تازيون خبرون

Daily Archives: December 8, 2015

سنڌ حڪومت رينجرز جي اختيارن جي مدي ۾ 4 مهينن جي واڌ جو فيصلو ڪري ڇڏيو

ڪراچي (اسٽاف رپورٽر) سنڌ حڪومت پاران رينجرز جي اختيارن ۾ 4 مهينن جي واڌ جو فيصلو ڪري ورتو آهي، هڪ نجي ٽي وي دعويٰ ڪئي آهي ته رينجرز جي اختيارن ۾ 7 ڊسمبر کان اپريل 2016 تائين 4 مهينن جي واڌ ٿيندي  جنهن کانپوءِ پارليامينٽ جي اجلاس ۾ وڌيڪ واڌ جي اجازت ورتي ويندي، وزيراعظم جي صدات ۾ امن و امان جي اعليٰ سطحي اجلاس ختم ٿيڻ کانپوءِ وزيراعليٰ سنڌ سيد قائم علي شاهه شام تائين اختيارن ۾ واڌ جو نوٽيفڪيشن جار ڪري ڇڏيندو.

 

عمران فاروق قتل ڪيس ۾ گرفتار جوابدار 7 ڏينهن جي جسماني رمانڊ تي ايف آءِ اي حوالي

اسلام آباد (اين اين آءِ) دهشتگردي روڪٿام جي عدالت عمران فاروق قتل ڪيس جي ٽن گرفتار جوابدارن کي ستن ڏينهن جي جسماني ريمانڊ تي ايف آءِ اي حوالي ڪري ڇڏيو ايف آءِ اي عمران فاروق قتل ڪيس جا 3 گرفتار جوابدار خالد محمود سيد محسن ۽ معظم علي خان کي اسلام آباد ۾ دهشتگردي روڪٿام عدالت جي جج ڪوثر عباس زيدي جي آڏو پيش ڪيو ايف آءِ اي جي وڪيل پاران اپيل ڪئي ويئي ته جوابدارن کان جاچ لاءِ کين 10 ڏينهن جي ريمانڊ تي ايف آءِ اي جي حوالي ڪيو وڃي عدالت ۾ جوابار معظم علي جي وڪيل جوهر عابد موقف اختيار ڪيو ته کيس اڃا تائين پنهنجي مؤڪل جي خلاف ايف آءِ آر جي ڪاپي ناهي ڏني ويئي هن عدالت کي درخواست ڪئي ته معظم علي جي ان جي گهرڀاتين سان ملاقات جي اجازت ڏني وڃي جنهن تي ايف آءِ اي جي وڪيل چيو ته اسان کي ملاقات تي اعتراض نه آهي هي انهن جو قانوني حق آهي معظم علي جي وڪيل ان جي گهرڀاتين کي ايف آءِ اي هيڊڪوارٽر وٺي اچن جتان انهن سان ملاقات ڪرائي ويندي عدالت ٽنهي جوابدارن کي ستن ڏينهن لاءِ ايف آءِ اي جي تحويل ۾ ڏيندي ايندڙ ٻڌڻي ۾ کيس ٻيهر پيش ڪرڻ جو حڪم ڏيئي ڇڏيو.

 

هڪ ٻئي سان ڪاوڙ وڏو نقصان پهچايو آهي، سڀ اڳواڻ اختلاف وساري عام چونڊن جي تياري ڪن: عمران خان

اسلام آباد (بيورو) پاڪستان تحريڪ انصاف جي چيئرمين عمران خان چيو آهي ته قوم اسٽيٽس ڪو جي ڀيٽ ۾ تحريڪ انصاف کي متبادل طور ڏسي ٿي، پارٽي اندر چونڊن ذريعي ميرٽ تي قيادت اڳتي آندي ويندي، اسلام آباد ۾ پي ٽي آئي جي مرڪزي ايگزيڪيوٽو ڪميٽي جي اجلاس کي خطاب ڪندي عمران خان چيو ته مڪاني چونڊن ۾ صوبائي حڪومتن جي مداخلت هوندي آهي، جڏهن ته تبديلي لاءِ عوام جون اميدون پي ٽي آئي ۾ آهن، هن چيو ته خيبر کان ڪراچي تائين سڄي قوم جون نظرون تحريڪ انصاف تي آهن، سندس چوڻ هو ته اسان بهتري لاءِ پارٽي چونڊون ڪرائينداسين ۽ نئين قسم جو نظام آڻينداسين، اسان يونين ڪائونسل، تعلقي ۽ ضلعي سطح تي منظم طريقي سان ڪم ڪنداسين، عمران خان جو چوڻ هو ته پاڻ ۾ ڪاوڙ وڏو نقصان پهچايو آهي، سڀ اڳواڻ پاڻ ۾ اختلاف وساري عام چونڊن جي تياري ڪن.

