سٽيل قرار ڏنو ويو. ٿرپارڪر ۾ ڏڪار سبب پيدا ٿيل بيمارين جي ڪري معصوم ٻارڙن جي فوت ٿيڻ وارو سلسلو جاري آهي، مٺي مان ڪراچي منتقل ڪيل ڳوٺ ڪڍڙو جي رهواسي پورهيت عيشور داس جو نئون ڄاول ٻارڙو فوت ٿي ويو.  مٺي سول اسپتال ۾ ڳوٺ ڇهو رام جي رهواسي ٻن ورهين جو رجب پٽ محمد اويس به حياتي وڃائي ويٺو، جڏهن ته ڇاڇري ويجهو ڳوٺ ستلا ۾ ساڍا ٽن ورهين جو ٻارڙو مول چند ڀيل ڊائريا وگهي فوت ٿي ويو. سول اسپتال ۾ گذريل 11 ڏينهن دوران بيمارين سبب فوت ٿي ويل ٻارڙن جو انگ 17 ۽ سڄي ضلعي اندر فوتي ٻارڙن جو انگ وڌي 39 ٿي ويو آهي. بلاول ڀٽو زرداري پاران ناصر شاهه ۽ مولابخش چانڊئَي تي ٻڌل جوڙيل ٻه رڪني ڪميٽي ٿرپارڪر جي ياترا ڪري چڪي آهي، رليف بابت وڏي وزير قائم علي شاهه جَي صلاحڪار علي حسن هنڱورجَي به مٺي جو دورو ڪيو آهي. ضلعي جي ٻهراڙي وارن علائقن ۾ ماڻهن کي طبي سهولتون فراهم ڪرڻ لاءِ اڃا تائين موبائل سروس به شروع نه ٿي سگهي آهي ۽ نه ئي ٿرپارڪر کي ڏڪار سٽيل علائقو قرار ڏئي رليف جو ڪم شروع ڪيو ويو آهي. ٻئي طرف صحت جي صوبائي وزير ڄام مهتاب حسين ڏهر چيو آهي ته ٿر ۾ ٻارن جي موت جا ڪيترائي سبب آهن انهن ۾ ٻارن جي جلدي شادي، خوراڪ جي کوٽ، وقت کان اڳ ٻارن جي پيدائش ۽ انهن جو گهٽ وزن هجڻ شامل آهي، جڏهن ته حڪومت پنهنجا سمورا وسيلا استعمال ۾ آڻيندي ٿر جي علائقي ۾ عوام کي معيار زندگي بلند ڪرڻ لاءِ ڪوشان آهي. اها ڳالهه اڄ هن پنهنجي دفتر ۾ هڪ اجلاس جي صدارت ڪندي چئي. ان موقعي تي سيڪريٽري صحت سنڌ ڊاڪٽر سعيد احمد مڱڻيجو، ايم ايس سول اسپتال حيدرآباد ڊاڪٽر واجد ميمڻ ۽ نيورو سرجري لمس جي چيئرمين ڊاڪٽر رياض احمد به موجود هئا. هن چيو ته اسان ضلعي ۽ تعلقي سطح تي موبائيل ميڊيڪل يونٽس جي فراهمي لاءِ يو ايس ايڊ سان رابطي ۾ آهيون ته جيئن عوام کي سندن در آڏو ئي علاج معالجي جون بهتر سهولتون فراهم ڪري سگهجن. صوبائي وزير وڌيڪ چيو ته جيڪڏهن اسان لاهور ۽ فيصل آباد جي اسپتالن ۾ تازن ڄاول ٻارن جي موت جو تناسب ڏسنداسين ته اهو ٿر جي مقابلي ۾ وڌيڪ آهي، پر اسان جي ڪوشش ۽ خواهش آهي ته ٿر ۾ هڪ به ٻار موت جو شمار نه ٿئي. ڄام مهتاب حسين ڏهر چيو ته پرائمري هيلٿ جي شعبي ۾ تمام وڌيڪ ڌيان ڏيڻ جي ضرورت آهي ۽ ان سلسلي ۾ انسان دوست شخصيتن ۽ ادارن کي اڳتي اچي صحت کاتي سان گڏجي غريب مريضن جي مدد ڪرڻ جي ضرورت آهي. هن چيو ته اسان ٿر ۾ ڪم ڪندڙ اسپيشلسٽ ڊاڪٽرن لاءِ خاص سهولتن جو به اعلان ڪري رهيا آهيون جڏهن ته اتي ماڻهو ڪم ڪرڻ لاءِ تيار نه آهن. ان موقعي تي صوبائي وزير سيڪريٽري هيلٿ کي هدايت ڪئي ته سنڌ جي سمورين وڏين اسپتالن ۾ نيورو سرجري جا وارڊز جديد نموني تي فعال ڪيا وڃن ته جيئن غريب ۽ ضرورتمند مريضن کي پريشاني سان منهن نه ڏيڻو پوي.

