تازيون خبرون

Daily Archives: January 8, 2016

سعودي پرڏيهي وزير جون وزير اعظم ۽ آرمي چيف سان ملاقاتون، خطي جي صورتحال تي ڳالهيون

اسلام آباد (بيورو) سعودي عرب ۽ ايران ۾ شروع ٿيل ڇڪتاڻ سبب خطي جي بدلجندڙ صورتحال ۾ سعودي پرڏيهي وزير عادل بن احمد الجبير اهم دوري تي پاڪستان پهچي اسلام آباد ۾ وزيراعظم نواز شريف،آرمي چيف ۽ سرتاج عزيز سان ڌار ڌار ملاقاتون ڪري خيالن جي ڏي وٺ ڪئي سعودي عرب جي پرڏيهي وزير عادل بن احمد الجبير اهم دوري تي اسلام آباد پهتو،جتي ايئرپورٽ تي پرڏيهي صلاحڪار سرتاج عزيز ۽ ٻين اعليٰ اختيارين سندس شاندار استقبال ڪيو سعودي عرب جي پرڏيهي وزير اسلام آباد ۾ وزيراعظم نواز شريف، آرمي چيف جنرل راحيل شريف ۽ پرڏيهي صلاحڪار سرتاج عزيز سان ڌار ڌار ملاقات ڪري خطي جي صورتحال جي حوالي سان خيالن جي ڏي وٺ پڻ ڪئي عادل بن احمد الجبير،وزيراعظم نواز شريف سان پي ايم هائوس ۾ ملاقات ڪري خطي جي بدلجندڙ صورتحال جي حوالي سان تفصيلي خيالن جي ڏي وٺ ڪئي، ان موقعي تي پرڏيهي صلاحڪار سرتاج عزيز،قومي سلامتي واري صلاحڪار ۽ پرڏيهي سيڪريٽري اعزاز چوڌري پڻ شرڪت ڪئي سعودي پرڏيهي وزير، وزيراعظم نواز شريف کي شاهه سلمان بن عبدالعزيز جو اهم پيغام پڻ پهچايو ان کان اڳ سعودي پرڏيهي وزير،آرمي چيف جنرل راحيل شريف سان به جي ايچ ڪيو راولپنڊيءَ ۾ ملاقات ڪري علائقائي سلامتي جي صورتحال تي خيالن جي ڏي وٺ ڪئي آءِ ايس پي آر موجب سعودي عرب جي پرڏيهي وزير عادل بن احمد الجبير ۽ پاڪ فوج جي سربراهه جنرل راحيل شريف وچ ۾ ملاقات دوران علائقائي سلامتي واري صورتحال تي ڳالهه ٻولهه ڪئي وئي. آءِ ايس پي آر موجب سعودي عرب جي پرڏيهي وزير دهشتگردي خلاف جنگ ۾ پاڪ فوج جي ڪوششن جي ساراهه پڻ ڪئي عادل بن احمد الجبير وزيراعظم ۽ آرمي چيف سان ملاقات کانپوءِ پرڏيهي معاملن واري صلاحڪار سرتاج عزيز سان پڻ نويڪلائيءَ ۾ ملاقات ڪري تفصيلي خيالن جي ڏي وٺ ڪئي ڌار ڌار ملاقاتن بعد پاڪستان ۽ سعودي عرب وچ ۾ وفدن جي سطح تي پڻ ملاقات ٿي سرتاج عزيز جي سربراهي ۾ پاڪستاني وفد ۾ پرڏيهي سيڪريٽري اعزاز چوڌري ۽ ٻين ملاقات ۾ شرڪت ڪئي،جڏهن ته سعودي عرب جي وفد ۾ پرڏيهي وزير عادل الجبير،سعودي سفير ۽ ٻيا شامل هئا ٻئي طرف سياسي مبصر خطي جي بدلجندڙ صورتحال ۾ سعودي پرڏيهي وزير جي پاڪستاني دوري کي اهم قرار ڏئي رهيا آهن.