 

مقابلي ۾ ماري ڇڏيو پر ظلم نه ڪيو“ ڊاڪٽر عاصم حسين سڀ الزام رد ڪري ڇڏيا

ڪراچي (اسٽاف رپورٽر) پيپلز پارٽي جي اڳواڻ ۽ اڳوڻي صدر آصف زرداري جي ويجهي ساٿي ڊاڪٽر عاصم حسين پنهنجي مٿان لڳل سڀ الزام رد ڪري ڇڏيا آهن، ڊاڪٽر عاصم حسين کي سيڪيورٽي جي سخت پهري هيٺ ڪراچي ۾ دهشتگردي جي انت واري خاص عدالت ۾ پيش ڪيو ويو، ان موقعي تي بيان قلمبند ڪرائيندي ڊاڪٽر عاصم حسين چيو ته هن ڪنهن به دهشتگرد جو علاج ناهي ڪيو، جهيڙو ڪنهن ٻئي جو آهي ۽ ڦاسايو مونکي پيو وڃي، سندس چوڻ هو ته هو دل جو مريض آهي،کيس مارڻ جون ڌمڪيون ڏينون پيون وڃن ۽ ڊيڄارييو پيو وڃي، جيڪڏهن مان مري ويس ته ان جو ذميوار هي نظام هوندو، سندس چوڻ هو ته مون تي مڙهيل ڪيس ڪوڙو آهي، مونکي مارڻو ئي آهي ته گولي هڻي ماري ڇڏيو ته معاملو ختم ٿي ويندو، ڊاڪٽر عاصم چيو ته منهنجي حياتي کي خطرو آهي، مون تي جاچ آفيسر تشدد ناهي ڪيو پر مونکي مقابلي ۾ ماريو ويندو، هن چيو ته مان بيڏوهي آهيان ۽ منهنجو محافظ الله پاڪ آهي، دل جو مريض آهيان، مونکي ڪڏهن ڊيڄاريو وڃي ٿو ته ڪڏهن لالي پاپ ڏني وڃي ٿي، ڊاڪٽر عاصم حسين چيو ته هي ماڻهو مونکي ڪچو کائي ويندا، مونکي ڀلي مقابلي ۾ ماريو وڃي پر ظلم نه ڪيو وڃي، ان موقعي تي ڊاڪٽر عاصم جي نياڻي به قسم تي بيان جمع ڪرايو، جنهن ۾ سندس چوڻ هو ته سندس پيءُ جي حياتي کي خطرو آهي، ڊاڪٽر عاصم جو بيان ٻڌڻ کانپوءِ عدالت لاڳاپيل ادارن کي هدايت ڪئي ته کانئس قانون مطابق جاچ ڪئي وڃي، ان کانپوءِ عدالت ڊاڪٽر عاصم حسين کي 5 ڏينهن جي رمانڊ تي پوليس حوالي ڪري ڇڏيو.

 

مڪاني چونڊن ۾ هارائڻ تان عارف علوي ۽ علي زيدي عهدن تان استعيفا ڏئي ڇڏي

ڪراچي (اسٽاف رپورٽر) ڪراچي ۾ مڪاني چونڊن ۾ تحريڪ انصاف جي ناڪامي تي علي زيدي ۽ ڊاڪٽر عارف علوي پنهنجي عهدي تان استعيفائون ڏئي ڇڏيون آهن، ٻنهي اڳواڻن پنهنجي استعيفائون پارٽِي چيئرمين عمران وٽ جمع ڪرائي ڇڏيون آهن، تحريڪ انصاف جي اڳواڻ علي زيدي ۽ ڊاڪٽر عارف علوي پنهنجي ناڪامي تي اسلام آباد ۾ ٿيندڙ تحريڪ انصاف جي سينٽرل ڪاميٽي جي اجلاس ۾ استعيفائون جمع ڪرائي ڇڏيون آهن، علي زيدي جو چوڻ آهي ته ڪراچي ۾ مڪاني چونڊن ۾ ناڪامي تي عمران خان کي استعيفائون ڏئي ڇڏيون آهن هاڻي هو قبول ڪري يا نه ڪري ان جو اختيار آهي، اسان پنهنجي ناڪامي قبول ڪريون ٿا، ٻي طرف ذريعن جو چوڻ آهي ته ٻنهي اڳواڻن جون استعيفائون پهچي ويون آهن، انهن کي منظور ڪرڻ يا رد ڪرڻ جو اختيار چيئرمين عمران خان کي آهي.