 

ايم ڪيو ايم وفد جي ڪراچي ۾ صوبائي اليڪشن ڪمشنر سان ملاقات

ڪراچي (اسٽاف رپورٽر) ايم ڪيو ايم وفد ڪراچي ۾ صوبائي اليڪشن ڪمشنر سان ملاقات ڪري مڪاني ادارن جي مخصوص سيٽس تي جلد چونڊون ڪرائي هائوس مڪمل ڪرڻ  سميت  ايڊمنسٽريٽرز کي بدلين، مقررين ۽ ترقياتي فنڊس جاري ڪرڻ کان روڪڻ جو مطالبو ڪيو آهي. ڪراچي ۾ ايم ڪيو ايم جي خواجه اظهار ۽ محمد حسين  صوبائي اليڪشن ڪمشنر تنوير ذڪي سان ملاقات ڪري مڪاني ادارن جي رهيل مخصوص سيٽن تي جلد چونڊون ڪرائي هائوس مڪمل ڪرڻ جو مطالبو ڪيو آهي. متحدهه وفد ايڊمنسٽريٽرز کي بدلين، مقررين ۽ ترقياتي فنڊس جاري ڪرڻ کان روڪڻ جو مطالبو ڪندي چيو ته مڪاني چونڊن  کانپوءِ اقتدار جي منتقلي وارو مرحلو آهي پر ايڊمنسٽريٽر اختيارن جو ناجائز استعمال ڪري رهيا آهن . صوبائي اليڪشن ڪمشنر سان ملاقات بعد خواجه اظهار چيو ته صوبائي اليڪشن ڪمشنر مڪاني چونڊن جا رهيل مرحلا جلد مڪمل ڪرڻ جي خاطري ڪرائيندي چيو آهي ته ايڊمنسٽريٽرز کي مقررين ۽ بدلين کان روڪڻ سنڌ حڪومت جو ڪم آهي.

 

پي ٽي آءِ سربراهه جو چيف اليڪشن ڪمشنر کي خط، عليم خان خلاف بنا جواز ڪارروائي اليڪشن ڪميشن کي نه ٿي سونهين:عمران خان

اسلام آباد (بيورو) تحريڪ انصاف جي سربراهه عمران خان چيو آهي ته اليڪشن ڪميشن کي نه ٿو سونهين ته اها سندس جماعت يا عليم خان خلاف بنا جواز ڪارروائي ڪري. عمران خان چيف اليڪشن ڪمشنر سردار رضا محمد کي خط لکيو آهي. خط ۾ پي ٽي آءِ سربراهه جو چوڻ آهي ته اليڪشن ڪميشن قوم جي اعتماد ۽ جمهوريت جي نگهباني جي ذميوار آهي. عمران خان چيو ته جمهوريت جي مستقبل جو دارو مدار صاف ۽ شفاف اليڪشن تي آهي، هنن ڪميشن جي سرگرمين کي ڳــُجهو رکي اداري جي ساک خراب ڪرڻ جي ڪوشش ناڪام بڻائي. سندس چوڻ هو ته 1974ع جي اليڪٽرول ايڪٽ موجب شفاف ووٽر لسٽن جي تياري جي ذميوار اليڪشن ڪميشن آهي. عمران خان چيو ته اليڪشن ڪميشن کي اها ڳالهه نه ٿي سونهين ته اها تحريڪ انصاف يا عليم خان خلاف بنا جواز ڪارروائي ڪري. سندس چوڻ هو ته مئي 2013ع کان هن وقت تائين اين اي 122 مان 30 هزار ووٽرن کي خارج ڪيو ويو آهي. عمران خان چيو ته ووٽر لسٽ ۾ تبديلين جي جائزي لاءِ دستاويزي رڪارڊ حاصل ڪرڻ لاءِ عليم خان جي درخواست نومبر 2015ع کان التوا هيٺ آهي جڏهن ته اياز صادق عليم خان جي جي اهڙي درخواست جي مخالفت ۾ لاڳيتو سرگرم آهي. پِي ٽي آءِ سربراهه پنهنجي خط ۾ وڌيڪ چيو ته اليڪشن ڪميشن جي ڄاڻ کي ڳــُجهو رکڻ سمجهه کان ٻاهر آهي، اليڪشن ڪميشن آئين جي آرٽيڪل 19 اَي تي عمل ڪري ۽ بنا دير معلومات فراهم ڪري.