 

سنڌ حڪومت پاران ٿر جي اسپتالن جي بجيٽ ٻيڻي ڪرڻ جو اعلان

ڪراچي (اسٽاف رپورٽر) سيد قائم علي شاه ٿر جي اسپتالن جي بجيٽ ٻيڻي ڪرڻ جو اعلان ڪري ڇڏيو. اسپتالن جي بجيٽ هڪ ڪروڙ 46 لک رپين مان وڌائي 2 ڪروڙ 92 لک رپيا ڪرڻ جو فيصلو ڪيو ويو آهي. وڏي وزير سيد قائم علي شاهه جي صدارت هيٺ وزير اعليٰ هائوس ۾ ٿر جي صورتحال بابت اجلاس ٿيل اجلاس ۾ ٿر جي صورتحال تي غور ويچار ڪيو ويو. ان موقعي تي وڏي وزير پاران ٿر جي اسپتالن جي بجيٽ هڪ ڪروڙ 46 لکن مان وڌائي 2 ڪروڙ 92 لک رپيا ڪئي وئي. اجلاس ۾ ٿر جي 6 تعلقي اسپتالن کي هڪ هڪ ايمبولنس ڏيڻ جو پڻ فيصلو ڪيو ويو. اجلاس ۾ ٿر جي علائقي اسلام ڪوٽ ۽ ڇاڇرو جي اسپتالن کي اپ گريڊ ڪري انهن کي سڀيئي سهولتون ڏيڻ جي پڻ منظور ڏني وئي . ٿر ۾ خراب پيل 100 آراو پلانٽس کي جنگي بنيادن تي ٺيڪ ڪري هلائڻ جوڳو بڻائڻ جو پڻ فيصلو ڪيو ويو. اجلاس ۾ اهو به فيصلو ڪيو ويو ته ٿر ۽ ڪوهستان ڊيولپمينٽ اٿارٽيز ۾ قانوني پيچيدگين جو جائزو وٺي فوري طور تي بورڊ تشڪيل ڏنو وڃي. ٻئي پاسي ڏڪاريل ڏيهه ٿر تي هڪڀيرو ٻيهر موت جا لامارا جاري آهن، مٺي اسپتال معصوم ٻارڙن لاءِ مقتل گاهه بڻجي وئي، وڌيڪ هڪ ٻارڙو زندگي جي جنگ هارائي ويو، 7 ڏينهن ۾ 17 مائرن جون هنجون اُجڙي ويون آهن. ٿرپارڪر ضلعي ۾ معصوم ٻارڙن جي فوت ٿيڻ جو سلسلو جاري آهي، سول اسپتال ۾ سَوائي ميگھواڙ جو 3 ڏينهن جو نينگر فوت ٿي ويو آهي. 7 ڏينهن ۾ مختلف بيمارين سبب فوت ٿيل ٻارڙن جو تعداد 17 ٿي ويو آهي، جڏهن ته ڪيترائي ٻارڙا بيمارين جو شڪار آهن. هن وقت تائين جيڪي ٻارڙا فوت ٿيا آهن، اهي گيسٽرو، نمونيا ۽ غذائي کوٽ جو شڪار هئا. سول اسپتال مٺي سميت تعلقه ڏيپلو، اسلام ڪوٽ، ننگرپارڪر، ڇاڇرو ۽ ٻين اسپتالن ۾ گذريل 5 مهينن کان دوائن جي شديد کوٽ آهي، اسپتالن ۾ دوائون موجود نه هئڻ ڪري مسڪين ماروئڙا پرائيويٽ اسٽورن تان خريد ڪري رهيا آهن. ٿرپارڪر ضلعي جي اسپتالن ۾ 70 کان وڌيڪ ٻارڙا اعلاج هيٺ آهن، انتظاميا لاپرواهي سبب ٻارڙا فوت ٿيڻ جو سلسلو رُڪجي ناهي سگهيو. حڪومتي دعوائن جا پول پڌرا ٿي ويا آهن، خوراڪ جي کوٽ ۽ مختلف بيمارين مسڪين ماروئڙن کي بي حال ڪري ڇڏيو.