 

جيڪولين فرينڊس نئين فلم ۾ ٽائيگر شيرف سان ڪم ڪندي

ممبئي(شوبز نيوز) بالي ووڊ اداڪاره جيڪولين فرينڊس نئين فلم ۾ ٽائيگر شيرف سان ڪم ڪندي. جيڪولين فرينڊس پنهنجي بيان ۾ ٻڌايو ته کيس نئين فلم (فلائينگ جيٽ) ۾ ڪاسٽ ڪيو ويو آهي جنهن ۾ هوءَ ٽائيگر شيرف سان گڏ ڪم ڪندي. فلم جو ڊائريڪٽر ريمو ڊيسوزا آهي. جيڪولين فرينڊس مطابق فلم جي ڪحاڻي تمام گهڻي دلچسپ آهي ۽ ان جو اسڪرپٽ به مختلف آهي.

 

اميتاڀ بچن جهڙو بڻجڻ جي خواهش آهي: اداڪار فرحان

ممبئي(شوبز نيوز) بالي ووڊ اداڪار فرحان اختر اميتاڀ بچن جهڙو بڻجڻ جي خواهش ظاهر ڪئي آهي. هن چيو ته هو اميتاڀ سان فلم (وزير ) ۾ ڪم ڪري رهيو آهي ۽ ان فلم ۾ هن سان ڪم ڪندي کيس تمام گهڻي حيرت ٿي تٿ اميتاڀ هن ڄامر ۾ به اهڙي ته توانائي سان ڪم ڪري رهيو آهي جو کيس خواهش ٿي آهي ته هو به سندس جهڙو اداڪار بڻجي وڃي.هن چيو ته کيس خواهش آهي ته 45 سالن بعد اميتاڀ بچن جيان ساڳو توانو ۽ فلم انڊسٽري ۾ به اهڙو مقام حاصل ڪيان.

 

ڀارت دهلي ٽيسٽ ۾ ڏکڻ آفريقا کي 337 رنسن تان هارائي سيريز 0-3 تان کٽي ورتي

نئين دهلي(اسپورٽس نيوز) ڀارت ڏکڻ آفريقا کي چوٿين ۽ آخري ٽيسٽ ميچ ۾ 337 رنسن جي واضه مارجن تان شڪست ڏئي سيريز 0-3 تان کٽي ورتي. ان ڪاميابيءَ سان ڀارتي ٽيم عالمي رينڪنگ ۾ آسٽريليا کان ٻين پوزيشن کسيورتي. ڏکڻ آفريقن ٽيم 481 رنسن ج وهدف حاصل نه ڪري سگهي ۽ سڄي ٽيم 143 رنسن تي ڍير ٿي وئي. اي بي ڊي وليئرز 43 رنسن سان ٽاپ اسڪورر رهيو. روي چندرن ايشون 5 رانديگرن کي ائوٽ ڪيو. اجنڪيارا کي ٻنهي اننگز ۾ سينچريون ٺاهڻ تي مين آف دي ميچ جو ايوارڊ ڏنو ويو جڏهن ته ايشون سيريز جو بهترين رانديگر قرار ڏنوويو. گذريل ڏينهن تي فيروز شاهه ڪوٽله دهلي ٽيسٽ ۽ پنجين ۽ آخري ڏينهن آفريقا پنهنجي ٻي نامڪمل اننگز 72 رنسن 2 رانديگر آئوٽ تي ٻيهر شروع ڪئي ته هاشم آمله 23 ۽ اي بي ڊي وليئرز 11 رنسن سان وڪيٽ تي موجود هئا. آمله گذريل ڏينهن اسڪور ۾ رڳو 2 وڪيٽون وقفي وقفي سان ڪيرايون. بعد ۾ وقفي وقفي سان رانديگر آئوٽ ٿيندا رهيا ۽ ڏکڻ آفريقا جي پوري ٽيم 143 رنسن تي ڍير ٿي وئي ۽ ان کي 337 رنسن جي وڏي مارجن تان شڪست جو مُنهن ڏسڻو پئجي ويو. ڀارت طرفان روي چندر ايشون سڀ کان ڪامياب بالر رهيو. هن 61 رنسن عيوض 5 وڪيٽون حاصل ڪيون. اميش ياديو 3 ۽ روندرا جديجا 2 رانديگرن کي آئوٽ ڪيو.

 

مڪاني چونڊن ۾ ڪير ڪنهن جو مِٽُ: وسعت الله خان

پاڪستان جي چئني صوبن ۾ سڄي سال تي ڦهليل مڪاني چونڊن جو عمل مڪمل ٿيو. گذريل سال بلوچستان آڳ کنئي، وري خيبرپختونخواهه ۾ مڪاني چونڊون ٿيون ۽ گذريل هڪ اڌ مهيني دوران پنجاب ۽ سنڌ ۾ ٽن مرحلن ۾ هيءُ عمل پورو ٿيو آهي. ان کان هٽي ڪري ته هنن چونڊن ۾ ڪنهن کٽيو، ڪنهن هارايو، ڪي لاڙا واضح طور سامهون آيا.