 

رنوير سان شادي جون خبرون رد، دپيڪا کي سلمان خان سان گڏ ڪم ڪرڻ جي خواهش

ممبئي (شوبز نيوز) بالي ووڊ جي ڪامياب اداڪارا دپيڪا پدوڪون دبنگ اداڪار سلمان خان سان گڏ ڪم ڪرڻ جي خواهش ڏيکاري آهي، ڀارتي اخبار کي انٽرويو ڏيندي دپيڪا پدوڪون چيو ته وقت گذرڻ سان گڏوگڏ هن پنهنجي ڪيريئر ۽ پاڻ ۾ بهتر تبديليون ڏٺيون آهن،هوءَ پاڻ مٿان ٿيندڙ تنقيد کي سدائين هاڪاري انداز ۾ وٺي ٿي ۽ ان مان پنهنجي غلطين جو اندازو لڳائي سکي ٿي، هن چيو ته هوءَ پنهنجي ڪم کي وقت سان گڏ بهتر ڪرڻ جي ڪوشش ڪري رهي آهي،ڇو ته کيس فلمن سان محبت آهي،رنوير سنگهه سان شادي وارين خبرن جي ترديد ڪندي دپيڪا ٽوڪ واري انداز ۾ چيو ته شايد ماڻهو منهنجي زندگي کي مونکان وڌيڪ بهتر نموني ڄاڻن ٿا!دپيڪا هن وقت تائين شاهه رخ خان سان ٽن فلمن ۾ ڪم ڪري چڪي آهي ۽ هاڻ کيس سلمان خان سان ڪم ڪرڻ جي خواهش آهي.هن چيوته هوءَ ترت سلمان خان سان ڪنهن فلم ۾ ڪم ڪرڻ چاهي ٿي. پنهنجي تازي فلم باجي رائو مستاني جي حوالي سان هن چيو ته اها پهرين فلم آهي، جنهن تي سندس ڪٽنب سندس تمام گهڻي واکاڻ ڪئي. دپيڪا چيو ته منهنجي ڪٽنب مطابق اها منهنجي هن مهل تائين جي سڀ کان بهترين فلم هئي، پر منهنجي بابا چيو ته مونکي اڃا ان کان وڌيڪ بهتر ڪم ڪرڻو آهي. هن چيو ته باجي رائو مستاني جو سفر مون لاءِ تمام گهڻو خاص هو ۽ مان پهريون ڀيرو اها فلم ڏسڻ کانپوءِ ٻه ڪلاڪ روئيندي رهيس. هالي ووڊ ۾ اداڪار ون ڊيزل سان گڏ فلم ۾ ڪم ڪرڻ بابت دپيڪا پدوڪون چيو ته هڪ اداڪارا جي حيثيت ۾ هوءَ رڳو بهتر ڪم ڪرڻ چاهي ٿي، پوءِ اها بالي ووڊ هجي، هالي ووڊ يا ڪا مراٺي فلم ئي ڇو نه هجي.