 

وزيراعظم پٺاڻ ڪوٽ واقعي جي حوالي سان ڀارتي ثبوتن تي جاچ جو حڪم ڏئي ڇڏيو

اسلام آباد (بيورو) پاڪستان سعودي عرب ايران ڇڪتاڻ گهٽ ڪرڻ لاءِ ڪردار نڀائڻ ۽ مسلمان ملڪن سان ربطن جو فيصلو ڪيو آهي،وزيراعظم نوازشريف پٺاڻ ڪوٽ واقعي جي حوالي سان ڀارت پاران ڏنل ثبوتن تي جاچ جو حڪم ڏئي ڇڏيو آهي.وزيراعظم نوازشريف جي صدارت هيٺ اهم اجلاس ۾ علائقائي قومي سلامتي جي معاملن تي خيالن جي ڏي وٺ ڪئي وئي.اجلاس ۾ وفاقي ناڻي وارو وزير اسحاق ڊار ،گهرو وزير چوڌري نثار، قومي سلامتي وارو وزير ناصر جنجوعا،خاص معاملن وارو صلاحڪار سرتاج عزيز،خاص صلاحڪار طارق فاطمي ۽ پرڏيهي سيڪريٽري اعزا چوڌري ۽ ڊي جي آئي بي آفتاب سلطان شامل ٿيا.اجلاس ۾ سعودي عرب اتحاد ۾ شامل ٿيڻ واري معاملي تي صلاح مشورا ڪيا ويا ته پاڪستان ٻنهي ملڪن جي وچ ۾ ڇڪتاڻ گهٽ ڪرڻ لاءِ هاڪاري ڪردار نڀائيندو. ۽ معاملا حل ڪرائڻ لاءِ مسلمان ملڪن سان به رابطا ڪيا ويندا.

 

پاڪ فوج جي پروموشن بورڊ 27 برگيڊئيرز کي ميجر جنرل جي عهدي تي ترقي ڏئي ڇڏي

راولپنڊي (م.ڊ) آرمي چيف جنرل راحيل شريف جي صدارت هيٺ پروموشن بورڊ جي اجلاس ۾ پاڪ فوج جي آرمي ميڊيڪل ڪور جي 8 بريگيڊئيرز سوڌو 27 بريگيڊئيرز کي ميجر جنرل جي عهدي تي ترقي ڏني وئي. آئي ايس پي آر مطابق محمد عارف،محمد ظفر اقبال،آصف غفور،محمد علي،سعيد اختر،نديم احمد،اظهر راشد،طارق حسينمخاور رحمان،سليم احمد،وسيم احمد،علي عامر اعواڻ،خالد جاويد،عماد رضا،خاور رحمان،سهيل عزيز،اسلم خان،خالد ضياءَ،محمد رضا جليل،اختر نواز،سردار حسن اظهر حيات،ثاقب محمود،امتياز خان،عامر نديم کي بريگيڊئير جي عهدي مان ميجر جنرل جي عهدي تي ترقي ڏني وئي آهي.

 