مثال طور چوڻ لاءِ ته عورت ووٽرن جو تعداد گهٽ وڌ اڌ تي اڌ آهي پر جيڪڏهن مڪاني چونڊن جي آخري مرحلي کي ڪسوٽي سمجهي وٺجي ته چونڊ عمل ۾ اڄ به عورتن جي شرڪت ووٽ ڏيڻ کان اڳتي ناهي وڌي. جيڪڏهن مڪاني ايوانن ۾ عورتن لاءِ مخصوص سيٽن جي ڪوٽا نه هجي ته شايد حالتون اڃا به ابتر نظر اچن.

مثال طور سڀ کان وڏي صوبي پنجاب جي آخري چونڊ مرحلي ۾ 12 ضلعن جي جنرل سيٽن تي 31 هزار 848 اميدوار بيٺا، جن ۾ عورت اميدوارن جو تعداد 90 هو. رحيم يار خان ضلعي ۾ ته هڪ به عورت اميدوار جنرل سيٽ تي چونڊ نه وڙهي.

پاڪستان جي سڀ کان وڏي ڳتيل ۽ آباديءَ واري شهر ڪراچي عرف مني پاڪستان ۾ به حالتون اهڙيون ئي رهيون. هتي جي ڇهن ضلعن ۾ ڪل اميدوار 5 هزار 484 هئا، جن ۾ عورت اميدوارن جو تعداد 133 هو. اها الڳ ڳالهه آهي ته ڪراچيءَ ۾ درزن کن ذڪر جوڳيون سياسي جماعتون ۽ اتحاد هڪ ٻئي جي مدمقابل هئا ۽ انهن ۾ ڪابه جماعت اهڙي ناهي جنهن عورتن جي برابري ۽ انهن جي حق جو عَلَم بلند ڪري نه رکيو هجي.

ڪراچيءَ ۾ ٽين جنس سان تعلق رکندڙ تقريبن چار هزار ووٽر رهن ٿا. جيتوڻيڪ 2011ع ۾ سپريم ڪورٽ ٽين برادريءَ سان متڀيدي سلوڪ کي ڪالعدم قرار ڏنو هو، پر چونڊ لاءِ اميدوارن جي فارم ۾ ٽين جنس جو خانو ئي نه هو. نه ئي ڪو اهو ٻڌائڻ وارو هو ته انهن جو ووٽ مردن جي پولنگ اسٽيشن تي آهي يا عورتن جي.

ٽين جنس جي حقن لاءِ آواز اٿاريندڙ هڪ سرڪردا شخصيت بنديا رانا جو چوڻ آهي ته هن وقت تائين نادرا ڪراچيءَ ۾ رهندڙ چار هزار کدڙن فقيرن مان لڳ ڀڳ اڌ کي سڃاڻپ ڪارڊ جاري ڪيا آهن پر اسان جي ووٽرن لاءِ الڳ انتظام ناهن ڪيا ويا، تنهن ڪري اسان چونڊ عمل جو بائيڪاٽ ڪري رهيا آهيون.

بنديا 2013ع وارين عام چونڊن ۾ هڪ صوبائي تڪ تان چونڊ وڙهي پر هاڻي سندس مطالبو آهي ته جيستائين سندس برادريءَ کي عورتن، اقليتن، مزدورن، هارين ۽ نوجوانن وانگر مڪاني ادارن ۾ مخصوص سيٽون نه ٿيون ڏنيون وڃن ته اها چونڊ عمل کان الڳ ٿلڳ رهندي، ڇو جو ڪير به ناهي جيڪو خود سندن علاوه سندن حقن ۽ مسئلن کي سمجهي انهن لاءِ آواز اٿاري سگهي.

جيستائين غير مسلم پاڪستانين جي مڪاني چونڊ عمل ۾ شرڪت جو معاملو آهي ته ڪراچيءَ ۾ صورتحال ان حوالي سان همت افزا رهي آهي جو سئو جي لڳ ڀڳ غير مسلم اميدوارن عام سيٽن تي آزاد حيثيت ۽ پارٽي ٽڪيٽ تي قسمت آزمائي. انهن مان گهڻن جو تعلق هندو برادريءَ سان هو. پنجاب جي 12 ضلعن ۾ 51 غير مسلم اميدوار ٽين مرحلي ۾ رکيل مقابلي وارين سيٽن تي بيٺا. جيتوڻيڪ تمام گهٽ کي ڪاميابيءَ جي اميد هئي پر سماجي حالتن کي ڏسندي في الحال اها به غنيمت آهي. پر اوڪاڙه مان هڪ عيسائي بلدياتي ڪائونسلر هڪ اهڙي تڪ تان ڪامياب ٿيو آهي، جتي 93 سيڪڙو مسلمان هئا.