 

ليونارڊو ڊي ڪيپريو بهترين اداڪاري سبب گولڊن گلوب ايوارڊ کٽي ورتو

لاس اينجلس (شوبز نيوز) هالي ووڊ اداڪار ليونارڊو ڊي ڪيپريو بهترين اداڪاري سبب گولڊن گلوب ايوارڊ کٽي ورتو، هن فلم “دي ريورينٽ” ۾ بهترين اداڪادري سبب اهو ايوارڊ پنهنجي نالي ڪيو،سندس ان فلم  بهترين هدايتڪاري ۽ بهترين ڊرامي جو ايوارڊ به ماڻيو، ليونارڊو ڊي ڪيپريو گولڊن گلوب ايوارڊ ٽيون ڀيرو کٽيو آهي، ان کان پهرين فلم ايوي ايٽر ۽ وولف آف دي وال اسٽريٽ ۾ بهترين اداڪاري تي کيس اهو ايوارڊ ملي چڪو آهي، فلم “ روم” ۾ اداڪاري جا جوهر ڏيکاريندڙ بري لارسن بهترين اداڪارا جو ايوارڊ پنهنجي نالي ڪيو، جڏهن ته فلم اسٽيو جابز ۾ مددگار اداڪار جو ڪردار نڀائيندڙ ڪيٽ ونسليٽ بهترين سپورٽنگ ايڪٽر جو ايوارڊ پنهجي نالي ڪيو.

 

نيوزيلينڊ، پاڪستان خلاف ٽي ٽوئنٽي سيريز لاءِ 13 رانديگرن تي ٻڌل ٽيم جو اعلان ڪري ڇڏيو

آڪلينڊ (اسپورٽس نيوز) نيوزيلينڊ، پاڪستان خلاف ٽي ٽوئنٽي ڪرڪيٽ سيريز لاءِ ڪين وليمسن جي اڳواڻي ۾ 13 رانديگرن تي ٻڌل ٽيم جو اعلان ڪيو آهي، آل رائونڊر ٽوڊ ايسٽل کي پهريون ڀيرو ٽيم ۾ شامل ڪيو ويو آهي، جڏهن ته مڪولم مختصر فارميٽ واري ڪرڪيٽ کان پاسيرو ٿي وڃڻ ڪري ٽيم ۾ شامل ناهي، ڪيوي ٽيم جو هيڊ ڪوچ مائيڪ بيسن ڀارت ۾ رٿيل ٽي ٽوئنٽي ورلڊ ڪپ لاءِ ٽن اسپنرن کي ٽيم ۾ شامل ڪرڻ چاهي ٿو، جنهن ڪري ايسٽل کي پاڪستان خلاف کيڏايو پيو وڃي، ڪيوي ٽيم ۾ مچل سينٽينر جي صورت ۾ ٻيو اسپنر به شامل آهي، جڏهن ته روس ٽيلر کي پهرين ميچ لاءِ آرام ڏنو ويو آهي ۽ سندس جاءِ  تي ٽام ليٿم کي ٽيم ۾ جاءِ ڏني وئي آهي، ڪيوي ٽيم جي ٻين رانديگرن ۾ ڪوري اينڊرسن، ٽرينٽ بولٽ، گرانٽ ايليٽ، مارٽن  گپٽل، ميٽ هنري، مچل مڪ ڪلينگن، ايڊم ملني، ڪولن مينرو۽ ليوڪ رانچي شامل آهن. شاهد آفريدي جي اڳواڻي ۾ پاڪستان جي ٽي ٽوئنٽي ٽيم پهرين ئي نيوزيلينڊ پهچي چڪي آهي، جنهن ۾ اسپاٽ فڪسنگ ۾ 5 سال سزا ڪاٽيندڙ نوجوان فاسٽ بالر محمد عامر به شامل آهي، ٻنهي ٽيمن وچ ۾ پهرين ٽي ٽوئنٽي ميچ 15 جنوري تي آڪلينڊ، ٻي 17 جنوري تي هملٽن ۽ ٽئين ميچ 22 جنوري تي ويلنگٽن ۾ کيڏي ويندي.