ٻن سالن ۾ 2533 دهشتگرد گرفتار ڪيا ويا: چوڌري نثار

اسلام آباد (بيورو) قومي اسيمبلي ۾ نيشنل ايڪشن پلان هيٺ دهشتگردن ۽ مدرسن جي خلاف ڪيل ڪاررواين جي رپورٽ ايوان ۾ پيش ڪئي وئي.وفاقي گهرو وزير چوڌري نثار علي جو چوڻ آهي ته ٻن سالن ڪل 2533 دهشتگرد گرفتار ڪيا ويا.تفصيل مطابق گهرو وزير چوڌري نثار علي ايوان کي ٻڌايو ته ٻن سالن ۾ ڪل 2533 دهشتگرد گرفتار ڪيا ويا آهن،جن مان 726 کي آزاد ڪيو ويو. نيشنل ايڪشن پلان هيٺ پنجاب مان 55،سنڌ مان 897،ڪي پي ڪي مان 1068،،بلوچستان مان 193،اسلام آباد مان 42، فاٽا مان 206 ۽ گلگت بلتستان مان 72 دهشتگرد گرفتار ڪيا ويا.پنجاب مان 7 ،ڪي پي ڪي مان 635،بلوچستان مان 43 ۽ گلگت بلتستان مان 41 گرفتار دهشتگردن کي آزاد ڪيو ويو وزير مملڪت بليغ الرحمان ايوان کي ٻڌايو ته قومي ايڪشن پلان هيٺ ڪجهه ماڻهن صوبن ۾ قانون جوڙڻ جي ضرورت آهي. ايڪشن پلان تي عمل سان دهشتگردن جي خلاف اثرائتي ڪارروائي ٿي آهي. ايڪشن پلان تي عمل سڀني اسٽيڪ هولڊرز سان رابطن کانپوءِ ٿي رهيو آهي.پابندي مڙهيل تنظيمن جي ميمبرن جي فهرست تياري جي مرحلي ۾ آهي.فهرست ۾ شامل ماڻهن جا نالا نادرا،ايف آئي اي،پاسپورٽ اينڊ ايميگريشن،بينڪن ۽ ٻين ادارن سان جوڙيو ويندو.پابندي مڙهيل تنظيمن جي ماڻهن جي چرپر،پئسن جي مٽاسٽا تي نظر رکي سگهبي.فهرستن جي تياري کانپوءِ پابندي مڙهيل تنطيمن جي ماڻهن جي حساس ادارن ۾ داخلا ڏکي ٿي ويندي.گهرو وزارت پاران لکت واري جواب ۾ چيو ويو آهي ته نيشنل ايڪشن پلان هيٺ ملڪ ۾ 182 شڪي مدرسا بند ڪيا ويا.سنڌ ۾ غير رجسٽرڊ 72 مدرسن کي بند ڪيو ويو،جڏهن ته پنجاب ۾ 2،خيبرپختونخوا ۾ 13 شڪي مدرسن کي نيشنل ايڪشن پلان هيٺ بند ڪيو ويو. لکت واري جواب ۾ اهو به چيو ويو ته ملڪ ۾ 190 مدرسا پرڏيهه کان فنڊنگ وٺي رهيا آهن، اسلام آباد ۽ پنجاب جا 147،سنڌ جا 6، خيبرپختونخوا جا 7 ۽ بلوچستان جا 30 مدرسا پرڏيهي فنڊنگ وٺي رهيا آهن.اسلام آباد ۽ پنجاب جا 100 سيڪڙو مدرسن جي چڪاس جو ڪم پورو ڪيو ويو آهي.سنڌ جا 80 سيڪڙو،خيبرپختونخوا جا 75 ۽ بلوچستان جا 60 سيڪڙو مدرسن جي چڪاس ڪئي وئي.

 

بلاول ڀٽو زرداري آل پارٽيز ڪانفرنس ۾ شرڪت لاءِ سينيٽر فرحت الله بابر جي سربراهي ۾ 4 رڪني وفد جوڙي ورتو

اسلام آباد (بيورو) بلاول ڀٽو زرداري آل پارٽيز ڪانفرنس ۾ شرڪت لاءِ سينيٽر فرحت الله بابر جي سربراهي ۾ 4 رڪني وفد جوڙي ورتو. آل پارٽي ڪانفرنس بلوچستان نيشنل پارٽي مينگل گروپ پاران 10 جنوري تي اسلام آباد ۾ ڪوٺائي پئي وڃي. بلاول ڀٽو زرداري پاران جوڙيل وفد ۾ سنڌ مان سينيٽر تاج حيدر، مراد علي شاهه ۽ بلوچستان مان پيپلز پارٽي جو سينيٽر يوسف بلوچ شامل آهن. بي اين پي اڳواڻ عبدالرئوف مينگل بلاول ڀٽو زرداري کي ڪجهه ڏينهن اڳ ڪانفرنس ۾ شرڪت جي دعوت ڏني هئي.