جيتوڻيڪ مڪاني ادارن ۾ غير ملسمن لاءِ پنج سيڪڙو مخصوص سيٽون آهن پر اقليتي برادريءَ وارا مطمئن ناهن، ڇو جو سندن بقول انهن سيٽن تي چونڊجندڙ اڪثر ڪائونسلر پاڻ کي نامزد ڪندڙ جماعتن جي احساسن هيٺ دٻيل رهن ٿا جو پنهنجي برادريءَ جي حقيقي مسئلن جي لاءِ آواز بلند ڪرڻ کان قاصر رهجي وڃن ٿا.

هڪ رجحان اهو به ڏسڻ ۾ آيو ته هڪ ٻئي سان مقابلو ڪندڙ امدوارن انفرادي طور سيٽ ايڊجسٽمينٽ جا ٺاهه به ڪيا ۽ انهن ٺاهن جي راهه ۾ سياسي ۽ نظرياتي رڪاوٽن کي به ليکي ۾ نه آندو.

مثال طور ڪراچي جي ضلعي ملير جي مظفر آباد يونين ڪائونسل ۾ راهه حق پارٽي عرف اهل سنت والجماعت عرف ڪالعدم سپاهه صحابه جي اميدوار مولانا محي الدين يونين ڪائونسل جي چيئرمين شپ لاءِ پيپلز پارٽيءَ جي حمايت يافته اميدوار مثال خان کي وائيس چيئرمين جو اميدوا بڻايو. ٻنهي اميدوارن جيڪي پوسٽر ڇپرايا تن ۾ اهل سنت والجماعت جي اڳواڻ ضيا الرحمان فاروقي ۽ ذوالفقار علي ڀٽو کي گڏ ڏيکاريو ويو. جڏهن پپيلزپارٽي ڪراچيءَ جو ڌيان ان طرف ڇڪايو ويو ته جواب هو ته اسان جي اميدوار اهل سنت نه پر راهه حق پارٽيءَ سان ايڊجسٽمينٽ ڪئي آهي.

ڪورنگي ضلعي جي يونين ڪائونسل 14 ۾ مسلم ليگ نواز جي عبدالرحمٰن تحريڪ انصاف جي ياسر بلوچ سان چيئرمين ۽ وائيس چيئرمين جي جوڙي ٺاهي شينهن جي گڏيل نشان تي چونڊ وڙهي.

ڪراچي ضلعي اوڀر جي يونين ڪائونسل 5 تي پيپلز پارٽي ۽ نواز ليگ جي گڏيل اميدوار فراز آفريديءَ چيئرمين ۽ غلام عليءَ نائب چيئرمين لاءِ شينهن جو گڏيلو نشان چونڊيو.

ضلعي اوڀر جي يونين ڪائونسل 15 ۾ جمعيت علماءِ اسلام ۽ عوامي نيشنل پارٽيءَ جي گڏيل اميدوارن بتيءَ جي نشان تي پنهنجي جوڙي ٺاهي.

ڪراچي ڊسٽرڪٽ ويسٽ جي يونين ڪائونسل 25 ۾ نصر احمد چيئرمين شپ لاءِ ۽ حبيب الرحمان نائب چيئرمين شپ لاءِ تحريڪ انصاف، جماعت اسلامي، پيپلز پارٽي، جمعت علماءِ اسلام ۽ اهل سنت والجماعت جي گڏيل حمايت سان چونڊ وڙهي.

ڊسٽرڪٽ ويسٽ ۾ بلديا ٽائون جي يونين ڪائونسل 34 ۾ جماعت اسلاميءَ جي اميدوار کي تارازيءَ جو نشان پوسٽر تي ڇاپڻ سان به تسلي نه ٿي ته هن پنجاب جي گورنر سلمان تاثير جي قاتل ممتاز قادري جي تصوير به عمران خان ۽ سراج الحق سان گڏ ڇاپي ڇڏي. ڪجهه اميدوارن محبت ۾ اچي جنرل راحيل شريف جي تصوير به ڇاپي ڇڏي پر جڏهن ان کي سمجهايو ويو ته فوج سياسي جماعت ناهي ته ان کي بي دليو ٿي نوان پوسٽر ڇپرائڻا پيا.

سو هي آهي جماعتي بنيادن تي پهريون ڀيرو ٿيندڙ مڪاني چونڊن جي جمهوريت جو حسن.

 

ٽانءِ ٽانءِ فش ٿي ويل سونامي!: واحد پارس هيسباڻي

خيرن سان مڪاني چونڊن جو ٽيون مرحلو به پورو ٿي ويو، جنهن جا نتيجا گهڻي حد تائين روايتي صورت ۾ ئي سامهون آيا آهن. خاص ڪري ڪراچي جي حوالي سان پاڻ وارن دانشورن جا پرمغز تبصرا ۽ تجزيا پاڻي تي ڦوٽي جيان ثابت ٿيا آهن، ڌانڌلين، ڏاڍ مڙسي جا سمورا رستا بند ڪرڻ جي باوجود اتي متحده ان ساڳي ئي اڪثريت سان ميدان ماري رهي آهي. اهي ڌريون جيڪي پنهنجي هار کي ڌانڌلين واري الزام ذريعي جسٽيفاءِ ڪرڻ جي ڪوشش ڪنديون هيون، هن ڀيري انهن وٽ اهو جواز به نه رهيو آهي ۽ کين کُلم کلا پنهنجي هار جو اعتراف ڪرڻو پوندو، جيڪو راولپنڊي ۾ شيدا ٽلي ته چونڊ نتيجن واري ڏينهن ئي ڪري ورتو آهي، باقي ڌريون ان معاملي ۾ ڪيترو فراخدليءَ سان سامهون اچن ٿيون، ڏسڻو اهو آهي.

مڪاني چونڊن جي ٻنهي مرحلن جيان هن ٽئين مرحلي ۾ به جيتوڻيڪ پيپلزپارٽي کي به توقع جي ابتڙ سيٽون مليون آهن، پنجاب ۾ ته جهڙوڪر سندس صفايو ٿي ويو آهي، ملتان جيڪو پنجاب ۾ سندس ائين ئي ڳڙهه سمجهيو ويندو هو، جيئن سنڌ ۾ لاڙڪاڻو سمجهيو وڃي ٿو، اتي به هن ڀيري کيس وڏي شڪست ملي آهي، پر هنن چونڊن ۾ جيڪا ڏاڍي ٿي آهي اها تحريڪ انصاف سان ٿي آهي ۽ سندس سموري سونامي ٽانءِ ٽانءِ فش ٿي وئي آهي. هي جنهن دعويٰ سان ميدان تي لٿي هئي ۽ ملڪ جي سڀ کان وڏي پارٽي هجڻ جي دعويٰ ڪري رهي هئي، مڪاني چونڊن جي نتيجن کيس پنهنجي ليول ۾ آڻي ڇڏيو آهي. هي جنهن عروج سان ميدان تي لٿي هئي، ان ئي زوال سان پوئتي وڃي رهي آهي. گذريل عام چونڊن ۾ کيس جن جن علائقن مان سيٽون مليون هيون، هنن چونڊن ۾ اهي علائقا به سندس هٿن مان هليا ويا آهن، پاڻ ڪراچي جو ئي مثال وٺون ٿا، عام چونڊن جي ڀيٽ ۾ هنن مڪاني چونڊن ۾ کيس تمام گهٽ ووٽ مليا اهن. گذريل عام چونڊن جي نتيجن کانپوءِ هن دانهون ڪيون هيون ته چونڊن ۾ وڏي پئماني تي ڌانڌليون ٿيون آهن، سندس اُميدوارن کي هٿ وٺي هارايو ويو آهي، جيڪڏهن ڌانڌليون نه ٿين ها ته هي ڪراچي جي نمبر ون سياسي قوت طور سامهون اچي ها، پاڻ هنن ئي صفحن ۾ ڪجهه ڏينهن اڳ اهو لکيو هيوسين ته هي مڪاني چونڊون سڀني سياسي ڌرين سميت تحريڪ انصاف لاءِ به ٽيسٽ ڪيس آهن ۽ ان جا نتيجا اهو ثابت ڪري ڇڏيندا ته ڪراچي ۾ ڪهڙي پارٽي جو پلڙو ڀاري آهي. تازن چونڊ نتيجن ۾ اهو ثابت ٿي چڪو. هن ڀيري تحريڪ انصاف سان مسئلو اهو به آهي ته هي ڌانڌلين جا الزام به هڻي نه ٿي سگهي، ڇو ته هي چونڊون فوج ۽ رينجرز جي نگراني ۾ سخت انتظامن سان ٿيون آهن ۽ تحريڪ انصاف پولنگ عمل تي پنهنجو اطمينان پڻ ظاهر ڪري چڪي آهي، سو جيڪي نتيجا سامهون آيا آهن، اهي نه چاهيندي به کيس قبول ڪرڻا پوندا نه ته سندس دانهون خود پنهنجو تماشو پاڻ ڪرڻ برابر هونديون. پاڻ ڪراچي جي چونڊ نتيجن تي ڳالهائي رهيا آهيون. گذريل عام چونڊن ۾ تحريڪ انصاف کي جيڪي گهڻا ووٽ مليا هئا، اهي ڊفينس وارن علائقن مان مليا هئا ۽ چيو پئي ويو ته اهي ووٽ انهن برگر فيمليز ڏنا آهن، جيڪي هڪ ته عمران خان جي ڪرڪيٽر واري سحر ۾ اڃا تائين ڦاٿل آهن ۽ ٻيو سندس نچڻ ڳائڻ وارن جلسن مان متاثر آهن، پر هنن مڪاني چونڊن ۾ انهن ساڳين علائقن مان به کيس اها ساڳي موٽ نه ملي آهي. لڳي ائين رهيو آهي ته يا ته انهن علائقن ۾ رهندڙ برگر فيمليز جي اُميدن تي تحريڪ انصاف پوري نه لهي سگهي آهي يا انهن جي دلچسپي تبديل ٿي وئي آهي. بهرحال تحريڪ انصاف لاءِ هي چونڊ نتيجا سوچڻ جو مقام آهن ته هر چمڪندڙ شيءِ سون ناهي هوندي. وڏن وڏن جلسن ۽ ماڻهن کي گڏ ڪرڻ جو مطلب اهو ناهي ته اهي سڀ جا سڀ ماڻهو ووٽ به ڏيندا! هونئن به تفريح جي اڻهوند واري هن ماحول ۾ ماڻهن کي جيڪڏهن ڪو نئون موقعو ملي ٿو ته هي وقتي طور تي ان مان انجواءِ ڪري وٺن ٿا. ممڪن آهن تحريڪ انصاف جي محفل موسيقي سان ڀرپور جلسن سان به ائين ئي هجي.