 

سنڌ جي تعليم کاتي،نئين سال جي تعليمي پاليسيءَ جو اعلان ڪري ڇڏيو

ڪراچي (اسٽاف رپورٽر) سنڌ جي تعليم کاتي،نئين سال جي تعليمي پاليسيءَ جو اعلان ڪري ڇڏيو. نثار احمد کهڙي جو چوڻ آهي ته ننڍا امتحاني مرڪز ختم ڪري هر يونين ڪاميٽي ۾ هڪ هزار ٻارن تي ٻڌل امتحاني مرڪز قائم ڪيا ويندا،ڪاليجن ۾ داخلا لاءِ انٽري ٽيسٽ وٺڻ ۽ حاضري يقيني بڻائڻ لاءِ استادن توڙي شاگردن لاءِ به بايو ميٽرڪ سسٽم لڳايو ويندو. سنڌ جي تعليم کاتي جي سالياني اسٽيئرنگ ڪميٽيءَ جي گڏجاڻي تعليم واري وزير نثار کهڙي جي صدارت هيٺ ڪراچي ۾ ٿي،جنهن ۾ تعليم واري سيڪريٽري فضل الله پيچوهي،ڊائريڪٽرز ۽ خانگي اسڪولن جي نمائندن به شرڪت ڪئي اجلاس ۾ نئون تعليمي سال اپريل،جڏهن ته ڪيمبرج ۽ او ليول جو تعليمي سال پهرين آگسٽ کان شروع ڪرڻ جو فيصلو ڪيو ويو گڏجاڻيءَ کانپوءِ ميڊيا کي بريفنگ ڏيندي تعليم واري وزير نثار کهڙي ٻڌايو ته سالياني امتحان جا ننڍا مرڪز ختم ڪري هر يونين ڪميٽيءَ ۾ هڪ هزار شاگردن تي ٻڌل هڪ سينٽر قائم ڪيو ويندو. نثار کهڙي چيو ته يارهين ڪلاس جي داخلا آن لائين ذريعي ڪئي ويندي،ڪاليجن ۾ داخلا لاءِ انٽري ٽيسٽ به لازمي طور ورتي ويندي،استادن توڙي شاگردن جي حاضري يقيني بڻائڻ لاءِ بايو ميٽرڪ سسٽم به لڳايو ويندو. تعليم واري وزير ڪاپي ڪلچر جي خاتمي لاءِ ڀرپور ڪوششون جاري رکڻ جو عزم ظاهر ڪندي چيو ته خانگي اسڪول،کاتي جي منظوري کانسواءِ فين ۾ واڌ نه ڪري سگهندا،ڪيمبرج ۽ هائير سيڪنڊري اسڪولن کي سنڌي سبجيڪٽ پڙهائڻ لاءِ واڌو استاد ڏيڻ تي به غور ڪيو پيو وڃي. تعليم واري سينيئر صوبائي وزير واضح ڪيو ته اونهاري ۽ سياري جون موڪلون برقرار رهنديون،سمورن اسڪولن ۾ اسيمبلي ڪرائڻ،نعت ۽ قومي ترانو پڙهائڻ کي به لازمي قرار ڏنو ويوآهي، اسڪولن جي انتظاميا راندين جو هفتو ملهائڻ جي به پابند هوندي.