ڪراچي ۾ هلندڙ آپريشن ۽ متحده ڪارڪنن جي دهشتگردي جي ڪيترن ئي واقعن ۾ ملوث هجڻ جي اعتراف ڪرڻ کانپوءِ جيڪو سمجهيو ائين پئي ويو ته ان جو اثر متحده جي روايتي ووٽ بئنڪ تي پوندو ۽ ان جو فائدو سندس مخالف سياسي ڌرين کي حاصل ٿيندو. حقيقت ۾ ائين نه ٿيو. چونڊ نتيجن ۾ متحده پنهنجي ان ساڳي ئي پراڻي پوزيشن تي بيٺل آهي ۽ ڪراچي جو ميئر سندس ئي ٿيڻو آهي، ساڳئي نموني لياري آپريشن کانپوءِ جيڪي اهي امڪان ظاهر ڪيا پئي ويا ته اتي پيپلزپارٽي جي ووٽ بئنڪ کي ڌچڪو رسندو ۽ اهو اسپيس به تحريڪ انصاف والاريندي، اهو امڪان به پاڻي تي ليڪي جيان ثابت ٿيو آهي، لياري، ملير ۽ ٻيا اهي علائقا جتان پيپلزپارٽي جا اُميدوار ڪامياب ٿيندا رهيا آهن، اتي تقريبن پوزيشن ساڳي ئي آهي ۽ پ پ جا اُميدوار ئي ڪامياب ٿيا آهن.

هن ڀيري تحريڪ انصاف سان جماعت اسلامي به گڏ هئي ۽ ماضي ۾ ڪراچي اندر جماعت اسلامي جو سٺو ووٽ بئنڪ رهيو آهي، جنهن جو هڪڙو وڏو مثال مشرف جي ناظمي نظام جي پهرين مرحلي دوران جڏهن متحده بائيڪاٽ ڪيو ته جماعت اسلامي کي ڪاميابي ملڻ مان لڳائي سگهجي ٿو، جنهن ۾ سندن اُميدوار نعمت الله خان ڪراچي جو سٽي ناظم بڻيو هو. ٻنهي ڌرين جي گڏ ٿيڻ کانپوءِ کين جيڪا ڪاميابي ملڻ گهرجي ها، اها کين نه ملي سگهي آهي، جنهن مان ثابت ٿئي ٿو ته هي جيترا ماڻهو پاڻ سان گڏ هجڻ جي دعويٰ ڪري رهيون آهن، اوترا ماڻهو هنن سان گڏ آهن ڪو نه. تحريڪ انصاف جي هن انداز ۾ پوئتي وڃڻ جا ڪيترائي سبب ٿي سگهن ٿا، جن ۾ هڪڙو وڏو سبب پارٽي جا اهي اندروني اختلاف به ٻڌايا پيا وڃن، جيڪي ڏينهون ڏينهن وڌي رهيا آهن. چيو پيو وڃي ته تحريڪ انصاف اندر ٽي کان چار ڌڙا ٺهي چڪا آهن، جيڪي پنهنجون سموريون توانايون هڪ ٻئي کي ڪٽ ڪرڻ ۾ استعمال ڪري رهيا آهن، اهي ماڻهو جيڪي هٿ ۾ هٿ ڏئي جلسن ۾ گڏ نظر ايندا هئا ۽ ڏاڍي پرجوش انداز ۾ پنهنجي حامين جي جذبن کي گرمائيندي نظر ايندا هئا، اهي هينئر هڪ ٻئي سان هٿ ملائڻ به پسند نه ٿا ڪن، رڳو ايترو ئي نه پر ڪيترن ئي هنڌن تي ائين به ٿيو آهي ته پارٽي جي اُميدوار کي خود پارٽي جي ماڻهن ئي هٿ وٺي هارايو آهي ۽ جن به تنظيمن ۾ اها صورتحال هوندي آهي ان جو حال نيٺ اهڙو ئي ٿيندو آهي، جهڙو تحريڪ انصاف جو ٿي رهيو آهي.

سنڌ ۾ ته صرف ڪراچي اندر تحريڪ انصاف جو ووٽ بئنڪ نظر آيو هو پر پجاب جي ته تقريبن هر شهر ۾ سندس ڪامياب جلسا نظر آيا هئا، جن نواز ليگ کي به پريشاني ۾ مبتلا ڪري ڇڏيو هو ته هي ڇا ٿي رهيو آهي ۽ سندن پارٽي پوزيشن ڪٿي بيهندي؟ پر مڪاني چونڊن جي نتيجن نواز ليگ کي ڪافي حد تائين مطمئن ڪري ڇڏيو آهي ۽ مستقبل جي حوالي سان سندن ڳڻتيون تقريبن ختم ٿي ويون آهن، ڇو ته عام چونڊن جي ڀيٽ ۾ مڪاني چونڊن جي هنن ٽنهي مرحلن دوران تحريڪ انصاف کي تمام گهٽ ڪاميابي ملي آهي. لاهور جا اهي علائقا جتي عام چونڊن ۾ ڪانٽي جا مقابلا ٿيا هئا ۽ نواز ليگ کي خشڪيون چڙهي ويون هيون، هنن چونڊن ۾ اتي نواز ليگ جي اُميدوارن وڏي اڪثريت سان کٽيو آهي ۽ تحريڪ انصاف جي اُميدوارن کي تمام گهٽ ووٽ مليا آهن، ساڳيو قصو پنجاب جي ٻين شهرن جو به آهي. جيتوڻيڪ تحريڪ انصاف کي ڪافي سيٽون مليون به آهن پر انهن جو ريشو عام چونڊن جي ڀيٽ ۾ تمام گهٽ آهي، جنهن تيزي سان تحريڪ انصاف جو ووٽ بئنڪ گهٽجي رهيو آهي، اها صورتحال يقينن تحريڪ انصاف لاءِ ڳڻتي جو ڪارڻ هجڻ گهرجي، جنهن جو احساس شايد ان جي قيادت کي به هوندو.

اها پنهنجي جڳهه تي حقيقت آهي ته عوام کي روايتي اقتداري پارٽين سخت مايوس ڪيو آهي، ان کي تبديلي گهرجي ٿي ۽ تحريڪ انصاف کي مليل شروعاتي موٽ به ان تبديلي واري خواهش جو عڪس هئي پر پوءِ هن جهڙي انداز ۾ حڪمت عمليون جوڙيون ۽ سياست جي ميدان تي جيڪي رنگ ڏيکاريا، انهن عوام جي اُميدن مٿان پاڻي ڦيرڻ شروع ڪيو. عوام تبديلي کي ته پسند ڪري ٿو پر اهڙي تبديلي کي نه، جيڪا عمران خان آڻڻ چاهي ٿو. هن اسلام آباد ۾ طويل ڌرڻي واري سياست جا جيڪي رنگ ڏيکاريا، ان سنجيده سوچ وارن ماڻهن کي سخت مايوس ڪيو. هن جنهن الزامن هيٺ اهو ڌرڻو هنيو، سندس اهي الزام به گهڻو ڪري غلط ثابت ٿيا. جڊيشل ڪميشن جي انڪوائري سندس الزامن کي غلط ثابت ڪيو ۽ ڪيترن ئي تڪن تي ٿيل ٻيهر چونڊن ۾ به اهي ساڳيا ئي اُميدوار ڪامياب ٿيا، جيڪي پهريان ٿيا هئا. اصل ۾ سياست ۾ سنجيدگي ۽ مستقل مزاجي به ضروري هوندي آهي، ڳائي وڄائي وڏا جلسا ڪرڻ سان ڪير وڏو ليڊر نه ٿو ٿي وڃي. بهرحال مڪاني چونڊن جي نتيجن تحريڪ انصاف جي قيادت لاءِ ڪيترائي سوال ڇڏيا آهن، جن جا جواب کيس پاڻ ڳولڻ گهرجن.