 

عمران فاروق قتل ڪيس جي ٻن ڏوهارين عدالت ۾ ڏوهه قبولي ورتو

اسلام آباد (بيورو) عمران فاروق قتل ڪيس ۾ گرفتار 2 ڏوهارين عدالت اڳيان پنهنجو ڏوهه قبولي ورتو. عمران فاروق قتل ڪيس ۾ گرفتار 3 مان 2 ڏوهارين محسن علي ۽ خالد شميم کي ايف آئي اي سخت سيڪيورٽي ۾ ايڊيشنل ڊپٽي ڪمشنر اسلام آباد عبدالستار عيساڻي جي اڳيان آندو ويو،جتي ٻنهي ڏوهارين قلم 164 جي هيٺ پنهنجو ڏوهه قبولڻ وارو بيان رڪارڊ ڪرائي ڇڏيو.ذريعن مطابق ڪيس جي ٽئين مک ڏوهاري مغظم علي ڏوهه قبولڻ کان انڪار ڪري ڇڏيو،سندس چوڻ آهي ته هو ڪنهن به ان طرح جي ڪيس ۾ ملوث ناهي،ان ڪري هو ڏوهه ڇو قبولي.

 

ڀارت پاڪستان سان ڳالهيون پٺاڻ ڪوٽ حملي ۾ ملوث ماڻهن جي خلاف ڪارروائي واري شرط سان جوڙي ڇڏيون

نئين دهلي (م.ڊ) ڀارت هلندڙ مهيني پاڪستان سان پرڏيهي سيڪريٽرين وارين ڳالهين کي پٺاڻ ڪوٽ ائيربيس حملي ۾ ملوث ماڻهن جي خلاف ڪارروائي وارين شرطن  سان ڳنڍيندي  چيو ته بال هاڻي پاڪستان جي ڪورٽ ۾ آهي.نئين دهلي ۾ پريس ڪانفرنس جي دوران ڀارتي پرڏيهي وزارت جي ترجمان چيو آهي ته اسان پاڪستان سوڌو سڀني پاڙيوارن ملڪن سان سٺا لاڳاپا چاهيون ٿا پر پٺاڻ ائيربيس تي حملي کانپوءِ سرحد پار حملن جو معاملو هڪ ڀيرو ٻيهر ڪر کڻي چڪو آهي،جنهن کي ڪنهن به حالت ۾ نه سهنداسين. ترجمان جو چوڻ  آهي ته پٺاڻ ڪوٽ ائيربيس ۽ افغانستان ۾ ڀارتي قونصل خاني تي حملي جا سرا هڪٻئي سان ملي رهيا آهن. ان معاملي جي تهه تائين پهچڻ اسان جي پهرين اهميت آهي ،ڇو ته ان سانحي جي ڪري پاڪ ڀارت ڳالهيون دير جو شڪار ٿي سگهن ٿيون.

 

سانگهڙ ۽ بدين ضلعن ۾ ملتوي ڪيل مڪاني چونڊون 23 جنوري تي ڪرائڻ جو اعلان، نوٽيڪيشن جاري

اسلام آباد(اي پي پي) اليڪشن ڪميشن آف پاڪستان سانگهڙ ۽ بدين ضلعن ۾ مڪاني چونڊون امن امان جي صورتحال بهتر ٿيڻ کان پوءِ 23 جنوري تي منعقد ڪرائڻ جو فيصلو ڪيو آهي. خميس ڏينهن جاري ڪيل هڪ نوٽيفيڪيشن مطابق اليڪشن ڪميشن کي سنڌ حڪومت طرفان هڪ خط وصول ٿيو آهي جنهن ۾ آگاهه ڪيو ويو آهي ته ٻنهي ضلعن ۾ امن امان جي صورتحال بهتر ٿي وئي آهي. واضح رهي ته اليڪشن ڪميشن امن امان جي خراب صورتحال سبب 23 ڊسمبر تي سانگهڙ ۽ بدين جي ڪجهه يونين ڪائونسلن تي مڪاني چونڊون ملتوي ڪري 30 ڊسمبر تي ڪرائڻ جو فيصلو ڪيو هو